رواية اسألي عني الليالي الفصل الثامن وستون 68 - بقلم رقية جاسم

اتمنى روحي تصير .. طيرة وتجيكم ..
وتضل لحدما اموت ..تفتر عليكم ويلي ..
خلص صبرها ..احتارت بأمرها ..
روحي خطية شلون ..ضلت بديكم ..

قناة التليگرام

حساب الانستگرام

الـبـارت الـسـابع والستون...............

{{ البارت جاهز من العشرة بالليل لكن اشتراك النت حال دون ان اكدر انشر }}

خالة اجت عليهه اختهه ام جاسم اخذتهه تتأكد من وضعهه بمستشفى اهلية..الحجي جان بالدوام فماكدر ياخذهه..
جهالي كعدتهم بالهول يتفرجون تلفزيون وانه اطبخ الغدة بالمطبخ..شواي وافتقدت صوتهم..شو لا ضحكة ولا حركة.. غسلت ايدي وطبيت للهول ماشفتهم..
صعدت فوك بالغرف ادورهم..ماكو حتى جوه..تخبلت.. لبست الشال وطلعت بره ...

ماشفتهم لا بالطرمة ولا بالباب..جسمي كله رجف..انه سديت الباب وكعدتهم هنا..شطلعهم..
ركضت فوك لبست الصاية والشال وطلعت چني مخبلة ادور عليهم.. الجو حار يكتل كتل..شهر آب بعد.. كمت ازخ عرگ وگلبي يرجف.. مريت بشارعنا وعبرت تلث شوارع لحدما وصلت لبيت ابوي القديم..كل هلاماكن ماموجودين بيهه.. وين رحتو ماما.. انه معلمتهم ابد مايطلعون بدون علمي واذا رادو شي انه اطلعهم بيدي..
طلعت للشارع العام ولو بعيد گلبي يكلي مو هنا.. المحلات كلهه مقفلة..الجو حار ساعة ثنتين الظهر.. بقيت امشي لحدما تعبت ورجعت..كمت ابجي وگلبي يدك سريع.. احتاجيت صگر يكون يمي..اريده يجيني طيف بس يطمني وينهم.. هو كل ما انقهر على جهالي يجيني طيف يكلي لاتخافين مايتعبوج.. ديري بالج عليهم..

وذاك اليوم اجاني كبل لا تتمرض ديمة..
تنهدت وامشي عمياوي حتى مااشوف من الغواش.. من بين اصوات گلبي الخايف عليهم ويرجف رجف وصوت عيوني التبجي ومحد يسمعهه بس انه..حسيت على سيارة تقربت مني وبيهه اكثر من صوت..صوت رياجيل..واحد منهم صوفر والثاني ضحك..وواحد حچه
- : شبي الحلو يبجي..لك صدقة لمحمد..
- : خاف مزعلهه المحروس..اشتعلت لشته..
تعالت اصواتهم يضحكون ويمشي بالسيارة بطيئ وي مشيتي..

هو كال اشتعلت لشته وانه جسمي كله اختض..رجف.. حسيت اعصابي فلتت مني.. دنجت مسحت دموعي ودرت وجهي علي.. تفلت بوجهه
دنوة : كلب وخسيس..ليش تجاوز وتتحرش ببنات العالم.. ماعندك عرض..
مسح وجهه وعيونه تطاير شرار..بكد ما خفت منه بس كمشت روحي مااريد اضعف جدامه..مشيت سريع واسمع واحد يكله شلون تخليهه تتفل عليك..
مشيت مسافة تلث اربع امتار وسمعت صوت بيبان السيارة.. استغفرالله..ياربي انه شورطني وسويتله هيج.. لو ساكتة اشرفلي.. ادور حسيت المسافة لبيتنا چن بحر ومااعرف اسبح حغرگ.. كمت اتلفت بالشارع ماشفت احد..طكيتهه بركضة واسمعه يفشر ويغلط..

مااحس الا صار واحد منهم جدامي.. ابتسم ابتسامة خبيثة لعبت نفسي..هو نفسه التفلت علي..
لا اراديا حجيت : اعتذر خوية..بس خليني اروح..
- : لا وين..بعدنا ماسوينا شي..
دنوة : شتريد تسوي اخي..انه متزوجة وعندي اطفال.. عيب عليك تحجي هيج..
- : يولو اروح فدوه للانه هاي.. عجل متزوجة وهيج حليوة..
من كال عجل تذكرت بيت خال الحجية..يعني انباري.. ماجاوبته سكتت..دنجت ومشيت..جسمي كام يرجف.. انت حايرة اشوف وين جهالي وهذا لطشلي..كمشني من ايدي حيل..الدمعة صارت بطرف عيني..
- : عجبتيني..
دنوة : عجبتك حية..وخر ايدك استحي عيب جدام الناس..

ضحك وصحبانه همات ضحكو..متت خوف ياربي شيخلصني .. هسه انه ليش سويت هيج.. هو من اريد اسوي شي اتلخبط وينكلب ضدي..
احسن شي اسوي روحي حتخربط ويعوفني.. خليت ايدي على بطني سويت روحي اتلوى من الوجع..حنيت ظهري مثل واحد تعبان ومابي حيل يوكف..شفته توتر ورخى ايده..
- : شبيج ..
دنوة : بطني عفية..مااكدر اوكف بعد..هد ايدي دتوجعني..
- : اخذج للمستشفى..
دنوة : لا لا..بيتنا هنا..
هد ايدي..تمشيت بنفس وضعيتي لحدما وصلت لنهاية الفرع شفتهم بعيدين وركضت..كام يصيح ويكفر.. استغفرت وادعي الله مايلحكني..

جسمي عرگ كله من الخوف والحر وهذا الموقف الوصخ.. تذكرت من شذى طلعتني بالظهاري رحت تسوكتلهه.. هم سمعت هيج حجي وناس ماترحم ولا تكول عيب وحرام.. كمت ابجي ومدنجة راسي..تالي يصير بيه هيج.. جنت امشي ومااخاف من عدوي..كله بجالك.. ولا حسبت حساب لهيج يوم.. حشاه ربي مايظلم بشر بس انه ليش هيج صار بيه.. گضيتهه ضيم وقهر بعدين رجلي وحبيبي وابوي الوكف وياي يروح مني هيج..استغفرالله الهي..
وصلت لفرعنا من الجهة اليبدي بيهه بيت خالتي..يعني بيتنا بعيد.. لكيت سيارة واكفة بالباب..بس من الدموع مافرزنت مالمن.. تمشيت ورجلية ترجف مابيه حيل امشي خطوة بعد.. اقتربت جان تنفتح الباب ونزل واحد شايل ديمة وايمن كامشه بيده الثانية..

غمضت عيوني وفتحت اريد اتأكد..نزل ايمن بيده علاكة وديمة مصاصة كامشته من قميصه وتبوسه من خده.. هذا ارشد.. اي ارشد..وشعنده يم جهالي..شجابهم يمه اصلا.. احس گلبي صار جمر يچوي بيه..لحظات واندار نزع النظارة خلاهه بفتحة القميص..اول ما شافني تحولت ضحكته لابتسامة.. انه ميته من الخوف عليهم وهذا ماخذ جهالي.. تقدمت يمه كمشت ايمن من ايده وخزرته انه وارزله : شطلعك هسه.. امشي فوت جوه خوفتني عليك..
راح فات يركض..اخذت ديمة من ايده : وين اخذت جهالي.. وليش ماكلت اخذتهم..انه صار ساعة افرفر بالشوارع وگلبي نار عليهم بعدين يطلعون يمك..وشجابك عليهم حتى..
ضحك من كل گلبه بصوت مسموع : صلي مو لسان..

شكد اكرهك..كلت بگلبي.. مستفز واسلوبه ابدا مو حلو..
دنوة : وين اخذتهم..
ارشد : مريت من يمكم شفتهم واكفين بالباب.. ايمن يريد يروح للدكان يشتري..كتله امك وين..كال جوه..كتله تعال اخذكم اشتريلكم ونرجع..چي هسه ظهر ومحد مفتح فرحت هناك بعيد..
دنوة : مااسمحلك تسوي هيج بعد..انه امهم ..اذا امهم ماتدري بيهم وين راحو چا انت التدري..ابد لاتحاول تتقربلهم مفهوم.. عفته ومشيت للباب..
كال : شنو ماتردين تشكريني..
جاوبته بدون مااندار : عليش..
ارشد : چي جبتهم ..
دنوة : اصلا انه جنت ناوية اخابر الحجي هو يتصرف.. ابتعد عني وعن جهالي..تصرفاتك دتضوجني..

سكت ماجاوبني..طبيت وسديت الباب وراي..قفلته همات.. هسه خو عارف صديق العائلة بعد اكثر منه بس ولا يسوي هيج.. حتى من يشوفني يدنج وكله يحاجيني خوية وخيتي.. انه واتمشى للبيت مااعرف شنو خطر على بالي.. بس من مواقفه وياي اخر فترة كلت عينه علي..
مره اجه ع الكهرباء..وگبلهه شفت ايمن عنده جانت العدة بعدلهه چم يوم..بس ماحاجيته مجرد اشوفه ولو علي حتى نظرة بالغلط مااعاينله..ومواقف غيرهه هواي.. دائما يجينا لو اشوفه واكف بالباب يضحك وشايل ايمن..شكد اضوج من اشوفه يعلق ابني بي..احسه حيكسبه لصالحه.. دورات يجي بوكت تعليلة..يعني وره العشرة بالليل..خاصة اذا جان علي هنا..عارف همات يجي وياه..

