أساور الفضة الفصل السادس وأربعون 46 - بقلم نهى

مساء الخير والعافية عليكم
☺️☺️☺️☺️☺️

#اساور_الفضة_ج٢
#الكاتبة_نهى

هدى
انفتح الباب بكل قوة ودخل قاسم المغوار
وبعدها سد الباب وراه بكل قوة وجان اسمع صوت تكة المفتاح
يايمة يا تكة المفتاح عبالك داسمع التكتكة مال ظلوعي
من يكسرهن قاسم

ياربي شلون بية انهزم من اثير يطلعلي قاسم
على الاقل اثير كف ايده مقارنتاً وية
كف قاسم تعتبر ايد بنية

اتقدم يمشى لداخل الغرفة وكال بغضب

وانا على حطتي نفس وضعي ثابتة
وصامدة خاتلة جوة السرير

و على كولت ماجد المهندس ( انا مثل ما انا )
مثل الجبل ثابت والمكانة عالية
عيناً كلمات الاغنية تنطبق على وضعي
بس اشيل كلمة مثل الجبل
احط بمكانها مثل الفارة
والمكانه على شبابي يا خسارة

خرب حظي بغز الشدة واحشش على روحي

جانت عيوني تراقب حركة رجلين قاسم
حجة بصوت خشن
.. استغفر الله هاي وينها شلون راح ابتلي بيها

اباوع عليه راح اتوجه
لباب الحمام فتحه
دخل سمعت طكطكة ونوب رجع طلع من الحمام
وبعدها اتوجه لباب الغرفة
فتحه وطلع برة

يمة كلبي ما اصدك واخيراً راح يارحمتك ربي
زحفت تحت السرير حتى اطلع
هاي شنو اشو اني حاشرة وبالكوة اكدر اتحرك
دخيل الله هاي شلون دبرتها ودخلت جوة

شنو معقولة اني من الخوف اتمدد الجسد وسمنت
لو هو من حلاوت الروح بسرعة دخلت
وبأثناء ما كنت احاول ازحزح روحي من تحت السرير

وجان فجاءة . يرجع الباب ينفتح
والله العظيم لو اكول من كد الهبطة
اتزحلكت مثل الصابونة
ورجعت لمكاني لتحت السرير راح تكولون علية
تبالغ

يمة عزة العزاني همزين ما طلعت وشافني
رجعت ابحلق بعيوني اتابع خطوات رجله واترقب الوضع

عزة اشو هذا رجع مرة ثانية وقفل الباب ودخل
اسمعه سحب نفس عميق وحجة بكل هدوء
.. سمعيني زين ترة ادري بيج انتي بالغرفة

اباوع لرجليه لطالما يحجي جان تتحرك
.. سمعيني زين احسنلج طلعي بسرعة وستري على روحج
لا والل...............

فجاءة شفته اتوقف بمكانه
وكال متفاجيء .. معقووووولة !!!!

واني حابسة انفاسي
هذا شبي هو شنو المعقولة مدا افتهم شي

كمل كلامه
.. لا مستحيل ما اصدك الكاعد اشوفه
وربي راح اتخبل

عزة هذا شبي الرجال شنو شاف
انتبهت على رجليه اتحركت وتوقف بنهاية السرير
قرب التاج وفجاءة وما احس الا والسرير
كام يهتز عبالك زلزال

لااااااا ياربي دخيلك قاسم اندل مكاني
رجع مرت اللخ ما اعرف شنو ديسوي للسرير
بس بصورة عامة سواه مثل الخرخاشة بس اسمع صوت طكطكة الخشب
سمعت صوت الخشبة الجانبية للسرير وكعت وصدى صوتها كمزني من مكاني وعطت بخوف

اسمعه يحجي بغضب
.. ولج ليش تعيطين بعدج ما شفتي شي بس اصبريلي

جان يتحلف بية وسمعت صوت ام قاسم وهالة
.. يمة قاسم صلي عالنبي على كيفك بنت الناس
ترة كلشي ينحل بالتفاهم

قاسم حجة بصوت خشن.. حجية انتي طلعي منها
خليني انا وياها اريد اشوف هاي يا مرة تكسر كلمتي
وتتعداني

انتبهت عليه
اتجه لجانب السرير وبعد الخشبة حطاها على جهة
ورفع السرير من جانب واحد
باوع علية وهو ممصدك عيونه
وكال .. بسرعة طلعي لا اكسر الجرباية فوك راسج

وبعده ممكمل كلامه بسرعة طلعت وكمت من الكاع
ووكفت على رجلية اباوع عليه واني ارجف
كبل ترك السرير من ايده وصدر منها صوت قوي

وام قاسم تصيح .. يبوي كسر الغرفة عالبنية
لك يمة قاسم شلون بيك راح تموتني ناقصة عمر

باوع علية وعيونه نار
لم قبضة ايده وصاح بأمه
.. حجية ابوس ايدج عوفيني
لا اجنزها الج

هو جان يحجي ويتقدم علية
وعيونه بعيوني

اسمع صوت خالة ام قاسم تحجي وية هالة بغيض
كالت
.. هسة اني شبية حاركة دمي
اشو لا هو ولا مرته مسويلي حساب بهذا البيت
خليهم نارهم تاكل حطبهم المن حاركة كلبي عليهم

جان صوتها شوية شوية يبتعد عن الباب
حسيت بروحي لوحدي ارتعدت اطرافي من البرد

اقترب علية وحجة
.. انتي شلون تتجرأين وتطلعين من البيت بدون علمي
انا شنو كلت

بلعت ريكي وحجيت .. اااااانا والله اتصلت عليك
اكثغ من مغة (اكثر من مرة)حتى شوف نقالك واتأكد بس انت مجاوبتني
وخالة مموجودة واختي مغيم (مريم)جا........

