أساور الفضة الفصل الرابع والعشرون 24 - بقلم نهى

مساء الانوار عليكم احبتي
التمس منكم العذر لان اتأخرت بموعد التنزيل
وذلك لظروف خارج عن ارادتي
ولكم مني جزيل الشكر لتفهكم لي

#اساور_الفضة
#الكاتبة_نهى

اتفاجئت من شفت صهيب
.. صهيب!!
.. اي هدهد صهيب
.. الحمدلله على سلامتك هاي شوكت غجعت من السفغ (رجعت من السفر)

.. الله يسلمج البارحة يالله وصلت
جنت راجع علمود فاتحة عمو ابو قاسم
وما جنت ادري شنو المضموم لي
ياريتي ما راجع بعد العرفته البارحة
ااااااخ يالقهر هاي وين جانت مضمومتلي

جر حسرة وضرب الاستيرن اتلاحك لروحه وغير الموضوع
.. عوفج مني وكليلي انتي شلونج واختج شيماء شلونها
بالكوة بلعت ريكي وجاوبته
.. بخيغ ( بخير) والحمدلله عايشين تحت غحمة الله

جانت فاطمة تباوع علية وعليه بستغراب
تريد تعرف شنو الموضوع
ومبين عليه كوة لازم روحه
يمسح بوجهه وينفخ

فزيت على كرصة فاطمة وسألتني بصوت ناصي
.. ولج منو هذا الحلو منين تعرفينه
.. اشش عوبة بعدين احجيلج

مشينا طول الطريق هو ساكت ومسألني ولا حجة اي شي
شوية ووصلنا فاطمة على بيتهم وبعدها حرك السيارة يوصلني لبيتنا
واول محرك السيارة كبل التفت علية وحجة
بصوت كله غضب

.. ااااااااااخ يالله لج هدى
اجيت اموت البارحة من عرفت بضحى اتزوجت

صاح صيحة واحد مكسور كلبه
ودينزف غصب عنه
ظليت بس اباوع بعيوني وحرت شجاوبه

.. ما شفتي حالي من حجيت وية امي مثل الغبي
واكللها
يمة بس تخلص الفاتحة اخذج انتي والوالد ونروح حتى تحجون وية ابوشيماء تأجلون الموعد
عقدت حواجبي هذا شيقصد عن يا موعد
كمل كلامه
.. تالي صدمتني امي تكلي يمة انسى ماكو موعد البنية خلت بينا ونكثت بالوعد وراحت اتزوجت من غيرك
ومكلنالك بوكتها لان انت جنت مريض خفنا عليك تنتكس صحتك وانت مو ناقص
واحد يجملك
جان يحجي وهو معصب انتبهت عليه ديسوق
سريع خفت منه وحجيت وياه اهديه

.. عفية صهيب كافي لتعصب كلشي قسمة ونصيب وهي ممقسوتلك
جنت احجي واباوع عالطريق خاف يسوي بينا حادث

.. لج هدى شتحجين شلون ترديني اسكت وانا اسمع بحلمي صار لغيري
شلون تتزوج وهي انطتني وعد تنتظرني من ارجع نتزوج

.. وانت هم وعدتها سنة وتغجع (ترجع) واشو السنة صاغت (صارت) سنتين
اتأخغت (اتاخرت)عليها وطولت بالسفغ (بالسفر)
وما سمعنا عنك اي شي ولا انت الخطيت اي خطوة يخليها تتمسك بحبها
بس هم بقت تنتظغك ( تنتظرك)
مالك حق تعتب عليها وانت الي عفتها معلكة بدون اي كلمة منك
اختي جانت تنتظغ سغاب (تنتظر سراب)

.. هدى لا تخبليني
لعد ليش وافقت على كلام امي وياها
من كلتلها احنا بعد اسبوعين راح نجيب عمام صهيب ونخطبج من ابوج
وان شاء الله الزواج بعد سنة من يرجع صهيب هشكل جان الاتفاق
امي كالت حجيت وياهة قبل لا احجي وية اختها الجبيرة
حتى اجس نبضها
تكلي يمة هي وافقت على كلامي
بس اشو تالي
انصدمت ورة اسبوع من كلامي وياها اسمع بيها مخطوبة لاخو صديقتها

_ هاي شدتحجي صهيب
مستحيل ماكو هيج شي انت متوهم

.. شلون متوهم وامي بذات نفسها حجت وياها
واتصلت علية بوكتها تبشرني بموافقة ضحى

ظليت فاتحة حلكي مصدومة ع السمعته من صهيب عن ضحى معقولة

هزيت راسي بعدم تصديق
.. مستحيل ما اصدك الكاعد تحجيه

ضحى حاغبت (حاربت) لحد اخغ (اخر) لحظة
وغفضت (رفضت) الناس اتقدمولها
وشكد جان عليها ضغوط من بيبي والي شافته منه
بس ظلت باقية تنتظغك (تنتظرك)

عقلي مدا يستوعب كلامك
شلون تطلب مني اصدك كلامك
وهي صبغت (صبرت ) هذا كله
معقولة تنكث وعدها بكل سهولة خصوصا بعد ما صاغت قغيبة (صارت قريبة) من حلمها
ان تصيغ (تصير) من نصيبك

.. هو انا ليش راح انجن اريد اعرف هي ليش اتزوجت
وطعنتني بظهري بهاي سوايتها
جرر حسرة

