رواية بعد فوات الأوان الفصل الثامن عشر 18 - بقلم آنين الليل

تنويه //
مرحبا 🌷💞🌷
طبعا اسفه جدا جاي اتاخر بس صدگوني ما الي واهس اكتب فلازم تتحملوني وما تعتبون عليه
مجرد ما اكمل البارت انشره 🌷🌷😜
تحياتي 😘😘
#آنيين الليل #
/////////////////
سماح
ما صدگت من باوعلي سالم وكلي باچر قبل لا اروح اوديج يم اختج
انا راسا رحت حضنته وصرت اشهك من البجي وهو يكلي
انا اول مره اشوف عروس تبجي
وانا ضامه وجهي بصدره كتله //انت هيچ تحجي لان رجال بس انا ضل...

قاطعني وخله ايده على حلگي واخذني ع الچربايه وگعدنا باوعلي ورفع حنچي وگال
- سماح لو ما الي سويتي بيوم زواجنا يمكن اتصرفت اكثر من يوسف
هزيت راسي //لا سالم انت تختلف ادري بيك ما قابل على تصرف يوسف
باوعلي بنص عين //من. يكول شلون عرفتي

- من دزيت عليك تجي تاخذني من عرفت خاف تطلع رجلي من البدله
- سماح لا تظلمينه اليوسف تره هو رجال سبع وعده غيره
ما جاوبت هو اتقرب وكلي وهو يمسد على شعري //سموح حبيبي انخلص الليل نسولف وانا باجر رايح

ونمنا وگعدت الصبح سبح واتريگنا وطلع گال محتاج شغلات اجيبهن حاچيته بدلال
-سلومتي محتاجه شي زغيروني
- گولي بلا عياره
درت وجهي وگلت //ما لازم ما اريد
- گولي شتردين لا تشلعين گلبي
- ما اريد انت بس تقلد عليه
- زين براحتج

اتقربت منه وكتله //چنت اريد تجيبلي نقال وبي شريحه
هو فتح عيونه انا جاوبته //شلون اطمن عليك واعرف وصلت
ما خليته يحچي گتله //وخلي بي بس رقمك
-يعني تردين اتفهميني انتي ما عندج نقال

- لا عندي بس خليته عد اهلي من شفتهن رجعن نقال مروه وياهن انا اختصرتها وما جبته  وانت بكيفك
اذا تريد لاتجيب عادي
وطلع وانا بقيت بالبيت ارتب واخلي ملابس اله وانا هم خليتلي شكم قطعه وبصراحه اريد الوكت يمشي حتى اروح
اشوف اختي الي انحرمنا حتى من ان نسمع صوتها
رجع سالم وجاب غدا وشاف شلون مرتبه البيت ومنظفته وصار ياكل ويباوعلي وانا اكل وابتسم

وصار العصر وردت ابدل سالته //سالم شنو البس
هو باوعلي مستغرب كتله //اقصد عبايه اسلاميه لو عباية راس
-لا عباية راس ودشاديش
-صار

- وهاچ (مد ايده على جيبه وطلع نقال من العاديات وگلي ) هذا جبته وسيفت بس رقمي
اخذته وكتله //شكرا
- شنو ما عاجبج
- لا المهم اسمع صوتك واطمن عليك

ورحنا للحقل صارت السياره تمشي بينا وانا اباوع واسال نفسي //ليش هيج صار بينه
ويكون الجواب //كله من جمال
من دخلنه ع الترابي وانا اباوع السالم گتله // اوگف
هو باوعلي واتساءل بعيونه
هزيتله راسي وجاوبته// ايي اوكف شويه
وكف وسالني //شبيج
- انت تحبني

نزل نظارته الشمسيه // انتي مخبله
هزيت راسي // اي اعتبرني مخبله وجاوبني انت تحبني
سكت وما جاوب نزلت من السياره وهو يباوعلي وكلي //وين رايحه تعالي اصعدي
- ما اصعد وابقى اهنا اذا ما تجاوبني
دخن ونفخ الدخان // انا يمته عرفتج ؟
- ها يعني ما تحبني اذا ما تحبني وما تريدني ليش اتزوجتني هاا

لزمني من چتفي وباوعلي // لان چان لازم اتزوجج
هزيت راسي وانا اتعمد اتقرب علي //لا لازم تكسر عين اهلي بس تدري هذا الي تسوي حرام
غمض عيونه وجاوبني بعتب //والسوا ابن عمج شتسمينه
- اكبر حرام والله راح ايعاقبه مو بس على السوا بيكم لا راح يعاقبه على السوا بينه
ركب بالسياره وگلي //ا صعدي وراي شغل

