أساور الفضة الفصل الخامس والعشرون 25 - بقلم نهى

مساء الانوار عليكم يا احبتي
اشكر لكم متابعتكم لقصة اساور الفضة
وتحية خاصة حارة مني الى صديقتي وملهمتي
الادمن هدى اشكر لها مساندتي ودعمي بكل خطوة من القصة
#huoda_sad

#اساور_الفضة
#نهى_الحسون

شيماء
جنت امشي بممر المستشفى كلبي يريد يطلع من الخوف
اريد بس اوصل واشوف شصار
احس برجلية ثكيلات ومابيهم حيل بعد يحملوني
امشي واسأل عن مكانهم

قبل شوية اتصل علية بابا
واني بالمستشفى

.. لج شيماء لحكي اختج هدى سوت حادث ونقلوها
للمستشفى

عطت مفزوعة .. لا ياربي دخيلك شلون وشوكت
جان صوت ابوية مفزوع
.. هسة ستوهم جابوها للمستشفى وانا ما اعرف شسوي راح اتخبل جابوها غركانة بدمها

كلبي انعصر من سمعت بأسم بنيتي هداوتي مسوية حادث
جنت احجي وية بابا
واني مخبوصة انزع الصدرية البيضة وشمرتها على رباب واني اركض مثل المخبلة

.. عزة بعيني
كلي هسة هي بأي مستشفى نقلوها
.. تعالي بسرعة على نفس المستشفى الي اشتغل بيها
_ ليش شوداها يم بيتنا القديم
_هسه مو وكت سوالفج تعالي بسرعة

وانهى الاتصال
وراح وتركني لوحدي اتصارع وية الخوف
اجتي رباب تركض وراي بهرولة
.. لج شيماء احجي شصاير
جاوبتها بصياح واني خايفة .. لج اختي هدى دعمتها سيارة وهسة هي بالمستشفى وما اعرف شنو وضعها

.. انتظريني اجي وياج ما اكدر اعوفج لوحدج وانتي بهاي الحالة

والله من كد الهلع والخوف حتى ما اعرف شلون وصلت للمستشفى
جنت امشي واني حابسة الانفاس بترقب
ومنتظرة شوكت تنزل رحمة الله علينا

رباب تهدي بية .. شومة حبيبتي على كيفج ان شاء الله ما بيها شي
.. الله يسمع منج

شفت بابا واكف بنهاية الممر وعمو امجد والشرطة واكفين يمهم
يمة اني شفت الشرطة واني اتخبلت
.. عزة بعيني صارت بيها شرطة اكيد حالة اختي خطرة

رحت يمهم واني اباوع للوجوه
شافني عمو امجد واجة علية سألته
.. ها عمو احجيلي اختي شلونها ووينها هسة
.. على كيفج عمو لتخافين ان شاء ما بيها شي
هسة دخلوها هنا
واشر على الغرفة الوراه
ومنتظرين يطلع الدكتور ويفهمنا شبيها

انتبهت على بابا كام يصيح وهد على رجال ضخم واكف كدامه وكله
.. والله اذا صار ببنتي شي بيوتكم اعزلها على روسكم

جان الرجال ناطيني ظهره
ووياه مجموعة رياجيل وكفوا بوجه بابا يهدونه
التفت الرجال يحجي وية البصفه
وصار بوجهي وجان اوكف مصدومة وسألت عمو واني عاقدة حواجبي

.. عمو شنو القضية هذا قاسم ابن جوارينا شنو يسوي هنا وليش بابا يتعارك وياه
جنت احجي واعيوني تدور عالحولي
وجان اشوف مناك على صفحة فاطمة كاعدة تبجي بحظن امها

.. وفاطمة شبسرعة وصللها الخبر

امجد.. والله ياعمو علمي من علمج انا هم ستوني
وصلت للمستشفى

ولكيت ابوج جنه مخبل مجلب بخوانيك هذا الولد
والناس كاعد تفاكك بيهم واختج لحد هسة مشفتها

بس اتوقع هذا الرجال هو الي دعم هدى

لطمت على صدري .. يايمة سودة علية خيتي

تركت عمو ورحت بتجاه فاطمة وامها وابوها
خطية امها شافتني وكامت سلمت علية وحضنتني
واني ما اعرف شبية الدمعة عاندت وياي
مترضى تنزل
وفاطمة اتبعت امها بس حضنتني حيل وتبجي منهارة
اخذتها لحظني جانت ترجف

