رواية ازمة ضمير الفصل الخامس وأربعون 45 - بقلم Rozaya1122

ازمة ضمير ... البارت الثالث والاربعون
«للكاتبه روزايه»

( بارت مفاجئ لعيونكم الحلوين ... احبكم)

‏ولا حنيتّ
ولا ونيتّ
ولا طارش چذب وديتّ
ولك مرّلي بحلم ،
واحسبها لك جية .. واگولن جيتّ...
....

ثريا.. ماعرفت شحجي كل هاي الاشهر وراح يصير سنه كامله واخوي متعذب بنارو وبس يريد خيط امل يدلي بيهه ...

حجه جدهه بنبره محمله غضب رغم كبر سنو وظهرو محني بس حجه بصيغه امر وكال موجود العلاج؟؟

طلعتو اله ومديت ايدي وكتلو حجي شلونهه امنيه وليش كلتو مويمنه واحنه بالنه يمهه...

الحجي... مامبين بالج عليهه كلي لاخوج ديرباله يجي ويعتب بابي خاف سمع بيهه يمي وراح تخبري..

جان مخلي اصبعو كدام وجهي وحجه بتهديد وراح ما انطاني مجال حته اكمل ويا احس سالفه امنيه بيهه وماتتازم اكيد هسه ادهم ماراح يسكت بعد ماعرف مكانهه...

خلص دوامي ورجعت يوميه امر من شارع بيت جدهه يعني امنيه ونيران عايشات هين زين وضعهن شلونو لازم اروحلهن وادحكهن..

وصلت للبيت لكيت اخوتي كلهم موجودين ومهوسين سالت شذره شكو شصاير ؟؟

شذره... ما اعرف بس اجه تليفون لفاروق كالولو ابوك مريض وبالمستشفى وطالب فاروق واخوته يجون حته يبرو الذمه..

ثريا.. التفتت على اخوتي كتلهم شبي ابوي..
ايوب.. لبه تلب عيونج ولي من وجهي عندج ابو وتحجين..

اوس.. يول ايوب انت مخبل شبيك تگب اعلى من الواحد شئت ام ابيت يبقه ابوك..

ايوب.. اششش يول ماعندي ابو ولو ما اخاف من الله لا اروح ادوس بنص كلبو لاتذكروني بسوايتو هو وفلاح العار..

راح ثار رؤى وماخليتوني اكتلهم بيدي لان طلعو اصدقاء ابوك العار وعمك ..

اوس.. دخيلك مرت ٧ سنين وانت ادور ثار مو انحكمو وانعدمو بعد حارك دمك عليمن..

ثريا.. ايوب شعل الجكاره وخلاهه بحلكو واندار ع قيس
كالو اذا رحت لابوك كلو اشتعلت روحك بالدنيا قبل الاخره...

الحجيه.. خايب صارلك اسبوع متخبل علينه استهدي برحمن يايمه شجاك عصبي دحك عيونك شلون حمر..

ايوب.. مو تشكون الكلب كاعدين يمسلتون ابوي وابوي لبه تلب عيونكم باعكم وانتم زغار ...

ومرت ايام واحنه جوعانين وهو خير من الله يوم دك بابكم سأل علينه وهسه داز عليكم وانتم صفكتو الو ...

فاروق.. انت صاير موطبيعي ابد منو الرايح فهمني كلهم اخوتك ماقبلو يرحون واذا مات الله يرحمه نتحاسب يوم القيامه وكل واحد ياخذ الي الو والي علي...

يول ايوب يا ابني هدي حالك تحرك بهالجكاير واعصابك نار على يامال تريد توكع نفسك ابليه ...

ايوب.. سكتت بس سكتو قيس لا ابتلي بي كاعد يمشخط يمي..

قيس.. طاح حظك على راسك ريشه لازم مانحاجيك استاذ ايوب ..

ثريا.. على كيفكم اذكرو الله خلي اكلكم شي اليوم عرفت مكان البنات اجه جدهن اخذ علاج امنيه..

بعدني مامكمله كلامي وما احس غير الشحاطه اجتني تركض واجت برجلي ..

ايوب.. اليوم ابوج احركو الحلك الاعوج بالكبر روحي من وجهي لا ابتلي بيومج...

