مساء الخير احبتي وربي اشتاقيتلكم
منا ورايح راح يتم تنزيل البارت عالساعة
١٠ تبعاً للتوقيت الشتوي ☺️☺️☺️☺️
والنهار قصير
🌹🌹🌹🌹🌹🌹🌹
#اساور_الفضة_ج٢
#نهى_الحسون
شيماء
واكفة في ممر المستشفى على وجهي علامات الصدمة والذهول اباوع عاالنقال بيدي
خوف هلع كلمتين تعبر عن ما يدور بداخل عقلي
عقلي يردد كلمات مروة (اثير وامجد جابوا الشرطة واخذوا مريم )
.. ياربي دخيلك
والله مريم اختي راح تروح بالرجلين
ام احمد .. ها ياستار شبيها اختج
باوعت عليها والله حتى نسيت ام احمد
مشيت من يمها بسرعة حتى ما اعرف شنو جاوبتها
و رحت كبل على
الدكتورة سولاف وام احمد السستر
اجتي وراي تريد تفتهم شنو الصار
والدكتورة اول مشافت نظرات الفزع كامت من مكانها
هي والدكتور منذر
سولاف.. ها شيماء خيرج
.. دكتورة مريم اختي الصغيرة واكعة بشدة ولازم الحك عليها
وهسه اختي مروة اتصلت علية بلغتني
وضروري هسة اطلع من المستشفى عندي ظرف كلش حرج
الدكتورة سولاف تعرف خواتي وتصير صديقة مروة.
منذر .. شومة فهمينا شنو السالفة الاهل بيهم شي ؟تردين اجي وياج ؟
.. لا دكتور مشكور ما تقصر
بس اريد الدكتورة تساعدني حتى اطلع من المستشفى
سولاف .. حبيبتي شومة ولا يهمج روحي واني اشوفلج
حجة لطلعتج اذا سالوا عليج وكانت حالة طارئة بالمستشفى
عيوني دمعت ممنونة منها وبسرعة علكت جنطتي
على كتفي
ام احمد.. مكرودة يا شيماء من شفتها وشافتني
شايلة هم خواتها على كتافها.
طلعت بسرعة وتركتهم وراي
امشي بهرولة اريد اوصل لبيت سليمة
مروة اتصلت علية وكالت روحي لبيت سليمة اني جاية وراج
ياربي كلبي راح يطلع من مكانه وما اعرف بشنو دتفكر مروة
طلعت من للمستشفى واتجهت عالشارع العام
اجرت تكسي
وطول ما اني بالطريق لبيت سليمة
نقالي ما وكع مني
كل شوية اتصل على مروة وارجع اتصل على اثير
اريده يكولي وين اخذوا اختي وشسوو بيها
بس نقاله دائما يطلع مشغول
.. لخاطر الله رد .. رد جاوبني ليش مشغول
والله تلفت اعصابي
دك نقالي هدى
اهوو هاي هدى والله راح تجن
.. الو ها هدى
.. عفية شيماء راح اتخبل وين اخذوا مريم
رحت لبيت عمو امجد ادك ببابهم محد
طلعلي وهسة اني وصلت لبيت سليمة وهم ماكو
.. انتظريني هناك اني بالطريق هسة كلشي ما اعرف اتصرف
خلي اشوف مروة كالت انتظروني ببيت سليمة
هدى
سديت النقال من شيماء واني اروح وارجع بمكاني
سليمة.. ولج البكعة هم الج عين وتجين هنا لبيتي
هدى..اني ما جاية على بيتج
ولا اجيت علمود اشوفج
اجيت اغيد اعغف (اريد اعرف) اختي مغيم (مريم) وين اخذوها ولدج
اباوع عليها ميلت فتحتة دشداشتها وطلعت صدرها
وكالت .. وين الله واهل البيت كون يذبحونها هالعار
يمة اني كالت هيج احس سجينة ونبتتها بصدري
هديت عليها وجان اسمع صوت الباب يندك
رحت ركض فتحته لكيت مروة
.. ها. مغوة بشغيني (مروة بشريني )
باوعتلي وفاتت للبيت
.. اثير وين وصل لوبعده
..لا ماكو مموجود بالبيت
اباوع عليها رفعت النقال واتصلت
وحجت.. الو وين صرت اني ببيتكم. استعجل
صدكني اذا صار على مريم شي
تخيسون بالحبوس لو اعرف انطي العندي والماعندي
كون اخليكم تموتون بالسجن
سدت النقال وباوعت علية.. شيماء وين
.. بالطغيق (بالطريق)
مغوة (مروة) عفية كوليلي شنو غاح (راح) تسوين
.. انتظري خلي اثير العار.يجي كلامي راح يكون كله وياه
جنا واكفات نحجي بالمطبخ واندك الباب ووصلت شيماء
