رواية اسألي عني الليالي الفصل التاسع وخمسون 59 - بقلم رقية جاسم

عذبني أقبل .. اجرحني أقبل ..
بس لا تگلي .. انّك نسيت ..

تزعل احبك .. ترضا احبك ..
وبكلشي منك .. اني رضيت ..

قناة التليگرا

حساب الانستگرا

الـبـارت الثامن والخمسون...............

مع ذلك ما كدر ينسى ذاك اليوم..ما اعرف يمكن يحسه شي مخزي وعيب..لأن هو ما جان هيج..بس بكل مره احجيله نفس الحجي..ان انه وياه واعتبر ذيج اللحظة ما صارت..
بيوم كاعدة بالغرفة جنت توني طالعة من الحمام دا انشف شعري ودك التلفون مالتي..شلته .. سرور.. سلمت عليهه وحجينه طبيعي..بس بلسانهه سالفة حسيتهه..كتلهه : شنو شبيج تريدين تحجين شي..
سرور : اي والله..بس ياريت تسمعيني للاخير..
دنوة : اي اسمعج كولي..

سرور : شذى باعت البيت..ابوهه كال شعدهه باقية وحدهه هناك وهي كل اخوانهه واهلهه موجودين ببغداد..
دنوة : شلون تبيعه..والوراثة مالتنه..
سرور : ابوج الله يرحمه مسجل البيت باسمهه كبل لا تصير بي جلطة.. لمن صرتي زينة وره ما سوتلج سحر..مجان يعرف بيهه هي مسويته..فمسجله باسمهه..بهلحالة بعد لا تنفع وصية ولا هم يحزنون..
دنوة : يمعوده..شدتحجين..شوكت باعته شنو هلسرعة.. هي كالت ابوج مسجل البيت باسمي بس ما صدكتهه..كلت دتغثني وكالت هيج..بعدين جدي وعمامي وياهه ع الخط .. دائما رزان تحجيلي شلون يساعدوهم..ليش دتسوي هيج
سرور : اي والله..ما اعرف يعني اني هم استغربت لمن سمعت من ابوية..

كال احنه خوما نجبرهه..بيتهه وهي حره بي..الشرع وياهه حتى القانون همين..لو ابوج كاتب وصية بيج جان صارت بيهه لوفات ممكن وشغلات شرعية..بس ماكو..
دنوة : ما ادري شكلج..شريد اسويلهه..كاعدة ببيت رجلي ومرتاحة ما احتاجهه هي وبيتهه..بس اعتب على ابوي سلم بيت تعب علي وصرف دمع عينه بيد هيج وحده..
سرور : ربج ياخذ شي وينطي شي..البيت ما صارت بصالحج بس عوضج بصگر..
اخذت نفس وزفرته : صحيح..هي هاي السالفة الردتي تكوليهه..
سرور : لا بعد..
دنوة : ديله احجي عبالك اجر الحجي منج بالكوة..

سرور : جدي وابوية رايدين يشوفوج ذاك اليوم بس انتي ما طالعة تشوفيهم..
دنوة : ليش اطلع اشوفهم..فوك ما طردوني..
سرور : ادري..بس جان رايدج بشغلة.. بالبداية لمن توفى ابوج وطلعوله شهادة وفاة صار السبب هو جلطة قلبية فجايين على شذى..كايليلهه هو صاير عصبي مسوي شي..كايلة لا ما صاير شي هو على فجأة صاح نفسي ضاق واخذناه للمستشفى بعدين انطاك عمره.. الدكتور كايللهم غير شكل كايل نوبة عصبية مفاجئة وتوتر هيج مسويتله..هو قبل يومين رايح للدكتور مچيك وضعه كايلة كلش زين وتمام..حتى قايسله مستوى الدهون طلع عنده طبيعي بالنسبة لعمره..
عاد وره الفاتحة بايام كام لو ابوية لو واحد من عمامي

يروحون لشذى علمود المصرف والبنات..بعدين وره فترة .. قبل لا ترجعين من سوريا ابوية جاي عليهه ينطيهه الفلوس وجايب مسواك..هي محاجيته.. كايلتله انتو ما قصرتو ويانه وسويتو الواجب بس اني ارد ابيع البيت واسكن يم بيت اهلي.. ابوية هيج كال لأن بالبصرة وحدي شعندي..ع الاقل ببغداد كلهم موجودين خواني وخواتي..ابوية وامي..
ابوية كايللهه شلون تبيعين البيت والوراثة شلون..قابل هو مسجل باسمج..كايلتله اي سجله باسمي قبل لا يتوفى معناهه اني حرة بي شتصرف اتصرف..ودا اشوف هذا الصح.. ابوية متعارك وياهه كايللهه شلون تاخذين البنات وتروحين هناك شمدرينه وين حيسكنن..شمدرينه ما انتي جذابة بس علمود تشوفيلج واحد وتزوجين..
هي سامعته يكول هيج ومتخبلة..

يله يله..عفتو اخوكم يموت بحسرته ومحد سأل عنه.. بيكم زود روحو على بنته الجبيرة هي موتته..جان يريد يشوفهه كال احس نفسي راح اودع..يخابر عليهه وهي ما تجاوب.. يخابر على رجلهه وهمين ما يجاوب..شنو معناهه هاي.. هو من قهره انجلط ومات..وانتو لاحكيني ع البيت هذا..
ابوية ما مصدكهه ومتعارك وياهه..صايرة مشكلة جبيرة وجايبين صگر لبيت جدي..صايرة لغوة وعركات لحد ما جدي طرد صگر..كلة ما طول سويت هيج وما خليتنه نحاجي دنوة معناهه انت تدري بيهه شمسويه وهي السبب بموتة ابوهه .. ضالين يحاجون شذى ع السالفة هاي وجايبيهه للبيت.. محلفيهه القرآن هي وسما على حجيهه ودنوة شمسويه.. بس رزان جانت مريضة ما حلفت..وهاي لحد ما رجعتي وصارت السالفة بوجهج..

بس والله..الشهادة لله..اني شفته بعيوني جان كامش ايد صگر ويحاجي..بس ما سمعته زين..لحد ما هد ايده .. صگر غمض عيونه وغطاه لحد راسه..لمن طلع حاجيته.. كتله شكلك عمي..كال ديربالك عليهه لتقصر وياهه خطية.. و خلتحاللني وتواهبني.. اريد اروح مرتاح..ادري قصرت وياهه بس الحقد عماني.. فاني من شفتج رأسا كتلج تره جان يوصي بيج .. لأن ادري شحيصير والصدمة الحتشوفيهه شنو..
سكتت ما حجيت..ليش اكو شي ينحجي وره هلحجي هذا.. ما اعرف شصارلي..گلبي انعصر عصر..عبالك واحد جابه ويكطع بي بالسجينة لحد ما صار قطع صغار..شمسويه خاطر هيج تكرهني..بس اريد اعرف شمسوية..اجيت يمهه اقل الشهرين بهذلتني تبهذل..حرف لا ما كتلهه..شتكلي اكللهه نعم وحاضر..

