أساور الفضة الفصل الحادي والعشرون 21 - بقلم نهى

مساء الخير احبتي 🌹♥️🌹♥️
🌹♥️🌹♥️
#اساور_الفضة
#نهى_الحسون
#البارت_الواحد_وعشرين

لحظات واجة الولد صاحب السيارة وصعد وسلم على بيبي والتفت يسلم علية
رفعت راسي مصدومة وباوعت عليه
ما اعرف ليش بس سمعت صوته كلبي كام يرفرف مثل العصفور

اباوع عليه شلون عدل المراية وركزها علية
يمة اروحله سبع فدوات

دار وجهه على سليمة
.. هلا حجية نورتي سيارتي
.. هلا بيك خالة الله يباركلك بيها
طبعا سليمة متعرف رائد لان مشايفته
بس من محاسن الصدف ان يكون رائد من ضمن اصدقاء سيف بحكم انهم جوارين من نفس المنطقة
انتبهت لسليمة شلون تباوع لرائد وعيونها كامت تلمع غيرت نبرة صوتها وكملت كلامها
.. ربي يوقفك ويبارك بشبابك
وجرت الصوت
.. اكوووووول خالة انت متزوج لو بعدك
عزة بعيني بدت سليمة تزحف شلون بيها
هاي وين ما اوديها تكعد تنسق
خرب حظي

ابتسم .. لا والله حجية ما مرتبط بعدني
ادعيلي كون بنت الحلال تحن علية وتوافق

منتظر بس اشارة منها وتفرحني بموافقتها نذر علية لاركص للصبح بيوم عرسي

.. هاي ياعوبة مخليتك تنتظر لحد هسة
خليها تولي مال العمة كون نعال على كصتها
امهات الكمل هم يتشرطن

.. ههههه لاحجية خليها يلوكلها تدلل علي

.. انا اكلك يمة انت ليش ما تعوفها وانا عندي الك
مرة تسوى وتستاهل والله تندعيلي

يبووووووووي عليج سليمة
هسة ما اعرف هاي وياي لو علية هسة غير توحد الموجة
كوة لازمة روحي لا اضحك
.. حجية لو هي لو ما اريد ابطل ما اتزوج
انا كلبي هاويها وميت بعشكها
.. خاب من امداك انت وياها شبيك يحظي
ساحل روحك سحل عليها
ما جنك رجال حوك
ترة المرة من تشوف الرجال خفيف
تستهان بي ويقل مقداره

هههههههههه اخ يمة بطني قصفته لرائد
شافته ما اجة وياها للطريق مصرفلها كلامه
فمسحت بي الكاع

.. شسوي حجية مو بيدي بعد الكلب وما يهوى
.. هو انتو الرياجيل مو مال عيني واغاتي
تموتون عالواحد يمسح بيكم الكاع

اباوع لرائد فاتح حلكه ووجه صار احمر من ورة حجي سليمة شكله راح يشمر روحه من السيارة

شوية وكالت
.. اكلك
خالة انت وين مودينا
.. حجية غير اخذج للعرس
.. لعد بيت العريس وين صار اشو طولنا
حجيت بصوت عالي حتى تسمعني لان متعودة عليها كلة عالي احجي
.. شنو بيبي نسيتي العغس ( العرس) بالقاعة مو ببيت العغيس ( العريس)
.. ووجعة ابو بيبي طرشتيني عمة حتى عمة

يبووو الله ياخذج سليمة

اباوع لرائد يباوعلي خربان ضحك بس من التقت نظراتنا بالمرايا عيونه اكلتني يمة فديت عيونه
وشنو شلابس
غير القاط ياكل ويشرب عليه
يمة اروح لك فدوة بتكسي وارجع مشي لبيتنا
بشرط حافية

سليمة قطعة علينة اللحظة ورجعت تحجي
.. اكول خالة وديني لبيتنا انا تعبت ما بية حيل
اكعد بالعرس اشو لاني من المصفكين ولاني من المطبلين
شلهم بية خلي ارجع لبيتي احسنلي من دوخة الراس

.. لا حجية شلون شلهم بيج انتي الخير والبركة
.. تسلم يمة بس ماعاد حيلي الاولي
صرت سكراب بسرعة اتعب
سوي علية فضل وردني لبيتي

وبعدين اخذ هاي الكطمة ووصلها عالعرس
بس ها دير بالك تضيع منك بالعرس
.. ليش تضيع

.. نص اخمس وتروح بين الرجلين
شهكت وضربت على صدري انعل ابو شكلج يا سليمة
على هالقصف
ما خليتي بية شي براسه خير

