رواية اسألي عني الليالي الفصل السابع عشر 17 - بقلم رقية جاسم

قناة التليگرام

حساب الانستگرام

الـبـارت الـسـادس عـشـر................

وره يومين واكفين وره البيت دنخبز للغدة.. مااسمع غير صوت صياح مال زلم وغلط قوي..عدلنا شالاتنا وطلعنا مخروعات ماندري شكو.. اجه عمي لواء وسالم العصبية تارستهم..
سالم : فوتن جوه ..روحن..
ابتسام : يمة شكو فهمني..ابوك وين..احمد..
سالم : مابيهم شي يمة..
عمي عافنا وراح لغرفته..طلع مغير هدومه وبخطوات سريعة راح للديوانية..بابهه مفتوح طلاگتين.. شفت رائد واكف وبعد كومة زلم يمه..لابس عسكري وكامش المسدس بإيده اليسرى ويصيح..

رائد : يول بگدك انه اسلمك السلاح..انت تسلمني سلاحك لا اشگ حلگك..ماضلت بس الزعط تهوبز بي..
جدو حچه : ايهم ذب الغضب هذا..خلي الرجال يوگفلك لاتماطل ..
ايهم : لا مااسلمه..عندي بس رخصة..
رائد : ليش حضرتك وين تشتغل..هو انت مواطن عادي حالك من حال غيرك..وهسه الامريكان تفرفر بالديرة.. سلم السلاح انه ضابط مايحاچوني..
ايهم : شني اليضمن تردليا..
رائد : طبعا مااردلكيا وليدي..شوف كلك مايطلع عمرك عشرين.. مايصير تكمشه ..

ايهم يصير ابن گرايب جدو .. دائما يسوي مشاكل وابوه يجي يطلب مساعدة.. متهور كلش.. سمعت صوت سحب اقسام.. رائد واكف بمكانه ويحچي ماتقدم..عصام واكف بسده راد يطفر على ايهم ورائد كمشه..
رائد : اصبر هذا مسودن..هسه يرمينا..

ضلوا دقايق بنقاش حاد..احنا كاعدات على اعصابنا.. ابوي والكل يحاچي يريده يسلم السلاح ماكو.. تخبل .. وصدك بهليوم اجه الحارس على جدي كال الامريكان رتل كامل فات للديرة يريد يفتش ع السلاح..بما ان احنا بيت الشيخ فأكيد البيت لايخلى من السلاح بس اكو رخصة ..ع الرغم جدي وعمامي وابوي عدهم رخص بس ماتمشي عدهم هسوالف.. فجدي جمع السلاح وهو عنده مكان يضمه بي كلما يصير تفتيش للأمريكان.. ولو مكاننا چبير وواصل بس مانكدر نوكف بوجههم..عاد هذا الزعطوط شنو ديهوس بي..احس اكو شي وراه مو مال بس سلاح وهيج الهوسة..

ربع ساعة مو اكثر جان تندك باب الديوانية التطلع ع الحديقة البرانية.. مااحس غير رائد ركض على ايهم جر السلاح منه خلاه بخاصرته ولبس البيرية.. فاتوا الامريكان جان يجي قصي..
قصي : فوتن يولن..حيفوتون يفتشون..
سكتنا ..درت وجهي دااروح ندهني..انداريتله..
قصي : دنوة بوية ماتشوفيلي عمر وين بعد اخوج..
دنوة : اي هسه..

تمشيت لغرفتهم لكيته كاعد بالكاع يلعب بالملاعيب ورود كاعدة يمه تخابر صديقتهه.. چا ليش سأل وينه.. رجعت گتله بالغرفة .. كال خوش وراح وياهم..رحت كعدت بالمطبخ.. ومادة راسي اشوفهم شديسوون..رائد يحچي وياهم مافهمت شنو.. بس گعدوا بالصالة المفتوحة ..اربعة سود وبيضان اكثر مااعرف شكثر..فتحوا اكل مسلفن وگعدوا ياكلون.. يمة شعور غريب.. طبينا نكمل شغل عادي وجهزنا الغدة.. هم نص ساعة وطلعوا .. صبينا الغدة واجت الزلم تاخذه..لأن خوان ايهم وابوه وعمامه اجو..احنا كعدنا بالاستقبال ..

مشى اليوم بعيطة وفيطة علمود ايهم..حسب السمعته رائد هستوه نازل من الدوام وهو جدو طالبه علمود يسحب السلاح منه بالتهديد واخذه.. العصرية عفتهم كاعدين بالهول مسوين عصرونية ورحت انام..اخذت حباية مسكنة لإيدي فدخت.. طبيت تمددت وغفيت..

مرت ايام عادية..لاتخلو من رزايل ابوي .. من العركات والمشاكل التجي لجدو.. الچبس باقيله تلث ايام وافتحه.. گبل هلأيام كعدنا كلنا بنص الليل على صوت ابوي يصيح.. من يمي رجفت..يفشر ويغلط..
جدي صاح : لاتفشر منا بنيات حديثات..شمالك خرعتنا بنصاص الليالي..
محيي : اليوم المايگلي منو ناطي تلفون لهاي الملعونة انعل شرف شرفه..
سوى المسافة بيناتنا خطوتين..كمشني من فتحة الدشداشة ويعت بيه..ضرب راسي بالحايط وجرني للغرفة يفتش بكنتوري گلبه گلاب..
محيي : قندرة ادبسززز..اليوم اذا ماطلع التلفون احرگ الدنيا على راسج..
دنوة : بابا والله ماادري شدتگول..ياتلفون عفية..
محيي : اششش ولج لاتصيرين مثل امج..اعرفچن انتن النسوان .. تعاي طلعي..يله..

فات جدو سحبني وره ظهره .. ابوي حتى جنطتي ذب الكتب منهه.. متت خوف بس لا يقره الرسايل مال رائد..هي مابيهه شي بس اخاف..
شامخ : انت ياهو الواشيك عليهه..ماتگم من جدامي..
محيي : صار مرتين اسمع البنيات يسولفن عدهه تلفون.. تعوذت من الشيطان كلت ماعدهه..منيلهه.. يجوز مالت واحد من عدنا شايفاته بيدهه..بس اليوم تأكدت..

تقرب مني صار الحچي بيناتنا انه وياه وجدي.. : عدج علاقة وي العامل بمحلي بت السگط..اليوم اذبحج ع القبلة بس الاگي التلفون الطرگاعة هذا..
متت خوف كمت ارجف..حضنت جدو قوي ومچلبة بدشداشته : جدو والله ماادري بسالفة التلفون وروح امي..
ابوي اندار على عمامي وجديتي بباب الغرفة واگفين : روحوا لاتدخلون انه وبتي..
طلعهم ورگع الباب..نزلت كعدت بالگع بعد مااكدر اوكف ضغطي هبط من الهبطة..كمت اشوف غواش.. هو ديدور ومشغل الأضوية كلهه..جدو يحاچي يريده يبطل ويقنعه ماعندي شي..

دقايق فصلت بين الشك واليقين..لحظات صار نطق حرف واحد صعب على لساني.. تشاهدت بگلبي ودافنه روحي يم جدو.. فوك الكنتور اكو مكان بگد حجم المسدس مثل الحفرة.. ابوي جان اذا صار تفتيش يخلي سلاحه هنا..مد ايده علي وعگد حاجبه..صعد ع القاعدة مالت الكنتور وجره.. تلفون صغير اسود..فتحه ويگلب ماادري وين .. بس اسمع صوت الدخول ع الايقونات.. جدو نزل راسه عاينلي بنظرة مستغرب..
شامخ : شني هذ دنوة..من وينلج..
جاوبته وبالگوة اجمع الأحرف : جدو مااعرف والله وداعتك مااعرف حالي حالك..
هو مستمر يگلب جان تدخل جديتي..دگت عوچيتهه بالگع : محيي يمسودن شمالك وي البت..

