أساور الفضة الفصل الثالث وأربعون 43 - بقلم نهى

مساء الورد عليكم
تأتي متأخرا خيرا من الا تأتي ابداً
حبايب اليوم لم اتمكن كتابة الا اليسير نظرا للظروف
بس ما هان علية اعوفكم تنتظرون البارت
واخذلكم وما انزل رغم الظروف
كلت اكتب ويين اوصل انزله

مساء الورد عليكم
تأتي متأخرا خيرا من الا تأتي ابداً
حبايب اليوم لم اتمكن كتابة الا اليسير نظرا للظروف
بس ما هان علية اعوفكم تنتظرون البارت
واخذلكم وما انزل رغم الظروف
كلت اكتب ويين اوصل انزله
.............................

#اساور_الفضة_ج٢
#نهى_الحسون

هدى
جنت مندمجة داحجي وية شيماء وجان اسمع صوت شهكة شيماء الي خلاني اكطع النفس واوكف بمكاني
كالت

.. عزة هذا صوت مريم
انخمط كلبي .. شكو شيماء شصاير

ما ردت علية
ما اعرف شصار بية من هول الصدمة اسمع
صوت مريم اختي تبجي
مفزوعة وتكول بصوت خايف
.. اني مسويت شي هي ماتت لوحدها

بعدها انقطع الاتصال
.. لا يا ربي دخيلك كلشي ولا وحدة من خواتي يصير بيها شي والله اموت

ارتعد جسمي ونبضات كلبي كامت تتسابق مع بعضها
احس عقلي فصل وصار همي الوحيد
شلون اوصل لخواتي
ركضت اخذتلي شال وعباية كاب
وصرت البس واني انزل الدرج والله حتى ما انتبهت شلون لبستها صح لو مكلوبي من كد ما عقلي مشدوه

وشمرت الشال شلون ماجان على شعري
وية كل خطوة اتقدمها احس الوقت دينفذ مني
وعقلي يصوري ما راح اكدر الحك على خواتي

لاكتني هالة جانت بالمطبخ بس على صوتي الخايف
طلعتلي وكالت
.. يا ستار هدى شبيج شصاير
جاوبتها واني متوجهة على باب المطبخ بهرولة

وكلت.. لج هالة ما ادري منو المات وخواتي يصرخون كلشي ما افتهمت
جنت احجي واحس من الخوف والله رجلية بادت
وما كامو. يعينوني

تركت هالة وراي وصوت ام قاسم من المطبخ
سألت شكو شصار

بس اني وين فاصلة بغير عالم
تركت هالة تكللها وفتحت باب الشارع
اسمعها تصيح لج هالة جيبي عباتي بسرعة
طلعت بسرعة للشارع مفزوعة

واول ما طلعت للشارع شافني العم حسنين وركض علية
.. خيريك ياستي هانم حصل حاگة
بعد الشر

.. عمو بسرعة اخذني لبيت اهلي
.. حاضر من عينيا الاتنين
اركبي بسرعة

خطية ما كال شي بسرعة ركب وشغل السيارة عالسريع وهو يطمن بية نظرات عيوني الخايفة ورجفة جسمي حثته يستعجل

.. گيب العوائب سليمة يارب
متخافيش ربينا يبعد الشر عنهم

وضل طول الطريق كل شوية يطمني
واني عقلي كعد يحلل من يمه

منا علما وصلت لبيت سليمة ميت الف حسبة اجتي ببالي
نزلت من السيارة وهو كال
.. انا حروح اگيب ست الحاگة وارگع بسورعة

.. براحتك عمو
جاوبته بسرعة وتركته
ورحت جنت مستعجلة لكيت الباب مردود كبل دخلت
مثل المجنون

وجان اشوف منظر مريم بحضن شيماء
وشعرها مهوس والخد مجروح
والدم سايح منه

وسليمة كاعدة بالكاع تلطم
.. لج شيماء شنو شبيها مريم
شيماء والوجه مخطوف لونه

.. مريم
ضاربة مرت عمو امجد بالسجين وشاردة

ومريم من وصلت لحد هسة بس دترجف كلشي
متحجي غير بس هاي الكلمتين اني مسويت شي هي ماتت لوحدها

