رواية ازمة ضمير الفصل الرابع وخمسون 54 - بقلم Rozaya1122

ازمة ضمير ... البارت الثاني والخمسون
«للكاتبه روزايه»

‏ثگيل غياب وجهگ
        يالرحت سگته..
ليل الله إليمر
         بجفاگ ما نمته..
يسالفتي وصفنتي
    وروحي ظلت بيگ ...
        والمخبل جذب ما ينسه سالفته

.....

ايوب.. فحت عيني ما ادحك بس غواش ابيض ويمكن هاي ملائكه الرحمه فوك راسي ...

جسمي خدران واريد احجي ما اكدر بديت اسمع صوت جماعتي وصوت ادهم يرن باذاني وهو يكول يوميه مهبوطين عبالي مات...

فتحت تك عين دحكت اخوتي كلهم وبديت استوعب واتذكر انه وين وشلون اجيت هين...

انه ماعندي عداوه ويا بس مره تعارك ويه صاحبي وفزعتلو وضربتو وظل وين مايدحكني يهدد هالحجي من زمان وراحت السالفه وخلصت ...

بس اليوم جنه كاعدين بالكهوه انه واثنين من جماعتي واجه هاد علينه وبيدو سلاح وغير السجينه وجايبلو اثنين ويا مكذلين...

يافاروق تريدني اسكت كل واحد بينه اكل المقسوم هم عدهم سلاح وانه بطرك الشحاطه ومافادت...

هم تصوبو بالسجينه صاحبي وانه القهرني ياريت العدو كاتلني متكاونين انه ويا وواحد زانك الثاني ونتضارب ...

واجه صديقي العود بيدو سجينه يريد يفزعلي بوكسيات ودفرات والاثول جاب السجينه بخاصرتي ...

فاروق.. ايوب دخيلك والله مابيه حيل خساره جاي تاذوني وماتحسون لو رايح بيهه ...

ايوب.. يا اخي مالي علاقه هي العركه تركض وراي والله كل الي اتعارك ويا مسلح وانه بطرك روحي...

فاروق.. انطيت بي حكم وهسه اخذوهم للسجن وبعدين احاكمهم وهسه تطلع انت العايل بي..

... انه قبل صح كتلتو وكسرت خشمو وراح لايران سوه تجميل واجه وهسه يمكن كسرتو الو بس هو ماقصر زرف خاصرتي خاف بيهه روح ...

ادهم.. حوبتي بيك طلعت من كدما لوعتني يانذل ...

ايوب.. انجب يول لا اكوملك هسه اطيح حظك ..

... هسه راح اجيب ثريا صرعت راسي بين مايطلعون جماعتك..

ثريا.. اجه ادهم اخذني انه والحجيه للمستشفى كلبي مفرفح علي مسويلو عمليه وايدو مكسوره...

لكيتو وحدو بالغرفه حضنتو وابجي عذبتوني يا اخوتي اكوم من هبطه اوكع بالثانيه ...

ايوب.. يولي خنكتيني عليمن تبجين هي سجينه ماماكل سجاجين قبل..

الحجيه.. يا يول يالمزرف شلون بيك..

ايوب.. قدر ولطف نعيمه وشكم يوم واكل غيرهه..

ثريا.. كعدت يمو نسولف واكو ممرضه كلساع تجي حلوه وزغيره وعينهه على ايوب وهي المسؤله عن جرحو..

الحجيه.. يول ايوب هاي الحمامه والله حلوه جنهه تحوم عليك..

... استغفر الله شنو هالحجي غير اول مافتحت عيني اجت كدامي وهمزين ما اقترفت اثم وانه تحت تاثير البنج...

.. خايب اعرفنك ماتلزم روحك اعراض العالم يولي بس البت حلوه..

ثريا.. اجت للغرفه بحجه تقيس الضغط هي وصديقتهه رادت تقيس ضغطو وايوب كالهه عال العال مابيه شي..

ابتسمت ابتسامه حلوه ودنكت بخجل سالتهه الحجيه شسمج يايمه..

... اسمي ساره..
... عاشت الاسامي انتي من هين من بغداد..
... بلي اني من بغداد ...

... فدوه لهالحلك والبلي مالتج بس يايمه انتي تباتين هين ...
.. اي اليوم خفارتي ..

التفتت الحجيه ع ايوب ورفعتلو حاجبهه ورجعت حجت وياهه البنيه اخذت الجهاز وطلعت والحجيه دكت رجل الا ابات يمك..