وصلناها للبيت
ورجعت اركب بالسيارة لنفس مكاني
.. خير سالمين السايق مالت الخلفوج وتركبين ورة
باوعت عليه ضايجة
.. يالله شو اتحركي وكعدي كدام
فتحت الباب وكعدت كدام وهو صعد وشغل السيارة
وساق
دار وجهه علية وابتسم
.. اليوم عرفت الله شكد يحبني
هم لو مدورلي واسطات علمود يخلوني اتصل بيج هم جان ما رهمت
مثل هاي الصدفة
لج متصدكين فرحتي بيوم شفتج صعدتي بسيارتي غير اجة كلبي يوكف
انتبه علية ساكتة
.. متحجين ليش ساكتة
.. زعلانة عالصار وياي بذاك اليوم من ورة اهلك
انت اذا تعرف بأهلك مموافقين شكو دزيتهم وخليتنا
بهيج موقف محرج
تعرف من بعدك اني شصار بية
.. اي اعرف شصار بيج واني اضربيها في اضعاف اتدمرت اكثر منج
هدى الله يخليج تعرفين بية شكد احبج
وما اكدر اتنازل عنج لو على كص ركبتي
بس اريد منج توكفين وياي وتساعديني
.. شلون اساعدك
.. اريدج ما تديرين بال لكلام اهلي
وما عليج بأي واحد غير بس رائد
خليج وياي على طول الخط

.. رائد صعبة ترة هذولي اهلك مو ناس غربة
واكول ما علية بيهم ومو مهم رضوا عني اوما رضوا
يعني من نتزوج راح اشارك حياتي وياهم

.. لا هدى ترة اني ناوي من اتزوج كبل اعزل ببيت لوحدنا
يعني ما راح تلحكين تعيشين وياهم ولا همة راح
يضايقونج بأي شي

.. غائد هواي اكو مشاكل غير اهلك
.. شنو هاي المشاكل
.. الوحمة
.. شبيها
.. انت مشايفها واخاف من غدة (ردة) فعلك اذا تشوفها
احتمال متتقبلني

.. هدى كم مرة اعيد واحجي واكول انا من حبيتج
ما حبيتج علمود جسمج فقط لا وانما حبيت بنيتي
وصديقتي ورفيقتي الي شهدت وياي احلى ايام بحياتي
وتعرف كل صغيرة وجبيرة بحياتي مثلما انا اعرف كلشي عنها
تتوقعين مثل هيج شي تافه يأثر علية
على فكرة انتي حلوة وكل حلو بي لولة

وانتي من زود الحلة عندج لولة واحلى لولة
نذر علية بس تصيرين حلالي لاكعد ابوس بالوحمة للصبح
فكيت عيوني وشهكت
.. عزةةةةةة غائد عيب استحي على دمك

اول مرة رائد يحجي وياي كلام جريء
يبوووووو ابجي تيزاب على هذا حجيه

.. اي كمل
.. شكمل شنو جاي احجيلج قصة
رحمة على والديج كولي اي وخليني اتوكل
وادز اهلي وناسي يخطبونج
كولي رائد فوت والهوى بظهرك هدى ما تعوفك
وراح تساندك وتبقى وياك لاخر الطريق

.. ابتسمت بفرحة ودنكت راسي خجلانة
كلام رائد حسسني بالامان ورجع ثقتي بنفسي
وبلحظتها اتخذت قراري
.. موافقة
يمة هو جان يسوق وفجاءة لزم ابريك اجيت اطلع من الجامة
شهكت مفزوعة وحطيت ايدي على صدري
.. الله يلعن بليسك ياغائد وكعت كلبي
.. عيدي شنو كلتي مسمعتج زين
.. شوف اني حجايتي وحدة متصيغ ( متصير) اثنين
بس لخاطرك هالمرة اعديها
انى هدى اثير اوافق بكامل قواي العقلية ان اتزوح من غائد ابن المختاغ (المختار)

صاح بصوت عالي مثل المجنون
ووووووووووااااااااخيرا الي يتمنااااه كلبي

طلعت شمس موافقتج حتى تنور ارض رائد
لزم ايدي وهاي جانت اول مرة يتصرف وياي
بحرية احس كلبي اجة يطلع من صدري
انتبهت لوضعنا وسحبت ايدي من بين ايديه

.. ليش سحبتي ايدج لج انتي حلالي ومريتي
..ميخالف رائد لتستعجل على رزقك كلشي بوكته
حلو
حرك السيارة وكمل الطريق وهو كل ساعة يباوع علية
فرحان
جنت احب احافظ على روحي لأخر لحظة اني تربية شيماء

وعلى طاري شيماء وصلت للنادي
ودخلت للقاعة النساء ولكيتها تحوم يم الباب
وتفرك بيدها شافتني واجتي ركض علية ووجهة احمر
لزمتني من زندي وحجت بخوف على غضب
.. انتي متكليلي وين صرتي وليش اتأخرتي وويامن صعدتي السيارة
باوعت وراي
وبيبي وين مو جانت وياج
.. شبيج شومة ليش معصبة انطيني مجال احجي
تغة( ترة) انا اتأخغت (اتاخرت) بسبب بيبي لان تعبت وكالت ودوني للبيت

