رواية اسألي عني الليالي الفصل السابع وخمسون 57 - بقلم رقية جاسم

بغيابك ذبلنا ورگة .. ورگة ..
والله اشعل الروح شموع .. لو جيت ..

تدري انته شكثر تكتل الفرگة ..
احرگ عمري لك لو يوم رديت ..

قناة التليگرام

حساب الانستگرام

الـبـارت الـسادس والـخـمـسـون................

مرت الايام ماكو شي..سرور كل يومين خابرني تصبر بيه .. الولد هذاك الراح وي صگر همات ماكو خبر عنه..وهاي هيج لحد ما اجة علي لبيتنه الفجر..جنت كاعدة اصلي وسمعت صوت حجي جوه..لبست الشال ونزلت شفت علي كاعد مبدل ومخلد همات..عرفتهم حيرحون لبغداد..بقيت واكفه ع الدرج لحد ما راحو وصعدت فوك..دعيت لحد ما غفيت.. كعدت الصبح مالي واهس بشي..بس على أمل جية مخلد .. ضلينه منتظرين على جمر..لحد ما اجو بالليل..طلعت بالعجل فتحت الباب..محد عاين بوجهي كبل فاتو جوه..هنا ما اعرف شفسر احساسي..الف فكرة اجت ببالي..

سديت الباب وطبيت بالعجل..خالة اجت متلهفة وتريد تعرف شسوو..صار يومين منتظرين ع الجمر..
الحجية : هله خالة هله..كعدو تعبانين من الدرب..
علي : الله يسلمج خالتي..
الحجية : دنوة جيبي مي للولد..
جنت واكفة يم باب الهول يطلع ع الكليدور..تمشيت للمطبخ اخذت مي وانطيتهم..دقايق واجة الحجي وائل..
وائل : بشرو..شصار..ماكو خبر..
مخلد : ماكو شي..شوفتهم صورته..اسمه الرباعي خاف يطلع تشابه اسماء..كال ماكو هيج اسم صار شهرين ما اجتنه حالة مثله..مو انوب ضابط.. هاي اول يوم كال هيج..ثاني يوم هم رجعتلهم..كال اجتنه حالتين وفاة..حالة الوفاة قديمة بس هسة واصله للطب العدلي..

طبيت شفت واحد منهم وعلي شاف الثاني..محد منهم صگر ولا لمحة اصلا..
علي : اي والله..انه حتى خابرت ابو مهدي من تلفون مخلد كال هسة ادزلك ابن اخوي هو ببغداد..بس انطيني عنوانك .. كتله بالطب العدلي..عاد هو اجه وشافهم ثنينهم كال هذول وين ومهدي وين..كال دورنه بكل مكان يروحله هو دائما بس ماكو تكول فص ملح وذاب..بقت من ربك..هو راح واحنه رجعنه هاي جيتنه جدامكم..
الحجي اندار على خالة ويحاجيهه بنبرة مكسورة : ما تكليلي وين راح هذا..بط گلبي والله..ما خلينه متر يعتب علينه بعد وين ادوره..هسة لو هو مو ضابط جان كدرت اوصل من خلال اشخاص للسجون..توقيفات..بس هو ضابط..شيودي هناك .. حتى ما ترهم فشلة..

الحجية : بس والله گلبي يعلمني..يكلي عايش وموجود حيرجع بس مطول..
وائل : هسة شيفيدنه كلبج اذا طلع بي شي..
الحجية : لا مابي شي..انه ام..ام..يعني احس بي هو وبعيد .. دورو..بس مصيره يرجع..
وائل : تحجين اوهام..بس خاطر ترضين روحج..
الحجية : لا مو اوهام..ماكو واحد يحس مثل الام..هو هذا اليميزهه عن الاخت والزوجة وغيرهه..
كام وكف وراح لغرفته هو ويستغفر..ما عاجبه الحجي.. علي ضل شوي بعدين راح..كال مرام وحدهه وي الجهال.. ضليت كاعدة يم خالة..كلامهه ذكرني بصوته بالغرفة..انه همات احساسي يكلي عايش ويشتم الهوى..تقربت منهه..كتلهه : خالة..ارد احاجيج بشغلة..

بس لا تفهميني غلط..عبالج بيه شي..
الحجية : خير ياربي..كولي حبيبة ما افهمج غلط..
دنوة : انه همات اكول صگر عايش..
الحجية : يالله..همزين واحد منكم يريح كلبي بحجية..
دنوة : اي والله..دا اسمع صوته دائما بالليل لمن اروح انام .. خالة عبالك كاعد جدامي ويحجي هلكد ما صوته واضح
شهكت وخلت ايدهه على حلكهه : يمة يمعزاية..
رادت تكمل قاطعتهه : خالة مابيه شي..دا اخذ دواية وملتزمة مو جدامج..بس متعودة علي وعلى حسه بالغرفة..حتى ذاك اليوم كمت اصلي وابجي..غمضت عيوني عبالك اجاني طيف كلي لا تبجين..موجود..
الحجية : الله يسمع من حلكج..خالة بعد لا تنامين وحيدج .. تعاي نامي يمي..استوحش وحدي..

دنوة : بس خالة مابيه ...
قاطعتني : ادري مابيج شي..بس انه اريدج تنامين بغرفتي شنو ما يصير يعني..جنتي وبكيفي..
ابتسمت بتعب : تدللين..اجيب بطانيتي واجي..
مسحت على راسي وبهدوء خلته بحضنهه..كامت تحاجيني ع الدوة مالتي ونومتي..خافت عبالهه رجعتلي الحالة النفسية .. هو انه كلت ما احجي بس الموقف جبرني..ردت اطمنهه واطمن روحي وياهه..بس فرحتني بموقفهه..شلون اهتمتلي .. حتى كالت بعد انه ادقق وراج خاف تزاغلين منا منا.. ادور تروحين تتمرضين واحنه بيا حال..مو ما احبج بس بيمن التهي .. التهي بروحي لو بمصيبة صگر لو بيج..شكد حاولت اقنعهه مابيه شي بس هي قفلت بعد..وحقهه..بعد الصارلي والبهذلة العشتهه..خاصة من ردت احرك روحي..

طبعا تكول هيج وتخاف علي..
ضليت يمهه شواي وكمت صعدت فوك..اخذت المخدة مالته والبطانية ونزلت..ع الدرج وصادفتني سلمى..
سلمى : ها اشو نازلة شكو..
دنوة : خالة كالت استوحش وحدي..
سلمى : يله لعد تصبحين على خير..
ابتسمتلهه : اجمعين..
نزلت خليتهن بالغرفة ورحت للمطبخ اكل علمود الدوة.. دقايق واسمع مخلد يحاجي اسماء..هو يريد يصيح بس كاتم صوته بالكوه..سكتت واسمعلهم..
مخلد : والله لو ببيتنه جان جنزتج من الكتل..
اسماء : اااا .. عشتوووو..كال يكتلني كال..انت بس مد ايدك عليه وشوف خواني شيسوون بيك..

يله موزين متحملة خبالك وخبال اخوك ابو المصايب.. اخدم واطبخ اني وساكتة..عبالك خدامه مو مرة..بس كل هذا ما غزر بعينك الزايغة..تحط عينك عليهه..جعلهه تنفكس..
هي كالت هيج وسمعت صوت راشدي..هلكد ما قوي تأذيت من يمي..شهكت وغصيت باللكمة..كمت اكح..طب هو وياهه .. شافني مختنكة اجة انطاني مي بالعجل..شوي تحسنت بس بعده بلعومي مشحوط..كتله : شكرا..
مخلد : العفو..خوما تأذيتي..
دنوة : لا زينة..
تضايقت من وجوده..عفته ورحت للغرفة..بقينه كاعدين انه وخالة..ادور اجت ام مخلد كعدت ويانه..الدوة مالتي يسطر ضليت احاول ابقى كاعدة بعدين غفيت من وحدي..

