علي: اشبيج
سالي: ااااه اخر ااااه تعبانة
علي:. اشبيج ضوجتج مرت ابوج
سالي: ياريت
علي: وتالي وياج ليش متحجين وتريحيني منو وياج ليش هيج تبچين برگة
سالي: حچتلة كلشي
علي: ميخالف جوز اتفاجئ من شافج وهيج كانت ردت فعلة اتصير مرات يلة مسحي دموعوج ايضل ابوج وماكو اب يكره بنتة شوفي هسة اذا مااجة واعتذر وگولي علي مگال
سالي: اي كلش يجي يعتذر
علي: لا هسة يجي وشوفي هسة اريد احجي وياج
سالي: اتفضل استاذ
علي: اولا بعد لتگولين استاذ اني استاذج بس بالجامعة واني اسف من البارحة ضربتج والله اني مو هيج طبعي ولا امد ايدي على مرة بس چنت مغثوث وشفتج گدامج وصار الي صار وهاي ايدج بعد هيج اخبال مااريد مااحب هيج اسوالف
سالي: لا است....
علي: ها شگلنا
سالي: ههه والله مااگدر ماامتعودة احسها ثگيلة
علي: لا تتعودين بلة گولي هاي الجملة . علي خل نفتر
سالي؛ هههه است.... ع ل ي خل نفتر
علي: ههه عفية بالشاطرة چنت توج تتعلمين بالگوة اتگولين علي ههه
سالي: مو متعودة
علي: هسة رضيتي لو بعدج مطنگرة
سالي: مااگدر ازعل منك
علي: ليش
سالي: ماادري
علي: لعد اذا هيج خل نفتر وناكل موطة
سالي: بكيفك
من طلعت من بيتنا كلش چنت ضايجة ومقهورة من علي حجة وياي بعد متحملت گمت ابجي حچيتلة اشوي ارتاحيت وهم حجة حسيت علاقتنة بدتت تتحسن طلعنا نفتر بالسيارة والهوا ايخبل رحنة للبلوط گعدنا بي واكلنة شفت علي اول مرة مرتاح ومتونس ويضحك فرحت على فرحة مع انو چان اكو غصة بگلبي من أبوية بس بوجود علي نسيت كلشي رحنا للسوبر ماركت اشترينا حبشكلات نورة اتموت على هل سوالف هوة گلي اخذي شنو تردين اني استحيت گتلة لا كلشي مااريد بعدين شفتة اخذ اهواي شغلات وگام يفرز بعدين گال هاي الج استحيت حيل منة اخذهن وداهن للسيارة ورجعنا للفقمة اخذنة موطة عائلية شگد حنين وذكر أهلة وشنو ايحبون أخذنا ورجعنا للبيت
علي: السلام عليكم
الكل وعليكم السلام
سامر: هاااي وين چنتووو
علي: وانتةةة شعليييك
سامر: عيب ياولد اكو واحد هيج يحجي وية عمتة
نورة: ههههه عمتة فد مرة
علي: هاج نورة جبتلج حلويات ادري اتحبين هيج اسوالف
سامر: واني
علي: غراضك وياها شوكت تكبر راح اتصير عريس
سامر: بارك الله بيك ياولدي وان كبرت وأصبحت عريس سوف ابقة ولدك المدلل
سالي: هههه عربيتك ممتازة
سامر: نعم اعرف ذلك
علي: اي چلب بعد هاج يمة هاي موطة
سعاد: يمة فددوة لحنين يمة ماينسة احد
نورة: اي هذا علاوي
سعاد: يمة اشلونهم اهلج
سالي؛ زنين الحمدلله
سامر: بلة نور شو هاي حلوياتج طيبة اطيني
نورة: مااطيك اشوي
سامر: بس وحدة
علي: اهووو راح ايسوي سالفة ليش عينك ضيگية مو هاي كومة گدامك بس اتريد اتحارش
سامر: هسة شگلنة😒
علي: اروح انام تعبان كلش
سامر: اي من التفرفر
علي:😒😒
صعدت فوگ تعبان بدلت الغرفة حارة لان هسة اشتغل السبلت ضليت بالفانيلة نمت على چرباية عود البسها من تجي سالي ضليت بنص الچرباية علة السبلت ومااشوف الا سالي واكفة خدودها حمر يافشلة الفشلة طفرت لبست التيشيرت هاي وجها يطي الوان
علي: اا ماادري بيج اجيتي بس چانت حارة
سالي: لا عادي
