أساور الفضة الفصل الثاني وسبعون 72 - بقلم نهى

مساء الانوار عليكم يا احبتي

احبتي وحدة من المتابعات تطلب منكم الدعاء
لبنتها نزلت الصورة

#اساور_الفضة_ج٢
#نهى_الحسون

هدى

بعدما كان البيت منور بأجواء الفرح
فجاءة و بلحظة وحدة انقلبت الامور
ودخل الفزع والخوف بكلوبنا
شلون وشوكت وليش انخطف هشام

هاي الما عرفناها لحد هسة
لان خالة كاعدة بس تبجي. وتدعي
كولشي مفتهمت من عندها غير بس هشام انخطف
والله وكع گلبي بين رجلية

ام قاسم وهي تبجي
.. يمة هاي وين جانتلي ابني ينخطف قبل عرسه بأسبوع
وقاسم راح ينجن من الخوف على اخوه
يكول لكو سيارته مفتحة بالشارع قريب على منطقتنا
وواحد

خطية كسرت خاطري والله حالها يمرد الگلب
رحت انطيتها كلاص ماي
.. هاج خالة اخذي شغبي (شربي ) شوية ماي
لا يصيغ (يصير) بيج شي وتتخغبطين (تتخربطين)

اخذته وشربت شوية وكالت
.. رحمة الله والديج
عفية خالة هدى اتصلي عالبنات خلي يرجعن للبيت
بعد ماكو خطوبة ولا اكو فرح منا لحد ما برجع ابني لحضني
وليدي راح وما اعرف عنه اي خبر
بس الله الي يسترنا

.. ان شاءالله خالة هسة اتصل عليهم
بس انتي اهدي شوية موزين على صحتج

رحت
اتصلت من نقال خالة لان نقالي فوك وما بية حيل اصعد اجيبه
دكيت على منى وفهمتها الموضوع وهي انخبصت
ودروا البنات سمعت صوت هالة وسحبت النقال من منى وسألتني
.. ولج هدى صدك تحجين هشام شلون انخطف ومنو خطفه
خطية نهت كلامها بالبجي

منى اخذته منها وكالت
.. هدى دزيلنا العم حسنين خلي يجي علينا للصالون يرجعنا للبيت
.. اي هسة. اكله

طلعت للباب وكلت لعمو حسنين
ورجعت لكيت خالة تتصل على عزام
وعزام
ما انطاها اي خبر. كللها
.. اني يم قاسم وبعدنا لحد هسة ما
وصلنا لاي شي يدلينا على مكانه
ومنتظرين الخاطفين يتصلون على اي لحظة يطلبون فدية
خالة نهت الاتصال وظلت تحوم بالبيت
عبالك وحدة عندها حالة مخاض
وكل شوية تدعي وتنذر كون ربي يرجع ولدها سالمين ويبعد البلاء عنهم

واني افتر وراها اامن على دعاءها وشايلة اسوا الي كانت تبجي.
عبالك تحس بينا اتأثرت باجواء البيت المشحونة

ورة فترة اجوي قاسم وعزام وعمو فرزدق وصهيب.
وكم واحد من جماعته. لقاسم دخلوا للاستقبال

قاسم دخلهم واجة دخل للمطبخ
اباوع عليه شلون وجهه مخطوف
جانت خالة كاعدة على القنفة
دتبجي بس شافت قاسم كامت على حيلها وكالت

.. ها يمة قاسم بشرني وكلي لكيت اخوك
قاسم باسها من راسها وكللها

.. يمة انتي بس ادعيله وان شاء الله الكاه
انا شاك بهواي اطراف. الهم يد بخطفه
بس ما عندي اي دليل حتى اوجه الاتهام. واتحرك على ضوءه

ام قاسم.. منو هذولي الي يخطفوا وشنو مصلحتهم
اشو هشام سودة علية كافي خيره شره
لا متعارك وية احد ولا مأذيله واحد

.. يمة يكفي انا اخوه هذا اكبر سبب يخليهم يطمعون
ويخطفوا هاي وحدة من الاسباب

اباوع عليه هديء امه وكللها
.. يمة ابوس ايدج لا تأذين نفسج لاتخلين بالي يمج
وما اعرف احتار بمنو بيكم اخوية لو امي

كعدت ام قاسم بمكانها وكالت تطمن ابنها
.. روح يمة لتخاف علية انا كلشي ما اريد منك
بس اريدك تبرد گلبي بأخوك

جر حسرة وكال .. ان شاء الله

تركها
وطلع من المطبخ وراح صعد فوك
وصاحني.

