رواية بعد فوات الأوان الفصل الثامن 8 - بقلم آنين الليل

مرحبا حبايبي
اعذروني اتاخرت عليكم بسبب ظروف
صدگوني ما الي خلك اكتب نفسيتي تعبانه الى ابعد الحدود
//////////...////////////..../////////
يوسف
ما اعرف شلون صرت اسوق بالسياره اريد بس اوصل للمستشفى لمن ما اتصل عليه سالم وهو يگلي
يوسف مصيبه مصيبه چبيره
ما حاچيته عرفت سالم قصده انو ازهار اتوفت
بس ازهار راحت للكليه هي مرحله رابعه يعني شلون اتوفت معقوله بالكليه ليش شصار وياها

اتذكر الصبح گعدت اريد اروح للدوام وشفت امي وهي صابه الريوك انا سلمت :: صباح الخير
ردو عليه وهي نزلت مبدله تنوره وقميص والشال بايدها گعدت گالت //صباح الخير
ردينه //صباح النور
سالتها ::مو چنچ گاعده من وكت 
هزت راسها // اي صحيح لاتنسى اليوم اروح للكليه مو للمدرسه الي اطبق بيها
::ها يجي عليج الخط
- لا امر ع البنات ونروح بالكيات

وصلت للمستشفى شفت سالم منتظرني بالباب وشفت ولد عمي كامل موجودين وهواي ناس انا باوعت السالم
الي تلگاني وعيونه حمر وشفت شيخ عشيرتنا الي اخذني على صفحه وگال
: اختك متوفيه بحادث سياره ويه ولد
نزل هذا الخبر مثل الصاعقه عليه غوشت عيوني وصار گلبي يدك لزمت سالم من ياخته وانا اجر النفس قوي واگله
:: شيگول هذا
سالم هز راسه //ايي مثل ما سمعت
اجه احمد ابن عمي كامل وگال وهو يعيط //خاطفها بتنا مخطوفه عمتي وين خلي تجي اتفهمنا البت مخطوفه

شويه حاولت اسيطر على نفسي گلت :: ايي اكيد مخطوفه سالم بسرعه اريد اعرف منو هذا وين بيتهم
رحت للضابط الي واگف على صفحه وطلبت معلومات عن الخاطف  الضابط سالني
: يعني تدعي علي خاطف اختك
خزرته وهزيت راسي ::ايي ادعي وهسه اريد معلومات عنه
الضابط //ما يصير انطي اي شي
صرت اعيط واهدد وانا اگله :: الميته اختي وهذا ما نعرفه واي تهور من عدنا انت تتحمل المسؤوليه
الضابط //على كيفك خلي نفتهم

اتقربت منه وانا اگله ::اريد عنوانه لازم تعرف هاي قضيه عشائريه قضية شرف تعرف شنو قضية شرف
الضابط // لحد هسه ما نعرفله عنوان
گتله :: اريد اشوفه
الضابط // استاذ يوسف شتشوف منه صاير لحم
هزيت راسي ::مي خالف
راح وياي ودخلت شفته بالثلاجه وصدك  صاير لحم ما مبين اي شي باوعت للضابط

:: اريد هويته
الضابط //ما يصير
جاوبته ::اريد هويته وكل شي يخصه هاي قضيتنا ولحد هسه احنه ما سوينه شي
الضابط انطاني چيس نايلون بيها الهويه والنقال وفلوس اخذتهن وطلعت عفت الجنازتين واحمد من شاف الهويه گلي
: عرفته واندل بيتهم
ورحنا البيت الحقير بالطريق خابرني واحد من گرايبنا گال //اعرفه عنده معرض سيارات
وانطاني اسم المعرض
گتله :: اخذ جماعه وارموا وعزلوا واكتبوا مطلوب دم واذا تلكون اخو ابو عمه اكتلو بدون رحمه