زمخ بية واني طفرت من مكاني ما انطاني مجال اكمل
.. لااااا تخليني انعل ابوج لا ابو النقال وياج
يعني اذا ما ارد عليج انتي تطلعين من يمج
ولج اليوم ما اتسمى قاسم اذا ما ربيتج

هد علية ولزمني من زندي وعتني حيل وعطت متأذية
يمكن انخلع كتفي
رفعت وجهي اباوعله وقطرة دم ما بية من الخوف
انتبهت عليه كور كف ايده

وجان يرفعها يريد يضربي
غمضت عيوني وصرخت بصوت
خايفة وحجيت اترجاه

.. قاسم احلفك بالله لا تخلي الايد الاخذتلي حقي الباغحة (البارحة)
تنمد علية اليوم وتضغبني (تضربني)بيها
عفية لا تكسغني (لاتكسرني)بيك الباغحة(البارحة)كنت انت سبب فخغي (فخري)
اتغجاك لتصيغ (اترجاك لتصير) اليوم سبب ذلي

اباوع عليه رص اسنانه بغيض ووجه قبضة ايده ولكم الحايط تاج السرير
بحيث غمضت عيوني وعطت خايفة بكل ضني الضربة اجتي بية

جان واكف كلش قريب علية رفعت راسي وباوعت بعيونه وغصب عني نزلت دموعي وحجيت

تدري ليش الباغحة (البارحة) بست كف ايدك
لان اول مغة (مرة)بحياتي من انضغب (انضرب) يجي واحد وياخذلي حقي
شيماء من ادافع عني تنضغب (تنضرب) هي هم
تعغف الباغحة اول مغة (تعرف البارحة اول مرة)
انام عالمخدة واني مغتاحة (مرتاحة)
بدون ما اخاف من احد يمد ايده علية ويأذيني
لان اعغف (اعرف) انت سندي

جانت النار بعيونه وكوة لازم نفسه ما يهد علية
ويخنكني بثنين ايديه

بس امنت من شفته ارتد عني
بديت اهدي بي
.. اني اعغف بغوحي (اني اعرف بروحي ) غلطانة
وحيل بية واستاهل تعاقبني
بس اتغجاك (اترجاك) حاول تقدغ (تقدر) وضعي
وتفهمني

اغيدك تعغف (اريدك تعرف)
اني نقطة ضعفي بالدنيا خواتي
واتخبل اذا اسمع بوحدة منهم بيها شي
لان ما عندي بالدنيا غيغهم
فحقي ومحد يكدرغ (يكدر) يلومني على خوفي عليهم
كون انت بمكاني

باوع علية وهو راص اسنانه
..حبج لخواتج ما ينطيج الحق تكسرين حجايتي وتطلعين بدون علمي
انا سبق وان حذرتج

مسحت دموعي وكلت
.. اوعدك بعد ما غاح (راح) تسمعني معتبة بباب البيت اذا مو بعلمك
عفية الله يخليك كافي لتعصب

حجة بصوت يهدر
.. تدرين انا متعجب على نفسي شلون لحد هسة
انا لازم ايدي عنج وما مكسر رجليج
جان المفروض هسة انتي مكتولة وكاعدة تبجين موجوعة من الالم

هي مو مرجلة من الرجل يمد ايده على مرته
بس اذا مستحقة مثلج ليش لا لزم تنضرب علمود تجر عدل

بلعت ريكي

اباوع عليه غمض عيونه بصبر نافذ
دار عني وانطاني ظهره وحجة بنفاذ صبر

.. هدى طلعي برة من كدامي وخليني ابرد شوي
لان ما اضمنلج روحي ابقى صامد بدون ما امد ايدي عليج

ما انطيته مجال يكمل كلامه بسرعة مثل الاسير
الي قرروا الافراج عنه رحت ركض فتحت الباب
وطلعت من الغرفة
جان جسمي كله يرتعد سحبت نفس عميق
ممصدكة اني كدرت انفذ بجلدي بدون ما يأذيني

باوعت لروحي شلون ووين اروح ما اكدر انزل
جوة اخاف خالتي تلزمني
وتظل تحجي
اتوجهت على غرفة هالة فتحت الباب ودخلت ما لكيتها موجودة رحت اباوع بالمرايا
نزلت طرف ثوبي اتفحص
مكان كتفي يوجعني باوعت لكيت اثار لزمة ايده على زندي صايرة حمرة

ولوح الكتف كام يصل علية من الالم خرب يومه
هذا وهو ما ضاربني هيج حالي لعد لو يريد يضربني شيسوي

لحظات وجان تدخل هالة لغزفتها
ووكفت بمكانها مصدومة تباوع علية
هالة.. معقولة هاي روح المرحومة هدى دتحوم بغرفتي
عزةةةة

رفعت حاجبي وحجيت واني ادلك بذراعي
.. امداج عوبة شلون تعوفيني لوحدي وتطلعين
هي هاي الفزعة مالتج

اتجهت علية وكعدت يمي
.. عذريني انتي حقج مشايفة قاسم من يعصب
شيصير يطبك كل ثنين سوية

.. ميحتاج توصفيلي غضب اخوج شفته بعيني محد كلي
رجعت امسد عالالم

هالة.. اي صدك تعاي كليلي انتي وين جنتي
من دخل للغرفة وما لكاج

اجة لعدنا وسأل امي وكللها هاي وين راحت حجية احسنلج طلعيها
امي عاطت بي وكلتله اني مالي دخل بيكم روح انت ومرتك
وهي مرتك من وصلت للبيت كبل صعدت فوك
باوع علية بعده ما وجهلي السؤال كبل كلتله

هدى بالغرفة اني من نزلت حانت موجودة
بالغرفة

.. الله يلعن بليسج بعد لوجاية ومدوغة (مدورة)علية وياه عالواهس
عمة حتى عمة بسرعة انطت بية. كدام اخوها
انا الج هين اغدها (اردها) الج بالافغاح (بالافراح)

.. والنعم منج انتي كدها وكدود
عليج الله بس كليلي وين جنتي خاتلة

دنكت راسي وخدودي صارت حمرة
.. احم ختلت جوة السغيغ (السرير)
يابة اني كلت هيج
وهي وكعت بالكاع من الضحك

.. عمة حتى عمة على شنو تضحكين ترة والله
الخوف الي عشته ميضحك

هالة.. اخ يمة بطني ينعل بليسج ههههه
يعني هاي شلون دبرتيها وكدرتي وختلتي جوة السرير

