رواية ازمة ضمير الفصل الثالث وخمسون 53 - بقلم Rozaya1122

ازمة ضمير ... البارت الواحد والخمسون
«للكاتبه روزايه»

‏وانتهت هاي السنه           
وما لگينه اعزاز امس
ناس باگتها  المنيه             
وناس بايگها العرس
...

امنيه... افتح بعيوني واشوف نيران كدامي بس صورتهه تروح وتجي كدامي اريد انطق ما اكدر كوه حجيت بس كتلهه وين ادهم!!

... ماندري يا امنيه قوي حالج انتي مريضه لايصير بيج شي وادهم يزعل عليج..

... جانت كلمات نيران اليه نفس كلاماتهه السابقه من تواسيني يعني ادهم صاير بي شي ...

كدرت انتبه وماقبلت اظل بالمستشفى الرجال ابو الحمايه نصيحلو عمو حسن هو ويانه رجعنه للبيت ..

بعده صوت ثريا وصريخهه يرج البيت اباوعلهه مخليه راسهه ع الحايط وهالكه نفسهه وداكه ع خدودهه ...

كعدت بصف الحجيه ابجي ما اعرف وين ادهم بس الي عرفنا انفجار بالسيطره مالته ويكولون مالاكين حته جثث صايره العالم لحم...

الحجيه.. كافي ياثريا لاتفاولين ع اخوج ..
... جده لاتواسينه سمعتي اوس شكال السياره مستهدفه ادهم والعبوه بسيارتو ..

الحجيه.. يارب الطف بحالنه كافي مواجيع وضيم مو كلوبنه خلصت من الموت يوميه انودع واحد ..

امنيه.. لادكولين مات مامات ادهم هسه يجي ...

ثريا.. اسنين صارلو يدور عليج ويتوسل بيج وانتي ذليتي وخليتي يدعي ع نفسو بالموت بسببج ارتاحيتي هسه ..

امنيه.. انتي اخر وحده تحجين تسكتين لا اطلع قهر كلبي بيج الج عين وتحجين كل همج اخوتج اخوتج ماعندي ضمير ولاعندج شي بالدنيا بس راحه اخوج...

والباقي عندج بفلسين تركضين ورا مصلحتج وطبعج الغدر انتي وحده عديمه الضمير انانيه تحبين نفسج واخوتج دمرتيني الله يدمرج وينتقم من عندج الله لايسامحج ...

بعتي مسكنه بروس اخوتج وكدام الحجيه وطلعتي نفسج مسحوره مووو اذكرج ثريا بحقارتج السويتهه قبل السحر قبل خطبه ادهم لو صعبه عليج ...

نيران.. موهيج امنيه لاتنفعلين وانتي ثريا اسكتي رجاءا انتي مواحرص منهه ع حبهه ولا متاذيه بكدهه ادهم اخوج وبنفس الوقت حبيبهه اذا ماعندج حجايه تحجيهه اسكتي..

ثريا.. شكد مدحكه عكارب بس مثلجن ماكو تلدغن وتضمن راسجن انتي المشهودلج السويتي العجب واختج طلعلهه السان كبل ماتعرف تسولف..

امنيه.. علميني انتي ع السوالف شوفي راح اسكت احتراما للمصيبه الي احنه بيهه ...

الحجيه.. طاحظج ياثريا وطاحظ كبرتج جايبه الاهانه لنفسج يولي شتريدين من البنات مو دمرتوهن كافي اخوج بين الحياة والموت ومحد يعرف شي عنو وانتي حايره بسخافتج...

ثريا.. ماعندي واهس اجاوبهن لذلك سكتت وانتظر واحد من اخوتي يجي ادك عليهم مايجاوبون ...

دكيت ع فاروق زكح بيه وكال بعد لاتتصلين ماندري شي عنو بس سيارتو رماد صايره...

لحد ٩ بليل واحنه ع فد بجيه اجه قيس واوس تلكيتهم بالبواجي واسال علي..

