رواية اسألي عني الليالي الفصل السابع وثلاثون 37 - بقلم رقية جاسم

زنجر قفل روحي ..
وحاير بناري ..
ومن گلبي اعلى گلبي انگطعت اخباري ..

قناة التليگرام

حساب الانستگرام

الـبـارت السادس والـثـلاثـون..............

سوة كلشي وانه رجلي تكسرت من الكعدة..مانزلنا بس مره تغدينا ورجعنا..صعدنا فوك.. حط الغراض بالغرفة وانه كاعده ع الجرباية اراقب حركاته شلون هادئة ورزنة.. فات للحمام والباب مفتوح..ثواني وطلع ينشف ويمسح على إدي.. تقرب مني هو ويبتسم..

رجفت بخوف على رهبة..مااعرف من شنو رجفت بالضبط .. مع العلم حسيت بهلشعور لمن جنت وي عقيل.. بس هسه اكو شعور غالب ع المشاعر الثانية..شعور الحب..شعور الأمان والراحة يم رائد..بعد السوالياه كمت احسه مصدر لكل شعور وذرة فرح ممكن احسهه..جوارحي وروحي وأفكاري منقادة بشكل لا ارادي لوساعة صدره ودفو حضنه.. كمش ايدي وسند إدي على فخاذه..قربهه من شفايفه وباسني منهه..
عاينلي بنظرة مليانة حب وطمأنينة.. راد يحچي وسكت..
حرارة أنفاسه مشت من اصابع ايدي لصدري وگلبي وراسي وكل جزء بيه..مااعرف شصار.. رعشت رعشة خفيفة بيده .. حسيته داري وملجأي ومسكني.. لأن رجفتي هاي مو بس خوف.. حب وحب مو هين..حب جمعنا بعد سنين.. بعد كل ظرف مريناه.. وكل ليلة ماگدرنا ننام بيهه ثنيناتنا من التفكير والبعد والقلق..

سكتت ماحجيت..ضل يعاينلي وعيونه احسهه دتذبل وجفونه تثگل رمشتهه.. باس ايدي وگام ع الجنطة طلع بلوز خفيف .. نزع القميص ولبسه..جانن اكو مصلايات ثنين.. عاينلهن واجه كعد جدامي ركبة ونص خاطر يصير بمستوى عيوني.. انه اريد افلت ومااخلي يعاين بعيوني.. اريد يضمني بحضنه ولا يتفرج علي هيج..
رائد : حبيبي كومي توضي وتعاي نصلي.. حاولي لخاطري .. انه وياج وبس تحسين....
شهگت وخليت ايدي على حلگه : كافي عفية لاتحاجيني هيج.. هو انه متوترة..
ابتسم وخله ايده فوك ايدي..باسهه وكام ..گومني وياه..
دنوة : ااا... اي هسه بس اتوضى..
رائد : يله گلبي..خلي نيتج صافية وادري بيهه هيج.. خلاكمل الباقي من حياتي يمج..

حركت راسي بالموافقة ورحت توضيت.. لبست الشال واجيت فرشت السجادة.. بيناتنا مسافة قليلة..
كبر بخشوع وصوت تملي نبرة الرجولة.. صلينا ركعتين.. حسيت روحي هديت شوي..كمت وشلتهه وياي.. خليتهه ع الكومدي وعيوني تتفرج ع الغرفة..البردة نيلية والفراش ابيض ناصع..هدومنا بالجنط على صفحة.. اجه ببالي موقف إن هدومنا حتصير بكنتور واحد..عطره يغلب على عطري.. وحضوره يزيدني شخصية ومقام جدام أي شخص اوكف جدامه.. فزيت من افكاري على ايده حاوطت خصري.. جمدت بمكاني..خاصة من شواربه لامست خدي..كزبر جلدي.. وخرت ايده بهدوء..وحاچيه بدون ما اندار : انطيني مجال..
ابتعد وكعد ع الچرباية..جر باكيت الجگاير..ورث جگارة وزفر الدخان بهدوء : كل المجال الج عمري..

رحت ع الميزتواليت نزعت الشال وفكيت شعري.. نزل بشكل ويڤي بي كسرة..نزعت السترة الفرو ورحت اخذت الجنطة للغرفة اللخ البيهه حمام..فتحتهه وصفنت.. شلبس.. استحي شلون حطلع جدامه هيج..اووف ياربي صعبة..بس بنفس الوكت مااريد احرمه من هلشعور..واحنا ماضل شي مامرينا بي..هو تعب وياي هواي خاصة من تمرضت.. صحيح راغبته ورايدته بس احس عقيل بعده ديلمسني ومتملك جسمي.. اخذت سيت ابيض مفضوح حيل بس فوكاهه روب لحد ركباتي.. تصميمه حلو واكو تفاصيل بالحافات.. والحزام يجنن.. اخذته ورحت سبحت بس جسمي كله يرجف وخايفة ومتوترة.. معقولة حصير بين إدي..مااصدك..ياربي صدك لو چذب.. جريت نفسي وسديت المي.. نشفت ولبسته .. جنت ماخذة كحلة وحمرة لونهه وردي بس هادئ ويناسب بشرتي.. خليت وشسورت شعري.. سرحته.. لبست الروب وشديته شدة خفيفة .. كعد تفصال على خصري ووركي..

عاينت لنفسي بالمراية.. اووف..انزول علي شلون حطلع جدامه هيج.. يله شوف شلون ياربي..طلعت على كيفي وانزل بأطراف الروب..احس روحي عريانة ولا چن لابسة وشعري مغطي چتافي وظهري.. طبيت للغرفة لكيته داير وجهه وباقي بس بالفانيلة والبنطرون..حمحمت اريد يندار..اندارلي وبحلگه الجگارة .. صغر عيونه ورجع طبيعي..
رائد : هههههه..حلم علم يولي..
دنوة : شنو مو عاجبك..
اندلر ع النفاضة..طفى الجگارة واجه يمي..هو يمشي خطوة وانه ارجع..لحدما انطبگت ع الكنتور..كمش خصلة من شعري قربهه منه يشم بيهه..غمض عيونه واحس بشهگاته لمن يجر نفس..

تقرب مني اكثر ..حسيته تاه..مد ايده ع الحزام.. بلحظة او أقل فتح الحزام وطاح الروب مني..ضليت بس بالثوب الجوه.. ادور كلش فاضح واستحي..كمشت ايده..فتح عيونه بذبل..
رائد : شنو حبيبي..
دنوة : مو گتلك بعدني مامتعودة..
رائد : ادري غريبة عليج.. بس حاولي..
سكتت ماانطيته ردة فعل..بس مستحاي يزيد وي كل كلمة يگولهه..
تقرب من إذني وبهمس گوة ينسمع : سلميني گلبج وروحج گبل جسمج..والعلي اسوي..
انه من حرارة انفاسه لساني ثگل.. عاين بعيوني .. جنت اريد اگله موافقة بس ماكدرت احجي..جسمي وكلشي بيه إنشل.. هو فهمني من نظراتي..

مد ايده نزع الحزام وطبگه..شهگت وكمشت ايده : عزززه حتكتلني..شبيك عفية..
رائد : هههههههه..هنيالي اي والله..لا ابوية..دااريد انزعه شنو ابقى لابسه..ضايقني..
زفرت انفاسي براحة..شمره ع الكومدي ومد ايده طفى الضوة.. ايده تسللت لفتحة الثوب بظهري.. جسمي ذبل من حركته.. قربني علي واخذني بهدوء ع الچرباية..
خلاني بحضنه ويهمس بإذاني .. : احبج..ومامصدك كامشج بالحلال.. دناوي..
دنوة : اا..ها ..
رائد : لاتخجلين..مااشوفج..احجي اليعجبج..
دنوة : ماعندي شي اگوله..

