رواية ازمة ضمير الفصل السابع 7 - بقلم Rozaya1122

ازمة ضمير ... البارت السابع
«للكاتبه روزايه»

باچر تگضي واتذكر مواقفكم
واجي والگه الفشل كل حيلة تارسكم
باچر روسکم بالملگه ماتنشال
تدنگ والحچي الينگال يوجعكم...
...

فاروق.. من عمري 7 سنوات واني ماناسي ولا لحظه من العشتو بهذيج الساعه كلما اغمض جفني تتراكم الصور واللقطات كدامي...

ابد ما راح انسه شنو من ام عدنه ولا شنو من اب من جنت صغير اسال بيني وبين نفسي ليش جدي هيج طلعوا ولدو

يكولون جدي رجال معروف يحب يساعد الناس وينطي من ايدو جثير والحجيه حليمه بنت شيخ واخوتهه شيوخ ومعروفين باخلاقهم..

ليش طلعوا ولدهه اثنينهم هيج لا عماد بي مروه ولا فلاح عماتي نسوان وعليهن اهوان من اخوتهن شنو من بشر من يا طينه الله خلقهم ...

احتمال لو واحد يكعد يحجيلي نفس قصتنه واني انسان عادي وعايش بخير جان كلت هذا جذاب ماكو هيج اب ولاعم..

لسه اتذكركم زين من تبجون وتتوسلون بام عديمة الرحمه ومن اصد عنكم الضرب مال ابوكم ويجي كلو بظهري  .

ماانسى ولاراح انسه شلون عشنه ايتام وياما وياما فقدت اصدقاء لان يعيروني بابوي ويكولون عليه فگر واني ما اتحمل واتكاون وياهم...

تدرون اكبر خساره صارت الي وراح تبقى اعظم شي مر بحياتي واني ادحك مستقبلي انهد كدامي وتنازلت عن شهادتي..

اضطريت اترك دراستي والمفروض اني هسه متخرج بس حالنه مايساعد وكلمن يمد رجلو ع كد اغطا..

وراهه كسرتوني اكثر من بطلتو واحد ورا الثاني كله هذا منو يتحمل مسوؤليته غير ابونه؟؟

اليوم الي سوينا وتهجمنه علي وضربنا اكبر غلط وتدرون بيه اني ما اتندم على اي تصرف بس هذا التصرف تندمت علي جثير..

كعدت استغفرت ربي لا يعاقبني بيكم على مدت ايدنه هاي بس فاض الصبر ومابعد عدنه حيل

سمعتنه راح تصير ع كل السان ويكولون كتلو ابوهم ماراح يكولون هو موخوش اب راح ينزهو ويصير ماكو من عنده...

قيس.. فاروق من الاول كتلك ما انروح للكعده احنه ماعدنه مشاكل هسه هاي اجتنه صفح وفوكاهه ثريا بنص..

فاروق.. لا احسن خطوه صارت هي روحتنه يول لومارايحين جان انباعت ثريا ومحد وكفلهه وجان ماحجت نيران ..

اوس.. فاروق انت شلون تأمن بعمي وتمدح بيه يول هذا عار اكثر من عماد ...

فاروق.. يول عجل ماشفتو شلون هجم على بنتو وهي طفله حته ماتستوعب وكفتهه بنص الزلم ...

لو ماخذ ومنطي ويا واتكاون يرجع ع بنتو ياذيهه بالعكس احنه انريدو بصالحنه ويجيب الوصيه هو ..

قيس.. هسه شراح نسوي بعد الصار..

فاروق.. شيخ ناصر هو الخبرني بسالفه الوصيه لان سامع من رجل عمتي ام جاسم ..

اني ماراح ادخل راح ياخذ الوصيه بطريقتو ويعيد التقسيم من جديد وهذيج الساعه من تصير الامور لصالحنه نبدي بدايه صحيحه..

كلكم ترجعون للدراسه تقدمون خارجي وادرسون بس خلي يصير عدنه راس مال نكدر نتصرف بي..

قيس.. وانت تعتقد الوصيه موجوده بعدهه مدامهه ماوصلت للمحكمه ماراح نحصل شي..

فاروق .. حسب كلام الشيخ الوصيه بشهود وراح يجيبون الشهود كلهه تشهد بس جاي يشتغل بيهه بسكوت حته مايلعب بذيلو عماد...

