أساور الفضة الفصل الثالث والعشرون 23 - بقلم نهى

مساء النور والسرور والتشويق عليكم يا احبتي
والان اقول لكم اربطو احزمة الامان
وتعالوا معي برحلة الى داخل عالم اساور الفضة

#اساور_الفضة
#نهى_الحسون

رائد اتزوج
والله انخمط كلبي من سمعت هاي الكلمة
شهكت شهكة موت لكن كتمتها بصدري

جنت كاعدة بين شمات خفت لاتغدرني دمعتي
وانفضح يمهم

ماردت شماتي يفرحون ويكحلون ناظرهم بدموع عيني
ما بينت كدامهم اي ردت فعل
فاطمة جاوبت ليلى
.. اي صدك جنت بيومها كلش مريضة وماما بقت يمي
جانت تحجي وتباوع علية بحذر جانت خايفة من ردة فعلي من سمعت الخبر

باوعت على شيماء يم خالة ام فرزدق
جنت حابسة الصدمة بداخل كلبي
واكول يا روحي هوني لتبجين عالباعج
جنت اداري بدمعتي وخايفة لا اضعف كدام ليلى وامها وانهار

وبهاي الاثناء جنت ادعي ربي ينطيني الصبر وكون ما ابجي
والحمدلله بهاي الاثناء وصلوا اقراباء ابو قاسم من الجنوب
دخلت مرية جبيرة بالعمر تصرخ وتولول ووياهة مجموعة نسوان لابسات كلهم اسود
اتوسطت المكان وصاحت
.. يبووووووو
وكامت تهوس وتلطم والنسوان كلها اجتمعت من حولها وكاموا يلطمون وياهة
(ياهيبه وصدر ديوان للكلفات يردونه)
(جيت ولكيت الباب مسدود.. اظلن كاعده لو ردن اردود )
(كل يوم الدنيا اتبز عيني)
اول مرة بحياتي اشوف هيج منظر وكف شعر راسي
وظلت الكلمات معلكة ببالي
وخطية هالة وخواتها صاروا يصرخون بصوت عالي
هوسات المرية هيجت مواجعهم
انتبهت على هالة فقدت بالبجي واللطم
تلقائياً كمت من مكاني ورحت عليها ولزمت ايديها
وحضنتها اصبرها

منظر هالة وحزنها على ابوها سلب مني حزني
على زواج رائد واستصغرت همي
اصلا صار حزني مقارنتاً بحزن هالة واهلها
على فقدانهم عمو ابو قاسم شي تافه

وبعدها هالة انهارت
واجتي اختها منى وكالت
.. بنات عفية اخذوها دخلوها للغرفة لا تتخربط علينا
والله بعد ما بينا حيل واحد يتخربط
كافي امي بالمستشفى

كمنا اني وفاطمة ودخلنا هالة للغرفة
وهي بس تبجي وعيونها حمر
والوجه احمر والخدود مخرطة والشعر منفوش وحالتها حالة
خطية جانت كلش مكسورة على ابوها جان ونعم الاب
بالنسبة الها ولخواتها كان دلالهم وهيبتهم
سبحان الله عكس ابونا
الحقيقه مااعرف راح احزن على ابوية لو لا اذا مات

توالت الساعات واحنا كاعدات يم هالة
نواسيها ونصبر عليها
انتبهت لهالة كل شوية تسأل وحدة من خواتها على اخوها قاسم وين

وترجع تبجي وتحجي بس لفت انتباهي كلام هالة بأثناء البجي
.. ولك يابة موتوك وارتاحوا
مفتهمت عليها منو موته لابوها
وتبجي وترجع تكمل
.. من الله لايوفقك يا منير انت وابنك
موتوا بابا بحسرته
التفتت على فاطمة وحجيت بصوت ناصي
.. اكول هذا منير مو عمها
جاوبتني بنفس صوتي .. اي منير عمها.

