رواية اسألي عني الليالي الفصل الثامن عشر 18 - بقلم رقية جاسم

قناة التليگرام

حساب الانستگرام

الـبـارت الـسـابـع عـشـر...............

عفتهم يحچون ودرت وجهي.. هسه اذا حچيت حيكلي خايفة علي وانتي شدخلج..اعرف سوالفه.. وره وكت سمعت ابوي يرعد بإسمي.. ترخصت منهم ورحت اشوفه.. عاگد حواجبه وجدي واكف يمه..

دنوة : طلبتني يابة..
محيي : اي.. سمعتي شصار بالگعدة ..
سويت روحي ماادري.. : شصار..
محيي : وافقت على رائد..بس بشرط يشتري بيت بمنطقة ..... هنا بالبصرة.. هو شوكت ما يلاگي البيت ويسجله بإسمج يله تصير الخطوبة..غيرها ماعندي..عندج اعتراض..
شامخ : انت حچيتها بعد..جاي تطلب رايها بشني.. بالله عجيبة سالفتك..
محيي : لو انت بمكاني تسوي هيج واكثر..
شامخ : لا مااسوي..ليش مانعرف رائد شني مثلا.. الزلمة بالشدة والسرة ويانا..ذاك اليوم عرس ابن عمه وهو مريض واجه.. وغيرها وغيرها..
محيي : بوية لاتدخل رجاءً..انه دخلتها مدرسة لاجلك.. وهاي زواجتها من رائد لوما ناهي عليها فلا انطيها..

المهم بوية .. اندارلي وكمل حچيه : هسه مبدئيا هو حيطول يله يلاگي.. وانتي دوامج گرب..حضري روحج اخذج..
دنوة : شوكت نروح..
محيي : يومين واخذج .. وصيت خالتج تشتريلج نفس زي العام انتي ماتلحگين تشترين..
حركت راسي بالموافقة وطلعت.. صوته عالي هو ويحاچي جدي بنبرة تحدي : خنشوف هذا ابن الكلب شيگدر يسوي.. كله وكلايله خلگ ضابط..منين يجيب فلوس..
شامخ : ضب لسانك ارعن..لاتحچي لاعلى حامد ولا رائد..
محيي : ديله انبياء عساس..هم والقندرة..

تمشيت للغرفة وتركته..مااريد اسمع هيج كلام يجرح بعد.. صحيح ديحچي على رائد يعني مو علي بس چنه جابها بگلبي.. انقهرت ليش هيج يتخايله..والله حباب ومؤدب.. تمددت وضليت اتگلب وافكر..صافنة على ميل الساعة انتظرهم ينامون واروح اخابره..لحد الوحدة ونص كلش اختفى الصوت.. يعني ناموا.. كمت على كيفي رحت للمطبخ ادور بلكت واحد منهم ناسي التلفون مالته..والله ولكيت تلفون بيبي .. اخذته ورجعت للغرفة..قفلت الباب ودورت رقمه ايدي ترجف.. لگيته ودگيت.. شواي وجاوبني..

اول ما جاوب الظاهر جان يحاچيني احد يمه : اسكت قندرة خلامسلت.. جلى صوته وحچه : الو..
دنوة : ااا..رائدد..
رائد : اهلا..هلا بيج بنيتي ودنياتي..
دنوة : شلونك..
رائد : بخير ونعمة.. انتي شلونج حبيبي ..
جاوبته بإندفاع مااگدر اضم بعد : قلقانة عليك..
رائد : ها..ليش ابوية..
دنوة : سمعت بأبوي شگال اليوم..وانه مااريد اكلفك ابد.. اترك موضوع الخطوبة هسه بعدين هو يلين ويسقط قرار البيت ومااعرف شنو..

رائد : وانتي علمود هاي مانايمة..
دنوة : اي..جنت افكر بيك.. زين انت ليش مانايم..
رائد : انه يم صاحبي حبيبي..المهم مو هذا موضوعنا.. بنيتي صارلي سنين بالجيش وعندي راتب زين الحمدلله.. وانه شاب عزابي قابل شعندي عائلة وحليب وهدوم..ابوي عنده فلوس من المحلات يعني مايحتاجوني..فالراتب نصه اضمه.. وانتي حسبي چم فلس مجمع صار عشر سنين بالخدمة.. وإن احتاجيت مستعد اداين من كل واحد اعرفه بس اشتري البيت واسجله بإسمج..ترخصلج فلوس الدنيا كلها..جواج وداعة عيونج الشهل..
دنوة : زين انه اعتذر..
رائد : ليش الاعتذار باباتي..
دنوة : ابوي يأذي بالحچي..وانت ماتستاهل..
رائد : سهلة بنيتي..لعيونج اصبر ميخالف.. شو مااحسج فرحانة يولي..بس لا ماترديني..

دنوة : لا شلون..بالعكس..بس حچي ابوي ضوجني..
رائد : هانت يروح روحي.. احاول بأگرب وكت ادور بيت واشوف السلطان يرضا بي يا لا..
دنوة : هههههه..هاي على ابوي..
رائد : اي عمي سلطان وداعتج..غير انطانياج..اسوي نبي..
ضحكت وهو هماتين..حچيت وياه شوي بعدين سديته .. رجعته لمكانه ونمت..

مرن يومين عاديات..اجت خالتي جابتلي الهدوم والقرطاسية للسنة الجديدة..لگيت ملازم لكل المواد..كالت هاي مني انه اشتريتهن..ابوي بس منطيها للهدوم والاقلام وهذني..
گتلها : ليش تعبتي روحج خالة..مايحتاج..
خالتي : لا حبيبتي هذا سادس..لازم ملازم وقراية مركزة.. عسى ولعل اطلعين معدل عالي وتكملين دراسة..
دنوة : هذا حلم خالة..
خالتي : الله كريم..كلشي ممكن بهلدنيا حبيبة.. هسه اروح البنات وحدهن بالبيت..يسلمن عليج..
دنوة : الله يسلمهن..وصليلهن سلامي..
خالتي : واصل حياتي..
رحت وياها ودعتها ورجعت..حضرت هدومي بجنطة چبيرة..

بالليل طلعت الملازم دااضمهن بالجنطة مالت المدرسة ومن ضمنهن دفتر التاريخ مالت العام..گلبت بي جان تطلعلي الرسايل مال رائد.. فتحتهن قريتهن چن اول مرة اقراهن .. ياعين الصگر بالزعل من تحتد.. شكد احب هلبيت.. كلها احبها ماطول من عنده.. طبگتهن وخليتهن بملزمة لخ.. رحت نمت والصبح كعدت بدلت وكملت..جدو وصاني على دراستي.. گال : حفيدتي بعيدة عني بهذا رمضان..
ابتسمت وحضنته : حشتاقلك جدو..
باسني من راسي..ودعته وطلعنا لبغداد.. وهاي الاجراءات الروتينية بين ما وصلنا..ابوي ضل كاعد شواي وراح.. جانت مرة خالو الثانية موجودة..استغربت شعجب هي هنا.. حتى سيف موجود..انه بقيت على هدومي العادية وشال.. هو همات ثگيل وكاعد على صفحة مايحچي قليل بس على كد السلام..

مرت ايام عادية..عرفت مرة خالو الاولانية طالبة الطلاق وماقابل يطلگها.. فرايحة لبيت اهلها .. وهاي مرته جاية تسيارة.. بعدهم گاعدين بالبيت الأجره لمن جنت موجودة.. بعدين بلش الدوام.. سيف رجع سافر يكمل .. گال هاي اخر سنة ويتخرج.. اول يوم داومت طبيعي وضغط من اولها چي سادس.. ثاني يوم هماتين رحت مشي ولمن رجعت شفت ابوي جاي..استغربت..شنو اشتاقلي .. رحت سلمت وكعدت..
محيي : بعد لاترحين مشي..سجلتج خط..باچر يجيج سيارة بيضة..
دنوة : ماشي بس ليش..
محيي : الوضع موزين..حتى البنات دينكتلن وينخطفن..

