رواية بعد فوات الأوان الفصل التاسع 9 - بقلم آنين الليل

يوسف
من گال الشيخ عني سبع ومعدل واخو اخيته الكل بالديوان أيد كلامه وحجي شياع گال
اي والله مثل ما تگول يوسف دومه عاقل وفاهم ويوزن الامور ويفكر بحچايته
جريت نفس وحچيت ::تسلمون انتم اخواني وحزام ظهري وانا ما اقبل بمضرتكم وگفتكم وياي تسوى الدنيا
احمد وگف واجه يميني //تحچي صدك يوسف انت تمون على رگابنا

الشيخ سالني //وهسه شقررت
هزيت راسي وگلت ::الله كريم
حجي شياع گلي //عمي هو اول وتالي نگعد للفصل ولازم گبلها نتفق
باوعتله باستفهام ::على شنو نتفق ؟
الحجي من تكعدون للفصل ...
قاطعته :: من رخصتك حجي هسه مو وكت هذا الحچي

الشيخ //صحيح كلامك بس لازم نعرف رايك انت شتريد
باوعت الهم ورفعت اصبعي هزيته :: ما احچي ولا باي شي ناسيين حتى عطوه بعدنا ما منطيين
الشيخ //ادري وهاي مو بصالحك
جاوبته ::شلون
الشيخ //يوسف الساكت وما ينطي عطوه لازم يسوي شي لازم يكتل
جاوبتهم ::وهو هذا الي راح يصير

احمد //يوسف انت شتگول مو توك تحچي وتگول ما اريد انا اكتل وانوب همه يكتلون او ...
قاطعته ::اي گلت بس من ايملون راح يكسرون العطوه مو صحيح وانا اريد امللهم
الشيخ //خلي ننطي عطوه والله يا ابني الشيوخ كلت وجهي وتگول باچر يصير عدك ومحد يوگف وياك
جاوبته //ولا يهمكً يجرالك ابو راكان
الشيخ //عمي بس لازم تگعد ويه اخوانك او ويلاد عمك وتتفقون
هزيت راسي ::اعرف حجي وهو هذا الي راح يصير بس يرادلها الشغله تفكير

احمد او ولد عمي الباقييين گالوا// بكيف يوسف الاخت اخته وشيفصل احنه نلبس واحنه وياك للموت
اتشكرتهم وگلت ::انتم هم اخوانها واولياء امرها وگفتكم وياي ما انساها
(واتقربت يم سالم ) ::وانت اخوي وحرگة گلبك مو اقل من حركة گلبي بس هاي الناس تريد حقها
سالم //ادري يوسف بس وسفه

جاوبته :: سالم وداعتك بامكاني اكتل تلاثه واجلي حالي من حالهم بس يا ابن عمي خلينه ما نصير انانيين من
ناحيه انسانيه شكم واحد بالعشيره ما يكدر يشيل وما عده قوت يومه هذوله ناخذ خطيتهم مثل ما ذاك النذل مو بس
اخذ خطيه اختي لا وخطية عشيرته شگد بيهم انضرو من ورا مو عبالكم انا ساكت قابل بوضعي لا والله لو بيدي
ما اخلي من اهل جمال نفر يشم الهوى

بوكتها كتمت صرخه بصدري بس بينت بعيوني الي غورگن دموع الكل گام على حيله وهمه يحچون
ويتوعدون باهل جمال
سالم //تحچي صدك يوسف هسه نروح ونحرك اليابس والاخضر
حجي شياع //عمي يوسف ولا يهمك ولدي گبلك وگبل اخوك
الشيخ //افه تبچي عمي مع الاسف تنهضم واحنه موجودين

كلامهم زاد من حزني وقهري ومن حقدي على جمال الي ما اعرفه بقيت ساكت ما جاوبتهم وبعدين صارت
احاديث جانبيه الشيخ ويه الحجي واولاد عمي على قضايا صارت تشبه قضيتنا لكن انا مو وياهم افكر شنو اسوي
راحو وبقى بس احمد وسالم وبسام انا گتلهم تعبان وصعدت الغرفتي خابرت السيد وگتله
::سيد اريد اجيك ومحد يعرف بجيتي
السيد //هلا بيك تشرفني
::رحم الله والديك سيد
السيد جر نفس وگال // والديك الجنه تندل البيت
::لا ما اندله

