رواية ازمة ضمير الفصل الثالث 3 - بقلم Rozaya1122

ازمة ضمير ... البارت الثالث
«للكاتبه روزايه»

جبناها طرب معدان
ما ندري بزوايه الروح...
وين مجودره الوجعه..
....

توالت الاشهر بتفوق وكل اخواني ينجحون بدرجات لاتقل عن 95 بس فاروق وقيس تعبوا جثير مرات قيس حته مايكدر يتحرك من ظهرو من العماله...

المدير ساعدهم وينطيهم اجازه بس الشغل متعب وحملوا مسوؤليه اكبر من عمرهم...

يجي يلگح (يشمر) نفسو تعبان وتروح علي المدرسه اذا الدوام ظهري يطلعون الصبح واذا صباحي يطلعون ورا المدرسه ..

كل هذا وماهملوا دراستهم بس قيس تعبان حيل ينقهر على دراستو لان شاطر وماجاي يلحك للدروس ...

اجت فتره المراجعه مال فاروق وكعد بلبيت ابدال مايراجع صار يوميه يطلع للعماله ومايلحك يشوف الكتاب ...

ابد ماكعد مثل الطلاب وراجع يمكن لو ساعتين لو 3 يقره بيهن والباقي يركض بي للشغل الحمل زاد وكلنه كبرنه...

انتهت السنه الدراسيه ونجحت بتفوق لصف السادس الابتدائي واخوتي كلهم نجحوا بتفوق وكرموهم كلهم وبدت امتحانات فاروق...

جان من يروح للامتحان افرش السجاده واكعد اصلي الو حته الله يوفقو وينجح جان من يرجع من الامتحان اتلكا بالباب يدنك يحبني ...

ويكلي من ادحك لوجهج الحلو كلشي يصير عندي حلو هاي كلمات فاروق الي يوميه اسمعهه ...

خلص امتحانات وينتظر النتيجه وحالنه ماكاعد يتحسن ابوي وامي مايدرون بينه وين مرات عماتي يمرن علينه بس فاروق يطردهن وبعد ما اجن...

لان هن نفس الشي هم داعن بالورث ومحد حجت كلمه حق ومحد من عدهن وكفت بوجه ابوي وكالتلو لا تطردهم ...

الجيران كلهه تتجنبنه لان بس شباب وكاعدين ابيت وحدهم ماخلوا شغله ما اشتغلوهه ...

يدفعون عربانه وباعوا علاليك بالسوك عماله كلشي اشتغلوا بسبيل لگمه العيش...

اجه موعد النتائج مال فاروق وبيومهه راح قيس يجيبهه لان هو بالشغل واحنه نترقب جيتو...

اجه قيس وكلنه تلگينا بالباب ونسال بشر شطلعت النتيجه؟؟

يول ياب على كيفكم شبيكم  خايفين ع فاروق مايجيبهه ناجح ومعدله 81 وكسور...

مااعرف بالمعدلات بس الي اعرفه زين وفرحانين واخوتي مهوسين واحد يحضن بالثاني فرحتنه اكثر من عندو ...

ننتظرو شوكت يجي ونبشرو بس اوس ما اتحمل راح يركض للمكان الي يشتغل بي وكالو ..

فاروق جان فرحان بمعدلو بيومهه راح قيس جابلنه عشه كباب ودجاج شوي ع احسابو هذيج الليله فرحة اخوتي بنجاح فاروق ماتنوصف...

حته عماتي اجن باركن لفاروق ومن دحكن ع  البيت شلون تعبان ظلن يحجن ع ابوي ...

عمتي الجبيره ام جاسم رادت تاخذنه يمهه كالت بيتي چبير وعيشوا يمي علما تكملون دراسه ...

بس اخوتي مارضوا كالوا ما انريد انصير اثكال على واحد هنا نشتغل ونعتمد ع نفسه...

... يا عمه مايصير شوفو البيت تعبان وابوكم كل رجى مابي اني بمكان جدتكم اخذوا غرفه اكعدوا بيهه ...

قيس.. مشكوره عمه احنه شباب وعندج بنات وما انريد انقيد احد واحنه مونفرين ست نفرات  ...

... يمه شتقيد اني عمتكم موغريبه ورجلي ابن عم ابوكم والله هو الي كالي مايصير تعيشون بهاي الخرابه...

يعني الناس شتحجي علينه احفاد الحجي ابو عماد خير من الله وشبعانين تالي عايشين هيج ...

