أساور الفضة الفصل الرابع وأربعون 44 - بقلم نهى

مساء الخير عليكم احبتي
حبيت انوه عن فقرة
طبعا اشكركم على تفاعلكم الجميل

ودائما اشوف التعليقات. بس
مرات الحك اعلق وياكم واتفاعل ومرات
ما اكدر ارجو ان تتفهموا قلة مشاركتي وياكم
بالتعلقات مع العلم مرات اتمنى اكعد اعلق
وياكم عالواهس
لان فعلا تعليقاتكم تحسسني عبالك عائلة وكاعدين
ببيت واحد ونكعد نسولف
بس اني من انزل البارت
اروح اكمل دراسة اطفالي او اكوي ملابسهم
المدرسية لذلك لا تفهمون قلة مشاركتي وياكم
عدم اهتمام
طولت عليكم اعوفكم تكملون قراءة البارت

☺️☺️☺️☺️☺️☺️☺️☺️☺️☺️☺️☺️☺️☺️

#اساور_الفضة_ج٢
#نهى_الحسون

هدى

بعدما اخذني قاسم من بيت سليمة
صعدت بالسيارة وكلبي ممرود على خواتي
اتمنيت اروح وراهن واعرف شصار بمريم
وشنو سالفتها وية جنان

باوعت لقاسم جان يسوق ويحجي وية هشام وانا كاعدة ورة

اجاني صوت قاسم
.. هدى شنو سالفة ابوج وعمج شبيهم اليوم
ترة. انا كلشي ما افتهمت ومن اتدخلت
جنت اعرف اثير ناقص غيرة. واكيد هو الغلط
بس ردت اعرف شنو السبب هالمرة

يارب والله صعبه عالبنية ينكال على ابوها ناقص
انا سامعة الابو يا ناس هيبة
ليش انا من دون البنات ابوي صار خيبة
وما اكدر ارفع راسي بي

باوعت على قاسم
ياربي شلون بية
والله جنت شايلة هم لهذا السؤال
لان بيت اهل قاسم ناس طبيعين عايشين حياة عادية مثل اي عائلة طبيعية
ومن سابع المستحيلات
يستوعبون موقف. مريم وطعنها لجنان بالسجين
اكيد راح يستنكرون موقفها
ويعتبروها جسارة من مريم هاي اذا ما
عقولهم راحت لبعيد اكثر من هذا الشي

عود بعدين منا علما اكعد اشرحلهم عن الاسباب وافهمهم موقفها
يكون ماي وجهي كله رايح

يعني بيت اهل قاسم مو ملائكة اكيد راح ياخذون فكرة عني وعن خواتي مو زينة

هو كلش كافي علية ابوي وسوالفه وسيرته الحميدة على كل السان
وفوكاها هسة شكد زحمة كدام هشام انضرب عمي وانهان ابوية
صحيح كلة من ايدهم ويستاهلون بس يبقى هذا الشي ما اكدر افتخر بي

وصحيح قاسم خلصنا اني وخواتي من ظلمهم
بس اذا رضيت او ما رضيت يبقون
هذولي محسبوين علية اهلي وكرامتي من كرامتهم
والاهانة الي تطولهم ترجع علية
لو مهما حاولت اتغاضى عن هذا الشي
لان يبقون يخصوني
وهسة مستحيل انطي بخواتي
كافي ذل.
رفعت راسي وكلت

.. والله يا قاسم ما اعغف (مااعرف) شنو اكلك
اجيت لكيت اختي مغيم (مريم) وجهها مجغوح (مجروح)كله دم

وعمو امجد وبابا متحلفين بيها شنو وليش
ما لحكت اعغف (اعرف) لان الله يحفظهم شوفة عينك
ما انطونا مجال نفتهم شنو القصة
بس مجغد (مجرد) ما شفت خوفة اختي وجغح (جرح) خدها عغفت (عرفت )
ان هي اتعغضت للضغب ( اتعرضت للضرب) والتعنيفً

قاسم.. زين اختج مكالت شنو الصار
.. لا محجت اي شي لان مغيم (مريم) جانت كلش خايفة ومفزوعة. بس تبجي
كلت بس اوصل للبيت اتصل على شيماء وافتهم منها القصة

.. بس خلي ببالج ترة مروة مو من حقها
تاخذ اختها يمها بالبيت وابوها وعمها بالوجود
في غض النظر عن الظروف وعن الصار

مريم اختج تعتبر قاصر وابوج هو ولي امرها
فما يصير تجي مروة وتاخذها هيج بكل بساطة
اتوقع مروة راح تواجه مشاكل وية عمج وابوج.
ما راح يبقوها عندها
كلام قاسم قبض كلبي وزاد حوفي على خواتي

وصلنا للبيت وجان الكة هالة منتظرتنا
هالة.. ها هدى بشري شلونها اختج

.. الحمدلله بخيغ (بخير)
هالة اكتفت بهذا جوابي مؤقتاً ادري بيها راح تكعد تحقق وياي
باوعت ما شفت خالة ام قاسم
.. شنو خالة وين