يمة اني سمعته كال هدى تعالي
واني وكلبي فز من مكانه

يمة فدوة لهالصوت صارلي شكد ما سامعة اسمي على السانه
اثاري شكد حلو اسمي بصوته

رحت ركض عليه
وصعدت وراه ودخلت للغرفة. اباوع عليه طلع مسدس
من الكنتور وحطه بحزامه وكال

عزة هذا طلع مسدس ليش
وهمست بخوف
.. هاي ليش المسدس شتسوي بي

حجة وعقله مشدوه .. كلشي ما اسوي اخذه للاحتياط
باوعي وسمعيني زين اريدج ديرين
بالج. على امي
وسحبي النقال من يمها . لان راح تظل كل شوية تتصل علية

اقتربت منه خايفة عليه
.. قاسم عفية طمني عليكم والله خايفة

.. لتخافين الله موجود. هدى اريد اعتمد عليج
بشغلة

طلع جنطة مال اوراق من الكنتور
انطانياها وكال
.. شوفي انا طالع اذا اجة ولد اسمه عدنان انطي هاي الجنطة.
بالحقيقة ما اعرف منو ورة خطف هشام
وانا لازم اخذ احتياطاتي وما عندي وقت

وكع گلبي بين رجلية
من خوفي عليه اتمنيت اتعلك بركبته وما اخليه يطلع
بباب البيت بس المشكلة قاسم شوره من راسه
اخذت الجنطة من عنده وطمنته وكلتله
..لتخاف اني بظهغك (بظهرك)

حجيتها واني ابجي فاقدة وخايفة اطمنه واني احتاج الي يطمني عليه
ما اتحملت ركضت عليه و شمرت نفسي بحضنه
واتوسدت صدره

فتح ذراعه ولمني لحضنه وباسني من راسي وكال
.. لا تخافين ان شاء الله ماكو شي. اريدج تصيرين فطنة
وعينج على البيت انا طالع وما اعرف شوكت ارجع

جنا نحجي
وسمعت صوت نقالي يدك بغرفة هالة رحت وعفت قاسم بالغرفة

جان نقالي يدك
والمتصل مريم بس شفت اسمها يبووو هاي اكيد
كلبها يعلمها
يمة سودة علية مريومة
متأكدة بس تعرف بهشام انخطف راح تتخبل

رديت .. الو هلا مريم
فاجئني صوتها وهي تبجي خايفة
.. لج هدى. صارلي ساعة اتصل عليج وين جنتي ليش متردين

سألتها وعقلي يحلل معقولة عرفت بالخبر زين منو كللها
.. ما ادغي (ماادري) حبيبتي جان فوك ما سمعته
شنو شبيج دتبجين

مريم .. لج هدى جنت داحجي وية هشام بالنقال
وما اعرف شصار بي فجاءة سمعت صوته يصيح
واصوات رياجيل يمه

وسمعت هشام يكللهم
.. عوفوني لا انعل والديكم ولك ضياء العار انا الك بسيطة
كول للكلاب مالتك خلي يعوفوني.

وبعدها انقطع الخط وما اعرف شصار بي عدت الاتصال يطلعلي الجهاز مغلق
عفية هدى راح اتخبل
فهميني شنو الموضوع وهشام خو ما عليه شي طمنيني

مريم تحجي واني كبل ركضت لغرفتنا ولكيت قاسم يريد يطلع وكلتله

بسرعة
.. قاسم انتظر لحظة.
قاسم .. شكو شبيج
.. اتوقع الخطفوا اخوك هشام همة اهله ابوه واخوه ضياء

سمعت شهكت مريم .. يمة صخام يعني هشام مخطوف

قاسم اقترب مني وسألني
.. منو كلج وشلون عرفتي
.. هياته مغيم (مريم) كالت جان يحجي وياها بالنقال من صاغ (صار) الحادث.
وحجيت لقاسم كل كلام مريم

قاسم زاد غضبه .. والله العظيم جنت شاك بيهم
بس جنت ممتأكد منهم بيت كلظم جانوا احد الاطراف الي جنت شاك بيهم

اباوع عليه تركني ونزل بهرولة
وكال وهو ينزل واني وراه
.. مو تتسين الجنطة
.. لتخاف ما انسى

جان نقالي بيدي ومريم بعدها عالخط
اسمع بس صوت بجيها

حجيت وياها اطمنها وكلتلها
.. حبتبتي مغيومة (مريومة) لا تخافين هشام ان شاء الله ما بي شي

