رواية اسألي عني الليالي الفصل الثامن وثلاثون 38 - بقلم رقية جاسم

مثل شمعه احس هلروح وياك ..
تشعل كلشي بيها حتى تضويلك ..

قناة التليگرام

حساب الانستگرام

الـبـارت السابع والثلاثون....................

رحت ع الجرباية حضنت المخده وكمت ابجي بالزايد لو رائد هنا جان الكل انخرس ومحد حاجاني بحرف .. تعبت من البجي ونمت الفجر..فزيت الصبح من وكت على صوت صياح معرفت منو ومنو ديصيح..بس واحد يكول وينهاااا.. هذا اجه اليوم يموتني..بس لازم انزل وادافع عن نفسي..كافي اكلوني اكل وانه ساكته..لميت شعري وخليت شال ونزلت .. جانو كاعدين بالصالة التطلع للدرج..نزلت بالعجل صرت وره رائد وهذا خالة كاز ع اسنانه يريد يكطعني عبالك..
وائل : انتي شجابج..شلون عين صلفة..
رائد : تحجي عليهه جدامي..لا والله ماضل احترام لصاحب البيت ..خالي على عيني وراسي..بس مال تحجي عليهه جدامي لا ماقبل..

محمد : ماشفت وضعهه شلون نايمه ع علي..
رائد : دنجب لك..بحال هذا الهتلي هي..هو هذا لو بي خير ميختل بهذا البيت وهذاك..
ام علي : مثل ما انت متقبل ينحجي على مرتك الشريفه العفيفه انه هم ما اقبل تحجي على ابني..
رائد : شريفه ونص واحسن منكم كلكم..
وائل : تعال اكلك..اشو انت تحجي ومترهي .. عبالك جنت يمهه وشفتهه ..حقك لو شايفهه جان طلكتهه بنفس الليلة بس ربك راد يستر عليهه..
رائد : يله يله كافي..سمعت منكم اريد اسمع منهه..
اندار علي..جنت ابجي وايدي ع حلكي من السمعتة.. ليش هذا الكره كله..شمسويتلهم انه..
رائد : احجي يابة..شصاير..
علي : يعني عفت اهل البيت كلهم وتصدك بهاي الزعطوطة .. اذا هيج معناهه انت كوا...

رائد هجم علي موته كتل..ويفشر علي يكله انه كواااا.. ياجلب ياقندرة.. اعوفهه مسكينة تاكلوهااااا ليش يالماعندك غيرة .. الحجي ومحمد يريدون يكوموه منه هو ماعافة الا صار جنازة..مرام والبنات كلهن طلعن .. اجت مرام ضربتني وجرت شعري كمت ابجي واكمش ايدهه اريد تعوفني..اجه رائد دفعهه وخزرهه..اخذني من ايدي واندار علي..
رائد : احجيييي..شصايييير..
جاوبته والدموع بعيوني : والله هو علي..انه مسويت شي و .. وخالو وائل ذبني بالمخزن..
اخلاص : اي بعد تبلي علينه بعد..شنو انتي..
رائد : انتي تنچبين لا اطيح حظج..شغله متخصج لتدخلين بيهه..اندار على خالة..صدك مسويلهه هيجي..
وائل : والله بعد الشفتة جدامي اكيد اسوي هيج..
رائد : وانت منووو خاطر تسوي هشكل بيهه..عمهه خالهه .. تره انت خال رجلهه..انه احاسبهه مو انت..ولا أي واحد بيكم يمد ايده عليهه..شنو وحوش انتو..شوطتوني من صبحيات الله .. الله يطلعهه بيكم ..مرتي اذا احد جاسهه والله وروح ابوي اذبه هو وغراضه بره..

وانت علي القندرة .. باقرب وكت اريدك بره البيت..
ام علي : ها يعني طردة هاي ..
رائد : اييي طردة لليعجبه..المحترم نفسه عايش..
ام علي : والله وكت وصارت البيوت بيد المزعطة..
رائد : لتخليني اعدد زيناتي وياكم واخلي راسكم بالكع من الفشلة..هذا علي لوما اعرف ماضي زين جان صدكتة .. بس اعرفه وواكفله بوحده ثنين ثلاثه..ماريد احجي واطلع الوصاخه كلهه .. دنوة متسوي هيج حتلو تنجبر..
مرام : اي بعد طلعهه نبي متغلط ولا تسوي شي موزين .. دنكلك شفناهه بعيونه..شنو السالفة..
رائد : عميان..اي والله عمياااان..وانه الاعمى منكم اجيت اسمعلكم..اذا شفت احد متقربلهه لو مأذيهه بحجاية لا يلومني شحسوي بي..يله ..كلمن يولي بغرفتة..لعبتو روحي من الصبح..عود جاي ارتاح..امداااا هيج راحة
وائل هو ويكوم بعلي : صدك متستحي انت وماعندك احترام لشيبات الاكبر منك..

رائد : كومي يابة كومي..لا تسمعيلهم صعدي فوك.. بعدين يكلولي ليش شعرك مشيب..حتى گلبي شيب وانه اركض لهذا واوكف لهذاك..بعد لحكتوني على مرتي..ليييش.. جي فقيرة ومتكدر ادافع لروحهه..ليش ماحجيتو على جلنار.. بس هاي وكحة ومحد يكدرلهه ماتفكون حلككم..
انهجم البيت من وراي..شسويت بالدنيا انه..ليش وين ماروح تصير عركة ومشاكل شكبرهه..الكل يعاينلي بنظرة احتقار فوك نظرتهم القديمة..صعدت للغرفة..سديت الباب..تمددت ع الجرباية ومكرفصة روحي وابجي..تعبت كمت اغفي.. فات هو شافني مغمضة حسباله نايمة..غطاني وكعد يمي يمسح بشعري ودموعي..من لمسة ايده غفيت بعد..كعدت ماعرف شوكت لكيتة كاعد ع الكرسي يكلب بالتلفزيون ويدخن.. كمت ورحت كعدت يمه بالكع..
رائد : شبيج..
كمشت ايدة : لا تعوفني بعد..ضعت بدونك..

