رواية ازمة ضمير الفصل الرابع 4 - بقلم Rozaya1122

ازمة ضمير ... البارت الرابع..
«للكاتبه روزايه»

أفرزنهن عدل ..وأعزلهن الخشنات
واخذ كل ثگيله ..وراكزه ..وتازه
أعرفهن وأجيهن
جيه مستنگاه
ما أحب الوجوه ألـ مالهن عازه...
...

مخليه اذني بالباب واتسمع الهم هاي يامشيه؟؟ اجه اوس اخذ الجاي واني بس اريد اعرف شكو؟؟

فاروق... حجي ابو راضي انت تدري احنه ماطلعنه من البيت بارادتنه ابونه طردنه وبعد كل هاي السنين داز علينه وحته ما كلف نفسو هو يجي..

وهاي كدام الجميع اكول ابوي طرد 5 ولد وبنيه واني كتلو ماعندو ولد عجل هسه من تذكرنه دزكم علينه..

صارلو يومين يوميه يدز عمومته وين جان عنه ماسأل صار سنين وحته من ردنه نكسر الشر بيناتنه ورحنالو طردنه للمره الثانيه ...

حجي راضي.. يا ابني نبينا محمد وصانه ما انرجع الاساءه انت ابن وهو اب هالحزه هو بحاجتكم ودز عليكم ...

هالحزه عرف عندو ازلام ويريد توكفولو بمحنتو خلي تفض سالفتوا ونكعد انحاسبو عليهن وحده وحده...

فاروق.. احنه هم احتاجينا جثير وما دحكنه شي منو وطلعنه من بيتوا بعز الحر  نفتر ع دار تلفنه ( تجمعنه)..موهسه وكت احسابو بعده ماحان

قيس.. حجي راضي احنه ما انريد ننتقم منو ولا انريد نقلل من شانو گدام الناس بس صدك الي سوا ماينغفر وليومنه هذا احنه نعاني بسببو...

حجي راضي... اعرف يابويه انتم صادكين بكل حجايه دكولوهه بس ادري بيكم صاحبين نخوه ع الغريب شحال ابوكم وعمكم ما اديرون ظهركم الو...

اوس.. ابوي وصلنه حجي من عندو بيد ولد عمومته كال اني ما اتشرف بيهم وحته ما يرضى نسلم علي كدام الناس لان مو من المستوى العايش بي...

اكثر من مره اتلگا وجه بوجه واسلم علي ويرد السلام كأنو غريب وماطالع من ظهروا هو هذا يتسمى اب ؟؟

ربينه نفسنه وحدنه لا بيكم چبير ولاصغير طول هاي السنين مر علينه وكال ادحكهم شلون عايشين ...

حجي راضي.. ياابني قسما بالله من اجينه هالاسبوع هين سمعنه بسالفتكم ...

كلما نسألو بكول زينين مانعرف مطردكم من بيتو الفاينه الي سواهه والله مومال ازلام...ذ

فاروق... سمعت ياحجي راضي اني مالي حكم ع اخوتي كلهم كبار وزلم والي يشوفو اني انفذو...

حجي راضي.. اني اليوم جاي لداركم وادري كلش زين ولد الحجيه حليمه مايرجعون ضيفهم فشلان ...

يا بويه وجودكم بالمشيه يحل امور جثيره عمكم وابوكم بورطه وتعرفون عشايرنه ماتسكت وتصير مذابح احنه ما انريد الوادم تحجي بطاري الحجي جدكم بالشين...

الله يرحمهم جانوا كافين شرهم وايدهم دوم تمد المساعده بس من راحوا لرحمه ربهم عماد وفلاح كل واحد يغرس انيبابه بظهر الثاني...

اني ماعايش بديرتكم جنت اسمع عن جدك وكرمو واخلاقو من اجيت وشفت ابوكم وعمكم ماكالت غير بس مع الاسف ...

صدك لوكالو اهلنه النار تخلف رماد جدتكم جان ينحلف بحكمتهه وياما ساعدت وادم تالي هيج يجازونهه ولدهه...

هسه احنه مانريد انصير مثل اخلاق ابوك وعمك انريد وكفتكم ويانه وكفة زلم اترجاكم يابويه لاتفشلوني...

