رواية اسألي عني الليالي الفصل الثاني 2 - بقلم رقية جاسم

يمسهر رموشك غزل ..
يالسوالفك ونة السكران ..
وحجل ضحكاتك بليلي تنغزل ..

خيط الحزن وي روحي يتخيط ..
لو مرّيتني وانه هيمان ..
- رُقيّة جَاسم

حساب الانستگرام

الــــبــــارت الاول....................

جنوب البصرة عام ١٩٦٧ .. في أحدى الأرياف البصراوية ..

ماكدرت انام.. المنظر شيب راسي..حسيت روحي تخبلت .. مااعرف.. بس اني يصير بيه هيج..اني البغدادي المتفضل ع الكل.. تالي اصفى متعاير من عمتي..فركت وجهي وطبيت للحمام غسلت.. طلعت لكيت ابويه واكف بالباب ومنتچي علي..

باوعتله بنظرة باردة..خالية من كل ذرة حب ابن لأبوه.. تركته وكمت اريد اطلع بالحلال..محتصر ومخنوك.. كمشني من ايدي هو ويباوعلي بكل توسل..
شامخ : وين رايح وليدي..
حامد : شدخلك انت..حاسب روحك اب..اصلا ماطايقك وروح امي خوش لو لا..
شامخ : احجي عدل لا افرك حلگك..دااجيبك بالعيني والاغاتي وماتقبل تجي..شسويلك فهمني..
حامد : لاتسوي يابة..بس ضل اضحك على سناء بكلامك هذا.. شايفتك نبي..
شامخ : وحگ الحگ مايصير براسك خير..انه ظهرك يول.. اذا ماحتاجيتني اليوم تحتاجني باجر.. لاتكابر وانت بعدك ماتعرف الدنيا شني.. بعدين تعال جاي..اني شني..لاتصير خيخة وتلطشلي بخوالك الكوا...

باوعتله وسكتت.. شافني مانطيته ردة فعل عافني..طلعت بالحلال اتمشى..والله طخت براسي اعوفله البيت والدلال .. اي احسن شي اسوي هيج..شعندي باقي..بزعان من الدنيا والبيهه.. حتى مااريد اباوعله..كارهه من السما للگع..

ضليت امشي لحدما وصلت للشط..شفت ثنين زلم كاعدين .. واحد يكول يايااابة والثاني يجر مواويل.. مشيت غادي عنهم وكعدت بدون مااحجي..مركز عيوني ع الشط وبالي وي هذا ابو الموال..غنة عن الام.. دمعت بقهر .. لحدما كملو وراحو كلمن بدربه..

فزيت على ايد اخوي كاظم..درت وجهي ماحاجيته.. ولو ارتاحله من بينهم كلهم..بس روحي محترگة مالي خلك النفس الأجرة..
كاظم : كوم خوية الجو بارد مو مال هيج كعدات..
حامد : مااريد ..روح شوف شغلك..اكعد يم ابوك..
كاظم : حميد لاتسوي هسوالف..هذا ابوك مثل ما ابوي.. وابونا كلنا.. حرام تنكر معروفه..
حامد : لاتخليني اكرهك..
كاظم : ليش..چي حجيت الحگ..

ماجاوبته..عفته وكمت تمشيت جوه..رغم الجو بارد يگرص گرص بس مابينتله..ماخليته يحس كلامه صحيح.. كتوم لأبعد درجة واتحمل..اتحمل المايتحمله الشايب..بس ابد مو عصبي .. مااحب العصبية..طبع طايش مايفيد..

فتت للبيت من الباب الوراني..ماخليته يشوفني افوت.. طبيت للغرف غرفة غرفة اباوعلهه بكد هدوء بس گلبي يغلي وروحي تسعر.. شكد ما كارهك وكاره بيتك بس حخسر هواي بطلعتي هاي.. حخسر ادري..بس اعرف شسوي..كل كلمة سمعتهه منك وانت عبالك مو وياك ومامهتم بنت شخصيتي.. رجال رغم عمري التستهين بي..الا احرگ گلبك مثل ما حرگتلي گلبي..

صعدت فوك جريت جنطة خليت بيهه هدومي.. كلشي يخص الدراسة حرگته..هدوم وكتب..تخليت عن دراستي بس علمود اطلع منا..ادري بي يكمشني من ايدي التوجعني بحجة دراستك مهمة..

لبست بلوزين وقمصلة وبنطرون..لفيت الشماغ على خشمي حتى ماابرد..الهوى برة يكص الخشم..اخذت كل الفلوس الجمعتهه من بلشت اشتغل لحد هللحظة..
اخذت الجنطة ورحت لغرفة سناء..اختي..لكيتهه نايمة ع الكتاب والفانوس يمهه ناصية النار مالته..
ندهتهه : سناء..سنا.. كومي..
اندارت صعدت النار مالت الفانوس وشالته تريد تشوف منو.. جفلت رادت تصيح خليت ايدي على حلكهه : وجع لاتصيحين..
حركت راسهه يعني اي..

سناء : شكو خوفتني..
حامد : لبسي وطلعيلج هدوم بعد مانرجع هنا..
سناء : شدتحجي..فهمني وين اطلع..
حامد : بعد مااكدر ابقى هنا..اكرهه..اكره حتى بيته.. مااريد اختي تتربى عنده..كومي بالعجل..
سناء : وابوي حامد شنو اكوم..دراستي وماما غادة..
حامد : سوي مثل ما اگلج..هذول ولا واحد بيهم يريدج.. انتي بتهه مو بتهم..وتبقين هيج..كومي لبسي واني وعد ابيع هدومي واجيبلج شتردين..ابوج انسان ظالم ومجرم.. كومي واسمعي مني..تتندمين ع اليوم التبقين بي هنا..

دنجت ماجاوبتني..رفعت راسهه بيدي : مو تجين تاخذين مني الفلس والدرهم تشترين بي..
ماجاوبت ..رجعت حاجيتهه : مني لو من ابوج..
سناء : منك..
حامد : خلص بعد..ليش مترددة..
سناء : ابوي مااكدر اعوفه حامد.. شلون اخاف يصير بي شي لمن يشوفنا ماموجودين..
حامد : لا مايصيرله شي..هسه نروح لبغداد وشوفي العيشة هناك شلونهه..

مديتلهه ايدي وكامت..اخذت هدوم الهه ولبست.. كتلهه تنتظرني يم الباب الوراني.. طبيت لغرفته القديمة.. اخذت الجناسي ونزلت..اخذتهه وطلعنا لبغداد.. ماانكر شعور الخوف والمسؤولية الصارت علي..بس مااكدر ابقى يمه بعد.. بزعان من شوفته وحتى من صوته..

بسيطرة بغداد وكفونا..عبالهم شاردين..شوفته الجناسي وهو من ملامحنا ماشكك بالموضوع كال فوت.. اني للأسف طالع علي.. بالعجل شبيت وشواربي اختطت..حتى لحيتي.. بهلسنة عمري ١٩..داخل ع العشرين.. بعمر العشرين المفروض وردة حياتي وعيشة مستقرة..بس اختاريت الهجولة ولا عيشته الي ادري بيهه حيحملني منية..
فزيت ع السايق ..
- : خوية وين رايد..
حامد : وين وصلتنا..
- : بالسعدون هسه..
حامد : هاهيه يمك..

