رواية ازمة ضمير الفصل السادس 6 - بقلم Rozaya1122

ازمة ضمير ... البارت السادس
«للكاتبه روزايه»

أكابر...
وانتچي اعله الآه
واضحك چذب وتبختر
واكشخ كشخة الصفصاف
بس افياي مايثمر...
....

فلاح... حجه فاروق بكل هدوء والكل تصنتله وعماد منزل راسو مايعرف شيكول بوجود ولدو...

فاروق.. ياجماعه الخير اكو بيكم من يعرفني واكو اول مره يدحك وجهي..

انه فاروق عماد وهذوله اخوتي 4 والكاتل ابوي والمحرض عمي واحنه اجينه هين للكعده انحلهه مو نأزمهه ...

تريدون فصليه لو هدر دم حاجيناكم بمايرضي الله وگنالكم ع الفصل واطلبو ديه شكد ماتريدون...

هاي كلهن ادري بيهن وانتم تدرون كلش زين اساس الخطأ من عدكم...

بس مال توصل المواصيل انطي اختي فصليه لحضرات جنابكم لا هاي ماصايره ولا راحت تصير ...

حاضركم يبلغ غايبكم اني وياكم والمحاكم اكو شهود واكو دوله ومو اول مكاونه بالديره وماتنحل...

مناحي.. ابوك الكاتل واريد دم ابني لو من حرمه لو ادفنو بكاعو...

فاروق.. ابو مزهر شتريدون تعتبرون كلامي اعتبروا تهديد بالي يعجبكم احسبوا وهاي كدام شيوخكم واهلكم...

قسما بذات الله الي يحاول يلفظ اسم اختي ع السانو لهد الديره على راسو وراس اليطلع ورا...

ثاركم وفصلكم تحلو بالمحاكم مدامكم ماتحشمون وكل واحد مسوي نفسو شيخ وماعرف يحل مشكله صارلهه ايام ...

خلو المحاكم تحلهه ابوي الكاتل ابوي يتحمل عواقبهه ما تطلع من عدنه حرمه لا اختي ولا غيرهه الا ع جثتي..

شيخ مناحي... فاروق انت كاعد بديوان هذا حجيك مامقبول بوسط مشايخنه..

فاروق.. ياشيخ ما تعلمني الاصول ولاتعلمني شلون احجي الي يصفكلكم تحسبو زلمه والي يوكف بوجوهكم يصير مايعرف بالديوان...

اعيد على مسامعكم لو تجمعون عشايركم كلهه ماتوكف بوجهي ووجه اخوتي من يوصل حجيكم ع عرضي لا والله اهينو بارضوا ...

... ابوك انطه بنتو واذا ما نحلت الامور هيج ابوك ينكتل واحنه مانريد دم وهاي ماشيه من قديم ينطون حرمه حته يوكف الثار...

... المحاكم موجوده وانتو الي تعديتوا علينه شلتو اسلاحكم وكفتوا بابنه الامور ضدكم بس انت ماجيتوا بالتي هي احسن خلي الدوله تشوف شغلهه...

وبعدين لا ابوي ولا غيرو يقرر مصير اختي بكيفو لاتخلون الحجي ينعاد وهذيج الساعه تصير موخوش..

... ماهيج الحجي فاروق ابوكم كتال ابنه وانريد حگو فصليه لو دمو الفلوس ماترد اعتبار...

... ابنكم اجه لدارنه برجلو واسلاحو بيدو ماجان بيدو غير يدافع عن نفسوا ...

كل هذا عدينا ولارضيتو بفصل ولا تنحل بمايرضي الله بس توصل بيكم تنهون خلافكم ع حساب اعراضنه لهنا وبس...

ماراح ياخذ منو غير الحق العام باعتبار قضيه دفاع عن النفس والخسران انتم ...

... انت هسه هددتنه وكدام الوادم تشهد على كلامك يافاروق وراح يصير دم وثارات ماتوكف

قيس.. من رخصتكم ياشيخ ازيدك ع كلام اخوي امو داعيه علي الي يتگربلنه خلوهه هاي الحجايه باذانكم زين...