صعدت ابدل هم چنت تعبانة دخلت على كيف عبالي علي نايم ومااشوف هذا النظر يبووي الدم صعد للخدودي نايم وبس بالفانيلة وبنص الرجرباية على. السبلت شفتة طفر ولبس التيشيرت اني اخذت ملابسي دخلت للحمام وجسمة انطبع بدماغي يبووي. شلون طرگاعة جديدةة بدلت وطلعت لگيتة ايباوع للسگف
سالي: بعدك منايم
علي: لا گاعد افكر بشغلة المطعم
سالي: ناوين اتفتحون مطعم
علي: اي احسن النة صنعة وضمان لمستقبلة ومستقبل ولدنة
سالي: هاا اي
علي راد ايخليها تخجل
علي: اي جهالي باجر عگبة يشتغلون بيه
سالي: انتة شكم طفل اتريد
علي: اني احب الجهال هواي يعني اربع بنات واربع ولد
سالي: ياا عزة الله يساعدها للمرة هههه
علي باستغراب: يعني الله يساعدج
سالي: ليش اني شعلية
علي: لعد انتي غير مرتي
سالي: لا اني مو مرتك انتي متحبني واني هم مااحبك وزواجنة كلة غلط يجي يوم وكلمن ايروح بطريقة اصلا كلشي صار المفروض ميصير
علي بعصبية مكتومة؛ وانتي ليش هيج تحجي ها
سالي: هذا واقع
علي: لا مو واقع وماكو كلمن ايروح بطريقة انتي مرتي واني رجلج وكلشي مصار غلط
سالي: لا انتة گلت اني مااريدج ولا راح اريدج والي صار بس حتى ننستر من الفضيحة وبس انتة گلت هيج قبل
علي: اي قبل بس هسة لا
سالي: ليش شنو اتغير هسة
علي بعصبية : امشي طفي الضوة
سالي بنفسعا؛ هذا اشبي لو ما هو گال هيج اووف
علي
من گالت هيج فورت دمي صح اني گتلها هيج بس مجرد مااسمع هيج نهاية علاقتنة اضوج حييل
خليت ونمت شفتها اجت نامت يمي لشوي شفت نفسها ثگل درت عليها وضليت اباوع بوجها اول مرة اشوف شكلها هيج حلووو ورصعاتها مبين اثرهن والشعر اشگر والخدود والخشم حمر حسيت شعور كلش حلو من باوعتلها ارتاحيت حيل مجرد شكلها امتص كل العصبية مني ومااحس على روحي الا نمت
ثاني يوم الكل راح للدوام كروتين عادي مثل كل يوم ورجعوا اتغدوا
العصر الساعة 5:22
سعاد: اطفرري الموبايل ايدگ انوير
نورة: هاي خالة شيماء
سعاد: جيبي بسرعة الووو
شيماء: هلا ام علي اشلونج
سعاد: هلا خية اشلونج
شيماء: الحمدلله زنين
سعاد: دوومكم انشاللة
شيماء: خية خابرتج اردلج الجواب
سعاد: اي بشري
شيماء: ووالله ابو جيهان موافق والبنية همين
سعاد: يااا كلللللوووش
نورة بصوت ناصي: هلة هلة 💃💃💃
سعاد: والله خية فرحتيني وين الگة احسن من نالين لسامر
شيماء: ووحنة وين نلگة نسيب مثل سامر
سعاد: والله فرحتيني يلة خية اروح اطي خبر لسامر
شيماء: شوكت متجون هلة بيكم
شيماء: الله وياج
نورة:. كلوووش مااعرف ههه
سالي: اي والله خالة نالين خلقة واخلاق يستاهل سامر
سعاد: يمة ربي دخيلك شمسوية والله مطيني هيج چناين
نورة: وهيج أبنية
سالي: هههه وين اكو مثلج
سعاد: اني راح اروح لبيت جيرانة خطية ام ناصر مريضة المرة صاحبة واجب خل اروح عيب ومن ارجع اگل لسامر باليل
نورة: اي خوش
بعد ماطلعت ام علي
نورة: سالي ضايجة
سالي: أي والله حتى اني حموووت من الضوجة
نورة: عندي فكرة
سالي: ياستار
نورة: خل انگوم نرگص
سالي: خاب دطيري
نورة: خاب گومي هو منو اكو امي وطلعت وعلي وسامر هم طالعين دگومي بداعتي حبابة
سالي: افففف گمت بس مو هنا بغرفتي لحد يدخل وانصير لحم مثروم
نورة: ماشي گومي صعدي بين مااجيب السستم مالتي والبس التراك واجي
سالي: ماشي