ونيران رغم صغيره بس جريئه وماتخاف راح تفيدنه ما انريد نستغلهه لان تتاذى بس نحاول وياهه بدون علم ابوهه...

لازم هذا الشهر نخلي النقاط ع الحروف تعبنه صار اسنين واحنه نعاني ..

ادهم.. وراح تسكت عن ابوي مو يافاروق وين كلامك من دكول ادفعوا الثمن..

فاروق.. يول ادهم مخافه الله فوك كل شي اني اكرهو ولو يوكع بيدي هسه اكتلو بس باجر يم الله شحجي ..

اكول حقدي عماني وكتلتوا ادهم ما اكلك حبو ولاتعطف علي بس اياك تفكر تسوي شي يغصب رب العالمين...

اني مثلكم بلحظه ذكره لثريا ردت احط طلقه براسو ديربالكم الشيطان شاطر وياما ناس خسرت كلشي بلحظه طيش..

خلي ناخذ حقنه من عندو والباقي ينحل نلوعو ونخلي يضوك المر بس اياكم توصل للقتل وخسران السمعه...

قيس.. فاروق عمي فلاح نفس الطينه حته بناته مستعد يتخلى عنهن بسبيل الفلوس..

ايوب.. عجيب امرهم من تسقط الاقنعه كلشي ينكشف شلون الهم قابليه يمثلون وشراح يحصلون من هذا كلو...

الي يقهر يحلفون باخلاقهم وهم حثاله المجتمع مثل عمي ادري موعايش بغداد ولاعندو عداوه شجا تخبل صدك الفلوس تغير النفوس..

فاروق.. ثريا انتبهي ع نفسج ماعدنه شي انخسره بس انتي ابوج يلوي ذراعنه بيج ..

ثريا.. انت دكول ابوج يعني معقوله راح ياذيني؟؟

.. ثريا بنظري انتي بعدج صغيره اكو اشياء من تكبرين راح تعرفيهه وهذيج الساعه كولي صدك ابوي مابي خير وماينحسب ويه الزلم..

سر مضموم بكلبي صار اسنين ورغم كلنه كبرنه بس ما اكدر احجي الكم خلوهه ابالكم ابد لاتستهينون لا بابوكم ولا بامكم..

قيس.. فاروق لا تشغل بالهم خلي الزمن كفيل باخذ حقنه..

ثريا...
من وفاه جدتي لهاي اللحظه ماحاسه بشي ودائما احمد ربي واشكره ع راحه البال عمرهه الفلوس ماتجيب الراحه والسعاده..

بس اليوم جربت شعور غريب احس تكومت المشاكل ع راسنه ونطلع من وحده نفوت بالثانيه..

رغم اتمنى حالنه يتحسن وتصير عدنه فلوس بس بنفس الوقت ما اريد تصير مشاكل ويتاذون اخوتي...

سالفه الوصيه ماراح يتركهه فاروق وخاف ابوي وعمي ياذو المصيبه موبس فاروق حاد اسنونه عليهم كلهم اخوتي وهالمره لازم ياخذوهه...

نيران.. بس طلعوا ولد عمي ركضت للغرفه اختبي من بابا بس للاسف لاول مره اشوف هذا الانسان الي دللنه ويخاف علينه هيج طماع وجشع ..

سحلني من ضفيرتي للطباخ واني اصرخ الله عليك بابا عوفني والله بعد ما اسويهه ..

فلاح.. صايره سباعيه بنت الكلب اليوم اورج ور (احركج حرك) حته تبقين طول عمرج تذكريهه..

صوت ماما واخواتي وهن يتوسلن يعوفني بس لاحياة لمن تنادي...

وكفت بوجهه ماما وحمتني من عنده انهال على ماما بالضرب لاول مره يمد ايده عليهه ويسبهه انسان ثاني الي انشوفه  كدامنه...

اذه ماما حيل وامنيه ورؤى مفزوعات واني خاتله جوه الدرج ما انسه هاي اللحظات ابد ..

من كدما فرفحت وابجي ريگي نشف كتل امي واخواتي كلهه تاذت بسببي...

امنيه الصغيره ورؤى مالهن ذنب كل ذنبهن دافعن لماما لازم الحزام ويضرب بكل قوه ...