ركبنا واحنه ساكتين وانا اباوع للهيمه الي بيها اختي وانا احتسب على ابوي وعلى جمال وعلى يوسف
قبل لا نوصل سالم حچى وياي وهو يسوق وعينه ع الطريق  //اسمعيني انتي راح تبقيين شكم يوم ولو
ما اعرف انتي مشتاقه الاختج ما جبتج لا چان قفلت عليج الباب
اتحسرت هو كلي //ما اريد تطلعين وياها تبقيين بالغرفه واي شي تحتاجينه تخابريني

استغربت //اخابرك
هز راسه //ايي وانا اخابر يوسف لو بشير ويجيبه الج شفتهمتي
سكتت ما جاوبت هو رد سالني //ليش ما تجاوبين
- صار الي تأمر بي
- سماح بعد ما اوصيج اذا يجي يوسف كلام زايد ناقص ما اريد حدج السلام
- اكيد بدون ما توصي

وصلنه للحقل العصر كلش واجه بشير يسلم علينه وگال //اتفضلوا ابيتنا على ما تجي ام يعگوب من السروح
هسه على جيه ما تتاخر
انا باوعت بانذهال وما سالت سالم الي جاوبه //تسلم ابو بهاء ننتظر اهنا

وصرت اترقب وعيني ع الدرب اريد بس اشوفها لمن ما بين خيال وحده تمشي وره الابقار وبيدها عصا
وموزره بوزار العشاير صارت دموعي ينزلن وانا اشوف وحده تمشي بتعب وهي اي شي ما بيها من
صورة اختي مروه الحلوه حتى مشيتها مختلفه انا ما صبرت صرت ابچي بصوت مسموع واندفعت اريد اروح
لكن سالم لزم ايدي واتقربت وهي تباوع چانت شبه المنگبه بالشال مالتها شافتني وگفت وهي مذهوله انا وياها
صرنا نمشي حتى نوصل ونتلاكه

حضنتها وانا اشهك وهي ما مصدگه عيونها وانو انا جايه يمها واشوفها باوعت الها چانت نظرتها بارده
يمكن من المفاجأه گتلها // مراوي يابعد عمري اشلونج
هي سالتني = سماح جابوج اهنا يعني هم مثلي
هزيت راسي //لا حبيبتي انا اجيت اشوفج سالم جابني
سالم اتقرب // اشلونج مروه اشلون صحتج

هي مدنگه = الحمد لله زينه (دارت وجهه وتاشر بايدها ع الغرفه ) اتفضلوا ليش واگفيين
سالم //لا غير مره انا اروح عندي شغل (باوعلي ) تعاي وراي

شو اتغيرت نبرة صوته ما اعرف شبي  وصلت فتح الصندوك مال السياره وطلع علاليك كلي //هذا مسواك
اخذتهن بدون ما اجاوبه ورحت للغرفه ومروه طلعت وهي تگول =شنو هالزحمه
هو باوعلي وما جاوب ردت گالتله= خويه سالم
هو باوعلها اتقربت منه وكالت = شكرا لان جبت سماح اشوفها

وغرگن عيونها بالدموع هو ما رد عليها باوعلي وركب السياره وانا وصلت يمه فتحت الباب وركبت بالصدر وسط
ذهوله بقى يباوعلي انا حضنته وگتله// راح اشتاقلك مو تطول عليه
هو باوعلي وحچى // هاي شسميها
- اول وتالي ينجلي الغيم وتطلع الشمس انت بس دير بالك على نفسك
غوركن عيوني بالدموع هو لزمني وكال //ليش تبچيين معقوله هلگد تحبيني

مسحت دموعي الي وگعن //خلص ما احبك بس ما عندي احد غيرك اهنا يعني انا بدونك ضايعه هسه ارتاحييت
جاوبني //ديرن بالچن واقفلن الباب قوي
هزيت راسي
- وانزلي خلي اتوكل
نزلت وهو. راح وانا ومروه دخلنه للغرفه الي باوعت الها وانا متفاجئه واكول ويه نفسي
-الله اكبر عليك يايوسف ولك لو كاتله اختك ما تسوي بيها هالشكل

