رواية ازمة ضمير الفصل السادس وأربعون 46 - بقلم Rozaya1122

ازمة ضمير ... البارت الرابع والاربعون
«للكاتبه روزايه»

حن وانه حن
غناهه ياس بكل حزن...
واني استمع واتذكرك
ودموعي تاكل بالجفن...
يمته تحن وترد الي
والجسد بعدك منطعن...
حن وانه حن...
...

ثريا... طبكت الورقه ورجعتهه لجيب الستره يوميه اكتشف شي جديد بايوب شلون يشتغل وحده ومنيلو هلكد معارف ومقابل الوزير على مقابله...

امنيه ناجحه من السادس معناتهه بهاي السنه الي فاتت ماوكفت ولاكتفت اديهه وظلت تنوح على حبهه المذبوح..

كملت دراستهه وناجحه من السادس العلمي بمعدل 62 بالنسبه لوضعهه اكدر اكول عليهه بطله هم خارجي وهم دور اول وهم وضعهه والفتره الي مرت بيهه بحد ذاتهه دمار...

ايوب ساعي بيهه ومقدملهه مسائي معهد طبي ومكتوب بالموافقه تحولت من قسم التحليلات لقسم الصيدله واستظافه على المسائي...

كلهن هذني ايوب راكض بيهن واكيد التقديم على حسابه شكد مرت اشهر طويله وامنيه كملت دربهه بيأس وحزن وادهم وكف بنفس المكان لاتقدم ولاتراجع ...

قررت هالمره ما احجي واكتم السر بكلبي تطلع من غير ماتطلع من عندي نزلت جوه وحسبه تاخذني وحسبه تردني...

بالي على ادهم وضعه موتمام ويكابر يمارس حياتو طبيعيه بس بداخلو بس الله يدري بي ...

البيت يخنك والكل يصيح مامرتاح وكلنه نعرف سوالف اسماء هاي والحجيه ترقي بالبيت وماكو ويوميه نلكه شي مرشوش بالباب صارت بلاملحه وحته مانكدر نحجي خاف دكول تتبلون عليه...

ثاني يوم بالدوام كاعده واجه فارس بعد السلام والاخذ والعطه رجع فتح موضوع الزواج وكال اريد اتقدملج بهاي الايام ولازم ترجعيلي خبر ...

ماكدرت احجي ظليت مدنكه وخجلانه صح ما احمل مشاعر لفارس وكلبي خالي بس اعتبرو زواج تقليدي حالي حال الالف البنات وفارس مابي شي يتعيب..

انتظرت يجون اهلو العصر ومحد اجه ومرت ٤ ايام ادحكو بالدوام بس مايفتح موضوع حته انه خجلت من نفسي يوميه اتحضر ومايجي ولا اكدر اعرف السبب...

بديت اتجنبه حته ما احجي ويا اذا ماناوي يخطب على شنو كاعد وياي ويفتح مواضيع ...

خلص الاسبوع وبيوم العصر اندك الباب جنت اغسل بالطرمه رحت فتحتو نفسهن النسوان الي اجن خطبني بالرمادي..

سلمت عليهم وفتحت باب المضيف وصحت الحجيه راحت ام شذره كعدت وياهن وشذره قدمت الضيافه ...

ماتاخرن شويه وطلعن والحجيه كالتلهن يجون اخوتهه ونشورهم وانردلكم خبر...

بليل صادفو كلهم موجودين وحجت الحجيه كالت اليوم اهل الولد فارس القبل خطب ثريا اجو خطبوهه وكتلهم ورا اخوتهه...

فاروق.. فارس شجابو ووين يعرف ثريا انتقلت ببغداد؟؟

ثريا.. بديت ابلع بريكي بسرعه لكفهه فاروق والتفت عليه وحجه بنبره حاده وكال مو وياج ثريا وين يعرف انتي هين؟

ثريا.. قبل شكم يوم دحكني بالمستشفى وسالني وكتلو انتقلنه هين كوه حجيت احس جسمي يرجف نظره فاروق ماحبيتهه وكانو افتهم كلشي .