انت شيخهم المفروض تهديهم وماترضى بالظلم مو كاعد تحرضهم احنه ماجايين ننصح جايين ننطي كلمتنه بس...

... ماهيج الكلام ياشيخ ناصر نتهدد بديوانه ومن ولدكم ماصارت ولادارت ..

فاروق... اهدد وانفذ اياكم ينفتح كدامي هذا الموضوع ولاشيخ ولاعشيره تكدر توكفني ...

كدامكم الفصل والمحاكم ماعجبكم روحوا لدوله تحلهه غير هالكلام ماعندي..

فلاح... كلام فاروق مثل الصاعقه ونزلت ع مسامعنه وع بيت مناحي ...

خسروا الجهتين والقانون يكول هو المتعدي وهذا لصالح عماد بحكم دفاع عن النفس...

توتر النقاش وكل واحد ينطي رأيو وصارت مذابح بالكلام فاروق نهض من مكانو وخله السن تنخلس ..

حجي ناصر صار بين موقفين عملة عماد وشلون انطه بنتو فصليه وفشلتو كدام فاروق لان لح علي يجي للمشيه...

طلعنه من بيت مناحي وانه اركض ورا فاروق واخوتو بس اعصار وهاج ما الحك بيهم ...

اشرلهم شيخ ناصر الكلام بالبيت موكدام الناس ونصير علج بحلوك الوادم ..

انه ماحسبت حساب لهيج كلت فاروق يكوم ينهد بابو ويضربو ويتكاون بالديوان واثنينهم يخسرون وتنزل هيبتهم...

بس كلام فاروق بحكمه وكانو متعلم ع كعدات العشاير خلانه نكسب السالفه لصالحنه وبيت مناحي هم يتوسلون تعالو نحلهه...

صعدنه بالسيارات ورجعنه للبيت وعماد وياي وهم يحجون ويه شيخ ناصر بس يردون يسكتون قيس واخوته فاروق جان ساكت ...
....

ثريا... ما اعرف شصابني من دخل ابوي حسيت بشعور موطبيعي...

حسيته راح ياخذني من اخوتي عيونو بيهه شر ابد مو ابوي هذا هذا وحش كدامي ...

ما اعرف شسوي بدون وعي تلقائيا احتميت بفاروق ما اريد ابوي ياخذني بحضنو احسه راح يأذيني..

شويه واجه حجي نوري وتجمعت الزلم وكالو يله انروح انه ما اريد ابقه هنا اريد اروح ويه اخوتي...

كلت لفاروق ماريد اظل رجعوني للبيت ...
... ثريا ساعه ونرجع ظلي هنا كوه لازم اعصابي ع ابوج..
... روحو بس لاتتاخرون انتظركم...

بس طلعوا واحس واحد وخنكني من رگبتي اريد اركض وراهم واخبيهم واحد واحد من شر هاي الناس...

اخوتي ياناس كافين شرهم مايوم طلع صوتهم ويه غريب ولا تكاونو حايرين بس بلگمه العيش...

حته من دحكو بنات عمي وضعهم تغير لان جابوهه ضيم بضيم لاحبو ولا انحبو ...

كل همهم يحافظون على ثريا ويدفعون ايجار ويوفرون مصرف اخوتي ماارتاحو من يوم الي كسرتنه امي...

كاعده واهز برجلي وبنات عمي مدري وين راحن غريبه بوسط دارج ياحليمه وينج وتجين ادحكين احبابج شمر عليهم جور...

اسمع صوت نيران بس ما اميز شتحجي وامهه تسكت بيهه الساعه ماتمشي وعبالك دهر...

شويه واجن بنات عمي وامهم يسولفن ويضحكن الا نيران جانت ضايجه وخدهه احمر ومطبوع علي اصابع مبين واضح لان بشرتهه بيضه...

انطلقت رؤى بالكلام وتسالني عن الدراسه واخوتي وين وصلو واني مجرد مجيب الي كل فكري يم احبابي...

ادحك بنيران امهه شبعتهه تكرص وهي تحوص مدري شعدهه كلشي غريب هين ...

اجن اخواتي من ابوي اسمهن رفل ورسل بصف سادس تقريبا مادارسات مبطلات ...