قيس.. دخيل الله شكد تنوحين زين ومتصوب برجلو بس سيارتو وهو جان بعيد عنهه بس راحو بيهه ٥ مدنيين..

ثريا.. اخذنه نفس وشكرنه الله ع سلامتو لثاني يوم اجه ايوب يريد يبدل ويرجع للمستشفى جنت واكفه بلمطبخ ما احس غير ايوب يلزمني من زندي بقوه...

ايوب.. اسمعي يولي وحق الله اطيح حظج اذا سمعتج محاجيه امنيه بحرف احطترمي نفسج واسكتي فوكاهه ابدال ما تعتذرين منهه مطلعه السانج متر...

... وشحاجيتهه انه هي انهدت بيه ماتستحي والسانهه طويل..

... شد ع ايدي اكثر وكال سدي حلكج لاتخليني اتجاوز عليج صايره رعنه وماتعرفين تسولفين ...

بسرعه بجيت وهو طلع  حته اخوتي انكلبو ضدي والكل صار يدافعلهن ...

ظل ادهم يومين وطلع للبيت وبيتنه مافرغ من الخطار عدهم معارف جثير وخاصه يجون ع فاروق...

امنيه... اليوم يطلع ادهم كوه ماسكه اعصابي من ثريا مستفزه وحته نظرتهه مدري شلونهه...

من جابو بلمضيف ويمه جماعتو نزلت من الدرج شفت ثريا وياقوت بالمطبخ ماحاجيتهن بس سالت ام شذره كالت راحو وحده نايم...

فتحت الباب ع كيف وكلبي يدك سريع عبالك بموعد غرامي بس ردت اتحمدله لا اكثر خاف يكول امنيه حقوده ويطلعوني بالصوره الموزينه...

جان نايم ع ظهرو ومخلي ايدو ع وجهو رجلو مرفوعه وملفوفه الاصابه بيهه..

وكفت يم راسه ماجان حاس عليه لان غافي ماشفت عيونه ردت اطلع بس صوت عمر بالحديقه يلعب ويتعارك خلا يفز...

بس شال ايده عن عينه صرت كدامه بلاول رمش اكثر من مره وبعدين ظل صافن بوجهي..

... الحمدلله ع السلامه ماتشوف شر..
.. الله يسلمج ..

... ماكدرت اظل اكثر وماعندي شي احجي بسرعه التفتت اريد اطلع بس لزمني من ايدي انداريت علي كتله رايد شي...

... اااي ساعديني اكعد ..
... سندته شويه الجهه اليمنى عنده متاذيه كعدته وخليت المخاد ورا ظهره وهو بعده لازم ايدي...

ادهم.. اكعدي اريد احجي وياج..
... شتريد لاتعتقد من اجيت اتحمدلك ع سلامه معناتهه بعدني احملك مشاعر بس تبقه ابن عمي..

... حجاهه بغضب وكال اكعدي كتلج وبطلي عناد
... كعدت ع حافه الجربايه بس قريبه علي حيل مرتبكه وافرك بايدي السحبتهه من بين ادي...

ادهم.. امنيه موكافي عذاب يولي ردت اموت بيني وبين الموت شعره ومامحصلج بعدني امنيه كافي اظل طول العمر اعتذرلج ..

اذيتج وجرحتج بس والله ماحاس بشي والله عقلي ماخانج لحظه بس گلبي الغدر بيه موبس بيج..

امنيه.. ادهم كلشي انكسر مايتصلح وحتلو يتصلح يبقه اثره انت موكسرتني هشمتني وشما تكعد تلم بالفتات ماراح تجمعهن واحتمال هاي الفتات الصغيره تجرحك وانت تحاول تجمع بيهم...

كلشي مقدر وكلشي قسمه ونصيب واني مونصيبك انت نصيبك راح لغيري ما اكدر انسه ابد ..

