رواية بعد فوات الأوان الفصل السابع 7 - بقلم آنين الليل

مروه
طلعنا انا وامي وعمتي وقبلنه طلع حجي عبد وشفنا سياره سوده واگفه يم الباب ولا چنها سيارة عروس رفعت
راسي شفت المنطقه مليانه كلها سيارات بيض ومن طلعت صار الرمي وكانما يگولون خذيناها وكسرنا عيونكم
حجي عبد سلم على صاحب السياره السوده وصعد بالصدر وانا وامي وعمتي صعدنا وره انا صرت بالوسط
بقى الكل ساكت وصلنه المنطقه قريبه من متطقتنا وگفت السياره ونزل الحجي ولاگا رجال چبير اتسالموا واجه
الحجي ويه الرجال وهو يگله

: شيخ هاي امانتكم من ايدي الايدكم وهاالله هاالله بيها
الشيخ // تسلم حجي اتفضل نعقد الهم وبعدين يتوكلون
ما فهمت اي شي وين راح اروح والمن راح يعقدولي ما فاهمه شي وخايفه لكن لازم ابين قويه الخاطر امي
دخلت للبيت ولاگتنا مره وهي تگول //اهلا وسهلا حياكم الله
امي وعمتي سلمن // السلام عليكم
المره //عليكم السلام هلا ومرحبا اتفضلوا اهنا

دخلنه الغرفه نوم مبينه مالت ابنها لان حتى چرباية طفل بيها والمره راحت جابت النه ماي وعصير وراحت
بعدها اندك الباب وحجي عبد گال الامي
ام امين خلي البنيه تغطي وجهها راح يعقدولها وهي مو زغيره يعني هي وكيلة نفسها واذا تريد انا اصير وكيلها
امي //حجي انت صير وكيلها الله يطول عمرك
وكل شي صار بسرعه دخل الشيخ وعقد بعد ان سمع موافقتي وانا ما اعرف المن عقدولي بس الي عرفته انو الولد
اسمه يوسف

بقينا بالغرفه محد اجه ولا مر بينا وكت العشا جابولنه صينيه بيها تمن ولحم وخضره وخبز ومرك
انا ما اشتهيت اكل لكن امي وعمتي جبرني حتى اكل
اكلت شويه الخاطر امي الي ما بطلت دموعها تنزل ومن شافتني اكلت هي وعمتي اكلن وبعدها اجن اثنين
نسوان شالن الصواني والثانيه گالت هذا حمام واشرت على باب بداخل الغرفه رحنا غسلنه وبعدها جابولنه تلث
دواشك ونمنا واحنا ساكتات ما نعرف شنوالي مضموم النه چنا بمثابة اسرى وما نعرف شنو الي راح يصير
بليلتها ما نمنا او خلي نگول نمنا نوم متقطع امي تحتسب على جمال وهي تگول

:ياربي ترضاها هو سووا سوايته ومات واخته ما الها شغل متهنيه ابيتها ورجلها وحلالها واحنه كله طاح براسنا
وبراس هاي المسكينه
عمتي امل گلتلها //شبيج سهام اذكري الله ومروه سباعيه ما ينخاف عليها
امي //شنو هالمسكينه منيلها السباعيه اشو بجال اخوج عاشن مهضومات ومحرومات
هزت راسها عمتي وهي تگول // ادري خيه بس شبيدنا
امي //الله كريم الله يباوع الها

الصبح گعدنا وغسلنه وانا بدلت ولفيت شالي لمن ما اجت نفس البنيه وهي شايله صينية الريوك وراها وحده جايبه
قوري الجاي وكوابه وشكر خلنهم گدامنا وراحن
اتريگنا وشربنا چاي وبعدها غسلنه واجت المره الچبيره وهي تگول //الشيخ يگول اذا حاضرات حتى نتوكل
عمتي // اي خيه ما عدنا شي

لبست عباتي وطلعنا امي شايله جنطه وعمتي همه شايله جنطه والبنيه شايله جنطتين وسط اخذوهن وخلوهن وره
واحنا ركبنا بنفس السياره وركب ويانه بالصدر الرجال الي يسمونه شيخنا يعني شيخ عشيرتهم وصارت السياره
تمشي واحنا ساكتات وعمي جمعه كل شويه ويتصل وعمتي تكله //الحمد لله زينين