مريم. بس تبجي كولشي مفتهمت منها
نهيت الاتصال واني بالي. مشدوه
نزلت الجنطة وياية

لكيت هالة والبنات رجعوا
وهالة عيونها حمر
ومنى وكوثر الوجوه مصفصفة

هالة سالتني
.. هدى قاسم وين راح وشنو صاير فهمينا
.. قاسم غاح (راح ) وية عمو فغزدق (فرودق) وعزام والولد
لبيت عمكم كاظم لان مغيم (مريم ) اختي جانت اخغ (اخر) وحدة
جان يحجي وياها من صاغ (صار) الحادث وسمعت
بالصدفة هشام ذكغ (ذكر) اسم ضياء اخوه

ان قاسم .. يمة صخام سواها كاظم النذل ونفذ تهديده
من الله لا يرضى عليه ولا يوفقه

منى كاعدة ام خالة تواسيها
.. يوم كافي لا تعصبين عفية لا يغتفع السكغ (لا يرتفع السكر)

انتبهت لاسو دا تبجي اجتي هديل وشالتها تهز بيها
تريد تسكتها وعينها على خالة.

وكوثر كاعدة تتصل على رجلها
وهالة طلعت نقالها وطلعت برة
عرفت بيها راح تتصل على عزام

جنا كلنا كاعدين منتظرين بين الترقب والخوف
منى تتصل على زوجها كللها انا كاعد يمهم
انطيني مجال خلي افتهم منهم شنو السالفة

اشو اخوج قاسم يصيح وضياء يصيح
منى كلتله
.. عفية الله يخليك طمننا عليهم وهدئ النفوس

.. لاتخافين عمي محمد وابوي وعمي فرزدق اجوي
هسة سدي النقال خلي اروح افتهم شنو الموضوع وبعدين اكلج

شوية وسمعنا صوت الجرس اندك
باوعنا من الكاميرا واتفاجئت بمريم وشيماء وحيدر بالباب
رحت فتحتلهم الباب.

وسلمت على حيدر وسألني على قاسم والوضوع
واني كلتله هو هسة ببيت عمهم
حيدر.. هدى اني اخوج كولي ممحتاجين شي ترة انا موجود

.. مشكور ابو حسام متقصر كلك خيغ وبغكة (خير وبركة )
راح حيدر وكال لشيماء خلينا على اتصال

ودخلوا البنات مريم جانت منهارة من البجي

ام قاسم شافتها وكامت تسلم عليها
وتواسيها ومريم شمرت نفسها بحضها وضلت تبجي
بعدها اجوي مرت عمهم محمد ورهف واختها
واخوها وزوجة عمهم حسن وبناتها
وخالة ام صهيب اجتي

لان هذولي بيوتهم كلهم قريبة علينا
واني بس شفت رهف
احس صار مغص ببطني واتزلزلت كلي

ما اعرف شصار بية من شفتها
حسيت بالتهديد
والصدك هي الله يحفظها حليانة مدري من كد الغيرة
صارت حلوة بعيوني.

طبعا همة مصارلهم هواي من اتصالحوا وية قاسم وخالة.
وهسة همة جايين يقومون بالواجب
شوفت رهف نستني مصيبة هشام

شيماء كاعدة يم مريم الي جانت بس تبجي
ومنى تسكتها
ام قاسم.حضنت مريم وتدعي
.. ربي لخاطر دموع هاي اليتيمة كون تردلها هشام. وتقر عينها بشوفته

صارت الساعة ب٦ العصر
ودك الجرس وشفت بالكاميرات رجال غريب واكف بالباب
لبست حجابي وشلت الجنطة
واخذتها طلعت سلمت عليه وكال
.. اختي انا عدنان قاسم دزني على الجنطة
كال تلكاها بالبيت الاهل ينطوك اياها

انطيته الجنطة واتصل على قاسم وكله اخذت الجنطة
انتوا وين ؟؟
.. يالله لعد انا جايكم ؟؟

دخلت جوة ولكيت منى كاعدة تحجي بالنقال
والوجه مرتاح
سدت النقال ودارت على امها وكالت
.. يمة ابشري انحلت السالفة

ام قاسم والنسوان يمها ضلوا يصلون عالنبي
ويحمدون الله ويشكرونه على سلامة هشام

ام قاسم.. ماكلتيلي شلون انحلت وشنو صار
منى كلتلها .. يجي قاسم وهو يفهمج
عرفت منى مقبلت تحجي لان النسوان كلهم موجودين

مريم الي وجهة نصه دموع ونصه فرحة
ام قاسم باوعت عليها وكالت
.. خالة مريومة الحمدلله على سلامة رجلج

مريم وجهة احمر دنكت وكالت.
.. الله يسلمج خالة. ربي يفرحج بي

انا الناس بالناس
وانا عيني على رهف
ما اعرف احتار بيمن برهف لو بالفضول الي كتلني
اريد اعرف شنو صار بين قاسم وبيت عمه

