رواية ازمة ضمير الفصل الثامن 8 - بقلم Rozaya1122

ازمة ضمير ... البارت الثامن
«للكاتبه روزايه»

ما تدوم الدنيا لحد طبع بلدنيا تدور
صح فقير احوالي هسة وعاكسة وياي الأمور
لكن اني عيوني شبعت شافت جنان وقصور
ومن ترده الحال بيه مازلت عبدا شكور
اني عنبر لمن اطفة ومن أوج مثل البخور....
....

نيران.. سديت التليفون واني افكر منو هاي البنيه؟يله ماعليه المهم احصل فاروق ..

مرت ربع ساعه ضبط ورجعت اتصلت بس انرفعت السماعه اجاني صوته الوو نيران..

..هلو فاروق شلونك
.. هلو نيران شلونج انتي ابوج خوما اذاج؟

.. زينه اني اتصلت عليك وطلعتلي بنيه عبالي ثريا..
.. لا هاي زوجة صديقي اني منطيهم علم خاف تخابرين لانو ماعدنه تليفون بالبيت وهم قريبين من بيتنه ..

.. فاروق اني لگيت الوصيه ونسخه منهه عندي واخاف يكشفوني تعال اخذهه باقرب وقت بابا متشدد علينه وما نطلع..

فاروق.. فاجاني كلام نيران رغم جنت متوقع نيران هي الي راح تساعدنه وراح تاخذ الوصيه بس ماحسبتهه بالهسرعه وبعد ماسمعت من الشهود ع اساس تلفت وشاگيهه..

بس بعدهه طفله وخاف تتاذى ما اريدهه تتعرض لمشاكل بسببنه وخاصه ابوهه اضرب من ابوي بالف مره ..

نيران ضمي الوصيه واياج تخطين خطوه بدون تفكير وصيري حذره راح احاول بكل الطرق اجيج واخذهه ..

نيران.. ماشي فاروق راح اسده لاتجي ماما هسه مع السلامه..
كلش خايفه وقلقه بنفس الوقت خاف يكشفوني لان بس اني ادخل بيتهم وخاف بابا يعرف ويعاقبني ..

كمت بليل ما انام منا ماما وصوتهه دائما اسمعه ومنا قلقي وخوفي من مصير مجهول كلساع اتخيل عمي يجي عليه ويعرف بيه اخذتهه لو اتخيل بابا يحرك بيه ..

احس نفسي راح اصير مجنونه التفكير مهلك ما انطي مجال لدماغي يرتاح وين ما اكو شي سيء افكر بي حته النوم طار من عيوني وكمت اسهر الليل كله...

ورا اسبوع من مخابرة فاروق اجه بابا كال تهيرو(تحضرو) معزومين ع عشا يم فاروق..

بيان.. شعجب عازمنه هو ما يطيقنه اصلا..
... اني جثير اتودد الهم وقويت علاقتي بيهم لان ياحرمه القضيه كاسبهه فاروق وع ساعه نتهجول من هين عزمتو اكثر من مره ماقبل كال جيب البنات وتعال...

نيران.. ماما وبابا يتناقشون واني معجبه بذكاء فاروق شلون استغلهه وشلون خله بابا يأمن من ناحيته من يحجي بابا مطمن حيل ..

ركضنه طلعنه كل ملابسنه وحايرين شنلبس والبس وانزع وبابا خبصنه وهو يصيح يله استعجلو وواكف ع راسنه...
....

ثريا... عزيمه بيت عمي مااعرف بمناسبه شنو اخوتي مايسولفون وصايرين بس يتهامسون ولا واحد من عدهم يحجي كلما اسألهم كالو مالج علاقه..

الي عليه بس طبخت رغم ماعدنه وهذا الشهر دفعنه ايجار بس جانو متلهفين ع العزيمه ايهم يطك اصبع ويكول يول جانه الخير جانه..

كلت لاوس منين عدنه فلوس حته نعزم ونشتري مابيهه داعي..
كالي لايولي هاي العزيمه راح تفتح علينه ابواب الخير وتعوضنه بس لا تشائمين جنج بومه..

جنت اطبخ وهو يمي ياكل بخياره اريد افتهم شي من عندو بس كلامه مدري شلونو..

ثريا... شبيكم صرتو تضمون عليه خاف حاطين عينكم ع وحده من بناتو..

... دخيل هالمخ هذا مالگينه غير بنات فلاح اخو عماد ننعجب بيهن مو قلة بنات ..