وصار يوصفلي رحت ركبت سيارتي وطلعت وصلت البيت السيد تلگاني واتسالمنه وگعدنا بالديوان جابولنه چاي
والسيد گام وقفل الباب وكال //الله بالخير
:: الله بالخير اعذرني اجيتك بهالليل
:افه عليك البيت بيتك
::تسلم سيد اجيت اسألك
:اي عمي اتفضل
::ليش هلگد مهتم للشغله
باوعلي باستفهام //شلون يعني

::سيد اعرف من تصير قضيه ناس تدخل طبابة خير بس انت ماخذها على عاتقك
:ياعمي الناس للناس ومن اتدخلت جابني رجال غريب اصلا مو كرايبهم
انا عكفت حواجبي //ها وشلون
هز راسه السيد // حجي عبد هذا صاحبي تاجر معروف وعنده خير من الله هو خابرني وطلب مني
اصير واسطة خير وگتله فهمني ليش
هو سولفلي على ابنهم وگال هذا هو مربي اجه يشتغل عده صانع من چان عمره عشر سنين او اكثر شويه والهسه
عمره فوك العشرين ما طلعت من عنده زله ولا مد ايده على فلس حرام

وصار السيد يسولفلي على اخلاقه وامانته وشگد متحمل من ابو ومن جمال متحمل كله الخاطر امه واخواته والرجال
هو وداهم الگاع اله بالاطراف بيها بيت حتى يگعدون بي
(السيد باوعلي وگال ) //والصدك رحت وسالت وهم رحت وشفتهم صدك خوش ولد هو واخوانه ولو ما چان
خوش ولد ما چان الحجي انطاهم الكاع والبيت يگعدون بي لذلك انا اهتمييت الهلموضوع لان ناس ما الها دخل بالصار
والناس اتجهولت من بيوتها واشغالها
اتحمحمت ::سيد اول وتالي راح نگعد للحك
السيد //اي بويه وصاحب الحك سلطان
باوعتله وسالته ::گتلي الناس اتجهولت ؟

السيد //اي عمي مو بيت عمه الي حاوينه ولا عمامه المقربين ناس من العشيره عافو بيوتهم واشغالهم بيهم الي
عايش باليوميه وبيهم المريض والشايب والاعمى والارمله وعدها ولد واحد كادود على امه واخواته
انقهوت وجاوبته :: استغفر الله بس همه الجابوها ...
قاطعني السيد وهو يحرك ايده بالنفي //لا عمي شنو همه مودينه يخطف بتكم الفسده على راعيها وانت عمي هم
لازم شويه ترخي
باوعتله صفح ::ليش سيد ارخي انا انباك مني عرضي تره انا هم افتهم بهيج امور مثل ما انت تفتهم ساعات
حتى لو المره مكرم السامع چلبه
الرجال لازم يتنزه وجمال فات على عرضي واعتدى واي واحد بمكاني ما يقبل

السيد //عرضك ابيض عمي وحقك ومحد يلومك بس ياعمي شويه مييل على نفسك
هزيت راسي ::ان شاء الله اكو امور وكلام يصدر من الواحد بساعة العصبيه وبعدين يتندم عليها
السيد //محشوم والله ما طلع منكم اله كل خير
وگفت على حيلي ::سيد انطيني مجال ومن يسألوك گلهم الشغله يمك انت جاي تسعى بيها
السيد //وانا اريد منك ...
رفعت ايدي ما خليته ايكمل ::انطيني مجال سيد وباسرع وكت ارجع الك الخبر

السيد //عمي بس عطوه حتى الناس ترتب امورها
هزيت راسي ::اي ان شاءالله ما يصير خاطرك اله طيب
وطلعت من بيت السيد رجعت للبيت وصلت شفت سالم واگف بالباب وبعيونه تساؤل
دخلت السياره للكراج وسالم يسإلني //انت مو گلت تعبان وين رحت
هزيت راسي ::اي تعبان وراسي كلش يوجعني رحت للمستشفى قاسولي الضغط شافو مرتفع
سالم //هاا وهسه اشلونك
::الحمد لله شويه احسن بس اريد اصعد انام

سالم //اي روح نام
باوعتله ::وانت
سالم //اكو ملدوغ يگدر ينام
شفت بعيونه كسره على حلمه الي ضاع گتله ::تصبح على خير