.دخلت هالة للمطبخ والحلك مشكوك من الفرحة
عرفت بيها جانت تحجي وية عزام
واكيد مفهمها السالفة
وانا الفضول ماكلني اكل

ما كدرت اصبر اكثر رحت دخلت للمطبخ الحار وصحت هالة
.. هالة تعاي شوية ساعديني خلي نسوي العشا

اجتي هالة تتمايل بمشيتها والعيون تلمع
ورايحة بغير عالم
هي دخلت للمطبخ واني سحبتها من زندها عالسريع
واخذتها على صفحة

.. هالة العوبة هسة تحجيلي كولشي شنو كلج عزام بالحغف (بالحرف) الواحد

هالة.. وانتي شكو تردين تعرفين شنو هالفضول العندج
عيب عليج
هاي اسرار خاصة بين المخطوبين

دمغت كصتي وكلتلها.. خاب شوف هاي وين عايشة
والناس وين لج ثولة اني شعلية بخصوصياتكم
الج اني اغيدج (اريدج ) تفهميني شنو كلج
عزام شصاغ (شصار) على موضوع هشام وقاسم شلون حلوها للسالفة

تحجين لو اغوح (اروح ) اكول لخالة بنتج كاعد تلعب بذيلها من وراج.
ويومية تتصل بعزومي قبل لا تنخطب وعايشين اللحظة من وغاكم (وراكم)

اقتربت من بسرعة وسدت حلكي وكالت
هالة .. عمة حتى عمة يا مفضوحة
هسة احجيلج كولشي
حشى مو السان رشاشة

الي يشوفج فصمة ميعرف كل البلة بيج همزين انتي مو اطول بشبر
جان اكلتيتي اكل

.. هسة شنو تحجين لو اغوح (روح )
.. اوكفي لحظة هسة اكولج

شوفي يا عوبة.انتي اتصلت على عزام وكال
قاسم كعد وية عمامه بالاستقبال ببيت كاظم
وجان كاظم واولاده وابنه ضياء موجودين

وقاسم كبل دخل بالموضوع وكللهم
.. ادري بيكم انتوا الي خطفتوا هشام حتى تخربون عرسه لان طلع عن شوركم

ضياء.. اي احنا اخذناه. نزيد نربي من جديد
ماكوا واحد يكسر كلمة ابوية. وهشام ولد عاق
تعدى حدوده وتجاوز هواية
علينا اني وابوية
والبركة بيك انت الي علمته على الطغيان

راح اخذ عمامه وشيوخنا و خطب
والكل اكلوا وجه ابوية من الفشلة يسألون وين ايوك يكللهم ماعندي اب
وانا قررت اسويله كرصة اذن واربي واحطله حد
خاف عباله ماعنده رداد يحطه عن حده
لازم يعرف اني موجود

قاسم بغضب.. شوفوا. هذا ابنكم وانتوا احرار بي
تخطفوا تحبسوا شنو تسوون بي سوو
بس احب اكللكم شغلة هو رجال وحر نفسه
شكد تردون تطولون وتبقون حابسيه يعني لشوكت
لا بد وان يجي اليوم الي يطلع بي

وساعتها تعالي الي يخلصكم من غضبه
مو بعيد يروح يقدم عليكم بلاغ بالمركز
وضيفوا فوك هذا كله
اول وتالي راح يسوي الي براسه. غصباً عن الكل
فانصحكم تطلعوا وتطلقون سراحه
لان ما باقي على عرسه اسبوع واحد
لاتكسرون فرحته. وتبهذولوا
ترة متحصلون شي غير بس تخلوا ينفر منكم اكثر وتزيدون الطين بلة

ضياء.. شوف قاسم انت لا تتدخل. هذا الموضوع خاص بينا وبين ابننا
شنو نريد نسوي بي نسوي
نحركه نحبسه. بكيفنا. انت اطلع منها.
لا حشر نفسك بيناتنا

عمهم محمد.. ضياء شنو هذا الحجي وين كاعدين
رجال شكده وشكبره. تتحكمون بين وتخطفوا
شنو غابة انتوا وانا ما ادري

التفتت على كاظم وكله
.. كاظم احجيلك كلمة شنو عاجبك هذا الحجي

كاظم .. والله اني من رأي ابني ضياء
حقك محمد انت تحجي هيج مسيطر وتحجي هيج براحتك
لان مو ابنك الي طلع عن شورك وسود وجهك كدام الناس
وهمشك. وخلاك بلا قيمة وراه

فرزدق وعمهم حسن حاولوا يقنعون كاظم وابنه ضياء
حتى يعوفون هشام ويطلعوا

بس ماكو الثنين معندين وراسهم يابس
تالي قاسم طفح بي الكيل وراواهم وجهه الثاني
وخلاهم واحدهم يدعم بالثاني
وسحب من تحتهم البساط