سكتت..بعد احسن..جنت شايلة هم للشتا باردة.. هو ضل نص ساعة تقريبا بعدين راح..بروحته اجت مرة خالو الثانية هي والبنات..
ابتسمتلي : مبين توچ جاية من المدرسة..
دنوة : اي خالة..
افاطم : يله فوتي ارتاحي حبيبتي..بعد اني اجي اسوي الغدة هو همات بحساب بيتي وانتي ضيفتي..
شكد حبابة ياربي..خالة ابتسام بس بغدادية.. تركتها ورحت بدلت وتمددت نمت..كعدت العصرية اكلت وجبت الكتب اقره.. ثاني يوم الصبح سمعت صوت هورن..ودعت بيبي وطلعت.. كعدت ليوره..شفته شاب بكد رائد بهلحدود..اكبر يعني بالتلاثينات..
وصلني وبالباب اندارلي.. : عمو اني عندي بعد بنات تلاثة اخذهن من الشارع العام..فاليوم نتأخر يله نرجع..
دنوة : ليش مو انه أقرب يعني..
- : هيج اهلهن موصيني..والدج كال ماكو مشكلة..
دنوة : ها..اي هاهيه عمو..براحتك..

كال خوش..نزلت واشوف الشلة التعبانة صايرة صدك تعبانة حتى مامهتمات لروحهن..انه عود الماادير بال كمت كلش اعتني بهدومي لمن افوت لهلمدرسة.. شرط جواريبي ماتبين من الحذاء.. والصدرية بيها مكان مالت حزام بس رفيع وهيج محافظة علي.. عاينت عليهن بطرف عيني وتعديتهن للصف.. ترتيبنا متغير فكل وحدة منهن بشعبة صايرة.. مشى اليوم طبيعي ماكو شي.. بنهاية الدوام اجتني غزل.. ابتعدت خطوتين مااريد المأساة تنعاد..
وكفت جدامي وحچت : شلونج..
عاينتلها مستغربة : زينة الحمدلله..
غزل : اعتذر..اتمنى تسامحيني.. الصارلي مو قليل..
دنوة : الله يسامحج مو انه..

عفتها ورحت بالخط.. افكر شصارلها يعني .. انه ليش نسيت اسأل رائد شسوه بموضوعهن..خاف سوالها شي.. اي هو اكيد ماكو غيرها..چا حلم علم تجي تعتذرلي سواء هي او أي وحدة منهن..

البنات الوياي بالخط من غير مدرسة..فبالروحة يجيني اخر شي وبالرجعة يوصلهن أول يله انه..وصلهن ورجعني للبيت.. طبيت بالثنتين الا..جنت بالوحدة وشوي..يله المهم مدااتعب..

مرت ايام الدوام طبيعي..جهدت روحي بالقراية.. ماالتقي بأحد بس وكت الأكل..خالة افاطم كلش حبابة .. هي تسوي الغدة دورات تطلع علمود بناتها يرجعن من المدرسة فتسوي وتگلي حمي من تجوعون..وبالليل يومين انه اسوي ويوم خالو يجيب من برة..مرته الاولى ماسمعتلها حس.. بس العرفته مخبثة على افاطم وخالو متعارك وياها وطالعة.. سرور تخابرني مرة كل اسبوع تسألني ع الدراسة وتروح مانحچي هلكد.. رائد ماكو اصلا.. مالحگت افكر حتى من الدراسة والضغط.. الشلة التعبانة متغيرة كلها.. حتى لابسات حجاب مع ذلك ماحاولت اتقربلهن بعد..طابت روحي منهن..

مرت فترة وبلشنا امتحانات شهرية..وبيوم چان ماعدنا شي بالخميس وبالأحد امتحان تاريخ..فسوينا غياب جماعي ماداومنا.. رجعت نمت نومة طويلة ولمن گعدت شفت ابوي هنا ديحاچي بيبي..كمت غسلت واجيت سلمت علي..
بيبي : ها شنو يمة حتاخذها..
محيي : لا حجية مااكدر انقلها هسه اصلا.. بس اجيت أرجعها واذا عدها شي باچر اخذلها اجازة..
دنوة : لا ماعندي شي .. بس ليش نرجع بابا..
محيي : رائد لگى بيت..رحت شفته زين حلو ومرتب.. اخذج علمود باچر نتكاتب علي وانه اصير وكيل امشيلج بالمعاملة وي هذا المصخم..
بيبي : يداده..ليش تحچي ع الزلمة اشوفه خوش رجال والله..
محيي : خوش موخوش..المهم حيصير خوش لمن ينكسر ظهره بهلبيت..
بيبي : چنك تريد تنتقم من الرجال..شمسوي..
محيي : خيولي هلعار..ولا اطيقه..

انقهرت من كلامه وهو ينحش بلحمه..ولا چن دافع الله اعلم شكثر فلوس علمود يشتري البيت علمود زواجة ممكن تصير وممكن لا.. ردت ابچي من قباحة حچيه..بس الفززني صوته لمن گال حضري روحج نرجع هسه..

گمت بدلت وطلعنا للبصرة..وصلنا المغرب وره الأذان.. طبعا رمضان فابوي صايم..نزل اشترى مي فطر بي بين ما وصلنا .. لمن طبيت البيت لگيتهم ديفطرون وملتهين.. كعدت وياهم اكلت.. شگد احب لمتنا..هناك ملل ولا عبالك رمضان.. بيبي ماتگدر تصوم فبس انه وخالو دورات يجي يفطر عدنا..

مشى اليوم بحلاوة الجو بمثل كل رمضان..الجو بلش يبرد خصوصا بالليل.. اخذت هدوم من سرور ماجبت وياي گال ثاني يوم نرجع مانطول..التهيت وياهن سوالف وضحك .. محد نام لحدما صار وكت سحور..جان تندك الباب.. طلع عصام يفتحها واشوف رائد گلبي وقائد احساسي فات مبتسم.. ابتسمت على ابتسامته..مبين صار فترة بالبيت لأن لحية خفيفة طالعتله..سلم علي وطلع جدي استقبله.. شكد يحترمه والكل يحبه بس ابوي.. حضرنا السحور للزلم وحد واحنا وحد .. كعدت وياهن وبلشت البسامير..
ابتسام : يمة شونج بالدراسة حبيبة..
دنوة : زينة خالة دااقره وبعد الله كريم..
فاطمة هي وعاوجة حلگها : اي حظهن گاعد.. بيت ملك ورجال بالجيش..فوگاها مدرسة ببغداد..چا شبي حظ بنيتي..

الحجية غادة : لاتشوفينا ساكتات يفطيم..تره انه لخاطر وليدي لواء ووليداته بعد انتي أعرف بالأصول عمة..
فاطمة : اي عمة..بس حچاية الحق تنگال..مايصير وحدة هيج عمرها يتسجل بيت بإسمها..
الحجية غادة : لويش لا..دنيوة تستاهل كل الزين.. رويد هماتين زلمة حوك مايزاغل ويلعب بالذيال وتلفنه للصبح يبعد عيناها لعمتج.. مو يا لا عمة ام قصي..

دنجت راسي للسفرة والضحكة كاتمتها بالگوة..ورود سكتت ماكالت شي.. شواي وگامت من الأكل .. انه همات گمت .. چانوا جايبين زنود الست فاكلت منها بين ما خلصوا وبدت تجي المواعين وتروح الچايات.. كملنا تنظيف وكلمن راح لداره يقره قرآن بين ما يأذن..

طبيت لغرفتي راسي يوجعني من الطريق.. سمعت الجامة تندك..ابتسمت ورحت قفلت الباب .. فتحت الشباچ ومتچية روحي ع الحايط..
ابتسملي : دنياتي وحبيبي..شلونها أميرتي..
دنوة : ههههه اوي تخجلني بكلامك.. زينة وانت..
رائد : الحمدلله گلبي.. مشتاگلج شكثر..
دنوة : ااممم..شكد..
رائد : والله هواي..ماتشوفيني اجيت اشوفج بهيج وكت.. انه اصلا مااتسحر بس اليوم تجين فگلت اجي اشوف بنيتي.. شلونها الدراسة..

