أساور الفضة الفصل السادس وثلاثون 36 - بقلم نهى

مساء الخير والنصر عليكم يا احبتي

#اساور_الفضة_ج٢
#نهى_الحسون

شيماء
رجعت كلش ضايجة لان الخبيث رفض ينطيني اجازة
شفت رباب

رباب.. ها بشري اخذتي اجازة
.. لا عاند وياي وكلي اخذت استحقاقي من الاجازات
واتعديت المسموح

.. يااا شوف الحظ شلون بالله وهدى خطية منو راح
يكمل تجهيزها
.. ما اعرف كلت اعتمد عليج
تاخذيها
بين ما جنا نحجي دخلت علينا السستر ام احمد
وسلمتني الورقة وكالت
.. هاي ورقة الاجازة دزها الج فرات
فتحتها وجان اشوفه موقعلي على ٣ ايام اجازة

اتفاجئت بالحقيقة مجنت متوقعة واحد بالمية
يوافق لا وبعد يرسلها الي
رباب.. الحمد لله ربي حنن كلبه عليج

.. اي يمكن لازم اروح اتشكر منه
بس لحظة هو شغير رأيه جان كلش
معند ورافض ينطيني اجازة

اتسعت عيوني .. لج رباب هذا يمكن حيدر اتدخل هالمرة وخلاه
يوافق عالاجازة لا مستحيل
اذا صدك مسوي هيج راح يجيب لي حجاية

اكيد فرات راح يكعد يسال شنو علاقة حيدر بشيماء علمود يتوسطلها

رباب.. شوف حظي الناس وين وهاي دايخة
بفرات راح ياخذ عليها نظرة

لج عوبة انا لو منج هسة اكوم اركص من الفرحة
.. وليش اركص

.. لان صارت الامور واضحة وضوح الشمس حيدر
معجب بشيماء

المفروض هسة انتي تكومين ترحين تتشكرين من عنده
عالسواه

شيماء.. لج لا بطلت من ورة الصار بذاك اليوم بعد حرمت احجي وياه او احط عيني بعينه

.. ليش ولج شسويتي
.. شنو نسيتي انتي مو كلتيلي روحي اعتذري منه عالصار بيوم الحادث وفهمي موقفج واتشكري منه عالسواه

.. اي صدك وشصار
سولفت لرباب عن موقف الاحراج الصار بيني وبين حيدر بذاك اليوم

رباب .. عزة بعينج لاتكولين سمع هذا كلامج كله
شيماء .. وداعتج سمعه كله
.. عزة وشنو كلج
.. كال
معقولة كل هاي الصفات الي ذكرتيها بية

بس انا شيماء اعجبج
هو بشنو احسن مني منو انطاه الحق يتعامل وياي
يتكبر ويستصغرني

.. اهوووو انتي شنو من مصيبة كلبتي السالفة كلاب
يعني من ظالم الى مظلوم والله انتي كارثة دكملي وشسويتي بعدين شلون لحمتي السالفة وطلعتي روحج من هذا الموقف

التفت عليه واني محرجة لان سمع كلامي عليه بس ما متندمة على اي كلمة كلتها عليه

وبلحظتها هو باوع علية
ورفع حاجبه بتحدي وكان واقف بكل ثقة ينتظر مني اعتذر منه عالصار بس جوابي سحب البساط من تحته

.. اي انت صدك اناني وواحد شايف نفسه وضيف عليهم انت ما تعرف الاحترام
اتسعت عيونه واشر على نفسه.. انا ما احترم شلون بالله
فهميني شوكت انا قللت وياج الاحترام

.. والله بهذا تصرفك وياي جان اكبر اهانة بحقي
كتف ايديه .. اي بالله كملي

.. حضرتك كلت انتظريني دقيقة اكمل اتصالي
واني بقيت واكفة انتظرك تكمل كلامك بالنقال حتى احجي وياك
وانت شكلك نسيت امري وطولت بالمكالمة

والاقوى منها من اجتي الدكتورة رسل وحجت وياك
اباوع عليك بسرعة نهيت الاتصال وكعدت تحجي وياها
واني واكفة ملطوعة حتى مكلفت نفسك تعتذر

ولو انت حقك اكيد الدكتورة اولى بالاحترام من الممرضة
بس بالاخير اني ابقى بشر حالي حالكم وعندي كرامتي