رائد : لا يابة شعوفج متكليلي..المره الجايه شيسوون..
مادري ليش حسيته زعلان وماخذ بخاطرة..كمت لميت شعري لبست الشال ونزلت جوه..الحجية جانت جاية..رحت سلمت عليهه وكعدنه بالمطبخ..
الحجية : شلونه رائد..مو سهل السمعة..
دنوة : كاعد يدخن..خالة انه هم مو سهل الصارلي..
الحجية : حقج حبوبة حقج..انه حجيتله كلشي..
استغربت..شتعرف يعني : شحجيتيله..
الحجية : لا اكلج ولا تكليلي..اخلاص هي وهاي جلنار الحية سون هاي السالفة..بس خاطر يهجرج ويروح عليهه.. انه رحت لاختي متخربطة خطيه بتت وياهه بالمستشفى..بس كبل لا اطلع كتلهه لاخلاص ديربالج تسوين شي لدنوة.. اذا رائد يعرف الله يستر شحيسوي لا تخلين دوبج من دوبة.. كلتلي لا يمة هذا بس حجي ماسوي شي..هي تبقى بنتي ادري بيهه غلطت بس شسوي يعني اذبحهه..انه مينطيني گلبي اسويلهه شي..بس رائد محيقصر..
دنوة : يعني شنو حيكتلهه..

الحجية : لا لج..وليدي مايمد ايده ع البنية..جان طكهه ذاك اليوم من فتنت علي جدامنا..هو يعرف شيسوي..
دنوة : وعلي ليش رائد يكرهه هو وخالة..
الحجية : نكارة جميل..صح خواني بس انه اكلج لو تنطيهم عيونج مايكولون شكرا..عمي لا تكولون شي..بس لا تحجون بالشين ميصير..ورائد بس واحد يگله محتاجك بكذا شغلة يروحلة ويوكف وياه..ومن ضمنهم علي..حتى وائل.. جان مسافر لالمانيا فترة وهو ما ماخذ الجنسية الالمانية..جي ما متزوج حتى جهال ماعنده حتى يصير عدهم الجنسية ويبقون فرجع.. اجة علينا من جان حامد عايش..ضل يمنا تقريب الخمس شهور وراهه رائد من خلال معارفة سواله لجوء مره لخ وسافر من ذاك اليوم لحد كبل فترة رجع..وهسة وائل اول الناس وكف ضد رائد واذى مرته وهو كاعد ببيته.. هاي ولا شي مقابل المسويلهميا..بس هو مايحب يحجي ويكول انه سويت وسويت ويكعد يعير..

صفنت شوي ..شلون رائد مسويلهم كل هذا وهم ولا عبالك .. حتى ماجابو طاري..صدك خطية..ادور الحجية شلون تحجي بگلب محروك على ابنهه..احسهه بنار اخلاص من جهة ومن الجهة اللخ رائد ..ومتدري شتسوي..
الحجية : تحملي فترة..تره مايحجي هو..يعني يجي واحد يكلة مرتك كيت كيت..شيصير بي..انه لو جنت موجودة مجان صار كلشي..بس هاهية..اكيد بيهه صالح..
ضلت تتردد ببالي مواقفهه اخر فترة ..جانت متدافعلي ولا تحجي..الا ماندر..انه ساكته لخاطره..ماريد من يجي يكلوله دنوة سوت هشكل وحجت هشكل : خالة ليش مسويتي شي اخر فترة .. اقصد من جان رائد هنا ادافعيلي ومن راح سكتي .. ليش
الحجية : حبوبة من هو هنا منو يتجرأ يحجي..كلهن يخرسن وداعتج..بس هاي هيج بلبلة بيناتهن..وانه مالي خلك عركات وطولة بال..فمن تفض اكعد احاجيهه لاخلاص اكللهه بسج من دنوة متحصلين شي تره..دتفهمين شلون
حركت راسي يعني اي : وعلي شلون؟

الحجية : كتله لخاطري لا تخليهم يطلعون..علي اذا يطلع يكتلوه .. وانه خوما اشوف اختي تتعذب جدامي..
دنوة : ها اي..خليت ايدي على ايدهه وابتسمت .. كمت احضر الغده..طبت جلنار بيدهه طه يبجي ..
جلنار : هاج اخذي مديسكت يريدج..
الحجية : متسكتين ابنج..شكو ذابته ع البنية .. امه اخته هي والله نسوان هلوكت ولا يرضن بشي..
دنوة : خلي عادي.. اخذتة منهه ورحت كعدت بالصالة الاعبة لحدما سكت..خليتة يم القنفه ورحت جبتله لعبتين من غرفتهم عفتة يلعب ورحت للمطبخ اكمل الغده..فاتت مرام
مرام : شوكت يصير الغده..
دنوة : بعد مصار هواي من بديت بي..عافتني وراحت.. تكول عمتي وانه جنتهه تجي تتأمر على راسي..بين ما كملت كلساع واحد فايت ها شوكت تكملين..بس رائد مشفته ..

صبيت الاكل بمواعين وخليته ع الكاونتر..صعدت فوك لغرفة اخلاص دكيت الباب وطبيت..
اخلاص : خير شكو جاية..
دنوة : ودي الاكل للصالة..طبخته وصبيته..مادري شعجب سكتت وكامت نزلت..طبيت للحمام غسلت وجهي ورحت للغرفة رائد مطفي الاضوية ومتمدد .. ايده على عيونه واللخ كامش بيهه الريمونت..مادري اكعدة لو خطيه .. طبيت نزعت الشال استحريت من الطباخ.. كعدت ع الحافة ..اكيد حازة بخاطره شلون يسمع هيج حجي على مرته..شويه وحجة..
رائد : شبيج..
دنوة : صبيت غده..تاكل..
رائد : لا ماشتهي..اكلي انتي..
شكد جاف حتى بنبرة صوته..كمت لبست الشال ونزلت .. كلهم مجتمعين ع الاكل وساكتين..
الحجية : ها وين رائد..ميجي ياكل..
دنوة : كال ما اشتهي..

وائل : عساه لا اشتهى..شسوه بينه من الصباحيات .. الله يقبلهه محمد ..كله علمود المزعطة..يابه شفناهه بعيونه لا شلون كلكم جذابين بس هي تصدك..
الحجية : لا تحجي على جنتي..انت تعرف شي وانه اعرف شي .. الحمدلله وليدي واعي ويحسب الف حساب كبل لا يسوي شي..لو طايش جان راحت البنيه وهي ما مسويه شي بس كله من وره المايخافن الله..
تحجي وتعاين لجلنار..فوخت گلبي..الله ياخذهه واخلص منهه وين تريد توصل..وين ماروح لاحكيني ع الزينه الاعيشهه .. شافتني تهنيت بصگر لحكوني علي..البارحة شكد حجيت من شافوني وي علي بس محد صدكني..هاي مو بس هنا.. بكل مكان وخصوصا بالعراق..البنيه هي الغلطانه حتلو مجانت مسويه شي..بس هيج تتلطخ سمعتهه ليش..جي هي بنية وهذاك رجال ميصير ينحجي علي عيب..همزين اجه رائد وسكتهم كلهم..لو كاعد ويانه جان محد حجة..تغديت وصعدت فوك..