.. لعد ليش تدعي عليه شكو شصاير بينهم
.. ما اعرف والله بس البارحة ماما من رجعت منهم كالت صايرة مشاكل ببيتهم
.. يااااا خطية هالة ياربي والله ميستاهلون اهلها خوش ناس

شوية ودك نقال فاطمة والمتصل اخوها
التفتت علية وكالت

.. يالله هدى اخوية بالباب ينتظرنا
باوعت على هالة وكلبي ما ينطيني اعوفها واروح بس اتأخرنا عندهم وصارت الساعة بالسبعة بالليل

وشيماء كل شوية تتصل علية تسألني شوكت ارجع
للبيت لان هي رجعت قبلي وية ام فاطمة
التفتت على هالة

استأذنت منها هي تباوع علينا شكلها متريد نعوفها
بستها من خدها وحضنتها ووعدتها باجر ارجعلها
وفاطمة هامتين حضنتها وكالت
.. هالة حبيبتي صيري قوية لخاطر امج وخواتج

بعدها
طلعنا لاخو فاطمة وصعدنا اني وفاطمة كعدنا ورة

حسيت بفاطمة عندها حجي تريد تحجيه وياي
واستغلت انشغال اخوها بالنقال

حجت وياي بصوت ناصي
.. هدى بخصوص زواج رائد
اني مكلتلج بسالفة زواجه لان اعرف راح تنقهرين
وكلت خليها تنساه بعد هو كلمن راح بطريقه شراح تستفاد اذا كلتلها
كلام فاطمة هيج علية المواجع مثل المريض الي
يفكه البنج تبدي الالالم تتوالة عليه مثل السهام
هذا حالي
باوعت عليها بعتب

.. ليش خليتي ليلى تصدمني بالخبر وتتشفى بية
لو كايلتلي على الاقل اكون مستعدة لليلى وما انصدم

.. ما اناطاني كلبي اقهرج فوك ما انتي دتعانين من السواه بيج

بس لتنقهرين اني اخذتلج بحقج وشفيت غليلي بيه
عقدت حواجبي .. شنو شوكت شفتيه
.. من رحت وية امي لبيتهم علمود امه مريضة
انتبهت لرائد يروح ويرجع علينا
عرفت بيه يريد يحجي وياي
صاحتلي بوقتها ليلى واخذتني للمطبخ
ودخل هو وحجة وياي

كان جدا حريص لحتى يشوفني ويحجي وياي حتى اوصلج الكلام بس اني بوقتها ما حجيلتج عناد بيه
مردت ابلغه مراده عن طريقي

.. ليش هو شنو كلج

كال .. كلي لهدى رائد راح يخطب
وبلغيها وكليلها
السوته اختج شيماء مراح يغير من قراري
شي صحيح شيماء خلتني اعرف انتي برئية
وانظلمتي

بس هذا الشي ميمنع ولا راح يلغي ان هدى دخلت للملهى وجانت تشتغل بي
هذا كله سوته من دون علمي
ولا حتى كلفت نفسها تكلي بالموضوع

ومستحيل اي رجال راح يتقبل يتزوج بنية
جانت تشتغل بملهى لو مهما كانت الاسباب
تبقى بعين الكل وصمة عار في غض النظر ان هي جانت تجهل نوع المكان

واني حجيت وياه وكلتله
.. ما اكول غير بس حسبي الله ونعم الوكيل بيكم انت وليان كسرتوها للبنية
بس خليها ببالك صدكني انت الخسران وراح يجي اليوم الي تعض ايديك من الندم عليها
تريد تتزوج
روح اتزوج بس لا تظن ان بزاوجك راح تعاقب هدى
او تكسرها
بالعكس هدى صديقتي واعرفها زين
خبر زواجك راح يقويها ويخليها تنهض من جديد لان

ساعتها راح تعرف ان هي حبت واحد ما يستاهل حبها
وهي تستحق الاحسن منك
وطلعت وتركته وراي

سمعت صوته يسب ويلعن ادري بي
جان يتمنى يشوف وجهج من تسمعين الخبر
عباله هو بزواجه راح يعاقبج عالسويتيه

جانت فاطمة تحجي واني وية كل كلمة كلبي يتكطع
بس بأخر كلمات حسيت اجتي لكلبي مثل الصعقة الي
توعي البشر وترجعه يفكر منجديد
ورفعت راسي وحجيت
.. يحلم اذا خليته يشوفني مسكورة على هجره
صدكي وامني بالله

بعد السمعته والعرفته
خاف جان عندي اله بكلبي
شوية مجال بهاي حجايته
صار مكان حبه بكلبي وصمة عار