.. ما اعرف بس حشرت روحي بالكوة حتى جسمي انسحت بالكاع

رفعت الدشداشة وطلعت بطني وصدري صايرين حمر
هاج شوفي هاي اثر المعاناة

هالة تضحك .. خرب بالحظ اتخيلج ميتة من الخوف جوة السرير

يايمة
موقع جثة الضحية .. تحت السرير
سبب الوفاة .. سحلا حتى الموت
مجلس العزاء .. سيقام في رياض الاطفال
اي والله خطية لان بعدج صغيرة كلشي ما شفتي بحياتج

.. شنو حضغتج (حضرتج) تضحكين علية عوبة طاح حظج
هو مو صوجج صوجي اني اجيت يمج
خلي اكوم اغوح لغيغ (اروح لغير ) مكان

لزمت ايدي ورجعتني كعدتني مرة الثانية عالسرير
وكالت.. لا عليج الله كعدي
بس تعالي كليلي قاسم شسوة اشو بعدج
قطعة وحدة كلشي مطاير منج

باوعت عليها واني سرحانة
.. ما ضغبني (ماضربني)
جنت احجي الكلمة وعقلي كعد يحللها

هالة.. لا لا ما اصدك معقولة قاسم اخوي
عافج هيج بكل سهولة بدون ميسويلج شي
لج احجي شسويتي لأخوية

.. يمكن كسغت خاطغه (كسرت خاطره ) وعتقني لوجه الله تعالى

.. خرب يومج هديوة والله عمي مجنصة وامج داعيتلج
والا شنو الي يخلي قاسم يكف ايده عنج
وانتي مستحقة السحل

.. هو صحيح اني غلطت من استهانيت بي
وطلعت بس جانت اسبابي قوية
بس على العموم بعد الي شفته اليوم
مستحيل بعد اجازف واطلع من البيت بدون علمه
بعد لو مو خواتي يصيغ (يصير ) بيهم شي
عسى ما اسمع سليمة بكبغها (بكبرها) تموت
ما اطلع بعد الا بأذنه

هالة.. هههههههه شكد كذابة بس تسمعين سليمة ماتت تروحين ركض
تريدين تتاكدين الخبر صحيح لو اشاعة حتى تركصين

بقيت يم هالة ما يقارب ثلاث ساعات رفعت راسي
وباوعت للساعة وجانت ب١٢ بالليل

طلعت من عندها ورحت دخلت لغرفتي على اطراف اصابيعي
باوعت لكيته نايم عالسرير وايطارالخشب للسرير مرجعه ومسويه

غمضت عيني ورحت فرشت فراشي
واتمددت وحطيت راسي عالمخدة
وصار موقف قاسم كل شوية يتكرر بعقلي

ما اعرف شنو حسيت من قاسم اتراجع عن ضربي
واتمالك نفسه وهو بقمة الغضب
جان بحد ذاته شي جديد علية
وبهذا اليوم بالذات بدة شعور الامتنان والولاء لقاسم

نمت واني كلي امل باجر اكعد اعتذر منه واصالحه
للساعة بال ١ بالليل سمعت نقاله يدك
اتعودت كل يوم اسمع نقال قاسم بهيج وقت من الليل يدك.
بس بدون ما ادير بال احط المخدة على راسي واغط بسابع نومة مثل اليوم

يوم ثاني الصبح
كعدت قبل قاسم ورحت اتوضيت وصليت
وبعدها حضرتله ملابسه وحمامه وكعدته من النوم

كوة يالله كعد وعيونه حمر وشعره مهوس من النوم رمش بعيونه
ابتسمت بوجهه. صباح الخير
كوم راح تتأخر عالشغل

باوع علية ومسح وجهه وشال نقاله وباوع للشاشة حتى يشوف شكد الوقت
حجة بصوت خشن من اثر النوم
.. الساعة بثمانية
جان ديحجي وية روحه
كام من السرير ووكع الغطا وجان ما لابس تيشرت يغطي صدره
اباوع عليه راح اتوجه للحمام وهو ماد ايديه يتمغط
حركته مددت عظلات ظهره وحركت وشم الصقر
عبالك ديحرك بجناحاته يتحضر للطيران

انتبهت لروحي
ودرت وجهي وحجيت اني نازلة اسويلك غيوك (ريوك)
هم ما جاوبني عرفت قاسم زعلان وميحجي وياي
اوف راح دخل للحمام

واني بدلت ونزلت جوة
للمطبخ حطيت القوري عالنار
وجان تدخل
خالة ام قاسم للمطبخ
باوعت علية ورفعت حاجبها وجهها جان ثكيل

.. صباح الخيغ (الخير) خالة
مجاوبتني اباوع عليها كبل راحت للثلاجة وصارت تطلع منها الغراض

اهووو هاي شلون مشكلة حتى خالة ام قاسم زعلانة
المشكلة اني احب خالة وزعلها علية مو هين
عمري ما راح انسالها وكفاتها وياي
من يوم موقف اثير وغيرها وهي ابد ما انطت بية
وصار كل يوم يكبر احترامها بكلبي وحبيت حرصها
وحنانها على عائلتها وبنفس الوقت حازمة وشخصيتها قوية ما تتهاون وية الغلط

رحت وكفت يمها وجليت حنجرتي وحجيت
.. ااااحم خالة ادغي (ادري) بيج زعلانة علية من الصاغ الباغحة (الصار البارحة)
بس امانة لتزعلين علية والله غصب عني
خواتي اهم شي بحياتي وخوفي عليهن نساني نفسي

عفية خالة حقج علية واوعدج هالشي ما ينعاد ابد

جانت تتحرك بالمطبخ واني واكفة بمكاني واحجي وياها
حطت اكواب الجاي علىً ميز الطعام وجابت القوري
بالصينية هو وقنديل الشكر ورتبت الريوك واني
اراقبها

بعدها التفتت علية باوعتلي وكالت ببرود.
.. تعالي كعدي تريكي وخليني احجي وياج كم كلمة