نزلت انطيته الكروة وراح..خوالي كلهم هنا..فاعرف السعدون واعرف فنادقهه شبهة..بس محد يدري بيه هنا.. اثبت روحي والگالي شغل براسه حظ وراهه شيريد يصير خيصير..

كمشتهه بيدي وتمشيت جوه..الف حسبة ببالي.. منهوك بداخلي وتعبان..بس ميخالف..والله لاخليك تتمنى شوفتي.. عفته من بالي ودخلت لوحدة من الفنادق..أجرت چم ليلة واخذت سناء وصعدنا للغرفة..
اول ما دخلت عاطت : عفيه هاي شنووو..وين جبتني..
حامد : نظفي وكعدي..شتردين يعني ..
سناء : حتخليني اتندم على جيتي وياك..
حامد : ميخالف..نظفي بين ما اروح اجيب غده.. قفلي الباب ولاتفتحيهه حتلو تكسرت..

دخلت الجنط ونزلت جوه..نزعت الشماغ لفيته على رگبتي والهوى يلاعب شعري..حسيت روحي عبرت اول خطوة.. بكد ما الدنيا صعبة اني اصعب منهه..

فتت على مطعم اشتريت اكل ورجعت لسناء..لكيتهه منظفة .. فرشت الاكل واكلت..اجذب اذا كلت ماكو خوف بداخلي من الجاي..بس بنفس الوكت مستحيل أبين هلشي حتلو بيني وبين روحي..
من التعب كمت نمت بهدومي..الغرفة باردة مجرشة.. الجامة جان بيهه كسر صغير.. بس اني من التعب بعد مااشوف كلت انام ولمن اكعد اشوف شسوي..

نمت وحضرني نفس المشهد..بكل تفاصيله.. بكل لحظاته .. بالصوت والصورة..عبالك فلم والمسجل دماغي وذاكرتي.. كله ينعادلي بشكل واضح..
فزيت مرعوب وگلبي يدك سريع..صحت : ويننننج..
اجت سناء خايفة وايدهه بيهه زاهي : ها خوية شبيك..

فركت وجهي واستغفر : لا روحي مو يمج..
سناء : شنو..غير صحتني انت..
حامد : لا لا..سناء .. تعاي كعدي احاجيج..

اجت يمي..مااعرف شصار بالضبط.. بس ماحجيت..ردت احجيلهه شنو بخاطري..شنو الديخليني افز بعز نومتي مرعوب وشياطين الدنيا كلهه جدامي..سكتت ماحجيت.. اااخ شكد صعبة من تكون انسان كتوم..
سناء : شبيك عيني تره دتخوفني..
حامد : ردت اكلج خوما بردانة..
سناء : اي والله..شحنسوي احنا شنو مصيرنا حامد..
حامد : باجر حطلع ادور شغل..تصفى لاتخافين.. بس اسمعي مني وخليهه ترچية بإذانج..بوكت طلعتي اياج تفتحين الباب لأحد..ابوج مايدري بينا هنا..واذا درى حياخذج بكل الطرق..انتي من ريحة امي..مااريد اخسرج..

باوعت علي هي وساكتة..ماتدري شدااقصد.. شبگتني وتمسح على راسي..شكد جنت بردان بس دفيت.. حسيتهه إشارة منهه يعني حبقى وياك..

بنفس اليوم طلعت لكيت كارتونة بالشارع..اخذتهه واشتريت لاصق سويت بيهه الجامة..اشتريت چولة نتحمى بيهه لحدما اشوفلي شغل..
بالليل قفلت الباب وجبت الجنطة كعدت وراه..طلعت الفلوس حسبتهن..كل يوم شكد حصرف..ادري الشغل مو بسهولة ينلگي.. اقل شي عشر ايام.. حاولت اقتصد وخليت الحسابات ببالي..بالاخير لفيت الشماغ على راسي وكمت انام.. لكيت سناء متقربه من الچولة وغافية..ماردت اكعدهه.. عفتهه ورحت غادي..تمددت ونمت..

فزيت وجه الصبح من وره الحلم نفسه..مخنوك ومقهور.. المنظر الشفته حتى دموع ماخله بعيني..كمت اشهك اريد هوى.. كمت غسلت والمي بارد ثلج..جنت هناك مااحس بالعايشه.. بس ميخالف..اني اكون روحي واصير احسن منه..

نزلت للشارع تمشيت وافكر..ابوي بصراوي بحت..من الكع وبيهه..بس امي بغدادية..فتحت عيوني اني ببغداد..اكثر نص الشهر اني ببغداد يم خوالي..حتى لهجتي وهدومي يختلف عن خواني الباقين..ماالبس دشداشة..لبسي كله بناطير وقمصان.. ولو ابوي لمن يروح لبغداد يتخلى عن الزي البصراوي الريفي..بس تعودت والشغلة تعلوم مو شمرة.. فاحس روحي من هلمكان وبي..شكد ردت اتعود ع البصرة ماكدرت.. مااكدر..

رحت لواحد عنده مخضر اشتريت فواكه وچم شغلة لخ بعدين رجعت للشقة..سناء سوت الاكل وكعدنا ناكل.. كملت وكمت بدلت هدوم مالشغل..بلكت الگى من هسه..
حامد : سناء..حطلع ادور شغل..مثل ماوصيتج..لاتفتحين الباب لأي سبب خوش..
سناء : حاضر خوية..
حامد : عفية ..تعاي قفليهه..

طلعت سمعت صوت القفل ارتاحيت ونزلت..افتريت شارع السعدون كله من الطول للطول..اكو شغل بس الأجر قليل.. وسناء بنية يعني تحتاج اكثر مني..اني عادي مومشكلة.. عاد اخر شي رحت لباب الشرجي..جانت اكو محلات مالفيترچية وحدة بصف اللخ والكبنگات مفتوحة.. سلمت وحاجيته شكد الأجر واذا يومية لو اسبوعية..شفتهه مقنعة..اتفقت وياه من باجر وكل نهاية اسبوع استلم فلوس..بالوكت الحالي تسوى ٨٠ الف..

شغلة تتعب وتاخذ كل الحيل وفوك هذا عليهم سمعة..بس ميخالف..اروح بدربي وارجع بدربي..لفيت الشماغ على خشمي لأن الشمس نزلت النهار كله افرفر..رجعت للشقة بالعجل ..خلص اليوم شلون مجان ونمت...

محيي : جنت واكف بره يم الفلاليح وياهم خطوة خطوة خاف اكو غلط لو نقص.. اجه ابوي وكف بسدي..
شامخ : بوية زلمة حوك الله يحفظك..
محيي : ويحفظك يابة..حامد وين..
شامخ : ماادري..شوف يا بالبيت يا يم جماعته..
عاين علي بنظرة مكسورة..ادري بي مكسور خاطره على حامد.. بس مايكدر يسوي شي..راكب راسه مايسمع كلمة من عدنا كلنا..