فاروق.. شبيهه عيشتنه صح بيت ماعدنه وتعبان بس ع الاقل ماناكل حرام ولا اتشاركنه باذيه احد ...

... اني لاحول ولاقوه ياعمه حالي من حال اخوتي هو ابوكم الي ماقبل ينطيكم من الوصيه مال امي هي لومصدقه بالمحكمه محد كدر يحجي بس الموت غلبهه...

والله اني جنت شاهده ع وصيه امي من حاجت ابن عمي يشتغل بالمحكمه كالتلو البيت ونص من البستان لفاروق واخوتو...

بس شفت انت عمك ابو بغداد اجه سوه اسوايات يريد حصتو وابوك هم لو علينه جان اتنازلنه الكم...

فاروق... هذا الحجي بعد مايفيد ماعدنه اب ولاعدنه عم احنه ولد ونكبر ونعيش باي شكل من الاشكال وحتلو انام بشارع محد يكول ليش؟

بس بالله عليكم ماواحد بيكم لا رجال ولاحرمه كال عدهم اخت طفله وين تعيش وشلون تبقه وحدهه اذا طلعوا اخوتهه ...

كلشي انتهى بالنسبه الي اني عائله ماعندي انتي عمتي بحكم قرابه الدم بس كل مكان بكلبي ما الكم ...

هسه شفتي حالتنه اطمنتي علينه شلون عايشين صيروا مره وحده حقانين انتي اول وحده وكفتي ويه اخوتج وردتي حصه ؟؟

موانتي كلتي اريد ابني بيتي وماعندي والله جابهه ليش انطيهه لفاروق واخوتو؟؟

وهسه جايه هالحزه شتريدين؟؟ اهل ماعدنه احنه وحدنه عايشين ومره ثانيه اذا اجيتي ديربالج تذكرين عماد واخو كدامي...

ثريا... فاروق محمل عليهم وقسى بالكلام ويه عمتي وطلعت زعلانه منو بس هو  ما اهتم ابد ...طلعت تحجي وتلوم بينه وشلون مااحترمهه ...

حجه ويا قيس كالو يول فاروق موهيج الحجي تبقه عمتنه شويه خليك احسن منهم ليش تعامل بالمثل ...

بس مايريد يسمع اي شي منهم يكرهم هم الي شاركوا بدمارنه وخلونه وصلنه لهذا الحال...

تلاطشوا قيس وفاروق قيس مايرضى هيج نعاملهم يكول اكو رب يجازيهم ...

وفاروق يكولو انت تسكت وتسد حلكك عاجبتك هاي العيشه وتركض ورا لكمه الخبز وابوك احدث سياره صاعد...

قيس وفاروق دومهم متكاونين حته توصل بيهم واحد يضرب الثاني ويصيرون مثل مناكر الديج ورا شويه يله يفلون...

عيشتنه كل يوم بيومو اليوميه الي يجيبوهه نتسوك بيهه وندفع اجار وبس ماكو ملابس  نشتري  بموسم واحد  ...

صار التقديم مال الكليات وفاروق ماقبل يقدم شكد لحينه علي وحجوا اخوتي بس ماقبل...

حته تعارك ويه قيس بس جان مصر ع رايو يكلو ابيش اداوم وادرس واحنه لگمه ماشبعانين ...

يوميتهم قليله ويوم اكو شغل وعشره لا ... هوايه شباب كاعده ادور شغل مرات مااكو بناء يطلعون ويرجعون فارغين....

ومرات تجي ايام بس واحد منهم يطلع والبقيه يرحون يفترون ع غير شغله...

المشكله احنه جثيرين ومصرفنه جثير وهم شباب وبموسم المدارس تصير سالفتنه سالفه وندفع ايجار...

اني صغيره مااعرف اخبز ولايقبلون لذلك نشتري خبز حصه ماعدنه لان مامفصولين عن ابوي وكلو نشتري شرايه ...

كل ما كبروا كلما زاد حقدهم ع ابوي حته بنجاح فاروق ما اجه مايوم كلف نفسوا واجه يشوفنه ويسأل علينه...

شكد اتمنيت ينفتح الباب بيوم واشوفو كدامي هو وعلاليك المسواك واركض علي احضنو...

شكد اتمنيت اشوف امي حته لو بصوره اي شي الهه ماعدنه ولو اشوفهه بشارع ما ااعرفهه...