ما اعرف منو يصبر على منو

حجيت واني اواسيها
.. فاطمة حبيبتي اهدئي ولتبجين ان شاء الله هدوشة مبيها شي
جاوبتني بصوت متقطع

.. شيماء شلون تردين مني اهديء
وواني شفتها كدام عيني
شلون طيرتها السيارة
ملحكت عليها اجيت لكيتها ممددة بالكاع وغركانة بدمها

كلام فاطمة هد حيلي وخمط كلبي بحجيها

بعد السمعته مكدرت ابقى واكفة على طولي جسمي صار كله يرجف

حسيت على ايدين لزمتني وسندتني
باوعت جانت رباب كعدتني عالكرسي
واخذت من ام فاطمة بطل الماي
فتحته وكالت

.. هاج اخذي شربي ماي وجهج انكلب كركم
جانت هاي اخر كلمة اسمعها
بعدها صرت عبالك بعالم ثاني كأنما بداخل قارورة
عازلتني عنهم

حسيت نفسي كجسد يمهم
لكن روحي سافرت لغير
عالم ولغير زمن هنااااااااك واشوف مجموعة بنات صغار كاعدات سوية
اي هياتني اني كاعدة وداير مدايري
خواتي الاربعة
اي هياتها هاي مروة دتدرس مندمجة وية الكتاب

وهاي ضحاوي دتعدل بشعرها وتباوع لروحها بالمراية
وهاي بنية صغيرة بالكماط دترضع حليبها وهي راضية اي هاي مريومة اختي

وهناك بنية صغيرة عيونها عيون الحور
وشعرها الطويل منفوش من دونهم اجتني تشتكي
تبجي مضروبة

هناك واشوف ام فرزدق
لزمت ايدها وكالت خطية هاي البنية يامكثر عثراتها
وظلت تكرر هاي الكلمة
اكثر من مرة
عثراتها .. عثراتها .. عثراتها

لحد ما صرخت بيها حتى تسكت
عطت بصوت رج اركان صدري رج
حسيت على ايدين تهزني حتى اصحى

رمشت عيوني ولكيت نفسي مغمى علية بحضن رباب وام فاطمة دتمسح على وجهي بالماي وتقرة ايات

رباب.. حبيبتي شومة ما اتوقعتج هشكل ضعيفة وبسرعة تنهارين
عود هاي انتي السباعية هشكل سنحتي
علية

حجيت واني اعدل بكعدتي المايلة حطيت شعري ورة اذني بعدته عن وجهي
واسترديت النفس واتماسكت اكثر وسحبت نفس عميق والتفتت على فاطمة وسألتها

.. فاطمة ليش انتي وهدى وين جنتوا حتى اندعمت
كوة كدرت اكمل كلامي

.. اليوم الصبح اتصلت علية هدى وكالت فاطمة اريدج تجين وياي على فد مكان
سألتها على وين
كالت اخذج وبعدين اكلج وين

اجتي علية واخذتني على بناية مشتركة نصها كان مركز تجميل والنص الثاني عيادة الامراض النسائية والحمل والولادة

رحنا كعدنا وهي كالت ابقي هنا
راحت حجت وية السكرتيرة ما اعرف شنو كلتلها
وبعدها اجتي كعدت يمي
سألتها شنو الفلم

كالت .. اريد اراجع الدكتورة عندي شغلة
باوعت عليها ورفعت حاجبي
.. اي من الاول وكولي هيج تريدين تسوين تجميل
شكو مدخلتني بالانذار وكل شوية تجيني حسبة براسي
زين شسوين خشمج حلو وشفايفج متحتاج
مجاوبتني وجانت كلش متوترة

وبعدها انتظرنا ما يقارب الساعتين ننتظر سرانا
شوية السكرتيرة صاحت باسم هدى
وهي كامت واني كمت حتى ادخل وياها باوعتلي
كالت .. لا فاطمة انتي ابقي هنا انتظريني ما راح اتأخر

دخلت للدكتورة لوحدها
وبقيت انتظرها ورة فترة
طلعت هدى ووجها احمر والعيون حمر

بس اشو هاي طلعت من يم الدكتورة منهارة بس تبجي
وتمشي بدون متحس على روحها
مشيت وراها جان المركز مو هواي يبعد عن منطقتنا

حوالي عشر دقايق بالسيارة ظلت تمشي واني اسألها
.. هدى شبيج احجيلي شكو شصاير ليش تبجين
ما ردت علية
اسمعها تحجي وهي بغير عالم وكالت
شكد جنت اتمنى افرح شيماء بس مع الاسف شكل الفرحة ما مكتبوتلنا
مفهمت عليها ووصلنا قريب على منطقتنا وصلنا نعبر الشارعين