بسته من راسه : لاتخاف بوية..مابي شي..بعده مايعرف مصلحته وين..
شامخ : الله كريم.. كمل شغلك بوية ماأخرك ..
محيي : حشاك هلا بيك بكل وكت يابة..
طبطب على ظهري وراح..كملت الشغل وره المغرب ورجعت للبيت.. سبحت وطلعت وي صحباني..مااحب كعدة البيت.. رجعت بالليل كلش..لكيت ابوي يلوب ..

محيي : الله يساعدك يابة..خيرك..
شامخ : يول شفت حامد..وين راح هذا حيسودني..
محيي : اي شفته ع الشط..
شامخ : ويامن.. شوداه هناك..
محيي : كاظم جان بسده..فوت ارتاح مايجي وراه بس شلعان الگلب..هسه يجي لادير بال..
عافني وفات جوه..

انه وحامد نفس الگصة فرق سنة..خوان بس بالجنسية.. بالطبع والاسلوب ماكو تشابه ابد..انه عصبي بخبال ..هو قالب ثلج..يسكت مايحجي حتى لمن واحد يدوس ببطنه.. انه احجي اكلب الدنيا اذا الحگ يمي..بغدادي ولا يم البصرة .. لا من طبع ولا من هدوم وغيرهه..يكرهنا نفر نفر وانه ابوي على راسهم..بس اخوي كاظم يرتاحله يروح يكعد يمه يحاجي عادي مايكول شي..انه اشتغل وي ابوي بالحلال.. ع الزرع وشغل الفلاليح..هو يروح يشتغل بالمدينة مو يمنا..ابوي ماقبل يشتغل هناك.. يگله اي رايح يم صحباني وهو يروح يشتغل.. ماندري شي شيسوي وويامن يكعد..كتوم مايحجي..

بهذا اليوم رجعت تعبان..رأسا نمت..ماكعدت الا على صياح ابوي ..نزلت بالعجل اشوفه شبي..خواني واكفين بسده مايحجون شي..
محيي : ياستار..شصاير ..
سكتو.. : مو دااحجي شبيكم يالله..
شامخ : اخيك حميد ماموجود..لاهو ولا سناء..
محيي : شنووو..كول يالله يابة..شنو ماموجود ..انه شفته ع الشط ..اجذب عيوني..
شامخ : تعال جدامي..يول جذبت علي..ماشايفه وتكول شفته.. وين راح هذا..سناء ويييين..
محيي : وحگك مامجذب..انه شفته بعيوني..

صعدت فوك لبست ونزلت..طلعت وي كاظم وابوي راح يسأل الفلاليح بلكت شايفي..
انگلب البيت على راسه بهليوم..رحت للمدينة..للمكان اليشتغل بي سألت عنه اذا شافو..محد يدري بي..لمن كتلهم چن انخرعوا ..مايدرون بي طالع..ماكايل لأحد.. اااخ منك شسويت.. حينجلط ابوي.. بقيت بالشارع للعصر..سألت بكل مكان..ماكو آدمي خليته يعتب علي..اخر شي كعدت ع الرصيف..
كاظم : امشينا نرجع..هذا شرد من ابوي..
محيي : يول هذا مخبل بالقرآن مو صاحي.. هسه ابوي لو يطگه چا كلت حگه..اشو حتى يصيح ويگلب الدنيا گلاب بالليل مايحاجي..بس مستهتر وطايش..

كاظم : لا عاد الا حامد لاتكول علي طايش.. وداعتك اكبر راس مايكدرله..هذا ابوي بكبره وشهامته ضحك علي وشرد.. كوم هسه خلاشوف ابوي شون صار ضل بالي..
كمت ونكتت الهدوم..بين ما وصلنا جان مأذن المغرب.. تلكتني امي تبجي..هي مو جبيرة بالعمر بس چي رايحة للحج نصيحلهه حجية..

الحجية غادة : يمة وين رحتو مو گلبي اكلني عليكم..
بستهه من راسهه وشبگتهه : لاتخافين غير ندور على حميد .. ابوي وينه..
الحجية غادة : هو احنا نشوفه لابوك..جايين علي بطلابة .. هسه يطلعون وفوت حاچي..هو يريد خاطرك..
محيي : يله بين ما ابدل..

صعدت لبست دشداشة وفتت يمه بالديوانية..لمن وعيت ع الدنيا الخطاطير بالبيت ليل نهار..من غير الطلايب والكعدات .. شغل الحلال لمن كبرت انه فكمشته وي كاظم..هو بس يجي يشوف شسوينا ويطمن ويروح..

هلمرة جايين اهل واحد ولد بايكين الكع مالته .. عمامه ماخذيهه چي يكرهون ابوه..
- : احنا دخيلين عندك شيخنا..ماعدنا بس هلكع ووليدي وحيد ماعنده ظهر ينشد بي..عاد هلكع توكف وياه يستفاد منهه..
شامخ : مايكون خاطركم الا طيب..اطلعهه من عيونهم ماطول حلاله لاتخافون..الحرام ماينوكل ..
- : عاش لسانك شيخ..
اتفقو وياه على يوم يروحون لعمامه علمود تصير الكعدة ويتنازلون عن الارض مالته..
بقو كاعدين لحدما أذن العشه وراحو..

انه اعاين لابوي شون كاعد ويحجي بكل هدوء..ولا چن ابنه ماموجود هو وبنته..عجيب شون عنده قابلية يضم الجواه مايبين لأحد.. حامد طالع علي بهواي شغلات..

بين ما راحو وطلع وياهم..شواي ورجع.. نزع الغترة انطانياهه ..
شامخ : ماكو مو..
محيي : مالكيته والله..جنت اريد ابقى بعد بس كاظم ماقبل.. شونك يابة .. وجهك مصوفر..اخذك للمستوصف..
شامخ : والله متندم..نعلة الله ع الشيطان..هذا راح يم خواله.. وحگ الله اذا لكيته يم واحد بيهم احرگ البيت على روسهم..
محيي : لاتستعجل اصبر..انه سألت علي يم صحبانه والمكان اليشتغل بي مايدرون بي..ماشايفي اصلا..
شامخ : اي طبعا..طالع بنصاص الليالي..گلبي جان حاس .. ماشفتني كاعد لليل..
محيي : صحيح..
شامخ : دزيت ضرغام هو وعادل يدورون علي..
محيي : وين..مو شفته ماكو..
شامخ : يول يدورون علي ببغداد..هنا ماكو ادري بي.. انطيت عناوين خواله حيروحولهم..انه الطلايب فوك راسي.. استغفرالله

عافني وطلع هو ويكف رداناته..صدك بهلفترة اكثر من طلابة صارت..هو يروح يفكهه..من غير الفصول والكعدات الجبيرة..

ثاني يوم الصبح طلعت وي ضرغام وعادل هذول يشتغلون بمحل ابوي مالت الگصابة ببغداد بس هم بصاروة.. طلعت وياهم لبغداد ويمكن هاي المرة الثانية اشوفهه..عنده تلث خوال.. كل واحد من عدنا راح على واحد..
واحد منهم جان بحي الجهاد..دكيت الباب وواكف انتظر.. شواي وطلعلي يفرك بإدي چي باردة..