بعدين هي تسوي هيج وتذبهه براسي..ليش.. جي فقيرة ويتيمة..شنو هاي من مرة اب..جهنم بحد ذاتهه.. طعنتني كسرتني كسفت احوالي..أذتني بكلشي يطلع بيدهه.. ليش كل هذا..بعد حتى ما اعرف احجي اخذت نفس بهدوء وسكتت
سرور : دنو تسمعيني..
دنوة : اي..
سرور : ابوية يريد يشوفج..اكو قطعة ارض جان مشترك بيهه هو وعمي الله يرحمه..باعهه وانتي لازم تاخذين حصتج منهه .. هو خابر على شذى انطاهه علم علمود تجي تاخذ حصتهه هي والبنات..لأن يعتبر ورثة..
دنوة : وين صايرة هاي..
سرور : بغداد منطقة الاسكان..
دنوة : اشوف صگر شيكول واخابرج..اذا رحت وياه فبس اخذ الحصة..ماعندي حجي وياه..

سرور : على راحتج..اني ادري بيج ما تسوين هيج شي.. وتحبين ابوج حتى لو هو مو زين وياج..وحاجيتهم.. والله حاجيتهم وكدام صگر صار كلشي..كتله دنوة تربت عدنه وانتو تعرفوهه زين..شلون تشككون بمبادئهه..بس الشيطان وين يروح..وهي حلفت قرآن.. تدرين حلفان القرآن ما منه رجوع .. بعد شسوي..
دنوة : حياتي..ادري بيج ما تقصرين..
حاجيتهه دقيقتين او اقل بعدين ودعتهه وسديته.. انشف شعري واعاين لروحي بالمرايه : هو هذا حظج..صار سنين على حطته مصخم مصخم..انه مو ع الفلوس والسوالف هاي .. ما تهمني اصلا..كاعدة ومرتاحه يم صگر..بس ابوي شلون يخاطر هيج مخاطرة ويسجله باسمهه..هلكد جان يحبهه يعني معقولة.. مدا استوعب..حتى ما فكر بيه..
كلماته لمن جان يوصي بيه يم صگر بقت براسي..

كمت اتخيل نومته وشلون حاجاه لصگر بصوته التعبان ولسانه الثكيل..حسيت كتلة جمر صارت بزردومي..دنجت راسي لحضني وكمت ابجي..اختنكت بالبجي..تذكرت الحلم مالت ذاك اليوم..جانت صفاحه توجعه ويعاين علي هو ودموعه بعينه .. شنو معناه..يمكن جان يدري حيصير هيج..
ما ادري.. دخت هلكد ما بجيت..مشتاقتله اريد اشوفه.. هو انه من جنت بسوريا اكول شوكت ارجع واشوفه.. ما صدكت تحسن وياي بعدين يروح.. مسحت دموعي اريد اسكت بس ما اكدر.. دقايق وانفتحت الباب فات صگر..رفع حاجبه متفاجئ مني..عيوني حمر دم من البجي..
اجه وكف وراي و ادي على جتفي..
صگر : شبيج باباتي..

كمت من مكاني انداريت علي..ذبيت روحي بحضنه وحاوطته من ظهره..دموعي ما احس بيهن بعد..صارت على خدودي ورگبتي.. كام يمسح على شعري بيده البيهه رجفة..
همس : حبيبي شصاير..ليش البجي..
سكتت ما جاوبته..اخذني من ايدي كعدني على حافة الجرباية هو دنج جدامي يمسح دموعي ويحاجيني..
صگر : غير اعرف شكو..شبيج يابة..
دنوة : مشتاقه لابوي شسوي..
صگر : الله يرحمه..اخذج وعد بس اصير زين..
نزلت من الجرباية كعدت يمه بالكع..خليت راسي على فخذه ومكرفصة روحي..كام يمسح على شعري هو وساكت.. دقايق وحجيت : صگر..
صگر : ها گلبي..

دنوة : سرور خابرتني كبل شوي وحجتلي..
صگر : شحجتلج..
دنوة : شذى بايعة البيت جي ابوي مسجلة باسمهه.. كالت هي كايلتلهم دنوة خلته يموت بحسرته هو جان حاس حيصير بي شي فمخابرني عساس وانه ما مجاوبته..انت همات مخابرك وما مجاوبه..محلفيهه ع القرآن هي وسما جدامك.. صحيح هلحجي..
صگر : اي صحيح..حلفت هي وسما..
دنوة : ليش ما كتلي..
صگر : ما يحتاج تعرفين وتغثين روحج من اختج..عوفج من شذى..هي هاي مو بشر خاطر الواحد يحجي وياهه.. بس اختج موقفهه وصخ..رزان هي خابرتني بنفسهه وره يومين من السالفة..كالت اذا خابرت دنوة اعتذرللهه بمكاني..

كتلهه واصل بس ما حجيت..انه حتى ما كلت لمحمد.. محد يدري لحد ما رجعتو وحجيتلج بس رؤوس اقلام ما دخلت بالموضوع..مالج خلك مغثة..
رفعت راسي اعاينله هو ويحجي..كال : لا تكطعين علاقتج برزان..اختج وتحبج .. خاطرهه مكسور عليج بذاك اليوم .. بس ما تكدر تعوف امهه..هاي لحد كبل لا تتمرضين انه عندي اتصال بيهه..وراهه انقفل الخط مالتهه..بعد ما ادري عنهه شي لحد ما كتيلي كبل جم يوم..
دنوة : هيج تكول..
صگر : اي بنيتي..وانتي براحتج حبيبي..كليلي سرور شرادت منج..بس كالت هيج..
دنوة : لا كالت ابوج مشترك وي ابوي بقطعة ارض ببغداد منطقة الاسكان..

يريد يبيعهه بس حصة ابوي متنباع لازم تتوزع علينه.. انه والبنات وشذى..شتكول انت..اروح..
صگر : براحتج..تريدين اخذج ماعندي مانع..بس مو هسة.. بين ما اصير زين وتروح هاي الرجفة..
كمشت ايده بين اديه..على لحظة تكوم ترعش مثلي لمن تمرضت هيج جنت..هو ساكت ما حجة..صار هدوء كلش.. كتله : صگر..انقهرت من عرفت البيت انباع..عبالك تعب ابوي كله راح..ولو بسببه..بس حرامات..
صگر : هو اعرف بعد..يمكن جان ما يدري حتبيعه..
دنوة : يمكن.. اخذت نفس طويل وزفرته..كمشت ايد صگر لفيتهه على خصري وتقربت حضنته..امسح على شعره واحاجي : لا تعوفني مثل ابوي..ضل وياي..ما اعرف شسوي بدونك..اذا انت ماكو احس ضايعه..

سحبني لحضنه وباسني من خدي..
همس : شمستي شلون اعوفهه واعيش بالظلمة..
كومني وراح ع الباب قفلة..اجه ع الجرباية تمدد وصاحني اكعد يمه..تمددت بسده وراسي على صدره.. حاجاني ويتغزل بيه..حبيبي وحياتي..انه بس مبتسمة..
صگر : دناوي..دتاخذين دواج..شصار..
دنوة : رحت ع الدكتورة لمن جنت ماكو..كالت وضعج متحسن وصاير كلش زين..انطتني ادوية مثبتة للنسبة وفيتامينات .. كالت عندج فقر دم وبعد جم شغلة..هاي كبل كومة.. هسة اكيد صرت زينة..
صگر : يله خير ان شاء الله..مو كتلج لا تأذين روحج كلشي ينحل وانتي بعدج صغيرة خوما بالتلاثين..
دنوة : صحيح..الحمدلله..هسة هذا مو مهم..المهم انت تصير زين..