هالة.. امي اخذت علاجها ونامت خطية شكد انتظرتكم

قاسم .. هالة عفية سويلي عشا كلش جوعان
هشام .. وانا هماتين سويلي لفة وكلاص جاي وصعديهم الي للغرفة

انتبهت لقاسم صعد فوك
واني رحت صعدت وراه
دخلت للغرفة لكيته ديبدل لفت انتباهي
ظهر كف ايده شوية دم

.. قاسم ايدك بيها دم
.. اي هاي من ضربة عمج امجد سنه نبت بأيدي
.. خو تأذيك ايدك
انطاني ظهره ونزع التيشريت
بكل ثقة
.. ههههه هو منو المفروض يتأذة الضارب لو المضروب
كعدت احم حم .. اكيد المضغوب ( المضروب)

رحت اخذتلي ملابس ودخلت للحمام ابدل
صرت كلما اتذكر فزعة قاسم النا اني وخواتي
جسمي يضل يرتعد

يعني لوما هو جاي ولاحك علينا
اني وخواتي
جان بس الله اليلعم شنو يصير بينا

جنت كلش ممنونة لوكفته ويانا
اندعيله بكلبي ربي يحفظه لامه وخواته

بديت اسبح احس جسمي كله مرضوض
من ورة الضرب اتذكرت مريم وشيماء
سودة علية هسة شلونهن

نشفت شعري بالشسوار بدون ما امشطه بعدين امشطه
طلعت من الحمام ولكيت قاسم
ستوة مخلص عشا وحاط الصينية والطبلة على صفحة

كام من مكانه وراح للحمام غسل ايديه
وطلع وبيده المنشفة يمسح بيها
علك المنشفة بمكانها
راح كعد عالسرير
وباوع علية بنظرات مثل الي يريد يدرس الشخص الواكف كدامه
جنت لازمة المشط اريد امشط شعري
حجة بصوت خشن
.. هدى اريدج تسمعيني زين
نزلت المشط وباوعت عليه

.. بعد ما اريد اسمع بيج مرة ثانية طالعة من البيت بدون علمي
اعتبري هذا انذار
هالمرة عذرتج لان جنتي خايفة على خواتج
بس مرت الثانية ما اقبل بأي عذر سامعة

هزيت راسي بموافقة
.. صاغ (صار) بعد ما اطلع من البيت بدون علمك

اريد اشكره على موقفه وياي
بس متردده رحت اتقربت عليه وكفت كدامه
باوع علية منتظرني احجي

.. احم قاسم اني ممنونة منك على وكفتك وياي اني وخواتي

.. انا ما سويت شي هذا واجبي انتي تخصيني
وحمايتج راجعة الي
.. اي اعرف بس انت اليوم وكفت الي ولخواتي

.. اي واحد بمكاني عنده غيرة راح يتدخل من يشوف الظلم
الصار اليوم ينطق الصخر

.. اي بس انت بالاول رفضت توكفلهن

.. شلون تردين مني اهجم على ابوج
واطلع خواتج الي همة بناته
بدون ما مفتهم السالفة شنو وحتى لو افتهمت
اشوفها صعبة اتدخل بين الاب وبناته

وانا لو جنت بمكان ابوج وعمج ما راح اسمح
لاي مخلوق يتدخل بيني وبين خواتي
لان هاي امور خاصة عائلية محد اله حق يتدخل

جان يحجي ويمسد مكان الكدمة الموجودة
بظهر كف ايده

ما اعرف شصار بكلبي من شفته يتلمس الجرح ذكرني بوعدي لنفسي اليوم
اقتربت عليه وركعت على رجلية قريب عليه جان هو بعده كاعد عالسرير
جمد بمكانه على حركتي
رفعت راسي واجتي عيوني بعيونه

وهمست .. تدغي(تدري ) اليوم من شفتك ضغبت (ضربت) عمو امجد
بيدك اخذت عهد بيني وبين نفسي

لزمت كف ايده بين ايدية وقربتها على شفايفي
ودنكت وبست مكان كدمة ايده جانت خشنة

اتسعت عيونه حسيت بي متفاجيء من حركتي وبنفس الوكت سرت رجفة بيده
حجة بصوت خشن.. هاي شنو ليش سويتي هيج
جاوبته واني عيوني بعيونه

.. من شفتك ضغبت (ضربت) عمو امجد بيدك
حلفت كون ابوس الايد الي غجعتلي (رجعتلي) حقي

حركتي سحبت الكلام من قاسم
انتبهت على عيونه شلون تتمعن بوجهي
توتر الوضوع بيني وبينه ما اعرف شصار

حس على وضعنا وسحب ايده من بين ايدية ورجع شعره

ابتسم وكال
.. اكول خوية هادي ما ادري بيك عندك هيج شفايف ترفة
خرب عشيرتك اي غير تكلي انت حالف تبوس
ايدي لان ضربت بيها عمك
حرامات لو ادري بالسالفة هيج
جان بدربي اخذتلي عضة من عمك

شهكت
.. يبووووووي عليك قسام هم فهمتني غلط

.. اكلك خوية هادي تكوم من كدامي
لا اخرب الاول والتالي
اشو تتحارش بية وتكلي لا تفهمني غلط
شنو كالولك عني انا جدتك وتبوس ايدي وتريدني امسح على راسك