هو صار صديق علي..فدائما يعزمه ويجون يمنا.. ماادري شلون تقربله وكسبه..
بيوم همات جنت طالعة اجيب مسواك وشفته هناك.. احسه متابع خطواتي..ماادري صدفة يجوز..لحد هسه مااعرف شي عنه..يعني اشوفه لمن اتسوگ للبيت وحده وگايد بيده طفل.. اكيد متزوج ..حتى فشلة افكر مجرد تفكير ان اخلي يتقربلي سانتيم واحد..وذاك اليوم هم شفته گايد طفل.. بس اعرف واحد من ولده اسمه اكرم لأن يسموه ابو اكرم..يعني الموضوع مو بيوم وليلة..لهلسبب اخاف..
انه كارهه كل الزلم من بعد صگر.. مااشوف اكو شخص حلو وحريص وحنون مثله..گلبي انعمى كبل عيوني..
تنهدت وطبيت جوه..قفلت باب الكليدور بعد التوبة اذا ابقي باب مسدود بدون قفل..لكيت ايمن كاعد وياكل بالچبس.. انه من خوفي علي نزلت ديمة ورحت علي جريته من اذنه..

ردت اضربه راشدي شفت دموعه بعينه وحاط ايده على وجهه هو ويتوسل : ماما لا حبابة..اسف اسف..
شفت روحي بي..انه جنت حتلو مو غلطانة لمن ابوي يجي يريد يضربني اگله اسفة..هسه ابني ع الاقل غلطان چي طلع بدون علمي..الدمعة صارت بطرف عيني..شلت ايدي وعدلت وكفتي : اذا عدتهه بعد مااحاجيك خوش لو لا..ابقى زعلانة عليك والأم من تزعل تكوم متحب جهالهه..
هو سمعني اكول هيج وكام چلّب برگبتي ويبوس بيه وبعيوني : يعني ماتحبيني بعد..
ابتسمت وبسته من خده : لا طبعا احبك للأبد..لحدما تكبر وتكوم تدرس وتصير عندك شهادة..
سكت بس مبتسم..باسني ونزل..

صعدت فوك سبحت وطبيت للغرفة انشف شعري.. لكيت صگر كاعد ع الجرباية بس ضايج..مو مثل كل مره..
دنجت ودموعي تصب على خدودي..نشفت ونزلت جوه كملت الغده..الهبطة الاكلتهه اليوم اخذت مني عشرين سنة.. مااتحمل بعد.. شكد حسيت روحي ضعيفة..من هذا الموقف وهيج ضعفت.. باجر عكبة جهالي يكبرون وايمن ولد يعني عنده تبعاته..ولو هو فقير كلش بس ولد الحرام هواي..
ولو حسيت بالضعف بس موقفي وي ارشد خلاني احس شخصيتي البنيتهه وي صگر ماتهدمت..
جريت نفس وسكتت..كملت شغلي ع السكتاوي وصبيت الغده جان تندك الباب..لبست الشال وطلعت لكيت خالة والحجية ام جاسم بالباب..وصلت يمهم واسمع خالة ادردم..
الحجية : وج يخالة الحر كتلنا..دفتحينه للباب..
دنوة : اي جيتج خالة..

فتحتلهيا وفاتو جوه..طبو يغسلون بعدين اجن ياكلن..
دنوة : ها خالة بشري..
الحجية : والله ييمة سويت فحص لعيوني..كتلج اخر فترة اشو كمت اشوف مغوش وعيوني تسورب..خفت يطكني السكر وانعمي.. هذا ابو العوينات كال عندج قصر.. بس يحتاجلي روحة للطبيب يفحصني خاف عندي مي بالعين.. وصفلي نظارة والدرجة مالتهه..كتله سويهه يمك.. بين ما سواهه رحت سويت تحاليل شاملة..
دنوة : ها خير ان شاء الله..وشنو طلع بالتحاليل..
الحجية : سالمة خالة سالمة..بس تحليل الغدة مو هلكد..
دنوة : يعني شنو..
الحجية : عندي زيادة افرازات بالغدة..وانه يخالة رگبتي صار فترة مخنوكة حتى اكل مااكل مو جدامج..
دنوة : اي منتبهتلج.. خالة لاتخوفيني..روحي للدكتور فدوه خيشوفج..اضيع بدونج ..

الحجية : اسم الله عليج حبيبة..هو بس يرجع وائل اخلي يحجزلي يم ابو عيون وواحد لاخ يخص الغدة ..بعد شوف الله كريم شلون تصفى..
سكتت ماجاوبتهه..خفت عليهه..اوف ياربي يعني شلون انه هيج مخلوقة بس للاخبار الشينة..حتى خالة تمرضت.. شيصير بيه بعد اكثر من هيج..نفسيتي صارت تحت الصفر.. بالحضيض.. شوكت ارتاح..من ادخل للگبر ..
خفت عليهه فماكتلهه ع الصار اليوم..هي مريضة ومتوترة على روحهه ادور انه اخوفهه بالزايد.. ام جاسم بقت يمنا لحد العصر واجه جاسم اخذهه وراحو..
الحجي رجع المغرب صبيتله الغدة وكعدت خالة تحاجي ع الدكتور..كللهه باجر اطلع احجزلج..

وگفته ويانا قليل بحقهه الشكر..كل احتياجاتنا يجيبهه.. وهاي اول ايام وفاته بالعدة مالتي جان يتجنب يحاجيني.. يحاجي خالة وهي تسألني وتردله جواب.. ولو انه اعتبره بمثابة عمي بس يبقى مو عمي اللح..
هم هو يجيب المسواگ والعشه اغلب الايام من بره.. بس الشغلة الوحيدة المضوجتني علاقته بارشد..هو روحه شبابية اليشوفه مايكول عمره بالخمسينات..معتني بروحه يعني.. يحجي وي ارشد چن صديقه وعلي همات..دائما يعزمه لو يعزم علي وعلي يجيبه وياه..مااعرف ليش مااطيقه..ماحبيته.. ولو هو شخصيته حلوة ومقبولة..بس انه ماكمت اشوف احد غير صگر.. احسه موجود بكل الوجوه..
هسه انه شبيه لزكت للرجال حيتزوجني ويتزوجني.. مستحيل وعلى گص رگبتي اذا قبلت..سواء ارشد او غيره..

تركت الموضوع شكليا بس ماانكر شكد فكرت بي.. فوكاهه مااعرف عنه شي..حتى زحمة اذا طلع متزوج لو شي..
بالليل كملت شغلي واخذت الجهال سبحتهم ونصيت السبلت خاطر مايتمرضون ونامو رأسا.. انه من الهبطة الاكلتهه بس خليت راسي نمت..

اجاني صگر بالحلم..چن احنا ببيت بس مو بيتنا هذا .. بس بالحلم عبالك بيتنا..اجه صگر لابس عسكري ويفحط من التعب.. وجهه عركان وساند ايده ع الحايط ويون بتعب.. كمت علي حضنته حيل وابوس عيونه وخدوده وايدي تمسح العرگ من وجهه..
دنوة : حبيبي..اشتاقيتلك والله ماتوقعت حشوفك مره لخ..
ماجاوبني..كمش ايدي خلاهه على صدره وهمس : تعبان دناوي..وخايف.. خايف وروحي محترگة عليكم..
بس سكت طاح بالكع من طوله..كمت ابجي واشهك .. شربته مي واذب على وجهه اريده يصحى..لحظات جان يجي ايمن بس كبران لحية وشوارب..چنه صگر ..صاح يااابة.. واجه علي حضنه وباسه..شوي صحصح وگومه كعد ع الكرسي..
حاجاه بصوت گوة ينسمع : ديربالك على ديمة.. خليهه يمك دائما لاتعوفهه..
ايمن : ليش هلكد قلق عليهه يابة لاتخاف بعيوني..
ابتسمله بعدين عاينلي وفزيت...

كعدت على صوت التلفزيون عالي..طالعة دورا وايمن مكابلهه وكاعد.. فتحت عيوني وغمضتهن اريد اتأكد.. الحلم عبالك حقيقة.. لكيت ايمن صغير وصگر بس دشداشته معلكة ع التعلاگة وره الباب..هو ماكو..
تنهدت والدمعة بعيوني.. يعني حلم..شوكت ابطل افز من احلامي واشوف كلشي مثل ما نمت..
انه واسولف بگلبي اجه ايمن وخر الغطى وحشر روحه بحضني.. بسته من خده واخربط شعره..
دنوة : شو كاعد من وكت شعندك..
ايمن : مانعسان..اكلت وي بيبي وخالو..
دنوة : بالعافية حبيبي..
ايمن : ماما اكلج شغلة..بس ماتزعلين
دنوة : كول عمري..
ايمن : جنت العب بتنفون (تلفونج) وشفت صور بابا..
دنوة : اي وين المشكلة عيوني..
ايمن : شوكت يجي..

دنوة : يتأخر حبيبي..لازم احنا نروحله..بس ماندري شوكت..
ايمن : ليش وينه هو هسه..
دنوة : بمكن بعيد.. شجاب هلاسئلة على لسانك حياتي.. انه يمكم مااعوفك ابد..حتى بابا يمنا بس مانشوفه..
ضل صافن علي..عاينت بملامحه وكاتمة دموعي بالگوة.. يشبه صگر..صدك الخلف مامات..نفس الملامح نسخة.. وانه جنت اتعجب شلون الخلفة تطلع نسخة من الاب او الام..
اخذت نفس وبسته وكمت للحمام..غسلت ولبست شال ونزلت .. ع الغده جان تجي اخلاص.. اهو هاي كل يومية جايه.. ضوجتني.. لازم اسمع كلامهه البايخ..
وره الغده طبيت للمطبخ اغسل مواعين واسمعهه تسولف هي وخالة على رجلهه..

الحجية : بعده متزوج هذيج الحية..
اخلاص : اي يمة..ادور كام يعز علي الفلس.. صاير عص.. كتله مااتحمل بعد..قدمت الفايل مالتي بالجامعة الداومت بيهه هسه داانتظر..لأن صديقتي اذا تذكريهه مها ذاك اليوم شفتهه وتواصلنا صايره استاذة جامعية بنفس القسم مالتنا.. كالت شهادتج موجودة ..بكالوريوس وماجستير بس تقدمين وهي من يمهه تمشيهه..ع الاقل يصير عندي راتب..خوما ابقى على هذا الجلف..
الحجية : الغسل اي والله..هي المن الفلوس غير لولده.. شبيهه هاي الزلم تسودنت..
اخلاص : يمة وداعتج مامهتمه..خلصت منه ومن خيانته.. ع الاقل هسه ادري بي متزوج..بيتي وكاعده بي..جهالي وموجودين جدام عيني..هو .. طبه مرض..
الحجية : انه گلبي عليج ييمة..اخاف لا تقهرين بروحج ادور يصير بيج شي اسم الله..
اخلاص : لا يمة لاتخافين..المايريدني مااريده..