حتى اخاف ابجي يمك لو اضوج..اكول هو تعبان خطية.. اجي انه تجمالة شكو..
ابتسملي وايده حاوطت ظهري : والله حاس بيج..ادري بروحي متغير..بس مو بيدي..بعدني تعبان..كل ما اشوف ايدي شلون ترجف اتحسر على ذاك اليوم الطلعت بي وي مهدي.. انه هيج يصير بيه..والله ما مصدك يولي..من زمن صدام انه بالجيش .. شفت كلشي..حتى الاعدام شفته بعيني.. بس هذول شوفوني الويل.. تعرفين شنو يعني واحد ما يدري الدنيا ليل لو نهار.. كلشي عشته هناك ديجيني بالحلم كل ما انام..اريد ابقى كاعد لحد ما انسى بعدين انام..جا انه الارفع صوتي عليج.. صار سنين كل السويته يمكن مرتين صيحت ومتندم لحد هذا يومنه.. وهسة كلمة والثانية زمخت بيج..

دنوة : هسة انت مقهور على هاي..ميخالف انه راضية.. بس لا توتر روحك ادور تتمرض بالزايد..الدكتور كال اعصابه مشدوده لا تخلوه يتوتر يصير اسوأ..
صگر : الله كريم..اشوف وين تاليتهه..
دنوة : اخذت دواك اليوم..
صگر : اي يابة اخذت..كومي طفي الضوه خلانام..
دنوة : بس بعد وكت..
صگر : ميخالف..نعسان اشو..
حركت راسي يعني اي ورحت طفيته..ردت اطلع صاحني : تعاي يمي استوحش وحدي..
گلبي عصرني لمن كال هيج..كام يخاف من الظلمة.. ما يبقى وحده..الا انه وياه..هاي اذا طفت الكهرباء يتهستر لحد ما اجي يمه يله يرخى..

دورات يصير زين..دورات يصير ويتعارك وي الكل.. خلكة كصير وعلى طول تعبان..بعدهه حالته مو ثابته..
رحت يمه حضنته لحد ما حسيت انفاسه ثكلت يعني نام.. على صوت انفاسه غفيت..
وره يومين جنت سهرانة وياه للفجر..راسه يوجعه .. نعسان وميقبل ينام..اخر شي قريت على راسه لحد ما غفى بحضني بقيت على وضعيتي خفت اتحرك ادور يكعد..
كعدت الصبح على صوته..كمت لبست الشال ونزلت بالعجل واكف بالصالة ويصيح بصوت عالي..وعليمن.. على اركان .. هو ما يتعارك وياه ما ادري شصاير..
صگر : لاااااا انه سمعتك تحجي عليهه..لييييش..
اركان : يابة والقران ما جايب طاريهه على لساني.. مو يمهه وداعت امي..دا احجي عن غير وحده..

صگر : لك شنو زعطوط جدامك..دا اكلك سمعتك.. اعتذر منهه يله..يلهههه..
نزلت وكفت يمه..اندار شافني ورجع يحاجي : يله هيانهه.. اعتذر لا تعبني..
دنوة : شكو ليش يعتذر..
ام مخلد : عيني رجلج يكول سامع ابني يحجي عليج.. هو اركان بحالج قابل..بس الله يسلمه قافل..
اركان : عوفي يمة..اعتذر وحقج عليه..ولو ما حاجي والله.. ششفت منج حتى احجي عليج..
دنوة : ما صار شي..
كمشته من ايده وصعدنه فوك..طول الدرج هو يحجي على اركان..هذا الادبسز الارعن..عباله ما اسمعه ماخذ راحته.. بس بسيطة انه الك..

ادري بي ديخربط..كبلهه هم سواهه وتعارك وي مخلد.. يكلة انت السبب..السبب بشنو ما كال..وهم بالكوة يله كدرت اسكته .. كلت ناخذه لدكتور نفساني..بس ما قبل..
طب للغرفة كام يصيح علي : شبييييج..شبيج فاهية .. فتيتي گلبي ليش هيج..
دنوة : شبيك ياعيني..احد مضوجك..
سكت ما جاوبني..رحت يمه حضنته وبسته.. كمت ابجي فرفحت..حاجيته وانه نص كلماتي ما مفهومة : ما متعودة عليك هيج..اصحى لخاطري..لخاطري كبنتك..ترضا تعوف بنتك وحدهه.. بعدت عنه ومسحت دموعي ..اخذك للدكتور.. لازم تروح..حباب .. تعرف شيصير بيه لمن اتذكرك ذاك اليوم.. يوم تصير زين يوم لا..
صگر : ما اريد..

دنوة : لا تريد..وتروح اليوم..
تقربت منه ورفعت نفسي..بسته من خده وكمشت ايده.. كل ما يصير عصبي تكوم ترجف بالزايد..همست : ادري حتروح لخاطري..مو..
سكت ما انطاني جواب..عاينت بعيونه حسيته هدأ : ها.. تروح مو..ادري ما تكسر بخاطري..
صگر : اروح..
اخذت نفس طويل وزفرته : تريكت..اخذت دواك..
صگر : لا ما كدرت..ايدي من الصبح ترجف..
دنوة : روح اكعد..هسة اسويلك واجي..
راح تمدد..نزلت جوه طبيت للمطبخ اسويله اكل..ع البجي هذا من الصبح حتى مالي نفس اخلي شي بحلكي..
شواي وفاتت جوان..وكفت يمي تحاجيني..

جوان : شلون صار صگر..
دنوة : زين..هديته بين ما اسوي اكل..
جوان : سوده عليه..ميستاهل والله..
عرفتهه تريد تغثني..نترت بيهه : اي والله ما يستاهل حبيبي وشمعة دربي.. هو متعود علي تره..حتى اكل ما يقبل ياكل الا من ايدي.. ان شاء الله يصير زين ويرجع مثل كبل..
عاينت علي بطرف عينهه وراحت..كبر حتى كبر.. رجال مريض وتتمسكنين سوده عليه وسوده عليه..سوده من صدك كولي امين..
كملت وصعدت فوك..رحت فتحت التلفزيون واجيت كعدت يمه خليت الصينية بحضني واوكله ضليت تقريب النص ساعة.. طول هاي المدة هو يعاين على حركة ايدي..ما اعرف بشنو ديفكر..

يمكن تذكر حالتي كبل..همات جان هو يوكلني..
خلصت وانطيته الدوه مالته..كمش ايدي بايده الترجف..
صگر : لا تتأخرين..
دنوة : تدلل..
بسته ونزلت..جانو متريكين ومخلصين..ليش محد مفكر يسويله اكل..بس بالاسم يحبوه ويدللون يمه..
خالة جانت بالمطبخ..كلت احاجيهه ع الدكتور..
دنوة : خالة..خلناخذ صگر للدكتور النفساني..
الحجية : والله انه هم كلت..اليوم اخلي مخلد يروح يحجزله شوف شوكت عنده مجال ونروح..بلكت اليوم..
دنوة : يله خوش..انطيني خبر عود..
الحجية : ان شاء الله..الله يساعدج يمة..وحده غيرج وين تتحمل هيج..