رؤى ... اي حبيبه ثريا فرحنه حيل بجيتج والله دائما افكر بيج لان ما ملتقين..

ثريا.. اني هم فرحت .
... شلون عايشه وحدج ومدبره العيشه ويه اخوتج..
...الحمدلله مرتاحه واني هسه فتره مراجعه وكاعده بالبيت...
.. حبيبتي ربي يوفقج ويعلي شأنج وتفرحين اخوتج اني اتمنى عندي اخوان بس عمر وصغيرون
... شكرا يوم الالج...

عزا بعيني كمت اخيط واخربط شنو يوم الالج هي شكالت البنيه همزين ماسمعتني ما ادري شبيه الساني تخيط وكولت اوس تخوطين بصف الاستكان..

رؤى... اكول ثريا ليش ماتجون تعيشون هنا اشو البيت كولش جبير ليش ساكنين وحدكم وهو عمو عماد خير من الله ...

.. هااا ما ادري بس احنه هناك مرتاحين..
... اخوتج دارسين لولا؟؟
... فاروق انقبل هندسه وما داوم. والبقيه لسادس وبطلوا...
... ياعيوني ليش ماكمل يله ان شاء الله يعوضه ..

عيني ع الساعه شوكت يجون كمت افقد اعصابي من التوتر والقلق اعرف فاروق ماراح يسكت ابد ومهما يصير...

شويه ونسمع صوت هوسه برا معناتهه اجو بس صوت اخوتي واضح حيل اخترق مسامعي صوت اوس وهو يگول...

ياعيبه العيبه حرامات تسمه ابونه يانذل تفووو على هيج زلم عارات...

... عزا العزاني صوتهم حيل واضح كلنه كمنه اندحك من الجام وانخاف نبين ومرت عمي تصيح سوده بوجهج بيان...

ابوي وعمي وزلم غربه وحجي راضي واخوتي كلهه مجتمعه برا وناس تحجي وناس تصيح من الهوسه ما اميز شكو ...

بنات عمي صرعن راسي من كدما يسألن شكو وشكو وامهن مبينه مسالمه وماتريد مشاكل...

حجي نوري يجر باخوتي يريدهم يدخلون جوا بس ماجانو يسمعون شي ..

كدام البيت ساحه الي هي نص من البستان وكلهه واكفه بيهه وناس متكاونه وناس تهدي باخوتي ..

بهالحظه دحكت ادهم هجم على ابوي ولزمو من ياختو وضرب ظهرو بجذع النخله الي بالباب وعبالك يريد ياخذ روحو ...

يربدون يخلصون ابوي من ادهم مايكدرولو زلم جثيره تسحب بادهم وبس اسمع يكولو والله اذا نطقت اسمهه بعد لا ازوعك حليم حليمه كلو...

اريد اطلع تخبلت ابجي ويسكتن بيه اريد اصيح ع فاروق يحميهم مايتاذون بس زلم جثيره والصوت عالي خلاني افقد اعصابي...

فكوا ادهم من ابوي وبعدو وعماد يهد ويغلط على ادهم والوادم تتفرج الولد يكتلون ابوهم شنو من مصيبه هاي..

اثر الصوت وعماد مدري شيحجي واخوتي اعرفهم من يعصبون لازم ياخذون حگهم ...

فلاح... ماحسبنه احساب لحكمه فاروق وعبالي يتكاون بنص الديوان بس جاب ابو لعتبه دارو وهد اشبالو علي..

كل واحد بيهم كتله من نار بس انريد نحجزهم صرنه فرجه للوادم وكلهه ادحك علينه ...

عماد انهان بكاعو وبوسط عمامو من ولدو فقد اعصابو صار يغلط ويسب بولدو ويتوعد الهم غصب عنهم ياخذ ثريا ...

عماد... يولو اذا ما اطيح حظكم وادفعكم ثمن السويتو..

قيس.. اذا انت زلمه جرب توصل حدنه والله لادفنك انت وعدل لاعبالك ابونه انت انسان ميت بالنسبه النه..

عماد... ثريا اخذهه منكم وغصب عن شواربكم واريد اشوف يازلمه منكم يطلع وراهه...

