رواية بعد فوات الأوان الفصل السابع عشر 17 - بقلم آنين الليل

بنات اعذروني
ما اعرف شبيه ما اشتهي اكتب هاي گوه كملت البارت
ضايجه وما اعرف من شنو اشكي
ارجوكم اعذروني

///////////////////////
سماح
من وعينا على الدنيا انا واختي واخواني واحنا عايشين بكابوس من الخوف من ابونه ومن تدخلات جمال الي ما تنتهي
والي بقى ويانه الحد ما كبرنا وجمال سووا الي سوا واتغربنا من بيتنا وابوي شال الفصل من بعد ما انطوني انا
واختي فصل

ومن اخذوا مروه وشفت حرگة گلب امين وصادق انقهرت والي زاد قهري دموع امي وهي تبچي عليها
چنت ادري بمروه عايشه بضيم ومرار وبنيت تصوري من لمن تجي عمتي امل وتبقى تسولف هي وامي
بصوت ناصي

انا اروح ابچي على مروه بمكان محد يشوفني بي وبالليل من اريد انام اتذكر سوالفنه وضحكنا ابقى جوه البطانيه
وانا ابچي وافكر بيها شلون عايشه وشلون تكدر تتصرف ويه ناس دمهم فاير على بتهم الي انوخذت غدر من واحد
عديم الاخلاق

مروه بطبيعتها جديه وتاخذ الامور على محمل الجد اما انا فعندي نوع من التطنيش وهذا الشي انا دووم الجأ اله
حتى انسى المرار الي معيشنه بي ابوي من وره ابن اخو واخته الي بين معدنهم خبثاء وانذال من يوم الي عرفناهم

مروه من اتزوجت انقطعت اخبارها وانا يوميه افكر بيها وبعذابها الى ان اجه امين بالليل وطلب ياخذ امي للزيازه
ومن رجعت امي اشوفها حزينه ودووم تطلع بره والنقال بايدها ومن اسالها تگلي احجي ويه عمتج امل
وفد يوم عمتي امل مخابره ابوي الي صار ما يتواجد هلگد بالبيت عمتي مخابرته وگايلتله خلي البنات وام امين
يجون عدنا عازمتهم

ابوي شويه اتبدل ما صار على كل شي يعيط لا شويه اهون وقبل نروح ناخذ علي ونروح يوم نبات  والصبح نرجع
وطبعا هذا الشي چان بمثابة سفره للخارج مو البيت عمتي الي يبعد عن بيتنا ساعه

رحنا وهناك اتفاجأت بان عمتي عدها رقم مروه الي خابرتنا ومن سمعت صوتها صرت ابچي بصوت عالي
حسيت بمروه عدها كلام تريد تحچي لكن يمكن وجود امي ما حچت وبس مجرد سلام وانا زينه ولا يظل بالكم
وديري بالج على امي ورجعنا واحنه شويه مرتاحات لان سمعنا صوت مروه وره اسبوع اجت عمتي وهناك
اخذتني على صفحه وسولفت عليه الكلام الي گالته الها مروه وعن تصرفاتهم وياها وهي ما تعرف سالم لكن
عمتي اكدتلي انو هو خوش ولد وحتى احسن من يوسف واهنا انا صرت افكر بين الخوف وبين شلون اتصرف ويه
هذا سالم خصوصا وعرفت هو ما عنده بس اخته الي متزوجه يوسف يعني انا راح اصير احارب من تلث جبهات
سالم واخته وبيت عمه وهذول كلهم يطلبوني ثاار

وصرت اعتني بنفسي وافكر شلون لازم اكسب سالم الجانبي خصوصا والقصه فات عليها اكثر  من سنه وسالم ما
متزوج يعني اگدر احتوي ويمكن بمرور الوقت انسي خطيبته بس اكيد ما اگدر انسي جريمة جمال
انا مو كلش بيضه ولا سمره انا حنطيه ابياض وبشرتي حلوه كلش تشبه بشرة الاطفال يعني شكلي مقبول وانا
بوكتها لا سمينه ولا ضعيفه كلش جسمي ممتلئ بترتيب وعندي خصر وطولي حلو يعني شي على شي انا مقبوله