دنوة : خالة قابل بيده..لو قليل السوالياه صگر..شما اسوي قليل بحقه..ما مسويه الا الواجب..
الحجية : زينة العقل..الله يرزقكم بطفل كود..
دنوة : من حلكج لباب السما..
ضلت كاعدة يمي..ساعة تجي شهد وياي.. ساعة سلمى.. اسماء ملتهية وي البنات معليهه.. خالة حاجت مخلد علمود يحجز لصگر..كال العصر اطلع للعيادة مالته اشوف شوكت عنده حجز..
انه سويت الغده وصبيته بمواعين وخليته ع الكاونتر.. عاد البنات اخذوه للهول..كعدت اتغده شلون ما جان.. تفكيري كله يم صگر..كملت وصعدت اشوفه..لكيته نايم..اخذت نفس براحه ورحت تمددت يمه..حضنته ودموعي تصب.. نومته مخربطة .. يكرفص روحه يله ينام..

ساعة اي وعشرة لا..ذاك اليوم يكلي حبيبي وبنيتي.. واليوم تخربطت حالته..تعبت وياه ما ادري شسوي..لا هو مثلي خاطر اكول هيانه الكتاب مبين من عنوانه..ولا هو طبيعي
شوي وكام يهذي .. يحجي بصوت ناصي كلش.. تقربت منه يله سمعت عدل..
صگر : كتلك لو تموت ما اصيح.. لج ضربني..انه انضرب.. انه يصير بيه هيج..
ضل يحجي لحد ما سكت وحده..اكيد اجاه نفس الحلم.. هسة شلون يعني احرمه من النومة علمود ما يحلم..
بقيت كاعدة وياه لحد ما غفيت..
كعدت العصر على صوته يحاجي مخلد..عدلت نومتي والشال واسمعهم..
مخلد : حجزتلك على باجر بالخمسة ونص..

صگر : يابة مابيه شي..هاي شلون بلوة..
مخلد : انت ناسي نفسك..على ساعة وساعة تتوتر وتصيح ع الكل..مابيهه شي اذا رحت للدكتور..ما راح يسويلك شي .. انت مثقف وتعرف ماكو عيب بالموضوع..
صگر : مو ع العيب..بس انه تعبان..الدكتور شيكدر يسويلي .. ينطيني علاج للتعب مثلا..
مخلد : يكدر كلشي يسوي..انت بس لا تعاند..
صگر : يله هاهية..ما طول حجزت..
مخلد : عندك العافية خوية..حنزل..بس ردت انطيك خبر..
صگر : متقصر..
طبطب على جتفه وراح..اجه كعد يمي..خله ايده بين اديه .. استغربت من الحركة هاي..
عاين علي وعيونه حزينة : تعبتني..

تقربت منه حضنته..لف ايده على خصري وشد علي.. ما حسيت بشي غير شهكاته..صوتهه ينضرب بالحايط ويرجع ضعف بإذاني..بعدت عنه وحضنت راسه بإدية.. يبجي بجي بدموع ويشهك بصعوبة..كسر گلبي.. وخر ادية وحط راسه بحضني..ردت احاجي سكتني..
صگر : لا تحجين..خليني..
سكتت بس خليت ايدي على شعره وامسد بي بلكت يهدا.. ضل يشهك وايدة ترجف وي كل شهكة..اخر شي حجة..
صگر : تعبان شلون ارتاح..راسي يوجعني وصدري يضيق علي على فجأة..ما متعود هيج..ما متعود..
دنوة : حبيبي مو تكول كلنه نتعب..وانت تعبان هسة.. يرادلك فترة ترتاح ويروح التعب كله..
صگر : شكد هلفترة .. حيصير شهرين..

دنوة : انت هناك سبع شهور..اكيد متجي للشهرين هذول.. خلي ايمانك بالله جبير..وما طول حتروح للدكتور يعني حتصير زين..انت مو تصدكني..
صگر : اي..
بسته من راسه وحضنته..دقايق وسكت.. خلص اليوم وصوت شهكاتة بإذاني..ما متعوده علي هيج..هو همات ما متعود على روحه..الله ينتقم منهم شمهما يكونون..ما يستاهل حبيبي.. بالليل تأخر يله نام..اجه فتح اديه وحط راسه بحضني.. كال اقري على راسي خلانام..قريت يله غفى..
ثاني يوم العصر ساعدته يبدل وانه هم بدلت بعدين نزلنه.. رحنه انه واركان وخالة..اول ما شفت الدكتور حسيت اعرفه .. بعدين من طريقة كلامه واسمه تذكرته..نفسه الاخذني علي ابوي لمن تمرضت..

كام يسأله وهو يجاوب طبيعي..اسمك وعمرك.. منو اجه وياك .. هذوله منو..بشنو تحس..شوكت تنام .. صايرلك شي اخر فترة..وغيرهه.. بعدين سألني الي..
الدكتور : شنو تصرفاته معاج ومع غيرج..متشابهه ..
دنوة : لا دكتور..هو عصبي وي الكل..ويصيح علينه على فجأة بس متعلق بيه..يعني الاكل مني ياخذه والدوه انه انطيهيا
الدكتور : علاج شنو ياخذ حاليا..
دنوة : طلع عنده قصور بعمل وظائف الكبد فكتبله الدكتور علاج الهه..وأبر فقر دم بس خلصن صار جم يوم..
الدكتور : صحيح قصور عمل وظائف الكبد تسبب رعشة وارتجاف باليد..
دنوة : اي هو كال الدكتور..بس ايده بعدهه.. يعني يوم ترجف على فجأة ويوم من الصبح لليل..

الدكتور : هسة نجي نقطة نقطة..الديصيرله حسب تشخيصي مجرد ما ردة فعل لا اكثر..والحالة البسيطة منهه.. الي متحتاج علاج قوي..فقط نوع واحد من الادوية ياخذ حبابة بين يوم ويوم الى ان يخلص الشريط .. تقلل من ارتعاش اليد وترخي الاعصاب..من اسبابهه حصول حدث غير متوقع.. والتعنيف حضرتك كلت تعرضت للتعنيف..
صگر : اي دكتور..
الدكتور : سهلة ان شاء الله..واحنه كأطباء دائما الحالات من الرجال التجينه يكون علاجهم وتقبل جسمهم للعلاج اسرع.. بين ما ينتهي العلاج حتكون بصحة جيدة .. لكن بشرط.. تخلي ببالك انك لازم تتعدى هاي الفترة..كل انسان يتعب .. وانت حسب عمرك والحادث التعرضتله فتصرفاتك جدا متوقعة .. مابيهه شي غير مألوف..

