رواية اسألي عني الليالي الفصل السابع وستون 67 - بقلم رقية جاسم

مشتاگلك ..
انا احس نار بصدري ..
ولشوفتك والله لانطي عمري ..
ارحم حبيبك ..
لك فدوه انظر بأمـري ..
مشتاگلك موت ..

مشتاگلك ..
اتمنى اكون بحضنك ..
واتمنى ابوسك ..
واشم ريحة عطرك ..
مو راح اموت ..
هواي صار انتظرك ..

الـبـارت الـسادس والـسـتـون.............

عاد شوي شوي كامو يرحون..بقت بس رزان هي وسما وشذى.. سرور همات..نوارة رجلهه اجه وياهه فبس رجعنا اخذهه وراحو..بالليل طبيت للمطبخ اسوي عشه..جان اسمع صوت عيطة..غسلت ايدي وطلعت اشوف شكو..

لكيت شذى متمدده ومغمضه عيونهه..رزان وسما مخبوصات بيهه يردون يكوموهه..
رزان هي وتبجي : دنوة فدوه بس جيبي مالتهه العلاگه بالغرفة.. حتتخربط ..
رحت للغرفة بالعجل وايدي ترجف..خفت عليهه خطية.. لاحول ولا قوة منتهية..اخذت الچيس مال ادويتهه انطيته لرزان.. طلعت حباية خلتهه جوه لسانهه وغسلتلهه وجهه بالمي.. وره عشر دقايق هيج فتحت عيونهه..رحت كعدت يمهه..
دنوة : شلون صرتي..
حركت راسهه يعني زينة..حتى مابيهه حيل تحجي.. ولو أذتني بس انقهرت عليهه لخاطر رزان وحالتهه اصلا تقهر الواحد بلا ما يحس.. گومتهه انه ورزان..اخذتهه للغرفة الجان مخلد كاعد بيهه كبل..تمددت ورزان كعدت يمهه.. رجعت اكمل العشه لكيت سرور تگلي..

سرور : روحي سبحي وبدلي عيني..اني اكمل..
دنوة : يله..
عفتهه وصعدت فوك..الجهال جانو جوه يتفرجون تلفزيون بالهول وي ولد سرور ..طبيت للغرفة اول مارفعت راسي لكيته منتچي ع الباب مالت الكنتور..تعودت اشوفه.. حتى احاجي .. بس هلمره سكتت بس دموعي تجري..رحت طلعت ملابس اسبح..
همس : دناوي..ماردتج ترحين اليوم..
خليت ايدي على عيوني وابجي..كمت اشهك واتذكر كل لحظة عشتهه بدونه.. كتله : انت عفتني مو انه..انه ماعندي غيرك شلون اعوفك..عفتنا كلنا ..
عفته ورحت للحمام اسبح..طبيت جوه الدوش وابجي بحرگه .. شوكت اتعود..ماادري بس تعبت بدونك .. روحي شايطة ومختنگه بلياك..اريد اشوفك..اريد انام بحضنك..

اريد حضنك يلمني..اصير چني عصفورة صغيرة بحضنك .. هسه وحدي بفراشنا وبغرفتنا وبيتنا كله..خالة مامقهورة مثلي.. هي ربتك وتعبت عليك لحدما كبرت وشلتهه وشلت البيت على متونك بدون ماتحجي.. بس انه.. انه شفت يمك الحنان والحب والأمان..اذا انت ابنهه..انه ابوي واخوي وحبيبي ورجلي وابو جهالي.. مايوم مديت ايدك علي..مو حرام.. حرام ..حرااام تعوفني وحيدي.. شلون اكمل بدونك وانه جنت امشي بزودك..اكول صگر واكف وياي مااخاف..هسة شلون.. ولك انه خايفة من اليوم كبل باجر.. شلون شسوي.. شحيصيرلي.. شمضمولي..

ضليت ابجي ولو ادري مايصير الواحد يبجي بالحمام.. بس شسوي..مقهورة وتعبانه من النفس الاتنفسه.. تعبانه من روحي والمكابره الدااكابرهه جدام جهالي.. جنت شوكت ما تضيگ بيه ماافكر ابد بس اجي يمه واصفن..
يكلي : ها حبيبي شبيج..
دنوة : محتاجتك ..
يطفي الجكارة ويفتحلي ايده : كلني لدنيتي..تعاي..
اجي بحضنه واتنفس ريحة هدومه وشعره التعودت انام على ريحتهن..ابجي وافضفض هو يسمعني مايمل مني.. انه من النوع اليحجي مايكتم..هو عكسي حييل..بحيث حتى موضوع يخص حياته ومتعلق بينا ماكاللنا..مشكلة الانسان الكتوم..

تنهدت ومسحت دموعي وكمت بدلت..خلصت ونزلت كعدت وياهم ع العشه..محمد جان كاعد ليغاد هو والحجي.. كمت اشوفه شيطان مو بشر..هلكد ما كرهته..بعد مااطيقه.. كله من وراه..شكد حقير ونذل..كتلته ليش.. انه احجي بگلبي واحسه يچويني من القهر..كلشي تخيلت بحياتي بس غيبته عني لا.. ادور سوده علي جان مشتاقلي..حتى ماشافني ضلت حسرة بگلبه..من وره هذا العايش ويشتم الهوى.. غصيت بالاكل انه واحجي بگلبي..كمت اگح اختنكت..ادور شربت مي واختنكت بالزايد..حسيت روحي وصلت لزردومي..اخر شي كمت استفرغ يله راحت الخنكة.. نفسيتي انسدت للاكل بس كعدت يم جهالي اوكلهم..كملتلهم شلون مجان وكمت اغسل الطاوات بين مايخلصوو .. اجت سرور يمي تحاجيني..

سرور : عيونج حمر..
دنوة : اي جنت ابجي..
سرور : تدرين ايمن شكال ع الاكل..
دنوة : شكال..
سرور : كام يبجي..كال ماما مدري ويامن تحجي بالليل تصيحله صگر..هو مو بابا مسافر..كتله اي غير تخابره.. سكت ماكال شي..دنوة مايصير هيج جدام الجهال خطية نفسيتهم تدمر.. وانتي ويامن تحجين بالليل..
دنوة : مااحجي وي احد..ايمن خال باله وياي ووي تصرفاتي .. بس شسوي..بيدي قابل..دااحاول اضغط على روحي واصير طبيعية جدامهم..نفسيتي متدمرة وروحي خلصانه..سرور خسرته ومامصدكة..شوكت اصدك.. الف حسبة ببالي وخايفة من كلشي..
خنگتني العبرة والخوفة من الدنيا..حقي..فتحت عيوني بشخصية مهزوزه ومنهارة ع الاخير.. ووكت ما بنيتهه انهدمت بسبب وفاته..عافني وحيدي وي جهالي الي حتى محيتذكرون شكله وتصرفاته وياهم..بس انه احترك گلبي وروحي شاطت .. تعبت من الدنيا وكلشي متعلق بيهه..عايشة لخاطرهم بس..

كمت ابجي واشهك..انهاريت..كل مره انهار وحدي بالليل يم ريحة شماغه وصوته لمن يقرالي قصيدة عريان وارجع الم روحي وانام..اكول لخاطر ديمة وايمن..منو الهم اذا استسلمت وعفتهم.. ضليت ابجي لحدما فاتت روزة شايله الصينية .. مسحت دموعي وغسلت وجهي..غسلت المواعين وسرور يمي ماعافتني..جهالهه يونسون شوي ضحكت على سوالفهم .. وره ساعة صعدنا فوك والباقين ضلو جوه..رزان وسما بقو يم شذى كالت باجر الصبح يجي السايق..انه تعبت من الطريق والبچي بس صعدت فرشت لجهال سرور والهه ونمت..

محمد وره يومين رجع لاربيل..البيت فرغ .. نفسيتي بمكان ما تتحسن وابدي اتعود كمت استوحش بالزايد.. بالليل اروح لغرفة اخلاص ابجي ماابجي جدام الجهال.. عمي قاسم على طول يخابرني خاف محتاجة شي..كتله لا ..الحجي مامقصر وانه عندي فلوس بالمصرف وبالبيت يعني..
علي ومرام يجون دائما بالليل..خالتي همات تجيني العصرية هي والبنات ..
خالتي : اخذ الجهال يمي يتونسون شوي.. خاف تعبانه..
دنوة : لا خالة..هم مونسيني بسوالفهم..بدونهم اطك واموت..
خالتي : اسم الله عليج حبوبة..كلهه فترة زمان وتبدين تتعودين .. هي هاي الدنيا..چا انه شكول..انه همات ارملة مثلج.. وعمتج هماتين..هو هذا العراق يخالة..
دنوة : اي والله..هو هذا العراق..شسوي بعد..

هاي تجيني دائما تحاجيني..ابادل واجامل بس مالي نفس بكلشي..هي شلون مجان بس مااريد افشلهه.. خالة كاسره خاطري..تبجي بجي ماصاير..اكعد الصبح اشوفهه كاعدة بالحديقة..الحجي طالع ومحد بالبيت فرحت كعدت يمهه.. لكيتهه دتبجي..
الحجية : وليدي محروم من الهوى وانه هنا اسرح وامرح بهوى الله..لا اعتراض على حكمك ربي..بس مايستاهل ..
بستهه من خدهه ومسحت دموعهه : مو تكولين اشوف صگر بايمن..خلي يمج تونسي علي..
الحجية : اي يخالة لوما هو چا طكيت ومتت..شسوي بس هو مصبرني..بسواليفه وحركاته..
خليت راسي بحضنهه وبجيت بدون صوت..مااريد اهيج جروحهه هي هم خطية..كامت تمسح على شعري وتحاجيني..