شيماء.. ها بنات بشروني مريومة ماكو خبر عنها
جانت تحجي وعيونها مغوركة بس متبجي
.. حالنا من حالج ماكو شي
مروة.باوعت علينا وجاوبتنا بنفاذ صبر
. بنات بس صبروا علية شبيكم هسه تشوفون وتسمعون
حجت ورفعت ايدها تباوع عالساعة
مروة.. استغفر الله وين صار هذا
وجان تجي سليمة وشافتنا
.. يا صلوات على النبي لفن بنات الفكر
اني ما يشرفني تدخلون لبيتي
جاوبتها .. اصلا احنا ما يشغفنا (يشرفنا) ندخل لبيتج
هسة هو بيتج فد مندلة خابصتنا خبص بيتي وبيتي الي يسمعج يصدك
اصلا بيتج البيت الابيض من ادخل بي ينكغب (ينكرب)كلبي
طالع على راعيته نحس اسود وصخم
سليمة.. ولج البكعة ام نص لسان
والله ثم والله اذا ما تطلعين من بيتي
هسة ااكوم اعيط والم عليج الناس انتي وخواتج
مروة عاطت بيها بصوت عالي خلاها تكمز من مكانها وتسكت بسرعة
.. كاااااافي شخبصتينا ببيتج
لا تخليني احط عقلي وياج والله العظيم كبل
اخليهم ياخذوج ويودوج بدار العجزة
تبقين هناك تحت رحمة الما يرحم
سليمة .. كولي اني مرة سبعة وسويها
جاوبتها مروة باستهزاء
.. الي عندها اولاد عار مثل اثير وامجد
المفروض تتوقع كلشي منهم
جاوبتها .. وولدي شنو دخلهم بية اني معايشه عدهم
اني كاعدة ببيتي ومحد اله حق علية وانتي ما تخوفيني بكلامج
مروة بحقد سنين مكتوم
.. شنو رأيج تحبين تجربين وتشوفين
شنو اكدر اسوي
ترة طردتج من البيت اسهل منها ماكو
مجرد تقرير من المستشفى يبين عدم صحة عقلج
وصعوبة السيطرة عليج وكبر سنج وغيرها من الامور
اما ولدج فما يحتاج اقتعهم راح يركصون بجفية من اكلهم
اشو همة يبيعون امهم وابوهم عالفلوس انطيهم كم فلس مقابل
ياخذونج ويحطونج بدار العجزة وهمة الممنونين
وهمة المستفادين من الي راح يصير
يبيعون بيتج ويقسمون فلوسه
سليمة كامت ترجف من الغضب
.. ولج انتي وحدة عار جاية من المنزول
والمثلج كلشي اتوقع منها تسوي
من الله لا يوفقجن انتي وخواتج
اريد كون رب العالمين يفرفح كلبج على اختج
راحت دارت وجهه ودخلت لغرفتها وسدت الباب
شيماء .. مروة عوفج منها مرية جبيرة لاتحطون بالكم يمها
ترة هي ما بيها خير بس السان متكدر تسوي شي
مروة.. خليها تستاهل اذا كنتوا. انتوا. متسامحين وياها
فاني لا
اختلف عنكم اذا الدنيا علمتني شي
فهو عدم نسيان الناس الي اذوني وحطم حياتي اني وخواتي
ابشرج كلبي صار اسود ما يرحم
من وراها هي واولادها
لحظات وجان يوصل اثير
دخل للبيت وصار يباوع علينا اني والبنات
وباوع لمروة
اثير.. كولي بسرعة شنو رايدة
مروة حجت وياها بكل برود
.. شوف اثير عندي الك عرض
بس قبل لا احجي اريد اعرف اختي مريم وين هسة خو ما اذيتوها
اثير.. من شوكت نزلت عليج هاي الحنية واتذكرتي عندج اختج
شوفي ولج انا ابوها احركها ابيعها ادفنها انتي مالج اي حق تجين تحاسبيني عليها
شيماء..لك مرة بحياتك صير اب بمعنى كلمة اب سويلنا شي زين بحياتك
حتى نتذكرك بي
انت شنو شايل من كلب اتوقع الي ينبض بداخل صدرك
حجر مال .. وسكتت
اثير عاط بيها .. اشششش ولا كلمة انتي بالذات تسكتين وما تحجين وياي
ترة سوايتج الناقصة وية الجماعة. لحد الان ما ناسيها
شيماء .. انت لي.........
مروة لزمتها من ذراعها
.. شيماء لحظة مو وكته هذا الحجي
خلي بالاول نلحك على اختنا لا تروح من بين ايدينا
لحد الان ما نعرف هسة هي وين وشنو ديسوون بيها
دارت وجها على اثير..