نزعت الشال وغيرت ملابسي..تمددت يمه ..بسته من خده وخليت راسي على صدره..مادري اذا نايم لو كاعد بس حاجيته ماريد يضل شايل بگلبه علي .. اسفة ..ادري زعلان مني وحازة بخاطرك..بس انه محجت شي لخاطرك اكول ماريد من يجي يكلوله دنوة سوت هشكل وراددت فلان وعلان ..سكتت بعد مسمعت بس صوت انفاسة.. تنهد وحاوطني من خصري قربني علي..
رائد : مزعلان..بس ماريدج تصيرين فقيرة..اعرفهم زين واحد واحد..واعرفج مثل ما اعرف روحي والله..امي حجتلي .. مادري شكول اذا اختي تسوي هشكل..الغريب ماعلي عتب بعد..منا وجاي بس واحد يحاجيج جاوبي.. لا تنتظرين واحد يكلج سوي هيج وسوي هيج..الفقير ينوكل.. انه مو دائما موجود الله اعلم شمضموم..
دنوة : يعني تعوفني..
رائد : اعوف روحي وماعوفج يولي..نامي يابة نامي.. تعبان صار يومين منايم..متعود عليج..

اخذت نفس وبادلته الحضنة..شويه وغفيت..كعدت مالكيتة كمت رتبت الجرباية ولبست الشال ونزلت..ابوي جان موجود وهو كاعد وياه هو والحجي والحجية..سلمت علي وكعدت يمهم .. جايب وياه هدية وفرحان..شكلي احسن بهووااي من جنت متزوجة عقيل..يعني مبين التغيير..بقى شويه بعدين راح.. طلعت وياه حضني وباسني من راسي..انطاني فلوس
دنوة : شنو..مو جبت هدية بعد شكو..
محيي : يعني تردين ابوج..اخذيهه..قابل جم مره جايكم
ابتسمت واخذتهه..وعدته وراح..طبيت للبيت جان رائد ديلعب وي طه ويضحكة..يگله منو حبيب بابا ويدغدغه وهو يضحك ويشيله فوك..بنفس الوكت اجت جلنار..رائد راح يمهه بالباب وطه بيده..اخذت ابنهه وراحت هو راح وراهه.. رحت للمطبخ جانن نور وزينب كاعدات ويتهامسن..ماهتميتلهن رحت ع الثلاجة اكل شي..اخذت حلاوه وطلعت..بباب المطبخ سمعت زينب تحجي وصوتهه واضح..

زينب : عبالهه تخزي بعلي واسكت..بسيطة خلتصبرلي
نور : شتردين تسوين..تره ماعدنه مكان نروحله..هسة يجحتنه ونضل بالشارع واخوج ينقتل..
زينب : لا ماسويلهه شي..ختولي هاي زعطوطة متعرف شتسوي .. جلنار تستلمه احسن..مثل ما كالت اخلاص هي بيضة وشگرة وين اكو هج..خوما هاي الملحة .. والله اذا دخل لغرفتهه وشافهه متعطره ومبدلة ميعارض.. دنوة اذا شافت وضعة بعد متشوفه وجهه..
متحملت..طبيت خليت الماعون ع الميز .. فزوا ع الصوت
نور : وجع شبيج مخبلة..
دنوة : انه مخبله..لو انتييي..كمت اصيح دمي فار .. انتن شتريدن منيييي..عوفوني اعيش عوفوني .. شتردين من رجلي..رائد والحجي اجو على صياحي..احس رجعتلي الحالة كمت اريد املخهه ع السمعته والصار كومه اسمعه مليت منهم..صگر كمشني يريد يهديني وانه اصيح ..انداريت علي خزرته..اكلك وخرررر اريد اموتها.. اكرهكم خربتو عيشتي ..حقيراااات..شيسوي الله بيجن متبهذلات من بيت لبيت..

انه احجي وافك بإيده اريد يعوفني عتيت ايده حيل ورحت عليهه كمشتهه من شعرهه واصيح بوجهه ..ماخليت احد يحجي كلهه سكتت بس انه احجي وهاي تعوي هي واختهه.. هاااا بعد تنسين السويته ..لو اسوي الاكثر دفعتهه وكمت..جان تجي اخلاص..
اخلاص : شبيك فكاكه مدتشوف مرتك شدتسوي..
رائد ماجاوبهه ..عاين عليهه وسكت..
دنوة : وانتي شكووو بكلشي حاشره روحج..والله تهسترت احس شي بداخلي دفعني عليهه كمت اجر بدشداشتهه وابچي ..ايدي مضبوبه على شداشتهه ماعرف شلون صرت بهلموقف..حسيت على رائد يسحبني من ظهري..دارني علي وهو محاوطني من ظهري..اختنكت بالبجي واشهك.. حيلي راح ليش هشكل وياي..شمسويتلهم..
رائد : شلون وي المشاكل احنا..
زينب : هي مخبله..اجت من وحدهه تضرب وركعت الماعون .. هاي صاحية عود..
ام علي : اي بعده اثر السحر..متفيد هاي تخبلت..

الحجية : ها عيني سالمين..شو تحجين عليهه عبالك بنتج.. مابيهه شي جنهه ورد..بس بنتج شوف شمسويتلهه..
رفع راسي وهو يعاينلي بعصبية : شمسويلج..
احس جمره بداخلي وطلعتهه ..كمت احجي بعصبية وابجي واشهك : زينب تريد تخلي رائد يتقرب لجلنار..فوكاهه تعيب علي تكلي ملحة وسمرة..
ام علي : اي وشنو يعني..واذا كالت..هي هم مرته واله حق عليهه خوما بس انتي..
زينب : جذابه والله ماكلت هشكل..تتبلى علي..
رائد : شالج الله كولي امين..مسويات شلة وتقررن مصيري وتقهرون بيهه..زين ماسكتتلكم..
وائل : يعني ترضا مرتك تصيح وتخبص البيت..
رائد : البيت بيتهه مثل ما هو بيتي..وماسوت الا الصح .. انه قابل ..لأن سكتت واكلتوهه زين منهه تعاين بوجوهكم.. لو وحده غيرهه والله تكلب البيت على روسكم..