رحت وانا ما اشوف بعيوني اله انو انبگت بعرضي وهذا الشي ما يغسله اله الدم وصلنه وصرنا نرمي
على البيت طلعوا الجوارين وحاولوا يهدونه لكن ما قبلنه وعطنه عليهم وصرنا انسب ونغلط بعدين دخلنه للبيت
وكسرنا شنو بي
ما خلينه اي شي نشوفه نرمي وطلعنا وخليت جماعه يم الطب العدلي حتى الجنازه ما تنشال وبعدها صارت
الاتصالات من ناس اعرفها وناس سامع بيهم وناس ما اعرفهم رادوا بس عطوه لكن انا ما قبلت وگلت
::ما كو عطوه دمهم مهدور رجال وشباب واطفال والعشيره كلها

رجعت للمستشفى والقاضي طلب امي وطلبني ولان تقرير الطبيب الشرعي ما معروفة الملامح مهشمه
سجلنا دعوه وطلعنا الجنازه ورجعت للبيت وانا اسمع الصريخ على اختي وشبابها  ورحت اشوفها لگيتها
متهشمه صرت ابچي عليها وانا اتذكر ضحكتها وسوالفها وشلون تلحگني تاخذ مني فلوس رغم هي عدها راتب
ابوي بس تگلي ::ما يكفي

صرت اتذكر صوتها وسوالفها وعصبيتها واتذكر دلال امي وابوي ابوي الي وصاني عليها
راحت امي وضحى بالجنازه وياهن مرت احمد ابن عمي واخوي بسام واحمد وبقيت انا يمي الزلم والشيخ الي ما
بطلت الناس تتصل بي تريد عطوه لكن انا ما وافقت ولازم اكتل منهم حتى بس يبرد گلبي

اكثر الناس الي اجت للفاتحه چانت تريدنا بس نوافق ياخذون الجنازه ايدفنوها لكن انا ما قبلت وكان ردي بسكوتي
ثالث يوم الفاتحه بالليل بعد ان كفت وراحت اكثر الناس اتصل عليه رقم بالبدايه ما جاوبت لكن صار ايلح اكثر
من مره جاوبت:: الو

الو السلام عليكم اخ يوسف
::نعم منو وياي
انا رائد وسام
:::اهلا وسهلا خير
كل الخير بصراحه رايدك تجي للمركز وافضل تجي ابحدك
جاوبته باستغراب ::ليش
شغله جدا ضروريه تخص الحادث
::وليش اجي ابحدي
استاذ يوسف اكيد هذا الشي بصالحك ياريت تجي وبسرعه

طلعت ولفيت الشماغ على راسي واتصل سالم وهو يگلي //خير وين رايح بدون ما تگول
::شغله ما اتاخر
اي غير اتفهمني
::سالم خلي اوصل وبعدين افهمك ،

وصلت للدائره وهناك اخذوا اسمي وگلولي انتظر بعدها بخمس دقايق اجاني ولد وسلم عليه وگلي اتفضل
هو مشى وانا مشيت وراه دخلنه الغرفه بيها مكتب ورا ولد شاب يجي عمره تلاثين سنه وگاعدين ع القنفه اثنين
زلم لابسين دشاديش وبشت وعگل
سلمت والولد وگف ومدلي ايده وهو يگلي
اهلا بيك استاذ يوسف اتفضل

گعدت هو گلي الله بالخير رديت علي وحسيت انو هذوله الزلم من طرف اهل المجرم الرائد گلي
استاذ يوسف اسف جبتك بهالليل لكن انا اول شي انسان وثاني شي اعتبرني طباب خير
وگفت على حيلي ورديت علي ::انت جايبني على مود الجماعه
وگف رجال چبير گدامي وگال //عمي انا سيد ...وهسه اريد امشي عليك جدي اريدك تنطينه عشر دقايق وبعدها
الك مطلق الحريه گدام هذا الولد لو تكتلني انا
الرائد هز راسه وانا باوعت وگلت ::شكو احچو
الرائد //اذا تحبون انا راح اطلع وانتوا اخذوا راحتكم
جاوبته ::لا استاذ ماكو داعي انت طباب خير اتمنى تبقى