مرت تلث ايام ماكو شي..محد خابر..كلهه ملت..جدي خابر الحجي ابو مخلد اخر شي كالة انه سويت العلي..بقت يم الله شوف شلون تفرج..خالة كلبتهه بجي ومناحة..ضلت ساعة تبجي وتتحسر..وينك و وينك..كلنه بجينه على بجيهه.. صدك تقهر وتمرد الگلب مرد..
خاصة لمن كالت : لا يروح ويخليهه يتيمة..
تقصدني..ما كالت يخليهه ارملة..تدري بي شلون يحبني .. يحبني مثل بنته كبل مرته..وهاي كلمة بنيتي ما تنزل من حلكة جدامهم كلهم يكلي هيج..
انه لمن سمعتهه كالت هيج انفجرت بالبجي..دموعي تصب مثل المطر..انقهرت على روحي ووضيعتي..كل دمعة تحرك گلبي مو خدودي..الحجي من شاف وضعي كف عني..كام ما يحاجيني تجي الكلمة على لسانه ويسكت..

هو منو اله نفس يحجي اصلا..لو ساكتين لو نحجي بموضوعه وشنو ممكن يصير..همات كلهه احتمالات..نريد شي اكيد ماكو ..تعبنه..
وراهه اندكت الباب العصرية..جنت كاعدة بالصالة انه وسلمى وشهد..عدلت الشال وكمت افتحهه..صارت اخلاص بوجهي .. عيونهه مورمة مبين باجية وبطنهه واصلة لخشمهه هلكد ما عالية.. سلمت عليهه وفاتت جوه..سديت الباب ورحت وراهه .. بباب الكليدور واشوفهه حاضنه خالة وتبجييي..
اخلاص : افيييش يمة ريحتج والله اشتاقتلهه..بعد عيني والله اشوف صگر بيج..
وخرت عنهه وباستهه من راسهه وخدهه بعدين فاتو جوه.. سديت الباب ورحت للمطبخ صبيت عصير وقدمتلهه .. هي بلا كلشي ما تعاين بخلقتي..ادور هسة..

ضلت كاعدة وتسأل عن صگر..وين دوروا وشديصير .. نفس الحجي كل يوم ينعاد..كل شخص نحاجي يكول نفس الكليشة محد بيده شي..بس منتظرين خبر من مراكز الشرطة بلكت ع الاقل يلاكون مهدي..هو حيعرف وين جانو اكيد..
اجن البنات سلمن عليهه وكعدو كلهم..خلص اليوم عادي .. شوي التهينه باخلاص..صارلهه كومة ما جاية.. عيونهه لمن شفتهه جانت مورمة جي باجية..بالطريق باجية على صگر .. هي تحبه..بس تكرهني انه..ماطيق تعاين بخلقتي.. عاد انه همات لا اجي يمهه ولا شي..بالليل سويت عشه زين .. اكلت وياهم شوي وصعدت..كلت كبل لا يتغدون بيه اتعشه بيهم.. احسن مما يفلشني الحجي جدامهه احسب روحي بهدوء واصعد فوك..هن هواي بنات عود خلوحدة منهن تغسل المواعين مو بس انه بنية هنا..

طبيت للحمام توضيت ورحت للغرفة..قريت قرآن وصليت.. لحد ما صارت بالدعش اخذت الدوة مالتي ونمت..
ثاني يوم مر طبيعي ما صار شي..اخلاص ساكتة .. اخاف هذا هدوء ما قبل العاصفة..ادور بعدين تكب بوجهي مثل خوالهه..مو غريبة ولا استبعد هيج تصرف..منهه خصوصا .. سلمى تحاول اطلعني من جو الكآبة الاعيشة..لمن تشوفني كاعدة وحدي كبل تجي تحاجيني..مثل ذاك اليوم..
سلمى : عليش صافن الحلو..كومي نطلع بالحديقة والله مليت من البيت..وهسة الجو حلو يسوي واهس..
دنوة : ما اريد اكسر بخاطرج بس مالي نفس بشي..
سلمى : الله يساعدج ويخفف عنج..انتي سباعية وقوية .. وحده غيرج تعيش بمثل هذا الجو والبيت وغيرهه من الظروف جان انتحرت لو تخبلت رسمي ..بحيث لا يفيدهه علاج ولا هم يحزنون..

بس ربج يعرف المن يختبر..لو ما يعرف انتي تكدرين تتحملين جان ما خلاج تمرين بكل هاي الظروف..ثقي.. اني خالتي اعتبرهه قدوتي بهواي امور..كلش تعبت بحياتهه وشافت الما شافه احد.. رجلهه عدموه ظلم بزمن صدام..ابنهه لأن اسمه علي كتلوه بالطائفية بال٢٠٠٧ ..بقو عدهه ولد ثنين وبنية .. عسه هي عايشه بالسيدية منطقة ابغداد والحمدلله.. شكد تعبت بس بالاخير ارتاحت وهسة ولدهه واحد مهندس والثاني طيار..بتهه صارت مدرسة..هي ربتهم وتعبت عليهم وحدهه .. تعبت على روحهه وياهم..بعدين صفت بيهم الدنيا وارتاحوا .. صحيح عانت بس بالاخير شصار..
دنوة : ارتاحت..
سلمى : لا عاب حلكج..اني وياج..مثل اختج..لا تترددين اذا تريدين تحجين شي..

هياتهه غرفتي كدام غرفتج..بس دكي الباب واني اعرفج جايتني علمود شغله مضوجتج..لأن كلش حبيتج..خاتونة ومؤدبة بشكل..حتى اليحاجيج ما تجاوبي..تعجبيني..
ابتسمت بتعب : هيج انه..
سلمى : اي والله هيج ياعيني..قابل اجذب عليج..
دنوة : حتى انه حبيتج..دائما احاجي خالة عنج..
سلمى : حبيبتي..يله هسة كومي نطلع شويه ونفوت..
كمت طلعت وياهه فرشنه حصيرة وكعدنه..صدك الهوى كلش طيب والريحة مال وردنه..تجددت نفسيتي..عبالك جنب حاجرة على نفسي..لا اروح يمنه ولا يسره.. ضلينه كاعدين لحد ما غربت الشمس وطبينه..
مريت من غرفة خالة وسمعتهه تحاجيهه..
اخلاص : هذا محمود جان ع الخط..

الحجية : اي هله بي..شبي..
اخلاص : مابي شي..كال شكد حتبقين فاتفقت وياه..كتله فد اسبوع انوب واجي..مشتاقه لأهلي..
الحجية : ها..وشكال خوما ما يقبل..
اخلاص : لا هو عنده شغل باربيل اصلا..كال اتأخر وهاي هم اجت من صالحج علمود تاخذين راحتج هناك..كتلة خوش
يعني هاي حتبقى اسبوع..شيخلص الاسبوع هذا بدون مشاكل..خاف تسويلهه مشكلة ما تكعد راحة.. يله شسويلهه عود اذا رادت تسوي شي اعوفهه واروح..مو اول مره اعبرلهه هو انه بأسعد حالاتي ما اجاوبهه..ادور هسة بهاي الظروف والتوتر..طبعا البسهه..

