رواية ازمة ضمير الفصل الخامس 5 - بقلم Rozaya1122

ازمة ضمير ... البارت الخامس
«للكاتبه روزايه»

مـايدرون
هاي الدنيا فطره وبخت ناس وناس
نـاس تلگت العاگول ملگه الياس
وناس بگلب جوري ومالگت بستانِ...
...

نيران ... بعد السمعته من عمي عماد ومرته راسي يدور شلون اوصلهم الحجي حته يجون للكعده..

هالمره التزمت الصمت وكلت لازم افكر بطريقه صحيحه حته اوصلهم باي شكل من الاشكال..

فكرت بطريقه كلت خلي احجي لبابا هو يضوج من عمي عماد واكيد راح يساعدهم ...

رحت دكيت الباب على بابا جانو نايمين دنيا الظهر فززته من نومته واني كلبي يدك الف..

فلاح.. شبيج بابا نيران وجهج اصفر وين جنتي؟
نيران ... جنت يم بيت عمو عماد وسمعته يكول لمرته راح ينطي ثريا فصليه يقصد بنته..

.. منين جبتي هالحجي شو حدري هين خلي افتهم شسمعتي؟؟

..كعدت احجيله الي سمعته ونية عمي كتله بابا انت موكلت الفصليه معناتهه خدامه ويضربوهه لاتخلي عمي يسوي هيج بثريا ع الرغم ماشايفتهه..

فلاح.. هذا الكلام مايطلع لاكبر واحد اني اتصرف اياج تفتحين حلكج بحرف..

.. هزيت راسي بقبول وكام بابا لغرفته همزين بابا راح يساعدهم حسيت هم وانشال من عندي بس صدك عمي ظالم شلون يسوي ببنته هيج..

بليل طلعت اريد اشوف تلفزيون وماما بالمطبخ يسولفون كلش موحلوه هاي العاده العندي اتسمع ع الكل ...

تقربت ع الباب اريد اسمع شيحجون اذا حجي عادي اعوفهم بس وكفني كلام ماما وهي دكول لبابا ...

عيب يارجال الله مايقبلهه اسمع فلاح الساكت عن الحق شيطان اخرس روح وصل خبر لولد اخوك وكلهم ع نية ابوهم...

شنو ذنبهه هاي البنيه بعد كل هذا السمعته عن اخوك وماكل حقهم وانت تريد تزودهه عليهم...

... لا بيان راح ادز حجي راضي يقنعهم يحضرون الكعده ويشوفون بعينهم ويسمعون كلام ابوهم ..

بيان.. يارجال كتلك صير صلح بينهم مو تريد تشعل مشكله الهه اول مالهه تالي شجاك فلاح شو من اجيت هنا نسيت الرحمه والضمير...

انت بنفسك كلت عنده ولد يهزون الكاع هز والتقيت بيهم وما عبروك ولا اهتمولك ...

... هو هيج لان عاملوني هيج لوتشوفين فاروق ابوي بعينه كلمتين وكالي اتفضل برا ...

صرت هالكبرني كدامه طردني كدام ولد عمي واصلا دار ظهره وما عبرنه بفلسين...

خلي يجي يكعد ويشوف ابو وهم استمتع بمهزله عماد واكيد ابنه ماراح يسكت وعنده 5 ولد متحملين ع ابوهم ...

خلي يهينوا بنص الديوان هم ينهان عماد وهم فاروق تنكسر هيبته كدام الناس لان اكيد يتهجم ع ابو كدام الكل ويكولون ولد عاق...

.. تحجي صدك دخيلك ربي شنو هالحجي هذوله ولد اخوك سند لابنك ...

... اسكتي فاروق الو 3 ارباع الاملاك بالوصيه يعني اكثر من النص اذا عرف بيهه اني وابو مزوريهه ضدو مانخلص منو خلي نلهي بسالفه اختو وهم اتقربلو بحجه ادافعلوا...

... لافلاح والله اخذ بناتي وارجع لاهلي منين اجاك هالطمع ومات ضميرك جنت مقتنع ب3 الالف ودكول خير ...

.. كومي منا وسدي حلكج واياج تحجين منا لمن تنحل سالفه عماد ..

نيران... هذا بابا شبي شلون يحجي هيج وعبالك تخطيط لعدون وبعدين هو فاروق منو شايفه وهيج حاقد علي؟

سمعت بابا كال لماما باجر الكعده وراح اروح لفاروق واعزمهم ع عشا هو واخته واشوف عماد ينهان كدامي من ولده...