هو يفتهم يعني ما تگدر تحچي
وصلنه الى دار استراحه او مطعم  ودار علينه السايق وگال
راح نوگف اهنا وانتن انزلن وغسلن واگعدن شويه
ونزل الرجال هو والسايق واحنا نزلنه وراهم رحنا المكان خاص بالعوائل ورحت للحمام وبعدها غسلت وجهي
واجه النادل جايب كباب وصمون ومقبلات وچاي عمتي گالت //اكلي عمه واشبعي وانتي سهام هم اكلي خلي
نشوف وين مودينه وشنو تاليتها

اكلت وامي اكلت هي وعمتي وشربنا چاي بعدها رحنا للحمامات غسلنه وطلعنه وعمتي راحت للمحل جابت
علاگه ما اعرف شنو بيها
ركبنا واحنا ساكتات ما نعرف شي ولا وين رايحين مشت بينه السياره وره ما طلعنا من المطعم تقريبا ساعتين دخلنه
المنطقه الحجي باوع علينه وگال
راح تنزلون اهنا للصالون والعصر تصير الزفه منا احنه متفقين وياهم

ما حچينه ولا ردينه اتقرب السايق على صالون نسائي ودك الباب ونزل الشيخ وحچى ويه مره وبقوا يسولفون
بعدين اجه السايق وفتح الباب ونزلنه وعمتي نزلت البدله وملابس داخليه ودخلنه للصالون سلمنه ولگينه عرايس
اثنين قبلنه اجت يمي بنيه ثلاثينيه وگالت //اذا تردين حمام تسبحين موجود
باوعت عمتي گالت //علوا الطريق چان كلش طويل هسه اروح اجيب شامبو وصابون

وراحت عمتي بعد ان وصفتلها البنيه على محل قريب وجابتلي غسول جسم وشامبو ودخلت للحمام وصرت جوه
الدوش وانا ما افكر بشي لان بالاساس ما اعرف شي طلعت وبعدها استلمتني ام الصالون حال اي عروس مكياج
وتسريحه وگالت بعد ان امي سالتها //من حجزوگللولكم الزفه منا
هي هزت راسها وردت // ايي لان حسب ما عرفت انتوا من غير محافظه

كملت وبقيت كاعده ربع ساعه رن تلفون ام الصالون الي گلتله كملتها واجت نفس السياره الي جابتنه من بيتنا
ونفس الشخص
صعدت بعد ان لبسوني برنص وام الصالون گالت الامي اشمري عبايتها عليها شمروا العبايه وركبت بالسياره
عمتي بالصدر وامي يمي لان البدله چانت فخمه وعريضه وصلنه وانفتح باب الگراج ونزلت الولد راح دك باب
مسدود وانفتح ودخلنه انا وامي وعمتي الصاله بيها شكم مره امي وعمتي سلمن واجت يمهن مره چبيره
حچت بعصبيه وبنبرة امر // صعدنها فووك

وراحت قبلنه وفتحت غرفه بمفتاح عدها دخلنه وهي نزلت
وخرت العبايه والبرنص واباوع الوجه امي وعمتي وهنه مرتبكات وخايفات واشوف امي ما بقت دموع بعينها
باوعت شفت غرفه جديده اجيت يمها وانا احضنها واگول
= يمه لا تبچيين شوفي الغرفه شگد حلوه يعني ما كو شي من الي بالج
عمتي //شفتي من اگلج سباعيه ما تقبلين والله مراوي انتي احسن من عدنا

هزيت راسي وانا اتصنع ابتسامه = يعني يمه شنو تفرق عن عيشتي هناك بعذاب ابوي وحقارة جمال
امي //الله لا يرحمه
امل //كافي لحد يسمعنا وخلي نتاني سهام مروه جاي تسحك على نفسها على مودج واتقبلت هذا الشي الخاطر
امين وصادق مو الخاطر ابوها هي حتى ما سلمت علي
امي //عبالي من مات جمال الله فكنا اثاري هو مات والضيم صار علينه

امل //اگلچن هو وينه العريس ولا شفنا
امي // يجوز هو الجابنه بالسياره
عمتي //لا مو هو ما سمعتي الشيخ من كله يوم ال الك
امي //هسه يجي وتشوفينه
امل //جمعه يگول خوش ولد