مدت ايدها ولزمت ايدي وعصرتها
.. عفية عليج هاي هي هدى صديقتي الي اعرفها
لتخلين واحد مثل رائد يهزج ويكسرج
التفتت عليها وعقدت حواجبي وسألت

.. العفو غائد منو؟؟؟

ابتسمت وكالت كلمتنا المشهورة
.. هوووااااا دة

غيرت الموضوع وعضيت جرحي الينزف ودست عليه
.. اكول باجر مو تنسين تمرين علية ونروح لهالة من وكت خطية
لوحدها وهي تحتاجنا يمها بهيج ايام
.. صار تددلين من عيوني

🌹🌹🌹🌹🌹🌹🌹🌹🌹🌹🌹🌹🌹🌹🌹🌹
شعر بقلم houda_s@

انا لن ابكي
لاني فوق البكاء
ولانك مخطئ حين تظن
اني هشة ، كبعض النساء

اجلس على باب حزني
ابكيك كل مساء
انتظر عودتك
حينما..
وكيفما تشاء

انا احبك
ولكن ان رحلت
لن ارجوك البقاء
ساقيم مراسم دفنك في قلبي
واتقبل بك العزاء

انا مثل نخل العراق
يموت واقفا
راسخ في الارض
سعفاته تعانق السماء
شامخا
متحديا
ان هبت عليه رياح الشتاء

ولن ابكيك ابدا
لاني فوق البكاء
ولانك مخطئ حين تظن
انك ابجدية الهوى
ومن دونك تسقط حروفي
فتتناثر روحي اشلاء

#Hoda
.🌹🌹🌹🌹🌹🌹🌹🌹🌹🌹🌹🌹🌹

ووصلوني للبيت

ومشت من راس الفرع واجاني علاوي يركض حافي فرحان وبيده حب شمسي
وصار يمشي بصفي ويحجي وياي
.. مبروك هدى سمعت من امي ما صارت الخطوبة خربت وانا من سمعت رحت اشتريت حب شمسي ووزعته على اصدقائي من الفرحة

باوعت عليه يالله شكد جنت مختنكة وضايجة بس من حجي علاوي الاملح خربت من الضحك
.. ههههههههه الله يلعنك شكل عينك وغاية (وراية)
اشوف الولد طاغ (طار)
هاي اثاغي (اثاري) انت الي طيغته (طيرته)

.. لا ما سويتله شي بس مرة
من جان ينتظرج شمرت على راسه حجارة صغيرة من بيعيد بدون ميشوفني
وهو ظل يفرك بمكان الضربة ويتلفت يريد يشوف منو
شمرها عليه

والمرة الثانية ما لحكت اضربه راح
وايست منه وكلت المرة الجاية
افشش تايرات السيارة بس الحمد لله ما احتاجيت طار العريس من اول حجارة

.. ههههههه مخبل انت متكلي شنو سالفتك انت والحجاغ (الحجار)
.. همة مو يكولون اشمر ورة الناس الي تكرههم سبع حجارات وهمة بعد ميرجعون
.. اي
.. اشو هذا عريس الغفلة من اول حجارة راح بعد ما رد

.. ههههههه الله يلعنك
مد ايده الي كلها تراب بيها حب
.. هاج اخذي كرزي بمناسبة القضاء على الختيب

دخلت للبيت واني اضحك
لكيت سليمة عافسة الوجه وشيماء دتسوي العشا

سلمت ورحت على شيماء وحضنتها وبستها
هي التفتت علية وشافتني
وكالت.. شنو جنتي بفاتحة لو بعرس اشو اشوف
الوجه مورد وفرحان
يارب دوم تبقين هشكل

.. لا بس اليوم عغفت (عرفت)عندي اخت ذهب
واكتشفت ان اني جنت عايشة بوهم اسمه الحب
واليوم انشالت الغشاوة من عيني
وعغفت (عرفت) اني جنت مضيعة وقتي بحب انسان تافه

رفعت حاجبها باستغراب
.. اشو كمتي تحجين بالالغاز
.. اغوح (اروح) ابدل واغجع (وارجع) احجيلج
وانتي تحجيلي
دخلت بدلت وسمعت الباب اندك
طلعت سمعت صوت بابا يحجي وية بيبي سليمة
وصاح وهو يم بيبي
.. بابا شيماء جبت الخبز يالله صبيلنا عشا
.. هسة بابا دقايق ويجهز العشا
التفتت علية وهي تكلي بالبتيتة
.. اي ست هدى شنو الصاير
.. اي صدك شومة انتي شنو مسوية بغائد من موقف
.. ليش منو كلج