.. اني عندي احساس واحد من عدكم يحب من بناتو بس ما ادري منو؟؟

.. صايره تحجين بالحب ست ثريا اشتغلي والصمي وراح سادس وانتبهي ع دروسج وعوفج من هاي الخرابيط محد يحب من عدوه ..

... شبي مايتفاهم اوس هو اني شكلت عبالك كتله اني الي احب...

حضرت كلشي واحنه بانتظار عمي وبناتو كولت ادهم العائله الملكيه...

قيس وفاروق بالشغل والبقيه موجودين صرعوا راسي من المناگر مايكعدون 5 دقايق اذا ما تناگروا وواحد يكول لثاني انجب ..

دحكت ع الساعه ب5 ونص هسه ع جيه كمت طلعت المواعين وغسلتهم وخليتهم بزاويه المطبخ ماعدنه كاونتر...

صدك شويه واندك الباب راح ايهم يفتحو ويمشي ويعدل بشعراتو ويفرك ايدو ويمسح وجهو..

تلكيتهم بالباب رحبت بيهم بس عمي ما ارتاحلو ابد حته سلمت علي سلام بارد...

امهم حيل حبابه والبنات طيبات رؤى مرحه وتشاقه وامنيه فد وحده بس تتدلع ...

اما نيران هاي البنيه ليش احسهه تدخل حياة واحد من اخوتي مجرد احساس لا اكثر..

لابسه بنطرون قماش وعلي قميص وردي ونفس الضفيره الصفح مخليه الشال ع النص بس كعدت نزعتو...

التهو اخوتي بالسوالف وعبالك عمي صديقهم ولاجنه عدوهم لازم عدهم غايه بهاي السوالف..

صحت البنات يمي بالمطبخ واني وياهن انسولف ويحجلي عن بغداد شكد حلوه جانت وشلون صارت من صار السقوط ...

طلعت الخيار والطماطه وكعدت بالكاع اثرم زلاطه وامنيه كاعده جنهه فاره بحجة تضوك الخيار خاف مره وكلو اكلتو ع النص..

سمعت الباب انفتح يعني اجو فاروق وقيس دحكت ع نيران عدلت ضفيرتهه وعدلت قميصهه..

لفت انتباهي اثر بخدهه ماجان موجود قبل سالتهه كالت وكعت بس مومال وكعه واخواتهه وحده ادحك ع الثانيه...

دخلو فاروق وقيس سلموا وبوجهم للحمام يغسلون واني بديت احضر بالعشا ومرت عمي ويايه..

بدينه انصب وانخبصت دحكت ع نيران ماكو اختفت شويه واجت من الحديقه سالتهه امهه كالتلهه شفت الحديقه حلوه وجنت اشوف الورود...

كلنه كعدنه ع السفره ناكل وعمي يحجي بطولاتو وشلون جان عايش ببغداد وهو انسان نزيه مقتنع براتبو وماقصر ويه عائلتو ويكول اني مايوم اذيت مخلوق واحب اساعد الناس ومارجعت واحد دك بابي هذا كلام عمي المنافق ..

انتبهت ع نيران تسرق نظرات اعجاب ولمعه حب بعينهه كلساع ترفع راسهه وترجع تنزلو ياترى المن هاي؟؟

راقبتهه طول الوقت نظرات اعجابهه ولمعه عيونهه وتعدل ضفيرتهه الصفح كلهه جانت صوب قيس الي مارفع راسه ابد ولا دحك عليهه..

ابتسمت بداخلي قيس طيب الى درجه مايكدر يكره حته الي ياذي ونيران كلبهه طيب ودليل مساعدتهه لاخوتي معقوله راح يوكع بحبهه..

فاروق يحجي ويه عمي ومندمج وامنيه الفصعونه كاعده بصف ادهم ومرتجيه ع رجلو ودكلو عيونك حلوات انطيني ارموشك بس يومين وهو يضحك عليهه..

كملنه عشا ولميت السفره وساعدني البنات بغسل المواعين ورحنه كعدنه يمهم ..

نيران... من دخل فاروق وقيس اجتاحني احساس غريب واني ادحك لقيس وهدوءه وشخصيته..

اكثر واحد عجبني بيهم هو هادىء حيل وعيونه حيل حلوات لونهن عسلي وبيهن فد جاذبيه غريبه عيونه من النوع النعسانات ونظرته مثل الواحد الي منعس ومايكدر يفتح عينه..

دخل غسل وطلع برا لابس تراك نيلي ..فاروق كاعد يم بابا واني استغليت ماما واكفه تصب ويه ثريا وطلعت ورا..