بالنسبة للاحلام والكوابيس هاي موجودة بعلقك الباطن.. هاي الفكرة منسوجة بداخله..والعقل الباطن أي حركة او فكرة ممكن يسويهه الانسان تنسخ بي..وبالليل تصير على شكل حلم .. وانت المريت بي ديبين عندك بالاحلام.. لازم تساعد نفسك حتى تتخلص منهه..حاول تتلهى عن الكعدة وحدك.. اختلط .. صلي اذا كنت تصلي..هسة انت احلامك مثل اول ما اجيت.. نفس الخوف والذعر لو تغير شي..
صگر : لا اكو تغيير..جنت احلم من انام لحد ما اكعد.. وكلشي يمر علي بالتفصيل..هسة احسن ..
الدكتور : اي لعد مثل ما كتلكم..مجرد فترة ويكدر يتخلص منهه بشكل نهائي..
اركان : دكتور هو اول ما اجة ما جان هيج..لمن شفناه وحاجيناه جان شبه طبيعي..بعدين يوم عن يوم يسوء..

الدكتور : اي شي طبيعي..لأن شعور الافراج والفرح غلب على شعور الحسرة والتعذيب والحزن..وبما ان الفترة العاشهه بعيد عنكم اطول من هلفترة فشي أكيد حيصير عنده هيج.. هسة اريد اعرف منو ينطي العلاج..
دنوة : انه..
اجيت وكفت يمه واتبع وياه شلون يكتب الدوة.. علمني علي وعلمني على جم تمرين بدني..كال لا تخلي يبقى بنفس المكان لفترة طويلة..لازم يطلع ويختلط ووو.. بعد هواي شغلات.. خلص وانطاني الرايجته..تشكر منه ونزلنه .. رحت اشتريتله الدوه ورجعنه للبيت..ضل كاعد ويانه بالهول .. عفتهم كاعدين وكمت اسوي العشه..اجة كعد يمي ..
دنوة : عبالي حتكعد يمهم..
صگر : لا ما اريد..

دنوة : مشتهي شي اسويلك..
صگر : براحتج..كلشي منج طيب..
ابتسمتله وسويتله بوسة بالهوى..ابتسملي بتعب.. جان لمن اسوي هلحركة يضحك ويجي يبوسني.. يله ..فترة زمان ويرجع طبيعي..ما أمل منه واضل وياه لحد ما يصير زين..
تعشينه وضلينه كاعدين .. انطيته الدوه مالته .. لحد الدعش بعد رجلية كامت توجعني وما بدلت من اجيت ليهسه..عفتهم كاعدين وصعدت فوك بدلت وتمددت..دقايق وحسيت علي فتح الباب..اجه فتح اديه ودفن راسه بحضني..مديت ايدي امسح على راسه واقره ايات قرآنية لحد ما تعبت ونمت..
ضل على هلحالة ايام..عصبي ويصيح..هو ابد مو عصبي..بس لمن واحد يدوس ببطنه..بالعكس خلكة طويل ويسمع اكثر مما يحجي..

طول هاي الفترة هو تارك الصلاة..بس لمن كام ياخذ الدوه كمت اخلي يصلي وياي..بالليل يكول مرتاح مدا احلم احلام بذاك السوء مال اول ايام..
رجفة ايده وي اخر حبايبتين اختفت..كام بس لمن يصير عصبي ترجف..هو وكاعد كلش طبيعية.. تحسنت نفسيته .. كام هو يريد يطلع مو انه اطلعه..يضحك ويحجي.. بس طبعا بعد معاناة..هي ١٥ يوم بس طلعت روحي وياه.. اول فترة يصيح علي ويرزلني على اقل شي..اذا الاكل مو مثل اليريده يرزلني..وبالليل يجي بحضني يله ينام..بيوم جنت منظفه البيت انه واسماء والبيت جبير يعني يتعب.. فبس كملت صعدت فوك انام..هو جان جوه كاعد وياهم.. كعدت على صوته يمي
صگر : دنوة..زعلانة مني جي صيحت عليج..ليش نمتي وعفتيني..اسف بعد ما اصيح..

بلحظتهه ما ادري ابتسم لو انقهر علي..شكد متعلق بيه .. هاي اول فترة بعلاجه..صار اسوأ بعدين بلش يتحسن.. ذبيت الغطى وجاوبته بنعاس : حبيبي ما زعلانة..ليش ازعل منك .. بس تعبانه ونمت..تريد تنام..
صگر : اي..
دنوة : تعال يله..
فتحت اديه واجة بحضني ينام.. وره فترة طلعنه انه وياه ومخلد ع الدكتور الاولاني..بس كبلهه رحنه للمختبر علمود التحاليل .. وراهه رحنه للدكتور قراهن..كال هسة كلشي متحسن مبين تعبانين ع العلاج والوقت مالته..كتله اي والله بالساعة انطيهيا .. كال هاهية ما يحتاج بعد تجون..والعلاج ما يحتاج يكرره.. بيومهه طرت من الفرح..يعني واخيرا خلص.. بقى بس مالت الاعصاب ورجفة الايد..

هو من كبل العلاج يكعد ويانه بالهول..يبتسم اذا احد حجة شي يضحك..بس هو ما يحجي..كاعد وبس يسمع.. مثل ما كال الدكتور..ردة فعل .. وهو تعب ما جان متوقع حيصيرله هيج بيوم وليلة..
التغيير وضح مثل الشمس..كمت احجي وياه كبل لا ينام شغلات تفرحه او تنسي..بس هو جسمه تعود ع السهر.. لحد ما يأذن واكوم اصلي..اجي اقره قرآن.. يكعد يمي بين ما اكمل الكاه غافي..يكعد الصبح يكلي ما حلمت شي.. وهاي يوم عن يوم تغيرت نومته واحلامه..اول فترة نفس الاحلام بعدين كام يشوف شي بسيط من ذاك المكان..لحد ما اختفت نهائيا .. بهاي الفترة كام هو يسبح وحده..بس الاكل انه وياه ما يسيطر ع الخاشوكة..وراهه لا استعدل..

اليوم يكون ثاني يوم بدون الدوه..كعدت الصبح افتح عيوني بالكوة..تعودت اسهر وياه لحد ما ينام..بس اشو هو كام يعوفني وينام من وكت..اضل اكلب بالتلفزيون لو امسح على شعره وابتسم..احس گلبي جان مخربطة نبضاته وهسه استعدلت من صار احسن..ما متعودة بدونه..بدون كلماته .. الحمدلله هسة صار زين..
لكيته سابح ديبدل ومنطيني ظهره..سوده عليه.. مكان التشطيب صاير جوزي والأثار مالت الجكاير باقي بس مكانهه دوائر صغيرة متوزعة على جتفة لحد نهاية ظهره.. لبس واندار شافني كاعدة ابتسم..حسيت ابتسامته نفسهه القديمة لمن يشوفني..اجة كعد يمي يحاجيني..كمشت ايده خليتهه على خدي..ما حسيت برجفتهه..مدترجف..عاينت علي وابتسمت : كتلك حتصير زين..

صگر : اي والله ما مصدك..شكد فرق بين ذاك اليوم واليوم .. جنت عصبي انه العندي خلك محد شايلة..الحمدلله..
تقربت بسته وخليت راسي على جتفة : الحمدلله..
صگر : تعبتج وياي غاليتي..
دنوة : تأمر وتدلل على راحتك..ما سويت الا الواجب..
ابتسملي وكرص خدي على كيفه..ديحجي جان يدك التلفون .. كمت جبتلهيا كام يحاجي..
صگر : حبيبي الله يسلمك..اي احسن خير من الله.. هااا .. هليومين..اذا مو عكبة فوراهه..اي ما مطول ان شاء الله.. مشكور ما منك كصور..مع السلامة الله وياك..
رفعت حاجبي : ها منو..
صگر : واحد ضابط..لازم هلاسبوع انزل بعد..
دنوة : وتبقى هواي..