والله خوش تفكر هاي..شلون شخصية عليهه اويلي الله.. توكف بوجه الزلم ولا تكول عيب..چا شبيه انه محطحطة راسي ومااحجي وي خيالي..الفضل لابوي.. الله يرحمه ..

وره يومين الحجي اخذ خالة وراحو للدكتور مال غدة.. ابو العيون سراهه عكبة..اخذت تحاليلهه وراحت..
ع الغدة جنت صابة طرشي ومسويه سمج شوي.. فكمت دااغسل مواعين صارن هواي..توني كملت ورجلية مكسره من الوكفة لكيت الهول والصالة مكلوبات گلاب من وره الجهال.. واخلاص عيني كاعده تكلب بالتلفون..ضوجتني.. هي تعتبر من اهل البيت مو خطار..
دنوة : كومي نظفي شنو ماكو رحمة بگلبج..چا شكد وصخة بحيث عايفة البيت هيج..
اخلاص : روحي عن وجهي مالي خلگج..بيت ابوي هذا.. بكيفي شريد اسوي اسوي..وانتي چنة..يعني شغلج الخدمة لاتفكين حلكج..

دنوة : لا حبيبتي خاف بيت ابوج وتزعلين..عيني هذا بيت رجلي.. بيت ابو ايمن مو ابو صگر.. يعني بيتي وبيت جهالي.. وانتي الجايتني مو انه دازه عليج..كومي طگطگي رجليج واشتغلي لا العب العودة على ظهرج..يله ..
اخلاص : والله وطالعلج لسان ام الزلم..
دنوة : ع الاقل مااجت مره على راسي..انه الاجي فوكاهه.. يله حصعد اسبح واجي الكاج منظفة..
عفتهه وصعدت للحمام سبحت..بس طلعت اسمع صوت ركع گزاز والطبلات الخشب.. مديت راسي من الدرج واشوفهه متهسترة تكسر..والجهال واكفين على صفحة..ديمة حاضنه ايمن وتعاين لعمتهه التخبلت..
صحت : لج تخبلو الجهاااال..الله لاينطيج ياچلبه..
نزلت بالعجل اخذت جهالي فوتتهم لغرفة خالة.. اجيت لكيتهه واكفة وكامشة الماسحه..

ركعتهه بحضني : يله نظفي ام الرجولة..
هي كالت هيج وانه انهديت بيهه..كمت اصيح صرت نار.. تهسترت واعصابي فلتت بحيث كمت اجر بفتحة الدشداشة.. بحركة يمكن جنت غافلة عنهه بس من حرگة گلبي من كلامهه وانه كبرت بعد مااتحمل هيج حچي خصوصا جدام الجهال وجهالي خاصة..شكيت الدشداشة من رگبتي لحد صدري.. هي شافتني هيج صرت سكتت واخذت الماسحة كامت تنظف وتلم الگزاز والطبلات.. صعدت فوك انه واتحسب بصوت عالي.. الله ينتقم منج يانذلة.. هاي كل جياتج هي تلعبين بيه لعب.. حسبالج ردادج مات يعني تايهتلج السالفة.. لا فنچ اذا سكتتلج بعد..
طبيت للغرفة وگلبي يدك سريع.. نزعت الدشداشة لبست غيرهه بدون ماانتبهي لجسمي ولروحي..لميت شعري جان يطبون ايمن وديمة..

ديمة كامت تبجي واجت حضنتني تريد اشيلهه.. شلتهه وكفتهه ع الميزتواليت امسح دموعهه..
دنوة : ليش تبجين ماماتي..
ديمة : انه بعد مااحب عمة ابداا..
دنوة : لا عيب مايصير..هي تحبكم..بس هسه عادي چي صرت عصبية ..
ديمة : لا ماتحبنا..
دنوة : لا تحبكم لاتكولين هيج..ازعل..
ايمن : بس هي سوتج عصبية..وجهج احمر ماما..
دنوة : هسه اغسل واصير زينة..نزلو لعبو وي رامي و نوار.. يله حبايبي لاتخافون علي..
ايمن حضني من رجلي وديمة همات حضنتني.. غمضت وقربتهم مني.. الله لايرضا عليج..

بستهم وراحو جوه..طبيت للحمام غسلت واخذت التلفون ونزلت وراهم.. كعدت بالمطبخ اگلب بي..گلبي كام يدك سريع وانفاسي حارة..راسي يوجعني من يم عيوني احسه حينفجر.. كمت شلون ماجان رحت لغرفة خالة قست ضغطي.. لكيته مفول.. كمت عصرت ليمونة بمي وكعدت اشربهه.. اخذت حباية مال وجع راس..وره ساعة هيج شوي بلش يهدا.. حسيت روحي حموت..شلون وجع..
اخلاص ماحجت وياي بعد من شافتني انهاريت.. انه طول هلوكت ساكتة ماحجيت لمن نزلت من الغرفة.. وره ربع ساعة اندكت الباب..خليت الشال وطلعت افتحهه.. فاتت خالة هي والحجي..
سديت الباب وطبيت..

وائل : جيبلي مي بعد خالج..شنو من حر هذا..يذبح..
جبتله مي وكعدت..توني دااسأل خالة واحس صوتي مبحوووح بشكل مخيف..
عاينتلي متفاجئة : شبي حسج خالة..
رفعت حاجبي بمعنى مااعرف..
تنهدت وچنهه حست بسبب اخلاص..لأن ماكعدت يمنا خلاص.. صاحتلهه : وج اخلااااص..
اجت مناك وعيونهه علي : هاي يمة اجيتي..ماسمعت الباب..
الحجية : وعمى..شمسويه بمرة اخيج..ليش هيج حسهه رايح.. هاي انه حسرة اعوفج يمهه هيج تسويلهه..
اخلاص : وانه شكو يمة..شو وكفتيلهه بدون ماتدرين شسالقة حتى..
كمت من مكاني صرت قريبة على خالة اريدهه تسمع حسي : خالة تعاركنا انه واخلاص وهي سوتني اعصاب وانقهرت ...

سكتت ..
الحجية : وشنو..
دنوة : شكيت دشداشتي من حرگتي..
لطمت على صدرهه هي وتشهك : وج شمسويه بيهه يانذلة.. امشي ولي من وجهي..وج شفتيني ماكو كمتي تستگوين عليهه.. خافي ربج بيهه يتيمة.. بالله عليج لو اخيج موجود چا سويتي بيهه هيج..چا لصمج على حليگج..افيييش فدوه لإيده..
هي حجتهه وبجت..اااخ شكد حسيت روحي ضعيفة.. تقربت حضنتهه وبجيت بحضنهه..تعبت اريد راحة منين اشتريهه..
اخلاص : يمة اسفة لاتسوين هيج بروحج..خلص بعد مااعترضلهه هاهيه..
مسحت دموعهه ودارت وجهها عليهه : بعد وكت.. فد عشر سنين لخ كولي مااعترضلهه..المفروض تكيفين عليهه چي من ريحته سوده علي..عرض روحه للخطر علمودنا..

اجت باست راسهه وايدهه..حسيتهه شوي رخت..
مسحت دموعي وكعدت يمهه علمود تسمعني..
دنوة : ها خالة شكال الدكتور..
الحجية : كال عندج زيادة بالافرازات..يعني بعدهه بالبداية تتعالج بالادوية..كتبلياهن واشتريتهن..كال ماطول بعدهه مامنفوخة يعني بعدنا بالبداية..شوف ربج همزين تلاحگتلهه.. مالي خلك عمليات ..
دنوة : الحمدلله يارب..وعيونج بعدهه تغوشج ..
الحجية : خليهه لمن اروح للطبيب هو يكشفني.. مااكول اي ولا هسه..الله كريم..
ابتسمت وبستهه..الحجي جان جايب اكل وياه.. اخذته من ايده كمت اسوي..وتعشينا..

بالليل نظفت وكملت..صعدت الجهال اريد اصعد جان تصيحني خالة..
الحجية : يمة لاتحجين ابد..موزين عليج.. روحي اكو عسل بالكاونتر فوك اكلي خاشوگة..
دنوة : شلون خالة مو يشحط الزردوم..
الحجية : سوي مثل ما اكلج حبيبة..انه اعرف..
حركت راسي يعني اي ورحت سويت مثل ما كلتلي.. شربت مي دافي فوكاهه وصعدت..تمددت ومغمضه عيوني اشم بالمخدة مالته..ريحته ماترضا تترك الغرفة والجرباية.. نزلت دموعي انه وامسد عليهه بهدوء چن احاجي : شفت شصار بيه اليوم.. بس صرت قوية مثل ما عودتني..مانطيتهه مجال .. ايمن سألني عليك ماردت اگله بابا راح وعافنا..هو انت ويانا مو.. تشوفنا لهلسبب دائما تجيني واشوفك..

رفعت راسي وانداريت للجهة اللخ لكيته متمدد وايده جوه خده يعاينلي ومبتسم..
همست : سمعتني..
صگر : بنيتي الاريد اشوفهه صار سنين بهلشخصية..
ابتسمت وبجيت بحرگة..دفنت راسي بالمخدة واسمع صوته يمي وبكل مكان..جريت حسرة كسرت گلبي بعدين غفيت وحدي..