جان واكف بالحديقه ولازم جكارته بيده وشايل الصونده مال الماطور يريد يسحب مي..

صحته ع كيف قيس قيس!!

التفت عليه وشمر الصونده ودنك بالكاع سد الحنفيه وجكارته بحلكه وتقرب اتجاهي گلبي يخفق سريع..

قيس.. هااا نيران...
.. قيس اني جبت الوصيه هاك اخذهه لان فاروق ملتهي ويه بابا واخاف ماتصير فرصه ..

سلمتهه اله وهو مدنك عليهه فتحهه يتاكد من عدهه واني اباوع ع ملامحه..

اول مره اشوفه من قرب ملامحه حاده اسمر وعيونه حلوه رمشه كلش طويل وشعره حيل حلو معلي شويه ومحدده من الجوانب وعنده شامه بطرف حاجبه..

اول مره اشوفه بهالقرب من اجونه بالكعده وشفته باوعلي بنظره سريعه ومن دخلت عليهم للاستقبال كدام الشيخ جانت نظرته بعد احلى حته ماعرفت افسرهه..

رفع راسه وباوعلي كال شكرا نيران ماقصرتي بس انتبهي ع نفسج زين واذا احتاجيتي شي احنه موجودين..

.. شكرا ماتقصرون..
.. ركز بوجهي وكال شبي خدج شنو هذا الاثر؟؟

...ارتبكت بسؤاله كتله لا تعورت وكعت ماكو شي بسرعه عفته ودخلت للمطبخ وايدي ع صدري احس گلبي يدك باذاني مدري شجاني...

عيني مانزلت من عنده وكلساع انتبه ع نفسي واكول نيران عيب استحي شنو هالتصرفات تخبلتي ...

بس هو ابد ماعبرني ولا حجه وياي ولا حته باوعلي مثل ما باوعتله اني..

كال بابا يله انروح كمت خليت الشال شلون ماجان ع راسي وطلعنه ..

طول الطريق بابا يمدح بيهم ويكول حبيتهم ولازم اوكفلهم واساعدهم عماد مو وجه نعمه وبهالحجي مدري صدك مدري جذب..
...

ثريا...
اليوم موعد النتائج واني گلبي نار كلساع ادهم يكلي هسه تجي محمره وتاليتج انعينج فراشه بالمستوصف ..

وصلت بيه من الخوف كمت ابجي وهم يضحكون ساعه ينصبون عليه وساعه يمدحون بيه... قيس هو راح يجيب النتيجه واني الوب مثل الوحده جاي تطلك ...

تاخر جثير وانه بدت اعصابي تنهار سمعت الباب انفتح لو احس رجليه ماتساعدني بعد ادفع بادهم اكلو روح جيبهه وهو يكول يولي احس روحي تعوقت..

اسمع صوت قيس وهو يصيح ثريا يول ثرياااا..

ماكدرت اتحرك خطوه سديت اذاني ودموعي تجري حسيت على ايوب وهو يخلي ايده ع ظهري ويهديني ..

قيس.. يول ثريا عزيزتنه حبيبة گلوبنه والله ورفعتي راسنه..

ايوب.. احجي قيس شكد معدلهه؟؟
.. معدلج91 الاولى ع مدرستج والمديره توصلج سلام وتباركلج...

تعالي هين يولي لاتبجين خلي اضمج بين اضلوعي..

ثريا.. بدون كل وعي احس كلبي راح يوكف شمرت نفسي بحضن قيس وابجي وهو يضحك بفرح..

هوسه اخوتي وصياحهم وفرحتهم لحد الان اتذكرهه احلى يوم مر بعمري هو هذا اليوم...

ادهم يشيلني ويفر بيه وعبالك ثريا ام 6 سنوات خجلانه  شايلني ويفرني ويصيح اروح فدوه ونذر لثريتنه...

لسه اتذكر ردة فعل اوس لزمني من راسي ويحبني من راسي ومن كصتي وخدودي ويرجع يضمني لحضنه ..

دموع فرح متجمعه بعيونهم ومايعرفون يعبرون عن الي يحسون بي..

انتظر فاروق ع نار اريدو اريد ابشرو ابويه حبيبي سندي اتنازل عن مستقبلوا بسبيلنه ..

كلماته الي خليتهن كدامي حافز وهو يكول اقري ثريا لا تخيبين ضني فرحينا مثل ما فرحناج...