مروه راحت تغسل واجت وهي لابسه دشداشه صفره وانا رحت حضنتها واكلها //مراوي هاي انتي صدك
هي ما صبرت وبس عيونها يجرن ما حچت شي بس تبچي بدون صوت واتوضت حتى وهي تصلي عيونها
يجرن دموع انا صليت ورحت عزلت المسواك وعرفت شكد هذا يوسف واحد حاقد واي واحد بمكانه يحقد لكن
مو على مروه بس يمكن مثل ما كال سالم لان يعتبرها خطيبته
هي گامت تريد تسوي عشا انا گتلها

- سالم جاب عشا وجاب فواكه ومخضر انتي لاتسوين شي
هي ما تكدر تحچي اتقربت منها وانا اكلها //مروه ليش ما تحچيين شبيج حبيبتي
ردت عليه =همه جابوج هم تشتغلين اهنا هم راح يشمرج مث...
قاطعتها// هاي شبيج مراوي حبيبتي والله جايه ابقى يمج كم يوم انا اتوسلت بسالم حتى يقبل يجيبني يمج

= يعني مو جايبج مثلي
اتحسرت وهزيت راسي // لا مروه انا من سولفتلي عمتي شنوو سوو بيچ عرفت شلون اتصرف
=يعني شلون ؟
- خلينه نتعشى واسولف لج ياروحي انتي
واتعشينه وانا اشوف مروه بين الخوف والفرح لان ما مصدگه انا جايه اشوفها وسولفت الها شنو سويت وشلون
اتصرفت هي ابتسمت ابتسامه باهته وكالت //شتتصورين ايفوتنها الج

- حتى لو ما ايفوتنها احس سالم يحبني
= الله يسعدكم يارب
- اوگفي مروه خلي اتصل بسالم وين هو وبعدين نسولف
= ايي
واتصلت هو رد
-الو
- هلو حياتي (حاچيته بدلاعه كانما اشاوره ) اشتاقيت لك

-ايي
- شنو ايي هاي ليش هيج تتصرف
- ما بيه شي
- زين ما اعطلك بس خابرتك حتى اطمن عليك
- اطمني
- ما اطمن الى ان توصل كل ساعه اخابرك
- لا تخافيين مو اول مره اسافر عمري كله خلصته اسافر

- بس هالمره غير
- وليش باالله ؟
- ولو يجوز انت ما معترف او ناسي بس هالمره ياحبيبي عندك مره مو لو ناسي
هو ما جاوبني رديت كتله // العفو مو مره فصليه

وسديت التلفون وانا اشوف مروه متمدده على ظهرها وهي هادئه وتكلي
= امس اتصلت بعمتي وهي تكلي امي بالها يمج
- ادري مراوي واعرف هسه بس تبچي امنا الله يساعدها
مروه برطمت انا اجيت يمها وحظنتها // لا مروه الله عليج لا تبجيين تره حتى احنه من نكبر ويتزوجن بناتنا
هم نبجي

هي اتحسرت = يتزوجن سماح مو يرحن فصليات
- هسه دليني ع الجهاز وينه خلي اخابر عمتي واخليها باچر تجيب امي يمها ونحچي وياها

وراحت مروه وطلعت بره وانا بگلبي ادعي على يوسف وعلى عيشته الي معيشها الاختي لكن مضطره اسكت
واجامل حتى ما اقهرها وهي حامل ومريضه جابت النقال الي لافته بعلاگتين وقفلنه علينه الباب واتصلت بعمتي
الي ردت عليها

- هلا عمه مروه اشلونج
= هله عمه انا زينه الحمد لله عمه هاي سموحه تريد تحچي وياج
عمتي باستغراب //سماح شلون اجت او وصلتج
اخذت النقال من مروه وانا اكول // افه امل اتشكين بمواهبي

- هله ياروح امل اشلونج
- ازهو بالنصر انتي شلونج
عمتي اتحسرت //والله ياعمه انا زينه بس خايفه على امج راح تعمي عيونها
- عمه حبيبتي باچر اتعني وجيبيها هي وزنوبه يمج وخلي نخابرها حتى تطمن
- صار وتدللين
- تره سالم خلالي نقال
امل //زين خابريني من نقالج

- لا مو هسه اريده هو يخلي ارقامكم بايده بس شويه صبر
- براحتج سولفيلي شسويتي
- وداعتج من اول يوم دخلت حرب ولحد هسه انا الفايزه بس لازم اخذ حذري
- ديري بالج منهن تره عگارب
ادري عمه وصاحيتلهن ياالله حبي اريد اسولف ويه مروه لان مشتاقه الها تصبحين على خير