صگر : ع الاكثر اي..
دنوة : بس كمت اخاف عليك من كلشي..اخاف تروح ادور ما ترجع شيصير بيه وراك..اتخبل..
صگر : سلامتج يبعد عيوني..صارت وبعد ما تصير..
دنوة : زين انه مشتاقتلك شلون..ما شبعت منك..
صگر : اليوم شبعي مني..انه هم مشتاكلج..
ابتسم وغمزلي..كتله بخجل : ما كلنه هيج..
كام يضحك ووكف..كمشني من ايدي سحبني لحضنه.. مد ايده حاوط خصري ..صرت كلي بحضنه..كمش وجهي بايده اللخ بهداوة ويعاين بعيوني وشفايفي..
صگر : اليوم فزيت الصبح بالسبعة متفاجئ..بكل مره انه بحضنج..هلمرة لكيتج حاضنتني وكامشة تشيرتي حيل..
دنوة : صدك..ما اتذكر..ما حسيت حتى..

صگر : اي جنتي غاطة بالنوم..
ابتسم وتقرب باسني..بوستة الهادئة مليانة احساس ولهفة .. مثل كبل حسيت صگر رجعلي بكل تفاصيله..
طول بيهه وابتعد..ابتسمت ودنجت ع الشال اخذته.. رحت للحمام غسلت ونزلت لكيته جوه.. كلهم كاعدين كالعادة .. انه اخر الناس اكعد..
بس هلمرة الجو مختلف..منتظرينه انه وصگر.. هو رجع مثل الاول..ما ادري شوصف فرحتي..شسويله واوصفله .. ابوسه .. احضنه .. ماعرف..
هو كاعد ع السفرة ياكل وانه مركزة علي من فوك ليجوه.. ايده مترجف..يضحك ويبادل المقابل..كبل جان ماعنده ردة فعل غير الابتسامة بطرف شفافه ومبينه مجاملة..
خلص اليوم عادي..بالليل صعدنه فوك انه وشهد وسلمى ..

غسلت السطح..هو اصلا فارغ وجبير..فبس غسلناه مابي شي .. فرشت حصيرة جبيرة وكعدنه..نزلت اجيب كرزات وحب .. بهاء جان جايب علاكة حلويات وجباسة.. خليتهن بصينية وجم ماعون وكعدنه..الضحك بفلس.. تحشيش وتنكيت على كلشي..خو صگر..انطلق .. كل شوي اريد ابوسه واحضنه بس اكول عيب جدامهم..هاي ضحكاته ورجعته لطبيعته احلى شي صارلي بهاي السنة..تعبت بيهه من بدايتهه لحد هسة حتخلص السنة بعد شهرين ..
ضلينه كاعدين لنص الليل..بعدين كلهم راحو.. شهد اخذت الصينية ونزلت..كمت اطب حسيت الجو بارد.. كمشني من ايدي كعدني بسده..
دنوة : باردتلي اروح البس شي..
صگر : تبردين وانه موجود..تعاي هنا..

كعدني بحضنه ومحاوطني بإدي ثنينهن..سكتنه ثنيناتنه بس احس بحركة صدره هو ويتنفس..انفاسه منتظمة .. مو مثل كبل فترة..دخت بي وتعبت حيل..كمت اخاف حتى من يتنفس اريد اشوف انفاسه طبيعيه لو يحس بخنكة..
صار هدوء كلش ودفو من حاوطني فغفيت..فزيت علي يبوسني من خدي..
همس : فززتج..
دنوة : شوي..بيش الساعة هسة..
مد ايده ع التلفون يشوف الساعة : ثنتين الا..
كمت من حضنه بالعجل : غير تكعدني..صارلك ساعة على هلوضعية..بلكت ظهرك كام يوجعك..
ضل يعاينلي ومبتسم ..انه تخربطت سوالفي..سكتت .. كام وحاوطني من جتفي..

طبينه وسديت الباب..رحنه للغرفة قفل الباب وحطني وراهه .. كام يعاين بعيوني هو وساكت..
دنوة : اا..شنو عيني..تره دتخجلني بنظراتك..
سكتني من شفايفه لامست شفايفي..طفى الضوه ورحنه بغير عالم..العالم المتعودة اشوف بي صگر الهادئ .. لمسته هلكد ما خفيفة ما احس بيهه..رجع هو القديم..
وره يومين كعدت وياه الصبح سويتله الجنطة واكل .. انطاني فلوس وباسني من راسي وراح..
مرن شهرين ماكو شي..سلمى جابت ولد .. كلنه فرحنه بي .. نفر جديد صار بالبيت..خواتهه اجن يشوفنهه وامهه همات .. جوان تعاينلي بطرف عينهه وتبتسم..عود انتي ما صرتي حامل ليهسه..بيومهه جان صگر بالبيت..عاينلي وابتسم.. رحت للمطبخ اكل شي ..

اجه حضني وباسني من رگبتي..ايده حاوطت بطني
صگر : لا تقهرين بروحج ابوية..
دنوة : ما مقهورة وداعتك..بالعكس فرحانتلهه..
صگر : معليج بجوان..لا تخليهه تحجيلج حجي سم..
دنوة : تأمر..
هو انه صدك ما جنت مقهورة..بس هو يخاف علي..
صگر صالح الحجي وائل وي الباقين..عزم خالة ابو جمال وخالته ام جاسم..صارت كعدة وسوينه غده ضخم.. هو ماعنده علاقة بس بالحجية وام علي..هو كبل رايد يخطب وحده مسيحية واهلة ما قابلين..خوانه يعني..هلحجي وره ما امه وابوه متوفين..مطردي من البيت .. بعدين رايدين يبيعون البيت وكلمن ياخذ حصته ورثة يعني..هو ما قابل يبيعوه.. مثل ما عاندوه هو همات معاندهم..

رافعين علي دعوة ما اعرف شنو بحيث جايبي للمحكمة مسير غير مخير اخذ حصته وانباع البيت..من يومهه هو ما تزوج بعد .. ولا فكر حتى..بعدين سافر للاردن ورجع ما انطوه اقامة جي ما عنده عائلة..ادور رجع صگر سواله لجوء كمتضرر بأحداث السقوط مالت ال٢٠٠٣ وراح لالمانيا.. هم جي ما عنده عائلة رجعوه.. رجع ب٢٠٠٥ .. لمن شفته بالباب هو وصگر .. المهم صالحهم ورجعت العلاقات..بس هلكت من التعب بيومهه عاد هو من شافني تعبت سوالي كعده مرتبة.. يدري بيه ما احب الطلعات فيسويلي هيج..لو سهرة على فلم لو كعدة .. هيج يعني..وانه مكيفة بي وحده..لا كعدة ولا اكلة.. اريد احطه واجي اتفرج علي لحد ما اغفى من وحدي..
وره هلشهرين شكيت حامل..بس ما اريد احجي.. حرامات افرح على شي بعدين يطلع ماكو..

