رواية بعد فوات الأوان الفصل التاسع عشر 19 - بقلم آنين الليل

السلام عليكم
الحمد لله صرت شويه احسن من الاصابه وهذا الشي بسبب دعائكم الي ان شاء الله
بعد اسبوعين اعيد التحليل وان شاء الله خير
الله يكافيكم شر هذا الوباء وشر جميع الامراض ويارب يشافي كل مريض

كنتم لي  خير الاصحاب والاخوات  انتم عائلتي العزيزه المجهوله التي استمد منها فرحتي ونجاحي
دائما سؤالكم ودعائكم يهون عليه وانا اقرأ رسائلكم ع الخاص

احدى العزيزات ابدا ما فارقتني وكثيرة السؤال والدعاء وهذا الشي فرحني كثيرا رغم ما احس فيه من آلم
شكرا لكل من دعا ولكل من سأل ولكل من كتب جمله كانت السبب ان اقول آميين 🤲🤲

اخص بالشكر العزيزه الى قلبي  ام معتز الي ابدا ما فارقتني ودائما تسأل عني وقلبها نابض بالدعاء
والعزيزه ايمان ونبضات مهدويه والكاتبه حوور وغيرهم كثيير
شكرا لكم وكل الامتنان والاحترام والتقدير لشخصكم الكريم
لازلت دائما بحاجة لدعائكم
احبكم كثييرا
اختكم #آنيين الليل #
/////////❤️❤️❤️/////////

يوسف
بيومها رجعنا انا وامي وضحى الي ما صدگت امي تگلها بسرعه تعالي هي هم جابت ملابسها واجت وسط
سكوت سالم
الي حتى ما گال خلي يبقن يعني انطاني رساله بعد ما اريدهن طلعت قبلهن وشفت محمد وگتله
::الحگني للبيت انت وبسام

وركبت بالسياره وامي وضحى اجن ركبن وياي وتمينا ساكتين دخلنه للبيت وگعدت بالصاله وانا ادخن امي
كسرت السكوت وهي تحچي على ضحى وتگلها //كافي لا تبچيين
ضحى //خاله انتي شفتيها انا هم اتقربت يمها
امي هزت راسها // لا ابد ولا وصلتي يمها بس هي الله اليستر منها انوب سالم شلون دارت عقله

صارت ضحى تبچي بصوت انا اتقربت يمهن وخليت اصبعي على حلكي :: كافي ما اسمع الج نفس خوش تمثيليه
هي رادت تحچي انا سكتتها بعصبيه ::مو گلت ما اسمعلج نفس
امي //على كيفك يوسف تره ضحى ما مسويه شي
هزيت راسي وگلت ::ايي ادري ابد كل شي ما مسويه
امي //هاي شبيك شو  انت وسالم انگلبتو ا هالگلبه جاي اگلگم ما وصلنالها

جريت نفس ::هسه مو وكت الحچي محمد راح يجي كلام زايد ناقص ما اسمع (اتقربت يم ضحى )
:: وانتي تبقيين يم خالتج مفهوم ما اريد اشوفج فووك
اهنا ضحى ردت //لا ما مفهوم واذا ما تريدني طلگني
لزمتها من چتفها :: راح يصير بس مو هسه سالم عريس وعيب من عنده اطلگج كل شي بوكته حلو

امي //اگلك شبيك ويه البنيه ...
قاطعتها وانا امشي للدرج ::راح ابدل على ما يجي محمد
وصعدت فووك دخلت  سبحت وبدلت واندك باب الغرفه انا فتحته وچان بنيتي انتقم من ضحى لگيتها امي
- ها يوسف ادخل لو هم تطردني
::اتفضلي

دخلت امي وگعدت وهي تگول // يمه يوسف بت عمك وغلطت سامحها
:: انا ما مسويلها شي تكعد باحترامها وانتي لا تكبرين راسها
هزت راسها //هذا هو مثل ما تريد

واجه محمد وبيومها بقينا انا ويا نسولف وبعدين نمت بالديوان والصبح اتريك وطلع البغداد عنده شغل وگلي
- امشي وياي ما نتاخر نرجع بنفس اليوم
شفتها خوش فكره ابعد عن التوتر وصلنه الصبح واتريگنا ورحنا گضينا شغلة محمد وبعدها طلعنا نزور
الكاظميه المقدسه
وزرنا بعدها افترينا باسواقها واشتريت ملابس مال طفل عجبني وانا اتخايل شلون راح يكون شكله واشتريت
بدلة حوامل
ما جان بنيتي اشتري شي لكن من شفت الملابس ما اعرف حسيت لازم اشتريهن لان هذا الي شايلته مروه يخصني