ادهم... الي تريدي منو شنو يولي ماحبيت غيرج والله ولاراح احب بكدج ماعندي احد بالدنيا بس انتي واخوتي امنيه اعتذاري موكافي الج بس صدكي كل الكلمات ضايعه بحلكي وماعرف شحجي...

امنيه.. لاتحجي لان بس اتعب نفسك انت ابن عمي وتبقه عزيز عليه بس لاتفكر بيوم اصيرلك مره وياريت بس تتشافه اطلكني  اريد تطلع برضه ما اريد تصير مشكله ...

ادهم.. استغفر الله سالفه الطلاك انسيهه لوتموتين مااطلك بس الموت يخلصج من عندي من اموت عود اتحرري طلاك ما اطلك..

... دائما اناني تريد كلشي الك والمقابل طبه مرض مره ثانيه لاتطلب من عندي اكعد واسمع سوالفك واني اسف بدون فايده...

كمت من يمه بس ماخلاني سحبني حيل من ايدي طخيت بقوه بصدره واجت ايدي ع جهه صدره المجروحه حسيته تالم بس ماحجه ...

عيونه متلاقيه بعد فراق طويل ودكات كلوبنه مثل الانغام الموسيقيه تعزف سوه اختلطت دكات كلبي ويه كلبه...

ما اعرف شصار بيه واني اشوف هاي العيون من صغري وهاي عيونه ورموشه سالبه كل ارادتي موبس احبهن لا اسرح بيهن لعالم ثاني ...

ايده الماسكه ايدي ارتخت وحاوطت خصري رغم المه بس مقاوم وناسي جرحه...

بلحظه خطف من عندي بوسه من شفايفي جانت مثل الصعقه الكهربائيه لمريض يحاولون يستيعدو للحياة ورجع من جديد...

ابتعدت عنه بس ماكدرت اسحب نفسي لان ركز اكثر وايده صعدت من خصري لركبتي ولزمني بقوه وباسني بوسه طويله قويه ...

ضربته على كتفه الصاحي اريد يتركني بس مثل الصمغ ما اكدر اتخلص من عنده ..

دكات كلبي فضحتني واحس اذاني بدت توش وجسمي ارتخى وذبيت كل ثكلي علي ...

انفتح الباب وصوت ايوب يصيح لا اله الا الله ...

ابتعدت ع السريع وهو فلت ايده ما اكدر اظل واكفه اريد اطلع بس ايوب خبيث كطع الطريق عليه...

ايوب.. لا دخول الحمام مش زي خروكو وين ست امنيه الزعلانه المغدوره المخذوله ووووين!!!! حجاهه بتشدد..

امنيه.. دنكت راسي كتله اريد اروح وخر ايوب..

ايوب.. وين موليه دحكي جتفو ينزف روحي صلحي مخلفاتج وفواينج يله واعتبرو ايوب مادحك شي..

ادهم.. يول ايوب عوفهه تروح راح توكع وتعال ساعدني ايدي تنزف...

ايوب.. منو كالك انه طبيب هي حبيبتك بالصحه روحي امنيه عالجي جرحو وبدربج اطمني منا منا..

امنيه... احس الحراره صعدت لراسي ادهم شمر ايوب بالشاحنه اليمه وكاله يول راح تتخربط موهيج تعالي امنيه ...

هز ايده ايوب وطلع واسمعو يكول مشكور ياربي مخليني بس اصيد بالوادم منو يبوس احلى وانه عبدك الضعيف ماجربتهه...

رجعت ع ادهم بعصبيه كتله ارتاحيت شيكول عليه ايوب !!!

... شيكول ترى انتي مرتي موحرام وع اساس ايوب اول مره يدحك شو فاضح العائله هو..

امنيه .. ظل انزف لو تجي اختك تعالجك درت وجهي وطلعت سديت الباب وكلبي نغزني ع جرحه ومنظره واني الي ضربته ونزف...

