رواية اسرني كيدها الفصل الخامس والثلاثون 35 - بقلم الكاتبة ايات الـ سند

بقلم : ايات السند
السلام عليكم

لا تنسون التصويت لتعبي والتعليقات استمتعو ♥️

ذا يُبلغها بأنّي مُتعَبُ؟ والشوقُ في جنَبَاتِ قلبي يَلعبُ من ذا يُبلّغها بِكُل بساطةٍ أني بدون وجودها أتعذب يا ليتنا عن كل عين نختفي ويضمنا دون الخلائق كوكب

__________
خلصت اجازة اسر ولازم نرجع للانبار تحضرنا طلعنا الفجر مثل ما اجينا
بس نمت بس اول ٤ ساعات وكعدت وبدت معاناتي وخربت واسر حار بية وينطيني ادوية ويحاول وبالكوة العصر وصلنا سلامات
اول ما وصلنا سبحت وتمددت راسي يوجعني اسر بدل وجابلي بندول ونطاني اياه ونزل للمغرب بدلت ونزلت
لكيهم كاعدين بالصالة بس اسر طالع سلمت وكعدت

نور : ها جمانة تونستي هناك

جمان ابتسمت : اي

نور : بس حرامات ما سويتي سبعة

جمان : عادي مو لازم
سكتت نص ساعة كالت : تعاي جمان خلي نسوي انا وياج العشة

جمان كمت وراها دخلنا للمطبخ
نور : شنسوي

جمان : مدري بكيفج
طلعت اكل وقفت اقلي وياها وهية بس تسئل وتحجي اخر شي كالت : اكلج انتي اشو اسر ما طلع النا النيشان (او البياض ) مالتج بليلة العرس

جمان : هوا اعرف عاد

نور : اي اكيد تعرفين هاي عادة بس من سئلناه وينه كال معليكم منو ضل يدقق بهيج اشياء وصعد

اسر دخل من باب المطبخ : اي لانو صح وهذا الشي ميخصج مو

نور : شصار هوا بس جاي نحجي منين طلعت انتَ

اجى يمي كال : شنو صرتي

جمان : احسن
طلع يمهم ع الصالة

نور : من اجيتو ليهسه طالع غير تتلكي ببوسة بشي

جمان : ماكو داعي هذا الشي يصير كدام الناس

نور فرغت الطاوة : اكلج جمان رحتي ٨ ايام وتونسيتي وهسه لازم نقسم الشغل مو

جمان اخذت نفس : اي عادي هوا شغل

نور : انا جان العشا علية والغدة على عمة والتنظيف ايات هسه انتي اخذيه وانا مواعين الغدة لانو تعرفين بعد سنين يلا صار حملي وهسه انا اخر شهر لازم ادير بالي على نفسي

جمان : خوش ان شاء تكومين بالسلامة
نور : اخ متت حر من الطباخ راح اروح بالصالة اكعد شوي عود انتي صبي

جمان ما رديت طلعت من المطبخ غمضت عيوني بغضب اليوم اجينا واستلمتني
فاتت ايات يمي وصرنا نحجي الاسبوع الجاي نتايجها
صرت اصب فات اسر للمطبخ

اسر : ها شو وحدج تصبين
جمان : نور راحت ترتاح
اجى يمي صار ياخذ المواعين للصالة ويحط
كملنا عشة صرت احلف وايات تغسل وياية كمت وصعدت اسر متمدد على الجرباية

جمان : اسر اريد اروح يم اهلي
اسر : على باجر
جمان : لا امانة هسه ضايجة بس نتعلل
اسر : زين بس ما تباتين
جمان : الله كريم

اسر : يعني الج نية
جمان : حجيت وياهم زينب هناك عود باجر تعال علية
اسر : لع حدري وباجر اوديج
جمان :نشوف

كملت لبست عباية فوك هدومي ونزلنا جانو كاعدين بالصالة طلعنا تمشينا ومن وصلت كال : يلا فوتي وانا عود من اصيح عليج طلعي

فتت لكيتهم مجتمعين بغرفتي سلمت عليهم وكلت : راحت جمانة واحتليتو غرفتها

هاجر ضحكت : غير خلصنا منج

جمان برطمت : صدك ماما خلصتي مني
ضحكو وضلينا نسولف وشوفتهم الصور الي اخذتها هناك وسئلت ماما : رحتي ع الفاتحة مالته