صار يومين يجون عليه واكلهم ما ادخل وخاصه من كالو دازين ناس عليكم وماقابلين بس هسه كلفني الشيخ واجيتكم...

ايوب... ياشيخ هسه عرفنه شيخ ناصر مو اخو جدتي حليمه ورا فاتحتهه شو مادحك بوجهنه وكال شمحتاجين؟؟

حجي راضي.. حدرو هين وخلي نحجي الحال انتو ولد عماد وكاعدين ابيت جدتكم من قسموا الورث مچانكم عند ابوكم وطلع ابوكم خسيس...

احنه ناس ساكنين بالفلوجه ونسمع اخبار اهلنه من اندز طارش وكل مايجينه الطارش يكول زينين ...

من اجينه هين عرفنه السالفه من عمتكم ام سعيد الصغيره وابوكم نكر كلشي وكال هم طلعوا وحدهم...

هسه اكولكم والله ازين شاربي هذا اذا ما ارجعلكم حگكم من بين عيونو وهذا كلام الشيخ ناصر كال وصلوا لفاروق..

گلوا هو زلمه والورا ازلام ينشد بيهم الظهر حگهم يجيهم لباب بيتهم لهاي دز عليكم الشيخ...

فاروق... المطلوب من عدنه شنو؟ وحضورنه بشنو يفيدكم؟؟

حجي راضي... اسمعني يابوي يافاروق انت الجبير وتربيت بديوان جدك وتعرف الاصول والواجب ...

عمك فلاح صار مده من اجه سكن بلانبار يكول وضع بغداد مو زين وخايف ع عائلتوا وهاج من بيتو ورجع لاصلو...

ابوك مامستقبلوا بحكم العداوه القديمه وكملوهه بمكاونهم ع الورث وصار واحد يتمنى ياكل اخيو...

عمك عندو حصه من البستان وابوك زارعهه ويحصل منهه وعايش بخيرهه...

فلاح ماطلب غير حگوا راد ينطي الحصه حته يبني بيهه وكالو اني ماكاعد هينه بس يهدء وضع بغداد يرجع...

ابوك تذابح ويه عمك وماقبل ينطي شبر من الحاوي( البستان) وكالو ما لك حصه يمي...

فلاح مثقف ودارس وراد يتعامل ويه ابوك بالقانون لان الوحيد الحاوي هو باسم جدك الله يرحموا ومن تقسم الورث تقسم هذا الحاوي بالتساوي..

كعدنه ابيت ابوك وجدكم الشيخ ناصر( اخو حليمه)  راد يحلهه بما يرضي الله ومايتذابحون ولد الحجي ع مال الدنيا...

ابوك ماقبل ينطي عمك لا حصتو من الحاوي ولا قبل ينطي غرفتين من البيت يكعد بيهن ...

هاي صار فوك الشهر طلايبهم ومكاونهم ع الدار والحاوي ولوما يتدخل شيخ ناصر جان تكاتلوا ...

رضه ابوك ينطي غرفتين ونص من الحديقه لعمك وبنه بيهه ع گدو وكعد واستقر والحاوي ظل لابوك وعمك هم الزلمه ماحجه كال بس يهدء الوضع ارجع لداري...

هسه ابوك متكاون ويه عشيره ثانيه علمود المي هذولاك كاطعي عن الكاع وميت الزرع...

عمك ما واكف بسد اخو عايفو وحدو بنص هاي المكاونه ومدخله الشرطه وحابسين ابوكم اسبوع ...

حجينه وذمينه فلاح شلون يعوف اخيو وحدو بنص هالطلايب وراح طلع ابوك بكفالتو ...

قبل اسبوع عشيره امناحي هادين ع ابوك وعمك وصايره بالتفك ( السلاح) من ورا نهر مي يمر بكاعهم وكاطعي ع الوادم...

ابوك  كاتل واحد من ازلامهم وميت بساعتو وهذولاك مايجفون الشر  وهسه فصل مايريدون لو نكتل لو ناخذ حرمه منكم فصليه...

ياعمي استهدوا بالرحمن زمن الفصليه وله ومحد يمشي بي كلنه عدنه بنيات عزيزات شلون ننطيهن ونذلهن...

بس ماكاعد يرضون لو تسلمونه الچتال لو الفصليه وهاي صار اسبوع احنه هاجين ورا الشيوخ بس انريد عطوه ونحلهه بالتراضي ...

