أساور الفضة الفصل الثاني والعشرون 22 - بقلم نهى

مساء الخير والسعادة والتفائل عليكم يا احبتي

#اساور_الفضة
#نهى_الحسون

اتفاجئت اشو ولا واحد بالبيت
عقدت حواجبي والتفتت على رائد
.. غائد اشو محد بالبيت اهلك وين
جاوبني بصوت هادىء
.. اهلي مسافرين
حجاها وهو مضيك عيونه
سد باب المطبخ وراه وقفله
واتقدم علية
ارتعد جسمي وباوعتله بحذر
رجعت ورة
ارتبكت .. شش شنو غائد ليش هيج تباوع علية
وليش كذبت علية وكلت امي عازمتج
جنت احجي وابلع بريكي متفاجئة بتصرف رائد
سمعت نقالي دك بالجنطة دنكت اريد افتح الجنطة
صارت روحي بالنقال احس مثل حبل النجاة الي راح ينقذني بس من شنوينقذني ما اعرف
بس كلشي ينبأ بقدوم العاصفة ووجه رائد ميطمن

طلعت النقال بأيد ترجف شفت المتصل شيماء اجيت ابجي من الفرحة
كبل حطيت ايدي عالرد
محسيت الا على غفلة انسحب النقال من ايدي
وانغلق ما لحكت ارد على اختي واطمنها
وهنا حسيت اني وكعت بشدة
باوعت على نقالي بأيد رائد
وشلت عيني على رائد اباوع عليه باستعطاف
احس دموعي واكفة متحجرة بعيوني هي هم خايفه مثلي مدتنزل

.. غائد شبيك دتخوفني .. صاير شي

حجة بصوت مبين كوة لازم روحه
.. هدى اسألج سؤال واريدج تجاوبيني بكلمة وحدة
اي او لا
.. شنو
.. انتي قبل مشتغلة بملهى ؟؟؟
شهكت بخوف ورجعت للخلف وحطيت ايدي على حلكي هذا الي مايوم حاسبة حسابه
هذا الشي يوصل لرائد
كمت ارمش بعيوني وابلع بريكي واشر بيدي
كل حواسي تشتغل سوة اريد اخذ فرصة افهم رائد

.. اوكف لحظة رائد خلي افهمك
غمض عيونه بقلة صبر
.. هدى احجي اي لو لا بلا لف ودوران
مديت ايدية بتوسل
.. رائد عفية بس اسمعني خلي افهمك....

عاط بية بصوت عالي رج اركان بيتهم رج
.. هدى الجوووووووواب
كمزت من مكاني من الخوف
مثل الطفل المذنب دنكت وهزيت راسي بالموافقة
ما حسيت الا على حرارة وجع الضربة الي نزلت على خدي
والراشدي انطبع عليه مثل الختم الاحمر
واني بين الخايفه بين المتفاجئة
حسيت نفسي تايهة ممستوعبة
حطيت ايدي على خدي وعيوني الي دموعها كانت محبوسه
نزلت مثل مطر شتا من غيمة سودة

رجع رائد صاح بي رجعني من شرودي
_شلون وليش وشوكت
اباوع عليه عبالك مااعرفه
ما ادري على غفلة انكلب وجه رائد مثل الوحش

صاح بصوت مقهور
_ لج هدى ليش وشوكت
رحتي اشتغلتي من الله ياخذج يااااعار
شنو السبب القوي الي دفعج ترحين تشتغلين بملهى

جنت لازمة خدي لاول مرة بحياتي احس بالخوف من وجود رائد بقربي بعد ما كان مصدر اماني وملاذي الي التجئ لحضنه من يحاصرني خوفي

جانت عيوني شاخصة عليه من الخوف
والساني انعقد صرت اشحذ كل ذرة قوة عندي اريد بس انطق ماكو
صوتي ميطلع محبوس

كمل كلامة. بغضب

.. متحجين ليش ساااااكتة
لزمني من زندي سحبني قوي ودفعني كدامه بحيث ردت اوكع على وجهي

.. احجي كولي شلون يصير هذا كله وانا ما ادري
لج اجيت اتخبل من كلولي هدى جانت تشتغل بالملهى
بس اريد اعرف