رفعلي حاجبه : شجابك..
محيي : حامد وين..هو وسناء..
- : ليش وينهم..
محيي : اسأل روحك..
- : احجي عدل لتنتر..وينهم..
محيي : من البارحة ماموجودين شنو وينهم..شو ماتعرف تسولف.. انتم خوالهم ماتدرون بيهم وين..چا شكد مطفي..
- : اني لو انتو فكاكة متعرفون وين ولدكم..اني كتله لابوك بعد مالي علاقة بولد المرحومة..مااريد يجيني العار من وراهه.. روح شوفهم يم خالاتهم.. شايل ايدي للموت..

هجست حچيه مايدخل العگل..دفعته وطبيت جوه.. مرته بالعجل لبست الشال ..
صاح : ويييين..متكول حرمة بيت تفوت چفت شلون..ماعندك اصول..
محيي : فرغلي البيت اشوفه..عاني معتني من البصرة لهنا تالي يطلع يمك شمدريني وانه ماادري..
- : شوف حطلعهم مو علمودك..بس مااريد ابوك يسويلي مشاكل.. كومي جيبي البنات بالطرمة خيشوفه خاف طاب بالحيطان وماادري..

طلعن بناته ثنين ومرته بالطرمة..طبيت للغرف دورته.. صحت بإسمه واسم سناء ..ماكو.. ماتندمت چي دخلت.. هم خلوا قدرهم واحترامهم جوه القندرة..زين مني طبيت بهلطريقة.. عفته وطلعت..اختي تكسي ورحت لباب المعظم.. ضليت ادور بوجوه الوادم بلكت اشوفه وياهم..مو لخاطره.. مايعنيلي شي.. بس لخاطر ابوي..چي حيتمرض.. وجهه مصوفر من البارحة ادور يصيرله شي..

لهناك ورجعت للمكان الاتفقنا نتلاگة بي..وين اكو تلفونات .. فلازم اتاني ..ساعة واجوي..ثنينهم مالاگيهم ..
ضرغام : اكلك امشينا نرد للديرة..اذا ضلينا اكثر حتغورب الشمس..وين نبات ..
عادل : لا..خنشوفه بعد ..الشيخ اذا شافنا راجعين بدونه .. استغفرالله شمعرفني شيسوي..
محيي : يابة سوينا العلينا..دنعل شرفه لابو..امشي طگني البرد شمسويلي واوگفله هيج..هجم البيت علينا..خلنرجع وخليهه علي..
رحنا للگراج..اجرت سيارة ورجعنا.. وصلت بالليل ..كتلهم يرحون وانه افوت لابوي احاجي..

طبيت واشوف البيت صاير هوسة للستار..اجاني لواء اخوي..
محيي : هاي شكو شصاير..الحجية وين..
لواء : هاي وينك يمعود..ابوي تخربط وسكره صعد فد صعدة.. اجه عمي زاهر اخذه..انه وكاظم رحنا وياه..
محيي : جذب.. وخر اشتعلت لشتك حامد..

طبيت لغرفته لكيته متمدد وايده على راسه..ماكو احد ماقابل يبقون يمه.. رحت كعدت بسده بسته من راسه..
محيي : الحمدلله ع السلامة يابة..شجاريلك.. هسه حجالي لواء..
شامخ : مالكيته هذا الارعن..
محيي : لا..سألت خواله كالو ماشفناه وحتلو شفناه معلينا بي.. مو يمهم بوية..مو يمهم..
شامخ : وين راح هذا الأغم..هسه هو زلمة ماينخاف علي.. بس هاي سناء..اااخ يابة اااخ..راحت بنيتي مني..هي هلوحيدة .. بوية انه اصدگن بيك..تدري بروحك شكد عزيز..
محيي : اي بوية..ابشر شعندك..
شامخ : ماگلك شي..هو جان ضايج..مبين علي شي..
محيي : هو كل يوم ضايج بوية شوكت جان طبيعي..قابل بس هلمرة..بس وغلاتك عندي ماكال شي..
شامخ : خلص هاهيه..بس افض هاي الطلابة واروح بروحي لبغداد..هذا يضحك علي..استغفرالله ...

علته يكوم لحيله..هجسته استعدل شوي.. صعدت فوك بدلت ونمت حتى مااشتهي..

ابوي وره اسبوع طلع لبغداد وحيده ماقبل يطلع واحد من عدنا وياه.. ضل يومين هناك بعدين رد.. انه جنت يم الشط وي صحباني وشفت سيارته طبت للديرة.. تانيته يرجع ورحت وراه بالعجل..سلمت علي وكعدت..
محيي : بشر بوية شصار..
شامخ : كلشي ماكو ..لا خالاته يدرن بي ولا خواله.. رحت لباب الشرجي بلكت اشوفه هناك..خاف مدورله على شغلة عملة ماكو هم نفس الحچي..
محيي : يعني شنو مات..
شامخ : وجع هو هذا حچي..شايفلك واحد يكول هيج ..
محيي : لا بوية مافهمتني..بس شمدرينا وين راحو..
شامخ : بس الاگي.. هين يول يالأرعن ..

تركته وكمت .. خواني مامهتمين..محد بينا مهتم لحامد.. حتى وهو بيناتنا مانهجس وجوده فدشي مهم..بس انه وياه دائما .. احس بالذنب ولو انه مالي علاقة..ابوي يكلي خليك وياه.. انتم نفس الگصة اكيد متشابهين حتى بالتفكير.. حاولت اتگربله واتوددله مايرضا..تركته بعد..ضل بس كاظم وياه..

حامد : كعدت الصبح متأخر..البارحة نمت ميت من التعب هلكد ما افتريت..بدلت بالعجل وطلعت..قفلت الباب من بره وشمرت المفتاح من جواه..
دگيتهه مشي من السعدون لباب الشرجي.. اول ما دخلت ابو المحل كام يصيح..
- : هاي اول يوم وهيج متأخر..اذا تأخرت بعد اجيب واحد بمكانك..
سكتت ماجاوبته..بس واكف على اعصابي..

بنفس الوكت المحل البصفنا صارت بي عركة قوية.. العامل تعارك وي ابو المحل..ضليت اباوعله واكول بگلبي : احمد ربك مو عراك..جان جنزته..واني عمري كله محد رافع صوته علي..

بلشت بالشغل..مدنج كله جوه السيارة والزيت على هدومي وشعري..بس ميخالف..ماطول طلعت مناك يعني لازم اتحمل كلشي اشوفه..زحمة ارجعله برجليه واني مااطيقه حتى.. للظهر هيج جابولنا اكل..اني واكل تذكرت سناء.. اكلت هسه لا.. ماادري حظلمهه هيج لو هو هذا الصح.. اكلت لگمة وكمت ..

واحد ويانا اسمه مهدي صاح : وين ابو الشباب..
حامد : هسه اجي مااتأخر..

تمشيت بعيد عنهم وركضت للمخضر جوه الفندق.. اشتريت فواكه وشغلات تنطبخ وصعدت فوك..دكيت الباب ماجاوبتني.. خفت عليهه..حتى صوت حركة ماكو..
صحت : سناء اني حامد فتحي..
الا كتلهه اسمي يله..طبيت خليتلهه الاكل بالكع : هاج سويلج اكل بيهن بين ما ارجعلج المغرب..
سناء : وانت تغديت..
حامد : اي شبعان لاتخافين..ديربالك على نفسج..