بس انفتح الباب ركضت الو مثل الطفله بعمر 6 سنوات جان شايل علاكه بيدو ذبهه بالكاع ولفني بحضنو..

حضنه امان يعادل عشيرتي وديرتي كلهه مستحيل بيوم اعيش لحظه الامان بعيده عنو هو خيمتنه

عندو علم بالنتيجه حبني من راسي ويمسح دمعتي كلماته ترن باذاني ..

رفعة راسي بنيتي امشي بفخر والكل يباركلي بنجاحج ما اعرف شلون اوافي حقج بس ان شاء الله كدرت ولو بشي بسيط اكون وفيت وماقصرت..

اتمنيت هنا ويتوقف الزمن لحظات الفرح تكون قليله بس مجرد
ما استعيدهه احس وكانو انعاد الموقف من جديد وارجع ابتسم والفرحه تسيطر عليه...

استلامي للنتجه جان عباره عن بدايه جديده بحياتنه ربنا كريم اذا راد يرزق عبده ويفرحه بين يوم وليله

....
وصلت الوصيه للمحكمه وانحجزت كل الاملاك وعماتي وابوي وعمي اتخبلوا ..

شيخ ناصر ساحلهم للمحكمه وكاتبين تعهدات محد يتعرضلنه ولايوصلون لدارنه..

كل الي عرفتو اخوتي اخذو الوصيه وابوي انسجن بتهمه التزوير هو وعمي ورجل عمتي...

شيخ ناصر وحجي راضي هم ركضوا بيهه بس جانو ياخذون الشور من فاروق يكولون حته عماتي رايدات يجن ع فاروق شلون بيهن وين يعيشين بس ماقابل فاروق كايل كل حق يرجع لاهلو...

بيومهه فاروق جمعنه بليل وبده يحجيلنه وجانت هاي اخر لمه بهذا البيت..

فاروق.. الي ردنا حصلنا واملاكنه رجعت النه وثريا نجحت واوس وايوب قدمتو سادس وراح تكملون...

يعني شكد عانينه وصابنه يأس بس ان مع العسر يسرا حاشا لله ينسى عبد مظلوم هذا درس ماتنسو بعمركم كلما يصيبكم اليأس تذكروا حالنه هسه...

راح اكلكم شي البيت ماراح اطلع ابوي من عندو احسهه صعبه شعره ابيض واخلي كاعد بشارع لا الله ولانبيه يرضاهه..

راح اخذ السياره من عندو ويظل كاعد بالبيت ما اكدر اطلعو
عندو عائلتين هو وعمي والمشكله عمي عندو بنات ومحسوبات عرضنه ..

ادهم.. فاروق اسنين عايشين بهاي الخرابه بالشتا يفوت علينه المطر ونظل نجمع كراتين وانسد الشبابيك خلي ابوك شويه يضوك من هذا العذاب...

... صحيح الي سوا ماينغفر بس ثقوا بالله لحد الان متندم ع مدة ايدكم علي بسالفه الكعده ..

اكرهه وماراح اسامحو بس يبقى عندو مكانه يم ربو وراح نتحاسب اذا اذينا وهو  رجال جبير ...

ادهم.. اذا تريد تسامحو اني لاتحسبني وياكم واذا ابوي ما اخذ عقابو حته بكاعوا ما اسكن الف مره هانه وضربنه وطلعنه مثل المسوين جريمه لا ام ولا اب عدنه عاشوا بنعيم طول هاي السنين وهسه من طلع حگنه ماراح تحاسبو ..

قيس.. يول ادهم ليش هيج گلبك اسود ماكنالك روح اكعد وتسامر ويا هو بصوب واحنه بصوب بس مانطلعوا من البيت وين يعيش ولاتنسى عدنه اخوات من عندو ومرجعهن علينه..

ايوب.. كافي عشنه بمهزله طول هاي السنين استحي اكول اني شاب ومابجيبي الف دينار وابونه يوميه صاعد سياره حديثه وبموسم الزرع فلوسو مكومه وهو يبيع من حگنه ..

تريدون تسامحو اني والله متبري منه ليوم الدين لسه حرگة كلبي وخساره شهادتي ادك براسي ...

جان هسه متخرج ومحقق حلمي والي اريده بس بسبب الفگر العشنا ماكدرت اشتري دفتر واحد واكمل دراسه..

يولو نسيتو من انحل ونلگه ولد الطاگين شلون يستهزءون بينه الف مره تعاركنه وسمعنه كلام لسه من اتذكره يعصر كلبي...