ثريا.. عصب حيل ماقصدي احجي شي غلط بس ردت اهديهم بس ايوب هد عليه ولازم نفسو بالكوه بسرعه ركضت للغرفه واسمع عياطو وهو يتكاون ويه قيس...

قيس ركض لبيت جد البنات وادهم ماموجود جان وفاروق كال خلي يروح ياكل المقسوم..

كمت ابجي بالغرفه على اهانه ايوب متخبل هاي الايام وكل الي يوكف كدامو ابدو يفترسو...

حجت عليه الحجيه وذمتني بالتصرف الغلط شلون احجي بدون ما استشير اخوتي هم مخططين لشي وانتي خربتي عليهم هم حته راح يوكعون بمشكله ويه جد البنات...

بدلت ملابسي وطلعت اريد اغسل لكيت فاروق يريد يطلع بس كالي لاتزعلين علي اعذري هاي الايام..

ثريا.. دحكتو شلون ضربني انه موصغيره يافاروق..

فاروق.. مدام تعرفين موصغيره المفروض تعرفين مايصير تحجين بنص هيج وضع وتعلكيهه بيناتهم...

اسمعي ثريا ايوب بهاي الايام متاذي لاتزوديهه علي لاتنسين بهاي الايام ذكرى وفاه المرحومه لذلك كل سنه بهيج ايام يفقد اعصابو ويتجدد علي الحزن..

ثريا... اتذكرت صدك قبطت سبع سنوات على وفاتهه ومانساهه ولا راح ينساهه ع الرغم ماجان بينهم علاقه بس هم اخوتي من يحبون يتعلقون بكل جوارحهم...

ضجت جثير وبجيت وقيس رايح لبيت جد البنات وطالع الحجي مطردو وما مدحكهن لاحكو ادهم وهم عايط بيهم ورجعو خالين..

بس احسهم ارتاحو لان عرفو مكانهم وايوب ورا كلشي وهو الي مخليهن هين صار اسبوع من انتقلن ابيت جدهن...

اسماء رغم طلاكهه ومابطلت حجي علينه حته الجيران عرفو وبعدهه مصره هي حامل وادهم مامهتم ويكول جذابه..

اوس اتفق ويه عمهه يجيبهه للمستشفى ويسويلهه تحاليل كامله واتفقو ع يوم تالي قبل الموعد بيومين اجت مرت عمهه كالت صار عدهه اسقاط لان تشيل ثگل...

كلنه ضحكنه على هيج سالفه اليقهر مرت عمهه مصدكتهه مدري شريكه بالجريمه مدري صدك على نياتهه...

ادهم حالتو للاسوء مايكدر ياكل ولا يقبل يروح لطبيب وما ادري شلون عايش ومستمر بحياتو...

علاقه شذره وفاروق طبيعيه مبنيه ع التفاهم والحب الشي الي يمنعهه من عندو نهائيا ماتكررو ولا تحجي بي وهذا الشي خله فاروق يحبهه اكثر...

كل واحد ملتهي بهمو وحياتنه ماشيه يوم بيومه وقيس وادهم مابطلو من دكه باب البنات وجدهن يطردهم..

لحد ما اجه يوم اجه قيس وكال الحجي ابو بيان بايع بيتو وشايل وماخذ البنات ومانعرف بيا ديره...

ما استغربنه ابد واكيد هالتصرف راجع لايوب لان قبل فتره سمعتو يحجي ويه فاروق على فلوس ويسحب من حصتو كل ضني يفتح محل بس اكيد هو الي نقلهن من هين...

ايوب خله اخوتي يضوكون المر وماحن كلبو عليهم وكلما يتوسلو ادهم يكلو انه ما ادحكهه لان جدهه مايقبل ...

مره من المرات طلعت الصبح للدوام وزلكت اباب البيت دحكت ع الكاع وادحك مثل الزفت الاسود مرشوش داير مداير عتبه البيت...

صدك خفت ورجعت اركض لجديتي وطلعت دحكتو وقرت علي ايات ومدري شسوت وكالت يارب رد كيدهه في نحرها...

معقوله اسماء تسوي هيج شتريد من عدنه موكافي دمار ادهم موكافي خربت كلشي شتريد بعد...

جنت بالدوام اشتغل وكالو اكو واحد من الدكاتره مفصول وجايبين واحد بمكانه اسمو فارس...