واني جنت احجي وياها بس فجاءة هي عاطت بية
بصوت عالي وعيونها غركانة بالدموع
ظليت واكفة بمكاني مصدومة

.. هاي شبيج هدى اتخبلتي
بس شكلها مداتسمعني مشت وكملت طريقها بدون متنتبه
اجيت اموت من الصدمة من شفت
اجتي سيارة سريعة طايرة ودعمتها لهدى

بعدها صار كلشي سريع
التمت الناس وهدى ممدة بالشارع
واني بس اعيط من الخوف

نزل الرجال صاحب السيارة رفعت راسي حتى اشوفه منو حتى احفظ شكله وجان انصدم صدمة عمري من شفته قاسم اخو هالة صديقتنا

شالهة من الكاع وركض بيها صعدها بالسيارة
وركبت وياهم وكم واحد من اهل المنطقة جانوا شاهدين هم اجوي ورانا

ووصلنا على اقرب مستشفى
وبعدها جابوا سدية واخذوها من عنده جانت ملابس قاسم كلها دم

من سمعت كلام فاطمة اجيت اموت بدمي
وسألتها بخوف اريد اتأكد من صحة ظنوني
حجيت بصوت متردد.. شنو اسم المركز الي رحتوا عليه
جاوبتني
.. اسمه مركز ال.......

لطمت على خدي .. لا يا ربي سترك
صخام الصخمني
يايمة اني شسويت بأختي والله جنيت عليها

لو ظالة ساكتة احسنلي هسة شحجاني
شلون نسيت هدى وفضولها

هدى
دكيت الباب واني كلبي يدك يريد يطلع من صدري
اجاني الرد
.. اتفضل ادخل

ما اعرف شصار بية من سمعت صوتها
احس جسمي كله كام يرتعد قويت كلبي ونويت العزم
وفوضت امري لله
فتحت الباب وفتت

جانت كاعدة على كرسي كدام المكتب
لابسة المانتو الابيض الخاص بالدكتورات
وعلى ركبتها ملتفة سماعة الفحص
ولابسة نظارات طبية وشعرها كان لونه عسلي قصير

جانت مدنكة ودتكتب عالورقة
اتقدمت ووكفت كدام المكتب خلصت كتابة ورفعت راسها وهي مبتسمة

وصارت عيني بعينها
جليت صوتي وحجيت
.. احم شلونج دكتوغة مغوة (دكتورة مروة)
اختفت ابتسامتها وعقدت حواجبها
ووكع القلم من بين ايديها
حجت وهي متفاجئة

.. هدى!!!!!!!!!!!!!!
رجعت فتحت حلكها تريد تحجي شي بس شكلها
غيرت رأيها وبطلت تحجي

للحظة شفت مر بعيونها ومضة لهفة على دفو
بس سرعان ما اتلاشت هاي النظرة وحلت محلها اللامبالات
غمضت عيونها وسحبت نفس عميق
وحجت بكل برود

.. انتوا شنو سالفتكم
شكلكم اخذت رجلكم عالعيادة
واتعودتوا كلما تحتاجون شي تجون على مروة
يالله كولي فضيني انتي الثانية شنو تردين

اتفاجئت بردها واسلوبها بالكلام ضربني على وجهي
.. مغوة اني اختج هدى شنو نسيتيني

.. اني ما عندي خوات واذا هسة راح تكعدين تذكريني بالماضي وامنا والعائلة
فمن هسة اكلج لتضيعين وقتج ووقتي
اني حالياً عندي مراجعين دينتظروني

.. مروة ما اتوقعت كلبج هيج قاسي على خواتج
تدغين (تدرين) اني اجيتج اليوم علمود شومة اختي الي كضت
طول هاي المدة تبجي وتسأل عنج
اتمنيت احجي وياج وتسمعيني حتى ينتهي سوء الفهم الي بيناتنا
ونغجع (نرجع)خوات مثل قبل وحدة كلبها على الثانية

.. هدى رحمة على والديج بدون لف ودوران
طلعت من جنطتها رزمت فلوس
وكعدت تحسب بيهم
.. كولي من الاخير شكد محتاجة حتى انطيج وتتيسرين
من كدامي شمرت رزمة الفلوس جانت كلها فئة
٢٥ الحمرة

.. بالله شو اخذي هذولي وشوفيهم يكفونج
لو مثل ابوج جاية وعندج مبلغ محدد ببالج
عقدت حواجبي مستغربة