كمزت من مكاني
.. والله لازم محد يسوي الزين بهاي الايام

.. اي هو عفية عليك خير لا تسوي شر ما يجيك
يالله حباب روح طفي الضوة خليني انام

شيماء
مرت ساعتين ونص على جيتنا من بيت سليمة
ااباوع لمروة كل شوية تتصل وبعدما
اتفقت وية مسؤل امني بمساعدة زوج صديقتها
ووقعت وياه على عقد حتى يامن بيتها وعيادتها

سدت النقال وباوعت علية اني ومريم الي جنا كاعدات منتظرات تخلص

مروة.. الحمدلله خلصت كلشي وامنت عليكم هسه
حتى خاف يفكرون يسوون شي على الاقل اكون ماخذة احتياطاتي
كلشي اتوقع يطلع منهم وهذا امجد اني اله حسابي وياه بعدين
بس خلي يصبرلي الظاهر نسى نفسه

بس همة صدك لو كالو ذيل الجلب ما ينعدل
جرت نفس وباوعت لمريم
جانت مروة تحوم بالصالة وتحجي
منفعلة
دخلت مشمش علينا تفرك بعيونها ولازمة بيدها دبدوبها
مبين كعدت من النوم
.. ماما تعاي

مروة التفت عليها .. ها حبيبي مشمش
.. ماما دبدوبي نعسان يغيد (يريد) ينام تعالي نوميه
باوعتلها مروة
.. ها الدبوب يريد ينام يعني مو انتي

.. لا اني عيب كبغت (كبرت) ما احتاج ماما تنومي
بس هذا دبدوبي خطية بعده صغيغ (صغير) يكول ما نام الا ماما تنومني

اسمع كلام مشمش وكلبي تكتك عليها وعيوني كامت تلمع ياربي شكد حلوة
اتمنيت للحظة عندي بنية مثلها

مروة باوعت لمريم.. مريمة كومي فوتي سبحي حتى ترتاحين بين ما
اروح انوم دبدوب مشمش وارجع نكمل حجي

كمت من مكاني .. واني راح اسوي جاي
بين ما تخلصون

مريم بتردد .. ماعندي ملابس
.. انتي فوتي سبحي واني انطيج ملابس من عندي
صحيح كبار عليج بس هم يفيدون

كل وحدة راحت لمكان دخلت للمطبخ
وحطيت القوري عالطباخ
وكعدت افتح واسد ادور على الجاي
الخدامة مالتها نامت لان الوقت كلش متأخر
الساعة ب١٢ بالليل

لكيت علبة الجاي اخيرا
وحضرته وبالي مشغول بخواتي شلون بية وبيهم
وخايفة نوب مشاكلنا تعم على حياة مروة

ااااخ يا اثير

والله الي وكفة وياك هناك يم رب العالمين
والله ما
اسامحه على الاذية الشفتها اني وخواتي على ايده

من وراه اني وخواتي عشنا حياتنا بخوف وذل وهضم
اشو كضيناها كلة يا جاك الذيب يااا جاك الواوي

وما اعرف الدنيا بعد شنو ضامتلي
صرت اكره كلمة بابا من اسمعها من وراه
انتهت من صفنتي على دخول مروة

.. ها مشمش نامت
.. اي نامت متعودة متنام الي اني يمها

.. حبيبتي الله يحفظها تجنن
.. يارب يرزقج بوحدة مثلها
.. امين بس شكلي ما الحك يصير عندي اطفال
القطار راح يفوتني

.. ربي يرزقج بواحد ذهب مصفى مثلج
جانت تحجي وتحظر بكوابة الجاي
خلصت الجاي وصبيته وانتقلنا للهول
لكينا مريم طالعة من الحمام وكاعدة مكرفصة عالقنفة
مثل البزونة الخايفة انطيتها الجاي
انتبهنا عليها جانت دترجف

كعدت بصفها ولميتها لحضني ومروة كعدت كدامنا
مروة.. مريم اريدج تحجيلي كلشي بالحرف الواحد
شنو الصار وليش طعنتي جنان وليش وجهج مجروح

حجيت .. مريومة احجيلنا كلشي ولا تخافين
من احد حتى نكدر نساعدج
وناخذ حقج

ارتعد جسمها ورجفة شفايفها وبدت تحجيلنا الصار
.. ماما من يوم الي دخلتوا انتوا لحياتي وهي زادت
بالقسوة والتشديد علية

ما انكر هي من الاول جانت قاسية وكلبها ميت
جانت دائما تعاملني بقسوة
مو بس اني حتى احمد اخوية تعامله بقسوة

هي من النوع عندها هوس بالترتيب والنظام والتسلط
يعني اتوقع لو شم الهوى تكدر تتحكم بي جان هم
ما تخلينا نتنفس الا بأذنها

هذا الحجي ينطبق على الكل حتى عمو امجد
من يدخل للبيت يصير عديم الشخصية حاله حال ولده حالي
كلنا كدامها تحت امرها