وصرت افكر شلون ممكن اكسب سالم خصوصا وانا عرفت كل الماساة والظلم الي عايشه بي اختي مروه
صرت اقرا قصص واتابع مسلسلات واشتري شغلات حلوه ومرتبه ومن ابقى وحدي احاول االف افلام ممكن تفيدني
يعني بين قوسين اتخذت من المثل الي يگول (اذا لم تكن ذئبا اكلتك الذئاب ) وما دام الناس انطونه بالباطل بس حتى
يحقنون الدم اذن انا لازم اتعايش واعيش بس اعيش بذكاء وحسن تصرف

لان من اخذو مروه ما چنا نعرف شلون يتصرفون وياها يعني مروه صارت الضحيه الي علمتني شلون
اتصرف ويه الناس
وقرب يوم الزواج ونفس الشي راحت وياي عمتي وامي وانا ردت  تروح حتى اختي زينب اقلها هناك تشوف مروه
زينب الي شبت وصارت تخبل احلانه كلنه

امي ما قبلت وكالت علاوي يضوج ويستاحش غير مره ناخذها وهالمره اجو اخذوني من بيتنا الي كاعدين بي
اجو بالخمسه الصبح مو زفه ورمي لا هالمره اجه الشيخ ابو عادل ويه شيخهم هو وزوجته وابنه وسياره
ثانيه عرفت بعدين هو ابن عم سالم الي بالبصره
مرت شيخهم هي الي طلعتني وياي امي وعمتي وانا لابسه عباية راس وكوستم وابو عادل گال الشيخهم

- اتفضل خويه هاي امانتكم
الشيخ رد علي // مشكور وصلت
ومشينه مرت الشيخ گالت اركبو بهاي السياره واشرت على سيارة محمد ابن عم سالم
وهي راحت ركبت يم زوجها امي وعمتي سلمن على الولد الي رد السلام ابرود
وبالطريق نزلنه للمطعم واتريكنا ع السريع وعمتي جابت ماي بارد وگعدنا ساكتات طريق شطوله واحنه ساكتات
وصلنه همه حاجزين عد صالون الولد وصلنه وگال الام الصالون // هذا تلفوني بس تكملين اتصلي

رحت غسلت وبعدها بلشت بيه ام الصالون صارت تلبخ 😛😛
لكن انا بما انو اعرف شلون اتمكيج فهمتها ما اريد مكياج صارخ وانما اريد مكياج يظهر جمالي ويه البدله الفخمه
الي اصريت ان ااجرها رغم غاليه بس اجرتها من البصره وجبتها وياي
عمتي طلعت وراحت جابت اكل وگلتلي تعالي اكلي بس انا ما قبلت لان ما اشتهي وجبرت امي ان تاكل بعد ما
شاورتها عرفت اتگللها اكلي لان اكيد راح يخلونه بدون عشا

باوعت الهن وانا ابتسم  وگلت // ماما عمه تره جايبه كليجه وياي
هنه ضحكت وعمتي كالت //زين تسوين
من كملت انا شاورت ام الصالون بشغله هي خابرت الولد وگلتله
- البنيه العروس تكول خلي يجي رجلي ياخذني ما طول ما كو زفه
- اي هي تكول لان بدلتها فخمه ويجوز تطلع رجلها او ... المهم انت وصل الزوجها هذا الكلام

امي وعمتي گالن // ليش هچي طلبتي هسه يفشلج وحبايبه يظلن ايقلدن عليج ويتمضحكن
الصدك خفت لا صدك ايفشلني وره نص ساعه اجه العريس ابحده حتى ياخذني الى المجهول هو سلم واول مره
اسمع صوته صدك رجفت بخوف
عمتي بادرته بفرحه //اشلونك خاله مهنه ياربي
وهو رد عليها //اهلا بالحجيه الله يخليج
وباوع الامي وكلها //اشلونج خاله
امي مخنوكه بعبرتها ردت //هلا يمه الله يسلمك
انا مدنگه بس اتمنى اشيل راسي واشوف هذا الي زفوني اله فصليه هو گال //ياالله خلي نمشي