فاروق انت ابونه ونحترمك ونحبك بس مال تجبرنه نسامحو مستحيل ولا راح تصير بيوم..

قيس.. يولو شصابكم شنو هالحجي هذا محد كال نسامحو بس ما نكعدو بالشارع هو ناقص غيره احنه هم ناقصين مثلو؟؟

اوس.. ايوب وادهم انه وياكم والمرينه بي صعب حيل وراح تخلص مرحلة الشباب وماشفنه شي من عدهه ..

لا طلعنه ولا اشترينه الي بنفسنه ولا حققنه حلم واحد من احلامنه ونفس المر الي جرعتوا اتجرعنه وياكم وحته ثريا الهه نصيب منو...

بس تذكرون كلام جدتي حليمه كالت اخذوا حقكم بمايرضي الله ولاتخلون الشيطان يصير بيناتكم..

كالت بس تخالفون شور ورأي فاروق راح تخسرون وراح يدخل بينكم الشيطان ويفرقكم وعبالك تدري بهذا اليوم راح يجي..

انسوا سالفه ابوي راح ننطي البيت لوجه الله لا انريد منه حمدا ولاشكورا وعمي لخاطر بناتو ..

ثريا.. ادهم وايوب معارضين رأي الكبار وحجايه منا وحجايه منا تكاونو مثل كل مره وصاح بيهم فاروق وسكتهم ...

فاروق.. كافي يولو كبرتوا وصار واحد ياكل بالثاني اخر كلام عندي هذا الي معترض علي يروح هو بنفسوا ويطلع ابو واخواته وعود هذيج الساعه خلي ادحكلوا يكدر يسويهه...

لاتحجون حجي ما تسوو ولاراح تسوون ذره من عندو ابونه انسان ظالم اكل حگنه نومنه بخرابه ماسأل علينه بس احنه غير  اذا سوينه مثلو شراح نفرق عنو..

اني مولاجل عيونو سويت هيج بس صدكوا لاجل نفسنه تدرون انصير مذمه بحلوك الوادم الي ماترحم اريد نبقى طول عمرنه سمعتنه حلوه ويترحمون للربانه مو يسبون حليمه...

ثريا... بعد كلام فاروق الكل سكت بس ماقابلين ايوب وادهم بس هم يحترمون فاروق بشكل موطبيعي...

بدينه انحظر بغراضنه لان فاروق استلم كل الاملاك واشترالنه بيت ع كدنه مرتب بس كل هذا فاروق ماسمح لابوي يتواصل ويا باي شكل من الاشكال..

كلشي تم عن طريق المحكمه وعن طريق شيخ ناصر هذا الانسان صدك شيخ وكدر ياخذ حقنه والفضل الاكبر لنيران الله دزهه بطريقنه ..

بيوم الي حملنه غراضنه وطلعنه من هذا البيت التفتت علي هاي اخر مره ادحك بي راح ننتقل لغير منطقه ..

اتذكرت اول يوم اجينه بي ومن اكلنه لفات وظلينه اسبوع بدون اكل بس لفات وبعدين اشترينه طباخ ...

رغم مساوئ هذا الدار بس ضم ذكرياتنه وضحكاتنه ومكاون اخوتي وورا ساعه يتراضون ابتسمت بفرح وطلعت من هذا الدار  واني اودع 18 سنه من عمري بالفگر وكلي امل ابدي من جديد بحياة العز...

صعدت بسياره صديق اوس والاغراض حملوهن بكيه هن قليلات كال فاروق اشترينه جديد .. متلهفه ادحك بيتنه الجديد وراح اعيش بسعاده بعد الحزن الي شفنا..

وصلنه للمنطقه حلوه وبيوتهه مرتبه بعيده كل البعد عن بيت ابوي ما ادري اخوتي ليش اختارو ينفصلون عن كل كرايبنه وفضلوا يعيشون بعيد...

نزلت من السياره وهم ينزلون بالغراض بيت مرتب طابق واحد الطرمه مالته كاشي ملون احمر وابيض (اشتايگر) والمطبخ امامي..بي الديوانيه والمضيف وغرفتين نوم وحديقه حلوه..

جنت حيل فرحانه بي بديت ارتب بالغراض عدنه كاونتر جديد وديوان بالمضيف وبالديوانيه تخم مال قنفات خشب ومعرض صغير مال تلفزيون ..

بديت ارتب بالتحفيات العاريه الي ع شكل ملائكه احبهم حيل لان من ذكرى جدتي الله يرحمهه  ..