جنت صغيرة من اشوفها تجوي بأحمد علمود
يغلط او ياخذ درجة مو زينة بالامتحان
من اروح اسأله يكلي امي تسوي هيج علمود مصلحتنا

واني من كبرت صرت حالي حال اخواني
اتعاقب واسكت
جان انواع العقاب صارمة
ما بين تحرمنا من الاكل او تجوينا
يعني تحمي الخاشوكة وتحطها على جلدنا

اتذكر مرة حركت احمد اخوية وعلى اثرها دخل للمستشفى
وبابا اتعارك وياها ودز على اهلها وظل يحجي

وبوكتها هي راحت زعلانة وية اهلها
وظلينا احنا و بابا بالبيت لوحدنا

وصدك بابا غرك وما دبرها
وكلما يصير شي يكول اهووو عمي حقها جنان من تسوي بيكم هيج

مروة.. يعني باختصار عمو امجد ما يستغنى عنها
.. هي بالحقيقة كلمة حق تنكال
هي جانت حيل ملتزمة بالدراسة والنظام
وعلى اثرها اني واخواني جنا متفوقين بالمدراسة
والدليل اخوي الحبير صيدلة واحمد هندسة
واني هم شاطرة بالمدرسة مثلما تعرفون

بس من بديت اكبر صرت اريد هواي اشياء
اريد احجي بحرية اكل براحتي انام بكيفي

اريد ارتكب اخطائي حالي حال البنات حتى اتعلم
اريد اضحك واتشاقة مثل هدى وصديقاتي
بدون ما اخاف اتعاقب

صرت اختنك من قيودها وملحتها عكس اخواني
جانوا راضين عالوضوع ولا يوم واحد بيهم انتفض بوجها
واعترض على اذيتها وتسلطها واسلوبها

وقبل سنتين بالتحديد من بديت استوعب الوضع
وافتهم الحياة اكتشفت بأمي عندها صفة كلش تبالغ
بيها وهي حب التملك

تتعامل وياي ووية اولادها عبالك ملك حصري فقط الها
اتخيلي اخوية حسن من اتزوج

كامت تسوي اشياء غريبة عجيبة وصلت بيها
كلما حسن يدخل وية زوجته

تكوم تطلعلها الف عذر وعذر علمود يجي يكعد يمها
واغلبها تسوي نفسها مريضة ومتخربطة

وهو يترك زوجته وينام يمها مغصوب حتى لو يعرف مابيها شي
بس هو لازم يبقى نايم عالقنفة يمها
وهي حيل مستغلة هذا الشي
واذا مرة راد يطلع مرته لازم تطلع وياهم وما
تصير اي مناسبة اذا مو هي وياهم ميصير يطلعون وحدهم

لحد ما زوجة اخوي انتفضت وطلعت زعلانة ورفضت ترجع للبيت
الا يحطلها بيت لوحدها
وخطية هو يحب مرته. وامه معترضة

اخر شي بابا اتدخل وكله روح رحع مرتك
واطلع بيها ببيت لوحدكم وامك عوفها علية

ومن ذاك اليوم لحد يومكم هذا ماما ما تحجي وية حسن
رغم شكد حاول وياها
ومن وقت حسن اخوي وماما زادت ما نقصت بتسلطها وقسوتها وياي اني واحمد اخوية

جانت ما تتهاون ولا تتنازل عن العقاب
ولا تنسى ولا يفوتها شي
جانت تجيني ايام توكفني ساعتين لازم مااتحرك من مكاني ورجلي ثابته واذا شوية تحركت تضربني وتزيد على المدة فد نص ساعه واني لازمة كتابي اقرة

.. ليش تسوي هيج
.. لان اكتشفت بية ضامة عنها درجاتي الضعيفة بيهم
حجيت بحركة كلب ودعيت عليها
.. من الله لا يوفقها

..تدرين شيماء شكد جنت اكرهكم انتي وخواني
جنت كلش حاقدة عليكم

شهكت بصدمة من اعتراف مريم
.. ليش مريم تكرهينا احنا خواتج ونحبج
.. جنت كلما اشوفكم انتي وخواتي من تجونا
هناك للبيت اشوف ضحكتكم واشوفج شلون

تتعاركين وية بيبي سليمة علمود تدافعين عن هدى
لو تتعاركين وية اثير علمود تحمين ضحى
اسمع من بابا انتي المسؤولة وام خواتي
وجنت كلما اتعاقب يزيد حقدي وكرهي عليكم
اكول واني وين من هذا كله

جنت من اشوف هدى وضحكتها وشقاها جنت احسدها
اكول هنيالها عايشة حرة مثل الفراشة

عكسي اني عصفور محطوط بقفص من ذهب
كلشي موجود ومتوفر وبنفس الوقت كلشي ممنوع عني
يعني الي يشوفني يحسدني
بعدها صرت يوم عن يوم استسلم لحياتي واطيع
اوامر جنان وما اطلع عن شورها حالي حال اخواني

بس من بدت شيماء تتواصل وياي
احس مثل شمعة امل ضوة حياتي
هيج جان شعوري من اشوف شيماء تجينا وتسأل علية