قفلت الباب وراي وطلعت بنفس الركضة لباب الشرجي.. لمن وصلت لكيتهم مخلصين الاكل..يله من ارجع شسوي..

ضليت بالشغل للمغرب ورجعت..طبيت سبحت والمي بي خيط حرارة..بحيث بالعجل شلون مجان وطلعت ..لكيت سناء صابتلي الاكل ومشغلة الچولة..كعدت يمهه اكل..هي تريد تحجي وساكتة..
حامد : احجي شعندج..
: ها..
حامد : وجعا..شبيج احجي..
سناء : اكو مرة كاعدة جدامنا..دكت الباب علي الظهر جابتلي اكل..كالت ضيوف جدد عدنا انتو..
حامد : شكبرهه هاي..
سناء : بكد ماما غادة..
حامد : خوش..بعد لاتفكين الباب..خلاشوفهه منو هاي.. بلكت طلعت من ابوي وتريد تاخذج..اذبحهه..
سناء : لا لا..مبينة حبابة كلش..

سكتت ماجاوبتهه..كملت وخلص الوكت بالليل خليت سناء قريب الچولة اخاف تبرد واني نمت بعيد..

مرت ايام بين الشغل وبين سناء يعني ماكو شي.. الشقة الكعدت بيهه اتفقت وي ابو الفندق كال اكعد شكد ماتريد .. ماطولك مطول انطيني نص الأجر.. ماكلت لا..لأن احتاج حتى الدرهم الواحد..طول هلفترة محد يدري بينا هنا.. هاي المرة الجدامنا تجي بس لمن اني هنا..تخليلنا اكل وتروح.. سناء بعدهه موكلشي تعرف..هي شافتني اشتغل واغلب وكتي برة وسناء بعدهه صغيرة فكامت تجيب اكل..

بيوم واني طالع بالشغل..نايم جوه السيارة اسوي بيهه .. سمعت صوت مو غريب عليه ابد..بقيت على وضعيتي ماحجيت حتى حركتي بطئتهه..
لحدما سمعتهه كال : بوية ماشفت واحد هيج حنطاوي طول وضخم.. حامد اسمه..
مهدي : - لا والله عمي..
- : مشكور..

هذا ابوي..شجابه وشدراه اني هنا.. لمن اجيت اشتغل كتلهم اسمي وليد..محد يدري بيه حامد..بالعقل .. واحد عايف اهله وديرته علمود مايلگوه بعدين يكول اسمه الصريح.. طبعا لا .. حسيت خطواته ابتعدت يله كمت.. صحت مهدي حاجيته..
حامد : شراد هذا الزلمة..
مهدي : لك بالله اكول يشبهمن..يشبهك يالحسن..
حامد : هسسس وجع لاتعلي صوتك چنك مرة.. احجي شراد منك..
مهدي : يسأل على واحد اسمه حامد..كتله مااعرفه.. تعرف هيج واحد..
حامد : لا.. تعال كمل بمكاني..تعبت اني..

رجعت للشقة ميت رعب..اذا اليوم اجه هنا وماعرفوني من اسمي .. باجر عگبة يعرفوني من ملامحي..اشبهه نسخة .. كجسم وملامح..حتى لون البشرة.. وهذا مهدي على نياته فد نوب.. هسه بس يجر لسانه يخرطله الاول والتالي.. استغفرالله هاي شلون بلوة منين اجتني..توني يالله كلت استعدلت بعد ماعندي شي شكلهم نسوني..انوب طلعلي مدري منين..

ضليت من الشقة للشغل..كمت من اروح للشغل ألف الشماغ على وجهي بس عيوني تبين..اكول خاف داز واحد من جماعته هنا والمنطقة بيهه قيامة الله ناس..شوف واحد منهم يعرفني يجوز..

سناء الكاسرة خاطري..بالليل لمن اريد انام اسمعهه تبجي .. تجي يم راسي..حسبالهه نايم..
سناء : حامد.. حامد ..اكعد..
حامد : كولي..
سناء : مشتاقة لبيتنا ولابوي..شكد حنبقى هنا بعد..
حامد : منرجع بعد..افهمي..
سناء : بس ماكتلي هيج..
حامد : لا كلت ونص..تذكري زين..اني لوما احبج وخايف عليج منهم ماجان اخذتج..حمل زايد..يولي احبج انتي اختي.. يعني ريحة امي ..
تنهدت وسكتت .. : كومي نامي حبيبتي..ماكو شي ابوية.. هسه بس استلم بعد چم اسبوعية اشوفلنا بيت نكعد بي احسن من هاي الشقة..انتي مرتاحة بيهه..

سناء : مرتاحة..تعودت يعني..
بستهه
من راسهه وحضنتهه.. : اذا مقصر وياج كليلي.. علمود اعرف شسوي..
سناء : لا والله مامسويلي شي..بالعكس..حتى خالة ام خالد كلش حبابة وتجي يمي دائما هي وبتهه..
حامد : اي خوش..بس ديريبالج تحجيلهه شي..هي تحجي وانتي سمعي..اخاف عليج..
سكتت ماجاوبتني..هي فقيرة وفطيرة..تربت على ايد خالة غادة.. فاكيد تطلع فقيرة.. مااصيحلهه امي بس اريد خاطرهه الشهادة لله..

وره فترة استلمت فلوس الاسبوعية الرابعة..صار عندي فلوس تنكمش وبيهه حظ..وياهن فلوسي القديمة..سناء ماتتطلب واني مااريد..

بعدهم الكل يعرفوني بإسم رائد حتى المرة ام خالد.. سناء اختي نفس اسمهه ماخليتهه تكول غير هلكلام..دورات اصفن بيني وبين روحي..اليسمعني يكول وين اكو واحد يفلت من اهله وهو زلمة.. هي النسوان تفلت هذني النكول عنهن ميكدرن يسون شي..فما بالك برجال چادود ويكدر يجيب اللكمة بوكت صعب تتحصل..واني كدرت اجيبهه بهذا الشهر.. الشهر الجاي الله كريم بس مستحيل ابطل..

بعد هلاسبوع طلعت الصبح للشغل لكيت المحل مسدود وبس مهدي واكف بره..صبحت علي وتقربت احاجي..
حامد : شو هنا..ليش مامفتوح المحل..
مهدي : والله ماهلي اروح واعوفك تبقى تسأل..صارلي نص ساعة من اجيت..ابو رياض ماموجود (هو ابو المحل) .. مريض خطية..
حامد : شبي سلامات.
مهدي : شمدريني..البارحة من طلعت انت هو طلع وراك قفلنا الكبنگات جان يتخربط..اخذناه للمستشفى اجو ولده وطلعنا بعد .. اليوم عبالي نفتح بس هذا البصفنا كال ميفتح اليوم..
حامد : يابة البارحة غير طكيتهه بركضة للبيت..ميت تعب ومنا الجو بارد..هسه نروحله لبيته تندله..
مهدي : اي.. العصر اشوفك هنا ونروحله.. هنا قريب ..
حامد : يله ثيمالاه بعد..