ابتسمت وعيوني تتفحص لمعة عيونه ولهفته.. : زينة داادرس عادي..وشنو..
رائد : شنو عمري..
دنوة : انه هماتين مشتاقتلك..
ضحك وخلى ايده على گلبه : هذا من كلماتج يصير يصافگ .. عاد من اشوفج جدامي تتمشيني ببيتي شلون..
خزرته ومبتسمة : عفية ليش تحچي هيج..احسك تخوف..
رائد : انه يولي..حسافة بس..
ميلت راسي ع الحايط وصافنة علي : اشاقة..
سكت ومكتفي بالابتسامة.. ماارتاحيت للوضع الأحنا بي.. هو هادئ بشكل بس عيونه ونظراته تصدح بغير شي.. بهدوء مصطنع واضطراري..گلبي كام يدك سريع وانفاسي ترجف.. غمضت عيوني واخذت نفسي طويل بلا مايحس .. دخل عطره لروحي وكل خلية بجسمي..بعده محافظ علي ويستخدمه..
گتله انه ومغمضة عيوني : صار سنة من شفتك هنا.. حسيت بيك.. فتحت وگعدت..هو نزل كعد بالگع وايده ع الحديدة مالت الشباچ..

دنوة : رائد .. انه..يعني مااعرف..بس احبك وعلى طول اگول لروحي سعيدة بيك وبوجودك بحياتي..هيج تمسكت بيه وحتى بيت .... سكتت لمن تذكرت كلام ابوي هو ويگول اكسر ظهره بهلبيت..يعني مو خوفا علي..
تقرب مني وايده چن تريد تكمشني ويسحبها : حبيبي ليش محملة روحج نتيجة الصار..انه احبج والصار من أوامر من ابوج متحملها وماحاچي شي..الحب للزلم .. لليعرف يتصرف ويحكم عقله وگلبه بوكت واحد..وانه لوما اخذه بعقلي واسكت چا حتى مستشفى نيمته..چا ضربته..حتلو عمي.. بس اجاوز علي مع العلم اجيته من أضيگ باب ومااستقبلني.. اجيته من أوسع باب وصدني.. منين يريد اجي بعد .. بس ميخالف سهلة هانت وراحت..بنيتي والله مامصدك اصادفج بيوم.. لمن شفتج تذكرين شلون چنت عصبي چن واحد ضايج..
دنوة : اي صحيح..
رائد : اي ماچان اكو شي.. بس شبهتج ببالي.. لون عيونج ماجان مبين بالصورة زين.. انتي كبرانة وحسج يلالي بالبيت.. صدك چذب.. دناوي هاي .. بس شفتج بعد والحمدلله على كل حال..

ابتسمتله : شكرا على كلشي سويتليا ودتسوي..
رائد : مابيناتنا شكر حبيبي..وانه اذا مو اليوم فأول وتالي اعزلچ وحد..لاتفكرين..
جاب ايده جدامه قره الساعة.. گام وگف ينكت هدومه : يله اروح بعد..بس گبلها..
رفعت حاجبي بتساؤل : شنوه..
مد ايده على جيبه الوراني.. انطاني ورقة .. ابتسمت واخذتها منه.. قربتها من گلبي لا اراديا : اكيد قصيدة.. بس لياشاعر هلمرة
ضحك بصوت : اي يبعد الدنيا..عريان ماكو غيره احب قصايده.. بس ضميها عود لاتخلين ابوج يشوفها ادور يتسودن علي ماينطيني گاعي..
دنوة : هههههه..ماشي عيني..

ابتعد خطوتين وانه تقربت من الشباچ اشوفه شلون يمشي علمود يروح.. هو وديروح گال بصوت متقصد : انه زلمة ع التواضع متعلم هلكمال منين اجاني..
اندارلي وغمزلي..ضحك وراح.. الابتسامة بگلبي گبل شفايفي.. شگد احبه مااتحمل بلياه.. سديت الشباچ وانتچيت ع الحايط اقراها..كالعادة الخط يجنن والتاريخ فوك..

استراحي براحتي ..
وجفني العليج يميل ضلّه
وحلّي محبوس الشعر ..
انه استحي من الله من احلّه

شيلة زنودج وزن للكون ..
خاف يميل ... وتبيّن بحال الزمن خلّه
يالاصابيعچ جكاير (كنت) ..
من تومي بزعل يتطّشر الباكيت كلّه

انتي روحي وراحتي
وآخر ندى العالورد ينزل ..
انتي ليلي ولالتي وتفاحتي ..
الجمعت حلاة الشمس والظل
يلّي رمشج يجمع خيوط الفجر ..
بتّ وي بتّ وبيها يغزل ..

يلّي صوتج غفوة الغبشة
وخمر تينة ندى وبيّن فعلها براس بلبل ..
يلّي بعيونج عزم مهرة عرب
من تشم ريح الطيب تصهل ..
يالحلاتج سومري يفوّح بخور وطيب
وشفافج توجّ بالبوس فلفل ..

ياغصن مضنوك
ماشايف غصن هاكثر يحمل ..
كل كتر مني اشتعل ..
والكل يريد يذوب بالكل
وكل كتر منج نبض فحطان ومكهرب
وبس ينجاس ينتل ..

ياحبيباتي العذر لله
الحلاوة البيها تكتل ..
توعد وتوفي ..
وتوج شمس بشمس ما يوم تنكل ..

خوفوها محبتي ..
ودكت رجل ..
لا اليكره ولا اليمنع ولا الراد يعذل ..
وشتت ومطرت فرح ..
وأمتلت روح البور سنبل ..
وأمتلت روح البور سنبل ..

عيوني دمعت من الكلام وفرحانة موت.. مدااصدك .. انه اسمع هيج غزل وحب.. لمن چنت صغيرة گبل اسمع النسوان تسولف.. تكول حبيبها انطاها رسالة واهلها كشفوها يداده.. ادور الثانية تگللها ماتعرفين شمكتوب.. تجاوب : شكاتبلها قابل خية.. اكو غير القصايد حتين الوادم ماتعرف شني بيناتهم.. فهسه نفس الموقف انعاد علي..شعور حلو.. صوت الحب بداخلي..بداخل العضلة المتحكمة بالجسم كله بس مامتحكمة بالمشاعر.. شعور ينبض بحب ولهفة لإسمه وسماع صوته.. طبگتها وخليتها بجنطتي..تمددت متناسية وجع راسي من ثقل جمال اللحظات العشتها.. غمضت وغفيت..

كعدت الصبح بدلت وطلعنا انه وابوي ورائد وعمي قاسم.. اخذني للبيت شفته اول.. ذواق .. حلو ونفه..غرفة نوم جوه وصالة ومطبخ وحمام..فوك غرفة چبيرة على عرض واجهة البيت وحمام.. ابوي راح هو وعمي قاسم بره مدري شيسوون .. رائد مد ايده على جيبه ورث جگارة وزفر الدخان.. تقرب مني هو ويعاين ع البيت..
رائد : شلونه..حلو..
صفنت علي..رسمة شفايفه بارزة ومحددة.. سكتت ماجاوبت.. رأسا عاينلي وابتسم..
رائد : ها يولي..
دنوة : لا لا حبيته..حلو كلش..
رائد : يله اهم شي عجبج..

ابتسمتله..چانت اكو سطلة مال صبغ فارغة ومگلوبة.. جريتها گعدت عليها..بطني توجعني دتتگطع احسها.. ضميت راسي لحضني ومكورة روحي..حسيت بي دنج صار مقابيلي.. ريحة العطر وي الجگاير لعبت روحي..ولو انه احبها لمن اشتمها بي بقربه..بس مااعرف شصار..
رائد : اسم الله بنيتي شبيج حبيبي..
دنوة : بطني توجعني.. رفعت راسي گتله ..ريحة الجگاير دتأذيني.. ابتعد حباب..
گام ويشمر الجگارة طفاها بحذاءه.. اجه ابوي ساعدني اگوم وطلعنا..اشترالي مسكن شوي احسن..راحت النغزات.. رحنا لمكتب عقاري..خليت ابوي وكيلي واتفقوا ع السعر وكلشي يخصه.. بعد تبقى المعاملة وهلأشياء بالشهر يله تكمل..

