رواية اسألي عني الليالي الفصل الثامن وخمسون 58 - بقلم رقية جاسم

وأنه بعز خوفي أحَبنك ، وأريدنك ولو لحظة ..
تجي وترتب افكاري وأركضلك ..
ركض ملهوف من فراشي افز حافي وأكلك ..

قناة التليگرا

حساب الانستگرا

الـبـارت السابع والخمسون..................

تقريب العشر دقايق وسديته..
بعد مرور اسبوع..جنت حلمانة حلم مزعج ويغث.. بس ما اعرف شنو..كلت كابوس..بالليل كاعدين كلنه بالهول مثل كل مرة..التحليلات والاحتمالات جارية طبعا..لهناك واسمع صوت طلقات..طلقتين تلاثة..
اركان راد يطلع الحجي صاح بي..
ابو مخلد : اكعدددد..وين طالع..
اركان : يابة مدتسمع الطلقات..بلكت صار شي..
ابو مخلد : اكعد لا تروح تجيك طلقة تايهة..
ضلو كاعدين دقايق تقريب الربع ساعة وطلعو..انه وكفت يم باب الكليدور واسمع..هوسة وصياح بالشارع.. متت خوف رجلي كامت ترجف..بعد ما عرفت شسوي..حتى ما اكدر اوكف..كعدت بمكاني..

خفت يكون صگر..هذا كل الاجه ببالي..
شواي وصار صوت بجي نسوان..عاد طبو الولد..كمت من مكاني اريدهم يحجون..
مخلد : لا تخافون..ماكو شي..هذوله ناس بالفرع ميت ابنهم على فجأة..بعده شاب..
اخذت نفس براحة..الحمدلله مو مثل ما فكرت..الله يرحمه.. نفضت ملابسي وطبيت جوه..
مرت الايام مثل كل يوم..ماكو شي جديد بس قهر.. بيوم نزلت من فوك اسوي عشة جان الاكي مخلد بالمطبخ.. ويبجي .. بجي بدموع ..ضليت صافنة علي..شبي هذا.. هو شافني سكت ودنج..خلى ايده على عيونه علمود لا اشوفه.. جريت كرسي كعدت جدامه..
دنوة : خيرك..

رفع راسه عيونه حمر دم..سكت وره لحظات حجة : ماكو شي بس مقهور ع البنات..
دنوة : ليش شبيهن..كبل شوي بدلتلهن مابيهن شي..
مخلد : اعرف..بس ما ادري احسهن يريدن امهن..
دنوة : اي طبعا يريدونهه..اذا مو اليوم باجر..
مخلد : ومنين اجيبهه..
دنوة : شنو منين..رجعهه من بيت اهلهه ليش غريبة يعني..
مخلد : اسماء مريضة نايمة بالفراش..متندم بكد شعر راسي ع السويته بيهه..رحتلهه مرتين متقبل ترجع..
دنوة : خطيههه..شبيهه ليش مريضة..
مخلد : ما اعرف شصايرلهه..ماقبلت تحجي..تريد اطلكهه والبنات اخليهن يمي..حتى متريدهن..

صفنت..ما اعرف شجاوبه..يعني هو مقهور على اسماء لو على بناته لو عليمن..
جر نفس طويل وكام ع السنك يغسل وجهه..كمل واجة يمي
مخلد : باجر اروح ارجعهه..بلكت تقبل..اخذ ابوية ويايه..
دنوة : انه من زمان اكلك رجعهه خطية البنات يبقن وحدهن .. بس انت قفلت..لا تنسى شلون ضربتهه..
مخلد : اعرف..ما ناسي والله..اني احبهه غير ام بناتي.. بس مليت من المشاكل..حتى الحب يصير ماله قيمة بسببهن..
دنوة : اي صحيح بس لازم واحد يتنازل..يله سوي العليك بعد هي بكيفهه..واذا ع البنات انه موجودة وشهد همات يعني مداريهن زين..
ابتسم : ما اعرف شلون اشكرج..اختي ما سوت مثلج .. ملتهية بروحهه ..

يقصد على جوان..هي بلا كلشي ملتهية عاد هسة.. كتله : تدلل سهى..انه احبهه..بس هم ارجع واكلك هي حتكبر بعدين وتحتاج امهه..لا تجيبلهه مرة اب..تبهذلهه..
مخلد : اي والله تبهذل صحيح..لا حرجعهه كتلج متندم..
دنوة : الله يسهلك..
ضل كاعد ع الكرسي يحاجيني طول ما اسوي العشة.. شواي واجت شهد بيدهه سالي تبجي بصياح..اجت وكفت يمي .. انداريت عليهه احاجيهه : ولج ليش تبجين يكلبي.. مخلد خليهه يمك خاف تريدك..
مخلد : تعاي جيبيهه..سويتيلهه حليب..
شهد : اي والله سويتلهه..بس ماشربت بس نص..
راحت انطتهيا وهي تبجي ما سكتت..خطية ضل بالي .. كملت بالعجل ورحت شلتهه..هم كامو يصبون اكل..

ما اكلت وياهم ضليت وياهه..سكتت من شافتني.. ضلت تتلمس وجهي وتضحك..شفتهه سكتت رحت جبت اكل كعدت يمهه اكل..بالليل ردت اروح فوك كامت تبجي وتفتحلي ايدهه يعني شيليني..اخذتهه ورحت انام..ضلت تحوص بعدين نامت على بطنهه..مديت ايدي على شعرهه الناعم..تذكرت صگر .. هو همات ينام هيج..كلبي كام ينغزني لمن تذكرته..مديت ايدي طفيت الضوه وحضنتهه..كمت ابجي بهدوء علمود متكعد .. وينك هسة والله تعبت انتظرك..حيصيرلك ست شهور لا يوم ولا يومين..مليت اجي للغرفة ما الكاك موجود..حتى صوتك الجنت اسمعه بأول فترة هسة اختفى..ادري بيك عايش.. يجي يوم ترجع..بعد ما افرط ولا لحظة وياك..اسمعلك واشبع شوف منك .. اشتاقيت لكلمة اشتاكيتلج منك..اشتاقيت لبنيتي وابوية انتي.. يبعد عيوني هلعيون..

اريد اكعد الاكيك موجود بالغرفة وحاط الجكارة بحلكك.. بعد ما اكلك اختنكت من ريحتهن..دخن شكد ما تريد قابلة.. بعد اكعد كبلك من الصبح اسويلك جنطتك..والله اسوي كلشي بس ارجع تعبت من الانتظار..عيوني لمن ابجي تصير حارة وحمره بشكل مو طبيعي..بس كله لخاطرك يهون..اذا ادري الدمع يرجعك مستعده ابجي لحد ما تجي..
ضليت ابجي لحد ما تعبت..كمت اشهك وانفاسي بصعوبة اخذهه..سحبت نفسي بهدوء رحت للحمام غسلت وجهي واخذت نفس..ارتاحيت من بره وعيوني هدأت نارهه بس نار الگلب شلون..
ثاني يوم العصرية راح الحجي ابو مخلد ومخلد يرجعون اسماء..بلكت ترجع..خطية البنات..همزين صغار ما يتذكرن لو كبار جان أثر بيهم الموضوع اكثر..