فاروق.. شنو هالسالفه هاي وابوي من كونه موكدهه وين يريد يكاون باراضي الوادم...

حجي راضي جيتك ع راسي راح نحضر الكعده مو لاجل ابوي وعمي بس لجل ما تطلع من عدنه حرمه مسبيه ...

انطينه موعد المشيه ونجيكم اني واخوتي وان شاء الله ماكو غير الخير...

حجي راضي.. ابوك يريد يجي يحجي وياكم باجر الصبح واني اكلك ع الكعده ...

فاروق.. لا ما اريد اشوف وجهو الكعده تطلع من بيتك ولا يحاول يسلم لو يحاجي واحد من اخوتي خبرو هذا الكلام..

حجي راضي.. يابويه يافاروق ونعم ماربتكم الحجيه بس المروه مريوده( مطلوبه) مو ابيت ابوكم ابيت عمكم فشله من الوادم شدكول ...

قيس.. ياوادم تحجي عنهه شو كلمن تبره بحزتهه ومحد حجه كلمه الحق لاتشيل همهم لان وادمنه التحجي عنهه شالو مستحاهم...

فاروق... حجي راضي باجر بلغنه بالموعد ويصير خير ..

ثريا... طلع حجي راضي الي عم ابوي رجال معروف وساكن بالفلوجه يجي قليل محد يشوفو ...

كل اهل ابوي عمامو وعماتو ساكنين بالفلوجه حته اهل جدتي حليمه بس واحد من اخوتهه ساكن هين..

انه كبرت واعرف كل العادات والتقاليد عمري 18 سنه وعايشه ويه 5 شباب وتعلمت كلشي من عدهم...

رحت صبيت العشا حطيته كدامهم وكعدنه ناكل وهم يسولفون بسالفه ابوي ...

ثريا... فاروق خاف ابوي بظهرو لعبه ويريد يورطكم ..

فاروق... ثريا موزغار احنه باجر تجي الكعده ونفتهم صاير ابوج زلمه ويكتل بالوادم ...

قيس... فاروق باجر سيطر ع اعصابك ادري بيك ماتكدر تلزمهه من ادحك ابوي...

ثريا... بس انتو مابيدكم شي اذا بيت مناحي يدورن شر شسوون انتو شبيدكم تحلو...

فاروق...  يابنتي ما راح انحل شنو دخلنه بابوج هو رجال مستقل يدور راحتو ...

اكو شغله من زمان اريد احجي بيهه بس ما ادري شنو الي يأخرني مدام الشيخ ناصر وحجي راضي اجو هين لازم احجي واطلع حگنه...

قيس... والله يافاروق ما مطمن لهاي السالفه اني اعرف بيت مناحي دومهم يدورون شر ابنهم جان وياي واعرفهم يوميه فصل ...

فاروق.. اكو قانون ما رضوا بالفصل خلي ينسجن ابوك وفضت راحت ولايتنازلون ...

ثريا.. سمعت حجي راضي يكول يريدون فصليه منين عدنه بنات اني وبنات عمي خاف يسويهه ابونه..

فاروق.. شيسوي مثلا ينطي ثريتي فصليه؟؟

ثريا.. مو بس اني عجل اني خايفه لان ابوي مثل ماطردنه يبعنه..

فاروق.. يولي ياب والله احرك العشيره وبيت مناحي وابوج والي يطلع ورا اذا مسوج بسوء...

شتحجين ثريا انتي ماعندج اخ واحد عندج 5 زلم وراج.. ابن ابو الي يتگربلج امو داعيه علي..

قيس.. ماحبيتهه منج هاي السالفه ثريا يولي وين رحنه احنه وتحجين هيج ...

اوس.. والله ابوج الي ننطي فصليه وما انخليهم يشوفون طرف اذيالج ...

ادهم.. غير لو صدك ابوي يلفظ هالكلمه ع السانو والله لا اعلمو تربية حليمه شنو..

ايوب.. اسكتوا احس الدم صعد براسي مجرد ما اتخيلت بس صدك ننطي ابوي فصليه..

ثريا... الكل ضحك على حجايه ايوب واني عيوني مليانه دموع وراسي مرفوع واحساس الفخر المسيطر عليه ...