مار عليه هالاسم بس ماعمقت بي ولا اهتميت الف اسم يمر عليه باليوم من دكاتره ومراجعين...

ثاني يوم رئيس اللجنه سوه اجتماع واجيت امشي انه ودكتوره وياي حته نحظر الاجتماع سلمنه ودخلنه ...

كاعد كدامي هذا الانسان الي مرت فوك 7 سنوات ما مدحكتو اخر مره لمحتو بالقاعه مالتنه وبعدهه كالو انقل ...

متغير جثير وكبران وشعرو ابيض ما ادري عدهم وراثه الظاهر ماكو شعرايه سوده براسو...

انتبهت علي وهو يدحك بيه وكانو اتذكر ثريا الي مثل ماوصفهه بالسابق حبه الاول وكال اخليج اسعد انسانه ...

دنكت راسي والدكتور يحجي وانه ما اكدر حته ارفعو لان صاير كدامي ومبين يدحك عليه ...

خلص الاجتماع وبدينه ننسحب بس اريد اطلع من القاعه حسيت نفسي هذيج الطالبه الخجوله الي تخاف تحاجي اي ولد ...

طلعت امشي بالممر وصوتو وراي وهو يصيح باسمي ثريا ثريا...

رجليه وحدهه وكفت واسمع خطواتو تقترب اتجاهي التفتت علي اجت عيني بعينو كال شلونج ثريا؟؟

... الحمدلله انت شلونك..
... ايباااه صار اسنين ماشفتج متغيره حيل شجابج لبغداد..

... انتقلنه قبل سنه هين وطلع تعيني بهاي المستشفى..
جانت عينو على ايدي يدحك لابسه حلقه لا ...

بس فاجاني بسؤالو وهو يكول سمعت انخطبتي لسلام اشو جاي اشوف العكس...

ثريا.. فسخت الخطبه منين تدري..
... كالي صديقي بس ماكال فسختي الخطيه ع العموم اهلا وسهلا بيج واذا احتاجيتي شي انه برسم الخدمه..

ثريا.. شكرا ماتقصر حجيت هيج وكملت طريقي شلون ايام انعادت كدامي هذا الانسان الي حبني وخطبني اكثر من مره بس ماعرفت اختار الصح...

شكد صغيره الدنيا رب العالمين اذا راد يهيء الصدف لو بعد البحار تصير بلمحه بصر واقرب مثال هذا فارس الي مامدحكتو صار سنوات وهسه التقيت بي...

وادهم مرت سنه بس يريد يلمح امنيه وهي بعد شارعين عن بيتنه وماظفر بيهه ولا بلمحه ..

رجعت للبيت راسي مصدع فتحت الباب وطبيت لكيت ايوب يلبس بحذائو ومدنك يشد بالقيطان ...

ثريا.. ايوب فدوه من تجي جيبلي وياك اوراق بحث محتاجتهن ..

ايوب.. انه راح العب طوبه واحتمال اتاخر وتعزل المكتبه اذا لكيت اجيبلج...

ثريا.. طلع ايوب وانه بدلت وغسلت ومحد بالبيت بس النسوان اسمع صوت ادهم وهو يكح بصوت عالي .

رحت ادحكو شبي وانصدم بمنظرو مخلي راسو بالمغسله ويتقيء دم ولازم الدرج بيدو ...

وكفت ورا وحجيت بخوف ادهم شبيك شتحس...

ادهم.. غسل ورفع راسو كال مابيه شي راح انام لاتكعديني ...

ثريا... ما انطاني مجال احجي واكلو روح لطبيب وهو معاند ويه نفسو...

للمغرب كاعدين بالمطبخ واجه ايوب مسحول سحل مبين متكاون فات من يمنه صاحت الحجيه هايول تكاونت واجيت..

ايوب... اسكتي نعيمه تنزل رحمه لموتاج اذا سكتي..

الحجيه.. خايب احجي ويامن تكاونت وهدومك مشككه كاتل مكتول...

ايوب.. لا بيهه ولا عليهه براس الشارع مالتنه اجيت امشي وادحكلج رجال لا والله زمال لازم حرمتو ومطلعهه بثوبهه ويكتل بيهه والناس ادحك علي..

يضرب بيهه دفرات وهي ترفس بالكاع مكبسل مدري شارب وانه ياجده ماتحملت هديت علي وتضاربنه .