.. اثير كلامك صحيح اني مالي حق احسابك على اختي
لان انت ابوها موجود وتملك الحق بتقرير حياتها
يعني ولي امرها
لذلك اني اجيتك هسة حتى
اساومك اوقدملك عرض مغري مقابل
ترجع مريم من اخوك امجد وتبلغه
ان هو بعد ما يملك الحق على مريم
.. وشلون ترديني اروح اخذها منه وهو متكفل بيها صارله سنين
.. القانون وياك بصفتك ابوها تكدر تاخذها
من عنده شوكت متريد
وهو ما راح يكدر يعترض ويفتح حلكه وياك
اباوع لاثير صفن وحط ايده على حنكه وكعد يمسد بي
بتفكير وجاوبها
.. وشنو الي يخليني اسوي وياه هيج
وانا حاجتي يمه. وهو مصارله هواي من دايني فلوس
سيارة وخاف ما تدرين ترة عمج مسوي هواي فضل
براس خواتج
وهذني هنة كدامج وسأليهن على عطايا عمهن امجد وكفاته وياهن
هدى.. اي انت كلتها هو سوة فضل بغاسنا وكثغ الله خيغه (براسنا وكثر الله خيره)
بس هذا ما ينطيه الحق يظلم اختنا. ويأذيها
ويغيدنا (يريدنا) نسكت والله لان هو صاحب فضل
اثير.. ولكم انتوا شنو ما يكسر عينكم بسرعة تنكرون المعروف
هدى فتحت حلكي حتى اجاوبه
ومروة قاطعتني .. لحظة هدى
انتظري الظاهر صاير سوء فهم عند ابوج
ويحتاجله توضيح
.. شوف اثير خلي بمعلومك
ترة مصدر افضال اخوك الي صارلك ساعة دتحجي عنها ترة كلها من عندي
اني ورة كل فلس صرفه امجد على خواتي
شهكت مصدومة وشيماء باوعت لمروة متفاجئة بكلامها
اثير متفاجيء.. مستحيل ما اصدك هذا فلم منج
.. وليش مستحيل ترة لتنسى امجد يصير اخوك
والبطن الي حملك حمله
وهيج طلعة غريبة عليكم تكعدون تصرفون على اخواتي
انتوا اثنينكم تموتون على الفلس
يعني انت ما سألته شنو الحنية النزلت عليه بصورة مفاجئة
علموم هذا مو موضوعنا اني هسة موضوعي مريم
واريد احجي بي
شنو رأيك فلوس دين السيارة واجريلك راتب
كل شهر اربع ورقات. يعني اعتبرك موظف عندي بدون عمل
واسدد كل ديونك مقابل تكتبلي وتوقعلي كمبيالة صك
عقد حواجبه بشك .. وشنو راح تستفادين
.. اضمن وجود مريم يمنا ومترجع لبيت امجد
ها شنو كلت
صافن يدرس الموضوع وشوية حجة
.. والله طلع امجد مو هين اثاريه نايم على منجم ذهب
شوية وباوع لمروة وحجة وياها
.. خلاص هذا هو انا موافق بس قبل لا اوافق
اريدج تزيدين الراتب وتنطيني بدال اربع ورقات
اريدهم تسويهم سبع ورقات
مروة بنفاذ صبر
.. شوف اثير حتى اكون وياك صريحة راح اجي وياك للطريق
وانطيك بس خمس ورقات بالشهر
انت لهنا حدك وعرضي ما راح اغيره
لا عبالك تريد تستخدم مريم اختي حجة وتكعد تضغط بيها علية
ترة صدكني اذا رفضت انت الخسران
لان بيك بدونك
اني راح اخذ مريم وغصب عالكل عندي ظهر قوي
عن طريقهم اكدر اوصل لاختي واخذها
وبشرط كدام عيونكم وتشوفون
اثير بنذالة.. لعد ما دام انتي هيج قوية المن جايتني
ما ترحين للناس الي كاعدة تحجين وتزامطين بيهم وتاخذين اختج
.. ما ردت اكبر الموضوع وادخلهم ويتأذة احد بيكم
مهما يكون انت اسمك موجود ورة اسمي بالهوية
وهذاك الثاني عمي وماريد انزل راسي بيكم
كلت اقترح عليك هذا الحل ان رفضت راح اضطر
اروح اطلب منهم يوكفون وياي ويبطشون بيكم
ومن غير ما يرفلي جفن
ها شنو كلت تحب تجرب وتشوف بعينك اني شنو اكدر اسوي
لو تخليها بينا احسنلك الك ولاخوك
جانت مروة تحجي وية اثير بكل دم بارد
اثير .. خلاص هاي هي اتفقنا بس ها تسلميني الفلوس
يالله اوقع على اي ورقة
مروة.. تمام
بس قبل لا اسوي اي شي اريدك هسة تروح تجيب
مريم اختي من امجد وكدامي
بهاي اللحظة
.. اي بس كون من اجيبها الكاج محضرة الفلوس
كام من مكانه
ومروة كامت وياه
وكفت كدامه ورفعت نقالها واتصلت
كدامه حجت وية رجال اسمه ابو ياسر
يجيبلها المبلغ وانطته عنوان بيت سليمة وكلتله اني انتظرك
نهت الاتصال وباوعت لاثير وكالت
.. وهاي اني نفذت وعدي الك