محيي : يمة عدهه علاقة وي العامل مالتي..وج هاي عار .. خزي بهذلتني بهذلت شيباتي..
الحجية غادة : وانت شمعرفك إلهه..
محيي : انه عرفت بطريقتي لاتضوجيني حجية..

دگ على رقم مااعرف المن وفتح حاكية..اول ما جاوب گال : الو حبيبتي..
شهگت وخليت ايدي على حلگي بخوف..كمزت من مكاني رحت يم جديتي..حاوطتني بإيدهه ..
سكتنا ماحچينا..رجع حچه : عمري دنوة تسمعيني..
لو انذبح قطرة دم ماتطلع مني..كمت ارجف وانخض بشكل هستيري..
محيي : حضر چفنك يانغل اليوم ابوك احرگه..

سده منه ورگعه بالگع..كمشني من زندي ويضربني حيل راشديات ودفرات..ماگمت أميز منين دتجيني الضربة.. الى أن اجتني ضربة على ظهري..حسيت گلبي طلع صار بيدي.. كمت اگح طحت چفي على وجهي..تركني وطلع يصيح ويغلط.. جدي طلع وراه واسمعه يگله وين تطلع بنص الليل انت مخبل.. انه بس كاعدة وابچي .. ماادري من الموقف لو من الكتل الأكله..اجت سرور وخالة ابتسام .. شالني واخذتني سرور للحمام غسلت ..رفعت راسي ع المراية.. طرف عيني ازرگ وشفتي طاگة دم..

رجعتني للغرفة.. حضنتهه قوي : سرور لاتعوفيني.. حبابة ابوي حيموتني ولج ماادري شصار والله ماادري.. شلون هسه شقنعه..مااعرف اكو تلفون اصلا صدگيني..
مسحت على شعري : ادري حبيبتي..ماكو انظف منج .. بس مالمن چا..الا اذا جان اكو وحدة حية سوت هيج..
دنوة : مااعرف..مااريد اعرف..بس عفية ابوي خاف يسوي شي ادور يفوت سجن شلون..
سرور : لاتخافين راح ابوي وراه وعمي لواء هماتين.. هسه يردونه .. نامي الصباح رباح ..
دنوة : ليش هم ضل نوم..

اجت خالة ابتسام جابت ثلج خلت على عيني وتفركلي بزندي.. كمت أون من الوجع وحرارتي فولت.. ابوي اجه يصيح ويغلط علي.. كال باچر اتصرف غير تصرف وياج ..اما بالنسبة للولد فماسمعت شراح يسوي بي..ضليت ألوب بالفراش .. ماكدرت اغفى للفجر .. سرور كاعدة يمي خطية ماغفت الا لمن غفيت عفتهه گاعدة ماادري شصار..

ثاني يوم الكل ثگيل وجهه علي..حتى جدي..حقهم بعد السمعونه حتلو جان عدهم ثقة تامة بيه بس بهلموقف ماتفيد الثقة .. كمت غسلت ورجعت للغرفة مالكيت التلفون.. ابوي أخذه ماكو غيره.. للعصر جان تنفتح باب الحوش طلاگتين وفاتت سيارة ابوي هو وعمي لواء وقاسم صاعدين وياه.. ركضت للغرفة وقفلت الباب.. لاطشة إذني عليهه اسمع شسوى .. لأن قريبة ع الديوانية فينسمع كلشي..

شامخ : ها يول يعني سويتهه صدك..
محيي : اصلا ماهو ابن المناعيل.. اي طبعا .. رفعة راسي گلتله اشرد بوية حيجيك ابوي..امدا لحظي الجابلي خلفة شهلاء..
شامخ : انت ولا تجوز..بوية هسه السالفة شني غرضهه بشهلاء.. گلي وينه هذا الدماغ سز..
محيي : ابو هاشم (شريك ابوي بالمحل) يكول من البارحة هو ماكو.. اخذت عنوانه ورحتله ..طلعتلي امه ع العرباية مال مقعدين..كالت ضياء ماراد للبيت..
لواء : الولد فص ملح وذاب..اتركه هسه .. هو طبعا يشرد يخاف منك..عوفله الساحة فارغة ويردلك برجلي..
محيي : چا اعوفنه..شبيه تسودنت.. لا أملخه تملخ بس خلاكمشه..بوية مااريد السالفة تطلع .. حتى كاظم وفيصل مااريدهم يعرفون..

ضياء..اول مرة اسمع بهلاسم..اووف هسه هاي البلوة منين اجتني..حظي المصخم الملطم.. ضليت كاعدة وادعي ربي تعدي الايام هاي على خير..

مر اليوم والوراه .. ورود حتى ماحاچتني..هي جانت كلما ابوي يرزلني تجي تگلي انه بريشة طير ماانجاس.. يعني تتشمت .. حتى سرور ونوارة لاحظن عليهه.. بس البيت بهلفترة صار كلش هوسة..ولد عمام ابوي اجونا هم ونسوانهم.. دخت منا هذول ومنا السالفة ما هذا ضياء مااعرف شسمه.. ابوي متحلف بس يكمشه يدخله سجن ويلفقله تهمة.. يستاهل چي ذبهه براسي بس خايفة..

باليوم الثالث اخذني عمي قاسم وقصي للدكتور فتحلي الچبس ورجعنا..طول الطريق ساكتين ماحچو وياي كلمة وحدة.. ايدي شكلهه اختلف عن الثانية صارت أضعف بس كال ترجف طبيعية وي مرور الايام..

مرت عشر ايام محبوسة بين المطبخ والغرفة..مااحچي وي احد بس التقي بيهم وكت الشغل والخبز..خلال هلأيام ماشفت لاجدي ولا ابوي.. ابوي بشغله ويدور على ضياء ماله أثر.. وجدو ملتهي بمشاكل الناس..أجاه واحد شاب يحب وحدة بس أهلهه مايقبلون ينطونهه..هو عود رايد يحلهه وياخذهه.. گايم داعمهه بالسيارة..ادور عشيرة البنية طالبين فصل فراح جدو وعمي كاظم وقاسم وياه..بالأخير جدو گايل الزلمة نخاني وماارد واحد مكسور..وماطول دعمهه خلي الفصل زواجهم وكان الله يحب المحسنين..بما ان جدي الشيخ الچبير يعتبر فمايردوبه طلب وتحددت المشية..وهاي هيج ضل من شغلة لشغلة..

وره هلفترة كعدت بالليل عرگانة كلش..تمشيت للحمام أغسل شفت الضوة مطفي ..الباب مفتوحة بشكل خفيف.. واكو صوت همس مالت بنية.. ركزت بي..صوت ورود..ضليت واگفة اسمعهه..
ورود : حبيبي ديربالك ارجوك..عمي بعده يدور عليك وكل يوم يتحلف بيك.. لا محد شك بيه ابد..اي لازم اخذ احتياطاتي چا شلون..يله انتبه لنفسك فدوة باچر اخابرك..مع السلامة بيباي..

عاينت ع الباب ماصدومة..ياحقيرة يانذلة..الله يموتج واخلص منج..تكرهني ادري بيهه..ركضت للغرفة ماخليتهه تشوفني.. اذا حچيتله لأبوي مايصدك..شلون اقنعه وشسوي.. لازم أبري روحي..الكل زعلان مني وماخذ نظرة غلط عني من وره هلملعونة.. باچر اسولف لسرور ونوارة اكيد حيساعدني.. من الصدمة مااجاني نوم لوجه الفجر..صليت ودعيت ربي مايخيب ظني لأن مظلومة.. وراهه غفيت..

ثاني يوم كعدت مشدوهة كل الأريده يعرفون هي الغلطانة مو انه.. بريئة وماعندي هيج سوالف ..واكفين وره البيت من الصبح دنخبز..انه واگفة ارفع القبق ..اجت سرور ندستني..
همست : شبيج حبي..
دنوة : هسه نفوت واسولفلج..اريد تساعديني..
سرور : تدللين بس نكمل..
ضلينا لحدما كملنا وطبينا..صحت سرور واخذتهه وياي لوره البيت عود نرجع الغراض لمكانه..
دنوة : سرور البارحة سمعت ورود تخابر واحد..تگله عمي بعده يدور عليك..ديربالك على نفسك..