ام جمان تنهدت :رحت يمه رحت بس امي وكل خواتي كالبين وجههم علية ( فقط خالة وحدة تحجي ويا ام جمان وهية اجت بعرسها ) عاد شوي ورجعت

جمان : ليش رحتي ماما ليششش عساهم بابو زايد

ام جمان : غير مات ورحت

جمان : ميستاهلون تقدريهم وتروحين

زينب : سدو الموضوع بلا لا تلعبون نفسي بيهم شكد حجيت ويا ماما ما يفيد

ام جمان : هما وربهم ما اعرف احقد
نص ساعة واجى احمد كال اسر يريدج

ام جمان : صبري يمة شكد عيب ما سلمت عليه
لبسو احجبة وفاتو بالديوان سلمو وشوي كال : يلا جمانة

زينب : وين خليها تبات ويانة وباجر تجي زهراء

اسر : لا والله خيتي الصبح اجيبها

ام جمان : دخليها لباجر قابل على هل كم ساعة

اسر باحراج : يلا خلي تضل
اشر لجمان بعيونه حتى تطلع وراه
طلع ع الباب وهية طلعت وراه

اسر : مو تريدين تباتين دباتي يلا

جمان : هههههه شبيك هوا يوم

اسر : تعودت عليج وياية بالغرفة

جمان : احم ميخالف ارتاح مني شوي

اسر : شلون ارتاح منج وانا راحتي يمج

جمان ابتسمت: باجر تداوم مو

اسر : اي عود العصر من اطلع اجيج

جمان : يلا حفوت

اسر جرها وباسها من خدها : ديري بالج على نفسج
وطلع سديت الباب وفتت ضلينا سهرنينا وثاني يوم اجت زهراء ع الغدة وكضينا الظهرية كلها ضحك
العصر خابر اسر كال راح اجيج كمت لبست العباية وبوستهم وطلعت عليه ع الباب ومشينا على البيت سلمت وصعدت ذبيت العباية وبدلت صعد اسر اجى حضني

جمان ضحكت : شبيك خرعتني

اسر : مريتي واحضن بيها بكيفي شدخلج

جمان : صدكككك ذكرتني بعد ممنوع تتقرب مني اذكرك من بالخطوبة اجينا هنا وكتلي اني احب وحدة ليش تضحك علية وتكول احبج

اسر باستهزاء : انا كلت اني ؟

جمان مفهمت فصده

اسر : لا تجذبين اكول انا مو انيي

جمان : انتة تريدين تضيع علية السالفة مو

اسر ضحك : تراج غبية

جمان كرصته من ايده : هاي علية

اسر بتقليد : يي عليج شتسويلي تكرصيني ؟

جمان : لا غلط
عضيته من جتفه

اسر ضحك : اخ انتي شنو اهلج ما ملقحيج

جمان : قصدك اني جلب مو
بجيت

اسر : هههههههه عود صحيح تحجي
حدري هينا يمي
كعد ع الجرباية وجرها يمه : يول جنت اقصد عليج

جمان : شلون علية

اسر : انا مو كتلج اكو وحدة احبها ورايدها وراح اخطبها جنت اقصد عليج بس انتي غبية

جمان : ها وخر عني غبية مو

اسر : هههه لا مو عليج اقصد على عمي

جمان : اي خوش هدني خلي انزل اسوي عشة

اسر :احبج

جمان واني البس بالشال : حقك هوا منو ما يحبني
كاملي وانا نزلت اركض ع الدرج جانت نور متمددة بالصالة

نور : شبيج تركضين

جمان كلت بكلبي لو نازل اسر وهية متمددة وبطنها لي حلكها : هيج

نور : شو البارحة ما كلتي راح اروح على اهلي

جمان : كلت لاسر وهذا كافي

نور : امم اي شكلنا

جمان دخلت على غرفة ايات جانت متمددة ووسام يمها على التلفونات هججتهم وصرت اسولف وياها و وسام حاضني وبعدين كتلها كومي نكمل سوالف بالمطبخ ودخلت اسوي العشة وهية تحضر نور ما اجت يمنا
كملنا وتعللنا كلنا بالصالة وانتهى اليوم

