رواية ازمة ضمير الفصل التاسع وثلاثون 39 - بقلم Rozaya1122

ازمة ضمير ... البارت السابع والثلاثون
«للكاتبه روزايه»

زفوهم واچتافي ارتخت والمشكَلة
الشامت شمت
عجل ليش
ما عندي بخت
- ويصير حآدث بييهم
.....

امنيه.. كلماته وصياحه وعركته ويه فاروق وهو يصيح بعلو صوته ما اريدهه من الاول كتلكم مده واطلكهه وهذا جان اتفاقنه..

فاروق.. انجب يول سالتك اكثر من مره كتلي احبهه وما اعوفهه وانت حددت زواجك وقررت شنو الغيرك هسه..

ادهم.. يا اخي ما اريدهه بطلت تريد نتزوج ماعندي مانع علمود تبقه بالبيت بس اتزوج وراهه تريد تطلك وادحك طريقهه هم ماعندي اعتراض..

فاروق.. ادهم وروح حليمه اذا ما اخليك تدفع الثمن غالي على كل كلمه كلتهه وهيج اذيتهه ...

ياسافل عديم المسوؤليه اذا موكد كلمتك ليش واعدتهه يول بنت عمك هاي مو غريبه وتضحك عليهه بس الا اطلع من طوري واخليك تعض اصابعك ندم...

اسمعو كلكم مابيكم واحد بي خير بس عنتكه ونافخين نفسكم وانتم فارغين لا المواعد حبيبتو التزم بوعده ولا الكدر يصون عائلتو ...

مراح تموت وراك امنيه ولا نيران راح تتعذب بسبب قيس بس انتم الي ادفعون الثمن مدام طلعتو هيج انه الي اوكف بوجوهكم...

امنيه... ماكدرت اسمع اي شي بعد رحت للغرفه واني بحاله صدمه اعيد كلمته وهو يصيح ما اريدهه وارجع اعيد كلامه من يكول اني وياج للموت ...

لازمتني نيران واسمعهه تحجي دكلي لاتنقهرين احنه ماعدنه حظ الله ماقاسملنه الفرح احنه ع حظ امنه...

صوت ثريا وهي دكلي يله لاتنقهرين هو الخسران احس الموجودين كلهم شماته نفسهه ثريا الي اشكيلهه على ادهم وماتسمعني...

نفسهه الي حذرتهه من اسماء تهجم بيتنه وماصدكت وفضلتهه عليه ما ادري شسوي بس دموعي تنزل بغزاره احس نفسي انهانيت وتفشلت كدام الكل ...

ماجاوبت اي وحده بس اسمع اصواتهن وصوت الولد برا بس احس دماغي مامستوعب اي شي وبعده نايم في سبات...

ماكدرت اغمض للصبح كلساع اكول هسه يدك الباب ويعتذرلي هو يحبني هو كال احبج واسعدج هو كال ما اعوفج للموت ...

سمعت الاذان ياذن طلعت اريد اصلي لكيت فاروق كاعد صبحت علي  رد عليه كال امنيه تطلكين لو تقبلين تتزوجي رغم كلامه؟؟؟

امنيه.. لا اطلك وخلي هو يروح يتزوج اني مو رخيصه ويحجي وياي هيج..

حجيت هيج ورحت للغرفه  ما اعرف شلون اوصف شعوري كلساع اكول اني جاي احلم وهسه اكعد من هذا الحلم ...

خليت راسي ع راس اختي ما اكدر اطلع من الغرفه ششوف منو الي يريدني ثريا بالجذب مواساه ماواستني ولا وكفت بجانبي ..

الحجيه ماحجت بس تسبح وهاهي عبالك الكل جان يكرهني وهسه ارتاحو من عافني ادهم حته ولد عمي قيس واوس ماحجو وياي بكلمه اطيب الخاطر..