ورجعنا بالليل شويه غيرت جو ونفسيتي ارتاحت صعدت وضميت الملابس بغرفة مروه ما ردت تشوفهن ضحى
ونزلت بتت بالديوان والصبح محمد راح للبصره وانا رحت  للدوام وره الظهر رجعت اتغديت ابحدي وصعدت
نمت بالغرفه والعصر نزلت ضحى جابتلي الچاي وهي ساكته خلته گدامي وراحت الغرفة امي گعدت بيها
انا صرت العصر اطلع للسوك لو افتر بسيارتي ما اروح للحقل ما اريد اشوف نظرة العتب لان ما خليتها تجي
تشوف اختها

چنت اخابر سالم واسأله خاف محتاج شي بس ما اروح واشوفه من يمي خجلان من الي سوته امي واخته
تقريبا خامس يوم سالم اتصل عليه وهو يگلي //الو اشلونك يوسف
::هلا بالمعرس اشلونك
الحمد لله زين
::دووم يارب
اگلك يوسف
::گول

  احم اريد اودي سماح يم اختها
بصراحه اتفاجأت وگتله ::ها شعجب
سالم //شنو شعجب تره هاي اختها
::اعرف اعرف بس ليش اقصد بعدكم عراريس
- يوسف باچر عندي شغل ولازم اسافر للبصره ويجوز اتاخر وما اگدر اخلي سماح ابحدها ،

::زين جيبها ...ما كملت
سالم //وين اجيبها مو شفت شنو سوون بيها
انا بضحك ::والله انت ما ادري شسوت بيك
سالم بفراغ صبر // ياخي كل شي ما سوت هسه شگلت
:: شگول يعني سلووم  اخذها وديها يم اختها شنو يعني اگلك لا تاخذها

- خو ما نزاحمكً
جاوبته ::اعرف قصدك وما الي خلك
سالم //صاير بانزين عمي ما نحچي
::هههههههه لا انت يتراوالك چي راح تفارك انت الي اعصابك بانزين
- اي والله ياخي الي يتعود ع المره صعب يفارگها
:: خوش مروضتك شنو حتى اسبوع ما صارلك

- لا بس تعرف مااگدر اخليها
:: اي اعرف
- ياالله فيمان الله وشكرا جزيلا
:: صدك چذب الحقل والبي تحت امرك سلوم الله وياك

ثاني يوم بالليل اتصلت ابشير الي گلي سالم اجه هو وزوجته وتركها وراح
فهمت بشير يدز امه ويشوف اذا يحتاجون شي ايجيبه وبقيت هاي الايام ما رحت رغم انا حتى
من اروح للحقل ما صرت امر وهذا الشي ما اعرف ليش صار وياي

ضحى اكثر من مره اجت وطاحت عليه واتسامحت مني لكن انا ما سامحتها بعدين جابت امي وهي تبجي
وامي صارت تحچي نفس الديباجه  //وهاي بت عمك ويتيمه وما الها احد وسوت هالشكل الخاطرك تحبك وسامحها
واذا ما تسامحها راح اغضب عليك

وصالحتني بس انا مو نفس قبل اتذكر شلون ضحى چذبت عليه ومن سمعت صوت مرت سالم وهي  تستنجد
ما اعرف حسيت بيها ثگيله على گلبي لكن مضطر اسكت لان هي زوجتي وما اريدها تروح البيت سالم الي
حسيت بي هو ماخذ بخاطره او ما يريدها

ضحى لا هي ولا امي سألن عن حمل مروه او عن سالم وزوجته وكان كل هم ضحى ان ترضيني اما امي فدائما
اشوفها تبچي على ازهار
وانا ما احب لا اگعد يم ضحى ولا اسمع كلام امي

وره خمس تيام خابرني سالم كال انا بالطريق ومناك يروح يجيب زوجته احس بكلام سالم  اشتياق ولهفه وحتى فرح
احجي ويه نفسي :: صدك شي ايعجب رغم اتزوجت ضحى وحتى مروه ما حسيت بشي اتجاهن
بس يمكن سالم لان ما متزوج او لان هو اكبر منها او يجوز لان حلوه ايي يجوز