مر اسبوع الصبح حسيت شي حرك راسي فزيت لكيته اسر بملابس الدوام وكاعد يمي ع الجرباية وحاط راسي على رجله ويلعب بشعري
جمان : ها صباح الخير

اسر : قصدج صباح الظهر

جمان : مو مبدل

اسر : هسه رجعت من الدوام

جمان : يا شكد عيب من خالة اني نايمة ليهسه

اسر : لا حبيبي ما تكول شي اصلا من فتت جانت تصب غدة كالت خليها نايمة على راحتها وانتَ تغدة

جمان : لا خلي اكوم

اسر : صبري
كام ذب هدومه ولبس بجاما بس انا ما بية حيل اكوم من النوم اجت اكوم نام بصفي وحضني حط ايده على بطني

اسر : اريد انام لا تنزلين

جمان ما كلت لا بعدني نعسانة ما اشبع من النوم نمنا للعصر من كعد كعدني كال : كومي جماني بدلي الحجية عازمتنا ع العشة
كمت غسلت ولبست فستان حطيت مكياج عيون خفيف وحمرة جاي الف بالشال دخل اسر جان حوا صار يصوفر

اسر : عميييي شهل رقة مسحي مسحي هل كحلة الي ع عيونج

جمان : لا بالله اول شي هذا ايلانير وثاني شي صار ساعة ارسم بي هسه تريد امسحه

اسر : اي شعندج خالته كلها ولد هناك

جمان : لا اسر خليني مرتبة شبيك تغار من عندي

اسر : عجل مو ما تترتبيلي

جمان : ديلا بطلت ما اروح

اسر ضحك : ها طنكور شو كشرت

جمان : لو اروح هيج لو ما اروح

اسر : انتي ايمتى تبطلين تهديدات

جمان : يلا اختار

اسر : حدري عمي امشي الله يعيني على ما ابتلاني

جمان كيفت بدل ونزلنا هم متحضرين رحنا بسيارتنا ويا خالة وايات وعمر ونور بسيارتهم احسان كال اريد اطلع عود الحكم

وصلنا هناك نزلنا كاعدين زلم ونسوان بالديوان وبيت عمه الثاني هم جايين سلمنا وكعدني اسر يمه كالو شلونكم سوا ومن هل سوالف ولليل حطو عشة وكملنا صرت اشيل وياهم والزلم طلعو يتعللو بالحديقة بس ما شفت مريم ابد

ام اسر : ام نور شصار ويا مريم ع الخطبة

ام نور : والله ابوها شاد الا تاخذه وهيا ما تقبل

الحجية : والله ابوها يعرف مصلحتها بس هيج معاندة نشوف وين تصفى وياهم

صارو يحجون بغير مواضيع وانا بطني صارت توجعني حيل ساعة واسر صاح كال يلا امشي رجعنا للبيت شفت جايتني الدورة بدلت لبست شي طويل ونمت وتغطيت بلكي تهدة بطني ما عندي مسكن ولا جيس المي الحار حتى احطه

فات اسر للغرفة : يمعودة العصر كعدتي وانوب تريدين تنامين من هسه

جمان : عفية اسر عندك مسكن ؟

اسر عكد حواجبه وتقرب عليها بسرعة : ليش شبيج

جمان : احم لا بس هيج اريد مسكن

اسر : غير افتهم مسكن مال شنو دحجي

جمان : بطني توجعني

اسر : خاف اكلتي شي هناك واذاج

جمان : لع

اسر صاح : عجلل شنوو

جمان : يمعود علية الدورة

اسر : ها دطلعها لهل درة قابل شنو ومستحية
كام فتح جرارته مالت الادوية ونطاني مسكن وضليت متمددة ولزمت الموبايل هوا هم ضل كاعد بصفي ب ١٢ سمعنا صراخ جوا نزلنا نركض ليكينا نور تبجي دا تطلك اسر كبل اخذ المفتاح مال سيارة من عمر وطلع شغلها عمر شال نور وخالة اخذت جنطة الجاهل وطلعت وراهم انا فتت يم ايات ننتضرهم