خلصت اليوم يم خالة والحجية ام مخلد..البنات متعودات عليهه ويلعبن يمهه.. ضلينه كاعدين تعشينه وكملنه و هم ماكو.. عاد بعدين شواي ورجعو..انه جنت كاعدة بالصالة اللخ يم البنات سمعت صوت اسماء..شلت سالي وسهى مشت وراي.. اول ما شافت بناتهه اجت عليهن تبوس بيهن وحضنتهن..
اسماء : يروح ماما اشتاقيتلكم حبيباتي..عمت عيني اذا اعوفكم بعد..
ابتسمت عليهم..انتبهت على مخلد مجتف ايده ومبتسم .. رفعت راسهه تحاجيني : اشكرج لأن داريتيهن..
دنوة : لا يدللون ماعندي شي ليش ما اداريهن..
ابتسمتلي وراحت لغرفتهه هي وياهن ادور راح وراهه مخلد .. كعدت اسمع الحجي شمسوي علمود صگر..
ابو مخلد : والله ما صاير شي..نفس الوضع كل يوم .. بقت يم الله..مابيدي شي..

هاي هيج مرت الايام..خالة تعبت وذبلت كلش..ضليت يمهه اداريهه..انام عدهه علمود اكعدهه الفجر على دواهه.. بلشت تتحسن يوم عن يوم..سكرهه استعدل بس كل ما تنقهر لو تبجي يرتفع..وهي عدهه من النوع بصعوبة ينزل اذا صعد .. فكل ما تريد تبجي احاول الهيهه..صرت انطبق ع المثل اليكول طبيب يداوي الناس وهو عليل..
مخلد واسماء محد يحجي وي الثاني بس رجعهه علمود البنات .. هاي اول فترة..بعدين هو كام يتوددلهه..لو يخلي اكل جدامهه..يجيبلهه شي كل ما يطلع..هيج يعني.. لحد ما لانت شوي..
سرور ورزان كل فترة يخابروني يسألون شسوينه وشصار .. بس بكل مره اجاوبهم نفس الجواب .. ماكو شي لحد الان .. سرور اكو سالفة بحلكهه بس ما تحجي..تكلي بعدين ..

مو وكتهه هسة..ما لحيت عليهه مرتين سألتهه وسكتت بعد.. هي شوكت ما تريد تحجي انه اسمع..
اخلاص بعد ما كدرت اروحلهه بس خالة راحتلهه بالاربعين مال ابنهه كتلهه وصليلهه سلامي..وخليت بيدهه خمسين.. جان باقي عندي بالكنتور..
وره هلفترة يكون خلص ست شهور ضبط ماكو صگر.. ولا لمحة عنه..المحامي والمراكز والمستشفيات ملت من عدنه.. نفس الوجه يروحلهم بين يوم ويوم او كل يومين..بحيث مره راحو اركان وعلي للطب العدلي الدكتور كايللهم ماعدنه هيج اسم والله .. ليش نضم عليكم..كل يوم ماكو خبر عنه يخلي التوتر والقلق يزيد اكثر واكثر..
بيوم كاعدين دنتغده واسمع التلفون يدك..بس ما ادري مالمن .. عفت السالفة..يمكن دا اخربط لأن تعبانة..

بين ما كملت مريت من غرفة خالة سمعت الصوت يطلع منهه .. رحت اخذت التلفون ..مكالمات شكددد.. اخوي ابو جمال .. بالبداية نسيته..بعدين تذكرته..نفسه الكعدنه عنده لمن اخذني صگر لبغداد علمود الناظور..داك خمس مرات.. ياستار شكو .. رجع دك مرة اللخ..فزيت من مكاني بالعجل اخذته وانطيتهيا..همست : هاج خالة هذا تلفونج جان يدك..
عاينت علي بإستغراب واخذته..جاوبت بالبداية حجي عادي .. الحمدلله على الله..
لهناك جان تشهك وتصيح : صدككككك..ولك احجي لا تعذبني .. يعني ابني عايش..يا يمهههه..انطي التلفون انطيي خلاسمع صوته عمت عيني علي..
كلنه فزينه..خوف على قلق على فرح..منعرف شكو.. معقولة صگر راجع ياربي فدواتك..

سكتت شوي بعدين رجعت تحجي : خوية باجر جيبه وتعال فدوه..والله ما اتحمل اصلا عبالك حلم.. شيصبرني اليوم .. انتظرك باجر..مع السلامة..
ام مخلد : خير خية..شكو شصاير..
كامت تهلهل وتبجييي : ولكم صگر عايييش..احساس الام ما يخيب..ما يخييييب..جاي ببيت خالة سوده عليه.. ولج دنوة كومي خابري خالج وائل ومحسن خليرجعون..ابني راجع
كمت ابجي من الفرح..بعد ما اعرف شحجي وشكول.. لساني نعكد..رجلية ما تشيلني بعد..كعدت ع الكرسي وابجي من الفرحة .. ياربي فدوه لأسمك يعني واخيرا ما راح الصبر بلاش..
كلنه بجينه دموع فرح برجعته..ولو ما شفناه بس الخبر غير جو البيت كله..

سلمى اجت يمي عيونهه مدمعة وحاطة ايدهه على جتوفي : ولج مو كتلج حيجييي..كتلججج..
ابتسمت وحضنتهه..شديت عليهه بعد ما اكدر احجي.. صدك الفرحة الحسيتهه ما حاستهه بحياتي كلهه.. شيصبرني لباجر كون انام واكعد الكى الصبح جاي..
شوي وابتعدت عنهه..كتلهه : سلمى روحي خابريهم خليرجعون انه ما بيه احجي مدري شصارلي..
سلمى : اي خية حقج حقج..هسة اروح تدللين..
راحت خابرتهم واجت لمت الاكل..حتى من الفرحة شبعنه .. الحجي لمن رجع اجة بالعجل للصالة يصيح : وينننننج.. تحجين صدكككك..
يعني صدك هاي الفرحة تعادل حزن الشهور السبعة هذني .. اجيت كتله اي خالو صدك مو جذب..

بالليل كعدنه بالصالة..بس الوجوه كلهه متغيرة وانه اولهم .. احسه ابوي والله هلكد ما عودني علي.. هسة شلونه .. شلون صاير..حبيبي اكيد تعبان وما ينام.. بس يرجع.. اريد انسى العشته بغيبته..
اخذت نفس وضليت وياهم لثنعش وصعدت فوك.. توضيت وصليت..كعدت اكلب بالتلفزيون ماكدرت انام.. اريد بس انعس عيوني كامت تحركني..بقيت كاعدة لحد ما أذن الفجر.. كمت صليت وغفيت ع السجادة..نمت جنازة ما متعودة اسهر صار فترة انام من وكت علمود ما افكر..
كعدت الصبح على صوت هلاهل..گلبي صار طبل.. اجه.. اي اي اجه..كمت نزعت ثوب الصلاة لبست الشال ونزلت.. كلبي يركض جدامي..سمعت صوتهم بالهول.. رحت لهناك وشفته

انصدمت صدمة اكبر من عمري بمرتين..لحيته ماكو.. بس شوارب..شعره الثخين خلصان..عيونه ذابله ومطعن جواهه بشكل مو طبيعي..مكان محفور شوي يم عينه قريب عليهه كلش..ضعفان..ضعفاااان فد دور..مو هذاك الاول.. الصدره عريض وضخم بشكل معقول..ذبلان كله من فوك ليجوه..
لحظات واستوعبت هو واكف جدامي..نفسه صگر هو اي.. كمت ابجي بصوت..انتبهلي واندار جان داير وجهه على مخلد .. تمشيت يمه وذبيت روحي بحضنه..حاوطته من ظهره وابجييي..دموعي خلصت بحضنه..كمت اشهك من البجي.. مغمضه عيوني واحاجي : هذا انت..يعني اجيت صدك.. مدا اصدك عفية اخاف افتح عيوني خاف يطلع حلم..
كام يضحك..حضن راسي بين ادي ورفعه..صارت عيوني بعينه.. لحظتهه بس حسيت الصار حقيقة..