رجعني للبيت وطلع ماادري وين..وره الفطور بساعتين هيج سمعت صوت عمر يبچي..فتت لغرفة ورود مالگيته.. صعدت فوك لگيته واگف وره الباب ويدك بي..شلته وبوسته.. غسلت وجهه وردت انزل..سمعت صوت من غرفة سالم ديحچي هو وعصام ماادري بشنو..ردت اروح بس صوتهم العالي سوالي فضول..وكفت وراه وأنشنش بعمر حتى لايبچي ادور يفضحني..
عصام : ماادري لاتحاچيني..
سالم : زمال سز..ارعن..منين اجيبلك هسه..
عصام : مااعرف..تره انه جايك طالب العونة..مو هيج تصدني وترزلني..
سالم : اكسف احوالك مو بس ارزلك.. اليوم تاخذني لهذاك البيت اريد احاچيها لهاي بت ال.... بله زعطوط انت مليونين هيج يروحن..اليسمع يكول الفين دينار..گوم لابارك الله بيك..

سمعت صوت خطوات اقتربت..رأسا نزلت .. هذا شبي ادور.. الله يفرجها علي مهما چانت الشغلة المسويها..ماردت احچي لسرور لو نوارة خاف مايدرون بلكت شي ينحل بالعجل.. سكتت ماحچيت.. ثاني يوم الفجر عمي فيصل اجانا للبيت .. حضرت روحي ورحت وياه ديروح لدوامه.. وصلني ونزل سلم على خالو وبيبي بعدين راح..

اول ما فتت نمت..گعدت الظهر جهزت الفطور وجريت الكتب اقره.. هذا السبت بعد لازم اجهد روحي مو مال اقسم المادة على يومين.. گبل الأذان بشوي كمت صبيت واجه خالو هو ومرته افاطم وبناته..صبيتلهم وگعدت وياهم.. فطروا وخلصوا..
خالو گال : اگلج خالو حبيبي..
دنوة : شنو خالو..
عمار : شصار على خطوبتكم انتي وابن عمج..
بيبي حچت : يااا..ليش يمة متدري محيي يريده يشتريلها بيت يله يصير العقد مالهم..
عاينلي متفاجئ : صدك خالو..
نصيت سويت روحي داألم المواعين : اي خالو.. هو هيج شرط..
عمار : والزلمة منين يجيب فلوس بيت وهو بعده شاب عزابي.. اني عندي سيف صار مراهق يله لميت ايدي وگدرت ابني..

بيبي : اي اني هم حچيت وياه..ماقبل..يكول اني ادرى بمصلحتها وهو گايل عندي فلوس جوه ايدي..
عمار : والله ماادري.. الله يرزقه..شيشتغل هو..
دنوة : رائد بالجيش..
عمار : هاا الله يحفظه.. بعد ابوج مندخل احنا..
دنوة : اي خالو ماتقصر..

لميت المواعين وافاطم غسلتهن..بهليوم باتوا عدنا فهي سوت السحور وانه نمت..كعدت الصبح للدوام بدلت واجاني الخط..

مرت ايام رمضان بهدوء..ماكو شي..مدرسة وامتحانات.. البنات مبتعدة عنهن بس صارت علاقتي بالبنات الباقيات قوية.. چي شاطرة والكل داخل خصوصي تقريبا فعبالهم انه هماتين.. بالفرص نگعد گروبات نراجع بالاسم.. هي بالصدك كلها ضحك وتحشيش..بس تونست هلسنة احلى من الگبلها والبنات چن تقربتلهن اكثر وعرفتهن شفتهن احلى واحسن من الصورة الرسمتها ببالي..

وبيوم گعدت مثل كل مرة..بيبي گعدتني دتاخذ دواها.. لبست الصدرية وستريج جواها الجو بارد الصبح.. اخذت سترة كابوي رصاصية لبستها واجاني الخط.. البنات الجايات قليلات.. فعالاغلب مايجونا مدرسات بشكل منتظم.. كعدت بمكاني چان تجي الشلة..مااهتميت گلت عادي مثل كل يوم عبروني واعبرهم.. ماحسيت بيهن غير گاعدات جدامي .. درت وجهي مابادرت..

دقايق من الصمت فصلتها مبادرة غزل..
غزل : شلونج حبي..
جاوبتها بدون مااندار : زينة الحمدلله..
سهاد : باوعيلنا..تره تغيرنا .. ونريد نحچي بموضوع يخصج.. هو صار بعد وراح واحنا تعلمنا هاهيه..
درت وجهي جاوبتها ببرود : يخصني..انه شعلي..
غزل : ابن عمج سوالنا مشكلة واهلنا عرفوا بعد..
ابتسمت بطرف شفتي : من ايدكم حبيبتي..
غزل : اووف..ولج غلطنا..اني رحت دكتورة نفسانية راجعت حالتي.. حتى البنات همين..مابينا شي مجرد نشوة مراهقة وانحراف .. لأن اني الشاهد الله ماچنت هيج ابد.. بس هلسنة الاجيتي بيها تخبلت..
دنوة : وانه شعلي بابا..الله يهديكم .. چفوني شركم..

گمت دااطلع كمشتني علا من ايدي..عاينت عليها شفت نظراتها من مثل گبل..اكو تغيير.. چنت احسها شهوانية تجاه جنسها.. هسه مااعرف نظراتها شتقصد بيهن بالضبط بس الأعرفه ماكو انجذاب لناحيتي..
علا : اصبري مو دنحچي وياج..
دنوة : ماعندي حچي وياكم.. بس اريد اعرف ابن عمي شسوى..

غزل : شسوى.. ليش اكو شي ماسواه.. صرنا بموقف يفشل.. چان اكو تفتيش للامريكان ومحد اكو من اهلي..البنات چانن يمي و...
رفعت حاجبي : وشنو..
غزل : الولد الشفتي ويانا ذيج المرة..هو چان يجيني للبيت بالوكت اليطلعون بي اهلي..
شهگت وجريت ايدي منها.. : شنو هللعبان نفس.. وابن عمي شعلي شمسوي مداافتهم..
هدى : عيني هو چان خال جندي يشوف بيت غزل.. لأن دائما نروح عليها متجينا هي..والولد نعرفه يعني يجينا هناك.. بس والله تركناه بعد هلسالفة الصارت من وره ابن عمج.. بيوم التفتيش هو واصله خبر إن اكو تفتيش بهذا الزقاق.. فإجه وشافنا وياه.. انوب الجيران مخابرين ابو غزل واجه.. هلحچي الامريكان اخذو عبدالله وبس احنا وابن عمج بالبيت.. فهو حچالهم كلشي وطبيعي أي اهل يشوفون بناتهم بهيج موقف حيصدگون أي كلام ثاني يسمعوه.. وامي اجت اخذتني لدكتورة وصار اليصار.. هسه احنا ما المفروض نلتقي بعد اهلنا منعونا .. بس هنا بالمدرسة نشوف بعضنا وهاهيه..
غزل : لحد ذاك اليوم لمن بلشنا دوام شفته براس الفرع مالتنا گال لتعترضيلها بعد واني زلمة زحمة اهدد النسوان.. بس خلي هلحچي ترچية بإذنج انتي والباقيات.. والأمانة لله خفت منه واحنا تغيرنا بعد..هذا كلشي..

عاينتلهن ببرود : الله يهديچن..ومااخذتن بس استحقاقچن .. چي أذيتوني وانه يتيمة خاطر تعرفن حوبة اليتيم شكبرها يم ربج..
عفتهن واخذت كتاب ورحت بالساحة اراجع.. اجت بنية صارت صديقتي كعدت يمي نراجع سوه ونسأل بعض وهيج خلص اليوم..

رجعت للبيت طبيت اسبح وتذكرت اليوم البچيت بي بسببهن.. الحمدلله ربي ماخذلني وانطاني شخص مثل رائد.. لو ابوي فلا يصدگني ويذلني.. راحت هاهيه ختولي ..