سكتنا ثنيناتنا.. تجرأ ولمساته مشت على زنودي ورگبتي.. شفايفي وفخاذي..شعور خوف ورهبة..أمان وغربة..مااعرف اكثر من شعور..مااكدر احدد واحد منهم..هو هادئ ورومنسي بكل حركة ولمسة يلمسنياهه..وكل شوي يهمسلي اذا يبتعد لو لا.. ضليت بدوامة مابيهه بس انه وهو ومشاعرنا وشوقنا ولهفته هو الطاغية على كل ذرة احساس بداخلي.. ماحرمته من شي لو انه بمكانه جان تمنيته بنفس لهفته وشعوره.. هو صابر علي.. صابر على خرمشتي لظهره وصدره..الى أن انتهى كلشي بس صوت انفاسنا..باسني من راسي وخدي..
رائد : احبج شكثر..
ابتسمت وحضنته : انه هماتين.. اسفة..
رائد : على شنو بوية..
دنوة : خرمشتك..

ضحك بهدوء : مااريد اشوف ظهري شلونه هسه..
سكتت بس استحيت منه..ضلينا كاعدين وهو مخلي راسي على صدره ويمسد بشعري..مااعرف شكد ضلينا كاعدين.. اخر شي باسني وگام لبس..
كمشت ايده : وين حتروح..
رائد : اجيب اكل..مشتهية شي..
دنوة : لا حبيبي..
رائد : اويلي يربج..يله بس اطلع كومي سبحي وبدلي.. اخذي راحتج..
دنوة : ماشي..

راح سبح واجه يلبس..لبس بنطرون غيره وبلوز وقمصلة .. رجع شعره ليوره واخذ الفلوس والسويچ ونزل..بس راح كمت سبحت وبدلت..غيرت الفرشة جان اكو وحدة لخ بالكنتور.. فرشتهه وكعدت انتظره.. فتحت التلفزيون اتفرج واگلب بتلفونه.. العب هاي لعبة الحية..وراهه بساعة هيج اجه جايب اكل.. خلاه بالگع ..كعدت يمه اكلنا..

وراهه كام شال الاكل وغسل واجه..انه فتحت البرده واتفرج من الشباج الغرفة الكعدنه بيهه جانت ع النهر واضوية بره.. شوي واجة هو..مد ايدة فتح الشباج رفعت راسي عاينتلة.. ليش فتحتة
رائد : دتشوفين عدل غير..

ابتسمت واجه حضني..شوي ووكف بسدي يدخن..ثنين خلص الثالثة وذبهه..سديت الشباج والبردة وانداريت علي.. رفعت نفسي شوي وهو دنجلي حاوطته من رگبته..شالني ورحنه ع الجرباية..باسني بخدي وشفتي..
رائد : احسه حلم..
خليت ايدي على وجناتة واحركهه ع كيفي : لا حقيقة.. حضني وخله راسي على صدره..
رائد : من البارحه كاعد مانمت..گلبي ماخلاني انام اكول يعني صدك..هاي الجنت اكول وين حشوفهه وانه كل ما تصيرلي فرصة اروح للديرة حتى ما المح طيفهه..شلون حشوفهه واخليهه تحبني مثل ما احبهه..

والله الف حساب محسب لهليوم..اكبر منج بهواي واخاف عليج مني..بس مشت الحمدلله..
عاينت بعيونه وابتسمت : شكد حنين انت..
عيونه ذبلت والبسمة على طرف شفايفه : انتي الترفة والله.. دورات الواحد من لهفته لشي مايحس شديسوي.. جنتي بين إديه ومادنت نفسي عليج..اشوفج واسبحج بيدي..بس البداخلي عليج خوف وقلق مو غيرهن..
دنوة : حبيبي..
رائد : عيوني الج..گولي..
دنوة : احبك..
رائد : اويلي الله..غير اموت عليج انه..

ضلينا گاعدين الى أن نام هو وانه ضليت اعاينله واتأمل بملامحة حتى هو ونايم يبين علي عصبي وخشمة فوك وميتحاجة بس صدك گلبة طيب..ابتسمت ونمت..ثاني يوم نفس الحالة بالليل كال باجر نرجع فحضرت الجنط بالليل ونمنه من وكت علمود الطريق..كعد الفجر وكعدني وياه..بدلت وهو هم..اخذ الجنط ونزلنه..انطى الرجال المفاتيح وطلعنه للبصرة..اسعد يومين بحياتي..كلشي حلو سمعتة..بعد طريق سبع ساعات وصلنا للبصرة..اكيد وكفنة بمكان اكلنا بعدين كمل الطريق..اول ما دخلت للبيت عبالك اول مره اشوفهم..ما اتذكر منو هذا ومنو هاي..كعدنا بالصالة والكل اجة يسلم ويحاجي..اخلاص الوحيدة جنت اتذكر حجيهه بالاحرف.. ديحجون جان يجيبون طاري مرة رائد..انفتح الموضوع..

ام رائد : مناوي تحجيلنا سالفة مرة خالد..
رائد : تدرين خالد صاحبي استشهد وره ابوي بشهر..مرته مسيحية مصلاويه وهو مسلم بصراوي..اهله واهلهه من تزوجهه تبرو منهه كلولهه لا توصلينه ولا نوصلج..حتى خواتهه متزوجات مسيح وكلش متحفظين بدينهم ميقبلون ينطون لغير دين وهو اهلة كلوله اخذهه واطلع منريد نشوفهه..اذا صار عدهه طفل منعترف بي جي امه مصلاوية..وهي هم ماقصرت بالمشاكل وكل يوم عركة اخذهه وطلع أجر بيت..كبل خمس شهور صار انفجار جدام المقر اليشتغل بي..هو وطالع وي الضباط الباقين طكت عليهم واستشهدوا..بقت مرته وحدهه..تدرين بي شلون صديقي واخوي حاله حال محمد..حتى من انقل شغلي من البصرة للعمارة رحت بتت عنده وماطلع منه كصور.. وغيرهه وغيرهه هاي قطرة ندى بشط..

فشلون اعوف مرتة وهي عدهه ابن وبعدهه شابه متكدر تشتغل..تعرفين وضع العراق شلونه الولد ماسالم ادور المره شلون..ضليت اتردد عليهه كل فتره اجيب اكل ومسواك وشغلات للطفل..فديوم اجيت جايب شغلات الهم اجاني طفل كلي عمو المرة طالعه هي وابنهه..تعجبت لأن هي متطلع محد يريدهه..بعدين كلي الناس كامو يكولون انت صاحبهه يعني انه شحجي بعد..گتله كللهم هاي مرته وبس وراهه بيومين رجعت لكيتهه تبجي..شبيج يابة ما شبيج بالاخير حجت..كالت مالي احد والناس دتحجي علي..جانت ببيت اهلي ابوهه متوفي وامهه رايحة يم اخوهه..واخوهه ماقابل يفوتهه للبيت وراجعة..بس خسرت وكت الطريق..كتلهه اعقد عليج بس الشهادة لله لا جاي يمج ولا شي ولا الي حك يمج من الباب انطيج الغراض واروح لأن خالد ماقصر وياي بيوم واجة دوري اردلة الجميل..