بعد ماتعب من عدهن وماما كوه خلصت نفسهه من عنده اجه يركض عليه وعبالك عدوته مو بنته ..

ضربني ضربات متفرقه بالحزام لاول مره هيج انضرب من الخوف كمت اصرخ بعلو صوتي ..

تمنيت عندي اخ مثل اولاد عمي من وكفوا بوجه ابوهم مجرد ماذكر ثريا بالموزين...

فلاح... بنت الكلب هلكبرج وما اكدرلج من تكبرين شتسوين توكفين بنص الزلم وتهينيني  اليوم اطلع روحج..

... بابا والله ما اسويهه بعد عوفني الله عليك ..
بيان.. فلاح عوف بنتي ياظالم الله ينتقم من عندك والله اذا اذيتهه ما اخليك تلكاني طول عمرك..

.. ماما تحجي بصوب وهو بصوب ثاني اخذني سحل للطباخ وجر الخاشوكه خلاهه ع النار ...

روحي راحت بس مجرد ما اباوع للنار افرفرح مثل الطير المذبوح ...

جر الخاشوكه بكل قسوه وراد يطبعهه ع حلكي بس من كدما احرك براسي انطبعت ع خدي...

صرخت بصوت حسيته وصل لبيت عمي كمت ارفس جوه رجلي واني اريده يعوفني وهو مستمر يضرب بيه بالحزام..

صوت اخواتي وهن يصرخن بابا عوف نيران انبوس ايدك عوفهه...

اجت ماما شمرت نفسهه كدامي وضمتني بحضنهه وصار الضرب كله على ظهرهه...

ليله ما انساهه طول عمري اكتشفت بيهه هذا الانسان مايستحق يكون اب ..

اعترف بخطأي والمفروض ما اسوي هيج وانزل من قيمته بس هو انسان ظالم اكل ورثهم وحرض عمي عليهم وبعده يدعي المثاليه..

للصبح اني ابجي من الحرك واخواتي يبجن وياي امنيه الزغيره دكول لماما خلي نرجع لبغداد خوالي يادبو...

بيان.. ليش يا امي موكتلج لا تسوين هيج ادري بي راح ياذيج طول عمري متحمله الاهانه بسبيلجن ...

مايوم خليتجن تحسن ابوجن موخوش ادمي حته ما تضوجن منه بس كلشي طلع عن حده وبعد ما اكدر اضم عليجن..

نيران.. ماما بابا ظالم انسان ماكل حرام شلون تقبيلهه فهميني شنو فرقه عن اخو ماقبل لان حجيت الحق وهو رجال مادافع عن الحق ...

بيان.. اسكتي بنتي الله ينتقم من عنده وعسه ايدك يافلاح تتعلك بركبتك ...

نيران... دخلت بحرب نفسيه اريد اسوي هوايه شغلات بس ما اكدر اريد افضح ابوي وعمي كرهتهم حيل بس ما اعرف شسوي..

تخيلو كميه البشاعه بالابوه الشايلهه فلاح كام يطب يطلع يسب بماما ويضربهه ويجبرني اروح اخدم مرت عماد لان مريضه عدهه فقرات..

بس تخيلو الضمير الميت الي بداخله الي يقبل بنته تنهان واصير خدامه لبدريه مو حبا بعماد بس حته يذلني ويذل ماما ..

اروح يم بدريه اكرف شغل وتتامر عليه ومن احاجيهه وارد عليهه تشكي لابوي وصارت ايده والضربه ...

تعبت حيل خلال اشهر اتمنيت اكتله لو ينسجن بس حته نرتاح من عنده ..

ما ادري وين هذا الوجه مضموم شلون صار انسان ثاني مجرد ما اجينه هنا...

بيوم من عدهن جنت نايمه بليل وكعدتني امنيه تريد مي كمت من مكاني اريد اجيبلهه مي بدربي للمطبخ ..

واسمع صوت ماما وهي تستغيث من عنده ما جنت اعرف شبيه بس اسمعهه تتوسل بي ودكله فلاح حرام عليك جاي تاذيني انت

اصوات تطلع من بابا مقززه بس والله ما اعرفهه شنو بس توسلات ماما بعدهه ابالي وهي تستغيث من عنده..