رحت دخلت لغرفة التبديل حتى انزع الجبة والشال
واجتي وراي
.. منو وصلكم للبيت
.. واحد ما نعغفه (منعرفه)من جماعة سيف غكبنا (ركبنا)وياه بالزفة ووصل بيبي للبيت وبعدها خطية وصلني لهنا
اباوع لشيماء ممقتنعة بالكلام
مصرفلها هذا الحجي
.. شوفي سمعيني زين
اياني وياج اشوفج تركصين بالعرس
هاي وحدة
اثنين رجلج على رجلي وين ما اروح كون الكاج
بصفي فاهمة لو اعيد
عقجت وجهي وبرطمت شفايفي
.. شبيج شومة اذا مو بعغس ( بعرس) اختي
اغكص ( اركص) لعد بعغس ( بعرس) منو اغكص

.. هدى ما راح اكرر كلامي احترمي نفسج وامشي كدامي الناس ما نعرفهم وتعالي شوفي التصوير
بالقاعة صاير بفلس

عود هاي استاذ سيف افندي منبه الموظفات على سالفة التصوير وكال
كولو رجاءاً ممنوع التصوير
والي الكفها تصور بنقالها
اخذه منها واصداره كبل

رحت كعدت يم شيماء وباوعت على اجواء القاعة
والمعازيم كلهم فخمين مثل عرس اهل هالة

انتبهت شفت ام فرزدق راحت لضحى وسلمت عليها
وضحى كامت وباستها من راسها

والله انقهرت من اتذكرت صهيب والوعد المبتور
خطية هسة الله يعلم عرف بموضوع زواج ضحى لوبعده

اجتي شهد وسلمت علينا وبعدها كمنا اخذنا مريم اختي ورحنا وكفنا يم ضحى وصورنا عالستيج

الحلو بالموضوع والي رفع معنوياتي
اثنين نسوان اجوي سألنوي شكد موالديج

وانتي بنت منو هاي احد الاسئلة الي تعرفين من خلالها انتي اتقدمولج خطابة

بعدها رحنا سلمنا على ام فرزدق وجنتها ام صهيب
ام صهيب سلمت علينا وكالت لشيماء
.. يوم الالكم نشوفكم عرايس
.. اشكرج خالة
ورجعت كالت.. خالة ليش استعجلتوا بزواج ضحى
والله بعدها صغيرة

جاوبتها ام فرزدق.. ياعيني صغيرة شنو
عمرها٢٠سنة
بعد شكد تردين عمرها يصير وتتزوج
سكتت مجاوبت خالة
ورة فترة
شيماء كامت وهدت لضحى المحبس وطلعت من العلبة سوار امي الفضة الخاص بضحى ولبستها بمعصمها
وضحى شمرت روحها بحضن شيماء وباستها

بعدها استمر العرس ودخل سيف وصور وية ضحى
جان يباوع لضحى وعيونه تلمع وكل شوية يشاورها
يحجي وياها وجههة يصير طماطة
حجيت بصوت ناصي وية البنات

.. امنيتي اعرف العغسان (العرسان) بهيج لحظة شنو يحجون
رباب .. ههههههه ان شاء الله من تتزوجين تعرفين شنو يحجون عود غششينا وكولينا شنو يكلج زوجج
.. نذغ (نذر) علية بس يحجي وياي واعغف(واعرف) شنو المضمون كبل اذيعها بالسماعة
.. ههه خرب يومج شكد مفضوحة

بعدها كام سيف وكوم ضحى واخذها على ميز الكيكة حتى يقطعونها
جانت شهد وشلتها واكفين قريب على ميزنا
اسمعها تكللهم
.. اوووف منج يا ضحى شكد فاهية
شوف حتى متعرف شلون تلزم الشوكة وتوكله من ورة غبائها خربت ام اللقطة والرومانسية

احس بكلبي كام يفور عليها
باوعت لشيماء لكيتها ملتهية بالسوالف وية رباب والبنات
سحبت نفسي من يمها على كيفي
مثل النملة
الانسحاب تكتيكي لهادي المكسيكي
مشيت رحت لشيماء احس نار تسعر بية اشو العوبة نزلت على اختي بالرزايل
وانا اتلفت على ورة خاف شيماء تصيحني
اقتربت عليها وطبطبت على كتفها وحجيت

.. اكووووول شعندها الملكة ديانا ام الكمل
صارلها ساعة تحجي بالاتكيت

بس سمعتني التفتت علية
وفكت عيونها وانفتح حلكها متفاجئة من مداهمتي وخافت لا احرجها كدام صديقاتها

كلبت عيونها وحجت من بين اسنانها المرصوصة
لا هلة ولا مرحبا اشكد مكروهة
وغيرت الوجه وابتسمت
جنت ما اعرف شنو معنا كلمة ام وجهين بس هسة عرفته من شفت حركات شهد
.. شكوو شتردين
.. سلامتج ما رايدة شي بس بالصدفة جنت مارة منا وسمعتج تغلطين على اختي