بالبداية عارضت كتلهه انه لمصلحتج وماعندي شي وياج وراهه قبلت..عقدت عليهه..بيوم العقد جنت اخابر واجت اخلاص سمعتني داحجي بموضوعهه..حجيتلهه ونبهتهه اكثر من مره متطلع السالفة بره الغرفة..الحمدلله ماقصرت هي وحجت بنص البيت..والله وروح ابوي لو عندي شي وياهه جان محد درى بسالفتهه لحدما اموت..بس ادري بروحي السويته صح وماعندي شي وياهه ولا حيصير..انه احب دنوة لو اشوف مدري منو ولا اعاين عليهه..تعبت يالله حصلتهه ادور اروح اتزوج عليهه لو احب..لا يابة لا شنو زعطوط قابل

حاوطني من جتفي وابتسم..كعد يحجي وياهم..كلهم سكتوا من حجالهم السالفة..انه هم سكتت..ماكدر احجي بس ما انكر غرت وضجت..بس مادام مصاير شي بيناتهم ولا حيصير ورائد من يحجي كلمة يسويهه ميخلف بيهه لأي سبب فاطمنت.. بقينه كاعدين جوة..اخلاص تعاينلي بنظرات تريد تحجي بس رائد كاعد متكدر تكول شي..الي بالبيت خاله وخالته هي وبناتهه ثنين وابنهه هو ومرته وبنته صغيرة معرفت ليش جايين كلهم هنا..كلت بعدين اسألة..البنات الثنين مامستلطفيني..حتى ماحجو شي وياي.. يشوفوه شلون يحاجيني كلة عيني واغاتي وحدتهن تكوم تتأفأف..اخلاص راحت وي البنات للمطبخ..بقينة بس احنه..
وائل خال رائد : شوكت يبلش دوامك..
رائد : بعد مو هسة..فد يومين..

شنو يومين..ششفت منة..عفتهم يحجون وصعدت فوك.. مغير الغرفة مو مثل الاجيت بيهه اول مره..والفرشة تخبل كلشي مرتب واخر موديل..حتى الزولية مغيرهه..ابتسمت ونزعت الشال حطيته ع الكومدي..شوي ودخل هو..حضني من ظهري وباسني من رگبتي..حاجاني هو ويهمس..
رائد : شلونهه حلوة..
ابتسمت : اي تخبل..
رائد : اريد اجربهه..
صفنت علي شلون يحجي بجرأة.. غمزلي وراح قفل الباب وطفى الضوة.. بقينا ع الضوة اليجي من البردة.. مد ايده يفتح الضفيرة ومقرب راسه من رگبتي يشم بيهه واحسه ضايع.. دخل إيده بشعري من وره ووي كل حركة يتقرب من رگبتي اكثر..

كمشت ايده وايدي احسهه ترجف بين إدي..
همس : لاتخافين مااجبرج.. بس تحسين ماتكدرين گليلي..
بهللحظة جنت مااكدر ومتوترة مااعرف ليش..بس مامنعته.. انطيته الموافقة بصوتي الذبل من كمشته.. سحبني لحضنه هو ويلعب بشعري وانه منتشية بعطره الحسيته يمشي وي أنفاسي.. اخذ شفايفي بين شفايفه بلهفة تغلب الحب..سلمته كلشي وصار هو رائدي والمتحكم بيه بلحظات لو وي غيره مااحس بربع الحسيته وياه.....

انداريت علي شفت رگبتة بيهه اثر..اا..رائد
رائد : شنو حبيبي..
قربت اصبعي للاثر بركبتة : هذا الاثر شلون..ضحك وحاجاني هو ويمسد بشعري..
رائد : طلعتي وكحة..
دنوة : لا لا انه مو هيج..بس
رائد : بس شنو..وغمز..
درت وجهي : مادري..هذا شلون يحاجيني هج..شنو وكحة والله عود صدك..كام يضحك..حضني وباسني..
رائد : يولي نشاقة شنو حرام..يله سكتنا يابة سكتنا مبين حتموتيني بزعلاتج..
عدلت نومتي : لا ماسوي شي..صدك حتلتحق بعد يومين
رائد : اي والله..من يوم الاجيت لبيتكم الصبح انه بالبيت صار فوك العشر ايام ميصير بعد طلابة..بس نزلت يومين جان الوضع طارئ ورجعت..
دنوة : زين شكد وترجع..
رائد : ما اطول بنيتي..هسة تشبعين مني..

صفنت على شعرة..صدك بي شيب..شعره اسود فاحم بحيث الشيب مبين وبارز كلش..بس لايكله..بسته من خده وكمت طلعت البرنص لبستة ورحت للحمام اسبح..من طلعت صادفتني اخلاص..هو ووحدة من البنات..زينب..
اخلاص : زين طلعتي من الغرفة..عبالنه نمتو..تره تغدينه
دنوة : اي عافية..غمتني وراحت..هاي شبيهه كبر..عفتهه ورحت للغرفة..فتحت شعري ونشفت بالخاولي اول بعدين بالشسوار.. لگيته متمدد ويعاينلي ويبتسم..شنو متسبح
رائد : من اكعد..تعبان من الطريق..
دنوة : حنزل يمهم بعد..
رائد : وين وين..تعاي نامي هنا..ماعرف انام بدونج.. لتبدلين خليج هشكل..
ابتسمت ورحت يمه..حضني ونمنا ثنيناتنا..كعدت بالليل مالكيته كمت بدلت ولميت شعري..خليت شال ونزلت

رحت يم خالتي بالمطبخ..جانو كلهم كاعدين البنات بس ماعرفهم فماحجيت شي بس وي خالتي..
الحجية : شو مشفناكم كبل صعدتو فوك..
دنوة : غير الطريق شكد يضوج..داحجي وياهه واخلاص صاحت من مكانهه..
اخلاص : اي شكو عليهه..نايمة ورجليهه بالشمس..حتى ماعون متشيل..منا وغاد كلة انتي تسوين الغده..
الحجية : ها خير سالمين..شنو عمتهه انتي شو تتأمرين عليهه يمة بكيفهه..بعدهه عروس شنو خوما تشتغل..
اخلاص : ايييي وزت براس اخوي خاطر يتزوجهه ومسوي نفسه يحبهه..يجوز هي مسويتله سحر والله ماراد يصيرله شي فرجعلهه..الله اعلم..جا اكو واحد يخطب ويزوج وابوه حتى سنته مطالعة..وين صايره هاي وييين..
كامت تبجي والبنات يهدون بيهه..انه ضليت صافنة عليهه هاي شبيهه..حتى معرفت اجاوب..اكلتني وشربتني منطتني مجال احجي.. ليش حتى اسويله سحر شمسويلي هو

الحجية : شبيج بابا..شمسويتلج البنية هيج انهديتي بيهه
اخلاص : اي يمة من حركة گلبي..ترضيهه انتي..هاا ترضيهه يعني هج العالم تحجي علينه..
الحجية : يمه منو حاجي علينه متكليلي..اشو كلهه تحجي بأخوج بالزين..انتي تعرفين شي وانه اعرف شي..
اخلاص : شتعرفين يعني..احجي خلينه نفتهم..
دتحجي جان يطب رائد ..شافهه دتبجي والحجية واكفة وتحاجيهه تريد تهديهه..هي بس شافته زادت بالبجي وتأشر علي تكلة ترضاهه دنوة تمد ايدهه علي بس جي كتلهه شو متسوين عشه..يمه شهلتهايم هاي..شهكت وخليت ايدي ع حلكي من الصدمة..جذابه والله مسويت شي..