بس مستحيل اسكت اني ما اعرف ولد عمي بس باجر من يجون حتلو اطبلهم للاستقبال واحجيلهم لا ابوي ولا عمي يوكفوني...

اكلهم عمي يريد ينطي ثريا فصليه وخلي هم يتصرفون حتلو يزعل بابا جاي يمارسون ظلمهم عليهم من ورا الفلوس...

ثريا ... خلصت شغلي ع السريع من الصبح حته اخلص مراجعتي لان الايام تركض وانه اخاف ما الحك..

للظهر صارت ب12 رجعوا قيس وفاروق تلكيتهم من الباب سالتهم شعجب راجعين بهيج ساعه؟؟

قيس... جان عمج فلاح يمنه وحجه ويانه ع الكعده وتاخرنه.

ثريا.. عمي!! شعجب منو كلف نفسو واجاكم كلمن يدور مصلحتو لاتصدكون بي...

... لا انصدك بعمج ولا بابوج انروح ونفتهم...حضري نفسج ناخذج ويانه..

ثريا.. اني شسوي اروح هي كعده زلم..

... عمج اصر الا تجون والصدك اني ما اعرف اردو لان لح جثير وجان فاروق موهين كلت عيب ارجعوا...

ظل يتوسل واني ما ادري بابوكم هيج مسوي واوكف وياكم  ومن هالخرط الي بلامعنى ...

... يعني انت مرتاح لسالفه ابوي قيس اني خايفه التفتت ع فاروق وحجيت ...

كاعد بالكاع ويفرك برجله ... فاروق ليش ساكت اني مامرتاحتلو وگلبي ناغزني منو..

فاروق.. ليش مامرتاحتلو مايكدر يسوي شي طلب من عدنه مساعده وراح نساعدو ...

مدام عمج ضد ابوج لازم ادحك حل لوضعنه لان مايتغير اذا بقينه هيج ...

... عجل ليش اني وياكم؟؟

... كنالو ايهم يبقى يم ثريا مانتركهه لحالهه كال اريد اشوفهه وكعد يتوسل هي ساعه انروح ونرجع ثريا تروحين ويانه وادعي الامور تمشي مثل ما اريد...

.. شنو براسك فاروق؟؟

... جثير شغلات براسي وما اكدر اخطي خطوه بيهه الا اخذ حگنه وهذيج الساعه لعلم ابوج ومرتوا فاروق شيسوي..

ثريا... كلام فاروق قلقني ..صبيت غده بين ماغسلوا وحضرت ملابسهم وفكري مشغول مامرتاحله ابد..

خايفه ع اخوتي بالذات فاروق اعرفو مايسكت وخاف يتكاون ويه ابوي وتصير مشكله منين اجتنه هاي...

اجه موعد لقاء ابوي واكيد راح انشوفو صار شكد مامدحكتلو ولا سامعه صوتو..

رحنه لبيت جدتي حليمه واني ادحك من الجامه طفولتي كلهه هين هذا البستان وهذا الشارع الترابي وهاي الشجرات جنت العب يمهه اني وادهم ...

اتذكرت جديتي الله يرحمهه شلون جانت تكعد بالباب ودكلهم اكتلو كل واحد يعيل بيكم يول صيروا اسباع...

فززني من صفنتي صوت ايوب وهو يكول وصلنه دحكت ع الباب مغيري ومجددين بناء البيت وباب ثاني مشتمل صغير...

نزلت من السياره ولاول مره اطلع من البيت خلصتهه من المدرسه للبيت...

لزمت بايد قيس ما ادري ليش متوتره وخايفه يصير شي ع اخوتي وين جان كل هاي السنين عنهم...

دكينه الباب مال بيت عمي مال المشتمل جان ينتظرنه فتحه وبده يسلم ع اخوتي ...

اخذني بحضنو وهو يكول هلا بثريا اخوتهه ...

يشبه ابوي نسخه من عندو ركزت على عيونو وهو يحجي ويه فاروق ما ارتاحيتلو...

اكو شر بعيونو واكو نوع من الشماته وشلون الي واحد عنده مكيده ...

ابدي اخذ اخوتي بي اضلاعي واخبيهم واحد واحد وما اخلي مخلوق يمسهم...

صرت الوم بقيس شكو اجينه وهو يكلي اسكتي يولي صرعتي راسي...

ماد ايدو النه وهو يصيح تفضلوا تفضلوا واحنه واحد يدحك بالثاني انحس نفسنه غربه عن هذا الدار ...