الحجيه.. عزا بعينك هسه يجرك للكعده..
ايوب.. اي والله انه انفعل بسرعه ذاك اليوم هاي البغله اسماء جان ابتليت بيهه وجيب الكعده ورد الكعده..

وهسه هذا حاطلو حرمه من حرمت علي عيشتو تكتل بيهه ابن الكلب شتريد من عدهه ...

الحجيه.. جده انت تحب المشاكل ادورهه دواره هسه يجون علينه وتعال اعتذرلهم...

ايوب .  اااخ يابه كون بيدي سلطه والزملج شكو واحد يسوي هيج واعلكو ..

ثريا.. لو يخلوك وزير حقوق المراه تفيد..

ثريا.. بله شحجي وياج يانعجه هاي شواربي جنهن حبل ومسويتني وزير حقوق المراه..

ليش انه اعرف حقوقج شنو؟؟. ايباااا تذكرت امنيه الله يذكرج بالخير ...

حجه هيج وطلع يعرج وصاح موتحجن لفاروق بس يتعين يسمطني باربعه ارهاب...

وصدك لليل واجو الناس علينه وفاروق يعتذر من ورا ايوب وماكو...

وفوكاهه هو ابو الراهي يكول فاروق يعتذر لرجال وبس عوزو يكلو اعذرو مخبل وراد يسويني مخبل ومهدود من البيت ..

فاروق.. رحمه لحليمه بطل عصبيه ومشاكل اظل اركع وراك  موحته رگع ماظلت...

ايوب.. شمسوي انه ما اسكت ع الغلط والعايش بي غلط بغلط ما اكدر اسكت ..

الحجيه.. جده اذا اتزوجت وعصبت هم تهد عليهه بالبوكسيات...

ايوب.. وسفه انه اهد ابوكسي يابه ويه كل عركه اهديلهه ورده لان انه رجال رومانسي..

الحجيه.. هجم بيتك جانت المرحومه تخاف من عيونك وتنهزم منك..

ايوب.  الله يرحمهه مره خزرتهه كامت تبجي عبالهه راح اكتلهه ...

حجه هيج وضرب عينه وكال عساج بالعمى ااااخ لاتهيجين اجروحي ترى بعدهه طريه...

الحجيه...هسه تجيك التداوي جروحك بعد ما ايست منهه ....

ايوب.. الله كريم هسه عوفوني من الجروح انه عندي شغيله واريد اطرحهه على مسامعكم...

اوس.. انت ماتطرح الا تنفذ وبعدين تحجيهه ..

ايوب.. دومك تسيء الظن بيه بس انه فكرت اريد اروح للعمره  ..

الحجيه.. يا جده مولازم تكمل نص دينك حته تصير حجي..

ايوب.. ما اروح للحج جده اروح للعمره وماتصيحلي بعد حجي كله عمري...

الحجيه.. غطت وجهه بالشيله وضحكت وضربتو على كتفو بشقه كالتلو اخذني وياك ..

ايوب.. حطيتي روحج وين اريد بيج انه اريد اروح اعتمر ما اريد الساني يفلت ومن اروح وياج ما اسيطر علي..

فاروق.. روح ايوب اذا ماعندك شي واخذ الحجيه وام شذره وياك...

ايوب.. لا بطلت هسه لو يكلولي صارت بالرمادي ما اروح ماخذلي عجايز اثنين وين اريد بيهن...

اذا هيج حاب تفرح نسيبتك اخذهه انت وهم تفرح الحجيه بطلت انه...

فاروق.. اثبت ع راي يول ..
ايوب.. بطلت يخوي ابتليت حجيت وين المفاصلهه خربانه كربستهه براسي...

ثريا... لا اخذو منه حق ولا باطل هو هذا ايوب ينطي اشاره لشغله الي ابالو وينفذهه بعدين ويخلي الكل متفاجىء...

نظرات فارس وملامحو انعادت مثل قبل احاول اتهرب من عندو بس كلشي بي مفضوح ...

جنت واكفه بالصيدليه وبدون سابق انذار عرض عليه الزواج وكال بعدني معجب بيج واريد اتقدملج...

انسطرت من كلامو ولا كدرت ارد علي بسرعه سويت نفسي اشتغل والمراجع خلصني من الموقف...

رجعت للبيت وانه حسبه تاخذني وحسبه ترجعني كعدت حجيت للحجيه وكالت ياثريا اخذي الي يحبك ولاتاخذ تحبه..