رائد : هااا بلشنا يالله..شبيكم بله..
الحجية : يمه اختك اخلاص هي تعيل بدنوة والبنيه لا يمهه ولا عليهه..ادور كامت تخبط مواضيع..
اخلاص كامت من مكانهه وتأشر علي وتحجي بعصبية : هاي الادبسز هي خلتك تزوج وابوك بعده مطالعة سنته.. شلون ترضاهه متكلي..هي سوتلك سحر خلتك متندل دربك..
دنوة : معرف شجاوب بعد..سكتت..تحجي تحجي متسكت ادور حتى بنات خالتهه وكفن وياهه..كمت ابجي بدون صوت .. ليش هشكل وياي..شمسوية..
رائد : شدتحجين انتي..شنو سحر بابا..ليش اكو افقر من دنوة..انه احبهه وماردت تروح لغيري وخطبتهه وتزوجتهه وخلص بعد شنو..حتى عرس مال اوادم مسويتلهه بس لخاطر ابوي الله يرحمه وهي قبلت..انتي لو بمكانهه تقبلين ..

حتى الحب حرام هسة..عوفيهه لتتعرضيلهه .. جم مره كتلج.. لو هي غلطانة اكول اي..بس ادري متحجي شي..بعدين هي عروس شتريدين تسوي..تكنس وتطبخ..عود لاحكه ع السوالف هاي تره اربع بنات انتو..لو تريدين تذبيهه براس المسكينة جي متحجي..اندار شافني دابجي..كام يحجي بنتر..
رائد : ليش تبچوهاااا..شمسويتلكم..
اجه دنج يمي ومسح دموعي..شاورني : لتهتمين بنيتي انتي .. انه وياج جدام الكل.. كام واندار عليهم..
رائد : بالعناد مراح تكمش كلشي..خلي الشغل عليكم هي بكيفهه شوكت متريد تشتغل خلتشتغل..ميعجبهه لتجبروهه عوفوهه براحتهه..
زينب : ليش شنو هي قابل..حالهه حالنه..
رائد : المره مرتي والبيت بيتي..عندج شي بعد..

سكتو كلهم..كلي امشي وياي لتبقين هنا..رحت وياه للصالة هو مكعدني بسدة ويحجي وياهم..بعدين كامو يجيبون العشه ردت اكوم وياهم..كمش ايدي كلي كعدي لتكومين.. كعدنه ناكل هو ياكل وينطيني..انتبهو علي..
خالته : شبيهه هي متاكل..جانت مريضة اي بيهه مجال بس هسة زينه .. شنو تدلل عليك قابل طفلة..
رائد : تدلل براحتهه..انه قابل خالة..
دنوة : خاله وخالته ميحاجوني ابد..مدري مستنكفين مني جي جنت مريضة..خلصنه اكل..كمت اشيلة وياهم..رجعت اشيل السفرة خزرني وشاورني..
رائد : عدلي لبسج وكافي لدنجين..تعاي كعدي..
عاين لنفسي..الشال جان صاعد والمنطقة جوه الرگبة مبينه كمت وعدلت الشال..كعدت يمة حتى السفرة مشلتهه ..

اجت مرة علي ابن خالته..واكفة بالباب وشايله بتهه
مرام : ماشلتي السفرة لو تنتظرين احد يشيلهه..
رائد : انه كتلهه كعدي..صيحي وحده من البنات تجي تشيلهه قابل شنو هي .. فد معضلة عود..
دنجت وهمست : رائد ميصير هيج تحاجيهه جدام رجلهه وخالك والكل كاعد..
رائد : الباب يوسع جمل..معاجبهم .. يطلعون..
عود ليش يحجي هج..اكيد اكو شي..شوي واجت خالته جايبه صحن بي فواكه..اخذ برتقالة كشرهه وانطانياهه.. ديحسسني بنتة هلكد ما يهتم ويراقب تصرفاتي وحده وحده..اجت اخلاص كعدت يمة وشاورتي مدري شنو..كللهه من باجر الصبح انطيج .. انتعشت هي..

ضلو يحجون ع الوضع وذكريات عرفت خالتة هي وبناتهه وابنهه اجو هنا لأن علي جان بحزب البعث وتهدد فاجوا.. وخاله مبين ماعنده علاقة بخوانه وخواته الباقين من عدا هي خالة وام علي..
الحجية : عود صدك تريد تلتحق عكبة..
رائد : اي يمة طلابه شنو..
الحجية : بس انت عريس..دصبرلك جم يوم .. شوف مرتك عيش وياهه..مطاير الشغل..
رائد : والله مرتين خابرني العقيد يريد يتعارك بس ما انطي مجال .. يكلي شوكت ناوي تشرفنا..كتله عندي ظروف وماخذ اجازة يكلي لا وين..مو يمي اخذت..اجه جديد ويتأمر براسنا بهذل الضباط متدرين شيريد .. بس ماخلي يحجي حجاية زايده علي..تدرين خلكي شكد طويل واطول بال ميكدر يعاديني ..عايفه على راحتة..

وائل : والله الوضع مو امان..
رائد : متعود صار سنين..فتره وتصفى..
ام علي : خالة خوما علي عليه شي..خاف يعرفون منك
رائد : لا شيعرفون الا انه انطيهم..ماسويهه طبعا شعندي وياه قابل .. ثار..
هذا علي مو حيل جبير..شبسرعه صار وي الحزب بس رائد ليش هشكل ميطيقه .. بنفس الوكت مافرط بي..مادري يمكن شي قديم بيناتهم..وره شويه نعست همستله حصعد فوك.. بقو هم جوه ..شعجب يسهرون.. هنا الاضوية مشغليهه وجايبين تحلا وكاعدين يحجون..طبيت للغرفة طفيت الاضويه وتمددت..ضليت اتكلب بعدين بديت اغفى..حسيت علي فتح الباب وقفلهه من دخل..

نزع التشيرت واجه يمي ع الفراش حضني وايده لافهه على خصري.. رائد..
بهمس : ها حبيبي..
دنوة : تذكر من خليتلي الرسالة جوه المخدة..
رائد : اويلي.. هههههه.. شلون انسى..
اكول يولي شو ماكو لا احبك لا شي..بس انه الكريم
ضحكت وحاوطته من ركبته : احبك شعندي غيرك..
رائد : اي هسة انام مرتاح.. ابتسمت وبسته من خده ونمنا ثاني يوم العصر اجت سرور ونوارة وخالة ابتسام..بس مابقو هواي..خالة خلت بيدي فلوس مقبلت .. ادور جدام رائد عاينلي بنظرات عرفت شيقصد فاخذتهن وكعدت وياهم..نوارة تكلي اي هسة مبين عليج متزوجة وفرحانه مو مثل كبل..حتى سرور.. الحمدلله الصبر ماراح بلاش..

شكد صبرت وانضربت وانهانيت .. من الكل.. حتى من ابوي..بس هسة هو معوضني كلشي محلو عشته باهتمامه وحبه واحساسه..بس واحد بالبيت يحاجيني يجي يسكته ويخليني يمة..يهتملي كبل لا يهتم لنفسة.. بالعشه تجنبت الحجي ورحت اجيب الاكل وي البنات..ماريد اخلي اخلاص تلكاهه حجة خاطر تحجي علي لو تحاول تفشلني كعدنه كلنه ع السفرة..
الحجية : خالة جيبي الملح ع الكاونتر فوك..
كمت اجيبة..سمعت الباب تندك..رجعت للصالة رائد جان بره هو وخالة..فاتت بنية شابة وياهه طفل..فاتو جوه وهي جانت تبجي وعيونهه حمر..ملابسة شال مفرعة..كلنا ضلينا متفاجئين منو هاي انه منهم..دقايق وحجت الحجية..
الحجية : منو هاي..
رائد : مرة المرحوم..