شاورت عمتي الي هزت راسها بعدم الرضا لكن انا مجرد ما طلعت وامي وام الصالون رافعات الذيل مال البدله
شفت عمتي فتحت الباب الوره انا وصلت للباب الامامي وفتحته وسط ذهول العريس وحاولت اركب لان شويه
سيارته عاليه مو نفسها السوده مديت ايدي هو لزم ايدي وانا صعدت وام الصالون تگله
لو جايب للحجيات تكسي يوديهن قبلكم للبيت يجوز يعجبكم تصورون او تفترون هو ما جاوب وامي وعمتي
صعدن وره واحنه ساكتين قبل لانوصل باوع العمتي وگلها

-من تنزل اشمري عليها العبايه
عمتي //اي خاله هاي هي بايدي
وصلنه وانا احس شگد اكو ناس هو كلي //دنگي كلش ابد لاترفعين راسج
انا سويت مثل ما هو طلب وانفتح الباب ودخل السياره للبيت ونزل وامي وعمتي نزلن وبقن واكفات فتحت عمتي
السياره وانا گتلها //خلي يجي يلزم ايدي وانتي ارفعي البدله
عمتي گلتله وهو اجه لزم ايدي ونزلني وعمتي ذبت العبايه عليه وذبحو جوه رجلي خروف

دخلت للصاله وگت العمتي شيلي العبايه وشوفي بس نسوان بالصاله
وشالتها عمتي وكالت ايي بعد ان سلمت هي وامي انا ذبيت البرنص وشفت قنفه فارغه گعدت وفرشت
بدلتي عليها

اجت مره چبيره وحچت // شكو اهنا گاعده خليها تصعد فوك
وصلت يمي مره يجي عمرها اكثر من تلاثين سنه وهي تكلي
-عيني اصعدي فوك للغرفه
باوعتلها وابتسمت وگلت بدلاعه // بس سالم كلي اكعدي بالصاله وبعدين اصعدي
اومأت براسها //ها ما دام هالشكل براحتج

گعدت وانا اباوع للوجوه بين الانبهار وبين الاحتقار بعدها گلت العمتي // اريد اروح الغرفتي
عمتي سالت البنيه // خاله بلا زحمه وين غرفتها
هي ابتسمت وكالت //فووك
وراحت قبلنه وامي وعمتي لازمات البدله وراي

صعدت اول بايتين المره الچبيره كالت //جايباتها معرينه حتى ما متستره عبالهم يكبر بختها
انا درت وجهي عليها وامي وعمتي يعظلي شفه يعني اسكتي حچيت  بدلاعه //لاخاله متوهمه انا متستره ابرنص
وعباية راس بس تعرفين كلكم نسوان ومو عيب اذا خليتكم تشوفون جمالي واناقتي

الكل استغرب وصلت للغرفه وامي وعمتي ايگللي // شسويتي هسه ايضمنها الج
انا اطمنهن بابتسامه وصرت اباوع للغرفه حلوه وفخمه لمن ما اجت نفس المره وگالت بنتر //اتسترن اجه الشيخ يعقد

لبستني عمتي البرنص والعبايه وعقدلي الشيخ  انا وسالم بعد ان طلب مني اردد ورا رابع مره ورددت ورا والشيخ باركلي
وطلعوا وانا نزعت العبايه والبرنص واجه سالم وامي وعمتي طلعن وهنه  يسمن ويصلن ع النبي

انا مدنگه وگاعده ع الچربايه سالم قفل الباب وانا صرت اقرا ايات قرآنيه واطلب من الله ان يوگف وياي
وبنفس الوكت لازم اتصنع القوه وصل يمي ومد ايده اليه وانا انطيته ايدي هو  گومني ورفع الكليل من وجهي شافني
بقى صافن وانا باوعتله ونزلت عيني رفع حنچي وصار يباوعلي ويمرر ايده على خدي واصابعه يلعبن بشفايفي
ما اگلكم ما خايفه لكن انا چنت مقرره امر ولازم اسوي بعد الي عرفته من عمتي من الي سوا يوسف باختي

صار نفسه قريب مني وانا گلبي يدك بقوه هو مد ايده على الكليل وصار يوخر بالماشات ما اعرف ليش هدئت شويه
بعدين گلي //بدلي وانا اروح ابدل بالحمام جاوبته بهدوء وحاولت انعم صوتي واتدلع بكلامي
- ممكن تفتح السحاب
هو رد بتوتر //ايي ممكن ليش لا