دخلت للبيت وصعدت للغرفه لگيت ضحى بيها باوعت الها وگلت ::انزلي نامي جوه
ضحى اتقربت مني وشبكت اديها برگبتي // انا چنت جوه بس من شفتك طلعت گلت اتانيك يجوزتحتاج شي
نزعت اديها ::لا من احتاج اصيحج بس ناس تخابرني ويظلون يحچون ويصير جذب وشد بالكلام وصياح
عاد خليني ابحدي احسن
هي باستني //اي بكيفك تصبح على خير

ما اعرف ليش هذا البرود اتصرفه ويه ضحى هي شعليها بلي صار ليش گالب وجهي عليها
وراحت ضحى وانا قفلت الباب وراها وصرت اتحرك بتوتر واتذكر كلام السيد بحق بيت عم جمال الي
عايش عدهم
وقررت جمال لازم يتعاقب لان اتعدى علينه وعلى شرفنا ولان هو انقبر فلازم يتعاقب باهله
خابرت ابن عمي احمد وهذا عنده معارف اهوايه جاوبني

-الو يوسف
::هلا احمد شلونك
جاوبني باستغراب -هلا بيك يوسف شصاير
::لا اطمن ما صاير شي بس رايدك بخدمه
-اي اتفضل گدامك
:: تسلم اريدك تجيبلي اخبار بيت عم هذا الچلب
-تقصد جمال
::ايي بيت عمه العايش عدهم اريد اعرف كل شي عنهم
-هذا هو مي خالف عكب باچر يمك كل شي تريده

::احمد ما اوصييك ابيناتنا بس انا وانت
-ولا يهمك لاتوصي حريص
::مشكور وتصبح على خير
-الله وياك

سديته من احمد رجعت اتصلت بابو راكان جاوبني بسرعه //ها عمي يوسف سلامات
::ماكو شي شيخنا بس شتگول ننطيهم عطوه
الشيخ //عمي يوسف اذا ما ننطيهم اليوم ننطيهم باچر واذا مو بعد شهر هم ننطيهم بعد سنه واول وتالي يصير حل
وفصل وكل شي ينسي بس الكلمه الطيبه تظل تنحچي بكل مكان وزمان
جريت نفس ونفخته گتله ::هذا هو شيخنا باچر خابرهم وانطيهم عطوه اسبوعين يمشون علينه
الشيخ //ها اسبوعين
::ويجوز انمددها

بكيفك عمي اخابر السيد الصبح واگله
::اي شيخنا وخليها بوجهك گله ماقبلو ينطوني لو ما زعلت علينه
الشيخ ||هو هيج راح احچي
::ياالله تصبح على خير
سديته من الشيخ واتمددت وانا اباوع للسگف واحچي ويه نفسي
::ولك جمال يا ابن الزنا شسويت بينه لا نعرفك ولا تعرفنه ولا اكو عداوه بيناتنا ما اجيت اله على اختي
الزواجها بعد شهر

صرت اعض بشفتي وانا اگول :: منين اجتنا هاي المصيبه ليش احنه من دون الناس اشو ما ماذين احد بس
والله وداعة حركة كلبي اله انچلك ياجمال وانت بگبرك

ثاني يوم قبل الظهر اجه ابو راكان ويا ابو مشتاق وحجي شياع وسالم واحمد موجودين الشيخ گال
::عمي يوسف خابرت السيد وانطيته العطوه
سالم فز من مكانه وهو يحچي بعصبيه //شنو (باوعلي )يوسف انت انطيتهم عطوه
هزيت راسي وگلت ::ايي
سالم //شلون تنطي العطوه قبل ما تشيرني نسيت انا ابن عمها وخاطبها
::لا ما نسيت بس اول وتالي لازم ننطي عطوه حتى نشوفهم شنو رد فعلهم وللعلم ما انطيت عطوه حتى
نگعد لا اريد العب باعصابهم وبعدين اكعد وياهم

احمد -// بس دووم العطوه تنطي مده قليله حتى اذا لعبو بذيلهم نرد عليهم
::هاي اذا چان غريمنا موجود بس احنه غريمنا ميت
احمد -//واذا
ابو راكان ::يوسف ذكي انطاهم عطوه حتى ما تبقى الهم حجه وحتى يحسبون الف حساب والي نريده ناخذه
سالم //شنو قابل مشمعين چيسنا هذا شرفنا وكرامتنا وجمال داسها ولازم ناخذها مربع
الشيخ //على كيفك مو هيچ الحچي