الحجية : تذكرين بالاربعين مالت المرحوم..
دنوة : عمي حامد..
الحجية : اي يمة..شون اجيتي بحضني نمتي على رجلي.. حجيتلج على وليدي..جان محلفني مااكول .. بس شني.. بط گلبي علي..شفته متكلوط يروح منا ويجي منا.. كلت خلاگللهه ولو هي عقدت بعد..الله شاهد لو وحده غيري چا كرهتج چي رفضتي ونفرتي منه..بس انه اعرفج شني..واعرف المرحوم شسوه خاطر ماتوافقين..
دنوة : خالة انتي وصگر لو ماعرفتكم جان مدري شصار بيه.. احبكم واحب حجيكم وياي..وگفتج لمن رحنا لسوريا..
الحجية : الله يعين گلبج يخالة..بعدج شابة وشفتي العجب.. احنا اهل كبل تعبنا وشفنا اشكال..حرب وحصار.. بس الوادم كلهه عاشت مثلنا..انتي وحيدج ..
دنوة : انتي وياي..وايمن وديمة..انه باقية علمودكم.. بس لاتعوفيني مثله..

الحجية : كلشي بيد ربج..
دنوة : صگر هم جان يكول هيج..لاتخوفيني..حاجيني .. قنعيني محيصير شي..انه تعبت بس مابيه حيل..روحته اخذت البقى من عمري كله..
سكتت بعد ماحجيت شي..خفت تبجي وموزين عليهه.. ضلينا كاعدين نص ساعة بعدين طبينا جوه..سويت ريوك ورحت اشوفهم كعدو لا.. لكيت ايمن يجر بديمة وهي تبجي.. شلتهه اسكتهه واحاجي : ولك ليش هيج وياهه ها..اكول لخالو عليك..
ايمن : ماما تاخذ معابيبي (ملاعيبي)..
دنوة : اليوم اشتريلك جديدات..انطيهيا..اصلا صارن قديمات اجيبلك الاحلى..
اجه حضن رجلي ويضحك عود حتشتريلي يعني ديغورهه.. ابتسمت واخذتهم غسلتلهم ونزلنا..

وره يومين كاعدين العصر بالهول صبيت چاي چي خالة ابتسام هنا..هي وجديتي ومرة عصام الجديدة اماني.. يعني بنية عادية بس عيونهه شرانية ماارتاحيتلهه.. الحجي طالع يم علي جان تندك الباب..عبالي هو..لبست شال وطلعت .. سياجنا ناصي والباب مشبچ..يبين منو.. لكيت ارشد واكف بس داير وجهه ديخابر..شعنده جاي..دااحجي وي روحي جان يدير وجهه..نزل التلفون من اذنه..عفته وطبيت جوه..
الحجية : ها يمة منو..
دنوة : ارشد بره..
الحجية : روحي خابري خالج خليجي يستقبله..خوما احنا..
دنوة : اي هسه..
اخذت التلفون ع الكاونتر وخابرته..كال هسه اطلع..

رحت صبيت عصاير خاف يجي بس ياخذ الصينية جاهزة.. ضليت كاعده يمهم لحدما سمعت حسه يعني اجه.. شواي وفات اخذ الصينية وراح كعد يمه..وره ساعة طلع وجديتي والباقي طلعو وراه..خالة راحت تحاجي..
الحجية : شراد رويشد..
وائل : باجر يجي هو وعارف نروح نطلع السيارة..
الحجية : مو كال ماتطلع..
وائل : دافع فلوس..زحمة لازم ارجعله..
الحجية : شكد منطيهم..
وائل : اربع اوراق..حسحب من مالات الفصل وانطي..
الحجية : ديله على راحتك خويه..

ماهتميت للفلوس..وهو هم ماطلب رأيي اذا اقبل ياخذ منهن لو لا..
نظفت البيت وسويت عشه..فتحت كارتون للجهال يتفرجون.. الحجي طلع مدري وين كال اتأخر تعشو انتو.. كملتلهم وصعدتهم فوك..بقيت يم خالة نسولف..
اخذتهه حبايتهه ونامت..طفيت الضوه جان تندك الباب.. طلعت فتحتهه همزين اجه هسه..قفلت البيبان وصعدت فوك.. نهاية الدرج مالنا يصير المخزن وبسده الحمام بس اكو مسافة بيناتهن تقريب المترين..جان صگر دائما ينتجي ع الحايط هذا ويدخن.. رفعت راسي وانه بين افكاري لكيته نفس ما تخيلته.. بس انه وياه..واكفه جدامه وايدي تعدل بقميصه العسكري.. ضليت جامدة بمكاني..ماانكر شعور الخوف التملكني.. كل شوفاتي اله اشوفه وحده..ليش هسه انه وياه.. شفته مبتسم ورفع راسه زفر الدخان ودنج باس راسي ومغمض عيونه .. شفايفه تتحرك چن واحد ديسولف.. بس كلشي صامت ماكو صوت..

خانتني دموعي والضعف احتواني انه وعقلي وگلبي..كمت ابجي بحرگة واصعدله فوك .. خطواتي ثكيلة وانفاسي بعد اثكل..بس تقربت منه اختفى خيالي ضل بس هو.. عقلي كام يخبط مواضيع ..احس اعصابي انهارت..خفت وانقهرت وگلبي يرجف كبل جسمي.. ماادري شنو اجه ببالي بلحظتهه.. بس من القهر والشوق ماحسيت بروحي غير احاجي بحرگه وهمس چن بس هو حيسمعه..

دنوة : ليش بس انه دااشوفك..انه اتعذب من اشوفك خيال وانت ماكو..صگر..اقتنعت انت رحت وعفتني من رحتلك بالاربعين وقريت اسمك ومواليدك..جنت باقية على امل بلكت اكون متوهمة ومن القهر قريت اسمك بدال غير اسم.. بس لمن رحنا كلشي اختلف.. حبيبي بست اسمك وسلمت عليك.. شفتني..
ابتسم ابتسامته اليبتسمهه بتعب ويغمض عيونه ويفتحهه بشكل ثكيل.. نزل الجگارة من حلكه ويحاجيني مثل كل مره : لج ابوية انتي چم مره كتلج اخاف عليج وحدج..انه گلبي يمج بنيتي.. انه موجود بغرفتنا..بديمة وايمن..روحي ساكنة بگلبج.. ديري بالج على روحج..كلشي يوجعج احس بي..
دنوة : جذب..ماموجود..انه دااتخيل وأوهم روحي.. تعبت بدونك انه والله تعبت..
جنت مدنجة وابجي..رفعت راسي لكيته عاكد حواجبه ويحرك راسه بـ لا..يعني لاتبجين..

رجعت دنجت وابجي..لحدما فزيت على صوت ديمة..
ديمة : ماما ويامن تحجين..
مسحت دموعي بالعجل سويت روحي داافوت للحمام .. جاوبتهه بدون ما اندار : ها حبيبتي..هيج داافكر بيكم نمتو لو لا..
اجت بيدهه الممة حضنت رجلي ورافعه راسهه : اريد اكل..
دنوة : امشي نامي..مو كبل شوي سويتلكم..
ديمة : ازعل..
دنوة : دمشي هسه..اغسل واروح اسويلج..
باستني وراحت..بله هاي تريد اكل هسه..اوف اوف.. يله ميخالف شعندي غيرهم.. طبيت للحمام غسلت وجهي والحسرة بگلبي على شوفته..شكد انقهر لمن اشوفه خيال.. احسه شكد بعيد والدرب بيناتنا مقطوع نهائيا بحيث يجيني بهلهيئة..

انه اكول خيال..بس الحقيقة هو بشر عادي انه اشوفه بس.. صوت وحركات..بس اتقرب يختفي..دورات اخاف وعيوني تبدي تفحص المكان خاف اكو شي غريب..دورات اكيف لمن اشوفه..

تنهدت ورحت جوه..طلعت جبن اسويلهه لفة.. سمعت صوت تلفون يدك..بس بعيد مو بالمطبخ.. البيت اظلم طفيت كلشي وصعدت.. تمشيت لمكان الصوت بالهول..قريب القنفة الطويله.. بس ماادري وين..وخرت الكوشات والچرچف ..ماكو.. اخر شي انسد من وحده..كلت يمكن مالت الحجي .. عفته توني دااطلع ورجع دك.. لازم الكاه..فتحت الضوه ودورت لكيته وره القنفة بينهه وبين الحايط..اول مره اشوف هيج تلفون.. مو مالتنا شجابه هنا.. بي رمز والمتصل انتصار.. مكتوب اسم بس.. الخلفية صورة طفلين ولد..مالمن هذا.. خليته صامت وحطيته ع اليدة مالت القنفة..خاف خالة نسته.. لا وين عدنا وحده اسمهه انتصار..
بس طلعت من الهول تذكرت ارشد..يمكن مالته هذا.. يله هو باجر حيجي ع الحجي اذا مالكيته يعني مالته..