ياربي اخوتي اخوتي كلشي ما اريد من الدنيا بس احبائي الخمسه ...

ادهم.. اكول يولد سمعتوا حجي راضي يكول عمكم جاي وهو وبناتو..

ايوب.. اي وجاي هو وبناتو شبيك حميت؟؟

ادهم.. لا يول هذني بنيات وغريبات عن الديره واحنه اولاد عمهن ولازم نشوفهن خاف محتاجات شي..

ايوب.. انجب يول شبيك گلبك يرف بس تشوفلك بنيه اثكل يول...

ادهم.. هسه ماعلينه باجر اذا رحنه عليكم الله خلي انمر ع بيت عمي انشوف كتاكيت بغداد..

يكولن بنات بغداد بقلاوه بالدهن الحر هيج تاكل منهه وماتشبع..

قيس... سد حلكك مالكيت غير عمك مو ع اساس تكرهم...

ادهم... انه اكره عمي بس ما اكره بناتو!!

قيس.. عمك وابوك نفس الشي الف رحمه ع روحج حليمه لوعدله جان ماكدر واحد بيهم يفتح حلكو بحرف..

ادهم... يول ثريا حضريلي ملابس الكشخه خاف بنات عمج حلوات يطلعن...

اوس.. كوم ولك عرضك لاتحجي هيج ندري كلبك رهيف بسرعه يحن...

ثريا... ادهم شعل الجو عليهم خلاهم نسوا السالفه وبس يحجون ع بنات عمي ...

كمت غسلت المواعين ورحت للغرفه اقره عندي فتره مراجعه وما اريد التهي عن دروسي ...

فاروق وقيس واوس يطلعون بالليل يم ربعهم وايوب وادهم يبقون يمي ومرات بالعكس...

ثاني يوم كعدت الفجر صليت وكعدت اقره اليوم اخوتي ماعدهم شغل بس قيس وفاروق عدهم واوس يشتغل بتكسي يكعد ع كيفو...

سويت ريوك وكعدتهم ادهم يشلع كلبي يله يكعد نومه ثكيل ...

وايوب يكعد روحه بخشمو ويتعارك ويه ذبان وجهو ...

اوس يكعد نشيط بوجهه للسياره يشغلهه ويرجع يتريك ويطلع...

وقتي يخلص بين الدراسه وبين البيت وطلبات اخوتي ماتخلص ثريا غسلي قميصي... ثريا سويلي جاي ... ثريا وين حذائي ... ثريا ثريا لحدما اتعب وينهد حيلي...

....

نيران...
مواليد 1988 سنه 2004 جنت سنه اولى معهد معلمات عايشين ابغداد بس اصلنه من الانبار...

بابا اسمه فلاح معلم وماما اصلهه تركماني ربة بيت اسمهه بيان احنه 3 بنات وولد واحد...

الجبيره رؤى اكبر من عندي بسنه والزغيره امنيه بصف رابع ابتدائي واخر العنقود اسمه عمر وبعد ماما ماخلفت شالت رحمهه ...

الوضع بعد هاي السنه تازم ابغداد جنت ناجحه للمرحله الثانيه  وسمعت بابا يقنع بماما يگولهه انروح فتره ونرجع ...

هنا الوضع مو امان واني عندي بنات وخاصه منطقتنه بيهه امريكان هوايه وخايف عليهن ...

بيان.. فلاح اهلك مايحبوني شلون تريديني اكعد يمهم وبعدين احنه مامتعودين شلون فهمني...

فلاح... هن شكم شهر ونرجع بين مايهدء الوضع اذا صار شي انظل ناكل باصابعنه ندم ...

امي توفت واخواتي كل وحده ابيتهه عندي كاعي هناك ونكعد بيهه وبس يصير الوضع امان نرجع اني هم تعودت ع بغداد...

بيان.. راح اروح وياك بس يافلاح موهناك وتشوفني الويل وكالت اختك وحجت مرت اخوك ترى البيه مكفيني...

فلاح.. كومي لمي الغراض وباجر من الصبح طالعين...

نيران... اني اول وحده تخبلت شلون اعوف المعهد شكد بجينه ع بغداد من طلعنه الفجر واني اشوف الشوارع والاضويه ...