السيد گلي //عمي انا سيد وهذا ابو عادل شيخ عشيرة الناس المطلوبين
باوعت للسيد وجاوبته بعصبيه ::هااا والله زين جاي وجايب وياك الشيخ شنو هالگد مستزغرني يعني ما اكدر
اكتله واهنا وگدام عيونكم
ابو عادل //والله عمي الك كل الحق تكتلنه انت رجال راعي حق
جاوبته بدون ما اباوعله ::خير شتريد

ابو عادل //عمي راح احچي الصار وياكم شي چبير وانا نشدت عنك كالوا خيير ورزن
السيد // واسمعني بويه  بيوم  بيومين بسنه بعشره لازم يصير الها حل هاي السالفه
انا  بقلةصبر :: خلصو شتردون
ابو عادل //استاذ من صار الحادث انتو انخبصتوا بس هسه لازم تسألون نفسكم بتكم طالبة كليه
ومأجره خط شلون الولد خطفها
باوعتله وانا شرار يطلع من عيوني ::شقصدك
ابو عادل //بدون تشنج مثل ما انت تطلب احنه ندور شي ايفيدنا

رفعت حواجبي ::هاا مو چنك فتت زايد
السيد //استهدى بالرحمن واسمع
::شسمع اشو انتو جاي تلفون وتدورون
السيد //اختك ما رايحه للكليه بالاساس
::اي لان خاطفها
بس المخطوفه ما تگعد بالصدر
::وين تريدها تگعد

ابو عادل // عمي احنه بالولايه والولد معروف من يخليها بالجنطه مو صعبه علي واليخطف ما يمشي
بنص المدينه لا يروح بره بمزرعه بگاع بعيده
:: ها يعني تردون تگولون اختي رايحه ويا بارادتها هاي انحسبت عليكم لان  جاي تتهمون اختي ويه ابنكم
ابو عادل //لا مو هيج الحچي
::شنو الحچي
ابو عادل //عمي احنه غرگانيين وجاي نلزم بگشايه وهذا الله شاهد مو كلامي

:: زين راح اجي وياك ليش ما تگولون اجرته لان هي البنيه جاي تطبق وبس اليوم تداوم بالكليه ومن شافته
يريد يخطفها سايسته وبعدين حاولت تشرد وما گدرت وتعاركت ويا وصارت
الحادث يعني اختي جنت على نفسها وسوت الحادث وماتت  بس حتى تحافظ على شرفها من ابنكم الچلب
وهنا الرائد اسألوا يصير هذا الكلام لو ما يصير
الرائد //يصير ومضبوط ميه بالميه

ابو عادل //احنه ما نبري الولد لا غلطان وغلطان هواي هو انقبر واختك هم ماتت
السيد //انتو اخذتوا بتكم اتدفنوها وهو انريد ناخذه اندفنه
رفعت راسي للسيد //سيد مو چنك اتهدد
السيد //لا عمي افه عليك انا طباب خير بس عمي الناس شالت من بيوتها وعافت اشغالها وانتم ما تقبلون تنطون
عطوه ولا ترضون يندفن ميتهم
هزيت راسي ::ايي

السيد // ايي عمي جايينك نريد ندفن الولد والتريده يجرالك
هزيت راسي بالنفي وگلت ::لا ما يصير هذا الشي لان كلام الشيخ الواحد لازم يفكر بي
الرائد //استاذ يوسف الحجي ابو عادل من حچى هالشكل راد يوصلك انو الناس تتساءل لكن هسه من وضحت
انت الصوره هسه هو جاي يريد يطلب منك هالطلب
::استاذ جاي خال بصدره شكم كلمه عباله احنه ناس ما نفتهم لو نطخ ما يدري كل كلمه تنحسب
علي ويتحاسب عليها

ابو عادل //لا محشوم وهذا الضابط ما ردت احچي گدامه گلت لمن ما تجي
وگفت وگلت ::وصلت المعلومه وخلي كلامك النفسك يفيدك
السيد//يواشك عمي شنو ما كو تقدير
باوعت للسيد وحچيت :: المفروض من تجي ويه واحد تعرف المن جاي
السيد//لا هاي اهانه
انا بعصبيه::وانتوا حافظيلكم شكم كلمه وجايين اتهددون بيها