مر اسبوع وصوتي بعده هو هو..خالة ماخلت زنجبيل عسل مي وملح..كلشي مايفيد..اخر شي كلتلي اخذج للدكتور وياي من اروح لابو العيون..انه ماكلت لا ..لأن تعبت.. اريد احجي واسكت محد يسمعني كلش ناصي صار ومبحوح يضوج..
جسمي طگع من فوك ليجوه..بالبداية خفت وبجيت.. بعدين شوفته لخالة كالت هاي چي ماكلة سمچ وطرشي وصرتي عصبية..انطتني الرمين وراحت.. بس بقيت اليوم كله مسطورة .. اخلاص عافتني كامت ماتعترضلي وهو المطلوب.. بس عگبيش..عكب ما أذتني وهمشت نفسيتي.. حسبي الله.. شكد اكرهها..بكل مره احاول اتقبلهه اكول وراي عمر خوما يضل الكره بيناتنا.. بس هي انسانة تكرّه المقابل بيهه..

وراهه بيومين بدلت العصر وبدلت لديمة مااخليهه هنا فطيرة وتبجي بالعجل..كملت ونزلنا..الحجي جان مبدل هو وخالة بس نزلت طلعنا..وصلنا للعيادة جان يحجي..
وائل : بس تخلصون خابروني اجيكم..
الحجية : يله خوية..
نزلنا وصعدنا فوك للدكتور..هي جانو ثنين جدامهه.. فاستغليت الفرصة ورحت لدكتور الانف والحنجرة كتبت اسمي عند السكرتيرة ورجعت..وره ساعة اجانا الدور..
فتت وياهه ..سألهه عن عمرهه وشنو ديصيرلهه وفحصهه..
الدكتور : امي مبين عندج سكر مو..
الحجية : اي عيني عندي..
الدكتور : صايرلكم شي اخر فترة..فاتحة ..
الحجية : اي صارلتنا فاتحة..
الدكتور : الى رحمة الله..

حجية انتي مثل امي..البچي يأذي شبكية العين.. وانتي مرة كبيرة بالعمر مو نكول ثلاثينية او حتى بالاربعين.. فانتي عندج مي ابيض بالعين..
عاينت لخالة حسيت وجهها خطف..كامت تتلكأ..
الحجية : يعني عملية..
الدكتور : اي نعم..عينج اليمنى سالمة..بس اذا ضليتي تبچين ويصعد سكرج حتى الثانية تتأذى..فانتي اخذي احتياطاتج وابتعدي عن الانفعالات..اني هلفترة ماعندي مجال بمستشفى البصرة.. تكدرين تسافرين لبغداد..
الحجية : اي يمة ماعندي شي..
الدكتور : جيد امي..اذا حالتج المادية مو تمام اسويلچياهه بمستشفى حكومية..
الحجية : لا خالة الحمدلله والشكر..
الدكتور : الحمدلله..لعد بيوم السبت اشوفج بمستشفى ال.... بثمانية صباحا.. بس كون انتي قبل العملية بساعة متواجدة هناك..

كتبلهه ورقة وحاچاهه بعد ع العملية وشلون تصير.. بعدين طلعنا.. خليت ديمة عدهه وفتت للدكتور.. شرحتله حالتي..
رأسا سألني شجنت ماكلة..كتله سمج وطرشي.. كتبلي ادوية لأن صاير عندي احتقان..اقراص فوار وبعد چم شغلة.. كال يحتاجلج صبر..اقل شي اربع شهور يله يرجع طبيعي .. تشكرت منه وطلعت..اخذت ديمة ونزلت للصيدلية اشتريت الادوية..خالة راحت تخابر الحجي بالممر.. توني طلعت جان يصير ارشد بوجهي..منتچي ع السيارة مالته..لابس تشيرت اسود وبنطرون اسود..مناظره حاطهن على شعره.. ابتسم بطرف شفافه..مابادلته بشي..عفته وطبيت يم خالة.. وره خمس دقايق اجه الحجي واشوفه واكف يم ارشد يحجي وياه.. ادور عزمه ع العشه..استغفرالله ..هذا خالو ناوي يموتني.. هسه شكو جايبه شكد اضوج منه..
عفته وركبت ليوره..هو يحاجي خالو ويعاينلي.. ششايف بوجهي هذا..من كل عقله عود..

درت وجهي لديمة بين ما كملو ورجعنا للبيت..ع العشه اندكت الباب وانه بالهول داارتب الكوشات..سمعت صوت ارشد يضحك وي خالو..دورات تكره شخص بدون سبب.. ولو هو خطيه ساعدنا هواي بخصوص سالفة محمد وعلمود السيارة بس مااحبه ابد..
بالليل كلش طلع..ضل واكف بره يدخن بعدين تنهد وطفاهه وراح..

وره تلث ايام جهزت جنطة خالة..بقيت كاعده وياهه.. مااكدر اروح علمود الجهال خوما يبقون يم اخلاص.. فالحجي واخلاص راحو وياهه..طلعو الفجر علمود يباتون يم ابو جمال والصبح ثاني يوم يطلعون للمستشفى..كتله بس تدخل العمليات خابرني..
كعدت الصبح وياهم ودعتهم وقفلت البيبان وطبيت.. البيت صنطة وهدوء يخوف..كلهم نايمين..تنهدت وطبيت للمطبخ اشرب مي..لكيت صگر.. اوف صار شكد ماشايفته مفتقدته.. جنت احس براحة من اشوفه..ولو انقهر بس ع الاقل جدامي حتلو خيال..
رحت وكفت جدامه واحاجي بصوتي المبحوح..

دنوة : شعجب هسه..
صگر : شلون صرتي..
دنجت وحركت راسي يعني زينة.. شوي واختفى.. عفت المطبخ حتى مي مااشتهي..رحت بالهول فتحت التلفزيون اكلب بالقنوات.. ماجاني نوم ..بالصدفة لكيت قناة مال اعلانات مصرية فاكو اعلان عن امراض نفسية وعلاجهن.. واحد منهن ان تسوي عالم خاص بيك وتحجي وي اشخاص ماموجودين.. صفنت وي روحي..
معقولة رجعت تمرضت..صح تاركة العلاج بس بس دااخذ مو كاطعته نهائيا.. يعني صگر من اشوفه خيال هذا جذب.. انه مسويته لروحي چي متعلقة بي..
مااعرف بس بجيت بقهر على حالتي..مااريد ارجع اتمرض.. جهالي منو الهم..وخالة خطيه مرة جبيرة وين بيهه حيلي..

تنهدت وكمت طفيته..صعدت فوك اكلب بالتلفون مال صگر.. لكيت رقم الدكتورة مالتي ببغداد.. اخابرهه احجيلهه.. خاف ماتقبل لازم الا اجيهه هناك..
اجرب المغرب وره ما تعزل عيادتهه اخابرهه..اذا شفتهه تجاوبت احاجيهه..هي انقهرت على حالتي فانطته لصگر رقمهه مو رقم السكرتيرة..اي اخابرهه لازم احجي لأحد الدااشوفه.. شحتفتهم مني وانه صوتي مبحوح..
ادزلهه رسالة.. اي عدهه واتساب..
قفلته وخليته يم راسي..تمددت حضنت مخدته اشم بيهه لحدما غفيت..

مر اليوم عادي..بين الجهال والطبخ..التهيت وياهم شوي.. لحدما المغرب وره الاذان دزيتلهه رسالة..
- مرحبا دكتورة..شلونج ..
عفته وكمت..ضليت كلساع ارجعله..بعدين كلت اوي كافي خلاعوفه هي شوكت ماتجاوب ختجاوب..اكيد مشغولة هسه.. كمت صليت ورجعت لكيتهه مجاوبتني..
- اهلا عزيزي.. الحمدلله..دنو شلونهه..
دنوة : انه زوجته دكتورة..هو ماموجود..
بقيت احجي وياهه..حسيتهه تجاوبت وياي..
كالت : شبيج امي..
دنوة : دكتورة شوكت عندج مجال ومرتاحة..اريد احجيلج عن شي ديصيرلي صار ثمن شهور..
- : اني هسه دخلت للبيت..ارتاح واراسلج..
دنوة : ماشي شكرا..

عفته وكمت احاول الهي روحي بشغلة..سويت عشه وكعدت وياهم..بالتسعة ونص تقريبا اجه ايمن جايبلي التلفون.. اخذته وحاجيتهه..
- : اي حبيبتي شعندج..تحبين نتخابر توضحيلي اكثر..
دنوة : مااكدر دكتورة..صوتي مبحوح..
- : ها..سلامات امي.. كتبيلي لعد..
دنوة : دكتورة زوجي توفى..
انه واكتب هي جاوبتني حسيتهه متفاجئة..
- : اليجيبج دائما للعيادة..
دنوة : اي..
- : الى رحمة الله..والله قهرتيني عليه..اكول ليش كتبتيلي انتي.. عبالي هو..
دنوة : يرحم موتاج..

سولفتلهه شلون دااشوفه..حتى احجي وياه.. يحس بيه ويجيني دائما لمن اضوج لو لمن ابجي..كتلهه بس انه اشوفه.. امه واخته مو مثلي..مابخلت عليهه بكلمة.. احس حمل بگلبي اريد شخص يمدلي ايده ويفسرلي كلشي..
انتظرت دقايق هي ماكو..بعدين وصلتني رسائل صوتية منهه.. فتحتهن وقربتهن من اذني اسمعهه..
- : حبيبتي اكو شي اسمه العقل الباطن..هذا كلشي تفكرين بي ينسخ بداخله ويظهرلج على شكل حلم بالليل.. فانتي بعدج بنفس البيت حسب ما كتيلي..وهو الشخص الوحيد وكفلج وساعدج واكيد اب لأطفالج.. فبقت ببالج مواقفه.. ولشدة تعلقج بي والصدمة الصارت فاكيد حتبقين متوترة وتشوفي دائما.. اما الكلام التتكلمي معاه من تشوفي فهذا من نسج عقلج الباطن.. والدليل كتيلي اطفالي يكلولي ماما ويامن تحجين.. لتخافين اني..أمر طبيعي لشخص مثلج ومثل علاقتكم .. والمرحوم امي من شفته شلون جابج ويعاملج بحرص كلت رجل بمعنى الكلمة..ترحميله وسلمي أمرج لالله..