ويزيد اماني من اشوفها مصرة تحجي وتتواصل بأي طريقة
حتى تسمع صوتي وتعرف اخباري

هذا الشي قوة عندي الامل بالحياة بعد ما كنت يائسة
بالمقابل جنان شنت علية الحرب
وخاف جانت تجويني علمود الاخطاء
هسة صارت ايدها والحرك وياي
بسبب وبدون سبب

واجتي تتخبل من تشوف شيماء كل يوم تتصل بية
حاولت بقدر الامكان وبابا تريده يمنع شيماء ان تتواصل وياية
بس بابا جان يكللها ماعندي سبب يخليني امنع البنية تتواصل وية اختها الجبيرة هذا حقها
جنت حيل خايفة لا تبعدج عني وانتي تستلمين وتعوفيني

بس ماما من شافت ماكو امل ان تبعدج عني خافت
تاخذيني منها خصوصا من رحت وياكم لبيت مروة
تتذكرون الم الحركة الي سألتوني عنها

.. اتذكر كلتي بوكتها جنتي تكلين و انلسعتي
.. هاي جانت وحدة من عشرات اللسعات الي اتعرضتلها على ايد جنان
.. لج ليش ما كلتينا بوكتها ليش سكتي

جان مستحيل اعوفج عندها دقيقة وحدة هاي مريضة نفسياً مو طبيعية مهووسة

.. محجيت لان جنت بعدني ممتأكدة من وجودكم بحياتي
بعدني خايفة بأي لحظة تتخلون عني وتعوفوني
مثلما سلمتوني الها واني طفلة بالكماط لاحول ولا قوة

كل كلمة تحجيها جانت بيها الف حسرة
مروة باوعت علية ورجعت باوعت لمريم
.. انتي حيل غلطانة ومتوهمة بتفكيرج
وبالذات شيماء الوحيدة الي جانت متمسكة تبقين ويانا وبحضنها
وحيل متعلقة بيج بس حكم القوي عالضعيف
هي هم مثلج اكو من يحكمها ويفرض عليها قوته
انتي الله سلط عليج جنان واحنا الله سلط علينا اثير

هو من اليوم العزمتينا بي
اني بديت اتغير واطالب بابا يوديني لبيت سليمة حتى اشوف شيماء

بس امي
اعرفها كلش زين حست بالتهديد من تقرب شيماء كل ضنها راح تاخذني منها

وجان البارحة تصدمنا كلنا بقرارها
من كالت اريد ازوج احمد لمريم

يعني انتوا شايفيين او سامعين وحدة تتزوج اخوها

جنت مصدومة وممستوعبة الوضع
حقي لان عشت طول عمري اشوفهم اخواني
وهمة هم بالمقابل يعاملوني مثل اختهم الصغيرة

اباوع على مريم كامت تحجي وتبجي
واني ومروة مصدومات من الي عرفناه
مريم .. هو حتى احمد من كالتله ماما
راح ازوجك مريم

جاوبها مصدوم .. ماما شنو هذا الحجي استغفري ربج
ما يجوز شلون ترديني اتزوج اختي
يعني بنات العالم خلصوا ما لكيتي الا مريم اختي
اتزوجها

جنان .. لا هي مو اختك هي بنت عمك وانت تعرف كلش زين
وانا اخاف عليك ما اريدك تاخذ غريبة مثل اخوك حسن وتروح وتعوفني

احمد بالذات جان دائما يعاملني بأخوية بس مع الاسف
تسلط امي وتحكمها
كلمتها عليهم تمشيها مثل السيف
ومثل كل مرة احمد يستسلم ويخضع لكلام امي
لان هو صحيح حباب بس ما عنده شخصية

واليوم هي اجتي تبلغني استعد حتى تاخذني للسوك وتجهزني للمهر
اني رفضت وكلتلها مستحيل اوافق عالزواج مو بكيفج اني اتزوج

هي سمعت ردي منا وهي تخبلت

صارت تضرب بعصبية بية بحيث فقدت كل اثر للتعقل

جنت بلحظتها كلش خايفة على نفسي
خاف تسوي بية شي ومحد بالبيت يخلصني منها

وصدك جان شكي بمحله جان عالميز مالتي
مبرد مال اظاهر

كبل لزمته وضربتني على وجهي وهي تتوعد وتتحلف
تكلي اموتج اذا رفضتي
اليوم يجي ابوج يسألج تبلغينه موافقتج
وحتى لو رفضتي اخلي يذبحج

جنت اتلمس بوجهي خايفة بس من شفت
الدم احس راد يغمى علية من الفزع

وحجيت .. انتي انسانة مريضة ولازم تتعالجين
هي ما انطتني مجال اكمل كلامي كبل هجمت علية وبيدها المبرد

صرت اتلاوة وياها واختل توازني ووكعت بالكاع وهي
صارت فوكي
جنت ما افكر بأي شي غير شلون اخلص نفسي من بين ايديها لان نيتها واضحة تريد تشوه وجهي