بس ايوب جان يحاول يشد من عزيمتي ويكلي مايستاهلج انتي بريئه وهو واحد نذل الله يحبج وخلصج من عنده...

ثريا.. صوت بداخلي اريد اصرخ بعلو صوتي اريد اوكف ويه امنيه اريد اكسر البيت على ادهم بس ما اكدر احجي نار وتسعر بكلبي هيج النار احسهه جوه اضلاعي مثل البركان ...

كلساع اكل للحجيه جده احنه ليش ساكتين وهي دكلي ربج يريد هذا الشي..

وصلت بيه اكعد نص الليل ابجي من الكوابيس الي ادحكهه واكثر احلامي قطط سود تفتر ابيتنه احس نفسي صرت خبله وكمت اكره كلشي حته ما احب احجي ويه اخوتي...

كعدنه ورا العشه السفره نقصت نفرين امنيه ونيران مايكعدن ويانه الكل ساكت وادهم صار مده ملاحظتو صاير اعصاب حته حواجبو معكوده وبس واحد يحاجي ينفجر بي..

لميت السفره ورحت جبت جاي الهدوء مسيطر على الكل حجه فاروق بنبره حاده كال ادهم حضر نفسك باجر اتروح اتجيب الشيخ يطلك امنيه.

انتفض ادهم مثل الاعصار ووكف على حيلو رفع اصبعو بوجه فاروق ايده ترجف وعبالك فاقد السيطره ...

ادهم.. ما اطلك ماكو واحد يحدد بكيفو طلاك ما اطلك..

فاروق.. محد حدد هي رادت تطلك ماكوشي يربطكم بعد انت اتزوج وهي هم تروح تتزوج انت مواحسن منهه ...

ادهم.. فاروق لاتتدخل بيني وبينهه ما اطلك وين تروح اذا طلكتهه..

فاروق.. تكعد هين وبعدين تروح لبيت رجلهه وانت جيب مرتك هين ...

ادهم.. يول فاروق لاتضغط عليه انه كوه مسيطر على اعصابي....

فاروق.. انه اكلك اطلكهه واذا ماطلكتهه برضاتك بالغصب اطلكهه ولو عشيرتك كلهه توكف وياك اطلكهه...

اسمع يول ادهم مدام ما اكلت من النعمه الكدامك ودفرتهه روح اكل الفضاله ...

امنيه مستعد اهجم بيت كامل على راسكم وما اخلي واحد مثلك يمسهه بكد الشعره سمعت الي حجيتو باجر تروح اطلك وانت الممنون...

ادهم.. لاتحجي وياي هيج امنيه خطيبتي واريد اتمم زواجنه محد يجبرني اطلكهه وحته لوهي رادت ما اطلكهه..

ايوب.. شتمم يول انت البارحه كلت ما اريدهه وتريد تزوج غيرهه بعد هالتناقض شنو طلكهه واسكت.

ادهم.. لاتتدخل انت بكلشي مخلين ارواحكم انه ما اطلك موبكيف واحد...

ايوب.. غصبا عليك ندخل كعدت تحجي وتعير بيهه ودكول ماعدهه احد تروحلو وتريد تزوج عليهه حته تذلهه تخسه يول ...

ثريا.. منا ادهم كاب نار وايوب الي دومه عصبي بسرعه تكاونون واحد زانك الثاني وفاروق كاعد يدحك عليهم...

قيس واوس وكفو بجانب ادهم ورجعوا على ايوب صارت بيناتهم ضرب بوكسيات وانه واكفه بعيد ودموعي تجري على حالهم ...

صوت ايوب وهو يزكح بعلو صوتو ويكول لادهم والله اردك لامك اذا مااحترمت نفسك...

المصيبه الاكبر اوس وقيس توالو على ايوب ويضربون بي رغم جرحه بعده ماطاب لان حجه الحق..

اصيح فاروق كوملهم وهو كاعد ويدحك عليهم بس ايوب ضرب ادهم بوكس على خشمو خله الدم يكت كت من عندو...