السيد //لا عمي ما انهدد انريد انحلها هو غلط وانقبر واحنه مستعدين للي اتطلبونه وهسه نترك كل شي
وانريد الانسانيه اكرام الميت دفنه ولو هو ما يستاهل الدفن لكن احنا مسلمين ودينه يامرنه بدفن الميت وانت
عمي حسب ما عرفنه من السيد الرائد ماخذ حتى جنسيته ونقاله
::وهسه شتردون
السيد // عمي يوسف احنه ما نريد انت انت نريدك تتكرم علينه وتقبل ناخذه اندفنه
::باي قانون

السيد //قانون الاسلام قانون دين محمد عليه الصلاة والسلام
الكل گال صلى الله عليه وآله وسلم
السيد //شوف شكد مختلفين لكن وصلنه الدين الاسلام التقينا بطريق واحد
طلع قطعة قماش وعگدها وگال //هاي راية العباس وهاا (لزم شاربه ) شتريد يجرالك
وتعال اگلك عمي مكرمه اختك الله يرحمها حتى لو رايحه ويا بارادتها لو مصاحبته همه يبقون
محقوقين وغصبن ما عليهم  يگعدون ويفصلون
ياما بنات اتقشمرن وسون الموزينه بيهن انكتلن وبيهن انسترن وغصبن على شاربه الي اخذ وفصل
والي فصل وشال
والي والي وانت بكيفك محد يجبرك اجيتك من درب الانسانيه

جريت نفس ::يصير خير باچر الصبح ارجعلك خبر
السيد //ان شالله
طلعت وانا ما اشوف بعيوني وبقيت امشي بالسياره ما اعرف وين وگفت شويه نزلت وجريت هوا لان احس
ما اگدر اتنفس وراسي يوجعني
اتقيأت وصرت اجر بالنفس قوي ما اريد ارجع ويسالوني وين رحت ويامن ومنو اتصل بس لازم ارجع
دخلت للبيت لاگاني سالم وبسام سلمت سالم سالني // وين رحت جاي اتصل وما ترد
جاوبته ::اهنا شوية اجراءات ع الشكوى
هاا
هزيت راسي وگتله :: دايخ كلش خلي اروح اتمدد شويه
دخلت للغرفه من شافتني ضحى اجت چانت يم امي وزهره اختي وخالتي دخلت وهي تگلي
الله يساعدك
باوعت الها ورديت ::هلا يابه
يوسف شبيك وجهك اصفر
::تعبان ضحى روحي نامي يم امي وخالتي اريد ابقى ابحدي

هزت راسها ودارت وجهها وراحت بمجرد ما وصلت للغرفه انا طلعت باوعت الامي الي اشوفها متوتره
::شكو يمه ليش خايفه
امي جاوبتني وهي تبچي //اي يمه خايفه عليك ما عدي شي اخاف منه بس انت شو علاء بالخارج حتى ما كلف
نفسه يجي وزهوره دفنتها واجيت
وصارت تبجي حييل وهي تگول //يمه ازهار ياروحي وعيني
ازهار يابعد گلبي
يمه يلمونستني بعد عدمن افل شوگي
يمه ياام البيت زهوره يمه

اسمع امي واشوف دموعها وكسرتها وخالتي نعيمه تحچي على امي وتگلها //كافي ام علاء يوسف تعبان الله يساعده
امي //خيه ابنيتي شنو ذنبها انخطفت بنيتي الي چان ابالي بس هالشهر واجهزها هيج يجي ابن حرام ويخطفها ويكلب
السياره بيها
خالتي // ايي صدك هو گلب السياره يجوز راد يعتدي عليها وهي صارت تصيح وخاف
امي //اي خيه يمه يا شبابج يمه احبيبه
خالتي //كافي خلي يوسف يرتاح وانت روح خاله ارتاح الله يساعدك بس من هاي الناس الكل ساع واحد
اثنيين  جايين مثل ناگوط الحب