على كلٍ هذا مو موضوعنا
اني طلبت احجي وياك علمود اعتذر منك عالصار بذاك اليوم
جنت احجي وياه بغضب اعمى
وهو واكف يباوع علية متعجب
قطع كلامي وحجة بغيض
.. اوكفي لحظة انتي منو انطاج الحق تنسبين الي كلام انا ما حاجيه

شوفي سمعيني زين مو انا الي اعامل الناس بمراكزهم
ترة اخر همي اكعد ادور عالشكليات

صدكي ما يفرق عندي شي سواء كنتي ممرضة لو دكتورة

و بما ان انتي عقلج مريض وترجمين المواقف على مزاجج
فخلي اكسب بيج اجر و افهمج
ترة اني من نهيت الاتصال بسرعة وحجيت وية الدكتورة رسل
جانت غايتي ان اصرف الدكتورة واتفرغلج
لان انا اعرف الموضوع الي رايدتني بي راح يسببلج الاحراج وما تكدرين تحجينه كدام الدكتورة رسل

فتحت حلكي مصدومة.. وانت شلون عرفت الموضوع الي اني جاية عليه

.. ترة واضحة ما يحتاجلها علم اني وياج ما بينا
شي غير بس موضوع.ذاك اليوم والتهديد

وانتي من اجيتي وحجيتي وياي جنتي كلش مرتبكة ومترددة فمو شي صعب اخمن الموضوع
الجاية عليه

.. ست شيماء اتوقع احنا كبار مو صغار حتى
نكعد نترجم تصرفات المقابل على هوانا

اولا انا ما عندي عداوة وياج او اي مشكلة حتى انتي
تفهمين موقفي وياج كأهانة
ترة مو حلوة كلما التقي بيج لازم
تصير مشكلة وسوء فهم
بحيث صرت كلما اشوفج احضر نفسي للهجوم

دنكت راسي مستحية من كلامه وحجيت
محرجة
.. اتوقع بعد الي صار فقدت حقي بالاعتذار
لان هواي اتعديت حدودي وياك

بس اوعدك منا ورايح مراح تسمع مني اي شي
واحاول ما اخلي طرقنا تلتقي
لان الظاهر اني صرت مصدر ازعاج لحضرتك
واشوف من حقك تحجي هيج لان فعلا المواقف كلها تشهد على هذا الشي

كملت كلامي وطلعت بدون ما انتظره يحجي

يعني اتخيلي مثل كل مرة انحط بموقف وياه اضرب من الي قبله
يعني جان يحاول يجنبني الاحراج
واني مثل كل مرة اجيت ونسفت كلشي بوجهه
رباب.. يابة انتي صدك مخبلة
هسة عوفج من هذا الحجي الي صار
صار تركي وراج
واحجيلي عن معنويات هدى بهاي الايام

شيماء.. اووف يارباب هدى كاسرة خاطري
خطية حتى بزواجها مو مثل البنات

اكلج رباب عفية قبل لا اروح اكمل شغلي
مو تنسين هاي الايام اريدج تفرغين نفسج
وتعاونيني
رباب.. ما يحتاج توصين حريص انا برسم الخدمة

.. يابعد عمري ان اشاء الله اردها الج بعرسج
رفعت ايدها للسما
.. اللهم امين

ربي يسمع منج واعرس شكلي خمرت على كلب اهلي
واحتمال راح يطلعوني من البيت جلاليق
خصوصا امي احس بيها كاعدة على اعصابها
تريد اليوم قبل باجر تزوجني

.. الله يخليها الج امج معذورة كلب والدة ما عليها عتب

طلعنا اني ورباب ورحنا
حتى نقبض الراتب ونوقع عليه بالاستلام
جنا دنمشي وصادفنا حيدر ديمشي بأتجاهنا بالممر
وشايل بيده نفس الجهاز

رباب شافته ولكزتني وحجت
سمعيني زين الله جابه بطريقنا اتشكري من عنده
زحمة مو مال تغلسين عليه

هي تحجي واني كلبي كالعادة فقد السيطرة على دكاته
بلعت ريكي وكوة كدرت اطلع الصوت
اوقفه .. استاذ حيدر لحظة