اخذت اللفة وصعدت فوك..انطيتهيا اكلتهه ونامت.. ايمن جان نايم.. كمت طفيت الضوه ورحت على خانته.. ضليت ادور بيهه واشم ريحته.. اووف شكد مشتاقتلك.. مشتاقه لكلشي بيك.. شكد هادئ وتراعي المقابل بكل كلمة تكولهه.. شكد نيالي عليك وهيج رحت مني..جريت بلوزه طاح مدري شنو.. ماانتبهت عيوني مغوشه من الدموع..جريت الباب جانت سلايد ومسحت دموعي.. دنجت لكيت السيدي مالت اغنية اسألي عني الليالي .. عيوني غرغرت وانفاسي سرعت.. اختنكت .. بعده لهسه عندهيا..مايذبه ..چم مره كتله خلاذبه شتسوي بي..
يكلي : يولي اذب روحي اذا ذبيته.. غير ذكرياتي بي..
دنوة : مو عدنا نت وهاي يعني اسمعهه بي..
صگر : لا بابا..ماتعرفين شكد يعنيلي..رجعي بمكانه باباتي..

مر الموقف جدامي لمن سمعلياهه كبل لا نروح لسوريا.. قربت بلوزه كمت اشم بي وابجي بحرگة وكاتمه صوتي بالبلوز.. ضليت ابجي لحدما تعبت وكمت رجعت السيدي ورحت تمددت بمكانه..كبل لا انام اخلي من عطره على مخدته خاطر ماتروح ريحته من الغرفة والچرباية.. حضنتهه ونمت ..

ثاني يوم الصبح كعدت واخذت الجهال غسلتلهم ونزلت.. لكيت خالة كاعده مخليه الچاي ع النار..صبحت عليهه وكعدت ع الكرسي احاجيهه..
دنوة : طلعو خالو وارشد..
الحجية : اي يمة..اكلج هذا رويشد ناسي تلفونه..
دنوة : شلون ..
الحجية : كعدت لكيت تلفون ع القنفة ..سألت وائل كال مو مالتي.. عاد لمن اجه ارشد اخذه..كال نسيته ..
دنوة : چا شلون خابر ع الحجي..
الحجية : كال عندي ثنين..شني فد معضلة..
دنوة : ديله صحيح..تعاي كعدي انه اكمل..
الحجية : حلمت بصگر..

گلبي فز من جابت طاري..حتى وانت رحت گلبي يفز من ينجاب طاريك.. اخ منك يگلبي..
دنوة : شحلمتي خالة..
الحجية : شفته لابس دشداشة بيضه هو وابوه جانو كاعدين وجايب كيمر وكاهي..كتله يمة شو هنا..چا جهالك وين.. كال هسه تجي دنوة وتجيبهم..يم جدي كاعدين.. اجه حب على راسي وشبگني..كتله يمة خوما تعبان ..خاف متوجع وليدي..
صوتهه صارت بي غصة واضحه.. الدمعة بظرف عينهه..
دنوة : وشكال..
الحجية : كال لا حجية مرتاح..بس بالج عليهم..
كامت تبجي وتتذكره..شكد ايام صعبة ومن موقف واحد نتذكره والعيون تهل بالدموع.. كمت عليهه حضنتهه ومسحت دموعهه.. انه اريد واحد يطبطب على ظهري بس وكفت وياهه وهديتهه.. تعلمت منه..جان هو ومريض يخاف علي خاف اتوتر ويصير بيه شي.. اوووف ياگلبك الطيب هيج ينمرد بطلقة .. شدعي عليهم وشكول..

بقت بالربع ساعة تبجي..لحدما سكتتهه واجو الجهال.. التهت وياهم تضحك على سوالفهم بين ما مشى الوكت..

ارشد : جنت بالبيت توني طالع من الحمام ..شفت انتصار واكفه وبيدهه تلفوني يدك.. كتلهه : منو..
انتصار : ماادري بس رقم..
تقربت اخذته وشلته..
- : السلام عليكم سيدي..
ارشد : وعليكم السلام.. منو..
- : ماعرفتني..
ارشد : ولا صغرا بيك..
- : اني الضابط اللزمت قضية السيارة التعرضت للمداهمة.. كتلك مااكدر اجازف بعد..
ارشد : اييي عرفتك..هلا بيك خوية..خيرك..
- : كل الخير..تكدر تجي انت وأي كفيل اطلعون السيارة..
ارشد : يالله..شكو ليش شصار..

- : والله كاعد بالمركز جان يخابرني رقم مجهول.. كال السيارة السوده رقمهه الفلاني..طلعهه بعد ميحتاج تبقى.. بالبداية كلت كبسة يمكن.. وراهه بفترة يومين تلاثه رجع خابرني.. كال صار گوام بيناتنا وانحلت القضية واني تعهدت بعد مااتعرضلهم وتنازلت عن السيارة.. اكيد اخاف على منصبي ومكاني.. كتله هاهيه.. والله اول ما سديته سويت الجامة مالتهه والكشنات مكان الطلقات خليت المصلح نفسه يخلي عليهه مثل اللزكة حتى ميبين اثر للمداهمة.. تدري حضرتك ضابط وتعرف ميصير سيارة متعرضه للطلق الناري تمشي بالشارع..
ارشد : اي صحيح.. شكد كلفت كلهه..
- : اربع اوراق..
ارشد : شنوووو..الله بالخير خوية..
- : اي والله هلكد..
ضليت صافن..فركت وجهي وحاجيته : يله خير ان شاء الله.. بس انطي خبر لأهله واجي..فلوسك يمي لاتكول ارشد دفع..
- : التريده يصيرلك سيدي..حبيت اخبرك..
ارشد : ممنونك ياغالي..اخذ راحتك.. الله وياك..

سديته منه وكمت ابدل..
انتصار : شو صاير هواي تطلع..شعندك..
ارشد : وانتي شكو..
انتصار : اني مرتك ارشد..ليش هيج..
ارشد : لاتنسين نفسج والحدود الحاطهه.. بعدين انه لمن ارجع اذا ماتعبان احجيلج..خوش بوية..كومي قفلي الباب وراي..
ضلت صافنة چنهه تريد تحجي شي..
ارشد : كومي شبيج ..
انتصار : من ترجع اريد احجي وياك بشغلة..
ارشد : ميخالف..
كمت واجت سدته وراي..بس ضلت الشغلة ببالي.. شخطت السيارة ورحت لبيت المرحوم..

دكيت الباب وانداريت اخابر عارف..يمكن بالخمس مرات اخابر ومايشيله..اخر شي يله شاله..
ارشد : وينك نعلعلا شرفك..
عارف : شكو شتريد..
ارشد : هاي سيارة صگر باجر تطلع..بس اريدك تجي وياي انت وخالة علمود الكفالة..
عارف : هاي شوكت هلحچي..شو ماادري..
ارشد : اي هسه خابرني الضابط فهمني..
عارف : ديله خوش شوكت تمرلي..
ارشد : اجيك الصبح..بالتسعه هيج..مو اضل ادك بالباب وانتظر مثل الطرن..اطلع بالعجل..
عارف : شبيك كالب الچهرة خالي..بالهداوة..يله توكل شوف شتسوي والباقي باجر..
ارشد : يله هاهيه..

حسيت الباب انفتحت..درت وجهي شفت البنية نفسهه.. مرته.. اخر مره شفتهه بالمگبرة بيوم الدفنة..وراهه لمن سمعت بمحمد شمسوي انه جنت اخابر بره وماحبيت اشوف منظرهه هي وتبجي.. بقيت داير وجهي..بالاربعين ماجانت مبينه وگرابته كلهم جايين..زحمة اشوفهه حتى.. بس منظرهه هسه مختلف عن اول مره..ملامحهه كبرانة وتعبانة..اااخ ياموت الاحباب شكد يتعب الروح كبل الجسد.. لمن شافتني عكدت حاجبهه ودخلت بالعجل..شكد حلوه وسمره.. بنتي سمره ودمهه يلعب.. ماادري ليش شفتهه بيهه..چي سمره يمكن..
هسه شجاني انداريت.. استغفر الله.. انتچيت ع السيارة انتظر واحد منهم يطلع..وره شواي اجه خالة.. استقبلني وفتنا جوه.. حجيتله الحچاليا الضابط ..كال باجر الصبح نطلع نطلعهه..

بقيت كاعد عدهم لحدما دك واحد من تلفوناتي..عندي ثنين.. ترخصت منه وطلعت بالحديقة اخابر..
انتصار بتعب وگوة تحجي : وين انت..
ارشد : يم الجماعة..خيرج شبيج..
انتصار : تعبانة ماادري شبيه..
ارشد : هسه جايج صبري..

سديته وطبيت جوه كتله اترخص انه..طلعت بالعجل حتى مافتشت وراي خاف ناسيلي شغلة..وصلت للبيت واسمع حسهه تستفرغ وتشهك..بس طبيت لكيتهه كاعده يم باب الحمام ومدنجة راسهه بين اديهه..ذبيت السويچ والغراض وكعدت يمهه..
ارشد : شبيج يالله لاتهبطيني..
انتصار : اخاف احجي..
ارشد : دكومي هسه حتى مابيج حيل تحجين..
كومتهه وغسلت وجهها..اخذتهه للغرفة ترتاح..كعدت يمهه.. كل البالي مستبردة لو فلاونزا..
انتصار : ارشد..اسمع مني.. اني عفت كلشي علمودك .. الفلوس والطلعات وغيرهه..ليش متريدني اصير حامل.. شنو اليمنع..ليش تحرمني وتدري اذا طلكتني بعد محد يتزوجني..

ارشد : شنو هلحجي هذا..مو من زمان قافلين الموضوع وگايلج مااريد اطفال..بزعانه روحي انه..
انتصار : بس اني حامل..
كمت بالعجل كمشتهه من فتحة التراك : شنووووو.. عيدي ماسمعت.. حامل..
انتصار : اي..وحباب خلي ليش تسوي هشكل..
ارشد : لاتخبليني تره اذبحج هسه واخلص منج.. والمنع السويتي وين راح..
انتصار : رحت ع الدكتورة وخرتليا..اني اريد نبني حياتنا.. انطي علاقتنا فرصة..
ارشد : كومي كومي..تردين تجلطيني يول يالله..
عفتهه وانداريت..هاي حتطيحني بمصيبة الهه اول مالهه تالي.. فركت وجهي وايدي على شعري..

