رواية ازمة ضمير الفصل السادس وخمسون 56 - بقلم Rozaya1122

ازمة ضمير ... البارت الرابع والخمسون
«للكاتبه روزايه»

تگاودنـه ،،
بوكت ماچان ديـرة #خيـر #صحبانـي
كبرنه وصـاار
محـد يعـرف الثانـي .!!
مگاريـد وخذانـه الشيـب  ضعنـه بچلمـة #المحـد
ذاك اتغيـر_وتعبـان
ذااك الشـال
ذاك الـراح وستشهـد ،،
....

ثريا.. ما اعرف شريد اجاوبهه وياسؤال اسالهه كاعده بالديوانيه وعينهه تصد يمنه ويسرى تعبانه وكبرانه والتجاعيد ماليه وجهه ومبين الكبر عليهه..

ياقوت جابتلهه مي واحنه كلنه كاعدين واندحك عليهه شتريد دكول طببتهه للبيت بدون علم اخوتي وياترى يقبلون لولا..

ام فاروق.. كلشي الو نهايه ولازم الشباب يولي ويجي يوم الكبر والعجز ويكون الانسان وحيد ومحد يوكفلو غير بس الطلع من بطنو..

بس انه مابيه خير وماحويت ولدي وتاليتي اطلطلط بين النسابه وهذا يلكحني على ذاك وذاك يكول ماريد امج ابيتي وتاليتي صفيت بالشارع..

وهاي رجعت برجليه لولدي الي ماحويتهم ودرت ظهري الهم وهم بحاجتي كبرو وعانو وفرحو وماكو ام وكفت ساندتهم ...

ثريا.. هسه يله دريتي انتي ام وعندج ولد تدرين الصار بيهم لوماتدرين من يوم الي اجيتي بالرمادي وبعد مادحكناج ولا نعرف شي عنج ..

لا انتي ولا ابوي وكفتولهم ليش خلفتينه ليا قهر ليا ضيم تدرين بيه شعانيت بدون ام اتزوجت واطلكت وردت ام اشكيلهه وتواسيني وادحكهه ادافع عني وانتي ماكو..

ام فاروق.. بدموع الخساره والندم نزلت من التخم وكعدت بالكاع ولكحت شيلتهه وكامت ادك ع صدرهه التعبان وشعرهه الابيض ..

لادكولين انه ام انه مو ام ولا من الله الي اختارهن انه ضلمتكم وضلمت نفسي انه يابنتي اكلت عقابي بالدنيا قبل الاخره ..

صار اسبوع انه بالشارع يولي تعرفين ام القاضي فاروق والمقدم ادهم والضابط قيس انه نايمه اباب الجامع ..

منين هذا كلو من عمل ايدي ماحمدت الله ولاشكرتو ولا اكلت من النعمه الي كدامي انه ما اطلب منكم العفو ابد بس حك ٩ اشهر الي حملتكم ابطني خلوني اموت وانه ابتكم لا تخلوني اموت وحيده مثل ابوكم..

ابوكم مات بالمستشفى ودزو ع عمامو اخذوا لاولد ولاتلد ولا بناتو اجن متزوجات بعيد ابوج مات وهو يصيح باسماء اخوتج وبس راد يطلب منهم السماح ولحد ماغمضت عينو وهو ينتظركم...

الحجيه.. ام فاروق صح انتي ورجلج ما جنتو اباء ولا وفيتو حقكم لأبنائكم بس الله انطاكم زلم شيمتهم الوفه وماعرفو الغدر شنو ...

دومهم مظلومين مو ظالمين وانتي هسه اجيتي برجلج ما اعتقد فاروق يطردج مثل قبل لان هو جرب الابوه وعرف شنو الضنى ...

اكعدي ارتاحي واذا جنتي ندمانه الله يسامحج ويغفرلج الله رحيم بالعباد مواحنه انقيمج ولا احنه نسامح السماح يم رب العباد..

ثريا.. بلحظه اتحرك الحب للام بداخلي وانه ادحك دموعهه ومره جبيره وتعبانه كمت اخذتهه للمغسله غسلت وهي تبجي عدلت شيلتهه ورجعت كعدت ..