لحدماتعبو وكل واحد واكف بجهه ٣ على واحد وين وصل بيهم الحال وشلون تكاتلو ...

فاروق.. هااا ارتاحيتو صفيتو عداوتكم الله يطيح حظكم بعد زكح ادهم بصوت عالي طلاك ما اطلك لو اعرف اموتهه بيدي وما اطلكهه...

امنيه.. اسمع الصوت والعركه الصارت بس من سمعت كلام ادهم طلعت من الغرفه وحجيت بصوت عالي كتله اني ما اريدك انت وعدتني شوكت ما اطلب اطلكني..

ادهم.. يولي امنيه روحي من هين نجوم السما اقربلج  من الطلاك...

امنيه.. اذا انت رجال اطلك هاي اذا عندك كرامه..

جانت كلمتي مثل الضربه القاسيه على مسامع ادهم اجه عليه مثل البرق وخنكني من ركبتي وعينه بعيني الي دموعي تجري وعينه تشع غضب وقريت بيهه كره موطبيعي اتجاهي...

اختنكت وبديت اكح وهو منبت اضافيره بركبتي ويردد ما اطلك لوتموتين بس ايد فاروق هي الي خلصتني..

ركضت للغرفه ما اكدر اتحمل بعد وصلت لاقصى حد من التحمل ماعندي طاقه استوعب صدمات ولا جروح...

اني فتحت عيني بنص اخواتي الباب ماشايفته ومن بديت ابصر الحياة لكيت ادهم كدامي ماحبيت ولاعرفت الحب ولا الساني طخ السان شخص غريب شلون اكدر اتجاوزه...

ما ادري شلون خلصت هاي الليله والبعدهه والبعدهه كل الليالي التمر عليه سوده وجرحي يتجدد بيهه وانه ادحك اسماء يوميه تجي وضحك ثريا وياهه مثل الطلقات وتخترق مسامعي...

اباوع ع نيران واسالهه ماتحسين بالذل؟؟ دكلي كوه جاي اتجرع هذا الشعور اني وياج مالنه مكان بيناتهم ولاعدنه مكان انروحله ...

امنيه.. نيران تعتقدين اكدر انسه ادهم..
... جان نسيت قيس حبنه طاهر ونقي مستحيل راح يزول غباره راح يبقه محفور بنص الكلب...

امنيه... اباوع ع جنط الملابس والنيشان اباوع ع قطع الذهب واكعد اتخيل البدلات الي حجزتهن وينهن هذني طلعن كلهن جذبه...

جنت كاعده واباوع لبنت نيران انفتح الباب ثريا والحجيه كالن انريد نحجي وياج...

ثريا.. امنيه ادهم كالي روحي كلي لامنيه وكليلهه انه رح اخطب اسماء جيرانه..

امنيه.. هيج خنجر وانبت بكلبي ومثل الي طلعو ورجعو نبتو من جديد الم يحز بيه حز...

امنيه.. المطلوب من عندي شنو اباركله لو اروح اخطبله..
ثريا.. لا بس راد يوصلج خبر ويكول تريد تبقه على ذمتي تريد تختار الموت وما اطلك..

امنيه.. انتي جايه بصلافه وتوصليلي هالكلام الظاهر فرحانه باختيار اخوج لصديقتج الساقطه..

ثريا.. لاتغلطين عليهه البنيه مؤدبه وماطالع عليهه شي واذا حبهه ادهم موفد شي جبير..

امنيه.. مبروك الج ولاخوج والكم كلكم ماكدرت اكمل كلام وياهه بسرعه كمت اركض للحمام...

سديت الباب وكعدت ع طبله صغيره ابجي وابجي واحس الحركه الي بكلبي ماتبرد ليوم الدين..