.. هيج عغفت بالصدفة من خلال كلام فاطمة وياي بخصوص غائد
ان انتي حاجية وياه ومفهمته عن شغلي

.. اني محجيت وية رائد
لان مو اني الي انزل من قيمة اختي واكعد ابررله تصرفاتج حتى يقتنع حضرته ويعفو عنج
بس اني كل الي سويته دزيت على ليان وخليتها تحجي كدامه على كل الي سوته وياج
وهو اتفاجيء وانصدم وخلاص
اني بس ردته يعرف ان انتي بريئة.
لا اكثر ولا اقل وبيومها طلعت وتركته وما وجهتله
اي كلمة لان شفته انسان ميستحق

احجي وياه وارفع من شأنه
وهو من عندها عرف بعد ماكو اي امل يرجع لهدى

جانت شيماء تحجي وانا فاتحة حلكي بين المفتخرة بأختي وبين المتعجبة بتصرف رائد وردة فعله

رحت حضنتها وكلتلها
.. تدغين (تدرين) اليوم سمعت برائد
متزوج

جمدت ايدها لحظة جانت تطلع البتيتة الكلي
ورجعت تكمل
وكالت .. هو الخسران
هسة بدلي الموضوع وعوفينا من رائد الفضاء
وكليلي هالة شلون صارت وامها طلعوها من المستشفى لو بعدها
وكالعادة عرفت شيماء شلون تلهيني و تبعد تفكيري عن وجعي وتشتت انتباهي
.. ياااااا لج شومة سكتي غير عم هالة منير ما اعرف شنو مسوي من مصيبة وية اخوه ابو قاسم سمعتها تكول
موتوا بابا بحيرته ما افتهمت شي

.. اي خطية اليوم اسمع النسوان بالفاتحة يحجون بهذا الموضوع وام فرزدق سولفتلنا اني وام فاطمة شنو الصار

جنت اطلع بمواد الزلاطة وبيدي السجين
.. اي وشفتهمتي
.. افتهمت ان على الاساس خطية ابوقاسم عنده شغل شراكة هو واخوه منير وابن اخوه منتضر

تكول هو متعود على اخوه وابن اخوه دائماً يخولهم
يتصرفون من يمهم بشؤن الشغل والحساب
بس قبل اسبوعين يكلج قاسم ابنه جايه
وكايله
.. يابة ولو انا حالف دين قسم ما اتدخل بشغلك
بس لهنا وكافي ووصل حدها ما اكدر اسكت اكثر

يكولون عالاساس قاسم مكتشف اختلاس عمه وابنه منتظر من فلوس ابوه ورايح مبلغ ابوه عليهم

بس ابوه بيومها مجذبه لقاسم وكايله انت دومك تضوج من عمامك واولادهم. وتدور عليهم الزلة
وانت من يوم الي كشفك منتظر تسحب من فلوس الشركة وانت حطيته براسك

.. اي والله اتذكر خطية مرة هالة حجت بهيج موضوع

.. اي هو يمكن على هذا يحجون

.. اي وتالي كملي شصار
.. المهم تالي يكلج قاسم كايل لأبوه
جنت اسكت وما احجي لان عرفت راح تجاوبني بهذا الحجي وما راح تصدكني

بس يابة انا لهنا وكافي بعد ما اتحمل
طفح بية الكيل الحلال حلالك وانت حر بي
بس مال تجي كل مرة وتطلعني انا الغلطان
والناس كلها بنظرك همة الصح
هاي هي خلاص بعد منا ورايح
انسى شي اسمه قاسم انا طالع وعايفلكم البيت

.. يااا اشوف هالة اليوم كل شوية تسأل عن اخوها اثاري هيج الحجي
ونوب فجاءة اتذكرت كلام هالة عن عمها
.. يا شيماء اليوم هالة كامت تدعي على عمها وابنه
.. اي ولج اني شكاعد احجي
هو قاسم من يوم الطلع من عندهم سافر وعاف ابوه
ويكلج خطية امه اجتي تتخبل على ابنها وحيدها
والاب ظل يكابر