شال الطفل خلاه بحضنه وهو كاعد يمهه..
الحجية : وشعدهه جاية..مو كلت متجي..
رائد : البيت محترك وجايين .. زين ملحكين عليهه هي وابنهه وين تروح يعني..
ام علي : وين حتكعد..
رائد : كحط..هنا جوه .. بسد غرفة امي بس ترتبهه..
كام والطفل بيده كللهه كومي..راحت وياه للغرفة الكال عليهه .. انه ماعرف شصارلي..جسمي صار نار..ضجت وغرت.. شلون شايل الطفل وهي يمه..اكيد حتخلي يتقربلهه اذا هي حتصير ويانه بعد..شويه واجة هو والطفل بعده بيدة..
رائد : شبيكم صافنين..مو حجيت وكلت عاقد عليهه.. هاهية ماكو شي..عوفوهه وهي هم متأذيكم..
كعد والكل سكت بعد..الطفل يريد يمد ايدة ع الاكل بس متوصل .. يكله بابا ويأشر ع الماعون..

ليش يكله بابا.. عفتهم وصعدت فوك..كمت ابجي ..ماكدر مو بيدي.. يعني صدك صارت هنا ويانه هي وابنهه..وهذا ليش يكله بابا.. ادور هو رائد شكد متعلق بي ويبوس بي..شايله بگلبه مو بيده مسحت دموعي وكمت اريد اطلع جان يدخل هو..سد الباب وانتجه علي رفع حاجبة وحاجاني..
رائد : ليش باچية..
دنوة : مابيه شي..اجه تقرب مني وحضني..مابادلته بشي .. رفع راسي بايده..
رائد : والله ماكو غيرج بهلگلب..حتى لو هي ويانه بس صدكي ما اعاينلهه..ماعدهه احد وين تروح خطيه..
دنوة : والطفل..ليش يكلك بابا..
رائد : متعود..چي دائما اجي واجيبلة شغلات يلعب بيهه .. ادري بيج تفتهمين وعاقلة..فاريدج تعوفيهه ولا تجين يمهه.. كد كلمتي وداعت عيونج الاحبهن..

ابتسمت..شويه ارتاحيت..دنج باسني من خدي..
رائد : يله تعاي اكلي..ادري ما اكلتي..
نزلنه جوه..تعشيت وياهم بعدين البنات شالو الاكل وانه غسلت المواعين..شويه واجت مرته ..
- : بس وين المي..
أشرلتهه على مكانه..بعدين سألتهه شسمج..
- : جلنار..
يعني صدك مسيحية..مسامعة بهج اسم..اخذت مي وراحت كملت المواعين..طفيت الضوه ورحت فوك..تعبانه اليوم كاعده من الصبح ومنمت الظهر..ادور اجو بيت عمي بعد التهيت .. رحت ع الكنتور لبست ثوب نوم ستن فوك الركبه فوكاه روب بي حزام مثل لونه كعدت ع الطبلة مالت الميزتواليت خليت كحلة وحمره بس..كمت ادور بالمجرات ع الريمونت شواي ودخل..ردت اكوم..
رائد : خليج خليج..

قفل الباب واجه حضني ويبوس برگبتي وخدي ..طفى الضوه ورحنا ع الفراش..هو بكل يوم يزيد حنية واحساس يعيشني بغير دنيا..هو مغمض عيونه وحاضني .. رائد..
رائد : كولي حبيبي..
دنوة : حتروح باجر..
رائد : اي..يولي وين حروح قابل..ما اطول وداعتج.. تعاي نامي لتفكرين كافي..
حضنتة ونمت..كعدت الصبح لكيتة ديربط الحذاء مالته ومدنج كمل ورفع راسة شافني كاعدة..اجه يمي هو ومبتسم .. دنج باسني من خدي..حاوطتة من ركبته وبسته بخده.. حشتاقلك
رائد : بعد عيوني هلعيون..
ابتسمت ووخرت ايدي..كمت لبست الروب ردت انزل وياه..
رائد : وين وين..يشوفج علي هج..لا يابة..كملي وتعاي .. بعد نص ساعه اروح مو هسة..
دنوة : هاي ليش فشلتني عود..خوب تكيف انت..
رائد : هههههه..يولي وين مفشلج..فوك ما انبهج..

دنوة : اي زين..عفته ورحت طلعت ملابس ورحت للحمام سبحت وبدلت ورجعت للغرفة..نشفت شعري ونزلت جوة.. جان كاعد بالصالة..هاي بيش الساعة.. بـ١٢ يايابة..شنو هاي فدنوب صايرة اكعد متأخرة..متريكين ومكملين وحيبلشون بالغده حتى..عو جان كاعد جان يجي هذا الطفل يمشي خطوة ويعثر باللخ..راح على رائد يطبطب بايده على رجلة شاله وحضنه ويدغدغ بي هو خربان ضحك .. رائد مبتسم ويضحك ع ضحكته..هو وديحجي جان تجي جلنار..
جلنار : هاي انت هنا واني عبالي طلعت..تعال ماما وفتحتله ايدهه حتى يجيهه..
كام وراح عليهه..انطاهه فلوس ومدري شحجة وياهه اندار على اخلاص هم انطاهه فلوس..كللهه انتي وامي مو تكول ماخلالي..تذكرت البارحة من اجت حاجته .. يعني جانت تريد فلوس..

مهتميت..كمت اروح للمطبخ اكل شي صاحني..رحت يمه
رائد : تحتاجين شي..
ابتسمت : سلامتك..باسني من خدي واخذ الجنطة وراح .. ماكال شكد حيبقى بس ميطول..سديت الباب وطبيت .. رحت للمطبخ.. ديسوون الغده..اخلاص عاينتلي وحجت..
اخلاص : انه مشايفه وحدة عروس يجيبون ضرتهه هي وابنهه يمهه ورجلهه يعوفهه ويروح يلتحق..
زينب : اي والله صدك..خطية..
اخلاص : وليش خطية اسم الله..متكولين اخوي خطيه تكربص بهاي ام السحورة..
سكتت مجاوبتهه..رحت ع الثلاجة اخذت ماعون جبن وكعدت اكل..هي دتسوي بحشوة البرياني وتعاينلي..
اخلاص : حتى مالهه عين تجاوب..جانت تتباجى چي رائد موجود..هسة منو يفزعلج..دتحجي جان يجي طه للمطبخ ويضحك .. شكد حلو ودبدوب..

اجة ع الماعون يريد ياخذه ادور يطيح وينكسر..شلته وكعدته بحضني..وكلتة وياي..شويه وكام ميريد بعد..فاتت مرة علي..
مرام : كاعدة تلعبين ابن ضرتج وعايفة البنات يشتغلن .. مدي ايدج شويه شنو ماكو احساس..
دنوة : ميخالف هسه اكوم وياهم..شلت طه واخذت الماعون حطيته بالثلاجة ورحت للغرفة الكعدت بيهه امه..دكيت الباب وطبيت..لكيتهه دترتب ملابسهه بالكنتور..اندارت شافتني بيدي طه..ابتسمت واجت علي..
جلنار : هذا ميكعد بالكاع..حيتعبني..
دنوة : قابل منو اكو..عادي خلي..بسته ورحت وي البنات للمطبخ .. بزلت التمن وحمست بصل وبهارات للتشريب .. هم يحجون براسي..يحاولون يغثوني بس مغلسة اسوي روحي ما اسمع..كملت الغده ورحت فرشت السفرة..بعد ماكدر..