هو صگر اي..حسيت بلمسة ايده..ولو ايده متخشنه هواي .. بس حسيتهه نفسهه لمسة الايد الاولانية..
همسلي : هذا انه يبعد عمري انتي..مشتاكلج يروح روحي
ابتسمت والدموع بعيوني..دموع الفرح اي..ما اعرف شحجي بعد بس دموعي توضح حالة الفرح والذهول الطبيت بيهه .. رفعت نفسي وحاوطته من رگبته.. ما اهتميت منو كاعد وشديسوون..ما يهم..ما مصدكة روحي شفته ادور اكعد ادقق منو كاعد ومنو مهتم..كتله : مشتاقتلك بكد الهوى والله..
صگر : يبعد الهوى انتي..والله مشتاكلج يولي..
شواي وابتعدت من وره خالة..صاحت : ولج دنيوة وخري عن الرجال خطية تعبان مابي حيل روحه..
صگر : خليهه يمة ما مسويه شي..
كعد ع القنفة وصاحني كعدت يمه..

الحجية : يمة ترتاح لو زين..
صگر : زين يمة لا تعبين روحج..بس نعسان..
الحجية : جا ما تروح تنام..هيانهه غرفتك..
ابو مخلد : صبري يابة خلنفتهم وين جان وشسوه.. لاحك ع النوم عود..
ابو جمال : اي والله البارحة ما حجة هيج بس رؤوس اقلام وراح نام..
صگر : يله احجيلك ماعندي شي..
هي شلون صارت السالفة..انه لمن طلعت منا ورايح للدوام خابرني واحد ولد اعرفه صديقي اسمه مهدي.. كلي محتاجك بشغلة وادري بيك كفو وما تقصر..كتلة كول واذا اكدر حساعدك وما اقصر..عاد حجالي..كال اطلب واحد فلوس..

صار تلث شهور ما منطينياهن..فاذا قبلت تجي وياي خاطر اخابره اكلة جايك اليوم..لأن هو كبل فترة كايلة تعاي اخذهن ليش ما ماخذ واحد من اخوته ما ادري..المهم رحت للدوام بعدين صار شغل بالناصرية بالصدفة هو مناك اصلا بس بغير منطقة..خابرته من تلفون واحد من الجنود.. كتله انتظرك بفلان مكان تعال بس لا تتأخر عندي شغل والتزام.. كال خوش ضليت انتظره تقريب النص ساعه بعدين اخذني وطلعنه للمكان المتفقين بي..اول ما شفت الرجال عرفتهه كبسة.. شكله مو راحة وعيونه تزغلل هنا وهنا..عبالك يدور على شي.. طبعا الفلوس لا شفتهن ولا لمحتهن..ضل يماطل تقريب الساعة .. انه هيج وانه هيج..والناس تحلف براسي وانه ما اكل حك العالم .. كتله احنه ما كايلين هيج..

انطينه الفلوس ونروح..هستوه ديسلمهن جان يفوتون اربع مدري خمس زلم..الضخامة الشايليهه مو طبيعية.. ضخامة بشكل..اخذ الفلوس جانت مليون ونص..تلاطشو مهدي وهذا الاخذ فلوس..بالبداية ما ادخلت لأن السالفة بعدهه ببدايتهه مجرد تهديد وحجي..بعدين ضربه طيحه بالكع.. عاد هنا ادخلت وضربته..صارت لغوة جبيرة..تقريب الربع ساعة واجت دورية بس ما ادري شلونهه..يعني ما شايف هيج انه.. كال اصعدو كلكم..كتلة شصعد مخبل انت..انه ضابط وهذا الباج مالتي ..ليش متاخذ هذول المزعطة مدري منين ما منين.. هاي فوك ما جايين ناخذ حگنة تكولون هشكل..
هو انه كتله هيج جان يتهستر علي..صار صياح وغلط وفشار اخذو مهدي صعدوه..انه حاولت اتفاهم وياهم بس الظاهر ماكو طريقة للتفاهم..

صعدني كعدت بسد مهدي..ما ادري وين اخذونه لأن نص الطريق ونزل واحد منهم شد عيني بعصابة..ضليت اسبوع مشدودة عيوني..تخبلت..ما اشوف الشمس والمكان الاخذونه بي وغره وحار يسمط سمط..ولا تكول الشهر الواحد والجو بارد..انه الغلط مني..المسدس عفته بالسيارة ردت انزله بس مهدي الاغبر كال لا تجيبه خاف عبالهم جاي تهددهم وما ينطون الفلوس..ادور انه استغربت..يعني شنو هذول وشنو من سلطة عدهم بحيث ياخذون عقيد بالجيش ومحد يدري بي وين هو نفسه ما يدري وين اخذوه..
اول شهر ما سوولنه شي..بس الاكل بالكوه يتحصل.. ويجي جايف حشا نعمة الله..مابي طعم غير المرورة..يجي واحد فوك راسي يدفر ويضرب الا تخلصه..

بالشهر الوراه اكلج روحي وصلت لزردومي.. ضرب وكتل دمار يعني هذا لو ضابط بالجيش ومتغيب عن الخدمة ما يسووله هيج..اكو اكثر من واحد مو بس انه ومهدي.. بعد خمسة .. بفترة خمس شهور جابو ثنين بعد..
مهدي كضوهه وياه تكفخ وجلاليق..بس زينوله شعره ويجي هذا مدري منو يكول اضحكو علي..يابة شنو اليضحك.. تضحك لو اسويلك مثله..واحد ما ضحك..علكة بالسكف من ادي..انشنطت ايده صار عنده كسر مدري خلع..الليل ما ينام من الوجع..ادور هذا يسمعه يصيح و يون يجي يضربه بجعب الرشاشة..شايفه هذا شلون يوجع..يشوغ الروح..
بيوم اجه نفس الرجال الي كل يوم يجي على راسنه من ناكل .. خلة الاكل جدامي دفرته..
هو انه دفرته لو ابتليت..

يابة مو اكل..لعبان روح..يخليك تكره شي اسمه اكل.. حتى ما يطب للمعدة..
اخذني دفرات بنفس المكان بس نزلني درج.. مثل الممر بس مليان وصاخه وريحة مجاري..كل متر تجيك باب يمكن عرض الغرفة متر بمتر..هلكد ما صغيرة احسهه تابوت.. طببني لوحدة منهن..من يومهه بعد ما شفت مهدي ولا واحد من الولد الكاعدين..كلهم شباب كصة محمد..بس واحد بكدي..
بنفس اليوم بالليل اجو ثنين للغرفة الخلوني بيهه.. كال انزع القميص والبنطرون كتله احلم..صاح على واحد اجه يمه يرجف وخايف..كلة روح كمشه..كمشني ونزعني القميص والفانيلة..ايدي رجعهه ليوره بكل حيله كلت انخلعت بعد .. شدهه بحبل كام يدخن ويخلي بحلكي..لعبت روحي حلكة وصخ وريحة شرب بي..

يطفي الجكارة بصدري..بطني وايدي..يخلي الجمره مالتهه تطفى يله يوخر..هاج شوفي..
كف الردان مالت القميص شوفنه ايده..مدمرة الى درجة بحيث اكو اماكن متشوهه..ما كدرت اعاين درت وجهي بالعجل.. خفت..من يوم يومي اخاف ادور هسة.. وبصگر..خالة كامت تبجي..لأن وضعه صعب..هاي ايده هيج شحال رجله وصدره هسه.. ضل يهدي بيهه لحد ما سكتت ورجع يكمل..
صگر : هاي ضل كل يوم هيج..لحد ما صرت ما احس بالچوية تعودت..يجويني بنفس المكان القديم..هاي راد يطفي الجكارة برگبتي ودنجت صارت يم عيني..لو متحرك شوي جان انعميت .. يابة شفت الما شافه بشر..شنو من ناس.. ادور اريد اعرف منو هذول وشلون ماكو ولا يزل لسانهم..