صعدت فوگ لبست تراك عندي برمودة لبستها بيضة وبيها بزونة لولو ايدي لفيتها بالفاف حتى إذا سألت اگلها توجعني
نورة: جبتة جبتة هاااي شنوو ياب شنو هل جمال
سالي: شكرا وانتي ممقصرة
نورة: شبيها ايدج
سالي: توجعني شو الاغاني
نورة: خير من الله كلة ردح
شعلت اغنية يشيب حيل عشگ الصغيرون
طبعا سالي طلعت كارثة رگصها ايجنن ومن تهز خصر كارثة
نورة: هااااي شنوو. ولج طرگاعة
سالي: هههه بعدج مشايفة شي عيني شعلي ردح
نورة: تدللين
شغلت ردح للگاع وهاي فلت شعرها جوة الورك واصغر وذبيت لحم اني كلها تحسدني على رگصي بس مو مثلها
علي: طلعت اني وسامر اندور على مكان چبير للمطعم لگينة واحد كلش حلووو وموقعة هم حلوو وچبير اتكاتبنة وباجر انسلم الفلوس رجعت حتى احضر الفلوس دخلت البيت صنطة صعدت فوگ اسمع صوت اغاني فوگ ردح اتخلي الميت ايفز دخلت للغرفة واگول معقولة سالي شاعلة اغاني دخلت على كيف وانصدم 😱😱😱 شنووو هاي مستحيل هاي شلابسات انتبهت على سالي شلابسة وشلون ترگص ضليت. فاك حلگي هاي هيج يطلع منها شلون تركص والخصر طرگاعة اول مرة اشوف شعرها وهيج طويل ايموت ادور گامت تركص سچاچين مو رگص كارثة اني ضال اباوع عليها ادخل لا خطية اتكوم متباوع بوجهي بعد خل اطلع احسلي طلعت واني دايخ حتى ردت أعثر بالباية مال الدرج طلعت وضلت مطبوعة بدماغي الرگص اني مشايف هيج وحدة ترگص حتى نور صافنة عليها عبالك داخل دورة ضليت گاعد يم الباب دايخ بالي شفتة
سعاد: هاا يمة شوو گاعد اهنا
علي: هاا هلا يمة وين چنتي
سعاد: چنت بيت ام ناصر مريضة
علي: هاا اي
سعاد: تعال ادخل
علي: اي هسة جاي الووو
سامر: هلا علي اگلك هذا إياد مريض ترووح
علي: هااا اشبي
سامر: ماادري بس ايگول تعبان كلش
علي: اي اروحلة اشلون لعد هسة اجيب عشة واجي
سامر: يلا خوش اني رايح گبلك
علي: يمة يمة
سعاد: هاا يمة
علي: اليوم لتنتضرون على العشة إياد مريض واني وسامر رايحين
سعاد: ياا خطية اشبي
علي: والله ماادري هسة رايح
سعاد: اوگف هاك هاي الدولمة وديها آلة ادري بي يحبها وسلملي علية هذا هم وليدي
علي: يمة يالحنينة تدللين اوديها مع السلامة
سعاد: الله وياك
نووور ولجج نووور
نورة: ها ماما
سعاد: وينج شعدج فوگ
نورة: هسة حننزل
ولجج سالي امي اجت يلة خل انبدل بسرعة
سالي: عزززةيلة
نزلنا جوة
سعاد: هاي شبيجن مزبرات
نورة: ماكو شي
سعاد: انوير احجي ادري بيج مو خالية
نورة: هههههه چنة نرگص
سعاد: شوف الله باع شلون اتعلم البنية
نورة: يا عشتو تعالي وشوفي چنتچ شلون ترگص اني شنو
سعاد: هموزين مصاعد عليجن علي چان وعلي گتلچن شفتة چان برة
نورة: عزززة
سالي: يمة همزين ماصعد
سعاد: يلة سون عشة بس مو هواي علي وسامر راحوا لاياد مريض
نورة: شنو. اشبي😨
سعاد: وانتي شعليج
نورة: يمة عزززة إياد مريض
سالي: لتخافين انشاللة. مابي شي
نورة: اهى اهى
سالي: ولج اسكتي لتجي خالة اشوفج ايجوز افلاونزة
نورة: اموت لو صارلة شي
سالي: لا حبيبتي انشاللة كلشي مابي
نورة: انشاللة
في بيت إياد
علي: طق طق ✊ ✊
سامر: ها هلا اجيت
علي: لا بعدني 😏
سامر😒
علي: لك هااا سلامات شلونك ضلع
إياد: هلا علي عاش من شافك
علي: شنسوي ملتهين
إياد: هههه بخت كل يوم اتنام بحضن مرتك واني احضني المخدة وبعد يومين سامر هم بس اني