باوعت السالم :: سالم لا تصير عصبي من انطيتهم العطوه اعرف شلون اخليهم يملون يملووون والي اطلبه منهم
يسوونه بدون ما يحچون لا تشوفوني ساكت انا نار واجه بگلبي وما تنطفي خلوني افكر لان انا مشوش والف فكره
وفكره تجي براسي
الشيخ //وعلاء مناك شيگول
:: علاء يگول انت اتصرف انت هسه ولي امرها واتصرف
احمد -// ايي صحيح حتى انا من خابرته گال الشغله كلها بيد يوسف هو شيريد خلي يسوي

ابو مشتاق //هذا هو بس غير تفهمنا شتريد اتسوي
::هواي اشياء ومن اريد اتصرف اكيد ما اخليكم وراي
ابو راكان //زين خلي نفتهم شتريد وشنو راح تطلب
::بعد وكت شيخنا اعرف لازم نگعد ونتفاهم ومن نطلب غصبن عليهم يلبونه
الشيخ //صحيح كلامك

ثاني يوم اجه احمد ابن عمي وجابلي كل شي يخص بيت عم جمال من سولفلي اتعجبت من كلامه خصوصا وهو يگول
-عدهم بنات محد شايف طولهن والناس تحلف بشرفهن
انا باستهزاء::ليش محد شايف طولهن وين عايشات بالصحراء
احمد // ما يطلعن من باب الحوش ومبطلات من المدرسه
::هاا
-اي مثل ما اگلك واولادهم عمرهم كله ما سوو لو مشكله لو طلعت عليهم نص كلمه
احمد گال // الصدك عائله ملتزمه ما عليها لو نص حچايه ما تتذكر شلون الجوارين وگفوا بوجهنا
بيوم الهدينا ما تتذكر ماكو واحد بقى ابيته وشلون يدافعون عنهم بس هذا الحقير جمال حسيت ولا اكو احد يحبه

باوعتله ::شلون عرفت
-مبين من كلامهم متكبر ما اله وكفات بالمنطقه يعني يقصدون فرح حزن ما يوكف وياهم
::وبعد شعرفت
-هذا ابنهم الچبير امين الناس كلها تحبه وابو الشغل مسلمه حسابات المحلات
ويگولون من هو زغير اشتغل بس ولا يوم غلط لو سواله مشكله وبالحسابات ماكو هيج شاطر ويفتهم
باوعتله وانا رافع حواجبي ::اشو طلعتهم ملائكه

احمد //شبيك يوسف انت ردت تعرف كل شي عنهم وانا هذا الي عرفته وسمعته اجيت وحچيته الك
::اعذرني احمد ما اعرف شسوي عليه ضغط وگلبي نار ما يبرد اله اذا كتلت واحد منهم
-واحنه وياك يوسف
::بس لا تنسى انت تگول خوش ولد يعني همه ما الهم دخل
احمد اياشر اب ايده // - اصلا ما يعرفون بي وين يروح او وين يرجع مخلي بيتهم عبالك فندق وهو
الحقير طلع خاطب بتهم
اتعجبت من كلامه ::هاا شتگول

هز راسه // اي وصار اكثر من سنتين ويتحجج عليهم يگلهم ادور على بيت
::يعني عايش وياهم وخاطب بتهم صار سنتين
- ايي هذا الي عرفته
::صار سنتين ما متزوجها وهو عده خير واموره ماشيه
احمد - // ما افتهمت يوسف
بقيت احچي ::ورغم هذا ما اعتدى عليها واعتدى على عرضنا
- على كيفك يوسف

بيومها ما نمت وانا افكر شلون انتقم من جمال يمكن لو اطلعه من گبره واحرگه ما يشفي غليلي
بعدها بايام رجعت اخذت اجازه من شغلي والدائره خذت بنظر الاعتبار الظرف الي نمر بي
واولاد عمي تقريبا يوميه يجون ونحچي شراح نسوي وشراح نطلب وهواي امور
اما علاقتي ويه امي وزوجتي فبارده الى ابعد الحدود ما اگعد ولا اسولف بس حد المصرف ودووم
ادز بسام يجيب مسواك

وضحى هي وزهره يطبخن للناس الي تبقى ع الغدا والعشا اما علاقتي بضحى كزوج فنسيتها بسبب مشاغلي
بمشكلتنا

قبل ما نگعد للفصل دزوا فلوس يسموها فرشه وهاي خليتها عد الشيخ امي من سمعت اجتني وحچت وياي بزعل
امي //صدك جايبين فرشه وراح تكعد للفصل
هزيت راسي ::ايي ليش تسالين
امي وهي تبچي //شبساع حتى اربعينيتها ما گضت بعدها ترابها اخضر
زهره //يمه يوسف يعرف يتصرف لا تحچيين ولا تلومينه