بقوني بنفس المكان..بالليل تصير وحشة مو طبيعية والمكان صاير ببستان بس هذا العرفته من الشباج..شباج صغير ما يفوت ايدي ببداية الممر..المكان وصخ والريحة.. من غير الفار خو هذا يلعب هنا عبالك ساحته..
وره فترة اجه نفسه هذا اليطفي الجكارة بيه.. كال انه ضايج .. ضليت صافن علي شر البلية ما يضحك.. مدري انقهر على حالي مدري اشوف هذا الخبل شديكول.. شواي واجوي ثنين وياه شالني علكني بالمكلوب.. احس راسي حينفجر الدم كله نزل جوه..هاي اول مره اطلب مساعدته .. لو اكله كافي..بكل مره يغلط ويفشر ويطفي الجكارة اسكت ما احجي..بس هنا تأذيت الى درجة..ادور شد ايدي وره ظهري عافني وراح..دخنت من الوضعية..كمت اصيح يمعووود بس نزلني..

ضليت يوم كامل هيج..بس كل ساعة ارفع روحي بين ما يتعدل ضغط راسي وانزل..بهذلني كسر احوالي..اجة يمي يريد ينزلني كال سب فلان وفلان انطاني اسامي.. ضليت ساكت ما حجيت..ادور اجه كام يضربني بهذا السواط مثل الحزام بس الوجع مالته ضعف..سب وانه ساكت ما حجيت.. لحد ما تعب من وحده وصاح على واحد اجة نزلني..طحت على وجهي جفي..بعد ما كعدت الا وره ما اعرف شكد.. بس حسيت على حذائه يزرف بخاصرتي..
وره شهر جان يجيبون واحد وياي بس مكانه مقابيلي.. هذا ما سووله شي بس هيج جايبين..يفشرون علي ويكفخوه ويطلعون ولا شي بالنسبة الي..
وهاي هيج ضل كل فترة يجي يعلكني يسب ويغلط يضرب لحد ما يتعب ويروح..

انه تعبت من الضرب بعد مابيه اكول كافي..جسمي تعود كام اذا يضربني عبالك متخدر ما احس..
الاكل يجيبه فاهي ما ينجرع..يخلي بي كطوف الجكاير يكلي اكل..الله لا يضوك احد الضكتة..شنو وين وصلنه.. عبالك الامن العامة بس هذولاك معروفين..هذول محد يدري بيهم شنو ومنو حتى..
ضليت هيج لحد ما فد يوم اجه واحد منهم..كال طلعنه مهدي ووصيناه يسافر بعد ما يرجع للناصرية..وانت اذا طلعت عيش براحتك بعد معلينه..سوينه النريده..
ما سألته بعد..هو يتخبل مني جي اسكت واطول خلك.. يكمشني من فجي يتفل بوجهي.. يكلي لك احجي اريد اسمع صوتك..شنو انت مو بشر متتأذى..
كامو يجيبون شباب اشكال يمي..

واحد قلعو اظافره ضل صوته من يصيح بإذاني الليل كله ما كدرت انام..احس الصوت براسي..واحد علكوه من رجلي هو رجال جبير يعني بنهاية الاربعين فطس ومات بمكانه .. محد اجه علي لحد ما طلعت ريحته..كبلهه ضل يتوسل بالرجال الواكف بالبداية..الله يخليلكم ولدك بس نزلني..حموت والله روحي صارت بخشمي..ويصيح لك ياااابة الحكليييي.. صياحه يفطر الگلب..انه هم مربوط شكدر اسويله..الشمس ما اشوفهه حتى ما اعرف احنه الصبح لو بالليل..فد مكان مو طبيعي.. يعني متكتمين كلش بحيث حتى ميخلونه نشوف الشمس.. انه ليل نهار بالظلمة حسيت روحي انعميت.. كلت اذا اشوفهه مرة اللخ انعمي يمكن..

هسة دا احجي عادي..بس والله الليلة محسوبتلي دهر.. اريد اشوفكم شلونكم ضل بالي اكول اكيد مشغول بالهم علي وديدورون..بس وين..انه نفسي ما اعرف وين.. وهاي من رحت لحد كبل لا يطلعوني انه ما سابح ولا قطرة مي لايحة جسمي .. ادور اجه الصيف..صار المكان وغره بعد اكثر والريحة..يجي الرجال نفسه يعيب..

اي هو انتو ملوك الوصاخة هيج هيج من ربكم..يضل يكفر ماكو صحابي ما يكفر بي..ماكو نبي ما يجيبه على لسانه
وراهه بفترة كبل يومين اجاني واحد اول مره اشوفه.. شكد بقيت..سبع شهور كلهم شفتهم بس هذا ما اعرفه.. كال كوم اسبح اليوم تطلع..شحجيلك خالو..لمن كال هيج طكيتهه بضحكة..ضحكت من كل كلبي..يعني شنو اليوم تطلع.. انه تخيلت روحي حبقى هنا لحد ما افطس واموت مثل هذاك الرجال..كال شبيك تضحك..مدا اشاقة وياك كوم.. عاد كمت وياه طببني لحمام ما ادري شلونه..سبحت رجعت لبست الملابس نفسهه..كال زين لحيتك..زينتهه ورحت وياه.. رجعني للمكان الاول الجنت بي لمن جابوني..وراهه ثاني يوم اجه طلعني شد عيوني وصعدني بسيارة..

تشاهدت..كلت حيضربني طلقة والسلام..ضلت السيارة تمشي مسافة طويلة..ساعات مو ساعة..لحد ما كال انزل وبعد ما نريد نشوفك وي الجماعة ذولاك..يحجي عبالك ديحجي وي واحد ماعنده هيج رتبة ومكانه..انه ما غاثني غير هلشي.. شنو من مكان عدهم بحيث يحاجون عقيد بهلشكل.. فتح عيوني ونزلت .. بالبداية تيهت..ماعرفت وين انه..بعدين شوي شوي شفت الجزيرة السياحية ببغداد..وانه بمكان مثل البساتين وصاير ع النهر عرفت بالراشدية..عاد اخذت تكسي ورحت لبيت خالي ابو جمال..خطية الرجال كال ما اريد كروك.. كلت اذا ارجع للبيت رأسا يجوز امي يصير بيهه شي من الصدمة عود اخلي هو يكللهه ادور اجي ثاني يوم .. وهاي جيتي

انه اسمعه وفاكة حلكي..سوده عليه شصاير بي.. متبهذل ومدمر عمت عيني..الله لا ينطيكم مهما جنتوا..هو كال ما يعرف منو..ما اعتقد عصابة..اكيد شي راجع للدولة بس اله سرية خاصة بحيث مخليهم بهيج مكان..
خالة كامت تبجي وتحضن بي..حقهه..ما ادري شلون طلع عايش وره هذا كله..بس الله ما يعوف البشر وحده..يعرفه اذا حيتحمل لو لا..وهو تحمل..
كلنه بجينه علي..حتى الحجي..سلمى وشهد.. جوان ذبحت روحهه بجي ودموع وشهكات..اخر شي حجة..
صگر : رحمة لدينكم ما اريد اشوف دموع واسمع صوت بجي .. شبعت هناك هلكد ما بجوا يم راسي..
خالة باسته من راسه وكالت هي وتمسح دموعهه : يله هاي لخاطرك يمة كلشي يهون..بس غير مقهورة عليك..