فكلت اروح اسوي تحليل احسن..صگر جان بالدوام.. اخذت اسماء ورحت..هي جانت تريد تطلع تشتري ملابس الهه وللبنات فرحت وياهه..هي راحت تشتري وانه رحت للمختبر سويت التحليل..طلعت وياهه لحد ما كملت وطبيت اخذت النتيجة .. جانت مره جبيرة وانه متوترة اريد بس اعرف.. نزلت مناظرهه على خشمهه وابتسمت : حامل..
تشكرت منهه وانطيتهه فلوس..اخذت التحليل ورجعت للبيت اريد اطير هلكد ما فرحت..واخيرا يعني واخيرا.. صار سنين انتظر هاي اللحظة..من ٢٠٠٦ سقطت ولحد هسة احنه ٢٠١١ صار خمس سنين..لو ما مسقطة جان هسة بنتي عمرهه خمسة..الحمدلله على كل حال..
بالطريق كتلهه لاسماء فرحتلي من ودهه تبوسني بالشارع .. صدك جانت هاي اللحظات اسعد شي بحياتي..

طبيت للبيت اول ما شفت خالة حضنتهه كتلهه بفرح : حتصيرين بيبي وعندج طفل من ابنج..
باستني كامت تهلهل..هو انه بين خجلانه وبين فرحانة.. باركولي كلهم..اولهم مخلد.. تأدب وره ما نترت بي ..هسة عادي وياي مثل بهاء واركان وفرحانة هيج..
كعدت احسب يوم يوم علمود يرجع صگر واحجيله.. هلمرة اكيد ردة فعله حتختلف..
بعدني اول ايامي وصرت مدللة..خالة ما تخليني اكمش شي كله الشغل على شهد وجوان..جوان لمن عرفت تخبلت.. فتت من يم غرفتهه هي وشهد سمعتهه تحجي وتبجي..
جوان : ولج حامل..حامللل..يعني ماكو امل بعد خلص..
شهد : اكلج ما تنجبين احسن..رجال متزوج ويحب مرته انتي شكو منبصة روحج..

ندري تحبي بس هو ما يحبج..استوعبي لا تعيشين بالاوهام .. شوفي شكبرج صرتي..وحدة غيرج هسة متزوجه وعدهه ثنين .. انتي بكد اسماء تره..شوفي اسماء وشوفي روحج..
جوان : مو بيدي شسوي..قابلة اصير مرته الثانية..
شهد : امداج اذا صدك..دروحي تفكيرج سخيف .. ليش انزل نفسي واصير مره ثانية..واذا احبه..طز بالحب..
عفتهم يحجون وصعدت فوك..والله زين منهه هيج مجلبة بي والكل يكللهه عوفي الرجال ما يريدج متزوج ويحب مرته.. هي بس تسمع كلمة يحب مرته عيونهه تنكلب.. تغار كبر ..
وراهه بجم يوم غسلت المواعين وصعدت فوك سبحت وطبيت للغرفة لكيت التلفون داك..صگر..رجعت دكيت علي جاوبني .. وحجينه عادي..
صگر : احس اكو شي..

دنوة : مثل شنو ..
صگر : ما ادري..شصار بغيابي..
دنوة : احمم..ما صار الا الخير..ترجع وتشوف بعينك..
صگر : يله..باجر راجع هو ردت اخابرج انطيج علم..
دنوة : هله بيك عمري..
صگر : صار بيهه عمري..صبري يولي بس يطر الفجر اطلع هم عود الكاج نايمة..
دنوة : ههههه..اكعد لخاطرك تدلل..
صگر : حبيبي انتي..يله اروح انه..بالج على نفسج..
دنوة : انت هماتين..
صگر : تأمرين أمر..
ابتسمت..ودعته وسديته..

ثاني يوم كعدت الصبح عود ردت اكعد من وكت..كتلت نفسي يله كعدت بالدعش ونص..كمت غسلت ولبست الشال ونزلت لكيته كاعد مثل كل مرة..گلبي كام يدك..شلون حكلة.. خاف ما يهتم ادور اتفشل وانه جايته فرحانة ومتلهفة لأن هو جان ما يلح علي بخصوص الطفل..
سلمت علي وكعدت وياهم..شواي وكمت ع المطبخ اكلت شي .. سمعت صوت صگر يم الدرج ديحجي مدري ويامن.. مديت راسي شفته ديخابر ..دقايق وصعد فوك..غسلت ايدي وصعدت كلت هاي فرصتي خلاكلة ما اريد اماطل..فتحت الباب وطبيت كبل..هو متعود علي افتحهه بهدوء واستحي خاف ديبدل لو شي..ضل صافن علي بعدين ضحك..
دنوة : شكو شنو اليضحك..
صگر : تعاي احجيلي شعندج مستعجلة..

دنوة : لا عيني ما مستعجلة..
وكفت ع المراية ونزعت الشال..اجه حضني من ظهري وباسني هو ويعاينلي بالمراية..
صگر : سولفيلي..كلي آذان صاغية..
اخذت ايده خليتهه على بطني كتله : ارد اكلك انه حامل..
ابتعد عني متفاجئ وفاتح عيونه على كبرهن.. لحظات ورجع تقرب مني..حط ادي على جتوفي وعيونه متلهفة بيهه الف كلمة : تحجين صدك..شوكت عرفتي..
دنوة : اي والله..كبل جم يوم ..هو انه جنت شاكة بس كلت اتأكد يله احجي..وطلعت وي اسماء سويت تحليل طلع حامل .. كام يضحك ومبتسم..حضني وشالني من الكع هو ويبوس بيه..ردة فعله جنت متخيتلهه ببالي والحمدلله ما خاب ظني..

اكيد وره كل هلانتظار حيصير هيج..كمت اضحك وكامشته من قمصلته : صگررر نزلني..
خلاني ع الجرباية ورافع نفسه عني : روح صگر وعشيرته وديرته ودنيته..ما مصدك والله ما مصدك..
كمت احاجي واعدل بقمصلته : اا..هو حتى انه ما مصدكة الصراحة..بس صارت..فرحان..
صگر : ميت فرح وداعت عيونج الحلوات..انه ما احجي تدرين بيه..علمودج..اكول هي تعبانة واجي اكللهه اريد طفل واريد طفل..حتى لمن صرتي زينة وراجعتي يم الدكتورة كتلج لا تخاطرين بروحج..
دنوة : اي..بس ما صارلي شي..
غمض عيونه وباسني من راسي..عدل كعدته وخلاني بحضنه يبوس بيه ويتغزل..اميرتي ودنيتي..حبيبي وعمري..

عاد هي هاي احلى لحظات لمن يخليني بحضنه ويتغزل بيه .. يدري بيه استحي وخدودي تصير حمرة..يتقصد يعني.. علمود يكرصني منهه..
اخر شي كام نزع القمصلة..راح ع الكنتور طلع ملابس وراح للحمام يسبح..كمت عدلت الجرباية ونزلت..
ع الغده كاعدين هو يخلي جدامي اللحمة الزينة.. صار سنين سوه..بس من نلتم ع الاكل ما امد ايدي..اكل من الجدامي بس .. هو يدري بيه هيج..فيخليلي ..يخليلي الزين همات مو هيج..جوان تعاينلي بطرف عينهه وعاوجة حلكهه.. والله اضحك عليهه وعلى سوالفهه..سخيفة اصلا..للاسف هو مو بحالهه ولا بحال وحدة غيرهه..انه ماليه عينه..ودائما يكلي اليحاجيج كوليله هيج علمود لا يحجي..خلى الثقة عندي عالية.. ولا يوم فشلني جدام احد..