الحجي راد يحجي سكته رائد : بله سكتوا احسن.. ماريد اسمع حجاية زايدة..جاي ارتاح سممتو عيشتي..الله يقبلهه محمد ..امشي يابة صعدي فوك.. كمشني من جتفي واخذني للدرج ..بعدين اندار عليهم.. لتحضرون عشه انه اطلع اجيب عود..عافهم يحجون وصعدنا فوك..طبيت للغرفة وعفته رحت تمددت ع الجرباية بس احسني بغير عالم..مادري اختنكت والدنيا صارت شكدوتهه بيه.. كعد ع الطبلة مالت الميزتواليت ويدخن..لعبت روحي من ريحة الدخان.. هو يدخن جدامي عادي بس مادري شصار..رائد..
جاوبني هو ويكلب بالقنوات : ها..
دنوة : طفي الجكارة..دتخنكني..كام طلع بره شويه ودخل قفل الباب وطفى الضوه..شغل ضوه التيبل لامب وكعد على حافة الجرباية يمسح بشعري ويعاينلي..جسمي نحلان احس الكيلوات الزدتهه رجعت ضعفتهه والحركة بزردومي رجعت .. تذكرت من راح لغرفة جلنار وحجي زينب..

تخيلتة مسوي مثل ما يحجون..عدلت كعدتي وتقربت منه.. بدون مقدمات سألته .. ليش رحت لجلنار..
رائد : حاجيتهه ع السوته هي واخلاص..
دنوة : داضوج من طه..من اشوفه يمك .. ضحك ضحكة حتى غص بعدين .. الله الله..
رائد : تغارين من طفل..
دنوة : وانت شكو تضحك..هسة تحب امه على محبته.. وانه اضل وحدي وي هذني الحقيرات ..
رائد : شلون احب اليأذيج يايابة..كومي غسلي وجهج شوف شلون غادية دم..
بعدن جاف وياي..ضجت ممتعودة علي هشكل..هو علي الغلطان انه شكو..عفته وكمت غسلت وجهي ورجعت للغرفة لكيته واكف يم الكنتور ونازع الفانيله..ظهره مجلغ وبي ازرك اندار شافني صافنة..
رائد : شبيج..

دنوة : مابيه شي..ليش ظهرك هشكل..
رائد : قديم مال تدريب..
لبس وراح نزل..خليت شال ونزلت وراه..طه يطبطب ع الدرج يريد يصعد..نزلت حضنته وشلته..اخذته للصالة الثانية.. اخلاص والبنات كاعدات يكرزن حب..
اخلاص : روحي ودي طه لجلنار..
دنوة : ليش خلي يونسني..
اخلاص بضحكه : دروحي شبيج..يعني مرتاحة هيج شايلته وتمشين..هي كالت تريد تبدلة..شوفيهه
حركت راسي يعني اي واخذته للغرفة..الباب مردوده فتحتهه وطبيت..ضليت صافنة وهي هم ورائد..كامشته من تشيرته وايدهه على صدره وتحجي بتنعوص..دموعي خانتني بس مبينت .. اخلاص كلتلي تريدين تبدلين لطه..
جلنار بصوت ناصي : اي والله حبيبتي..جيبي..
اجت اخذته..طلعت بس ضليت يم الباب اسمعهه..

تكله طه يبجي الليل كله ميسكت يكول بابا..تعال يمه عود.. هو ينام بسرعة ميضوج..وهج تحجي بتنعوص اااخ لعبت روحي منهه عفتهه ورحت لغرفة الحجية..طبيت لكيتهه دتسبح بالسبحة توهه مخلصه صلاة..سديت الباب وكعدت يمهه..خليت راسي بحضنهه وحضنتهه كمت ابجي وهي تمسح بشعري..
الحجية : استغفر الله..شبيج حبوبة..ليش تبجين
ضليت ابجي مجاوبت..لحدما تعبت..مسحت دموعي وحاجيتهه انه وبحضنهه مكمت : جلنار حتاخذ رائد..
الحجية : شلون يعني..
دنوة : شفتهم سوه بالغرفة..وهي كامشة تشيرته وتحاجي بدلع حتى لبسهه مبين هيانه..
الحجية : خالة هاي همجية لا تشوفيهه هشكل تتنعوص براسه شوفي روحج شلون تحجين بهدوء ورزانة..ختولي عيوني انتي رائد عاقل وجبير..لا تخافين يعرف شيسوي..
دنوة : اي ادري بس ماشفتيهه شتكلة..ادور تكلة طه مينام تعال نيمه بس خاطر يصير يمهه..
الحجية : تردين احاجي..بكيفج..
دنوة : لا خالة عوفي..ضليت يمهه شويه

بعدين اجت اخلاص وياهه نور.. تربعت جدامي..
اخلاص : هاي انتي هنا وانه ادور عليج..
الحجية : شتردين منهه..عوفيهه..
اخلاص : شنو اعوفهه..جا يبقى البيت وصخ.. هم نريد نكعد نرتاح..هي الجنة هنا وهذا شغلهه..
الحجية : مرام هم چنة..جيبوهه تشتغل..
اخلاص : لا هاي ضيف عدنا..هي وجلنار.. بس دنوة هي من عدنا وبينا لازم تشتغل..انه تعبانه تدرين..
الحجية : هلكد ما تكولين تعبانة مابيه حيل حتصيرين صدك تعبانة..كومي من يمي.. اليسمعج يكول مگرمة.. كومي بابا نظفي انتي..يعني هي تسوي غده وعشه وريوك وتردين تنظف بعد.. لا فد دور جايبين خدامة وجايين..
نور : شدعوه هلكد ادافعيلهه..حتى امهه مجان دافعتلهه هشكل.. حظ عمي حظ..
الحجية : وجع انتي اللخ..خوش مخمخمات وعايفات الدنيا كلهه عليهه..يله اذا طلعت ولكيت البيت على حطتة اكول لرائد هو يتصرف..وتعرفين شقصد..

بس كلتلهه هيج كامت بالعجل هي ونور وطلعو..مسحت دموعي بستهه وطلعت..صادفني رائد بالممر..معاينت علي.. عفته ورحت ..حجاية وحده اذا حجيت وياه اطلع مو دنوة..الموقف يحركني كلما اتذكر..كعدت بالصالة مدنجة واهز برجلي واگرضم بروحي..اريد انفجر بوجهه..شلون كامشتة وتمسد على صدرة..وهو مركز على ايدهه..اكرهه اريد اصيح.. ماكدر احجي مثل بلاع الموس..هي هم مرته..بس هو كلي ميريد منهه شي ومتنازل عن كلشي..وهي هم متريدة..شنو هسة تذكرته وتريد تتقربلة لو هاي سوالف هجامات البيوت..كلساع اريد اكوم اروحلة وارجع..كاعدة ع القنفة اجه هو جدامي.. رفع راسي بايدة..نظراته مابيهن معنى..
رائد : اجيبلج شي وياي..
كمت وابتسمتلة ابتسامه استهزائية : جيب لجلنار وابنك احسن انه ماريد شي..عفته ورحت للمطبخ ..سمعت صوت الباب انفتح يعني طلع..كمت الوب بالمطبخ..