-وانتي من اهل الخير
-عمه سلميلي على عمي جمعه
-الله يسلمج ياروحي باچر ان شالله من الصبح اغبش اجيب سهام وزينب
- ان شالله سالمه يااحلى عمه بالدنيا

وسديته وانا اباوع المروه الي نايمه على ظهرها انا فرشت يمها وگتلها //الليله احضنج وانام
هي دارت عليه وحضنتني وهي تبچي وانا اگللها// سولفيلي كل شي
هي تشهك = لا سموحه ما اريد اضوجج
- شنو تضوجيني لازم اعرف كل شي حتى اعرف اتصرف
= اهم شي انتبهي النفسج وديري بالج من اخته وخالته
- ذكرتيني خلي اخابره

واتصلت
- ها الله يساعدك
- هلا
- گلي ياروحي مو بس هلا
- منو يگول انتي روحي
- لان انت روحي

بقى ساكت انا جاوبته / اگدر اعرف انت شبيك ليش هيج تتصرف
- بعدين سماح جاي اسوق
- شگد وتوصل
- ان شاء الله ساعتين ساعتين ونص
- دير بالك واقرا سورة الفاتحه والتوحيد والقدر واية الكرسي
- ان شالله تأمرين بشي ثاني عمتي
- لا بالوقت الحاضر اريد سلامتك يجوز بعدين اريد شي ثاني

- ان شالله تدللين
- انتبه للطريق
-ماشي
الله وياك
وسديته منه ومروه تگلي =لا تلحيين على الولد
- لا احسن حتى يعرف انا مهتمه بي

وصارت مروه تسولفلي على الي سوا وياها يوسف واخذت عنه نظره هو انذل من جمال الحقير
شبعت قهر وانا اشوف اختي ذابله من كد ما شافت ضيم وتسقيط للكرامه وكل هذا ليش بس حتى ينتقم
الشرفه وكرامته من انسان ميت والمشكله احنه نكرهه وما نطيق اسمه وقررت لازم افهم سالم على علاقتنا
بجمال وخصوصا علاقة مروه

وصرت اخابر بسالم الى ان وصل للبصره وهنا سالته // وين راح تنام
هو جاوبني //يم اخوتي
انا باستغراب //منو اخوتك
- بعدين اجي وافهمج
- شتفهمني سالم انت متزوج عليه مو

- هههههه واذا اتزوج اخاف منج
جاوبته بزعل //لا شنو تخاف مني بس خلي بمعلومك من تتزوج عليه اكتل مرتك واكتل نفسي
سالني //وانا ما تكتليني
- لا
-ليش ؟
جاوبته بدلاعه //بعدين اگلك
-ليش بعدين
- لان نعست

- ياالله نامي وارتاحي
- ما اگدر انام
- ليش مو تكولين نعسانه ليش ما تنامين
جاوبته //لنفس السبب الي مخليك ما تنام
- انا منو كلج ما اريد انام
- اممم احساس ياالله تصبح على خير
- وانتي من اهل الخير

سديته ومروه تبتسم = ثاريج مو هينه
-ليش هو الي يعيش ويه ابوج وجمال وبعدين اسمع المصايب الي مسويهن وياج يوسف شترديني اصير
=بس خايفه عليج
-شيريد يصير بينه اكثر من الصار
-فهميني شلون شكيتي الدشداشه
=الدشداشه مشككتها وانا بعدني ابيت اهلي بس شالتها يهني بس الزمها تنشك
=ههههه عفيه عليج

- وانتي مروه
= انا شبيه
- مو لازم تحاولين اتغيرين اب يوسف
=شلون
- تحچيين ويا تحاولين اتفهمي
=هاي اذ چنه نحچي سماح انا من اخذته الهليوم الكلمات معدودات الله لايچذبني يمكن عشرين او تلاثين كلمه
- وتالي تبقون هيج
=اكيد لا يحلها الحلال
- والنعم باالله

////////////////////////////////

يوسف
بعد ما امي خابرتني وكالت ضحى راحت البيت اخوها انا رجعت للبيت وانا اشوف بعيون امي كلام
وهي كل شويه تسمعني
- بسام مو تخلصها وياي سويلي غدا سويلي عشا انا ما بيه حييل جيبوا من المطعم سفري
بسام //يمه انا اي شي اكله ما اتشرط بس انتي حاجي يوسف لا توجهين الكلام الي وانتي متقصده يوسف
وبعدين خلي ابالج كلمن بكيفه
امي //هاي حتى انت صرت تحچي بعد اسكت احسلي وكلمن بكيفه