عفتهم وصعدت فوك..وره يومين فزيت الصبح على صوت كزاز يتكسر بالبيت وصياح كلش قوي..حتى ما كدرت اعرف منو ديصيح..اكثر من صوت..كمت مثل المخبلة طلعت بدون شال نزلت بالعجل طبت كزازة برجلي..متكسر ع الدرج والكع .. بباب المطبخ والهول..كزبر جلدي من الوجع..كعدت ع الباية وطلعتهه..محد انتبه علي كلهه مصدومة من مخلد واسماء جي ديتعاركون.. ابوه كامشة يريد يجره وهو بعد بس ياكلهه لاسماء هلكد ما غادي نار وعصبي كلش..اسماء واكفة جدامه عادي ولا عبالك.. ذكرتني بمرام لمن علي صار عصبي..همات ضلت واكفة بنفس النظرة بنفس الاسلوب..
كلتله : وشتريد هسة..اطلكني..يله بعد احسن.اخذ بناتك وياك هم ما اريدهن..ما اريد شي يخصك..
مخلد : لج تاكلين تبن لا اطلعج بالجلاليق..

جر ايده من الحجي وراح عليهه موتهه كتل..كزبر جسمي من فوك ليجوه..صارتلي رجفة..شلون يضربهه نعنعهه.. شكد حقير لعبت روحي منه..دفرات وجلاليق بنص بطنهه ..شعرهه هلس كله بيده..اجة اركان يريد يفكه ويصيح : يمعوووود ماتت البنية ماتتتت..وخر عنهه الله لا ينطيك..
هي كامت ما تعرف شتكول بعد..احسهه فقدت .. لحظات واركان ضرب مخلد برجله دفعه ليوره..شالهه وأشر لسلمى تاخذهه يمهه..اندار علي يحاجي..
اركان : ايا مخبل يا همجيييي..هيج..هييييج يضربون.. تره انقرضت سالفة الضرب..روح تفاهم وياهه بالغرفة.. عيب لا تنسى نفسك..احنه مو ببيتنه والفضل لأخوك النذل.. هجولنه من بيتنه الله يهجوله عديم الاحساس..
مخلد : انت لا تضل ادافعلهه..اخوهه ابوهه..شفت لسانهه شطوله..اطول منك بمرتين..

تاكلك وتشربك وانت ساكت..عديتلهيا مره ..مرتين تلاثة.. بس البشر يتعلم من اول غلطة..شنو هي حيوان ومدا تعلم.. بس سهلة..اني اعرف شلون اربيهه واعلمهه..الا ما طلكتههههه وذبيت اوراق الطلاق بنص وجهه الزفر اطلع معتب.. والبنات لو تموت ما تاخذهن..
كام راح للغرفة واركان وراه..
اركان : يمعووود..استهدي بالله..هذني بنات وين روحن.. يحتاجن امهن..لا تمصخهه وخليهه تعدي على خير..
مخلد : انت تعرف شي واني اعرف شي..لا تدخل ..
اول ما طب للغرفة وره دقايق ورجع العياط مرة اللخ..الحجية ام مخلد عكدت حواجبهه بخوف وراحت وراه..خطية التهو وياه ولو ما اعرف شمسوي..او هي شمسوية..ليش هيج ضربهه خطية ضلو كلهم هناك لمدة ربع او ثلث ساعة وطلعو..

طلع مخلد كامش اسماء من ايدهه هي شايلة بيدهه اللخ جنطة وسهى تمشي وراهه..تمشي وتتعثر..خطية بعدهه ما تعرف تمشي عدل..هيج خطوة خطوة..كمت صعدت للغرفة لبست شال ونزلت بالعجل اريد اعرف شكو..
وكفت بباب الكليدور اشوفهم..كام يدفع بيهه للباب البراني .. هي تبجي وتصيح..هو يصيح حتى الواحد ما يفتهم شديكولون..الحجي كمشه من ايده يريد يدخلهم جوه بس ما يكدرله..هو رجال جبير وهذا شاب بعده بحيله.. بس محد قهرني من السالفة هاي كلهه غير سهى..خطية شلون مجلبه بأمهه متدري شنو السالفة..وهذا مخلد شكد حقير وحاقد .. يشوف بنته توكف واطيح من البجي هو ولا يمه..ما تحملت رحت جريتهه من ايدهه وحضنتهه..اخذتهه بهدوء ووكفنه يم باب الكليدور..

محد انتبه من الصياح..وهي صغيرة وكصيرة..مسحت دموعهه وقربتهه لصدري..ما اريدهه تشوف المنظر لأن صدك شي مخزي ويخرب حياة الطفلة هي مالهه ذنب..
بعد دقايق من الصياح والهوسة طلعت اسماء..ركع الباب واندار يحاجيهم..انه عفتهم وطبيت جوه اشوف سالي وينهه هاي صغيرة كلش اكيد تريد حليب وأم..بله هذا عاقل مخبل اكو واحد هيج يسوي بمرته وهو عنده بنات صغار..
شلت سهى ورحت للغرفة لكيت سالي تريد تنزل من الجرباية بس خايفة خاف اطيح على وجهه..تمد ايدهه تريد تكمش الكع وتشوفهه بعيدة فتعوفهه..رحت يمهه حضنتهه وشلتهه .. كامت تبجي وتتلمس وجهي عبالهه امهه..كمشت ايدهه وبستهه على كيفي..همست : لا تبجين سوسو..تعاي خالة..
اخذتهه وسهى تمشي وراي..

كعدنه بالصالة..ادور خفت عليهن من الكزاز..جان اكو ع الطبلة مكعبات مال العاب..خليتهن بحضنهن ورحت جبت الماسحه كفيته على صفحة وشلته..بين ما كملت فاتو كلهم للصالة الثانية..كمت ذبيت الكزاز واجيت كعدت يم سهى وسالي واسمعهم..
ابو مخلد : ابوية..لا تغلط غلطة تتندم عليهه..بناتك شنو ذنبهن يبقن بدون ام..
اركان : يابة منو كال يبقن بدون ام..اصلا الحضانة الهه لو تنطبق السما ع الارض..عدا الحالات الاستثنائية ..
ابو مخلد : وإن .. ما يصير يبقن بدون ام او اب..وثنينهم عايشين ويشتمون الهوى..مخلد انعل الشيطان..تره الواحد من عصبي كلشي يجي على لسانه يكوله..

بس خوما كلشي ينكال لازم يتنفذ..استهدي بالرحمن وفكر عدل..حرام تخرب حياتك وحياة البنات..
مخلد : ما مخرب حياة احد..مو بس هي مره..الف وحدة غيرهه تتمنى بس تزوج وينستر عليهه..
ابو مخلد : بس ولا وحدة حتربي بناتك مثل امهن..
مخلد : كتلك اطلكهه يعني اطلكهه..والبنات يبقن عندي.. واذا تريد تاخذهن ارفع عليهه دعوة اخليهه تتشرشح بالمحاكم ومحد يباوع بوجهه..
ام مخلد : هذا ثار مو زواج..ابني شبيك مو هيج..
مخلد : يمة انتي تعرفين شي واني اعرف شي..والله عذبتني كرهتني بعيشتي..شكاكة وتنكنك على كلشي..ع الصغيرة قبل الجبيرة..انوب هسة لمن اجينه هنا كامت تعيرني.. ها تبهذلنه من وره اخوك..ها حنعيش بالضيم..