.. مفتهمت عليج بابا شنو دخله بالموضوع
.. حضرت الوالد المحترم
هو هم جان هنا بمكانج قبل كم يوم
اجاني ووكف نفس هاي وكفتج
وطلب مني اساعده وانطيه كم فلس
علمود يساعدكم بشنو يساعدكم
ما اعرف ولا اريد اعرف

كمية التحقير الي موجودة بكلام مروة
سلبت مني الكلام وخلتني خاوية

حجيت مخذولة وغمضت عيوني بقهر
.. خلي فلوسج عندج اني ممحتاجتهم
ما اجيتج علمود فلوس
وانما اجيت اطالب بأختي مروة حتى ترجع النا
وردت اطمن شيماء وافرحها بشوفتج

بس الظاهر اني رايحة زايدة

ابتسمت.. لا ليش اخذيهم يفيدونج
بلكي تسوين عملية للوحمة
لو انتي جاية علمود هذا الشي بالاساس
تريدين تسوين عملية بالمركز

عادي كولي لتستحين
ترة علمتني الدنيا ان الناس كلها مصالح محد
يسلم على احد اذا ما عنده مصلحة

جانت تحجي ووية كل كلمة تنطقها احس بيها تخترق گلبي مثل السهم

نزلت دموعي وخنكتني العبرة وهزيت راسي مستنكرة
كمية الاحتقار الموجودة بداخل كلامها
همست بصوت متكسر
.. مع الاسف عليج يا بنت امي وابوي
متوقعت هيج كلبج علينا اسود

درت وجهي وطلعت من الغرفة بأسرع ما عندي
داسمع صوتها تنادي علية من بعيد
ودتبجي عقدت حواجبي مستغربة
ليش هي مو قبل شوية طردتني ليش تبجي
ردت اتحرك هاي شنو ليش ما اكدر اتحرك

رجعت اسمع صوتها وهي تبجي تتوسلي
ارجعلها واجاوبها
هاي شبيها هشكل تحجي مفزوعة وخايفة

لحظة اني وين
سحبت نفس عميق وشميت ريحة معقم ديتول
احس اكو شي مقيدني اريد اصرخ بس
ما اكدر شنو ليش مدا يطلع صوتي

بديت اتحرك شوية وعطت بصوت موجوعة
..اااااااخ يمة رجلي
عبست الوجه اريد افتح عيوني عبالك واكعة بحفرة عميقة

رجعت سمعت نفس الصوت المتوسل الخايف
هذا صوت شيماء
اي هاي شيماء مو مروة
لحظة اني شكاعد يصير وياي
استجمعت كل قوتي وبديت افتح عيوني
بالتدريج
كلشي مغوش كدام عيوني كنت اباوع على سقف ابيض
بعدها بدت تتضح عندي الرؤية

انتبهت طل علية من فوك راسي وجه شيماء
مدنكة تباوع علية وهي تبجي وتبتسم
اسمعها تكولي
.. الف الحمدلله على سلامتج هدوشتي
فتحت حلكي اريد احجي
.. اااخ
ليش فكي يوجعني
رجعت احجي بصوت جاف تعبان
.. شومة ماي عفية عطشانة
ماي

انتبهت عليها تحجي وية وحدة بصفها طلبت منها الماي
جابت بطل الماي وقربته من شفايفي وعدلت كعدتي

عطت بصوت مفزوعة من الالم
عزة بعيني اني شبية ليش كلش دا اسوي يوجعني

شيماء.. يالله حبيبتي اتحملي هسة ترتاحين
انطوج ابر مسكنة للالم

اجتي فاطمة وكفت بصف شيماء ويعدها اجتي امها
سمعت فاطمة تحجي وتبجي
.. الحمدلله على سلامتج جنية خوفتيني عليج
اجيت اموت وراج من اندعمتي

هنااااااااااا
اتوقف عندي الزمن واتزاحمت عندي الذاكرة
وصارت تتوالى على افكاري
بمجموعة صور للحادث

خوف رهبة صدمة
هذا كل ما كان يدور بذهني بذيج اللحظة

رجعني صوت شيماء
.. ها حبيبتي هسة تكدرين تساعديني حتى اعدل كعدتج
حتى تشربين الشوربة
وتاخذين العلاج
رفعت السرير من العتلة وصار بوضعية الجلوس
باوعت على رجلية مجبسة