نهض من مكانه وكال

.. خلاص هاي هي انتوا جبتوها لنفسكم
انا عني ردت احلها بالتي هي احسن
وكلت اجيكم بالعيني والاغاتي وانتوا معاندين وراكبين راسكم
ما اجيتوا وياية للطريق.
بس الظاهر انتوا مو مال احترام تردون اراويكم وجهي الثاني

هشام صحيح ابنكم بالاسم
بس هو اخوية كول وفعل غصباً عن اليرضى والما يرضى
وحليب امي الشاهد علينا

بما ان انتم بقيتوا مصرين
خلاص اني ما عندي غير حل راح اضطر
اعرقل مصالحكم. بالمشروع واطردكم منه مثل الورد
وساعتها كل فلوسكم تروح بالشط واكعدكم على الحديدة
عود راويني شنو تكدرون تسوون

كاظم وضياء كامو من مكانهم وكالوا
.. وانت شنو دخلك بالمشروع لا تظل تتفلسف
من يمك هذا المشروع خاص بينا احنا وعمي منير ومنتصر
متكلي انت شلون عرفت بالمشروع

قاسم ضحك بستهزاء وكللهم
.. ليش هو من صاحب المشروع الرئيسي وبأسم منوا

ضياء ضحك بنتصار وكال
.. قاسم هالمرة مثل كل مرة ما راح تكدر علينا
كضيت طول عمرك تهدد وتهد وتنثني وتكول حقي اطلعه
وبس تنبح ما تعض
وهالمرة مثل كل مرة تتوعد وكلشي ماكو
احب اكلك المشروع بأسم عدنان. ال......
واحنا اتكاتبنا وياه وفلوسنا حطيناها بالمشروع
وانت يا حلو راحت عليك. ولو مو انت لو الاكبر منك
ما راح يكدر ياخذ المشروع من عدنان

لان عدنان معروف وميحتاج اعلمك بي هو منو
كاظم يأكد على كلامه ويكول
.. اي صحيح كلام ضياء روح دورلك على غير حجة
غير هاي

قاسم رفع نقاله واتصل على صاحبه
.. شوف يالحبيب اريدك هسة تجيني وجيب وياك جنطة الاوراق

ضياء وكاظم يباوعون على قاسم وهمة مسيطربن ما
عرفوا عليمن اتصل

سد النقال وباوع عليهم قاسم وكال
..لا تستعجلون على رزقكم كلشي بوكته حلو
انا لو منكم اكعد اراجع حساباتي
لان مو انا الي اخلف بوعدي.
صحيح صارلي سنين اهدد واتوعدلكم

وكل هاي السنين انتوا مأمنين بس وروح ابوي
ما عدة علية يوم اذا ما انام عالمخدة. وعقلي
يخطط شلون اجركم مثل الخرفان
للمذبح واكعد اباوع عليكم شلون يصلخون بجلدكم

ضياء كام يريد يهد
وعمه حسن لزمه
وانا جنت اباوع لقاسم واعرف عن شنو جان يحجي
لان انا مشيت بأغلب المعاملات الي صارت بينهم

لحظات ودخل عدنان علينا وجايب الجنطة وياه
عدنان بس شاف قاسم راح كعد يمه وكله
.. شنو قاسم طلبتني اجي شكو صاير شي

قاسم يباوع على ضياء وكاظم وكال
.. لا ما ردت شي
بس ردتك اتوضح للجماعة الموضوع
وتفهمهم منو صاحب المشروع

عدنان .. تدلل من عيوني هسة افهمهم
ولو هو ميحتاج للشرح
كلشي موجود بالاوراق الي وقعوها

ضياء ..عدنان فهمنا شنو الموضوع وهذا قاسم شكاعد يهلوس

عدنان .. بالحقيقة المشروع بأسم قاسم وانا فقط
الوسيط البينكم. الي جنت اكمل كل المعاملات واجيبلكم المشاريع طول هاي السنين

ضياء وكاظم نطت عيونهم وفلت وجهم
وعمهم محمد التفت على قاسم وكله
.. قاسم شنو قصدك من هذا كله معقولة وصل بيك الحقد
تخطط تهجم بيوت عمامك وتنتقم منهم
صدك فاجئتني

قاسم.. اي معقولة وكلشي اتوقع
وشبيك متعجب ليش مو همة نفسهم.
الي نهبوا فلوس ابوية وحلالنا كله راح بليلة وضحاها
وبسببهم خسرت الوالد
وين جانحرصك هذا بيوم السوو بينا وباكونا وابوية مات بسببهم
اشو ما سمعتك اعترضت او لزمتلك واحد وعتبت عليه
شلون يسوون باخوهم هيج