رجعت انداريتلهه..عطت بيهه : وجع وسم وزهر.. كومي لبسي خلاخذج للدكتورة..
انتصار : مااكوم ولا اتحرك خطوة..
ارشد : لا تكومين وغصب بعد..يله.. طفل مااريد.. تردين تبليني وتكربصيني ببلوة..
انتصار : لا مااريد هيج..بس اسمع مني شبيك..
ارشد : صارلج شكد حامل بت الكلب..
انتصار : ليش تفشر على ابوية..هو ميت ..
ارشد : ليش انتي منيلج اب..لج لوما انه چا انتي كل يوم رايحة تسقطين..شفتج بعدج صغيرة وماتعرفين انقهرت عليج.. بس مال تكربصيني بطفل لا والف لا..كومي دااحاجيج بالعيني والاغاتي مااريد اخذج بالغصب..
انتصار : كتلك مااكوم ارشد..

جريت الصاية لبستهه واخذتهه سحل من شعرهه : قندرة ادبسز.. اعوفج بالبيت واروح للدوام مأمن عليج بعدين تطلعين من وراي.. اليوم اذا مانزل الطفل اذبحج واخلي يرافس ببطنج.. ادور شهرين حامل..شفتيني ملتهي ياكلبة.. صبرج علي صبررررج..

فتحت باب السياة اصعدهه..عصت ماتقبل تصعد..
عاطت والدنيا مغربية اكو واحد حجي بالفرع يصلي بالجامع.. وكت صلاة جان تعيط..اندار علي واجاني..
الحجي : سلامتكم بوية..
ارشد : ماكو شي حجي..الله يسلمك..
مااحسهه غير فلتت ايدي وراحت وراه : عمو يريد يطرحني.. تقبلهه يكتل الطفل ببطني..
الحجي : لا اله الا الله..مااريد ادخل روحي بوية بس مايصير تكتل روح..
ارشد : مشكور حجي..بس شغلة بيناتنا..ماكو أي ربط بالطفل والحمل..
خزرتهه وجريتهه : صعدي بت القندرة..
الحجي خلّه وراح..صعدتهه وصعدت بالعجل قفلت البيبان من جوه..ادري بيهه تريد تفتح الباب تخليني اضطر اوكف..

ارشد : يادكتورة رحتيلهه وخرتلج المنع..
انتصار : نفسهه السوتليا..
ارشد : خوش ..
اليوم احرگ العيادة عليهه.. سقت چني مخبل.. بين ما وصلت جان اكو ثنين نسوان بس والسكرتيرة..

اول ما شافتني عرفتني..
السكرتيرة : تفضل اخوية..
ارشد : اكو احد يم الدكتورة جوه..
السكرتيرة : لا..بس دتصلي محد يكدر يفوت..واكو نسوان تلاثة جوه ديشترن الدوه..
ارشد : بس تكمل اريدهه تدخل لانسوان ولا ادوية..وانه ادخل وياهه مو وحدهه..
السكرتيرة : مايصير تدخل انت عيوني..بس البنت..
ارشد : مثل مااكلج..
اخذتهه على صفحه انطيتهه تلاثة و١٥ مالت الكشفية.. كالت بس تخلص ادخلكم..
ضليت واكف بالباب وعيون النسوان هذن علي وعليهه.. كامش ايدهه بالقوة ..
همست : ايدي توجعني ارشد..
ارشد : ووجعتهم..
انتصار : حرام عليك تكتله..ليش تسوي هيج..
ارشد : لاتفكين حلگج زين لو لا..

ضلت تبجي لحدما اجت السكرتيرة تحاجيني..
السكرتيرة : تفضل..ولو الدكتورة ماتقبل يفوت رجال..بس حاولت وياهه كتلهه مريضة وماتكدر تمشي..
ارشد : يله امشي..
اخذتهه وطبيت..اول ما شافتني وكفت..تدري بيه اجيت كبل سنة لو سنة ونص علمود المنع..
الدكتورة : اهلا..تفضلي عيوني..اشو جاية بدون حجز شعجب..
ارشد : اريدج اطرحيهه..هسه وبهللحظة.. شلون تشيليلهه المنع بدون موافقة مني..
الدكتورة : شنو شلون اخي..هي صاحبة الطفل والحمل عليهه انت مامتأذي بشي..ثم إنّي كدكتورة صارلي سنوات مستحيل انزل الطفل..سواء هي او غيرهه.. حرام ومايجوز ابدا.. بحال اذا كان مشوه او عنده نقص بالأعضاء يكون جائز..غيرهه مايصير.. واني سويتلهه سونار وتأكدت من وضعهه..

ارشد : والله اكلب العيادة فوك راسج اذا مانزلي الطفل..
الدكتورة : تعذرني..بس هذا شي غير قانوني.. ممكن يصير عدهه نزيف وتتوفى..او رحمهه يتأذى..مااكدر ..
ارشد : لا تكدرين وهسه يله..شكد تردين فلوس انطيج..
الدكتورة : مااريد فلوس اخي.. بس هذا شي خارج عن حدودي وصلاحياتي.. خاف ربك بالطفل..هو طفلك ليش تقتله..
ارشد : انتي تعرفين شي وانه اعرف شي ثاني..طرحيهه والموضوع يبقى بيناتنا قسما مايطلع بره الباب..

وجهها صار احمر وعرگت بس بعدهه ماتقبل تنزله.. ضلت تعاند وتماطل..وانتصار واكفة وياهه..
اخر شي هددتهه : اذبج بالسجن انتي ورجلج اذا ماطرحتيهه..
الدكتورة : تفضل اطلع بره..مااستقبل هيج تفكير.. بنات الحرام هواي..هي اطرحهه اذا هلكد مصر ع الموضوع..
كمشتهه من ايدهه شمرتهه ع الدكتورة : حطلع.. نص ساعة اذا ماطرحت اقفل العيادة بيدي..
عفتهه وطلعت..ضليت واكف بره انتظر..صار مرتين بعد مااتحمل هيج اخطاء..استغفرالله بس.. نزلت للمحل جوه العيادة.. اشتريت مي..راسي كام يدك وعيوني احسهه حتنفجر ضغطي صعد..بهلاثناء جان يدك تلفوني..والدتي

الوالدة : ها يمة شلونك حبيبي..
ارشد : هلا حجية هلا بيج..زين زين..انتي شلونج..
الوالدة : على الله وليدي..
ارشد : كولي محتاجة شي..صار فترة مامارلج ..بس تعبان والله من مكان لمكان ضال اروكض..
الوالدة : الله يساعدك يمة..اريد تجيبلي دواياتي.. اليوم تخربطت الصبح..
ارشد : لا جذب..شنو تخربطتي ليش شصاير..
الوالدة : بعد امك اشو گلبي كام يدك سريع واختنكت.. صار اسبوع ماماخذه دواية مالت القلب..جيبليا..
ارشد : وشلون يمة هسه زينة..عارف وين..
الوالدة : موجود يمة..هو غسلّي وكعد يمي لحدما ارتاحيت..
ارشد : يله انه طالع بشغلة ساعه واجيج..
الوالدة : انتظرك عيني..

ودعتهه وبقيت واكف لحدما صارت بثمانية وصعدت فوك.. لكيتهه كاعده ع الكرسي وجهها اصفر ..النسوان الجانن هنا ماكو..شواي وطلعت الدكتورة..لمن شافتني خلت وطلعت بالعجل حتى ماحجيت وياهه..اخذت انتصار ورجعت للبيت..
ارشد : اقفل الباب بعد واروح لو شلون..مااخاف عليج من نار من صخام..بابا افهمي مااريد مااريييد..انه هم اصير ابوه يعني الي حق اذا اريده يصير لو لا..
انتصار : اني امه..يعني اني حتعب مو انت..لو متريد تحرك چيسك بفلوس زايدة..
ارشد : تنلصمين لا الطج على حلكج..الفلوس مطشرة وانه مو فگر خاطر اضمضمهن..جيبي تلفونج بعد ماكو نعل..
انتصار : هناك..
وأشرت ع الكومدي..اخذته طلعت السيمكارت وفرمته .. فرغ مابي شي..اكيد هاي ام حنان هي تخلي براسهه هلحچي..

شافتهه فقيرة وتمشي بشور هذا وذاك..وانه اخر فترة بعد ابد مارحت هناك..ضاجت ماكو فلوس..

شواي وتذكرت والدتي..اخذت فلوس والسويج وطلعت اشتريتلهه الدوة.. حلفتني تريد تحاجي رحمة بنتي.. هي جانت تكعد يمهه دائما وتدلل عليهه.. تحبهه.. دكيت على ختام امهم يعني.. خليتهه تحاجي رحمة ورجعت للبيت.. ضليت كاعد بعيد عنهه..ماادري بيهه .. سويت النرگيلة وفاتح التلفزيون على فلم..بنص الليل خابرني عارف..صوته مطفي ومبين مو طبيعي..