حبيبي وخطيبي وجنت محضره نفسي لزواجي يروح من عندي بين يوم وليله اريد اصرخ واريد اعيط واريد اكسر واضرب نفسب كلشي اريد اسوي بس اخاف انذل وما اريد اشوف نظره عطف من احد...

نيران ادك بالباب امنيه وينج اطلعي خلي احجي وياج ..
طلعت بسرعه اخذتني من ايدي للغرفه جانت تهز بيه وكانو تريد تصحيني من الكابوس الي احلم بي...

نيران.. امنيه انتبهي على نفسج محد يفيدج بعدج صغيره والعمر كدامج خلي يولي ادهم لاتنقهرين ابوس ايدج لا تنقهرين

... نيران اني احبه شلون انسه لوميت احسن ولا اشوفه يروح لغيري نيران ساعديني كلبي مشتعل نار لج راح اموت...

نيران.. اسم الله ع كلبج ياريت اكدر اشيله عنج ياامنيه هاي قسمتج لاتكعدين تنوحين ماراح يتغير شي...

امنيه.. اني ما اذيت احد ابد ليش هيج يعاملوني الحجيه ليش ساكته ليش ماتساعدني..

نيران.. لا اطلبين المساعده من الناس بس الله يكدر يساعدج وصدكي يا امنيه مدام ادهم ناوي يتزوج محد يكدر ياثر علي ...

شوفي حته فاروق هسه يوافق لان ماراح يوكف بطريق اخو الخاسر الوحيد هو احنه لا انتي ولا انه حبينه وتزوجنه مثل البنات...

امنيه.. ماكدرت اطلع سمعت صوتهم وعركتهم كالعاده يتعاركون ومايصفون وكل واحد بيهم يسوي الي يعجبه...

اسمع ثريا تسولف للحجيه دكلهه فاروق تعب من كدما حجه على ادهم بس ادهم مصر على اسماء وفاروق مايريد يشتت اخوتي لان كلهم صارو ضد فاروق...

اوس وقيس وادهم وثريا كلهم بصوب وبس ايوب وفاروق بجانبي الكل مايد زواجه ويمدحون بيهه ومن ينذكر اسمي يكولون هو من البدايه ادهم كال ما احبهه مجرد اساعدهه...

من اسمع هالكلام حالتي تزداد واني اسمع العطف من العائله الي ربتني واعتبرتهم اخوتي اريد اوكف كدامهم واسال اوس وقيس شمسويه اني الكم حته هيج تعاملوني...

انت قيس ليش هيج وياي وانت يسموك الحنين اني امنيه ليش اخذتني بذنب نيران ...

اجه فاروق وحسيته عاجز عن الكلام قبل لايحجي كتله خلي يتزوج وروحو اخطبوله هو الزواج مو غصب بس خلي يطلكني...

ماحجه شي فاروق بس اخذ نفس عالي وطلع حسيته اكثر من عندي متالم وهو يشوف اخوته طلعو عن سيطرته وكامو يتهمونه بالتقصير ويحملو ذنب معاناتهم...

امنيه.. سالو عليهه وكالو حبابه وعمهه صاحب سمعه زينه استفسرو عن اهلهه كالو يتيمه وعمهه مربيهه وراحو خطبو واسمع صوت الزلم البرا من كرايبهم الجابهم ادهم من الانبار حته يخطبوهه..

اسمع صوتهم وهم يباركوله ويكلوله شايف كل الخير منك المال ومنهه العيال...

هاي الكلمات جنت منتظرتهه اسمعهه بعد اسبوع زواجي بس كلشي انهدم مثل الحلم وفزيت من عنده عبالك كل هذيج السنين جانت عباره عن وهم لو جنت احلم...

ثريا والحجيه راحن يحضرن الخطبه واني واختي يتيمات مكسورات الخاطر وحده تباوع بوجه الثانيه وتواسي اختهه...