.. صهيب اني اعتذغ ما اكدغ (اعتذر مااكدر ) اصدك كلامك
اختي ضحى واني اعغفها (اعرفها) وجنت شاهدة على حبها الك
عقد حواجبه بتسائل
.. شنو قصدج يعني امي جذابة وان هي محاجية وية ضحى بالموضوع

.. اني مكلت امك جذابة بس ياغيت (ياريت ) تتأكد
بالاول قبل لا تتهم اختي

وصلت لبيتنا وسلمت عليه وكال
.. لحظة هدى متتحركين منا الا تكولين
شنو قصدج بهذا كلامج
..قصدي واضح
لا تتبلون على اختي وتكعدون تتهمونها ظلم

نزلت من السيارة واني كلني ارجف من القهر والغيض
سديت الباب وانتبهت عليه وجهه انكلب اصفر وكصته عركانة جان مبين عليه مريض

دخلت للبيت واني كلبي يفور عليه وعلى اهله
صدك ناس ما عدها لاذمة ولاضمير
كل شوية ويكول
امي كالت ادري شنو امك ملاك معصوم متغلط
اااووووف
اذا انتي جنتي متريدين تخطبين لابنج ضحى شكو
مسويتلج فلم روحي كولي لأبنج ما اريدها تصيرلي جنة

الله يكطعهم شلون ناس تعبانة لا والاخ معصب وزعلان فوك حكه دكه هذولي غير ناس تعبانة

رجعت للبيت وشيماء شافتني وجهي مكلوب
وكعدت تستجوبني منو وصلني للبيت
وشبيج ضايجة
جاوبتها عالصار وية بيت اهل قاسم

وهي شوية تنقهر وشويك تضحك علية

بس محجيت عن سالفة صهيب وضحى
تركت الموضوع مومهم لان بعد ميسوى الواحد يحجي بيه
خصوصاً ضحى بعد اتزوجت وراحت لحال سبيلها
والحمدلله
انتبهت لشيماء احجي وياها وهي شاردة بفكرها
وصافنة بغير عالم

..شنو شومة شبيج
باوعتلي
.. مبية شي بس هيج جنت افكر بموضوع
اليوم اجتي دكتورة اقترحت علية اشتغل عندها بعد الدوام بالعيادة واصير مساعدتها بالعيادة

بعد يومين بالكلية
فاطمة.. اكول عوبة ليش ما اتصلتي علية اول البارحة مو كلتلج اتصلي علية

.. ما عندي غصيد.(رصيد) مفلسة الله وكيلج حتى ابو شغكة (شركة)اسيا
صاغله (صارله) قغن (قرن)من يطلبني فلوس القغض (القرض)

.. هههههه عزة بعينج حتى الشركة ما سلمت منج
.. اي والله خطية كل يوم يدزولي غسالة (رسالة)
ويكلولي يابة ايها المشتغك غجع (المشترك رجع) الفلوس الي اخذتها والا سوف نغلق خطك وخط الخلفوك

.. ههههههه خرب بالحظ لحكي عبي رصيد لخطج لا يغلقونه

.. هو اني اليوم عبيت غصيد للشغيحة (رصيد للشريحة)
يا يابة لو تسمعين ابو الشغكة اشكد اتشكغ (اتشكر) مني
كام يطك اصبعتين
.. هههههههه خطية ممصدك
عبيتي رصيد عباله غلستي عليهم

.. بس يافغحة (يافرحة) الما تمت
انا عبيت غصيد (رصيد) ابو الخمسة اشو نصها غاح (راح) للديانة والخدمات
ما صفالي من الخمسة الا الف
.. شطلعت هاي يابة والله كسرتي خاطري جان رمشتيلي اولت البارحة وانا اتصل عليج
.. لج عوبة شغمش عليج اكلج مفلسة بحيث كمت من اتصل على احد
يكولي ايها المشتغك غصيدك (المشترك رصيدك) تف دولار مو صفر دولار
اشحن خطك ولتصيغ (لتصير ) ملطلط

.. هههههه الله يلعنج حتى شركة الاتصال ما افتكو منج
اي صدك اتذكرت هداوي
اليوم مو تنسين الخميسية مالت ابو هالة
اجي عليج ونغوح سوية

.. يمةةةةة لالا عفية روحي انتي لوحدج
اني بعد الي صاغ (صار) مستحل اغوح لبيت اهل هالة واخوها
ابو المعاغك (المعارك)هناك

لج والله كلما اتذكغ موقف قاسم شلون هد بالغشاشة (بالرشاشه)
جسمي يكوم كله يغجف (يرجف) من الخوف
خغب (خرب) يومه هم غامي (رامي) الولد وماكاعد غاحة (راحة)

فاطمة .. بس يمة فديته هو شلون قاسم غير يموت
.. اي ولج سكتي تدغين (تدرين) لحد الان ممصدكة
قاسم الاملح الاجلح صايإ (صاير) كيكة ابن اللذين
بس كيكة مفحمة من الغضب

فاطمة.. صدقة لربه والله عليه عيون ورموش تموت
لج ذاك اليوم عصبي وعاكد حواجبه وعيونه تكطع
زين لعد هذا لو يباوعلي بعيونه وهو مبتسم شيصير بية
يمكن اموت

.. اي بعد بعد غني سحغني بنظغة (سحرني بنظرة ) عيونه ابو عيون السود
قاسي وية اليحبونه ابو عيون السود