باوعت لشيماء وسألتها
.. شيماء شبيها غجلية (رجلية)
.. شوية كسور من اثر الحادث

رفعت ايدي توجعني
واتحسست وجهي جان مورم

.. اكول شومة وجهي موغم
.. اي اكيد عندج رضوض هوايه من الحادث الحمدلله مو شي اكبر

بدت شومة توكلني ورباب وفاطمة وام فاطمة طلعوا بعدما سلموا علية

عرفت اني وصلت للمستشفى بوفت الظهر
وهسة حاليا الساعة بالتسعة بالليل

.. شومة غجلي (رجلي) اتأذيني
.. هسة بس تاخذين العلاج ترتاحين
كمزت من مكاني على صوت صياح
زلم برة الغرفة بس شكلهم واكفين قريب عالباب

شماء التفتت باوعت عالباب
ورجعت توكلني
.. اوووف الظاهر هاي الطلابة مراح تخلص
.. ليش شصايغ (شصاير) عن يا طلابة دتحجين

.. مو المكرود الي دعمج وكع بأيد ابوج
قبل شوية العصر سمعته اتفق وية الولد وعمو امجد ان ياخذ من الولد مبلغ مالي كتعويض عن الصار

اشو هسة بابا اجاني وانطاني صورة الاشعة وكللهم
غيرت رأئي ما اريد فلوس بنتي كلش متضررة
ورفض يتنازل عن القضية

لحظات دخلت مريم وعمة جنان
جانت مريم تباوع علية بحذر
همست بصوت ناصي يا دوب سمعته
.. الحمدلله على سلامتج هدى

وابتعدت وكعدت يم عمة جنان
شيماء.. عمة شنو هذا الصوت البرة
جنان.. هذولة اهل الولد الدعم اختج اجوي اهله وجماعته
يردون يتفاهمون وية ابوج ويتوصلون لاتفاق
علمود يطلعون ابنهم من السجن
وشكل الولد عنده واحد من اقاربه
مسؤل ورايح للشرطة حتى يطلعون الولد

حسب كلام عمج امجد
كال الضابط المسؤل عن القضية
كله .. سيدي جيتك عالعين والراس. بس انت تعرف الاجراءات القانونية فوق الكل ومنكدر نتلاعب بيها

لو بيدي جان اطلقت سراحه من هاللحظة وخليته يرجع وياك للبيت
بس عندك ابو الضحية كلش معند وميقبل يتنازل
عن القضية

بالحقيقة تكدر تروح لاهل الضحية وتتفاهم وياهم
وتتوصلون الى اتفاق بس بهاي الطريقة تكدر تطلعه

وهسة همة ديحجون وية ابوج
الي معند راسه
بس الظاهر ابوج
ديرسم على ابعيد والله اعلم على شنو ناوي

جانت عمة جنان تحجي وجان بابا يدخل
وصاح لشيماء على صفحة

ما اعرف شنو حجة وياهة وهي
اتسعت عيونها متعجبة

وكالت .. هسة اروح وياك للبيت واريدك تفهمني على شنو ناوي وين تريد توصل

.. ميحتاج تجين وياي للبيت انا اندل المستمسكات
انتي ابقي هنا يم اختج

راح بابا وطلع من الغرفة وشيماء ركضت وراه
تصيح .. لحظة بابا انت شكاعد تسوي بس فهمني

سد الباب والرياجيل واكفين يم باب الغرفة وعمو امجد
خزرها وكللها دخلي فوتي جوة
شيماء بعناد.. ما افوت قبل لا اعرف بابا شراح يسوي

.. انتي لتتدخلين
بهيج امور ابوج هو المسؤل بأتخاذ القرار عنكم
وهو ولي امر اختج
يالله فوتي جوة وسدي الباب

ما اعرف قلق وارتباك شيماء
خوفني.. شيماء شكو شصايغ (شصاير) خوفتيني شبي بابا
.. هيج كلشي مصاير بس اجة سألني عن مكان المستمسكات وراح

يوم ثاني الظهر

شيماء باتت يمي بالمستشفى
وبابا يروح ويرجع لان هو هنا دوامه
واني الحال على ما هو عليه كلش متأذية
وبعدها شيماء طلبت من بابا ياخذها للبيت تجيب الي ملابس وتسوي اكل وترجع

باوعت علية وكالت .. راح اتصل على رباب تجي تكعد يمج
طلعت هي وبابا واني نمت

شيماء
.. بابا اكدر اعرف انت ليش بدلت رأيك بسالفة الاتفاق
وعلى شنو هاي المشاكل

.. سكتي ربج دزلنا بطة تبيض ذهب
عقدت حواجبي
.. شنو قصدك بابا
.. انا اكلج
من صار الحادث وعرفت منو ورة الحادث
ارتاح كلبي جان قاسم ابن ابو قاسم
حيل مخبوص ومعصب
اسمعه يكول لصاحبه البصفه
بدون ميتبهون علية
حلها بأي طريقة اشكد ما يريد انطيه
بس خلي يتنازل لان كلش مو وكتها
ما عندنا وقت وحيل مضنوك