مرت ايام عادية..ابوي يجي كل فترة ينطيني فلوس والخط هو دافع شهرين ليجدام..مااحاچي بموضوع رائد اخاف يرزلني.. بس بيوم جنت واكفة ع الطباخ دااسوي سحور الي.. محد اكو حتى بيبي نايمة..گلت بيني وبين روحي ..مشتاقة لرائد اريد اخابره.. بس گال مااتسحر انه .. يعني نايم اكيد.. يله اخابره واشوف اكيد يگعد ع الآذان .. كملت وكعدت اتسحر.. فتحت تلفزيون اتفرج..خلصت وگمت غسلتهن بعدين اجيت ع التلفون.. اخذته ورحت للهول .. كتبت رقمه وخابرته..
ثواني وجاوبني بصوت نعسان : منوووو بهلليل..
وجهي صار احمر دم واختنگت من الفشلة..رأسا سديته.. ثولة ثولة.. اي هو انه گلت نايم شكو اخابر واعاند .. اوف امداني فوك ما گعدته ادور تفشلت..

كمت اقنع روحي ماصار شي..رحت شربت ماي كومة عبالي الماي بيه كله نشف من الصار..توضيت وانتظر يأذن.. دقايق واسمع التلفون يدك..رقم رائد .. رحت شلته بس ماحچيت..
رائد : الو.. تفضل منو..
: ها..انه ..
رائد : يولي نعلعلا..وانه عبالي تهديد صخام.. شلونج حبيبي.. هبطتيني..
دنوة : اعتذر..بس شنو ماگدرت يعني..ردت احچي وياك..
رائد : لا لا مايحتاج..ماطول انتي ميخالف كلشي مسموح..
ابتسمت : شلونك..
رائد : الحمدلله زين..انتي شلونج..
دنوة : زينة..
رائد : يمكن باجر اخر يوم رمضان.. والله انه اريد افطر اليوم گبل باجر..
دنوة : يا ليش..

رائد : ليش ابوج ماحچالج..
قلقت من كلامه : لا ماگال..شكو ..
رائد : حبيبي صحيح احبج..بس اريد تعذريني.. الظروف اقوى مني..
دنوة : يعني شنو شحيصير..ليش دتحچي هيج..
رائد : محگدر اخطبج..الظاهر مالنا نصيب.. وانه كبرت بعد اريد طفل يلعب يمي ويصيحلي بابا..
ايدي رجفت من كلامه..ماانقهرت بكدما انصدمت.. ماعرفت اجاوب..وانه كلما اگعد بيني وبين روحي احمد ربي علي بعدين هيج يگلي.. اخذت نفس وحچيت بعصبية : على فكرة تره انت حقير وماعندك احساس ابد..ولاتفكر تكدر تضوجني بكلامك هذا.. هاهيه صدك مالنا نصيب بس مايحتاج هيج تحچي بهلنبرة الحقيرة.. كرهتك .. وحسوي اليريده ابوي بعد احسنلي.. باي..

ردت اسده واسمعه يضحك بقهقهة.. كام يگح ويضحك .. اخر شي جلى صوته وحچه : اسف يبعد عيوني الأشوف بيهن.. اويلي شلون احب العصبي انه..طبعا افتقد للعصبية بحياتي .. بس اجاني التعويض هسه..
دنوة : شو سوالفك بايخة..
رائد : بوية حگج علي..تره اتخبل واحد يگعدني من نومي.. بس انتي صارت عندج زلاطة تگعديني..
دنوة : عفية دااحسك محملني منية .. اصلا صوچي بعد مااخابر ابد ابددد..
عاد كلماتي الأخيرة ديقلدني بيها : ابد ابد.. ههههههه .. عمي انه اريد طفل شسوي بي وعندي هلملاك البريئ..
سكتت ماجاوبته..ضجت منه شلون ديضحك علي.. صوچي ادري صوچي..

حس بيه ضجت..گال : دناوي اميرتي..مااقصد وداعة عيونج الشهل يولي يبعد طولي هلطول..
دنوة : لا سخافة وكلش ضجت..
رائد : حگج علي مسحيها بيه دنياتي..
ضل يتغزل ويراضيني.. رضيت مااگدر يعني اضعف بمثل هيج كلام وطريقة تأسرني..
گال : حبيبي ان شاء الله وره العيد تصير الخطوبة.. حيجي ابوج ياخذلج اجازة يوم الخميس وجمعة وسبت ارتاحي بيهن عود..
دنوة : هاا هيج..يله ماشي.. ابتسمت وحچيت لا اراديا : رائد.. مامصدكة صارت صدك..
رائد : وداعتج ولا انه مصدك..بس يله اصدك بطريقتي..
: يعني شنو..
رائد : صبري هلاسبوع وتعرفين..
: يله حصبر..
رائد : ههههه..يله گلبي روحي صلي ديأذن.. اروح للدوام انه..
: هسه تطلع..
رائد : اي هم يله اوصل..
ودعته وسديته.. گمت صليت ودعيت كلشي يمشي بهدوء .. تمددت بالغرفة يم بيبي وغفيت..

عاد صدك وراها چان اخر يوم برمضان.. وره الفطور نظفت البيت انه ومرة خالو افاطم..سبحت الفجر ونمت.. الصبح تفاجئت بيبي تگعدني ..
بيبي : گومي ولج ابوج يريدج ع التلفون..
كمت اخذته منها..
محيي : شونج بابا..ايامج سعيدة..
دنوة : وايامك ان شاء الله حجي..
محيي : الله يسلمج.. بوية حضري روحج هسه اجي اخذج..
دنوة : نرجع للبصرة..
محيي : اي..
دنوة : ماشي هسه حبدل..

سديته منه..گمت بدلت وحضرت هدومي.. اجه خالو عمار هو وبناته وسيف همات اجه .. خالتي گالت توصل الظهر .. شواي واجه ابوي..تريگنا يمهم بعدين اخذني وطلعنا للبصرة..

كالعادة الاجواء ببيت جدي دنيا ثانية.. خطاطير شكد .. ولو تعب بس تونست.. ضليت وياهم بالشغل .. چايات وتحلاة واشكال.. خابرت خالتي عايدتها هي والبنات .. هاي هيج مرت ايام العيد هوسة بس حلوة.. الخطار لحد آخر يوم يجون وراها بلشوا يخفون.. وره هلأيام طبيت سبحت ورجعت للغرفة تمددت..تذكرت رائد .. خطية بالعيد مو يم اهله.. شكد تضوج هلشغلة.. بس بعد هو متعلم.. نفضت الافكار وغمضت .. توني داخلة بنومي چان تجي سرور فززتني ..
كمت اصيح وعصبية : ادبسز ليش تگعديني صار يومين مانايمة حقيرة ولي طلعي..
سرور : هو مو صوچج..صوچي اگعدج..رائد يريدج ع التلفون ولج يالفايخة..

اخذته منها وخزرتها..ضحكت وراحت..عايدني وگال عيدي هلمرة صدك عيد لمن تصير الحلقة بإيدج.. ودي اشبگه .. حتصير شبگته حلال.. ابتسمت ..رجعت التلفون لسرور واجيت نمت..

وراها صدك اجت ام رائد واخلاص اخذتني انه وخالة ابتسام گتلها تعاي وياي مااعرف.. اشتريت ذهب وشغلات لخ.. طبعا بالگوة يله عجبني شي .. حلقات وگلادة زنجيلها كعب الغزال يسموه .. بي مدالية بحرفه ماردت بحرفي.. سوار ومحبس .. هو ناطيها بعد فلوس بس راعيت ان هو صارف اكثر من هلمبلغ بأضعاف علمود البيت.. كملت الأحتاجه وأجرت فستان خطوبة.. طويل ومخصر .. ورجعنا للبيت .. اجت ورود مثل الحية هي وامها تبحوش بغراضي.. ها ششتريتي وبيش.. اخذتهن منها وراحت هي تستفسر من فلانة وعلانة..