.. والله تردين الصدك يلوكله اغنيله هو من ناحية القساوة
فقاسي اسم على مسمى قاسم قاسي
.. عوبة اشو تحجين وانت مكزكزة عالولد
عيب اتستغي يا مغة ( اتستري يامرة ) ماعدنا بنات يتغزلون بالغياجيل (بالرياجيل)

.. لج خية مو بيدي غير اخرب من اشوف واحد اسمر ومملوح متدرين بية اكوم اعلس وما اجمع حجي
بالعافية على رهف الفاهية لا ونوب يحبها
يعني والله كلش هواي على كلبي الصغير وربي ميتحمل

.. هههههههه هو انتي شبقيتي بالرجال حتى بالعافية عليها
خغب (خرب ) بالحظ بس هو والله شايل طول ههههههه يسطغ (يسطر) ابن اللذين
لو بس شوية ينطيني من طوله جان اني هسة اغني دان دان من الثقة
.. والله احجيها من كل كلبي بالعافية عليها
اني تدرين بية كلما اشوف بقلاوة
يصعد عندي السكر
.. اي والله ادغي (ادري) بيج بوخة بس حجي
من يصيغ (يصير) وقت الجد الكاج خاتلة بأقغب (اقرب) زاوية
بس تغدين الصدك هو وغهف لايكين على بعض
هي حلوة وهو يخوف

.. عمة بعينج هذا الزين كله وتكولين عليه يخوف
انطيج عيوني تشوفين بيها
شنو الموحلو بيه طوله لو شكله لو سماره ابو سمرة
لو جسمه خرب شفتي الشامة الي بزنده
.. يا.. يا.. يا فصختي الولد تفصيخ
وين لحكتي تشوفين هذا كله اشو اني ما لحكت اشوف شي
بس لمحت عيون حمغ (حمر ) واكتاف عغاض (عراض) يكول عبالك
داخل بحلبة مصاغعة (مصارعة)
.. ههههههههه حقج انتي مشفتي روحج شلون كمتي تعيطين وتبجين عيونج تصب وخشمج يصب وحالتج حالة ووويييييع جنج صخلة تايهة بالوادي
ولازمتني من طرف ثوبي وكل شوية تصيحين

.. يمااااااا اجانة الذيب اخذوني لبيتنا
ينعل ابو شكلج بيومها والله روحتي علية مشهد الحب الا بشدة

.. يا مشهد هو وغة الصاغ (ورة الصار) بعد ظل بيها مشهد
.. يااااا ولج نسيت اكلج
مو ست رهف من دخلو قاسم بعد العركة
راحت يمه وسلمت
عليه واخذت من خاطره ولج اباوع عليهم جان هو واكف جوة
الدرج يم المغسلة ديغسل راسه من الغضب
وهي اخذت المنشفة وراحت وكفت يمه
وانا اختج حديقة ناقصة مشاهد عاطفية وحنان
ظليت مصفصة اباوع عليهم

.. الله وكيلج فطومة
خاف انتي حديقة اخوج هادي صاير صحراء قاحلة
من الجفاف العاطفي
كولي خية كولي اطغبيني (اطربيني ) خليني اسمع

.. ههههه لعد خلي احجيلج حتى تكابليني ونلطم سوية
ليش ما هو خلص غسل ورفع راسه
واخذ المنشفة من ايديها كعد ينشف براسه
ويباوع عليها
وهي الست كامت تبجي وتكله
.. قسومي حبيبي اجيت اموت من سمعت بيك متعارك

يمة لو تشوفينه هو طويل وجثل دنك راسه عليها وهي رافعة راسها تباوعله دايخة وياه
وحجى وياها ومدري شنو كللها وهي ابتسمت
بس لكفت كلمتين
مسحي دموعج ما عاش الي ينزلج دمعة
وظلو يتهامسون مثل طيور الحب
وناسين اكو ناس حدايق موجودين حولهم

.. عاااااااااا ابجي تيزاب عالغومانسية
كملي خية كملي
.. خرب شكمل بعد ترديني احجيلج على حالي شلون جنت واكفة اباوع عليهم وفاتحة عيوني وحلكي
والله حتى ما رمشت خاف يفوتني شي
وداعتج صار شكلي مثل هذولي
روتانا سينما مش حتقدر تغمض عينيك

.. خغب بالحظ لج فطوفة خية كافي والله كصيناهم كص
لا يصيغ (يصير)بيهم شي من وغانا (ورانا)
الله يستع (يستر) عليهم ويبعد عنهم العين
.. امين يارب هسة شنو
ترحين وياي لبيت هالة لو لا
.. لا حبي ما اغوح (مااروح)لبيت اهل هالة عندهم وحش
اخاف ما بايعة غوحي (روحي)

.. ولج صدك تحجين معقولة تخافين منه لحد يومج هذا
.. اي شسوي هذا حظي وقسمتي سوة بية خوفة

الناس تصير عندها فوبيا من الاماكن المرتفعة
من الظلام واني حظي عندي فوبيا من قاسم المغواغ (المغوار)

لزمت كصتي
.. شايفة هاي
جنت ااقصد عالندبة
.. اي شبيها شنو وواكعة على كصتج وانتي صغيرة ؟؟

.. لا حبيبتي هذا اثغ ضغبة قاسم من جنت صغيغة (اثر ضربة قاسم من جنت صغيرة)
اتذكغ (اتذكر) بيومها طلع مني دم ومن عندها
صاغ (صار ) قاسم سبب كل كوابيسي