جان لازمه ومدنك راسه وهو متالم ويحجي وياي بالم رجعت فتحت الباب وطبيت لكيته فاتح الشاش وحده ومخلي كلينس علي...

اخذته من ايده وبديت اعقم بي ربكتني نظراته وقربه وانفاسه ايدي اطخ بصدره وكتفه العاري تخلي كل العواصف الي بداخلي تهيج...

اعقم بي وابلع بريكي وهو قرب راسه اكثر ولفحتني انفاسه بركبتي وهمس يم اذني ليش مرتبكه موماتحبيني ؟؟؟

امنيه.. ماجاوبته لان بديت افقد السيطره ع كلشي وايدي رجفت جنت لابسه دشداشه وبيهه دكم من صدرهه مامنتبهه والدكمه مفتوحه ...

اشوف عيونه تصعد وتنزل على صدري جريت ثوبي ليورا وكمت الف بالشاش بسرعه بس اريد اخلص ...

همس بهدوء يم اذني وكال كبرتي و الحبه ماكبر !!!

... خلاني فتحت عيني ع جراته بسرعه لفيته شلون ماجان وكمت وكتله منحرف وطلعت!!!
....

ثريا... اليوم مسوين عشه وطلعنه منا للجيران وكوه الحجيه قنعت البنات ينزلن جوه ويكعدن ويانه ع السفره...

كعدنه كلنه وياقوت بشهرهه الاخير وبينه خوفه من شذره ليل نهار ندعي تطلع سلامات...

عموري كاعد بين ايوب وابو. ومرتجي ع رجل ايوب والخاشوكه مايوصلهه لحلكه يوكعهه ع رجل ايوب وكلساع ويجوي ...

لمينه السفره وكعدنه كلنه وادهم مدد ع التخم ومرتجي ع التخم وماد رجلو ع الطبله...

ايوب.. مدام كاعدين كلنه انريد نتناقش بشروط امنيه...

فاروق.. ياشروط !!
.. شروطهه ال٣ والي كتلهه عليهن ضريبه..

... ابتسم فاروق وكانو افتهم السالفه كال طبعا امنيه مثل ماقبلت شروطج ادفعين الضريبه اذا خليتي بيهن...

امنيه.. شنو الضريبه !!

ايوب.. لا انتي احتفظي بشروطج والضريبه بعدين ..

ادهم.. يول ايوب محد يخلص من السانك !!
... شمسوي انه اريد مصلحتهه ..

الحجيه.. ياجده كطع الاعناق ولاكطع الارزاق لاتكطع رزق واحد يا ايوب...

ايوب.. عجل انه قابل يكطعون هالرزق شوكت مادكليلي!!!

امنيه.. واحد يرفع واحد يكبس خلوني فتت بنص اهدومي من الفشله..

وادهم ماعرف شيجاوب موقفه ضعيف كدامهم والحجيه وايوب ما انطو مجال ....

ع السريع كمت اتعثر بخطواتي لا اكدر ارفع راسي ولا احجي حته نيران ماواجهت قيس وصعدت وياي..

حجيت وياهه شكد بس جانت مصره ع زواجهه لحدما انفعلت وكامت تصيح عليه..

نيران.. احبه قيس موبس احبه هو امي وهو ابوي وكلشي بس اني انسانه عندي مشاعر امنيه اني مو معاقه قيس شاب مامتزوج مايجي يتزوج وحده قبله متزوجه ومطلكه وماكو شي بجسمهه صاحي..

موحقه مويريد جسم ويريد مره يخلف منهه شيلكه بيه جسم مزرف من الكيماوي لو صدر ماعندي وخلفه ماكدر اخلف ..

عوفوني وحدي اعرف راح يتاذى قيس بس احسن مايتاذى طول العمر ويظل حاير خاف يتزوج عليه ويجرحني وخاف وخاف ...

امنيه اني مومثلج كامله من حقي احب واعيش واكون اسره بس مايصير اباوع للعالي واني ما يوم احققهن

امنيه.. هواي بنات مثلج وتزوجن وكملن حياتهن لا تسوين هيج بنفسج انتي ماناقصج شي ...