رفعت المبرد ووجهته علية واني لزمت ايدها امنعها
حتى متوصل لوجهي مرة اللخ
بأثناء مجنت اتلاوة وياها وكع منها المبرد وكبل لزمته وطعنتها بيدها بدون ما احس على نفسي

صرخة بألم ولزمت ايدها مكان الطعنة وكامت تنزف
واني كبل دفعتها ما اعرف منين اجتني القوة
بس يمكن الخوف ينطي قوة خارقة وارادة للحياة عجيبة

من دفعتها وبديت اكوم بس هي لزمتني من رجلية
.. ولج اليوم محد يخلصج مني
جنت شبه واكفة بس ممسيطرة لان هي جانت تسحبني من رجلي حتى يختل توازني اوكع

رفعت راسي وجان اشوف الشاحن USB
جان كلش ثقيل صرت اتصارع بية ما بية حتى اوصله
شلته بكل ماعندي من قوة وضربتها براسها
بدون شعور هي وكعت من اول ضربة
واني كبل ابتعدت عنها

بس منا على ما استوعبت اني شنو سويت
وشكبرها المصيبة الي وكعت على راسي
كان وقتها فات الاوان عن التراجع بأتخاذ القرار
والموضوع طلع من ايدي وبكل ضني هي ماتت لان
اتحركت والدم كام يطلع منها بغزارة

ما اعرف شتصرف بوقتها بس صرت اتبع اوامر عقلي
المفزوع كبل طلعت من البيت اركض مثل المخبلة
ومالكيت روحي الا واني بباب بيبي سليمة
يا الله جانت وتحجي مردت كلبي

لميتها بحظني .. كافي بجي ولتخافين
جنان عايشة ما بيها شي كدروا يتلاحكولها
ضمت راسها بحظني وهي ترجف

.. مريم اريدج توعديني تصيرين قوية وتوثقين بية
اني مستحيل اتركج لو على موتي

رفعت راسها وباوعتلي والدموع معلكة برموشها
وحجت بوهن
.. تدرين شيماء اكو قانون عدنا بالفيزيا يكول
لكل فعل توجد هناك ردة فعل تعاكسه بالاتجاه
تساويه بالقوة

اني جنت متحملة افعال جنان لان جانت ردة فعلي
ضعيفة غير مدعومة
بس وجودج شيماء بحياتي اعطاني القوة الكافية
لحتى اوكف بوجه جنان واواجها واعترض على كل ظلمها

دك نقالي وجان المتصل هدى تتطمن على مريم وصرت احجي لهدى عن الصار بمريم
وانتبهت لمروة كامت من مكانها واخذت مريم
حتى تنام

خلصت الاتصال وجان تجي مروة
.. ها مريم نامت
.. اي انطيتها شوية حبوب مهدئة حتى تساعدها تنام

لان الصار هواي على عقلها يتحمله
كعدت بصفي عالقنفة وصارت تباوع كدامها صافنة

..دك نقالها وردت وجان المتصل زوجها
مروة.. رافد شوكت ترجع من السفر
مشمش تسأل عليك
.. تمام باجر ورة الظهر ادزلك السايق يجي ياخذك من يم المطار
يالله لعد ننتظرك عالغدة على فكرة شيماء ومريم اختي يمي
.. الله يسلمك
انهت الاتصال وباوعت علية تبتسم
.. رافد يسلم عليكم
.. الله يسلمه
اكول مروة ترة اني من هسة اكلج باجر ارجع لبيتنا
ومريم تبقى يمج
.. لا لا مستحيل لا تفكرين بيها مال اعوفج ترجعين لاثير انسي حبيبتي

.. لا مروة لحظة هذا الشي خاص بية محد اله دخل بي
مستحيل ارضى على نفسي اعيش وية اختي وزوجها

شنو شكلج نسيتيني اني شيماء اختج الجبيرة
الي اتحملت ذل وقهر سليمة واتجرعت كلشي
بس بقيت عندها ما طلعت برة بيتنا
مهما يكون يبقى هذا بيت جدنا واحنا غصباً عليهم يخلونا نعيش بي

بس بيت زوجج لا اشوفها واكفة انتي وزوجج تردون تاخذون راحتكم لوحدكم بخصوصياتكم اني شكو كاعدة بينكم شنو خراعة خضرة مثلا

.. ههههه حيل انتي والله رايحة بعيد
حبيبتي شيماء هذا البيت والعيادة والمركز كلهم بأسمي
سويتهم بتعبي رافد ماله اي شي بحلالي
لج هو حتى السيارة الحديثة الي راكبها اني مشتريتها اله
رافد صحيح من اتزوجته جان عنده ورث ابوه بس هو صرفه على اللعب والدياحة
هو طبعه صراف تلاف عكسي تماما

.. اكلج هسة هو شنو يشتغل
.. دكتور جامعي ينطي محاضرات
وراتبه ما يكدر يوفرله البذخ الي عايش بي هسة كله بحلالي وبتعبي
لذلك اريد تخلين ببالج هذا بيت اختج معناها بيتج