.. خرب يومج طلعتي جنية بوخة

اجة الخط وسلمت على فاطمة ورجعت للبيت
لكيت شيماء راجعة من الدوام من وكت
ومسويتلنا مطبك دجاج ريحته واصلة لباب الشارع
دخلت وسلمت عليهم

.. ها شومة اليوم غاجعة (راجعة) من وكت شعجب
.. فوتي بدلي بسرعة حتى تجين تساعديني
اليوم خميس وسويت ثواب لامي واتصلت على
ضحى وكلتلها تجي تتغدة عدنا

.. والله مشتاقتلها البذاتة غاح يصيغلها (راح يصيرلها) ٦ اشهغ (اشهر)
من اتزوجت بس مغتين (مرتين) كلفت غوحها (روحها) تجي حتى تشوفنا

.. لتحجين هشكل ترة ضحى امرها مو بيدها
ومبين رجلها ميقبل يجيبها النة
خرب يومج هدى راح توصل البنية وانتي بعدج واكفة وممبدلة ملابسج
دروحي بدلي وبعدين تعالي كملي سوالفج

.. صاغ طلقة ابدل واغجع ( ارجع)
رحت دخلت للغرفة ابدل
واسمع سليمة تحجي وية شيماء تكللها ضميلي الكوانص مالت الدجاج اسويهم للعشا
سليمة هواي تداري بروحها
كملت تبديل وحطيت نقالي عالشحن وسمعت الباب
اندك
طلعت افتح الباب لان شيماء بالمطبخ دتطبخ
وجان اشوف مرية لابسة عباية راس وبوشية سودة على ووجها مبركعة

حجيت قبل لتحجي.. تفضلي حبيبتي المن رايده

سمعتها كالت
وهي تتقدم تريد تتدخل

.. ههههههه لج عربة هدى اني اختج ضحى
فتحت حلكي ممصدكة ورجعت على ورة
سويتلها مجال حتى تدخل
.. عزة بعينج ضحيوة والله معغفتج (معرفتج)
دخلت وسديت الباب ورفعت البركع
وهي تضحك
رحت عليها وحضنتها ياربي شكد مشتاقتلها
.. بنت الاوادم هاي شصايغ (شصاير) بيج ولا انتي حيل متغيرة
جنا نسولف ونمشي
.. متغيرة نحو الاحسن لو نحو الاسوء
قاطعنا صوت شيماء
اجتي وبيدها المغرفة ولابسة صدرية الطبخ
.. ياهلا وميت هلا نورتي البيت
اخذتها لحظنها
انتبهت لضحى شمرت جنطة الغراض مالتهة
وركضت عليها وحضنتها وضمت راسها
بصدرها
وشهكت بصوت باجي مال وحدة مكسورة

انصدمنا اني وشيماء
اباوع لشيماء لمتها لحضنها بين ايديها وصارت تمسح على ظهرها حتى تهديها

اني وشيماء جنا وحدة تباوع للثانية ولسان حالنا يكول اختنا شبيها منو هاضمها

شيماء وهي تمسح دموع ضحى .. اششش على شنو هاي العيون الحلوة تبجي
ضحى تمسح دموعها
.. وربي طك كلبي عليكم مشتاقتلكم بس سيف
كل مرة يطلعله حجة ويبطل ميجيبني الكم

دخلت جوة للبيت ونزعت عبايتها
وكعدت اتفحص واتمعن بشكلها
عسى ولعل اعرف على سبب غصة ضحى
ما اقتنعت بحجة مشتاقتلكم
اباوع عليها
جانت لابسة ملابس فخمة

ومدندشة بالذهب الي يشوف شكلها
راح يكول ايبااخ شكد مبين عليها مرتاحة
بس بعيونها جان اكو حزن متكدر تخبيه عني
حتى لو تحاول تلبس قناع الرضى

اجتي سليمة وسلمت عليها وتباوع عليها
سليمة .. ها ولج ضحيوة شفتي الرجال ونسيتي اهلج
ماتكولين هي بيبيتي خطية اروح اسلم عليها
لو تخافين انضربج بعين

غمضت عيوني بصبر هسة هاي شحجي وياها
ما ادري منين تطلعلي بهاي السوالف

ضحى.. بيبي والله لو بيدي اجي اشوفكم كل يوم
بس امري مو بيدي سيف ميقبل اجي
.. وليش حبيبة ما يجبج النة شبينا نكرص لو نعض
لو مو من مقامه وقدره احنا

شيماء.. بيبي انطيها مجال ستوها اجت خلي تجر نفس
اباوع لسليمة كامت تكلب بوجها معاجبها العجب
دخلت ضحى للغرفة
و طعلتلها

دشداشة من جنطتها حتى تاخذ راحتها
نزعت كدامي وجان انصدم بمنظر جسمها كله
اثار ضرب وازرك مخطط

.. لج ضحى هاي شنو
ارتبكت ولبست دشداشتها بسرعة

وكالت.. ماكو شي هاي هيج تدرين بية جسمي حساس
من اشتغل اشبع ضربات بالكاونتر لو بالاثاث وبيت عيالي جبير يتعب
جان حجيها غير مقنع وما بيه اي ربط
بس عرفت متريد تحجيلي خلاص خليها براحتها وراح اجاريها بكذبتها
.. يا خطية الله يساعدج

صاحتنا شيماء علمود نجي نتغدة
كعدنا ناكل
و نتبادل الاخبار وضحى كل شوية تسألني عن
اجواء الكلية واني احجليها
وبعدها سألت شيماء عن شغلها
اباوع على ضحى احس بيها كبرانة

