رواية اسرني كيدها الفصل السابع عشر 17 - بقلم الكاتبة ايات الـ سند

بقلم :ايات السند
السلام عليكم

لا تنسون التصويت والتعليق بين الفقرات استمتعو ♥️

يمتى التعّب ينگضيّ؟
ونضحكَ على الراحن 🖤،

______________
جمان

أنور :ي اعرفه اليوم انعل والديه، وطلع من البيت
ضلينا لل ٣ الفجر وهوا ماكو شوي وفات و وجهه بي جروح

ابو احمد بعصبية : وين جنت يا كلب صار الفجر و احنا ننتضر حضرتك وين رحت بدون ما تفهمنا شبيك

انور : يابة انا اعرف الي سوا هيج واحد صديق اخذت منه دين ويريدها مني وما يقبل يصبر

ابو احمد بصراخ : ولك كلب يا دين يا صخام بشنو مقصر وياك ورحت تتداين من العالم يول حتى تعيين عينتك ولك انتَ شنو

انور ضل ساكت
ابو احمد : فهمتنه شلك بالفلوس

انور : احتاجيتها

ابو احمد : ولكككك بشننوو احتاجيتها وراتبك وين

انور : كتلك جنت محتاجها وخلص وانا هسه رحت تفاهمت وياه

احمد : شكد ماخذ منه ومن ايمتى

انور : انتَ لا تدخل نفسك

ابو احمد : انجب و رد

انور : ٣ ملايين صار ٦ اشهر تقريباََ

ابو احمد : الله يصخم وجهك من رحت شنو حجيت وياه

انور : تفاهمنا وهاهية يلا فوتو نامو كافي ماكو شي
صعد لغرفته واحنا دخلنا بالغرف بس بابا حيل صار عصبي وأحمد يهدي بي

في اليوم الثاني

جاي نصب غدة أجواء البيت متوترة شوي من البارحة

حطينا الاكل وكعدنا ناكل من خلصنا وجاي نلم سمعنا صوت هبد (ضرب) ع الباب البرا طلع احمد وبابا
شافو ولد وجهه مشووه من الضرب وزلم وياه انوب

ابو احمد باستغراب : تفضلو

واحد من الزلم الواكفين كال : شنتفضل ابنا يطلب ابنكم فلوس وطلبها منه باحترام وهوا مشبعه ضرب البارحة نام مستشفى ليش يعني

ابو احمد بصدمة : العفو منكم ابنا غلطان من ضرب ودينك راجع ان شاء الله

: احنا بعد الضرب الي حصله ابنا وهوا ظلم صار عدنا وياكم كعدة عشائرية ونتفاهم

ابو احمد : اخي ماكو داعي للكعدة فلوسكم وراجعة

: هذا اخر شي عدنا ننتضركم باجر

__________________

اسر

كعدت الصبح وداومت مع انو اليوم عطلة بس طلبوني
بالي ضل يم اهل جمان منو هذا وشيريد منهم بس ارجع اكول خاف ميريدون احد يتدخل

من خلصت دوام ورجعت للبيت شفت ابو احمد واحمد واكفين ع الباب ومشت سيارات من يمهم رحت يمهم وسلمت وكلت : ما عرفتو منو سوا هيج بسيارتكم اعذروني ما مريت الصبح جان عندي دوام

ابو احمد : عادي ابني اصلا عرفنا هذا صديق انور وطلبه فلوس وهيج سووا وهوا الغبي راح ضربه وهسه صارت كعدة عشائرية، ابو احمد حجا لان اسر صار قريب منهم وعرف

اسر : ما جان لازم يستعجل ويحدر يضربه زين ما عرفتو من يا عشيرة

احمد : عشيرة ******** وباجر الكعدة

اسر : سهلة ان شاء الله هذول من عشيرتنا وانا عمامي عدهم عرف وأصدقاء بالشيوخ و راح احجي وياهم وما اقصر بشي

ابو احمد بابتسامة : جزاك الله خير ما اعرف شنو اكلك

اسر ضحكت : النبي { صلى الله عليه وسلم} وصانا بسابع جار ولو انتو الثامن بس تتدللون

احمد ضحك وحط ايده ع كتف اسر : كفو منك

وسلمت عليهم ورحت ع البيت 
ورا الغدة محمد راح جلبت بيه مقبل
_________________
جمان

جنا واكفين ع الكامرة دخلو من برا وبابا كام يصيح : وين هذا الكلب انور

ام احمد : بعده نايم

صعد عليه فوك وكعده وكال : ولك انتَ مو كلت تفاهمت وياه طلع ضاربه و موته يا كلب

انور : يستاهل

ابو احمد : شنننووو يستاهل ولك شنو يستاهل فلوسه ويريدها تضربه ليش

انور : كتله انا انطيها الك ويجي يجلخ السيارة الكلب وبعدين انتو منين عرفتو

احمد : شنو منين عرفنا غير هدو ع البيت وطلعنا الهم يريدون كعدة باجر لان يكولون ابنا نام مستشفى من وراكم وراح يصير فصل فوك الدين