سرور : عززززه..چذابة..صخام..هاي الحقيرة عدهه تلفون .. الله يكسرهه شگد خبيثة..
دنوة : شلون ولج ساعديني لاتضلين تحچين..حتى امج ماتحاچيني وانه مامسوية شي..
سرور : شوفي اليوم انام يمج وانطي خبر لأمي.. اگللهه ابقي كاعدة.. هسه اكيد تخابره ..
دنوة : اي هي كالت باچر اخابرك..
سرور : يله چا خوش..معلونة بگد النعال وتسوي هيج.. والله يالله.. انه إلهه ..

ضلت تحچي عليهه وتعيب..ضحكت عليهه..تستاهل بسيطة اليوم يبين الحق.. العصر اجه ابوي من شغله.. ماعاينلي حتى ماراد اكل من ايدي..شفت خالة فاطمة قدمتله الأكل اكل منه شوي وگام..ماياكل بس مني..انه اعرف شطبخله.. دومك ظالمني.. بس هلمرة انه أبين الصدك..

بالليل اجتني خالة ابتسام جنت بالغرفة داانتظر سرور تجي يمي ..
ابتسام : خالة صدك هلحچي..تره عيب وحرام تتهمين بنية بريئة..
دنوة : خالة ماعندج ثقة بيه ليش..تصدگين بورود وانه لا..
ابتسام : مو هيج امي..بس اليسمع يگول تريد تبري رويحتهه وهي خاطية (غلطانة) ..
دنوة : اليوم تتأكدين..
زفرت انفاسهه بقلة حيلة : يله ماما ميخالف..هسه تجيج سرور..
دنوة : ماشي خالة..

راحت وردت الباب وراهه..رحت ع الكنتور اول مافتحته صارت ريحة العطر الجابليا رائد بخشمي.. استشقته بكل حواسي مو بس بالشم.. بروحي وعقلي .. لو هو موجود حيوگف وياي مايصدكهم اكيد..

سمعت الباب انفتحت..سديته ودرت وجهي اجت سرور.. ضلينا كاعدات .. كلساع أمد راسي اشوفهه بلكت طلعت.. غرفتهه فوك فأشوفهه من تنزل.. والله وگبل أذان الفجر اشوفهه تتلفت وتركض للحمام..تانيتهه تدخل ورحت على سرور جريتهه ورحنا وراهه.. نفس القوانة مال بارحة حچتهه.. حبيبي واريدك وحچي وصخ..وانه رائد خبلته يله گلت احبك.. شكد فطيرة .. راحت سرور صاحت خالة وانه دفعت الباب عليهه وفتحت الضوة.. تخبلت ..ماتوقعتني اسوي هيج.. اجيت اخذت التلفون منهه ..هي هلگد ما خايفة اعصابهه كلهه مرتخية.. بس جريته انجر..
ورود : د..دنوة ششدسوين..رجعيلي التلفون..
دنوة : لاحبيبتي خابت ظنونج..تردين تبليني وتطعنين بشرفي..
انه واحچي وياهه اجت خالة ابتسام..اخذت التلفون خلته على إذنهه..
ابتسام : نعم.. انه ام ورود منو حضرتك..
وخرته وگالت : سده بوجهي..ليش خالة تتهميهه مو خطية.. ماخفتي ربج..
ورود : عفية شدتحچون انتم..ماعندي هيج شي..هاي هي دنوة وتريد تذبهه راسي..

ابتسام : امي شنو شايفتني دابة وماافتهم.. گومي طلعي ابوج يتصرف وياج..انه مااتدخل هم عندي بنيات وأخاف الهوى الطاير بيهن..
جريتهه وطلعتهه..گامت تعيط وتهمش بيه .. عمي لواء وقصي نزلوا من فوك بالعجل .. الكل گعد..ونفس الموقف الحقير الصرت بي ..هسه افتر الدولاب وهي صارت بي..تستاهل وماانقهرت عليهه بگد النمنمة..

ابوي انتبه ع التلفون بإيد خالة : لج قندرة هذا مو التلفون الشفته بغرفتج..
دنوة : بابا مو مالتي..مو مالتي وروح امي..شگد حلفتلك ماصدكتني..
ابتسام : خوية ابو دنوة..التلفون مو لبنيتك.. طلع لغيرهه..
گالتهه وعاينت على ورود..
فاطمة : لا عيني شدتقصدون..تردن تبلن بنيتي..ليش ماتخافن الله..
لواء بصياح : روحي لاتدخلين..
اجه على ورود كمشهه من شعرهه : التلفون الج..
ورود : لا والله مو الي..والل...
سرور : شالج الله حبيبتي..سهل هيج تحلفين بالله.. عمي انه سمعتهه بإذاني وهاي امي ودنوة..مانكفي شهود.. وحتى الولد جاوب امي گللهه ورود وينج..هي گلتله انه ام ورود تفضل.. يعني شنو معناتهه هاي..

رجع عاط بيهه.. وجرهه حيل : احچي بت النعال..
ورود : اي الي اي..بس لاتجر شعري فدوه..
ضربهه راشدي فر وجهها..درت وجهي عاينت لأبوي بنظرة انتصار ووضوح الحق.. الكل نظراته تغيرت تجاهي ورجعت طبيعية.. نفسهه النظرات اللاقيتهه شفتهم ينظرون لورود بيهه.. ع الاقل بغلطة مو مثلي بدون..

ضلت تصيح وتعيط..قصي وعامر تخبلوا عليهه.. بس عمي ماقبل يدخلون..گال انه ابوهه موجود مامتت.. أخذهه سحل فوك ويضربهه راشديات..درت وجهي مااريد اتشمت.. بس مي بارد نزل على گلبي.. قصي وعامر من فشلتهم بأختهم حتى ماعاينولي..مااريد شي ولا اريد يعتذرون..بس اريد المظلوم ياخذ حقه واخذته.. شواي واجه عمي لواء يلهث.. فات للحمام يغسل ..خالة فاطمة واگفة يمه وتهدي..
هو يصيح ويتوعد : الكلب النذل هذا انه اذبحه هلمرة مو محيي.. يدور بعرضي الا اطشر راسه..

عفتهم بهوستهم ورحت وي سرور ونوارة فوك لغرفتهن.. سدينا الباب وگعدنا.. شوي شوي بلش يروح الصوت يعني الكل نام..
سرور : حيل تستاهل الحقيرة هاي..
دنوة : اي تستاهل..بس كافي مانريد نتشمت ختولي.. المهم وجهي رجع ابيض..
نوارة : اي حبوبة هو انتي وجهج ابيض دوم تخسى هاي التافهة تفشلج..
دنوة : حبيبتي ابوس راسج.. هههههه ..
ضلينا كاعدات ساعة تقريبا وغفينا..

ثاني يوم رجع كلشي لمكانه الصحيح..صبحت عليهم وكلي ثقة وراس مرفوع..جدو باسني وعاينلي بنظرة حنينة.. عرفته شيقصد.. جديتي هماتين.. عامر وقصي على موقفهم فشلانين.. عدنا هلشي كلش چبير..ويستحق اقسى العقوبات.. خالة فاطمة وورود كاعدات على صفحة ويتهامسن.. گبر ولا كالت اعتذرلهه..سخيفة مصدگة روحهه عود.. وره الغدة كاعدات كلنا بالمطبخ..شي يعزل..شي يصفي الجدورة.. انه واگفة اغسل مواعين..من كلامهم عرفت عمي رايح لبغداد هو وقصي وعامر..لاگي الولد وكاتله.. ماخذ السيمكارت كاسره ومهدده مايوصللهه بعد.. البنية اذا رادت تسوي شي محد يمنعهه.. فالمفروض الهه يگللهه لاتوصليله بعد ..