بلعت ريكي ورحت كعدت عالميز مقابيلها
عبالك طفل معاقب وراح يتلقى محاظرة عن التربية

لزمت كوب الشاي وشربت منه
ورجعت نزلته وبدت تحجي وياي بصوت حازم

.. شوفي خالة هدى ترة اني بيوم رحت خطبتج
وتغاضيت عن سوالف ابوج والظروف ال صار بيها هذا الزواج
اتجاوزت كلشي
واصريت الا انتي تكونين من قسمة قاسم
ترة لا عبالج اني كاتلة روحي عليج علمود سواد عيونج وجمالج

لان لو الموضع مبني على الجمال
جان بنت عمه رهف اولى بيه من غيرها
وجان ما تعبت نفسي بالاصل
بس كل ما في الامر اني اختاريتج
انتي بالذات لان اعرف بيج كلش زين
انتي تربية بثينة صاحبتي واختج شيماء
يعني بنية حبابة ومتربية وتعرف الواجب والتقدير
وفقيرة ما تتجاوز احد

ترة خلي ببالج اني رضيت اتنازل واعاند الكل واصريت الا انتي تصيرين زوجة قاسم

وجان كلش كافي ابوج اثير
بحيث الكل استغرب اختياري وكالو شمعنا هي
بس كلت ميخالف همة ما يشوفون الي اني اشوفه
فلا تخليني اتندم على اختياري الج
الصار البارحة انتي

ثبتي بنية متعرف الاحترام في غض النظر
عن الظروف الي دفعتج
اتجاوزتيني و اتجاوزتي زوجج ولا عبالك النا قيمة
وضربتينا بعرض الحايط وطلعتي من البيت بدون ما تنطينا اي خبر
وحتى ما كلفتي نفسج ترجعين تتصلين وتطمنينة

وثقي بالله هاي لو وحدة من بناتي مسوية وياي هشكل
تتجاوزني ومتسويلي احترام مثلج
جان تحلم اباوع بخلقتها لو احجي وياها

هي جانت تحجي واني العرك ملى كصتي
وخدودي صاروا حمر من الفشلة

كملت كلامها
.. انتي من اول يوم دخلتي لبيتنا
واني وياج وسعيت بكل طريقة حتى اقربكم انتي وقاسم
وحتى قاسم صرت اضغط عليه

حتى يقوم بواجبه اتجاهج وما يقصر وياج
زين كليلي انتي شنو قدمتي من تنازل
لهذا الزواج حتى تقويه

اشو قاسم بالكوة يالله خليتيه يتقربلج
انتي حتى ما حاولتي تكسبين زوجج وتنسيه رهف

اشو من اتزوجج ابني لحد هسة
ما تغيير اي شي بحياته وباقي نفس ماهو وية رهف
وسهراته كل خميس على حطتها
بعده مداوم عليها

يعني اني ام واشوف ابني بصفحة وزوجته
ضاربة الدنيا بعرض الحايط وماخذتلها صفحة
ترة انتي مو صغيرة وتعرفين شنو معنى كلامي
خلي ابالج مو شفتيني متمسكة بيج ومستقتلة حتى انجح
هذا الزواج
عبالج انتي ماكو غنى عنج
وزني كلامي بعقلج زين الف من تتمنى مكانج
المفروض انتي تتمسكين بزواجج بيديج وسنونج حتى ينجح

لان مو كل بنيه تجيها هيج فرصة وقسمة مثل الي اجتج
فانصحج منا ورايح تنتبهين لحياتج
انتي وقاسم

حسيت بروحي محاصرة من كل الجهات
ام قاسم دتحجي هيج لان عبالها اني وابنها زواجنا طبيعي

ومنا قاسم الي ميريد احد يعرف بحياتي اني وياه
ويريد بنفس الوكت يتزوج رهف
زين وحياتي الي اريد احافظ عليها وما اريد انكسر
من بعد ما يتركني
والمفرض مني ابقى صامدة كدام كل هاي الضغوطات

حجيت بتعب
.. زين خالة انتي نسيتي ضغطج على قاسم حتى يتزوجني بالكوة
لو نسيتي شغطه (شرطه)عليج بيوم وافق
مو كلج انا حتى لو اتزوج ابقى على وعدي
لغهف (لرهف) واتزوجها

ام قاسم.. اي وشنو يعني واذا كال اريد اتزوج رهف
بالله رهف بشنو احسن منج انتي شنو ناقصج
وما تفرين عقل ابني وتخلينه ينسى رهف وعشيرتها

ترة المرة الشاطرة تكدر بأكثر من طريقة تكسب رجلها
وتخليه ماله غنى عنها بكل شي

كلام ام قاسم رغم قسوته
علية بس فتح عيوني على هواي اشياء
فعلا اني ما سعيت حتى انطي هذا الزواج فرصة

اكون اكبر غبية اذا اتنازلت عنه
واخليه يروح لغيري بكل سهولة
لان صدك قاسم رجال بي صفات
تدفعني حتى اتمسك بي
يكفي حمايته الي ولخواتي
وهي هاي الميزة الي اريدها تتوفر بالرجال
الي ناوية اتزوجه بالمستقبل

وليش اكعد ادورعلى رجال قوي
واني زوجي يمي وبي كل الي اتمناه وتتمناه كل بنية
حتى لو جنت بعدني ما احبه وهو ما يحبني
بس يكفي اني احترمه وهو يحميني
ليش ما احاول وياه واجرب حظي

شيماء
مر يومين على حادث مريم
وطول هاليومين اني
بقيت ببيت مروة علمود اعالج مريم
واغير ضماداتها وابات يمها
بس رغم هذا كله جنت كلش متقيدة بالرغم رافد زوجها حباب
واصلا مو دائماً متواجد بالبيت
جنت صافنة واعدل بوجهي
دخلت مروة علية بالغرفة
مروة.. الله شنو هذا الجمال راح تكسرين على رباب خطية

ابتسمت .. منو حمادة العروس غير حفافتها
طبعا تكولين هيج غير اختي
مروة.. دروحي تدرين بية اني ما احب المجاملة وصريحة وانطي الكلمة بالكصة

وصدك انتي حلوة ومتحتاجين اجاملج
بالله شو دوري خلي اشوف الفستان عليج

درت على نفسي واني ابتسم
.. ها شنو رأيج
.. ولو هو لونه غامق تعيس بس
هم طالع عليج حلو
يالله استعجلي ترة السايق اجة
.. لعد يالله وين مشمش خلصتيها

مريم وهي كاعدة عالسرير وتباوع علينا كالت
.. اهووو مشمش خلصت قبلج من شوكت
يمكن حتى قبل العروس مخلصة

كل شوية تجيني وجايبتلي
قراصة تريدني احطها لشعرها
عبالك عندها سباق.