ولا رزلني..وكف وياي بأصعب المواقف..دوم بيني وبين نفسي اكول سوالي الما سواه ابوي..ما اعرف شلون ما قبل ينطيني ويكرهه ما يطيقه..لو يشوفه هسة شلون مدللني جان ضل يترحمله دنيا وآخرة..
وره اسبوع تقريبا خابرتني سرور..كالت ابوي ينتظرج باجر بالمحكمة ببغداد..شذى والبنات حيكونون موجودين بس انتي .. كتلهه ماشي..بالليل كلت لصگر ..
صگر : براحتج عيوني انتي..
دنوة : اي نروح عيب صار جم مره تخابرني..
عاين علي وابتسم..باسني من راسي وهمس : شكد فطيرة وگلبج طيب..
دنوة : ليش شنو المناسبة..
صگر : ماكو سبب غاليتي..تعاي نامي ورانه طريق..

اجيت بحضنه قفل علي بايده لحد ما غفيت..كعدني من وكت وطلعنه لبغداد..بالطريق خابرتني سرور كالت اريد احجي وي صگر علمود ادلي ع المحكمة..انطيته التلفون تحاجي.. على حسب الوصف وصلنه..لكيت عمي وشذى والبنات واكفين بباب المحكمة..شذى شكد متغيرة ..هي وسما.. محد تقدم علي بس رزان..حضنتني وباستني..ابتسمتلهه ورحت على عمي.. عاينتله بنظرة عتاب..ليهسه ما يروح منظره لمن طردني وانه جاية من غير دولة والطريق خطر..يا سلابة يا امريكان.. درت وجهي بالعجل لمن شفت نظرة جدية ومابيهه معنى..طبينه للمحكمة والقضي قسم الورث..كلمن اخذ حصته وبعد اجراءات انباعت الحصة المفروض تكول الي واستلمت فلوسهه صگر اخذهن كال نرجع للبصرة واسجلهن باسمج..

طبعا عمي جان ناوي البيعة ومكمل كلشي بس يجون الورثة وتتقسم حصتنه عاد احنه بكيفنه شنويد نسوي بيهه نسوي .. وانه شسوي بالكع..حتى الفلوس ما اريدهه..بس هاي لخاطر سرور جي ما عافتني..شذى بس شافت الفلوس تخبلت.. اخذت مالتهه ومالت سما..ورزان وحد..ربهه دينهه الفلوس .. شكد اكرهه واكره تفكيرهه السطحي.. طول الوكت ولا عاينت بخلقتهه..لا هي ولا سما..لعبانه روحي منهه..حلفت قرآن ضدي وانه بديرة غرب لا يمهه ولا حواليهه..شكد نذلة وتكرهني كره ما صاير ولا حيصير..الله شحيسوي بيج.. شكد ما انه فطيرة واسامح بالعجل بس مستحيل لساني يطخ لسانهه بعد هي وسما..حتى عيب اسميهه اختي..اختيش هاي.. عود ابوي جان مكيف لمن عرفني عليهن..كال هذني خواتج وسندج بالمستقبل..كود اشوفه عايش جدامي واحاجي..

اكلة محد صار سندي غير الرجال الكتلتني وهنتني حتى خليت مرتك تضربني لمن خطبني..شكد ساء الظن بي.. هو حتى لمن جان يجي صگر لبيتنه وره ما يروح اسمع ابوي يكول شعنده جاي هذا ابن المخبل..على عمي حامد.. لو يغلط علي لو لو..هواي..همزين ما جنت اعرفه ولا شايفته بذاك الوكت .. جان متت قهر من كلامة..
فزيت من افكاري على صوته يحاجيني..
صگر : عود نتغده بره..مالي نفس بأكل البيت..
دنوة : ها..يله ماشي..بكيفك..
كمش ايدي وباسهه : عيشي الواقع لا تعيشين احلام وشي ما موجود..اعرفي اختج على حقيقتهه وعوفيهه احسن مما تبقين وياهه وهي ما تريدج..
دنوة : شمدريك دا افكر بيهه..

صگر : شفتج ما عاينتيلهه حتى ما وكفتي يمهه.. لا تقهرين بروحج يروح الروح..ختولي انسيهه..هسة تجيبين وتلتهين بعد يا اخت يا بطيخ..
دنوة : ههههه..على كولتك..
ابتسملي وكمل الطريق..بس دخلنه للبصرة كال نزلي نتغده كتله رجلية توجعني..جيب ناكل هنا..خطية ما كال لا.. راح جاب غده تغدينه ..عاد كمت اتنعوص.. ما اريد هيج.. لتكثر من هذا..هو يسمعني ويضحك..يكلي تدللين شتريدين يجرالج ما يضوج مني..
ورة شهرين خلالي الفلوس بالبنك سجلهن باسمي .. كال شوكت ما تريدين تسحبين منهن روحي مفتوح حسابج.. هو انه شسوي بالفلوس..بس هيج علمود اخلص من السالفة بالعجل بدون عناد ومماطلة..هو طبعي ما اعاند ..

وخصوصا بهيج شغلات لا تقدم ولا تأخر..
بهلشهرين جنت كاعدة بالهول اشرب جاي انه واسماء وسلمى الولد طالعين كلهم..بس صگر بالبيت ونايم .. اندكت الباب .. خليت الشال وطلعت..شفته محمد..سلمت علي وحضنته .. ابتسملي وفات جوه..طلعت خالة على صوته..اجت حضنته وتبجي..صارلهه سنتين او تلاثة ما شايفته خطية.. عفتهم كاعدين وصعدت فوك اكعد صگر..لكيته توه كاعد ويفرك بعيونه بعده نعسان..
صگر : اكو صوت جوه..منو اجة..
دنوة : محمد..
فتح عيونه متفاجئ : محمد اخوي..
دنوة : اي..ليش اكو غيرة..
كام من مكانه لبس البلوز وراح غسل وجهه ونزل..

نزلت وراه اشوفه..حضنه وشاد علي بكل قوته..ومحمد همات .. شكد حلوين الاخوان..محمد باسه من راسه..تفاجئت
محمد : شكد متغير خوية..تعذرني ما كدرت اجي اشوفك
صگر : يوصلني سلامك من امي اكعد لا تهتم.. والله مشتاك لشوفتك..شلونك مرتاح..
كعدو يحجون عن حياته لمن راح لاربيل ووين ديشتغل.. كال صديقي عنده معرض سيارات وانه اشتغل وياه..
محمد : كاكا انه اجيتك بشغلة..
صگر : هههههههه..اكول ارسى على بر..لو كردي لو بصراوي .. بس يله كول..
محمد : والله اريد اخطب..ومستحي من الجماعة..

يتبــــــــــــــــــــع......................

جدا اعتذر ع التأخير بس صارتلي سفرة وتدرون اليسافر بعد يلتهي ، حاولت اخلصه بأسرع وقت .. عموما كل عام وانتو بخير ، الموفقية للجميع يارب😘،