اتوقف وباوع علية جانت نظرته لا ابالي
شكله بعده زعلان
ما انطيته مجال يحجي كبل كلت
.. استاذ حيدر حبيت اشكرك بخصوص موضوع الاجازة

باوع علية وكال .. العفوا عن اي اجازة دتحجين
رمشت بعيوني .. الاجازة الي رفض ينطيها الي فوات
مو كدامك صار الموقف

.. لحظة وانا بصفتي شنو اتدخل واطلبلج اجازة
ما تشوفين شوية الموضوع واكف

يمة هو كال هيج وانا اتمنيت اختفي من كدامه
يا الله ليش اني من دون الكل انحط بهيج موقف
انبلع الساني صدك فشلة والله صارت الدمعة بطرف عيني ادري شنو كصتي اتعودت عالقصف

رباب.. العفوا استاذ حيدر
وكفاتك السابقة ويانا خلتنا نخمن ان انت ورة الاجازة
مو جديدة عليك انت صاحب نخوة
بس اني من يمي كلت لشيماء تشكرك

ما اعرف جانت رباب تحجي وهو يباوع علية وانا دموعي كامت تلمع بعيوني
جاوبها وعيونه ما فارقت وجهي
.. لا عادي مصار شي اتعودت على سوء الفهم وية
شيماء مو شي جديد

رصيت اسناني ولزمت ايد رباب وحجيت واني اباوع عليه .. اخذ راحتك استاذ احنا نترخص منك

مشيت وسحبت رباب وراي جانت تمشي وتضحك
على منظري
وصلت لمكتب فرات ودكيت الباب ودخلت

جان يكتب رفع راسه وشافني
.. ها شيماء وصلتج ورقة الاجازة
.. اي وصلت واني جاية اشكرك
بس ما كلت شنو الي غير رأيك

ضحك بكل ثقة وكال
.. وداعتج وصلتني اوامر من الجهات العليا

اكول طلعتي مو هينة ماجنت اعرف ان انتي وراج ظهر قوي
دك نقاله شوية وكام من مكانه وشال الفايل الي كدامه
واشرلنا بحركة سلام سريعة وتركنا وطلع
عقدت حواجبي مستغربة
وصرنا اني ورباب وحدة تباوع بوجه الثانية
اذا مو حيدر ورة الاجازة. لعد منو
............

هدى
مرت الايام وانا اتكلب ما بين خوف وحيرة وضياع
وقرب موعد العرس
وشيماء وفاطمة صديقتي ورباب وخوات قاسم
الكل اتعاون على تجهيزي للعرس

صرت مثل اللعابة اتنقل من ايد لأيد
كل يوم طالعة وية مجموعة جانت فاطمة وامها ملجئي
الوحيد بهاي الهوسة كلها

جنت ادبر الحجج حتى اتهرب من خبصة تجهيزات العرس
واروح يم فاطمة وامها

وشيماء جانت تعرف بخوفي لذلك تسمحلي
اروح يمهم بعز الهوسة
مثل الي تنطيني فرصة اخذ نفس للسكينة

بس مع الاسف شارفت ايام الحرية على الانتهاء
وباجر الحنة مالتي وعكبة العرس
وهسة اني بنص الهوسة

وسليمة الي جانت مثل البومة تحوم فرك راسي تزيد من مخاوفي
وبابا ولا عبالك بنته راح تتزوج ولا كلف نفسه يسألني شنو احتاج

وضحى اليوم جابها سيف من الصبح
خطية جانت كلش متغيرة وضعفانة ووجها اصفر
عبالك صارلنا سنة ما شايفيها مو اسبوع من رجعت

رباب .. اكول ست هدى لاتكعدين تخلصيها علينا صفنات وداعتج اول وتالي وراج
فاحسنلج سلمي روحج الي

باوعت لشيماء اترجاها
.. عفية شيماء يعني الا اسوي شيغة ( شيرة ) لجسمي والله اتخبل منها اتأذة

شلون ياربي يعني منو كال الزواج حلو
رباب.. احجي عن نفسج لا تجمعين اني عني انتظر اليوم قبل باجر اتزوج

شيماء.. يالله هدى بلا دلع خلي رباب تنضف جسمج
ترة ورانا كومة شغل حتى نودي الجنط لبيت قاسم
ونرتبهم وعمو امجد اتصل علية
حتى يتأكد من وجودنا بالبيت
كال انتظروني مو تطلعون اريد احجي وياكم