مروة.. فديت بنوتي مستعجلة عالزواج
تذركني بهدى قبل من جانت صغيرة وتكول اريد اعغس

اليوم عرس رباب صديقتي ورفيقة دربي
الي عاشت واتشاركت وياي كل حياتي بحلوها
ومرها
وصلت لبيت اهلها جان بيتهم كلش بسيط وصغير وبمنطقة شعبية
بعد اكثر من منطقة سليمة

دخلت ولازمة بيدي مشمش
الملعونة بس سمعت بية اريد اروح للعرس
جلبت الا اخذها وياية

واول مدخلت صارت رباب كدامي
عيوني غركت بالدموع
وكلبي فرحلها
رحت اقتربت عليها جانت لابسة بدلة عرس بيضة
وطالعة حلوة والفرحة مرسومة على وجهها

شافتني واتسعت ابتسامتها
رحت حضنتها وهي تكول
.. بعد وكت ستوج اجيتي لو خالتها بعد فد مرة تجين وية اهل العريس. مو احسن

.. لج رباب عابتلج تدرين بية ما فراغة وراسي ما حاكته من ورة المسؤوليات والشغل
.. معذورة حبيبتي على العموم عوفج من هذا الحجي
بالله شو تعالي رفعي بدلتي شوية كرصيني من ركبتي بس على كيفج
حتى تلحكيني وتتزوجين

والله حلفت ما يكرصني اي وحدة من البنات الا انتي تجين وتستفتحين الفال
.. هههههههه الله يلعن الافكار الغريبة الي كل
يوم نازلة بموديل

اني عني متنازلة عن حقي من هاي الفقرة روحي طبقي
هاي سوالفج على غيري

جنت واكفة يمها واحجي وهي كاعدة
ما حسيت الا وهي مدت ايدها وكرصتني من ركبتي

كمزت من مكاني بسبب حركتها
.. هههههه خرب يومج
رباب ما اكول بس الله يساعد زوجج عليج
.. شسويلج مدتكرصيني كلت خلي اني اكرصج

اجتي ام رباب وسلمت علية واختها ومرت اخوها
سلموا علية واخذت مكاني وكعدت

وصرت اباوع على الكل جانت اجواء الفرح تعم البيت
وفعلا جان الفرح معدي وانطلقت
اضحك واسولف وية بقية زميلاتي الممرضات الي عزمتهم رباب

بما ان رباب اتفقت هي وزوجها ما يسوون عرس بس زفة كبل للفندق لان المادة ما تسمحلهم يسون حفلة عرس

لذلك رباب قررت تسوي حفلة
بسيطة ببيت اهلها تعزم بيها صديقاتها وتكون موعدها
قبل الزفة بساعتين

على كولتها . حتى اطلع فلوس الصالون وايجار البدلة
بعدما خلصت الحفلة واجوي اهل العريس واقتربت
اصوات السيارت اباوع لرباب حظنتني حيل وكامت
تبجي
.. اكول عوبة اني شكو تحضنيني
اشو انتي عايفة امج وخواتج وجايتني

رباب تمسح دموعها .. لج ثولة هذا مقطع شفته
باليوتيوب عروس تحضن صديقاتها وهي تبجي
فأختج رادت تعيش الدور
عابتلج لازم تخربين علية اللحظة

ادري برباب جانت تداري تدموعها
لان اني وياها ياما عشنا لحظات واتشاركنا اسرار بعضنا
وجنا وحدة توكف للثانية على كولتها
لج حتى لاختي ما اكول عن اليصير بحياتي
بس انتي عندي غير انتي صديقة العمر

وفعلا جانت ونعم الصديقة الي
دخل زوجها وعيونها كامت تلمع
شفت اللهفة بعيون الثنين
لزم ايدها وكعد يمها
لزمت مشمش من ايدها لا تضيع بالهوسة لان صارت كلش خبصة والبيت هو منا صغير
اباوع لزوجها كل شوية يقرب راسه ويشاورها وهي تضحك

يارب دوم الفرح ربي تمم نعمتك عليها واسعدها
وية زوجها

وبعدها بديت انسحب من بين الناس المتجمهرة على العريس والعروسة

وطلعت للباب وشفت السايق ينتظرني
اني كلت للبنات ما راح اتأخر بالعرس
مشمش.. خالتوا ليش .. ليش
نغوح ( نروح)

باوعت عليها وحضنتها لصدري
.. لج يابعد عمر خالتج شلون بالله تردين نبات
بالعرس

.. ما اغيد اغجع للبيت
.. هههههه اوعدج عالمرة الجاية تبقين بالعرس
لحد ما تشبعين
بس لازم تصيرين عاقلة

هزت راسها بكل ثقة رجعت اتكأت وكتفت ايدها
بحركة الطالب العاقل
.. اي اني حلوة اصيغ عاكلة (اصير عاقلة)

.. ياربي شلون بية اكلها هاي البنية وما اشبع منها
كرصتها من خدها

وصلنا لبيت مروة رفعت راسي وجان اشوف
امجد واكف يم باب بيت مروة
حسيت بكلبي. خفق بخوف
جان مبين من شكله ناوي عالشر

جان الحارس الشخصي واكف كدامه ديحجي وياه
نزلت من السيارة ولزمت ايد مشمش

اتقدمت عليه وقبل لا احجي وياه فوتت مشمش لداخل لبيت لان عمي وابوي خلوني كلشي اتوقع منهم