رحت اتصلت على عمو امجد حتى افتهم شنو السالفة لكيته هو وابنه ماخذين جنان وناقليها للمستشفى
كلي هسة اخذوها منهم ودخلوها للطواريء
ولحد الان ميعرفون شي عنها

لج هدى خايفة على اختي راح تروح بالرجلين
لان عمو امجد وهو يحجي جان كلش معصب
وكام يهدد ويتوعد متحلف بمريم

سليمة تباوع على مريم وتحجي
.. شكول عليك يمة اثير جانت عايزة والتمت
من تالي وكت تطلع وحدة من بناتك مجرمة

على الاساس خواتها مقصرات بسوالفهن
وهي تجي وتكملها بسوايتها
ولج انتي كتلج صار حلال
رجعت تطلم

سليمة تحجي واني النار كامت تفور بصدري
هديت عليها اتمنى اكلها بسنوني
.. د كااااااافي لخاطر ربج انتي شوكت تنقرضين
الي بعمرج ماتوا وشبعوا ماي ورد

.. ها ولج البكعة هم الج عين تحجين
المثلج هسة تكعد وتاكل تبن وتفكر برجلها خاف يطلكها
من ورة سواية اختج

شيماء بقهر.. هدى كااافي عوفيها تحجي لوحدها
البينة كافينا
.. اي صدك انلصمي وروحي التهي بأختج المجرمة
هسة الله العالم شوكت يجون وياخذوها سحل للسجن

سمعت صرخة مريم المفزوعة من ورة كلام سليمة
وكامت تتوسل بشيماء
.. لا لا لا عفية شيماء لا تخليهم ياخذوني
والله مسويت شي

خوف اختي طير اخر ذرة عقل عندي
اقتربت من سليمة بتهديد وعطت بيها بصوت عالي
.. ولج سليمة الظاهر انتي اليوم مشتاقة تشوفين ملك الموت

اباوع عليها كامت من مكانها وصاحت
..يبووووووو ونوب دارن علية يردن يموتني

شيماء.. هدى ابوس ايدج عوفيها والله ما ناقصين
ولزمت ايدي تمنعني اوصل لسليمة

.. لج شيماء عوفيني عليها اليوم اجفنها بيدي
انا كملت كلامي وما اشوف الاسليمة لابسة عبايتها
وتريد تطلع من البيت

.. والله ما ابقالكم دقيقة وحدة بالبيت انا رايحة اكعد بالباب انتظر ولدي يجون ويسولكم حل وانتي البكعة اذا ما اليوم خليت كتلج رفس ما اتسمة سليمة

باوعت لشيماء ونترت ايدي منها
.. ولكم هدوني عليها
ولج سليمة همة خلي بالاول يلحكون عليج قبل لا تموتين وبعدين كليلهم

.. بس شافتني هديت عليها
شهكت بخوف واتسعت عيونها ولمت عبايتها و
وكبل طلعت بكل سرعتها كامت تمشي بخفة ولا جنها مرة جبيرة صدك الخوف يصنع المعجزات

جريت حسرة بقهر وباوعت لخواتي
مريم ضامة راسها بحضن شيماء

و شيماء كل شوية تتصل على عمو امجد
حتى تشوف شنو صار على جنان

كللها خيطوا راسها وزندها وكالوا لازم تبقى بالعناية المركزة
تحت المراقبة ٢٤ساعة حتى خاف تصير اثار جانبية
مثل نزيف داخلي بالدماغ

اتنهدنا براحة بعدما جنا حابسين الانفاس
جانت شيماء تحجي وتمسح بوجه مريم
جانت صاكة اسنانها من الخوف والرهبة

دك نقال شيماء وكالت
.. هاج هدى هاي عمتج دتتصل علية
ردي عليها

.. يا خطية والله نسيتهم
رديت واجاني صوت هالة
.. ها هدى شنو الصاير عفية طمنينا عليكم

اسمع صوت خالتي ام قاسم تكللها فتحي السماعة خليني اسمع
صوت تكة بالنقال وبعدها رجعت هالة عادت سؤالها مرت اللخ وجاوبتها