اتقربت من امي وبست راسها ::يمه اتصرفت هيج الخاطر الناس الي گاعده ولد عمي وگرايبنا عافو
شغلهم وارزاقهم ويردون مني بس احچي شنو ذنبهم العالم
امي //واختك العروس يمه
::وداعتج اخذ حقها مربع وتشوفين واخذه من جمال نفسه وهوه بكبره

بيومها دخلت الغرفتي وصرت افكر شنو اسوي وشلون اتصرف وصار امامي الانتقام واسال نفسي منين انتقم
يكون الرد انتقم من بيت عم جمال من عمه الي ربا ومن بت عمه الي خاطبها ومن اولاد عمه
انتقم منهم كلهم وكل هذا ما يشفي غليلي
وقررت من يجوون للفصل ما احضر لا انا ولا بسام ولا سالم ولا ولد عمي كامل وخابرتهم وفهمهتم ان ما يجيبون
اي طاري گدام الشيخ والكبار من اقاربنا

واجت الناس للفصل ابيت ابو راكان الي بنى جادر چبير وبيومها جابو شيوخ وساده وناس خييره
انا وسالم وبسام واحمد واخوانه بقينا بالديوان ما طلعنا وفهمت الشيخ شنو يگول
::اخوها الچبير ما وصل من الخارج وهمه ما يگدرون يفتون بهذا الامر
الشيخ شفته اخذ بخاطره بس ما گدر يكسر بيه راح وگللهم
: هلا والف هلا بالي اجانه واتكلف وهذا بيت اخوكم الزغير واريدكم تعذروني لكن اخوها الچبير ما وصل من
الخارج وما نگدر انبت بشي لان گال الامر يمي

واحد من الجايين گال //لا هاي چبيره ومو حلوه بحقنا هاي نعتبرها طرده
شيخنا ما انطى بينه وگال للناس //عمي ابد لاتلومون اخوها وابن عمها فاير دمهم لان الصار بيهم مو شويه
واحد من الحضور //بس انت شيخهم ويمك الحچي
ابو راكان باوعلهم ورفع ايده لان صار لغط والكل سكت // ايي يمي الحچي بس بسالفة الشرف والعرض لا تعذروني
الكل سكت وحتى واحد من الي اجو وگف وگال //حقهم ولو يطلبون زلم مو نسوان غصبن ما على عشيرة. ...تلبيلهم

هاي الحچايه صارت ابالي وبعد ان راحت الزلم صار عتب من ابو راكان او ولده عليه لكن انا جاوبتهم بكل هدوء
::حقكم عليه بس هذا الي سويته مو بس الصالحي الصالحكم
ابو راكان //شلون يوسف
::ما سمعتوا شيخ ... من صار عتب بالديوان شنوا گال گال حقهم اخوتها ولو يطلبون زلم موونسوان يتلبالهم
ابو راكان //عمي يوسف هذا حچي بس احنه عشاير النه سناين ابيناتنا

::وانا راح اخلي الحچي فعل
الكل باوعلي والشيخ گال //شلون
::شيخنا ولا يهمك بالليل كلش تتصل بالسيد وابو عادل وتگلهم انا حچيت ع الولد واعذروهم فاير دمهم ونريد نسكت
هذا وذاك لذلك الگعده بعد اسبوعين سواء اجه اخوهم او ما اجه وهم طالعه الاربعين بس عدهم شرط وانت
من يمك تحلها وتنهي كل شي
ابو راكان //شنو الشرط
::امين ابن عم جمال اريده يحضر هو وابو
الشيخ //هذا شلون حچي يوسف

الكل اتفاجأ بشرطي وانا حچيت بكل برود //انت وصللهم هذا الكلام وخلي الباقي عليه
الشيخ //بس ما صايره واحد ابن عمه معتدي وانت تريد الولد يجي حتى تكتلونه وتمثلون ن بي تريد تطلعني
ناقص تريد تفضحني
هزيت راسي ::لا لا ابو راكان بس والله اريد ايلبونه كل الي نريده
الشيخ //حالنه من حال العالم شنو كل الي نريده
هزيت راسي ::لا شيخنا بهاي انا مو وياك الي سووا جمال شي چبير حجي ما كو واحد يخطف ابنيه رايحه للكليه
وتموت عده ياريت باقي عدل چان اخذنه ثارنه منه البنيه انخطفت من بيت ابوها وهي بعد اسبوع عرسها هذا الي
سووا ابنهم شي چبير وسواء همه ما يدرون لو يدرون الي يربيله چلب يعرف وين يروح او وين يرجع