ارشد : ها شارب يول..
عارف : تعال عازمك..
ارشد : روح نام يابة مو وكتهه..باجر ورانا طريق..
عارف : دتعال..ارد احاجيك شو ضايج مدري شبيه..
ارشد : هسه اجيك..
كمت لبست وطلعت..لكيته واكف بالباب يخابر ماادري منو.. اخذته وطبينا جوه.. نظفت الصالة من البطالة والوصخ.. بقى بس اكل جايب من بره بس مامفتوح..فتحته اكل منه جان يمد ايده..
ارشد : دوخر لاتاكل..هسه تذبه كله..
عارف : شبييك شنو حرام..
ارشد : ماكتلي بشنو ردت تحاجيني..

شال ايده وطلع جكارة ورثهه وانتچى ع الحايط.. فارش مدات بدون قنفات داير مداير الغرفة..
عارف : جنت افكر بمرته..
ارشد : مرتمن..
عارف : صگر..
ارشد : شجابهه على بالك..
عارف : ماادري..اشو ممرود عليهه خطية..شفتهه بالاربعين شسوت..وبالدفنة ..شلون حتكمل هاي ماادري..
ارشد : شعليك منهه عمي..عوف المرة مايصير..
عارف : قابل انه حاط عيني عليهه..شو ماتعرف تسولف.. هو ابني بطولي عليمن اعاين بعد..فشلة حتى..
ارشد : اي هيج احسن..

ضل يعاينلي مدري شلون..سكتت ماحجيت.. انه كل كلمة كلتهه مااقصد بيهه شي..اخر شي كمت اروح للبيت.. طلع وياي بره يحاجيني..
عارف : تره ماتتزوج..خاف تفكر تزوجهه بعدين..
ارشد : روح خش جوه بوية..انت شارب ومطفي.. انه كلت اتزوجهه شو مدري شلونك صاير..
عارف : هسه يجي يوم تفاتحني بهلموضوع وتكول كال عارف.. روح الله وياك..

هذا شبي تورشعني..عفته وطلعت ..هو لمن يشرب يجي هنا لهذا البيت..متزوج ومرتة متوفيه كبل هواي..ب٢٠٠٧ توفت موتة الله..عنده ثنين ولد وبنية..الولد مواليده ٩٥ والبنيه الفين.. محد يدري بي يشرب بس انه..ولده موجودين ببيت الوالدة هو هم عايش وياهم هناك بس دورات يجي هنا..
بين ما وصلت للبيت الف حسبة اجت ببالي.. شمدري بيه.. هي مره وحدة نظرتلهه واستغفرت..
رجعت للبيت وتذكرت تلفوني الثاني ماكو..طبيت مخترع.. بي كلشي ارقام الضباط وهواي شغلات تخص الشغل.. صحت : انتصاااار..وينج..
ماجاوبتني.. رحت للغرفة لكيتهه متمددة وتلفونهه يم راسهه محطوط.. نزعت التشيرت والحزام ذبيته..تمددت يمهه .. ضليت صافن عليهه بس بالي مو هنا ابد..

فززتني بلمسة ايدهه : اجيت..
ارشد : اي ..
انتصار : خابرت عليك وماجاوبتني..وين جنت..
ارشد : خابرتي ع الاثير غير..
انتصار : اي..
ارشد : مدري وين نسيته..يمكن ببيت المرحوم..باجر اروح اشوفه وين يروح قابل..
همهمت بدون ماتحجي..رفعت راسهه كبل غمضت بدون ماتعاينلي حتى ..
همست : بوية لاتكبريهه علي..
انتصار : شنو مااكبرهه..اني حتمرض ويشيلولي الرحم من وراك..ليش شنو ذنبي..لأن اريد نصير عائلة حالنا حال الباقين.. لو حظي..

ارشد : انه مامستقر انتصار..افهمي..لو مستقر وادري بروحي اكدر اكون عائلة من جد وجديد چا من اول مره ماخليتج تطرحين وهاهيه..بس مااكدر.. اغلب وكتي بالواجب وهسه بالي على جهالي..داعش حيوصل لديالى ..لازم اجيبهم بس اشوف بيت هنا..يعني حدفع ايجارين ومصرف اربع خمس نفرات وانتي وياهم..عندي فلوس ومتمكن..بس مامستقر وانه لوما اريد خاطرج مااخذج واعوفج يم ام حنان..
سكتت ماجاوبتني..كامت تبجي وراحت كعدت بالركن.. استغربت..شبيهه هاي.. كمت انزع الفانيلة وحجت..
انتصار : اني ماذبيت الطفل..
انه مثل واحد وكفن جدامه شياطين الدنيا كلهه..

ارشد : لاتخبليني..شنو ماذبيتي..
انتصار : الدكتورة ماقبلت واني توسلت بيهه.. اذا مصرفي ثكيل عليك اكوم اشتغل واجيب لروحي..
كمت اصيح واكسر..ركعت البيبان ماضل عقل براسي : لج انتي بكد القندرة تضحكين علي..اكلج تسوين شي تروحين تلعبين من ورااااي..اذا ذبحتج هسه حلال..
اجت يمي تريد تهديني..صار الجنت خايف منه..مااكدر ارجعهه هناك..اكو واحد يطلك مرته خاطر ترجع للمزبلة.. هي لمن شفتهه جان الهه اسبوع اذا مو اقل بهلمكان وبعدهه صغيرة بالنسبة للباقيات.. كلت اخذهه واخليهه عندي احسن مما تضل هنا وادري هلامكان شنو بيهن..فمااكدر ارجعهه زحمة على روحي..ولا اكدر اضربهه خاطر اطرحهه.. شهرين هواي لا يوم ولا يومين..ادور تروح تموت..

انداريت عليهه شبعتهه راشديات وجر من الشعر : يبقى موو.. بقي يله..بس والله فلا اجيج بعد..ضلي هيج..
انتصار : محملني منية ليش..هذا ابنك او بنتك..
ارشد : انتي ماتفهمين بالبشر..روحي انخدمي لاتشوفيني خلقتج بزعانة روحي..
كمت اخذت غطى ورحت بالهول..وقتت التلفون ع السبعة ونص علمود اروحلهم..

ثاني يوم كعدت بدلت وطلعت بدون اكل حتى..رحت ع الحجي لكيت تلفوني عدهم..اخذته وطلعنا لعارف بعدين لبغداد.. بالطريق خابرت الضابط علمود يجهز كلشي بين ما نوصل.. بس وصلنا طب خالة وقع على اوراق الخروج.. اخذت الضابط على صفحه دفعتله اربع اوراق بس جدامهم كال كلشي مدفوع التكلفة كبل لا انطي اصلا..مثل ماوصيته يعني..
وره اجراءات ولغوة طلعنا..عارف وياي والحجي ساقهه لطريق البصرة.. نزلنا تغدينا بالطريق..وصلنا هناك بالثمانية الا ربع بالليل..هلكت من التعب..ضليت كاعد يمهم بالصالة..

دنوة : مشى الوكت لحد وره الظهر كلهم نايمين.. خالة والجهال نيمتهم..غسلت الهدوم وصعدت اشرهن بالسطح.. الجو حار يكتل كتل..انه وأشر واسمع صوت همس .. يمكن من الحر دااتوهم..
- : واحسك لغز شنهو انت وشنو اوصافك ..
وتوصيني اعلى ياذمة توصيني ..
حياتي انت ونبض يسري بشراييني ..
ضلت هلجمل تتردد على اذاني بصوت همس بس واضح.. كملت ودرت وجهي لكيته واكف بالباب ومبتسم.. عيوني غرغرت بالدموع.. دنجت ومريت من يمه ..ماكال شي ..طبيت للغرفة بدون مااحجي..بس حضنت مخدته وغفيت عليهه..

وره المغرب سمعت صوت الباب انفتحت..طبيت للهول شفت سيارة صگر دتدخل للگراج..بس من وره الضوه ماانتبهت منو ديسوقهه.. گلبي كام يوجعني من شفتهه.. اوف واوف.. شكول وشحجي..ششفت منك..ليش انه عشت سنة مرتاحه بيهه.. بس سنة ٢٠١٣ جانت طبيعية وشفتك زين..ماعولت اتعود ورحت مني.. يعني اذا ارد اعاتب ربي شكول..هو الصوج بمحمد .. ضليت اعاينلهم لحدما طفت ونزل منهه الحجي.. بعدين فات ارشد.. هو هم طويل وجسمه مرتب بس مايجي ذرة لصگر.. مدري انه كلشي صار باهت بعيوني.. عفتهم وطبيت للمطبخ اسوي العشه..خالة جانت بغرفتهه جان يجي الحجي..
وائل : ها خالو شمسوية..
دنوة : خير من الله..حيتعشون هنا..
وائل : لا هسه حيروحون..حتوضى واصلي بالحديقة..
دنوة : على راحتك..

كملت ورحت حطيته بالصالة..فتت من يم الهول ماسمعت صوت احد..يمكن طلعو..ديمة اجت وايمن ماكو.. دورت علي بالغرف وبالحمام.. هذا وين طفر..
صحت انه وافتح الباب : ايمننن وينك ماما..
كمزت من مكاني لمن شفت ارشد كاعد وايمن بحضنه.. انه من الفشلة وكفت بمكاني ماادري شسوي..عدلت الشال وخزرت ايمن اشرتله بيدي يجي..
ارشد : يله روح يم امك..
باسه ونزله من حضنه..اجاني يركض..عفته وطبيت جوه : شوداك هناك..عبالي طلعت بره..
ايمن : هو عمو صاحني..
دنوة : شكال..
ايمن : كال تع (تعال) اكعد يم الزلم..