.. اسمع منو جاية تحجي على الغلط
الله يرحم ذاك اليوم جنتي ترزلين بأختج وتتعاركين وياها وتغلطين عليها

حطيت صبعي على صفحة راسي
.. عاااادي بكيفي مزاجي
انا اغزل (ارزل ) اختي اتعاغك (اتعارك)وياها اعيب عليها اي

بس من تجي وحدة مثلج وتحجي عليها لااااااا حبيبتي

بساعتها تصيغ (تصير) اختي عزيزة وغالبة
الي تحاول تقلل من شأنها انتف شعغها شعغاية شعغاية (شعرها شعرايه شعرايه )سامعة يا حلوة
حجيت الكلمة الاخيرة واتقدمت عليها بحركة تهديد
كمزت من مكانها عافسة وجهة بتقزز
عبالك دتباوع على جلب بوليسي وتخاف يهد عليها بأي

لحظة ويخرب كفشتها اقصد تسريحتها
الحلو بالموضوع
اني ما عندي شي اخسره
لا معازيم يعرفوني ولا اسوي حساب للبرستيج
لذلك جانت تباوع علية بحذر
حجت تتنعوص بخشمها
.. اوي هاي شنووو السانج شطوله عبالك السان دلالة

.. اي ديغي(ديري) بالج مني تغة(ترة) مو بس الساني طويل
حتى ايدي طويلة وتلوح ومرات (مرات) غجلي (رجلي) هم
يصيغ (يصير) بيها شب الطول وتطول

حجيت واني رافعة تك حاجب
خرب جايبة دور المعلمة توحة
هزت كتفها بغيض ورفعت خمشها وكالت

.. بنات يالله امشوا خلي نروح منا
هفت بيدها على وجههة تطلب الهوى
.. اوووف اختنكت المكان هنا صار بيئة

مشت هي وصديقاتها من يمي
جنها الطاووس المغرور
حجيت من وراها بصوت ناصي
بس حرصت ان تسمعه قبل لتروح

.. انصحج تغحين (ترحين) لحديقة الحيوانات تلكين بيها هوى نقي يناسب مزاجج وعود سلميلي على جماعتج القغود (القرود)هناك
لمت قبضة ايدها من الغضب ومحجت شي
كان مبين عليها تريد تكول شي
بس وين اني واكفه مثل الديج
نافشه ريشي مستعده للقتال

يالله بنات امشو اخذتهم وراحت
روحة بلا ردة
كعدت اتسكع مثل الشقاوة بين الطبلات واتفقد
احوال الرعية
الفضول الهداوي يسرح ويمرح بالساحة
من كد ما افتريت احس رجيلة وكعت
سمعت صوت شيماء صاحتني التفتت
ورحت يمها

.. شنو ما مليتي من الفرة كعديلج شوية
والله صرت حولة من وراج كل شوية التفتت الكاج بمكان
رباب.. عوفيها براحتها ترة هواي خنكتيها خطية
البنية عندها طاقات مخزونة خليها تصرفها
بالفرة
..هو اني ليش خايفة لان عندها طاقة مخزونة
وتحتار بيمن تفرغها
.. شومة خليني اغكص (اركص)واني افغغها (افرغها)كلها
.. انعل ابو شكلج على هاي اللكافة
خزرتني .. انجبي وكعدي يالله
كعدت وانا ضايجه

ورة فترة
وبدة بوادر انتهاء العرس
خلص العرس ما بين عازم ومعزوم وعريس وعروسة
ونحن جالسون بينهم مثل الطراطير
مالنة اي دور غير بس ضحى كل شوية تصيح علينا تكول ابقوا يمي لتروحون بعيد

بس بعدين من حان وقت الرحيل وصار لازم يزفونهم
ضحى انكلبت معالم وجهها والعيون صارت حمر
ونزلت الدموع وهي تباوع علينا

اباوع لشيماء صارت تسحب نفس عميق حتى لا تنهار
تريد تبقة شامخة مثل الجبل قوية
اما اني جنت ابجي واتذكر ايامنا الحلوة سوة
الي عشتها وية ضحى وشلون جنت انصب عليها
واتعارك وياها واتشاقة وياها
اتشاركنا بكلشي حتى بالهموم متقاسمين
روحي ياخيتي عسى دربج اخضر وتشوفين السعادة

وبيومها ودعنا اختنا الي راح تصيرلها من هاي الدقيقه
حياتها الخاصة

رجعنا للبيت هدوء شفنا بابا فاتح باب الثلاجة وواكف يمها
شافنا .. ها خلص العرس
.. اي الحمدلله
.. وشلونها اختكم
.. خطية ظلت تبجي من زفوها
.. على شنو تبجي كل بنية مصيرها لبيت رجلها
يوم الالكم وانتوا تتزوجون واخلص