ياقوت كامت تسوي عشه وانه كاعده يمهه ساكتين وهي مدنكه وماتكدر تواجهنه وادحك بوجوهنه تدري بنفسهه مذنبه...

اذن الاذان واول وحده بينه فرشت سجادتهه وكامت تصلي ورا الاذان اسمع سياره اخوتي كلساع واحد يوكف مرات اكول الي يدحكنه يجيبلنه العين 4 سيارات توكف بالباب بس ادهم وقيس لا دوام اثنينهم بسياره...

اول واحد اجه فاروق وجنت لازمه كلبي من ردت فعلو امي جانت كاعده ومرتجيه الحايط والحجيه لازمه السبحه وتسبح وهو طب شايل عمر متلكي بالباب...

كال السلام عليكم ردينه السلام وامي نفضت نفسهه وكامت وكفت ...

علامات الاستغراب والتعجب انرسمت على وجهو ظل يدحك عليهه وهي ادحك على طولو ومتفاجئه بشكلو اكثر من عندو..

ماحجه اي كلمه فاروق بس تصرف امي جان مفاجئ تقربت علي وحضنتو هو وابنو الي عمر لازم ابو من ركبتو اثنينهم اخذتهم بحضنهه وتبجي بصوت مبحوح...

فاروق جامد الى ابعد حد ولا بادلهه الحضن بس ادين عمر التفت على ظهرهه ...

ابتعدت عن فاروق وهي تمسح بدموعهه ودكول ابوس اديكم سامحوني ...

نزل عمر من ايدو وكالهه هلا بيج وصعد لغرفتو ..

تقربت عليهه الحجيه اخذتهه من ايدهه وكلتلهه ترى فاروق هو هذا طبعو انتي جايه اطلبين السماح منهم اتحمليهم ...

رجعت لمكانهه وبعدهه هستوهه كعدت طبو اخوتي البقيه كلهم واوس يصيح عمر تعال دحك ششتريتلك؟؟

كلهم واكفين بوسط الديوانيه وواحد يكل لثانيه ادحك وياي لوبس انه هاي امي واكفه وفاتحه اديهه تريد تاخذوهم لحضنهه بس كلهم ماتقربو الهه..

كل واحد راح لغرفتو بس ايوب ظل واكف يدحك عليهه وهي تمسح بدموعهه وتعالج كسرتهه وواضح الندم عليهه ..

مولان امي واريد اطلعهه باحسن صوره بس كل انسان ينقهر على الانسان الجبير بالعمر ومثل مانكول العجوز وامي جانت بهاي المرحله من العمر عجوز ومره جبيره ومريضه ...

تقربت على ايوب وكالتلو يا ايوب بعدك بهالسمار والدم المملوح ولزمتو من اكتافو رادت تحضنو..

بس هو كالهه اهلا وسهلا وتعداهه كلهم متفاجئين ومايعرفون شيتصرفون..

الحجيه تهدي بيهه ودكلهه اتحملي واطلبي رضاتهم والله يسامحج موهمه ..

كمت ويه ياقوت اصب العشا امنيه واكفه بالمطبخ تساعدهه فرشنه السفره وصحت اخوتي امي ماقبلت تكعد كالت خاف مايريدون يدحكوني بس ام شذره كالتلهه تبقون امهم ويحنون الج...

كلهم اجتمعو وعمر كعد بصف ابو وكلساع يسالو بابا منو هاي الحجيه؟؟

جان الهدوء سيد الموقف والكل مدنك ياكل وهي ماكلت شي تحس نفسهه غريبه ...

كملنه عشه وجبت الجاي وكلهه مجتمعه فاروق كاعد على التخم ومنزل رجل بالكاع ورجل طابكهه نايم عليهه عمر يدحك كارتون..

واوس كاعد بالجهه الثانيه وبحضنو شمس وبصفو ياقوت..

وادهم كاعد وبصفو امنيه لامه رجليهه ع التخم وعبالك بنتو ولامهه بحضنو..