كلت بالبداية اطلب عليهم فلوس والمبلغ الي ببالي
اول شي هديت عليهم معصب وظليت اهدد واحجي
وجماعته كعدوا يهدوني علمود اسكت
وبعدها

جسيت نبضهم وكلتلهم
ينطوني خمسين مليون واتنازل عن القضية
شفته حجة وية صاحبه اتشاوروا وبعدها كلي
.. هذا هو تم تعال ويانة واتنازل عن القضية واحنا نسلمك كلتلهم وشنو يضمنلي تنطويني الفلوس

.. اشكد زحمة من الولد بابا انت شلون تسوي هشكل
مو هذا يصير قرايب خالة ام فرزدق وياما وكفولنا

.. شسوي بالعيب
دسمعي شصار وبعدين كولي عيب
اترخصت منهم وكلتلهم شوية وارجعلكم
رحت اتصلت على ولد اعرفه محامي حتى يفهمني
بالموضوع علمود اعرف شنو الالي وشنو العلية
وبعدها رجعت لكيته واكف هو وصديقه
وجان اسمع صديقه يكله
.. لك قاسم شيريد هذا الرجال انطيه
كلشي ولا تدخل للسجن والله يخرب الاول والتالي وناكل تبن بثنين ايدينا

.. ميكدر يسوي اي شي
هذا مبين عليه راح يسكت بكم فلس ننطيهم اله ويتنازل
بس انت اهدئ ولا تخبصني

..
.. قاسم شلون تريد مني اهدئ والمشروع
الي استلمناه بأسمك مكلفنا اربع مليارات والوفد باجر راح يوصلون احنا بطلاع الروح يالله استلمنا المناقصة
نسيت المنافسين شلون فاتحين حلوكهم علينا ومنتظرين يلزمون علينا اي زلة او ثغرة
حتى يخربون كلشي وياخذونها همة بكل طريقة
ولتنسى اني حطيت كل ما املك بهذا المشروع
وانت همين اشتركت بكل فلوسك وتعبك ورحت رهنت بيت ابوك
بالبنك وسحبت الفلوس وحطيتهم بالمشروع

ثق بالله والله اذا مصارلنا هذا المشروع
فلوسنا كلها تروح بالشط
وساعتها نروح بالرجلين

.. يابة لتخاف قوي كلبك ما راح يصير شي
وهذا انا كدامك لا داخل سجن ولا اي شي

تدرين اجة يوكف كلبي من سمعت بالمبلغ
ولج حتى من اريد الفظه كلبي يوكع بالكاع
وهذا صاحبه كالها بكل سهولة
وانا جايهم مثل الغبي اطالبهم بخمسين مليون
والله ياربي
.. وتالي شنو سويت
.. تالي رحت اتفقت وية صاحبي بقسم الاشعة
ان ينطيني صور اشعة ثانية مال حادث بدرجة اقوى من حادث هدى والله وجان للعصر رتبلي الشغلة كلها على حسب الاصول

لطمت على وجهي .. عزة بعيني وهذا صديقك شلون يوافق على هيج شي حرام عليكم
..

.. اي لعد شلون تردين اطلع حق اختج على كل ً
لتخافين انا هذا صاحبي
اصلا هاي نقطة ببحر بالنسبة للجمايل الي انا مسويها براسه
.. احجيلي وشسويت
اسأله وحاطة كلبي ببيدي

.. رحت عليهم جانوا واكفين همة وضابط من المركز
وكلتلهم يالله خلي نتوكل
وصلنا للمركز وكعدنا
وحجيت وية الضابط المسؤل عن القضية وكلتله
.. انا مستحيل اتنازل عن القضية واطالب
بحق بنتي الي رجليها عابت
وهاك سيدي اتفضل شوف

انتبهت لقاسم صار عصبي وظل يغلط ويسب
ويكول
.. ليش تحجي هشكل احنا مو اتفقنا ننطيك فلوس وانت تجي ويانة للمركز تتنازل

.. شنو بكل عقلك تريدنذ اتنازل ولكم ياناس يا عالم
حاي اكلكم بنتي عابت تعرف شنو عابت
يعني لو فلوس الدنيا بعد ما تسكتني
ما يرضيني الا اشوفه مخيس بالسجن