ابتسملهه وحضنهه..ضلينه كاعدين للظهر وطلع الحجي جاب اكل من بره وتغدينه كلنه..رحت اكعد يم سلمى أشرلي اكعد يمه..ابتسمت بداخلي..صار شكد ما حاسه بوجوده.. صار شكد ما مسويلي هاي الحركة..الحمدلله رجع .. رحت كعدت يمه لحد ما كملنه محد حجة..مثل كل مره لمن يكعد يمنه كلهه تسكت..حسيت روحه تملكت البيت من جديد ..نسجت خيوطهه بين حيطانه..ما اعرف شوصف فرحتي كلشي ينحجي قليل بحق الفرحة هاي..
وره الغده ابو جمال طلع كال ارجع للبيت بعد هم يالله.. صگر بقى كاعد يمهم كام يغفي بمكانه..تقربت منه همست : تروح تنام..
فز بهدوء..كال : يله هسة..
كام ترخص منهم وصعد فوك..

انتظرت دقايق ورحت صعدت وراه..لكيته نازع القميص ضال بس بالفانيلة ونايم على بطنه..ايده مبينه كلهه..جتفة من فوك .. كله مجرح و مجوي..نزعت الشال ورحت يمه.. عبالي نايم بعدين شواي واندارلي..اخذ ايدي باسهه وغمض عيونه..
صگر : مشتاك لبنيتي..مشتاك لأميرتي.. تعاي هنا خلاشبع شوف منج..خلصت روحي يم الظلمات..ارد اشوف شمستي حتلو تعميني..انه قابل..
ابتسمت وتقربت بسته من شفافه..طولت لحد ما حسيت نفسي انكطع ادور وخرت..عاين علي مصدوم ومبتسم..اشرلي اجي من الجهة اللخ..رحت تمددت يمه .. اخذني لحضنه ودافن راسه بشعري..ايده حاوطت خصري قربني علي.. ما حجة شي بس ساكت..حسيت على ايده ترجف..عدلت كعدتي واخذتهه بين اديه..كتله : شبيهه ايدك..

حسيته ارتبك بس ما راد يبين..
صگر : مابيهه شي حبيبي..بس من التعب..
سكتت ما حجيت..تقربت حضنته وراسي على صدره.. هو مد ايده على شعري يمسد بي..ما ادري شجاني حسيت اكو شي لازم احجي..اريد احجيله شصار بيه بغيابه.. كتله : صگر..
صگر : ها عمري..
رفعت راسي عاينت بعيونه : اشتاقيتلك..اشتاقيت لكلشي يخصك..مكانك ع الفراش..مكانك ع الاكل..اشتاقيت لكلمة بنيتي لمن تريد تحاجيني..كل يوم الفجر اكعد على صوت الاذان اصلي واطلبك من الله..اكول يارب مابي شي ويرجع انه ادري بي حيرجع هو كال ما يعوفني..كمت اسمع صوتك بالغرفة تحاجيني لمن ابجي تكلي لا تبجين ابوية انتي..

تعلمت منك اطول خلك واضبط الصلاة بوكتهه.. جنت اريدك تجي علمود احجيلك..علمود اكلك تعبت وحدي اريدك تجي تشوف حالي من بعدك..ما رحت عن بالي ولا دقيقة.. ذاك اليوم سالي نامت عندي..انتبهت عليهه شلون تنام على بطنهه مثلك .. حضنتهه وكمت ابجي..تخيلتك بمكانهه..
اخذت نفس طويل وسكتت ما حجيت.. كمش ايدي خلاهه على گلبة ويعاين بعيوني..
صگر : دتحسين..
دكات گلبة سريعة بشكل..احسهن صارن بگلبي.. ابتسمت : اي دا احس..
صگر : اووووف يابة شمحتاج هلحجي..والله مشتاكلج من راسج لرجليج..انتي وامي ماخذين كل تفكيري والله.. امي ادري بيهه سباعية ما تنهز..

بس انتي..انتي غير شكل..خفت لا ترجعلج الحالة وانه بعيد لو ناسية ادويتج من وره السالفة هاي..كلت هي بلا كلشي متاخذ دوه الا اجيبه جدامهه عاد هسة شلون..
بنيتي..والله متت على شوفتج..خيالج الوحيد مصبرني ع الظلمة العشت بيهه..
جر نفس طويل وزفره بتعب : الحمدلله راح كلشي..والله عبالك حلم من اجه يكلي باجر تطلع..كلت حرجع اشوفهم.. اشوف دنوة..ميت تعب صار سبع شهور باليوم بس ساعتين انام .. هيج كشي تقريبي من عندي اكول ساعتين..تدرين بيه ما ارتاح بس بحضنج..كون اضل نايم يمج لحد ما ارتاح واكعد من وحدي..هسة تعاي خلانام ميت نعاس وتعب..
ابتسمت وبسته من خده..تقرب حضني ومقفل علي بيده ورجله راسي يم صدره فدگات گلبة اسمعهن هلكد ما واضحات

ضليت هيج لحد ما غفيت وياه..جنت نعسانه ما نايمة زين .. كعدت من النوم عاينت ع الساعة بالسبعة..صار شكد نايمة .. نومة اهل الكهف.. بقيت بمكاني ما تحركت خفت يكعد وهو نعسان..كمت اتمعن بملامحه..شكد تعبان.. يتنفس بصعوبة وعاكد حواجبه..دقايق وصاح : لاااااا..
كمزت من مكاني جفلت لأن على فجأة وعاط.. بقيت واكفة بمكاني انتظره يكعد..لهناك وكعد..رحت كعدت يمه : شبيك
فرك وجهه ودنج : مابيه شي شفت حلم..
ايده ترجف وانفاسه سريعة..كمشتهه بيدي وهديته لحد ما هدأ وانتظمت انفاسه..
صگر : حكوم اسبح..
دنوة : يله..هسة اطلعلك ملابس..

حرك راسه يعني اي وراح..كمت طلعتله ملابس..لبست الشال وطلعت انطيتهيا ونزلت..شافتني خالة..
الحجية : ها يمة شلونه..
دنوة : زين خالة..فات يسبح جان نايم..
الحجية : يله الحمدلله..اليوم لا تسوين اكل حيطلعون الولد يجيبون..هسة فترة يومين تلاثة ونكول لجدج..
دنوة : شنو حتسوون عزيمة..
الحجية : اي..نعزمهم ولو هو ما يحجي وياهم بس وكفوا ويانه عيب لازم نردلهم الجميل بالنكدر علي..عود انتي همات حاجي علمود لا تصير عركة..
دنوة : ها..يله ماشي..
عافتني وراحت لغرفتهه..طبيت للمطبخ اسويله ماعون فواكه جان تجي سلمى..تغني يمي..

سلمى : اي عيني اي..اليوم فرحانة المدام بعد ما تشوفنه..
دنوة : هههه..ولج غير ما مصدكة..اوف ادور اموت من الفرحة ما الحك اتهنى بي..
سلمى : فال الله ولا فالج..يول لا تكولين هيج..دمشي اخذيله الفواكه خلياكل خلصان خطية..
دنوة : يله بس اكمل..
كملت بالعجل وصعدت فوك..لكيته بالغرفة بفتر بعده ما سابح .. خليت الماعون ع الكومدي وحاجيته : شو ما سابح ليش..
صگر : تعاي وياي..ايدي ترجف ما اسيطر..
ما ردت احسسه بشي هو منا نفسيته مدمرة..كتله : يله حبيبي امشي اجي وياك ولا يهمك..
ابتسم بتعب ورحنه..