باوعت عليه وحجيت..
.. شعندك جاي لهنا
التفت وباوع علية بغضب وعيونه تكول يا شر اشتر
امجد.. شوفي ولج هسة تدخلين جوة للبيت
وتطلعين بنتي لا اليوم احرك البيت على مروة وعائلتها

شهكت بخوف من تهديده
وجان اسمع صوت مروة واكفة بالباب وراي وكالت
.. وانت بصفتك شنو جاي تطالب بمريم
قابل انت ابوها واني ما ادري
لو ولي امرها

امجد بكل ثقة .. ولج مروة لا تتحديني
ولج اليوم اخذ مريم غصباً عليج وشاربي مو علية
اذا ما سلحتها كدام عينج واطلعها من بيتج وانتي تشوفين

مروة ابتسمت بشماتة .. اذا انت بكد كلمتك
يالله اتوكل وراويني شنو تكدر تسوي
شنو تنتظر لا تكول انت هسة جاي تستأذني علمود
تاخذ مريم

.. هاي هي يعني ما تريدين بالعيني واغاتي
بس صبريلي خلي يوصل اثير وهو يشوف شغله
وياج وراح ياخذ بنته غصب عنج

ربعت ايديها على صدرها يالله ننتظر اثير
ونشوف شنو يكدر يسوي

وبهاي الاثناء وجان يوصل اثير وامجد يبتسم بكل شماتة وحقد وكال
.. تعال انت منو انطاك الحق تخلي مريم هنا عند مروة
انت مو تعرف انا ما اقبل تخطي عتبة بيت مروة

اثير حك لحيته وكعد يحم حم
.. شوف امجد بعد الي سويتوه بمريم
انا قررت منا ورايح مريم
تعيش عند اختها مروة

اباوع لامجد شهك واتسعت عيونه بغضب اسود
.. ولك اثير سكط العار وانت مصدك روحك ابوها
ترة انت اسمك بس بالجنسية

مروة قاطعتهم .. شوف اثير هسة تاخذ. اخوك منا
وتروح تفهمه بعيد عن بيتي وكله
بعد يحلم اخليه يشوف خيال مريم

ها اي صدك قبل لا انسى باوعت لامجد
.. عمي العزيز لا تجرب حظك وياي
بس تحاول تسوي موقف ارعن بتجاهي
كبل اخذ تقرير الطبي بخصوص حروق مريم
واسلمه للشرطة واخليهم يشوفون شغلهم وياك

فها دير بالك من عندي ولا تاخذني باللسان والقوة
اذا انت عندك ناسك اني هم عندي
ظهر يوكفلي فخليك حباب وروح منا

اباوع عليها دارت وجها وكالت
.. يالله شيماء امشي خلي ندخل جوة هنا الجو صار مسموم

دخلت وراها وتركنا امجد واثير واحد يباوع بوجه الثاني

مروة التفتت علية وسألتني عالعرس
ولا كأنما جانت قبل شوية تتعارك وية امجد

جاوبتها .. رباب طلعت كلش حلوة واني من وصلت الزفة
طلعت لان صارت هوسة

والناس بالناس وبنتج مشمش كوة قبلت تطلع من العرس
تريد تبقى وية رباب ورجلها

بدلت ملابسي وكعدنا يم مريم فوك
ولحظات وجان تفوت علينا بنية تقريبا تصير بعمر مروة جانت كلش حلوة وانيقة

وراها فاتت مروة وهي تضحك على كلام البنية
بعدها بدت مروة تعرفنا عليها

مروة.. فاتن خلي اعرفج على خواتي
اشرت علية
هاي اختي الكبيرة شيماء
وباوعتلي وكالت .. شومة هاي صديقتي وحبيبتي
فاتن هاي رفيقتي من ايام هناء جنا احنا الثلاثة سوية بالغربة

ابتسمت فاتن واتقدمت على شيماء وحضنتها
.. انتي شيماء شكد جنت اتمنى اشوفج من كد ما مروة جانت تحجي بيج
احب اهنيج على الروح القوية المقاتلة الي تملكينها
.. اشكرج حبيبتي

انتبهت لمشمش بس شافت فاتن راحت تركض عليها
وحضنتها بكل قوة وفاتن الظاهر علاقتها قوية وية مشمش
كانت شايلة علاكة طلعتلها كارتون بي بيت لعابة باربي

وصارت مشمش تكمز من الفرحة
جانت فاتن بنية كلش حبابة والظاهر تعرف كلشي
عن حياة مروة طبعا

بعدها اتوجهت لسرير مريم وبيدها علبة حلويات
.. حبيبتي الحمدلله على سلامتج
والله مروة البارحة بس تحجي بيج غير مردت كلبي من سولفتلي عالصار بيج

يالله ما اوصيج صيري قوية وانسي الماضي
وبما ان عندج اخت مثل شيماء فاكيد راح
تكونين قوية

شكرتها على تشجيعها لمريم
بعدها انتبهت عليها كعدت هي ومروة على صفحة
وكعدوا يحجون بصوت عادي
واني كعدت يم مريم انطيتها ملازمها حتى تكمل دارستها
كانت تسوي واجباتها وتحضرها

بس لفت انتباهي موضوع كلامهم
اسمعها تكول لمروة
.. اهووو يا مروة شلون بيج ليش ما تسمعين الكلام

مروة جاوبتها.. لج فاتن ما اعرف ليش متأكدة
هالمرة رافد عنده ذيل وكاعد يلعب من وراي
وتدرين بية اني شكي دائما يكون بمحله

فاتن .. انتي ليش تبقين دومج ما عندج صبر مو كلتلج
خلي علية واني اجيبلج اخباره
كلها واعرفلج وين يروح وويامن ملتهي
بس شوية انتي اتحلي بالصبر

مروة .. يالله هذا هو راح اسكت وما راح افتح وياه الموضوع الا من اتأكد
بس يا ويله وسواد ليله لو كان صدك شكي بمحله

هدى
مرت يومين واني وقاسم ما نتحاجة
بس خلال هاي اليومين ام قاسم
رجعت تتعامل وياي مثل قبل