وانه كاعده بصف قيس وايوب متمدد بالكاع وطابك المخده ومرتجي ع التخم واديه اثنينهم جوه راسو..

حجت امي بصوت مكسور وكالت ادري بيكم مستغربين جيتي وحقكم بكل كلمه دكولوهه افترت بيه الدنيا وتالي صفيت وحيده..

صارلي اسبوع افتر ببغداد ادور عليكم ومحد يعرف انه امكم سالت جثير ناس وكل واحد اسالو ومن يكلي بيت القاضي فاروق روحي يساعدوج عدهم خير من الله...

عبالهم الناس انه مجديه وادور وفعلا امكم اسبوع تاكل من مساعدات الناس لان ماعدهه بيت يلمهه وتكعد بجالو..

كدام الكل احجي انه ما استحق ام انه غدرت بيكم وفاروق انت تعرف كلش زين الماضي ماريد اذكرو كدام نسوانكم ..

ما استاهل عطف منكم ولاشفقه بس صدكو صار ٣ اسنين ساجده لرب العالمين اطلب السماح منو قبل ما اطلبو من عدكم...

بناتي اتزوجن ويوميه اكعد يم وحده شهر ودكلي رجلي مايقبل واروح يم الثانيه ودكلي مايقبل وصارن يتفقن عليه ووحده دكول لثانيه اخذيهه يمج..

عظم ابن ادم ثكيل وصارت عليه اللكمه حسره انه بيه سكر وضغط حته علاج ماعندي اشتري راح دكولون ادورين فلوس واجيتي بعد هاي السنين..

يايمه محد يموت غير بيومو بس ما اكدر اظل نايمه بشارع ويوميه اباب جامع انه اجيتكم وانتم بعد بكيفكم تريدون تخلوني اظل يمكم وتحسبوني ماموجوده تريدون ارجع منين ما اجيت..

كدامكم اكول بيوم الطردتوني جنت محتاجتكم حيل ومن هذا اليوم بناتي يعيرني يدرن بيه ماعندي احد واهلي ماتو والي تهجر ...

هذيج الليله دعيت عليكم بحركه كلب مادحكون الراحه بعمركم ابقه ام تبت واطلب السماح من عدكم بس سديتو الباب بوجهي..

بس هيج ام ماتستجاب دعوتهه الحمدلله توفقتو وصرتو بمراكز عاليه ..

فاروق.. بيتي مفتوح للغريب والقريب وللمحتاج وانتي حالج من حال هاي الناس ماراح تزودينه لكمه ...

اكلج مره ثانيه ابد لا اطلبين السماح من عدنه اطلبي من ربج اذيتينه جثير وبسببج نعاني من ورا هواج ..

ثريا.. دنكت تمسح بدموعهه وفاروق كام واخوتي كل واحد راح لمكان ...

ثاني يوم كال ادهم قررت نتزوج بهذا الشهر ووامنيه اجه جدهه اخذهه يمهم وكال تجون تاخذوهه بزفه من بيتي..

التهينه بالشغل وترتيب البيت وهالمره صدك نوينه نسوي عرس جبير وعزمنه كل كرايبنه ...

امي ليل نهار تصلي وتقره قران الله واسع الرحمه الله يغفرلهه اكعد نص الليل تبجي وتصلي ..

ادهم غير الغرفه وغير كلشي ونيشان جديد على ذوقهه هي ونيران وامل يطلعن يجهزن..

اليوم اربعاء حنه ادهم ومن الصبح بيتنه مهوس والخطار كومه عماتي وبناتهن وجناينهن واحفادهن شابات ..

اول مره احس بهيج فرحه اكثر من فرحه عرسي بيومهه الصفك والهلاهل كلشي متغير اخوتي صار عدهم فلوس وصار الكل يحبهم...

حفلة امنيه باجر كالت يوم واحد وفرحه ادهم ماتنوصف طاير من الفرح..

حنه الولد بليل واجو كل جماعتهم اسمع رجل عمتي يكول عمي كلهه اكابر وشخصيات لو ضابط لو قاضي شنو هاي ولد عماد ...