فاروق.. مو المفروض من ادحكي تجين تحجين اذا حاجي وياج ؟؟؟

الحجيه.. صلي ع النبي فاروق غير موضف وياهه وهو من زمان رايدهه مابيهه شي يايمه...

فاروق.. مابيهه شي وفارس خوش ولد بس كلامي الج ثريا لاتحسبين نفسج كبرتي وتصرفين من شور راسج الولد ما اجه خطب اذا ما اخذ الموافقه من عندج وانطيتي العنوان...

ثريا.. دنكت راسي وظليت ساكته ما اعرف شجاوب ..
قيس.. حجه وياج؟ وصار شكد من دحكتي..

ثريا.. لا بس بخصوص الشغل يحجي وما انطيته العنوان هو ما ادري منين اخذو..

فاروق... الراي الاخير الج اذا موافقه خلي انرجعلو خبر بعد مانتاكد من اخلاقو ونسال عنو واذا ماموافقه ممنوع تخطين خطوه اوتصرفين تصرف واحد بدون علمنه..

ثريا.. جان ضايج وماسمح لاحد يناقش بسرعه كام واخوتي كذلك دحكولي بنظره غريبه...

كلهم كامو بس ايوب كاعد يدحك اخبار وكلساع يخزرني وانه ابلع بريكي صدك خجلت من موقفي مو غايتي اضم عليهم بس ماتوقعت ردة فعلهم نسيت اخوتي كلهم مفتحين باللبن ومايفوتهم شي..

رجعت الموافقه للحجيه وهي كالت لفاروق ورا اسبوع يله رجع الموافقه فاروق بعد ماسالو عنو بالتفصيل والكل مدح بيهم...

ثاني يوم داومت ولكيت فارس ينتظرني بالصيدليه كتله من ننخطب يله نحجي ما اكدر اوكف وياك احس اخوتي من كل مكان يراقبوني...

اجت الزلم وحددنه يوم للخطبه صادفت يوم جمعه جابو الشيخ عقدنه الفاجئتي امو ماقبلت بالحفله وكالت اذا تريدين تسوين خطبه احنه منجي لاتحسبين احسابنه..

المن اسويهه لاعندي صديقات هين ولاعندي كرايب واخوات ماسويت حفله بس بوقتهه حيل انقهرت لان موقف امو موحلو وكانو مجبوره ...

ماحسيت بنفسي مخطوبه ابد لان بس شيخ ولاكعدنه سوه ولا لبسنه حلقات لان امو جابتهه ولبستنياهه وكالت عدنه شغل ومن حجيتلو كال انتي الي ماقبلتي بالحفله...

بدت رحمه الله من هسه كامت تسوي الغلط وتنسبو اليه حجيتلو وفهمتو الوضع فرك وجهو بعصبيه وكال سدي الموضوع ..

ما جنت حاسه بعدم قبول امو ولا ادري امو مارايدتني كل ضني اجت خطبت مثل من اجتي اول مره وصح مامبين عليهه بس بعد الخطبه اكتشفت هالشي...

جانت رافضتني رفض نهائي ولخاطر ابنهه اجت خطبتني حته عزمونه بيوم الي عقدنه محكمه ومارحت لان ماخابرتني ولاكلفت نفسهه الي عزمني ابو ومباركتلي...

حجيت للحجيه كالت اسكتي هم تريدين تفسخين حته تصيرين علج بالحلوك ورا العرس اكسبيهه...

مر شهر ع خطبتي وجنه كاعدين كالعاده ورا العشه وكال فاروق   هاي السنه الاولى عندي خلصت ...

وما ادحك بيهه داعي لتأجيل الزواج واحنه نفس البيت كلشي عدنه كامل بيتنه ومكونين نفسنه لذلك خاله ام شذره اخذي شذره وابدو جهزو لراس الشهر العرس...

ثريا.. ولايتوب فاروق من هاي القرارات المفاجئه خلاهه كلهه صافنه بس محد اعترض لان ماكو داعي للتاخير مثل ماكال..

بس شذره تفاجات وكالتلو اشو ما ادري اني ؟؟

فاروق.. هاي دريتي وكدامج شهر تلحكين واذا مالحكتي هم اخذي الوقت الي يعجبج ..