رفعت ايدي ومشيت.. العصر بدلت ولفيت الشماغ خاف احد يعرفني..لاكيت مهدي ورحناله لبيته..تعبان فدنوب ..
حچه بالگوة : بوية اني حبيع المحل بعد مااكدر اشتغل..
مهدي : حجي احنا بالمحل ليش تكول هيج..
ابو رياض : اي يابة مااكدر بعد..هاهيه شوفولكم غير شغلة .. واني اذا لاگيتلكم شغل زين اكول لواحد من الويلاد يوصللكم ويخبركم..

بقينا كاعدين ساعة هيج ورجعنا..تعودت ع المكان والفلس الاحصله منا..وين انطي وجهي بعد..رجعت بالطريق لكيت واحد يبيع فول وحمص اشتهيته لسناء..اخذت منه ورجعت للشقة.. ضليت كاعد بعيد اتصفن..ذيج المرة الله راد يعطف عليه ولكيت الشغل بسرعة..هلمرة شلون..
سناء انتبهت عليه : حامد..
: ها..
سناء : شبيك شو ضايج..
حامد : ماكو شي يابة..ماكو شي..
سناء : شصار بالشغل احجيلي..تره ضايجة وحدي احجي شوي بلكت تروح الوحشة..
حامد : لازم ادور غير شغل..وماادري وين..
سناء : خلنرجع لبيتنا حامد..تعبت بعد مابيه حيل.. اريد ارجع للدراسة شسوي..شون..

حامد : يولي والله بس الگى شغل زين ودائمي ارجعج للمدرسة.. بس يرادلي واسطة علمود التسجيل..ماادري شسوي عوفيهه الله كريم..
سناء : حتضل تكول هيج..اووف ماادري شسوي مليت..
حامد : سناء تره دااتعب بالشغل وحيلي مهدود ع الاقل احجيلج كلمة بيهه خير لو لتحجين اصلا..اني لوما احبج مااخذج جان عفتج يم ابوج..بس احبج واخاف يظلمج بعدين ممستعد اخسر شخص ثاني..

سكتت مجاوبتني..مر اسبوع ادور شغل ومتبهذل فدنوب.. لاعندي شهادة اكدر اتعين بيهه ولا الشغل الاشتغلته بالبصرة نفسه هنا.. اخر شي وره هلاسبوع طلعت كمحاولة اخيرة .. شفت مهدي واكف وي مجموعة ولد جدام مطعم مال باچة.. رحت وكفت يمه وسلمت..عرفني عليهم ..
مهدي : يول والله صار فترة اريد اوصلك اكول بلكت اشوفه يم المحل القديم..اني لكيت شغل ولكيتلك الك..
حامد : شلكيت يمعود صار عشر تيام ماخليت مكان مارحتله..
مهدي : لا بالله..هنا دااشتغل بهذا المطعم..والله شغل خير من الله..اني اعرف اطبخهه انت شتكدر تسوي..
حامد : شكدر..انظفهه مثلا..
مهدي : فوت لابو المطعم حاچي اكيد يعرف وين يشغلك..
حامد : يله حشوفه..

طبيت حاچيته.. قبل يشغلني بس اغسل مواعين وجدورة.. قبلت واتفقت وياه شوكت اجي..مغبش اويلي يابة..التعب ضعف حيصير..بس ميخالف كلهه تبنيني..

ثاني يوم بلشت الشغل واستمريت فترة طويلة..تقريب الشهرين .. بين الشقة وسناء والشغل..صارت عندي معارف وصحبان.. كلهم يعرفوني بإسم رائد.. ابوية..ابوية ماشفته بعد من ذاك اليوم..اول فترة جنت اخاف لا يلگاني انوب ياخذ سناء ادري بي..بعدين بمرور الايام شفت الوضع استقر وماكو شي.. كمت لمن اخلص شغل المغرب اطلع ويا الولد الاعرفهم .. كله مشي صح اكو سيارات بس قليل..نروح مشي لباب المعظم لو للنهر يم الكرادة وابو نؤاس..

سناء تعودت ع الكعدة..السنة الدراسية شبه حتخلص.. فكلت قبل لا تخلص ارجع للبصرة اخذ مستمسكاتهه من المدرسة علمود انقلهه هنا مدرسة متوسطة..هي تركت سنة فمتأخرة عن البعمرهه ..

مافكرت خاف ابوية يشوفني..لأن مخطط لكلشي.. ادز صاحبي لهناك يشوفلي الوضع وشصاير..حتى اذا ماكو شي اطلع من الغبشة لهناك اخذهن..سالفتهه مطولة لازم اكثر من مرة اروح علمود النقل لأن بغير محافظة..بس ححاول امشيهه بسرعة حتلو بفلوس..

اني اندل محل الگصابة مالتنا..نوبات اروح من راس الشارع اشوفه وارجع..مو حبا بي..بس للإحتياط..خاف يشوفني..

محيي : ابوي وره ما رجع من بغداد دز جماعة نوبة اللخ يدورون علي..يعني وين يدورون كبل ماكو تلفونات واشياء متطورة.. يرحون يسألون اذا شافو شخص هيج مواصفته .. هم رجعو بنفس الحچي..

امي ..تعبت فد دور..هي كلش متعلقة بسناء تكول بنتي .. حتى حامد هو همات يتوددلهه..شكد ما يبين علي الكره والنفور من عدنا كلنا بس يم امي يسكن حيل..هي همات تريد خاطره..

ابوي تعب وتمرض مرضة قوية.. چنا كاعدين ع الغدة.. هو راح ديصلي كال هسه اجي.. وره شواي امي حچت..

الحجية غادة : يمة شوف ابوك وينه..اشو بطى..
كمت لكيته متكوم يم المغسلة..بطوله وضخامته طايح.. ركضت علي شلته وصحت كاظم وقاسم ..اخذنا بالعجل للمستوصف.. حتى نفس مايتنفس ووجهه ازرگ..اجه الطبيب اخذه ودخل لغرفة الطوارئ..خلوله اوكسجين..ضلينا واكفين بره نتاني يطلع خاطر نحاچي..ربع ساعة وطلع..
كاظم : بشر دكتور..
-: الحمدلله على سلامته..قستله السكر مرتفع كلش.. مايصير .. واني حسب جسمه وهيئته مااعتقد يكثر بالأكل..
كاظم : لا دكتور..بس صاير ظرف بالبيت..
-: اها..اي اكيد الحالة النفسية والتوتر والعصبية تأثر.. مااكدر أشخص شبي..اخذوه لدكتور كبد وبنكرياس او سكر وضغط.. مشكلته بوحدة من هذني..ومن الله الشفاء..
قاسم : نكدر نطلعه ..
-: اكيد بس يحس نفسه مرتاح تگدرون تاخذو..

تشكرت منه وواكف بباب الغرفة..شواي وسمعته يگح ديجلي صوته ..يعني كعد.. اخذناه ورجعنا للبيت..