رحت صعدت واسمع خالتي  تصبر بامي وهيه تبچي على شباب ازهار وشمعتها الي انطفت قبل اوانها
صار هدوء وبقيت متمدد بالگاع ويتراوالي هسه تفتح الباب وتجي وهي تضحك وتتشاقى وتكلي
... ههههه شبيك يوزر كون زليخه مزعلتك
اجاوبها ::واذا مزعلتني شتسويلها
ضحى تضحك وتگلها /وانتي شعليج رجلي وبكيفي مو راح تتزوجين اخوي
...لا ما اتزوج وافرحج اله البس كل ملابسج الجديده
ضحى //هسه الي يسمعج يگول ما عدها ملابس ما يگول تلبسين كله ماركات

هي تغور بضحى ... حبيبتي الله يرحم ابوي ويخليلي اخوي انا شنو يعجبني اشتري مو مثل بعض الناس حاطيهن
على گلوبهم بعدين اريد البس ملابسج خباثه وانوبه اذبهن بالشط
ضحى //تف تف جاي اتحسديني عين الحسود بيها عود
باوعتلي ... والله الصدك وما تزعل يوسف
::لا ما ازعل
... احلف
::بدون ما احلف ما ازعل
...انت ما تفتهم
::ولي ولج
...مو گتلك لا تزعل انا اقصد اتمسكن الها وحبيبتي وكلبي واخذ فلوسها وسافر واخذلك وحده احلى منها

ضحى بعتب //شوف يوسف اختك شگد چلبه انا الج اله اخلي سالم يتزوج عليج باسبوع عرسج
اتخوصرت وهزت ايدها ... جربيي ياالله خابري
ضحى //ادري بيج ما يشوف وحده بالدنيا غيرج
... جاي اتحسديني هسه شكلتي دگومي انطي اليوسف شكم فلس خلي ياخذله مره
ضحى اتغور بيها //حرگه وانا يوسف ما ياخذ عليه موتي

بوكتها اتذكرت سحر ودموعها لكن ما عاتبت ازهار لان العتب ما يفيدني بشي
جريت نفس وسمعت رنة النقال
::الو
الشيخ //الو اشلونك عمي
::الله يسلمك هلا شيخنا
الشيخ //هلا بيك عمي يوسف خابرني سيد ...وحچى وياي
اضطريت اسوي نفسي ما ادري سالته ::شراد شيخنا
:عمي گال اكرام الميت دفنه وحچى وياي گال انطوني الجنازه وانا ادفنها
::وانت شتگول شيخنا

:اگول هو ميت واحنه شغلتنا يم العدليين
::وبعدنا كل شي ما سوينه للعدليين
الشيخ //نسوي انت تفصل واحنه نلبس
::طال عمرك شيخنا وحتى ما اكسر كلمتك خلي بس السيد ياخذه محد يوصل للمستشفى
الشيخ //هذا اول شرط راح اكوله واحنه انطيناهم درس
::بعد شيخنا بعد هواي دروس
—اي عمي مثل ما تريد گدامك ولدنا وحلالنا ومالنا

::تسلم ما تقصر
راح اخابره واگله هسه يروح
::لا ابو راكان باچر بالليل يجي السيد ويا سايق وياخذ الجنازه
—هذا هو مثل ما تريد
::اذا خابرك السيد گله ما حصلته يجوز مو يمه النقال
—-اي عمي تدلل ياالله اخذ راحتك فيمان الله
::الله وياك وانت هم تعبت حييل
—لا بويه كل شي ما سوينه بعد هواي ورانه

سديته من ابو راكان
نزلت جوه ودخلت الغرفة ازهار چانت زهره قافلتها گالت امي كل ساع واتهددت تريد تدخلها جريت نفس قوي
گتلها جيبيلي المفاتيح
جابتهن زهره وراحت وانا دخلت للغرفه تدرون هاي اول مره ادخل غرفتها الازهار لان انا بيه طبع احترم
الخصوصيه
شفتها غرفه بيضه جديده كنتور تلث ابواب وميز تواليت وچربايه چانن جدد اتذكر قبل شهرين او تلاثه گالت
اشتريت اخشاب جدد
ومن سالتها ::منيلج فلوس
كالت راتبي وامي چملتني