شوكت رحتي تشتغلين بالمنزول من وراي وانا وين جنت عنج
لزم النقال وركعه بالكاع بصفي واتكسر وصار شضايا

عطت بصوت عالي خايفة كلي ارجف عين على شبقايا التلفون وعين على رائد خايفة يسوي بية شي جنت امر بلحظة خوف على رعب
حجة بغضب
.. لج اني تالي وكت تجيني ليان الساقطه
الي جنت اتخبل منها وعقلي يكمز منها
تكلي باستهزاء
.. مبروك على خطوبتك من هدى
والله زين ما اختاريت
واني الاغبر واثق من نفسي اجاوبها بترفع
.. خير ليان شتردين فوتي بالمفيد المن جاية

وهي هم مقصرت اجتي يمي وكالتلي بنفس اسلوبي مترفعة علية
.. لاهيج اجيت اهنيك على اختيارك وكلت
احذرك بنفس الوكت حتى تدير بالك من هدى
وماضيها الاسود

واني صحت بيها بحيل صدر متأكد من حضرتج
.. ديري بالج تجيبين سيرة هدى على السانج والله اكصه
وهي جاوبتني مترهية
.. وليش. تحجي علية علمود وحدة تافهة جانت تشتغل عاملة بالملاهي بين شرابين العرك والحشيشة والدعارة
واني الغبي جيت اضربها واغلط عليها
.. انتي وحدة ساقطة وعار
و كلبت الميز كله عليها واجيت امسح بيها الكاع

بس جانت واثقة من كلامها وما اهتمت لتهديدي
شكلها متأكدة من حجيها
جاوبتني .. حتى تتأكد روح اسألها
شوكت اخر مرة اشتغلت بالملهى وشنو جانت اخر مصيبة صارت بيها بالملهى
وهي راح تحجيلك

ولج هدى حقيرة ..تدرين ليان جانت تحجيً وتضحك تتشفى بية من وراج
وعرفت شلون تنتقم مني
لان اني ممعبرها وجنت انظرلها بعين الاحتقار

ولج انتي وحدة عااااار
ضرب الكاونتر مالهم ووكعت الصحون
واني كلما يضرب بصوت عالي اصرخ
كعدت بالكاع كرفصت على روحي وحطيت ايدية على اذاناتي كلت هاي هي راح
يضربني يشوهني ويمثل بية
ما اعرف شنو حجيت ولا اتذكر بس
.. يمة لحكيني
ابوس ايدك غائد كافي
اني مسويت شي بس اشتغلت كم يوم بكوفي ابو ليان جنت اغسل
مواعين جانت تصيغ (تصير) الساعة ب٨بالليل طلع
الا مغة (مرة) وحدة صاغ (صار) بية موقف ومن يومها حغمت (حرمت) اطلع بباب البيت او اتصغف (اتصرف)هيج تصغف(تصرف )طايش
عفية غائد لا تحاسبني على شي جان خاغج اغادتي (خارج ارادتي)

.. هذا الشي شوكت صار وانا وين جنت
.. هذا صاغ بفتغة مغاجعة (صار بفترة مراجعة ) الامتحانات جنت
احجي وامسح بدموعي الي حركت خدي فوك حركة الراشدي
.. زين اكدر اعرف شنوالسبب العظيم الجبير الي خلاج تقدمين على هيج كارثة وتعرضين نفسج للخطر

.. غدت (ردت) اشتغل واعيل نفسي واهلي
حتى شيماء اختي توافق تتزوج بدون متشيل همنا

.. زين ليش ما اجيتي الي وسألتيني اساعدج
لتكليلي عزت نفسج وكرامتج ما تسمحلج تطلبين
مني المساعدة

وفضلتي تشتغلين بالملهى بين السكارة والمدمنين
على رائد

دنكت ما اعرف شجاوبه نزلت دموعي بقهر على الحظ العاثر
رجع بكل عصبية يصيح مقهور
دنك علية ولزمني من زندي وسحبني حيل بين ايديه
احس انخلعت ايدي من القوة

.. رفعي راسج وحطي عينج بعيني وكليلي التسوي هيج سواية شنو يسمونها
الي تطلع بدون علم اهلها لهيج مكان شنو اسمها
فهميني انتي شنو فرقج عن الساقطة الصايعة الما عندها رداااااااد