الشيخ //حقك عمي محد يلومك
::انت خابرهم وانتظر ردهم قبلو اهلا وسهلا ما قبلو اكسر العطوه
الشيخ يسألني //وتكتل يوسف
هزيت راسي ::اي اكتل اثنين وتلاثه على ما ينشفي غليلي
الشيخ جر نفس وگلي //يوسف انا راح اگلهم بس انا گدامهم ادك صدري واگول همه بحمايتي
::ايي شيخ گول واذا اسوي اي شي خلي راكان يطگني طلقه
الشيخ //هذا هو انا اعرفك انت رزن وتوزن الكلام گبل الفعل
::تسلم شيخنا وما يصير خاطرك اله طيب

ابو راكان خابر ابو عادل وكله الكعده بعد اسبوعين وهواي حچى وياهم وصار هواي نقاش خصوصا من طلبنه
منهم امين وكلهم ابو راكان هذا طلبهم ياالله يگعدون وراها صارت تجي على الشيخ هواي مكالمات من ناس جايين
للفصل وكلمن يكول ما سامعين بيها گبل
وچان رد الشيخ عليهم //لا سمعتوا شيخ ...من گال اذا يردون زلم تلبولهم

ومن يومها ولد عمي والشيخ ما تركوني رادوا يعرفون شناوي اسوي لكن انا ما انطيتهم جواب واجه يوم الگعده
والشيخ بنى جادرات اثنين لان گال راح تجي ناس هواي وبيومها واجو ساده وشيوخ واجه عم جمال ويا اثنيين
شباب عرفتهم اولاده تمينا ساكتين لمن ما واحد من الساده وحچى وبعدها واحد من الشيوخ احنه بس نسمع ما حچينه
ولا بكلمه الى ان كام السيد الي دووم انا ويا باتصال
وباوعلي وحچى وانا اترقب وحچى //احنه اليوم جايين خطار والخطار خطار الله وما يرد الكريم اله اللئيم وانتم
اجواد والتردونه يصير ومتانيين نسمع منكم التردونه

شيخنه راد يجاوب اشرتله بعيني وانا حچيت بكل هدوء ::سيد الطلبنا وين
الكل سكت وهمه يباعولي لمن ما اوگفوا اثنين شباب والولد الچبير گال
:انتم طلبتوا واحد واحنه اجينه اثنيين وگدامك لحمنا ودمنا الزلمه المحسوب علينه غلط وغلطته چبيره وشتريد تسوي
انا گدامك وهذا انا گدام هاي الناس كلها اذا كتلتني او كتلت اخوي او كتلتنه اثنينه احنه انبريك من دمنه لا فصل
ولا تجلون ولا اي شي انتم طلابة حق وصاحب الحق سلطان وهاك (مد ايده على جيبه وطلع سچين شمرها گدامي واتقرب
گعد ومد ركبته ) هاك هاي السجين وهاي رگبتي تكتلني اهنا وگدام هاي الناس وانا مبريك محد يطالبك بشي
واذا تريدنه اثنينه احنه گدامك مصيبتكم چبيره وحملكم ثكيل وسواية جمال ما يسويها بس الخسيس ولما عنده غيره وناموس

الكل انبهر بكلام ورزانة الولد واخو الي واكف بظهره دنگت وانا اعض بشفتي الجوانيه بعدين باوعت للاولاد گتلهم
::صيروا على صفحه طلبناكم حتى ما تبقى حجه لا الكم ولا النه
واحد من الگاعدين گال// شلون
جريت نفس ::المتعارف علي انو الناس المطلوبين ما يجون لان اكيد محد يلزم اعصابه انتم ابن عمكم او اخوكم
العايش ابيتكم سووا جريمه لا شنو جريمه سووا جرايم بحق عرضنا وشرفنا
اتعده ع البيت وخطف اختي وتالي اتسبب بموتها وهاي انتم كلكم الگاعدين لو صاير وياكم مثل الصار وياي سويتو
شي ما يتسووا واول شي تسوونه تكتلون واحد منهم وهاي تلث جرايم وكل وحده اتعس من الثانيه وكل وحده عليها
اربع ارجال لكن انا اگول