رجليه اتربطت لا اكدر اوكف واستمع احس كلبي يتفطر على حال ماما ولا بيه اكمل طريقي...

اخذت كلاص مي ورجعت ركض وصوت ماما وهي تبجي ودكله راح اموت حرام عليك اتحملتك هواي ..

ركضت للغرفه وسديت اذاني خليت المخده ع راسي واضغط بيهه اريد صوت ماما يروح من راسي...

اكرص بنفسي بس حته احس بلالم ويتشتت بالي ولا انسه هذا الموقف ابد...

ثاني يوم كعدت الصبح اباوع بوجه ماما تعبانه بس تحاول تخفي المهه مثل كل مره ...

واكفه تسوي ريوك وكلنه كاعدين حته بابا بس اشوفهه تتحرك بصعوبه كمت اساعدهه مبينه تعبانه...

لفت انتباهي ايدهه من يم معصمهه حمره حيل سالتهه ماما هاي شبيهه ايدج حاولت تنزل ردنهه وتخفيهه وكالت حساسيه ماكو شي...

اباوع لابوي كاعد يشرب جاي ولا مهتم ولا عبالك هاي الانسانه نفسهه تتوسل بي البارحه..

اتمنى اكبر واخذ امي واخواتي وانهزم وما اخلي يلكانه خلال اشهر قليله خلانه نكره حياتنه ...

كام يضربني ع اقل شي وغير تدخلات عمي عماد ووصلت بي عادي يضربني لو يضرب رؤى بحجه بمقام ابوج...

نفس كل يوم اروح لبدريه اخلص الشغل وبناتهه قمه الوسخ يمشن ويزبلن وكل وحده جنهه ثور ليل نهار يعلفن...

سايست بدريه بس حته تامن بيه واكدر احصل شي يخص الوصيه ...

اكثر من مره اشوف عمي يصعد فوك وينزل شايل بيده شغلات لو مستمسكات لو شي يعني غراضهم فوك...

بقيت فتره بس اراقب بغراضهم عندي اصرار موطبيعي اريد افضحهم كلهم حته بابا ...

مرت 3 اشهر ضبط واني وصلت لاتعس حاله صرت عباله عن دميه للضرب حته يفرغ غضبه بيه بابا ...

اصرخ واتعارك اكله ليش تغيرت بابا شبيك ليش تاذيني بس موبس اني دائما يتلفظ الفاظ بشعه ويكتلنه كلنه حته دراستنه ماخلانه نكملهه حته امنيه الطفله حرمهه ..

ثريا... التهيت بالدراسه وليل نهار اقره باجر اول يوم امتحاناتي الوزاريه اخوتي نفس وضعهم بس دائما يكلولي ان شاء الله خير...

يوميه اروح امتحن وارجع وادهم هو ياخذني ويرجعني خلصت الامتحانات وانتظر النتيجه...

اسمع اخوتي يتناقشون بينهم ومخبوصين وما اعرف السبب جنت ملتهيه عنهم...

سألت ايوب شكو شصاير شبيكم مخبوصين؟؟
ايوب.. ثريا اوس قدم خارجي والسنه راح يمتحن بس ياخذ شهاده السادس يقدم على كلية الطيران ..

... شنو شوكت قدم وشو ماكاعد يقره..
.. هسه يبدي يقره ماتدرين بي هو شاطر وانفتحت الكليه الجويه بس ينجح يقدم ..

... يارب ينجح فرحتني حيل ع الاقل واحد من عدكم يوصل..
... ثريا تدرين اني اتمنى اقدم بس ماعندي فلوس!!

.. لادكول اتمنى تحققهه ان شاء الله هسه تتعدل امورنه وتقدم...

... ما ادري ردت احجي لفاروق واكيد يساعدني بس ماحبيت استغلو لان هو ساعد اوس بالي عندو كلت ورا اوس اقدم..

.. لادكول هيج فاروق ابونه وراح يفرح بيك اذا يسمع عندك طموح للدراسه..

.. بس خلي تنحل سالفه الوصيه ونحصل بيت نكعد بي براحه اقدم خارجي وامتحن..

ثريا.. قهرني كلام ايوب شكد متمني يدرس كلهم يحبون دراستهم بس ماحالفهم الحظ ...

بعدني منتظره اعلان النتائج وانفتحت علينه باب من الجحيم...