استسلمت للامر وكعد جوة ايد رباب
وصرت اتصارع وياها لحد ما خلصتني

كمت من جوة ايدها وباوع لروحي بالمراية
.. عززة والله جني دجاجة منتفين ريشها

رباب.. لا خية جنج باجة مصلوخة ههههههه
ضحى جانت تصفط ملابسي بالجنط
وتباوع علينا وتضحك

ورة ساعتين اجة عمو امجد جان محمل
علاليك وغراض
سليمة تفتح بالعلاليك
.. يايمة امجد الله يفتحها بوجهك ليش هيج مكاف نفسك
بس ما كلت هذولي شنو والمن

امجد.. يمة هذني بدلات وشغلات للبنات علمود حلفة الحنة
كلت اسوي باجر حفلة حنة بسيطة لهدى ببيتي
حتى تاخذ راحتها وية صديقاتها

شيماء بفرحة ممزوجة بالامتنان
.. والله ياعمو لساني يعجز عن الشكر ما نعرف شلون نجازيك افضالك مغركتنا

امجد.. شنوالسالفة عمو انتوا مثل بناتي وهذا واجبي
سليمة بعدما شافت كل الغراض

عفست وجها وكالت
..يمة شنو السالفة هذني الغراض كلهن للبنات اشو انا مالي اي اشي بيهن
ليش ما ذكرتني بفد دشداشة تفرحني بيها
ولك انا مو امك

امجد.. عذريني والله يمة نسيت تعرفين هنة غراض
هواي وما فرغت اشتريلج شي ولا يهمج
اوعدج باجر اشتريلج احلى دشداشة
اهم شي لا تزعلين علينا

طلعنا الفساتين واني اتشكرت من عمو. والتفتت عالبنات احجي وياهم

.. ياربي والله عمو امجد اجة بوكته ما تدرون شلون جنت شايلة هم للحنة وتكاليفها ووين اسويها
خصوصاً من كالت هالة حضري روحج بليلة الحنة
نجي احنة وقاسم نحنيج

جنت دايخة وين اخليهم والبيت صغير
بس ربج ما ينسى عبده

طلعنا الفساتين وكعدنا نلبس بيهم
ونستعرض
ضحى.. والله عمو امجد طلع مو هين وذواق شوفي الفساتين
شلون جايات فيت بالقياس وموديلهم كلش حلو
شيماء.. اني عني هاي البدلة ما البيها بالحنة راح اخليها للعرس لان العرس بالقاعة وناسهم هواي وواصلين

رباب.. اي والله صدك كلامج هاي البدلة راقية حرامات تضيعيها بحفلة بيت

وكعدنا نتناقش وتالي عدة الوقت والبنات راحو
يرتبون الملابس ببيت قاسم
واني وصحى بقينا هنا بالبيت

وجان ضحى تفتح وياي اصعب موضوع بحياتي
جنت كلش محرجة اسأل عن هيج مواضيع
ضحى.. هدهد ادري بيج مستحية تحجين بس لازم
اني افهمج على ليلة العرس
وشنو المطلوب منج تسوين بهيج لحظة

وصارت صحى تشرحلي على ليلة العرس

واني كل شوية اكمز من مكاني اريد انهزم وهي
ترجع تلزمني وتكعدني يمها

.. لج عززززززة شنو هذا الحجي والله ما اتزوج
بالله شو عوفي ايدي ما اريد اسمع لا تكملين

ضحى تضحك.. لج تعالي بعدني ما مخلصة كلامي
بعدنا بالبداية
طفرت من مكاني مرت اللخ
.. عاااا هاي البداية لعد النهاية شنو

ضحى.. اني اكلج بالنهاية انتي تصيرين حبابة
ومطيعة وتسمعين كلام قاسم
شنو يكلج انتي كولي تم حتى ما تتأذين

حطيت ايدية على اذاناتي رافضة اسمعها
.. لا ضحى عفية كافي والله لو باقية على عمى وجهي احسنلي

لكن ضحى بقت مصممة ان تفهمني على هذا اليوم
لاخر فقرة

منا على ما خلصت انا جنت شبه هدى
حسيت بأي لحظة اتخربط اوكع من الخوف

اني مو جاهلة وعندي معلومات عن هاي المواضيع
بس كلام ضحى عن هذا الشي زيد مخاوفي
طبعا من ناحية التقاليد وشنو المفروض يصير
جان الخوف ماخذ كل فكري لدرجة ما كدرت انام وظليت بس اتكلب وبليلتها كمت من الفراش
رحت اتوضيت وصليت
واندعيت ربي ييسرلي اموري
.............................................................