لل٢ بليل سمعنا صوت سيارة اجت طلعنا الهم فاتو عمر فوت نور ترتاح بالغرفة جانت جايبة بنوتة صغيرة متت عليها بستها خالة نظفتها وكمطتها وجانو محضرين مهد صغير خالة حطيه بغرفتها ونيمت البنية يمها عمود نور تعبانة انا صعدنا ونمنا

مر شهرين طلعت نتايج ايات ناحجة اسر نقلها على مدرسة علمي وانا هم رجع دوامي مرحلة ثالثة صار شهر ادوام واخيرا رجعت التقي بطيبة اسر يوديني اني وايات ويروح لدوامه انا وياه عادي ما صار تطورات ٢٤ ساعة نتناكر ومن ينام مرات يحضني لا اكثر وانا مرتاحة للوضع صح راح الخوف منه ورجع حبه بكلبي ما كتله بعد حابة الوضع هيج حالياً

احسان اسر قدم له على مدرسة اهلية وقبلوه وبدا يداوم مدرس كيميا وياخذ راتب حيل زين
اسر كعد يشاقيه ويكله يلا لم فلوسك حتى ازوجك وهوا يرد الله حيو ايمتى نعرس واحنا نضحك عليهم

بيوم عيد ميلادي ١١/٤ رحت على اهلي وصولي على كيكة مكتوب عليها (happy birthday jomana ) ورقم 20 يعني صار عمري عشرين حيل فرحت بيها واحتلفو بية اسر ما اجى كال طالع ويا ربعي ضجت وانقهرت بس من احتلفو بية وخواتي مجتمعات والهدايا نسيت كلشي تعشيت يمهم كملت وكمت اغسل دك الكرس طلع احمد شوي وفات كال : هذا اسر يكول خلي تبدل وتطلعلين

ام جمان : ياااا احمد شبيك ما كتله خلي تبات

احمد : كتله ما يقبل يكول خلي تطلعلي بسرعة

جمان : ميخالف ماما
جنت لابسة بنطرون وقميص من حفلة العيد ميلاد لبست عباية وبوستهم وطلعت لكيته واكف ع الباب جان جاي بالسيارة صعدت وياه
جمان : شو جاي بالسيارة

اسر ببرود : جنت طالع

جمان : وحتى ما اجيت ع الحفلة ليش

اسر : كتلج جنت طالع

جمان درت وجهي عنده وكف يم باب البيت دخلنا بالحديقة واسر فات من باب الديوان فتت وراه وجان اشوف ميز عليه كيك وشموع ونفاخ وتريبات دخلو اهل اسر من باب الديوان الداخل اجت يعايدوني خالة وايات ونور وحتى الحجية جاية احسان وعمر من بعيد وسومي اجى حضني الكيكة جانت صورتي وصورة اسر بيوم الي رحنا لحدود ايران

كصيتها وحيل فرحت بيها شكد ما بسيط بس فرحني فعلاً حسيت انو عندي اهل اثنين اكلو من الكيك ولمينا وصعدت لغرفتي اجى اسر من وراية فتحلي الباب جانت الغرفة ضلمة بس هذا الكلوب الالوان الي بالسكف جان مخلي كارتون على الجرباية

كربت شفته موبايل جديدة
جمان : عزاااا هذا اليي ؟

اسر : عجل لعمي

جمان : صدككك فتحت الكارتون

اسر بتقليد : اي صدوك

جمان رحت يمه حضنته
اسر : كل عام وانتي بخير يا جمانتي ومريتي وحلالي وكلشي يخصني يول انتي هينة واشر على كلبه

جمان تذكرت من اعترفلها ( يول انا احبج ) : يول اني احبك

اسر ضحك بفرحة وحضنتها وشالها : يبعد عمي واخيرا يعني !