////////////////////////////////////////////////

مروه
صرت يوميه اطلع الابقار اوديهن للارض الي بدت تيبس تلقائيا بسبب حرارة الجووصارت  الشمس
اتاذي وجهي وانا احس يوم بعد يوم جاي اثگل ام بشير فهمتني لازم اخلي شالي على وجهي اكثر الوكت
حتى الشمس ما تضربه ويتصبغ

وفعلا صرت اخلي الشال على وجهي واطلع وارجع قبل المغرب وصرت يوميه اجيب وياي حطب بس حطب قليل
لان انا بطبيعة الحال ابحدي ومو دووم اطبخ اكثر اعتمادي صار على ام بشير تجيبلي خبزات وعشا
واكثر اكلي فواكه وخضروات

وره ما اجه يوسف وسالم واجتني ام بشير بلغتني انو سالم راح يتزوج هالاسبوع بلحظتها چنت اريد
ام بشير بس تطلع حتى اخابر عمتي  رغم انو هي تعرف انا عندي جهاز موبايل لكن ما احب احچي
او ادلي على مكانه
چنت حذره بكل شي من راحت ام بشير رحت طلعته للجهاز واتصلت بعمتي الي ردت

-هلا عمه هلا بيج اشلونج
=هلا عمه صدك  سماح راح ياخذوها
امل //اي عمه صدك شيخهم خابر ابو عادل وابو عادل بلغ ابوج
صرت ابجي ما اتحملت =يعني ما صار حل ما حاولوا ياثرون عليهم

امل // عمه الشهاده ال الله ابوج ما قصر ويا عمج جمعه يرحون ويتوسلون بس الولد قافل حتى يوسف رجلج
گللهم بكييف سالم اذا يريد ايفكها بكيفه
صرت اشهك بالبچي =عمه انتي تعرفين بيه شلون يوسف معيشني
امل //وداعتج كل شي اعرف لا تبجيين بس بعد شنسوي بلكي يطلع زين
=منين زين اذا انا احارب على جبهه وحده سماح تحارب على جبهتين سالم مو بس بت عمه الماتت وخطيبته
واخو مرت يوسف

امل //ما بيدنا شي نسوي انا فهمتها وسماح مثلج سباعيه المهم انتي ديري بالج على نفسج وبلكي يجيبونج
للعرس ونشوفج
=وامي
عمتي جرت حسره //امج الله يعينها بس دموع منا انتي ما ترحين من بالها انوب هسه اختج

عرفت انو سماح راح تجي وراح تعيش نفس معاناتي اذا مو اكثر خصوصا ومرت يوسف اخت الولد
بقيت افكر شلون ممكن سماح تعيش ويا سالم واكيد ضحى ما راح تعوفهم بحالهم

صارت عيني يوميه تربي ع الطريق بلكي يجي يوسف ويكلي امشي للعرس شوفي امج واختج لكن ابد هو
حتى ما وصل للحقل هاي اكثر من تلث تيام
بالليل اجت عليه ام بشير وهي تگلي //بشير راح اليوم يبات بالولايه
= خير خو ما كو شي
-راح اخذ الگصاب والطباخ العرس ابن عم يوسف باچر

هزيت راسي وبلا اراده صارن دموعي ينزلن تلقائيا رغم اعرف سماح عرسها باچر  بس مقهوره لان يوسف
ما اجه حتى ياخذني اشوف امي گلت يجوز باچر الصبح يجي وياخذني

احچي ويه نفسي وانا اعرف هاي مجرد امنيه وصار العصر ومحد اجه بوكتها حقدت على يوسف لان
هذا الي يسوي اذلال ودوس للكرامه بيومها ما نمت صرت ابچي واخاف  اتصل لان ما اعرف الوضع شنو
ثاني يوم گعدت من الصبح وكالعاده اخذت الابقار ورحت بيهن وانا القهر والهضم ماكلني

وبقيت هذا برنامجي ويوسف صار حتى للحقل ما يجي وهذا الشي يريحني لان من يجي فوك تعبي يريد اسويله اكل
وخدمه ونظراته الي تخوفني