نيران تهدي بيه ودكلي مايستاهلج بس هاي الكلمه الي يواسوني بيهه شلون اوصفلكم شعور وحده انذبح حلمهه كدامهه شلون اكدر اعبرلكم عن حزني...

ادهم الي بس ضحكته جانت بالنسبه الي حياة من صغري يشاقيني ويكرصني من خدودي كبرت وحبيته وبده يغمرني بدلاله دائما يكلي اموت ع برائتج ...

طب ايوب وشافني شلون عيوني مورمه بجي كال لاتبجين يولي مايستاهل والله انت لو بس كايله اخذو حقي من عنده والله اشيلو من هين ...

امنيه لا انه ولافاروق رحنه بالخطبه ماراضين عنو بس مابيدنه شي لكح الصوج براس فاروق وحملو المسوؤليه  والله هسه يتندم ويجيج يتوسل ...

امنيه .. هزيت راسي باسى ماعندي جواب اجاوب بي اجت ثريا تضحك والفرحه مبينه على عيونهه شايله بيدهه كيك الخطوبه ...

بعدني مسيطره على نفسي جنت واكفه اغسل بالمواعين بالسنك بس اريد الهي نفسي وابين اني مامهتمه ثريا جابت الكيكه وخلتهه ع السنك وكالت تعالو اكلو طيبه..

ما ادري شحسيت بهاي اللحظه مثل واحد يركص ع جروح غيره اتمنيت تكعد وياي تواسيني اتمنيت تبجي على بجي ودكلي ما اروح للخطبه علمودج...

انفعلت حيل فقدت ما حسيت بنفسي غير شايله الكيكه وشامرتهه بنص المطبخ هي والكريمه صاحت ثريا شبيج تخبلتي..

امنيه.. فرحانه ست ثريا بخطبه اخوج الله ينتقم من عندكم ويضوكج من نفس الكاس الي خلتيني اجرعه...

انتي السبب انتي فتحتي البيت الهه وخليتهه تتقرب انتي ساعدتيهه بكلشي شكد حجيت سويتي نفسج تعرفين العيب وتستحين واني الغبيه مصدكج طلعتي بلوه...

ما اكول غير بس حسبي الله ونعم الوكيل عليج وعلى اخوج وعلى كل واحد بيكم شارك بعذابي دكيت ع صدري بقوه شايفه هاي النار التسعر بكلبي ان شاء الله تضوكوهه كلكم وانتي اول وحده...

سحبتني نيران للغرفه لان ماجنت حاسه بشي اسمع ثريا تغلط عليه ودكول مخبله تريده كوه يحبهه  اريد اطلع اريد انهزم باي مكان مستعده انام بالشارع ولا اسمع صوته بالبيت ...

بليل اسمع صوته ويتشاقه ويه اوس وقيس وانه اشتعل وارجع انطفي اريد اكوم اكسر راسه  مايبرد كلبي.

عيوني فاركت النوم وما غمضت ابد صار ايام اني اكعد اناجي ربي يساعدني اني ما استاهل الي يصير بيه لان ماغلطت ولا سويت ذنب...

نفس غرفتي ونفس نيشاني تجي ثريا دكلي اذا مامحتاجته عليمن نشتري غيره شايفين هيج ياناس...

شايفين كميه النذاله الي وصلت بيهم تكعد تفتح بجنطي وتختار حسب اليوالم قياس اسماء كلهن صغار عليهه دكول يله نشتريلهه غيرهن ودكوم وتدفع الجنطه برجلهه...

بيومهه صدك تخبلت كمت ع ثريا الي تشيل بملابسي مثل الماعاجبهه تلزمهن بطرف اصبعهه وترجع تشمرهن بالكاع ...

نيران لازمتني كلساع اتعوذ من الشيطان واكول اصبري يا امنيه الله ماينساج يا امنيه ...

تالي تروح تصيح اسماء وتجي تختار الي يعجبهه من ملابسي جنت اشوف هاي مشاهد الخباثه بس بالتلفزيون بس هسه صوره حيه كدامي...