بنت عمتي ام جاسم بكد امل كالت انسوي حنه بس النه ونركص جبنه الديجي وفتحنا ودك ركص ع ساجده عبيد ..

اول مره اركص مثل المهبوله اريد اصرخ بصوت واخلي كل بغداد تسمعني واكول فرحانه بعرس اخوي..

ركصت ركص مال خبال وعماتي وبناتهن حسيت بفرحه عظيمه ..

عيني على امي ماوكفت دموعهه من الفرح مدري من الندم ياقوت خوش تهز وبس تسمع صوت اوس تبطل مايقبل تركص..

بنت عمتي ام بهاء اسمهه زينب عمرهه ٢٠ مخلصه معهد اداري ومن صارت احداث داعش كعدو بكركوك...

عينهه ع ايوب والعيون تلمع انه انتبه بسرعه وياقوت كالت دحكيهه شلون عينهه تفتر ورا..

ايوب جان احلى من العريس مزين ومحدد اللحيه والبشره سمره صافيه وكل الهوسه براسو..

جانت جنه عمتي ادك على الباب وعمتي تهوس واحنه نركص وطب ايوب وصار المطافر بفلس.

ام جاسم.. خايب غير ادك الباب جفتت على البنوات ..

ايوب.. وينهن البنوات ما ادحكهن ..

امل.. شتقصد هاي البنات كلهه موبعينك عجل شوكت تسكت..

ايوب.. هسه ماعلينه خلصت ركص شبعتن ملحتن كلوبجن انطنه الديجي يريدو برا..

ثريا.. اخذو الديجي وزينب تسرق نظرات ع ايوب وماادري انتبه لولا وشنو رايه..

حلوه وصغيره ودارسه مابيهه خلل وحبابه وهاي عمتي ابد مااذتنه من زمان متزوجه بالمركز ومالهه علاقه باحد...

نسمع صوت الديجي والهوسه مال الولد برا وكلنه ركضنه ليفوك اندحك من الشباك الفوك طفينه الضوه حته مانبين واندحك...

جانو مسوين دبكه وكلهم لابسين دشاديش وجراويات وفاتحين جوبي وكلهم نفس الحركه...

جان ايوب لازم طرف الجوبي وبيدو سبحه واوس الطرف الثاني ونفس الحركات يسووهه ...

والاغنيه جانت ويه الجوبي وعشك الصغيره وعشك الصغيره
مثل الرمد بالعين ياعشك الصغيره...

كل البنات يصيحن الله يخبلون دحكن ايوب وكل الانظار متوجهه علي وصدك الجوبي مالتو يجنن...

صاحت علينه الحجيه ونزلنه خابرت ع امنيه سالتهه محتاجه شي كالت لا مامحتاجه ونيران يمي وخالاتهه...

لحد ١٢ يله راحت الهوسه وهم طبو للبيت وعماتي يهلهلن ويصفكن واليوم الك يا ايوب...

فرشت للخطار واحنه البنات مانمنه اجيت اريد امدد بفراشي دحكت زينب داخله ع صفحه ايوب وتكلب بيهه بس دحكتني ضمت التليفون ...

ثاني يوم كعدنه من الصبح جثير ناس اجتنه وجابو الطباخ للبيت يطبخ واحنه كلهه ملتهيه تسوي بالشعر والي تتمكيج...

الحفله مال امنيه ب٢ ع السريع كملنه واجرولنه سياره جبيره اخذتنه ...

امنيه طالعه حيل حلوه وبدلتهه مرتبه وفرحانه جثير ونيران بعد احلى بس الحزن مخيم عليهه...

هم ركصنه وهوسه وننتظر تجي الزفه لحد ال٥ العصر كالو اجت الزفه...

امنيه.. هذا اليوم جنت اتمنى من زمان حاولت ما افكر ولا اتذكر اي شي من الماضي ركزت بس ع فرحتي بهذا اليوم...