ايوب.. يمعوده ام الغيره وين تباتين هسه يجون جماعتي يسوون المستشفى كهوه وين احطج..

... عجل اعوفك وحدك والبنت خفاره يمك..

... ادري خفارتهه عليه لو راح اتسامر وياهه اعراض العالم هاي جده موعندي هاي النعجه اخاف واحد يدحك عليهه...

ثريا.. منو بحالي يا ايوب ويدحكولي ..
الحجيه.. خلي نكوم ترى هاي ثريا تكوم تون ياجده الجربايه ماشلناهه لان انتم مسوين جدول واحد ورا واحد نخرج مكاسير ومزاريف...

ثريا... طلعنه من المستشفى ورجعنه للبيت احس نفسي مخنوكه وراسي يوجعني صايره دمعتي بطرف عيني..

احس الكل متغير عليه حته كمت استثقل نفسي مو هذيج ثريا القديمه مدلله اخوتهه هذا ادهم وقيس بس بوقت مايحتاجوني اسمع اسمي ...

ثاني يوم طلع ايوب وانه رحت للدوام رجعت لكيت اصدقاء ايوب كلهم موجودين وبس الصياح والضحك عود يسولفون ..

للمغرب يله راحو طبيت للمضيف ايوب مدد وبس كطوف الجكاير وكاسرين المخاد والتخم متروس زبل ..

نظفت المضيف ع سريع وياقوت كالت اسوي عشه وامنيه ماتنزل ولا تتعشه ويانه حته مانعرف شتاكل.

اسمع الحجيه اداهر بايوب ع الممرضه وهو يكلهه الامانه لله هي حلوه بس مادك كلبي موبالكيف ياحجيه...

صبيت العشا وكعدنه وايوب اخذتلو العشا للمضيف ماقبل ياكل كال ما اشتهي...

كملت غسل مواعين واخوتي كلهم ع التلفزيون وايوب نايم بعدني اغسل بالمواعين ونزلت امنيه فتحت الثلاجه مادحكتهه شدور عبالي تريد تاكل...

انه جنت ضايجه جثير واحس نفسي مختنكه واحسهه هي غيرت اخوتي عليه كتلهه شدورين؟؟

ردت بصوت خافت وهي راسهه بالثلاجه كالت ما ادور...

... شنو مادورين مو هاي راسج بالثلاجه ترى ماحسبتلج حساب بالعشا عبالي مثل كل يوم...

من حجيت هيج مامتقصده اجرحهه بس قصدي ماظل عشه يعني لازم تسوي جديد ...

سدت باب الثلاجه والتفتت عليه وبيدهه باكيت مال الابر الانسولين شايلتهن جانت ادور على هذني ..

دنكت بالكاع حسيت بحجم كلامي حجت بصوت مكسور كالت لاتخافين ما اخسرج عشا بس ردت الابر مالتي..

افترت رادت تطلع لزمتهه من ايدهه جانت ايدهه ترجف مثل السعفه..

... امنيه شبيج تعالي اكعدي ارتاحي ماقصدت هيج عبالي اسويلج..

امنيه.. ماكدرت احجي دموعي كامت تجري وايدي ترجف ماكمت اسيطر ع اعصابي واني منا متاخره عن موعد الابره...

ماماكله وياهم وعبالهه ثريا اريد عشا دكول مامتقصده بس هي من زمان تسمعني الكلمه ودكول ما متقصده..

ثريا.. امنيه موقصدي والله هدي نفسج انه اسويلج عشا..
... لا ماريد شكرا اخذت باكيت الابر وطلعت ..

ثريا.. عيني عليهه طلعت من المطبخ وادهم جان كاعد ويدحك عليهه وما نحسهه غير توكع يم الدرج..

ركضت عليهه فاقده الوعي وباكيت الابر بيدهه اخذهه ادهم من ايدي وخلا راسهه بحضنه يطبطب ع خدهه وذبينه عليهه مي وما انتبهت...

الله ذب عليه البواجي وعبالك مخليني حجر عاثر بطريق هاي البنيه وكلما اريد اصلح شي يرجع ينكسر..

اخذهه ادهم وام شذره للمستشفى وانه كعدت ع الدرج بجيت لمن كال الله بس احس عيوني ورمن..

كمت للغرفه وانه اشهك شنو هالعقاب ياربي مادحكت الراحه بهاي السنين تعبت جثير ...

لحد ١١ يله رجعو تلكيتهه من الباب سلمت عليهه ردت عليه طبيعيه بس هي تعبانه ..