اجت اسماء نفشت ملابسي وتختار وتشمره بعيد دكول اووي شنو هالذوق ع بختج ثريا...

لهنا وبس ماتحملت ابد كمت من مكاني كبل لشعر اسماء سحلتهه من شعرهه من نص الغرفه للمطبخ وثريا تغلط عليه وتريدني اعوفهه تجر بيه

نيران واكفه بس صافنه ما ادخلت ما ادري منين جبت هاي القوه حسيت شعرهه اجه كله بيدي واجر بيهه ماخليت كلمه توصفهه ماحجيتهه بس مابرد كلبي...

بهاي الاثناء ويطب ادهم انقهر ع حبيبه الكلب المدمايه صاح بيه امنيه عوفيهه تخبلتي ..

امنيه.. ماعندي كلام وياك من تصير رجال احاجيك والكدامي مجرد ذكر...

السجينه يمي بسرعه لزمتهه كتله بس تحجي حرف اكتل نفسي واكتلهه واحرمك من ليله عرسك...

كلامي جان ماينحمل بنظره يتقرب عليه واني بعدني مجلبه بشعر انعال وهي تصيح حبيبي ادهم خلصني من هي مجنونه...

كلما تحجي اعت راسهه حيل وكل الي يوصل يمي امد السجينه علي وصدك بلحظتهه لو متقربين اكثر جان كتلت واحد...

مانزلت دمعه وحده من عندي واني اشوف الحلقه بيده نازع حلقتي ولابس وحده جديده ..

كوه تماسكت واريد اسيطر بس للاسف الموقف الكدامي وعيني على الحلقه خلاني انهار اكثر وكعت السجينه من ايدي وتركت راس اسماء...

واني عيني بس على ايده الي فتحهه لاسماء وراحت احتمت بحضنه هذا الموقف يدك براسي لسه ولا انسه...

وهذا الموقف هو الي خلاني اوصل واعيش حياتي واتمسك بنفسي وعانيت وعانيت وحدي اسنين طويله واني ادور عن نافذه بصيص امل...

تعبت حيل احس نفسي بديت اتلاشه شويه شويه احس كل الناس يتمنون حزني محد يريدني محد يدافع عني حته اختي ضعيفه ...

صرت احس الدنيا مثل الخزانه المظلمه كلما اريد اطلع راسي ابصر النور ارجع اوكع للقعر من جديد...

اليوم احد والخميس عرس خطيبي ما ادري شحجي خطيبي يتزوج كدام عيني وبنفس غرفتي ونيشاني اسمع الحجيه تحجي علي يكلهه طلاك ما اطلك واتزوج اسماء لان احبهه...

بيوم الاحد بليل طلعت اريد اشرب مي استغل الفرصه واطلع من الغرفه اذا موبالبيت حته ما اشوفه تلكاني وجه بوجه بالباب...

عيونه حجت اشياء مامكن انساهه عيونه دكلي امنيه احبج اللمعه واللهفه والدموع الي اتجمعت بيهن بس جوارحه كلهه ترفض امنيه  ...

ظل دقايق هو صافن عليه وبعدهه تعداني جانت هاي اخر نظره اشوفهه من ادهم واخر مره اوكف كدامه بهالضعف ...

....

ثريا... البيت مظلم ليل نهار مشاكل ورزقنه قل واخوتي ابد مامرتاحين ولا اني مرتاحه...

صرت اضوج من امنيه لا وصلت بيه كمت اكرهه ولا اريد حته اشوفهه وشكد افرح من اشوفهه تبجي ...

مرات يجيني شعور خاطف بان اروح احضنهه وابجي وياهه بس بسرعه يتلاشه وارجع اكول حيل بيهه...

فاروق السكوت الي عنده خله حته اخوتي يخافون من عنده ما حجه ولا اعترض حجه مره وحده وبعدهه سكت ...