اريد بغداد ما اريد اروح للانبار ما عندي صديقات وبيت جدي اهل بابا حته ما شايفتهم ولانعرفهم...

اصلا هو بابا بنفسه يحجي عليهم ودائما يتردد ببالي سؤال ليش بابا يضوج من اهله ...

وصلنه الانبار تختلف عن بغداد صح حلوه ونظيفه بس مومثل حياتنه حته ماما بس تباوع ومستغربه كولشي يختلف هنا ...

ماشايفين اهل بابا بس سامعين عنهم ونعرف عدنه عم اسمه عماد و4 عمات بس هذني الي نعرفهن ونعرف بيبي اسمهه حليمه بس شنو السبب والعداوه هاي مانعرفهه...

نزلنه اباب بيت جبير حيل وداير مدايره اشجار المنطقه زراعيه وكل واحد بستانه شكبره مجرد ما اخذت نفس دمعت عيني على بغداد ...

دك الباب بابا وطلعنه رجال حضن ابوي ويرحب بينه عرفته هذا عمي عماد ابو فاروق عنده علم بجيتنه ...

طبينه للبيت استقبلتنه مرته وعنده بنات صغار بس ماعنده ولد لعد ليش يكلوله ابو فاروق؟؟

حيل ماعاجبني الوضع احس هنا الكل يمثل واولهم بابا هو يكره عمي ودائما يذمه منين اجته هاي الحنيه...

استقرينه ابيت عمي بس اني فضوليه دائما امشي واتسمع للحجي من جنت صغيره هاي الحاله بيه جانت ماما شكد تضربني بس هاي عاده عندي وابد مابطلتهه ...

كلما اشوف عمي وبابا يحجون اركض اتسمعلهم هوايه شغلات ادور ابالي بس اريد جواب يرضي فضولي..

مره سمعت بابا وعمي يتعاركون ع بيت وبستان وبابا يكل لعمي انت ليش متلاعب بوصيه عبالك لو عرفوا ولدك يسكتون؟

عماد.. لا تكوم تحجي حجي ماصخ ع اساس انت ماتدري ليش مو انت كتلي خلي نحذف الوصيه وانطيك البستان الك ...

فلاح.. انت الطماع وطمعت بورث ولدك من كتلك هيج غير عندك بيت وتلم ولدك شلون اطردهم علمود مرتك ...

.. ماطردتهم هم مايتحملون الحجي وزعلوا وراحو وهالحزه شبيهم كبروا وصاروا زلم...

.. تتوقع راح يفوتهه الك هاي العمله لازم تظل حريص على كلشي حته ماتوصلهم حجايه منا منا...

... محد يوصلهم هو ابو سالم بس الي يعرف بالوصيه لان امي خلتهه عندو حته يسلمهه لشيخ ناصر وماتت وتقسامنه واخذ المقسوم وسديت حلكو ..

... ادعي ربك ابنك الجبير فاروق مايدري بالسالفه اني وياك انروح بالرجلين ...

ولك عماد شفته والتقيت بي بلحظتهه فز كلبي من عندو نسخه من ابوي الله يرحمو حته طريقه كلامو ...

عماد... وين شفتو وشوكت ؟؟

...رحتلو لمكان شغلو حته اقنعوا يحضر الكعده ومانظل وحدنه ع الاقل يكولون عدهم ولد مو نهمش مثل الغركان...

مالكيتوا كعدت ويه قيس شويه اهدء من فاروق اخذنه وعطينه بالكلام وبعدين اجه ..

اول كلمتين والثانيه ما انطاني مجال حته اتناقش ويا شفت ابوي بعد هاي السنين كلهه ...

واذا عرف ياعماد والله لينتقم من عدنه شر انتقام واخوتو من كلامهم يحترمو ومعتمدين علي...

عماد .. يمعود كلشي مايسوي ماكو شي يثبت الوصيه وشكيناهه وراحت ...

نيران...اتسائل بيني وبين نفسي وين ولد عمي هسه؟ وين ساكنين؟ ويا وصيه جنت شسمع اروح احجي لامي واحصل المقسوم  من الرزاله...

كثرت المشاكل بين عمي وبابا ومرت عمي عماد شدت ويه ماما وهم يوميه عركه واشوف هوايه زلم تجي للبيت عمي يحجون واصواتهم عاليه يريدون يحلون المشكله...