انت ما تشتغل..ما عندك فلوس..اليوم طوختهه زايد وجفصت بمصارين جدي مو بمصاريني..كبيت عليهه..لو مقصر جان كلت اي..بس عندي فلوس..عنديييي..مو مدرس شبيه ناقص ايد رجل..بس هي جلبة..كافي اربع سنين شفت الويل.. اذا اعوف التلفون وانام اكعد الكاهه مسويتلي مصيبة.. ها ويامن تحجي..المن تخابر..هي هاي هم عيشة..
جر حسرة بكبر الدنيا : خليني ساكت..هذا ولا شي بالنسبة للمعيشتنياه هي..اني اخذت قراري وهذا الاحسن الي والهه وللبنات همينه..
ابو مخلد : انت مسؤول عن نفسك..ما طول كلت هيج بعد ديربالك تكول متندم..اني شلت ايدي بعد..
اركان : اني هم بعد معلية..انت الظاهر ميفيد بيك الحجي .. الا تعض اصابعك ندم..

بس اريد اكلك..احنه مو بحال طلاك ومشاكل.. ابن خالتك ماكو والبيت متوتر..لا تخلي فوك التوتر تجمالة..
ضلو يحجون وياه..يردون يقنعوه وهو ماكو قفل بعد.. سهى وسالي التهيت وياهم..ساعة اكعد وي سالي ساعة وي سهى عبالك توم كلش يتشابهن بس فرق بالعمر.. اول يوم ما اعرف للحليب مالت سالي والملابس..بعدين تعلمت عليهم .. مشى اليوم عادي..بالليل شهد اخذت سالي بدلتلهه ونيمتهه وانه نيمت سهى..هي متعوده علي تعرفني..دورات تجي تذب روحهه بحضني..ما تستغرب عكس سالي..بس هم يجي يوم تتعود علي هلكد ما حتشوفني..بين ما نيمتهه غفيت وياهه ع القنفة..حلمت بأبوي..جن كاعدين بالبيت مالتنه انه وشذى والبنات..جنت فرحانة بدون سبب..كلت جا وين ابوي.. شوي وفات هو للاستقبال..

لابس دشداشة بيضة ونظيف..كتله فرحان اشو..كال عندي الج بشارة حتفرحج بس امشي وياي..لبست الشال وطلعت وراه متحمسة اريد اشوف شنو بشارته..ضلينه نمشي هواي لحد ما تعبت..كتله يله شوكت نوصل مو تعبت..هو عاينلي وابتسم بعدين صارت حفرة جبيرة جدامنه..مد ايده يريد يطلع شخص من الحفرة..كتله بلا وعي : لااا يابة خاف اطيح ادور شلون اطلعك ما اكدر..ما اندار بس سمعت صوته يضحك بدون قهقهة يكلي ولج هيانه..مو كتلج اصبري..محاللج ومواهبج من ذاك اليوم .. ربج ما يعوفج وحدج بنتي..
وراهه فزيت..طحت من القنفة للكع..فركت وجهي بيدي .. ان شاء الله خير ياربي..شنو هلحلم..معقولة يقصد صگر.. هو انه فسرته ببالي بس ما ادري اذا نفس التفسير لو لا.. باجر اسأل خالة هي تعرف بهسوالف..

كمت اخذت سهى وصعدت فوك..تغطينه ونمنه..
ثاني يوم العصر خلصت شغلي ورحت يم خالة حجيتلهه الحلم .. كامت تدعي ودموعهه مدمعة من الفرح..
الحجية : ولج الميت من يضحك بالحلم خير..خصوصا اذا المره المتزوجة حلمت بأبوهه..
دنوة : ليش شنو يعني..
الحجية : يعني رجلج راضي عنج رضا تام..و الله همات راضي عنج..والرضا شنو معناه..معناه خير..هاي الحفرة هي المكان الموجود بي صگر..وحيطلع بس مطول..
دنوة : الله يسمع منج خالة ونرجع نشوفه..شنو انتي كلشي تعرفين تره ميصير..
الحجية : اي خالة غير اشكال شفت وعفت..شلون ما اعرف .. وهاي تفاسير الاحلام من زمان احب اقره عنهن..

دنوة : يله اجه وكتهن بعد..استفاديتي منهن..
ابتسمت وباستني من راسي..سألتني عن دواية..كتلهه اخذته من الظهر..باجر المفروض اروح للدكتورة..بس انه بيا حال .. مدري اروح مدري لا..اذا ما اروح يخرب الكورس وارجع مرة اللخ ابدي ..ياريت بس محاولة جديدة.. لا .. احتمالية الحمل تقل للأدنى بعد..فكلت اكول لخالة شوف هي شتكلي.. كتلهه : خالة باجر موعدي وي الدكتورة..
الحجية : تردين تروحين..
دنوة : ما ادري هو انه دا اسألج..اروح لو لا..
الحجية : روحي خالة..اخذي وياج سلمى..صگر مهم بس صحتج همات مهمة لا تهمليهه..هي ساعة زمان وترجعون
دنوة : اي ما نطول قابل شكو..
الحجية : اليعجبج حبيبة..

بالليل همات اخذت سهى ونيمتهه يمي..مخلد ما شفته بعد بس ع العشه..طول اليوم يطلع هو واركان..ما كاعدين بالبيت حتى بنته ما يدري بيهه زينة لا..مداريهه دتاكل .. شكد مهمل ضجت منه ومن تصرفاته..فوكاهه يريد يخليهن يمه.. خاطر يموتن من الجوع من وراك..
ثاني يوم العصر اخذت سلمى ورحنه للدكتورة..شرحتلهه حالتي وموقفي يعني رجلي ما موجود..
الدكتورة : افحصج اول اذا متحسنة للمستوى المطلوب بعد ما يحتاج انطيج علاج..سواء منشطات او مثبتات..او يمكن نثبت على نوع واحد فقط..
كمت تمددت سوتلي سونار وسألتني بعد جم سؤال ..
الدكتورة : متحسنة هواي..عجبتيني يعني التزامج واضح.. بس مع ذلك انتي مو حالة طبيعية حتى اقطع عندج العلاج .. لأن مستمرة ع العلاج النفسي صحيح..

دنوة : اي صحيح..
الدكتورة : اي فتبقين على نوع واحد من العلاج حكتبلجيا تروحين تشتري..كل ما يخلص تجددي .. موعد الحباية كل يوم متأثر بس علمود تثبت نسبة الحمل متقللهه..
تشكرت منها ونزلت ع الصيدلية اشتريت الدوة بعدين اخذنه تكسي ورجعنه للبيت خالة سألتني ع الدكتورة طمنتهه ماكو شي ووضعي زين .. كالت الحمدلله..ع الاقل شي يفرحني شوي هلفترة.. ابتسمت وصعدت فوك..بدلت ونزلت جوه.. خلص اليوم عادي ما صار شي مهم..نفس القرص ينعاد..يدورون علي بكل مكان بس ماكو..اليوم صار تلث شهور..هي اسمهه هيج.. بس كل يوم ينضاف يخلينه نفقد الامل الاكثر .. مهدي مثلنه..همات ماكو شي عنه..
سرور بعدهه تخابرني ما نستني..صوت صگر تعودت علي

خالة لمن سألتني اذا بعدني اسمعه لو لا كتلهه لا ما اسمع اختفى..هو جذب بس ما اريد اشلشهه وياي..سهى وسالي كل اليوم يمي..اسويلهن اكل وحليب..ملابسهم وكلشي مهتمة بي ..ع الاقل انسى شوي والتهي..بس بالليل تجي شهد تاخذ سالي تنيمهه وسهى تنام يمي..
اخلاص كبل لا تروح بيومين من اول ما كعدنه الصبح هي ضايجة وما اعرف شبيهه..تحجي من وره خشمهه.. جوان سألتهه خاف متضايقة لو ضايجة من كعدة البيت..كالت لا مابيه شي بس تعبانة من الحمل..
اركان ومخلد جانو طالعين للناصرية كمحاولة اخيرة يدورون بالمستشفيات..طلعو من الصبح ..هم بالعادة يرجعون العصر بالزايد المغرب..بس هلمرة تأخرو..ادور الحجي خاف عليهم .. كام يدك عليهم وبس يرن..محد يجاوب..لا مخلد ولا اركان