بس تكول ام فرزدق بيوم وفاة ابو قاسم
اكتشف ان حجي ابنه جان صحيح اكتشف اخوه وابنه
بايكين بحلاله لحدما مفلسيه وممبقين على حاله حال
ومطلعين الشركة كسر مسويها فرهود

.. يايمة صخام
.. اي خطية وهو من عرف يكلج
ماخذ سلاحه وهاد على بيت اخوه منير الي يكون تقريباً
بنفس المنطقة بس بعد فرعين

ورايح رامي عليهم وبيومها صايرين من الروس
هذا كله وقاسم ما يدري بأبوه جاي يتعارك لوحده وية عمه واولاده

يكلج الناس ملتمة وصايرة هوسة واجة اخوهم الجبير محمد المسؤول
هو واخوانه الباقين منصور وكاظم
.. اي اعرفه ابو رهف
.. اي هو واخوانه جايين ومفاككيهم
واخذ السلاح من اخوه ابو قاسم وكام يهدي بيه
عمو فرزدق يكول لامه
بين ما اخذوا منهم السلاح وهدوا النفوس مؤقتاً علما ما يلكون حل
ورجعوا ابو قاسم للبيت جان وجهه ازرك من العصبية
يكول خطية اول ما دخل للبيت والتموا عليه بناته ومرته
وهو وكع من طوله مرتفع عنده السكر
.. ياااا يمة خطية والله ميستاهلون
جنا نحجي و سمعنا صوت بابا يكول

.. يابة يالله وين صار العشا شنو نمتوا
مو كتلنا الجوع
شيماء.. شوف خرب يومج هدى اخذتنا السوالف
يالله جيبي الصينية
خلي احط الصحون واصب
كملنا صب العشا واخذنا الصينية يم سليمة
وبابا وكعدنا ناكل
شيماء.. بابا تدري ابو قاسم اتوفى

.. اي ادري بي اتوفى جابوا
على نفس المستشفى الي اشتغل بيها

وبالصدفة شفتهم وركضت وياهم بس خطية ما لحكوا عليه جابوه
ميت للمستشفى
سليمة.. انا لله وانا اليه راجعون
اي صدك ما كلتلي شجابهم يمك
.. اي غير انا اداوم موضف بمستشفى .... القريبة على منطقتهم
خرب بالحظ يكولون المرحوم مات لان خسران كومة
فلوس ما اعرف شلون خسرهم

سليمة.. شفت يمة شلون مات مقهور على فلوسه وحلاله يمة اثير الحك على امك وردلها فليساتها
لا اموت بحسرتي

جنت اكل واسمعهم شنو يحجون بس من حجت سليمة
غصيت بلكمتي وكعدت اكح من الضحك
الله يلعن بليسج شلون دارتها للسالفة
شيماء تضرب على ظهري
.. اسم الله .. اسم الله هاج اخذي شربي الماي

سليمة.. على كيفج اكلي ترة ماطاير الاكل شنو عندج سباق
هههههه ما تضيع فرصة اذا ما تهجم
كملنا العشا وشلت الصينية
وكعدت اغسل مواعين العشا
واني اردد الكولات الي سمعتها بالفاتحة
ظلت ببالي وحفظتها
.. جيت ولكيت الباب مسدود اظل كاعده لو اغدن اغدود (اردن اردود)
كل يوم الدنيا اتبز عيني احوو احوو

وجان اسمع صوت سليمة واكفة وراي وتحجي

سليمة .. تف .. تف.. تف ياستار استر
ها يالبكعة منو ماتلج وتنعين

هدى.. لا بيبي دا ادغب على الكولات
حتى بالفاتحة مالتج اوكف بالنص واكول

يايمة بعدني مامكلة كلامي ما اشوف الا نعال طياري
انشمر علية
واشرد خوية عامر الا طحين
اسمعها تغلط وتسب
دخلت للغرفة وسديت الباب واني مكطوعة الانفاس
من الركض
شافتني شيماء .. ها هدى اشتغلت رحمة الله
رمشت ببراءة .. ها شنو شسويت
.. كلشي ممسوية بس اسأل بيبي سليمة منو داس على ذيلها وخالها تعوي بهالليل