لحدما قسموا البيت بالنص وصار عدنه مشتمل زغير بس ظلوا بابا وعمي متعاركين وواحد ميحجي ويه الثاني...

مبينين واحد ماطايق الثاني مجرد تمثيل حته كل واحد بيهم يحصل الي يريده ...

ما ادري شنو السبب الي يدفعني افكر بسالفه ولد عمي والورث والوصيه كمت احاول اجرجر بنات عمي عماد الصغار بالحجي بس جهال مايعرفن شي...

اتمنيت الگه الوصيه واخذهه واسلمهه بيدي لولد عمي مبينين متعذبين من ورا ابوهم ...

شهر هنا وشفت عمي من ياصنف كل كلامه بيد مرته شدكول يكولهه بلي ...

ماما جانت  ابد ما قابله ع الوضع دائما دكول والله جيتنه هنا راح تسببلنه مشاكل احنه بغنى عنهه...

نيران.. بيوم سألتهه كتلهه ماما وين ولد عمو شو بس بنات عنده؟

بيان... يا امي ولد عمج طالعين وحدهم منهزمين من ابوهم ومرت ابوهم الحيه  صار سنين...

نيران... وامهم وين ؟؟
... شكد تسالين امهم مطلقه اكعدي واسكتي وبطلي هالفصول لاترحين تذبينه ابليه شنو من بنيه راح تموتني...

نيران.. دائما امي تاخذني بالعين الصغيره بس والله عقلي شكبره اكو شي بهاي العائله ولازم اعرفه ...

قويت علاقتي بمرت عمي عماد رغم رزايل امي بس ما اتوب اتسلل لبيت عمي عماد بالخفيه ومن تدري بيه تشبعني رزايل...

سألت مرت عمي عماد اسمهه بدريه على ولد عمي وين ساكنين؟ وهم يجون وشكبرهم؟

بدريه.. ياا اليوم شعندج تسألين عليهم گلعه تگلعهم همزين خلصت منهم جان هسه مثل السيف واكفين ع راسي...

... ليش شمسوين؟ وشكبرهم؟

... صاحبين طلايب ويوميه لاگحين عمج بمشكله ويحل وراهم امهم اطلكت ولكحتهم وراحت وبقوا بدون تربيه...

هم خمسه فاروق هسه عمرو 25 سنه وقيس واوس توأم اصغر من فاروق ب3 سنين..

ايوب عمرو 21 وادهم 19 وثريا يكولون 18...

... يعني عندي بنت عم ماشاء الله اول مره اسمع بيهه واكبر من عندي..

... اي عندج وحده عاشت ويه اخوتهه ومابطلوهه ويكولون تتدرس وشاطره..

نيران... رضيت فضولي بهاي الاسئله بس بعد لازم اعرف سالفه الوصيه وليش بابا ساكت عن هذا الشي وقابل باذيتهم ...

اكو شي يجذبني لولد عمي واحس بمسوؤليه اتجاهم خاصه من سمعت شلون ماخذين حقهم...

بيوم منهن اجه بابا يركض وقفل الباب علينه تساله ماما يكلهه صارت عركه وعماد كتل واحد وهذولاك هادين علينه لا اطلعين انتي وبناتج وابنج خلي يمج...

ماما كلش خايفه وبس تردد ايات حقهه وين جنه وين صرنه كله من بابا الي مانعرف شيسوي ....

شويه واجه بابا حجالنه السالفه مال عمي وعليمن متعارك وشلون هذولاك هادين عليهم...

بابا خايف ويكلهه مايقبلون بفصل وخاف يكتلون عماد ...

بيان ... وين ولده مايجون يوكفون لابوهم بهيج محنه عليمن خلفهم لعد..

... ياولد ولج يامره رايحين ناس عليهم ومطردهم ابنه الجبير كايلهم ماعدنه اب اكتلو اسجنوا بكيفكم...

... ياعزاا هاي شبيهه الناس متذابحه والابن مايعترف بابو... هسه شراح تسوون؟

... خابرنه ع عمومتنه الي بلفلوجه حجي راضي وشيخ ناصر راح يجون ويشوفون حل...