امنيات جثيرة عندي بس للاسف ماشفت شي من هاي الامنيات ...

دائما اسال بيني وبين نفسي شنو الاسباب الي خلت ابوي هيج يكرهنه وامي دارت ظهرهه ومشت..
...

فكره عدم تقديم فاروق للجامعه اثرت باخوتي حيل ضاجوا علي شلون يتنازل عن مستقبلو بسبيل يظل يشتغل ...

كلش جان معاند بيومهه حته نمنه بدون عشا الكل ضايج ومقهور اسمع قيس يحجي ويكول دمر مستقبلو بسببنه وراح يتكفل بعيشتنه وهو معدلو عالي...

الليل كله يتناقشون ويحجون ورادوا يغيرون شويه من فاروق بس للاسف كلمتو وحده وماغيرهه ابد

بعد قرار فاروق اخوتي قاطعوا ومايحجون ويا وخاصه قيس وهو اقرب واحد الو...

صار من يجي من الشغل مايكعدون يمو ويعوفوا وحده بس هيج شايل عناد فضيع حته مايسال شبيكم؟؟

قبل ماينتهي التقديم ب٤ ايام انفجر بي اوس وكالو اذا ماقدمت هسه اهج من البيت وماتلكالي اثر ...

صار الصياح عالي وفاروق يكلهم ماتجبروني بزعلكم ع شي مااريدو.... وهذولو يكلوله لا انجبرك اذا تحبنه واجبك تسعدنه واحنه سعادتنه انشوفك مقدم ...

قيس.. انت زودتهه حيل وعبالك بس انت كاعد تعاني ماعندك اهل بالله عليك اسألك شنو فرقنه عنك احنه هم عايشين نفس احساسك ...

فاروق.. من تحجون فكروا موبس اتصفط حجي اني وياكم قدمت ووراهه شنو ؟؟

شلون اداوم كليه وخطوط ومصرف واني ماعندي وشوكت اطلع لشغل وانتم شلون؟؟ لازم واحد بينه يضحي..

اوس.. فاروق اذا ماقدمت اني ابطل والله وحته البقيه يبطلون وانت ارتاح ...

فاروق.. يول اوس لاتزيدوهه عليه طول عمري عايش بكرامه ما اريد اجرب شعور الذل واسمع كلام يحز بخاطري بالكليه ...

هاي جامعه مو مدرسه ابيش اكملهه ومنين اصرف واحنه انروح مشي للمدرسه...

قيس.. فاروق قدم واذا ظلينه ع حالنه اجل السنه بس لاتضيع الفرصه من ايدك اذا تحبنه والنه خاطر يمك قدم ..

بعد معاناه طويله واول مره اشوفهم هلكد مصرين يله قدم ولخاطرهم اي نيه ما الو بالدراسه ...

دائما يكول اتضحكون ع عقلكم بلاول اشبعوا ابطونكم يله اكوم اصرف ع الكليه ...

طلعت القبولات انقبل هندسه الانبار واحنه بدت المدارس وبدينه انداوم ونفس الروتين اليومي..

مشت السنين والحال مثل ماجان ... اوضاع العراق تازمت جانت بدايه السقوط والبلد يمر بفوضى مو طبيعيه...

انتشرت الجماعات المسلحه لذلك الشغل وكف واغلب الناس سافرت وكامت تجي عوائل مهجره من غير محافظات خاصه من بغداد بحكمهه العاصمه واول من دخلوهه الامريكان..

رجع حالنه للاسوء لان شغل ماكو وصلت المواصيل يطلعون من الفجر يدورون ع عماله ويرجعون بخيبه امل...

فاروق صار هو الكفيل مالتنه يشتغل يوميه بحكم ماعندو دوام واخوتي يدرسون ومرات بالعطل يطلعون ويااا بس موذاك الشغل بس يسد جوعنه حته الايجار شهر ندفع وشهر لا...

تعرف ع واحد اسطه جديد وكام يشتغل ويا ويروح اماكن بعيده بس المهم يحصل يوميه...

اخذ مهنه  مال تطبيك كاشي واخذ شمره الشغل وكام يطلعوا بيوميه اكثر كل الي يحصلهن لو ع المدارس لو ايجار ومسواك...

صار عمري 17 وبديت ادرك معنى المعاناه وكمت احس باخوتي واحد واحد الله وهبني هالاحساس من نظراتهم اقراهم ومرات اخلص الليل بس افكر بيهم...