عمه محمد بهت لونه وماعرف شيحجي
وسأله .. هسة شنو المطلوب

باوع لكاظم ولضياء وكال
.. المطلوب تلزم اخوك وابنه وتفهمهم بقائهم بالمشروع
مقابل يتركون هشام واي حركة زايدة منا منا
راح يلكون نفسهم بالشارع

كاظم حجة بأستسلام والغيض ينبع من عيونه وكال
.. هذا هو هشام يطلع بس شنو الي يضمن انت راح تبقى تحافظ على كلمتك ويانا

قاسم.. ماعندكم غير حل واحد هو بس كلمتي
واني عن كلامي مسؤول والشاهدين عمي فرزدق وعمي محمد
همة بالوجود ولهنا وكافي

ضياء بتشفي .. يالله عادي اخذ هشام بس اهم شي
خربنا عليك. تعب السنين وما كدرت تكسرنا
وراح نبقى مشاركين بالمشروع غصباً عنك

قاسم ابتسم وكال

.. انا صحيح ما راح اطردكم من المشروع
بس الي يجبر بخاطري ان انتم راح تبقون تحت رحمتي
اي حجاية مني ينسحب منكم كلشي

وهذا الشي بحد ذاته يشفي غليلي
ان تبقى حاجتكم عندي وراح تنجبرون غصباً عنكم
تطيعون اوامري

عزام .. لج هالة لو تشوفين عمج كاظم وضياء
كاموا يكمزون من القهر وما كدروا يفتحون حلكهم بأي كلمة
وعمج محمد كال لقاسم .. يعني افهم من كلامك
عمك منير وابنه منتصر راح ينطردون

قاسم كام من مكانه وكال
.. انا لهنا ويخلص كلامي وياكم اما منير وابنه منتصر
فهذولي حسابهم يمي ومحد له دخل بالموضوع
مثلما شلتوا ايدكم بيوم سلبوا حلال ابوية وموتوا بحسرته ومحد اتذخل منكم
هسة هم اريد منكم تطلعون من السالفة ومحد يتدخل وتخلوني اني وياهم نتفاصل

اتجه يطلع من الباب وقبل لا يروح كال
.. انا طالع. رايح للبيت اريد كون قبل لا اوصل الكة اخوي هشام موجود قبلي

هالة .. وهسة همة يامحفوظة السلامة جايين بالطريق
وخلينا نطلع العشاء ونلحك نعشيهم
لان اذا اجوي اخواني راح تصير هوسة وكولشي ما نلحك نسوي

هالة جانت تحجي واني مسطورة سودة علية قاسم
كل هاي شايلهة بگلبه ومتحملهم لوحده

هالة سالتني
.. اكلج هاي ست رهف شجابها هنا عدنا
.. حظي الاعوج جابها مو عالاساس اني ناقصة
هم وتجي كهف تكملني

اجتي مريم يمنا بالمطبخ وكعدت تساعدنا بالعشاء
شوية وجان يندك والباب وسمعنا صوت هلهولة فرح
من ام قاسم

وركضنا كلنا نباوع منو القادم
وجان نشوف هشام حاضن خالة ام قاسم
وهي تبجي على صدره

وصار هشام يتنقل من حضن لحضن بين اخواته وامه
اباوع لمريم واكفة وراية مستحية وتمسح بدموعها

باوعت عليها وكلتلها .. انتي شنو سالفتج فرح حزن

كلو دموء مافي ضحك انتة واهد مجنون

ابتسمت رحت يم هشام اتحمدله عالسلامة وكلتله
.. عيني هشومي اكو ناس زغعوا (زرعوا) نفسهم هنا ببيتنا
من الظهغ (الظهر) ظالين مثل الطفل الضايع

هشام يباوع علية وسألني
.. منو هذول
التفتت واني اباوع على باب المطبخ الوراية

باوع على اتجاه مكان نظراتي
واتسعت عيونه مثل الي لكة هدية العيد
وابتسم .. من اروح قربان لدموعها

مريم
كلبي نهض من مكانه من شفته دخل وسلم على خالة وخواته.
صرت اترقب وانتظر دوري شوكت يحن
ويوصلني السرة واسلم عليه
واخذه بأحضاني مثل خواته وخالة
اريد اصيح بعالي صوتي واكول اني هم الي حق بي

شافني وابتهجت عيونه وكال
.. جعلني قربان لدموعها
دخل للبيت وكمل سلامه على باقي اقاربه
وسلم على شومة اختي واتشكر منها
هذا كله واني استحيت اروح اسلم عليه كدام الكل كلت خلي
من يكون لوحده اسلم عليه
ربع ساعة ودخل قاسم والولد