طب ادهم لابس القاط اسود والقميص ابيض وهوسات عماتي وهلاهل امه وتصفك كدامو والحجيه تهوس هاي الرادهه وهاي التمناهه...

صعدنه بالسياره واوس هو الي يسوق ايد ادهم انمدت على خصري ودنك يهمس باذني ...

يحجي كلمات حب وغزل وفرحان اكثر من عندي وكلساع يكل لاوس ماتسوق سريع شبيك...

ثريا.. رحنه بالزفه وايوب كدامنه يسوق والحجيه تصيح خايبات هذا الولد شلوش البنات ابو سمره...

بهاي المناسبه صارت عند ايوب معجبات جثير واحتمال يدك كلبو ع وحده من عدهن...

ماخلونه نكمل ويه الزفه رجعونه للبيت والزفه طلعت كدامنه...

امنيه.. كاعده بغرفه الفندق وافرك بايدي اني بلايام العاديه وانصهر بين ادي النوبه ليله عرسي ...

سد الباب ونزع سترته واجه يمي بدون مقدمات بس خلاني انزع الحذاء ومدد ع الجربايه بملابسه واني بدلتي شكبرهه...

ضمني لحضنه حيل ويبوس ويشم بيه ويكول مامصدك نفسي انتي يمي امنيه خاف احلم اني ...

اكثر من مره اخذ ايدي وباسهه ويرجع يبوس كصتي واني كاعده ع الجربايه بدلتي...

بدلتي قيود ونازل منهه خرز منا ومنا انمدت ايده على كتفي وبده ينزع بالقيود والايد الثانيه انمدت ع السحاب..

لزمت ايده موهيج يا ادهم ما اكدر الضوه مفتوح واني كاعده مربعه ماتوقعت هيج جنت ناويه اطفي الضوه والبس سيت نوم..

ماقبل بس سد الضوه وشمر البدله بعيد وضليت بين احضانه ايده تتجول ع جسمي بكل جراه وبوساته تنطبع بكل مكان ...

اخذني بليله ورديه ماتنوصف ولاتتكرر حته بلاحلام من الحب واللهفه والرومانسيه الي ترجمهه بكل مكان على جسمي..

ما ادري شصابني بدت اعصابي ترتخي وكمت ادحك الغرفه افترت بيه واذاني توش وكانو صارت عندي حاله اغماء...

رغم حالتي بس مابطل اهمس باذنه بهدوء ادهم ما اتحمل بس ماجان يسمع ولا ينطي اهتمام لكلامي..

ماحسيت باي شي ولا الالم الي يحجون علي لحدما ضمني بحضنه وهو بصفي وراسي مدفون بركبته وهو يبوس بيه ويكول مبروك...

رفع نفسه من يمي وكام للحمام واني متلفلفه بالشرشف والغرفه دافيه ارتخت كل اعظائي..

طلع من الحمام لكاني نفس وضعي احس نفسي متخربطه واكثر من مره رجفت بين ادي عبالي من قوه اللحظات الرومانسيه..

بس جان عندي هبوط بالسكر وماتحملت كومني واني ملفوفه بالشرشف ردت اوكع ولزمني ..

امنيه.. ادهم متخربطه يمكن سكري هابط انطيني اي شي حلو ما اكدر اوكف بعد...

ركض للثلاجه نيران خلتلي حلا كالت خاف تحاجي اكلت شويه وهو مخليني بحضنه وكاعدين ع الجربايه...

شويه بدت حالتي تستقر وهو الخوف مبين على ملامحه طمنته صرت احسن ماقبل يعوفني واخذني للحمام..

بوقتهه شكد خجلت احس جسمي صار نار واني بين ادي والشرشف صار بخبر كان ...

كملت سبح ولفني بالمنشفه وطلعنه صح بعدني مامستقره والا الزم الحايط بس وجوده جان كفيل بتوازني...

طول الليل مانمنه كل شويه وناخذ اشواط رومانسيه تخليني ارتعش اكثر من مره وهو يفقد اكثر من حالتي ..

جانت موبس ليله عرسي احلى يوم مر بحياتي ويوم عظيم خلاني ادهم بي اسعد انسانه وكلشي انمحه عندي من الماضي...