.. اممممم صارلي شكد مماكلة هيج اكل طيب لج شيماء والله مشتاقة لطبخج
سليمة.. ليش همة هناك ما يوكلونج لو شنو

.. لا بيبي يطبخون واغلب الاحيان اني الي اطبخلهم
بس ما يلحك طعم طبخ شومة

جنا ناكل ونحجي وناكل ونتذكر ذيج الايام
.. بابا شخباره اشو ماكو
شيماء .. ما ادري بي صارله يومين كلش يتأخر و لليل يالله يرجع

.. ها يالله بلكي الحك اشوفه واسلم عليه
هدى .. ليش انتي ما غاح تباتين اليوم عدنا
.. لا وين يا حصرة استاذ سيف احلم يخليني ابات عندكم هو جية بالكوة خلاني اجي

خلصنا غدة وعزلنا الاكل
ورحنا كعدنا بالغرفة نشرب جاي

وسليمة راحت تاخذلها غفوة الظهرية

انتبهت لضحى كلما نسألها عن احوالها تتهرب وتغير الموضوع

ضحى.. بنات صدك سمعت بجارنا ابو قاسم اتوفى
.. اي خطية اتوفى الله يرحمه
.. سيف يكول قاسم ابنه صديقه
يكول خطية استفلسوا وكعدوا عالحديدة
شيماء.. الله يعوضهم خسارتهم
بس هو الاهم من الفلوس ابو قاسم نفسه راح بشنو قيمة الفلوس
.. اي والله صدك كلامج الفلوس ما تكدر ترجع الراح
جانت تشرب جاي وسرحانة
ما اعرف ليش من جانت تحجي على بيت ابو قاسم
فجاءة اجى على بالي صهيب وكلامه
.. اكول ضحى تدغين صهيب غجع من السفغ (رجع من السفر) وشفته بالفاتحة
انتبهت عليها شركت بالجاي وظلت تكح
شكل سؤالي فاجئها
. ظلت اتمتمت
.. ااا الحمدلله على سلامته

.. تدرغين من عغف (تدرين من عرف)بيج متزوجة حغك (جرك)الدنيا
وبيوم الوصلني للبيت كال كلام
غغيب (غريب) بالحقيقة صدك نغفزني (نرفزني)عبالك هو المظلوم

جنت احجي واباوع على وجهها شلون كام ينطي الوان
شيماء حجت وهي ضايجة

.. وفوكاها الاخ هم جاي متأخر وهم ضايج حضرته
يالله ولو هو الحجي بعد ميفيد كلمن راح بطريقه
ليش مكلتيله انت هم الك عين تحجي عشمت البنية
وتالي نكثت بوعدك

الغريب بالامر اني وشيماء نحجي بالموضوع وضحى
تتهرب وما نطقت بأي حرف

..اكول ضحى اغيد (اريد)اسألج سؤال
صدك ام صهيب حاجية وياج قبل لا تنخطبين بأسبوع
وكلتلج على الاساس ان همة غاح يجون يتقدمولج بعد اسبوعين
والزواج بعد سنة

جاوبتني مرتبكة
.. ها لا ماكو هيج حجي
انتبهت لشيماء ضيكت عيونها ورفعت حاجبها
.. شنو هدى هذا شوكت صار الحجي
.. انا مكلتلج بيوم الوصلني صهيب للبيت
حجة وياي وهو معصب ومقهوغ (مقهور)
وحجيت لشيماء كل الي صار
وضحى اباوع عليها تريد تنفجر كل كلمة احجيها
اشوفها تختنك
شيماء سألت ضحى بصوت ناصي

.. ضحى كولي هذا الحجي السمعته صدك لو جذب

جاوبتها ..ميحتاج تسأليها طبعاً جذب اصلا انا ما صدكته
لا ونوب ما يسكت يكول كون اغيد البية بيها يصيغ
وتعيش لوعة كلبي
يعني فوك حكه دكه
عاد انا ما سكتتله وانطيته كم كلمة بالعظم
بحيث بوكتها
انخطف لونه وجهه كام يعرك وداعتج يوم ثاني
سمعت ام فغزدق تكول انتكست صحته وماخذينه
للمس........

فجاءة صرخت ضحى .. هدى كاااااااااافي .. كااااافي والله كلبي بعد ما يتحمل
كليله الله اخذ بحقك مني وهاي اني
جاي اتجرع المر كل يوم من ورة حوبته
جانت تحجي وهي تبجي منهارة
اني وشيماء انخرسنا وظلينا وحدة تباوع بوجه الثانية
شنو شتقصد

شيماء.. لا مستحيل ما اصدك الي اسمعه
يعني انتي ضحى الي جنتي مجنونة بصهيب
تسوين هيج يالله واني كلهه اتحسب عليه واكول
كسر بأختي واتأخر عليها
تالي طلعت اختي هي الي خذلته وكسرت كلبه

جانت شيماء تحجي واني اباوع على ضحى وكلمة وحدة ترن براسي
سألتها .. زين ليش سويتي هيج انطيني سبب اقنع بي نفسي
مو حجت وياج ام صهيب عملود يتقدمولج
ليش قبلتي بسيف