ايوب هجم على ابو وضربو بوكس خلا يوكع بالكاع ودنك علي وشالو ورجع ضربو كله ..

يضرب بي وعبالك ملاكم خلا الدم يطافر من وجهو وفاروق ماحرك ساكن ترك اخوتو ياخذون حگهم من ابوهم ..

صوت الزلم وهم يصيحون ابوك يول ابوك هذا بس جان فاقد وعبالك اخذوا شي عزيز منو ...

شيخ ناصر يلوم بفاروق ويكلو امنع اخوتك يبقه ابوكم وسمعته من سمعتكم...

ادخل فاروق وبعد ايوب واشرلهم ياخذون عماد الي تكسر من الضرب وهو رجال جبير ...

ماكو احد غريب عمامنه وخوالنه بس اللوم وكع ع فاروق واخوتو شلون يمدون ايدهم على ابوهم ...

قيس.. لحد يكعد يحجي اصول براسنه وانتم بلاضمير ما يتسمر اب الي جابنه حته يخدعنه ونوكف ويا تالي يبيع اختنه كدام عيونه...

لا والله امو داعيه علي الي يتگربلهه لو مو ابوي لوعشيره بحالهه نوكف بوجهه ...
...

ثريا... مدري ابجي مدري ادعي احتاريت شسوي ابوي المفروض سندنه ويوكفون يحمو هيج تهجموا علي ليش شسوو وشكال وخلاهم يفقدون اعصابهم...

شيخ ناصر وحجي راضي يهدون باخوتي وبس يريدوهم يدخلون الدار وعمي فلاح بس بعدهم ماشافين گلوبهم...

واكفين ويتناقشون وما اشوف غير اثنين ازلام يهجمون على ايوب وهو داير وجهو ويضربو براسو بس صوت الزلم وكلهه تصيح هاها مالحك يضربو لان انتبه ايوب...

جان هذا نصيب فاروق كل ضربه يوجهه الو توكعوا بالكاع اشوف الزلمه مدمه ومحد ادخل شيخ ناصر منعهم...

فاروق مثل الاسد الغضبان ويدافع عن اشبالو شلون انمدت الايد عليهم ليكسرهه اليوم...

وفعلا الزلمه تكسر ووكع بالكاع واخذوا من ايدو بالگوه...

دخلو اخوتي لديوانيه واني اخذ النفس بصعوبه اسمع نيران دكول لامهه انتي السبب كلو منج ماقبلتي احجي...

ماعندي طاقه اسالهه شنو تقصد بس حيلي رايح وخوفي ع اخوتي استحوذ عليه ...

مرت عمي تسوي جاي وبناتهه يمهه يسالن ماما ليش ضربوا ابوهم شلون يصير وهي تصيح بيهم لاتتدخلن ...

صوت الزلم عالي واخوتي اعلى بس اسمع كلمه والله نكتلو والله اندفنو بكاعو...

مرت نص ساعه على نفس الهوسه وبعدين شكم واحد طلع وضلوا شيخ ناصر واخوته وحجي راضي ...

اجه عمي فلاح ووجهه مايبشر بخير وكال تعالي عمي ثريا شيخ ناصر يريدج...

ياربي اليوم جثير عليه ما اكدر بعد اسنين واني مامدحكه غير وجه اخوتي اليوم احس روحي راح اوكع...

دخلت ويه عمي ورجليه وحده تضرب بالثانيه اول ماجتي عيني ع فاروق اعرفو صاير شي ...

تفقدتهم واحد واحد واسالهم خوما تاذيتو نسيت الكاعدين بس اريد اطمن عليهم..

جاوبني فاروق ماكو شي يولي حدري هين اكعدي...

كعدت بصفو واحس اسناني واحد يطخ بالثاني واني بوسط هاي الزلم..

شيخ ناصر... شلونج ياثريا ..
.. زينه ياشيخ..

... ثريا اخوتج اليوم تكاونو ويه ابوج علمودج وانه بحكم معرفتي هيج اب خسيس ما يتامن بي..