علي: اي لعد متزوج
إياد: بعد ملاگي بت الحلال
سامر: يعني هية غير بت حلال يعني اريدها توگف گدامك واتگلك اني بت حلال
إياد: بدينا وية رحمة الله
علي: كلامة منطقي
سامر: خاف انعديت من إياد اول مرة اتأيدني
إياد: ههه
علي: حالة بيتك يرثى عليها
إياد: خاب مدگلي شسوي لا مرة لا اهل شنو
علي: افااااا. لك احنة شنو لعد
إياد: انتو اخواني بس يعني اتنضفلي هه
علي: اي ليش لعد اعيوني الك
سامر: الله لايطيك إياد عديت الولد خطية صخن
علي: إبدال هل حجي گوم وياي
إياد: دگعد اشاقة وياك
علي: انجب ماكو شقة
گمت كفيت ارداناتي سامر بالگوة گام لمينة الهوسة وبعدين كنست بالفرشة وسامر يمسح واياد ايصور وخربان ضحك ايگلي انت ام بيت معدلة واني اروح اضربة وانام علية ويجي سامر على الواهس عدلنا المطبخ وصيت على أكل وحميت الاكل لاياد الدولمة خليتها على الطباخ والباقي على سامر
علي: اخخخ بوية رجلية الله يساعدج يمة
أياد: هههههههه خرب الا بشدة التصوير
علي: اني اعلممك اوگفلي هسة تعبان
سامر: وصل الاكل هجوم
علي: هاي الدولمة امي مسويتها الك.
إياد: عاشت ايدها
علي
اكلنا وخلصنا سامر غسل الماعين ضلينا نضحك وانسوالف رجعنة للعشرة باليل عساس احنة رايحين زيارة مريض رحنا كركنا يمة رجعنا امي والبنات گاعدات
علي: السلام عليكم
الكل: وعليكم السلام
سعاد: شوو اتأخرتوا
سامر: التهينا ضحك وسوالف
سعاد: ماطول اجيتوا تعال اگعدوا سامر اليوم خالتك دگت وگالت موافقين وحتى ازاد همين گالت شوكت متجون هلة بيكم
علي: اي بيها الخير خوية نشوف عمي ونأخذ مشية زلم ونروح
سامر: گليلهم قبل امتحانات نص السنة اريدها يمي
سعاد: يااا اشعدك مستعجل متگلي شماخذين فصلية
سامر: هذا الي عندي خل اروح اگطع مهر ونلبس محابس و ورة اسبوع الحنة والزفة
علي: وين التلحك
سامر: علي تذكر انتة اخذت سالي ورة أربعة أيام 😏
علي: اي براحتك😒
نورة😂
سالي 😳
سعاد: اي براحتك
سامر: گليلهم الخميس الخ احنة يمكم والورى خطبة والورى عرس
سعاد: اندري تاليها وياك
علي: البارحة خابرني حسام واعتذر وايگول وعلي لو بيدي اگبعها واطيها الكم
سامر: رجاءا طاري سمر لحد ايجبة گدامي خلص انتهت اني راح ازوج وحسام معلية ايضل ابن عمنة
علي: سالي سويلي چاي راسي مصدع
سالي: صار
بالمطبخ
نورة: الله همزين سامر راح يزوج وانذب لحم وعلي اذا مارگصتي ازعل عليج
سالي: لا يمعودة استحي
نورة: انتي لترگصين وشوفي
سالي: الله كريم
سويت الچاي وديتة لعلي باوع علية وضحك
علي:. شكرا عاشت ايدج
سالي: بالعافية
سامر: علي مين اخذت غرفتك
علي: لا غرفتك علية هدية العرس
سامر: لا يمعود مشكور خاف باجر عگبة اتعيرني
سعاد: عشتووو هم ايلوگ هية وين اكو من نالين
سالي: شنوو معنى اسمها
سامر: معنا آهات
نورة: ويعرف معنى اسمها اشررد
سامر: انجبي نمونة من ميعرف
الكل: اني
سامر: هههه استغفرالله اروح انام
علي: اني همين يلا الكل اينام
سالي: تصبحون على خير
الكل: اجمعين
كلمن راح لغرفتا ونام
مرت أسبوع على نفس الروتين ماكو احداث
اليوم خميس مشية سامر الساعة 1:00
سامر: علي وينك الجماعة متانين
علي: اي اشبيك چنت اعددل القاط اجة إياد
سامر: اي اجة بس عمي وحسام ماكو
علي: هسة اخابر الووو ها حسام وينك