مرت على فاتحة ابو قاسم اربع ايام واني وفاطمة كل يوم اول ما نحل من الدوام نروح لهالة كبل
ونكعد وياهم وخطية ام قاسم طلعوها من المستشفى
وعلى مرتين
شومة تصدف تجي بالفاتحة
تضربها ابرة وتفحص ضغطها
شلون مرية حبابة ومتواضعة

وبرابع يوم الفاتحة كامت على حيلها
وشدت العزم اباع عليها شلون دارت امور الفاتحة
بعدما كانت حلل وغير منتظمة

رغم حزنها على فراك زوجها وابو بيتها وحبيبها
بس جانت قوية الشخصية
من خلال هاي الايام عرفت شخصية ام قاسم
وبناتها جانوا كل وحدة شكل

خطية كلما تشوفني اني وفاطمة تكول
.. الله يبارك بيكم بنياتي ان شاء الله نردها الكم وكفتكم ويانة بالافراح
فاطمة.. تسلمين خالة هذا واجبنة
اني الحمدلله عندي خلل ونقطة ضعف بهاي المواقف ما اعرف شنو اجاوب الناس
جاوبتها مثل جواب فاطمة

اعاني من كلام المجاملات الاجتماعية لهيج مواقف
لان ما متعودة
يعني اقصى حد عندي
الي يكلي شكرا
اجاوبه .. العفو
غيرها اغرك
شيماء دائما تكلي هذا اللسان طلع. كله بوخة

وباليوم الرابع بدة بيت اهل هالة يخف من الناس
وطول هاي المدة مشفت رهف بس امها وخواتها شفتهم
سألت هالة عنها كالت

دخلت كلية طب وامها تكول خطية غركانة بالدراسة
وماعندها وقت تحضر الفاتحة

جانت هالة تحجي وتكلب بعيونها مبين عليها ضايجة منها
لكن اليوم رهف بينت جانت لابسة اسود والشعر قصير
اباوع عليها وحجيت بصوت ناصي وفاطمة يمي

.. بنت اللذين والله حلوة شايلة طول وجسم تسطر سطر
عمي حقه هذا قاسم يخرب عليها
فاطمة.. هههه ها هدى اشتغلت رحمة الله
اجتي هالة وشكلها سمعت كلامنا
وكالت .. اي هي صحيح حلوة بس جمالهة بارد
يعني فاهية ولو تشوفيها دمها شلون ثقيل

ترة الجمال جمال الروح
جاوبتها .. اكلج غحمة على والديج متسكتين انتي وجمال الغوح
مستعدة انطيها هسة جمال غوحي بس خلي تنطيني شوية من طولها
فاطمة.. الله يلعنج هاي انتي الحلوة هشكل تحجين لعد اني شكول
هالة.. شبيج هدى ترة انتي حلوة
هو انتي بس روحج المرحة ودمج العسل يسواها ويسوى عشيرتها
.. خلي يولن الناس علهيم بالظاهر
هالة بحزن .. دشوفيها اليوم يالله كلفت روحها

تجي وتاخذ من خاطرنا ما اعرف على شنو شايفة روحها هي واخوانها هواي متكبرين

رفعت حاجبي وضربتها بكتفها
.. هنا الحجي طلعت السالفة بيها خوانها المتكبغين (المتكبرين)
هالة وجهها انكلب احمر
.. هدى رحمة على والديج وخري عني ما ناقصتج
ادري بهالة تتهرب مني. بس ما علينا شورانة
الايام كدامنا مصير الحي يتلاكة

وعلى طاري مصير الحي يتلاكة
جنا كاعدين وهالة كامت يم اختها منى
وصاحتني خالة ام قاسم كالت خالة هدى روحي صبيلنا
جاي اني والنسوان
.. يمكن هاي خامس مرة اروح وارجع اقدم جاي كسروا على سليمة بشرب الجاي
كامت وياي فاطمة
.. اي غير فاتحة ناس تجيهم
دخلنا للمطبخ وشفت كم مرية كلهم ملتهيات يطبخون
المطبخ شكد جبير بس من ورة بناتهم
صاير زحمة كلهم يشتغلون عبالك خلية نحل
خطية شفتهم ملتهايات

جان عندهم مطبخ حار ومطبخ بارد
دخلت للمطبخ الحار الي بي الطباخ
ووكعدت اسوي الجاي وفاطمة
يمي دتغسل الاستكاين وتحطهم بالصينية
سمعت صوت هالة واكفة بالطارمة
قريب عالشباك مالت المطبخ