بوكتنا ما نعرف شنو نحچي لان ما عدنا شي نحچي بي الى ان انفتح الباب بدون ان يندك واجت نفس المره وحچت
من وره خشمها //يردون يزفون العريس
عمتي امل //هلا بي
عمتي طلعت عطر وبخته عليه وره دقايق دخل العريس الي ما شايفته سلم ابرود //السلام عليكم
امي وعمتي ردن السلام هو بقى واگف وهنه طلعن بدون ما يحچن ولا كلمه اما انا فصار گلبي يدگ وصرت
مثل السعفه انا مدنگه هو اتقرب عليه وشال الكليل من وجهي وانا مدنگه وهو رفع حنجي بايده حسيت بي
يسمي ويصلي على محمد

شويه ارتاحيت من الي صار لاول مره اباوعله چان لابس دشداشه بيضه وشماغ وعگال عمره يمكن اكبر مني يجوز
بگد جمال الحقير هو خزرني وحاچاني بامر ::غيري ملابسج
انا بقيت واگفه وهو نزع الشماغ باوعلي گال بعصبيه ::اشو واگفه ما سمعتي
جاوبته بخوف = وين وين اغير

جر نفس قوي واتقرب يمي وصار يوخر بالماشات مال الاكليل وانا ارجف واحس وجهي نار يطلع منه
بعدها فتح الزنجيل مال البدله ونزلها من جوه بقيت بالملابس الداخليه اتقرب عليه وصار يباوعلي وانا واگفه
بدون ما يحچي وياي وبدون مقدمات دفعني ع الچربايه واخذني صرت زوجته اخذني كما الحيوانه بدون مداراة
المشاعري وبدون ما يحچي وياي ولا كلمه
انا حابسه دموعي لكن گوه نزلن وهالمره ما اعرف عليمن نزلن

على حياتي المضت لو على الجاي من عمري لو على زواجي الي چان عباره عن كابوس هو لبس گلبيه رجاليه
وطلع واسمع الهلاهل وانا بقيت دخلت امي وعمتي وشافني ابچي وعمتي اخذت النيشان وخلته بجنطتها وگومني
حتى اسبح دخلت للحمام الي بالغرفه وانا ارجف چانن دموعي اقوى من ماي الدوش طلعت بعد ان لبست دشداشه
كشمير

هنه قدرن وضعي حتى ما سالني بقينه احنا التلاثه گاعدات ولا احد اجه يمنا ولاجاب لو جكاية ماي ولا احد جاب
عشا رغم احنه ولا وحده بينه مشتهيه تاكل عمتي طلعت من الجنط كليجه مسويتها سماح وبيسي وكالت اگعدي اكلي
وانتي سهام همه بكيفهم شنو يموتونه من الجوع قابل
وفعلا اكلنه وانا جاملت امي وعمتي لان اعرف بيهن شگد مقهورات
بعدها اتمددت وهنه بقن گاعدات انا نمت ما حسيت على نفسي اله الصبح

گعدت لگيت امي وعمتي نايمات يمي بالغرفه بقيت متمدده ع الچربايه لمن ما اندك الباب واجت نفس المره وگالت
ياالله السياره متانيتچن توصلچن للگراج
امي رادت تحچي بس عمتي لزمت ايدها وگالت الها
:لا خيه خاف عدكم شغل احنه نطلع وناخذ تكسي توصلنه للگراج
هي ما حچت طلعت وطبگت الباب  حييل وامي صارت تنحب وتبچي بصوت عالي وهي تگول
: يمه يامروه ياظليمتج

اتقربت منها عمتي وگالت الها //سهام بتچ فصليه والناس مقهورين الصار بيهم مو شويه ويمكن يردونه بس نحچي
امي //وچ خيه امل الولد بس اجه اخذها وطلع والناس گلاص ماي ما جابولنه وچ خيه شلون بابنيتي
انا دايره وجهي وابچي حسيت بامي صارت تشهك من البچي وعمتي تصبر بيها گمت على حيلي ومسحت
دموعي وانا اگلها
= فصليه فصليه ارحم من رجلج ما راح ابقى طول العمر هيج لازم يتبدل حالي يمه روحي للبيت وابد لا تحچين
شي امين وصادق يتهورون وانا كل هذا السويته الخاطرهم

امي طلعت تلث سوارات لبستهن الي وتراچي ومداليه چبيره وانطتتني فلوس گالت ذني ميتين وخمسين الف
انا سالتها = منين هذني يمه
جاوبتني //من اخوج امين
وبوستني وانا حاولت ما ابين حزني ولا قهري ضحكت وگلت الامي
= شوفي يمه بلحظه حياتنا اتبدلت من بيتنا للگاع وجمال راح بسيارته وهو متحلف بيه وما رجع
عمتي //شنو متحلف بيج