قاسم كام من مكانه وهد علية ولزمني من ياختي القميص وضربني كلة براسي
الله يلعنه
والضابط عاط بيه وطلب الحرس
وكللهم اخذوه وشمروه بالسجن

اشو هذا ما يحترم واتجاوز
ولا جنك ضابط موجود كدامه

اباوع لصاحب قاسم ظل يتوسل
وبعدها اتصل على عم قاسم
عمه محمد اجة للمركز هو وحمايته
وانا طلعت من المركز كلت خليهم شوية
وابيع عليهم ثكل

.. بس اريد اعرف وين تريد توصل بكل هذا
.. صبري جايج بالحجي
والله وجان يجون عمه محمد وفرزدق
وعمامه كاظم ومنصور
ومجموعة زلم

كلهم جايين يعتذرون عن قاسم لان اتجاوز علية ويبردون كلوب
فرزدق ابو صهيب حجة وياية

وكلي .. ابو شيماء جاييك نطالبك بحق الجيرة
وان شاء الله احنا مثل الاهل
كل الي نريده منك بس تسوي تنازل عن القضية
وان شاء الله نعوضك على خسارتك وخسارة بنتك
وعسى ما اسفرها للخارج واعالجها
وارجعها مثل الاول واحسن بعد

مو حلوة بحقك ولا بحقنا نتعارك بيناتنا
انا كلتله
.. اسألك بالله هاي لو وحدة من بناتك
ويصير وياها هشكل وتعيب رجلها ومو بس هيج

تدري قبل يومين اجوها ناس اتقدمولها علمود يخطبونها مني
وهسه من عرفوا بيها مسوية حادث ورجلها انعابت
ردولي الخبر وكالوا. خطبنا لابنا

يعني تعرف شنو معناها
معناها بنتي انكسر بختها وبعد ماعادت تصلح للزواج

انتبهت لعمه محمد حجة وهو معصب
.. والطلوب من هذا كلامك شنو
كلتله
.. والله انا ما اتنازل عن القضية الا بحالة وحده
.. شنو هي

.. ابنكم بتزوج بنتي مثلما دعمها وعابها وكسر بختها
يتزوج ويستر عليها
لان انا رجال ما عندي خلفة ولد ولا دايم لبناتي
جنت اتعشم ازوجهن وارتاح تالي طلعلي هذا ابنك وخرب علية الاول والتالي

فرزدق كال.. ما طلبت غير حقك نسأل الولد ونشوف شنو يكول

بس عمه محمد حجة بعصبية
.. طبعا لا ميوافق وين كاعدين عسى ما يبقى بالسجن وينحكم ولا يتزوج بنت هذا ويناسبه

جان يحجي بتكبر
جاوبته وانا مسيطر
.. على كلٍ روحوا سألوا صاحب الشأن واخذوا رأيه بالموضوع وتعالو لي
والله وداعتج ما طولوا غير بس ساعتين
جان يجوني مرة ثانية فرزدق ابو صهيب وعمه كاظم

وكالو .. قاسم وافق ويكول خلي يجي يتنازل
كلتلهم لا انا مو غبي لهاي الدرجة

ما اتنازل قبل ما يعقد على بنتي
هد علية عمه وفرزدق لزمه
وكله .. كول يا الله احنا ما عولنا نهدي قاسم ونقنعه
تجي انت تزيد الطين بلة
كاظم.. ما جاي تشوفه شلون يدوس بالمصارين

.. حقه الرجال انت ليش ضايج هو اول وتالي قاسم
راح يعقد على بنته هسة او بعدين شنو الفرق

الي افتهمتها من هدة كاظم ان همة ناوين
يسكتوني بالكلام ومن يطلع ابنهم تالي
يظلون يماطلون بالاتفاق لحد ما اوافق على شروطهم وانا الممنون

شهكت ولطمت على صدري .. عزة بعيني بابا لا تكولها
.. اي بابا وداعتج طلعت حق اختج من حلك السبع
وتالي. رحت وياهم للمركز وطلبت يجيبون السيد هناك كدام الضابط

كلتله .. سيدي انا رجال وحداني ومالي ظهر اخاف اتنازل عن القضية ويروح حق بنتي
وتالي يستضعفوني ويكسرون كلمتهم

اباوع لعمه محمد عصب ووصل حده
الضابط كال
.. جيبوا قاسم
شوية ودخلوه علينا
اباوع عليه بوية يخوف
عيونه نار وراص على اسنانه يتمنى يهد علية ياكلني
بسنونه