غمضت عيني وتركتهم ورحت دخلت للغرفة واني اباوع لمكان فراش ضحى اوف يا هالمكان شكد شهد على مواقف وجان شاهد على هواي حسرات
مضى اليوم وتلتها الايام تتعاقب
ورجعنا لحياتنا
شيماء التهت بدوامها واني صرت اقدم عالكليات
وية البنات هالة وفاطمة
جانوا يقدمون وياي
رجعت للبيت بعدما قدمنا الاستمارة
وننتظر شنو يطلع النة يا قسم
شفت سليمة دايخة وتحجي وية نفسها

وتتحسب
شافتني ونزلت علية بالحجي
.. واخيراً لفيتي وين جنتي
.. شنو السالفة مو كلتلج قبل لا اطلع اني غايحة وية فاطمة صديقتي حتى اقدم عالكلية

.. اوووف منكم دفوتي سوي غدة وتعالي
دوري وياي على مفتاح الكنتور ما اعرف وين
اختفى

ذبيت جنطتي ورحت بدلت ملابسي ورجعت يمها بالمطبخ فتحت الثلاجة واني احجي وياها
.. اخاف بجيبج انتي دائما تحطي بي
.. يالفالحة لو بجيبي جان ما سألتج
.. انتي متعوفي
كله بجيبج
.. بلا حجي زايد وتعاي دوري وياي
.. هسة اخلص طبخ الغدة واجي وياج ادور

اوف منج ياسليمة كل يوم طالعتلي بشغلة
كملت الطبخ وطفيت النار عن الجدورة
ورحت ادور وية سليمة عن مفتاحها الضايع
اسمعها تدور وتحجي وية نفسها
.. يمة وين ولى مفتاحي

واجتي شيماء والوجه مبتسم
سلمت علينا وشافتنا ندور وراحت للغرفة بدلت ملابسها ورجعت شافتنا على نفس وضعنا ندور
البحث عن الكنز

شيماء.. شكو على شنو تدورون
سليمة.. ولج ادور على مفتاح كنتوري ضاع

شيماء عقدت حواجبها وكالت
ما ادري بس اتوقع شفته اليوم الصبح بيد بابا
بالله انتظري خلي يجي وسأليه

.. عزة العزاني شيسوي مفتاحي عند ابوج
.. شمدريني
انتبهت لسليمة ظلت تحوم مثل البزون المحروك ذيلها
ما تعرف شتسوي
راحت شيماء للمطبخ وصاحتلي

.. ها شومة اصبلج غدا؟؟
.. اي عفية صبيلي غدا بين ما اسولفلج الموضوع
العاجل
طلعت الصحون من الكاونتر وعيوني عليها

.. شنو الموضوع
اخذت الصحونة وفتحت الجدورة وصرت اصب
.. الموضوع يخص حبيب الكلب رائد
جنت اصب بالمركة ورجفت ايدي
حطيت الصحن عالميز
وعيوني تلمع.. شنو كملي شبي غائد

.. اتصل علية اليوم وكلي استأذني من الوالد
يشوفلنا يوم احيب الاهل والعمام مشية زلم
حتى يتقدم لاختي القزمة
يمة .. يمة.. يمة
صارت صدك

.. حلفي
.. وروح بيبي سليمة الما تحلفين بيها جذب
يالله بالعجل صبي غدا ترة كلش جوعانة لا احطج واكلج

.. ثواني واخلص
حطيت الصينية كدامها وكعدت يمها
.. اكووووووول شومة شوكت تحجين وية بابا
.. ما اعرف من اشوف فرصة مناسبة احجي
.. لاااااا عيني اليوم بالليل تحجين وياه
لا يطيغ( يطير) العغيس ( العريس)
من ايدينا شنو هو قابل يظل منتظغني (منتظرني)
.. يمة منج ومن السانج الفصمة مستعجلة عالزواج

خجلت ودنكت .. لا مو هشكل بس اكول جنها طولت السالفة واخاف تخغب (تخرب)

.. اكوووووول ست هدى شنو الي غير رأيج
وانتي ذاك اليوم جنتي مطنكرة ومعندة مثل الثور
رافضة تحجين بالموضوع
فلت وجهي .. ااااا ها لا بس هشكل حسبتها بغاسي (براسي)
وكلت انا غاح اتزوج غائد مو اهله
اهم شي هو يحبني خلاص والباقي مكدوغ (مكدور) عليهم

.. لعد على بركة الله بس خلي يشرف ابونا العزيز
ونحجي وياه
خلص اليوم وصار الليل وسليمة تحوم عبالك وحدة عندها طلوك
بس لا تسويها صدك وتجيب علينا
ما اعرف ليش واتخبلت من درت المفتاح عند ابوي
كل شوية تسأل