ما جاوبتها صعدت فووك اتمددت على فراشي وغفيت وگعدت على رنة تلفون سالم جاوبته وانا اتثاوب
::هلا سالم
- هلا بيك گعدتك
::اي چنت نايم خير
- ماكو شي بس اريد اروح للحقل اشوفلي عجل

::ها اتوكلت ان شالله
- اي ان شالله بس هاي قاهرتني
:: مني ؟
- ضحيوه تبچي وتكلي شنو تاخذ فصليه اخذلك مره وتالي اخذ الفصليه
::بكيفك سلوم الي تريده سوي
- يوسف تدري ابو راكان يگلي الناس جاي تضغط علي يفكون بتهم وهو يگلي شوفلك بت حلال وفك البنيه

::وانت شرديت علي
- گتله وانا ما اقبل  اريد اخذها وبعدين اتزوج وحده ثانيه
::حقك سالم براحتك
- هسه يمته اجيك
::باچر لان اليوم تعبان
- هذا هو باچر باچر فيمان الله
::الله وياك شتحتاج حاضر

- ما قصرت صدك يوسف مشكور
::على شنو شمسويلك ؟
- مودي ضحى وگايللها تبقيين ترتبين بيت اخوج وتبقيين الوره العرس
جاوبته بارتباك ::ها يمعود صدك جذب گدامك
- مشكور عمي ياهو مثلك سلطان
::شقصدك ؟

- هههههه تودي ضحى يمي وتروح للثانيه خو مو انا
::ومنو لازمك اخذلك وراها اثنيين
- هسه خلي ناخذ اول وحده والباقي الله كريم
::ياالله فيمان الله
- الله وياك

سديت النقال وضليت صافن واجر  النفس بعدها گلت ::ما شاء الله اخذ السانج ع الچذب
بدلت ونزلت اريد اطلع امي حاچتني من وره خشمها / عود جيبولكم عشا وياكم ،
هزيت راسي ورحت ركبت سيارتي ورحت صرت افتر بعدها وكفت يم مطعم جبت كباب وصمون ورجعت
اتوضييت وصليت

واتعشينا واحنا ساكتين وبعدها صعدت اتمددت وفتحت التلفزيون وصرت اگلب بالقنوات وانا ضايج ما عجبتني
قناة بعدها خليته على فلم اجنبي مره اباوع ومره افكر وانا اگول
::؟هسه انا يمي امي واخوي وتلفزيون وحاس بضوجه مو لان ضحى مو يمي بس ما اعرف ليش ضايج لعد الله
يساعدج يامروه شلون تنامين وتگضيين الليل وبالنهار هم ابحدج لحد يسولف ولحد يسأل

صرت ادخن الى ان نمت گعدت ثاني يوم وغسلت وبدلت ونزلت لگيت بسام مخدر جاي انا شربت استكان
واكلت لگمة صمونه بس حتى ادخن وطلعت رحت للدوام وره الظهر رجعت للبيت وجبت وياي دجاجه وتمن
ومقبلات من المطعم

اكلنه ورحت اتمددت وبعدها گعدت بدلت ورحت ويه سالم بالطريق نزلت اخذت فواكه ومخضر البيت بشير
وانا اوصيهم يودولها لان ما كو ثلاجه بالغرفه
سالم سالني //يوسف هذا المسواك المن
::البيت ام بشير ليش
-لا هيج اسأل بس مو المفروض هم تاخذ مسواك المرتك
::موصي ام بشيرتاخذلها لان ما عدها ثلاجه

سالم ما عقب وصلنه وتلگانه بشير ورحنا شفنا العجول وسالم عجبه واحد واتفق ويه بشير الي گله هو يجيبه
ويشوفله گصاب وحتى الطباخ بشير اتكفل ان. يجيبه واتفقوا ع السعر انا هنا ما قبلت وكتله هذا شوباشك لكن
سالم اصر يدفع الفلوس وگال
- عود بالعرس شوبشني

بقينا نسولف ويه بشير لمن ما اجت مروه تمشي وره الابقار والعصا بايدها تمشي بتعب وثگل دخلتهن واجتها ام
بشير وهي طلعت راحت للغرفه بعدهاانا گلت السالم ::ياالله نرجع
سلمنا على بشير وركبنا باالسياره وهالمره سالم يسوق باوعلي وسالني

- ليش ما مريت على زوجتك
::ما الي خلك
- ليش انت من تمر يرادلك خلك
::سالم شتريد تگول
- الي اريد اكوله انو احنه اخذنه البنات فصل حتى نحقن الدم هنه ما الهن يد بالي صار