هزيت راسي = اي عمه بنفس الليله حاول يتحرش بيه وانا صديته وهو اتحلف بيه وتالي هو مات واحنه طلعنه
من بيتنا وابوي خسر كل فلوسه الچان ضامهن وانا رحت فصليه يمه هذا حالي ما راح يستمر صدگيني يمه
امل //عمه ان شالله انتي بخيته مثل امج من شورت برباب وحوبتج ما فاتت الجمال (باوعت الامي )
ها سهام شتكولين
امي //شگول اريد اطمن على بتي 
انا بابتسامه عريضه = اطمني يمه وخلي ابطنج بطيخه صيفي على گولة المصريين
امل //شفتي الولد هيبه وثگيل بس هو مقهور من السوا جمال ومروه سباعيه

طلعن امي  وعمتي وهنه يوصني صيري سباعيه واتحملي وانا اباوع الهن وابتسم لان عدي احساس يمكن بعد
ما اشوفهن
بقيت واكفه وره الباب واسمع عمتي تگل المره چانت موجوده بالطابق الثاني
خيه چا وين العريس نريد نسلم علي
عرفتها هي نفسها الي اجتنه ردت على عمتي بنتر // العريس راح المرته الچبيره لان ما يكدر يفارگها
عمتي. ردت رغم متفاجئه // ايي حگه الله يسعده انتي خيه شتعوديله
انا امه وام ذيج المسكينه الي خطفها ابنكم الچلب

امي // والله حجيه شتگولين محد يلومج بس والله احنه ما النه دخل بل صار هو مو ابني هو ابن حماي
ورابي عدنا  بس ما ندري بي هلگد نذل وهالطاح كل شي براسنا
امل //وصدگيني ام يوسف احنه اتبهذلنه من ورا وهسه انتي حبيبه حجيه وخايفه الله وهلاتج بالبنيه انتي مثل امها
ردت بعصبيه //لا حبوبه انا عدي بنيه متزوجه والثانيه ماتت  كتلها ابنكم هاا وگبل لا ترحن ابني يگول ما اريد
نقال عد بتكم اذا عدها اخذنه وياچن
امي //حجيه ومن نريد نطمن عليها

هي ما ردت واجت امي وعمتي واخذن مني النقال وانا گتلهن عادي لا تهتمن عمتي گالت
يمه مروه احفظي رقمي ورقم امج ورقم امين على گلبج كل شي يصير بالدنيا
هزيت راسي وگتلها حافظه رقم امي ورقم امين بس رقمج
عمتي // اطيني قلم
طلعت من جنطتي القلم وعمتي كتبت على عشر تالاف ال 8ارقام وكالت
هاج اكتبي رقم امين ورقم امج واحفظيهن زين وهاي مو تصرفينها
هزيت راسي وعمتي گالت //ايي حبيبتي يوميه اتذكريهن مو تنسين هاي دنيا كل شي بيها

ونزلن وهنه يوصن لازم اتحمل كل شي واسمع واسكت وما اتدخل هنه نزلن وبعد ما اعرف منو وصلهن
او. وين راحن
بقيت بالغرفه اكثر من ساعه محد اجاني ولا واحد باركلي ولا احد جابلي ريوك بقيت ما اعرف شسوي اتمددت
ع الچربايه وانا خايفه ومتوتره ومن اتذكر البارحه شلون هجم عليه واخذني اكره حتى نفسي بقيت مره افكر
بلي صار ومره افكر بامي وعمتي منو وصلهن

انفتح عليه الباب واجت ابنيه تقريبا عمرها 13 سنه جابتلي صينيه زغيره بيها خبزه وكوب چاي ردت ارجعه
بايدها وردت اشمرها بوجهها بس اتذكرت انا فصليه وما اعرف شنو الي ضامينه اليه وهاي الي جاي يسوونه
بس حتى ايمللوني اخذته واكلت الخبزه وشربت الچاي صرت اكل ودموعي ينزلن لان اتذكرت امي وعمتي شلون
بقن بدون عشا وطلعن بدون ريوك