حرت شجاوبها والله صعبة
جاوبتها .. اختي متعرضة للضرب
على ايد مرت عمو امجد و اجتي شاردة منها
وهسة عمو امجد وبابا متحلفين بيها
سمعت يم هالة اصوات ثانية

شيماء.. عفية هدى بسرعة استعجلي بالكلام
خلي الحك اخابر مروة تجي تلحك على مريم تاخذها
يمها ما اريدهم يجون ويلكونها هنا والله بس يشوفنها
ما يرحمونها

حجيت بغضب وقهر ونسيت خالتي وهالة
عالخط وكلت واني اتحلف

.. يحلمون اخليهم يلمسون شعرة منها
والله الا على جثتي يوصلونها

شيماء.. هدى رحمة على والديج لا تخبليني وتفجعيني
بيج من يجي ابوي وعمي انتي بالذات لاتحجين والله يموتونج

هالة ..لا ياربي دخيلك هدى ديري بالج تسوين شي اعرفج مخبلة
ما جاوبتها وكلتلها
..هالة انا راح انهي المكالمة
يالله مع السلامة لازم نتصل على مروة خلي نلحك على اختنا قبل لا تروح من بين ايدينا

بعدها شيماء اتصلت على مروة
وفهمتها السالفة كلها بسرعة
وكلتلها عفية مروة تعالي اخذي مريم يمج بالبيت

نهت الاتصال من مروة بعدما
كلتلها جايتكم بمسافة الطريق انتظروني

دقايق وجان يدك نقال شيماء والمتصل اثير
ردت وايديها ترجف
اباوع عليها شلون انخطف لونها
وعيونها اتجهت على مريم بخوف

ورجعت باوعتلي
.. ششنو ليش وين تردون تاخذونها
شهكت واتسعت عيونها
فتحت حلكها .. لحظة انت.......
نزلت النقال تباوع عليه بصدمة
شكله انقطع الخط
اباوع عليها كامت من مكانها مثل المخبلة
وركضت للغرفة مستعجلة
وهي تصيح هدى بسرعة كومي خلي ناخذ اختنا ونطلع بيها من البيت

اابوج وعمج عافوا جنان بالمستشفى وجايين بالطريق حادين اسنونهم علينا
ابوج يكلي جهزي اختج حتى تجي ويانا ما اعرف وين يردون ياخذونها

والله اليعلم شنو ناوين عليها
جانت تحجي وتلبس بجاكيتها
لبسته شلون ما جان وراحت على كنتورها
وطلعت جنطتها وطلعت من جوة ملابسها فلوس
وحطتها بالجنطة

واني رحت ركض على مريم ساعدتها حتى تكوم
وشيماء علكت جنطتها على كتفها واجتي
سندت مريم وياي حتى نطلع

كلشي تم عالسريع عبالك عاصفة هبت علينا
جانت مريم كل شوية تمشي كم خطوة وتوكع
رجليها صاروا خيوط عبالك ماخذينها لمنصة الاعدام
متكدر تعين نفسها من الخوف

شيماء بجزع .. عفية مريم ابوس ايدج ساعدينا راح يوصلون

جنت حابسة انفاسي بداخل صدري
خايفة على خواتي

حوطت خصر مريم بذراعي
وجبت ذراعها ومديتها على اكتفافي

جنا دنمشي واحنا شبه شايلينها
وصلنا لباب الشارع بالكوة وطلعنا
وجان اشوف سليمة كاعدة على بلوكة يم باب الشارع وعبايتها على راسها
منتظرة ولدها يجون شافتنا وكالت

.. ها ولجن وين موليات
ما جاوبناها لان ما ظل عدنا وكت

مرينا من كدامها وهي بقت تدعي وتدردم علينا
جنا بالكوة نمشي
شيماء باوعت للطريق وكالت

.. هدى لزمي مريم زين
بين ما اروح اجيب تكسي واجيكم
حتى ما تضيع الوكت لان المسافة منا لشارع العام طويلة
ومريم مداتكدر تمشي راح تأخرنا