كالي ايوب ترى حساسه بشكل وسكرهه مامستقر بس كلت تتدلل ومنطيهه اكبر من حجمهه..

الحجيه ماقبلت تصعد لغرفتهه مددت يمنه وادهم كعد بالغرفه سالتو شكال الطبيب..

... كال سكرهه مرتفع وعدهه املاح ع الكلى ولازم فحوصات كامله..

الحجيه.. يمه امينه ليش ماتاكلين ويانه احنه موغربه تربيتي بنصهم وهذا ادهم رباج ع ايدو...

امنيه.. ما اشتهي اكل ..

ثريا.. شلون ماتشتهين ابو السكر يصير ياكل جثير فلت الساني الاكشر وخزرني ادهم وهي دنكت...

الحجيه... امينه يبنيتي الانسان مايملك غير صحتو ديربالج ع نفسج ومن تنقهرين لاتظلين ساكته تعالي وتعاركي ..

ثريا.. ماحجت شي عيون ادهم محاوطتهه ويدحك عليهه بلهفه وحب لحدما نعست صعدت لغرفتهه ..

لسه اتذكر هاي الليله شكد بجيت ومانمت حسيت نفسي خسرانه كلشي واخوتي يجي يوم ويعوفوني...

سمعت صوت طكه نص الليل مسحت دموعي وكمت دحكت ايوب يمشي ع العكازات ورايح للمطبخ يشرب مي..

لمحني وصاح ثرياااا كتلو هاا ايوب شعندك كاعد..

... يولي الالم موتني خاصرتي ذبحتني ماعندج شي شياتين ..

.. مايصير قبل شوي اخذت علاج كل ٦ ساعات لازم..

.. شعندج كاعد وليش خشمج مورم عليمن تبجين..

.. هو كال هيج وانه بوري وانفتح عيوني مثل الشلال اريد اسكت ما اكدر ابجي واشهك..

تقرب عليه وهو يمشي بصعوبه ولمني لحضنو وكال شبيج ياثريا منو مزعلج..

.. انتم كلكم متغيرين عليه وماتحبوني صح اطلكت انه بس مومعناتهه تتغيرون عليه..

.. تعالي خلي نكعد ما اكدر اوكف وبعدين نوحي..

.. كعدنه بالمضيف وبديت احجيلو انه صدك مثل ماتسميني نعجه كل حجايه وتصرف بدون ما افكر يبدر مني وياذي المقابل..

ايوب انه موحقيره واحب البنات بس صرت اغار من عدهن لان كلكم مهتمين بيهن ومحد بحالي..

ايوب.. يابعد ابوي انتي تبجين عليمن؟؟

انتي ثريا موعزيزه واحد عزيزه 5 زلم يولي انتي محد يوصل لغلاتج امنيه

ونيران مثل اخواتنه وواجبنه ندافعلهن لاتعتقدين احنه نفضلهن عليج بس ياثريا يابنتي مثل ما اكلج انتي ثوله ادوسين بالبطن ودكولين شمسويه...

بس قارني نفسج بيهن انتي عندج ٥ اخوه يحبوج ويدافعولج وهن ماعدهن بس احنه والله يعني تخيلي اذا تحسسن من عدنه يكدرن يجن يعاتبنه مثلج..

ابد لا تقارنين نفسج بيهن انتي معزتج شي ثاني عندي وعند اخوتج انتي صايره حساسه زياده عن اللزوم ...

ترى كلشي تغير فاروق مومثل قبل لان حزنو بكلبو وقيس انتي تعرفي وادهم كدامج يعني ياثريا كل واحد همو شكل بس مومعناتهه مايحبوج..

ثريا.. انت تحب امنيه اكثر من عندي ومهتم بيهه جثير ..

... ياثريا امنيه مريضه ابو السكر هم دكولين علي عايش طبيعي وياريت سكرهه مستقر يصعد وينزل ع ساعه يصير بيهه عجز من قهره من القهرات..

موكلشي النه هم شويه انطي من نفسج واتحمليهه ترى انتي الجبيره وهي صغيره ويتيمه صاير راسج يابس..

صرفت حجي جثير ومامتعود احجي بهدوء وحكم ومواعظ هسه ابلش بيج اطيح حظج كاعده تنوحين بنصاص الليالي عليمن ...

ثريا.. يعني هسه انت ماضايج من عندي لان تعاركنه انه وامنيه...