كعدنه بالديوانيه وهو يرحب بينه ومخبوص صاح ع زوجتو وبناتو ...

ام عمر تعالي ولد اخوي اجو صيحي البنات وتعالي...

من كال هيج دحكت ع ادهم عدل كعدتوا وحرك شعرو حته ايوب ابتسم اتذكرنه سالفتو مال البارحه..

شويه واجت مرتو لعمي سبحان الله رغم جبيره بس حلوه جثير حگو عمي يعوف اهلو علمودهه جمال تركماني اصيل...

بيضه وملامحهه حاده والسانهه حلو رحبت بينه وصاحت ع بناتهه كالت امنيه صيحي اخواتج خلي يجن يسلمن ..

ادحك ع اخوتي متوترين هذا البيت طلعنه من عندو مطرودين وبعد مارجعنالو گلبي لاعب من هاي الجيه ...

كاعده بصف قيس الي لابس دشداشه نيلي  وملامح التوتر واضحه علي يدحك باركان البيت وعبالك يتذكر طفولتو خاصه هذا المكان جان غرفه جدتي وغرفتنه ...

اوس لابس تشيرت زيتوني لونه المفضل ونظاراته الطبيه عندو قصر نظر ويدحك باركان الديوانيه وشكو لوحه معلكه يقراهه ويركز بيهه...

اوس دائما لبسو يختلف عن اخوته لان يلبس نظارات يفضل البنطرون ع الدشداشه..

ايوب ماعاجبه العجب وبس يحوص وكلساع اشوفه مدري شيحجي ويه فاروق وفاروق يخزرو ويهزله راسو...

ادهم من يطلع دائما يصير مؤدب بشكل وحته مايشارك بالحديث ولا عبالك هذا الخابص البيت...

فاروق ضليت مركزه بمعالموا اكو شي شاغل بالو واحس جيتو لهينه بيهه غايه ...

لابس دشداشه بيجي وكاعد بكل اريحيه بس عاكد حواجبو وهذا دليل ع انو ماراضي بالي يصير ...

ادحك ع عيونو متروسه حقد وضاغط ع ايدو مبين تذكر طلعتنه من البيت مطرودين..

عمي فلاح يسولف واخوتي قليل يناقشوا شرحلهم ع السالفه وكالهم هسه تلتم الزلم وانروح وثريا تظل يم البنات

احسهم كاعدين ع اعصابهم بس ما اعرف غايتهم شنو انه متاكده ورا جيتهم شي ثاني مايتنازلون اخوتي بسهوله...

فلاح.. عمي فاروق والله من اجيت هين عرفت بسالفه ابوك ومارضيت ع سوايتو

فاروق.. احنه من اجينه هين ما انريد نسمع مديح من عدكم ولا انريد واحد من عدكم يكعد يبررلي افعالو ..

كلت لحجي راضي وراح اكولهه هين جيتنه هين لاجل غايه وحده حته ماتطلع حرمه من عدنه مسبيه بسبب سخافه ابوي..

قيس.. ياريت تستعجلون ورانه اشغال وثريا عدهه دراسه كل الكلام الي دكولي سمعنا الف مره ...

فلاح.. والله ماعرفت شحجي من ادحك عليهم ياعماد ياعار عندك زلم ينشد بيهم الظهر شلون راح تواجهم؟؟

ادحك على فاروق براسو شي ومبين مايتنازل وعنيد الف رحمه على روحك يا بويه ...

جنت دائما دكول اريدكم اطلعون تهزون الكاع هز بمشيتكم ومن تحجون تسكتون اكبر واحد...

تالي ماطلعنه عليك بس طلع حفيدك نسخه من عندك مبين الحجيه حليمه غارسه بداخلو كل صفات ابوي...

منين اندار ادحكهم الغضب مالي عيونهم لو يدرون بعملة ابوهم شراح يسوون حته ادهم اصغر واحد مطبع باطباع اخو ؟؟

فضلت اسكت حته ما يسمعوني كلمه خشنه لان مايهابون ولاعدهم مانع يهينون المقابل راح انتظرهم وادحكهم بالديوان شلون يتصرفون؟؟

ثريا... احس الجو متوتر وكاعده اهز برجلي لحد ما خله قيس ايدو ع ركبتي يله كدرت اهدء ما اعرف شبلاني وليش هيج خايفه؟؟

كامت مرت عمي بيان وشويه واجت يمشن 3 حوريات اول مره ادحك هيج بنات مثل الي بالتلفزيون صدك لاكالو بغداديات..