سندتها بكل قوتي وصار ثقل مريم كله علية
وشيماء راحت بسرعة تركض بهرولة حتى تلحك

واني استمريت امشي واحجي وية مريم
.. مريومة عفية ساعديني حتى نوصل

جنت احجي واناهد بتعب
جانت مريم اطول مني
وصرت كل شوية ارفع راسي واباوع عسى ولعل وحدة من خواتي تبين
باوعت ولكيت
جهال المنطقة جانوا ديلعبون بس شكلنا لفتنا انتباههم
وجان يجينا علاوي يركض هو واثنين من اصدقائه

علاوي.. ها هدى شنو شبيكم صاير شي
ستوني شفت اختج شيماء دتركض وهاي شنو اختج شبيها خدها بي دم
جان يحجي ويأشر على مريم

.. علاوي عفية تعال ساعدني خلي نوصل مريم للشارع العام
اجة بكل همة وصار من الجهة الثانية لمريم وكعد يسندها وياي

باوعت عليه يمكن لو اكلكم صارت روحي
بعلاوي الصغير وكعدت استنجد بي حتى يساعدني
راح تكولون علية هاي تبالغ
بس فعلا بوكتها جنت بأمس الحاجة للفزعة

باوعت لمريم وجهة انكلب اصفر
كامت تحجي بصوت واهن
.. راح يجون يذبحوني ما اريد اموت

حجيت وية مريم اطمنها
وعلاوي يسمعني
.. لتخافين ما يكدرون يسولج شي واني وشيماء ومروة موجودات شحدة اليوصلج

علاوي بهمة.. هدى حتى انا موجود لا تخافين ابوي عنده. بندقية صيد ضامها عندي اجيبها واجي وياج

الدمعة غدرتني ونزلت على خدي تتحداني
كلام علاوي هيج المواجع

شكد حلو الواحد يكون عنده بهاي الدنيا
سند قوي يفزعله بساعة الشدة
ويكدر يعيش بأمان لان واثق هو مو لوحده اكو من
يحميه ويدافع عنه

جنا نمشي وكل شوية اباوع للطرق
صار راس الفرع شبعده علية
مدري من الخوف صار طال الطريق
مدري احنا نمشي بطيء

اتوقف لحظة حتى شوية اخذ انفاسي
باوعت بأمل للطريق بلكي وحدة خواتي تبين
بس ماكو

باوعت لعلاوي يباوع علية ينتظرني
حثيته .. يالله علاوي خلي نكمل بلكي نوصل لراس الفرع
علاوي.. يالله امشينا
مشينا كم خطوة

جنت كلش مشغولة بمريم وما حسيت الا على سيارة
كطعت علينا الطريق
رفعت راسي بأمل وجان اشوف عمو امجد نزل من السيارة والشرر يتطاير من عيونه

شهكت مفزوعة وروحي تريد تفر من الجسد
امجد اتوجه علينا
واني ارتديت للخلف بمحاولة عقيمة وياي مريم
صرت اباوع عين عليه وعين عالطريق الوراه بامل
بلكي وحدة خواتي تلحلنا

بس يا ريتني ما باوعت
شفت اثير نزل من سيارة عمو امجد لازم شيماء من زندها
ويجرجر بيها بكل قوة وشيماء تريد تحرر نفسها من عنده

انتبهت لاثير وجه كلامه لامجد وكله
اخذ مريم من ايدها وامشنا للبيت هنا نتحاسب
وياهن
بسرعة استعجل ترة الناس كامت تباوع علينا
امجد.. انا ما اريد شي سلموني بس مريم
هي حصتي

اثير.. امجد بعدين موهسة الناس كامت تنته علينا
عود بعدين اخذها وين ما تريد عسما للنجف ما يهمني
بس اخذها وفوت كدامي للبيت

شيماء بصياح
.. والله ثم والله اذا سويت لمريم
شي اكون لامة عليكم امة لا اله الاالله
واخلي المايشتري يتفرج عليكم
وساعتها انخاهم يهدون عليكم

اثير .. امشي لج عااار بس اصبريلي خلي ادخل للبيت
وانا اعلمج شغلج
سحبها حيل واتجه بيها للبيت
وهي تتلاوة وية اثير

انتبهت لامجد اجة بتجاهي
ارتديت للخلف وانخطف لوني وحطيت مريم ورة ظهري وحجيت بقلة حيلة