يالله اتحرك شنو تنتظر
.. خلاص انا رايح لبيت امجد اجيبها
حجيت بسرعة
.. عمو امجد مو بالبيت اني غحت (رحت)عليهم قبل لا اجي لهنا
واذا تغيد تغوح (تريد تروح) تاخذني وياك
شال نقاله واتصل على امجد وفعلا ماكو رد
رجع اتصل عليه وهم ماكو ورد
زادت نظرات القلق بعيون المتبادلة بيني وبين خواتي
والترقب الي احنا بي
ما ارتاح الا اشوف مريم اختي كدامي
اثير.. هذا شبي ميرد
بالله خلي اتصل على احمد
اتصل على احمد ورد عليه
اسمعه يكله ابوك وين
ذاك مدري شنو جاوبه
واثير راح يركض للباب
واني والبنات ركضنا وراه عرفنا اكو شي صاير يخص مريم
.. يعني شنو سوة بيها احجي كول
ما حسينا الا واثير كام يسب ويغلط
انهى الاتصال
وكال .. احمد يكول امجد اول ما داخل للبيت
دخل هو ومريم بالغرفة وقفلها
يكول ما كدرت اخلصها منه بس اسمع صياحها
لحظات وجان ينقطع صوت مريم
وابوي طلع من الغرفة وقفلها
وكال يالله امشي خلي نروح لامك بالمستشفى
وهسة هو بالمستشفى يم جنان وحابس مريم لوحدها بالبيت
كمل كلامه عالسريع وهو يمشي لباب الشارع
فتح باب الشارع يريد يطلع
مروة بغضب .. انتظرني اروح وياك رجلي على رجلك
شيماء.. واني همين اخذوني وياكم
من الله لا يوفقه لامجد
واني مكلت شي لان بيهم بدونهم اني اروح
لبيت امجد لو اعرف اطفر السياج كون اوصل لمريم
سودة علية اختي
ما اكدر اتخيل خوفها ورعبها بذيج اللحظة لوحدها
لاحول ولا قوة
صعدنا بالسيارة وية اثير ومروة اتصلت عالرجال وكلتله انتظرني لتجيب الفلوس هسة
اني بعدين من اتصل عليك جيبهم لان حتمال
الشغلة تتأخر جانت تحجي وتباوع لاثير
اثير جاوبها معصب .. والله احرك البيت على راس امجد اذا مسوي بيها شي
مروة.. الله عليج يالدنيا
صدك الفلوس تصنع المعجزات وتخلي
اثير يخاف على بنته
اباوع لا اثير معصب رفع نقاله واتصل على احمد وكله
.. انا جاي بالطريق لبيتكم
روح اخذ المفتاح من ابوك وتعال بسرعة خلي نلحك للبنية بس لا مسوي بيها شي
وصلنا لبيت امجد
ولكينا احمد هستوة واصل
قتح الباب ودخلنا واتوجه للغرفة الفوك
وفتح الباب الغرفة بالمفتاح
وجان نلكة مريم مكرفصة على نفسها بزاوية الغرفة وترجف والشعرها مهوش
ركضنا عليها مروة لزمتها
لكت حرارتها مرتفعة
مريم صاكة على اسنانها
الغريب بالامر ما لكينا عليها اي اثر للضرب غير بس خدها وشعرها المهوس
وبقوا مروة وشيماء يستكشفون جسم مريم بخوف
ويتفحصون اثار الضرب خاف مسوي بيها شي
واني رحت ركض بسرعة جبتلها ماي
ومروة اخذته مني
انتبهت لشيماء ممدتها بالكاع
ورفعت ثوبها
وجان نشوف زرها الايسر كله اثار حرك
مشوه
اقترب اثير يريد يشيلها وكال
.. وخروا عنها خلي ناخذها للمستشفى بسرعة
مروة بعدما عاينت حروق مريم
كالت بكل غضب
لا راح اخذها وياي لبيتي
واجيبلها دكتور يشرف على حالتها واني وشيماء نتعاون سوية
المستشفيات كلها ملوثة
فأخاف عالحروق تتلوث
شيماء.. اني من رأي مروة
اثير.. لعد يالله خلي ننقلها للسيارة
احمد كال.. عمو بس اخاف بابا ميقبل تاخذها مروة
جاوبته بكل حركة كلب
.. خاب ما تطيغ (ماتطير) انت وبابا
من كل عقلك هسة احنة نكعد ننتظغ حضغة (ننتظر حضرة) بابا يجي ويأذنلنا ناخذها
.. هدى انتي لا تدخلين ثقي بالله ابوي اذا عرف بيكم ماخذينها تصير كارثة
.. اكلك احمد غحمة (رحمة)على اهلك متكلي هاي يا كلية
سلمتك شهادة الصيدلة
عقد حواجبه مستغرب .. شنو قصدج
.. لا هيج بس اغيد اعغف (اريد اعرف )كمية الغباء الي شايلها
حتى اسوي حساب للجينات الوغاثية (الوارثية) خاف
توصل لجهالي كلشي يصيغ (يصير)
.. احترمي نفسج واحجي عدل
.. بالاول احجي كلام منطقي معقول
وتالي تعال طالب بالاحتغام (بالاحترام)
بس العتب مو عليك العتب على سواية امك وابوك