عمام ابوي عرفو بي مريض اجوي ثنين اخذوه وقاسم راح وياهم لبغداد.. علمود الطبيب ..چي تعب بعد حتى اكل ماياكل وايده ترجف..كل ما اشوفه اكول هاي اخر ايامه..مو سهل اكولهه بس من هول الموقف الصار بي..ضعيف وتعبان وماياكل..

بهلفترة انه وكاظم كمشنا الشغل كله..الكعدات البسيطة كاظم يكعد بيهه..بس الطلايب الگوية ماادخلنا..العمر اله حوبة وانه مهما تعلمت منه يبقى عمري مايسمح امتلك خبرته.. اطلع من الغبشة ماارجع تالي الليل..انه بالشغل واكول ابوي شلون تحمل هلمسؤولية وعمره ١٨ سنة..يرادلهه واحد فطن من أساسه وگوي مو بس هيج..

وره شهر رجعو من بغداد..اخذتلي يومين نايم مااهجس حس احد من التعب..هو بقى مريض ويعاني..يا سكره يصعد.. يا يتخربط من وره الكبد..كل يوم اوكسجين ومستشفى بالليل للصبح يله نطلعه..

حامد وسناء مالگينالهم اثر..كل فترة ابوي يدز جماعة يدورون عنه وماكو..حتى سناء بلكت بنية شايفتهه.. دز بت ابن عمه هي من بغداد اصلا فكللهه تسأل البنات بحلة وحدة من مدارس بغداد القديمة بلكت شايفيهه..بس محد لامحهه اصلا.. بيوم جنت بالحلال واكف وي العمال خلص وكتهم ورجعت للبيت.. بدربي شفته كاعد يم عتبة الباب الوراني.. ويدخن .. تخبلت.. منو يدخن كبل..بس العنده وجيبه مليان.. رحت سلمت علي ..

محيي : بوية مااريد ادخل بس انت مو طايح بالفراش.. شعندك ادخن موزين..
شامخ : مابيه شي..انه اصير زين بس اشوف خوانك.. راح اموت بحسرتي وحگ علي..
محيي : اسم الله عليك بوية لاتكول هيج..انت وين تشوفهم برأيك..
شامخ : موجودين..انه گلبي حاسني هيج..بس ماادري وين.. هذا حميد شعوطلي گلبي..شسوي اتحسب علي حتى حرام..
محيي : خاف رجعو يم واحد من خوالهم..
شامخ : لمن جنت ببغداد رحتلهم بروحي..حلفو ماشايفيهم.. حتى خشيت للبيت ماشفتهم..
محيي : والله ماادري يابة..انت اعرف..

مديتله ايدي گومته..سندته وطبينا جوه..

وره يومين جايين عمام ابوي وكاعدين احنا بالديوانية بالليل .. هناك ونسمع صوت رمي كلش قوي وگزاز تفلش وطاح بالگع.. ركضت انه وعمامي بره ..لكينا اربعة ملثمين وواحد واكف بنصهم بس بدون لثام..الرمي على بيت الشيخ يعتبر عيب ويستاهل فصل چبير..بقو واكفين بمكانهم ..عم ابوي ازهر بالعجل رفع مسدسه بوجهه..

ازهر : شعدكم هنا..مناعيل الوالدين..
-: عمي لاتجاوز تره تصير موخوش وحگ ابو فاضل.. ابن نوري جاي دخيل يمكم نريده من ياخته..خليتنازل الشيخ عنه.. لا والللله.. اهد البيت على روسكم..
ازهر : يول شو ماتعرف تسولف..ياابن نوري هذا.. اگلك تمشي منا لا افرغ المسدس براسك..ماعدنا دخيل..واذا جان اكو تحلم تشوفه..يله توكل وحضر عمامك طايح الحظ..

هو وديحجي طلع ابوي يگحگح..
صاح : شبي ابن نوري..
-: عمي ترضاهه يبوگ حلالنا تالي ماتالي يشرد ويجي عدكم دخيل وانت تستقبله..مامقبولة منك هاي شيخنا..
شامخ : يول منيلك هلحچي..چا انه شبيه مطفي ومااعرف دخيلي وياه الحگ لو علي..
-: معلينا شيخ..ياتخلينا نفوت نشوفه ياتحجي الحگ..
شامخ : انت تدري ويامن تحجي يالأغم..والله ادخلك سجن اخليك تخيس هناك..حرمة بيتي ماينجسهه واحد مثلك.. لو جايني مثل جيات الوادم چا مديتلك العين فراش والرمش غطى.. بس هاي سوايتك إهانة..وتتحاسب عليهه..

صار صياح من الطرفين..هذولاك الزلم يكولون احنا جايين نريد حگنا وابوي يكله هاي اهانة..وهي فعلا هيج..لوما كمشته لعمي ازهر چا رماه واحنا صرنا بالوجه والغلط يتحسب اعلينا..

اخر شي شردوا..ابوي يعرفهم المن يرجعون..كال باجر اعرف شسوي.. الگزاز التكسر مالت الهول..هو يصير بمقدمة البيت.. الحايط صايرة بي طلقتين..ابوي رأسا طاح من طوله..مايتحمل يبقى واكف هلكثر..هو تعبان ومريض ادور كام يصيح واعصاب.. اخذه كاظم وقاسم للمستوصف وانه بقيت بالبيت.. سدت الشبابيچ بكراتين منا لباجر اجيب الجامچي يسويهن.. لوما ليل چا صارت الكعدة بنفس الدقيقة..

ابن نوري اسمه فائز.. واحد عراك وعصبي مخبل..بس دائما الحگ وياه..فلهيج تجي المصايب ع الطاير.. ابوي لمن رجع من المستوصف دز ضرغام لعمام ابن نوري يكللهم باجر تصير گعدة.. اخ منك يابة شكد تكابر.. بعز المرض والطيحة يريد يروح..عمامه كالو احنا نروح بدالك ماقبل.. كال البيت بيتي وانهتكت حرمته..اليوم اجيبهم من شواربهم..

امي من الهبطة متخربطة..ماجنت ادري بيهه چي نسوان عمام ابوي هناك فهن مگوماتهه وواكفة على حيلهه..

ثاني يوم الظهر صار الگوام ورحنالهم لبيتهم..واحد من الزلم الملثمين عرفته من عيونه..البارحة كام يفشر..ردت اطگه وانيم الأخمس بصماخه..بس قاسم كمشني..

اليوم بالكعدة كال : ابنكم همات غلطان..احنا غلطنا تردولنا الغلط..مايصير..
يحجي ويأشر علي..تسودنت انه صرت مااشوف بعد.. كمت علي كمشته من خوانيگه واهجس واحد كامشني من ظهري يريد يجرني منه..انه منا عصبي بخبال ادور هذا اجه خبلني بالزايد.. دفرته بنص الكعدة يله فشيت غلي بي..
محيي : شوف لك..خاف تريد تركب البلوة براسي.. اذبحك جدامهم وحگ ربك اسويك طشار..أي حگ يمنا ماالكم.. ترضون او ماترضون..انتم جايين علينا..والبيت متضرر من وراكم.. تالي ماتالي يجيني هذا الزعطوط يكول احنا غلطنا بس مايصير تردونا بغلط..يول انه لو بيدي ارشك دم..بس هاي لخاطر عگال ابوي وشيمته ماسويت شي..