بيومها شلت فلوس وانطيتها وضحى كالت الها// مو بالعطله تتزوجين شلج بيهن
هي ردت وهي تضحك ...اخذها غرفه الجهالي
هزيت راسي وانا اتنفس وانفخ رحت فتحت الكنتور واشوف ملابسها معلكات وفتحت الباب الثاني شفت عطور وعلبه فتحتها بيها ساعات وتراچي ومحابس اثنيين وبيها مداليه ودناديش وجوه شفت بجايم ودشاديش نص
والباب الثالث بي ملابس نوم تقريبا اربعه او خمسه عرفت مشتريتهن لان جاي تحضر الجهازها
ما اتحملت وگلت

::دخيلك ياربي بدل ما هسه ابنيه وفرحانه وجاي تشتري وتحضر الزواجها تموت بسبب واحد نذل حقيير
ياريتك كون هسه عدل يمكن ربطتك بالشمس وبنص الشارع وشرط لا انطيك لا ماي ولا لگمة اكل والي يتدنالك
اموته بس وسفه لكيتك جثه

سديت الباب وقفلت الغرفه واخذت المفاتيح وصعدت الغرفتي لگيت ضحى متمدده ع الچربايه ومن شافتي نهضت
انا گتلها // مو گتلج انزلي نامي يم امي وخالتي
هي ما عقبت نزلت بسرعه
سديت باب الغرفه واتمددت بالگاع وظليت ادخن ما اعرف يمته وشگد نمت صحيت على بسام وهو يكلي
—-اجو ناس وسالم يگول خلي يجي

گمت رحت للحمام وغسلت وجهي ونزلت سمعت امي وهي جاياتها نسوان وهي تنعى وتبچي رحت للديوانيه لگيت
ناس جايينه شيوخ وزلم بس حتى ننطيهم عطوه لكن انا ما انطيت عطوه ولا قبلت اتناقش بأي موضوع وطلعو
الناس زعلانيين واحد من ولد عم ابوي گال //شنو ليش ما شويه تلين مو تشوف ناس رايحه وناس راده
جاوبته ::بعد خلي استوهم خلي يعرفون عرض الناس مو لعبه
- - حقك بس ما يصير الناس تريد حقها
هزيت راسي بدون ما اجاوب

بقيت گاعد بالديوان وتلفوني ما بطل رن مرات اجاوب ومرات اغلس وهواي اجتنا عالم وگرايبنا گاعدين عدنا
وهمه متحضرين الاي شي اريده وصار الليل واتصلوعلى ابن عمي احمد الي سد التلفون وگلي بعصبيه
:يوسف انت صدك گايللهم ياخذون جنازة هذا الچلب
هزيت راسي وگتله ::ايي
سالم نهض وصار يرجف ويصيح // شنو ليش هيج تسوي هسه رايح اكتلي واحد منهم والي يصير يصير

انا رحت يمه وگتله ::اوگف ما خليتهم همه ياخذونها رجال سيد جاي على ابو راكان و ما گدرت ارده مو حلوه
بحق شيخنا الرجال هو او ولده ويانه وشنگول ايگلنه صار ما يصير نكسر كلامه وشرطت بس السيد ياخذه ويدفنه
سالم // لا غلطان المفروض تخلي يعفن وما تنطي
باوعت سالم الي شفت الحزن بعيونه وجاوبته :: اعرف بحرگة گلبك الي ما تقل عن النار الي بگلبي والي بگلب
ولد عمنا بس هذا احمد ابن عمك هو واخوته اساله هذا الچلب وحيد ما عده اخوان عايش عد عمه

احمد هز راسه // ايي صحيح وعمه هو يتحمل مسؤوليته
ورثت جگاره وحچيت ::شوفوا كل شي اعرف بس اهدوا المفروض انتو تهدوني مو انا
سالم بعتب //مو انت الي وافقت ياخذونه يدفنونه
::ايي وافقت ما گدرت اكسر كلمة ابو راكان
گعدت وانا اباوع السالم واتخايله شلون عريس ويجي ياخذ اختي من ايدي البيته