رجع انطاني راشدي ثاني على خدي انخلعت ركبتي
صرت اصرخ من الخوف
.. رااااااائد دخيل الله ودخيلك كافي لتأذيني
جنت مغمضة عيوني وضامة وجهي بعيد عنه
.. الخوووف .. الهلع.. الرعب
كلهم اتجمعوا بكلبي وصرت اتذكر اسوء كوابيسي
ضرب ابوية لأمي ولاخواتي شيماء ومروة
ما اعرف منو بيهم اشد خوف على كلبي
بس وحدة امر من الثانية
سمعته جر حصرة
وحجة بصوت تعبان

.. لتخافين ما راح اوسخ ايدي بوحدة ساقطة
هانت عليها روحها ورخصت نفسها

سكت فترة وغمض عيونه وفرك وجهه بأثنين ايديه
وحجة بكل برود
.. شوفي هدى انا بعد الي عرفته عنج
والي سويتيه مستحيل اقبل ارتبط بيج

لان ما اكدر اامن بيتي وعائلتي بيد وحدة غير مسؤلة على تصرفاتها ورعنة مثلج
ما اضمن شنو تسوي من وراي ..كلشي تسوي
البارحة رحتي اشتغلتي بالملهى
باجر الله العالم شنو تسوين

اجتي كلمات رائد مثل الضربة القاضية على كلبي
صرخت بتوسل

.. لا .. لا.. لا عفية غائد ابوس ايدك لتكولها
اني مسويت شي عفية غائد لاتكسغني (لاتكسرني) بيك
انت الشي الوحيد الحلو بحياتي لتعوفني
الله يخليك لتظلمني
اني غطلت اي بس
بس صاغلي دغس (صارلي درس) وتبت وراها مااطلع من بباب البيت

جنت احجي وهو عاااط بية
.. كاااااااافي من الله ياخذج ياعار هم الج عين وتحجين
وكام يضرب على صدره
لج انتي كسرتيني كسرتي كلبي الي حبج سنين
ويعد ايام ينتظرج تكبرين

ولج انا لو منج ادفن روحي على الصار
بس تدرين شنو عيبج انتي لحد هسة ممستوعبة
عظم وكبر حجم غلطتج
ولحد الان تشوفين نفسج على حق وانتي مظلومة
وهاي مسألة تافهة لازم نسامحج عليها
لان مابيها شي شنو يعني
هي كم يوم اشتغلتي بالملهى شكو مكبريها
ومنطيها اكبر حجمها .. موبالله

وراها بعد كام ميكدر يحجي باوع علية وكال
يالله كومي اخذي جنطتج وطلعي برة
لان ميشرفني وحدة مثلج تدنس بيتنا

.. غائد عفية بس اسمعني لخا........
وجهه احمر وصوته مبحوح وبكلامي زاد خباله
اتقدم علية ولزمني من شعري الحمدلله الحجاب موجود جان شعري راح
جرني
بقوة وراه مثل الحرامية
حسيت بشعري ينج وياه وحجابي كام يخنكني لان دينجر بيده

.. غائد لحظة وين ماخذني
شفته اتجه بية لباب الشارع وفتح الباب
وصاح بية بصوت مبحوح من القهر.. دطلعي برةةةةةةة
ودفعني برة بالشارع واتعثرت رجلية ومن الخوف مشالتني كعدت بالكاع
وشمر جنطتي بوجهي

.. اياني وياج تحاولين تدكين الباب
قسما بالله اذا دكيتيها اطلع ما ارحمج
دخل جوة وسد الباب بوجهي
عاملني مثل الكلبة

انا غلطت واعرف عظم غلطتي
بس متوقعت تكون ردة فعل رائد هيج قاسية

اباوع على كم طفل جانو يلعبون بالشارع
وقفوا لعبوهم وكعدوا يراقبون الصار

كمت من الكاع واني ارجف نفضت ملابسي
وشلت جنطتي ومشيت ورجلية وحدة تضرب بالثانية

من يم باب بيت رائد وصار باب بيتنا القديم بوجهي

ها يا بيت اشو تباوع علية
احلفك بالله ما تصيحلي طيف امي تجي تشوف حالي

دنكت ومشيت واني ابجي منهارة مهتميت
للناس اذا شافوني

جنت اتمنى اوصل لبيتنا بأسرع وقت لان جسمي
صار كله يرجف بهستريا
والدنيا ظلمت بعيوني
خفت لا يصير بية شي واني بالشارع