صرت اشهك واكل بالخبزه رجعت عليه نفس البنيه وهي تكول
: رجلج يكول بسرعه تخلي بعلاگه دشداشتين وملابس داخليه وتلف شالها عدل وتلبس عبايتها وتنزل
هي بس حچت هاي الجمله نزلت انا فتحت الكنتور وطلعت دشاديش اثنين اليه وملابس داخليه وشال واخذت تراك
والفلوس خليتهن بجيب التراك واخذت جنسيتي والشهاده  ورحت على المرايه عدلت شالي ولبست جواريبي
ولبست عباتي ونزلت لگيت نفس البنيه منتظرتني والبيت سنطه باوعت الها شفت يوسف زوجي

هو بدون ما يباوع بوجهي گلي ::الحگيني
طلع من باب الصاله وانا ورا وفتح الباب البره وشفته ركب بسياره بيضه واشرلي اركب يمه
انا ركبت وانا ساكته والسياره صارت تمشي بينه عرفت انو يوسف ماخذني الشي اسمه مجهول وانو مستحيل يغفر
الشي السووا جمال حتى لو چان ميت فاكيد راح ياخذ ثاره مني انا

//////////////////////////////////
يوسف
انا يوسف مواليدي 1983 خريج معهد تقني اشتغل موظف بدائره حكوميه اعيش ويه اهلي اختي الچبيره اسمها زهره
متزوجه يمنه  بالبصره من ولد اقاربنا هذا الولد جدا متدين وخلوق وعدها تلث بنات او ولد واحد

واخوي علاء هذا اكبر مني باربع سنوات متزوج بت عمي كامل ومسافر هو وياها للخارج وبين فتره وفتره ياالله
يكلف خاطره بالسؤال وبعدين انا وراي بسنتين امي حملت وطرحت بالشهر الخامس ولد وراه بسنتين حملت
وطرحت ربعدين صار عمري سبع سنوات صارت اختي ازهار. وبعدين بسام الزغير ابوي اسمه يحيى اتوفى قبل
سنتين هو موظف بدائرة الكهرباء

عمامي اخوان ابوي اثنين عمي رسول ابو سالم چان متزوج خالتي اخت امي الي جابت سالم وضحى وبعدين
اتوفت وراها عمي  اتزوج بت عمه وصار عنده تلث اولاد وثنين بنات عمي ابو سالم چان تاجر الله رازقه
عمي الچبير كامل ابو احمد وهذا عنده خمس ولد واثنين بنات عمي كامل تقريبا مجنب نفسه عنه يحضر بس بالواجب
ملتهي ابيته واولاده وبناته الي بنته الچبيره متزوجه اخوي علاء ومسافرين للخارج

انا كملت معهد تقني اتزوجت من بت عمي ضحى قبل سنتين ونص زواج تقليدي ولان چانت الي علاقه بابنيه
وياي بنفس المعهد اسمها سحر ومن اتخرجت بقت علاقتنا واتفقنا على ما اكون نفسي واتقدم الخطبتها 
چان حبنا شريف والبنيه رايدتني وانا هم رايدها

اهلها ناس تجار واخوانها مهندسين اثنين وابوها مقاول معروف واختها صيدلانيه وامها مدرسه واخوها الزغير طبيه
بس هي ما تحب المدرسه گوه طلعت معهد تقني  انا من حصلت وظيفه بديت الم نفسي وقررت اخطب سحر
ودزيت امي واختي حتى يحچون ويه امها لان سحر فهمتني هي مسولفه الامها وامها گايلتلها خلي
يتقدم وانا اقنع ابوج واخوانج  ما دام مقتنعه بي

راحت امي وازهار وفاتحت ام سحر الي گالت ان شالله نرجع الكم خبر
وره اسبوع سحر خابرتني وكالت // ابوي يريد يشوفك انت وابوك حتى يتفاهم وياكم ع المهر وحتى من تجي الجاهه
كل شي متفاهمين علي وفعلا رحت انا وابوي وعمي ابو سالم الي كانوا مستغربين من طلب ابوها
ابوي //ادري غير المفاهمه تصير ويه النسوان
عمي // مي خالف ناس مثقفين ويجوز عدهم شروط يردون يحچوها النه

وصلنه البيت اهل سحر واتفاجئت من شفت ابوها شلون استقبلنه ابرود وگعد خله رجل على رجل وشلون
طلب طلبات تعجيزيه عرفت همه ما يريدون ينطوها الي بسبب المستوى المعيشي لان ابوها چان تاجر وعده
شركات فحسبها انو انا طمعان بي ومن رجعت اصر
عمي ابو سالم ان نروح البيته وهناك وجه كلامه اليه وكال