ضحى بحركة كلب .. مكدرت اصبر بعد سنة
ويجي يتزوجني جنت كاعدة امر بفترة عصيبة
وحالتي النفسية كلش متدمرة مثل المسجون الي ينتظر
حريته يوم يوم بس من كالت بعد سنة الزواج اتدمرت نفسيتي بالزايد

وفوك هذا كله اتعاونوا شهد واخوها وامها
كعدوا يحجون براسي وحطولي الشمس بيد والكمر بيد
شيماء .. ولج ضحى لتجننيني هذا مو سبب تسوين هيج بصهيب

.. شنو يعني خلي نفسج بمكاني
اني مسجونة ويجي واحد بي كل المواصفات المطلوبة
ويكلج بس وافقي عالزواج والله اعيشج اميرة
شنو. تردين مني اسوي

واني جنت اتلهف اطلع من سجن اهلي واعيش حياتي
بوقتها ما اهتميت للحب
ولا جنت افكر بصهيب جنت افكر بس بنفسي
شلون اتخلص من عيشتي المرة

بس ربج ما عداها الي تالي انصدمت صدمة عمري
بسيف واهله
ورجعت تبجي منهارة
شيماء.. لج ضحى يوم عن يوم تثبتين انتي شكد
غبية وسطحية بتفكيرج وصدك ناقصة عقل
خليتيني اضن بالولد بالسوء
جرت نفس عميق

.. خرب حظج ضحى واشوف ام فرزدق بيوم عرسج اجتي وجها اسود وضايجة
وبوكتها استغربت ليش محد اجة من اهل صهيب اثاري حضرتج لاعبة لعب

احجي انتي منو مداعرفج وينها ضحى اختي الي جانت مثل الوردة المغمضة
ولو شحجي وشكول خلي
يولي العتب بعد ما يفيد

كامت من يمنا وعافتنا وطلعت من الغرفة جانت كلش ضايجة من ضحى

جانت ضحى تبجي بدون متحجي اي شي حطت راسها
عالمخدة واتكرفصت على روحها مثل الجنين همست بتعب
.. اني خسرت كلشي بحياتي

اقتربت منها كسرت كلبي جان منظرها يقهر
اقتربت منها وكعدت امسد على راسها
.. كافي ضحاوي هذا هو انسي الماضي
وعيشي حياتج وية سيف

.. ليش هو اني عندي حياة وية سيف حتى اعيشها
لج هدى اني صرت رماد
جانت ضحى تعاني ومتحجي شنو الكاعد يصير وياهة
ببيت سيف واهله اكتفت بس بالبجي
اوف ياحظج يا ضحى

لليل اجة سيف واخذها جان مبين عليها متريد ترجع وياه
تكول بعدني مشباعنة منكم
جانت هاي اطول جية لضحى من اتزوجت لحد هسة

مرت الايام والشهور
وقربت الامتحانات النهائية
جانت حياتي بالكلية كلش هادئة وماعندي اي فعاليات
الي يشوفني يكول هاي شكد ثقيلة لان مو هلكد اختلط
وجنت مكتفية بصحبة هالة وفاطمة نجتمع بالاسبوع مرة
مع بعضنا بكلية وحدة من عدنا
وهالمرة احنا رايحين لكلية هالة
جنا نمشي
وفاطمة دتصل على هالة تريد تعرف مكانها وين
بس فجاءة صار كدامي رائد جان يمشي وية كروب شباب ما انتبه علية من مر من يمي
اخر شخص جنت اتوقع اشوفه وبهيج مكان
شهكت وحطيت ايدي على حلكي مصدومة
لا ياربي دخيلك

ها ياكلبي مو عالاساس كلنا شفى جرحك وكلت هاي هي بعد خلاص

فاطمة جانت تحجي
بس قطعت كلامها وباوعت علية وبعدها
باوعت على المكان الي جنت اباوع بأتجاهه
رصت على اسنانها ولزمت ايدي وسحبتني وراها

وهي تحجي من بين اسنانها
.. لا ياهدى مو هيج جان اتفاقنا
مشينا واني اتلفت للخلف اباوع عليه شلون يمشي ويضحك وية جماعته

والله احس اندليت مكان كلبي من شفته
عفو عليك ياكلبي مو هيج العشم بيك جنت اضنك اقوى من ان يهزك شوفته

بعدها التهيت وية البنات هالة وصديقاتها اجوي علينا ورحنا للكافيتريا

وكعدنا هناك اباوع على هالة هواي اتغيرت من وفاة ابوها لحد هسة وما اعرف شنو المتغير بيها

وحدة من صديقات هالة كالت بنات خلي نروح للمطعم ال... نتغدة سوية

اباوع للبنات وافقوا وفاطمة كالت اذا هذى وهالة يرحون اني اروح
.. اني عني عذروني ما اكدر اروح وياكم
استحيت اطلع وياهم للمطعم
واني يادوب مجمعة فلوس الخط والملازم وغيرها
خطية شومة ممقصرة وياي بس هم حبيبك حلو لا تاكله كله