ورة يومين
جنت اصارع
عبالك داخلة بدوامة تفتر بية
روج البحر يرميني ويرجع يسحبني
لداخل اعماقه وارجع اصارع الامواج رغم التعب
حتى اعيش
حسيت على ايد دافية تمسح على كصتي
فتحت عيوني ارمش شفت شيماء تباوع علية بقلق

شيماء بحزن.. ها حبيبتي ما ناوية تكعدين من النوم
كومي اتريكي وياي عالواهس
حجيت بصوت مطبك..بلعومي مجرح
.. هسة اكعد شومة
اتحاملت على نفسي حتى اكوم نظرة القلق الي بعيون شيماء تدفعني حتى انهض لخاطرها
شومة اختي تعبت هواي

كمت من الفراش احس بروحي خاوية
انتبهت لشيماء مدت ايدها ومسحت على خدي بمكان الضربة
جرت حسرة تتوعد

.. بسيطة يا رائد حسابي وياك بعدين انت وليان ما راح اخلي الموضوع يعدي عليهم بسهولة
جانت شيماء تحجي بقهر

طبعا بيومها
بعد الصار وصلت للبيت لكيت شيماء تحوم مثل المخبلة
لان من اتصلت رائد سدة بوجها وظلت قلقة علية
واول مشفت شيماء ركضت لحضنها ممصدكه وصلت لبر اماني
كعدت اشتكيلها عالسواه رائد بية
واني ابجي منهارة
وراها محسيت بشي بس انام
احلم بكوابيس
واحس بشيماء تنطيني ابرة مهدئة وانام

انتبهت من تفكيري على صوت شيماء
.. يالله مدي ايدج واكلي
لتخلين موقف رائد وياج يكسرج
بالعكس خلي الصار درس الج

وبدلت الموضوع وكأن شيئاً لم يكن
.. اي اتذكرت جهزي روحج حتى ناخذج اني ورباب
للمول تشترين ملابس للكلية

الله هنيالج يا هدى راح تدخلين كلية وتشوفين عالم جديد
جنت اسمع هواي بنات يسولفون عن حياة الكليات
اي صدك نسيت اسألج عن فاطمة وهالة شنو طلع قبولهم
جوابتها تلقائياً
.. فاطمة دخلت كلية علوم بايو
وهالة كلية تربية
.. اهووو وانتي كلية ادارة واقتصاد خطية كل وحدة منكم صارت بمكان
.. لا اني والبنات اتفقنا بين فتغة وفتغة نغوح (فترة وفترة نروح)على كلية كل وحدة بينة ونلتقي
.. اي عفية حرامات تتفارقون
.. مستحيل افترق عنهم اني اكره شي اسمه فغاق (فراق)
حجيتها بصوت مكسور
.. ها هدى رجعنا
احلفج بروح امي عليج تصيرين قوية
لخاطري مو لخاطر اي واحد

انتي الاخت الوحيدة الي صفتلي من بين اربعة
صعبة علية اشوفج مكسورة احس بالقهر لان مكدرت احافظ عليج واحميج

خوف شيماء قيدني ابتسمت بضعف غصب عني
حتى لو مصطنعة المهم اقنع شيماء اني زينة ما بية
شي
غصبت نفسي بالكوة
ومديت ايدي للاكل وكعدت اكل وياهة
وهي تباوعلي بحذر
وراها خلصت شيماء وكامت وغسلت وبدلت ملابسها
حتى تروح للدوام
طلعت من البيت وهي
كل شوية توصيني على نفسي طلعت وسديت الباب وراها وانتجيت عليه
غمضت عيوني وحسيت بدموعي نزلت بحرارة على خدودي