عصريه وحدي بالبيت واخوتي بشغل وجان يتكسر الباب حيل ماعرفت شسوي ركضت للطابق الثاني بغرفه فوك وقفلتهه عليه...

اسمع صوت باب المطبخ انفتح وواحد يدك على البيبان كسرهن ويصيح ولك فاروق اليوم انعل اهلك اني عماد هيج تسوي بيه ...

وين رحتو عارات وينكم الا اذلكم واخليكم تحبون اديه اني اعلمكم..

.. صوت ابوي وهو يهد ويتوعد عليهم خلاني انسطر احمد الله الف مره ماصعد فوك وعباله محد بالبيت طلع وسد الباب ورا حيل...

مانزلت ابد الا صار المغرب واجو اخوتي اسمعهم يصيحون ثريا ومبين خايفين ...

نزلت اركض ع الدرج واني الهث كدامي واكف قيس كتلو ابوي ابوي يدور عليكم ..

قيس.. شبيج يولي وجهج مخطوف شبي ابوج؟؟

... قيس ابوي اجه للبيت ويصيح ويسب ويغلط عليكم ويكول فاروق الا اندمو...

..ع كيفج يابه ابوج خلص عمره يهدد لا تخافين حدري هين خلي نفتهم...

صاح فاروق تعال .. كعدت احجيلهم ع ابوي وشلون هدد واني صعدت بالغرفه...

شبح ابتسامه مرسومه ع وجه فاروق والمصيبه كلهم نفس الابتسامه...

فاروق.. لاتخافين يولي ابوج وصله تبليغ المحكمه وهالثار علينه...

... يامحكمه ؟؟
.. رفعت دعوه علي مال الورث وتلاعب بالوصيه وجابو الشهود وشهدوا واكو نسخه من الوصيه عند ابوج ولازم نحصل عليهه...

... هاي شوكت يمه منكم موهينين اخوتي شلون سويتو هيج؟؟

...شيخ ناصر هو ساعدنه وظل يدور ع الوصيه وجاب الشهود وسالفه طويل بس كلهه بدون علم ابوج وهسه من اجا التبليغ هد علينه...

..شكاتبه جدتي بالوصيه؟؟
..كاتبه البيت والبستان النه والقطع الزراعيه الهم يعني اكثر من النصف باسمنه ورجل عمتي ام سالم هو الشاهد الاول...

بس اكو اثنين من ولد عم الحجيه حليمه شاهدين وهم ساعدونه يكولون بحزتهه هددنه عماد وسكتنه...

ثريا.. فاروق يعني راح يرجع حقنه بس خاف ابوي ياذيكم..

... ابوج ماخذ البيت والبستان والباقي بايعوا والي صاير من ضمن حصة عماتي يعني هو هسه ماعندو حته دار يسكن بي ...

.. اني اخاف منو ومن عمي والله ماعدهم مانع حته يأذوكم..

ايوب.. ازيد من هاي الاذيه ياثريا اذا نبقه ساكتين مانحصل شي لازم نتحرك واذا النه رزق يجينه..

ثريا.. اثق باخوتي ومايتصرفون باستعجال ويفكرون بكل خطوه قبل لايخطوهه بس ابقه قلقه عليهم..

عجيب امرنه احنه بني ادم هيج انبيع وننسى بسهوله هيج الفلوس تعمي الواحد وتخلي حته يبيع ضميرو..

ابوي من يخلي راسه ع المخده مايفكر بينه مايكول هذوله ولدي ليش هيج سويت بيهم؟؟ من يشتري اكله مايشتهيهه الهم وخاف جوعانين؟شنو ذنبنه هيج تعاقبنه ؟؟

نيران... طفح الكيل بينه بابا تخبل وخبل ماما اكثر اذيته على ماما كمت يوميه اسمعهه تتوسل بي بليل مدري شيسويلهه ؟؟

بهذاك الوقت عمري 16 سنه وبمعنى الكلمه زغيره ما اعرف كلشي ناس عايشه ع الفطره ولا تلفزيون عدنه وقنوات ولا موبايلات حته اعرف..

اشوف ماما من تكعد تعبانه وحته دكوم تبجي منع عنهه كلشي حته الباب ماتوصله يخاف تروح لاهلهه ..