.. حتى لو ما راح يغير من تفكيري شي ابقى متطفلة على حياتكم الخاصة
وادري بيج انتي خايفة علية من اثير
بس اتطمني اثير ما بيده شي يسوي
لان اني باب رزقه
محد يدفر نعمته برجليه الا مجنون واثير
من سابع المستحيلات ينجن

هدى

اليوم كعدت من الصبح واني افكر اطلب من قاسم يخليني اروح اشوف خواتي

لكيت خالتي وقاسم وهشام وهالة ديتريكون
دخلت عليهم بس جنت مترددة
ما اعرف ليش
ام قاسم شافتني اشرتلي اجي اكعد يمها

ام قاسم.. تعاي خالة كعدي يمي
شلون صارت اختج

.. الحمدلله الباغحة(البارحة) اتصلت على شيماء وطمنتني عليها
.. ليش هي شبيها اختج البارحة نمت وما عرفت عنها

.. خطية هاي زوجة عمي من الله لا يوفقها
ضاغبتها وحاغكتها (ضاربتها وحاركتها)
كله علمود تغيد (تريد) تزوجها لابن عمي امجد بالغصب

جنت مندمجة احجي وما حسيت الا على هشام
غص بأكله وكعد يكح

وهالة ضربت على ظهره وانطته ماي
ام قاسم.. شنو السالفة يمة على كيفك اكل ترة
الاكل ما طاير

اخذ الماي من ايد هالة وشربه ودنك يكمل اكله والوجه
صار احمر نار
التفتت علية ام قاسم
.. اي وهسة شنو شراح تسوون
.. والله مغوة (مروة) اختي اخذتها يمها بالبيت وتكول
ما اخليهم يزوجونها لاحمد لو على جثتي

قاسم.. زين هي ليش رافضة ابن عمها خو تتزوجه وتكعد وتسكت مو احسنلها من اثير وسوالفه التعبانة

.. مو مغيم (مريم) من هي وبالكماط اخذوها بيت عمي وتغبت (تربت)
عندهم وتشوف اولاد عمي احمد وحسن اخوانها
حتى همة يشوفونها اختهم بس تعال تقنع ياعاقل من الكباغ (الكبار)

هشام.. بس كلشي بالغصب الا الزواج

هدى.. اي والله كلامك صحيح اسأل مجغب (مجرب)

اباوع لقاسم خزرني وباوع لامه
وام قاسم رفعت حاجبها وكالت
.. ياخالة هدى البارحة اتمنيتج تشوفين قاسم

من عرف بيج ببيت اهلج وابوج وعمج هادين عليكم
وهالة كلتله روح الحك مرتك لا يفطسونها
لان هاي مخبلة ما راح تسكت عليهم

يمة .. يمة شسوة ماتعرفين شلون تخربطت احواله وشصار بي
اباوع عليه بسرعة ركض اخذ مفاتيح السيارة واخذ هشام وياه

اكله يمة انتظرني البس عباتي واجي وياكم
كلي يمة ما اكدر خليني الحك على مرتي لا يسوون بيها شي

اباوع لهالة فاتحة حلكها
زين ما طاح فجها بالكاع ومنططة عيونها
مبين عليها متفاجئة
شكل خالة ام قاسم صعدت عندها الحماوة

.. باوعت على قاسم وهو خربان ضحك
.. يمة فديته ابو بيتي

ام قاسم .. لج البارحة يالله عرفت معزتج عند قاسم
مو صح يمة قاسم
اباوع عليه اللكمة تارسة حلكه وكوة يحجي
جاوبها
.. امممم .. امممم

باوعتلي بأنتصار
خطية ام قاسم من يوم موقف العركة مال الغدة ببيت رهف
وهي تحاول تصلح بيني وبين قاسم
عبالها هي سبب التباعد بيني وبين ابنها المغوار

.. شفتي شلون يحبج. ما اوصيج انتي هم ديري بالج عليه

هشام يضحك.. لا يمة لا توصينها هدى ما محتاجة حب قاسم
عندها حبيب مستقتل عليها
باوع علية وكمل كلامه

.. لج هدى البارحة لو شايفة علاوي خطيبج السابق
شسوى اول ما شافنة اني وقاسم
ام قاسم.. عزة بعيني منين طلعلي هذا علاوي

هشام.. سمعي يمة جايج بالحجي
اول ما وصلنا لبيت اهل هدى ونزلنا من السيارة
لكينا ولد اجلح املح مصلبخ شكله صف خامس ابتدائي
انتبهت عليه جان يحوم يم باب اهل هدى
عبالك واحد مضيعله حاجة عزيزة

باوع علينا ينظرات تذبح
شنو مبين لو بيده ياكل قاسم بسنونه
وكف كدامنا وهو يهز بأيده باستهزاء

.. صلوات عالني. بعد وكت هسة يالله شرف الاخ
خاب روح الحك على هدى راح يسحلونها
هسه جاي يتمندل

عظ على كف ايده ويكول لقاسم
.. اااااخ ياحيف الله ينطي الجوز للماعنده سنون

هشام .. هههههه هدى لو تشوفين وجه قاسم شلون انقصف

هدى.. هشام ما اسمحلك تحجي على ختيبي السابق
اني حالفة بس تصيغ (تصير) عندي بنية ازوجها لعلاوي