دنوة : وهاي الخيالات اضل اشوفهن لو تروح..
- : تروح وتبقى فقط الاحلام..وهذا شي طبيعي جدا..
دنوة : شكرا دكتورة..عبالي محتجاوبين..
- : لا حبيبتي عادي..العفو اهلا بيج..
سديته وعفته.. يعني بعد محشوفك.. وهذا كله من بالي.. اي من بالي..چي جان ليل نهار يمي..ومن ابجي مايقبل.. لهلسبب هسه من ابجي يجيني..دااعوض مكانه بدماغي.. هي قصدهه..
تنهدت ودنجت..دموعي كامت تكت..حيصيرلك سنة بعيد بس مدااشوف فرق..نفس البجي ابجي بالليل على فراشك وريحة شماغك..حتى دشداشتك النيلية علگتهه خاطر اتخيلك بمكانهه.. احس حخسر عقلي.. انه چي ماشبعت حنان لا من اب ولا من ام فبخسارته حسيت خسرت الكل..حسبي الله عليك محمد..

كمت للحمام غسلت ورجعت كعدت يمهم..
ثاني يوم الصبح دك تلفوني..
وائل : صباح الخير خالو..
دنوة : هلا خالو..شلونك..
وائل : والله بخير..مو كلتي من تدخل عمليات خابرني..
دنوة : اي يالله..دخلت..
وائل : اي هستوهه فاتت..بعد لمن تطلع اخابرج..
دنوة : ماشي..انتظرك مو تنساني..
وائل : لا خالو..ديري بالج ع البيت والجهال..قفلي زين..
دنوة : حاضر..
وائل : يله اخذي راحتج ابوية..

سديته ورجعت غفيت..كعدت بالدعش لكيتهم توهم كاعدين.. كمت انوهم يمي كلهم خوما وحيدهم خطيه..
نزلت سويت ريوك اجاني نوار كامش التلفون..
اخذته منه الحجي جان ع التلفون..كال طلعت صارلهه نص ساعة.. حيباتون يومين يم بيت ابو جمال بعدين يجون.. مايصير تتعرض لشمس لفترة..

وراهه بيومين اجت..حسيت البيت ردتله روحه.. بوستهه وكعدت يمهه اداريهه..اخلاص راحت نامت..
كمت اغلب الوكت ابقى يمهه..مااريدهه تذكر وتبجي.. الدكتور كايل ممنوع دمعة اصلا..ع الاقل لفترة تلث او اربع شهور.. بين ما ترجع العين لنظرهه الطبيعي..
هم دوايات تمنع الالتهاب وقطرات وبعد كومة شغلات بس انه وياهه علمود ماتنساهن..
خطاطير اكيد منتهين منهه..خوانهه وخواتهه اجو.. حتى محمد.. بس ولا عاينت بخلقته..سلم علي جاوبته من وره خشمي.. لعبانه روحي منه..
التهيت بالخبصة والاكل.. نسوان عمامي همات اجو.. رزان خابرتني خليتهه تحجي وياهه وتحمدتلهه ع السلامة..
وراهه بفترة دخلنا للشهر التاسع تقريبا نهايته.. جنت كاعدة وياهه والجهال يمنا يلعبون مكعبات..اخلاص رجعت لبيتهه..
دنوة : خالة ليش ماادخلهم روضة..خطيه بس بالبيت.. صار شكد مامطلعتهم..

الحجية : على راحتج يمة..خوش فكرة..اكو روضة قريبة علينا تعرفيهه..
دنوة : اي ذاك اليوم طلعت تسوگت وشفتهه..اهلية..
الحجية : يله ماشي حبوبة..
وصدك..وراهه باسبوع تقريبا رحت للروضة سجلتهم ثنينهم.. شوي يلتهون..ايمن يحب يشخبط ويرسم..اخلي ينمي هلاشياء بداخله وهو ذكي..فاريده يعتمد على روحه بالدراسة بعدين.. انه مامكملة واكيد المنهاج تغير فحرامات يجي يسألني ومااعرف..فشلة..صگر جان يعاين على ايمن هو وكامش ورقة واقلام تلوين..
يكلي : اريده يكبر ويجي يسألني هاي شلون حلهه وهاي شلون تصير..

رأسا مر على بالي هلموقف..انقهرت بداخلي بس مااكدر اسوي شي جدام خالة..
صوتي بعده مبحوح بس شوي احسن من كبل..اذا احجي هواي احسه يرجع مثل كبل..بس عودت روحي مااحجي على كد الحاجة..
طلعت العصرية اشتريتلهم هدوم جدد والغراض الباقية كلهن ع الروضة چي اهلية.. ثاني يوم الصبح بدلت ورحت للمصرف سحبت فلوس من مالت الورث..المبلغ الاخذته مو مال اخذه وارجع للبيت وحدي..فكعدت على مصطبة خابرت خالو..
دنوة : الو خالو وينك..
وائل : هسه حطلع من البيت..
دنوة : تعال اخذني..انه يم المصرف..
وائل : جان كتيلي اخذج واجيبج..يله هسه جاي..
دنوة : يله..
سديته وكعدت انتظره..انه مدنجة والفلوس خالتهه بجنطة.. جان تنحجب الشمس عني..

رفعت راسي صارت عيوني بعيون ارشد..استغفرالله.. هذا شجابه.. سويت روحي مامهتمه..
ارشد : شو هنا خوية..
جاوبته بصوت مبحوح : اجيت بشغلة..
رفع حاجبه متفاجئ من صوتي : المن متانية..
دنوة : ولو هو شي شخصي المفروض ماتسأل بس خالو حيجي يرجعني..فمنتظرته..
ابتسم وحط إدي بجيوبه : وليش عصبية..
دنوة : لا مو عصبية..وبطل تعترضلي..
ضل مبتسم بهاي ابتسامته الاستفزازية.. ضليت استغفر لحدما اجه خالو..جسمي رجف..بس لا عباله عندي شي وي هذا رويشد..

كمت بالعجل وكفت يم الحجي..
دنوة : يله خالو تره حارة..
وائل : يله امشي..
سلم علي وصعدنا..رجعني للبيت وراح..
وراهه انطيت الفلوس لام الروضة وانطتني غراضهم كاملة.. اجيت اعلمهم شلون يتصرفون..ماخليتهم خط چي قريبة.. واذا فديوم صار مطر لو شي اخلي خالو يوصلهم..
بعد اسبوع كعدت الصبح بدلت وبدلتلهم.. ديمة بيضة مثل خالة ودبدوبة حتى عدهه طبگات بإديهه شوي..هيج من الله ولو ماتاكل هواي .. لبستهه تنورة وجواهه ستريج قصير وتشيرت ابيض فوكاه سترك خفيفة..بعده الجو بي حرارة بس الصبح شوي بارد.. سويتلهه شعرهه وايمن همات بدلتله ونزلنا.. لكيت خالة كاعدة ..صبحت عليهه وكعدنا شوي..

دنوة : خليتي قطرة لعينج..
الحجية : اي خالة..شوف باجر اروح يشوفلي وضعي شون صار..
دنوة : انتي تحسين بتحسن..
الحجية : اي يخالة..جنت مااشوف فد دور.. كله مغوش.. هسه نعمة..حتى قليل استعمل المناظر..
دنوة : يله چا باجر اروح وياج..
شربت چاي واخذتهم وطلعنا.. جانت اكو مدرسة ابتدائية بالشارع المقابيل الروضة..ابتسمت.. شكد حلو واحد يرجع طفل..لايهتم ولا ينقهر..
طبيت جوه وحجيت وي المديرة..ماتت على ديمة..كالت يمة شلون دبدوبة هاي وحليوة..
وره نص ساعة اخذتهم المعلمة ودخلو جوه..

وره دقايق اجت ديمة تبجي..مسحت دموعهه وبستهه : حبيبي ماماتي..هسه تشوفين بنوتات مثلج وتحبيهم.. انه الظهر اجيكم ونرجع يم بيبي..
ديمة : ما ..اخاف..
دنوة : لا يعمري لاتخافين..هسه تحبين المكان..مو ايمن راح يركض..روحي وياه..
ضليت اقنع بيهه لحدما فاتت مرة لابسة وكاشخة ع الاخير.. ريحتهه كفختني..مبينه موظفة..گايدة بيدهه طفلة بكد ديمة شايله لعبة بيدهه..اجت على ديمة حضنتهه چن تعرفهه.. مدري شكالتلهه وهي ضحكت بعدين طبو جوه..
شفتهه سكتت وطلعت..تمشيت اريد ارجع للبيت ومريت من يم المدرسة شفت سيارة ارشد واكفة..بنية سمرة كاعدة يمه.. وولد ثنين ليوره..

نزلو وهو نزل وياهم..بوسهم وانطى البنية فلوس بعدين راحو للمدرسة..ضل واكف يعاينلهم لحدما طبو.. دنجت ومشيت بعد ماادري انتبه علي لو لا..هذول جهاله..مبين متزوج من زمان.. چي كبار..
وصلت للبيت لكيت خالة صابة الاكل..كعدت يمهه تريكت ونمت بغرفتهه..كعدت بالدعش خليت الغده ع النار ونظفت البيت.. صارت ب١٢ ونص طلعت جبتهم واجيت..ديمة تضحك وتسولفلي شسوت هي وايمن..هم وصغار هيج متونسة وفرحانة بيهم..من يكبرون شلون..
اخذتهم ورجعنا للبيت.. وره يومين رحت وي خالة للدكتور.. الحجي جان بالبيت فعفت الجهال يمه..كاللهه العملية ماشية عدل مابيهه خطأ..غيرلهه القطرات..وحده تمشي عليهه فترة والثانية تضل عليهه دائما..

مرت ايام بين جهالي وخالة والحجي..اخلاص مااجت بعد .. طلع تعيينهه وتعينت..مااهتميت عادي ..هي للامانة جانت تدرس وتجهد روحهه بالدراسة لمن اجيت انه شفتهه.. فتستاهل يعني..
ارشد..مخليلي رادار وين مااروح وراي..كلش ضجت وتضايقت من مواقفه..هو مايحجي وياي ولا ابد..بس نظراته وحركاته ضوجتني..مرتين حجيت وياه..كتله ابتعد عن طريقي عيب هلحركات..حتى مايجاوب..يحسب حيخليني احبه لو يريد يخطبني..طبعا مااقبل شبيه عاقلة مخبلة..انه روحي وگلبي وحبي لكلشي بهلدنيا دفنته يم صگر..بعد مستحيل يجي شخص ثاني ياخذ مكانه..ومثل ما وعدت روحي ماانزع الاسود وعدتهه مااتزوج وراه..