مشت أيام طبيعية..دخلنا للشهر التاسع..الجو بده يكسر خصوصا بالليل.. رائد عرف بالصار اجه يمنا وسولفتله من مكاننا المعتاد..الشباچ..كال عوفي الوضع يبرد مايصير اشوفج بعد..بالأول ضجت..عبالي مايريدني بعد.. بس فكرت بيهه.. صحيح وكلام منطقي.. شفته مرتين بس وراهه بس اسمع بي جاي..وجياته خفيفة.. الشي الحلو الصار بهلفترة هو خطوبة يونس.. ابوي راح هو وعمامي وجدي ويونس.. بالمشية مال زلم.. وبيوم الخطوبة راحو اهله هماتين..

وره عشر ايام تقريبا سوو حنة مال زلم ببيت عمي فيصل.. انه وسرور ونوارة بدلنا وعمو قاسم اخذنا لبيت عمي والباقيان يجون ورانا..قريبين فتمشينا.. وبطريق مشيتنا شفت رائد نزل من سيارته لابس دشداشة ولاف شماغ على راسه.. تلگاه يونس يضحك وحضنه.. ياربي هلرجال بكلشي يوگفلنا.. خطوبة عرس عزة صخام..كلشي.. ابتسمت علي شكد حلو طالع.. طبينا وعمو گال نص ساعة ويجن النسوان.. ماانتبهت على كلامه .. تفكيري يم رائد طالع يخبل ..

طبينا وي شيماء مرة عمي ساعدناهه بالأكل..
اجت سرور تغني ..گرصتني من ايدي..
گمزت : وجع سرور حقيرة شكد تگرصين..
همستلي : ولج وين شاردة..ندري الزلمة طالع حلو..
خليت ايدي على گلبي چن واحد حيتخربط : اي ولج حموت من الجمال..وخري وخري الله يحفظه حبيبي..
سرور : ها صار حبيبج..صبري الا افتن اليوم دواج يمي..
دنوة : ايا حقيرة..ولج صبري..
راحت سريع ..ضليت اضحك عليهه واصيحهه تجي.. وراهه بشواي واجن خالة ابتسام وفاطمة وورود وجديتي.. جدي والزلم موجودين من العصر..

ضليت افرفر وياهن هنا وهنا..لحدما گالوا حيرگصون چوبي.. المطبخ صاير بالواجهية والطرمة والحديقة جدامه چبيرات كلش.. طفينا الأضوية ووگفنا وحدة بسد اللخ نشوف .. ابوي والكل موجودين..الدنيا ليل وبس الأضوية القوية مشتغلة مالت الحديقة .. انتبهت على رائد فتح الشماغ لفه على خشمه وحلگه ورجعه ليوره..
سالم صاح : يول ليش سويت هشكل..
رائد : يابة باردة شني..بعدين غير انه حكمش الدبچة..
يونس : انه معتمد عليك خوية..مااعرف للچوبي..
رائد : طاح حظك خزيتنا..چا انه العريس لو انت..
عامر : بوية يگلك رائد يخابرونه من العمارة يكمشلهم الدبچة.. يعني رجال عنده انشغالاته..وانت اجاك بلاش بعد شتريد..
يونس : اووي حبيبي صدقة لربك..يؤبرني شو مهضووم..

الكل ضحك حتى احنا..
عاينت على سرور : ولج هذا مو بي نزاكة اكثر منج..
سرور : ههههه..ليش عيني شبيه انه..اصلا انگط نزاكة..
نور : ولچن اخوي يشاقة شمالچن يولن..
دنوة : اي ادري ..دااسولف شمالج خية..

فزينا عليهم شغلوا المسجل..وگفوا واحد بسد اللاخ ورائد بالبداية مقابيلي .. يمة گلبي ماع..شكد حلو طالع.. عيونه سود ليل وحواجبه ثخان وطوال هماتين سود.. هو واكف أولهم ويونس بسده بعدين متسلسلين وراه.. مد راسه ماادري شگللهم وارتفع الصوت.. بالأول حركاته هادئة وبطيئة.. بعدين سرع ويدنج بجسمه ويرد يصعد.. انغرمت بحركاته .. عيوني مركزة بس علي ماشفت غيره.. كومة زلم كلش هواي بس هو بارز بيناتهم.. خبلهم لمن سرع .. كامش السبحة بيده وچن هو يوجههم .. القلق بالي شلون الشماغ مانزل من خشمه.. عبالك مثبته بدنبوس.. افتروا وي دبچتهم لحدما خلصت الفرة ورجع لمكانه.. طفوا المسجل وهو نزل الشماغ .. شفته ضحك وراح تمشى يمهم.. گعد ع الكرسي جابوله مي..
يونس : رفعت راسي ابوس راسك يمعود..
رائد : ايباااخ..تدلل يول غير ابن عمي..

همست لسرور انه وادير وجهي : ولج گلبي يمكن جلطة.. وخري خلاروح..
عفتهه ورحت گعدت اضحك على روحي..صدك طالع شهم الله يحفظه.. بقينا كاعدين سوو عشة للنسوان..بعدين بلشوا يطلعون الزلم..رتبنا البيت وياهم واجه عمو قاسم يرجعنا..
گال : يله بوية كلهه رجعت..انتن البنات تكيفن ع الگرگ..
دنوة : ليش عمو شسوينا..
سرور : بابا اشو احنا ساكتين..بس الزلم طلعت هم تحچي هواي..
ضحك هو ويفر بالسويچ .. : يله بالعجل..
البنات طلعن بقيت افتر ادور ع العباية.. شافتني مرة عمي مشدوهة وأدور على شي ضايع..
شيماء : شضايعلج حبيبة..
دنوة : عبايتي ماكو..شفتيهه..

شيماء : روحي يم غرفة البنيات هسه تلگيهه هناك علگتهه ع الشمعة..
دنوة : هسه اشوفهه..

تمشيت لغرفتهن .. بين الغرفة والحمام حايط ماكو غرفة لخ.. فاكو مغسلة.. شفت رائد واكف يغسل وذاب حيله ع المغسلة.. شامر الشماغ شمر على چتفه..تلفت يمنى يسرى.. تقربت منه.. انتبهلي ودار وجهه..اصفر كركم ..
حچه بصوت ناصي ويلهث بتعب : ها يابة..
دنوة : شبيك.. مريض ..
رائد : مااعرف بس تعبان..لازم ارد للبيت مااگدر أضل..
دنوة : ماتگدر تسوق بهيج وضع..
رائد : خابرت محمد حيجيني..روحي لايجي أحد يشوفج..
دنوة : شلون ضل بالي عليك..
رائد : لاتخافين ماكو شي..
تمشيت اخذت العباية..اريد اروح وگلبي ماينطيني.. روحه لعبانة چنه يريد يستفرغ.. هستوه مابي شي..

ردت أضل يمه بس الفززني صوت سرور..
سرور : هاي وينج يمعودة ابوي خبصنا..
دنوة : ها اي اي اجيت..
راحت..انداريتله : اخذ دوة حباب..
رائد : ان شاء الله ابوية..
تمشيت ورحت بره..رجعنا عمو وراح.. طبينا نظفنا البيت وكلمن راح لداره..

...........................................
رائد ......
...........................................

طلعت من المقر خلص الدوام..اول ما صعدت السيارة ذبيت البيرية ورحت لأقرب صيدلية اشتريت شريط وجع راس.. رجعت للسيارة لگيت امي مخابرتني..رديت دگيت عليهه..
جاوبتني مفرفحة : الو وليدي وينك ضل بالي..
رائد : هلا بيج حجية..
الحجية : شونك يوم..گلبي ناغزني عليك من الصبح.. اليوم اجازتك مو..
رائد : اي يمة شبيج خابصة روحج..مابيه شي.. حروح لبيت خالي وثاني يوم الصبح اطلع..
الحجية : زين شونك خوما مريض..
رائد : لا مابيه شي لاتخافين..بس اروح اغسل وارتاح .. عود اخابرج لايضل بالج..
الحجية : انت ماتحچي ادري بيك..بس يله ان شاء الله هيج.. من ترتاح خابرني خاف انسى..
رائد : تأمرين.. سلميلي على ابوي..
الحجية : واصل حبيبي..