بحق اختي بس وداعتك حوبة اليتيم ما تضيع عند
الله
اثير صاح على احمد
.. تعالي خلي نتعاون وننزلها
لكيت شيماء ومروة حاطين مريم عال شرشف
واحمد واثير اتعاوني وحملوها من اطراف الغطا
اني كبل رحت افتح بالمجرات مال غرفة مريم
اجاني صوت شيماء من وراي
هدى شنو دتسوين
جاوبتها واني ادور.. مثل متشوفين الملم كتب مريم وملازمها
مباقيلها شي على امتحاناتها وهاي فرصتنا الوحيدة
حتى ناخذ كل غراضها ما اريدها ترجع لهذا لبيت
شيماء رجعت للغرفة
.. عفية عليج لعد خلي اخذلها ملابس المدرسة
وبسرعة بسرعة كدرنا ناخذ كل الي يفيد مريم
طلعنا جنطة جبيرة بيها كراكيب
نفضناها بالكاع وحطينا بمكانها
الكتب والملازم والدفاتر
وملابس المدرسة فقط
.. ما اريد مريم تفشل بالامحتانات واشمت جنان بيها
اجتي مروة وشافتنا دا نسد بالجنطة
.. يالله ما تكولولي وين صرتوا
ترة اتصلت على الدكتور
وهسة على وصول لبيتي
شيماء.. يالله هذا هو خلصنا
مروة دتنزل ويانا عالدرج وتباوع للجنطة
.. متكولون هاي الجنطة المن
.. لكتب مريم وغراضها المدرسية
.. اها عفية عليكم زين تسون
بعدما وصلنا لبيت مروة
جان الدكتور واصل استلم مريم هو ومروة
وبعدها اني وشيماء والخدامة اتعاونا
على غرفة الضيوف ببيت مروة كان بيها سرير ابو النفر
عقمنا الغرفة كاملة بالديتول لان الحروق كانت قوية
والغرفة نظيفة بس محد مستعملها قبل
الدكتور من زملاء مروة جان اختصاص جلدية
بعدما كشف على مريم
كال .. ترة البنية متعرضة لحرق حديد ساخن وبالاحرى هاي اثار لسعات سجين
والحروق الجديدة عددهم ثلاثة
بس اكو اثار حرق قديم
واشر لمروة عليهن حتى يشرحلها
شيماء بخوف.. يعني دكتور وهسة اختي شنو
.. لا تخافين اختج ما بيها شي الحروق سطحية
مو كلش عميقة بس ارتفاع حرارتها
لان الحروق الجديدة فوق الحروق منطقة الحرق القديمة والتهبت
كتب على ورقة وسلمها لمروة
.. مروة اريد هذني الادوية والدهون الادوات هسة ضروري
تعرفين لازم بسرعة حتى ابدي اسلخ الجلد واضمده
ومروة انطت الوصفة للحارس
وبعدها بلش الدكتور يشوف شغله وشيماء يمه واني
طلعت برة يم مشمش الي جانت خايفة من شافت مريم هيج دخلوها
تباوع بعيونها وكل شوية تسأل هدى
.. ماما ليش عصبية
حضنتها
.. ماما مو عصبية ماما خايفة على اختها مغيم لان مغيضة (مريم لان مريضة)
هزت راسها توافقني .. اي سحيح
اني من اتمغض ماما تضوج
باوعت لمروة نزلت جوة وعرفت بيها رايحة لعند اثير
حتى تكمل اتفاقها لان اثير بقى هنا معسكر
ما قبل يطلع
بقيت مشمش يم الخدامة جوة بالمطبخ ورحت ورة مروة
دخلت ولكيتها دتتصل على الرجال
وبابا كاعد بكل صلافة عين حتى ما كلف نفسه يسأل
شلونها اختكم
دقايق واجة ابو ياسر وبيده الفلوس الصكوك والختم
دخل للاستقبال وسلم علينا ومروة عرفته علية
.. اختي هدى
.. اهلا وسهلا
واني هزيت راسي ..اهلا بيك
وهملت اثير وطلبت منه يتفضل وصاحت للخدامة حتى تقدم عصير لابو ياسر
اباوع عليه جان شكله مرتب وانيق يجي عمره
بالاربعين جان كلش رزن وهاديء هذا الانطباع الاول الي اخذته عنه
اباوع عليه
سلم الفلوس لمروة وحجة وياها بخصوص المعاملات القانونية
ومروة حجت وية اثير وهو وافق على كلشي
وكعد يقرا كل ورقة بخصوص الفلوس والوصل
المستلم ووقع عالصك وابو ياسر ختمه
وطلب من مروة هم توقع بصفتها هي صاحبة الفلوس
حتى تضمن حقها يعني بأختصار سوت مصادقة وضمان حقوق خاف اثير يلعب بذيله
بعدها كام واستاذن يريد يطلع
مروة.. وين طالع بعد وكت حتى ما ضيفناك
ميصير هيج
.. لا ما الحك والله عندي كومة شغل
بس تعرفين معزتج عندي ما كدرت اكلف اي واحد
بهاي الشغلة كلت انا بيدي اودي الفلوس واشرف على المعاملة
راح اخلي نسخة يمي بالحسابات ونسخة يمج
يالله مع السلامة