كعدت ع الكرسي بالمطبخ..ظهري كام يأذيني..بسبب الطيحة ببيت جدي.. صار فترة ممشتغله واليوم اشتغلت رجعلي الوجع.. احسة يشلني..اخلاص شافتني كاعدة وايدي على ظهري..كامت تصيح من مكانهه..
اخلاص : هااا بلشنه بالحجج المتخلص..يله حبوبه كومي ودي الاكل بالصالة..مابيج شي مابيج..
جاوبتهه والدموع بعيوني من الوجع : والله يوجعني ماكدر ادنج كملت كلشي بس تودين الاكل..عافتني وراحت تاخذ الاكل .. انه احس توني طايحة ع ظهري من الوجع..بين ما خلصوا انه اخذت اكل من الجدر وكعدت ع الميز..ماكدر اكعد بالكع .. اكلت وكمت اريد اصعد فوك جان تجي مرام...
مرام : وين صاعدة عيني..هاج كمشي..خلي طيبة يمج
اخذتهه منهه وكعدنه بالصالة وياهم دياكلون وانه مخليتهه بحضني ..كوه متحملة الوجع ادور اشيل طفل..

ام علي : ما اجيتي تاكلين ويانه..لو نكرص..
اخلاص : والله شكد صحتهه بس متقبل..تكول ماحب الكعده وياكم .. بعد انه شنو اتوسل بيهه قابل..
شهكت ومن حركة گلبي كتلهه وين كلت هشكل انه..ظهري ديوجعني وماكدر اكعد بالكع..
زينب : لو صدك يوجعج مجان شلتي طيبة..
دنوة : هي امهه خلتهه يمي..شنو اذبهه يعني..
وائل : يله كافي مناكر مال فكر..
الحجية ساكته محجت شي..ليش من رائد هنا ادافعلي وتسكتهه لاخلاص ولزينب وغيرهن..غلست عليهم.. ضليت كاعده وهم ياكلون..كملو وكلمن راح يغسل بعدين راحو لغرفهم ضلت الصالة فارغه محد شال الاكل..شنو ينتظروني اشيلة وانه ظهري مكسر احسه..اجت مرام اخذت بتهه وراحت .. شويه واجت ام علي..

ام علي : كومي شيلي الاكل وغسلي المواعين..
كمت اشيلة وكل ما ادنج ظهري يزيد وجع..جنت مدنجة ودالم السفرة انداريت..جان علي واكف يم الباب وصافن علي .. هذا شبي..توترت بس حاولت ما ابين..اجة هو شال السفرة ..
دنوة : لا ميحتاج..كملت..ضل يعاينلي من فوك ليجوه ويبتسم صدك لعبت روحي..شسالفة..
علي : لا عادي..مو مريضة انتي..
هي مرتك مارحمت بحالي جاي انت.. كلت بگلبي .. عفته ورحت للمطبخ اغسل مواعين بس احسة واكف بباب المطبخ.. حاولت الهي روحي بس المهم ما اندار وحسبالة اريد احصل نظره منه..كملت وغسلت وجهي ..انداريت مالكيته.. همزين .. طفيت الضوه وصعدت فوك..تمددت ونمت..كعدت العصر لكيت البيت هوسة ..صوت جوه..مدري منو هنا..

نزلت بدون شال نسيتة .. جانو مجتمعين بالصالة التصير ع المنور مالت الدرج كعدت يمهم..محمد جاي..سلمت علي وهو هم وباركلي
محمد : رائد وين ..
الحجية : متدري باخوك ميكعد بالكع..نزل للواجب..
محمد : يابة بعده عريس مو هيج عاد..
الحجية : كتله..يكول هي مفتهمتني..بعد ماعندي عذر..
محمد : اي وين يلكى مثلهه عمي..حلوه وحبابه ..
ابتسمت ع حجية ..ما كالهه بقصد يعني عادي..بس هذا خالة مدري شلون يعاينلي هو وعلي..كمت للمطبخ اشرب مي جانت مرام كاعدة دتوكل انفال..
مرام : شعندج نازله مفرعه..شنو ماكو زلم بالبيت لو انتي هج متربية .. والله يالله..لو رائد يدري يموتج..
دنوة : شدعوة شيموتني..مو غربه هم..ونسيت البس هي ع الشال هذا سويتيني هيج..

شو هاي تخبلت من كتلهه هشكل اجت علي جرتني من شعري قوي..
مرام : تريدين تغرين رجلي..امشي ولي فوك يله ولتنزلين بهذا المنظر .. لا من يجي رائد احجيله..
كمشت ايدهه اريد اوخرهه شعري راح بيدهه .. لج انه يمج شبيج وياي يمعودة..مادري والله مادري نزلت بالعجل بدون ما انتبه والله..وخرت ايدهه وشمرتني ع الباب .. صرت بحضن خاله واكف بالباب..وخرت بالعجل..
وائل : شبيجن.. انتي ليش نازلة بدون شال .. متكولين اكو زلم هنا..حرام بوية روحي لبسي..
مرام : هو انه جنت احاچيها هيج..هي تكلي ماريد البس وانه بكيفي اذا معاجبكم اطلعو من البيت..
شهكت وخزرتهه : جذابه والله تتهمني .. انه مكلت هيج وداعة رائد محجيت شي..
مرام : خالو شلون تخزرني..يعني حجيي صدك..

كمشني من جتفي بعصبيه وحاجاني : صعدي يله.. دموعي صارت بعيوني..عفتهم وصعدت فوك..صارت اخلاص بوجهي ابتسمت بخباثه وراحت..هاي شتريد مني..شمسويتلهه .. رحت للغرفة خليت شال ونزلت..الحجية سكتت فد دور ليش عود اشو من رائد هنا تحجي وتسكت بيهم..هسة ولا يمهه السالفه اصلا .. شنو حتصير وياهم..طبيت للمطبخ اسوي العشه وياهم ..فاتو محمد وعلي..
محمد : عوفو من ايدكم..اروح اجيب من برة..
اخلاص : اي عيني حيدللنه من اول يوم..
محمد : هاي چي رائد ماكو..من يجي هو يستلم كلشي خوما تبقوهه براسي..لا بوية..
اخلاص : مو دنحمد بيك..ليش هشكل ..
ابتسمت عليهم .. خطية..من الشغل للبيت لاحتياجاته واهله.. ممهتم لنفسة..ضميت الاكل والبنات راحو بالصالة اجة علي مدري ع شنو يدور..عفتة ردت اطلع صاحني..

علي : بلكت تشوفيلي وين الجداحة..شو ماكو..
رحت ادورهه بالمجرات مالت الكاونتر..هو واكف فوك راسي .. اختنكت من الوضع..شبي هذا والله ديضايقني.. ادور اخاف احجي محد يصدكني..لكيتهه وانطيتهيا..كمش ايدي هو ومبتسم اخذهه وراح..كبر حتى كبر..عود متزوج وعنده بنية .. لا يروح يبليني وي مرته البلوه..كعدت وياهم بالصالة.. هو كاعد ويدخن..كل شويه يعاينلي ويبتسم .. صدك بلشت اتضايق وين رائد عنه..مريت من غرفة ام علي .. سمعتهه تحاجي اخوهه والباب مفتوحة شويه..