باوعتله ::هاا هيج تحچي بعدك ما متزوجها للفصليه وحتى ما شايفها
- هاي حقيقه الفصليه تنوخذ حتى تحقن دم واول وتالي هي انسانه
::اگلك سالم شحال لو ما هاي الي تگلي ليش ما مريت وشفتها نازله ضره على اختك
وگف السياره وگلي //الحق حق چان ممكن ترفضها وتقبل بفصل او حتى ممكن ما تقبل بالفصل لكن انت
الي قبلت حتى ما شاورت احد واحنه وافقنا على موافقتك
ا
دخنت جگاره وجاوبته ::صحيح الناس ضغطت عليه واكو ناس ما الها يد بالموضوع
سالم هز ايده //اصلا كل الناس ما الهم يد
::شقصدك ؟
- قصدي جمال سوا فعلته ابحده محد دزا او دفعه يسويها
:: صحيح لذلك انا قبلت
- هسه هاي زوجتك الها حق عليك حالها حال اختي
باوعتله ::والله تعجبني

- يوسف لا تلف وتدور هاي حقيقه فصليه ورثيه جاريه انت عقدت عليها گدام الله والناس وسويت عرس بعد شكو
::وانا ما سويتلها شي اكو هواي زلم تهجر نسوانها
- ليش تهجرها ليش يوسف كمية العذاب الي معيش بيها روحك والبنيه شنو سببها
:: ما احبها وحتى انت ما راح تحب اختها

- حتى لو ما احب اختها اعيشها بكرامه ليش هالاهانه هاي
::شقصدك سالم
- قصدي المفروض انا الي اشجعك اكثر تسوي وياها لان نزلت ضره على اختي بس اهنا هي مجني عليها يعني
لو نازله ضره على اختي بارادتها يمكن ما يهمني ولا احچي بس هاي مجبوره وهذا الشي حرام
ضليت اجر نفس وانفخ سالم گال //يوسف البنيه ما الها اي ذنب واول وتالي محسوبه عليك
هزيت راسي وحاچيته بعصبيه :... لا الها ذنب وذنب چبير ناسي هي چانت خطيبته الذاك النذل

باوعلي وهو عاكف حواجبه //اي وشنو
::شنو شنو سالم سنتين خاطبها وگاعد ابيتهم يمكن انت من تاخذ اختها عادي بنيه زغيره تريد تكمل وياها او ما
تريد لكن انا صورة جمال ما تروح من بالي منا المصيبه السواها ويه اختي ومنا
- منا شنو
::منا هاي الي تگول عليها مرتي سالم انا اتعذب وانكتل يوميه الف مره

- يوسف شبيك جمال انقبر وازهار (اتحسر سالم ) ازهار الله يرحمها لكن انت معذب البنيه ومعذب روحك
:: ادري سالم
- وليش كل هذا لان چان جمال خاطبها لو اكو شي
::مثليش ؟
- يعني ما اتصور انت ويه هاي بالذات اذا لگيتها ......
قاطعته :: لا شتحچي سالم شنو عبالك اسكت
- اي بعد ليش معذب نفسك ومعذبها جانت مخطوبه وما اتزوجت مو بارادتها بارادة رب العالمين مات

::وهاي السنتين
- شبيهن
:: يعني ولد وگاعد ابيتهم وخاطبها والي عرفنا عن جمال انسان حقير ونذل ونفسه دنيه
- هذا الشي بس الله الي يعرف بي ولو تبقى تفكر هالشكل راح تتعب وتتعب هواي يوسف فكر بنفسك
::شلون سالم التفكير والشك كاتلني
- يوسف اكثر الناس متزوجه زواج تقليدي ومن غير محافظه وياما ناس اتزوجوابنات مخطوبات سنه وسنتين وبنوا عائله
واطفال وسعداء تدري ليش لان ما تعبوا نفسهم باشياء راحت عاشوا حياتهم واستفادوا من الحاضر
يوسف كل انسان اله ماضي انا وانت وامي وابوك احنه مو ملائكه احنه بشر

ابتسمت باستهزاء :: اليسمعك سالم ما يصدك نسيت من انطونه الفصليات انت شسويت شكد حچيت وسبيت وغلطت
وهسه جاي تدافع
هز راسه // مو ادافع بس انت يايوسف من تاذي البنيه تاذي نفسك ما تريدها رجعها الاهلها ولا تخلي الشك يسيطر
عليك تره للعلم حتى اخذتنا للفصليات من البدايه غلط
::ها وليش
- لان بصراحه هذا عرف اكل علي الدهر وشرب وهنه يادوب بنات عمه مو اخواته والناس بطلت سالفة الفصليه
بس ما رادونا نتورط نكتل واحد من ولد طالب لان ذاك المقبور لا عنده اخ ولا ولد
نفخت ::ادري سالم