مروة .. اشكرك ابو ياسر تعبتك وياية اردلك اياها بالافراح
جان يبتسم لمروة ماباوع على ابوية عبالك مموجود
سلم وطلع
وبقينا احنا واثير
مروة رفعت الورقة وباوعت على اثير
.. اثير شايف هاي الورقة خاف تفكر تلعب بذيلك وياي
وتتراجع بكلمتك وتجي تطالب بمريم او بفلوس زايدة
كبل اخذ هاي الاوراق وبوجهي للشرطة وتعال الكة الي يطلعك من السجن
اثير.. ميحتاج تفهميني اعرف وانا همين اكلج
اي لعبة او تأخير من عندج بالفلوس
تلكيني كبل ساحب منج مريم واسجلها بأسم امجد
ترة الشي متبادل حتى لو بعدها اروح للسجن
حتى ما تستهانين بية
سلمته فلوس الدين الي عليه من امجد
وانطته راتبه خمس ورقات وكالت
.. كل شهر بهيج يوم تجي تستلم راتبك من الحارس الشخصي الي موجود عالباب
كام وشال علاكة الفلوس وكال تمام
دار وجهه وطلع يعني قبل لحظات اكول ليش مروة
ما عرفت اثير على الرجال
بس هسة ادركت ليش هي اتجنبت هذا الشي
فعلا اثير ما يستحق كلمة اب حتى لو كانت جذب
وبعد ساعتين مريم متمددة بسريرها
امنة وبدة الدم يرجع لوجهة. دليل على راحتها
وشيماء عدلتلها شعرها وبدلت ملابسها
واني سويتلها شوربة عدس واستردت وعيها من اول ربع ساعة
بأثناء ما جان الدكتور هنا
وشيماء بدت تشرف على اخذ علاجها بالاوقات المطلوبة
جنا ثلاثتنا كاعدات يم مريم
سمعنا صوت الجرس
مروة .. هذا يمكن رافد
لبست شالي على راسي
لحظات وجان تدخل علينا ضحى هي وعبايتها والدموع على خدها والوجه اصفر
ضحى.. ولكم ليش اني اخر من يعلم خليتوني اروح على عمة وجهي لبيت سليمة واتلكتني بالحجي واجيت اتخبل من كالت روحي لاختج الصغيرة مدري ميتة مدري عدلة
اتصل عليكم ولا وحدة بيكم ترد ادري اني مو اختكم
جاوبتها
.. يبووووو نقالي جوة بجنطتي
شيماء راحت حضنت ضحى ومسحت دموعها
.. حبيبتي حقج علينا بس والله لو تعرفين شلون جنا مخبوصات
بالي صار وية مريم
ضحى تناشغ بصوت متقطع
.. اي بس سليمة كالت موضوع مريم من البارحة صاير ليش مكلتولي
يعني اني فوك ما سيف خانكني انتوا هم تتخلون عني وتبعدوني عنكم بالزايد
متتواصلون وياي
جانت تحجي وراحت كعدت عالسرير بصف مريم
وباستها من راسها
.. مريومة حبيبتي الحمدلله على سلامتج حرامات اني محسوبة عليج اخت جبيرة
مريم بصوت ناصي ابتسمت
.. ضحاوي لتكولين هيج انتي معذورة واني ابقى احبج
ضحى.. طبعا تحبيني غصباً عليج غير اختج
بس والله بعدني مقهورة لان محد يهتملي ويبلغني بالي يصير مو مهمة
مروة.. ضحى ترة احنا ماكلنا لج ندري بيج ما بيدج شي تسوينه لمريم
ادري بيج تنقهرين وتظلين تاكلين بروحج ورجلج ميخليج تجين
.. صحيح كلامج اني ادري بروحي انسانة فاشلة
وكل خير ما بية
ولابية نفع لا اقدم ولا ااخر على كولت عمتي ام سيف
بس ميخالف على الاقل اكون وياكم بكلبي ادعيلكم اتطمن عليكم
كسرت خاطري ضحى بكلامها هاي هم حظها
رحت عليها وحضنتها وبستها من خدها
.. حقج علينا ام دميعة عذغينا (عذرينا)ما دزينا عليج
من صاغت العغكة (صارت العركة) وية ابوج وعمج
اي والله حغامات (حرامات )جان حصلتيلج فد كم غاشدي (راشدي)على كم بوكسي
خاف معوزة من سيف شوية
تتونسين بيها ويانا عالواهس
لطمت على صدرها
.. عزة بعينهم لاتكولين ضربوكم
اني عبالي بس مريم صاير بيها هيج
.. خاب شوف هاي لج الباغحة صاغت الحغب العائلية الثالثة
(البارحة صارت الحرب العائلية الثالثة)
وداعتج لو تشوفين اخوج هادي الباغحة (البارحة)
صاغ (صار)جاكي شان كل شوية واحد جاي ساحلها
شنو سوني جيس ملاكمه ابوج وعمج
والحبل الي معلكين بي الجيس شعغي (شعري)
جنت احجي بتحشيش والبنات يضحكون على كلامي
سمعت صوت مريم الناصي كالت
.. هدى شكد احبج كلما اشوفج تحجين هيج اضحك
.. لعد خلي انطيج سبب اقوى من هذا اخليج من صدك تضحكين
مريم .. كولي الله عليج