ضلينه منتظرين على نار..الحجية ام مخلد مابقى دعاء ما اجة على لسانهه ولا اية قرآنية..خطية حقهه..
بالعشرة ونص بالليل ضبط اندكت الباب..طلع الحجي بالعجل يفتحهه..شواي وطبوا كلهم..
ام مخلد : يووو..هاي وينكم عاد والله الف حسبة ببالي
مخلد : لا تخافين..ماكو شي ..
ام مخلد : وين صرتو ضل بالي..
مخلد : هسة احجيلج..
كعدو ادور دقايق واجت شهد انطتهم مي..
اركان : يمة ..تدرين رحنه للمستشفيات..مناك طلعنه للمركز الي خلينه عنده مذكرة اختفاء لصگر..كال ما لكينه شي لحد هسة بس اجانه نداء من اللواء ما ادري شسماه نسيته .. كايللهم لاكين واحد مضروب ومدمة ع السريع مالت الناصرية العمارة..

رايحين يشوفون منو..طالع مهدي..اول ما جيبي مخابرين على ابوه وخوانه..جايين ماخذي وقافلين قضيته بكل المراكز
الحجية : يمة ابني وينه..ليش لكوا هذا وابني ماكو.. مو ثنينهم راحو سوه..شصار..
اركان : والله هاي السالفة تفر الراس فر..ليش هذا طلعوه وصگر ماكو..ثنينهم راحو بنفس الوكت..ادور هسة بعد ما اكدر اسوي شي..القضية انقفلت ما تنفتح..
ام مخلد : خاف هو نفسه هيج سوه..يعني جانت حجة
مخلد : لا يمة شلون هو سوه هيج..قابل لعبة هي.. اكو واحد يكلوه مدمة ومحد يعرف وين جان علمود فلوس.. بس كولي الجهة الماخذتهم شنو..هسة احنه ما نريد نحجي بالطائفية راحت وانتهى زمنهه..بس شرارتهه بعدهه..هو شيعي وذبوه .. صگر لأن سني ليهسه ماكو..هو ماكو فرق..

كلنه اخوان شنو الغريب..بس هذا تفكير العالم شلون تصححي..بعد انزرعت التفرقة..هسة ما نحجي شي بعده ما صاير..مثل ما ذبو مهدي حيجي يوم يذبون صگر.. شوفي شكد حاولو هم ..همين مثلنه وتعب لا ليلهم ليل ولا نهارهم نهار بس ماكدرو يوصلوله..لحد ما هو طلع من وحده..والله كلشي دنسوي ما يجيب فايدة..تركيهه يم الله..
وائل : لا بابا شنو تتركهه..ابنهه هذا..تعبت وخسرت ماي عينهه علي..نسوي النكدر علي لحد ما يصير الفرج..
ابو مخلد : اكلك باجر نروح لبيتهم..مو رحناله نوبة.. نروح نشوف شكو وشصاير..لا نريد نسوي مشاكل ولا شي.. ع الاقل خلنعرف وين جانو..
اركان : جان كال وانطى افادته للشرطة..بس ماكو شي دا اكلك متكتمين ع الموضوع..ما اعرف شصاير..

واحنه اذا رحنه ما ضامنين شحيسوولنه..يطردونه يضربونه ما ندري..ليش هيج خايفين على ابنهم..
ابو مخلد : ما تريد..لا تروح..اني اروح ويه مخلد لو علي.. وائل انت تجي..
وائل : اي اجي ماعندي شي..هذا اجانه من الله والله.. ما مصدك يصير هيج..بلكت لصالحنه..
الحجية : الله يسمع منك..والله ما اعرف..يعني راسي غادي طبل من التفكير..منو ماخذة قابل..انه ابني واعرفه..ما عنده عداوات ولا مشاكل..عقله براسه وتدري بخلكة شلونه .. يطول خلك وي اكبر واحد..بس الصار شنو..
ابو مخلد : باجر نروح ونشوف..
انه اسمعهم وصافنة..دموعي صارت بعيني..يعني وينه هسة ليش هذا طلع وهو لا..شنو ما يستاهل يعيش..

ما يستاهل يفرح مثل الناس..شو احسن منهم كلهم .. بس الزين متعوب طول عمره..
سهى جانت بحضني..دنجت راسي واحاجيهه عبالك احاجي شخص جبير : هو عايش والله..وحيجي يشوفني شلون منتظرته وما مليت ولا يوم..امل من الدنيا كلهه..هي وناسهه .. بس من عنده لا..شكد انتظرني لحد ما كبرت تالي تزوجت غيره..وبنفسي وقعت عقد السجن يم عقيل ونسيته..حتى ما فكرت ارفض علموده..
فزيت من افكاري على صوت اخلاص تصيح بيه..
اخلاص : من رخصتكم..بس اريد احجي حجاية ضاله بخاطري من يوم شفت هاي المسمومة بت المسموم.. تحجي وتأشر علي..
دنوة : وجع حتى وجع..شمسويلج ابوي وتغلطين علي..

حتى الميت ما ارتاح منج..
اخلاص : هااااا..لج ياااا وجه الفكرررر..اخوي ذبيتي وره الشمس بالنكد مالج..انتي فكر فكررر..عساج بالموت ولا تلمسه شعراية..يعني هذا الشباب الحلو هيج يروح ومحد يدري بي وينه وانتي الجلبة القذرة كاعدة معززة مكرمة..
انه اسمعهه ودمي يفور..كمت وشلت سهى : شوفي لج اذا فكيتي حلكج بكلمة لخ اطلع كل الوصاخة..اطلع شسويتي بصگر بغيبته.. اااخ..استغفر الله منججج..تذبين ثوبج على غيرج يا وصخهههه..تغارين..هاااا تغارين..
اخلاص : ومن شنو اغار بله..ليش انتي منو مثلا..خلك وحده شبعو بيهه تكفخ واهاين..حتى حجي ما تعرفين تحجين.. خلف الله على اخوي سوه براسج خير وطلعلج لسان..
الحجية : لج انه شحاجية..مو كايلة لا تعادينهه..

عوفيهه هي حال الضيم حالهه..قابل هي كلتله روح وذب روحك بالتهلكة..هو اخوك ما يسمع كلام شتسويله..
اخلاص : لااا..جانت تكدر تخابره وتطمن علي.. بس هاي شنووو.. صغرت عيونهه وتأشرلي من فوك ليجوه بإستهزاء .. هاي شنوووو مسمية روحهه مره ومحسوبة ع النسوان.. امشي بابا امشي..ادور تريد طفل..هو انتي طفلة اصلا..
وائل : والله الحق ينكال..ما اريد اصير وياهه بس انتي مهملة وانه كايلج هيج..واضل اكول..
خالة من شافتهم ثنينهم صارو يحجون علي ادخلت : هااا هيج صارت..محد يحترم جنتي..انتو كاعدين ببيتهه.. بيت رجلهه..ببيتي كاعدين..ع الاقل احترموني..ليش تحجون عليهه قابل هي مكيفة بضيعته..شو اكثر وحدة تبجي وتسأل شسويتو وشسويتو..حتى اخلاص اخته مو هيج..