بيوم راجعه قريب المغرب واشوف سياره واگفه ويمها رجال ومره اباوع هذا مو يرسف لان هذا مربوع
وشويه اقصر
بس منو هاي اعرف طولها  صار گلبي يدك ودي اركض اشوف منو هاي الي مجرد ما اتقربت هدت ايد الرجال
واجتني تركض چانت  سماح اختي انا بس شفتها رجفت بخوف وهي حاضنتني وانا عبالك ميته بدون شعور گلت
= شنو جابوج اهنا مثلي
جان كلبي يدك لكن هي هدئتني وكالت //حبيبتي مروه جاي اشوفج

زوجها نزل مسواك وسلم عليه وراح بعد ان اتشكرته وصارت سماح تسولفلي على بطولاتها ويه
ضحى وام يوسف
اسمع وابتسم بس بنفس الوكت خايفه على اختي الي اصرت تنام بحضني ورغم تعبي خلتني اسولف
الها شنو سووا بيه يوسف واتوقفت وصارت نفسي تلعب ورحت اتقيأت وهاي اول مره لان اتذكرت لمن نام
بالغرفه هو وضحى وتركني بره بالبرد

لاتكولون عني ضعيفه لا انا قويه لكن مشكلتي احب اخواني امين وصادق واخاف عليهم ويوسف لو ما
ماخذني يكتل واحد منهم وبحسب الاعراف العشائريه ما علي اي حق لذلك انا صبرت ولان وحيده ويوسف
حرمني  من كل شي انا حاربته بسكوتي وبرودي وعدم مبالاتي بوجوده

سماح من عرفت الي سووا يوسف وضحى گالت //مستحيل تغفريلهم
هزيت راسي //اي ما اغفر الهم
سماح //مروه سمعت امين يكول مروه اذا تجيب ولد مخيره تنطي الهم وترجع لو تبقى
= ايي حتى عمتي گلتلي
سماح // وانتي مروه شتكولين
باوعت الها = انا ؟
اي انتي شتكولين

اتحسرت وامرر ايدي على بطني = انا سموحه انسانه متلاشيه ما افكر مجرد بشر يمشي ع الگاع
سماح //اقصد الطفل من يصير
= بعدني ما مفكره بشي
سماح //شنو ما مفكره شنو هاي عيشه الي انتي عايشتها غرفه بيها بس فراش ملابس بعلاگه موزره وتسرحين
لا ثلاجه لا تلفزيون الى متى تصبرين

= اي اصبر الخاطر امي وامين اصبر
سماح رادت تغير الموضوع // صدك شفتي بالسونار
هزيت راسي :: لا ما عرفت لان من رحت ما مبين بعده بس الهسه ما يتحرك
- خاف بي شي
:: انا هم گلت هيج بس ام بشير كالت الولد خانس بالسادس يتحرك

خلت سماح راسها على بطني وهي تگول
حبيب خاله لا تاذي ماما صير حباب واطلع سبع على خالك امين
= ههههههه

ونمنا والصبح طلعت بالابقار والظهر اجاني بهاء ابن بشير وهو جايبلي غدا وكال //خاله هذا الاكل دزته الج اختج
وبقت سماح اربع تيام الليل كله گاعدات نسولف واخابر بعمتي وحتى امي هم اجت  البيت عمتي وخابرناها
والصبح اروح اجي الكاها
مسويه العشا وبس ادخل للحمام تكلي عوفي الملابس انا اغسلهن يوم خامس العصر اجتني هي وسالم وسلمت
عليه وانطتني مفتاح الغرفه وهي تكلي باستهزاء

-هاج حبيبتي هذا مفتاح الجنه انا رايحه سالم اجه من البصره بوجهه لهنا
سالم باوع الها و سلم عليه // اشلونج مروه
جاوبته وانا مدنگه //الحمد لله
سأل سماح //ها سموحه اتونستي

باوعتله وهي عاكفه حواجبها بدون ما تجاوب وحضنتني وباوستني انا عبالك بعد ما اشوفها صرت
اشهگ بحيث سالم راح للسياره وهي تگلي // المفروض انا ابجي لان انا الزغيره هاي شبيچ
= خاف بعد ما اشوفج ما يخليج تجين
ابتسمت بوجهي //تردين ابقى يمج هسه ادك رجل بالكاع وابقى
= لا لا روحي وديري بالج على نفسج

هي ابتسمت //وانتي هم ديري بالچ على نفسج وعلى ابو الشباب (ومسدت على بطني )
جاوبتها = روحي سموحه عيب من الولد
هي تباوع جهة السياره // اي والله عيب من كثر اشتياقه بوجهه لهنا ما مر بالبيت ياالله مع السلامه
حضنتها = الله وياج