وفتحلي السحاب وبقيت واگفه الى ان دخل للحمام  وانا محضره سيت نوم ابيض لبسته ولبست روب وهو طلع
لابس گلبيه بيضه رجاليه يباوعلي ويبتسم اتقرب مني انا درت وجهي رحت يم ميز تواليت وكفت وانا دايره وجهي
اجه يمي حسيته عصبي حاچاني // شبيج شكو
باوعتله وفتحت الميز وطلعت كتاب الله القرآن الكريم وسچينه هو استغرب تصرفي خليت القرآن ع الميز والسجينه
بايدي وانا اكله

- سالم انا اريدك تعتبرني مرتك مو فصليتك وگدامك امرين ياما تحلفلي بكلام الله تحافظ عليه وما تهين كرامتي
او لا هسه گدامك اگطع شرياني واموت
هو رد باستغراب //وتبليني ؟
هزيت راسي وانا ابچي //لا والله ما ابليك اكول انا انتحرت لان ما اريده
- وانتي ما ترديني؟

اهنا انا سويت دراما نزلت يم رجلينه وگتله //شنو ما اريدك صدگني انا اهنا بهاي الغرفه خادمه وحبيبه واخت
وزوجه وحتى جاريه لكن اهنا داخل الغرفه
وبره انت زوجي وتاج راسي وسندي وقوتي الي انسند علي بس الي اريده منك تحفظ كرامتي وما تذلني
لان احنا بالصار ما النه لا ناقه ولاجمل

ما رد عليه بقى ساكت وجر نفس لزمني من ايدي وگومني وحضني حيل وانا بادلته  نفس الشعور
وبعدها گعدني  واهنا انا خفت وارتبكت هو گلي
- اشو خفتي ام لسان

سكتت ما جاوبته بس صرت اتنفس قوي وهو اتقرب مني واخذني وصار زوجي ومن راد يطلع بره الغرفه انا بقيت
حاضنته رغم الالم  وشاورته بدلال // ابقى  يمي سالم انا زوجتك لا تتركني
وحضنته اكثر وخليت خدي على صدره وهو يلعب بشعري گلي // اطلع شويه وانتي غسلي وبدلي غير هاي الملابس
وكفت وراسا دخت هو اجه يمي
-شبيج سماح
-دخت سالم
-اساعدج

هزيت راسي //- اي انا راح ادخل للحمام وانت اوكف يجوز اوگع
-زين خلي ادخل وياج
انا دنكت وانا ابتسم // لا استحي

دخلت للحمام سبحت وطلعت لافه منشف على جسمي  وخاولي  فوك شعري وهذا الشي كله محضرته اشوفه يباوعلي
ويريد ياكلني گعدت ع الكرسي مكابله المرايه وخرت الخاولي وصرت امشط بالفرشه وهو گاعد ع الچربايه يباوعلي
انا وكفت واجيت يمه وگعدت بحضنه وانا اكله //ابقى يمي لا تعوفني

هو حضني وانا نمت وانا العب بصدره بالبدايه ما نمت بس بقيت حاضنته بس حتى ما يطلع من الغرفه لكن بعدين
نمنا لان فزينا الصبح على دك الباب وصوت مره وهي تكول

- سالم شنو ما تكعد
اباوع النفسي بحضنه والمنشف يمي وهو يباوعلي ومبهور ويگلي وهو يبتسم //صباح الخير
-صباح النور
  رد عليه  // خو مشيتي كلامج وما خليتيني اطلع

انا ما جاوبته بس خليت راسي على ايده وغمضت عيوني وهو بقى يلعب بشعري وكلي
- كومي البسي وانا اسبح واطلع
وهو راح للحمام بعد ان گتله // هاي ملابسك معلگتهن بالزاويه
هو باوع شاف دشداشه بيضه وداخليات بيض ابتسم واخذهن ودخل للحمام وانا گعدت لبست دشداشه حمره نص
وضيقه وبيها فتحتين من الجانب طلع واتفاجأ بيه وگلي
- ها ناويه تسجنيني بالغرفه وما تخليني اطلع