ودعتهه وسديته..رحت لبيت خالي محسن..اذا ارجع بنفس اليوم اسوي حادث .. لأن يومين ماشايف الفراش.. الوضع فالت حيل وانه ضابط بالدفاع يعني العبئ ضعف.. طبگت السيارة بره ونزلت دگيت الباب..بس لا تطلع هاي.. مالي خلگهه.. ضليت نص ساعة واگف .. مديت ايدي فتحته وطبيت جان تنفتح باب الكليدور طلعتلي جوان تضحك..
جوان : هاي اجيت..تعال تفضل..
اكو بلوكات ثنين بالركن..رحت گعدت ومدنج افك القيطان.. : اي صار هواي بالباب.. منو بالبيت ..
جوان : اني وماما وبهاء..
رائد : خوش سويلي مجال اريد انام..
جوان : محضرتلك الغرفة..ادري حتنزل اليوم..
رفعت راسي عاينتلهه بخزرة : وانتي شمدريج.. شني حاسبتلي.. بوية لاتدخلين چم مرة منبهج..

جوان : هاي شبيك ويايه.. فوگاهه..والله صدك سوي زين وذب بالشط..
رائد : ديله ميلي عني..
عافتني وراحت لأمهه..طبيت سلمت وسبحت بعدين نمت ماادري بالدنيا حتى مااكلت.. كعدت على صوت مخلد واركان ..
مخلد : گوم ياب شو احنا مانشوفك بس تنام..
رائد : قابل انه مثلك يول..الدنيا كلهه على راسي..
اركان : دعوفه هسه حاسده ع النومة.. هسه يزوج شينيمه بعد.. حتى الزعاطيط تگعده ..
رائد : والله انتم بمكان الزعط ياسرسرية خلاتهنى بنومي..

طارت النومة فگمت وياهم..بدلت وطلعت تعشيت بره.. رجعت بالليل كعدت وي خالي شوي..بعدين راح ينام..ضليت كاعد ع التلفزيون..دگ تلفوني.. يونس ..شلته..

يونس : ابو الشباب حبيبي شلونك رئودي..
رائد : هلا بيك بوية..الحمدلله وانت ..صحتك..
يونس : بخير خوية..
رائد : شعجب هسه تخابر..اكو شي..
يونس : عگبة الحنة مالتي..فاريدك تحضر.. بعد انه اهوبز بيك يم نسابتي..بس خاف بالدوام انت..
رائد : لا نزلت اليوم..شسالفة حتلو بالدوام اخذ طوارئ واجيك.. شوكت تسويهه..
يونس : العصرية غير..وانت شوكت عندك مجال تعال..
رائد : تدلل.. اجيك ماعندي شي..
يونس : حبيبي ماتقصر..يله اخذ راحتك خاف ضوجتك بالليل..
رائد : يول لاتمسلت شعندي بهلليل قابل..
يونس : اندري..بلكت حبيبة منا منا..
رائد : ههههههه..دمشي يله ..

سديته وگمت .. نسيت اخابر امي..يله هو انه نازل باچر.. درت وجهي لگيت جوان واكفة بالباب.. شلون اعاينلهه وانه ببالي غير وحدة..رحت يمهه..
حچت بصوت انوثي : شو گاعد عيني..
تچيت ايدي ع الباب ورافع حاجبي : هسه اذا حچيت حچاية أحد يلومني.. ماتخافين على روحج جاية يم زلمة بگدي.. حتى اكبر من خوانج..ادور انتي..
جوان : ليش قابل شحتسويلي..
رائد : الشيطان قوي والبشر مامعصوم..
جوان : بس رائد ...
رائد : لا بس ولا صخام..انه ماشايف واحد خايفين علي وهو ماخايف على روحه..
بچت لمن گتلهه هشكل : ليش تحاچيني هيج..
رائد : احسن..يله يابة روحي لغرفتج ..

عفتهه ورحت للغرفة..تمددت لحدما نعست وغفيت.. كعدت الفجر بدلت ..جان خالي گاعد.. ودعته وطلعت للبصرة.. شكد عشت ببغداد..بس البصرة تختلف.. روحي بيهه.. ببيت جدي.. يم الشباچ..صار شكد ماشايفتهه.. خايف عليهه من أبوهه .. ماصدگت شفتهه ادور يريد يزوجهه لعقيل.. اعرف سوالفه وحدة وحدة.. لمن نهيت عليهه هو اجاني لبيت ابوي يريد يتعارك.. گتله اوكف ولاتمسلت..تشرب وابو نسوان .. اطلعهن يا مايحتاج.. رأسا انسحب وولى.. مرة شفته يم واحد يبيع باجلة شارب وريحته تلعب الروح..حچيت وياه وخرطلي كلشي.. فطلع يشرب من زمان بس مايدرون بي .. وانه رجال فطن ماتفوتني الطايرة.. هددته وراح ..

وصلت للبيت ومشى اليوم طبيعي.. ثاني يوم العصر لبست دشداشة وطلعت الشماغ واگف جدام المراية ألفه.. اجه ابوي وامي تبعته..وكفت تصلي علي وتتعوذ..
رائد : حجية شكو قابل..
الحجية : لا عيني اخاف عليك..دشوف طالع چنك جمارة..
حامد : شعندك رايح..انت ماتجوز منهم..
رائد : مامسويلي شي يابة..انه زلمة ماادور مشاكل..
حامد : ضل هيج..الا يسوولك شي يله ترتاح..
الحجية : ايييه..يعيني ليش تحاچي هيج..اصلا كلهه تحمد بي وبزيناته..
حامد : هذا هو..براحتك..

ادري بي يكرههم..ماگدر يزرع الكره بداخلي.. بس محمد واخلاص يكرهوهم مثله.. مقدر وضعه واعرف السبب .. بس بالأخير انه ماشفت منهم الشين..

كملت واخذت السويچ وطلعت.. صار شگد ماحاضر مناسبة .. مر الوكت ووگفنا علمود الچوبي.. انه واگف بالركن من يم المطبخ وادري بيهه واكفة مقابيلي.. ضوة الحديقة عاكس ع الجامة بس بشكل خفيف..اويلي بنيتي شكثر مشتاگلها.. لهيت روحي لحدما كلمن طلع لبيته.. شو ماادري ليش لعبت روحي وراسي صخن.. گمت ع المغسلة اغسل .. اهجس روحي مضنوك ومختنگ من زردومي.. حتى النفس بصعوبة اشمه.. خابرت على محمد بالعشر مرات يله جاوبني..
بس جاوب انهديت بي : عار صار ساعة ادك عليك..
محمد : ها شبيك ياستار..
رائد : تعال بتكسي لبيت عمك فيصل..مااگدر اسوق ..
محمد : ليش شبيك يمعود خوفتني..
رائد : ابوية لاتعبني مالي حيل احچي..
محمد : يله هسه جايك..

عفته وضليت واگف متچي روحي ع المغسلة.. حسيت بيها اجت.. تدنتلي .. العطر الجبتلهيا مخلية منه.. فوگ الدوخة الدااحسها ادور وجودها دوخني اكثر.. اجت يمي وكل نظراتها بريئة..حتى لمن چانت تكمش ايدي ادري ماتحسب حساب للأحسه .. راحت ووره روحتها بدقايق اجه محمد.. اخذني ورجعنا للبيت.. ماگلت لأمي بس محمد ماقصر..مثل الدلالة يطش الخبر..