.. خلي ازيدج معلومه انه ماعرفت العركه بالضبط شنو بس لكيت امنيه متخربطه وعبالي ع ادهم بس نيران كالت تلاغت ويه ثريا واجيت حاجيتج ..

شو جنت اطيح حظج ماتزعلين هسه صايره ماتتحملين حبابه انه الساني ما اكدر الزمو ...

ثريا.. ظليت اسولف ويه ايوب واول مره نسهر اني ويا وتغير مسار الحديث وراح للانبار وهذيج الليله المشوؤمه ...

ايوب.. يجوز دكولين عليه مخبل بس والله ماجاي انساهه صار سنين مرت وصورتهه ماراحت عن بالي ...

اريد ارتبط واتزوج واكون عائله بس ياثريا اريد احب من كل كلبي وانه احس كلبي موالي شكد صادفني بنات وحلوات وبنات عوائل وضغطت ع نفسي بسبيل احب وماكدرت...

تتذكرين البنيه الي اجت سالت عليه بوقتهه ورحت وياهه هاي صديقه امنيه لحد الان تسال عليه وحبتني شكد حاولت افكر بيهه وانطي لنفسي فرصه وما توفقت...

... اتذكرهه جانت ادحك عليك بطريقه غريبه هي شرايده بوقتهه..

... امنيه واكعه بالدوام وجانت ماعدهه فلوس واجت عليه علمود اخذهه للطبيب وبيومهه رحت لكيت بنت نيران ميته قبل ساعه...

... بس يا ايوب انت ورؤى ماجانت عدكم علاقه وحته احنه مامنتبهين عليكم ..

... هو انه وين شبعت من عدهه جانت تشرد من عندي وما تواجهني ابد شكد لزمتهن وحاجيتهه وتخاف من ابوهه..

ادري بيهه تحبني ادحك نظراتهه وبعدين لكيت مذكراتهه ظلت غصه بكلبي ما اكدر اتجاوزهه..

شكد متونس بحياتي واطلع واطب وونسه وفلوس بس يجي الليل يتراكم كلشي عندي..

كل ليله عندي مثل الفضاء المظلم احوم بي بس ادور هذيج النجمه الي نورت حياتي بيوم وانطفت...

ثريا.. ايوب كلكم تعانون بس انت اكثر واحد حاكم ع نفسك وقافل ع كلبك ومامجرب حته تحب...

... الله كريم مايظل شي ع حالو ..
.. هاجت كل مواجعو بهاي الليله وكانو يدحك رؤى كدامو ايوب مولان اخوي بس اكثر واحد وفي بيهم هو ...

غلف نفسو بحب رؤى وامتنع عن اي كلمه حب وغزل يلفظهه السانو ...

كمت لفراشي كلبت بالتليفون شويه وغفيت ساعه وكعدت تريكت ورحت للدوام ..

اكو دكتور ويانه جبير وموصي وحده تجي تحاجيني ومن رفضت كالتلي يله يمعوده هو انتي مطلكه وجبيره ...

خاف جنت عايزه قهر كعدت بغرفه الاستراحه وابجي شنو من اختبار صعب ياربي...

طلعت من الدوام وكلت بطريقي امر ع الروضه لان طلعت ب١١ مالي خلك وعموري ب١٢ يجي الخط..

طبيت للاداره اسال علي ورحبت بيه المديره صدك بعدهه صغيره امهه اساسا متقاعده وفاتحه الروضه وكل الاعمال موكلتهن لبتهه بعمري تقريبا..

كعدت تحجيلي عن عمر وشلون متوحش وماكو طفل ماكاتلو شرحتلهه وضعوا وفهمتهه..

المديره.. صحيح مره دزيت علي للادراه وكعدت احجي ويا وكتله جيب امك كال ماما متوفيه..

اذاني بهاي الكلمه لان من كالهه مكسور وكال بس عندي عمتي وجده نعيمه وجده بشيره ونيران وامنيه اجيبهم..

... ههه اي عددلج العائله كلهه بس هو يخاف من ابو انتي بس كليلو اخابر ابوك يسكت..

... والله دكتوره الف مره كتلو واسوي نفسي بالجذب اتصل ع ابو وهو يضحك يكلي بابا مايجاوب لان هسه بالمحكمه ...

اكبر من عمره وسوالفه ماينمل منهه بس هو وكيح قبل شكم يوم رحت لكيتو صاير هو المعلم ومكعد المعلمه بالاخير ويشرح ويحجيلهم قصه النبي موسى...