صرخت بصوت مكتوم واتكومت بالكاع ابجي بحركة كلب موبيدي ياعالم والله موبيدي
حلمي وشمعة املي انطفت بلحظات وانظلمت
وانطعنت واتخلى عني الحبيب بعدما جنت اشوفه كل دنيتي صار ابشع كابوس بحياتي

شيماء
طلعت من البيت واني مبيتة النية
اتصلت على رباب
.. الو ها رباب رتبتي كلشي حسب الاتفاق
.
.
.
.. تمام عاشت ايدج اني جاية بالطريق والتقرير الي كلتلج عليه كدرتي توصليله لو بعدج؟؟
.. عفية بالسباعية اموت عليج
يالله مع السلامة مسافة الطريق واني يمج

سديت النقال وكلبي يدك حيل
رجعت دست اتصال مرة ثانية
على رقم رائد ثواني واجاني صوته

.. الو هلا رائد
لحظة اسمعني زين اني ما اتصلت عليك بخصوص موضوع هدى

هذا الشي راجعلك هاي حياتك وانت حر بيها تريد
تخطب متريد تخطب هاي بقت يمك
بس اني هسة اتصلت عليك علمود اطلب منك تجيني للمستشفى بموضوع جداً مهم

اذا عندك خاطر للايام العشرة احلفك بيها تجيني
هسة واني انتظرك

اجاني رده بالموافقة
.. شكرا انتظرك بنفس مكاني بالمستشفى بس اريد منك
من توصل تسأل عن رباب وهي توصلك الي
اكون ممنونة اذا نفذت الي راح تكلك عليه رباب

.. لتخاف ماكو شي بوقتها راح تعرف كلشي

سديت النقال واني عقلي يجيب ويودي وادعي الله كون
تمشي السالفة مثلما خططتلها

وصلت للمستشفى وسجلت حضور ورحت طلبت من زميلتي تاخذ مكاني واني اخذ مكانها لان ماظل عندي وقت رباب يم ليان بالغرفة

ورائد على وصول
شرد تفكيري عالصار قبل يومين بأختي هدى
اجيت اتخبل من شفتها شلون منهارة
ضربتها ابرة مهدئ حتى تنام
نامت وتفز من الكوابيس
وكوة كدرت الزم روحي ما اهد على رائد لبيتهم

واشوه وجهه مثلما مسوي بخد هدى
من كون كسر لايده العار الساقط
بعدما عرفت من هدى الي صار بينها وبين رائد ومنو ورة السالفة قررت

بيني وبين نفسي اخذ بحق هدى
واشفي غليلي
بساعتها اتصلت
على رباب وطلبت منها تساعدني

جنت اتسائل بذاك اليوم
وين الحكمة بأن انحط موقف الاختيار
وشمعنا اني بيدي اعالج ليان الي اذت اختي هدى وبوكتها اعترضت وجزعت وصرت اسأل وين عدالة الحياة

بس اليوم عرفت لكل شيء بالحياة سبب
البارحة طلبت من رباب تطلعلي تقرير ليان من جوة
الكاع بأي طريقة
لان رباب تشتغل بقسم النسائية والتوليد اتذكر بوكتها حولوا ليان لقسم النسائية للكشف

وبعدها سألت رباب عن ليان من باب الفضول ما جان الي غرض بس هيج حبيت اعرف شبيها
ورباب حجتلي الصار بيها
وكالت

الدكتورة النسائية بعدما فحصت ليان
اكتشفت بان ليان اتعرضت للاغتصاب
والدكتورة بوقتها كتبت تقرير وحجت وية اهل ليان

.. اني بهاي الحالة لازم اتصل عالشرطة واطلب منهم التدخل بالموضوع لان بتكم معرضة للضرب والاغتصاب وهاي مسؤولية واني الي راح اتعاقب

بوقتها ابو ليان اشترى سكوت الدكتورة وفبرك السالفة
وكدر يطلع ليان من المستشفى
بدون اي تدخل من الشرطة جان يخاف على سمعة بنته

بس ليان ظلت تراجع الدكتورة للعلاج وبنفس الوقت
سمعت تريد تسوي عملية ترقيع لغشاء البكارة