نمت هلكان وراسي يوجعني وجع مو طبيعي..كعدت بنص الليل لگيتها يم راسي تسويلي كمادات .. بس گمت حسيت بـ لوعة بمعدتي عصرتني.. رحت للحمام كمت استفرغ .. ماكثرت بالأكل بس مااعرف.. رجعت للغرفة شوي احسن راحت اللوعة وارتاحيت.. تمددت وأمي يمي تقره على راسي..
كمشت ايدها : حجية روحي نامي..
الحجية : لا ييمة غير گلبي گلوطني عليك.. شون صرت..
رائد : احسن هسه..روحي ارتاحي..
باست راسي ووصتني ع الادوية وراحت.. شگد چبير وعمري حيخش الـ٣٥ بس تصرفاتها تحسسني بعدني مراهق.. اخذت الأدوية وجريت التلفون.. لگيت رقم غريب داك علي.. منو هذا.. عدلت نومتي ورجعت اتصلت..
اول ما انفتح الخط صوتها اجه بإذني : رائدددد..
رائد : دناوي..
جاوبتني بإرتباك متعود علي : اي..شلون صرت..
رائد : احسن الحمدلله.. عاينت ع الساعة..بتلاثة الفجر.. گتلها : ليش كاعدة هسه باباتي..
دنوة : اي مو..مو يعني غير خفت عليك شفتك تعبان ومتضايق.. فحبيت اسأل..
رائد : ههههه..يروح روحي..زين لاتخافين.. يمكن الأكل بي شي مااعرف.. المهم هسه احسن..

دنوة : زين ماشي..حروح انام..
رائد : صبرچ علي يولي..مشتاگلج ..
دنوة : اهو..استحي..
رائد : هههههه..اويلي الله.. ميخالف فهمتج .. ردت احچيها .. فتحت سالفة : دناوي..تعبان..
شهگت : ليش اسم الله..روح دكتور باچر..
رائد : لا لا..انه يم السمر ارتاح..
دنوة : ااممم..عود شتقصد يعني..
رائد : حبيبي حسي مايساعد اغنيلج قولي احبك.. بس يله.. گولي احبك يولي شلعتي گلبي..
دنوة : ههههه..لا اسم الله على گلبك.. مو يعني.. اامم.. احبك..
رائد : اويلي يبعد عگلي وروحي.. روحي نامي بنيتي.. نوم الهنا..
دنوة : يله بيباي..

سديته وضليت اتگلب اتفطن بيها..أول نظرة نظرتها عيوني لهلإنسانة جانت صغيرة..احبها من صغرها.. اجي من دوامي اسمع امي تسولف بيها..اضل واكف اسمع شمسوية لحدما تغير الموضوع واروح..شگد صبرت..ولو ماشايفها بذاك اليوم هم چا صبرت بس لأجل اشوفها.. انه كتوم ومااحب احچي بس بروحي اگول باليوم الاشوفها بي عيوني حتحچي كلشي.. وحچت .. بس مو كلشي.. البداخلي اكثر ..

ثاني يوم شفت روحي احسن..بدلت ورحت وياهم علمود زواجة يونس وهوسة..راسي صار طبل..الظهر اجاني يونس .. انه واكف بالشمس داانزل الكراسي وي سالم وعصام.. كمشني من چتفي..
يونس : خوية سمعت بيك مريض..اترك كلشي من ايدك فوت ارتاح اخذلك حب وجع راس..
رائد : لا يابة زين اليوم..منين سمعت..
يونس : امي كالت..
رائد : لا لايضل بالك..والولد هنا هماتين ديعاونوني.. روح خش جوه يول لاتسومر ادور تشرد المرة..
يونس : لا ماعوزها والله تشرد..يالله كمشتها..
كلها ضحكت..ضل واگف ويانا بين ما كملنا..

العصر جهز كلشي تقريبا.. عفتهم ورجعت للبيت اغير هدومي.. طبيت سبحت وطلعت اشوف ابوي مغنتب ماراضي على روحتي..تركته لأن ماكو شي غلط.. لكيت عارف صاحبي داك علي.. خابرته..
عارف : ها يول وينك..
رائد : موجود..گول شكو..
عارف : والله گلت اعزم روحي لعرس ابن عمك.. شمالك غير يونس عزمني ومااندل بيتهم..فانه جايك لبيتكم ونطلع..
رائد : يله خوش ماطولي بالبيت..بالعجل ..
عارف : يله مااتأخر..

شمرته ولبست بنطرون كتان اسود وقميص ابيض.. دنجت اسوي الحذاء..اجه ابوي گعد يمي..
حامد : گللها لأمك لاتبطي..انه ماگتلها خطية خاف تنكسر نفسيتها..
رائد : اي ماشي قابل شعدنا..وهناك مايطولون ..
حامد : يله خوش..شوكت تعرس انت..حتى الأصغر منك تزوجوا..
رائد : هلفترة ادز امي تمشي بيها..
حامد : بوية شچلبت بالبت..مو نصيبك..
رائد : انعل ابو النصيب..نصيبي لو تنطبك السما ع الارض.. انت بس تجي وياي بيوم المشية وهاهيه..
عاينلي بقلة حيلة..انه طالع علي بكل اطباعه.. فيدري بيه اذا ردت شي اسوي.. الكلية العسكرية گال اتبرى منك اذا دخلت.. ماسمعت ورحت قدمت وطلع قبولي وتقبل الواقع..

حامد : يله ميخالف كلشي لخاطرك يصير..بس ها.. اجي كلشي مااسوي.. انت احچي ..
رائد : حاضر.. كمت وكفت ارتب شعري واحاچي : ماگتلي شلون طالع..
حامد : الله يحرسك بوية..شون طالع طبعا حلو..
ابتسمت واخذت السويچ..اجه عارف وامي محضرة روحهه.. اخذتهم وطلعنا..

مشى الوكت بهوسة العرس..مالحگت اشوف شي.. حتى دنوة ماانتبهت اذا چانت موجودة لو لا..بالاخير انه زفيتهم بسيارتي لبيت عمي .. كعدت بره وي الزلم..اجه عمي ابو دنوة.. يابة شكثر يكرهني..وكف جدامي..
محيي : شو ابوك مااجه..
رائد : ماعازمي..عشنو يجي..
محيي : هو دومه گليل أصل..ويجوز انت مثله..
استغفرالله هسه هذا شگال لروحه من حچه هيج..ماجاوبته .. تركته ورحت..

وره ما خلصت الهوسة..الكل طلع من البيت بقوا بس همَ.. انه هماتين طلعت ردت ارجع للبيت اجاني عصام..
عصام : الله بالخير..حترجع..
رائد : اي هم يالله..
عصام : دتعال انت وصاحبك للبيت..شوي واطلع.. جدك مايقبل تطلع هسه..
رائد : اعتذرلي منه يول والله رجليه مكسرة ماتشيلني..
عصام : يله براحتك..روح بالسلامة..
رفعت ايدي بالسلام وطلعت..

بالطريق عارف حاچاني..
عارف : شسويت على بت عمك..وين صفت..
رائد : هلأيام ادز الوالدة..ماطول رمضان بعده ماجاي..
عارف : يله استعجل شكد خلگك طويل بوياي لو انه هيج اموت بالحسرة..
رائد : ههههههه..طاح حظك ياعار.. تعلم لاتصير زمال..
عارف : يله دااتعلم عمي ..
شواي ووصلنا لبيته..عفته هناك ورحنا للبيت.. طبيت سبحت وغيرت هدومي..كعدت بالهول ..اجت امي تسولف ع العرس.. تگلي مو رائد هيج صار.. مو وليدي.. اي يمة اي حجية.. مااحب احچي هواي..وهن نسوان بعد..

بنص الحچي كالت : كلهن جايات البنيات الا بت محيي.
درت وجهي : ليش ماجاية..
الحجية : ابوها ماقابل تطلع..
وانه اكول ليش ماخذ راحته بالحچي..تفكيره مسموم يحسب اريدلها الموزين.. خطية ..عفتهم كاعدين ورحت للغرفة بس تمددت غفيت..

مر اسبوع ماكو شي..خلصت اجازتي والتحقت.. لمن يصير الشغل مكثف اقفل التلفون..هلمرة كلش انشغلت.. قفلته ونسيته.. واحنا طالعين مأمورية للفلوجة اجه واحد جندي كال يردوك ع التلفون الارضي.. رحت شلته ..
امي ..صوت بچي وهوسة..
الحجية : وينك ييمة..
رائد : خير ياستار گولي ..شبيج تبچين..
الحجية : اخوك بالتوقيف متعارك..
رائد : استغفرالله..زين بيا مركز هو..
الحجية : قريب عليك ببغداد يمة..بمنطقة ........ ابوك بالطريق حيجي..
رائد : يله هسه اروح لايضل بالج..خابري گليله يرجع الطريق مو سهل..
الحجية : يله ماشي..طلعه فدوه مايسوي هيج هو..
رائد : دنطيني مجال اروحله.. هسه روحي لاتخافين..