ابتسمت علي..جان صگر لمن يشوفه كاعد يمي وهو يمه صحبانه يجي ياخذه..يكلي خليكعد يم الزلم لايتجبن.. احس گلبي عصرني..اوووف فراگك اكل روحي وگلبي والله.. احسه حلم..شوكت اصحى منه..انه صحيت بالاساس.. بس گلبي مامقتنع بعده..
كعدت وياهم ع الاكل بس الغصة بزردومي حتى ماكدرت اكل شي..لعبانة روحي..بس وكلتهم وبقيت كاعدة وياهم خاف يضوجون وحيدهم..لهناك وفات الحجي قفلت البيبان وراه وغسلت المواعين وصعدت نيمتهم..

اختليت بروحي وبشماغ صگر..
كمت احاجي وابجي واناشغ : مشتاقتلك حبيبي.. نظر عيني انت.. شلون اعيش بدونك بس فهمني..بعدني خايفة وماادري شمضموملي..اريد تضل وياي..حتلو تجيني حلم ميخالف.. طمني محيصير شي بغيابك..انه انتظر الليل علمودك .. علمود ابجي واحضن هدومك..
كمت اشهك احس الهوى بعد مايكفيني.. رفعت راسي لكيته ع الجرباية بسدي.. همست : جنت تسمعني..
صگر : اجيت خاطر مااخليج تبجين..
دموعي وكفت بس گلبي مجروح ويبجي بحرگة..دنجت وحضنت راسي بالشماغ مالته ومخليه جزء منه يم خشمي اشم بي..حسيت اعصابي هدأت وجسمي خدر.. كرفصت روحي صرت بوضعية الجنين ونمت..

مرت ايام والسيارة بقت بالبيت لاتطلع يمنى ولا يسرى.. بس الحجي كل فترة يحميهه يكول علمود الباتري مايچسي.. اكيد خالة ابتسام وجديتي كل اسبوع يمرون علينا يشوفون خالة.. عمي مامقصر..كل ما تجي جديتي يدز بيدهه شي.. لو هو يتصل علي وهيج يعني..صگر كل يوم اشوفه.. واشبع بجي بشوفته..مامتعودة بدونه..روحه ساكنة بكل متر بالبيت.. وبغرفتنا تنام وتاكل وتشرب..لمن اتأخر بالشغل واصعد فوك ادخل اشوفه منتچي ع الكنتور ومچتف ادي.. احس گلبي يبرد ويحترگ بنفس الوكت..بس هذا الطيف اشوفه بي .. وانقهر چي مااكدر اتقرب..احس روحي مسجونة..

اجذب اذا ماكلت تمنيت الموت..بس لخاطر جهالي استغفر واكول اذا هو راح معناهه انه همات اروح واعوفهم.. شكد ما احس روحي قوية بمجرد اشوف خياله كلشي بنيته ينهدم.. كل ذرة قوة اتظاهر بيهه احسهه تتحطم للاخير..

بيوم اجت خالتي اخذت الجهال كالت حيجون جهال دنيا خليتونسون شوي..اخذتهم وراحت..صعدت فوك اغير الفرشات مالت الجرابي والكهرباء طگت..فغرت روحي ..ادور الحجي ماموجود..طالع لبغداد يسوي تحاليل..
كملت شلون ماجان واخذت هدوم اسبح.. بالباب واسمع صوت يطلع من غرفة اخلاص..يمكن متوهمة..بس طبيت صار اعلى.. جسمي رجف من فوك ليجوه..خليت الهدوم بالحمام ورحت اشوف شنو هلصوت..بس اقتربت اكثر حسيته صوت صگر.. بس صوت ونين وآهات مال واحد تعبان.. فتحت الباب على كيفي مالكيت شي..
بس اسمع صوته تعبان ويجر الكلمة جر : تعبان.. تعبااان .. اويلي يابة..

عيوني انملت دموع ..لا اراديا حجيت : شبيك..
ماجاوبني بس يصيح اويلي يابة..سديت الباب وطلعت للحمام اركض چني شايفه جني..كمت ابجي وايدي على شعري.. يروحي شبيك ليش تعبان حبيبي..
ضليت ابجي انه وافتح شعري..جريت المكص اكصه.. هو جان يحبه حييل..يكلي يابو الليل الحلو اليلعب على چتافك.. چي طويل ولو لونه مو اسود بس ع الطول..
حسيت نسمة هوى مرت من يم إذني بيهه صوته لمن جان يكلي : احرگ العشيرة اذا انگص منه ملم واحد..
دنوة : ماادري شسوي..انه احس نار بصدري تاكل بيه أكل.. تعبت من كلشي..حتى من انفاسي تعبت..حياتي انت ورحت .. شضل عندي خاطر اعيشه..

صگر : لاتگصي..ماارضا عليج وداعت ديمة..
ذبيته وايدي ترجف..مراقبني كلّي ولمن اريده يجيني حلم مايجي.. تنهدت ومسحت دموعي..هو اختفى.. طبيت سبحت وطلعت نزلت يم خالة..
الحجية : يمة هاي بس يمنا ماكو كهرباء..
دنوة : چا انه عبالي طكت المحولة..
الحجية : لا مو خابرت عليوينا كال عدنا كهرباء..
دنوة : مايجي يسويهه..
الحجية : يكول بالشغل..بالليل يله يرجع..انه ع الحر هذا تفغر روحي واموت..
دنوة : چا شحتسوين..
الحجية : اخابر على ارشد لو عارف..هم بحسبة اهل البيت .. هذا وائل ابد مو وكته يسافر..
دنوة : ديله خابري انه همات اختنكت من الحر..

خابرت واحد منهم..سمته ابو اكرم.. وره شواي اندكت الباب .. بقيت بالهول شفتهم من وره البردة..اجه ارشد وياه شخص ثاني ماادري منو بس بيدة عدة ومحولة هاي يخلوهه بالميزانية بره.. ضل يشتغل بيهه لحد ساعة هيج وراح.. لمن طلع راحتله خالة تشكرت منه وانطته فلوس..بطلعته جان يجون ديمة وايمن.. شو هذا كيف عليهم وضل واكف يم ايمن..باسه واخذه من ايده مدري وين..
طلعت بلا وعي حاجيته : العفو وين ماخذه..
اندار وابتسامته راحت من شافني : ردت اخذه اشتريله.. شفت اخته ماخذه منه الچبس..
دنوة : فوت ماما انه عندي انطيك..لاتكلف نفسك خوية..
ابتسمله وطبطب على ظهره بمعنى روح.. اجو ثنينهم حضنتهم وطبينا جوه..هو شخط سيارته وراح..

تصرفاته مكروهه كلش..مااعرف ليش ماارتاحله.. عارف احسه أخ لصگر..بس هذا مدري شلونه.. دائما لمن يجي ياخذ ايمن يمه وهذا الفطير مكيف علي..تكول ماشايف زلم..
الصوت السمعته من غرفة اخلاص ماكلت لأحد عنه.. يمكن هلوست..بس ثاني يوم طلعتله ثواب واجه علي وزعه.. وره اسبوع خلصت العدة مالتي.. هذا اليوم بالزادت داس بروحي دوس..اربع شهور وعشر ايام محرومة من شوفتك.. محرومة من كلمة بنيتي وابوية وباباتي.. شلون ينطيني گلبي انزع الاسود..شلون تهون علي كلماتك ووكفاتك وياي.. انه لو بيدي اكعد بخيمة صغيرة يمك..اسولفلك واحجيلك كلشي يصيرلي.. تعبانة بدونك وروحي خلصانة.. تعبت افوت للغرفة وانه على دراية اذا تقربت منك تختفي..تعبت انام وحدي بدون ما احس بإيدك على خصري..تعبت چي وحدي..

بالليل نظفت البيت جان الحجي هستوه جاي ومتوتر ع التحاليل والزرع..شاكين عنده سرطان بالرئة..كام يكح گحة مو طبيعية اخر فترة ويختنك..حتى خالة كامت تفرش يمه وتنام.. تكول خاف يحتاج شي ومايلكاني..
صعدت فوك وقاصدة صورة ارد ادورهه..لكيت الجهال نايمين .. بقيت ضوه خفيف ورحت ع الخانة مالته ادور بين الهدوم..ضليت بالربع ساعة لحدما لكيتهه..

صورته ب٢٠٠٥ لمن ترفع من رائد لمقدم..واكف بالامام واكو ضابط واكف يمه..هو ضاحك ولابس بيرية وشابچ ادي ليجوه حركته الدائما يسويهه.. هي صورة شوي صغيرة يعني حجمهه وسط بس احبهه.. شكد عزيزة علي..اخذتهه ورحت كعدت ع الجرباية وحاضنه مخدته اشم ريحتهه.. مشيت اصبعي عليهه..على عيونه وشواربه المحددة..چتوفه وشفايفه..
دنوة : اخذني يمك..زردومي وروحي محترگة بدونك.. تعبت بعد مابيه حيل..
كمت ابجي بحرگة وابوس بصورته..اريد احس بي.. اريد ابوس عيونه مثل من بسته بالمغيسل..اريد اشم ريحة هدومه.. شكد صعب من اشتاقلك وادري بيك ماتجي.. بس گلبي محترگ عليك وداعت طولك الاحبه..شلون ابقى وحيدي بدونك يروحي..جنت اخاف امشي متر بدونك..وهسه ليالي وايام وشهور وحدي بدون ماتسألني (اساعدج بشي حبيبي)..