بليلتها نمت بالديوانيه انا وسالم واحمد وبسام وابو مشتاق ابن عم ابوي ثاني يوم الصبح اتريگنا ولو محد
يشتهي لكن اكلنه واجه علينه ابو راكان الي گال //طلعت بدون محد يدري بيه لان ردت اجي واشوفكم ابحدنا
جاب بسام الچاي وابو راكان صار يسولف ويگول
  —-كل مشكله وكل طلابه بالبدايه چبيره لكن يوم عن يوم تزغر
رديت وانا اسحب نفس من الجگاره ::اله طلابتنا
الشيخ هز راسه بالنفي //لا غلطان عمي يوسف حتى لو طلابتكم چبيره وما الها حل لازم نلگالها حل
::شقصدك ؟

  —- قصدي انا جاي اريد اتشاور وياكم واعرف شنو التردونه
::الي نريده منين
- - من عشيرة الولد
::ها يعني تريدنا نگعد للفصل
هزز راسه وگال //اي لازم يصير الها حل وانا جاي حتى نعرف شنو نطلب وشنو نخلي
احمد // ها شيخنا بهالبساطه تريد تحلها
الشيخ //لا الشغله مو بسيطه بس تعال اگلك يوسف بتكم انخطفت مو احمدو ربكم اصلا بيكم بخت ولگيتوها

باوعتله وما حچيت
الشيخ // اي لو ما خذها النذل وكاتلها ودافنها چان هسه كل واحد بينه ايدور عليها بناحيه
لو ما بيكم بخت وهذا الچلب سووا حادث هسه منو يرحمكم
الكل ساكت الشيخ استردف //اي لا تتعجبون همزين لگيتوها لو بتكم خاطفها هذا النذل ومسوي بيها شي لا سمح الله
گلي منو يرحمكم ويگول انخطفت چان راسا يگولون عاشگه ونهبت لو ماتريد ابن عمها وشردت صحيح لو لا
عمي تره الناس ما ترحم والناس الها الظاهر وليش نروح بعيد احنه مو انبياء هم من هاي الناس

::زين شيخ شنو المطلوب
المطلوب احنه نستوهم على نار هاديه وبعدين شنريد نطلب لان هاي مو بس جريمه وحده لا تلث جرايم
تلاثه وكل وحده يتحاسبون عليها ابحد الاختطاف والقتل ودوسة البيت
احمد //دوسة البيت ؟
الشيخ //ايي هذا شي متعارف علي مجرد ما طلعت خطفها معناتها ناوي عليها وداعتك يوسف اله ازين
راسهم بالفصل

باوعتله :: شيخ منو گلك نريد فصل
الكل سكت جاوبته :: شيخنا هذا شرف والشرف ما يغسله اله الدم
الشيخ //حقك ومحد يلومك واي واحد ابمكانك هيج يسوي وزايد بس الواحد هم ايفكر ليگدام
::شلون يعني
الشيخ //يعني الولد عد عمه وعمه هم وحيد ما عده اخوان وعده اثنين ولد شباب واحد يمكن عشرين سنه والثاني
سطعش سنه وروحو واسالو عنهم انا وديت جماعه الولد مؤدبين وما عدهم مشاكل بس هذا النذل كلب ابن كلب
حجي شايع گال //العده چلب يربطه ما يخلي ينبح على الناس وانوب يصير يعض بالرايح والجاي

ابو راكان // حجي مي خالف احنه هم عدنا شباب ومو كل اصابعك سووا
ابو شايع //اي صحيح مو كلها سووا بس غصبن ع العشيره تتحمل فعايل زلمها
الشيخ //اي بس انت حجي تعرف كل عشيره تلم الزين والشين وهم عدنا ناس بالعشيره مو خوش اوادم وخاف
بيوم من الايام واحد يسويله مكسوره شنو نشرد منها غصبن ما علينه نتگمنها
حجي شايع // ابو راكان الفسده على صاحبها