نزع الفانيلة والبنطرون ضليت صافنة..دموعي نزلت بدون وعي..سكتت ما حجيت شي من المنظر..
صگر : تعاي ساعديني ابوية مو تبجين..
مسحت دموعي ورحت يمه..ما خليته يغسل بالدوش كال مكان الچوية يحركني..بقيت تقريب الساعة وياه..شبعت بجي لحد ما خلصتله..ظهره مشطب ومكان التشطيب محفور.. من غير الچويات بكل مكان..ظهره وجتفه..بطنه وصدره.. غادي ابره وخيط هلكد ما ضعفان..طول الساعة هاي هو ما كدر يكمش شي..ايده ترجف..حتى الملابس صعبت علي لبسهه.. كملتله وطلعنه..رحت للغرفة اخذت ملابس بدلت لأن تنكعت.. بعدين اجيت يمه انطيته من الفواكه ياكل..
هو وياكل حاجاني : نفس الحلم حلمته البارحة اليوم اجاني .. وشوكت ما انام يجيني..

دنوة : خير يارب..شنو هو..
صگر : كابوس مو حلم..كل الصارلي بذاك المكان دا اشوفه حلم بس بشكل يخوف اكثر..حتى كمت اخاف انام..
دنوة : اكيد العشته صعب..بس حتنسى.. انت مو تكول هيج .. بس يحتاجلك فترة..انه وياك..
اندار صفن بوجهي وابتسم..اخذ ايدي قربهه من شفايفه ويحاجيني : متقصرين عمري..
بالليل بالتسعة نزلنه ع العشه..هو ماكدر ياكل بطنه توجعه وايده ترجف..ضل بس كاعد لحد ما خلصنه كمت غسلت المواعين هو كعد يمي بين ما كملت وصعدنه..ضل يلوب بالفراش ميكدر ينام..بقيت كاعدة وياه للاربعة الفجر بين ما أذن كمت صليت لكيته نايم..تمددت يمه من الجهة اللخ حضنته واردد ايات قرآنية بهدوء علمود ميكعد..لحد ما غفيت..

كعدت ثاني يوم لكيته نايم..خطية شكد تعبان..
مشى اليوم عادي..من كعد سألته اذا حلم مرة اللخ كال اي بس ما فزيت فزة قوية..حقه ما يكدر ينسى سبع شهور بيوم وليلة اقل شي يرادله شهرين اذا مو اكثر..
ع الغده خالة كلتله حيجون عمامك عكبة..كام يصيح كلب الدنيا..
صگر : ويييين..شعندج جايبتهم هذوله ال.... ال... لو بيهم خير ما يطردون بتهم..وهسه تريديني ادخلهم بيتيييي.. وره ما طردو مرتي..مخبللللل عاقل..
ابو مخلد : خالو اني حجيت وياهم علمودك..حجيت ويه جدك .. وهو ما قصر..دز جماعة يدورون عليك..ضل ويانه هواي شهرين الا..
صگر : على نفسه..

اذا اجه ما اكعد وياهم..تريد انت اكعد استقبلهم لحد ما يتزقنبون ويطلعون..
ذب الخاشوكة من ايده وكام..هو بالكوة ياكل ادور عافه وكام هسة شلون اقنعه..وكتج خالة..
اكلت شوي وكمت صعدت فوك..لكيته متمدد ويكلب بالتلفزيون .. رحت كعدت يمه : ليش عفت الاكل..
صگر : ما اريد..
دنوة : مو ما يصي...
صاح بيه : كتلج ما اريييد..
سكتت محجيت..عفته ونزلت..حالته صعبة وعصبي الى درجة بس واحد يحاجي يصيح بي..اذا صاحني وتأخرت علي يرزلني..بس اسكت..ادري مو بوعية يحتاجله وكت..
بالليل اكمل شغلي واصعد الكاه نايم..

ينام من وكت ويكعد الفجر يصيح راسي..انطي بندول لو براسيتول دورات بس ميفيد كلشي..يضل يلوب لحد ما عيونه تصير حمرة وينام..
وره يومين اجة اركان جاب شغلات مال حشوة تمن برياني شكد كومه..اجت اسماء وسلمى وياي..شهد نكعت التمن وبس تسولف متسوي شي..بس جوان ماكو..بين ما كملنه كلشي حتى التمن صارت ساعتين اذا مو اكثر..والجدر جبير تعبت بي..لهناك واندكت الباب..لبست الشال ووكفت بالهول اشوف من الشباج..طب جدي وعمامي..وياهم عصام وسالم.. بس احمد والباقين ما شفتهم..جدي كبرااان يمشي ع العكازة.. عمو قاسم متغير..همات كبران..كلهم متغيرين عن اخر يوم شفتهم بي..دمعت من المنظر..شلون السنين تركض.. ذاك اليوم رجعت من سوريا وشفتهم..

هسة شلون صارو وشلون تغيرو..
ضليت اشوفهم لحد ما طبو..سديت البردة وصعدت فوك اشوف صگر..لكيته ديلبس دشداشته..يريد يسد الدكم وايده ترجف ما مسيطر..سديت الباب ورحت يمه : لا تكلف روحك.. جان صحتني اساعدك..
عاين علي وابتسم..سديتله الدكم واحاجي : حتنزل يمهم
صگر : اي مو مال ابقى هنا..
بسته من خده قريب على شفته وهمست : ادري بيك صاحب واجب وما تطلع منك الشينة..
حضن راسي بيده وباسني : الله يحفظج..
راح يخلي عطر ونزلنه سوه..عاد التهينه من الوحدة لحد السته العصر ما كعدنه بالكع..يا مي يا عصير والاكل تعبت كلش .. ما طبيت سلمت عليهم ولا شي..

هم ساعدوا صگر ما ساعدوني..يمكن حتى هو ما حاجاهم بس كعد يمهم..
للعصر كملنه المواعين وعزلنه الاكل الباقي..لأن جاب وجبتين .. قريت علي الفاتحة على روح ابوي وابو صگر..وزعوه الولد .. للسبعه وسمعت الباب انفتحت يعني طلعو..عفتهم ورحت غسلت وجهي..صعدت فوك انام رجلية كامت توجعني.. توني غفيت وسمعت صگر يهمس يمي..
صگر : دنوة كومي..
دنوة : ها عيني كمت..
صگر : تعاي فتحي الدكم خلابدل ما اكدر..
تقربت منه فتحت اليم صدره والي بيده انه واحاجي : شسويتو هناك..حجيت وياهم لا..
صگر : ماحجيت والله مابيه حيل..

بس سلمت وكعدت..حجة وياهم خالي محسن..وائل همات هيج لان وياهم..ما صار شي يعني..
دنوة : يله لا تعب روحك..غير ملابسك ونام اذا نعسان..
صگر : لا ما انام خاف احلم مالي خلك فزات..
دنوة : براحتك عمري..
نزع الدشداشة وطلع ملابس يبدل..كال : تغديتي..
دنوة : اي..انت كدرت تاكل..
صگر : اكلت اكلت..لا يضل بالج..
كمل وراح تمدد..فتح ادي وصاحني..تمددت يمه حضني ويبوسني من خدي..مشتاكلج واحبج ما نزلت من لسانه.. حسيت بوجوده من لمساته..بس متغير مو مثل كبل.. ما ردت اخلي يعرف فسكتت..كلت حقه بعد الشافه اكيد حتصير تصرفاته لا ارادية وبيهه نوع من القساوة..