شذره.. توكل ع الله يايمه تلحك شعدهه واذا مالحكنه نكلك مابي داعي للتاخير ...

ثريا.. طلعوا اخوتي وشذره تصيح ما الحك شنو بعد شهر ليش ماكال حته اظافيري كصيتهم وشوكت يطولن ...

ثريا.. ياشذره تلحكين يولي بعد شهر حرتي باظافيرج...

الحجيه.. خايبه الرجال مستوي مادحكي عينو ماتنزل من عندج لاتخلين زلمتنه يخرب من وراج..

شذره.. شمسويه اني يابيبي؟؟

الحجيه.. تتموعين كدامو وتتدلعين يوميه وهو جد جدو مسموط خايبه كعدي راحه وخلي ياخذج ويرتاح..

شذره.. بيبي موهيج الحجي بس هو ماكالي قراره مفاجئ غير تناقش بي..

الحجيه.. عليمن تتناقشين هن شكم هدم تشتري وذهب ومشتريه كومن لا تمدين بركبتج علي...

ثريا.. اقتنعت شذره وبدت من ثاني يوم تطلع اتجهز مرات اطلع وياهن هم اجهز ومرات عندي دوام وما الحك عليهن..

علاقتي ويه فارس زينه ولا عندي تواصل ويه اهله ولا شي هو مايجي ابد للبيت بس نلتقي بالدوام...

هوانسان مثقف حته بكلامو لا يتجاوز ولا يحجي كلام بي قله ادب مرتاحه ويا بشكل موطبيعي وبديت احبه واتعلق بي اهتمامو واخلاقو كفيله تخليني احبو...

قرب زواج فاروق وكمل كلشي هالمره نوينه نسوي عرس جبير ونفرح بي اول واحد والجبير وجنه نخطط لكلشي...

بس فاروق ماقبل كال عرس بسيط وثاني يوم نسافر لتركيا جانت تركيا غاليه وموكلهه تروحلهه ..

بس ماقبل بالعرس والهوسه ويكول ماعندي كرايب تسوه حته احتفل وياهه مقرر ثاني يوم يسافر ...

اجه اليوم الي هو حنه هو عرس اجو معارفو واصدقاء اخوتي واحنه كاعدين اندحك من الجام وظلينه كاعدين وحدنه..

شذره لا اخت ولا بنت خال ولابنت عام ولا احنه الي عدنه وماسوينه حفله جانت شذره ضايجه حيل وامهه تسكت بيهه..

اسمع امهه تقنع بيهه ودكلهه راح يعوضج بسفره وشهر عسل تظلين تذكري طول عمرج شسوين بالهوسه وانتي ماعندج احد تعزمي صديقتج وماتكدر تجي...

بليل من انريد انام دحكت فاروق واكف يم الدرج ولازم شذره من اكتافهه وهي مدنكه وتمسح بدموعهه وهو يهمس باذانهه...

ما اسمع شي لان جانو بعيدين وانه بالمطبخ اكيد زعلانه لان ماسوالهه حفله جان صوت بجيهه واضح لان هي من الصبح كاتمه دموعهه وكلساع تريد تبجي...

حضنهه ويمسد على راسهه شويه وبعدين راحت للغرفه وهو صعد ليفوك..

كملت شغلي ورحت للغرفه مدت بفراشي بصفهه كتلهه شذره نايمه؟؟

شذره.. لا كاعده منين يجيني النوم..
ثريا.. ليش كاعده يولي نامي باجر وراج عرس..

... ثريا اليوم حيل ضايجه وشعوري موحلو جنت اتمنى تسوولي حفله صح اني ماعندي احد ولا خالات ولا عمات بس حالي حال كل ابنيه تتمنى عرس وحفله ..

... ياحبييه ياشذره من ناحية حقج بس احنه مثلج هم شكد عدنه كرايب عدنه عمات وخالات بس بلاسم ما عدنه احد ياشذره وفاروق اتاذه من كرايبنه جثير وبي طبيعه مايكدر يجامل ومايريد يعكر مزاجو بهيج ايام...

... عاذرته هسه اعتذرلي وكال لو تصير حفله جان تسمعين الف كلمه عماتي مايجن يباركن لا يجن بس يخلقن مشكله...