اسالهه ماما شبيج تقابلني بدمعه حزينه دكلي نيران اني تعبانه اني محتاجه امي مثل ما انتي من تحتاجيني..

نيران اني تعبت حيل ابوج تعبني وماعندي طاقه اتحمل بعد انتن الي كاسرات ظهري من صغرجن جان يهددني بيجن والا عفته من زمان..

... ماما لاتبجين هسه نكبر ونعوضج بس صحتج اهم شي..
... من تكبرين يا بنتي تعرفين معنى كلامي وشكد تعبت اني ..

... حالة ماما ابد ماتسر وبابا متخبل ع الاخر حته يطلع بالكهاوي ومدري وين يروح وبس مشاكل ويتعارك بسوك..

بيوم من عدهن يم بيت عمي عماد واسمع بابا وعمي تعاركوا ع نفس السالفه والورث والوصيه ..

كل الي عرفته فاروق رافع دعوه عليهم واثنينهم اجاهم تبليغ وراح ينسجنون اكيد لان مزورين ...

استغليت الفرصه بدريه كاعده يمهم بالحديقه واني بحجه انظف صعدت للبيتونه ..

بيهه كومه غراض ووسخه شكد قذره هاي المره ياربي لامتهه مدري منين مامنين...

بحجه اعزل وارتب بس اني متاكده هنا لان اشوفه من يصعد يجيب غراض وحته مرات ينطيهن لبدريه تصعد تضمهن..

ردت اعزلهن بس بطلت كلت خاف من الكاهه وبعدين يدور عليهه ويشك بيه يكول انتي نظفتي ...

عفتهه ع نفس الهوسه بس لكيت جنطه سفر قديمه تنشال بالكتف صغيره فتحتهه والكا كومه اوراق شلون راح اعرف الوصيه من هاي الهوسه ...

عيني ع الدرج اخاف يجي احد وادور بالاوراق لكيت ورقه مطبوكه فتحتهه بس مكتوب وصيه وجوه توقيع 4 شهود ماقريتهه خفت لا احد يجي بسرعه رجعت الغراض ونزلت..

لابسه دشداشه بيهه جيب بصدرهه ضميتهه بي وكلبي يدك سريع كلساع اخلي ايدي عليهه اطمن موجوده...

لازم استعجل واتصل برقم الي انطانيا فاروق بس الي ادري بي ثريا كالت ماعدنه تليفون واصلا النقالات بس الطاك عنده لان بدايه السقوط والناس موكلهه اشترت ..

حته احنه ماعدنه بس عدنه التليفون الارضي ركضت للبيت طلعت الوصيه ضميتهه بملابسي وطلعت الرقم الي انطانيا..

كلساع ادور مجال بس اريد اتصل لا تشوفني ماما لو امنيه وتروح تفتن عليه .. عصريه جانت كلهن طلعن بالحديقه واني ركضت ع التليفون ...

دكيت الرقم بالتليفون ابو الفره ومخليته ع اذني وكلبي يدك سريع وعيني ع الباب لا يجي بابا ويسمعني..

دك هوايه يله انرفعت السماعه صوت بنيه ناعم وهي دكول الوو..

... هلو ثريا اني نيران بنت عمج اريد فاروق بسرعه!!

... العفو عيوني اني موثريا متوهمه..
.. هذا الرقم متاكده من عنده لعد انتي منو؟؟

..شطالبه حضرتج اذا فاروق انتظري فد عشر دقايق ويجي واتصلي..

نيران... سديته من عندهه واني صافنه منو هاي البنيه وفاروق مامتزوج وماعدهم تليفون ؟؟

وتعرف فاروق وكالت انتظري منو هاي؟؟؟

يتبببع....

مقتطفات من مستقبل القصه..

الحدث 1
نيران .. كاعده ورجليه ترجف وكلشي بيه منهار مد ايده على خدي ورفع خصله من شعري وخلاهه ورا اذني وهمس يم اذني ماراح انساج ابد روحي بفالج وعيشي حياتج بس بنفس الوقت ماراح اسامحج لاخر لحظه بعمري...

الحدث2
حكمت المحكمه حضوريا على المتهم ...... بالسجن لمده 15 عام من يوم الاعتقال...

حبايب لاتنسون دعواتكم لشبابنه الله يحفظهم وينصرهم ويرجعهم سالمين غانمين يارب...