اركان ومخلد عافونه وراحو..هي اخلاص هذا قصدهه.. تريد تسويني مضحكة جدامهم..بس فنهه.. كمشت اعصابي وحاجيتهه من وره خشمي : لا تعبين روحج خالة حبيبتي.. هاي ما تهز شعرة مني..هي تحجي وهي تسمع.. عوفيهه براحتهه..المهم انتي تعرفيني شنو انه..
عدلت ملابس سهى وتمشيت جدامهه..راد تمد ايدهه تدفعني خاطر اطيح انه والطفلة بيدي : دشيلي ايدج لا اكسرهه هسة حمدي ربج حامل ما اكدر اضربج..
عفتهه ورحت للمطبخ..سلمى دايره وجهه ع الثلاجة تاكل تفاحة اندار شافتني وابتسمت..
سلمى : لج مو اكلج انتي قوية..شكد عجبتيني بهلموقف..
دنوة : اي الوضع جان متطلب هيج تصرف مني..يله اوي شسويلهه هي حتروح بعد يومين..

سلمى : حقج والله..الله يرجعه بالسلامة يارب..
دنوة : من حلكج لباب السما..ان شاء الله خير..
كعدت يمهه اكلت فاكهة..سولفنه لحد ما كالت حروح انام .. خليت قطعة موزة صغيرة بيد سهى بين ما خلصت لكيتهه مكمله بس مدمرة روحهه..غسلتلهه ورحت للغرفة لكيت مخلد رايح بسابع نومة..رحت على كيفي من الكنتور طلعتله ملابس وصعدنه فوك..بدلتلهه وفتحتلهه التلفزيون على سبيستون .. خليت يمهه المكعاب مالتهه..ضلت تتفرج وتلعب بيهن .. انه كمت توضيت واجيت صليت..دعيت مثل كل مرة..بنفس الگلب المتلهف..اليريد يشوفه..بس يعرف وينه وزين لو لا.. حتلو يطول..بس اشوف شلونه..هو ما يحجي سودة عليه.. اكيد متوجع بس ساكت..مشتاقلي ومشتاق لبيتنه وغرفتنه .. حتى انه مشتاقتلك..مشتاقه تكلي بنيتي..

جنت كاعدة..سجدت وبجيت بحركة من كل گلبي.. احس گلبي صار بزردومي هلكد ما بجيت وغصيت..ضليت على سجودي وابجي..راسي كام يوجعني وعيوني مغمضتهه وابجي.. دقايق وحسيت على سهى يمي..رفعت راسي وابتسمتلهه.. حضنتهه وبستهه..انتي هم مسكينة..حتعيشين وي ابوج .. مهمل الى درجة..حتى ما يكول بنتي شلونهه يم منو حتنام.. بالنهار تروح يم بيبيتهه..لو تلعب وي اختهه..وبالليل تجي يمي العبهه لحد ما تتعب واخذهه تنام يمي فوك..ما ادري شعجب متغار من سالي .. اليفة كلش..
ثاني يوم المغرب رجعو الحجي ابو مخلد و وائل ..علي ومخلد جانو ببيت هذا الولد مهدي..الحجي من الباب يصيح لحد ما دخل..يحاولون يهدون بي بس ماكو..اجت خالة على صوته
الحجية : ياستار استر..شبيكم شصاير..

ابو مخلد : شبينه..شبينه غير المصايب ولعبان الروح.. شوفي هذا ابنج بعد ماكو..اي هاهيه..
مخلد : يابة مو هيج..اصبر خلافهمهه.. خالة ..هسة بس نفوت ونحجيلج..الحجي تعبان من السمعه وحقه..
طبو كعدو..الحجي صيح شوي بعدين سكت..ادور كام يحجي مخلد وجاب الموضوع من البداية..
مخلد : من طلعنه منا رحنالهم..بالبداية تبرو من عدنه.. هذا الرجال الاصلع شويه..كال منو انتو ما اعرفكم..كتله احنه كرابة صگر شنو متعرفنه مو اجيت علينه..عاد ابوية حاجاه
ابو مخلد : اي والله..كتله احنه لا جايين نسوي عركة ولا هم يحزنون..نريد نعرف مهدي وين جان..المكان وين..حتلو ما يعرفه بالمضبوط بس كشي تقريبي..مثل ما احترك گلبكم على ابنكم احنه همات مثلكم..

مخلد : عاد طبينه كعدنه..ضيفنه ما قصر..كتله نريد نشوف مهدي..كال اني بمكانه..هو نايم هسة بين ما يكعدونه .. بس ميدري وين جان..هم واصلين لهذا الرجال اليطلبوه فلوس بعدين طابكة سيارة حمل سودة ماخذتهم ثنينهم والروحة روحة .. ثنينهم متعذبين..ضرب وتكسير الى درجة.. بعدين شواي وفات واحد اول ما شفته انصدمت..حتى كبل باوعت لخالي وائل..يعني منظره مو طبيعي..الشعر مزيني صفر.. الايد مشدودة ببلاستر..انوب حتى ما يباوع بوجه الواحد .. حسيته مريض..مريض نفسيا..خطية..
وائل : اي والله يقهر..انه من شفته هيج سحبت كلامي كله .. جنت اكول هو السوه هيج بصگر خلانه ما نعرف اراضي.. بس بين كلشي على حقيقته بعدين..هذا الرجال اليطلبه فلوس مسافر هو وعائلته محد شايفه..

لو موجود جان ع الاقل اكو خيط امل بسيط..عموما انه بكل الحالات حخلي محامي يكمش قضيته..مو مال بس بالمراكز والمستشفيات..هو المحامي يعرف يتصرف.. كلش كلش يكدر يرفع دعوة على هذا الرجال السافر ويرجعه للعراق.. يعترف وين اخذ صگر..
خالة كامت تبجي من سمعت بالولد مكتول ومبهذل حالة.. حتى ما كدرت تحجي خطية..اكيد تكول سوو بصگر همات هيج .. رحت كعدت يمهه اواسيهه..كتلهه : خالة حبيبتي لا تبجين فدوة اروح لدموعج..مابي شي مو انتي تكولين هيج..
الحجية : ولج گلبي يكول هيج بس الدنيا كلهه ما تكول.. اذا طاكين هذا الولد..ابني شسووله هسة..
حضنتهه وامسد على ظهرهه..ايدي كامت ترجف.. جسمي كله يرجف..عبالك الحجي هسة يله وصل لعقلي..

شلون خاف صگر بي شي..بس هو كال ما اعوفج..لا مابي شي هو يكول..وما يكول شي الا اذا يطلع صدك.. هسة يجي والله متأكدة حيجي..ما يهمني كل هذا الصار لأن كلبي يكلي حيجي..ولو يتأخر بس يجي..
بقيت كاعدة يمهه تقريب الساعة..لحد ما سكتت وغيرنه الموضوع شلون ما جان..الحجي طمنهه..كال لا تخافين ما طول مهدي عايش معناهه صگر همات..يجي يوم ويطلع لا تفقدين الامل..ياما ناس اختفت شهور وسنين بعدين لكوهم .. هاي عود جان الوضع مشدوه..شحال لو هسة امان والحمد لله .. كمت كل ما اضوج افكر بكلام سلمى..يمكن صدك محد يوصل لهلمستوى من التعب الا اذا ربه يعرفه حيتأذى بس يتحمل..وانه دا اتحمل..اتحمل الحجي والعتاب منهم نفر نفر بس كون هو عايش..