ضميت شفايفي وجريت نفس قوي وبعده حچييت :: ما اكتل ابدال جمال لان لاتزر وازره وزر اخرى
::جمال غلط وانتم جايين تفصلون
واحد كال //واحنه حاضرين الي تطلبه
300 مليون وتلث نسوان
واحد من الحضور//:: حگك عمي بس هاي الناس وخطارك يرادلهم الكرامه
وكرامتكم محفوظه جمال ينطلب فصلين اليه او لبن عمها
تالي صار الكلام طيح الشيخ ...وسيد ...لا يزعل
وهواي ناس طاحت علينه وصار الاتفاق الفصل 100مليون واثنين نسوان وحده الي والثانيه السالم

وراحت الناس بعد ان اتشكرو مني وانا نفسي متعجب على روحي بس الظروف فرضت عليه لازم اصير قوي
وما اضعف بالعكس لازم ابين شگد انا قوي وشگد عندي صبر وحلم وبنفس الوكت ما اسكت على ناس اتجرأت
عليه وعلى شرفي
ومن رجعت لگيت امي هادئه بس ضحى گالبه وجهها ما حچيت كلت البسام يسوون چاي لان اجه الشيخ
وسالم واحمد وهواي ناس وهمه مستغربين من الصار او خلي نكول متعجبين

الشيخ گال //يوسف حاط گلبي بايدي گلت لو انت لو سالم تكتلون واحد من ولدهم ويتصخم وجهي
راكان //وانا المسدس ما مأمنه گلت بس تحاولون تكتلوهم ارميكم برجلكم بايدكم
::افه هلگد تشوفوني ما عندي كلمه
الشيخ // لا وداعتك عمي بس شرطك تعجيزي وهمه الشباب اجو وشايلين چفنهم بايدهم
احمد // - اي والله ولا خايفين بس ابوهم يرجف

اباوع السالم ساكت اتقربت يمه :: اول وتالي راح تعرفون انو انا قبلت بالفصل لان اكو ناس فقره عايشين على
اليوميه ولان اكو ناس اتغربت عن بيوتها وحتى انا او انتم الكل عاف شغله والتهى وياي لان تشوفون ازهار
مو بس عرضي لا عرضكم وانخطفت وانظلمت ومو بعيده وهي تقاوم بي ما سيطر ع السياره وگلبها ويجوز
هي گلبتها حتى تحافظ على شرفها
جمال اتعدى على شرفي وهو مات فلازم ابرد گلبي وارفع راسكم بين الناس وما اريد اخذ ناس ابرياء بجريرته
لذلك انا قررت ما اخذ ثاره دم وابلي العالم والثار يجر ثار لا راح اخذ ثاري بغير طريقه
سالم //الكل بدايه نهايه هذا هو
الشيخ //لا تزعل سالم حالك من حال يوسف مره اله ومره الك

سالم ما عقب وبقى ساكت وصرنا نحچي بالناس الي اجت وشلون طلعوا راضيين من تصرفي
وراحو وبقيت انا وسالم وبسام ومحمود رجل زهره سالم واكف بره وانا رحت يمه لزمته من چتفه ::زعلان عليه مو
باوعلي نظرة عتب //زعلان من نفسي

:: لا تزعل سالم وداعتك من طلبت الولد الي غايه شباب ليش نكتلهم
باوعلي بعتب //واختك مو شابه مو محرومه
هزيت راسي ::بس همه ما الهم ذنب كل ذنبهم جمال ابن عمهم
سالم //وجمال مات
::وداعتك اخذ ثاري منه ماگدرت اخذه دم راح اخذه ذل
سالم باستغراب //ذل

هزيت راسي ::اي راح اذله وهو بكبره اذله بخطيبته الي يريد يتزوجها الي صار سنتين خاطبها وما متزوجها لان
يريد يبنيلها بيت الي حافظ عليها بس انا راح اخذها واذله واذلها وانت يا ابن عمي تاخذ اختها بنيه زغيره
وبعدين اخذلك مره فوگها
سالم //والله فلا مصدك هذا انت يوسف
هزيت راسي بقهر :: لا صدك انا انسان مقهور وقهري بس الدم ايبرده ولازم اكتل بس من اكتل ما اريد اعم عليكم