- لذلك ياخوي اما تراعي الله بيها واما تسرحها
باوعتله وانا رافع حواجبي :... ليش انت راح تراعي الله بالفصليه
- ايي ليش الچذب اجت على مرامي اجت ما اجت وما حبيتها اما اطلكها او اهجرها بس مو بحقل مال ابقار
باوعتله هو هز راسه - يوسف انت انسان رزن وتحسب حتى للكلمه ليش هاي القساوه
ما جاوبته گلي // يوسف انت بعدك تحب سحر

غمضت عيوني :: شذكرك بيها
- لان اتذكر شلون اتعاملت ويه موقف ابوها بكل برود ورزانه
:: لان الموقف اتطلب مني هيج ماحبيت ابوي وعمي يدخلون بكلام ما منه فايده
- يوسف اعرف حتى من اتزوجت ضحى بعدك تحب سحر
جريت نفس :: البنيه راحت الحال سبيلها

- بس انت من راحت ما فكرت حتى لو تنتقم بكلمه والي اعرفه انت وياها علاقه سنين اشو ماكو شهر واتزوجت
اختي يعني مسرع ما نسيت
جاوبته :: بس سالفة سحر مو مثل سالفة جمال
-لا مو مثلها لكن انا احچي على موقفك
:: چان لازم هيج اتصرف

سالم // تدري يوسف ذاك اليوم بمحض الصدفه سالت عنها وعرفت بعدهي ما متزوجه وصايره
مهندسه وتسوق سياره ،
::اعرف
- منين تعرف
::شفتها وهي گالت راح اتكمل دراسه
سالم بتعجب //شفتها ؟
::اي
-وين ؟
::بعرس ماهر

- يعني غفرت الها كل الي سوته وما عاقبتها رغم چان عندك علاقه وياها
::  سحر تختلف   لكن جمال النذل فات على عرضي وعرضك افتهمت اما سحر فچانت علاقه
- اي علاقه وگلتلك تعال اخطبني وخطبت وبعدين بين معدنها اشو درت وجهك واتزوجت حتى ما فكرت اتعاتبها
::لان هي ما الها ذنب

- هسه صار ما الها ذنب مو چانت تگدر تگل الاهلها الناس الي خطبوني على گد حالهم ما تردوهم ارفضوهم
وبلا ما تودون عليهم وتنتقصون منهم
باوعتله ::انت شتحچي سالم سحر واهلها ما الهم يد بالي صار
سالم باستغراب //شنو ؟
نفخت ::ماكو شي
- لا فهمني
::شفهمك شي صار وراح الحاله وانتهى واحنه اولاد اليوم

- بس فهمني شلون ما الهم يد وطلباتهم وتكبرهم نسيته
حكيت گصتي :: كله من جوه راس ابوي وابوك وامي وازهار
سالم //شتحچي يوسف
::نفس ما سمعت ابوي راد ياخذلي ضحى وابوك راد ياخذلك ازهار
سالم رافع حواجبه // ايي

::ايي بالبدايه ودو خالتك وازهار حچوا ويه البنيه وامها وبعدين البنيه فهمت ابوها انو انا فقير وما تگدر تعيش ويه
اهلي ولا انا اگدر اعيشها بنفس المستوى لذلك ابوها دز علينه وخلى شروط تعجيزيه
- بس خالتي بيومها ما راحت ويانه تتذكر
هزيت راسي ::اي راحت هي والمرحومه قبل يوم ومن وراي بس ابوي وابوك يعرفون

سالم // اووف كل هذا صار وانت من عرفت شسويت
:: شسويت چنت متزوج اختك وانت خاطب اختي بوكتها سكتت
- والله لو انا چان گلبت الدنيا
::وشنو الفايده
- ماكو فايده ياصديقي احنه دووم نركض ع الضعيف والقوي ندور وجه منه
هزيت راسي ::لا بس احيانا نسكت لان عرفنا بعد فوات الاوان والمقابل رفض