يومين وسمعت رائد نازل من الواجب.. طرت من الفرح..هو ماچان موجود فالحلقة اشتريتها حسب كلام امه.. بهلأيام حتى نسيت الدراسة..كلت انه اول وتالي حيبطلني فعالاقل عندي رائد بمكانها .. وراها بلشنا نحضر للخطوبة وحيصير العقد بنفس اليوم.. اجت ام رائد انطتني فلوس للصالون وعمو قاسم اخذنا.. انه والبنات ..خالة فاطمة هماتين وورود.. خالتي اجت وياي گالت البنات اجيبهن وره ما نرجع..نزعت الشال وفكيت شعري.. ام الصالون والگاعدات كالن ماشاء الله.. گعدت وبدت تسألني شتسويلي وشريد.. گصتلي الأطراف وسوتلي مكياج بسيط .. حفيت لأول مرة .. المهم طلعت حلوة ومتفاجئة بشكلي شلون صار.. كملنا وورود خابرت على عمي لواء اجه اخذنا..

اول ماطبيت للبيت لكيت ابوي واگف ديخابر وعصبي مافهمت شكو.. شافني چان يسده واجه يمي .. ابتسملي وباسني من راسي..
محيي : تخبلين عيون بابا..
دنوة : شكرا بابا..
دخلني جوه وراح.. اجن بنات خالتي وگعدنا.. ضحك واغاني .. لحدما گالوا اجه الشيخ..بس ماسمعت رائد جاي .. قلقت.. كمشت ايد سرور ..
شاورتها : رائد وينه..
سرور : مااعرف .. عساس بالطريق ..
دنوة : جيبي التلفون اخابره..حافظة رقمه..
راحت جابته واجت..كتبت رقمه وخابرته.. مايجاوب .. يضل يدك لحدما يفصل..

صار حچي بعد نسوان شلون مايحچن.. ها وينه .. من أولها شرد منها چا بعدين شيسوي.. الشيخ راد يطلع لأن عنده بعد عقد بغير منطقة بس لخاطر جدو بقى .. تأخر كلش.. كلها تخابر علي مايجاوب.. آخر شي سمعت صوت هوسة بره.. گمت فتحت البردة اشوف شكو ..

گلبي صار يدك سريع بشكل موطبيعي.. بالگوة كامشة روحي مااريد ابچي..شفته واگف وشفايفه مورمة طاگة دم من الطرف .. دگم القميص الاولى والثانية طافرة حالته متبهذلة.. كمشت ايد دنيا وعيوني مدمعة..
دنوة : شبي..روحي سمعي شبي..
دنيا : هسه راحت حلا تشوف..

عمي كاظم طلع مستعجل هو وعامر مااعرف وين راحوا.. فات رائد صار صوته واضح يمي هو ويحاچيهم..
محيي : أجلها ماتكدر اليوم..
رائد : لا هسه يجي ابوي يجيبلي قميص.. اليوم اعقد مااريد أأجل..
شامخ : متأكد..بوية شوف روحك..
رائد : اي متأكد..مااريد اكسر فرحتها .. هاهيه مابيه شي..

هو وديحچي فاتت حلا وسدت الباب وراها..اجت گعدت يمي وعيونها تسولف گبلها..
حلا : ولج عقيل متعارك وي رائد .. هسه هو بالمركز راحله عمج كاظم.. هذا شيريد من الرجال والله حلوة..
شهگت وخليت ايدي على گلبي بخوف : چذابة.. ليش شلون .. هسه اووف ماادري حلا..
گمت ابچي من حظي المعثر .. حلا وسرور يردن يسكتني مااگدر.. انكسرت بهليوم ليش يعني ..
ضل الوضع هيج متوتر لحدما اجت سرور عدلتلي المكياج.. وگفت وره الباب وبدا الشيخ يسأل عن موافقتي بمهر كذا مبلغه والمؤخر..
گال : قولي انت وكيلي..
رددت وراه لحدما انتهى كلشي والابتسامة مافارگتني .. تناسيت موقف رائد وامتليت بفرح الدقايق هاي.. خالة هلهلت وجديتي هماتين.. اجت سرور حضنتني وباركتلي والبنات ..

وراها گالوا حيفوت.. لبسن شالات ومنهن العباية فوگاها چي گصيفات.. دخل مبتسم ومبدل قميصه.. وگف يمي يحاچي امه ماسمعت شيگول بس صافنة بملامحه وتفاصيله .. گعد يمي كمش ايدي سحبها خلاها على رجله.. كهرباء مشت من اصابعي لإيدي لكل جسمي.. صخنت من لمسته الرجولية .. لبسني الحلقة وانه هماتين.. بعدين الگلادة والمحبس..
تقرب مني وهمس : ذوقج حلو.. احب النزاكة ..
ابتسمتله : اشكرك..

رائد : حبيبي تعذريني ع الصار اليوم..بس صارت بعد..
دنوة : ضل بالي عليك..
رائد : راحت هاهيه.. خليني فرحان بيج هسه..
اندار على خالة حاچاها مدري شنو..طلعت والبنات طلعن وراها .. ضلينا وحيدنا..
عاينتله مستغربة : مايصير..
رائد : ليش يابة..مرتي انتي هسه..

مد ايده لشعري ونظراته تتفحصه بتركيز : شفته بالحلال.. اويلي لو ينباس ابوسه..
ادنى علي وبلحظة فصلت تفكيري .. خلتني اتأكد واتيقن ان الصار حقيقة .. صرت ملك لرائد .. الانسان المستحيل ينرفض .. الفستان تفصاله نازل من الچتف..باسني من متني .. جسمي كزبر لمن شواربه لامست نعومة جلدي.. خليت ايدي على صدره دفعته بشكل خفيف وهمست : رائدد..
ابتعد وباسني من خدي..
رائد : هسه صدگت صارت صدك.. غمزلي..
ابتسمت بس بعدني ضايعة بحركاته..

گام هو ويعدل بقميصه..
كمشت ايده.. عاينلي وضحك : اي هسه كمشي براحتج..
خزرته ومبتسمة : هاي ليش تخجلني هيج انت..
ادنى باس ايدي ورفع راسه : گلبي يصافگ ع اليستحي يولي .. يله اروح بعد..
گمت وگفت .. : ماشي..
عاينلي من فوك ليجوه : نسيت اگول لاميرتي طالعة اميرة..
دنوة : شكرا عيوني..
ابتسم وراح .. فاتن النسوان يضحكن .. هو ليش يبقون وحيدهم العاقدين..فيعني يعرفن.. ضلينا گاعدين .. جابوا اكل انه مااكلت .. تانيت تخلص الحفلة وگمت اريد ابدل تعبت.. رحت للحمام طلعت الماشات وسبحت.. سرور اخذت الفستان خلته بتعلاگته باچر ابوي يرجعه.. كملت ورحت تمددت من التعب غفيت ماحسيت..

ثاني يوم صادف دوام وعندي امتحان..ابوي ناسي ياخذلي اجازة.. اهو تعال حاچيهن ومايقبلن ..اشوف شسوي.. مشى اليوم بهوسة عقيل ورائد.. عقيل مخابره متعيله علمود يسويله شغلة.. لمن واصل لهناك كاتله يگله افسخ ..والله حلوة هاي .. هو انه يمكن شايفته مرتين شمعرفه بيه.. عاد جاي صديق رائد ماخذ عقيل للمركز ورائد رجع بهذيج الساعة..

المهم عدت على خير وعمو كاظم تكفل بي وطلعه.. هسه هو بالديوانية .. باليوم الوراه گعدت الصبح بدلت واخذني ابوي لبغداد وهو راح لشغله..بيبي باركتلي وعيونها دمعت.. مسحتهن وبستها..
دنوة : شبيج بيبي..
بيبي : تذكرت نفسي..اني همين انخطبت صغيرة مثلج..
دنوة : ااممم..لا بيبي لاتخافين..تره رائد حباب كلش.. والحچي بيناتنا.. بيبي كلش احبه اموت علي ..
ضحكت وندهتني بإيدها : ولج لسانج طلعه هلرائد هذا..
دنوة : هههههه..اي هو يستاهل الحب..
بيبي : ولج امشي..