بيومها اجتني امي ودگت الباب وشفت زهره وضحى واگفات هي جرت نفس وكالت
شدعوه شمسهلها رضيتو تاخذون فصل
::يمه لو الشغله يمي ما اخذ فصل بس ما اريد ابلي الناس
امي بعتب //ياناس يوسف
::سالم وبسام ومحمود واحمد وابو مشتاق وغيرهم

امي //شلون باالله
::اي اذا ارفض العطوه لازم اكتل ومن اكتل هم لازم اشيل وانوب همه ما يسكتون يكتلون واذا مو انا بسام واذا
مو بسام واحد من ولد عمامي وهم ما راح نسكت وانوب اول وتالي نگعد ويصيرون همه اهل الراهي عليه
امي // ها ويروح دم اختك
اتقربت زهره وكالت //يمه محمود يگول يوسف نچلهم من ذاك اليوم لمن ما حضر الفصل
امي تهز بايدها //وشلفايده هالگعد وفصل

::اي رضيت بالفصل لان غريمي ميت ما اروح اكتلي ولد شاب ما اله لا ناقه ولا جمل واحمل خطيته بيا قانون هذا
حجيه الواحد يسوي المصيبه والثاني يطيح بيها
زهره //يمه على كيفج ما تدرين يوسف شلون كبر بعيون الناس
امي بعتب //اي كبر بعيون الناس ونسى اخته الراحت مظلومه نساها ونسى شبابها
::لا ما نسيتها والنار الي بگلبي اكثر من نارج مو هينه عليه اختي طالعه وجاي واحد بايگها وانوب بسيارته وميته
مو هينه

امي باستهزاء //اي وهالاخذت فصل وراح تاخذلك مره
::حجيه نسوان اثنين وحده الي والثانيه السالم
امي //اي انتم تتونسون وبتي جوه التراب
اتقربت يمها وگلت //يمه شتردين مسالة اورط ولد عمي وياي هاي ما اقبلها بس اذا تردين اروح اكتل وانوب اسلم
روحي الهم ما عندي مانع ما ابلي ولد عمي كافي هاي شهرين عايفين بيوتهم واشغالهم
امي //لا يمه اسم الله بس لو ماكاعدين هسه

محمود //لا عمه الناس ملت والشيوخ تروح وترد هم لازم نسويلهم تقدير
ضحى //يوسف خلي سالم ياخذ الفصليه مو مخطوبه چانت الذاك الچلب وازهار مخطوبه السالم خلص سالم ياخذها
امي باوعت الها// شني ياخذها سالم قابل بتي ناهبه براسه وياخذها گبل اخوها لا اول يوسف لو بسام ياخذ وانوب
سالم ياخذ الثانيه
ضحى //اي خلوا بسام ياخذها

اتقربت من ضحى وگلت بحده :: انا من اخذ مو فرحان لو بطران اريد اخذها حتى انكلهم لان هي مخطوبه
وانا اعرف شلون اخذ ثار اختي منهم
امي //يمه بس ضحى ما ينوخذ عليها
جريت حسره وحچيت ويه امي على گيف وانا اضغط على ايدها
:: شوفي يمه اخذ الفصليه حتى لو چنت ما خذ سحر

امي تغير لونها وباوعت الزهره وضحى وطلعت وزهره وضحى طلعن وراها
بقينا شويه نسولف بعدها محمود وزهره راحو وبقى بسام وسالم بالديوان وانا صعدت الغرفتي ولكيت ضحى
منتظرتني وهي مبدله وخاله عطر وبس شافتني حضنتني وهي تكول
- ليش يوسف من يوم الحادث وانت ما تباوع بوجهي انا شمسويه وانوب تريد تاخذ عليه مره
جريت نفس وگتلها ::ما مسويه شي بس انا تعبان

-ادري الله يساعدك بس الله يخليك لاتاخذ عليه مره ،
صارت تحضن بيه وتبوسني وهي تبچي وتگول // نسيت انا شگد احبك
حضنتها وقربتها الي وانا ساكت ونمنا ذيج الليله وقررت ما اخذ الفصليه اخلي سالم او احمد او حتى بسام ياخذها
لان ضحى ما الها ذنب
لكن الي صار وره يومين خلاني بين شغلتين
لو اخذ الفصليه لو اكتل امين
/////////////////////////////////يتبع
قررت ورا كل بارت احچي مشكله نعاني منها كلنه وباب النقاش مفتوح
اول مشكله راح اسميها (مافيا الاطباء) شتعرفون عنها
خلوني اقرا اراءكم
تحياتي
آنيين الليل
احبكم