:عمي لا تضوج ولا تنقهر هاي بتي ضحى اجتك  هديه ما من وراها جزيه
بصراحه عمي فاجأني انا ما رديت باي كلمه ومن رجعت للبيت ابوي وامي صارو يحچون وياي
:وهاي بت عمك ما عايزها شي والي نعرفها احسن من الي ما نعرفها
انا بوكتها محبط رديت عليهم :: مو وكتها سدو الموضوع
ابوي صار يحچي وياي //شنو سدو الموضوع شبيها بت عمك

::بابا ما بيها شي بس انا صرفت نظر
ابوي //شنو صرفت نظر الخلق سحر ما خلق غيرها
امي //بعدين ضحى بت عمك وبت خالتك لو نسيت
:: لا ما نسيت وما اريد اخطب البنيه غصب عنها عمي انطاها اليه بصيغة الهديه ناسي هي بني ادمه دم ولحم
وهي مسؤوله عن نفسها

دخلت الغرفتي وخابرت سحر وانا احچي بعصبيه ::شنو هذا الي سمعته من ابوج
هي ردت //يوسف احنه لا يمكن نكون البعض ما النه قسمه
::سحر هذا كلامج لو كلام اهلج
سحر //كلامي يوسف ما اكدر اعيش ويه اهلك بغرفه وحده ما اكدر
::ما تگدرين لو اكو شي صاير
سحر //الصدك متقدملي ابن صديق بابا ناس تجار واهلي قبلو وانا هم وافقت 

وسدت التلفون بوجهي حاولت اتصل لكن ما ردت غلقته ثاني يوم بالليل اجانه عمي ويا ضحى وصاحني ومن
اجيت اشوف ضحى شلون فرحانه ووتباوعلي وتبتسم
عمي گلي //شوف عمي يوسف هاي ضحى گدامك انت اسالها انا ما جابرها ادري ابتي ما عدها مانع موافقه
عليك وهاي گدامك راح اسالها لو انت تريد تسالها
انا جاوبت عمي // لا عمي شلقصه
عمي //احسن حتى ما تگول جبرناها بابا ضحى هذا ابن عمج يوسف قابله بي
البنيه وهي مبتسمه هزت راسها عمي گال //ها خو گدامكم هاي هي انا شريد غير اشوفكم مرتاحين وضحى
يتيمه واريد اخليها يم خالتها وعد واحد يصونها

بذاك الوكت استحيت من كلام عمي ما گدرت اعقب وهزيت راسي وانا گوه مبتسم لان اشوف ضحى بت عمي
بت خالتي مثل اختي بس مو زوجه الي عمي گال انتمم خطبة يوسف وضحاوي  وازوجهم واجي اخطب
زهوره السالم
وتمت الخطوبه واشوف عمي وابوي مستعجلين يردون بس يتممون الزواج واتزوجنا انا وضحى خلال اسبوعين كل
شي صار بسرعه وبعدها اجه عمي وخطب اختي ازهار الابنه سالم ونفس ما سووا عمي ابوي سووا واخذ رأي اختي
وهي گالت //موافقه بس شرط اكمل دراستي

چانت ازهار تداوم مرحله ثانيه تربيه رياضيه ناجحه للمرحله الثانيه وكلمتها ما تصير اثنيين وقرينه الفاتحه ولبسوا
الحلقات وچنت اشوف الفرحه بعيون سالم لان خطب اختي
وكل ما يجي يحچي ويه امي خاله خلي نتزوج وتكمل عندي  ازهار تزعل وتگول لا انا شرطت وانتو وافقتو
بعد زواجي بحوالي تلث تشهر چنت معزوم بزواج صديقي ماهر

هذا صديقي من ايام المعهد ورغم كل واحد صار بناحيه هو اشتغل اعمال حره وانا اتوظفت ظلينه على
تواصل رحتله بالزفه وهناك شفت سحر وهي شافتني انا وكأنما اراويها شگد انا فرحان وسعيد بزواجي
صرت اصفك واهوس الماهر رغم الكل يعرفني شگد انا ثگيل ورزن

وره اسبوع ماهر عزمني غدا وطلب مني اجي شويه من وكت مو حد الغدا انا گتله المفروض انا اعزمك
ماهر //ما بيناتنا جايين بيت خالي من الحله واريدك تجي
وفعلا رحت الساعه 11 وسلمت وگعدنا شفت بس انا المعزوم استغربت سالته //وين بيت خالك
ماهر //اعتذرو صار عدهم ظرف وما اجو (باوعلي )