جمان ابتسمت بخجل : اسر شبيك لا تخليني اسحب كلامي

اسر : انتي مرة وسحبي كلامج عمود اسحب راسج
باسني من شفتي

جمان فراشات وصارت ببطني اول مرة يبوسني هيج شوي ووخر

اسر حط كصته على كصتها : جنة  الله بالكاع انتي

جمان بعدني بحضنه
اسر غمز : شتكولين نكمل

جمان بخجل : لع اسر
اسر : عجل يول الله يرضاها متزوجين وع الناشف

جمان : ههه عود بعدين وخر خلي اشوف الموبايل

اسر : يمعودة لو ادري من زمان جايب الموبايل حتى تحبيني

جمان :هههههه اسر يجنن شكراا

اسر : جعلني الموبايل دللي حبيبي صرتي عجوز لازم ندللج شوي

جمان : عزا يا عجوز هوا كلي صرت ٢٠ سنة صرت عشرينية كيوت خوما مثلك راح تدخل ال ٣٠ ثلاثيني

اسر ضحك : لازم مو عاجبج ولج

جمان : هههه امرنا لله
كمت سبحت ولبست دشاشة قصيرة وطلعت كعد اسر يحولي حسابات وانا فرحانة واصفك ما متعودة احد يجيبلي هيج هدايا
جمان : زين وهذاك وين اودي بي تبيعه

اسر : لا يابة شبيع يرجعون صور شي خليه لجهالنا وغمز

جمان ابتسمت : لا تتغامز كملي اياه
شوي وعافه ونمنا

( راح احاول امرر الايام العادية حتى ما اكتبها وتملون راح اكتب فقط الاحداث وللعلم هاي البارتات الاخيرة )

بيوم راس السنة ما احتفلنا اسر يكول حرام بس طلعنا على مول وتعشينا برا ودخلت سنة جديدة ويا اسر دخلنا اول ساعة واحنا حاضنين بعض وان شاء نضل هيج

مرت شهرين امتحنت كورس اول وعطلت رغد مشى عليها ابن خالتها ووافقت عليه مر اسبوع بعطلتي صارت الخطبة انا رحت يمهم الصبح جانت رغد تنظف الديوان وتصيح الله يرضاها انا عود عروسة وانضف فتت اضحك عليها ذبيت العباية وكعدنا نسولف جان يطبون زينب وجوان ويفوتون باحذيتهم ع الديوان وكعدو يكولون من الصبح طالعين طريق تعبنا وجهالهم هجمو ورغد تكمز تكول توني نظفت وانوب اجو شياطينكم

جمان : شوفي رغد بس انا الكفو لا جهال ولا شي

رغد ضحك : اي والله
دخلو رجال اخوتي كعدو بالديوان ورحنا صبينا غدا ويا ماما كعدنا ناكل وجان تفوت زهراء

زهراء : عزا بس لا تغديتو
وكبل كعدت

جمان ضحكت :وهسه كملت السبحة

هاجر : اجى علي (رجل زهراء) وياج

زهراء : اي فات بالديوان
كملنا ولمينا جهزنا رغد وانا لبست قفطان العصر اجو الزلم واسر هم اجى عمود بابا دز عليه مدري شدخل اسر اصلا
والنسوان دخلناهم جوا يمنا واتفقو الزلم وكلشي تم وعقدت قران بدت الهلاهل حيل فرحنا الها اخر وحدة تتزوج من عدنا فات لبسها الحلقة وطلع

قبل المغرب راحو كلهم
اسر راد يروح رجال اخواتي ما خلوها كالو ضل ويانا لليل عاد كعد
صبينا العشا لنا وحدة وللزلم وحد عاد بالتعليلة كالو البنات خلي نتعلل بالديوان يمهم كامنا لبسنا احجبة وشلنا التعليلة ودخلنا يمهم اسر اشرلي كعدت يمه جان يدخن جكاير ولابس دشاشة طالعة تجنن عليه ضلو يحجون وهوسة لل ١١ اسر همسلي كومي لبسي عبايتج خلي نروح دخت

كمت لبست وسلمنا ورحنا اول ما دخلنا صعدنا فوك بدلت وكعدت يم الصوبة بردانة اسر فات سبح وطلع بس بالشورت

جمان شهكت : اسر شبيك الدنيا ثلج
نطيت هدومه لبس وشلت المنشفة انشف بشعره كتله : اصبر اجيب الشسوار حتى انشفه الك

كمت جرني عليه وباسني من شفتي وبدا يتعمق .......
مثل هذا اليوم خطبنا انا واسر وبهذا اليوم صرت مرته قلباً وقالباً ولا اي خوفة جانت بكلبي لانو علمني من الكل اخاف وارتبك بس من اوصل يمه لا كلشي يختلف ......

يتبع ........