كلنه مخبوصين انحضر لعرس ادهم الي هو باجر اربعاء الحنه مالته وحته عزمت عماتي وماخليت احد مادكيت علي اول فرحه النه...

جنت ادحك امنيه تصفن وبس تردد حسبي الله ونعم الوكيل هاي الجمله ماتوكع من السانهه ابد...

يوم الثلاثاء بالليل اجت عمه اسماء وصديقتهه وام صديقتهه جابن غراضهه وهلاهل وجكليت واخوتي كلهم مهوسين بس الكل من ادحك علي تلكه الحزن مخيم على ملامحو...

بس ايوب وفاروق ما الهم علاقه حته ماشاركو بفلس واحد وحته كلمه مبروك ما كالو لادهم...

الاربعاء الصبح مثل كل بيت اليوم عنده حنه وفرحان وانتظر الناس تجينه كعدت من الصبح دحكت نيران وامنيه كاعدات ...

لميت الفراش وطلعت والحجيه بعدهه نايمه البيت هدوء فارغ صحت نيران امنيه ماكو احد..

دورت البيت كله ماكو ركضت كعدت الحجيه جفلت وكامت ع حيلهه ادور وياي ركضت ع ادهم واوس جانو نايمين كعدتهم برعب...

اندور بالبيت بس كل اثر ما الهم ادهم ركض لغرفتو القديمه الي جان بيهه الكنتور جان المفتاح معلك بالكنتور ومامقفول...

بس فتحه كلشي يخص امنيه موجود ملابسهه الجديده والقديمه اي شي مشتري الهه ادهم من توفت امهه لهاي اللحظه على ترتيبه بالكنتور...

ركضت للغرفه ماماخذات اي شي كلشي حته الاحذيه والشالات حته ذهبهه امنيه وحلقتهه كلشي موجود بالكنتور...

ادحك على ادهم الي الدموع انحبست بعينو ويهمش مثل الطير ويصيح وين راحت...

خابرنه ايوب وفاروق واجو يركضون اليوم المفروض الخنه وراح توصل كرايبنه وامنيه واختهه انهزمن ...

ايوب انهد على ادهم وفاروق لازم تليفونو يتصل بس انريد طرف خيط بس كل هذا والهدوء الي عند فاروق من صدك بعث الخوف بكلوب اخوتي...

طلعو يدورون وادهم شبه فقد عبالك جان نايم وهسه فز من سبات عميق ...

امنيه ونيران طلعن من البيت وما اخذن اي شي مشتري الهن طلعن بس بملابسهن وبهيج يوم اختارنه...

عدنه رقم خوالهن دك ادهم من جهه وقيس من جهه وجان هذا اخر امل عدنه نلكاهن يم خوالهن...

بس للاسف طلعو مايعرفون اي شي عنهن وخلال ساعه اجت جدتهن تبجي وتصيح وين راحن البنات ...

بدت الناس تجينه وراح يصير موعد الحنه وامنيه ونيران فص ملح وذاب...

ما اعتقد ينسي هذا اليوم بالنسبه النه كلنه وخاصه لادهم راحت امنيه واختهه وعافن مكانهن خالي محد كدر يسده ابد....

يتببببع.... متابعه ممتعه

عيوني الحلوات الامورات الي يكولون القصه حزينه وكابه وترفع الضغط ياعمري شبيدي غير حياتهم هاي وما اكدر اختصر شي لان فعلا عاشو هذا الشي لعد اني الي اكتب شكول عراقنه العظيم بي بلاوي لذلك القصه اسمهه ازمة ضمير لان بهاي القصه الضمير معدوم...

وهذني اليكولن البارت قصير شلون اجي اموتجن تروح ايدي من الكتابه وانتن تقرنه بدقايق .... احبكم

هذا الفيديو مشاركه من متابعتي الجميله لادهم وامنيه