وراحت صعدت بالسياره اعرف بيها بچت بس ابتسمت واشرتلي بايدها وانا هم اشرتلها
عبالك صارتلي حجه روحت سماح گعدت بالگاع وصرت ابچي والعن بجمال العصر رجعت ودخلت للغرفه
اخذت دشداشه ورحت اسبح غسلت وطلعت غسلت ملابسي العليه ورحت اريد اشوف شنو اكل فتحت الجدريه
لكيت بيها حلويات وكعك ويمها علاكة فواكه عرفت سالم جايبهن

رحت صليت وخدرت چاي واكلت كعك وراها غسلت حلكي واتمددت على فراشي وانا اتحسس بطني واحچي

=يعني احمل واتعب واجوع وتالي ع الحاضر المستريح انطيك واخذ حريتي يعني انت تبقى اسير
حتى انا اروح يم اهلي اشوفهم
= بس انا ياماما تعبت وما الي قدره اتحمل لان ابوك ما حاسبني بشر حاسبني حيوانه
= زين واذا بقيت على مودك خاف اياذونك لان انت ابني
= وشنو اذا عفتك الهم ما راح اياذونك
هزيت راسي = لا ما اخليهم اياذونك لان انا اتحملت هذا الي يصير الخاطر اخواني وهمه شباب وكبار
شنو ما اتحمل الخاطر ابني وهو ما اله اي ذنب. ذنبه لان جمال ابن عمي وازهار اخت يوسف

حسيت رجفه بصفحة بطني وكأنما سمع كلامي وهاي چانت اول مره احس بحركته شعور بين الحب والحزن
طاحن دموعي وانا اگول
= المفروض هسه ابوك يمي ومن اتحركت هو يفرح مثل ما انا فرحت (اتحسرت ) الله كريم

نمت والصبح گعدت صليت واخذت وياي كعك وحلويات ورحت شفت ام بشير صبحتها بالخير هي ردت عليه
صباح النور هلا يمه
= هلا بيج خاله اكلج ام بشير
- ها يمه گولي
= اگول العشب تقريبا يبس والشمس صارت كلش حاره
هزت راسها //ايي ادري بس لازم يطلعن منا وهيج نصير ندور الهن على گاع معلف

= شلون يعني
ام بشير //يشوفون گاع محصوده لو نعلفهن مثل العجول
= اذا تنطوهن علف ليش يطلعن
لازم يايمه
انا بقلة صبر =خاله والله تعبت ومليت
اتحسرت //ادري خاله بس بعد شتسوين بلكي من ترحين للطبيبه تگليلها
= منو يگول تقبل
ام بشير //گليلها جاي اتعب

هزيت راسي ورحت للحقل وصدك الشمس قويه وبدا الجو يزيد بحرارته والغرفه بيها بس مروحه يعني لا
مبرده ولا مكيف بقيت افكر = معقوله بالصيف ابقى بس ع المروحه
بقيت ست تيام وره روحت سماح وانا يوميه اطلع وارجع العصر ما الي خلك روحي الظهر گاعده بسد الشجره
وسمعت صوت سياره ما باوعت ولا درت هو وصل يمي خليت اديه بالگاع وگفت هو اجه يمي وكلي

::اشلونج مروه
يمكن هاي اول مره يحاچيني باسمي
انا بدون ما اباوعله = الحمد لله زينه
:: وهذني شلونهن
ابتسمت على سؤاله=  زينات بس العشب بدا ايبس
:: اي اعرف بشير گلي ولازم منا وهيج نبدي موسم العلف الشمس حاره
= اي مو تشوفها

هو سكت ما جاوبني راح للسياره انا باوعتله وحجيت
= يوسف لازم اروح للطبيبه هاي الايام موعدها
   دار عليه ::يمته ترحين
= بكيفك
:: خلي اشوف يجوز باجر احجز واجي اخذج

اتعجبت من كمية الهدوء الي يحاجيني بيها هو راح يم بشير  وانا بقيت ثاني يوم الظهر اجتني ام بشير وهي تكلي
مروه يوسف خابر كال ترجع تحضر نفسها ياخذج للطبيب
هي استردفت // انتي روحي انا راح ابقى بمكانج بين ما يجي عامل ابو عيسى هسه بشير يخابره
باوعتلها وسالتها = خاله ما ترحين وياي
:: لا روحي ابحدج انتي ورجلج