مناجاة هدى في جوف الليل

الهي مولاي
في دجى الليل والناس نيام وانت حي قيوم لاتاخذك سنة ولانوم
يا اله الكون يارب الانام قد وكلت اليك امري وانت حسبي
كلما ضاقت بي نفسي ..واستبد الخوف بقلبي كأنه يحمل ثقلاً وحجرا كبيرا
ولفني ليلي وحزني .. اجد بابك يفيض رحمةً، ونوراً عنده استكين
على اعتابه اجلس اذرف دمعي فاجد السكينة قد حلت في روحي
الهي انت اعلم بحالي مني
في قلبي يقين انك تراني وتسمع كلامي ودعائي
وانت العالم مافي السرائر تعلم مافي نفسي من خوف وحيرة
خائفة مولاي وبك استجير من خوفي
اتمم علي نعمتك مولاي واغمرني برحمة منك واسنرني بسترك يارب

يارب يامنقذي حين اذكرك من كل الشدائد
يا الله يا مالك الملك يارب يا صمد ياواحد
عليك توكلت مولاي نعم المعين المساعد
هون يا مهون ما اعاني من خوف واكابد
انت العالم بحالي يالله وعلى همي شاهد
جئت بابك قاصدة يامن اليك الامر عائد
استرني بسترك وامنع عني كيد كل كائد

بقلم هدى سعد #Hoda
.........................................................
يوم ثاني
هو يوم الحنة خلص ما بين ركض وصالون
بحيث ما فرغت احك راسي
للعصر رجعت من الصالون جنت لابسة بدلة. قصيرة
قالب مفصلة عالجسم وجانت دلعة الصدر
تبدي من الاكتاف جانت كلش حلوة علية

وبلشت الحفلة ببيت عمو امجد وعزمت كل صديقاتي وشيماء وضحى ومريم خطية اتولو مهمة التقديم والمعازيم

جانت حفلة كلش حلوة شكد جنت خايفة
بس اشو اني سمعت صوت الديجي وشغلو اغنية واني
نسيت نفسي وانطلقت بالركص وية صديقاتي

وكلهن على فد كلمة الله يساعد كلبك يا قاسم
ههههه ما يدرون بقاسم اخر ما يفكر بيه هو هدى
(خلها سكتة يالفتة )

شيماء تباوع علية وتخزرني وكل شوية تجي علية
وتحجي بصوت ناصي
.. هدى عيب كعدي هسة شيكولون عليج

.. بعد شيكولون علية عغوس وفغحانة باجغ عغسها (عروس وفرحانه باجر عرسها )
يعني بذمتج انا مو اولى من الغغيب اغكص بعغسي (الغريب اركص بعرسي)

شيماء .. والله انتي مخبلة وراح تطلعين كرون لقاسم
.. هي هاي العايزة يطلعون كغون (كرون) لقاسم حتى ينطحني بيها مثل الثوغ (الثور)

شيماء كوة لازمة نفسها لاتضحك
ولليل وجان ام قاسم تتصل على شيماء وكالت راح نجي
نحني العروسة
هو اني سمعت بيهم راح يجون
وجان تتبخر وتختفي ضحكتي
وحلت محلها الخوف والقلق والتوتر

رباب .. ههههههه ها هدى اشو صرتي فقيرة
هسة الي يشوف وجهج ما يصدك جنتي قبل شوية
تكمزين بنص الصالة جنج جني

جانت تحجي وفجاءة سمعنا اصوات الهلاهل
واصوات الرياجيل والشباب والهوسات
دخلت ام قاسم والبنات

وبعدهم دخل قاسم جان لابس دشداشة بيضة
فات من الباب احس الباب مالتننة صار صغير
مدري طول قاسم صغر الباب بعيني

اباوع لعيون صديقاتي شلون فصلوا الرجال تفصال
هههههه وكل وحدة تتمنى تصير بمكاني
والله لو يعرفون اني اتمنى مكانهم جان كالوا علية
مخبلة بس اليدري يدري والما يدري
عود كولولة ........