فلاح... سلمن ع ولد عمجن وهاي ثريا بنت عمكم عماد..

وكعد يعرفهن على اخوتي ومن يسلمن يمدن ايدهن يصافحن وهذوله تيهوا الاول والتالي...

من يمدن ايدهن مايصافحوهن يكتفون بس بالسلام وانه عيوني تتنقل من واحد لواحد  حته ادحك ردة فعلهم...

كلنه كعدنه وعمي يحجي ويه فاروق وقيس وانه كمت كعدت بالجهه الثانيه وعيوني تراقب...

فلاح... انه عندي 3 بنات هاي الجبيره نيران سنه ثانيه معهد معلمات  ...

واصغر منهه بسنه رؤى وامنيه بصف رابع ابتدائي وعمر الوحيد اصغر واحد عمرو 6 سنوات...

دحكت على نيران صغيره وحلوه لابسه بنطرون اسود قماش وعلي قميص وشعرهه طويل حيل لحد الورك ومسويتو ضفيره هنديه...

رؤى هم حلوه بس موبحلاة نيران هاي تنطي شبه لابوهه حته بيهه خيط سمار عكس نيران وامنيه عبالك قالب ثلج...

احتاريت المن ادحك لاخوتي لو عليهن لابسات بنطرونات وحلوات وحجيهن حلو ومثقفات ...

لفت انتباهي الجبيره نيران ادحك بتمعن عليهم وتفرك بايدهه احساس غريب انتابني اتجاهه ماعرف شنو...

اجت عيني ع قيس من رفع عينو اثناء مايحجي عمي ودحك ع نيران بس بسرعه نزل عينو نظره خاطفه ...

اوس كلساع ينزع النظاره يمسحهه ويرجع يلبسهه يمكن انحجبت عندو الرؤيه...

اول مره يكعدون بمكان بي بنات ماشايفين غير الطاسه والعماله...

ادهم يمكن صرف باكيت كلينس من كدما يمسح بالعرك شجاهم اخوتي تخربطت احوالهم ضعيفين امام الجنس اللطيف...

ايوب كلساع يسرقلو نظره ويرجع يسولف ...

فاروق مندمج بالسوالف وما شفته ابد دحك عليهن ولاكانما موجودات وحته ما اندار عليهن ...

رغم هن صغار بس اجسامهن مو مثل ماكال عمي اصغر مني عبالي متخرجه نيران...

شويه ونسمع صوت زلمه كال يالله ... صاح عمي فلاح تفضلوا..

ادحك ع الانسان الي سلب راحتنه طول هاي السنين هذا ابوي ماشايفتو من عمري عشر سنين ..

كبرت وربوني اخوتي احتاجيته جثير بس مالگيتو اخوتي عوضوا مكانو..

عماد... واكف اباب الديوانيه وادحك على الزلم الخشنه الكاعده كدامي ماحركو ساكن ولا انطوني اهتمام...

ثريا بنتي كبرانه وصاره مره بسرعه اتذكرت سالفة الكعده وشلون راح احجي بوسط هذوله الاسود..

تگربت عليهم مديت ايدي اسلم ع فاروق توقعته يردني بس فاجأني وهو يمد ايده ويسلم ...

هز ايدي بقوه وعيونه تحجي الف كلام وكأنو يكول لا تفرح جثير اني وراك وراك..

اسلم ع ولدي وعبالك غربه سلامهم بارد مجرد رد السلام ما اعرف بهالحزه شكول اكتفيت بس اسلم عليهم...

وصلت لبنتي ثريا فتحتلهه ايدي اريد احضنهه ما ادري شحسيت بهذا الموقف...

فاجأني تصرفهه جانت واكفه اخر وحده بصف اخوهه قيس عافتني وراحت احتمت بفاروق ولاذت ورا وعبالك افتهمت غايتي...

فاروق فتحلهه ايدو وصار تحت جنحو ضاع عندي الكلام شحجي وشكول وهي لبوه بوسط الاسود ...

من اجتني بنتي رفل وكالت اخوتهه هنا احس رجليه انربطت بحبال شلون احجي بالكعده وهم موجودين وشلون اجو من كيفهم...

بدريه.. شبيك خايف منهم هم ولدك انت مسيطر عليهم بنتك وانت حر بيهه...

من ادحكهم ماقابلين جيبهه من عدهم بالغصب واحبسهه بالغرفه ونزوجهه لاتخاف اخلي اخوتي يوكفولك ...