وره شوي تقريب الربع ساعة تأذيت جوه ايده..هو ضيع بعد .. رفع نفسه عني خزرني وغمض عيونه..ما فهمت حركته هاي .. دقيقة او اقل ذب روحه ع الجرباية..جر الغطى تغطه .. ضليت صافنة علي..شكد ما تخيلته حيتغير بس هيج ابد.. تغطيت وتقربت منه مسحت على شعره : حبيبي شبيك..
صگر : ما اعرف ما اعرررف..ما ادري شصار مو بيدي ..
الا شوي يتهستر..خفت علي..حاجيته بهدوء وعلى كيفي : ادري مو بيدك..ما جابرتك عمري..مو كتلك انه وياك..
كمش ايدي وسكت ما جاوبني..شواي وكمت بدلت كإن ما صار شي..علمود نفسيته..
مرت عشر ايام بطلاع الروح..كل يوم يصير اسوأ.. عصبي نار ويصيح ع الكل..رجفة ايده يوم عن يوم تزيد..فتحت موضوع الدكتور وياه..

دنوة : صگر ليش ما تروح للدكتور..
صگر : لاااا..ما اريييد..مابيه شي لحد يدخل..
دنوة : علمود ايدك مو علمود شي..ما تريد تاكل تلبس..
صگر : لج شنو مستثقلة علي الاكلة واللبسة..ما اريد..
دنوة : لا لا ما اقصد هيج والله..اداريك وانه ساكته..بس علمودك دا احجي هيج وانت بكيفك..
صگر : اي ما اريد لتفتحين السالفة هاي مره لخ..
دنوة : على راحتك..

من يومهه بطلت احاجي كلت لخالة هي تكلة..هو يسمع كلامهه حتى ما يصير عصبي عليهه ابد..من ذاك الموقف ذاك اليوم ما ردت احرجه بعد كمت اتجنب اكعد يمه بس على كد النومة بالليل لو لمن يصيحني اساعده بالملابس وغيرهه..
وره هلعزيمة اجن خالاته ثنينهن تحمدوله ع السلامة .. بس ما بقوا هواي..نص اليوم وراحو..ام علي ما اجن وياهه البنات اجت وحدهه الحمدلله..مالي خلك مغثة..جوان بهاي الفترة ما سوت شي..بس من تشوفه نازل من فوك عيونهه بعد بس تطلع من مكانهه هلكد ما مركزة..حتى على رجفة ايده مركزة.. بس انه ما انطيهه مجال..كل ما تريد تحجي اكللهه هو ما يرتاح بس يمي..وانه حاخذه للدكتور..هسة فترة ويصير زين.. عاد هي تسكت بعد متفك حلكهه..

سرور خابرتني تبجي خطية تكلي ربج ما عافج وحدج.. هو صدك ما عافني وحدي الحمدلله..جنت محتاجته واضل محتاجته..ماعندي غيره..
رزان مجانت تدري..مخابرتني بالصدفة وكتلهه.. همات فرحتلي كالت اذا اجيت للبصرة امرلج..كتلهه هله بيج..
وره هلايام جنت دا اسوي الغده والجو حار سمطني..منا المطبخ عبالك فرن..سلمى وشهد جانن يمي ويحجن بس ما مركزة وياهن..شوي وسمعت صوت واحد يصيحني..
دنوة : سلمى تعاي ع الاكل خلاشوف صگر ديصيحني..
اجت وانه صعدت فوك..طبيت للغرفة لكيته متمدد بالكع وعيونه صاعده فوك الجفن..شهكت بحرگة ورحت يمه اكعده : صگر .. حبيبي كوم شبيك..شصايرلك..
ماكو ما يكعد..متت من الخوف..كمت على غرفة اركان

فتحت الباب وطبيت بدون ما ادكهه اصلا..صحت : اركااان .. تعال شوف صگر حباب..
اركان بخوف : خير ياستار..شبي..
دنوة : ما ادري عفية تعال شوفه..
كام بالعجل راح للغرفة..عدل كعدته وحجة : جيبي مي..
نزلت جوه جبتله وصعدت..غسل وجهه وضربه راشديات ع الخفيف..شربه من المي لحد ما بلش يصحى..
اركان : سلامتك سلامتك..متشوف شر شبيك..
صگر : ما ادري..بس حسيت بدوخة قوية..
اركان : كافي تعاند وخلينه ناخذك لدكتور..مراح يعضك .. بس يشوف حالتك..دتسوء يوم عن يوم..اول يوم اجيت جنت احسن من هسة..شنو التغير غير الدكتور يعرف..
صگر : ميخالف ميخالف..اروح..باجر عود..

اندار علي يحاجيني : تعاي كعدي يمة..هسة سلمى تكمل الاكل وتجيبه فوك..لا تعوفي وحده..
حركت راسي يعني اي ودموعي بعيني..شكد خفت من المنظر .. ادور هو ضعيف وجوه عيونه مطعن لأن ما ينام للفجر يكول الاحلام ما تخليني انام..
اجيت كومته تمدد ع الجرباية..نظراته مكسورة وحزينة.. بادلته مثلهه ما اعرف اتظاهر القوة جدامه..كمش ايدي قربهه من شفايفه ويتنفس بصعوبة..
صگر : ياريت ميت ولا الدا اعيشه..تعبان وداعتج تعبان.. ما اكدر اسوي كلشي..حتى الخاشوكة ما اكدر اكمشهه.. وانتي ملتهية بيه..
تقربت منه : التهي بيك براحتي..شعندي غيرك.

بس لا تحس روحك عاجز..مابيك شي .. فترة وتصير زين بس لو تقبل تروح للدكتور..تذكر انه شلون جنت..بس ما مليت مني ضليت تاخذني لدكاترة لحد ما صرت زينة..شو ما كتلك ملتهي بيه..هذا واجبي..هذا حبي..لأن ما اعرف اعبر عنه.. يمكن هسة اجه الوكت المناسب خاطر ابينلكيا..
بسته من خده وايدي على ايده الترجف : تروح للدكتور مو..
صگر : حاضر..
ابتسمتله وبقيت يمه..مرت تلث ايام .. خالة عرفت بي متخربط كامت تبجي خطية..عاد هو من شافهه بجت كال اروح وانه اصلا جنت ناويهه..
وراهه العصر اخذته للحمام ساعدته يسبح..يضل يعاينلي ويصفن لحد ما اخلصله..اكله : شبيك صافن عيني..
صگر : تذكرتج..

ابتسمت واخذته يبدل..سويتله الدكم ورتبت شعره.. ادور كام حتى الشيشة مالت الريحة ما يكدر يكمشهه..ايده ادهورت حالتهه كلش..مع ذلك ما اضل احجي براسه عليهه.. دائما اهدي اكلة انه وياك ما اعوفك..
خلص وانه بدلت بعدين نزلنه..رحت انه ومخلد وهو وخالة.. اخذناه لدكتور اعصاب ودماغ..كام يستفسر عن حالته .. واذا صايرله شي اخر فترة مأثر على نفسيته..بالبداية ما حجة .. بعدين انه واكفة يمه همست : احجي علمود يعرف..
شوي وكام يحجي..تخيلت نفسي بمكانه..هو جان ياخذني للدكتور ويوكف يمي..افتر الناعور صرت انه بمكانه..
وره ما خلص اسئلة حاجاني : انتي بنته..
دنوة : لا دكتور زوجته..