انه بس اشوفه كل هذا حينشال ولا ارجعله اصلا..
شواي وسكتت..بعدين كلمن راح لغرفته محد يريد ياكل.. اجيت اخذ سهى ما لكيتهه..تالي رحت للغرفة لكيت مخلد مكعدهه يمه ويلعبهه..ابتسمت عليهم..ردت اطلع صاحني..
مخلد : لا وين..تعاي عادي..
دنوة : لا مو شفتهه يمك يعني حتنام عندك..
ضل يعاينلي وعيونه تريد تحجي بس هو ساكت...اخر شي كال : احسج تبهذلتي من وره سهى وسالي..اريد ارجع اسماء علمود البنات..
دنوة : يعني ما اعرف اذا رأيي حيغير شي لو لا..بس رجعهه علمودهن خطية..يعني ينحرمن من امهن وهي عايشة..
مخلد : اني هم كلت هيج..
جر نفس طويل وزفره بتعب : الله كريم..

نامي اذا تريدين..سهى حتضل يمي..عود اذا بجت اجيبهه
دنوة : ماشي انه كاعدة عود..
ابتسمت لسهى وصعدت فوك..ضليت اتكلب بعدين نمت.. مرت عشر ايام ماكو شي جديد..بس قلق ينضاف بكل يوم يرجع بي الحجي لو واحد من الولد..تعبنه..الحجي وائل كلف محامي هنا بالبصرة بدعوة اختفاء..انطو اسم الشخص الجان وياه..مهدي يعني..والرجال الراحوله.. المحامي كايلة الشغلة جبيرة..لأن هذا لو انسان عادي جان كدرو مركز الشرطة بدورية وحده يلكوه..مو يسافر وفوكاهه هو وعائلته ومحد يخبر عنه او يدري بي وين..بس حيسوي اليطلع بيده .. شي على شي الموضوع صحيح..بس قابل ينترك هيج ولا عبالك..

جدي ما خابر بعد ولا كال..ولا الحجي خابره..كال ما نحتاج مساعدته بعد..خلينه محامي وهو يعرف يتصرف.. مهدي من يوم رجع ابو مخلد والولد من يمه ما حاجوه..لمدة تلث ايام ورجع اركان خابر عليهم لكاه خارج نطاق الخدمة.. كل سيمكارتاتهم هيج..يمكن خافو..او اكيد مو يمكن.. عبالهم حيسوون شي جي ابنهم رجع وصگر لا..انه من سمعت بي راجع تخيلت هو السبب بكلشي..بعدين لمن راحوله للولد واجو كالو هيج وهيج حالته كلت ماله دخل بعد..
وهاي هم كل يومين تلاثة يروحون للمستشفيات يدورون.. بس ماكو شي..والمحامي همات بين فترة وفترة يخابر يطلعهم على اخر شي سواه..
اخلاص اجاهه رجلهه اخذهه وراحو..كالت هلاسبوع ولادتي لازم اروح علمود موعد الولادة والتفاصيل..

تحجي وتعاينلي..عود تريد تذكرني ان انه ما احبل.. وتغور بيه تمشي من جدامي وتكول ولد عيني ولددد..خمسة وخميسة بعين الحاقد..اعوفهه واروح..ما ادري شتحس.. هو انه بيا حال كل يوم بالليل اشبع بجي لحد ما يمرني النوم واغفى من وحدي..اتمنى ما اكعد..اتمنى اذا كعدت فألكى صگر موجود وكاعد ع القنفة مثل كل مره..جنطته يم رجلة وملامحه ذابله من التعب..الكى حاضني ومحاوطني من خصري..من يجي تعبان ما يرتاح بس يمي..هسة شلون يرتاح وحده..
كل هلافكار واكثر تجي ببالي..تعبت من التفكير والبعد .. وينه هسة..شكد صعب الانتظار..صعب لمن تنتظر شخص تحبه بس ما تدري بي وين..شكد المسافة بينك وبينه..عايش ويشتم الهوى لو لا..

مابيدي شي غير اصلي وادعي يكون بخير..
وره هلعشر ايام خالة راحت للحلة هي وجوان علمود ولادة اخلاص..انه مكروهه بكل الحالات ليش اكره روحي بالزايد واروحلهه..عود لمن تجيب وتكمل اروح اباركلهه..
الباقين ضلينه بالبيت..مخلد ما فكر يرجع اسماء..حتى هي ما تخابره..لأن تلفونه مشمور ولا يشيله فيبين..
خالة لمن راحت ما كالت شكد حتبقى..بس ما مطولة ع الاكثر .. بهلايام نزلت من فوك جنت نايمة الظهر..طبيت للمطبخ اسوي اكل اشتهيت بيتنجان درك..شواي واجة بهاء كعد يمي..
بهاء : حتسوين اكل..
دنوة : اي..تاكل وياي..
بهاء : اي والله..هستوني تعاركت ويه شهد..

اكللهه سويلي شي اكله ما اعرف اطبخ..ولا طكة..تكلي روح مابيه حيل هسة..
دنوة : يله هسة اكل وياي ولا يهمك..
دا احجي وياه جان يطب مخلد..كام يحمحم ويخزر ببهاء .. شكو شمسوي الولد..هو ماعنده شغل غير يخزر..عفته وكملت اخذت الماعون وكعدت ع الميز..هو واكف على صفحة.. يمكن يريد ياكل..كتله : تعال اكل..
مخلد : لا ما مشتهي..
ضل يحوم داير مدايري..ضجت منه..اكلت لكمتين وكمت .. رحت للهول اعدل بي..محد اكو..الزلم طالعين والبنات بغرفتهن نايمات..بس انه مدري شكعدني هسة..
دقايق وحسيت شخص واكف وراي..درت وجهي واشوف مخلد كلش قريب مني..مسافة شبر اذا مو اقل..

خزرته وعدلت الشال : محتاج شي..
مخلد : لا..
دنوة : جا شكو لاطش بيه..صارلك فترة مو طبيعي.. ما احب هيج تصرفات..لا تشوف رجلي ماكو..خالة موجوده واذا مو هي انه اعرف ادافع عن نفسي..
مخلد : هييي..شو اكلتيني وشربتيني..شكو شمسوي..
دنوة : انت اعرف بنفسك..عيب احنه بيا حال وانت وين تفكر .. هسة روح رجاءً..عيب من بهاء..
عاينلي ورفع حاجبه..تفاجئ من ردة فعلي..اليشوف شكلي يكول هاي طجة..كلشي ما تحجي..صحيح انه هيج جنت بس خوما اضل مثل كبل..خاصة بهلموقف..ابد محسكت ولا اتهاون بعد الصارلي وي علي.. ادور كمت اخاف منه..بعد ما ابقى وحدي..اضل كاعدة يم البنات لو اصعد لغرفتي..

اي هيج احسن..بين ما تجي خالة و البد عدهه..
هو عافني وراح..وره يومين طلعت اغسل الطرمة جان تندك الباب هي بابنه ناصية مثل بيوت كبل بس مو حيل..فيبين منو بره .. مع ذلك ماعرفت منو..عدلت الشال ورحت..بس انصدمت يعني شلون شجابهه..صار شكد ..رزان.. وياهه رجال ما اعرف منو ما شايفته كبل..انه من الصدمة حتى ما ابتسمت.. هي شافتني هيج وشافت ردة فعلي جامدة عيونهه دمعت وذبت روحهه بحضني..كامت تبجي وتعصر بدشداشتي..
رزان : اشتاقيتلج وروح ابوية..
بادلتهه وبستهه من خدهه : هله بيج..فوتي..
مسحت دموعهه وحجت : هذا مهند زوجي.. هاي اختي..
عاين علي وابتسم..سلمت علي وطبينه جوه..بباب الكليدور وصار مخلد بوجهي..همست : اختي ورجلهه ..