ام علي : انه شلون حخلي البنات يروحن للدوام وي السالفة مال علي هاي..اخاف يسوولهن شي..
وائل : لا دخليهن..هم اذا رادو يسوولة شي يجون علي لو على رجال يعرفة..
ام علي : الحجي بيناتنه..انه خايفه ع رائد ..خاف يعرفون علي كرابته ويسووله شي..شيخلصنه بعد..
وائل : ماعلي شي..انتي بس لا تحجين..موزين قابل يكعدنا عنده..تره البيت بيته مو مال امه..
ام علي : اعرف..ادور هاي مرام ولا دتكعد راحة..كل ساعه مسويه مشكله وي مرته..
وائل : شنو قصدج..يطردنه يعني..
ام علي : اي مو بعيدة..ماشفت شلون يكول احبهه جدامنا ويوكلهه عبالك بنته مو مرته..
وائل : اكلج عوفي السالفة..ميصير شي خلص..

هاي ليش هشكل حاطين عينهم ع تصرفاته وياي.. هلكد خايفين منه..شمسويله ويخافون يسويلهم شي .. عفتهم ورحت ع الباب جانت تندك..طب محمد جايب اكل من بره.. ظهري تحسن شويه من نمت..فرحت فرشت السفره وصحتهم يجون ياكلون..ع الاكل اجت جلنار هي وطه..المره من اجت لحد هسة ماحجت كلمه..بس ع الاكل وتروح لغرفتهه هي وابنهه.. بس اخلاص وزينب لازم يحجون..
اخلاص : ولا تكول ضراير..عبالك حبايب..
زينب واختهه نور كامن يضحكن..بالكوه كعدت وياهم .. مليت من سوالفهه..وين ناوية توصل .. علي مانزل عينة.. اريد ارزله بس اخاف..هسة كبل يكولون ها مرة رائد تريد تتقرب لعلي وتذبهه براسة..

كملت اكل وصعدت فوك..عاينت للفراش.. شلون حنام بدونه .. تعودت يحضني وانام..فتحت شعري وذبيت الشال فتحت التلفزيون وكعدت اكلب بالقنوات..درته ع فلم ضليت اتفرج..لحدما خلص وبده واحد وراه..شفت نصه ونزلت اشرب مي.. كلت الكل نايم هسة منو يشوف..ع الدرج وسمعت صوت اخلاص وزينب يضحكن بغرفة جلنار..نزلت على كيفي اتصنط
اخلاص : كمشي لج..ديخابر..
جلنار : شنو شبيج..منو ع التلفون..
اخلاص : رائد عيني..انتي تستاهلي مو دنوة.. هذيج حتى مامكملة دراسه واخوي معهد طبي ومقدم شكبره شكده
جلنار : لا متفقين ميصير شي بيناتنه بس لخاطر طه..
اخلاص : اخذيهه مني..هسة يحبج ميصير بس الج..
جلنار : جاوب سكتي..الو رائد. ..اي اني جلنار.. لا ماكو شي ردت اسأل عنك..افتقدتك اليوم بالبيت وطه هم..لا محد يمي هيج كلت اشوفك..مو رجلي..ههههه.. اي ماشي.. يله اخذ راحتك عيونييي..
زينب هي وتضحك : هاا لج شو تضحكين..
جلنار : لج عيني غير حجية حلو..
اخلاص : مو توج تكولين متفقين ميصير شي بيناتنه..
جلنار : مو اني ممجربة احاجي هيج..

كمت ابجي انه واسمعهم..ليش هيج تسوي اخلاص وياي.. عفتهم وصعدت فوك..طفيت الضوه بقى بس ضوه التلفزيون حتخلي يتقربلهه بتصرفاتهه..مادري شوصف شعوري احس نار تاكل بية..تعبت من البجي ونمت..كعدتني اخلاص الصبح..شغلت الاضوية وشالت الغطى..
اخلاص : يله يله كومي بالعجل..تعاي سويلنا ريوك كبل لا يكعدون اهلي..
دنوة بنعاس : نعسانة شبيج..بعد وكت..
اخلاص : شنو بعد وكت بابا..تره بالعشره هسة.. لا عبالج على دلال رائد وتكعديلنا بـ١٢..
جرتني من الجرباية طحت على ظهري..يابه شاغت روحي.. اريد اموتهه..كمت ابجي من الوجع..واحد من الصبح يسووله هج..منو يقبلهه ..كمت ع كيفي غسلت وجهي ورجعت للغرفة لبست شال ونزلت..احس روحي غريبة بيناتهم..الحجية متجي للمطبخ قليل..بس تشوف شديسوون وتروح..

طول اليوم ماخلصت من حجي اخلاص والبنات..ادور صارت جلنار كلش صديقتهن ويكعدن سوه وضحكهن ليوين..ذبت طه علي انه ابدلة واكعد يمي يلعب انه واطبخ..وهي كاعدة بالصالة تكركر ومن تجيب طاري رائد تعلي صوتهه بس حتى اسمعهه .. شكد ضجت منهه..جنت عبالي حتضل مثل ما هي.. مشى الوكت طبيت للمطبخ وطه بيدي اريد اسوي الغده.. حطيته بالكع وانطيته عضاضته..مدري شسوي اكل..طلعت لحم بين ما ماع سويت العجينة مالت الكبة..اول ما بلشت الف بيهه كام يبجي طه..غسلت ايدي ورحت شلتة اهدي بي.. فاتت جلنار
جلنار : جيبي..ليش تخلي يبجي ماعندج احساس..
دنوة : هو وحدة كام يبجي..داحجي جان تزمخ بيه..
جلنار : اي فهمنه..جيبي انطينيا..

اخذته وراحت..كلهم جانو ولا كلمة يحاجوني من هو هنا .. والله صاكرهم..اكيد محيسمع لحجي جلنار..هو يحبني وسوه كلشي علمودي..اخذت نفس ورجعت الف الكبة.. كليتهه وسويت زلاطه بعد مابيه اتحرك .. اجت الحجية صاحت بالبنات كلتلهم كومن اخذن الاكل للصالة..لو ذابيهه براسهه .. بقيت كاعده بالمطبخ ماكدر اكعد بالكع..كعدت اكل ع الميز جان يجي علي..
علي : متجين تاكلين..
دنوة : داكل هنا..ميحتاج .. ابتسم وراح..شيريد مني هذا ضوجني..هاي هج خلص اليوم..وباجر وعكبة..كمت انه اكعد الصبح من وحدي..جلنار صارت بعد اسوء وياي..طه متشوفه بس بالليل من تريد تنام تجي تاخذة..وتريد تاخذه هو ونايم مو هي تنيمة..تعبت من الشغل واحنه هواي بالبيت..

بين ما انظف الصالة الجبيرة واروح ع الصالة الثانية الكاهه متخربطه .. محد يعيني كلهه ملتهيه بالسوالف.. ردت اخابره سألت الحجية عنه..كالت تلفونه مغلق من البارحة ضليت بقلق .. ليش مغلق..هو من يلتحق يغلقه بس يعني هم بقيت قلقانة.. علي كام يضايقني اكثر يوم عن يوم..بهاي الفترة جنت محضره الاكل.. نصيت النار وصعدت فوك اغير ملابسي صار عليهن زيت .. نزلت لكيت الاكل محترك..انه متأكدة جانت النار ناصيه وهو ميحترك بالعجل..كمت ابجي شكد تعبت بي جنت مسويه مقلوبة .. اجت مرام وجلنار بيدهه طه..
جلنار : هاي وينج..طه يريدج تعلم عليج..
مرام : هاي شنو الريحة..مال حرك..
دنوة : احترك الاكل..منو معلي النار..انه نصيتهه وصعدت فوك ليش هاي الخباثة مو حتاكلون منه ..