اتذكر من اجوي بناتها منى وكوثر
جانت هديل كاعدة تحجي لخواتها عن الصار
وهالة جانت يمي بالمطبخ بس اني من طلعت سمعتها بالصدفة
دتحجي علية وشلون ام قاسم رزلتني
وهديل جانت تحجي وتضحك بتشفي

بس استغربت من ام قاسم دخلت عليها ورزلتها
وكالت .. ولج هديل هاي عليمن دتحجين
سمعت هديل كامت تمتمت
بالكلام بس منى سبقتها وكالت
.. جانت دتحجي على هدى وتجاوزها عليج انتي وقاسم

ام قاسم .. بالعكس انا بهذا الموقف الصار بيني وبينها
اثبتتلي هاي البنية شكد مؤدبة

كوثر .. شلون يعني عرفتي
ام قاسم.. جربتها اكثر من موقف جنت
شكد ما ادوس وياها بالحجي اباوع عليها
متفتح حلكها وتجاوبني ابد وهذا الشي كبرها بعيني

منى .. طبعا ما دامها اختيار ام قاسم اكيد تطلع حبابة

ومن يومها حطيت ببالي ان
ابدي وية قاسم من جديد بس بالاول خلي
نتصالح حتى لو نرجع اصدقاء

صحيح هنة يومين مرت علية ميحجي وياي
بس احس عبالك صارله شهرين
بس ها اني مو هدى اذا ما خليته ينسى الزعل

هالة .. خير احجي وياج وين صافنة
صارلي ساعة واكفة بالبوابة منتظرتج ملطوعة بالحر
هدى .. عوبة كمزتيني مجنت صافنة بس جنت افكر بأخوج المغوار وراسه اليابس

هالة.. دمشي كدامي خلي نروح صارله ساعة العم حسنين ينتظرنا وانتي اتصل عليج متردين ليش

هدى.. تركت النقال بالبيت وقررت بعد ما اشيله وياي
هالة.. ليش عيني

هدى.. يعني على شنو اشيله واني ممستفادة منه
اشو اخوج من يريد شي من عندي يروح يتصل عليج لو على خالة وهو ابد ما يكلف نفسه ويتصل علية
ويسألني شنو احتاج

هالة .. اهووو الله يساعدج على زعل قاسم
كلش نحس

هدى برطمت .. هو اني ليش ضايجة
لان اشوفه وياي بغرفة وحدة وما يحجي وياي

وصلنا للبيت وجان الكل موجود حتى قاسم بس هشام مموجود وجانوا ديتغدون
ام قاسم .. يالله تعالوا بوجهكم اتغدوا ويانا
بسم الله.
هالة .. اوكفوا انتظروني طلقة اروح ابدل واجي اكل

.. اني ماشتهي اكل انتوا اكلوا بالعافية
ام قاسم بشك .. اكول هدى اشو هاي الايام صايرة متاكلين
ووجهج اصفر لج بس لا حامل
جانت تحجيها وعيونها تلمع

شهكت مصدومة من تخمينها
وقاسم الي غص بأكله من ورة قمبلة ام قاسم الذرية
واني فلت وجهي وما عرفت شجاوبها
ابتسمت ابتسامة صفرة وكلت
.. لا يامعودة خالة بعد وكت حتى بعدني عغوسة (عروسة) وين لحكت احمل

ام قاسم بكل ثقة.. انتي بس كليلي الدورة فاتتج لو بعدها

يبووووووي اني تعالوا دورو وجهي من الفشلة
ما اعرف وين اضمه
عفو عليج خالة هسة هذا هم سؤال
ظليت امتمت وما اعرف شجاوبها
بس ما حسيت الا وقاسم جاوبها

.. لا حجية ما فايتتها سأليني انا عنها حافظها بالموعد

لالا لا لهنا وكافي زوج اليبقى يمهم
طعلت من المطبخ ووجهي احمر طماطة
من الاحراج

دخلت للغرفة وبدلت ملابسي
وطلعت من جنطتي
نستلة وكعدت اكل بيها واني افكر بعد والله العظيم يحلم
بعد افتر وراه واحجي وياه ابو الهول
خلصها علية كله صامت
واني الفطيرة صرت افتر مثل ظله وراه وراه
وين ما يروح

بحيث مرات ينسى نفسه ويحجي وياي
ومرات لا يبقى معند ميحجي
واني لهنا وخلص صبري بعد ما احاول
هذا هو لا ونوب فوك هذا كله
كاعد يحطني هو وامه بمواقف محرجة
حضرته يتونس ويضحك على حسابي

طلعت نقالي من الجرار وفتحته جان الكة مكالمتين من شيماء ووحدة من مروة

جنت اكل بالنستبة وادردم عليه
وجان يدخل تمثال ابو الهول
هالمرة درت وجهي وسويت نفسي
اكلب بالنقال
وكف كدامي وكال
.. تدرين بية اتخبل من وحدة تتمزعل عالاكل
وانت الحمدلله شكو شي اتخبل منه
انتي كبل تسوي عبالك عندج تحدي

رفعت راسي وبرطمت شفايفي
.. عوفك مني ولا تدوخ نفسك بية
خليني اموت من الجوع
وانت تغتاح (ترتاح) وتفتك من همي ومسؤوليتي

ابتسم وكال
.. لا خوية هادي اسم الله عليك من الموت
لعد انا ويامن اتعارك كل يوم
ومنو يفتر فوك راسي مثل الذبانة

جنت كوة لامة حلكي ما ابتسم
مد ايده وكال.. يالله شو كوم كدامي انزل ويانا عالغدة

باوعت عليه .. ها والله ما مشتهية اكل
باوع علية وضحك
.. لك هادي لازم تاكل ترة مو زين عالجنين

شهكت وصرت اضحك على كلامه جان يقلد امه
يالله كوم ترة انطيتك هواي وجه لا تكعد تبيع ثكل علية

مديت ايدي وكومني وياه
نزلنا سوية دك نقاله
وهو بجيبه وجان المتصل رهف
عقد حواجبه وانطاها رفض