سلم علي وطلعو بره..احنه طبينه..
رزان متغيرة..ذبلانة وكبرانة كلش..صار سنين ما شايفتهه .. هسة لمن شفتهه عبالك رجعت ل٢٠٠٦..لمن عيرتني بطريقة عيشتي واسلوبي بالحجي..ضحكت علي بهواي شغلات وتستهزء..ما اعرف شنو الغيرهه بهلشكل..
عفت هذا كله وحاجيتهه مثل أي اخت تحاجي اختهه الي صار سنين ما شايفتهه..كتلهه : شلونج..شلون حالج..
رزان : الحمدلله..والله اشتاقيتلج هواي..ذاك اليوم اجيتيني بالحلم انتي وابوية..كلت من اجي للبصرة ازورهه..
دنوة : هله بيج عيني..موجودة دائما..وين بيتكم هسة..
رزان : امي وسما بعدهن بالبيت..بس اني تزوجت بديالى
ابتسمت بداخلي..حيييل..ديالى..شبعدهه عنه..شوف وين راحت الجانت ما تكدر يوم واحد بدون امهه..والله الدنيا ناعور واحنه مي..

ياخذ بينه ويودي..مجبورين نتقبل الدنيا هاي بتقلباتهه وصعوبتهه علمود نعيش ونكمل حياتنه..
دنوة : الله يوفقج..سما شلونهه..
رزان : والله زينة تسأل عنج..بس تعرفين امي شلونهه..
دنوة : اي ادري..يله انتي بمكانهه ما قصرتي..
تقربت مني وحضنتني..كامت تحجي بصوت مخنوك عبالك كامشة دموعهه بالكوة : دنوة..انتي شنو..ما اعرف شوصفج والله..ما توقعت حتفتحيلي الباب اصلا..
دنوة : لا افتحلج بعني جايتني متعنية وأردج..
باستني وكعدت يمي تحاجيني..امهه وسما مابيهن شي.. زواجة شذى متفركشة علمودهن..جي رادو ياخذوهن عدهم .. خليبقن يم امهن احسن..هناك بس ضيم وشغل من الصبح لليل حتى البنية ما تفتهم شي من حياتهه..

طول الكعدة ما جابت طاري الموضوع الكالتلي علي سرور .. هي حتى سرور ما حجت..رادت تحجيلي بس انه كتلهه بعدين ما اريد اعرف هسة..والتهيت بموضوع صگر وغيبته.. اذا رجع بالسلامة اسألهه..
رزان : دنوة..اني ادري بسالفة صگر..
دنوة : شبي ليش..
رزان : ادري مفقود..علمود هيج اجيتج..ما عندي رقمج جان خابرت وضليت اسأل بس ماكو..
دنوة : هسه انطيجيا عود..بس شمدريج بي..
رزان : مو جدو وعمامي دائما يجون علينه للبيت..فحاجين وسما دارية..خابرتني حجتلي..هاي قبل شهر تقريبا.. ما صارتلي جية الا هسة واجيتج الج خصوصي والله.. انتي اختي..معليه اذا من غير او نفس الام..

لحد الآن ما انسى يوم نصحتيني علمود هذاك الولد بالتلفون .. لأن وحدة بنية هسه ما اعرف وين صفى بيهه الدهر ابوهه شايفهه تخابر انوب كاتلهه وبهذلهه..كبل اجيتي على بالي وشفت عيشتي هسة شلون مرتاحه..
ابتسمتلهه وفرحت من كل گلبي : تستاهلين..الله يسعدج
ضلت كاعدة يمي وتحاجيني..سولفتلهه على صگر وغيبته .. ضلت تصبر بيه..كالت حبقى وياج ما اعوفج..الحمدلله كدرت اوصلج..تبادلنه الارقام بعدين اجة مهند اخذهه وراحو ..
مرت الايام وخالة رجعت مناك..كالت صارت زينة وتكدر تمشي بعد هاهية..من يطلع اربعينة اروحلهه..كتلهه اجي وياج اباركلهه عيب..ولو انه خابرتهه تحمدتلهه ع السلامة بس واجب ..
وضع صگر نفسه..ماكو شي جديد..

ادور حتى المحامي بعد ما يعرف شيسوي..وين ينطي وجهه .. وضعنه تعب واعصابنه تلفت..محمد يعرف من اول مره .. بس هاي اخر فترة كام هواي يخابر ويسأل..شاف الوضع تأزم اكثر..خمس شهور لا يوم ولا يومين..نص سنة تقريبا .. لا حس ولا خبر..الرجال هذاك اليطلبوه فلوس مالكوله اثر.. مهدي اهله مسفري بس محد يدري وين..ما كايلين..و هم قافلين باب بيتهم وشالعين..هلحجي عرفه اركان والحجي وائل من جوارينهم..

مخلد ابتعد عني من يوم زمخت بي وما انطيته مجال.. كام يحاجيني بس على كد سهى وسالي..اسماء ما رجعهه بعدهم هم هم..ما تغير شي..
الوضع بالبيت نفسه..بس التوتر يزيد..مليت من حجيهم .. هم همات ملوا..حجوا فترة وسكتو بعد محد جاب طاريي بسالفة صگر..خالة لمن تصلي تبجي بجي..يبجي الصخر.. خطية ادور اروح يمهه اريد اسكتهه تكلي هو انه شعندي غير صگر اذا راح شعندي باقية..
هيج تحجي تكسر الخاطر..دورات اكعد الفجر انزل اشرب مي اشوفهه تقره قرآن..لو تصلي..وبكل مره احاجيهه تكلي عايش وداعت طوله عايش..انه ام واحساس الام ما يخيب

وره هلايام..جنت كاعدة بالغرفة بالليل ويمي سهى تلعب .. اندك التلفون كمت شلته..خالتي..صدك تفاجئت .. حييل .. شذكرهه بيه..جاوبتهه..هي حجت بالبداية..
خالتي : الو دنوة حبيبتي شلونج..
دنوة : هله بيج خالة عيوني..الحمدلله زينة..وانتي..
خالتي : على الله..تعذريني صرت كطعية وما احاجيج.. بس حلا جانت مريضة اسم الله عليج..فاخذتهه يم بيت خالج عمار هناك ببغداد..صار شهرين تقريبا اعالجهه وماكو ما يفيد بيهه كلشي..لحد ما كبل شهر حاجيت خالج بالصدفة .. كال جيبيهه وتعاي لبغداد هنا خوش دكتور..عاد اخذتهه وبلشت تتعالج الحمدلله توهه كامت على رجليهه..
دنوة : يايمة..اشو ما ادري والله انه الاعتذر وحقج علي .. ما ادري بيهه جان زرتهه..هي شبيهه خطية..

خالتي : لج ما ادري هيج على فجأة وصاحت راسي يوجعني ياراسي ياراسي طلع عدهه شقيقة بس مرحلة بدائية .. همزين تلاحكتلهه..هسة تحسنت الحمدلله..
دنوة : الحمدلله..اجيكم فد يوم ان شاء الله..سلميلي عليهه
خالتي : الله يسلمج..واصل عيوني..
حجينه شوي بس ما جبتلهه طاري صگر..مابيه حيل احجي بالسالفة هاي بعد..

تقريب العشر دقايق وسديته..
بعد مرور اسبوع..جنت حلمانة حلم مزعج ويغث.. بس ما اعرف شنو..كلت كابوس..بالليل كاعدين كلنه بالهول مثل كل مرة..التحليلات والاحتمالات جارية طبعا..لهناك واسمع صوت طلقات..طلقتين تلاثة....

يتبـــــــــــــــــع....................