كلت لاخوتج يجون يعيشون يم عمهم بس مارضوا انتي شنو رايج تعيشين يم بنات عمج هاي الفتره حته مايظل بالنه عليج ..

... العفو شيخ بس اني ويه اخوتي وين مايرحون ما اعوفهم والي يسوو هو الصح ما اعوفهم...

ابتسم شيخ ناصر... يابويه حگهم يتكاتلون علمودج الف رحمه على روحج حليمه ونعم ماربيتي ...

فاروق.. شيخ ناصر اني رجال كافي شري واخوتي ماعدهم اذيه اجيت انت وطلبت من عدنه نحضر الكعده المفروض عندك علم بالي يصير..

انه ما انحط بهيج موقف كدام شيوخ ووادم اول مره اكعد وياهم تحلهه وتنطيني خبر واذا ماحليتهه اني اتصرف...

كاعي وحصتي واملاك جدي كلهه ترجعلي شوف منو الي ضحك على شوارب الزلم واخذهن ...

ثريا... فاروق يحجي بعصبيه وعمي فلاح مشتغل لوكي ويذم بابوي ماعرفت نيتو شنو ...

اثناء الكلام والنقاش اندفع باب الديوانيه وصوت مرت عمي وهي تصيح لا ولج نيران تعالي...

ما انحس غير نيران واكفه بوسط الديوانيه وبنص هاي الزلم وبضفيرتهه الصفح وايدهه ترجف...

زكح عليهه ابوهه شعندج نيران امشي لدارج مايصير يا بويه...

نيران ...
من شفت العركه وولد عمي ودمهم المحروك وشلون دافعوا عن اختهم ما ادري شصابني...

خفت لا واحد من عدهم يتاذى ابوي وعمي ظلام ومستعدين حته يقتلوهم ...

كله من ماما هي منعتني وماقبلت احجي جان ماصار الي صار وخاصه من اشوف بابا شلون مكار ويلعب ع الجهتين اتخبل ...

رغم مراهقه بس ما اقبل بهيج ظلم اكثر شي ضوجني تصرف بابا وهو يتودد الهم وسوه نفسه الزين وهو نفس عمي مايفرق بشي...

خليت ماما تلتهي واركض افتح باب الديوانيه وادخل عليهم بس صوت ماما وراي وهي تصيح تعالي نيران ...

واكفه بوسط الرياجيل واحس البروده سرت بكل جسمي خوفي من بابا يمنعني احجي بس ضميري يأنبني شلون هيج يسوون بيهم وهم ماعدهم اذيه...

صاح بيه بابا اطلع من الاستقبال بس الضمير الصاحي بداخلي هو الي مخليني صامده وواكفه كدامهم...

نظرات بابا الي وهي تخزرني حته اطلع ماهزت من عندي شعره الي اشوفه كدامي انسان ماكل حق غيره ومشترك بجريمه وفوكاهه يمثل وهو ماكل حقهم...

شيخ ناصر... خير يابنتي عسما شر وانتي داخله بنص الزلم ..
فلاح.. لا شيخ اعذرني متعلمه ع بغداد ماتعرف عاداتنه .. روحي لغرفتج بابا بعدين نحجي موهسه..

نيران.. شيخ اني اريد احجي شي لولد عمي ..

كلهم وجهو نظرهم عليه وبابا بس يصيح عليه اطلع حته جرني من ايدي بس شيخ ناصر وكفه وكاله اتركهه تحجي ...

حسيت بلحظه راح ياخذ روحي بابا من نظراته بس مدري منين جبت القوه وبديت احجي...

فاروق اني سمعت عمي ومرته من زمان يخططون ينطون ثريا فصليه وهي الي حرضته وكالتله انطي ثريا حته ماينطون فصل..

واجيت حجيت لبابا وكال اني راح احلهه ومااعرفكم حته احذركم من عنده وردت احجيلكم بس ماما ماقبلت كالت الزلم يحلوهه...

احجي بسرعه والهث وبابا اتخبل وعيون فاروق توسعت عليه حته خفت من عنده  ...

جان مركز عليه وكانما لوحه فنيه كدامه حته مارمش ابد بس عيونه تحجي الف قصه مركز ع كل حرف احجي..