.. ما اخليك تاخذ........
بعدنا مامكملة كلامي
ما حسيت الا اجاني راشدي
حار وانطبعت اصابع كفه على خدي مثل الختم

سمعت شهكة علاوي
.. ليش عمو لش

محد اهتم لكلامه
دفعني من كدامه
وجر مريم من زندها واخذها سحل للبيت

صرت امشي وراهم مثل المجنون فاقد عقل
احتاريت الحك لمنو بيهم اختي الجبيرة
لو اروح لاختي الصغيرة

وصل اثير يم الباب جان البيت قريب علينا
لان ما لحكنا نبتعد هواي
اتلكته سليمة

.. بالشكاوي
كلامها صار مثل الي يجمل حطب للنار
حتى يأججها
دفر باب الشارع ودخل وهي يجر بشماء
اتبعه امجد الي جان يسحل بمريم

اباوع عليها جانت تمشي وتوكع وهو يجر بيها بدون ما يهتم
امجد .. لج امشي كدامي كلبة بنت الكلب
اليوم محد راح يخلصج مني

دخلهم للبيت واني دخلت وياهم

اباوع لاثير استلم شيماء راشديات وهي كامت
تتصدة لضربه مثل اللبوة

وامجد لزم مريم وانطاها دفعة قوية كومها بزاوية الهول.

واني واكفة بالنص اباوع عليهم شيسون بخواتي
والله بساعتها اندليت مكان
صرخات مريم الخايفة وصوت شيماء المقهور
اتعاونوا على
فقدان التعقل عندي

وكبل اتخذت القرار واتحركت مثل المجون الفاقد عقل
ما عليه عتب ولا يسوي حساب
لردة فعله
دخلت للمطبخ جان الباب بصفي
رحت مباشرتا عالمجر وطلعت السجين

رجعت عليهم وجان اشوف امجد
يرفس بمريم
.. لج ماقصة عار الا اربيج على ايدي

وبدون اي مقدمات كبل ركضت على امجد
والسجين بيدي ونيتي انبتها
بظهره بدون ما يرفلي جفن حركة كلبي
عمتني
سمعت صرخة سليمة تنبهم
.. يبووووووووو البكة لا تموت ولدي

وما اشوف الا وايد اثير لزمتني ولوت ايدي
حسيت بيدي راح تنكسر

التفت امجد وشاف السجين بيدي
واتسعت عيونه متفاجيء من جسارتي

.. ولج ساااق ..... وصلت بيج تردين تكتليني

وما احس الا واثنينهم داروا علية
واتعاونوا علية
اجتني ضربة من امجد حسيت بيها شكت شفتي
واثير دنك علية

لزمني من شعري ورفعني من الكاع عبالك
لعابة

جنت اتلاوة. جوة ايده اريد يهد شعري
وحجيت وياه واني اباوع بعيونه الي ما بيهم ذرة رحمة
.. شتسوي بية سوي
تريد تموتني موتني
بس هد خواتي. وعوفهم يطلعون واخذ حيفك مني

اثير.. ولج اليوم اذا ما عدت تربيتج من جديد
ما اتسمى اثير

امجد.. ولك اثير عوفها علية هاي صار كتلها
حلال
مد ايده وجرني من شعري

اني جوة ايدهم اتكلب ما بين خوف وعناد وحقد
بس حقدي عليهم طغى على خوفي منهم
وحجيت.
.. من الله لا يوفقكم والله ذنبي وذنب خواتي بركبتكم

انتبهت لامجد لم ايده بقبضة ورفعها يريد يوجها على وجهي
غمض عيوني برهبة وصرت ارافس
اريد اخلص نفسي

بس فجاء
سمعت صوت غاضب خشن رج اركان البيت
كمز كلبي من مكانه وبجيت ممصدكة

قاسم .. شيل ايد عن مرتي
جان يحجيها وهو راص اسنانه

بعدها ما حسيت الا على امجد اجته ضربة
واتكوم بالكاع مثل الخركة البايدة

رفعت راسي جان اشوف
قاسم واكف فوك راس امجد
وهشام واكب وراه متأهب لاي حركة من اثير
خاف يغدر بقاسم
جان المنظر بحد ذاته عجيب