.. لا تضحكين عليه ناقصني كلشي اني ما اريد عطف احد ولا اريد اسمع كلمه وحده من اي بشر ..

امنيه شوفي حياتج ويه ادهم وابد لاتخليني عائق بطريقج ينساني قيس لان هو كال انساج ...

ثريا... قيس التحق وقبل ليله شكد حجه علي ايوب وكالو حاول ويه نيران بس فات الاوان كالو فاروق ماينفع رجعت خبر لابن خالهه بطلب منهه ما اجبرهه ع شي..

ردنه قيس يعلق يحجي ماكال شي اخذ جنطتو وطلع ونيران نزلت ورا ودعتنه وراحت لبيت جدهه...

دموع اختهه وراهه وحياتهه الي انرسمت بعيد عنه للابد انحرمت من الامومه لان ابن خالهه كالهه ماريد جهال لان عندي ...

امنيه اعتكف بعد اختهه وبس تبجي حته ماتروح للدوام اخذت اجازه وعين ادهم ع الدرج شوكت تنزل...

سمع قيس بزواج نيران ومانكول غير الله المعين ماتفرق ردة فعلو عن السابق وهاي المره الخساره للابد وبعد نيران مايدحكهه ...

بيوم نايمين واجه اوس يدك بالباب كال ياقوت عدهه ولاده اكلت شهرهه كله ركضنه بيهه للمستشفى والقلق والتفكير موتنه ..

انعاد علينه يوم شذره واحس فاروق هذا اليوم هيج كل مواجعو...

جابت ياقوت بنيه وسموهه شمس وعمر مكابلهه وكاعد ساعه يبوسهه وساعه نلكا نايم ع بطنو وصافن عليهه لويسد خشمهه ونلحكو لاتموت...

وكف بنص الديوانيه ويصيح بابا اريد وحده مثل شمس اريد اخت ...

فاروق.. منين اجيبلك اخت يوميه جايني بسالفه جديده..

.. بابا اتزوج المديره مالتنه ..
.. عمر راح اكوملك ..

الحجيه.. منيلك هالحجي ياجده..
... جده انه اروح لادراه وسمعتهه دكول لو يخطبني فاروق اقبل...

فاروق.. خوش مديره هاي يول ياب ايوب روح انقلو لغير روضه اهليه ..

ايوب.. خاف اتجلب بيه المديره جنهه تصيد زلم..

فاروق.. اكثر من مره حجه عمر هيج الا سامعهه انقلو وخلصنه..

ثريا.. رحت للمطبخ ارتبو قبل لا انام واتاكد من الطباخ واسمع ايوب يصفك هو وعمر بالمضيف ويغني مر ياحبيبي اشرب جاي..

رحت ع هوستهم والكاهم مسوين المضيف ساحه مصارعه والمخده مفلشه وعمر يكمز ع التخم وايوب يصفكلو...

ثريا.. ايوب يمعود انريد انام شنو هالهوسه..
.. ماتنخمدين منو لازمج سدي الباب ماينسمع الصوت...

... الله عليك منو يعزل هاي الهوسه؟؟ كوم عمر نام وراك دوام..

.. انام يم عمي ايوب وما اداوم باجر اروح ويه عمي ادهم  للعرس مال صديقو...

... كلت لابوك يجوز مايقبل ..
... اي كتلو عمه روحي نامي وراج دوام...

... انه اعلمك ابو السان تجي تريد اقريك خلي ايوب يفيدك..

عفتو مهوس ورحت نمت وراي دوام لازم اكعد من الصبح ...

ثاني يوم الظهر هستوني راجعه من الدوام واخوتي كلهم بالدوام واندك الباب...

صحت منو اجاني صوت شاب كال اختي كلي للولد ايوب متصوب بالمستشفى ولازم يجون...

يتبببببع.... احبكم