رحت للغرفه وانا تعبانه گعدت واندك الباب فتحته بهاء بايده علاگه وهو يگلي
ماما ودتها
اباوع اله شگد نظيف وكلامه حلو اخذتها منه وگتله = سلملي عليها
راح وانا فتحتها لگيت جدريه زغيره بيها تمن وفوكها مرگه بيها لحم وبتيته وخبزه

طلعته وصرت اكل حتى ما صبيته بصحن بعدها گعدت شويه احس بروحي مثل الفحطانه رحت غسلت واتوضيت
وصليت وشربت جاي ورحت سبحت ولبست دشداشه جابتها الي سماح من اجتني هي متعمده جايبتها مال حوامل
ضحكت وكلت = حاسبه الكل شي عفيه عليج

اجه دك باب الغرفه فتحتله رغم عنده مفتاح بس ما اعرف دخل وانا سلمت = الله يساعدك
::هلا يابه
گعد على الفراش رحت جبتله ماي بگلاص من الترمز هو اخذه راد يشربه بس مجرد ظاگه رجعه عرفت لان حار
(انا ام بشير يوميه من اطلع تخليلي ثلجه بالدبه وبالليل هم تجيبلي ثلجه اخليها بالترمز )
رفعت شعري ولبست شالي وهو بس يباوع الي انتبه كلي ::كملتي
= اي
::ياالله خلي نمشي

ركبت يمه بالصدر وساق السياره مشينه مسافه سالني
::ارتاحيتي من شفتي اختج
بقيت ساكته رجع سالني ::ليش ما تجاوبين شنو ما سمعتيني
= اكو واحد يشوف اخو لو اخته ما يفرح ويرتاح
جر نفس ::ايي ما شاء الله مبين على وجهج

عرفت يريد يحچي سكتت ودرت وجهي ع الجامه وصلنه للطبيبه گعدنا شويه ودخلت سلمت عليها هي
بالبدايه ما عرفتني بعدين من حچيت الها گالت //ما عرفتج لان شويه مستعدله
وصارت تسالني وانا اسولف الها فحصتني وكتبتلي سونار وتحليل دم

طلعت شفته گاعد على صفحه يم جماعه من شافني وگف انا  انطيته الاوراق  وفات گدامي للمختبر اخذو من
عندي دم حاچه ابو المختبر ::رايحين للسونار ونرجع ناخذ التحليل

رحنه لگينه قبلنه اثنين وانا الثالثه وهو اجا شكم اتصال ويطلع بره يجاوب بعدها دخلت ع الطبيبه الي كانت وياها
مساعده اخذتلي السونار وكلتلي الولد زين ونبضاته زينه وكل امورج تمام
اخذت السونار وانا ساكته ومن سالني شنو كلتلج جاوبته =گالت اخذي السونار للطبيبه وهي تگلج

رجعنا للعياده وراح للمختبر جاب التحليل وانطا الي دخلتني السكرتيره ويه مجموعه عدهن دوا اخذت السونار
وباوعتلي وكالت //صيحي زوجج
رحت يمه شفته واگف يدخن اتقربت منه وبعيونه تساؤل =الدكتوره تريدك
عكف حواجبه وكلي ::ليش
رفعت اچتافي = ما اعرف بس فتحت الورقه وشافت التحليل كالت صيحي زوجج

حك لحيته وهز راسه والسكرتيره كالت //تعالي ادخلي
ودخلنه سلم ::السلام عليكم
عليكم السلام
هي اشرتله بايدها اگعد ع الكرسي گعد وانا كعدت گباله هي تباوع بورقة السونار لملمت حلگها وعضتها شفتها
بحركات سريعه وباوعتله وكالت وهي تهز براسها
بعده فقر الدم عدها (سالتني ) تفحطين حييل من تمشين
هزيت راسي ب(اي)
سهله ان شالله (باوعت اليوسف الي چان يحرك رجله ) زوجتك تعبانه بسبب فقر الدم