كملت كلامي كتله فاروق عمي متلاعب بالوصيه مال بيبي هم سمعته يكول هو ورجل عمتي ام سالم مزوريهه لان الكم حصه بالاملاك...

انت الك حصه هوايه والمفروض الوصيه ينطيهه لشيخ ناصر بس متفقين وتالفيهه وما انطوك الحصه ..

حجيت كلامي دفعه وحده وما اعرف شسوي ووين اروح اريد اطلع بس شيخ ناصر خلاني اوكف...

التفتت على بابا كاله صدك هالحجي يافلاح؟؟

..لا شيخنه نيران افتهمت غلط صح سمعت عمهه حجه واجت كالتلي اني ماردت اوصلهه لفاروق حته ماتكبر المشكله ...

رحت حجيت ويه عماد وتكاونت  ويا وكال لا جنت اساير مرتي حته ما ادور مشاكل واني صدكتو وانطاني وعد مايحجي ولا يذكر بنته ما ادري باخوي شيطان...

... وسالفه الوصيه يافلاح؟؟

... هاي مالي علم بيهه هسه سمعتهه التفت عليه وكال بابا نيران غير تحجيلي حته اخبر ولد عمج بس وجهلي خزره قويه...

شيخ ناصر .. فلاح انه راح احلهه وكلشي يرجع لاصحابو وسالم دوا يمي ...

فاروق ماحجه اي شي لا هو ولا اخوته بس شيخ ناصر تناقش ويه بابا وبعدين راحو وبابا سوه نفسه بريء..

بس طلع شيخ ناصر رجع بابا لديوانيه بس جان عصبي حيل ما احس غير يهجم عليه ويرفع ايده حته يضربني واني بوسط ولد عمي وشيخ راضي...

غطيت وجهي بايدي بس اجت عيني على فاروق وهو يلزم ايد بابا ويصير كدامه واني صرت بظهره ...

فلاح... عوف ايدي يافاروق اني ابوهه واريد اربيهه واعلمهه شلون تحجي بكيفهه..

فاروق.. تعرف الي يتمرجل ع حرمه هذا شنو اسمو؟

بنتك ماغلطانه حجت كلمه حق وماراح انسالهه هذا الفضل طول عمري..

ولا انت ياعمي راح انسى وكفتك ادري بيك انت ماراضي بجور ابوي وواكف بجانبنه وان شاء الله انعوضك كل تعبك..

راح ناخذ حگنه وحكك وماننسى مواقفك بس اياك تاذي نيران...

فلاح... يا فاروق فشلان من عدكم مااعرف شكول بس اريد احاسب نيران شلون تضم عليه سالفه الوصيه...

فاروق.. هاي عرفنه هسه والفضل الك ولبنتك ...

ثريا... احس راح يغمى عليه ابوي ينطيني فصليه بعد كل هاي السنين ...

ابوي ماكل حقنه ونيران اعترفت علي ليش ابوهه سكتهه يعني اله ايد بيهه...

تصرف فاروق ذهلني شلون يصدك بعمي فلاح شلون مامن بي ياربي ساعدنه منين اجتنه هاي اخوتي بامانتك...

طلعنه من بيت عمي بعد مالح يريد نتعشه يمه بس اخوتي ماقبلو واني احس روحي متخربطه ...

من طلعنه بالباب فاروق التفت على نيران وهي عيونهه حمر باجيه والخدود حمره ..

اشرلهه براسو تعالي اجته تمشي سريع وتتعثر ابوهه جان واكف يحجي ويه حجي راضي..

فاروق.. اخذي هذا الرقم خلي عندج اذا اذاج ابوج لو عمج ابد لاتتردين اتصلي عليه بسرعه...

نيران.. هزيت راسي الو بموافقه بس جنت حيل خايفه من بابا اكيد راح يضربني ...

ثريا... رجعنه للبيت بس طبينه اوس تكاون ويه فاروق ويكلو يول شلون تامن بعمك نفس السم هو وابونه..

فاروق... حدرو هين واسمعوني زين وصلنه لنقطه النهايه ...

يتببببع....
متابعه ممتعه شاركوني بتواقعتكم ...