وكال اوعدج اعوضج عن هذا اليوم بالشي الي يرضيج بس سالفه الحفله لاتضوجين عليهه...

ثريا.. مدام كالج اوعدج هاهي هو من ينطي وعد ينفذو لاتهتمين فرغي راسج وباجر عروس عيشي اللحظه..

شذره.. باعي ثريا اكو خوف ورهبه بداخلي موطبيعي من باجر
... عادي كل عروس هيج مدام يحبج فاروق لاتخافين وعيشي ايامج واللحظات الجميله ولاتفوتيهه...

ثريا.. ثاني يوم اخوتي ملتهين واني وشذره رحنه ب١٠ للصالون جانت تسريحتهه هادئه حيل ومكياجهه هادئ برزت ملامحهه وطلعت بعد احلى ...

كل الموجودات بالصالون صلن ع النبي هي بدون مكياج حلوه وشعرهه ظل اسود حته ماصبغته ...

اجه علينه فاروق جانت زفتهم من الصالون وموهوسه هادئه واغلبهم شخصيات الموجودين بالزفه الجان يسوق قاضي متعين قبل سنتين ...

شذره ... عرسنه جان بالفندق وثاني يوم من الفندق ونسافر حته مانرجع للبيت كاعده بالسياره وكلبي ينبض سريع اتمنيت السياره ماتوكف وتظل تمشي...

وصلنه للفندق ونزلت وياي ثريا وماما والحجيه ما ادري شجانن يحجن وينصحني واني فاصله واتخيل وسويت فلم اكشن براسي ..

انسد الباب واسمع صوت المفتاح وطكه القفل اخذت روحي اتمنيت اركض ورا ماما حيل جنت متوتره وخايفه من هذا اليوم ...

عاملني بكل حنيه بعدما باسني وكال طالعه تخبلين بس لا جاوبته ولا اتجاوبت ويا مثل الصنم وواكفه..

كعد ع الجربايه نزع حذائه وكال تعالي اكعدي بصفي كعدت ع حافه الجربايه وهو لزم ايدي وخلاهه على رجله ويحرك باصبعه الجبير على كف ايدي...

فاروق.. شذرتي الحلوه ليش هيج خايفه ماكو داعي للخوف..

شذره.. فاروق الله عليك بروح بيبيتك حليمه خلي انبدل وانام حجيت هيج والدموع تلالي بعيني ...

فاروق... ضحك بصوت عالي ومن كل كلبه وسحب راسي لصدره .. ياحبيبتي ماكو داعي تحلفيني من تهدئين يله لاتخافين يابنيتي ...

شذره.. الله ذب عليه البجي اتخيل الاحداث وابجي وهو يهدي بيه وانتظره ينطيني وعد مايسوي شي بس ماحجه...

كام وكف ولزمني من اكتافي ودنك راسه عليه وكال كافي بجي تعالي خلي نبدل ونصلي ونتعشه كافي عليمن تبجين ..

... مسحت دموعي وفرني ليورا وايده على خصري وايده الثانيه تفتح بسحاب البدله ...

جنت خجلانه حيل مغمضه عيوني والضوه مفتوح حته ماسده بس لفني بحضنه حيل وحسيت بحراره حضنه ومشاني بنص الغرفه وحجه يم اذني يله فوتي اسبحي بين ما انزل اجيب عشه...

شذره.. سبحت وطلعت من الحمام لافه نفسي بالمنشفه همزين بعده ماراجع بسرعه بدلت ولبست سيت النوم الابيض الي يفضح مايستر..

اتلفت يمنه ويسره شسوي هم قصير وهم خفيف جربت اكعد بي على الكرسي فضيحه واكوم اطلعلي بجامه ماما مخليتهه بالجنطه والبسهه جوه السيت ...

لونهه اسود بس برموده رفعتهه سويتهه لحد الركبه يله ارتاحيت وفتحت شعري ونزلته حته يغطي اكتافي وصدري ...

اجه فاروق مبدل وجايب عشه باوعلي وكال نعيما بس وياهه ابتسامه وهو يباوع للبجامه...