سألته .. هاي شنو شعجب اشو انطيتها رفض شنو متزاعلين ؟؟
جاوبني .. هاي البنية عنودية متسمع الحجي
ويحتاجلها اربيها من جديد

باوعت عليه .. انت شنو سالفتك ما باقي واحد ممتعاغك (ممتعارك) وياه

شيماء
مرت الايام ومريم بدت تتحسن وخلصت امتحاناتها
واني بعد موقف مروة وزوجها
حسيت بالحرج وقررت ارجع لبيت سليمة

بسبب عركة مروة وزوجها
بذاك اليوم مروة اكتشفت بالصدفة
رافد مفيز جوازه ويريد يسافر لتركيا بدون علمها

والاقوة منها هو كايللها يريد يسافر للشمال
وبيومها من عرفت صارت عركة كلش جبيرة بينها وبين زوجها
ومروة كلتله تطلكني قبل لا تسافر
حسيت بي انحرج مثل الي لزمته من الايد التوجعه
هو كبل كنسل سفرته
بس بعدها شن الحرب على مروة بس بغير
طريقة كام يجيب امه وخواته
كل يوم للبيت
ومروة جانت تتخبل منهن لان عيالها جانوا ناس متكبرين وكل شوية يسمعوني كلام زايد الي ولمريم
بالطالعة والنازلة

وورجعت مروة تتعارك وية زوجها بس هالمرة اتعاركت علمودي اني ومريم من ورة اهله وتصرفاتهم
مروة .. شوف رافد تروح تحذر اهلك ما يندكون
بية وبخواتي لا والله العظيم مرة اللخ اطردهم من
بيتي
وهو عاط بيها وكللها
.. شنو حضرتج تهدديني ببيتج والله اطلع واعوفلج
البيت واخذ بنتي وياي واخليج تحلمين تشوفيها

ومن هذا اليوم قررت ارجع لبيت سليمة
و ما ابقى هنا واكون سبب بخراب حياة مروة
و مشمش خطية تحتاج امها ابوها
موذنبها احنا ما عدنا وطن
ومو من حقنا. نعم عليها بظلام حياتنا

مروة بوقتها جانت حيل معترضة على قراري
بس اني ظليت مصرة
مروة .. شيماء ليش تسوين هيج
تدرين بية ما ارتاح لسليمة
خاف تسويلكم شي

باوعت عليها .. شوفي مروة احنا شفنا الاسوء
من هذا وية سليمة بس ما يوم اتجرأت تسوي
وياي اني وخواتي شي

مروة ..زين بقي مريم عندي
بس مريم جاوبتها معترضة
.. لا اني وية شيماء وين ما تروح اروح وياهة

ومن ذاك اليوم رجعنا لبيت سليمة
وجان نلكة سليمة واكعة بالقاضية وصحتها مو زينة

اثير وامجد اخذوها للمستشفى
واني ومريم بقينا بالبيت لوحدنا
بس عشنا احلى فترة
جنا كلش مرتاحات ناكل ونام براحتنا بدون قيود
وما نأثر على احد

واني طول. هاي الفترة الفاتت جنت كل يوم اداوم
بالمستشفى
واليوم متعودة مثل كل يوم استلم واجباتي
وابلش بيهم
وبأثناء ما جنت اشتغل وجان التقى باخر انسان جنت
جنت اتمنى اشوفه

صار بوجهي يالله ما اعرف شصار بكلبي الساذج
رجفة كلبي الخاينة خلتني اتوقف بمكاني
اول ما شفته
هو بس شافني ابتسملي كبل اتوجه علية يريد يحجي وياي عجيب امره هذا الرجال بيوم الي اني اكون
اريد بس احجي وياه هو يتهرب مني
وهسة انكلبت الادوار
بس اني ما انطيته فرصة كبل غيرت اتجاه طريقي

واليوم من رجعت للبيت لكيت
سليمة مرجعيها للبيت وما بيها حيل تتحرك

باوعت لمريم.. منو جابها
كالت .. بابا اثير جابها للبيت
.. زين وين علاجها وشنو كال عليها الدكتور
ادري هذولي ولدها شنومن ملة. اي غير يفهمونا
شنو نسوليها

فجاءة وجان اثير اتصل علية يسألني على مكاني
.. اني رجعت للبيت بالله متكلي رحمة على اهلك
شنو اجيت وشمرت امك وهي مريضة بدون متحجي
اثير.. اني جاي وافهمج على علاجها
وعندي موضوع مهم احجي وياه

اندك الباب
ودخلت ضحى وسلمت علينا واخذتنا بالاحضان
واتبادلنا الاخبار خطية اليوم اجازتها
ضحى.. مريومة تعالي شوفي شنو جبتلج

جانت شايلة جنطة جبيرة مال ملابس
مريم .. هاي شنو
ضحى جانت مبسطة بالكاع
وفاتحة الجنطة وتطلع ملابس كلش حلوة
سألتها بفضول.. هاي شنو
ضحى ببتسامة تعبانة

.. هاي ملابسي الجديدة والقديمة
كلت بدال ما ضالة محرومة من عندهن خلي اخذهم لمريم خلي تستفاد من عندهم
لان سيف حرمهم علية

والله كسرت خاطري ضحى اباوع عليها
جنها مرية عجوز عبالك سيف ديسلب شبابها
استغفر الله ياربي

شوية وجان يشرف اثير
للبيت وبيده علاكة علاج امه انطاها الي وردت اكوم اخذه الهة بالغرفة
حجة .. شيماء لحظة انتظري عندي وياج موضوع اريدج تكعدين وتسمعينه زين

باوعت عليه انتبهت لضحو ومريم اتوقفوا عن الكلام
وباوعوا لاثير

رجعت كعدت بمكاني
.. شنو الموضوع
اثيرباوع علية وكال

.. اليوم اجوني ناس طلبوا ايدج مني
عقدت حواجبي
وكتفت ايدية على صدري وسألته
.. اي ومنو هذا
.. شاكر صاحبي

يتبع

احبكم هواي احبكم كومة
اختكم نهى ☺️☺️☺️☺️