الشيخ //ايي على صاحبها بس هسه عشيرة جمال كلها جاليه كلهم طلعوا من بيوتهم
باوعلي الشيخ وگال //يوسف عمي انت دانش عقلك وسولف ويه اخوانك وشتريد انا حاضر
::تسلم شيخنا ان شالله ما يصير خاطرك اله طيب ومن يخابرونك گلهم بعدهي السالفه ما بردت
الشيخ //هم حقك ما الومك وانا اعرفك انت خوش ولد وتدرس الامور من كل النواحي
::ان شالله شيخنا بس صدك بعد ما بارده گلوبنا

سالم// شلون تبرد گلوبنا واحنه معتدين على عرضنا واحنه هم ما قصرنا انطينه الجنازه ناقص نعتذر
منهم ونطلع بالتشييع
الشيخ //عرضك ابيض بابا والله سبحانه وتعالى ما ضيع دم اختكم لانها مظلومه بس مثل ما گتلكم الناس فقره
وما الهم شغل بلصار واتحملو سالفة ابن عمهم مثل ما هسه انت متحمل سالفة بت عمك
سالم بعصبيه //ازهار مو بت عمي ازهار مرتي
الشيخ //لا عمي بت عمك وخطيبتك من الناحيه الشرعيه ما عاقدين

سالم هز راسه //بس مخطوبين وملبسين حلقات وجاي تجهز بعد شهر ونعرس
الشيخ //كل هاي الامور تنحط گدامهم وغصبن ما عليهم يفصلونه
جاوبته ::شنو شيخ تفكر بس بالفصل
الشيخر//لا عمي يواشك شنو افكر بس بالفصل قابل اريده اخلي بجيبي انا افكر اكول عدنا ولد وطايشين
ما اريدهم يسوون شي نندم علي (باوعلي ) تره يوسف هواي اكو طلايب مثل طلابتكم واكثر وتنحل
سالم بعصبيه //بس احنه ما نريد انحلها
الشيخ //شنو عمي تريدونها حرب البسوس

احمد //واكثر امده الرجال الي ما يموت دون عرضه
الشيخ // وانا گتلكم عرضكم ابيض بس الدم ما يجر غير الدم والي راحو ينكتلون ما الهم لا ناقه ولا جمل
(اتقرب مني الشيخ ) يوسف انت ولي امرها وكلمتك تمشي عليه وعلى الكل بس اگلك عدك حظ وبخت تكتلون
منهم ناس ما الهم ذنب كل ذنبهم هو گرايبهم روحو واسألو هذا الچلب لا واكف ويه العشيره بفاتحه ولا واگف
بعرس واحد عده فلوس وما يعرف شلون يصرفهن
جاوبت الشيخ //ابو راكان مثل ماتريد تنحل لكن خلينه هسه بعدنا لا تنسى ابنهم هو الي اعتدى

الشيخ هز راسه //اي ادري عمي وحتى عشيرته مجرمته
::اي شيخ ومو احنه الي انطخ ونقبل راسا
:كلامك ذهب هذا هو من يخابروني راح اگللهم الناس بعدهي
جاوبته ::ايي عمي انت تعرف بهيج قضايا
سالم وحجي شياع گلولي//  شنو تريد تقبل بالفصل
باوعت الهم جاوبتهم :: اسمعوني الي يحچي يصير گد حچايته الناس جلو واذا ما ننطي عطوه معناتها لازم نكتل
سالم //اي نكتل

::تريدني اكتل ولد شباب ما الهم اي ذنب وبعدين عشيرتهم هم يكتلون من عدنا وانوب نكتل وهمه يردون علينه
وتالي نگعد للفصل وكأن شيئا لم يكن صحيح الي اتوفت اختي هي الله يرحمها لكن انتو عزوتي واخواني ما اريد
اورطكم لو اخسر واحد بيكم (باوعت للشيخ )وهسه نسكت وبعدين ننطي عطوه وراها نگعد للفصل وبشروطنا
الشيخ //هذا الحجي المعدل انا دووم اگول عنك انت معدل وسبع واخو اخيته
/////////// /////////////////////////////يتبع