يوسف سحر دائما تسالني عنك بحكم شغل ابوي وابوها ولا تنسى احنه چنه جيران قبل ما
يشيلون الغير منطقه وامس من اجت تشوبش زوجتي عرفت انو انت اتزوجت
دنگت وانا اهز برجلي وگتله //ماهر سد الموضوع
ماهر سكت وبعدين صرنا نحچي بامور عاديه وگف وگلي //من رخصتك
طلع من الديوان وانا لزمت ريمونت التلفزيون والجگاره بحلگي انفتح باب الديوان وشفت سحر واگفه بالباب
اتقربت وسلمت //اشلونك يوسف

باوعت الها وبلعت ريگي رديت عليها السلام لكن ابرود
سحر بابتسامه حزينه //مبروك يوسف
::الله يبارك لج شكرا
سحر بانكسار //انا اول امس عرفت انت اتزوجت
::اي والله اخذتلي وحده على گد ثوبي ما يردون سياره وبيت باسمها ومهر غالي
سحر //بت عمك مو
::ايي بت عمي وانتي اتزوجتي مو ها نسيت اتزوجتي ابن صديق ابوج مو تاجر وطاك ونفس مستواكم

هي بابتسامه مصطنعه //بالوقت الحاضر ما افكر قدمت هندسه اهليه
اتعجبت من نبرة الحزن الي حاچتني بيها سالتها باستهزاء //شعجب عاد انتي ما تحبين الدراسه وبعدين الف يتمنوج
(حچيت باستهزاء ) بس شويه نزلو الاسعار
هي من سمعت كلامي اتقربت مني وهي ترجف //يعني انت تشوفني سلعه انباع وانشري
::مو انا اهلج عارضينج للبيع لليدفع اكثر وانتي كلتي ابن صديق ابوج تقدملج ونفس مستواكم

هزت راسها // صحيح كلامك صحيح ما دون هالشكل روح اسال امك وابوك وعمك وحتى اختك وبعدين احكم
اتفاجئت من كلامها هي دارت تريد تطلع انا سبقتها صرت گدامها وانا اگلها بعصبيه
:: اوگفي شنو اسأل ابوي وامي وعمي
سحر اتحسرت //يوسف انت تتصور اهلي يطلبون هيچ طلبات تتصور اهلي من يعرفون بيه انا موافقه عليك وانت
ما عندك ما يگدرون يشترون البيت ويخلولي السياره لكن ...
جاوبتها بنتر ::لا تسكتين كملي

سحر //تدري كلش زين من گتلك اتقدم امي تعرف وهي الي شجعتني وگالت اقنع ابوج
انا بقلة صبر ::وليش ما قنعته
سحر //اجت امك هي واختك وحچت ويه امي وگالتلها انريد ابنه ياخذ بت عمه وبتي هاي تاخذ ابن عمها لان تريده
وانا جايتج احچي وياج اخوات ابيناتنا ما نريدها توصل للزلم
ابو يوسف وعمه واگفيين بره متانيني واذا بتچ اصرت على ابني يضطرون يحچون ويه اخوانها وابوها

حاچيتها :: سحر انتي شتحچين
هزت راسها // انا سمعت باذني ورحت فتحت الباب ومديت راسي وشفتهم همه ابوك وعمك منتظرين امك واختك
بوكتها ما هانت عليه نفسي وخليت امي تحچي ويه ابوي يدز على ابوك وعليك ويطلب هيج منهم
ضحكت باستهزاء :: هههههه خوش مسلسل تركي وليش هسه اجيتي تگليلي شنو الي استجد مرتي ماتت
وعافتلي جهال وحنيتي الي حتى اتزوجج

سحر // بلا استهزاء وروح اسالهن انا من شفتك بالعرس وبس شفتني صرت تهوس الماهر عرفت هذا مو انت
وعرفت بنفس الوكت شگد حاقد عليه وشگد انا بنظرك انسانه تافهه ردتك تفهم الحقيقه ولان خلص ما اتزوجك
لو شنو يصير بس لازم اخليك بالصوره ولازم تعرف الي سوو اهلك وما اخليك تباوعلي باستزغار
على انه انا انسانه تافهه