تحجي وية اختها منى
هالة .. يمة صخام الصخمني
يمة اخوي راح يروح من بين ايدينا
لج منى منوا كلج هذا الحجي

اسمع منى تكلها .. ستوه خابرني منقذ وكلي
قاسم ماخذ سلاحه وهاد على بيت عمي منير
هالة ظلت تكمز مثل المخبلة

واني وفاطمة وحدة تباوع للثانية
فاطمة .. يا خطية ونوب مدري منين طلعلها هذا اخوها قاسم مدري شبيه

هالة.. ولك يابة الحكلنا قاسم انجن مراح يسكتلهم وربي عرفت
والله كسرت كلبي

وهالة تبجي وتحجي وكلشي مفتهمت منها
غير.. يمة سودة بوجهي
اخوية قاسم ميستاهل
الكاعد يصير بيه منين تتلكاهة
لا اخو يوكف يسندك ولا اب بظهرك
ظليت وحيد لا ناصر ولا معين
منى تكللها .. اشش نصي صوتج لا تسمعج امي
والله تموت اذا تعرف

اخذت الصينية مالت الاستكاين وطلعت من المطبخ ردت اوديها لغرفة الاستقال الي كاعدة بيها خالة ام قاسم والنسوان

جنت كوة شايلة الصينية وما اشوف الا واحد ضخم
معصب طلع بوجهي وكفت جامدة بمكاني من الخوف طكني الثول فد نوب

هو ومن كد العصبية والغضب ميشوف كدامه
جان شايل سلاحه وصوته يهدر هدر

انخبصت اريد رجلية تتحرك ماكو
عيوني شاخصة عالرجال جان ديمشي هاد بتجاهي
عبالك دب ديهجم على فريسته

صاح
.. اليوم لو انا لو همة وحق الركب الراس
اذا ما اليوم منتظر ابيته بالمستشفى ما اكون انا
قاسم

يمة وانا سمعت كال قااااااااااسم
وانا هي عيطة وهي الصينية طارت بقدرت قادر بالهوى
شلون وشوكت ما اعرف
هو من العصبية ما انتبه علية مر من يمي
خطف مجرد خطفة
بس عبالك مر من يمي اعصار مو رجال

لحظات من طلع وما اسمع الا صار رمي برة
عياط وصياح زلم
الناس يصيحون ويكولون لحكو عليه
ام قاسم تدك وتلطم تصيح يمة ابني راح يروح من ايدي
وهالة وخواتها لبسن عبيهم واسمع واحد من ولد عمهم
كللهم التطلع اكسر رجليها والله قاسم بس يدري بيكم طالعات بباب البيت
ومنا الرياجيل والله يدفنكم

هالة .. والله اذا صار على اخوية شي والقران احرك بيوتهم على روسهم مو عبالكم قاسم لوحده
والله احنا مو بنات وحدة بعشر زلم

الناس تصيح وتلطم على المصيبة انا ادك والطم على حظي
اجتني فاطمة تباوع عالهوسة وترجع تباوع علية مستغربة
.. شنو هدى شبيج تعيطين وتصيحين
وياهم شكو شفتهمتي ابوج وياهم
.. ولج انا اصيح على حظي
ولج طلعلي قاسم كابوسي الاسود
شايل سلاح وهد بيه يريد يطلع يتعارك
واني انصدمت عبالي علية

ولج فاطمة امشي وديني لبيتنا
راح اموت من الخوف
جنت احجي وارجف بعدني مصدومة
.. صبري شبي اتخبلتي متشوفين الناس مخبوصة برة وين اطلعج بهاي الهوسة
جنت ارجف واحجي بصوت عالي خايفة
.. نصي صوتج فضحتينا هسة الي يشوفج يكول هاي شبيها
.. حقي اخاف
هو من جان صغير جنت بس مجرد المحه يمشي بمنطقتنا وشايل مصيادته بيده
اموت بدمي من الخوف واخبص الدنيا من البجي
مو هسة ..هذا كبر كام يشيل سلاح بدال المصيادة
شتردين يصير بية غير اتخبلت

ولج فاطمة ختليني .. ضميني بمكان

وبعدين مااعرف شلون
انا لكيت روحي خاتله ورة ام قاسم ارجف
هي الهوسة هايسة وانا محتارة بروحي وين البد