ضليت ابجي لحدما تعبت وغفيت ماادري بروحي.. وره يومين كاعدين ع الغده جان يدك التلفون..كام الحجي يجاوب.. شواي واجه عرگان حتى مااكل..
الحجية : ها خوية بشر..
وائل : طالع الزرع..باجر اروح اشوف النتيجة..مايقبل يكول.. لازم اروحله هناك..
الحجية : خليهه يم ربك وهي ماتضيع..ان شاء الله ماكو شي
وائل : الله يسمع منج..
عافنا وراح طلع بره واسمع صوته يكح..رأسا اجه ببالي صگر لمن تمرض هم جان هيج يكح..بس اعراضهم تختلف اكيد مو نفس المرض..
بالليل صبيت عشه وصعدت فوك لكيت ديمة نايمة.. والساعة بثمانية..هي بالوحدة ويادوب تنام..رحت تفقدت حرارتهه.. مابيهه شي..

يله اكيد نعسانة ونامت..هواي ركضت ولعبت اليوم.. غطيتهه ونزلت اوكل ايمن..
بالليل بين نايمة وبين كاعدة حسيت روحي بحلم وبمكان كله ابيض بعدين اجه صگر شايل ديمة ويبوس بيهه.. اجه حطهه بحضني وكال ديربالج عليهه..انه روحي بيهه..
فزيت الصبح مرعوبة..كمت عليهه اشوفهه..لكيتهه مصخنة غادية نار.. شلتهه صايرة خرگة..
همست : حبيبي ديمة..ماماتي..اشو فتحي عيونج..
اخذتهه ونزلت جوه..مااعرف اول مره طفل يتمرض عندي بالصيف..وانه مخليه ع السبلت على برودة متوسطة لاحيل بارد ولا حيل حار..شجاهه..
همزين لكيت خالة كاعدة..

دنوة : خالة هاي ديمة مصخنة..
الحجية : ليش ياستار..شو جيبيهه..
انطيتهيا..جاست خدهه ورگبتهه جان تخزرني : بتج مشمورة من الصخونة وانتي هسه دريتي..
دنوة : انه شفتهه بالليل مابيهه شي..هسه جستهه لكيتهه مصخنة..شلون شسوي..
الحجية : كومي يمة خلاسويلهه كمادات بين ما يفتح الدكتور واخذيهه..المستشفيات يرادلهه خلك وجر وعر..

ركضت خليت مي بارد بطاسة ووصله صغيره.. كعدت يمهه اسويلهه لحدما فتحت عيونهه شوي بس بعدهه مخنطلة.. اخذتهه لحضني وامسح على شعرهه..نفس شلون شعري..
دنوة : خالة تدرين صگر اجاني بالحلم يكلي ديري بالج عليهه.. عبالك حس بيهه مريضة..
الحجية : هو الميت يحس بهله.. عمت عيني عليك وليدي.. صفيت بس بالحرامات والله يرحمه..
كلماتهه شكد قهرني..حضنت ديمة وبجيت بدون صوت.. يحس بينا ويعرفنا شبينا وشنريد..چا ليش مايجينا..
خالة كامت تسوي الفطور انه ضليت يم ديمة..وره الوحدة الظهر جان تندك الباب..خليت شال وطلعت..لكيت اخلاص وجهالهه واكفين بالباب..الله ينطيني الصبر واتحملهه.. رحت فتحتلهه وسلمت عليهه بعدين طبت..

اول ماطبت كامت تعلق : ليش عايفة امي تسوي غالغدة.. انتي شبيهه ايدج مكسورة..
خالة صاحت من يمهه : ها ولج خليصان جيتي..تعاي هنا عوفي مرة اخوج بتهه مريضة..
اخلاص : مريضة..شبيهه ..
دنوة : مصخنة ومابيهه حيل شي..
اخلاص : سوده علي..اخذيهه لدكتور اليوم..
دنوة : اي حاخذهه..
عافتني وراحت..نزل ايمن يلعب وي رامي ونوار ولدهه.. وره الفطور كمت لبست صايتي مال طلعة بس مابيهه نقش مجرد قماشهه زين..بدلت لديمة ونزلت طلعت بالختلات ايمن اذا شافني يلطش.. بس شفت الشارع ماادري شصار بيه..

صار شهور ماشايفته..تمشيت للشارع واخذت تكسي للدكتور.. ضليت كاعدة بالصالة جان يفوت ارشد.. اي ارشد.. ضليت صافنة..هذا هو لو شنو..وكامش طفل بيده يطلع عمره ستة هيج..هو همات لمن شافني تفاجئ بوجودي.. قربت ديمة لحضني ولافتهه بالغطى تكول بردانة..شواي وطبينا.. سجل اسمهه وفحصهه..
الدكتور : فايروس بالجو هيج يسوي..
دنوة : يعني شلون..
الدكتور : يعني هو ياخذ فترة حياته بجسدهه لحدما يضعف ويخرج تلقائيا..بس انطيهه خافض حرارة..
دنوة : هي كامت تهلوس الظهر..معقولة بس خافض حرارة..
الدكتور : لا كعلاج اساسي فقط خافض حرارة..لكن اكيد حكتبلهه فيتامينات علمود المناعة ..
دنوة : شكرا دكتور..

انطيته فلوس الفحص وطلعت..بس طلعت دخل ارشد.. نزلت اشتريت الدوه واخذت تكسي ارجع للبيت.. بالطريق وخابرتني رزان..هاي شبيهه..خلاوصل وارجع ادك عليهه.. عفته وانتبهت ع السايق وكف السيارة..
دنوة : شو وكفت عمو ليش..
- : خلصت بانزين السيارة عمو..نزلي تمشي اذا بيتكم قريب.. لو ااجرلج غير تكسي..
دنوة : لا هنا قريب..شكرا..
انطيته كروة واخذت الجنطة وديمة ونزلت.. طبيت بدربونة نهايتهه جان واكف واحد يم سيارة..عيونه شرانية مدري شلونهن.. دنجت ومشيت عادي..مااحس الا مد ايده على ظهري من نهايته لحد رگبتي..جسمي رجف ولعبت روحي من الموقف..حسيت ديمة حتطيح من حضني..

انداريت خزرته وتفلت بوجهه : صدك ماتستحي..ماعندك عرض..
هي لحظة او اقل جان ينضرب بوكس ونزل للكع دفرات وچلاليق وبوكسات..
دنوة : خوية اتركه لاتسوي هيج..حيموت الولد..
ارشد : موتتهمممم..لك سرسري كلب ابن كلب..
ادور المنطقة فارغة الناس ببيوتهه محد حس بينا هنا.. كمت احاجي بصوت يرجف اريده بس يكوم من الولد حيموت ادور ابتلي انه وتنذب براسي على يابو هدومي تخلي يسوي هيج.. بالتواسيل يله كام منه..
ارشد : ام ايمن ياريت تصعدين وياي بس اوصلج للبيت..
دنوة : لا شكرا..هيانه قريب..
ارشد : تره مو مال عناد ابددد..شفتي شصار..

عاينت علي ودنجت..شكد فشلت من المنظر..اكيد شافه شسوالي.. هسه يحسب انه موخوش..عفته ومشيت للبيت.. بس وصلت الباب شفت سيارته واكفه يم بيتنا .. مانطيته ردة فعل بس طبيت هو راح..
دخلت مالي نفس احجي..لعبانه روحي..حسيت روحي مذلولة .. اريد اليوم يخلص واروح انام ..منا اخلاص ومنا هذا الموقف الوصخ..
بالليل فرشتلهه الهه ولجالهه يم خالة وصعدت فوك انيمهم.. ديمة نيمتهه يمي وكل شوي اسويلهه كمادات ..شواي وتفطنت برزان..خابرتهه اشوف شبيهه..
بعد سلام وكلام حجت..
رزان : اجينا لبيت عيالي ببغداد تدرين..
دنوة : لا والله..ليش..

رزان : غير داعش خية..مهند يخاف يكول قريبين ..
دنوة : الله يساعدكم والله..وشلونج مرتاحة لا..
رزان : اي الحمدلله..عمي وعمتي زينين بس حماتي شاوية على اذاني بصل..مريضة نفسيا...
دنوة : هههههه.. لا هن كلهن هيج لاتخافين..
رزان : مامتعلمة اني..واجتني هاي ادور..
دنوة : لبسيهه واخذيهه على كد عقلهه هي تضوج وتعوفج..
رزان : هو هم هيج حسوي..يله حبيبتي نامي أخرتج..
دنوة : لا عادي يعوده خابريني دائما..
رزان : يله مع السلامة..
دنوة : بيباي عيوني..

سديته منهه وضليت لحدما أذن الفجر..كمت توضيت وصليت اجيت لكيتهه نايمة مرتاحة وحرارتهه نازلة..بستهه وحضنتهه ونمت..

ارشد : من يوم چفتت للهول ادور على ايمن ضل شكلهه ببالي.. استغفرالله بس يعني هي مرة بعده رجلهه سنته ماطالعة..فشلة اخليهه براسي اصلا.. بس انه لا اراديا شفت روحي اتقرب لبيتهم..ادور ابسط الحجج بس ازورهم.. مثل الكهرباء..ماعولت تخابرني امه ورحتلهم.. نظراتهه ابدا مو بريئة مثل اول مره شفتهه بيهه..شلون توسلت بينا ننزله لمن چنا شايلين التابوت علمود الدفنة..وهسه شلون يعاينلي اذا شافت ايمن يمي.. حتى انتصار مااهتميت لموضوع الحمل مالتهه من ضربتهه هذيج المره بعد تركت السالفة.. هو ابني وهذا شرع الله..