هزيت راسي //لو بيدي ايي اسجنك
هو ابتسم ودار انا كتله //مو تتاخر عليه
طلع واسمع الهلاهل واجت امي وعمتي الي مبين عليهن الخوف بس من شافني ارتاحن شويه انا قفلت الباب
وامي كالت // ها يمه اشلونج
انا بابتسامه //زينه يمه كلش زينه
عمتي  //والله انتي سباعيه وما ينخاف عليج الله يهنيج
ابتسمت بوجهها وهي سالتني //بس ليش ما طلع من البارحه

- انا خليته يمي
عمتي باوعت الامي وهي تكلها //مو گتلج سماح سباعيه وما ينخاف عليها (باوعتلي عمتي ) ما شفتي البارحه شصار بيها
- ليش يمه مو گتلج لا تخافيين عليه
امي مسحت دموعها وهي تكول //هم مروه گالت لا تخافيين عليه وتالي مشغلها بحقل مال عجول وحتى ما جابها للعرس

عمتي //مي خالف سهام هسه سماح اجت يمها وان شالله تتعدل  الامور
امي //ما اشوفها تتعدل مو طلع شوفي اذا مو هسه يطردونه ويخلونه نطلع  بلا ريوك
عمتي تهز ايدها وتضحك //واذا طلعونه ناخذ الكليجه السوتها سماح وناكلها

ضحكنا رغم الالم واندك الباب وعمتي راحت فتحته اجت نفس المره الي صعدت تدلينه ع الغرفه وهي تبتسم
وتگول// صباح الخير اتفضلن اتريگن
امي وعمتي اتعجبن واشوف الفرحه بعيونهن ردن السلام امي گالت الها
-خاله اتفضلي تريكي ويانه
-لا خاله الف عافيه سبقتكم

عمتي //فدوه انتي اخت سالم
- لا انا زهره بت عمه انا اصير اخت يوسف الجبيره
امي رادت تحچي بس عمتي لزمت ايدها وكلتها //مشكوره خاله تعبناج
- بالعافيه

وطلعت زهره وعمتي تباوعلي //اثاريج مو هينه ها سهام شگتلج
امي تحچي وهي مقهوره //هو انا شريد غير ينسعدن ويرتاحن
- ياالله خلي نتريك ورانه درب بعيد
- ابقو اليوم
- لا يمه نروح الظرف مو مال واحد يبقى

اتريگن وانا اكلت وياهن شويه رغم جوعانه ومن ردت اشرب چاي اخذت استكان امي شربت منه وره ربع ساعه
اندك الباب وسالم دخل سلم وامي وعمتي باركله
امي //الف مبروك يمه الله يهنيكم
امل //شايفين الف خير الله يسعدكم
هو رد وكال //اليوم تبقون اهنا
امي // لا مو مال ظله نرجع

جاوبتها //ليش ماما ابقواليوم
-لا حبيبتي مناك ابوج واخوج
سالم //زين اتحضرن فد شويه وتروحن ويه زهره وزوجها 
عمتي //لا نطلع ناخذ تكسي ومناك نروح للگراج ما نريد نكلفكم

هز راسه سالم وكال // لا همه رايحين للبصره اي تكلفه ماكو
امي // مشكور يا ابن الاصول ما قصرت
دك نقاله وهو وگف وگال // ياالله تره منتظرينكم

سلمت عليه امي واهنا انا صرت ابچي وهي حاضنتني وتمسد على شعري  //حبيبتي يمه ليش تبچيين هذا زوجج
الله يخلي خوش ولد كافي ياروحي كافي انا والله امنت عليج وارتاحيت من جانبج
امي خنگتها العبره وعمتي گالت// صيري سباعيه وسالم خوش ولد خلي بعيونج
امي اتقربت من سالم وهي تگله //يمه الله يخليك الشبابك تره الحرمه وداعة الخيير وانت ابن اصول هاي
مرتك عرضك وشرفك ان كرمتها وحافظت عليها تره انت محافظ على عرضك وان هنتها هاي مو من شيم الرجال
وصدگني وانا هسه ماشيه بنيه
تره الصار احنه ما النه بي لا ناقه ولا جمل ولو هسه يطوني جمال بايدي اذب علي نفط واحرگه للنذل
والله يا يمه تره هذا النذل گبل ما اياذيكم اذانه والله شاهد على كلامي