انتبهت على قاسم باوع علية وخزرني
كعد يمي وسلم علية وباركلي
عبالك واحد حافظ هاي الكلمتين حتى يكولهن الي

اجتي هالة.. ها ولج هدى البنات يكولن هدى ذبت لحم
بالركص عوبة غير تنتظريني

يمة هي كالت هيج وجان قاسم باوع علية
وهمس يم اذني يتوعد
هو غير اجة كلبي يوكف من همس يم اذني

كال .. وروح ابوي اذا مرة ثانية اسمع بيج راكصة كدام وحدة شايفة هاي رجليج العارضتهم الا اكسرهم
الج واخليج تبطلين ركص

جان يحجي ويباوع عالسيقان
عفست الوجه وجاوبته
.. هذا هو صاغ بعد ما اغكص
(هذا هو صار بعد ما اركص )

رجع عدل كعدته ويوزع ابتسامات
مبين عليه ديجامل
ورجع باوع علية يتفحص شكلي وجسمي
ما اعرف ليش هومن يباوع علية اني بطني تنمغص
واكعد اترقب هجوم هرقل بأي لحظة

واجتي امه شايلة طاست حنة

وحطينا الحنا
شوية وسمعت نقاله دك ورد عالمتصل
جان يحجي ويعتب لفت انتباهي
اسم رائد اجة كلبي يطلع من مكانه
اسمعه يكله
.. رائد اليوم بالحنة مكانك خالي يالضلع
ورة فترة خلص المكالمة
باوع علية وعيونه تلمع

.. هدى لو اكلج منو جان يحجي وياي راح تتفاجئين

هو يحجي واني كلبي ينقبض وية كل كلمة ينطقها
.. تتذكرين رائد ابن المختار الي جانوا جوارينكم ببيتكم القديم

هزيت راسي بيأس والعبرة خانكتني
.. اي اتذكغه شبي
.. انا متأكد اذا شافج والله راح يخرب من الضحك من يتذكر شلون جنا نصنف عليج

وام قاسم جانت كاعدة يمنة وتسمع
كالت.. كوله امي زعلانة عليك ليش ما اجة للحنة عود هذا انت صديق العمر شلون ما تحضر بهذا اليوم

قاسم.. لا حجية رائد معذور خطية هو مسافر بس كال طيارتي باجر بس اوصل كبل تلكاني كدامك

بعد السمعته ما اعرف شلون خلصت الحنة
بس كل الي اعرفه اني دا اصارع علمود ابقى متماسكة وما انهار

هالة
اليوم بيتنا خبصة اليوم العرس وخواتي تركوا جهالهم هنا وراحو للصالون
وامي مكعدتنا
اليوم من الصبح مدخلتنا بالانذار
وخطية ام فرزدق اجتي من وكت حتى تساعد امي
وكم وحدة من الجارات اجوي هماتين
احنا متعودين بكل المناسبات الجوارين يساعدونا

وامي وما ادراك ما امي
اليوم عرس الغالي والدنيا ما سايعتها من الفرحة
دخل هشام للمطبخ جان لابس دشداشة لونها ابيض
مشنف ردانها
هشام.. يمة رحمة على والديج انطيني الجدورة ذبحوا
الخرفان ويحتاجون جدر جبير
باوعت عليه جان شعره مهوس

ام قاسم .. يمة هشام على كيفك لا تأذي رجلك ترة جرحك بعده ما برة
خلي الولد همة يشيلون الجدورة

هشام.. شنو السالفة يمة ترة هو كله خلك جرح
وانا الكدامج رجال طول بعرض مو بزر نستلة وخايفة عليه
هالة.. يمة اشو من كعدتيني الصبح وكربتيني بالبيت ما كلتي هاي بنتي خطية
راح ينكسر ظهرها بالشغل
لو هذا ابنج وانا بنت البطة السودة