انه بده سن المراهقه عندي برزت ملامحي الانثويه وكمت استحي من اخواني حته ماكمت اتشاقه وياهم مثل عهدي ...

احتاج ام احتاج اخت تحجيلي تفهمني جثير شغلات اريدهه بس ما الكه احد للاسف ..

ابسط شي كمت احتاج ملابس داخليه تستر اكثر لان اني شويه مليانه حته كمت اتجنب اكعد يم اخوتي لو انام بجهه بعيده عنهم...

بيوم منهن المدرسة صاحتني وحدنه وكالت بنتي ثريا انتي كبرتي وكلي لامج تشتريلج ملابس داخليه رياضيه لا اطلعين هيج...

لاول مره احس بلاحراج والعبره الي سيطرت عليه افتهمت قصدهه لان اني ضايجه من هالشي بس هزيتلهه راسي واستحيت اكلهه ماعندي احد...

بيومهه رجعت للبيت ودموعي ع خدي اول واحد دحك بوجهي  قيس وعبالو اكو احد ضاربني بس ماكدرت احجيلو اني بطبعي خجوله ومامختلطه هواي...

جنت ادحك ع الباب شوكت تجي وحده من عماتي واحجيلهه حته قررت ثاني يوم ما اروح للمدرسه خاف هم تحاجيني المدرسة...

بليل كعدت احل بواجباتي واجه قيس شايل علاكه بيدو خلاهه يمي كال هاي الج وطلع...

كمت فتحتهه باستغراب واشوفهن ملابس داخليه بناتيه وكانوا اخوي عرف بحالتي ...

ماادري شصابني ابجي وابجي جثير جنت محتاجه امي اريدهه يمي ما اكدر اكمل حياتي بدون ام ...

لبستهم واني ابجي دمعتي ماترضى توكف بهاي الحاله واجه اوس يناديني من شافني هيج يسال شبيج؟؟

ويهدد وانعل ابيو الي محاجيج واسوي هيج وهيج واني ولاسكتت تالي صاح ع قيس ...

قيس  الوحيد الي يفهمني قبل ما احجي ماكال شي بس كال لاوس عوفهه يمي اخذني بين ادينو وهو رغم عمرو ١٧ بس بنيه جسمه ضخمه...

ضمني بحضنو بكل حنيه وكال...ليش تبجين اني موكتلج احنه اهلج تستحين من البقيه اني قيس اي شي تحتاجي تجين دكولينه الي ...

ثريا بلا دموع ع شي مايسوه كومي غسلي وكملي واجبج ونامي ...

... هم هذولي اخوتي حته من يحجون كولو بحرگه وباوامر رغم كلبهم الطيب حبني من راسي وكام حسيته هو محرج اكثر من عندي...

مشت الايام سريعه وكل سنه ننجح وقيس صار سادس وصدمنه بقرارو من بطل من الدراسه...

اني كبرت وكمت افتهم الحياة اول وحده عارضت كمت ادحك ع  اخوتي بالسره واحد ورا واحد يتخلون عن مستقبلهم بسبب ضيق العيش...

كلهم جكايرهم ماتنزل من اديهم ويفرغون حزنهم بالتدخين...

نفس المكاونه انعادت وواحد يرزل بالثاني بس ماقبل يرجع كال لفاروق مثل ما انت بطلت اني هم مالك علاقه بيه...

من كدما ضغطوا علي انفجر كام يصيح كالهم اني ما اريد لو ادرس بكرامه لو ما ادرس شنو هالذل فلوس ماعندي اشتري دفتر وتريدوني ادرس...

مالكم دخل بيه يطبني الف مرض كل واحد يعتني بروحو دراسه ما ارجعلهه ...

سكتنه عنو من شفنا عصب بس ظلت كلمه حرامات تتردد ع خساره مستقبلو..

حيل انقهرت عليهم خاصه قيس كلش شاطر كلو يطلع اعفاء لحد السادس بس يحس بالمسوؤليه وبطل...

التفكير هلكني شنو مصير اخوتي قيس وفاروق ماكملوا الدراسه مو فاروق كال الشهاده اسلاح وهي الي راح تخلصنه من واقعنه المظلم عجل ليش تخلو عنهه؟؟

حياتنه ماشيه يوم بيومه بس المشكله اخوتي الى متى نظل فقيرين الحال وهم يجي يوم وادحكلهم شباب متزوجين وعايشين بحياة الرفاهيه...