وصدك صار البيت خبصة مثلما كالت هالة
والتهينا نسوي عشا وشيماء اجة عليها حيدر وكلتلي
.. يالله مريومة كومي حيدر ينتظرنا بالباب
هم يالله نروح

باوعت لهشام جان ملتهي يسولف ويحجي ومامنتبه علية
حسيت بالخذلان يعني شنو راح اروح واني حتى بعدني ما سلمت عليه

باوعت لشيماء وكمت من مكاني
.. يالله بس اروح اجيب جنطتي من المطبخ

رحنا اني وشيماء على خالة ام قاسم
حتى نسلم عليها. لكينا هشام فوك راسنا
هشام.. هاي شنو وين طالعين بعد وكت ابقوا اتعشوا وبعدين انا اوصلكم

شيماء.. تسلملنا بس حيدر بالباب ينتظرنا وهم يالله نرجع للبيت

ام قاسم.. زين خالة شومة خلي مريومة يمنا
محتاجيها تبقى وية البنات تساعدهم
هي حتى ما لحكت تشوف رجلها وتتحمدله عالسلامة

اجتي هدى وكالت
.. اي شيماء بقيها يمنا واني وهشام نوصلها للبيت
على الاقل تساعدني تلزم اسو واني التهي بالخطاغ (بالخطار)

شيماء ابتسمت وكالت بتفهم
.. يالله لعد اني طالعة
بس هدى مو تتأخر لان مروة تبقى تنتظرها

بعدها طلعت شيماء وراحت وية حيدر واني طرت من الفرح

بلشوا البنات يصبون العشا

واني شايلة اسوا وهشام
اقترب مني وعيونه تلمع بلهفة وشاورني وكال
.. صعدي فوك وية هالة اريد احجي وياج

كلبي صار يدك عالسريع
ابتسمت وجاوبته .. اممم

عض شفته وكال انا صاعد قبلج
راح صاح لهالة. حجة وياها

بالحقيقة ما اعترضت ولا عارضت جنت متلفهة
ابقى وياه والمه بأحضاني واتحمدله عالسلامة

اجتي هالة وكالت .. تعالي ياحلوة خلي اخذج
لاخونا العزيز واني من تالي عمري اصير مرسال غرام والله ياربي

مشيت وياها واني بعدني شايلة اسو
صعدت وية هالة فوك ودخلنا لغرفة لكينا هشام بيها
الظاهر هاي غرفته

هالة.. اتفضل هاي اني وصلت الامانة
يالله عن اذنكم انا طالعة

هشام.. اوكفي هالة لحظة وين. رايحة
هالة.. ها شكو مرتك وجبتها الك بعد شكو شتريد

.. تعاي اخذي وياج هاي الشحرورة. شعندها
يمنا

هالة.. لا حبيبي لهنا حدك. بنت قاسم تبقى وية خالتها
هنا للحماية. اصلا هي مريم بكبرها ما بقت هنا
الا علمود تلزم اسو

اتجهت للباب وطلعت وكالت
.. يالله چاو

همة يحجون واني وجهي ينطي الوان
سدت الباب وراها

وهشام باوع علية واقترب مني ولمني اني واسو لحضنه

يبووووو ياجمال حضنه
اتمنى اعيش العمر كله وياه
همست .. الف الحمدلله على سلامتك والله اجيت اموت
من سمعت الصار بيك

هشام سحب نفس عميق بقهر وكال
.. هذا انا من يومي. سبب كل مشاكلي ابوية واخواني
.. لتضوج الحمدلله ربي عوضك ب قاسم.

.. الف الحمدلله
اكلج شكلنا راح نكلب الخلوة مالتنة. نفحات رحمانية
ونطرد الشيطان

وان احر ما عندي هسة اكعد وياج ونتسامر
واخذج لحضني وعندي هواي سوالف ما تنفع تنحجي

اسو اتحركت متضايقة بين ايدية

هشام باوع عليها .. والله احنا مكتوب علينا
الرقابة سواء من اختج لو من بتها

ابتسمت وهو ضحك وساعتها قضيت وية هشام اجمل واحلى لحظات

هدى
رغم الخبصة ورغم الهوسة ورغم انشغالي
عيوني ابد ما وكعت من على رهف

اباوع عليها من دخل قاسم عيونها لمعت
ياربي هاي البنية نظراتها مفضوحة

ارتاح گلبي من شفت قاسم سلم على الكل
وهي من ضمنهم بصورة عامة ما خصها بالسلامة

رحت يمه اريد احرك گلبها
وكلتله .. الحمدلله على سلامة هشومة
.. الله يسلمج وين اسو اليوم ما شفتها
حبيبة ابوها