جهالي انه اربيهم..هاهيه..كافي الصارلي من انه وصغيرة تكفخت وانهانيت..انسحقت شخصيتي ورجعت بنيتهه وي صگر..لحدما صرت اوكف بوجه الكل..حتى اخلاص الي عمري مارفعت صوتي عليهه رزلتهه..كامت تخاف مني.. دائما تتجنبني..لمن تشوفني اشتغل تاخذ من ايدي..تأدبت.. واعرف شلون ابنيلهم شخصية مايهزهه اقوى شخص واقوى ظروف..
لا ارشد ولا غيره..مستحيل بعد..حتلو مو هلسنة.. بعد عشر سنين نفس موقفي.. حبيبي وروحيتي محروم من الدنيا وانه اتزوج وراه واتمتع..ليش شبيه مخبلة..
كمت كل ما اروح اخذ الجهال للروضة اشوفه ينزل ولده للمدرسة هاي..يضل يعاينلي لحدما اروح..اذا نظرتله فتكون نظرة طايشة وبالغلط ..
خالة دورات تبجي بس اسكتهه مااخليهه تبجي متواصل.. خطيه عينهه تتأذى..بس تحسنت ع القطرات والدوايات..
وره فترة وطبينا الشهر الواحد بسنة ٢٠١٥..

بليلتهه بجيت بجي يهز الحيطان..سنة جديدة بدونك.. حيصير سنة وانت جوه التراب..بعدني ابجي بنفس الحرگة والقهر.. بعدهه عيوني تكوم تچويني وتغوش من البچي..بعدك بگلبي مثل ما انت..ريحتك ابد مااخليهه تخلص من الغرفة..دائما من اعدلهه ارش من عطره ع المكان الينام علي..لحد هللحظة بعدني اشوفه خيال..بعدني احس بي يمي لمن ابجي وانقهر.. قليل يجيني بالاحلام..يمكن حچي الدكتورة الصحيح.. خليهه ع الوكت..

وره ايام بالشهر الواحد كعدت الصبح وكعدت الجهال اخذهم للروضة..لبستهم زين..ديمة طلعت بطة هي منا مدبدبة ومنا لبست كومة..اخذتهم وطلعنا..شوي نفسيتهم تحسنت من صارو يروحون هناك..ع الاقل ينامون من وكت مايشوفوني من ابجي بالليل..
وصلتهم وشفت ارشد منتچي ع الباب ويعاينلي.. استغفرالله العظيم..كمت مااهتم بس هو مايمل مني..ولا نطيته مجال بكد الشعراية..ثقة عنده ماشاءالله عليهه..
طبيت جوه سألت عليهم خاف يسوون وكاحة.. المعلمة حمدت بديمة..كالت حبابة وتسمع كلام.. بس ايمن حرك شوي.. هو ولد بعد شلون مايصير حرك..
بس طلعت شفت وحده مرة واكفة مبين هم عدهه اطفال هنا..

تقدمت علي تحاجيني..
بالاخير كالت : انه زوجي عنده سيارة خصوصي.. ابني الصغير وياه وبعد بنية هنا بالمنطقة..شفتج تجيبيهم مشي فكلت اكللهه ع الخط..
دنوة : انه همات مفكرة بيهه..چي الجو بارد..ميخالف من اجي اخذهم الظهر اتفق وياه..
تشكرت مني وراحت.. بين ما راحت جان الشارع فارغ.. كلهم فايتين حتى اهل المدرسة..رجعت بطريقي عادي هناك جان اسمع واحد يصيحني..

ارشد : ام ايمن..
انداريت عاينتله بملامح باردة : اهلا..
ارشد : ليش تخليلهم خط وفلوس..خليهم وياي انه اخذهم وي جهالي لدوامهم..
دنوة : حتلو وياك هم جان انطيتك فلوس..
ارشد : لا زحمة شسوي بيهن..چا انه ليش دااكلج خليهم وياي غير علمود بدون فلوس..
دنوة : شكرا بس مامحتاجين..بعدين انت شعندك تعاينلي تره عيب..صار چم مره احاجيك بهلموضوع..
عاين بعيوني وتنهد..راد يحجي وسكت..عافني وراح.. روحتهم شعندك لاطشلي..

طبيت لفرعنا من يم بيت خالتي..جانت الدنيا دتنث مطر خفيف من البارحة ماوكف.. احس رجلية صارن ثگال والدرب دربين.. تذكرت لمن جنت اروح للامتحانات..تذكرت ٢٠٠٦ وكلشي صار بيهه.. لمن فتت منا وشفت صگر..وكفت حجيت وياه.. هذا اليوم الخلانا ننجمع.. خلاه يجي لبيت ابوي ويصيح علمود بس ياخذني..وانه جنت مطلكة..لو واحد غيره خلص يترك الموضوع ولا عبالك..اويلي عبالك ذاك اليوم.. گلبي عصرني ودموعي تجمعت بعيوني..تفطنت حچاية جديتي..جانت تكول كلشي يتعرقل بالبداية مايفيد نستمر بي بعد..كتلهه ليش جدة.. كالت هي لو الله يريدهه چا صارت من الاول..عليش تطول وتعرض.. وانه وصگر ماكو شغلة ماصارت بطريقنا يله كدرنا ننجمع .. تنهدت من بعد هاي الافكار..لكيت روحي يم بابنا.. فتحتهه بيأس ودخلت..

الظهر رحت اخذهم واتفق وي ابو الخط..دليته ع البيت كال اندليت..ثاني يوم الصبح بدلتلهم جان يجي..طلعت انطيته الفلوس واخذهم وراح..مبين أمين خوش رجال..
بهلفترة سويت معاملة التقاعد مال صگر علمود الفلوس.. انه عن نفسي ابد مااريد فلوس..بس خالة كامت ماتقبل اسحب من المصرف..كالت لشوكت تضلين تسلتين بيهن لحدما يخلصن وهذني ذخر الج ولجهالج..مخمخمتهه ببالي شفتهه منطقية..صرفت نصهن ع الروضة وهدوم وغيرهه.. هاي بأقل من سنة خلصت نصهن..بعد سنة واكثر شلون..
فضليت تقريب العشر ايام اذا مو اكثر امشي بيهه.. خالو يجي وياي..عنده واسطة قوية علمود تمشي بالعجل.. صارت واستلمتهن لاول مره..

انقهرت بداخلي..جان هو يستلم ويجيبهن للبيت..يخلي نص منهن هنا والباقي يضمه بالبنگ بإسمه..لأن اكو محلات تابعة لعمي حامد تشتغل ببغداد فالوارد هم يرجعلنا..

وره فترة صادف السنة مالته..ماكدرت انام الليل من البچي.. بس اتخيل هو صارله سنة ماموجود..صارله سنة جوه التراب مايحجي ويانا ولا نشوفه گلبي يصيبه الف خنجر.. كعدت الصبح راسي صاير طبل..و هم نفس الاربعين اجو گرابتنا وعارف وارشد همات..علي والباقين..اكو بيهم بقو لليل وراحو .. والباقين ضلوا علمود نروح للمگبرة الفجر.. رزان اجتني وحدهه..كالت امي منتكسة وسما يمهه ماتكدر تجي.. عذرتهه..اجتني بالفاتحة والاربعين كلش كافي..
التهيت طبخ وهوسة..خالة رادت تجي وخالو ماخلاهه.. حتى ام جاسم ماخلتهه..علمود عمليتهه.. خطيه كامت تبجي چي محناخذهه..بس احسنلهه..ادور عينهه اللخ تتأذى.. كعدت يمهه اقنعهه..

الحجية : يمة عساهه بالعمى عيوني على وليدي..يعني حبوبي مدفون وامه ماتجي تزوره..چا مو ام انه..
دنوة : حشاج خالة حبيبتي لاتكولين هيج..احسن ام انتي.. بس الظروف تحكم وهو عاذرج..لو جان موجود مايرضا تأذين روحج..
خلت الشيلة على عيونهه وتبجي بحرگة..حتى چتافهه تتحرك .. حضنتهه وامسح بدموعهه واشم ريحتهه.. شكد احبهه.. احس صگر موجود بيهه..

بالليل صعدت انه والبنات نوارة وسرور ورزان ..نمت مدري شلون..كلساع افز..لحدما كعدت الفجر بدلت والبنات كعدن .. نزلت ديمة وايمن خليتهم بغرفة خالة خطيه مابيهه حيل تصعد.. طلعت جان يصير عمي لواء بوجهي..
لواء : هاي شلابسه..
دنوة : شلابسه عمي..
لواء : روحي لبسي عباية فوكاهه..مايصير هيج..
دنوة : مايحتاج عمي..هدومي مستورة والمرحوم لو موجود يقبل بيهن..
عاينلي ورفع حاجبه : كصري لسانج بعد..
ماجاوبته احتراما لشيباته..جنت لابسة صاية وشال..لبس طبيعي يعني..

وره شوي تحركنا لبغداد..نفس المشاعر الحسيت بيهن بالاربعين انعادن هسه..جرح فراگك كل يوم احسه ينفتح من ذكرى جديدة..
ضليت اعاين للدرب لحدما وصلنا مارفلي جفن.. طبيت للمگبرة واهجس صوته يصيحلي اروحله بالعجل..ماصدكت وصلتله وعيوني غرغرت بالدموع..خليت ايدي على حلكي وشهكت.. تمشيت وكعدت يمه..مسحت على اسمه بيدي وحاضنته.. ماخليت احد يتقرب..حتى اخلاص..انه المحترگة علي .. مااصدك اكو احد مقهور مثلي..بسته وشميت ريحة ترابه.. كمت اهمس بصوت ناصي واسولفله شلون مشتاقتله.. حبيبي اخذت ديمة وايمن للروضة.. مو جنت تريد تشوفهم بالزي مالت المدرسة..كتلهم بابا يمنا ويشوفنا دائما..بعدني مداانساك .. مدااتعود بدونك..علمني شسوي..علمني..