حسام: هياتة اني بالطريق بس ازدحام خمس دقايق احنة يمكم
علي: خوش يلة الله وياك
سامر: هاا
علي: جاين بس ازدحام
سامر: خوش
كركوك
ازاد: حضرتوا كلشي لتفشلوني
شيماء: ماعاش الي يفلشك بس بعد وكت ٣ساعات يلة يوصلون
ازاد: ادري الاحتياط واجب
نالين
اليوم اني اسعد وحدة بالدنيا اليوم المشي وحبيبي الي اريدة دخيلك ربي لتحرم هل فرحة أحد گاعد اجهز نفسي ولو هو مراح ايشوفني بس ميخالف يمة مجرد التفكير اتخبل اموووت علية عشقي😍😍
بغداد
علي: يلة وين صرتوا
حسام: غير ازدحام
سامر: يلة ترى اتأخرنا
حسام: شبيك مستعجل😉
سامر: نجب لك
اياد: يوم الي واذبح طلي
سامر: هو انتة طلي ميحتاج
علي: هههههه
فؤاد: فصوها العالم واكفة
علي: يلة يلة
ركبنا سيااتنة ويانة شيوخ وكبار العشرة ورحنا بعد٣ ساعات وصلنا لكركوك نزلنا سلمنا رحنة سلمنة على خالتي فرحت خطيةبالسنة حسنة انشوفهم
علي: العروس ماكو😉
سامر: علي لداهرني رحمة لهلك عوفني
علي: اي يابة على كيفك
رحنا بالصالة شربنا العصير طبعا اني متكفل بالتقديم خالتي ماعدها ولد وسامر العريس فطايحة براسي
فؤاد: والله ابو جيهان اليوم جايك مطلب واتمنة متردنا
ازاد: گول ابو حسام غالي والطلب رخيص
فؤاد: اليوم جاين نطلب ايد بتكم المحروسة لابنا سامر
ازاد: والله البنية صارت بتكم فصلو واحنة نلبس
شيخ العشيرة: اذا على بركة الله نقرة الفاتحة
قرينا الفاتحة وضلوا ايسولفون صار العشة اتعشينا وطلعنا رأسن وصلنا١٢باليل كلمن راح لبيتة دخلنة امي كامت اتهلل واطش على سامر چكليت تذكرت يوم المشية مالتي وباوعت على سالي ضحكت ودنجت
سعاد: شايف كل الخير حبيبي
باس راس أمة: ويخليج الي يمة
نورة: وزوجنا وخلصنا منا بعد ماكو أصغر منة
سعاد: كلللللوووش
سالي: شايف كل الخير سامر ستاهل
سامر: تسلمين انشاللة يوم رجلج يأخذ الثانية واني وياج بالوسطة نردح
سالي: ههه يمعود شمچلبلي بهل دعوة غيرها
سامر: ابد وداعتج
علي: كافي يلة راسي يوجعني واريد انام وانتة همين متنام متعبان
سامر: رايح تصبحون على خير
في غرفة علي
سالي: شلونها العرووس
علي: والله عذريني مالحگت اسولف وياها
سالي: يااا حرامات يلة على اجايات..
علي: هااا راح تنكتلين
سالي: لاااا ههههه اشاقة والله
علي: شن.و انتي اتكيفين من سامر ايگلج انشاللة رجلج يزوج عليج
سالي: لا ههههه بس هوة يشاقة
علي: يعني صدگ عادي عدج ازوج
سالي: اذا انتة اتريد ليش لا متزوج
علي: عادي يعني
سالي: اااا اي ليش اتريد تزوج
علي: والله جاي افكر بهل موضوع خل اروح ابدل
سالي
طبعا من علي گلت لعلي عادي لا مو عادي حسيت بغصة ومن گال افكر ردت ابچي طنگرت ورحت نمت
علي: طلعت من الحمام شفتها نايمة اني تعبان ذبيت روحي ونمت
غرفة سامر
والله ماادري الي اسوي صح غلط اووف ياربي شلون بيج سمر بعدج بگلبي ونالين بت خالتي شنوو ذنبها راح اضلمها دخيلك ربي ساعدني فجأ دگ الموبايل
سامر: منو بهليل يتصل
سامر😨😨😨😨
__________________________________
لهنا ويخلص النشر انتضروني بارت جديد
توقعاتكم للبارت الجاي؟
تقييم البارت من ١٠؟
البارت اهداء لعيون المتابعين 😍😍❤️
موعد النشر بعد يوم
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!