هشام.. قل اعوذ برب الفلق
اشتغلت هالة وغيرتها

راح يم امي واخذها لحضنه وباسها من راسها وهو الله يحفظه طويل بحيث امي ضاعت بحضنه

ام قاسم.. يمة هشومي
وداعتي عليك لا تعب نفسك ولاتخلي بالي يمك

هشام.. لا يمة عذريني اليوم حنة الغالي
لا تطلبين مني اكعد
ام فرزدق.. حبيبة ام قاسم عوفي الولد فرحان بعرس اخوه
هشام يضحك .. اليوم الا اخلي الناس تضرب بعرسه المثل

وعلى طاري الغالي دخل قاسم من الباب وجان
هو الثاني هم لابس دشداشة سودة
حاضنة اكتافه جانت جاية عليه تفصال

وام فرزدق اول مشافته دخل للمطبخ
وهي كامت تهوس وتهلهل
.. كلللللللللووووووش مبارك عرسك يالهيبة

كابلتها ام قاسم تصفك والضحكة مالية الوجه
.. عرس قسام هيل وطش بالولاية. عرس قسام

وانا وهشام ركضنا وكفنا يمهم كمنا نردح
نقلد عليهن ونضحك
ام قاسم التفتت عليه
.. زوجناه وخلصنا منه وبقة هشومي الاصغر منه
هشام.. يوم الالي واذبح طلي

اباوع لقاسم وجهه بقى جامد باوع لامي بنظرة عتب
شكله جان مختنك مثل المذبوح

ما عبالك اليوم عرسه فرحته مسلوبة
البارحة ضوة غرفته للصبح مشتغل
كل ما امر من يم باب غرفته اسمعه يحجي بالنقال وية رهف
يسكت بيها والظاهر هي جانت تبجي

قاسم.. لج رهف كافي لا تبجين مو زرفتي كلبي لاتخليني اخرب كلشي وانعل ابو العرس لابو كلمن يفكر يعرس

رجع سحب نفس عميق .. لج رهف طمنيني وبردي كلبي وكليلي روح خليني اعرف انام ليلي
بدون ما افكر بدموعج

ما كدرت اكمل اسمع كلامه
تركته ورحت واني افكر بهدى شلون بيها
ياربي امي يمكن ارتكبت اكبر غلطة بهذا الزواج
والله جرمت بيهم وراح تدمر الكل بعنادها

هدى
جنت كاعدة ببيت عمو امجد ستوني رجعت من الصالون اباوع لبدلة العرس البيضة جانت تماما عكس حياتي

اجتي شيماء دخلت للاستقبال وبيدها لفة دجاج وعصير
.. هاج اكليج لكمة ادري بيج على لحم بطنج وما اتريكتي
.. شومة والله ما اشتهي
.. لج اكلي وراج حصلة وجدري لازم تاكلي لانوب بعدين توكعين علينا بالعرس

ياربي شلون بية راح افارق شومة وما اشوفها
منو يهتم بية ويسأل عني

اخذت اللفة من عندها وكعدت اكلها
اجتي مريم اقتربت مني وحضنتني وعيونها تحجي
مريم.. مبروك ربي يسعدج
جانت لابسة بدلة وردي بناتية طالعة وردة بيها

وبعدها اجتي ضحى ولمتني لحضنها
والعيون مليانة دمع
.. صلوات على النبي ما شاء الله طالعة قمر وربي

هي تحجي واني كوة لازمة روحي لا انفجر بالبجي
لحظات

وسليمة اجتني جانت شاكة الحلك من الفرحة
.. مبروك عليج قاسم ما اوصيج
بيضي الوجه وهذا السانج المكطم عود بلعي
حتى ما يسمعج الولد وينهزم

سحبتها شيماء .. الله يبارك بيج بيبي تعالي كعدي اخذي راحتج
والله ما لحكت اضوج من حجي سليمة
لان بعدها سمعت اصوات المزيقى والطبل

يمة واني احس كلبي يريد يطلع من صدري ( دمبق.. دمبق.. دمبق)

شيماء ركضت لبستني البرنص وعدلت البدلة
وراها دخلوا خوات قاسم وامه وقرايبهم
وراهم دخل قاسم جان لابس قاط اسود
السترة حاضنة اكتافه بأنسجام مثل العشيقة

جان يمشي ويبتسم بكل ثقة بس عيونه جانت تحجي غير شكل وابد ما حطها علية ولا باوعلي
وعرفت بلحظتها ان حتى قاسم ديعاني من هذا الزواج