ثريا.. كعدنه الصبح كوه كعدت ايوب نايم على وجهه من التعب كعد يفرك بعيونو ...

غسل وفاروق كالو روح للمجمع دحكو صار يومين بيد العمال وارجع من العجز الي عندو دز اوس وماراح...

جان واكف بالمطبخ وزينب يمي تسوي جاي للحجيات كلساع ادحك ع ايوب وتنزل عينهه ...

شالت الصينيه تريد توديهه وايوب يريد يطلع وطخت بي الصينيه وكل الجاي وكع عليهه ..

وكع ع رجلهه وحار خطيه صاحت اخ وكعدت بالكاع وايوب ارتبك كعد كدامهه وهو يسال بيهه خوما تاذيتي..

جبتلهه معجون خليتلهه وايوب كال تحتاجين اخذج للمستشفى هزت راسهه بلا وهي خجلانه..

اريد ادحك ايوب مهتم ماكو ولاكانو البنيه عيونهه فاضحتهه ولامهتم ابد ...

صارت ب١١ اجو العرسان والكل باركلهم ونيران ما اجت مناك وراحت ويه رجلهه. قيس ماخذ دور الصمت ولا حجه ولاشارك ولاهذيج الفرحه عندو...

عماتي كالن نظل اسبوع يمكم شعدنه انه هم جنت فرحانه لان ما مجتمعين هيج ابد ...

امنيه غركانه بالعسل هي وادهم ويوميه للصبح هم كاعدين حته ادهم الصبح مايكعد يظل نايم ...

ثالث يوم وبليل وتخربطت زينب مثل الطير ترفس بالكاع وعمتي اتجيب بهالحبوب وتبلع بيهه وهي تبجي..

رحت ع فاروق كتلو ناخذهه للمستشفى كال روحي لايوب عمر نايم بحضنو ...

رحت ع ايوب جان بالمضيف كتلو زينب تخربطت خلي ناخذهه للمستشفى ...

لبست ورحت وياهه انه وعمتي وايوب طلع السياره جانت الساعه ب١١ ونص بليل وشتاء وبارده..

اخذناهه لطوارى وحطولهه مغذي كالو تسمم وظلينه شكد ننتظر المغذي يخلص ورجعنه ...

من طبينه امهه طبت كدامنه وهي غسلت من المغسله البره وايوب نزل من السياره صارت وجه بوجه هي ويا بس مادحك عليهه بسرعه دار وجهو...

بهاي الليله ايوب للصبح مانام كلما اكعد الكا كاعد والجكاره بيدو واحس روحو جاي تحترك مثل هاي الجكاره..

ليش ماجاي ينسه حيل متعلق بيهه وحكم ع نفسو ولا جاي يكدر يحب انسانه ثانيه

شنو من وفاء عدكم يا اخوتي لا عند امي ولاعند ابوي منيلكم هالوفاء ...

اتمنيت اكدر احجي ويا واكلو البنيه حلوه ومبينه حابتو لان كالت من زمان اتابع ايوب ع الفيس يعني مخليتو بالهه ...

ثاني يوم اجونه خطار بيت خال امنيه وخالتهه وصارت هوسه ونشتغل وزينب ويانه تساعدنه ..

اجه ايوب جاب المسواك وكال تعالن اخذن من عندي مستعجل امل كالت زينب روحي جيبي المسواك...

انه طلعت للممر اجيب المصفي وادحك ايوب انطاهه العلاكه جان واكف وهي كدامو عينو عليهه مركز بوجهه وهي مدنكه ...

جان قريب عليهه وكانو بلحظه رومانسيه ومال عشاق انطاهه العلاكه وطلع ...

التهينه بالشغل وما نسمع غير صوت امل وهيج تصيح الحكولي وصوت صريخهه رج البيت رج ...

ركضت عليهه والكاهه تركض حافيه للشارع وتصرخ تعزيتو ياثريا .....

يتببببع...  متابعه شيقه

تحديث من سارونه للدبكه ..