ضليت ابجي واحجي..انهارت اعصابي وكل ذرة صبر عندي خلصت..زردومي كام ياكل بيه وگلبي ورم من البچي والصياح والغصة.. سنة انت بعيد كل البعد حتى الوصل الك صعب.. وبيد ربي اذا يريد يعطف علي ويخلصني فيخليني التقيك وارتاح.. على الرغم من كل هذا بس ابد مابينت الضعف جدام احد..حتى اخلاص التكرهني ومامسويتلي مقام.. خليتهه تحسبلي الف حساب..
بقيت لحدما الشمس صارت علينا بعدين كمت..اول ما كمت دخت وافترت الدنيا بيه..ضغطي هبط.. كمشني عمي لواء مشاني للسيارة..كمت احس بخنگة وبالگوة اجر النفس.. اختنكت مااعرف شبيه.. بحيث كلهم ابتعدو بقيت بس انه كاعدة واگح من الخنگة..شواي وحسيت انمدتلي ايد رجال شايل بطل مي..اخذته منه شربته وغسلت شوي ارتاحيت.. رفعت راسي لكيته ارشد..

دنجت بالعجل وتشكرت منه..وره ربع ساعة تحركنا ورجعنا للبصرة..هلكد ما تعبت من البچي نمت بنص الطريق.. كعدت لمن وصلنا..كعدو يمنا لكيت خالة مسويه غده.. صبيته وتغدينا بعدين طشو..كلمن راح لبيته..
بيومهه دعيت من كل گلبي الله يرزقني شوفته حلم.. بالحلم احس كلشي حقيقة..

مرت ايام طبيعية..لاتخلو من دموعي بالليل..ختمتله القرآن مرتين بهلفترة..وبرمضان مرتين.. كل فترة اطلعله ثواب.. الجوارين من اوزعلهم بعدين يرجعون الماعون بيد طفل دائما يكلي ماما تكول عاشت ايدج..هو اكل طبيعي بس هو نفسيته طيبة بكلشي..دورات اكول لوما ربي عاطف علي وصاير عندي ايمن وديمة چا متت بحسرتي..ارتاح من اشوفهم.. خصوصا من دخلتهم روضة حسيتهم تونسو وملتهين كل يوم شي جديد.. وانه همات متونسة وياهم..
وره فترة اجاني نفس حلم الحلمته بصگر لمن اجاني تعبان.. بعدين شاف ايمن وسأله على ديمة..كال ديربالك عليهه وخليهه يمك..ضل يكرر بهلجملة..ديمة ماجانت موجودة بالحلم مااعرف ليش..شفت الحلم انعادلي مرتين رحت سولفته لخالة.. صارت مثل صديقتي كلشي احجيلهه..

دنوة : شنو معناه خالة..
الحجية : دفعي صدقة يمة..اسم الله خاف يصير بيهه شي حبيبتي..خوما مريضة شي..
دنوة : لا هيانهه جدامج دتضحك..
الحجية : سوي مثل ما اگلج..ان شاء الله ماكو شي.. بس الميت من يوصي بشخص يعني عزيز علي وخايف علي من شي..

ضلت جملتهه ببالي..حبيبتي اسم الله عليهه..كون كلشي موزين يصيرلي ولا يصيبهم..صارو روحي من الدنيا.. هم وخالة..بعد مااشوف غيرهم..
وره فترة الجو كسر صارت بي حرارة.. فكعدت الصبح اكعدهم يروحون لكيت ايمن مصخن..البارحة كام يركض وراح وكف كبال المبردة..ديمة كعدت بالعجل..بدلتلهه تنورة قصيرة وستريج نص يعني فوك الركبات..سويتلهه ذيل حصان ونزلت .. كعدت ايمن سويتله كمادات وشربته خافض حرارة.. شوي فكته بعدين رجع نام..
نزلت لكيتهه كاعدة..مخليه ايدهه ع الميز وخدودهه مدنفشة..
دنوة : مااجاج الخط ماما..
ديمة : لا ماما..ونيني (وديني) انتي..
دنوة : يله هسه البس واجي اخذج..اكلي شي بين ما اكمل..

عفتهه وصعدت فوك بدلت ونزلت اخذتهه وديتهه للروضة.. بالطريق خابرت ابو الخط كال ماكدرت اجي بس حترجع وياي.. كتله ماشي..
مدري شعجب ارشد ماكو..انه همات تأخرت يمكن جاي ورايح من زمان..رجعت للبيت ومر الوكت طبيعي.. لحد الوحدة الظهر هي ماراجعة..گلبي كام يلعب..يمكن چي احد يتأخرون .. ضليت افتر بالبيت رايحة راجعة..اخر شي صارت بالوحدة ونص خابرت الخط..
دنوة : السلام عليكم اخي..
- : وعليكم السلام خوية..
دنوة : تأخرت ديمة ليش..
- : ليش مو يمج..
دنوة : لا..مو كتلي ترجع وياي..
- : اي ادري ضليت انتظرهه ماطلعت..بعدين فتت للإدارة سألت عنهه كالو مااجت اصلا..

دنوة : شنوووو..لا عيوني اكيد غلطان..شنو مااجت.. انه اخذتهه بيدي..
- : ليش اجذب عليج خيتي..صار شهور اخذهم شعندي وياهم هم جهال بحسبة جهالي..بس هذا الصار..
دنوة : ماشي شكرا..
سديته وركضت فوك لبست صاية وشال.. نزلت چني مخبلة شافتني خالة تفاجئت..
الحجية : وين يمة بهلظهاري..
دنوة : لج عيني خالة..هاي ديمة ماداخلة الروضة.. انه اخذتهه بيدي فوتتهه..يمة شعر راسي حيوكف..وين راحت بتي..
خالة انخبصت وياي : اخابر على وائل يجي وياج..
دنوة : خابري..انه حطلع للروضة..

طلعت وامشي سريع عبالك دااركض..اريد بس اوصل.. يمة وين رحتي حبيبي..لاتخوفيني عليج ماما.. وصلت لكيت باب وحده مفتوحة..طبيت بالعجل حاجيت المديرة..
دنوة : بنتي فوتتهه وطلعت..خابرت خطهه كال سألت عنهه كالو مااجت اصلا..شنو هللعب هذا ست..
- : ست ابتهال..جيبي السجل .. شكلج مامصدكة بنتج مادخلت اليوم..
دنوة : ست انه مو مخبلة..انه فوتتهه بيدي..لا سجل ينفع ولا شي ثاني..كليلي وين بنتي..انتي امهم الثانية وهيج ماتعرفين بيهه اذا دخلت لو لا..
- : ماطول هي انفقدت خارج روضتي فانه مالي دخل ابدا.. هذا شي بعتقج..

گلبي كام يرجف..بس انه دخلتهه..حتى انطيتهه نستلة وراحت تركض.. عفتهه وطلعت..الجو حار وانه لابسه شال ثخين.. ودي انزعه منا محترگة روحي ومنا الجو حار.. كمت ابجي وامشي ادور عليهه بوجه كل جاهل يمر من يمي..
اخر شي مريت من دكان بالشارع البي الروضة.. رجال جبير يطلع بكد عمي قاسم..
شافني ابجي كال : شبيج عمو..ان شاء الله خير..
عاينت علي ودموعي تصب : ماشفت بنتي عمو.. بيضة مدبدبة لابسة تنورة زيتونية كبس شعرهه اشگر ذيل حصان..
- : والله انه اشكال يفوتولي جهال يومية..مااحفظهم.. بس اكو وحده اجتني يمكن هي..عدهه رصعة بحنچهه..
دنوة : اي عمو..اي هي..شوكت شفتهه وين..
- : فاتت هي وواحد شاب..يعني عمره ١٧ هيج..الصبح..

دنوة : ولد شاب..لا عمو كول غيرهه..مانعرف احد بهلعمر..
- : يمكن مو هي..بس جانت بهلمواصفات..
طلعت من يمه والحيرة بگلبي ضعف كبل ما ادخل.. كمت افوت بالدرابين بلكت الله الگاهه..بعد مابيه حيل هبطات.. وين رحتي يروحي لاتخلين ماما ترجف عليج..رحت على مرام وخالتي.. كمت ادگدك بيبان بس وين..محد شايفهه حتى.. رجعت لشارع الروضة بلكت اشوفهه..بلكت تطلع واكفة متانيتني.. بعد التوبة اذا خليتج تطلعين وحدج..انه صوچي..صوچي.. ليش خليتكم بالروضة ليييش..عود فرحت بيكم..
كمت امشي واحاجي روحي..لهناك جان يدك تلفوني.. خالة.. جاوبتهه بيأس..
الحجية : رجعي يمة هيانهه اجت..
دنوة : صدككك..
الحجية : يله يمة بالعجل لاتتأخرين..

ليش نبرتهه جامدة..زادت خوفي فوك الخوف الاكلني.. رجعت بالعجل للبيت لكيت سيارة ارشد واكفة بره.. دماغي كام يخوط ويخربط..شجابه هذا..هو ماخذهه معقولة..لا مايسويهه مو لهلدرجة..طبيت جوه ركض..
لكيتهه متمددة وستريجهه صاير كله دم.. ارشد كاعد يم راسهه يمسح علي وخالة تفرك برجليهه..عاينتلهم كلهم صافنين بوجهي.. رحت كعدت يمهه بستهه وخليت راسهه بحضني.. هي بس تغمض وتفتح حتى دموع ماكو بعيونهه..
عاينت لارشد : شبيهه ديمة..شجابهه يمك..
ارشد : كومي ناخذهه للمستشفى..لازم تخلين دكتورة تكشفهه.. انه لكيتهه ولبستهه..
فتحت عيوني بخوف : لبستهه ..ليش شبيهه..
عاين علي ودنج..