كعد يمي بدون ما ينطق اي حرف
حتى ما كلف نفسه يطمني

ورة دقايق كام قاسم ومد ايده حتى الزمها واكوم
رفعت راسي وباوعت عليه واجتي عيوني بعيونه
جنا اثنينا مظلومين من نفس المصدر وهمة الاهل

حطيت ايدي بأيده ولزمها ولمها بيده بحيث ضاع
كف ايدي بين ثنايا كفه الخشن

حسيت مثل الكهرباء اتسربت وانتقلت من ايده لباقي جسمي رجف كلبي واتبعه باقي جسمي

جانت لحظة كلش غريبة

طلعنا من البيت بالزفة وجان اشوف علاوي واكف
يباوع علية وعيونه تلمع
جان خطية كاشخ عالعرس الظاهر جاي وية المعازيم
من اهل منطقتي

باوعت عليه وابتسمت واتذكرت كل ايامي ومغامراتي وياه

احلى شي بالموضوع جانت بدلتي طويلة وشيماء شايلتها دتساعدني حتى اصعد بالسيارة انتبهت عليه
شلون ركض حتى يساعدني وشال طرف بدلتي الضخمة وية شيماء

حبيبي علوش مو بيده كون يفزعلي للمساعدة
صعدت بالسيارة وقاسم صعد بالسيارة وكعد يمي وباوعت عليه

وحجيت وياه .. علاوي اليوم طالع كشخة كسرت حتى عالعريس
خطية نفخ صدر وباوع لقاسم وخزره وكله
بكل ثقة
.. دير بالك تأذي هدى والله افلش سيارتك
سد الباب وراح عبالك رجال جبيرة

اباوع لقاسم فاتح حلكه وعاقد حواجبه
ابتسم وحجة
.. اشو هذا بكد الفصمة وكعد يهدد منو هذا

لميت حلكي بالكوة ما اضحك نسيت خوفي وجاوبته
.. هذا علاوي ختيبي السابق
.. هنا الحجي يعني انا عندي منافس وما ادري

هذا الكلام الوحيد الي دار بيني وبين قاسم بعدها سرح كل واحد بينا بعالمه الخاص
هو النقال ما بطل من الدك
عمامه خبصوه خبص

بعدما دخلنا للقاعة وسوينا كل مراسيم الزواج التقليدية
اخيرا استقريت بالكوشة وقاسم كاعد يمي

وعيونه بغير مكانه اتبعت نظرات عيونه وجان اشوف
رهف بأخر القاعة كاعدة والعيون دم

يا الله دخيلك والله مردت كلبي صدك الموقف صعب عليها
عيونهم جانت تحجي اسمعه يحجي وية هالة ويكللها رهف ليش اجتي تريد تدخل بذنبي بهاي الساعة

بعدها كام قاسم بكل غضب وطلع من القاعة بكبرها
هالة اجتي وكالت

قاسم راح للقاعة الثانية الخاصة بالرياجيل
مجاوبتها
وبعدها بلش العرس واني كاعدة بس اباوع بعيوني
حتى صوت الديجي ما كدر يخليني اتفاعل او انسى
مخاوفي والموقف الصار

جنت عبالك جاي اباوع عرس وحدة غريبة مو عرسي
هسة اكيد رهف تكول هذا مكاني هاي شتسوي هنا كاعدة

جانت ام قاسم كلش فرحانة واخواته
نفس فرحة امهن الا هديل
جانت كاعدة يم رهف حتى ما كامت ركصت

باوعت لخواتي جانوا كاعدات على ميز لوحدهم ويمهم سليمة وعمة جنان
اشرتلهم يجون ياخذون وياي صور
خطية كامن واجتي شيماء وضحى ومريم
باعت عليهم وكفوا يمي والمصورة اجتي وكعدت تاخذ
باللقطات وتراوينا

فجاءة انطفى صوت الديجي وبعدها خفتت الانوار

واتسلط الضوة على باب القاعة
وجان نسمع صوت منظمة الديجي تعلن بالسماعة
اباوع للكل شلون يباوعون بفضول
عم الهدوء بالقاعة
الموظفة حطت اغنية
هاي الاغنية اهداء للعروس من اختها
الدكتورة مروة

يتبع

‏https://youtu.be/foVlv3U-KVk

احبكم كومة احبكم هواي