وذاك الحجي والكلام والله كلنه وكفنه صفكنالو كتلو من علمك هاي القصه كال عمي ايوب يوميه يقرالي قصه..

ثريا.. هو ذكي بس وكح والله شكد نعلم بي ..
... تعالي وياي دكتوره شوفي يلعب بالساحه..

... طلعت وياهه نمشي ونسولف واندحك لمه بالساحه والجهال متكومه ركضت وحده من المعلمات وجان تشيل عمر عن طفل ويا امرعدو تمرعد..

دحكني ولاخاف خزرتو مايفيد تريد تسكتو المديره انهد عبالك السان محامي..

يكل للمديره هذا مامربى يسب امي سوده عليه بس كال امي بجه ولا جنه ذاك الاسد الكتل الجهال..

اخذتو المديره لحضنهه ودكلو هسه اخابر اهلو وهو يمسح بدموعو ويكلهه والله ادفنو اذا جاب امي...

اخذتو لحضني وطلعنه وطول الطريق اسكت بي واشتريتلو يله شويه غير مزاجو..

طبينه للبيت بوجهه لايوب يكعد يحجيلو واسمعو يكل لايوب يله غنيلي ...

وايوب يغنيلو صغير جنت وانته صغيرون
حبنه انعرف من نظرات العيون ... كالو ترى ذوله يحبون
من الصغر لمن يكبرون ... مثل نجمه والكمر كبر حبنه وازدهر لعيونك حبيبي...

طب فاروق كال شبي عمر خابروني من الروضه؟؟
... مريت علي ولكيتو متكاون ويه واحد ...

صاحو فاروق وكعد يحجي لابو ويكلو تقبل يغلط ع ماما؟؟ والله خليت دمو طلع من خشمو ولوما اجت المعلمه ولا اعوفو..

فاروق.. عمر حبيبي لومانت عايل بي ماغلط انت اعرفك ماتكعد راحه..

.. والله ماحجيت وياا هو يغار من عندي ابو دكتور وامو دكتوره ويكلي هذا الجاكيت مالتك ب٥ الالف وجاكيتي ب٢٠ الف..

كتلو هذا الجاكيت عمي ادهم جابو من اربيل وحتلو رخيص بس هو هديه...

وذاك جمع الطلاب ويصيح عمر ابو ٥ الالف ..

ادهم جان واكف يسمعو كالو تدري ياعمر اشتريتو الك هو والجنطه ب٤٠ خلي يولي يغار من عندك..

ومدام هيج زعلان ع الجاكيت هسه اخذك للمنصور واشتري الي يعجبك ..

عمر.. تؤؤؤ ماريد بس اريد اكتلو ما ارتاح كلبي..

فاروق.. اليوم انه وياك نطلع وعمتك ثريا خطيه مامطلعيهه ويانه شدكول..

عمر.. اي نطلع بس العشه ع عمتي مستلمه راتب انه دحكتهن هلكد فلوس..

... بدلنه ع سريع والطريق كلو نتشاقه ونضحك انه وعمر نزلنه افترينه وهاي اول مره نطلع ويه فاروق بس علمود عمر لان بجه اليوم..

جنه واكفين باب السياره ننتظر فاروق يحجي ويه واحد وعمر يكلي عمه تدرين المعلمه شدكول؟؟

دكل للطلاب ماكو ابو عمر قاضي هو بالشارع يمشي ويحكم بس ماعرف شنو شتقصد عمه؟؟؟

... شلك بهاي السالفه هاي المعلمه قصدهه ابوك قاضي ...

بعدنه واكفين واجت بنيه بلحظه كلشي بيه ارتخى واحس نفسي مثل العاصفه واجتاحتني...

دخيلك يا الهي معقوله الي ادحكو عيوني وكفت بصفنه وعينهه يمنى ويسرى ومرتبكه جثير وخايفه..

نسخه من شذره للحظه لو ماشذره ميته اكول هي حته عمر صافن عليهه ويرجع يدحك بوجهي...

حته نفس عمرهه خالق من الشبه اربعين اجه فاروق واحنه صافنين عليهه اشرتلو فاروق دحك ع هاي البنيه...

فاروق بيدو سويج السياره وموبايلو وواكف يم باب السياره والبنيه التفتت ع فاروق وكانو الكدامنه شذره...

انتبهت ع فاروق مانزل عينو من عدهه والبنيه تبجي وتفرك باديهه اشرلي اروحلهه ..

تقربت من عدهه وسالتهه محتاجه شي...

يتبببع ... احبكم

فيديو هديه من سارونه الجميله