ضليت اضحك على سوالفها.. نظفت البيت وگعدت اقره .. قريت للأمتحان بلكت اكو مؤجلات وتمتحني وياهن.. كملت بالليل ورحت نمت..ثاني يوم شفت الجو بارد ثلج.. لبست السترة الفرو ..الحذاء الاسود لمعته والصدرية القماش.. كالعادة شبر فوك القدم .. كعدت بالمطبخ انتظره..شواي وسمعت هورن بس مو مثل مالت ابو الخط.. اخذت الجنطة وطلعت من باب الفضول..واشوف رائد گاعد وايده ع الستيرن.. ابتسملي وأشرلي براسه يعني صعدي.. سديت الباب واجيت صعدت..
رائد : صباح الخير حبيبي..
دنوة : صباح النور.. شو انت شعجب ..
رائد : اي بعد ابو الخط ياخذ نص شهر والنص الباقي انه اوصلج بوكت اجازتي..
دنوة : ليش اتعب روحك عيني..
رائد : لا گلبي بالعكس .. هم منها اروح للمحلات..
دنوة : هاا..براحتك..

دقايق ووصلنا.. ردت انزل..
گال : وين وين..
انداريتله : شكو..غير وصلت..
كمش وجهي بإيده وتقرب باسني من خدي.. ابتسمت بس مستحية من الموقف.. ودعته ونزلت ..تذكرت گال السيارة مظللة يعني محد شاف..

مشى اليوم طبيعي..ضامة ايدي بجيب السترة مااريد أحد يشوف الحلقة..خصوص هن هنا ماعدهن زواج بهلعمر.. حسب السمعته من الطالبات..يمنا عادي هلشي.. گبل الدرس الاخير رحت للمدرسة گالت ماامتحن وحبرت بعد.. شكد حقيرة شبالعجل حبرتي..شرحتلها حالتي ماقبلت ولا تعاطفت..
- : ماطول مااخذتي اجازة حتى الامتحان الجاي متمتحنين.. عوضيها بنص السنة..
دنوة : ست لي...
- : ليش الظاهر ماحاچيلج البنات عني وعن طريقتي بالامتحانات.. تفضلي طلعي وبعد مااريد تجيني..
طلعت منها متفشلة وخايفة ع الدرجات..ابوي هسه ياخذها حجة ومنا صارت خطوبتي رأسا حيبطلني.. گمت ابچي لحدما دك الجرس وطلعت..

ادور رائد ماكو.. ضليت انتظره ثلث ساعة يله اجه.. صعدت وعطت : ليش تأخرت..هسه فوك ما ضايجة..
رائد : يالله..شبيج ليش البچي والعيون حمر..
دنوة : المدرسة ماتقبل تعيد الامتحان..ادور حتى شهر ثاني ماتقبل امتحن بعد..بله هاي صايرة ها..شهلحقارة..
رائد : امتحان شنو عندج..
: رياضيات..
رائد : راجعي اليوم وانه باچر اروح احاچيها..
دنوة : ماتقبل والله..
رائد : باباتي راجعي وتأكدي حتمتحنين..
: يله نشوف..

گرص خدي ووصلني للبيت.. عفته ونزلت .. راجعت وقريت للامتحان مال باچر ومشى اليوم طبيعي..ثاني يوم اجاني الصبح طلعتله ورحنا للمدرسة.. نزل هو ويعدل بقمصلته.. الحذاء يلمع مثل كل مرة..شگد يلفت ناظري.. فات وياي حاچه المدرسة.. هي عصبية وتصيح
- : عيني هي مهملة .. اني منبهة طالباتي ميتهاونون بإمتحاناتي ابدا..لأن مااعيد وحتى شهر ثاني ماامتحن..
رائد : ظرف طارئ والدها كان تعبان فماگدر يجي ياخذلها اجازة.. ثم احنا من سكنة البصرة يعني لازم يعبر هاي المسافة كلها علمود اجازة..
- : اي وليش لا.. حضرتك شتشتغل..
رائد : رائد بالجيش..
گامت تبلعم وتعتذرله.. كالت امتحنها شهر ثاني وانطيها يومي كامل بالشهر الاول بدون امتحان.. كيفت ورحت للصف ..

مرت ايام على هلنمط..لمن ينزل للواجب يجيني ابو الخط.. سرور تخابرني دائما وابوي يمرني كل اسبوع.. كلش ارتاحيت بهلفترة وطايرة من الفرح..

بيوم خلص الدوام وحليت..لگيت رائد واكف براس الفرع منتچي ع السيارة ويدخن.. گطوف هواي جوه رجلي.. تمشيت لعنده.. ذبها وابتسملي ..صعدنا وطلعنا.. شفته فات من غير فرع وطلع ع الشارع الرئيسي..
انداريتله : شو هنا ليش..
رائد : حنزل للواجب باچر اريد اشوفج..
اخذ ايدي خلاها فوگ الگير وايده فوگاها يفر بالحلقة.. درت وجهي ع الجامة نزلها شوي..

شميت ريحة گص وهيج بيني وبين روحي گلت الله مبين طيب.. مااحس غير لاف السيارة وراح لابو الگص..
جريت ايدي بالعجل : لا شبيك تره مااريد مااشتهي..
ضحك ماجاوبني..راح نزل وره شوي اجه جايبلي وحدة وقوطية ببسي وياها گصبة..خلاها بحضني وخابر على بيبي ..
: هاي ليش دتخابر..
رائد : نطلع ع الجادرية شوي.. شو ضايج ماادري ليش.. فگليلها حتأخر.. دك وانطانيا حاچيتها..
دنوة : بيبي حطلع انه ورائد..
: ها ولج..خاف ابوج ميقبل..
عاينتله سوالي حركة يعني حاچيته : لا هو حاچاه وقبل..
: يله براحتج بس لتتأخرين ماما ميصير..
دنوة : ماشي بيبي.. بيباي..

سديته وانطيتهيا.. ضليت اعاينله عاگد حواجبه وعصبي .. ماادري شبي.. خليت ايدي فوك ايده .. عاينلي بتعب وقربها من شفايفه باسني..
دنوة : شبيك تعبان..صاير شي..
رائد : لا ماكو شي..
دنوة : مدااحسك هشكل..
سكت ماجاوبني..

وصلنا للجادرية كال نزلي..ذبيت الجنطة ونزلت.. باردة والشمس غايبة .. چنها حتمطر..حضنت إديه بالسترة الفرو.. اجه يمي وتمشينا نزلنا جوه اكو مثل الساحة والنهر گبالها .. همات اكو مصطبات وواحد يبيع حب حار.. گعدت على وحدة قريبة من الحافة وهو راح يشتري حب.. اجه كعد يمي وماد ايده بيها الچيس مالت الحب.. اخذت بس استحي اكرز ويطلع صوت..
گال هو ويعاين ع النهر : لاتستحين يولي..
سكتت ماجاوبت.. بس صدك دقايق وتعودت..
تقربت منه وهمست : باردة..
رائد : هسه شوي ونرجع حبيبي..
دنوة : زين شبيك ضايج..

رائد : هيج يروح روحي..حسبة ببالي.. شلونج بالامتحانات ..
دنوة : زينة بس لاتغير الموضوع..
ماجاوب..نزع الشماغ چان لافه على رگبته : دترجفين..
انتبهت إديه ترجف ورجليه هماتين..اخذته وگمت هو همات.. تمشينا ع الحافة ..راحة ايده حاضنه ايدي بحرارة رجولية.. شواي ورجعنا للسيارة.. ضميت اللفة مااشتهي هسه .. وصلني للبيت گبل لا انزل شفته يعاينلي بتعب .. تقربت شبگته وبسته من خده.. : مااعرف شبيك.. بس اتمنى يكون شي بسيط ..
ابتسم وباس ايدي : فدوه اغدي لعيونج..
ودعته ونزلت بس گلبي يحسسني اكو شي.. طبيت للبيت بيبي بدت تستفسر وين رحنا سولفتلها كلشي ورحت نمت..

بعد فترة گصيرة بلشت الامتحانات الشفهية..امتحنتهن كلهن بيوم واحد وراها گعدت اسبوع اراجع النقوصات وأضبط .. بهلأسبوع اجه ابوي يشوفني.. خالو هنا فگعدت يمهم ..
دقايق وگال : بابا طلعي وسدي الباب وراج..عندي حچاية وي خالج..
طلعت بهدوء وسديت الباب وراي.. اجت بيبي تشرب دواها..
شافت الباب مسدودة .. : ابوج طلع..
: لا بيبي..
بيبي : لعد وينه..
: كاعد وي خالو ديحچون ماادري شكو..
بيبي : ها..دشوفيهم شكو ..
حركت راسي بالموافقة وضليت رايحة راجعة مااهتميت شديحچون بس لمن سمعت ابوي گال رائد انجذبت للباب تلقائيا..