كعد كدامي وحجة وياه الضابط وكله
.. استاذ قاسم رجاءا اتوصلوا لحل هنا وكدامي
بدون مشاكل
التفت عالضابط
.. هاي هي خلاص هو مو كال اعقد على بنته
جيبوا السيد خلي يعقدلنا
سمعت عمه محمد حجة معترض

.. مستحيل قاسم
ترة انت ممجبور تتزوج بنته بهاي الطريقة
هذا ديستغل الوضع

باوع لعمه وجر حسرة
.. عمي التأخير مو لصالحي ضروري اطلع من السجن
كلش مو وكتها كعدتي هنا

حان يحجي وعيونه ترشك سهام بتجاهي
انعل ابو شكله
زوعني العافية خرب يومه

وبعدها جابوا السيد حتى يعقد
بس مو هنا الحجي
المصيبة من انطيتهم رقم المؤخر خليت قاسم
يكلب الميز الكدامه وظل يغلط ويسب بكل غضب

وانا جنت حاط كلبي بشيشة من وراه
كلت هذا ما راح يوافق لان مبلغ المؤخر يكسر الظهر

تالي صاحبه شاوره ومدري شنو كله
رجع كعد وهو يتنفس بغضب
كال للسيد
اتفضل مولانا شوف شغلك
انا حطيت المقدم مبلغ عادي
بس المؤخر حطيت هذا الرقم حتى اضمن ما يكدر

يطلكها بعدما يطلع من السجن جنت محسب حساب لكلشي والله ينطي
صديقي المحامي هواي ساعدني بهاي الشغلة
لان مثلما تعرفين انا اجهل الامور القانونية

اباوع على بابا واني مصدومة معقولة
.. يعني هسة شنو انت بهذا كلامج جاي تكلي
اليوم زوجت هدى

.. اي والحمدلله
ظليت ادك والطم على حظ اختي

.. بابا انت صدك دتحجي معقوله اكو اب يسوي ببنته هيج
شلون هانت عليك هدى بنتك من لحمك ودمك
.. بالعكس هي الوحيدة من عندكم جنت شايل همها
متتزوج خصوصاً من بعد سالفة خطوبتها الي فشلت بسبب وحمتها

لتنسين ترة اختج معيوبة من كاعها ومحد راح يرضى يتزوجها
وهذا الله دزه النة وانا مو غبي حتى اعوف هيج فرصة تروح من بين ايدية

ضربت عصفورين بحجر واحد هم ضامن رجال لاختج
وهم هو عنده خير من الله على كلبه

هدى
اليوم الثالث الي بالمستشفى
شوية بدة الالم يخف
والحمدلله بهاي الفترة اتعرفت على مرية تشتغل منظفة بالمستشفى

احس بيها حيل تعبانة بس تريد تعيش
من حجتلي عن حياتها وحياة عائلتها
حمدت الله الف مرة على نعمته
عرفت حالي احسن من هواي ناس
جنت متمددة ورافعين رجلي وشيماء جانت ترتب بالسرير

وهي عاقدة الحواجب وصارلها يومين شكلها معاجبني
كوة تحجي وياي ادري بيها زعلانة مني لان رحت لمروة من وراها
_هاي ثاني مرة تسوين الي براسج
مو كل الي تفكرين بي انتي هو صح
بعدين من تطيبين نحجي بهذا الموضوع

دخل عمو امجد ووياه ضحى
وسليمة

و ضحى بس دخلت رفعت البركع
واقتربت علية وحضنتني وهي تبجي مفرفحة
.. عمت عيني عليج هدى حبيبتي شصاير بيج

ابتسمت اطمنها .. اسم الله عليج لتبجين تغة (ترة)هادي بعده
يزهوا بالنصغ (بالنصر)
هي شوية كسوغ على غضوض (كسور على رضوض)
ترة بعدني مامتت كاعدة على كلبج
ووفغي (وفري) دموعج لفاتحتي ليش من هسة مسبكة

.. اسم الله عليج لتكولين هشكل ان شاء الله اليكرهونج

وعلى طاري اليكرهوني

سليمة.. ها ولج شفتي الله شسوة بيج هذا كله من ورة السانج المكطم
والله حيرتينا وياج كضيتي طول عمرج الله كالبج من دون امة محمد
هسة ما نعرف نكلج الحمد لله على سلامتج لو نكلج مبروك
عقدت حواجبي
.. ما افتهمت شنو قصدج

يتبع

احبكم هواي احبكم كومة🌹♥️🌹♥️☺️
اختكم نهى