كال خلي نصلي وبعدين ناكل هو راح توضه واني فرشت السجاده وصلينه وكمت حضرت الاكل اثنينه مانشتهي ما اكلنه هوايه ...

بين مالميت الاكل هو غسل ومدد ويباوعلي افتر بالغرفه كدامه غسلت واجيت كعدت فتحلي ايده وكال تعالي هين ...

خليت راسي على صدره وهو يلعب بشعري ماحرجني ولاكال ليش لابسه هيج بس حسيت بحراره جسمه وبدت تتوالى عليه البوسات من كل جانب..

اريد امنعه بس يلزم ايدي رغم قساوته الي طلعت عكس ايام الخطوبه بس جنت ذايبه بحضنه...

حته بوسته اختلفت عن الخطوبه وكانو هو هذا فاروق الحقيقي الي اول ما تعرفت علي كلت مبين قاسي وعنيف وتفاجات بي بالخطبه رومانسي.....

اخذني بين احضانه وبلمساته الجريئه الي سلبت ارادتي بالكامل مد ايده طفه الضوه وبعدهه اخذني بجوله عارمه طلع هو المنتصر بيهه...

بسرعه سحبت الفرشه وغطيت نفسي بيهه وضميت وجهي وهو سحبهه من عندي ويبوس بيه بركبتي ورجع باسني من راسي وكال مبروك ...

حلكي يابس وريكي نشف ولا رديت علي بس هو كام راح للحمام واني احس كل جزء بيه منتفض وماجاي اسيطر ولا يهدء كلبي..

طلع من الحمام ولكاني ع نفس نومتي احس جسمي صار ثكيل واريد اظل بعزله وما اريد اكوم...

كعد يم راسي الي مغطيته من الخجل وكال عجبتج النومه كومي بنيتي ...

مارفعت راسي وما احس علي غير يشيلني من الفراش واني اتخبلت دخيلك نزلني خليت ايدي على عيونه وهو يضحك...

بس نزلني بالحمام سديت الباب وهو يكول انتي جبتيهه لنفسج حته منشفه ما اخذت وياي الخجل بهاي اللحظه ماينوصف...

صحت علي انطاني وحده وملابسي سبحت وطلعت اخبي وجهي عنه بعدهه غمرت راسي بحضنه ونمت على صوت همساته وغزله ...

ثاني يوم كعدت بوساته من المكان المحبب اله كمت غسلت وتريكنه وطلعنه للمطار حجزنه جان ب١١ لتركيا...

الطريق متعب ومناك اني جنت بليله جهاد بس وصلنه خابر على الحجيه وحجيت ويه ماما طمنتهه وكتلهه تعبانين راح انام...

هو واكف بصفي وهي دكلي شذره ماما سولفيلي خوما تاذيتي واني اكلهه لا وهي دكلي صيري سباعيه ودللي وهو يضحك يكلي سمعي نصيحه امج...

ثريا... بعد عرس فاروق وسفره كملت كل تجهيزاتي لان عرسي قريب واليوم يجي فاروق من السفر صارلهم اسبوعين...

وصلو الظهر واحنه مهوسين وفاروق بوجهه للشغل وشذره صايره بعد احلى حته سمنانه ...

بهاي الشهرين عشنه اجواء فرح والكل فرحان وبعد ايام راح اطلع من البيت واكوم اجيهم خطار ...

جان شهر رجب لسه اتذكر سنه ٢٠١١ وايوب اخذ جنطتو ونزل كال حجزت للعمره وراح اروح وباس الحجيه من راسهه كالهه عذريني ماكدرت اخذج لغايه في نفس يعقوب ...

سلمنه علي وباسني من راسي كال خاف ما الحك على زواجج بهاي الايام بس من ارجع هديتج موجوده...

راح ايوب للعمره واني ورا اسبوع صار زواجي سويت يوم واحد هو حنه هو عرس محد اجه من اهله وجانت حفلتي تنعد ع الاصابع شكم وحده من جيرانه وشكم وحده من البنات الي وياي...

صدك ضجت وانقهرت لومامسويه احسن مايلام فاروق من ماسوه عرس وعوضهه بسفر بس فارس ماقبل ع السفر...