انتبهت لشيماء ركضت لمريم وحطت راسها بحضنها
تريد تكومها من مكانها

قاسم دنك على امجد ورفعه من ياخة القميص
.. انت شلون تتجرء تمد ايدك عليها
وتضربها
امجد.. لا تدخل نفسك بشي ما يخصك
مرتك اتجاسرت رادت تطعني بالسجين

اباوع لقاسم دار وجهه وباوع علية
للحظة شفت بعيونه فخر
بس سرعان ما اختف هاي النظرة وحل محلها
الغضب
كال.. حيل بيك وابو زايد وقليل بحقك
السجين هي لو مكملة جميلها وطاعنتك
جان دكيتلها تحية احترام

بس مع الاسف العار مايموت مثلك انت وهذا
واشر على اثير

اثير.. شوف قاسم احنا مشكلتنا مو وياك اذا جاي على مرتك اخذها واطلع منا بلا مشاكل

فجاءة دخلت مروة مفزوعة والوجه لونه اصفر
وجان تشوف الوضع متأزم
باوعت بالوجوه تدور على مريم
شافتها واكفة وشيماء مسندتها

باوعت على اثير وامجد وعيونها غضب اسود موجه عليهم
اثير.. وانتي الثانية شجابج علينا
بالله شو طلعي برة لا اجي اطلع حركتي كلها بيج
مروة..اني ما جاية علمودك
اني اجيت حتى اخذ خواتي

راحت على مريم وكالت
.. يالله شيماء تعالو وياي انتي ومريم

جان قاسم واكف بنص الهول واثير وامجد واكفين كدامه وهشام جان واكف يم باب الهول
حاط ايديه على خصره متأهب

قاسم حجة وياي.. هدى لبسي حجابج وتعاي
خلي نطلع انتي تخصيني وامرج راجعلي اما خواتج البقية مالي حق اتدخل بيهم

باوعت عليه بقهر وعيوني غوركت بالدموع
رحت وكفت كدامه ورفعت راسي وعيوني صارت بعيونه وهمست بضعف
.. مستحيل اطلع منا واترك خواتي

اباوع عليه مثل الي ديعاني بس
جان متقيد ويعرف بروحه ماله حق يتدخل
ومستحيل يتعدة حدوده ويخلي الحق عليه

ياناس ياعالم المظلوم منو اله زين وين عدالة الحياة
وين الانصاف
همست اترجاه ..
.. قاسم ابوس ايدك على الاقل بس طلع خواتي منا

غمض عيونه وسحب نفس عميق وكال
.. هدى طلبج صعب مالي حق اتدخل بين خواتج وابوج ومشاكلهم

لزم ايدي وكال .. يالله امشي كدامي

التفتت
وباوعت لمروة سندت مريم ومشت
وشيماء تمشي وراها

اثير حجة يتوعد
.. مروة والله اكسر رجليج اذا اخذتي خواتج

مروة .. عبالك تخوفني من تكعد تهدد
اثير انت هواي غلطان اذا جنت تعتقد
اتركلك خواتي واطلع

امجد.. انتي اذا مرة جربي وخطي عتبة الباب

مروة باوعتلهم بتحدي
ومشت متجهة للباب الي بصف هشام جان الباب شوية مردود

اثير اتجه عليها بكل غضب وصاح
.. مروة لا تتحديني

شهكت بخوف على خواتي وحطيت ايدي اكتم صرختي
خايفة شراح يسوي بيها

لفت انتباهي صوت قاسم الغاضب وحجة من بين اسنانه
.. من احتركت عشيرتج مسحي دموعج

بعدها عافني وراه
واتصدة لأثير وقطع عليه الطريق

اثير وكف متردد يتقدم وصاح وهو واكف بمكانه
.. مروة ديري بالج اسويها وتطلعين والله ادمرج

قاسم واكف كدام اثير وحجة بتحدي

.. خوية فوتي اخذي خواتي وطلعي والهوى بظهرج
انا موجود اريد اشوف زلمة يفتح حلكه ويمنعج

وصاح بأمر .. هشام اخذهن وصلهن للسيارة
اباوع لهشام مثل الي جان منتظر هذا الامر
وكبل فتحلهن الباب على وسعه واشرلهن يفوتن
يطلعن كدامه