.. اليوم من دخلنا لبيت جنان حتى ناخذج
التفتت لشيماء وكملت كلامي
.. شيماء تتذكغين (تتذكرين) من كلتلج خلي نجمع كل كتب مريم وغراضها المدرسية
.. اي اتذكر واني وياج جمعناهم
بس انتي طلعتي مدري وين وتركتيني لوحدي اجمع الغراض
.. لج لو تدغين (تدرين)اخوج هادي شسوة
البنات كلهم على فد سؤال
.. ولج شسويتي
.. هههههه اباوع
الناس بالناس واخوكم هادي عايف الهوسة كلها
وغايح يخغب (رايح يخرب) بييت جنان
وداعتج استغليتها فرصة هي ما موجودة وابنها الفاهي
غاح وغة اثيغ العاغ (راح ورة اثيرالعار)
وجان اباوع للبيت العزيز واكله
هاااااا وين صاحبك يابيت اليوم محد يخلصك مني
وين يغوح (يروح) المطلوب النا
هي عشغ (عشر) دقايق ما بقيت شي عزيز على كلب جنان ما كسغته (كسرته)
من تحفيات على مواعين على مغاية غغفتها وعطوغها (مراية غرفتها عطورها)
انتوا مو هنا المصيبة المصيبة اخاف احمد يسمع صوت التكسيغ (التكسير)
ويجي علية تلكيني اغوح واغجع (اروح وارجع )عالحمام حتى محد يسمع
يمة بس شنو انكطع نفسي وطاح حضي تعبت
اثاغي (اثاري)اعمال الشغب والتخغيب (والتخريب) هم تهد الحيل
جنت احجي والبنات خربانات من الضحك
.. اخيغ (اخير) شي غحت لكنتوغ ( رحت لكنتور)جنان
بسغعة غكض (بسرعة ركض )طلعت ملابسها كلهم بالكاع
واتذكغت (اتذكرت) من غحت (رحت) اجيبلج ماي
لكيت بطل كلوغ قاصغ (كلور قاصر)
وجان اغكض مثل القغد اطفغ عالدغج (اركض مثل القرد اطفر عالدرج)
واجيب القاصغ (القاصر)واحطه فوك الملابس كلها
واغجعهم بالكنتور(وارجعهم بالكنتور)
وجان اسمع صوت مغوة (مروة) دتصعد الدغج (الدرج)تستعجلنا
غحت (رحت)طلقة يم شيماء وكعدت اساعدها حتى اسد سحاب الجنطة
شيماء بضحك .. واني عبالي نزلتي جوة يمهم تساعديهم اثاري الاخت لاعبة طوبة
ضحى بضحك .. بعد الجني الهداوي اذا ظهر يخرب الاول والتالي مو بيده
جنا نضحك من كل كلبنا والله صارلي كومة ما ضاحكة هيج ضحكة
وعلى طاري الضحك وجان تدخلي الخدامة وبيدها جنطتي وحجت وية مروة
.. ماما هذا جنطة في نقال يرن
واني اضحك .. تعالي ياكلب ماما
شبيك انتى ما يعغف (يعرف) هذا جنطة مال انا
اخذت الجنطة منها وطلعت النقال منها وجان الكة
خمس مكالمات لم يرد عليها قاسم
واني راسا سديت حلكي الجالكته بالضحك
دمغت كصتي واني اتذكر اهوووووو هاي شلون نسوة ياربي
شيماء.. شنو شبيج شكو
.. مو اني اليوم من اتصلت على مغوة حتى اطمن على مغيم
فاجئتني بالخبغ (بالخبر) وبساعتها من خوفي لبست عباتي واتصلت على قاسم
ماكو ما جاوبني علية اكثغ (اكثر) من سبع مغات(مرات) دكيت عليه
وفوكاها خالتي ام قاسم طالعة من البيت عندها واجب
عاد اني ما بية صبغ تدغين (صبر تدرين) بية
شيماء.. ادري بيج مخبلة وماعندج عقل وبسرعة تتسرعين
يعني لا تكولين انتي طالعة من البيت بدون علم زوجج
هزيت راسي بالموافقة
ضحى .. لا والاخت كاعدة بكل ثقة ومسيطرة
تحشش وتسولف ويانة ورجلها حارك النقال حرك بالمكالمات
باوعت عليها واني مسيطرة
.. وليش شنو صايغ تغة (صاير ترة )مو صوجي صوجه
هو ما يغد (يرد)على مكالماتي وخالة جانت ماموجودة
اني ممسوية غلط عذغي (عذري) وياية
وجان يرجع نقالي يدك كلبي كمز من مكانه
قاسم يتصل بك
وكع النقال مني وعيوني زغللت اباوع عالشاشة صرت اقرها
(قاسم متحلف بك ) مو متصل بيك
كبل اخذت النقال وجاوبته
بس ياريتني ما رديت
بعدني ما كلت
.. الو
كبل اجاني رده
.. شوفي ولج اني بالشغل راح ارجع للبيت الكاج كدامي
وبعدين نتفاهم
جان يحجي بكل غضب يطرش الاذان
وسد النقال
باوعت عالبنات وبلعت ريكي
والخوف بدة يزحف لكلبي
هسة يالله حسيت على كبر غلطتي
وحجيت .. عزة شكلها جنان شوغت (شورت) بية
شيماء كامت من مكانها وخزرتني
كومي كدامي خلي ارجعج لبيت عيالج