امي بچت بحرگه وانا حضنتها وگالت
- والله ياسموحه انا هسه أمنت عليج لان رجلج رجال وعد كلمته بس مقهوره على ذيچ المسكينه
امل //اذكري الله ام امين
امي //لا آله الا الله بكيفك ياربي التستر على سالم وتخلي يلزم التراب يصير بايده ذهب

انا حاولت الطف الموقف اتخوصرت وانا اباوعله والملم بحلگي
- شنو يعني انا تراب وبس لزمني صرت ذهب يمه انا ذهب من گاعي واسالي
هو ابتسم واتقرب من امي وباس راسها
ونزلن وهنه يدعلنه بالخير والسعاده وسالم نزل وياهن وره خمس دقايق صعد وهو يخزرني انا شفته
وبقيت مدنكه اتقرب مني وگلي //راحو اهلج
هزيت راسي //ايي راحو
- يعني هسه بعد محد بقالج

عرفت شنو يريد يحچي خفت بداخلي بس اتصنعت القوه باوعتله ورديت علي
- لا انت وبس الي بقالي لان انت اهلي وناسي
سالم وهو يخزرني //بس هذا الحچي ما يفيدج
- ادري ومحضره ملابسي
رد باستغراب //ياملابس

- شنو يا ملابس مال الشغل بما انو رجل اختي عنده حقل واخذها تشتغل بي فاانا حضرت سروال عريض
وقميص وچراويه
هو ابتسم وگال // المن
- الي لان انت سايق تريله فاانا اكيد اشتغل سكن عندك
هو ضحك حييل وگلي // الله عليج محضره هيج ملابس

هزيت راسي // ايي محضره ومن دخلت سمعت وحده تكول (وعوجت حلگي ) عليمن جايتلها ابدله عرس باچر
حالها حال اختها يوديها يم الحيوان
انا برطمت //الله عليك سالم انت توديني لهناك
قبل لا يرد عليه اندك الباب هو راح وفتحه شفت بنيه يجي عمرها 28 واگفه وهي تكله // سالم شنو ما تنزل
قبل لا يجاوبها هي كالت //خالتي رايدتك

باوعلي وجاوبها // ايي هسه نازل
انا گلت //انتظرني انزل وياك اسلم على خاله
هي جاوبتني باستهزاء // شنو وين نازله بهاي ملابسج
باوعتله هو ما جاوب رديت عليها  // لا ما انزل بهاي الملابس ابدل وانزل ما سمعتيني  كتله انتظرني
دارت وحچت بدون اهتمام //ياالله سالم خالتي تريدك

-اي جاي
هي راحت وما سدت الباب انا رحت سديته وسالته //منو هاي
- اختي ضحى
- هيه هيج دووم
باوعلي //شنو يعني ؟
- يعني دووم تخنزر وما تسلم
سالم باوعلي //سماح شنو هالكلام
- لا ما اقصد بس هي شفتها ما سلمت هاا عرفت هي الي متزوجه يوسف
هز راسه وكال //اي هيه

طلعت دشداشه خليجيه بيها تطريز وعريضه وردانها تلث ترباع ولبستها وخليت ريحه ومسحت المكياج وخليت
شال على شعري ونزلنه انا ويا ام يوسف بس شافته هزت ايدها// شنو ما تنزل اله وياك المدام
انا رحت عليها //اشلونج خاله
وردت اباوسها هي حركت ايدها كانما تدفعني انا باوعت السالم ورجعت ابتسمت
ام يوسف گالت //شنو ناسي اكو زلم بالديوان وكل شويه يسالون عنك

سالم //خاله منو موجود هو يوسف وبسام ومحمد
-اي واذا شنو يعني ما تروح تگعد يمهم
جاوبته // رووح حبيبي انا هذا بيتي
ام يوسف حچت بونه وكانما تشاورني //بيتها ام بيت

راح سالم طلع للديوانيه واهنا هنه خزرني عبالك ريا وسكينه انا وگفت  وكلت
- - من رخصتچن ارووح اناام لان البارحه سلومتي ما خلاني انام
رحت صعدت الدرج وضحى حچت بعصبيه // اوگفي وين رايحه
ما درت وجهي عليها اتقربت مني انا راسا شگيت دشداشتي من جهة ايدي وخربطت شعري وصرت اصيح
بصوت عالي //الحكلي سالم الحگلي سالم تعال الحگلي