.. وين صار ابوكم شنو الله انطاه والله خذاه
شيماء .. بيبي اتصلت عليه وميرد علية
جنت امسح بالبيت وجان الكة المفتاح بالكاع مشمور
بصف البوفية
رحت اخذت لسليمة

.. هذا المفتاح لكيته واكع بالكاع يم البوفية
اجتي بكل لهفة واخذته مني وراحت وعافتنا ..
انا وشيماء وحدة تباوع بوجه الثانية مستغربات
.. هاي شبيها بيبتج شخطت
.. حسستني عبالك ضامة شي عزيز عليها
جنا نحجي
وما نسمع الا وعياط سليمة رج البيت
كمزنا من مكانة وصرنا وحدة تدعم بالثانية
وصار الي جانت سليمة خايفة منه

ولنص الليل
وجان يشرف الوالد العزيز
وسليمة جانت كاعدة بالطارمة تنتظره وشياطين العالم كلها متربعة براسها الوجه يكول
يا شر اشتر

دخل وشاف وجه سليمة وسلم عليها
شيماء جانت بالمطبخ تسوي جاي
وانا اتنقل بالساحة مثل المراسل الصحفي لازم الكامرة
وينتظر بترقب حتى يصور المشهد العاطفي
للحظة اللقاء الجميلة بين الوالدة وابنها

وجان سليمة سألته
اول مدخل بدون لا سلام ولاكلام
كبل كالت

.. ها يمة اثير ونوبة درت على فلوسي واخذتهم
جمد بمكانه وحك خشمه
.. اي صدك نسيت اكلج احتاجيت فلوس
دخلت شراكة وية صاحبي بشغلة

جانت كاعدة متربعة بالكاع
لطمت على رجليها
.. يمة اصخام الصخمك اثير
ولك تاخذ فلوسي بدون متكلي
.. كل مرة اطلب منج فلوس تكليلي منيلي ما عندي ياحصرة
.. يبووووو راحت فلوسج يا سليمة
ما دام داخل شراكة وية واحد من ربعك
معناها اقرة على فلوسي سورة الفاتحة
.. اهووو لتلحين كلتلج راح ارجعهم اول ميصير عندي فلوس

كامت من مكانها تريد تدخل للبيت وهي تولول
حسبي الله عليك
جنت واكفة يم باب المطبخ اباوع عليهم
.. هاي شنو لا مستحيل معقولة خلصت المعغكة (المعركه)

بدون ضحايا ولا اصابات
لا لا اشعغ (اشعر) بالخذلان
شيماء واكفة وراي وتباوع عليهم
ضربتني على كتفي
.. دنجبي خلينا نسمع
فاتت من يمنا سليمة تدردم
لا مستحيل اخلي الموضوع يعدي هشكل
اتذكرت سودة علية مروة وفلوسها بيوم اخذهم ومحد
رف كلبه عليهم

دخلت وراها للغرفة وهي تفتح بكنتورها
تسب وتغلط وتتحلف
وكفت يمها واني احك باظافير الابهام الايمن على الايسر
واكول بكلبي ياحكه سوي عركه
وكلتلها

.. والله حرام عليه اخذ فلوسج تعبج تجمعي عمرج
واحتمال ما يرجعهم الج ويروحن عليج
انا لو بمكانج ما ابقى له ولا دقيقة وحدة بالبيت
احرك البيت على راسه واطلع زعلانة

واني حاطه ايدي ورة ظهري واحك باظافري
ياحكة سوي عركة

دارت وجههة علية
.. اي والله صدك هذا ابوج ناقص ويسويها وياكل علية فلوسي
اول مرة تحجيلج شي براسه خير يالبكعة
كامت من يم كنتورها وراحت هدت على ابوي
واني امشي وراها مثل الذيل وايدي ورة ظهري

وحجت بصوت عصبي

.. شوف ولك اليوم اذا ما ترجعلي فلوس
هسة البس عباتي واروح لبيت امجد اخوك
اخليه يزوعك الفلوس من خمشك

.. خير شنو تخوفيني بأمجد كلتلج راح ارجعهم
لاتكعدين تاكلين كلبي
الله وحجاية منها وحجاية من ابوي وصاروا من الروس
اسمعهم يتعاركون
وانا بالمطبخ اركص
واغني (صاغت عغكة بصغاوية بين الديج والواوية )
(صارت عركة بصراوية بين الديج والواوية )
رجعت سليمة دخلت للبيت واتجهت لغرفتها
وانا رحت وراها
فتحت الكنتور وتحجي

.. ولكم وين راحت المكموعة عباتي
تطلع بهدومها وتحجي
ركضت رحت جبتلها علاكة وكعدت اخذ منها الملابس واحط بالعلاكة وركضت جبلتلها العباية والشحاطة
جنت اركض مثل بيب بيب
وكفت كدامها وانا اتنفس سريع