- تقصد سحر رفضتك
هزيت راسي :: اي هي فهمتني حتى ما ابقى على عماي وابقى احتقرها ومن عرضت عليها الزواج واسكنها
بيت ابحدها رفضت وكالت حتى لو تاخذني بغير محافظه ما اتصور اهلك يخلونا ابحالنه
سالم بعتب //كل هذا صاير وياك وانا ما ادري
:: واذا عرفت شنو ممكن تسوي
نفخ سالم وكال // يجوز هواي امور اتغيرت ،تدري يوسف

باوعتله وگال// خالتي اليوم اتصلت بيه
:: امي شرادت
- مارادت بس عاطت عليه وسبتني وغلطت عليه ويجوز لو واگف گدامها يجوز حصلتلي تفله نعال
::وليش باالله
- ما تريدني اسوي عرس تگلي جيبها بعبايتها السوده واكسرها واشمرها مثل ما يوسف شامر اختها

::هاا وانت شگتلها
- شتدري بامك تقتنع بس انا گتلها خاله اسوي عرس گدام الناس حتى يعرفون اخذنه الفصليه غصبن على اهلها
باوعتله ::ومو هي هاي الحقيقه ؟
- يجوز نص الحقيقه بس مو كلها
:: بعد انت وخالتك انا ما عليه

بقينا ساكتين وصلنه بالليل سالم كلي //ادخل وياي للبيت اتعشى واشرب چاي
انا ما قبلت جاوبته :: تعبان وباچر دوام وانت شنو تحتاج بس خابرني
اتشكر مني ورجعت للبيت سالم بحكم دووم يسافر للمحافظات مطلع على هواي امور وهو بطبيعة حاله مرتب
يعني ما يضخم الامور لا انسان يتعامل ويه الامور بشفافيه وطبيعته كتوم وما يحب يفشل احد

وصلت وامي تلگتني //شنو وين چنت
باوعتلها صفح وگعدت ع القنفه :: شنو معقوله بت اختج ما گلتلج وين رحنه انا واخوها ما اصدك
- شو تحجي باستهزاء شبيها بت اختي تحبك وتغار عليك وهي ما سوت شي
جاوبتها باستهزاء :: لا ابد ما سوت اي شي بس شككت برجولتي وچذبت عليه

امي // - شتسوي اول وتالي تحبل
::وانا ما مقصر تعرفين كل روحه للطبيبه شگد انطيها تعرفين بيش الدوا وكل هذا مو بعيني بس تچذب عليه ما اسامحها
امي //اخوها بعد يومين يعرس يجيب اخت الفصليه شني تخليها اهناك
:: اي تبقى ابيت اخوها خليها تتربى
- يوسف هي هم الله يساعدها
::يمه الخاطر ربج ضحى بعد ما ترجع لو شيصير ،

واتزوج سالم واجو هواي ناس من البصره اختي زهره وزوجها وابنها وبتها وابن عمي محمد هو الي جاب
الفصليه وامها وعمتها بسيارته وحتى الشيخ وزوجته وراح سالم جاب العروس ومحمد شاورني هي الي طالبه
يجي لان تخاف تطلع رجلها

وصار ثاني يوم واجه سالم للديوان وتونه جاي نسلم علي وسمعنا صوت العروس وهي تعيط وتستنجد
ركض سالم للبيت وره شويه خابرت امي الي گالت اخذها وصعد فوك وانا دخلت اريد افهم شنو صار بعد ان
خابرت سالم
ودخلت للصاله وصارت عيني بعين ضحى الي خزرتها وسالم نزل امي گلتله //هاي البت ينخاف منها كل شي تسوي
ضحى //والله سالم انا ما اجيت يمها هي ال...

قاطعها سالم وهو ياشر ابصبعه //اسكتي ضحى انا شفتج
امي بعصبيه // جاي انگللكم احنه ما جسناها
- خاله دشداشتها مشگوگه وايدها معضوضه وشعرها املش بعد شنو
امي //ايي هي سوت بروحها هيج
سالم باستهزاء //گولوا مخبله
امي // لا ملعبه وارجع واگول ينخاف منها

شفت سالم متضايق من وجود امي گتلها :: كافي يمه شنو هالحچي هذا
امي وگفت على حيلها وكالت الضحى // ناوشيني عباتي هذا البيت بعد ما دخلته
ضحى انطت العبايه الامي الي جاوبتها //وانتي ياالله امشي بساعج شنو ضلتج
ضحى بدون اي كلمه راحت للغرفه وهي شايله جنطة ملابسها واهنا حچيت بيني وبين نفسي
:: يجوز هنه هيج سوون بس حتى ضحى ترجع وياها للبيت
/////////////////////////////يتبع
اذا عجبكم البارت صوتوا