وعضيت ايدي وعوجت واحد من سواراتي هنه انذهلن ام يوسف بمكانها وضحى يمي اجه سالم وانا ابجي
- الحگلي سالم كتلني شوف هاي عضتني وخالتك مشعت شعري
صرت حاضنته واكله //يكللي ليش تكليله حبيبي انتي قحط فصليه وشنو تكولين بيتي موتني اااخ راس راسي
انغمى عليه شالني واسمعهن ايگلله //چذابه هي شگت ثوبها وعضت ايدها

ضحى //والله سالم انا ما سويت شي
سالم بعصبيه //كافي ضحى شحال لو ما شفتج وانتي (باوع على ام يوسف ) انتي خاله سمعتج باذني
شنو الفصليه فصليتي محد اله شغل بيها
ام يوسف بعصبيه // جاي اگلك تچذب

اخذني  للغرفه وطلع ماي من الثلاجه وشمر عليه نقط انا جريت نفس باوعت وهو يگلي
- لا تخافيين انا يمج
هالمره بچييت من صدك على مروه وعلى امي وحتى على نفسي يعني لو حيله وچذب لو ماكو ننسحك بالرجلين
هو بقى يمي وجابلي ماي شربني وسالني //شنو صار

جاوبته بتعب //ما صار شي انت رحت يم الرياجيل وهنه لزمني اثنينهن وهنه يكولن
-  شنو انتي واختج عبالج نفوتها الج مناك ذيج اخذت رجلي وهسه انتي اخذتي اخوي وصارت تضرب بيه
وخالتك جرتني من ثوبي وشگته واختتك عضتني گدرت افلت وصرت اصرخ
(حضنته ) عفيه سالم لا تعوفني ابحدي اخاف هذني ايموتني

هو طبطب على ظهري //لا تخافيين
- شلون ما اخاف هاي صباحية عرسي يعني. لان فصليه قابل بايدي
- كافي لا تبچيين
- سالم وديني يم مروه هناك حالي من حالها
- اشش لا تحچيين شي كافي حبيبتي
باوعتله //شنو شگلت

- ما كلت شي
خليت راسي بصدره //لا كلت يعني لان فصليه ما تعيدها خلي انا اگلك انت حبيبي وروحي وكل شي
رن تلفونه جاوب
-ها يوسف
- زين نازل
جاوبته بخوف //وين وين رايح وعايفني
- لا تخافيين هذا يوسف بالصاله

- سالم لاتروح ذني يجن ويهجمن عليه
- اگلج انا بالصاله لا تخافيين
جاوبته //زين طلعلي دشداشه البسها
-وين
- اول خانه بالكنتور

طلعلي دشداشه بيجي  ردت البسها وبس رفعت ايدي گلت //ااخ اخ
هو گلي //ها شكو
- ايدي ايدي ما اعرف شبيها ما اكدر ارفعها
- على كيفج باالله خلي اشوفها
انا ابچي // اي هي لوتها يمكن انكسرت مو
هز راسه //لا ما انكسرت

صرت اگول //ااه يايمه الحگيلي راح اموت اااه يمه
هو حضني وكلي //كافي لا تبچيين خلي البسج الدشداشه
وفعلا نزعني المشگوگه ولبسني الثانيه وانا اگول على كيفك سالم على كيفك
من لبست اتمددت ع الجربايه هو گلي //راح انزل انتي ارتاحي
لزمت ايده //بس لا تتاخر عليه

باوعلي وابتسم ونزل وانا ورا حسيت بي نزل وطلعت اتسحبت واسمع يوسف يحجي
:: يمه كل واحد مسؤول عن نفسه ما يصير تضربين البنيه
ام يوسف //بيش تريدني احلف ما اجيت صوبها
::والخاتون هم ما اجت صوبها
ضحى //انا اصلا ما لزمتها
سالم // انا شفتج لازمتها

ضحى //ايي ردت اسكتها لان كامت تصيح
- منين تصيح مو دايرات عليها وطايحات بيها ضرب وعض
ضحى //لا سالم هي عضت روحها ومستعده احلف وهي هم خليها تحلف
يوسف بنتر :: بسج كافي العصابه مو مثلچن