محيي : مااعرف خوية..هو انه كلت اخذ شورك..
عمار : شكد مديون هو..
محيي : تلاثين مليون..مدري خمسة وتلاثين..
عمار : استغفرالله هواي هيج.. ابو دنوة انت بليت الرجال بهلبيت.. خطية قابل هو وحد عن الشباب وعنده فلوس.. فوگاها كلت اختاريته بمنطقة ..... يعني ماادري والله..
محيي : والله ولا اطيقه..واريد اكسر راسه همات..بس يبهذل بتي اذا اخذها وهو مديون هلكثر..

عمار : عليش انطيتها لعد .. حتى اذا چانت متحبه فهسه بعشرتهم هلفترة رغبته..
محيي : رغبته شني.. ماعدنا حب وتمعشگ .. خلاشوف هلفترة اذا ماسدد الدين اطلگها منه..

عمار : التشوفه انت..بس اخي هو ابن اخوك قبل لايكون أي شي ثاني..فلازم تساعده يسدد الدين..
محيي : مايطلب مني .. حتى كاظم والباقين ماطالب منهم.. بس ذاك اليوم چنت بالمحل واجه واحد گال انت مو عم الرائد رائد.. كتله اي.. گال هو خوش زلمة ويوفي بكلمته بس هلفترة معوز واريد الدين.. عاد من عنده عرفته مديون..

انصدمت من عرفت المبلغ الضخم المداينه.. ليش هشكل مسوي ودايس على روحه .. تذكرت لمن گال ضايج واخذني للجادرية.. ماحچه .. اي ماگال .. ليش ماگال .. اووف شلون شسوي شلون اگدر اساعده.. رحت على بيبي حضنتها وسولفتلها شسمعت..
دنوة : بيبي شتگولين..ابوي يطلگني منه..
بيبي : لا حبيبتي لتكولين هيج..ان شاء الله يوفي الديانة .. هو اكيد تعبان من التفكير شلون يسددهم بس ماراد يحچيلج خاف تحملين نفسج ذنب الصار..
دنوة : اي بيبي كله بسببي..حتصيرله مشاكل من وراي..
بيبي : لتحچين على نفسج يوم.. الله كريم لتتسرعين ..

سكتت ماجاوبتها.. مر الاسبوع وبلشت امتحانات.. راسي گام يوجعني من التفكير وتعب الامتحانات.. رائد ماكو خابرته مرتين يطلع مغلق.. ادور خفت لاصايرله شي ..حملت روحي كامل المسؤولية .. تعبان هو نفسيا وجسديا وانه گاعدة عبالي كمل مشتراة البيت من فلوسه..

اخر شي گبل الامتحان الاخير كاعدة بالهول دااراجع الدفتر .. كملت وصفنت شوي .. احسن شي انطي الذهب يبيعه.. اي ماكو غيرها.. اكيد حيساعده بمبلغ معين حتلو قليل بس المهم يساعده.. اي هاهيه بس يجي احاچي وانطيهيا.. اصلا ماالبسه بس الحلقة خالتها بإيدي..

ضميت غراضي ورحت نمت.. خلصت الامتحان والوراه هماتين .. طلعت اخر يوم البنات متونسات ومسويات گعدة مدري شكو..رحت صعدت بالخط ورحنا لمدرسة البنات .. شگد ضلينا واگفين عيني چي اخر يوم فيريدن يودعن بعض.. كلشي دينرفزني هاي الفترة..حتى الهوى العالي.. وصلهن ورجعني للبيت.. شفت سيارة رائد واكفة بالباب .. نزلت بالعجل.. شمرت الحذاء وطبيت..
صحت : بيبييي ..
طلعت من الهول : هلا يمة اجيتي..
اجت يمي وهمست : زوجج هنا .. فوتي شوفي..

خليت الجنطة على صفحة وطبيت.. سديت الباب وراي .. هو گاعد ولابس عسكري.. شعره مخربط وعيونه مطعن جواها .. گام وكف.. تقربت منه شبگته حيل ومحاوطة رگبته..
دنوة : مشتاقتلك..ضل بالي عليك..
بعدني وباس خدي : ماافتح التلفون بالدوام.. تعاي گعدي .. مريت على مدرستج مالگيتج كلت طلعت..
كعدت بسده ع القنفة .. هو محاوطني من چتفي وايده اللخ يفر بالحلقة..
رفعت راسي عاينتله : رائد .. اسألك وجاوبني بدون چذب..
رائد : كولي حبيبي..
دنوة : مديون انت.. وشكد يطلبوك ..
رائد : بنيتي شنو هلحچي منين سمعتي..ماكو هيج..

وخرت ايده من چتفي وكعدت مقابيله : سمعت من ابوي.. ليش هيج سويت..انه الك اول وتالي..ليش وازيت روحك.. صار عشر ايام مانايمة عدل بس افكر وخايفة عليك..يعني ليش تسوي هيج.. كمت ابچي واعاتبه على تصرفه..ادري چي يحبني .. بس فضلني على روحه وحياته..مااريد هيج.. مااريده يتوازى..
كام يمسح دموعي ويبررلي : حبيبي لاتبچين گلبي.. والله محضر الفلوس دااسدد كلما استلم الراتب.. وفلوس المحلات هماتين دااخذ الوارد واسدد..

دنوة : لا چذب..ابوي گال مطلوب هواي..مايتسدد بيوم وليلة.. انطيك الذهب بيعه وسدد بي..مااريده حتى الحلقة عادي بعدين من تستقر اشتريلي ..
خزرني وحچه بنبرة جدية : لاتحچين هشكل بعد.. لو اطيح الدنيا على متوني هم لاتگولين هيج خوش.. شلون اكسرج بالذهب وانتي بأولها..چا بعدين شسوي.. ابيعج ..

عاينتله بنظرة مكسورة والدموع بعيوني : مو خايفة عليك..
باس ايدي ومسح دموعي : لاتخافين..انه لو متوازي اطلب من عمامي وجدي خو همَ اولى بالعونة..بس الناس الاداينت منهم صحباني اللح وخوالي..يعرفون وضعي يعني.. فلاتگولين لأحد رائد مديون.. انه اعرف شدااسوي..وهاي فكرة الذهب شيليها نهائيا.. فهمتيني ..

تنهدت بدون مااجاوب.. ضل يحاچيني يريد يقنعني.. عقلي قنع لأن كلامه منطقي..بس گلبي لايب علي.. ضليت گاعدة يمه شوي فرحت بجيبته..اجت بيبي كعدت يمنا لحدما ترخص وراح.. طلعت وراه سديت الباب ورجعت ..
سولفتلها لبيبي شگال..انطتني أمل ان يكدر يسدد ويمشي كلشي طبيعي..

وره يومين اجه ابوي ورجعنا للبصرة.. بيبي خابرتني لمن وصلت ومن كلامها عرفت مرة خالو الاولى راجعة..عود شنو چي انه هناك ماتجي..حسيت روحي ضيف ثگيل..وهو ابوي اصلا گال وره نص السنة ارجعج لمدرستج الاولى.. بعد ماادري بس اريد ارتاح هلفترة من التفكير والضغوطات..

تقريب الاسبوع مر طبيعي.. ماكو شي ..ورود فاكة عينها علي.. ها يحبها واخذها حتى بيت اشترالها..عاد جدة تلصمها لمن تگللها احسن مما يلعب.. وره هلأيام حضرنا العجين واخذته لوره البيت علمود نخبز..التمينا كلنا..
بلشنا نخبز وحچت خالة ابتسام : حبيبتي دنو جيبي الچرچف فرشي نذب علي الخبز..
دنوة : اي هسه خالة..
گمت اجيبه واشوف باب الديوانية مفتوحة.. عمو كاظم واگف ويمه ولد ثنين گصة عصام واحمد.. بنية هماتين تطلع بگدي.. منو هذول.....

يتبــــــــــــــــــــع....................