جاوبها ::دكتوره انا اجيبلها اكل وهاي هي اساليها
- جاي تتعب بالشغل مو (باوعتلي )
انا سكتت هي ردت //اسمعني استاذ فقر الدم مو بس بسبب قلة الاكل لا يجي نتيجة التعب والضغط النفسي
والحمل انا چان كتبت الها على علاجات لكن المشكله هي حامل وكثر العلاج اياذي الطفل
لذلك انا راح اكتب علاج بسيط هو شويه غالي بس اريد ويه العلاج راحه تامه تتحركين حركه بسيطه والاهتمام بالاكل
لازم تاكلين مروه(باوعتله )  وانت لازم تجبرها ع الاكل اشوفك ما شاء الله ما مقصر وياها فااذا تريد يشرف ولي
العهد بدون مشاكل لازم تنتبه الصحتها خلال هاي التلث تشهر

هو من سمع كلمةًولي العهد فتح عيونه الدكتوره گلتله //شبيك صافن
هو جاوبها بارتباك ::دكتوره الطفل ولد
ضحكت وهزت راسها // اي ولد بس مثل ما گتلك لازم تداري وتداري امه وانتي كل ما اتعبين لازم تراجعيني
(باوعتله ) مو تتوانون تره مو زين ع الطفل

لاول مره يباوعلي ولمعه بعيونه الدكتوره كالت //هاك روح جيب العلاج
طلعنه وگعدت انا وهو رااح يجيب العلاج غاب فتره ورجع انطا الي ودخلت ع الدكتوره الي اشرتلي ع العلاج
دنكت ع الميزوسالتها = دكتوره ام السونار گالت الطفل وضعيته زينه وانتي خوفتيني
باوعتلي وابتسمت //انا ردت اخوف رجلج حتى ما يتعبج
ابتسمت بوجهها واتشكرتها هواي بعد ان وصتني //كل اسبوعين عشر تيام تعالي اشوفج

هزيت راسي وطلعت رحنا ركبنا بالسياره واحنه ساكتين ركن السياره ونزل يم مطعم وگف شويه واكوسوبر
ماركت راح واجه شايل علاليك وصل يمي خلاهن وره بدون ما يحاچيني ورجع يم المطعم جاب علاكه وهم خلاها
وره واجه بايده بطلين عصير انطاني واحد والثاني خلا وركب السياره چان الوكت ليل والهوى حلو انا فتحت
الجامه اليمي وظليت اتنفس قوي هو گلي بدون ما يباوعلي::  اشربي العصير
اخذت البطل وفتحته وصرت اشرب وهو گلي ::افتحيلي البطل

اخذت البطل وفتحته وانطيته اله وطخت ايدي بايده انا غلست وهو صار يشرب بالعصير فتح الجامه وشمر البطل وگلي
:: اشمري بطلج
انا خليته بايدي هو كلي ::ليش ما تشمرينه
جاوبته بدون ما اباوعله = لا اخلي اجمعه ويه النفايات واطلعهن وبشير من يطلع ياخذهن يذبهن
::ها تره اذا ذبيتي اهنا ما راح تخرب الدنيا
= بعد هذا شي تعودنا علي نحترم المكان الي نتواجد بي
::شلون يعني
= يعني هذا الطريق الي جاي هسه نمشي بي مو بس النه

باوعلي :: ما فهمت
= اقصد هذا الطريق مو بس النه انوجد الكل الناس فما يصير نتجاوز على شي مو النه حرام نتحاسب علي اذا
مو بالقانون فاالله سبحانه راح يحاسبنه
لملم حلگه وگال احس باستهزاء ::حرام ولازم نتعاقب
= هو مو نتعاقب بس الانسان لازم هو يكون ابصر بنفسه ويعرف هذا الشي غلط او صح
حاچاني بنبره بيها استهزاء ::على اي شي استندتي بكلامج

رديت =الايه بسم الله الرحمن الرحيم
(إن الانسان على نفسه بصيره ولو القى معاذيره )
صدق الله العلي العظيم
::صدق الله العلي  العظيم طيب بنظرج جمال على خطفه الاختي وتسببه بموتها شنو يستحق

  عضيت شفتي ودنكت ورديت بارتباك = هذا الشي تسأل بي رجل دين
:: لا اريد تصورج بالموضوع ما شاء الله مبينه ملمه بقضايا الحلال والحرام
جاوبته = ومن قتل نفسا بغير نفس فكأنما قتل الناس جميعا
باوعلي وهو رافع حواجبه ::يعني ؟
= يعني اذا چان عدل يستحق القتل