ام يوسف بفارغ صبر //هذا هو كتلناها وننعل  والديها ونطيح حظها شعدكم تعالو طگوني
همه سكتو يوسف گال :: ياالله يمه خلي نمشي
ام يوسف وگفت //ناوشيني عباتي وانتي امشي شعدج باقيه اهنا
يوسف ما حجى وسالم ساكت وهنه طلعن يوسف ::اعذرني سالم واحسبها عليه

سالم // - لا يوسف بس ما چنت متوقع هذا الشي يصير والبنيه متاذيه
يوسف ::ها ناخذها للمستشفى
- اشوفها بعد شوي اذا ما صارت زينه اخذها
:: ما تشوف شر انا راح اخذ محمد ابن عمي وياي وباچر مناك ويروح

- ايي بكيفك
:: فيمان الله ومن تحتاج شي بس خابرني
- تسلم الله وياك
وطلع سالم وانا دخلت اتمددت حسيت بسالم اجه وگعد بطرف الچربايه وهو يسالني //ها شلون صرتي
جاوبته //سالم ايدي ماذيتني حييل
-امشي اخذج للطبيب
-لا بس جيبلي كبسول من الصيدليه
-ايي بعد شويه واروح

انا اتغطيت ودرت وجهي واتعمدت اشهك بالبجي هو دارني  علي وكلي //كافي تبچيين
صرت ابچي واحچي كلام متقطع //سالم ليش هيج يعاملوني ومروه مروه اختي هم هيج عاملوها
هو سكت واتقرب عليه وگلي //شنو نكضيها بس سوالف تعالي خلي ننسى الي صار ونعيش السعاده
جاوبته //وتنسى انا فصليه
- واحلى فصليه

الظهر سبح وراح يجيب غدا من المطعم وبقينا اكثر من اسبوع وهو يجيبلي اكل من المطعم والصبح يجيب ريوك
وانا بس اسوي الچاي وما طلعني الاي مكان وهو. بس يجي علي يوسف يگعد بالديوان ويا اما علاقتنا الزوجيه
من احسن ما يكون چنت كلش سعيده لكن لان ما شفت اختي ولا عرفت اخبارها چانت هاي
اكبر غصه بحياتي اجه سالم وجايب عشا وگلي باجر العصر عندي حمل ولازم اروح للبصره

اهنا ان كتله /وانا سالم
باوعلي //انتي شنو ؟
- وين ابقى لاتگلي اهنا وبحدي
-ليش شعليج سماح ؟
- شعليه نسيت ايدي لهسه ما احركها وجاي ناكل من المطعم
-والمعنى
-اخاف من خالتك  واختك لان الي سونه مو قليل

باوعلي //والحل شنو ؟
- لو اروح وياك للبصره لو تشوفلي صرفه
سالم احس بي صار عصبي //تعوفين البيت وترحين للبصره هذا شلون حچي
شفته ضاج عاد انا رحت گعدت بحضنه وخليت اديه وره رگبته وگتله
-حبيبي لاتزعل عليه بس الله عليك انت اتامن انا ابقى اهنا ابحدي

هو ما رد عليه وبقى يدخن انا من يطلع الدخان من حلگه  افتح حلگي هو ابتسم وگلي// شتسوين
- شسوي اراضييك لان زعلت عليه
هز راسه // لا ما زعلت
- احلف
-بدون ما احلف ما زعلت

درت التلفزيون على اغنيه حلوه وصرت ارگص واتمايله وهو يباوعلي ويبتسم وانا اشوف عيونه تريد تاكلني
وكف واجه لزم ايدي وكلي //وبعد
جاوبته //احبك واموت عليك
-وانا هم
-زين من تروح اخذني يم مروه

هو اتعجب ما خليته يحچي لان حضنته وهو بادلني الحب وبعدها كلي
- راح اخابر يوسف واستاذنه لان تعرفين يجوز ما يقبل
هزيت راسي وگتله //اذا ما قبل يوسف تاخذني للبصره
هو بضحك //اي اشغلج سكن ؟
وطلع وگف اباب الغرفه وخابر يوسف ورجع كلي //باجر قبل لا اروح اخذج يم اختج
///////////////////////////////////////////يتبع
حبايبي اعذروني يمكن اتاخر عليكم بالنشر
اذا عجبكم البارت صوتوا