اوس اتبع طريق اخوتو وهم بطل ويه قيس بنفس السنه لان توام ماداوم غير شهر واحد ...

بصف الثالث تعرفت على بنيه من نفس منطقتنه حبابه وصارت صديقتي دائما تسالني عن اخوتي واحجيلهه عن عيشتنه...

بديت ارتاح وياهه لان امهه دائما تجي عليه للبيت وتسالني محتاجه شي ع الاقل اذا احتاجيت اروحلهم..

بيوم منهن اجت هي وامهه للبيت وشافت حالتنه امهه كالت احنه عدنه سياره تكسي يحي واحد من اخوتج يشتغل بيهه...

عبالك انطتني كنز مو لكيت شغله الفرحه ماواسعتني وبس انتظر شوكت يجون واحجيلهم...

اول ماطبوا للبيت تلكيتهم بالخبر كيفوا لان شغلهم موشي كالو اوس يشتغل بيهه ...

ابو البيت هو خرابه ويصعد بلايجار بحجه الوضع موشي واكو ناس كامت تطلع من غير مناطق وتجي هين بمنطقتنه ...

من نجحت من الثالث اجت عمتي الزغيره ام سالم جايبه اشكال وياهه مسواك وملابس ...

وكعدت تحجيلنه عن ايام زمان وتذكر جدتي الله يرحمهه طولت جثير بكعدتهه ...

بحلكهه حجي بس ماتعرف شدكول بس كالت اريد احاجيكم بموضوع ...

بدت تحجي وادحك ع  فاروق ضاغط ع ايدو كوه متحملهه وقيس يريد ينفجر بيهه...

ام سالم... اني اليوم جايتكم بشغيله جايه اخطب ثريا لابني سالم احسن ما ادور غريبه وهي بنت اخويه...

فاروق.. ثريا زغيره ومستحيل انزوجهه بهالعمر عمه سدي هالموضوع ...

... لايمه موزغيره الي بكدهه اتزوجن شلكم بيهه اشو انتم عليكم حسره اللكمه زوجوهه وانتم هم شوفوا حياتكم...

وشجاك بسرعه حجيت فكر يله شبيك حاقد علينه من صغرك.....

فاروق... طالبين من عندج ودكولين حسره اللكمه المهم مستورين واختنه ماانزوجهه واذا انزوجهه بعد ماتاخذ شهادتهه...

واذا اخذت شهادتهه انزوجهه لواحد مومن كرايبنه لان ما اريد حته الفظ اساميكم...

... شبيك ياعمه حاقد ع الكل ابوك وامك الي عافوك احنه ياهو مالتنه ...

اني كلت احسن من هاي العيشه عندي بنات اثنين اخذوهن انت وقيس واكعدوا يمي هو بس سالم وانزوجه ثريا...

هم ترتاحون انتو وبالنه يرتاح ليش انشوفكم متلوعين وتركضون ورا الشغل شو خير من الله البستان والمحلات..

فاروق ... عبالي هذا مسواكج مسويته لوجه الله تالي جايتني بخطه وفوكاهه تريدين 3 زواجات...

والله يحير العقل شيحجي وياكم بس ما استغرب منو اخوج اكيد نفس الطينه  ...

اسمعيني زين ثريا لو اعرف تظل طول عمرهه كاعده ماافكر ازوجهه لواحد من عدكم ...

واخوتي لو اعرف يتكسر الشيب بصدرهم ما اتشرف واخذ منكم تدرين ليش؟؟

لان كلكم وكفتوا وياهم وطلعتونه بالشارع واحنه نحمي باختنه من عيون الناس ...

انتي المحرضه الاساس بقضيه الورث ورحتي شهدتي كدام القاضي بان احنه عايشين ويه ابونه...

وفوك كل هذا حلفتي جذب بان جدتي ماوصت باي شي وهسه جايه اطلبين قرب لابارك الله بگربج وخيرج...

الاملاك والمحلات الي تحجين عليهه مرجعهه النه لابد مايجي يوم ويموت عماد وهذيج الساعه يصير خير...

ام سالم.. صدك ماتحشمون وماتعرفون العيبه يول اني عمتك اخت ابوك تحاجيني هيج ...

بس لاعتب عليكم منو الي رباكم اشو الام داحت ويه الرجل والابو ويه النسوان...