الدكتور : طيب..هسة اني حسب التشخيص اشوف عنده مشكلة عضوية أثرت على عمل اعصاب اليد..حكتبله تحاليل .. تحليل دم..وظائف الغدة الدرقية والكبد..هن هذني اهم اسباب رجفة اليد..كملوهن..وباجر التقيكم ان شاء الله..
تشكر منه واخذ الراجيته كتب عليهه التحاليل.. نزل سواهن وانه وياه ما عفته..خفت يطيح مثل ذاك اليوم..بياض عيونه صاير اصفر بي فقر دم منتهين منهه..
ضلينه تقريب الساعة ادور المحلل كال باجر العصر يكملن .. وراهه رجعنه للبيت..سويتله اكل واخذته فوك..ما يقبل ياكل جدامهم جي انه اوكله..اسويله كلشي انه وساكتة.. لا اتذمر ولا اتعب..لأن حالته تقهر شكد ما حاولت اشرح عنهه متوصل للمستوى المطلوب ..

بالليل كعدت يمه احاجي : صگر..
صگر : ها يابة..
دنوة : ليش هسة يله صرت هيج..مو اول ما اجيت..
صگر : من اول ما اجيت انه هيج..ما متحكم بروحي.. بس لمن شفتكم فرحت بيكم نسيت شوي..حاولت انسى.. هاي رجفة ايدي من كبل لا اطلع مناك بشهر وشوية..بس الديصير هسة ردة فعل للصارلي هناك..تخيلي تكعدين بمكان متر بمتر وأظلم لمدة اكثر من اربع شهور..شيصير بيج.. زين ما تخبلت.. اكو واحد جابو كام يضحك ويبجي بنفس الوكت..تخبل..
راد يحجي خليت ايدي على حلكه بهدوء : لا تتذكر .. عوفه انسى الماضي..هسة انت رجعت..حتراجع يم الدكتور وتاخذ علاج تصير زين وترجع مثل كبل..
ابتسمت وباس ايدي بهدوء..

هو ما وصل للمرحلة الوصلتهه انه..وضعه من ناحية الهذيان والكلام الي ماله صلة بالواقع منتهين منه..ابد ماعنده هيج شي..بس صار عصبي كلش..كاعد على اعصابه بكل وكت .. حجية قليل كلماته معدوده ع الاصابع..من غير رجفة الايد والكوابيس بالليل لحد ما يأذن الفجر يله ينام..اكلة قليل كلش مو دائما ياكل..ومو من أي احد..الا اجيبلهيا فوك يله .. دورات يصيحني يتذكر ذاك اليوم لمن ابتعد عني وهو عاجز..
صگر : مدا يروح من بالي منظر ذاك اليوم..ما اعرف شسوي .. عاجز بشكل..
دنوة : حبيبي شبيك ليش هيج تكول عن نفسك..يعني شتريد بعد كل هذا المريت بي تبقى طبيعي..اكيد تصيرلك انتكاسه بعدين يتحسن وضعك وترجع مثل اول..انه راضية وقابلة بيك هيج..لا تأذي روحك بالتفكير ولا تشيل هم..

هو انت مريض ادور تفكر وتعب روحك بالزايد..ازعل عليك تره واعوفك تاكل وحدك..
ابتسم وحاوط راسي بيده..باسني منه : عمري والدنيا العايش بيهه..شسوي بدونج ما ادري..
دنوة : انت شسوي بدونك..احبك..
صگر : اموت على ربج..

ثاني يوم العصر هم طلعنه للدكتور..اخذت التحاليل وصعدناله فوك..قراهن ورجع يحجي..
الدكتور : قصور بعمل وظائف الكبد..وظائف الغدة الدرقية بحالة جيدة..وعنده فقر دم حاد بشكل..نقص بالمغنيسوم بالدم .. حالته صعبة..لازم نبدي نعالج شغلة شغلة لحد ما تنتظم حالته ويبدي عمل اعضاء الجسد بشكل جيد..
كام يكتب بالادوية..كال اشتريهن خاطر اعلمج عليهن.. بقو هم بالعيادة بين ما اشتريتهن ورجعت..علمني عليهن.. كال لازم ينتبه على موعدهم بالمضبوط..ابر وحبوب وهواي .. لازم ياكل انواع خاصة من الاكلات..هم كتبهن بنهاية الراجيته.. تشكر منه وطلعنه..خالة ضلت الطريق كله توصي بيه علمود ادويته .. كتلهه : اي خالة وداعت صگر ادير بالي..

رجعنه للبيت وصعد فوك كبل..حددت الوكت الانطيته بي الدوة علمود باجر هم نفس الشي..الاكل الحجي يجيبه .. معلاك ومشاوي .. خضورات وفواكه علمود ترفع الدم..جان عنده النسبة ثنين ونص..من هاي كام يدوخ لمن يوكف..ما يكدر وحده الا اجي اكمشه لدقايق بعدين يله شوي شوي يمشي.. راعيت الادوية مالته وحالته النفسية دائما احاول انسي.. احاول اذكره بشغلات قديمة تفرح..دورات احجيله شغلة اخرب ضحك عليهه..انه قصدي اضحكه بس هو يبتسم لمن يشوفني اضحك اكله : شبيك شنو متضحك النكتة..
صگر : لا تضحك..بس انه فرحان على ضحكتج..
دنوة : خجلتني وانه ما اريد اخجل..
صگر : يلوكلج يولي..

وهاي هيج لحد ما مرن اسبوعين جان يخابرون على تلفونه.. رحت جبتلهيا شالة : هله بيك حبيبي..والله شوي احسن ها.. اي مو سويت اجازة طبية منا ودزيتهه بيد خلف لبغداد.. بعد اشوف الدكتور شيكول.. الله يسلمك يا طيب ..متقصر واصل .. مع السلامة الله وياك..
سد التلفون ورفع راسه..كتله : ها منو..
صگر : ضابط بالمقر خابرني..
اجيت كعدت يمه اشوف ملامحه..تغير هواي عن اول يوم شفته .. طعنات وجهه بلشت تختفي يوم عن يوم.. شعره من وره الاكل بلش يطلع ويرجع مثل كبل..جسمه ترس كام يكدر يسبح وحده..رجفة الايد قلت..بالبداية انه اوكله.. بعدين وره اسبوع كام هو ياكل بس السبح والدكم ما يكدر..فانه وياه

مع ذلك ما كدر ينسى ذاك اليوم..ما اعرف يمكن يحسه شي مخزي وعيب..لأن هو ما جان هيج..بس بكل مره احجيله نفس الحجي..ان انه وياه واعتبر ذيج اللحظة ما صارت..
بيوم كاعدة بالغرفة جنت توني طالعة من الحمام دا انشف شعري ودك التلفون مالتي..شلته .. سرور.. سلمت عليهه وحجينه طبيعي..بس بلسانهه سالفة حسيتهه..كتلهه : شنو شبيج تريدين تحجين شي..
سرور : اي والله..بس ياريت تسمعيني للاخير..
دنوة : اي اسمعج كولي.....

يتبـــــــــــــــــــــع............................

طبعا البارت نشرته بالغلط جنت بعدني ما مكملته فأعتذر ..
بالنسبة للموضوع الي تطرقتله من صگر كام يحجي هو شي حقيقي وموجود وصلني بالحرف واني نقلته بالحرف، العراق چبير ، وكلشي بي فمو شغلة خيالية .. طبعا الجهة الاخذته هو ومهدي جهة حكومية بس ما اكدر اذكر اسماء حتى لا انحاز لجهة معينه ( هذا جواب اذا وحده صارلها فضول تعرف ) ...
بوساتي للكل😘