انه كلت هيج جان يكبن بوجهي صياح وغلط حتى مانطوني مجال احجي.. اجه الحجي ومحمد ..
وائل : ياستار استر..شبيجن ادور..
مرام : هاي دنوة حركت الاكل هلكد ما ثولة وتريد تذبهه براسنا احنا شكوو..غير هي مهملة..
دنوة : خالو والله جذب..انه عفت ....قاطعني..
وائل : اي اي كافي اعذار..هسة شناكل احنه..
محمد : يابه شبيكم وي البنيه خطية..هسة اروح اجيب من بره شنو قحط..اكلتوهه وشربتوهه ميصير..
عفتهم ورحت ذبيتهه كمت اتحسر عليهه..حرامات .. راح محمد جاب اكل من بره وتغدينه..طه بحضني حتى انه اوكلة واسويله ممة والاعبه واناغي..تفوت اخلاص من يمي ..
اخلاص : جاهلة تلعب جاهل..شترجى منج يعني.. شفتي مو اكلج تره رائد ميريدج..يريد جلنار.. شوفيهه شلون بيضة جنهه مرايه وشعرهه ذهب مو مثلج..سمرة ششاف منج

كمت ابجي..وطه يعاينلي وايده على خدودي.. خطية ميعرف شديصير بس متعود علي اضحك والاعبة..وين رائد والله اكلوني اكل من راح لهسة.. صار ١٥ يوم عبالك شهر .. كل يوم اكعد الصبح اكول اليوم يجي..ادور تلفونة مغلق ومحد مهتم بس انه والحجية..كل يوم اروح عليهه اكللهه خالة ماخابرج .. تكلي لا والله..هذا متصيرله جارة الا يسكني الكبور..المشكله هو ميخاف يعني عادي عنده بس احنز ندخل بخوف .. جلنار من تشوفني اطبخ تكوم تعير بيه.. ها ممهتمه لنفسج ورائد حيعوفج.. جنت واكفه ع الطباخ شلت القبغ مالت التمن والبخار صار ع ايدي..اااخ ايدي.. جلنار جانت واكفة يم الباب..
جلنار : هاي شنو انتي..اشو ممهتمة لروحج..باعي حبيبتي من هسة اكلج .. انسي رائد ..
انداريت عليهه والقبق بيدي : ليش انساه بله..

جلنار : تزوجني قبلج واني اكبر منج وافتهم اكثر.. اعرف شلون اكسبة..انتي ثولة كلش..
دنوة : انتي لو تستحين على روحج جان ماكلتي هج ورجلج حتى سنته بعدهه مطالعة..روحي التهي بابنج احسن مما جاية تخططين تاخذين رجلي .. شو هاي كامت تبجي وتصيح الكل اجة على صوتهه..الحجي بدون مقدمات اجه كمشني من بلوزي وطلعني بره المطبخ جدامهم كلهم..شكد فشلت .. تمنيت محد ديعاين علي..
وائل : لسانج هذا يرادلة كص حية..كلساع متعاركه وي وحده شنو من مره انتي..بلوه والله..
الحجية : لا لتحجي عليهه..جنتي هاي اذا غلطانة انه اعرف اتصرف وياهه..بس ادري بجلنار متكعد راحة ..كومي بنتي تعاي وياي للغرفة..رحت وياهه طبيت للغرفة كمت ابجي واشهك ..مليت منهم..كل كلمة تسم البدن..

بس ما مضوجني غير من يصدكون بيهه لو باخلاص والباقيات جا وانه شنو .. بس انه اجذب والكل يحجي الصدك.. هي تمسح على راسي وتحاول تهديني..غفيت ع الجرباية مالتهه بعد مادريت شصار كعدت بالليل وره المغرب..البيت صنطة مدري شعجب حتى الحجية مو بالغرفة .. بطني توجعني جوعانة..رحت للمطبخ اكل حسيت على ايد حاوطت خصري.. شهكت وانداريت.. انت صدك متستحي..شتريد مني..
علي : عاجبتني..رائد ميستاهلج..
كمت ابجي وادفع بي..هو كامشني ماهدني..كشت روحي منه .. ادور ايدة قويه..اريد ادفعه ماكدر..كمش شعري بايد وايده اللخ على خصري..
علي : اذا حجيتي حجاية تتخزين انتي مو انه..

ديحجي جان تكب العيطة مال مرام ونور..هو بالعجل اندار وصرت انه فوكاه عبالك انه المتعنيتلة..وكامشني من ايدي حيل احسها انفصخت .. مرام كامت تبجي وتدفع بيه من علي وانه من الصدمة بعد معرفت شسوي..
مرام : بواكة الزلمممم جلبه حقيرة والله عرفت حاطه عينج ع علي .. چي رجلج ماكو ياكح...
اجة خالهم على صوت الصياح..نور حجتلة بالباب .. اجه فاير كمشني من دشداشتي وضربني راشدي صوفرت اذاني كمت ابجي وايدي على وجهي اخاف يجيني راشدي لاخ.. كام يصيح بوجهي ويجر بدشداشتي..
وائل : عووود انتي عروس..صوني رجلج بغيبتة مو ادورين وراه .. صدك ماضلت مستحى..

جرني وصعدني فوك وانه ابجي مسكتت..باية اعبرهه واللخ اعثر بيهه..علي محد حاجاه ليش انه هج انذبت براسي كلهه وانه لا ماكله ولا شاربة..فتح باب المخزن وشمرني .. كمت بالعجل كمشته من ايده : والله مامسويه شي..علي جذاب والله حرام عليكم ماسمعتوني..
وائل : بالج تطلعين منا..يجي رائد وهو يتصرف..
طلع وسد الباب .. كمت ابجي وادك ع الباب..والله يعرفكم واحد واحد..ميصدك بيكم..ماصارلي شهر وياكم طعنتوني بشرفي..الله شحيسوي بيكم..شكد اكره هذا خاله .. من اول يوم هو ميعاين لوجهي ويكيف من يشوف البنات يتعاركن وياي لو وحدتهن تعير بية..سمرة شحالج.. شحب منج .. شوفي هاي البيضة جنهه مرايه..تعبت من الحجي هذا كل مره ينعاد..الحجية وينهه مشفتهه..

والله متقبل بالناقصة تعرفني زين مثل رائد ..كمت ابجي واغص هلكد ما احس روحي انغبنت وطعنوني من وره علي..شكد حاولت اتجنبه وهو ماكو لاطش .. شنو استفاد هسة..ادور تجي اخلاص من يم الباب تكلي هو هذا تالي اليخون راعي وتضحك.. احسهه هي دازته علي بالعناد..بالليل الكل نام..اختفى صوتهم .. فتحت الباب وطلعت لغرفتي هي صايرة مقابل المخزن.. سديت الباب وقفلته..

رحت ع الجرباية حضنت المخده وكمت ابجي بالزايد لو هو هنا جان الكل انخرس ومحد حاجاني بحرف .. تعبت من البجي ونمت الفجر..فزيت الصبح من وكت على صوت صياح معرفت منو ومنو ديصيح..بس واحد يكول وينهاااااا .....

يتبـــــــــــــع....................