اباوع لقاسم غص وصار يكح
كمزني من مكاني انطيته ماي
ام قاسم.. اسم الله يا ستار شجاكم يمة كل شوية واحد
غاص لا لا هذا فال مو زين

خلي اكوم ابخركم
عن العين شوف هذا منو الحاسدكم

وراحت ام قاسم
وقاسم .. احتركت عشيرتك هادي عندك طلعات بدون بريك

صافنة بوجهه هذا شبي .. هسة اني شنو كلت
همس يم اذني بغضب وكال
.. بنت اللذين بعدج على ذمتي وتفكرين تتزوجين وتخلفين بنية
وتحجيها هيج عادي كدامي
ادري شكالولج علية كرن اشو انتي هواي ماخذة راحتج

بلعت ريكي ابتسمت الطف الجو
.. هههههههههههه شبيك ياحظي جنت احجي عن حلم
من احلامي البعيدة
الله يلعنك كلبته كابوس من ورة الهبطة عمي بطلت بعد ما اتزوج
انتظر علاوي يكبر اوتزوجه

كام علية يريد يهد
واني طكيتها ركضة بيييييييب بيييييييب

شيماء
اليوم داومت بالمستشفى بعدما كنت ماخذة اجازة
تركت مريم يم مروة بالبيت
جنت خايفة اعوفها بس مروة كالت روحي ولا يظل بالج عليها

اني اليوم ما اروح للعيادة. ابقى بالبيت يم مريم
وبالمرة رافد اليوم يوصل مو تنسين
اليوم ننتظرج عالغدة

بلشت داومي بالمستشفى مثل كل مرة
مشاكل الدنيا نستني حتى سالفة حيدر
وخطوبته من الدكتورة

ومجرد ما اجة اسمه على بالي كلبي صار يخفق
ياربي كلبي شكله ما يتعض ولا يتوب وبعده يحب كتاله
صرت امشي وادور بعيوني عليه
بلكي اشوفه

رباب اليوم ممداومة وضوجة
لان عكب باجر عرسها
حبيبتي حتى ما اتصلت عليها اكوللها اليوم ما اكدر امر عليها

وقعت عالحضور واستلمت جدول المهام
واليوم اني وية الدكتورة سولاف

وبلشت اني وياها بالشغل وانظم المواعيد المراجعات
بعدما خلصنا
باوعت علية براحة
.. لج والله بخلافج اغرك هاي اليومين ضوجة وخبصة
تدرين ما ارتاح الا وياج احس الشغل يمشي عدل
والمراجعات يصيرون يدخلون بأنتظام
مو مثل هاي الفاهية الي اخذت مكانج البارحة كل شوية تدخل عشر مراجعات ويصيرون علية لمة وهوسة

جانت تحجي ودخل علينا منذر
سلم علينا
وكعد كدامها عالكرسي

سولاف .. اكول منذر بالله ما تشوفلي هذا صديقك استاذ حيدوري وين صار رحمة على اهلك
وصيته على اجهزة لعيادتي اشو راح بعدما شفته

منذر .. والله ما اعرف هذا الرجال محيرني احس بي خلفته ونسيته مدوخني كلي راح اسافر وارجع بسرعة
بس اشو ماكو
هاي الايام ماعاجبني حاله

همة يحجون واني حابسة الانفاس منتظرة يذكرون طاري الخطوبة بس اشو محد حجة

كبل جاوتهم .. يمكن انشغل بخطوبته
وما يكدر يجي لهنا
سولاف ومنذر باوعوا علية وضحكوا على كلامي

منذر.. لا يابة انتي شكد قديمة هاي يا خطوبة
يابة الرجال صارله سنة من خطب حتى انسى هو خاطب من كد ما طولها
بس لا مو هذا سبب غيابه اتوقع غير شي

سولاف .. هههه شومة حبيبتي روحي نامي
التفتت على منذر
.. عفية اتصلي عليه واكد عالاجهزة

اني كمت من يمهم مثل المضروبة على راسي
من الصدمة
اترخصت منهم وطلعت

مشيت وما اعرف رجلية وين تريد تاخذني
عقلي اخذ اجازة عن اي تفكير

سمعت صوت ام احمد تصيحني
التفتت عليها بالي مشدوه مدا يستوعب
السمعته

اجتي ام احمد وبيدها جنطتي
.. شيماء نقالج صارله ساعة يدك
بجنطتج

اخذت الجنطة من عندها وطلعت النقال
انقبض كلبي
لكيت عشر مكالمات لم يرد عليها من مروة
وخمسة من هدى
يمة بس لا صاير شي

كبل اتصلت على مروة وبسرعة اجاني الرد
ما سمعت بس صوت مروة المنهارة

.. لج شيماء لحكيني اثير وامجد جابوا الشرطة لبيتي
واخذو مريم من عندي بالقوة

يتبع

يتبع احبكم هواي احبكم كومة
اختكم نهى الحسون
☺️☺️☺️☺️☺️☺️☺️☺️☺️☺️☺️☺️☺️☺️☺️