شحصلتي من سلام الحبيتي وهذا ابن ناس واوادم واجه خطبج وهسه هم اجاج من الباب فكري زين واقبلي...

ثريا.. لحيت عليهه جده دحكيلي ملامحي زينه وانسعد بهذا الزواج ركزت بوجهي وكالت..

الله اذا كاتب شي مانكدر نغيرو وانه كلي ثقه برب العالمين واخاف عليج يابنت من حوبه امنيه ...

سمعتهه ايام تردد حسبي الله عليج وخاف حوبتهه ماتتعداج انه هاي الشغله ابالي ودائما افكر بيهه امنيه طاهره ونظيفه وبريئه وتاذت وماعدهه غير رب العالمين سندهه ...

شكتج لربهه وسلمت بيد الله والي كالت بيني وبين ثريا رب العالمين تعتقدين ينساهه ربج...

ثريا... بس انه ياجده ماعليه موحالي من حالكم..
الحجيه.. انتي سويتي افعال مال وحده تكره جرحتيهه يا ثريا اذيتيهه ادعي تسامحج ...

ثريا... كمت من الحجيه وكلامهه يرن باذاني صدك ناسيه امنيه ونسيت المرت بي لازم اطلب السماح من عدهه...

بليل فاروق جان كاعد وبصفو شذره تلعب بتليفونو العاب وصايره تحت جنحو...

دك التليفون بيدهه انطتو لفاروق جاوب واسمعو يكول البقاء لله...

سده والتفت بكل برود وجبروت بعد ما انطه التليفون لشذره تكمل اللعبه...

وكال ثريا ابوج انطاج عمرو!!!!

كلهم اخوتي موجودين ماكالو غير البقاء لله ردت واحد منهم يتاثر ردت انه اتاثر على ابوي بس للاسف بس اسمو بجنسيتنه هو مات بداخلنه من زمان...

كملو سهرتهم وكانو شيئا لم يكن وعادي وكلشي طبيعي رحت لفراشي مددت ..

واسمع صوت ايوب وهو يصيح يول خلي اخذك للطوارئ دحك حالتك راح تموت..

طلعت اركض وادحك ادهم كاعد يم المغسله ومن كدما متقيء دم صاير عندو اغماء كوه يفتح عينو ويرجع يسدهه...

نزلو اخوتي ع صوت ايوب وكومو كوه وماقبل يروح للمستشفى مدد على التخم وايوب شال رجلي يريد يمددهن...

لزم ايوب من ايدو جنت واكفه يم راسو بس هالكلمتين حجاهن وكام يسعل...

ادهم.. ايوب اذا الي معزه بكلبك كلي وين امنيه...

ايوب.. وينك وين امنيه ماراح اطير امنيه دحك حالك يول انت مريض صار مده كوم خلي ناخذك للطبيب...

ثريا.. ماقبل يروح انطيتو علاج شويه هدء ونام وانه لصبح كاعده يم راسو اخاف يتخربط همل نفسو وصحتو ومانعرف سبب التقيء ونزول الوزن المفاجىء..

كلساع واحد يكعد من اخوتي طول الليل ماغمضت عينهم  وضع ادهم للاسوء ..

جان نايم وانه ادحك علي اتذكرت امنيه دكول احب رموشو صدك ادهم غافي ورموشه من كدما طوال نازلات وعبالك امسكرات...

تفاحه ادهم الي بارزه عندو من ضعف والشامه الي بين حواجبو ...

ماتهنى لا بترقيه ولافرح برتبتو وصار نقيب انكلبت حياتو  بين يوم وليله...

ثاني يوم ماداومت وادهم كعد سويتلو ريوك بس يشرب شي كبل يتقيئو معدتو ماتتحمل...

لميت المواعين وغسلتهم وصعدت لغرفه الفوك رتبتهه شلت ستره ايوب علكتهه انه متعوده ادور جيبوهه حته من اغسلهه ما تتلف البيهه...

كومه شغلات اطلع واخلي ع الميز موستره عبالك كنتور مامخلي شي مامخلي

جانت اكو ورقه فتحتهه واقره بيهه مكتوب بيهه طلب تقديم  ومختومه  وموقعه من الوزير ....

يتببببع.... متابعه ممتعه..