... اخاف تكبر واصير علج بحلوك الوادم واني هاي السالفه مامرتاحلهه...

... اخوي قحطان شرطي وراح يخوفهم وياخذهه منهم وحته اذا اشتكو عليك انت ابوهه ويلفهه من يمو...

... كلام بدريه طمني صدك اخوتهه شرطه واخوفهم بيهم انطي فصليه ولا يهدرون دمي ...

نيران...
كاعده وعيني عليهم اريد واحد من عدهم بس يباوعلي حته اشرلي واخلي ينتبه بس ولا واحد منهم رفع راسه...

كاعده احوص بمكاني بس اريد مجال شويه بس للاسف ماحصلت وانتبهت عليه ماما وكومتني ...

عرفت نيتي شنو وحبستنه بالغرفه اني واخواتي وقفلت الباب علينه...

اتمنيت اكسر الحايط واطلع حذرتني ماما كالت اياج نيران ابوج يموتج هو وعمج ...

ما اتحملت اول مره اجرب شعور الانسان يكون عاجز كمت ابجي واخواتي يسالن بيه شبيج...

شلون يصير عمي يبيع بنته وبابا يصفكله ويركص على جراحهم  لحد الان اتذكر الشعور شلون مؤلم..

لحدماطلعو واني محبوسه بالغرفه ورا ماطلعوا انفجرت بماما كتلهه شلون تسكتين عن الظلم تقبليهه ع اخواتي...

انفعلت حيل وعليت صوتي ماحسيت غير الراشدي ينطبع ع خدي ...

بعدج ماتعرفين عواقبهه ابوج عبالج يرحمج لوعمج الي هان علي ولده وبنته ماياذيج اذا عرف بيج لمصلحتج منعتج حالي من حالج اني...

كومي نيران اطلعي يم ثريا واياج تنطقين بحرف السانج اكصه...

حسيت بيأس فضيع ليش هيج الناس باعت ضميرهه ليش كلهه سكتت شنو ذنبهه خطيه خاصه من احتمت بفاروق شكد انقهرت ع عجزي وما خبرتهم...

فلاح... تحركت السيارات ورحنه لبيت مناحي حجي نوري وشيخ ناصر جان كل كلامهم ويه فاروق ...

مترقب شراح يسوي عماد وشيحجي لو دمه لوثريا واعرفو جبان ...

كعدنه بالمضيف وجثير ازلام جايه وشيوخ بحكم تعتبر اكو كتل ولازم ياخذون بثارو

حجه الشيخ ناصر وشيخ فلان عشيره وشيخهم وصار الحديث والوادم تجر طول بعرض...

اخو المكتول وابو شرانيين وكالو غير الفصليه لو هدر دمو مانرضاهه وكلساع يكومون يهدون ع عماد وشيخ ناصر يكلهم نحلهه بمايرضي الله...

ردنه من عدهم شكد تريدون فصل مارضوا الا الاحتمالين لو نكتلو لو فصليه...

فاروق واخوتو ماحجو بس يدحكون ما اعرف شيدور براسهم...

دقايق وعماد فجر القنبله بوسط المضيف وكال مدامكم ماتقبلون بالفصل راح انطيكم فصليه...

توسعت عيون فاروق واخوتو وجهو نظراتهم ع ابوهم مادحك عليهم وكالهم انطيكم بنتي الجبيره ويوكف الدم...

كل الكاعدين صوبو نظراتهم ع فاروق الي عيونه تطاير منهه شرر بس ماسك اعصابو...

اخوتو رادو يهجمون ع ابوهم بس اشرلهم براسو وسكتو....

الشيوخ وحجي راضي الي جابهم ماعرفو شيحجون ومحد متوقع عماد تطلع منو هيج وهذولاك كالو نعتبرهه فضت...

قيس واوس ايوب ادهم كلهم على حافه الانفجار بس احترامهم لاخوهم ساكتين...

الوجوه تترقب وشيخ ناصر عينو ع فاروق بس يريده يحجي وهو يقرر بحق ابو ...

بلحظه زأر فاروق مثل الاسد بكل قوه وجبروت اني عمو بلحظتهه ارتعدت من كلامو الي جان محمل حكمه وقوه الف شيخ....

يتبببع ... احبكم هوايه..

حبايب رساله من البطله كالت اتركي المتابعين على راحتهم بالتعليقات ينتقدون الي يعجبهم وحته وان كان على ابوي او اي شخصيه بالقصه خلي ياخذون راحتهم...