رحت ع الثلاجة طلعت مي وكعدت اشربه..جان يفوت علي ماعاينلي.. بالعجل راح بس وجهه مزورك من صفحة تستاهل ضل لازك بيه شتريد مني..حتى شال البس جدامه واتجنب اضحك واشاقة ملابسي كلهه عادية..لو اوخر الشال شيسوي.. انه وكاعدة جان تجي جلنار بيدهه طه وتغني..
جلنار : كلي ياحلو منين الله جابك.. اندارت علي وكملت حجيهه ..اكول هو وينه الحلو اشو راح..
دنوة : عليمن تقصدين..
جلنار : رائد غييير..ليش اكو واحد حلو بالبيت غيره..
مادري شصار بيه..متحملت كمت اخذت طه منهه خليته بالكع وجريتهه من شعرهه..كامت تصيح..وجع اي والله جايه تتغزلين برجلي جدامي..شنووو انتي..
جلنار : لج دوخري ايدج..هو هم رجلي تره لو يحتاج اكلج .. بعدين تعاي جاي..رائد جاي يمي من جنت بذاك البيت ..

اي حتى لا تضل بگلبج وحخلي يبات عندي ومتشوفي بعد.. انتي شنووو.. زعطوطة اني الاصل عيوني..
كمت اجر بشعرهه وادفر بيهه..كل كلمه كالهه مثل الجمرة اطيح علي..جذابة..رائد ميسويهه تردين تحركين اعصابي حقيرة..اكرررهج..اجة الحجي شافني شلون كامشتهه واجر بشعرهه..شلني منهه وزمخ بيه..
وائل : ووجع..شبيج همشتي البنية..
مجاوبته بس كمت ابجي مالحك على دموعي..كام يصيح علي انه بغير عالم..ماكو صوت باذاني غير حجي جلنار من كالت رائد جاي يمهه..اااخ لعبت روحي منهه ومن رائد .. اريد اصيح بوجهه ..اجت الحجية على صوتنا..
الحجية : ها شبيكم يحافظ..
وائل : هاي جنتج مخبله..شوفيلهه صرفة..
الحجية : ليش مخبله..جنهه ورد بس انتو تضوجوهه..

اجت يمي حضنتني ورحنه للصالة..كعدت تهدي بيه وانه احس انتهيت بعد ..حجيهه اذاني ورائد اذاني اكثر..
انه وابجي : خالة يحبهه..مو كتلج يحبهه..جا انه شنو اخذني وهو يريدهه..خالة حتى جاي يمهه هي كلتلي ..
الحجية : جذابه يمه شلون تصدكيهه..هسة يجي رائد ونفتهم كلشي..لا تحكمين علي من هسة..
دنوة : ماريد يفهمني..خيروح عليهه..هي احسن واكبر مني وشكره وتخبل وانه طلعت السمرة المحد يعاين بوجهي.. كمت اصيح بحركة حتى صوتي انبح.. ويييينج.. اخذي لرائد اخذيييي..اكرهكم ثنينكممم.. اجه محمد على صوتي هو وجلنار..واخلاص..
محمد : كافي تصيحين خبصتينه..
الحجية : انتي شعندج واكفه هنا..امشي ولي لغرفتج.. موزين مكعديج بالبيت جنج حية..يجي رائد وهو يتفاهم وياج.. ما تستحين من روحج انتي .. رجلج بعدهه سنة رجلج مطالعه وجايه تتلزكين برجال متزوج..

جلنار كامت تبجي..اجت اخلاص اخذتهه وهي تغلط علي وتصيح.. عفتهم وصعدت فوك..متت بجي..ماريد ابقى هنا بعد عندي اب اروحلة..نار بيه تاكلني..ليييش رائد لييش.. كمت ادور بالكنتور على ملابسي وابجي..من الدموع بعد ماشوف لبست الصاية وخليت الشال شلون مجان..شويه وانفتحت الباب..فات كمشني من ايدي..
هو وانفاسه سريعه : وين وين..اصبري افهمج
دنوة : اشو وخر ايدك لا تكمشني..روح عليهه..هي تريدك وانت تحبهه وتحبك..بعد شكو جايبني..
رائد : يولي شهلحجي رحمة لامج..
دنوة : جاي يمهه شكد حلووو..ان شاء الله الولد الصالح .. حروح لبيت ابوي وديربالك تجي ..ماريدك ..اكرهك.. كمت ابجي بحركة وادفع بي..ما اجه ببالي غير شكله هو وياهه كمشني من ايدي ونتر بيه..
رائد : لتضلين تصيحين..اصبري افهمج..
حسيت حيلي انهد بعد مابيه ادفع واقاوم..

كمت ابجي بدون صوت بس شهكاتي تنسمع..وهو يعاينلي منتظرني اسكت ويحجي..تنهد وحاجاني..
رائد : يابة..عيوني..بنيتي وداعت عيونج ماصاير شي بيناتنه ثقي بالله متحلى بعيني وحده غيرج..
دنوة : كافي تجذب علي..هي حجت بلسانهه..ماريدك انه بعد ماريييدك..روح عليهه هي اكبر مني وتفتهم ونازكة وشكره بيضه تخبل..انه سمرة شحالني..
رائد : لج باباتي اذا احبهه شلون احبج واجي من عز خبصتي وشغلي اخطبج..كافي لا تبجين..لتروحين تتمرضين مابيج حيل ياعيني..
دنوة : شعليك..مهتملي عود..اصلا حجيهه صدك ماجذبت .. مانسيت شلون شفتك وياهه بالغرفة..وانت عود تكرهه جي اذتني وخلت علي يسوي هشكل وياي..
رائد : اي هذا الموقف غلط واعتذر .. بس مو مال اروح عليهه برجلية..يولي والله ماحبهه بنيتي انتي..

هذا الشكار والبياض كله ميجي بجمال عيونج..وروح ابوي شتردين حاضر
دنوة : طلكهه اذا تحجي عدل.. عكد حاجبه بعصبيه..
رائد : لا ماطلكهه..وين تروح اذا طلكتهه..
دنوة : تروح لجهنم كول امين..اكرهه واكرهك..عفتة واخذت الجنطه بيهه ملابس..كمشهه مني وذبهه..
بعصبية : باباتي لا تصيرين طفلة..ماعندي شي وياهه وهسة اروح عليهه اذا كالت غير هلحجي اطلكهه جدامج
اخذني ونزلنه..صاح وين جلناااار..طلعت هي واخلاص من الغرفة..شافتني واكفة يمه وعيوني حمره من البجي.. كامت تتصافك..خافت..
رائد : اخلاص روحي حضري الاكل هسة نجي..
فتنه للغرفة..جانت دتبجي..صاح بيهه : وجع لا تتبچبچين .. شلون تحاجيهه هج وتقهرين بيهه..
جلنار : هي ضوجتني وماعرفت شسوي فكتلهه هيج.. مو قصدي اجذب..