اكو منهم كال حچيك صح..بس اهله وكفوا وياه..لو نجي ع الواقع اكيد حچيي صح..احنا لاحجينا ولا گلنا..مجرد حگنا ناخذه ونرد هيبتنا چي التعرض بمثل هيج موقف يعتبر انتقاص من هامتنا..

صارت الكعدة وفضت بالاخير بفض عادل ويرضاله اكبر راس.. رجعنا للبيت وجبت الجامچي سواهه وراح..ابوي شفت علي علامات لاهي رضا ولا هي غضب..بس العصبي مشكلة مايكدر يتحكم بروحه بعد..

مرت ايام وبعده ابوي طايح بالفراش..انه بطيحته هاي هجست روحي كبرت عشر سنين..شكد تعلمت..وانه الانسان اليكره الصبر ومايتحمله كمت اصبر ايام وايام..

ابوي ماخلة مكان مادور وسأل بي..حتى المدرسة مال سناء القديمة..كالت ماكو أي شي..لحد هللحظة متسترين ع السالفة ومحد يدري بيهه بس احنا بالبيت..حتى الناس اليسألولنا عنهم ياعادل ياضرغام ياعمام ابوي..خاطر محد يعرف.. ولمن يسألون مايبين هذا الشخص ماموجود لو شارد..

بيوم خلصت شغلي وطلعت للشط ع الهوى البارد..الجو هيج بالشهر الخامس بعده بي برودة بالليل..اجه صاحبي عبدالغني يحاجيني..
عبدالغني : تدري المدرسة احترگت..
محيي : يامدرسة..
عبدالغني : الجانت بيهه اخيتك..ماادري شسمهه راحت من بالي..
محيي : جذب..هاي شحرگهه..
عبدالغني : شمدريني شو كعدنا الصبح على ريحة الشعواط.. تدري بيتي قريب عليهه..
محيي : خو انت چن نايمة عليك بلوكة..ولا تحس..فديوم تحترگ وماتدري بروحك..
عبدالغني : يول شعدنا غير النوم..خلينا باجر عكبة يجيني الجاهل وتعال چد من الصبح لليل..
محيي : على كولتك..امشي للبيت عازمك..

اخذته ورجعنا للبيت..الحجية سوت اكل مرتب وكعدنا لليل وراح.. كمت تفقدت ابوي شفته نايم..عفته وصعدت..

حامد : ضليت اشتغل بنفس المطعم..اول شهرين ينطيني راتب زين..ومرتاح علي..واني مواضب ع الشغل..خوما بعازة الفلس وهم اتعاير ومااروح..

وراهه بفترة اسبوع يصادف الراتب مالتي..انطاني نص المبلغ.. ضليت صافن علي..
حامد : عمي ليش ناقص..
-: حبيبي نقصت من العمال كلهم..تريد تبقى اهلا وسهلا بيك.. متريد على راحتك..اكو غيرك يدور شغل..
اخذتهن منه وسكتت..رجعت للشقة سبحت وكعدت اتعشه.. اجت سناء تحاجيني..

سناء : حامد ارد احاجيك بشغلة..
حامد : كولي يابة..شعندج..
سناء : اريد هدوم صيف..الشقة حارة وماجبت وياي للصيف ماعبالي حنبقى هلكثر..
حامد : ميخالف..
سناء : عندك فلوس..
حامد : عندي اي..
باستني وكعدت يمي تاكل..هو اني اليوم راتبي ناقص ومنا هاي تريد هدوم..اوف يابة شلون بلوة.. بالگوة نمت بالليل ..تعبان من التفكير ومن الشغل..اني صبح ليل واكف على رجلية حتى ورمت بعدين هذا ينطيني نص..استغفرالله ..

ثاني يوم الصبح اخذت قياسهه ورحت اشتريتلهه قطعتين ورجعت.. ضليت كاعد بالشقة ماطلعت..فتحت الشبابيك بلكت يجي هوى شي..الجو يسمط بالنهار..

مرت تلث ايام ماطالع باب الشقة..بس على كد الاكل انزل اشتري واصعد..ام خالد مدري وينهه ماموجودة.. الفلوس كاعد بالشقة واگرط بيهن..شفت نفسي حضيع كلشي بنيته من اجيت لحد هسه.. طلعت باليوم الوراه كلت لازم الگى شغل.. ماارجع اذا مالكيت..وهناك ولكيت لوريات طابگة واكو عمال ديحملون بيهه طحين وشكر.. رحت حاچيت الأسطة الواكف عليهم .. كال الشغل مو ثابت بس اذا تريد هذا الشهر عندي فراغ.. كتله يله من باجر ابدي وياك.. صح لكيت شغل بس بعدني مشغول بالي.. هاي شلون بلوة..شكد صعبة هلشغلة..

باليوم الثاني بلشت شغل..الشمس تصگع على راسي وصياح وعياط بين العمال ومماطلة..واحد يذبه ع الثاني..اني اشتغل وساكت محجيت..سويت الشغل العليه حسيت ظهري انفصم.. وبكل مرة اكول نفس الكلام..ميخالف.. اول وتالي حشتغل ..

ورة اسبوع انطاني اسبوعيتي اني والعمال الباقين.. رجعت للشقة ولاگاني مهدي بالصدفة..فطلعت وياه مارجعت للمغرب.. هستوني دااصعد الدرج وحسين الفلوس انسحبت مني.. تخبلت ردت انفجر.. نزلت وراه بسرعة واركض واصيح اريده بس يرجعلياهن..حتلو نصهن اني قابل بس شي اكل بي وادفع إيجار.. دقايق مااحس الا الولد وكع من طوله.. ضليت واگف بمكاني والهث من التعب..

اجو زلم تلاثة علي يريدون يگوموه..بسرعة تقربت منه جريت الفلوس من ايده..
واحد منهم حچه : رجع الفلوس لصاحبهه..
حامد : هاي فلوسي عمي..هو باگهه مني..
-: منو يكول..
حامد : شنو منو يكول..دشوفني شلون متبهذل والطحين تارسني وشوفه هو مابي شي..
انطانياهن ورجعت للبيت..انطيت ابو الإيجار وصعدت نمت بهدومي ميت من التعب..

ضليت الشهر كله بهذا الشغل.. من الشمس صرت اسمر واني منا حنطاوي.. ظهري ينكسر ويتنعنع ويصيح طول النهار لحدما يجيني الليل ارتاااح حتلو انام على حصيرة.. بس المهم اغمض..هلكت وجهدت روحي بالشغل.. بس احصل فلوس وماانزل نفسي لأحد واگدي..

ورة هلشهر كعدت مصخن وجسمي مكسر..فلاونزا.. بس ماكعدت..كمت بدلت وشربت چاي حار وطلعت لنفس المكان الاشتغل بي..بلكت بعده يحتاج عامل..لمن وصلت شفت واحد داير وجهه..بين عرفته وبين لا..احس شايفه .. فجأة اندارلي....

يتبــــــــــــــــــــــع....................