وهالة كالت.. واني هماتين ما اكدر اروح
انتوا اخذوا راحتكم اذا تردون تطلعون
حجا وحدة من البنات
.. اكول هالة اشو انتي هواي متغيرة مو مثل الاول
تطلعين ويانة
هالة.. بنات عذروني مالي خلك
لحظات والبنات جمعوا كتبهم وراحوا
وبقينا بس اني وفاطمة وهالة
بس راحوا هالة هزت ايدها
.. والله ياربي يسألوني عن حالي شبية وليش متطلعين وتتونسين مثل الاول
يابة زمن اول تحول وماعدت انا هالة الاولية
فاطمة.. حقج والله حبيبتي اعرف بعدج حزنانة علمود وفاة ابوج
.. مو بس هشكل وضيفي فوكاها احنا كعدنا عالحديدة
وصار الفلس عزيز بعد مو مثل كبل اصرف
وابذر بكيفي والاريده يجيني
الله ولكم يازمن هالة تركض عالتخفيضات علمود تشتريلها قمص
اني الي جنت ما البس الا ماركة وما اعامل عالسلعة لو تنكلب الدنيا
تعالو شوفوني هسة شلون صايرة ام بيت وحريصة
عا الفلس
بس الحلو بالموضوع امي تكول هسة يالله صرتي مرة حوك سباعية ويعتمد عليج
قبل جنتي فاهية ما تدرين بالدنيا طشت لو رشت

هالة صحيح جانت تحجي وتضحك
بس عيونها جانت تحجي غير شكل
كسرت خاطري صعبة على بنت الدلال
تكون محتاجة
على الاقل اني متعلمة عالماكو ومو كلشي اريده يصير
لزمت كتفها وعصرته
.. لتضوجين حبيبتي الله يعوضكم البركة بأمج واخوج

انتبهت لفاطمة غمزتلي ودارت على هالة
فاطمة .. اكول هالة على طاري اخوج
طلع صدك بقلاوة وهيبة يستاهل تفتخرين بي
الله يحفظه الج
هدى .. اي صدك هالة شصار على سالفة بيت عمج منير وابنه
هالة.. خلي يولون يوم ثاني العركة ماخذ ابنه وشرده
برة العراق

وهو ورة يومي وكع اتخربط بالمستشفى
فاطمة .. اللهم لا شمات بس يستاهل

.. لا وبعد قاسم ضاملهم ضمة بس خلي يصبروله
بس خلي يخلص الشغل المهم الي جوة ايده
وبعدين يتفرغلهم كال وعد علية احاسبهم واحد واحد
عالسوه بأبوية
هسة همة كلهم مصدومين بتصرفات قاسم وقرارته
عمو محمد راح يتخبل من ورة قاسم
فاطمة .. ليش شبي قاسم شسوة هالمرة
.. مسوة شي بس كال انا مو ابوي ومنا ورايح مستحيل اخليهم يتحكمون بينا

هدى .. ليش يحجي هشكل هو هذا اخوج كلشي عنده
عركة

.. لا هدى مو قصة عركة وانما قاسم اخوي يرفض
طاعتهم لان عمو محمد اتعود هو دائما بيده السلطة
ويريد كون قاسم يصير مثل بابا يمشي وراه مثل ذيله
وشنو يكله ينفذ بدون نقاش
علمود يبقى تحت ظلهم

فاطمة .. اي صدك موحلو طبع عمج محمد متشوفين
من كد الطاعة العمياء خلت ابو قاسم يسمع كلامه
ويشارك اخوه وهو مغمض لحد ما انصدم ديسرقون حلاله وتعبه وقاسم كرجال يرفض احد يتحكم بي

.. اي ولكم على طاري التحكم خلي اكللكم قاسم شسوة وية عمو محمد
.. اي شسوة
..اول ايام من بعد وفاة بابا الله يرحمه

جان عمو محمد كل يوم يجينا ويسلم علينا
وينطيني الي ولخواتي كل وحدة مصرفها وينطي لأمي مصرف للبيت

بالحقيقة احنا من بعد وفاة بابا
فلسنا وما ظل الا الشيء القليل نصرف من عنده للبيت
وهالقاسمه الله الي يجيبه قاسم من شغله المجهول

وجان يوصل الحجي لعمو محمد ومن عندها كام كل فترة يجي ينطينا مصرف بين قوسين صار هو الي يصرف على بيتنا

هذا الحجي قاسم ما عنده علم
لان هو ديشتغل بمشروعه وهذا ماخذ كل وقته لدرجة
يطلع
من الفجر مايرجع الا بتالي الليل لا اني ولا امي تعرف شنو نوع شغله بس اسمع يكللها يمة اندعيلي كون يصير البراسي وما تطلعلي عكوسيات وتخرب علية الشغل
وعد علية اذا صار وكبل اوديج للحج

كان قاسم
بكل ضنه امي مدبره امور البيت بالفلوس الي ينطيها الهة

وجان يجي اليوم الي سمع بي قاسم ان عمو محمد ديصرف علينا

وبيومها رجع قاسم للبيت نار كبرة
وعاتب امي وسألها
قاسم..اسألج بالله منو ابو بيتج من بعد ابوي

ام قاسم.. انت يمة ابو بيتي وضوة عيوني
.. لعد شلون انطاج كلبج تهينين ابو بيتج وتقبلين تاخذين
مصرفج من غيري

ليش انا وين رحت مو جاي انطيج مصرف للبيت
ليش اسمع من الناس يكولون الله ينطي عمك
يصرف عليكم

.. يايمة والله والنعم منك ماقصرت ويانة والحمدلله
خيرك مغطيني اني وخواتك
بس هو عمك الي كاعد يفرض علينا ناخذ المصرف منه
شسوي يايمة وانا استحي ارده اكول زحمة

.. لعد هاي خلاص ان جان على عمي فعوفيه علية
وجان يجي عمو محمد للبيت مثل كل مرة
وانطة المرصف لامي بس قاسم