حسب العرفته متقدملها واحد معروف وتريد تتزوج

واليوم رباب
كدرت تجيب ليان للمستشفى بحجة الكشف والمراجعة
لكن رب ضارة نافعة

دكيت الباب ودخلت للغرفة الفحص الي جانت بيها ليان موجودة
شافتني رباب وابتسمت

انتبهت لليان جانت متمددة بس من شافتني فكت عيونها وعدلت كعدتها عالسرير. وكامت تباوع علية بحذر

وحجيت وياها واني بيدي ادوات الكشف
حتى ابين اني جاية بالصدفة علمود شغلي هنا

.. يامحاسن الصدف هاي شنو ليان عدنا هنا بالمستشفى واني ما ادري
اباوع عليها كعدت تتبلعم
.. اني دائما اجي لهنا

جانت تحجي واجاني صوت رباب
.. ست شيماء اني طالعة اذا جهزتي المريضة اتصلي علية حتى انطي للدكتورة خبر تجي تكشف عليها

.. اخذي راحتج بس اخلص انطيج خبر

نحجي وليان بدت تتطمن لمحتوى حوارنا اني ورباب

طلعت رباب واني بديت اجهز الادوات وليان ظلت
تتحرك بمكانها بتوتر

المذنب دائما يحس بعدم الامان
يعرف بروحه مطلوب بثار
لان هواي ظلم عالم واذاهم

وراح يتوقع باي لحظة يظهرله صاحب الحق يطالب بيه

واني وحدة من طلاب الحق الي ظلموهم ليان واهلها
دك نقالي ترميش
وهاي الاشارة المنتظرتها من رباب تبلغني بوصول
رائد

كبل بدون مقدمات اتوجهت على ليان وسحبت الستارة البردة الي تصير بصف السرير
نستخدمها بأثناء الفحص للحفاظ على خصوصية المريضة

وحجيت
.. اكول ليان شخبار الاغتصاب وياج
انخبصت واجتي تنزل من السرير

حطيت ايدي على كتفها وجبرتها تبقى بمكانها

وبيدي الابرة
.. سمعيني زين بس تتحركين من مكانج اوتطلعين صوت شايفة هاي الابرة كبل احطها بركبتج
وانهي حياتج واخلص العالم من شرج
حتى لو بعدها ادخل للسجن ميهمني
سمعت باب الغرفة انفتح ورجع انسد

واني بعدني على نفس وضعية التهديد
وليان متكدر تفتح حلكها من الخوف اباوع لكصتها كامت تصب عرك خايفة مني لا انفذ تهديدي

ما رق كلبي عليها ولا اخذتني الرحمة
الي كاعد تمر بيه ليان نقطة ببحر للي سوته بهدى

.. ما اريد منج بس شغلة وحدة اريد اعرف
ليش سويتي بهدى اختي هيج
شنو غايتج هي شنو سوتلج وانتي اتربصتيلها
وجريتيها

بالبداية ليان ظلت تتهرب و تماطل بالكلام من شفتها متجاوبت وياي
كبل رفعت ملف بيدي

.. شوفي ولج تحجين عدل بدون لف ودوران
لا قسماً بالله شايفة هذا التقرير الي بيدي هذا تقرير اغتصابج

كبل اوصله للشرطة واخليهم يجرجرونج انتي واهلج
بالمراكز هاا وعلى فكرة وقبلها اوديه لزوج المستقبل
حتى يعرف بيج انتي شنو قبل ليتورط
ويتزوج وحدة عار مثلج

ليان بتوسل .. خلاص خلاص
راح احجي كلشي بس بالاول توعديني
متسويلي شي وتعوفيني اطلع منا
.. اوعدج ما اذيج هاي هي اتفقنا يالله
احجي
ليان تفرك بأيدها

.. بالاول مجنت اعرف هدى بس كان سلام بيني وبينها
وبعدين عرفت عن طريق البنات ان هي يتيمة وابوها رجال تعبان وهي بنية عايفيها اهلها على حل شعرها

ميعرفون الله وين خالقها
شفتها تنطبق عليها المواصفات البنات الي يريدهم بابا
يشتغلون بالملهى اغلب الاحيان اني الي اجيب البنات لبابا

جانت حلوة وناعمة وحركة ودمها خفيف والرتله عدها زايدتها انوثه ومتخاف
وفوك هذا كله ما عندها واحد يطلع وراها
ويطالب بحقها اذا صار بيها شي
بالملهى