سحر باوعتلي وهي اتاشر بايدها //يوسف انت خوش ولد ومؤدب وهادئ هدوئك هو جذبني الك لكن من سمعت
امك وكلام اختك فكرت الف مره شلون راح اعيش ويه ناس ما تريدني حتى لو اناجربيت او اهلي يشترولي
صدگني اهلك ما چان يخلونه بحالنه خصوصا والكلام مو بس من امك واختك لا الكلام اجه من ابوك وعمك
قبلت تشوفني وحده متكبره وشايفه روحها ولا تعيش وياي والمشاكل ما راح تنتهي
ومن رجعت واتصلت عليه انا گتلك شوف حالك احنه طريقنا مسدود وحاولت اوصلك انو انا انخطبت الواحد
تاجر بس حتى تبتعد عني يوسف انا حبيتك وچنت مستعده اعيش وياك بخيمه لكن صدگني المشاكل ما راح
تنتهي لان الكل ما يريدني عرفت راح تتعب من تزوجني لذلك ابتعدت

طلعت سحر والدمعه بعينها اجه ماهر يمي وعرفت هو يدري بلي صار لكن سحر طلبت منه ما يگلي
بيومها عاتبته ليش ضم عليه هوه كلي // لان فعلا طريقك انت وسحر مسدود ولان كل اهلك ما يردوها فمستحييل
يخلونك تعيش وياها مرتاح

رجعت للبيت حتى ما اتغديت دخلت للغرفه كسرت شنو بيها ردت اعاتب ابوي وامي لكن واذا عاتبتهم شنو
راح يصير ابسط شي اطلك ضحى وسالم يفصخ خطوبته من اختي وعلاقة ابوي وعمي تخرب وسحر ما
راح تقبل نتزوج  لان عرفت اهلي
وحاولويعرفون شنو بيه انا ما حچيت وثاني يوم گعدت سبحت وبدلت ورحت للشغل

عمي ابو سالم اتوفى وره ثمن تشهر من زواجنا وره الاربعينيه اتقسم الورث لان اخوان سالم چانو ازغار
وامهم تريد الها مصدر عيشه
ضحى ما قبلت تاخذ ورثها خلته عد سالم لان انا فهمتها ما الي دخل
ورث ضحى چان ثلث البيت وسياره تريله وسالم ورثه ثلثين البيت وتلث تريلات اما اخوانه فاخذوا البيت الثاني
والمحلات اثنينهن وهاي چانت وصية عمي الابوي وسالم لان اولاد عمي من مرته الثانيه چانوا بعدهم زغار
وطايشين عاد المحلات تكد عليهم على ما يكملون دراسه

چنت اشوف ازهار دائما تطلع ويه امي للسوك وتشتري ملابس وتروح المناسبات اقاربنا والجوارين ساعات
احچي على طلعاتها وابوي وامي ما يقبلون وساعات امي تگلب على بت اختها ها هي وزتك هي گلتلك
ابوي يحب ازهار ومتعلق بيها وهي تحبه چانوا مدلللينها وما يردولها طلب
ضحى ما حملت وانا بالاساس ما چنت اركز على شغلة الحمل رغم امي دائما تلح عليه فيكون ردي الها
:: الله كريم يصير ان شالله

لكن ضحى چانت ما تگعد ودووم تروح للطبيبه وتسوي فحوصات وسونارات واشعه وعلاج
ورى سنه ونص من زواجنا ابوي اتوفى بعد ان اتمرض مات وهو يوصيني باختي وامي واخوي ادير بالي عليهم
وتالي كلي وهو يبچي //ابريني الذمه يمكن ظلمتك عرفت هو يقصد على سحر

اتوفى ابوي وما ترك النه اله البيت والراتب التقاعدي الي اتقسم بين امي وازهار  واخوي بسام
وهي كل شهر تشتري ملابس ومكياج ومن احچي امي تكول شنو شتريد منها بنيه مخطوبه وفرحانه ابوك بحياته
ما حچى وياها وانت ما كاد عليها خليها حالها من حال البنات
الى ان فد يوم انا بالدائره تقريبا بالتسعه الصبح اتصلت عليه ضحى رديت عليها

::الو
ضحى وهي تصرخ //الحك يوسف
انا رجفت ::شكو شبيج
- ازهار ازهار اتصلو على خالتي بالمستشفى ميته
::شنو شتحچين يا مستشفى
- الجمهوري
طلعت ركبت سيارتي وانا ما اتنفس لا صرت اذب النفس من خشمي اتصل سالم وكلي
— الحك يوسف مصيبه ومصيبه چبيره

/////////////////////////////يتبع