گلبي كام يدك الف..ايدي رجفت وجسمي كله رجف.. شلتهه خرگة حتى ماتنطق..كمت اطبطب على خدودهه اريدهه تبجي.. اريد دموعهه تنزل..
دنوة : ولج ماما احجي..حبيبتي شبيج شنو اليوجعج..
كام وكف واخذهه من حضني..
ارشد : يله بالعجل..
عاينت لخالة من خوفي بعد مااعرف شكول..شحجي ربي ساعدني بس خلانطق : خالة..شبيهه فهميني حموت من الخوف تره..
كامت تبجي ماجاوبتني..كمت مصدومة..عفتهه وصعدت وي ارشد رحنا للمستشفى..حتى مااهتميت ويامن صاعدة.. اريد بس اعرف بنتي شبيهه..بالطريق سألته..
دنوة : احجي شبيهه ديمة..شلون صارت يمك..ارشد تره گلبي كام يوجعني احجي لاتسكت..

ارشد : احجيلج..بس الله شاهد على كل كلمة حكولهه مااجذب وديمة حسبة بنتي
اليوم بس بنتي رحمة مداومة..اخذتهه وطبكت السيارة بالفرع الثاني ماكو مجال هنا..طبيت يمهه امتحنت وكملت بعدين اخذتهه..رجعتهه للبيت وطلعت بشغلة..مريت من يم الروضة شفت واكف ولد عمره بعده مراهق ١٧ سنة هيج مو اكثر .. حتى شواربه مامختطة..شايل طفلة ورايح للدكان.. كلت هاي ديمة لو متوهم..افتريت ورجعت لكيته ماكو.. سألت ابو المحل عنه وبعد چم واحد واكف..دلاني وين فات ورحت وراه.. وصلت لمحل مسدود الكبنگ مالته بس ماكو قفل جوه.. وواحد واكف بره يدخن.. شافني اريد افوت كال محد جوه بعده ابو المحل ماجاي..ضربته ودفرته بعيد..فتحت الكبنگ لكيتهه يمه..
سكت ماكمل..
صحت بي بلا وعي : احجييي..
ارشد : هي جانت بدون تنورة وستريج والدم واصل لنهاية رجليهه وتبجي بصوت عالي..نزلت يمهه لبستهه بالعجل.. لفيتهه بچرچف..لأن المحل مال مفروشات..

خليتهه بالسيارة وسكتت بعد مابجت..اخذت هذا السرسري لمركز الشرطة..طلعتلهم الباج مالتي سكتوا.. كتله اكمل شغلي واجيب تقرير من الصحة واريد اشوف ياكوا.... يحجي ومايسجنه..

انه اسمعه ودموعي تكت..لا مستحيل..مايصير بيهه هيج.. اكيد حلم هذا..اي حلم هذا هسه اكعد..انه بدلتلهه جانت فرحانة حتى بالليل كعدت ترسم وتكتب.. قربتهه لصدري وابوس بيهه وبإديناتهه..
دنوة : ماماتي..حبيبتي دمدومة..يروحي شبيج احجي جاوبيني انه امج..ولج شطلعج شطلعج.. ماما حاجيني..
كمت ابجي والعن حظي الزفت.. وصلنا المستشفى لكيت الحجي هناك..ماخليت احد يشيلهه..اخذتهه وطبيت جوه ع الدكتورة..اخذتهه مني دخلتهه بغرفة كالت لحد يدخل مايصير.. ضليت واكفة بره وابجي..حظي الزفت حتى بنتي لحگهه.. اوووف ياربي اووف..شسوي واخلص.. والله حرام والله..كافي كافييي..ماخلص الاختبار..تعبت بعد مابيه حيل.. نفسيتهه حتدمر اويلي عليج ماماتي..

وره ثلث ساعة طلعت الدكتورة..
- : وين امهه..
دنوة : انه دكتورة..
- : تفضلي ويايه افهمج الصار..
رحت وياهه لغرفة بيهه ديلاب فايلات ومكتب صغير.. وكفت هي وتكتبلي شهادة طبية وتحجي..
- : حكتبلهه شهادة طبية..لأن من الفحص تبين ان هي فقدت غشاء البكارة بواسطة جسم صلب..تأكدي لو كان بسبب ممارسة فعلية كان توفت لا سامح الله..لكن الصار تم فض الغشاء بأداة ثانية..ممكن قلم او حتى عودة تنظيف الإذن..
دنوة : ماكو احتمال يرجع يلتئم..
- : ممكن..لأن بعمر صغير فقدته..لكن مانعتبره شي اكيد ونمشي بي..اني سويت التقرير هذا خلي الهه للزمن.. كلشي جائز يصير..

بصمت علي وختمته ختم مال مستشفى حكومية بالبصرة.. يعني شهادة طب كاملة..
- : تفضلي.. خليتلهه مهدأ لأن اعصابهه متشجنة.. من حاولت افحصهه قلصت نفسهه بشكل..راعي نفسيتهه بشكل جيد وراقبيهه دائما..حسسيهه ان هي طبيعية والصار شي جائز نسيانه..هي بعمر الطفل ذاكرته مامكتملة..تلقائيا من تكبر محتذكر الموقف الصارلهه..لكن تمرهه تفاصيل صغيرة منه مو كله بحذافيره..والله يكون بعونهه وبعونج..
طبطبت على ظهري وانطتني الورقة..اخذتهه ورحت كعدت بالاستعلامات انتظر يخلص المهدأ واخذهه.. كمت ابجي بحرگة.. سوده علي يروحي هيج يصير بيج.. شسوي املخ روحي..والله تعبت يالهي اعطف بحالي فدوه لاسمك.. شلون حداريهه..شلون ارجعهه طبيعية..اويلي عليج ..

ارشد اجه كعد يمي يحاجيني..
ارشد : انه مااقربلهه شي..فلازم تجين انتي للمركز ترفعين دعوة ع الولد هذا..
دنوة : شيفيد السجن..
ارشد : يفيد خوية..اخذيهه مني..هسه اذا طلع حيسويهه شيوخ وتنفض..
دنوة : انه لو بيدي اذبحه..بس.. انطيني مجال افكر.. مدااكدر اسوي شي هسه..عقلي منشده..
عاينت علي ودموعي تصب : شلون انطاك گلبك تعاينلهه هي وهيج حالتهه..
ارشد : وداعت بنتي ماعاينتلهه..داير وجهي ولبستهه..

دنجت ماجاوبته..گلبي ورم من المشاكل..بس هاي مصيبة مو مشكلة..بلوة ..
وره ساعة كملت الاجراءات واخذتهه..الطريق كله هي ساكتة ماحجت ولا بجت..حضنتهه وامسح على خدودهه.. لحدما وصلنا لكيت تلث سيارات بالباب..مااهتميت..عفت الحجي يحاجي ارشد وطبيت..عمامي جانو هنا.. شبالعجل وصللهم الحچي..اكيد خالو كللهم..سلمت وكعدت ..
ارشد كعد يحاجيهم..
ارشد : انه خليته بالتوقيف..تريدون تحاكموه قانونيا.. يصير .. ماتريدون..حاكموه عشائريا..بس تطلع سمعة..
لواء : سمعتيش..هاي طفلة..وهذاك كلب ابن كلب.. واحد حيوان نذل..
قاسم : والله اجيبه من اذانه اكعدهم ع الحديدة الا اخلي سمعتهم جوه الرجلين..حتى قانونيا احاكمه.. بعدهه طفلة وهذا اعتداء..لو جبيرة يمكن نستر الموضوع..بس بهلحالة لا..والتقرير الطبي واكف ويانا..

ارشد : هذا هو..انتو اولى بيهه بعد..ردت اخبركم وابري الذمة..
الكل : ماتقصر..
ترخص وطلع..عمامي ضلو عدنا تقريب الساعة بعدين راحو.. كالو حيروحوله للمركز ياخذوه يخليهم يوصلون لعشيرته علمود يصير الگوام..كتله براحتك عمي..التهيت بمصيبتي.. صعدت فوك فوتتهه للحمام اسبحهه..شعرهه طايحة منه القراصة والماشات..ايدهه صايرة زرگة..الله لاينطيك..حيوان شهواني كلب نذل..هاي هم تفتن بهدومهه..اااخ ياربي گلبي ملچوم .. شوكت ينجبر..بعدهه اللچمة الاولانية ماراحت ادور انچلم مرة اللخ..وبعزيزتي هلمرة..

سبحتهه وغسلت الدم..هي خرگة بيدي ماحست علي اصلا.. جانت تكيف من ادخلهه جوه الدوش..كمت ابجي انه واسبحهه وابوس بيهه من كل مكان..كملت ولفيتهه بالخاولي.. اخذتهه للغرفة انشفلهه..مددتهه ع الجرباية اشوف شنو الصار.. عضيت شفتي وغمضت.. اااااه ياربي اااه.. انه بكبري اموت اذا هيج صايرلي.. بدلتلهه بالعجل وخليته بحضني.. كمت ابجي وامشي اصبعي على خدهه..
دنوة : ماما احجي شي حبيبتي..بس اسمع صوتج..
ماجاوبتني..هي هواي تسولف مدري منين تجيب الحچي.. وهسه كلمة ماما ماتكولهه.. اووف ياربي ساعدني اعيلهه واخلصهه من الصار..

طول اليوم ماقبلت تاكل شي..بس شربت حليب..ايمن اجه عليهه يريدهه تلعب وياه ماقبلت تكوم..كعدت بحضني وكامشتني بقوة..تخاف حتى من الحجي..من شي اسمه ولد.. ضلت اليوم كله بحضني..بس انزلهه تبجي..
بالليل صعدت قريت على راسهه لحدما تعبت ونمت.. كعدت الفجر مالكيتهه..نزلت جوه والجو حار كهرباء طافية.. شطفاهه هي ماتطفى..
همست : ماما ديمة حبيبتي..وينج..
سمعت صوت بالطرمة..گلبي خرط..ركضت اشوفهه....

يتبــــــــــــــــــــــع.........................