رائد : ماتضوج عدوهه..ادور تجي ضوجج الج.. عوفي كل هذا شلون تكليلهه جاي يمي وحخلي يبات عندي.. شنو هلكد هيلكي انه وامشي بشورج..ماعندي عكل افكر واعرف شسوي .. من جنت اجي للبيت وانتي وحدج ماجيت يمج تردين وره ما اخذت الاحبهه اجيج.. لا يابة..
جلنار : اي اعتذر .. بعد ماكللهه شي.. اندار علي..
رائد : زين هيج..
عاينتله ورحت..صعدت فوك تمددت بملابسي..جريت البطانيه غطيت راسي ودموعي تنزل..مادري اذا يحجي صدك لو بس يريد يسكتني..اشو كلهه كبل من تريد تحاجيني يكلولي حلوه وسمارج احلى شي بيج..هسة صرت سمرة وملحة.. حتى اخلاص كايلتلي هج.. شبيهه تغيرت ..بين نايمة وبين كاعدة حسيت ع الباب انفتحت ورجعت انسدت..بس صوت خطوات بالكع..اجة وخر الغطى عن راسي..خله ايدة على رگبتي وانه مغمضة بس اسمع..

رائد : مصخنة..مو كتلج لا تصيرين عصبية شلون احنه .. كومي اغسلج..
وخرت ايدة وانداريت للجهة اللخ بدون ما احجي شي.. فهمني شقصد ..كام وراح..هلكد ما بجيت تعبت حسيت صار يوم كامل منايمة..بس خليت راسي ع المخدة نمت..اجاني نفس الحلم القديم..نفس الغرفة الظلمة والرجال الضخم.. ليش ديجيني هذا الحلم..مو تزوجني رائد وانتهى كلشي صارلي كبل.. شنو معناه..خنكني من ركبتي حسيت روحي طلعت ولو هو حلم بس فزيت من النوم مخنوكة وعركانه..رائد جان كاعد ع الكرسي يدخن ويخابر مدري منو..يكلة اي عكبة اجي واجيب الوالدة وياي..شافني كعدت ترخص منه وسده .. طفى الجكارة واجة يمي..كعد ع الحافة..
رائد : كومي اكلي.. الاكل ع الميزتواليت..
دنوة : وين حتروح عكبة..

رائد : خال امي بالانبار..مريض ويريد يشوفهه..اخذج وياي لتخافين..متبقين هنا..لتروح تنتكس حالتج..
عفته وكمت نزعت الصاية والشال..فوك ما ضوجني هو وجلنار بعده جاف ويجاوب على كد السؤال بس بالغرفة.. جدامهم يدافعلي وعبالك ماصاير شي..حاجيتة يكلي مزعلان.. ولا ينفهم ضوجني..رحت غسلت ورجعت للغرفة.. جبت الطبلة وكعدت اكل..بس احس مابي طعم ويجكجك بلعومي.. اكلت شويه وكمت..
رائد هو ويدخن : اكلي زين باباتي..
دنوة : ماريد..اكله انت..اخذت الشال من المجر ونزلت.. كعدت يم الحجية سولفت وياهه..
الحجية : جان رائد يمي كبل نص ساعة..
دنوة : ها..شكال..
الحجية : خايف عليج..يكول صوتهه يرجف بالكوة تحجي .. خاف ترجع تنتكس حالتج..
دنوة : اذا جلنار والبنات هنا طبعا تنتكس..
الحجية : خالة شلون يعني نطردهم..انتي تجنبيهم يعني شنسوي هو هذا المكتوب..

وليدي يحبج تره..بس كتلج الصار مو سهل علي..وهو مينسى بالعجل..اتركي هو ينسى وحدة بس لا تذكري بالسالفة..زين
حركت راسي يعني اي..شوي وسمعنا صوت صياح بغرفة علي..انه مارحت بس كمت وكفت عند الدرج اسمع.. طلع علي هو وكامش مرام من شعرهه ويصيح بوجهه..نزل بالعجل راح علي فك ايده منهه..
رائد : وجع هو هيج الواحد يضرب..
علي بصياح : هاي ماريدهه بعد.. گح...انه صوجيييي
هي واكفة جدامه وتعاينله عادي عبالك ماكو شي.. كام يصيح بالزايد ..رائد والحجي يردون يهدون بي وهو بالطالع
علي : احس مكررررم يالله..هاي الجلبه تعيرنييي.. والله ارد املص راسهه..لك اخذوها من وجهي..
اجت نور اخذتهه وراحن..رائد اخذه هو والحجي وكعدوا بالصالة التطلع للدرج..طلعت معيرتة چي مايكدر يطلع ويخش وهي تريد تشوف اهلهه يكللهه ماكو طلعة بره البيت ولو خطوه وحدة..يحجي بحركة حتى وجهه صار احمر..عفتهم وصعدت فوك..احترك گلبه مثل ما حرك كلبي وظلمني ..شيسوي الله بيك..ذبيت الشال واخذت ملابس رحت اسبح..

اريد تروح البوخة من جسمي..اختنكت صارت بزردومي ادور من سبحت .. كملت وطلعت..رحت للغرفة ملكيت رائد..نشفت شعري وعفته مفتوح..رحت ع الكنتور بخانة رائد ادور كرزات وببسي وهسوالف..هو يجيب مرات ..اخذت حب وببسي فتحت التلفزيون على فلم وكعدت اتفرج..خلص الفلم وخلصت الاكل يله اجة..عفته مهتميت..كعد ع الجرباية وانه بالكع..
رائد : طلعي غير فلم..
درته ع غيره وشلت الحب ذبيته..تمددت من الجهة اللخ اتفرج وياه..مدري شلون مر الوكت وغفيت..كعدت الصبح من وكت لكيت رائد بحضني..محاوطني من خصري وراسه ع صدري على صوت انفاسة رجعت نمت..
كعدت الصبح ملكيتة..مشى اليوم عادي..البنات ملتهيات وي مرام .. بعد صديقتهن شلون ميضوجن عليهه ..كاعدات يواسن بيهه يله لتضوجين ويجي يوم تشوفيهم قابل وين حيروحون .. ومن هلحجي..تريكنه وكعدت اغسل المواعين..كملت اجه كعد ع الكرسي وصاحني..