گلبي نهض حسيت بي رجع قاسم حبيبي

جان يحجي وراح للمغاسل يريد يغسل
ايديه هستوهم خلصوا من الاكل

رحت وراه جنا بس اني وهو يم المغسلة
شلتله المنشفة وبقيت واكفة منتظرته
بلهفة
قاسم خلص واخذ المنشفة مني وكال
بصوت ناصي

.. اتمنى ما تستغلين الوضع وتنسين نفسج
ترة لا عبالج نسيت وداعتج ضربتج لحد هسة تاكل وتشرب وياية
وما اعرف شنو الي اسويه بيج
حتى يشفي غليلي

كلامه رحعني لنقطة الصفر وحطم جميع امالي
همست بقهر وكلتله
.. ان شاء الله غب العالمين (رب العالمين ) ياخذ عمغي وتغتاح (عمري وترتاح )
مني وتشفي غليلك بية

اباوع عليه عيونه اتسعت ونتر بية بغضب
.. هدى وخري عن وجهي لان الظاهر كمتي تسربتين

حجيت بأمل
.. شنو ليش ضجت المفغوض تفغح (المفروض تفرح ) وتأمن على دعائي
جاوبني وكال
.. لاتفرحين ترة انتي متهميني بعد
بس ما اريد بنتي تعيش يتيمة بدون ام

يالله وخري عن طريقي.
وبلحظتها حسيت مثل الخنجر طعنه بصدري

بيومها بالليل اتفاجئنا بعزام واهله دخلوا علينا
ووياهم الشيخ

هشام شافه وكله .. اهووو هم انت لاتكول جاي تريد تخطب بهذا الليل

عزام ..اي اجيت اخطب شنو عندك مانع
هشام.. لا ما عندي مانع بس اخاف هالمرة يوكع علينا السگف. من ورة النحس مالتك

اشو كلما دتكول نخطب يصير بينا شي
والله صرت اذا اريد اهجم بيت واحد اكرهه
اكله اصبرلي الا اجيبلك عزام صاحبي يمحيكم عن بكرة ابيكم

قاسم يبتسم
.. شبيك على الولد عوفه
ام عزام وكوثر كالوا لامي ولهالة حتى تجهز
روحها للعقد

هالة طفرت من مكانها والحلك مشكوك
وراحت دخلت للمطبخ واني رحت وراها

شوية ام قاسم دخلت هي وكرثر ومنى وهي تحجي وية كوثر
.. اكلج والله عيب يعني هي حبكت الا بهذا الليل يخطبون ويعقدون
والله حتى كلشي ما مسوين
ولا محظرين نفسنا

اباوع لهالة كمزت من يمها وكالت
.. اهووووو يمة هو شنو ينرادلها هو عقد لا تسويها
قصة عنتر

لكزتها .. عزة بعينج عوبة
ام قاسم .. يالله هاج استلمي شوفي اختج الخبلة راح تجلطني بهاي سوالفها

منى .. اي يمة صدك ترة الموضوع ما يستاهل واحنا اهل على شنو التأجيل

ام قاسم .. اي اعرف احنا اهل بس انا خايفة من اختج لا تفضحنا بسوالفها
ويرجعوها علينا يوم ثاني
ويتندمون على هاي القسمة الكشرة الي ابتلوا بيها

هالة.. والله يوم المنى الي اكون ام بيته واصير من قسمته

ام قاسم خزرتها .. عليكم الله اخذوها من وجهي
لا والله اطلع للناس واكوللهم ماعندنا بنية للزواج

هالة حطت ايدها على حلكها
وبيومها تمت خطوبة هالة وعزام وصارت الفرحة فرحتين

وكل مرة اباوع لرهف تباوع لقاسم
بس هسة من باوعت ما لكيتها

واني كمزت من مكاني وعفت مريم اختي الي جانت
محضرة نفسها وتريد ترجع للبيت
وهشام منتظرنا بالباب بس اني وين عقل ما بقى عندي

رحت ادور عليها اباوع للبنات كلهم موجودين الا هي
مريم انتبهت علية انخبصت
وسألتني .. شنو هدى وين رايحة لج هشام ينتظرنا بالباب

عفتها وصرت ادور على رهف سألت اختها كالت. ما اندلها

سألت هديل عكدت حواجبها مستغربة
وكالت .. واني شكو تسأليني عن رهف حبيبتي
ترة اني بعدني زعلانة عليهم لا عبالج امي واخواني اتصالحوا وياهم
اني راح. هم لازم اصير مثلهم واصالحهم
لا عيني
الصار بية ابد ما انساه

يتبع

احبكم كومة احبكم هوااااااي
اختكم نهى الحسون