اخذتني
فاطمة ورحنا للمطبخ وجان اشوفهم من شباك المطبخ الرياجيل مشبكين قاسم وهو يتدافع وياهم يريد يطلع

اني اباوع وجسمي يرتعد
حجيت بصوت ناصي لفاطمةً
.. لج عزة بعينه هذا يا هو الي داعية عليه امه
ومعصب قاسم يمة الله لا يبلانة

.. اش لج سكتي خلي نفتهم شنو السالفة
ظليت كاعدة بالمطبخ وما اتحركت من مكاني من كد الخوف
وهالة خطية
تروح وترجع تحوم كل شوية تباوع من الشباك تريد تعرف شسوة اخوها

تالي اجتي منى تحجي وية هالة تكللها
قاسم مصوب منتظر برجله
وعمو محمد لفلف السالفة
وحاول بقدر الامكان ميوصل الموضوع للشرطة
واخذو منتظر للمستشفى

وقاسم بعده كل ساعة يهد وينثني
يكول كون احرك بيوتهم على روسهم

التفتت على فاطمة وانا حاصرتني البجية
.. ولج فاطمة توديني لبيتنا لو اغوح لوحدي لبيتنا
.. والله انتي مخبلة مو عاقلة

.. اي شعليج الايده بالماي مو مثل الايده بالناغ
.. هسة راح اتصل على اخوية واشوفه وين
جنا كاعدات ننتظر اخو فاطمة يجي علينا
وجان تدخل رهف
وحجت بصوت هاديء رقيق تجر بالحجي جر

.. اكوووول حبي هااااالة شنو شبي قاااسم
معصب

هالة هزت ايدها
.. استغفر الله خلصت العركة وست رهف ستوها تتحزم
بابا روحي رجعي نامي

وانا وفاطمة وحدة تباوع بوجه الثانية فاتحات حلكنا
حجيت وية فاطمة بصوت ناصي
.. خاب شوف هاي ام حمبي
شلون تعوج بالحلك
رجعت ضربت كصتي اتذكرت
.. اهووووو اني شلون نسيت هذا هو نفسه حمبي مال
غهف (رهف) طلع قاسم لا يا الله
خرب راح ابجي طين على لهفتها على قاسم
فاطمة ضربتني بكوعها

.. خرب ولج سكتي عيب لا يسمعونج
دك نقالها
وجان المتصل اخوها كللها انا راح اتأخر عليكم
انتظروني
.. يبوووو شلون اغيد اغوح لبيتنا
فاطمة.. لج عوبة شسويلج صبري هسة انتي شبيج حاركة الدنيا
جانت ام فرزدق كاعدة يمنا وكالت
شنو شبيج خالة ترجفين

فاطمة كالتلها.. تريد ترجع لبيتهم واخوي طلع عنده شغل راح يتأخر علينا
ام فرزدق.. يا خالة صدك جذب هذولي ولدنا
تارسين البيت هسة اتصلج على واحد منهم يوصلكم للبيت

لحظات وجان تجي ام فرزدق وكالت
.. يالله خالة جهزوا نفسكم السيارة تنتظركم برة بالباب
كمنا اني وفاطمة
وراحت فاطمة سلمت عالبنات خوات هالة وهالة وامها

وهي تحجي وياهم وتصبرهم
واني وراها شتسوي اسوي وشنو تحجي احجي
لحد ما انتبهت فاطمة تضحك علية
باوعت عليها

.. انتبهتي لروحج شنو كلتي لخالة ام قاسم
.. شنو شكلت حالي من حالج شنو تحجين احجي
.. اي مو عوبة اكو وحدة تكللها خالة امي تسلم عليج
بالله كليلي الثول شلون يكون لونه بعد

.. مثل لونج
جنت احجي وانا ملبدة راسي ورة فاطمة وخربانة ضحك على سوايتي

اجة ولد صغير دزته ويانة ام فرزدق حتى يوصلنة للسيارة
فتحلنا الباب وصعدنا ورة
وجة الولد وركب والقى السلام
وكال .. هلا بهدهد شلونج
باوعت على الرجال وحجيت مصدومة

.. صهيب !!!!!!!!!!!

يتبع

احبكم هواي احبكم كومة
اختكم نهى♥️🌹♥️🌹