رحت يمه..سحبني من ايدي كعدني على رجلة..
بهمس : زعلانة بعدج..
دنوة : ليش يهمك..
رائد : تهميني اكثر من روحي..مكدرت انام البارحة الا بحضنج .. باسني من خدي وركبتي..ابتسمت.. كال حضري ملابس الج والي نطلع الفجر هم يله نوصل..
دنوة : ماريد اروح..
رائد : ها ليش..
دنوة : احس حركة بزردومي ومخنوكة من البارحه.. خاف يصير شي هناك ادور تضل حاير بيه..
رائد : من العصبية والغيرة..كعدي بنيتي انتي..شفتي شلون طلع ماصاير شي..بس حركتي دمج..بعدين انه وياج وين اروح.. انعل ابو المايداريج يولي..
دنوة : هههههه..لا متقصر انت .. ابتسم على ضحكتي.. طبت نور هي واخلاص..كمت بالعجل..
اخلاص باستهزاء : لا جان بقيتو تكملون عادي..
جرني كعدني على رجلة ويحجي وياهه : محد كلج طبي جفت للمطبخ..رجال ومرته انتي شنو..

عافتنه وراحت..انداريت علي : ليش هشكل..
رائد : ختولي..متوقعتهه هلكد حقوده..امي فطيرة متعرف تقسي على عدوهه..مو ادور بتهه..انه اعرف اضبهه.. كومي صعدي جدامي ميت نعاس..مانمت للفجر..
كمت صعدت فوك..نزعت الشال وفتحت شعري..رطب من البارحة ..اجه هو سد الباب وقفلهه..حضني من ظهري ومحاوطني من خصري..راسه بين ركبتي ويهمس..
رائد : اريد طفل يشبهج..
ابتسمت : ليش لا..باسني بخدي وركبتي بعدين رحنا ع الجرباية..حضني..ضليت امسد بشعره الي نصه تقريبا شيب والباقي اسود فاحم..بسته من خده وحضنته.. هو بس يعاينلي ويبتسم..لحدما غفى ..غفيت وياه..كعدت على صوت الباب تندك..كمت بالعجل فتحتهه..

زينب : تعالو تغدو عيني..صح النوم..
دنوة : اي هسة..رحت علي..حبيبي كوم متتغده..
بنعاس : بيش الساعة..
دنوة : وحده ونص.. ذب الغطى وراح يغسل..لبست الشال ونزلت شوي واجة هو..كعدنه نتغده..
ام علي : شو مرتك مصارت حامل..لازم بيهه شي..
رائد : مابيهه جنهه ورد..انه ماريد..
كلت بيني وبين نفسي..مو توه يكول اريد طفل.. بعدين هو وينه رائد ..من تزوجنه لسه ماشفته بس جم يوم..لو مشكلة لو ينزل للواجب..انه معندي شي..بس هو جبير..يعني البكدة هسه يصيحولهم ابو فلان..مادري بعد .. كملنا اكل..هو كعد وي خالة ومحمد وانه وي البنات اشيل الاكل..جلنار كالت تغسل مواعين..انه اخذت طه ورحت للصالة العبة ..فاتت اخلاص
اخلاص : شدي حيلج وجيبي واحد مثله.. ولو حيطلع على امه اجلح املح شحالة..هاي اذا جبتي ولد..يمكن بنية..

دنوة : شبيهه البنية..اصلا رائد يريد بنية..
اخلاص : قنعي نفسج حياتي..ماكو واحد يريد بنية.. هاي انتي تردين تسكتي وتقنعي..عاكر..
الحجية : ها عيني سالمين..عاكر شنو..بعدهه يالله توهه متزوجة شنو هلحجي..لاحكين عود..
عافتنه وراحت..اجت الحجية يمي..
الحجية : شلونه رائد..ماتحسن..
دنوة : اي احسن خالة..عايفته براحته ماريد اضغط علي .. كعدنا نسولف وطه بحضني يلعب ويحاجي روحة بعده ميعرف يحجي بس يكول بابا ماما..وره شويه اجت جلنار اخذته وراحت للغرفة.. مشى باقي اليوم عادي ..بالليل كملت شغل رتبت البيت وصعدت..رائد جان طالع ماعرف وين.. صعدت غيرت الدشداشة وفتحت شعري..سويت الجنطة لباجر نروح لخال الحجية وشغلت التلفزيون كعدت انتظره ..

وره ساعه اختنكت خنكة ماعرف شوصفهه.. ماكدر اتنفس واحس الدنيا هلكدهه.. ضليت افتر بالغرفة رايحة راده.. لبست الروب وخليت الشال ع راسي ونزلت جوه.. فغرت روحي مادري شسوي ماردت اروح ع الحجية خاف نايمة وافززهه خطيه.. سمعت الباب انفتحت.. رحت بالعجل اول ماشفته حضنته واشهك اريد نفس.. اخذني بهدوء كعد ع القنفة وكعدني بحضنه..
رائد : شبيج حبيبي..
عاينتله : مداكدر اتنفس..مختنكة..نفسي ضيق..عفية امشي وياي للحديقة اموت اذا اضل هنا..كمت واجر بايدة اريد يطلع البيت حيخنكني..طلعنه ..اكو حصيره بره صغيره فرشهه وكعدني بحضنة..
رائد : ضايجة من احد..اخلاص ضوجتج..
حاوطته من ركبته وراسي على جتفة : لا محاجتني بعد.. بس مادري شبيه..مو كتلك ماريد اروح خاف يصير شي..

رائد : جا اعوفج هنا..ادور يصير بيج شي ومحد يهتم .. ع الاقل انه موجود واعرف اتصرف..
رفعت راسي عاينتله صافنة بعيونه لو شفايفه : شوكت حتنزل للواجب ..هم اطول مثل ذيج المره..
رائد : هلمرة مطول اي..بس اذا صار شي اجيج بالليل مثل ذاك اليوم..ذكرييين..
دنوة : هههه..احلى ليلة والله..خليت راسي على چتفه.. ماعرف شيصير بيه اذا عفتني ورحت..اضيع..
رائد : يمج وماعوفج للموت..جم بنية عندي..هي وحده وشالعة گلبي بغيرتهه وسوالفهه..
دنوة : ها صرت شالعة كلبك يعني..هج صارت..
بضحكة : لك مو اكلج شالعة گلبي..يابة احب شلاع الگلب منج ..كلشي منج حلو زين وشين..اتقبلة وانه الممنون .. موزين اخذتج وصرت اعاين براحتي وين الكاهه هاي.. اصلا جان حلم والله وتحقق الحمدلله..
دنوة : بس انه ماحبك..