سديته ورحت حاچيت العقيد انطاني ساعتين وانه اطلع ع المأمورية اللخ.. ركبت السيارة ورحتله للمركز.. بس شوفته الباج دخلني ..حچيت وي الضابط..
- : احنا حفظناه لمحمد..كل يوم مسوي مشكلة..
رائد : بعده شاب واندفاعي شسويله.. وينه هسه..
- : موجود بالتوقيف..
رائد : انه اكفله وطلعه..
وقعت على ورقة كفالة وطلعته..هي ناس عادية تطلع بنفس اليوم.. عاد انه واصل طبعا اطلعه..وهاي شغلته نفسها كل يوم يدخل بسببها..يتعارك ويشردون الباقين تنذب براسه..

صعد بالسيارة وطلعنا لبيت خالي..
محمد : هاي امي دزتك مو..
رائد : انت تضل عار وچلب وگوا....وانه اضل مثل الطرن اروكض هنا وهنا..بابا بطل مزعطة وصداقات لاتقدم ولا تأخر.. بزعت روحي شني ماتفهم انت..دماغ سز.. بكد القندرة وتطلع تبات يم صحبانك..شيفيدونك..شفت شسوولك..
محمد : ديله هسه لاتحاچيني هيج..المفروض تخفف عني..
رائد : اكسر راسك واگص لسانك يول ادبسز..مو صغير انت .. يله انزل وابقى هنا لاتطلع خوش.. انه يخلص دوامي واجي اخذك ونرجع للبصرة..

راد ينزل..كمشت ايده ..طلعت فلوس خليت بيده : روح خاف تحتاجهن..
تشكر مني ونزل..خلصت دوامي واخذته ورجعنا للبصرة.. بعد چم يوم ويبلش الشهر العاشر.. لازم استعجل بعد .. طبيت ارتاحيت ووره يومين حاچيت امي..
رائد : حجية عندي وياج حچاية..
الحجية : اي يمة گول تدلل..
رائد : هليومين روحي لبيت جدي علمود المشية على دنوة.. اريد اخطب گبل لايبلش دوامها..
الحجية : يله انه هماتين كلت لازم يستعجل.. ان شاء الله عگبة اروح ميخالف..
رائد : الله يخليج ..

طلعت مرتاح وروحي طايرة..اكمشها بيدي بالحلال.. حلم علم .. شكد ترفة وهادئة .. يله ماضل شي ويمشي النريده عدل..

...........................................
دنوة ......
...........................................

ثاني يوم كعدنا من وكت علمود عرس يونس.. هستونا دنخبز للريوگ جان يجي عمي فيصل..كال تريگوا عدنا.. ضمينا كلشي ..كمت للغرفة داالبس عباتي..اجه ابوي..
عاينلي بنظرة استفزازية : وين ان شاء الله..
دنوة : غير عمو گال تعالوا تريگوا يمنا..
محيي : ليش انتي تردين تحضرين العرس..
دنوة : چا شنو بابا..
محيي : دنچبي..خوش والله.. هسه خالتج جاية تاخذج عدها.. ترحين وماتفكين حلگج زين..
دنوة : مو كلهن حيرحن البنات..
محيي : تسوين الاگوله واذا شفتج جاية لبيت عمج بدون علمي اكسر رجليج..

سكتت ماجاوبته..لبست شال والعباية وكعدت انتظر خالتي.. اجت سرور كالت حنروح..گتلها ابوي مايقبل روحوا انتو.. رادت تحاچي تقنعه ماقبلت..اخاف منه كلشي يسويلي..

تقريب الربع ساعة اجت اخذتني ورحنا لبيتهم..
خالتي : حبيبتي تحبين ترجعين وانه احاچي ..
دنوة : لا خالة عوفي..مايقبل بعد قفل..
خالتي : والله ماادري شلون يفكر.. يله براحتج حبيبتي..
ردت اغير الموضوع : بيبي شلونها..
خالتي : اي زينة الحمدلله.. دوم تحمد بيج تگول دارتني مثل أمها ولا چن بيبيتها..
ابتسمت : اي غير هي حبابة فدوه الها..مشتاقتلها..
خالتي : ماضل شي للدوام وترجعين..بس كون ابوج يقبل تكملين هلسنة..
دنوة : اي يقبل حبي..هو يريدني اخلص بالعجل علمود يبطلني.. يله مو مهم المهم عندي شهادة السادس..
خالتي : عفية عليج الشهادة مهمة..

همهمت بالموافقة لرأيها ووصلنا..البنات نايمات.. رحت تمددت يمهن ونمت.. مشى اليوم طبيعي وحلو.. تونست وياهن كتعويض للونسة الفاتتني هناك.. خالتي لمن اجي كله تجيب مشاوي من بره..يعني تدللني..خصوصا جنت بالمستشفى بعدها متعاطفة وياي..

بالليل گعدنا نتعلل..خالتي كالت اروح انام..بس طلعت اندارتلي دنيا..
دنيا : اي حبيبة..شخبار الزلمة..
دنوة : منو.. رائد..
دنيا : ليش اكو غيره..
دنوة : هههههه..ولج لا عبالي تقصدين على يونس.. اي زين الحمدلله..
تارة : شوكت خطوبتكم يمعودة ضجنا .. نريد نرگص نصخم شسالفة..بس گاعدين..حتى بخطوبة حلا ماتونسنا..
دنوة : مااعرف والله..بس هو گال گبل لا تبلشين دوام اجي اخطب.. وانه إله بعد حتلو وره سنة ..
دنيا : حبيبتي خير البر عاجله..وهو رب البر والخير..
دنوة : هههههه..انچبي لج شو تتغزلين بي جدامي.. انزوول ولا ضلت مستحة..

كلهن ضحكن..ضلينا كاعدات للثنتين وطفينا.. ثاني يوم العصر اجه ابوي اخذني..
سألته : شلون چانت الحفلة..
دار وجهه علي وخزرني : حلوة..ورائد جان موجود..
سكتت ماجاوبت.. اكيد طلع يجنن ..وصلني للبيت وراح.. گال بالليل اجي..ماسألته وين..يرزلني ومايجاوبني فعفته.. طبيت كلها تحچي بزوجة يونس وفرحانيله.. من كلامهم حسيتها حبابة وحلوة..

مشى اسبوع ماكو شي..رحنالهم بيوم السبعة.. شفتها حبوبة وتونس.. كلهم سألوني ليش مااجيتي..گتلهم چنت مصخنة.. ضلينا عدهم لوره الغدة ورجعنا.. ايام مرت بهدوء فضيع من جهة ابوي..لايرزلني ولا يدقق علي..استغربت ليش هيج.. صحيح مرتاحة بس ولو احس اكو شي حيصير..

بيوم گعدنا مثل عوايدنا.. مابين شغل وتنظيف وخبز خلص نص اليوم..
العصر كاعدات انه والبنات سمعت صوت الباب يندك.. طلعت سرور تفتحته.. اجت وكفت بباب الهول وتفاجئت بهاجر وامها داخلة علينا.. شذكرها بيه هسه شكد مشتاقتلها.. رحت عليها بوستها وكمت ضيفتهم..هم يصيرون جيران عمة سناء.. من خلال الگعدة عرفت جاييها أخ فملتهية وي امها..