.. هاج بيبي لزمي هاي عباتج وهاي الشحاطة
.. جيبي انطيني
اخذتهم مني لبست عباتها على راسها
وهي تغلط وتسب على أبوية
وابوي يجاوبها

.. شتسوين بيهم نايمة عالفلوس وحارمتنا منها
.. ولك اغبر عار هذني فلوس حجتي
تريدني انطيك اياهم تصرفهم عالشرب والمنكر ولك ناقص
لبست شحاصتها وطلعت للباب

وشيماء ركضت وراها تهدي بيها
.. بيبي صلي عالنبي واتعوذي من الشيطان
وين طالعة بالليل رجعي واني اتصل على عمو يجي
ياخذج
اني اجاوبها .. شيماء حقج تحجين هشكل لان مو فلوسج
الغايحة (الرايحة) هذا تعب بيبي سليمة خطية
اخذهم منها غصب عنها حتى ما كللها
شيماء عضت شفتها
.. انتي انجبي وسكتي
.. لا ليش تسكت صدك كلامها
انا طالعة وما انتظر امجد اروحله بهالليل
حتى يطين عيشته

طلعت لباب الشارع وانا اتذكرت علاكة ملابسها
رحت ركض مثل الطلقة دخلت جبتهم
ورجعت اصيح وراها
.. بيبي .. بيبي.. بيبي انتظري لحظة
سليمة.. ابد والله لحد يلزمني انا رايحة
.. لا بيبي ما اغيد (ماريد) الزمج بس نسيتي تاخذين علاكة ملابسج
.. جيبي البكعة
اخذتهم وراحت مديت راسي من الباب
اباوع عليها تمشي بالشارع وتكحف بشحاطتها

حسيت على ايد لزمتني من اذني ولوتها
رفعت عيوني وباوعت لزمت اذني
.. ااااخ .. اخ.. اخ شومة اذني
.. لج ثولة كلبتي عاليها واطيها
حركتيهم حرك
باوعتلها ببرائة .. شنو اني شلي غغض (غرض)
كلشي ما سويت ام وابنها ومتعاغكين اني بس
غدت اهدي النفوس

.. لااااااا صدكتج ام شلج غغض
لج انتي حطيتي الوسواس الخناس بجيبج بسوايتج هاي
سمعنا صوت ابوي ورانا
.. شعندكم واكفين بالباب
رحت عليه
.. بابا الحك بيبي لمت هدومها وطلعت
صاح بصوت عالي
.. شلوووووووون!!!!

اباوع عليه لبس انعاله وطكها ركضة للشارع
يريد يلحك على امه
دخلت للبيت ورفعت ايدي بالدعاء
.. اللهم قدغنا (قدرنا) على عمل الخيغ (الخير)
ووفقنا لهداية الناس اجمعين
التفتت على شيماء وكلت .. كولي امين
ما حسيت الا على انعال طياري اجاني بالهوى
طكيتها ركضة واني اضحك

ورة يومين
شيماء فاتحت بابا بموضوع رائد
وهو باوع علية وكال عالبركة خلي اسأل عمج امجد
وبيومها اتصل على عمو امجد وحددوا الموعد وشيماء ردت الخبر لرائد كلتله يوم الجمعة تكدر تجي وتجيب واهلك تنورونا
يعني بعد اسبوع للخطوبة
وبهذا الاسبوع

رائد كل يوم جاي للبيت باخذني اني وشيماء
علمود نختار الحلقات بالبداية وكال ورة الخطوبة نطلع براحتنا نفتر نشتري الذهب على ذوقج
طبعا رائد جان كلش حريص ان ما التقي
وية امه واخته

يوم ثاني اشترالي نقال لمس كلش حلو
وبيومها طرت من الفرح
احس بروحي اسعد انسانة بالعالم
وشيماء خطية التهت بين الدوام والبيت

وسليمة بعدها ببيت عمو امجد زعلانة
هاي احلى فقرة كلش مرتاحة احس البيت صار كلش حلو
كل يوم اشغل مسجل واحط اغاني واكلبها
حفلة وركص
واغني
( امي مسافغة وحأعمل حفلة
بس ياغيت ما تگيش على غفلة )
( امي مسافرة وحأعمل حفلة
ياريت متكيش على غفلة) 💃🏻💃🏻💃🏻

جان كل يوم بالليل رائد يتصل علية ونكضيهاسوالف للصبح جنا نحجي بكلشي يخص حياتنا الجديدة ونحلم سوية ومرات يكلي خليني انام على صوتج
كولي رائد حبيبي
.. غائد حبيبي
.. اااااخ يايابة اتمنى كون يمي واباوع لشفايفج
شلون تنطقها حتى بعدها اشبعهم عض

يبوووووووو غديت ماي من الخجل

.. الو .. هدهد اشو صارت سنطة شكو وكعتي بنكرة
.. لا المشترك خجلان حالياً يرجى المحاولة فيما بعد
.. ههههههه الله يلعن ابليسج
شيجيب باجر واصبر شلون
كملت الاغنية.. باجر التقي وية اجمل انسان

.. كل لحظة التمر تسألني العيون
.. شظل من الوكت
.. مو كلبي خلصان
وربي احلى ثنائي بالغناء
اتمنى هاي اللحظات الحلوة متخلص
........