رائد : سوالف هاي..انه اريد الحجي ع الفراش هذا الصدك .. حجي العصبية ماصدكه باباتي..
يبو شكد خجلت وبين علي بالعجل : صدك متستحي..
رائد : مرتي حلالي ليش استحي..لازم اعلمج متستحين
ابتسمت : الله كريم ..حضنتة وهو هم ..ثنيناتنا سكتنا.. شوي تحسنت كمت اتنفس عدل..
رائد : يله ندخل..
همهمت يعني اي..كمت وهو همات نفضت ملابسي وانتظرته .. قفل البيبان واخذني وصعدنه فوك..ذبيت الشال والروب.. ضل صافن ..انه نسيت شلبست..
رائد : اكول ليش لابسة روب..تعاي هنا.. اليوم اعلمج متستحين .. ارد اشوف منو يستحي..
وجهي صار نار متت..ماجيت ضليت واكفة ع الميزتواليت عود داسوي شعري..اجة قفل الباب وطفى الضوة.. حضني
دنوة : هاي ليش..مو داسوي شعري..
بهمس : هسة يتخربط هنا ..تعاي..

هدوء الغرفة وظلمتهه دفعني استسلملة..هادئ وحنين بكل لمسة وكلمة يحجيهه بصوت ذايب..اليشوف شكلة يكول هذا صدك قاسي وماعنده حجاية لينة وحنينة هو بالعكس بس شخصيته عامة علي..حضني وراسه ع صدري..
دنوة : شيكعدك باجر..
رائد : نمت زين اليوم.. سكتنه ثنيناتنه بس صوت انفاسنه .. باسني من ركبتي وايده محاوطه خصري .. احبج .. ١٥ يوم بالدوام مارحتي عن بالي..احسب دقيقه دقيقه بس خاطر ارجع اشوفج..بس اجيت ع المشكلة هاي..والله مشيت وره گلبي مثل الاعمى.. مستحيل تسوي شي يقهرني .. وعلي اعرفه شنو ..من اجت امي حجتلي كلت الحمد لله ما ظلمتهه وصرت وياهم عليهه..
اسمعلة ومبتسمه ..رحت بغير عالم وي كلماتة واحساسة.. حضنته وبسته من شفافه..طولت بيهه بعدين وخرت..

كام يضحك ..باسني من خدي ..
رائد : هاي بمكان ما تجاوبين..
دنوة : اي عفيه صحيح..احسن مو..
رائد : ريت كل الاجوبه مثل هاي..بس منج مو احد ثاني
دنوة : احبك.. متعوفني مو ..
رائد : شحده اليعوفج..نامي مرتاحة عيون رائد ودنياته
خليت راسي على صدره ونمت..كعدت الفجر على صوته يكعدني .. كمت لبست الروب واخذت ملابس..رحت سبحت وبدلت وطلعت..اجيت نشفت شعري شلون مجان ولبست الشال..اخذت الجنطة ونزلت جوه..الحجية جانت كاعدة تنتظرنا .. رائد واكف يحجي وياهه..
رائد : شلون اعوف البيت هو وفلوسة بيدهم..
الحجية : شنو قابل هم يبوكون..لو حرامية..
رائد : لا مو هيج.. بس ميصير..اكول اذا عندج فلوس بكنتورج جيبيهن اضمهن عندي واقفل الباب..

راحت لغرفتهه..اندار علي صاحني يمه..تقدمت.. دنج باسني من خدي وهمس : همزين لابس بلوز..جان بين الاثر.. وخرت عنه شفته مبتسم..يا اثر؟.. وخر الركبة مالت البلوز .. يبو شمسويه انه..درت وجهي محجيت..اجه حضني..
رائد : شفتي شلون خليتج متستحين..
مادري شوصف..فشلت وابتسمت مادري شلون..ابتعد عني .. اجت الحجية انطته الفلوس..راح دقايق ونزل بيده القفل
الحجية : خاف ماعدهم وين يروحون..
رائد : خليت فلوس يم خالي..لا تخافين..
طلعنه..قفل الباب البره وشمر المفتاح حتى خاف واحد يريد يطلع ..كال منطول يوم يومين بالزايد ونرجع..الطريق كلش طويل..جم مره نمت وكعدت يالله وصلنه..بس طبينه للانبار الف سيطرة وكفتنه..منين جاي..من البصرة يوكفونه..بس ع الباج مالته نطلع..طبينا لمنطقة مدري شلون يحجون.. مفهمت شي بس هو يحاجيهم..

بعدين طبك السياره براس الفرع وطبينا نتمشى لبيتهم..انه دخت من الطريق بعد ماشوف.. زين وصلت للبيت..طلع رجال اربعيني استقبلنا وطبينا.. بيتهم جبير بس مو ذاك الكبر..يعني زين..مدري انه متعوده على بيتنه وبيت جدي..كعدنه بالاستقبال..الظاهر ماعدهم هواي زلم بس هذا الاربعيني بعدين فات رجال جبير كلش.. كامت الحجية على حيلهه وراحت يمه..كامت تبچي وحضنته حتى هو نزلت دمعتة..كام رائد سلم علي.. انه هم كمت بس ماعرفه يعني شريد احجي مثلا..
الحجي : حدروا يابة عشنو واكفين..حنا مالنا غرابة..
شلون يحجون حلو بس مافهمت عليهم..الرجال كام بقى بس الحجي..شاورته..هذا شديحجي..
رائد : هم هذول هيج يحجون..قابل كلهه مثلنا..
شويه واجه الرجال جايب چايات وكليچة .. ماردت اخذ بس رائد اشرلي بعيونه فاخذته بالجذب شربت شوي ورجعته.. عود عيب يعني..

وره ربع ساعه اجن نسوان ثنين.. وحدة اكبر مني بسنوات والثانيه جبيره..سلمن علينه وراحو.. خلص اليوم يمهم ..انه صارت غرفتي وي البنيه والحجية وي المره الجبيره ورائد ماعرف وين..غيرت ملابسي وطلعت يمهم بالمطبخ .. سوالهم حلوه ..طيبين ويضحكون للهوى العالي.. كمت اتعلم من حجيهم هم يكولون انه مثلنه..حدري يعني كعدي.. ويكولون واو .. احبو .. اريدو ..هيج يعني..صبينا اكل وحدنا بس الحجي ماقبل..كال معتبرينا غربة..فكعدنا بالصالة تغدينه

كملت وكمت اغسل..اجة رائد..
رائد : اليوم اتخبل اذا مانام وحيحرموني منج..
دنوة : هههههه..لا عيني متتخبل ماعليك شي.. راد يحجي عفته ورجعت للصالة..ضل يعاينلي ويخزرني..عود اذا صارلي مجال اجيك .......

يتبـــــــــــع..................

*القفلة عاديه لأن البارت الجاي مفاجئه ممتصوريها ؛ طفره مثل منگول ..بس هوب هوب ويايه .