هاجر عاينتلي بابتسامة وحجت : شكد مشتاقتلج ولج صار شكد مامتشاوفين.. شلونج شصار وياج بس سمعنا انقلتي و ماافتهمنا شكو ضل بالي يمج..
دنوة : الحمدلله والله حتى انه مشتاقتلج.. بس صارت على غفلة لأن بيبيتي تمرضت ببغداد فانقلت لمدرسة هناك.. والسنة الجاية ارجعلچن لاتخافين وراج وراج..
عاينتلي بفرح : صدككك.. همزين والله المدرسة ماتنطاق بلياج..
ادنت يمي شاورتني..امها ملتهية تسولف وي خالة ابتسام وفاطمة .. : صدك شصار على ابن عمج..
دنوة : هاي اجيتي ع الوشالة.. غير نهى علي..
هاجر : چذابة..شلون..

حچيتلها شصار من يوم تمرضت واجه نهى علي.. وايام نومتي بالمستشفى..تسمعني وفاكة حلگها متفاجئة..
هاجر : عزززه الله عليج.. والله وطلعتي مو قليلة واحناا عبالنا.. بس خطية الحمدلله على سلامتج..
خزرتها بشقة : شقصدج ولج..
هاجر : مو قصدي عيني شبيج صايرة تفتهمين غلط.. هاي عيشة بغداد تعلم اللواتة طلعت..
ضحكنا ثنينا وبقينا نسولف شوي بعدين اخذتها امها وراحوا..

وراها بفترة قرب الدوام.. ابوي گال لمن اخذج لبغداد اشتري مناك عود..ماگلت لا..اخاف احچي ادور يبطلني.. اجه اليوم الطيرني للسما..حسسني بكوني أنثى استحق رجال يقدر كل ذرة حب واحساس بداخلي.. چنت كاعدة بالمطبخ دااسوي بسبوسة تحلاة للعصرية..بالليل نكعد ناكل منها انه والبنات.. كملتهه وعفتهه تبرد..وگفت اغسل المواعين جان تجيني سرور الضحكة شارگة الحلگ..
سرور : لج عيني اليوم يوم السعد..
دنوة : ها شكو..كيفتي ع البسبوسة..
سرور : شوف حظي وين تفكر..لچ ام رائد هنا جاية تمشي بيج.. هي وخواتها ثنين واخلاص..هسه طلبتج..
ذبيت المواعين من ايدي وگمزت من الفرح.. : جذابة.. عززه مدااصدك چذابة..
سرور : والله وداعتج..گومي بدلي وروحيلها..
دنوة : اي اي حروح.. عزززه حموووت..

كامت تضحك واجت تكمل بمكاني..رحت غسلت وجهي وغيرت هدومي..تعطرت ورحت دخلت..سلمت عليهن ومدنجة راسي مستحية .. كعدت اسمعهم ..سوالف ومدري شنو.. بعدين طلبت ايدي..
ابتسام : اي عيني هي اكيد الكم..گبعوها واخذوها.. بعد رائد نهى عليها..
ام رائد : اي حبيبة بس وليدي يريد كلشي يمشي عدل..
الحجية غادة : فدوه اغدي لطوله..شون زلمة سعده بدنيوة بنيتي.. هو ماطول نهى عليها بعد هليعجبكم يمتى ما يجون الزلم خليجون..
ام رائد : ان شاء الله حجية..واحنا اكيد مامطولين..چي دوامها حيبلش..
الحجية غادة : چا خير اليصير ودية..

ضليت كاعدة وياهن لحدما طلعن..گالت يومين وتصير مشية الزلم.. طلعت ميتة فرح واغني بيني وبين روحي .. صارت صدك.. مامصدگة ..بالليل كعدنا انه والبنات..ضلينا ليوين بعدين گعد عمي لواء شافنا كاعدات كال روحن نامن.. طفيت الاضوية وكمت نمت.. ابوي ماگال شي لمن جديتي حاچته.. حتى ماجاوبها.. خفت منه يريد يسوي شي يخربها..

خليت ايدي على گلبي لحدما مرن يومين والعصرية اندگت الباب.. طلع سالم يفتحها..ضليت واكفة وره الشباچ الي بالاستقبال.. تفاجئت من شفت السيارات والزلم الدخلت.. فات رائد وزلم تلاثة بگد ابوي وعمي قاسم بهلحدود.. بعد شباب وبالاخير فات عمي حامد..عاگد حواجبه مثل عگدة رائد.. نفس التفاصيل والهيئة..فاتوا كلهم وانسد باب الديوانية.. كعدت يم سرور وحاضنتها خايفة ابوي يسوي شي.. بعدين شواي وگمت التهيت بالچايات صينية تجي وصينية تروح..

بالأخير كعدت اعجن وي خالة فاطمة للعشا..اجت نوارة ..
گالت بإستعجال : ولج كومي ركضي تعاي سمعي..
دنوة : شكو ياستار..
نوارة : تعاي بالعجل..
كمت غسلت ايدي ورحت..لگيتها لاطشة إذنها ع الباب مالت الديوانية .. أشرتلي بيدها يعني تعاي..رحت وگفت يمها واسمع..

محيي : هذا العندي وانت براحتك..تقبل ..گبعها واخذها.. ماتقبل ماانطيها لو صار دم للرچاب..
-: ابو دنوة مايصير..الزلمة شاريها..وابو المثل يگول هي ع الفراش ونصيح يانصيب
محيي : والله اذا ابنكم مو كفو انه شعلي..
حامد : احنا جايين نخطب .. مانعامل على سلعة.. خلي احترام لبنتك..
رائد : خلي يابة..انه قابل.. شتفصل البس..
محيي : شوف والله هاي لخاطر هلوجوه انطيتها.. بس كوني أب اكيد اريدلها الحياة الزينة مقارنة بالعيشتها بيها انه.. لهلسبب انه احدد وين تشتري البيت..المساحة براحتك وتسجله بإسمها ..
شامخ : انت چنت شاب وتعرف الشاب عايش لروحه.. منين يجيب فلوس بيت..
محيي : شلي غرض..هو راد ..هو يتحمل المسؤولية..
رائد : عمي انه قابل..ووين تحدد البيت اشتري..مانوگف على هاي..
محيي : هاهيه..شوكت ما تلاگي بيت انطيني خبر .. وراها يله تصير الخطوبة..
-: يعني نقره الفاتحة..
محيي : اي بحيل الله..

انه اسمع واعاين لنوارة متفاجئة.. حتى عمي اليكرهنا حس بأبوي شلون ديبضع بيه.. الفرحة كلها خمدتها خيبة أملي بكلام ابوي.. ممكن يكون صدك خايف علي من رائد ومن مستقبلي وياه.. بس مو لهلدرجة المقرفة .. عفتها ورحت للمطبخ دمعتي بعيني.. لمت حظي وتذكرت سكوته آخر فترة چان يدور على شي يگوله بيوم المشية وهذا اكثر شي ممكن يخرب اكبر زواجة.. كلساع خالة تسألني شبيج ماگتلها شكو..لحدما طلعت الزلم واحنا رحنا نخبز وره البيت.. طشت السالفة والكل عرف ابوي فارض بيت على رائد يله يقبل بي.. والمهر مبلغ عالي..

فكرت هواي برائد..خاف يوازي روحه ويضل يداين علمودي.. مااعرف طبيعته واذا هو يحتفظ بالفلس لو لا.. ماادري خليتها على الله لحدما باچر اخابره واسمع منه.. بالليل كملنا الشغل .. كعدت بالمطبخ وي النسوان ..بلش الحچي ..
فاطمة : عيني حاچي ابوج يخفف ع الزلمة خطية..
شيماء : حبوبة هو ابوها بعد قابل اكو واحد ادرى منه بمصلحتها..
الحجية غادة : انه حاچيته..گتله بسك البت حتروح سهللها دربها.. مارضا..
ابتسام : عمة هو يريد يخربها ومايدري شون..

عفتهم يحچون ودرت وجهي.. هسه اذا حچيت حيكلي خايفة علي وانتي شدخلج..اعرف سوالفه.. وره وكت سمعت ابوي يرعد بإسمي.. ترخصت منهم ورحت اشوفه.. عاگد حواجبه وجدي واكف يمه..

يتبــــــــــــــــــــــــــع...................