ابو احمد : لللييشش هيج تضربه يا غبي ما الك حق ولو شحجي وياك بعد ما يفيد

نزلو وضل اليوم كله البيت متوتر وأحمد حجة ع اسر شلون راح يساعدهم كلت بكلبي واخيرا نفع بشي

حتى عرس زهراء ع اساس باجر واليوم الحنة تاجلت لان بابا كال عدنا كعدة و مو مال نلتهي بعرس ان شاء الله الاسبوع الجاي نسويه وحجا ويا عيالها وما كالو شي اخواتي كالو مدام ماكو عرس احنا نروح راحو لبيوتهم وفرغ البيت ماما ضاجت عليهم

ثاني يوم كعدت وبدلت اليوم خميس لازم اداوم بس ما الي خلك افففف و اليوم الكعدة هم يا رب تخلص ع خير اصلا شهل خرافات ماكو داعي لكل هذا الحجي اخذو فلوسكم و ولو

داومت ورجعت لكيت ماما تجهز الغدة وتنتضرني
بوستها وبدلت واكلت شوية ما اشتهي صار العصر طلع بابا واحمد وانور للكعدة واحنا كاعدين ع جمر وننتضر شحيصير

________________
اسر

اليوم الكعدة مال انور داومت ورجعت من الداوم للبيت تغديت وغسلت ولبست دشادشة اقترحت لابو أحمد اروح وياهم للكعدة لانو ابوية وعمامي كلهم يعرفون شيوخ عشيرتنا وأصدقاء فكلت بلكي اساعده شوي

اذا احد يحتاج مساعدتك وانتَ تكدر تسوي هل شي ابداََ لا تترد وهذا الي اسويه انا دائما

طلعت بسيارتي ورحت لبيت أهل جمان هما هم طلعو وراحو بسيارتهم وانا وراهم ومخابرين شيخ عشيرتهم اجا وعمام احمد وصلنا لبيت صديق أنور هناك الكعدة لانو من شيوخ دخلنا وسلمنا وبعدها صار الحجي

رادو فصل ويا الدين لانو مأذي ابنهم بالضرب
كالو ١٢ مليون ويا الدين شيخ عشيرتهم حجة وبالكوة نزلو لل ١٠
انا كلت خل اجرب حظي مدام اعرف الشيخ ويعرف ابوي

كلت : شيخ صح انور ماذي الولد بالضرب بس هوا استفزه وشخط سيارتهم بدال ما يطلب فلوسه بهدوء وهوا لازم يساعد صديقه لانو الصديق وقت الضيق مو هيج يسوي جان من البداية لا ينطي وضليت احجي وياهم ولفت السالفة عليهم

الشيخ كلي خاطر ابوك المرحوم جبير يمي وكلامك صح اثنينهم غلطانين احسن حل نخلي الفصل ضعف الدين وخلص يعني ٦ ملايين

الكل اتفقو وكمنا طلعنا ضل يتشكر مني ابو احمد كلته ماكو داعي الشكر هذا واجبي و ساعدتكم

احمد : والله ما اعرف شلون نرد جميلك

اسر بمزح : ولك أحمد يا جميلة يا صخام تستر علينا وروح لبيتكم

ضحكو وانور شكرني بس مو من كل كلبه وانا رديت بحسن عكس نبرته ورحت للبيت وكبل نمت تعبان

___________________
جمان

رجعو من الكعدة و وجهم مبينة عليها الراحة

ام احمد : ها بشرو

ابو احمد : ان شاء الله انحلت السالفة ننطي الدين وفصل 
كم مليون وننهي السالفة

ام احمد : منين راح تجيب الفلوس

ابو احمد : ادبرها من اخواني وهذا نهاية شهر راتبي وراتب انور يسوون مليونين ونخلص من السالفة
كام من مكانه وتوجه لانور وكاله ما اوصيك انوب كل يوم مصيبة ولو ما عرفت وين وديت الفلوس بس اصبرلي اصبر

انتهت السالفة ومر اسبوع بدون أحداث

_____________________
اسر

راح يصير شهر من تقدمت لجمان ورفضت بس ابد ما تنازلت عنها اريدها يعني اريدها
خليت يمر اسبوع ع سالفة اخوها حتى ارجع اطلبها

اليوم خلصت دوامي ورجعت للبيت بليل احمد خابرني كال تعال تعلل يمي هل اسبوع حيل تقوت علاقتنا انا واحمد

رحت يمه وكعدنا وجاب ناركيلة كتله جيب ورق خل نلعب جابه وتعللنا من اريد اروح شال الناركيلة يجددها احمد كال اصبر دقيقة وارجع ودخل ابو احمد كمت سلمت عليه كعد يسولف وانا استغليت الفرصة وكلت خلي اطلبها
بنفسي احسن من حجي النسوان  وما اصبر بعد

اسر : الصراحة عمي عندي موضوع اريد احجي وياك بيه وان شاء الله ما تردني

ابو احمد : تفضل كول اسر

اسر : والله بدون مقدمات اريد اخطب بنتك جمانة منك ع سنة الله ورسوله وهالمرة انا الي اطلبتها منك مو النسوان وان شاء الله اذا اكو طريق اجيب خطبة واجي

ابو احمد : اعتبرها صارت لك...........

يتبع.......