اجتي الزفه وطلعت من بيت اخوتي جنت ادحك عليهم من الجامه مال السياره ضايجين وهم يسلمون على الزلم خاصه ادهم تعبان من كلشي...

اتزوجت وانتقلت لحياة ثانيه ومن اول يوم اكتشفت بان الوحيد بهاي العائله بس فارس يريدني اختو وامو ماحابتني لان من رافضه فارس متاذي بعدهه وع اساس بهاي الفتره يخطبولو بنت خالو وانه طلعت بدربو من جديد...

ماعليه بيهم غير اكمل شغلي واروح لغرفتي جانت جوه وهن هم مالهن علاقه بيه ومن الاساس هم عائله مثقفه وهادئه ...

ورا عرسي باسبوع رحت لاهلي جان ايوب جاي ولكيت شذره مشتريلهه فاروق تليفون ارتاحيت ع الاقل اكدر اتواصل وياهه...

ايام وانه ابجي عليهم مامتعوده انام بعيده عنهم حته فارس مل وكام يزعل حيل تعذبت بزواجي وكوه تحملت وتعودت ع فراكهم...

مع العلم قريبين بس روحي صارت بيهم واحس نفسي بعيده بس من اشترت شذره تليفون كمت اخابرهه يوميه...

بعد مرور 6 اشهر....

ثريا... كاعده بمطبخ بيتنه وشذره حامل ومخليه ايدهه على بطنهه وتحجي ويا شلون بيك يا ابن فاروق موزرفت خاصرتي...

شذره حملت ورا السبعه بسرعه واخذت سونار قبل شكم يوم وطلع بيهه ولد والفرحه شكبرهه بالبيت واخيرا راح يجينه حفيد...

فاروق تقريبا بعد شهر ويكمل دراسه ويمارس مهنتو وقيس على حالو دورو بغداد كلهه ومالكو اثر للبنات..

ادهم يوم زين وعشره لا ماراح للطبيب ابد ومن واحك يحاجي بسرعه يعصب غرفتو مامخلي شي صاح بيهه دكول شذره اسمع صوت التكسر واصعد الكا مكسر شكو شي كدامو...

مرت سنتين على فراك امنيه وموبس هو اشتاكلهه كلنه نتمنى اندحكهه ولو دقيقه ملينه من ايوب من كدما نسال بي ومايقبل اخر شي كال هي ماتقبل ادحك احد ومحملتني امانه ما اكول ...

ايسنه وتاكدنه امنيه اختارت طريق بعيد عن حب ادهم وماتريد تتذكر اي شي من عندو ولا تريد ادحك وجهو...

حجت الحجيه وكالت اوس ليش ماتزوج ماقبل رجعت على ايوب هم ماقبل وقيس وادهم محد يكدر يفتح هيج موضوع كدامهم...

انه ماصار عندي حمل لحد الان دائما اكول بعدني عروس وهو رزق رب العالمين ومامستعجلين علي بس ام فارس بالطبه والطلعه تسمعني حجي...

مرات يجي ايوب ياخذني من الدوام لان فارس انقل لمركز صحي اكو ابنيه ويايه هم صيدلانيه بس هستوهه متعينه مره وصلتهه وياي بطريقنه..

عينهه ع ايوب ولا نزلتهه وحته سالتني علي دحكت علامات الاعجاب بعيونهه بس هو ما يرفع عينو عليهه ولا يدحكلهه...

فتحت الموضوع ويا كال سدي هيج سالفه انه ملاحظهه بس مو من النوع الي يعجبني ..

... ايوب تدري شكد مر ع وفاه رؤى وانت لسه حابس نفسك بحبهه..

... ثريا انه حبيت رؤى حب حقيقي موبيدي ما اكدر انساهه احسهه وياي وين ما اروح ...

اكدر اتزوج واكون عائله سهله حالي حال الالف المتزوجين زواج تقليدي بس يابنتي كلبي المن انطي الي اتزوجهه ماتريد من عندي حب ...

ثريا... حاول تنسه يا ايوب اسمك عليك وصدك صبرت صبر ايوب وبعدك تعاني...

فارس سافر لمؤتمر بمصر وانه اجيت يم اخوتي هذا اليوم الرابع...