بيوم جنت كاعد ادخن نركيلة وحاط الاكل..تذكرتهه شلون اجت اخذت ابنهه ونظراتهه ..جان يدك التلفون فززني.. منو .. ختام..رديت متفاجئ..بعد سلام وكلام حجت..
ختام : ارشد شوفلك بيت هنا يمك..بعد منكدر نضل اكثر هنا.. الوضع يخوف واني اخاف ع الجهال وامي..
ارشد : اي والله داادور..باجر احاول بلكت الكى.. اذا اجيتي شكد وتوصلين..
ختام : ماادري بس فوك الخمس ساعات..
ارشد : المشكلة الطريق موخوش..باجر اطلع ادور وانطيج علم .. ببالي تره وداعت رحمة بس مخبوص..
ختام : يله وياريت تستعجل..
ارشد : خير ان شاء الله..بالج عليهم..
ختام : ان شاء الله..مع السلامة..
ارشد : مع السلامة..

سديته وكمت تغطيت ونمت..ثاني يوم الصبح طلعت ماخليت مكان مادورت بي..خوما اكعدهم طابق ثاني بهلحر.. يصيرون مشاوي.. اخر شي خابرت واحد صاحبي يشتغل بالعقار.. كال نيتك صافية كبل يومين اجه واحد عرض بيته للايجار شوفه اذا يناسبك أجره وانه اكفلك.. وصفلي مكانه ورحتله.. شفته زينه ومساحته هم زينة ومقبولة..رجعت للبيت جبت الجنسية والمستمسكات علمود اسوي العقد..اجه ابو البيت تعاقدت وياه والفترة والسعر..هو جديد هستوهم العمال طالعين منه.. فمايحتاجله تنظيف قوي..
رجعت للبيت خابرت ختام انطيتهه علم..
ختام : عمي عنده سيارة حمل فهو حيجيب غراضنا..
ارشد : خوش..بس يجيبهن اول بعدين انتو تعالو علمود ارتبلكميا بس تجون تكعدون..
ختام : ماشي..

سديته منهه وكمت للنركيلة اتصفن بملامحهه.. شسمهه هي حتى مااعرف اسمهه..شكد عجبتني..شلون هادئة ورزنة.. الله يرحمه جان محظوظ عليهه..
صار شهور مو يوم ولا يومين..وقايل انه صغيرون خاطر مااعرف بروحي شداافكر واحس..بس الواكف بعيني هي.. بعد خلانطي صبر بين ما تطلع السنة مالته..اكيد هي تفكر بمصلحة جهالهه..خوما يضلون هيج..
ضليت يمكن و أي لحدما عبرت التلاثة ونمت..

وراهه بيومين اجه عم ختام جاي غراضهم..رتبتهن وغسلت البيت..كالت احنا باجر نطلع الفجر..
بالليل خابرت انتصار..كتلهه حبات بره ..
انتصار : براحتك..بس وين..
ارشد : هذا البيت الأجرته جديد..
انتصار : ماشي اخذ راحتك..
سديته ونمت بالعجل من التعب.. كعدت الصبح على دكة التلفون..شلته جانت ختام..دليتهه على مكانه وكمت غسلت .. شواي واسمع الباب اندكت..طلعت فتحتهه صارو جهالي بوجهي.. يايابة شكد مشتاقلهم..من راس السنة ماشايفهم .. دنجت شلت فادي واكرم كمشته بيدي وطبينا.. واحد كعد بسدي والثاني بحضني..شفت رحمة واكفة يم بيبيتهه وكامشه ضفيرتهه..رأسا تذكرت مرة المرحوم..نفس السمار.. ابتسمت وفتحتلهه ايدي اجت بحضني..

ارشد : لاتخابرين لاتكولين بابا شلونه..صدك كطعية..
رحمة : مو ماما تكول عنده شغل..
ارشد : افرغ لخاطرج..غير تدلل رحمتي..تعاي كعدي بابا..
باستني وكعدت يمي..
ضليت كاعد يمهم..انطيت الجهال كل واحد خمسة.. سلمت المفاتيح لختام وطلعت..

جان رمضان وبنص تموز..بس طلعت رحت للبيت..
وراهه بفترة يومين تلاثة خابرتني ختام..
ختام : عندك شغل هسه..
ارشد : لا كاعد..شكو..
ختام : فادي مصخن صاير نار..تعال اخذه للدكتور اني مااكدر كاعدة يم امي اداريهه..
ارشد : يله بدليله هسه اجي بس البس..
كمت بدلت وطلعت..لكيتهه مبدلتله بس اخذته ورحت للعيادة.. تفاجئت لمن شفتهه هنا وبتهه بحضنهه ويعاينلي بنفس النظرة.. كلت بگلبي : وراك مسافة طويلة..محتقنع بالسهل ابد..وانه اريدهه تكون امام أمر الواقع بعد السنة مالته.. انتصار تطلع بكدهه هيج قريبة على عمرهه..بس طفت لهفتي الهه بعد ما صارت حامل..بعد الله كريم..

بين ما طلعت دخلنا احنا..فحصه وانطاه ادوية .. نزلت جوه اشتري الادوية لكيتهه دتأجر تكسي.. كملت بالعجل ورحت وره السيارة..شفتهه بموقف فاشل..بس اكيد هي لا.. ماادري شلون اخذتني رجلية لمكانه وجزنته كتل..لوما شايفهه چا سكتت ع الموضوع وكام يتمادى وياهه بعد اكثر..

دنوة : مرت ايام حالهه حال الكبلهه..الحجي تحاليله طلعت نظيفة هي والزرع بس عنده التهاب بالرئة.. خلاص شادة گورتهه وياي وتتخبل من مااجاوبهه..لو اريد اردهه ضعف بس روحي بخشمي وخصوصا رمضان..مفتقدة صگر.. البيت فارغ بدونه .. جان برمضان لمن يشوفني اتعب هو يسوي السحور ويكعدني..هسه اكعد من النوم اتخيله يمي يكلي يله دناوي حبيبي تعاي تسحري..
شتذكر منك شغلة لو ثنين..گلبي يوجعني من الذكريات والخيال والبعد وكلشي يخصك..حياتي ظلمت من بعدك..
تنهدت وكمت اسوي سحور..شفت ديمة تحسنت ضلت تلعب يمي وتاخذ من الاكل الاسوي.. ابتسمت عليهه ..

وره يومين..وره الفطور دنشوف تلفزيون اذا باجر عيد لو لا.. جان يكبر الجامع..خالة بجت بصوت ناصي..اجه ايمن يمهه..
ايمن : بيبي ليش تبجين..
الحجية : تذكرت شغلة بعد روح بيبيتك..
ابتسملهه وكام..بعده مايعرف.. اووف الصدمة اكلت روحي.. جان بس يكول باجر عيد يخابرني.. بعز الخبصة والهوسة يعايدني..واغلب الاعياد يصادف هو بالواجب..مع ذلك يخابر ويعايدنا كليتنا..بجيت بقهر على فراگه..على ايامنا الماتهنيت بيهن..حسبي الله الى يوم الدين..

وراهه الصبح اكو منهم خابرونا ومنهم اجونا..ام علي اجت هي وبناتهه وعلي ومرام وجهاله..اخلاص اصلا جانت يمنا.. اركان همات اجانا هو وسلمى وابنهم ..دعوتهم الي الله يصبرني.. انه بالعيد ولابسة اسود.. لو هو موجود مايقبل البس نيلي اصلا..مايحب هللون يكول مكروه.. كل الدنيا مكروهه من بعدك يروحي..بس الله ينطي الصبر...
الحجي جاب كباب من بره وخبز اكثر من صفطة.. صبينا السفرة وكعدنا..كلنا قريناله الفاتحة.. انه اقره وعيوني غوشت من الدموع والغصة بصدري..رحت صدك وهيج يمر رمضاني وعيدي بدون شوفتك..الله كريم..

كلهم باتو عدنا اول يوم..سرور والبنات خابروني.. ومشت الايام صنطة..بس دموعي تسوي صوت بالليل من تنزل على ريحة شماغه وهدومه..جان يصبرني على وفاة ابوي..هسه منو يصبرني على وفاتك..اووف ياوجع گلبي شيطيبه..
وره فترة شهر ارشد كل اسبوع لازم اشوفه..بديت اتضايق من الوضع..لو يجي للبيت لو يوكف بره يحجي وي الحجي لو علي.. ادور يخفت يريد يسوي شي ويذبهه براسي.. استغفرت وهديت..لا مايسويهه وانه همات مااتقربله ولا شي..

خالة اجت عليهه اختهه ام جاسم اخذتهه تتأكد من وضعهه بمستشفى اهلية..الحجي جان بالدوام فماكدر ياخذهه..
جهالي كعدتهم بالهول يتفرجون تلفزيون وانه اطبخ الغدة بالمطبخ..شواي وافتقدت صوتهم..شو لا ضحكة ولا حركة.. غسلت ايدي وطبين للهول ماشفتهم..
صعدت فوك بالغرف ادورهم..ماكو حتى جوه..تخبلت.. لبست الشال وطلعت بره .......

يتبــــــــــــــــــــــــــــــــع.......................

شلونكم؟ مشتاقتلكم نفر نفر قسمًا ،
التلفون ماكان بإيدي ابدًا ، اغلبكم عرف ايدي احترگت ، فماكدرت الزم تلفون ، اليوم فتحت وقريت التعليقات والسب والشتم ، صرت ماعندي اسلوب واريد اجمع تعليقات

ابدا مو هيج اني .. وقصصي الجاية حتثبتلكم هذا الشي ..

المهم احبكم وشكرا ع السؤال، 💙

قناة التليگرام

حساب الانستگرام