فاروق... الحمدلله من تعرفين اخوج عار وشنو طينته ومنو كالج عدنه ام لاتنسين الي ربتنه حجيه حليمه  ..

وهسه خلصت محاظرتج وبارك الله بجهودج وتفكيرج...

ثريا... ماانطاهه مجال حته تحجي وطلعت زعلانه مثل ام جاسم هو هذا فاروق كل واحد ينطي طينتو بكصتو ..

من طلعت گبت المكاونه بين فاروق وقيس وهذا يكولو شبيك ماعندك اسلوب وبس تتهجم ماتستحي كل الي تجي من عماتي تطردهه...

فاروق.. يول دخيل ربك تظل اثول وكاتلتك طيبتك اذكرك لونسيت بحالتنه ومنو الي وصلنه هيج ..

تذكر انت واكف ع السكله ادك طابوك وابوك فات من يمك باحسن سياره ودار وجهه عنك وكانو مايعرفك...

اذكرك من رحنه اني وياك يساعدنه ويدفع اجار لو يشوفلنه بيت احسن من هذا وشنو جان جوابه...

كالك روح جيب اختك ازوجهه وانتو اشتغلوا بالسوك ادفعوا عربانه بيعوا علاليك ما اكعد احط بحلوكم...

هذا كل نسيتو من طردنه كدام حرمتو وجهالو وجاي ادافع عن هاي العائله وحق الله الي يجيب طاريهم كدامي ويوكف بوجهي ويحجي لا يكول عندي اخ اسمه فاروق...

مستعد اخلص عمري واني اشتغل عماله وما اخلي هيج حثاله تذلكم قسي كلبك يول وبطل هاي الطيبه ...

قيس.. كلبك حجر بس مو مثلك اني عندك قابليه تكره اني ما اكدر فاروق اخوتك يتعلمون منك انت الجبير مو تزرع بداخلهم الحقد...

ادهم... قيس لاتلوم فاروق اني هم اكرهم واتمنى انتقم من ابوي..

ايوب.. والله اذا الله وفقني الا كلهم اخيسهم بالسجون ..

اوس.. مدكلولي شبيكم عدوانين صح اذونه بس مو معناتهه نسوي مثلهم ...

قيس... شوف اخوتك مشوا على خطاك ومن هسه انزرع الحقد بكلوبهم ...

فاروق.. مو صغار اخوتي عاشوا وشافوا بعينهم كميه النذاله الي عد عمي وابوي ...ذ

قيس.. دروح ظل بهذا حقدك وخلي اشوف وين توصل ...

ثريا... مقهوره على حالنه من يحجون اخوتي وعبالك يحجون ع واحد غريب مو ابوي ...

من هذا الموقف محد دك باب علينه حته عماتي الي جانن يجن بين كل مده بطلن جيه ...

الحال مثل ماهو مستورين الحمدلله وكل سنه ننجح لحدما وصلت لسادس وماكو كل جديد...

هنا اتعس مرحله واجهتهه هي هاي كل اخوتي الخمسه بطلوا يشتغلون ليل نهار بسبيل يخلولي خصوصي ...

كلهم شباب اعمارهم بالعشرين اصغر واحد ادهم عمره 19 سنه وبالسادس وبطل...

اوس يشتغل بتكسي جيرانه والبقيه كلهم عماله بنيه جسمهم ولون بشرتهم كلهه تغيرت وكل يوم يكبرون سنه...

بس مكابرين ع القهر ويحاولون يعيشون حياه كريمه بس ينقهرون من يسمعون بواحد ناجح وراح كليه...

بيوم منهن كاعدين دنيا المغرب واندك الباب حيل جنت اسوي عشا راح ايوب يفتح الباب...

سمعت صوت ازلام خشنه ركضت ع الولد كتلهم مدري منو جانه؟؟ طلعوا برا وبعدين صاحوا سوو مجال...

ركضت ليجوه وهم  فاتوا ماعرف منو الي وياهم بس شويه وبده الصوت يعلى ...

اخترقت مسامعي كلمة الزلمه وهو يكول...

فاروق ابني كل الي انريده منك بس تحظر المشيه انت واخوتك جيتكم ضروريه باجر ...

واكفه ورا الباب استمع لحجيهم ..خليت ايدي ع كلبي يامشيه هاي؟؟

يتببببع.... متابعه ممتعه

موعد التنزيل يومين نشر ويوم استراحة