والله لو اعرف بيج ما كايلة لقاسم جان ما خليتج
تبقين هنا لحظة وحدة
مروة كامت من مكانها
.. يالله لعد اني راح انزل احضر سيارتي
وانتوا تعالوا وراي
شيماء ومروة يحجون واني بطني بدت تمغصني
باوعت عليهم بخوف
.. يعني حسستوني عبالك لازمين طالب مهزوم
من سياج المدرسة وتغيدون (تريدون) تاخذوا للمدير بيدكم
شبيكم شو راسا كلبتوا علية ولا عبالك اني اخوكم الصغيغ (الصغير) هادي
مروة هزت ايدها ونزلت جوة
وشيماء بصوت حازم .. يالله اتحركي بلا حجي زايد
هسة كون هذا اللسان الطويل بي خير كدام قاسم
جان ارتاح كلبي بس ادري بيج بوخة
وصلوني شيماء ومروة وعلى طول الطريق
يرزلون بية شلون اطلع بدون علم قاسم وينصحوني
واني كاعدة وساكتة مدنكة راسي
ما اجاوبهم
وصلت للبيت عيالي ونزلت شيماء وطلعت خالة ام قاسم فتحت الباب
وسلمت على شيماء وباوعتلي وخزرتني جان و وجهة ثكيل علية
شيماء.. خالة حبيبتي اني اجيت اعتذرلج عن طلعة هدى
ام قاسم.. هسة تعالي فوتي دخلي للبيت خو ما تكوفون بالباب
شيماء.. لا خالة كلج خير وبركة خليها غير مرة
بس اريدج تعذريها لهدى جانت خايفة ومخبوصة
ام قاسم باوعتلي وكالت فوتي جوة خليني احجي وية اختج
عرفت تريد تحجي وية شيماء وما تريدني اسمعها
مشيت من يمهم بس سمعت ام قاسم قبل لا ادخل للمطبخ
كالت لشيماء
..والله خالة شومة ولو طلعت اختج
جبيرة ما ينسكت عليها
دخلت للمطبخ
واول مدخلت اتلكتني هالة تركض
هالة.. هلة .. هلة
شرفت المرحومة لج لحكي على نفسج واقري سورة الفاتحة كبل لا يجي قاسموف
عيوني غوشت وهمست بصوت ناصي
.. عزة بعينج هو اني ناقصة خوف وانتي كاعدة تعددين
كمت اباوع منا ومنا مثل الحرامي
.. اكول اخوج زوجي العزيز هغقل(هرقل) وصل لو بعده
.. لا بعده ما واصل بس حرك النقال على امي وظل
يتحلف ويتوعد وحتى عصب على امي يكللها انتي
مو بالبيت شلون تطلع وانتي ماعندج علم
صعدت فوك لغرفتي وهالة صعدت وراي
دتنقلي موجز الاخبار
باوعت عليها .. اكلج خاف جان عندي بكلبي شوية امل
اتفاهم وية اخوج هسة بعدما سمعت المقتل منج
ايست من رحمة الله
ولج هالة كليلي وين اغوح (اروح)
اذا قاسم اخوج يجي
هالة .. والله حبيبتي الله يساعدج بالحقيقة ما اتمنى مكانج
اني كلتلج قبل لا ترحين
يابة كعدي ببيتج وسكتي وانتظري رجلج
بس انتي وين جنتي بغير عالم
.. زين على الاقل ساعديني وكليلي مو انتي صديقتي المن الجيء
اي صدك لو اغوح (اروح) اختل وغة (ورة) خالتي قاسم
ما يكدغ (مايكدر) يتجاوزها ها شنو غأيج (رأيج)خوش فكغة (فكرة)
هالة .. ياربي هاي البنية عوبة والله عوبة
اكلج حرك النقال على امي وامي زعلت عليج
وعليه لان كام يصيح عليها
بالحقيقة ما انصحج ترحين يم امي وتطلبين منها
اللجوء
اقترح عليج تطلعين نفسج بنفسج
وتدبرين امرج انتي لوحدج وياه
كلامها زادني توتر وخوف وكمت اروح وارجع بالغرفة
وفجاءة وجان اسمع صوت قاسم العالي يرعد جوة بالبيت
كمزنا اني وهالة من مكانة ووحدة تباوع الثانية
هالة ..اني طالعة لا يجي ويلكاني هنا ويطبكنا سوية
واحصلي بوكسي
يمة هي طلعت وجان اسمع صوته ديصعد عالدرج
وخالتي وراه تهدي بي
.. يبووووو يمة اجاني
صرت احوم بالغرفة مثل الهنود الحمر من يحومون حول النار
ويضلون يولولون بأصوات غريبة
عيناً هذا يمثل وضعي
صرت التفت منا ومنا بسرعة
اتمنيت بهاي اللحظة اختفي
صار صوته قريب عالغرفة
وما اشوف روحي الا واني بقدرة قادر
خاتلة جوة السرير
والله حتى ما اعرف شلون دبرتها هاي
بس الخوف لا دين له
والله كلبي اجة يطلع من صدري
بعدما استقريت تحت السرير
وجان الباب ينفتح بكل قوة
يتبع
احبكم هواي احبكم كومة
اختكم نهى ☺️☺️☺️☺️☺️☺️☺️
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!