سمعت بيها تريد تشتغل وية فراشة المدرسة ام شاكر
وكبل اجتني الفكرة اعرض عليها الشغل بالكوفي

.. ها يعني هدى من اجتي تشتغل عندكم متعرف
هذا ملهى

.. لا هو اني اصلا ما مشغلتها بالملهى بالضبط
خليتها بالبداية بالكوفي
بابا جان مسوي المكان بالنهار كوفي ومن بعد الساعة عشرة بالليل يصير ملهى تكدرين تكولين اجراء امني
حتى ما يلفت الانظار ويبتعد عن المشاكل

فهدى اشتغلت عندنا فقط اسبوع وطول هذا الاسبوع جانت تغسل مواعين وجانت جدا حريصة
بان ما تطلع خارج المطبخ
كلت اخليها تتطمن وبعدين شوية شوية
اسحبها لشغل الليل

لان جانت كلش حذرة وحذرها
صعب علية هواي امور وبابا جان كل يوم يضغط علية
حتى ينزلها للملهى

بس صادف بأخر يوم عرفت شي بالصدفة عن هدى خلاني اتسرع
واستعجل واسحبها للملهى والضروف ساعدتني

زمخت بيها بصوت حاد واني رافعة الابرة كدام عينها
.. احجي عدل شنو هذا الشي

هي تحجي وانا احس النار تفور بداخل كلبي
كوة لزمت نفسي ما اخنكها

حسيت عليها ارتعد جسمها وعيونها معلكة عالابرة بيدي
.. ااااااا هسة احجيلج بس لتعصبين وتركي الابرة من ايدج ترة الشيطان شاطر
رصيت على اسناني يالله احجي
.. اكتشفت رائد يحب هدى
وهي تعرف بية اني احب رائد جنت دائما احجيلهم عن حبي لرائد بس اختج جانت مستغفلتني

وبيوم العرفت بيه بحب رائد وهدى
اتعمدت ااخر هدى وهملتها عقاب الها مجانت نيتي ااذيها اكثر من هيج
بس بالصدفة هدى طلعت من المطبخ جانت خايفة
تريد تستعجلني علمود اتأخرت

وشافها واحد من الزبائن المهمين عند بابا
وانعجب بيها ورادها بأي ثمن

وبابا كيف عليها
ويريد يرضيه بأي طريقة
لان جان من الزبائن الثكال

ومنها قرر بابا تنزل وية البنات تقدم الطلبات
بس اول منزلت تقدم

اتعرضلها واحد وهي خبصت الدنيا بالصياح وشمرت على راسه الماي
وبيومها سببتلنا مشاكل وية الزبون
بس الحمدلله عدت على خير

ورجعتها للبيت ومن عهدها مشفت هدى

ابتسمت بنصر وسديت النقال الي جان يسجل كلامها طول هذا الوقت
.. ما راح اتعب نفسي واحجي عليج واظل ادعي
بس راح اكتفي بهذا

سحبت البردة وشفت رائد كاعد عالكرسي
ووجهه اصفر رفع عيونه باوع علية

سمعت شهكة ليان وصاحت
.. انتي اكبر ساقطة شفتها بحياتي

ردة فعل رائد وليان بردت كلبي
رائد جان كاعد وماحجة اي كلمة متفاجيء بالعرفه
عن ليان وهدى

وليان ظلت تغلط وتسب وتهدد
.. بسيطة يا شيماء اذا ما اندمج عالسويتيه
فلا اني ليان
ابتسمت وباوعتلها

.. اني مو لهاي الدرجة من الغباء
اقدم على هيج خطوة بدون ما اامن حمايتي وحماية اختي لان اعرف انتوا ناس قذرة وكلشي تسون

رفعت النقال وسمعتها كلامهاالمسجل

هدت علية بكل قوة تريد تسحب النقال من ايدي
بعدته عني ودفعتها

.. راحت عليج يا حلوة هذا التسجيل تم ارساله
ونسخه
شوفي لج قسماً بذات الله
اذا حاولتي او تفكرين مجرد تفكير
تتعرضين لهدى او الي