ضحى دائما تتصل علية من رقم زوجها سيف وتسأل علينا
صارلها اسبوعين من اتزوجت وهاي المرة الثالثة
تتصل ونسمع صوتها
وشيماء دائما جانت تتهرب منها

لان بعده الكلب ينزف من الصار بيها
كالت ضحى .. سيف كال اوديج لبيت اهلج بيوم الخطوبة وكوة قبل يجيبني الكم الصبح
جان يريد يجبني الكم قبل الخطوبة بساعة
حالي حال الخطار بس
اتوسلت بي يالله وافق

.. يالله الحمد لله اهم شي وافق
سديت النقال من ضحى واتصل علية
رائد معصب
.. شنو ويامن جنتي تحجين
اتصل عليج كلة مشغول
.. على كيفك حبيبي جنت احجي وية ضحاوي علمود الخطوبة

.. هدى جهزي نفسج بسرعة
امي عازمتج عالغدة بالبيت وهسة راح اجي عليج واخذج
.. لحظة شنو تجي علية بالاول خلي اخذ راي شيماء

.. شنو السالفة هدى قابل راح اكلج ترة احنا
نعتبر مخطوبين وهسة انا ووين ماخذج
هو لبيت اهلي
.. ها لعد يالله راح اجهز نفسي
بدلت ملابسي وعدلت نفسي
واني افكر لازم

احجي وية شومة نطلع واشتريلي كم قطعة مرتبة
البسهم للطلعة لان ما عندي هدوم كشخة
مال وحدة مخطوبة
بين ما خلصت
اتصل علية رائد كال طلعيلي انا انتظرج براس الفرع

رشيت عطر وباوعت لروحي بالمرايا
واخذت جنطتي وطلعت اركض بلهفة
واني امشي بالشارع
شفت علاوي عاقج الوجه ومعصب زعلان
شافني واجة يمشي يمي وهو زعلان

.. اكول هدى صدك راح تنخطبين
.. اي علاوي اجوي ناس وطلبو ايدي من بابا
وكلوله نريد بنتك الصغيرة هدى
.. لعد وانا مو خطبتج قبله
ليش متنظريني بس شوية اكبر اجيب امي واخطبج
رمشت بعيوني بحزن

.. علاوي اني احبك بس شسوي
لبابا الا يزوجنا ما اكدر ارفض عيب البنية ترفض
علاوي .. وهسة انتي وين رايحة
.. طالعة وية خطيبي تعال خلي اعرفك
عليه

وصلني لسيارة رائد اباوع عليه شلون يخزر برائد
فتحلي الباب البصف السايق وحجة بصوت ناصي
.. ايييييييع خطيبج جنه عود شخاط
محلو
يحجي ويفر بيده ماعاجبه رائد
بكلبي خربانة عليه من الضحك
سلمت على علاوي الزعلان
ودرت وجهي وسلمت على رائد الغضبان
باوعت عليه وابتسمت

وكعدت احجيله على علاوي وسوالفه
وموقفه وغيرته منه
بس استغربت على رائد جان يجاوبني وفكره شارد
احس بيه مو على بعضه
هادىء

وتوتره انتقل الي واتذكرت اليوم راح اواجه امه واخته وابوه هذه المواجه الحازمة

دقايق ووصلنا لبيتهم ونزل من السيارة وفتح باب الكراج ودخلها
هذا كله وهو ساكت

نزلت من السيارة واني احجي بكلبي عمة حتى عمة
حتى ما كلفوا نفسهم يطلعون يستقبلوني
ينتظرون اني ادخللهم للبيت

حجة رائد من وراي
.. فوتي دخلي جوة
دخلت للمطبخ البارد واني احم حم واطلع صوت
حتى يحسون على دمهم ويجون يسلمون علية
ويدخلوني للبيت

بس اشو ماكو الجماعة ضاربين الصامت
يعني شنو ينتظرون ادخل عليهم للغرف واروح اسلم عليهم صدك ناس ما تستحي وما يعرفون الاصول

اتوغلت للبيت وحجيت بصوت مسموع
شنو الجماعة نايمين

لا يوجد رد عقدت حواجبي والتفتت على رائد
.. غائد اشو محد بالبيت اهلك وين
جاوبني بصوت هادي
.. اهلي مسافرين

يتبع

احبكم هواي احبكم كومة
اختكم نهى

(( يالله ماما عبوسي نرجع لموضوعنا
اكتبلي دار .. دور ))

ياجماعة الخير ما عليكم بية روحوا استمتعوا بالقراءة
هذا مشهد
من قصة حياة ( نهى واطفالها ).