اباوع لمروة باوعت لقاسم وهشام بأمتنان
وماحجت شي لان الموقف مو مال تكعد تشكرهم

امجد.. وانت بصفتك شنو حتى تتدخل
بينا وبين بناتنا ترة هاي السالفة ما ينسكت عليها

قاسم رفع حاجبه.
.. كلامك صحيح مالي حق اتدخل بين البنات وابوهم
بس المرة اذا تنخاك تستنجد بيك ساعتها تبطل الحجة وكبل تفزعلها

وانت تعرف الفزعة ما يلزمها
لا بنية وابوها ولا اخت واخوها

اسمع اثير يحجي وية امجد
.. بسيطة انا الهن خلي يطلعن وين يردن يروحن اوصلهن لو يرحن لاخر الدنيا

امجد.. شوف قاسم انت لهنا وحدك
مالك حق تتدخل انت عليك بمرتك
الزمها وكعدها بالبيت حتى ما يلوحها
طشار خواتها

قاسم باوع علية وكال بدون ما يجاوبه
.. يالله تحركي خلي نطلع

ركضت اخذت شالي الي جان جوة رجلين سليمة

.. ها ياكطمة بختج بعنتر ابن شداد
جنه باب هاكبرة

جانت تحجي بصوت ناصي وتباوع لقاسم
اخذت شالي بسرعة وكلت
.. قل اعوذ برب الفلق. خمسة وخميسة بعيونج عوذة
راح تحسد رجلي

رحت ركضت لعند قاسم
موقف قاسم وية خواتي
برد كلبي وشفة غليلي بأمجد واثير
احس بماي بارد نزل على كلبي

اخذني وطلعنا ولكيت هشام واكف يم السيارة ينتظر قاسم ومروة وخواتي رايحات
وعلاوي واكف يم هشام
بس شافني
اجة يمي ويحجي بكل ثقة
.. هدى شفايفج بيها دم
مسحت شفتي على كيف بظهر ايدي ولكيت شوية دم
جانت توجعني

علاوي.. انا مو كلتلج خلي اجيب بندقية ابوي
بس انتي ما سمعتي كلامي

ابتسمت على كيف متأذية
.. خفت عليك لا تتأذة
.. لعد ترديني اخليهم يسحلوج واكعد اباوع

.. يمة فديتك تروحلك سليمة وعشيرتها الف فدوة

قاسم.. اكول ابو الشباب مو جنك ماخذ راحتك زايد
وية مرتي

باوع عليه علاوي بكل ثقة
.. اصلا انا وهدى من الاول نحب بعضنا
بس ابوها زوجها الك
غصب عنها ما اعرف شنو شاف بيك وانطاك
هدى

يابة هو يحجي وهشام فاطس من الضحك
هشام .. انا خوك يقاسم راحت عليك
طلع عندك منافس

شيماء ..
طلعنا وية مروة ورحنا لبيتها
واني حاضنا مريم خايفة اعوفها

انتبهت لمروة طلعت نقالها
واتصلت على واحدة اسمه ابو ياسر
سلمت عليه وكالت
مروة.. ابو ياسر اريد اطلب منك خدمة
.. مشكور ما تقصر بس اريد احط حارس حماية مدرب
.. لا ما صاير شي بعدين افهمك بس كون تفهمه
يرابط حرس على بيتي وعلى عيادتي

.. مشكور ابو ياسر ما تقصر رايدك بالشدات
تمام يعني انتظرهم وانت وتجي وياهم ؟؟ لو لا
ها يعني انت مسافر هسة تمام خليهم يجون واتفق وياهم
وبعدين نحجي

نهت الاتصال ودارت وجهها علية
وسألتها .. مروة هذا منو وليش تردين تعينين حارس شخصي

.. هذا زوج صديقتي هناء الله يرحمها
هذا اخو دنيا هو وهناء ياما وكفولي وبالمقابل اني هم
صاحبة جميل عليهم وهوعنده معرفة بهاي الامور

من بعد تهديد ابوج وعمج امجد العار
لازم اتلاحك واامن على حياة مريم

يتبع

يتبع