ثقي بالله كبل يوصل التسجيل والتقرير
للشرطة وزوجج المستقبلي
عود بوكتها حتى بابا ونفوذه ميكدرون يخلصونج
من التهمة
اباوع عليها شلون كامت ترجف من العصبية
باوعت لرائد باحتقار

طلعت من الغرفة وعفتهم هي ورائد
ما اريد احجي وية اي واحد بيهم

رفعت راسي للسما وحمدت ربي وشكرته على لطفه بينا ودفع البلاء عني وعن اختي
وحكمه العادل هو مسبب الاسباب

هدى
بعد مرور شهرين من الي صار
بلشت اداوم بالكلية
جانت حياة جديدة وعالم جديد
بديت اتعرف على بنات حبابات بس بنفس الوقت جنت حذرة الي صار وياي
خلاني ما عندي ثقة بأي شخص
ومو بسهولة اصادق
وحتى وان صادقت يكون بحدود المكان

رجعت للبيت من الدوام واني تعبانة
لكيت سليمة موجودة تنتظرني
سليمة من يوم المشكلة رجعت للبيت
بعدما بابا راح طاح عليها ووعدها يرجعلها كل فلوسها
بس تصبر عليه كم يوم وهي وافقت
ورجعت للبيت
تسرح وتمرح وتبطش
وكل شوية تصخرني
عبالك جاي تعوض عن ايام الغياب طلع روحي منها
صاحتلي
حجيت واني انافخ

.. ها بيبي خيغ ( خير) شتغدين (شتردين)
باوعتلي .. شنو حبيبة ليش تنافخين
كون تشوفين جنان شمسوية بأختج مريم جان
حمدتي ربج وشكرتيه الف مرة علية
بيومها سألتها شنو جنان شبيها وية مريم
ما ردت علية ونزلت علية
بالطلبات والشغل
والتهيت اشتغل وادردم عليها

دك نقالي وجان المتصل فاطمة
من بعد موقف رائد شيماء اشترتلي نقال
حتى تتواصل وياي وتتطمن علية كالت تحتاجين
النقال بالكلية
.. الو هلا فطومة شلونج يالبذات....
فجاءة قطعت كلامي من سمعتها تبجي
.. شنو شبيج فطومة ليش دتبجين

.. لج هدى ابو هالة اتوفى البارحة بالليل
لطمت على خدي.. عزة بعيني
خطية وهالة شنو اخبارها
.. ما اعرف عنها شي
بس ماما البارحة بالليل جانت عندهم تكول

هالة وخواتها فاقدين وكلش متأذين
على وفاة ابوهم
اتفقنا اني وفاطمة نروح اليوم لبيت هالة
هنا مسوين الفاتحة
النسوان بالبيت

والرجال بالحسينية القريبة على بيت عمهم محمد المسؤول

للعصراجتي شيماء وكلتلها على وفاة ابو قاسم
وكالت اروح وياج

وصادف فاطمة اجتي هي واخوها
واخذونا للفاتحة
وهناك
شفنا هالة وخواتها فاقدات يبجون ويلطمون
وام قاسم ما شفتها الي عرفته اتخربطت صحتها
وقاسم ماخذها للمستشفى

شفت اغلب جارتنا القديمات وشفت خالة ام فرزدق
وام صهيب وسلمت عليهم
وجان اشوف ام رائد وليلى موجودات هماتين
ما رحت سلمت عليهم
بس شيماء سلمت عليهم من باب الاصول
ومحد يعرف من الجوارين شنو الصار بينا
بس

انتبهت على ليلى كامت من مكانها واجتي كعدت يمي
ما اعرف ليش كلبي قبضني من اجتي يمي

ابتسمت بوجهي وسلمت علية وعلى فاطمة
ظلت تحجي وتسولف وية فاطمة صديقتي
وبأثناء الكلام لفت انتباهي اسم رائد

.. احنا زعلانين عليكم انتي وامج
فاطمة.. شكو ليش زعلانين
.. ليش ما اجيتوا انتي وامج لعرس رائد بذاك اليوم

.. شهكت شهكة مفزوعة بصدري من الي سمعته

يتبع

احبكم هواي احبكم كومة
اختكم نهى♥️🌹♥️🌹