خليت صورتنه ع المعرض من عهد جدتي اطارهه خشبي اتلمس بيهه واني اتذكر هذا اليوم...

جان عيد واني يمكن عمري 5 سنوات واخوتي بعدهم زغار بلابتدائيه اخذتنه جدتي للمصور وكصلنه صوره ابيض واسود ...

جدتي كاعده ع الكرسي ومخليتني ع رجلهه وداير مدايرهه اخوتي فاروق واكف بصفهه ومخلي ايدو ع جتفهه ...

ادهم مامنتبه ع الصوره يدحك بالسكف اتذكر المصور يكلو هين دحك وهو ولايمو...

ايوب ضاحك واسنانو الاماميه واكعات ومسوي عيونو حول ومخرب الصوره بوكتهه جدتي رزلتو..

قيس واوس واحد بصف الثاني ولازمين ادين بعض ومبتسمين...

الله ع ايام قبل وجيل الطيبين كعدت استعيد كل ذكرياتي من يجي العيد ونصيح حنش بويه حنش... يشتغل بالطين حنش.. يوميته عشرين حنش...

اتذكرت ايوب من يوميه يروح يحط سم مال فار لدجاجات بيت عمتي ام جاسم وخطيه كل 5 يموتن سوه...

ومن نكلوا شسويت يكول ليش ماتذبحهن عجل وتطبخهن خلي يفيدنهه....

ابتسمت ابتسامه عريضه واتذكرت الموقف الي جدتي رادت تلگحنه من السطح بيومهه...

جنت صغيره بعدني مو بالمدرسه وادهم بلاول يوميه نصعد نلگح طابوك على بيت عمتي ام جاسم لان بصف بيتنه جانت ...

ليش مانلگح وتجي براس ابنهه جاسم  وصار الصياح وشافوا راسنه من فوك خفنه جثير وادهم كال خلي نختل بالتانكي مال المي جبير بس مامستخدم مزروف جان..

صعدني وكوه طبيت من الفتحه وهو مايكدر يصعد ومايطب من الفتحه انه تكربست وهو يصيح هسه تموتين وتصيرين طحالب خضر...

واني ابجي اتخيل صدك اصير طحلب اخضر فوك كل هذا سمع صوت جدتي اجتنه كوم شيل قطعه خشب جبيره وغطي الفتحه واختنكت...

لو ماجدتي جان هسه باعداد الموتى لسه من يتذكرهه يكول شكد جنت غبي عقلي تنكه ..

فززني صوت قيس وهو يكول ثريا جبت اكل جاهز كومي صبي متنه جوع...

كمت صبيت الغده واكلنه شكد فرحانه صارت عندي غرفه خاصه والمختارهه قيس حيل عجبتني..

جربايه ام نفر خشب وكنتور وميز وكومدي مال احذيه مجرد ما اتذكر هاي اللحظات تسري بداخلي فرحه من جديد...

غرفه اخوتي بيهه كنتور ابو 5 بيبان وشماعه مال ملابس وجربايه وحده بس لادهم لان ماينام بالكاع مايحبهه..

من جنه بهذا البيت عندو قريوله حديد الوحيد بيهم ماينام بالكاع...

احس براحه موطبيعيه بهذا البيت وفاروق وقيس فتحو مجمع مال جمله تزويد المحلات بالمواد الغذائيه وعافو العماله...

اشترينه سياره تكسي لاوس يشتغل بيهه ومرات ايوب يطلع وادهم ويه فاروق بالشغل ترتب وضعنه وصار عدنه وارد شهري ونشتري كلشي بنفسنه...

مرات افكر اكول هسه اخوتي ارتاحوا هسه ينتبهون ع نفسهم ويكومون يحبون واحتمال يقررون يتزوجون تاخذني التخيلات لبعيد والبيت متروس جهال اخوتي ويصيحولي عمه ...

شكد حلو الانسان يعيش بتخيلاته ولا يفز لواقعه المؤلم شيصير لو كل الي تخيلته يصير ليش لازم كل فرحه تبقه ناقصه وماتكمل ...

ونبقه نتحسر عليهه طول عمرنه راسنه انترس شيب ولسه ماجربنه طعم الفرحه الحقيقيه الي ادوم وما اتروح بساعه لو بشهر ...

يتببببع.....

شكرا لكل من دعالي بظهر الغيب شويه حالته تحسنت بفضل دعائكم شكرا لكل من سال عني وماكدرت اجاوب اعذروني ع التاخير بالقصه اذا صار ضرف طارىء انشر بين يوم ويوم ما احب اخذلكم..