نيران... استمرينه ع هذا الحال اسبوع ناس طابه وناس طالعه كمت اروح يم بيت عمي واسمع مرت عمي بس تحجي وتسب بالناس...

وعمي كدامهه مثل الارنب حته يخاف يحجي وياهه ..
زين اذا عمي لهدرجه مطيع وسماع حجي ليش مطلگ مرته الاولى وعدهه 6 والله شي غريب...

بيوم من عدهن ظهريه ومانمت كلت خلي اروح يم بيت عمي لان احنه تلفزيونه مايشتغل ومتابعه مسلسل..

دخلت لبيتهم  بيناتنه بس سياج وباب المطبخ مالتهم ماينقفل اني متطفله والله لوتدري ماما جان اشسوت..

جان البيت هدوء محد اكو رحت اريد افتح التلفزيون واسمع صوت عمي ومرته( بدريه) طالع من الغرفه...

تقربت شويه جان صوتهم واضح بحكم محد بالبيت واسمع حديثهم ...

عماد.. اسكتي صرعتي راسي بيت مناحي يردون فصل ملايين لو ابيع كل حلالي مايسد...

لو انطيهم فصليه شعندي وانطي هن بنات جهال لو دمي مهدور...

بدريه.. وكل عقلك تبيع املاكك شكلت لروحك من طكيتهم وبكاعهم مافكرت بحزتهه يامصيبتي شعدنه ونبيع لواخوك الجاي حاد اسنونه علينه..

... يامره ساعه شيطان شمدريني تجي بكلبه ردت بس اخوفهم سوو زلمه براسي وهو طكه ونص..

... احمد ربك لسه ماذبوك بالسجن جان محد طلعك روح دحكلك حل انطيهم فصليه واسكت...

... شنطيهم منيلي اني عشر بنات يولو هن بناتج اثنين جهال...

... عندك ثريه جبيره عمرهه 18 زوجهه انت ابوهه وانت تقرر اذا بعت الاملاك بيش تعيش ..

عماد ماخليك تبيع شبر واحد دحكلك حل لمصيبتك انطيهم بنتك واسكت

... جنج نسيتي فاروق واخوتو والله مايتهاونون بكتلي ومايخلوني امس ثريتهم ...

... انت ابوهه وتقرر وهي اولهه وتاليهه تتزوج وبيت مناحي خير من الله خاف دكول فگر عليهم ...

... باحرمه اسكتي هاي السالفه ماتنحجي عدهه 5 اخوه والله يثرموني ثرم لو مو ابوهم..

... انت لاتحجي هالحزه  بالديوان من تكعد الوادم ويصير الحجي وشفتهم مصرين ع فصل فاجأهم وكدام الشيخ كلهم انطيكم بنتي هم شمدريهم قابل جايين بالكعده ...

... خطيه ثريا هذوله ناس ظلام وخاف ماترتاح وياهم..

.. اول وتالي تزوج لعد خوما يذبوك بالسجن عود وراهه عوفهه عليه اني اروح لبيت ام مناحي واحجي وياهه عندي خاطر يمهه وتزوج حالهه حال البنات ....

عماد.. اي هم صدك هم مايجون للكعده فلاح رايحلهم وما راضين بس هسه اسكتي اذا دحكت حجي بيت مناحي وفصلهم جثير انطيهم ثريا واخلص بروحي...

نيران... افتهمت كل الكلام الي سمعته بنت عمي ثريا يردون ينطوهه فصليه جان بابا قبل يحجينه قصص عليهه ...

بنته قطعه من گلبه وتدرس وشاطره يريد ينطيهه فصليه؟؟

احس النار اشتعلت بيه من راسي لرجليه لازم الگه حل واوصل الحجي لولد عمي...

مدامه يخاف منهم لازم التقي بيهم واحجيلهم على مخطط ابوهم ...

شلون ياربي ساعدني بطريقه اخلص بنت عمي من ابوهه الظالم...

احس جسمي مدخن مجرد ما اتخيل الموقف شلون ينطي گلبه يسوي هيج...

كاعده ابيتنه وراسي يدور من الافكار بيا طريقه اوصل لولد عمي وخاصه فاروق شلون التقي بي...

انتفضت من مكاني واجتني فكره ابالي لعلى وعسى تنفعني وتسهل عليه والتقي بيهم...

يتبببع ... متابعه ممتعه...