جاوبني بعصبيه وهو يضرب على الاستيرن :: لكن هو انقبر
انا خفت واحس ريكي صار خشبه سكتت هو وگف السياره وحاچاني بنفس العصبيه وباوعلي ::ليش ما تجاوبين
هزيت راسي = شجاوب ؟
::اكلج جمال انقبر بهاي الحاله شنو يكون العقاب والمن
رديت بدون ما اباوعله = گتلك هاي لازم تسأل بيها رجل دين
:: اريد تصورج

رفعت راسي لان اعرف بي يريد يتعارك حاچيته = يوسف الوين تريد توصل
عوج رگبته ::انتي شتگولين
= انا اكول ...وسكتت
::ليش سكتي احچي
= افضل اسكت

هو ظل يدخن واعرف بي عصبي انا ما باوعتله وصلنه ودخلنه للغرفه علكت عباتي وجاي افتح شالي هو
اتقرب مني وگال بهدوء ::انا سالتج واريد الجواب
= عن شنو
::شتتصورين المن اعاقب لان جمال انقبر
اهنا درت وجهي ع الحايط وضميت ايدي وانا اگول =  ليش انت بعدك ما عاقبت
:: قصدج انتي
باوعتله وهزيت راسي = ايي جمال انقبر وهسه هو وعمله والله سبحانه وتعالى ابصر بي
    ::  وانتي
       هزيت راسي =. انا جاي ادفع الثمن

هو. وصل يمي وباوعلي وراسا غرس اصابعه ابلعومي وحصرني ع الحايط وهو يصك باسنانه ويگلي
:: انتي جاي اتدفعين ثمن حبيب الگلب الي سنتين مخطوبتله وبعدين مات وانا اخذت الفضاله مالته

فرفرت بين ادي وعيوني فاتحتهن رخى ايده وانا گوه اجر النفس لكن احچي بعصبيه اكثر منه
= عمت عينه والله لو لازم شعره مني مو اكسر ايده لا اگصها
باوعلي باستهزاء وكأنما يتهمني انا انقهرت على نفسي رديت علي وانا فحطانه
= لاتباوعلي انت مو احسن منه هو خطف بنات الناس وانت جاي اتذل بعرضك

اتقربلي وهو عاض شفته لزمني من شعري ::شنو شنو اذل بعرضي
حاچيته وانا ابچي = ايي اتذل بمرتك انا مرتك وعرضك الي لازم انت تحافظ علي
فتح الباب وقبل ما يطلع باوعلي وهز راسه بتوعد :: سهله اله اندمج

انا صرت ارجف يمكن من التعب ما اعرف من الخوف والخنگه غاب شويه انا گعدت وخليت وجهي بحضني
وغطيته باديه وصرت ابچي واشهك  انفتح الباب وجاب العلاليك خلاهن وطلع وسد الباب حييل ورا
من اتاكدت شغل السياره گمت ع الباب سرگته واتمددت وانا متعجبه واتساءل = شبي هذا ليش هيج يسوي وياي
= لان حچيت وجاوبته
= بس هو جبرني ارد
رفعت راسي = حسبي الله ونعم الوكيل حسبي الله ونعم الوكيل على كل واحد ظلمني

بعدها ارتاحييت شويه وگمت غسلت وصليت وفتحت العلاگه طلعتها بيها معلاك والثانيه بيها عصائر ومكسرات
واجبان وصمون بصراحه ريحة الشوي تشهي ورغم القهر والتعب اكلت لكن دموعي تنزل لان احس انو
خبزتي مغمسه بضيم وحزن وخوف من الجاي

ثاني يوم گعدت الصبح وطلعت الابقار مثل يوميه ومراسبوع 
يوسف ما اجه وانا يوميه اطلع بالابقار اسرح ويوم عن يوم الجو يصير حار الظهر اجت ام بشير وگالت
خاله يوسف خابر بشير راح يرجع الولد الي يسرح بيهن انتي ارجعي البيتج
ما اوصف مقدار فرحتي رحت على ام بشير بستها ورحت امشي بسرعه طلعت المفتاح ودخلت للغرفه
انرعبت وصرت ارجف لان اتفاجأت بيوسف گاعد انا بقيت واگفه وخايفه وارجف عبالك سعفه هو اتقرب مني وگلي
:: مروه انا اسف سامحيني
///////////////////////////
اتمنى يكون عجبكم واريدكم تتحملون التاخير لان انتم اعرف بوضعي