جنت جايه بالطريق هستوني راجعه من الدوام ظهريه والشارع يصفر امشي بشارع وادحك من بعيد وحده لابسه عبايه ومدري شخلت يم بابنه وصعدت سياره وراحت...

كمت امشي سريع وصلت للباب والسياره راحت وادحك طين اسود وبس وسخ شعر واعظام مادري مال شنو ومشمور ابابنه وبنصهن ورقه ملطخه بالوسخ...

الخوف تملكني وركضت ع الحجيه صحتهه اخذت الورقه وفتحتهه مكتوب بيهه ادهم ادهم ادهم ٣ مرات ومزرفيهه ومكتوب الموت الموت المرض المرض وبعد اسماء مدري شنو ...

مدري شجابت الحجيه مي ورشتو وتقره ايات واني اصك من الخوف الي دحكتو يوكف العقل منو هاي اسماء ليش صعدت سياره وماطبت لبيت عمهه...

لوما الحجيه وتسوي ترقيه جان هسه ادهم الله اعلم بحالو شبي من مصايب من ورا النسوان...

....
ثريا.. رجعت وحدي انه وموضفه وياي لان ابو الخط مااجانه كالت نرجع بخط اختي مال طالبات معهد...

خابرت اختهه وصعدنه كله بنات كعدت بالمقدمه التفتت على اخت البنيه سلمت عليهه جانت اكو وحده كاعده بلاخير مخليه السجل كدام وجهه ومادحكتهه...

رجعت اسولف ويه البنيه الوياي وكفت سيارتنه بسيطره وازدحام اسمع السايق يحجي ويه واحد بالشارع يكلو نقيب استخبارات جاي للسيطره واكو تفتيش ..

يمشي السير بطيء لحدما وصلنه قريب ع السيطره وادحك ادهم واكف ومخلي ادينو بجيبو والنجمات تلالي ع اكتافو واكو جنود وضباط واكفين يمو ...

بس الوجه حزين والحواجب معكوده والشمس ضاربه على عيونو طالع لونهن العسلي والرموش تخبل...

وصلت السياره قريبه وكدامنه سياره كلهه شباب ياخذون هويتهم يدققون بيهه واجت عين ادهم على سيارتنه...

ما انتبه عليه لان جنت كاعده بالجهه الثانيه  بس عيونو اجت على سيارتنه ومانزلهه كل ضني دحكني ...

حته كلت للبنات هذا اخوي يمكن دحكني بس الظاهر جنت غلطانه وعينو مو عليه ..

وصل السره النه والشرطه يدقق بهويه السايق وادهم عينو على الخانه الاخيره وبالضبط على هاي البنيه الي مخليه السجل كدام وجهه...

التفتت عليهه وادحكهه مخليه ايدهه من جهه الجامه ومغطيه وجهه والبنات يصيحن اماني شوفي هذاك الضابط يمه يخبل...

ادحك ع اخوي الي الي مانزلت عينو وخطواتو اقتربت للسياره والبنيه مامطلعه ولا شويه من وجهه وصديقاتهه بس يتغزلن بادهم....

مد راسو الشرطي وكال اذا طالبات اريد هوياتكم حسب ماسمعنه من السايق اكو اخباريه البنات كلهن طلعن هوياتهن وسلمنهه للسايق...

والشرطي اخذهن سلمهن لادهم المفروض يسلمهم لابو الحاسبه بس تفاجات وهو يسلمهن بيد اخوي...

وبعده مستمر بالنظر كلساع تجي عينو على اخر وحده وصلت بيه انزل واكله ادهم انه هين عبالي علمود الاجراءات وكلهم الواكفين استخبارات يعني شي جبير...

ادحك ع ادهم يبلع عينو ع الهويات ويدحك عليهن بتركيز....

يتببببع.... متابعه ممتعه...

اعذروني البرج الي يمنه عاطل صار يومين وانتن الكاعدات تحجن ودكولن اريد تعليقات همزين من شفتج هسه ما اطلعن بس وكت ماكو بارت ماعاجبتج القصه والانتظار لا تابعيهه وكرميني بسكوتج روحي تابعي غيري..... طبعا موللكل اشكر متابعيني الكرام...