كله.. لا عمي خلي فلوسك بجيبك
الدار الهة راعيها وهو الي يصرف عليها والمسؤل عنها
عمو محمد جاوبه

.. والنعم منك كفو ادري بيك كدها وكدود
بس هذا بيت اخوي وانا مو غريب
ولا تنسى انت بعدك ببداية شغلك ومشروعك بعده
بأوله يعني بعدك حتى ما لحكت تنهض بي

والي عرفته ان انت يادوب تطلع مصرفك
شلون راح تكدر تصرف على امك وخواتك وتبقى محافظ على دلالهم

كله بصوت خشن
.. عمي العيشة كافلها الله وما دامني انا ابو البيت
فاليجري علية يجري عليهم ودلال خواتي انا المسؤل عنه ولو اعرف

احفر بالصخر واجيبلهم اليردونه ولا اخلي كائن من كان يصرف عليهم

تدرون بنات

بوكتها شكد افتخرت ان عندي اخ
عزوة رغم الي هو بي بس يكابر

حسيت بعمو محمد ضاج من كلام قاسم
وسألنا اني وخواتي

.. كال عمو امانة عليكم اذا تحتاجون شي كولو
ماعليكم من اخوكم لا يخوفكم لو يرهبكم
هذا اعرفه راسه يابس راح يعاند ويكابر

كمت اني وكلتله
.. لا عمو احنة نشكرك لان تفكر بينا وشايل همنا
بس لتخاف على قاسم اخوي
هو كد حجايته ما راح يقصر ويانة

ومن يومها اخذت عهد على نفسي كون اسند قاسم اخوي واكوف وياه ضد الزمن

هههههه ما شفتوا اخوي قاسم من سمعني حجيت هشكل
باسني من راسي ويكلي هاي شوكت كبرتي
عبالك اول مرة يشوفني

احم احم واني كعدت ارفع بياختي
هدى.. حلفي كولي والله
يعني معقولة هيج بكل سهولة باسج من راسج
هيج بكل رقة وحنان والله ما اصدك
ولج اخاف ضربج كلة لراسج
وانتي من زود الحماوة ما حسيتي

.. لج العوبة تعبين على اخوي الا اكله هدى تعيب عليك
كمزت من مكاني وكعدت يمها وبست راسها
.. يماااااااي منج يا هالة عابتلج صايرة ولا تتشاقين

فاطمة .. ههههههههه صدك الخوف يعدل الشوف

مرت ثلاث اسابيع وخلصنا الامتحانات النهائية
وبأخر يوم للامتحانات رجعت للبيت متأخرة

لكيت شيماء منتظرتني وصايرة عصبية نار
بعدني مدخلت وهي نزلت علية بالاسئلة والرزايل
.. وين صرتي وليش اتأخرتي والنقال ليش مغلق
وانتي الى متى تبقين هشكل
جانت تحجي بعصبية وما انطتني مجال حتى احجي
كملت كلامها ومحجيت

.. بس اهدي شوية وخليني افهمج اني البارحة مو كلتلج
اليوم راح اطلع وية البنات ورة الدوام لان هالة عازمتنا على عصيغ غمان (عصير رمان )

انتبهت لشيماء عصبيتها جانت زايدة عن اللزوم
انتبهت عليها كعدت عالكرويتة مالت المطبخ وحطت ايدها على وجههة وصارت تبجي بتعب
كعدت يمها وسألتها شبيج شيماء

.........

ورة اسبوع من موقفي اني واشيماء وبعد الي سمعته من شيماء
قررت اروح واتأكد بنفسي من الي كالته
اتصلت على فاطمة وطلبت منها تجي وياي

اجتي وياي ورحنا للمكان الي وصفته شيماء
ويا ريتني لا رحت ولا اتأكدت ولاعتبت ذاك المكان
جنت امشي بالشارع بطريق الرجعة واني بس ابجي منهارة

معقولة الي كاعد يصير بينا
فاطمة.. هسة عىغير تفهمني ست هدى
اجيتي واخذيني وجبتيني لهنا وبعدها خليتي انتظر ساعات ملطوعة وتالي طلعتي تبجين

شكو شصاير جانت فاطمة تحجي واني امشي وتفكيري بغير عالم
سودة علية شومة شكد اتمنيت افرحها بس مع الاسف ما مكتوبلنا نفرح

وصلنا قريب على منطقة فاطمة الي هي نفس منطقتنا القديمة
فاطمة.. هدى مو داحجي وياج ليش متحجين
وصلنا للشارع العام حتى نعبر
وفاطمة لازالت مستمرة تحجي

واني كلبي منا خلصان ومنا هي بس تحجي
عطت بيها واني ابجي

.. لج فاطمة كاااااااافي غحمة(رحمة) على والديج مافي
هي ظلت واكفة بمكانها مصدمة من صياحي بوجهها
واني تركتها وكملت طريقي

ومشت واني عيوني مغوشة من الدموع
ما اسمع الا فاطمة صررخة
بصوت مفزوع التفتت عليها وما احس الاواني

كدام سيارة عالية جاية بتجاهي بكل سرعتها
جانت مجرد لحظة سمعت بيها صوت فرامل السيارة واني انشمرت فوك السيارة مثل العابة
وانضربت بالكاع
شلون وشوكت

ما حسيت الا الظلااااااام ديسحبني لعالم السكون

يتبع

اتمنى لكم قراءة ممتعة
احبكم هواي احبكم كومة اختكم نهى 🌹🌹🌹