رواية بعد فوات الأوان الفصل السادس وثلاثون 36 - بقلم آنين الليل

مرحبا
جاي اكتب يوميه الف كلمه او شويه اقل من البارت لان عندي مشاغل والتزامات
ارجو المعذره 🌷💙🌷
احبكم ❤️
آنيين الليل 😘😘
/////////////////////////////.

جهاد
بعد ما سمعت كلام مروه وطلبها الغريب مني بقيت يومين ما نايم ولا مستقر كله ضايج وافكر
اجه يمي امين حاول يعرف شنو بيه لكن انا گتله تعبان ومالي خلك
اكو طبع عد امين من هو زغير اذا يشوفني ضايج يسكت وما يلح عليه
وهذا الي صار راح على شغله وانا بقيت فكره تاخذني وفكره تجيبني

من ردنا نعزل اجاني امين وعزمني ع العشا هو مسوي ثواب الوجه الله الجية صادق سالم من الحشد انا اعتذرت
وكتله //حدي تعبان ما اكدر واصل الثواب ان شالله
امين //شنو جهاد مو على بعضك
  هزيت راسي وسحبت هوا // ما بيه شي بس يمكن آثار الفلاونزا
امين //اذا مريض امشي خلي اخذك للطبيب

  لا ياخي شويه تعب
امين //براحتك جهاد ما الح عليك
راح امين. انا رجعت للبيت بس دخلت خابرني صادق وگال //شوف جهاد لا سلام ولا كلام ازعل اذا ما تجي وتتعشى

وسد الخط رحت على مضض وگعدنا وچان جاي جمعه وعمتهم امل ومن سال جمعه على سالم رجل سماح
علي گال //عنده شغل سافر البغداد بس سماح اجت
انا ساكت والكل انتبهلي وانا ضايج لان كل شويه واحد يسالني
شخيرك جهاد
خو ماكو شي
ليش صافن

اتعشينا وانا اكلت شويه بعدها اجت عمتهم امل وجابت الچاي صادق يسولفنه على بطولات الرجال  وتضحياتهم
واشوف اندفاعه وتباهيه بالرجال الي ما يهمهم الموت وكل الي يهمهم الدفاع عن هاي الارض ومقدراتها
وبنفس الوكت صادق ضايج لان لازم يرجع الدوامه

بعدها صارو يسولفون على الخساره الي اتكبدها امين من جوه راس ابو وهنا صادق گال
— — راح يشتكي عليهم ويتهمهم انو همه امهددينهم
لكن جمعه وامين ما قبلو وكالو — —  ما نريد مشاكل نحاول نحلها وديا وياهم

وصار صادق يحچي ويكول // يعني الي انجمعه بطلعان الروح نسده الابوك وين صايره هاي
امين گله // صادق لازم تفهم انا رجال انعرفت اهنا والي ناسي وما اريد ايكولون ابوهم قفاص
صادق // شنو قصدك امين گولها لا تستحي كول الشغل شغلي وانا بكيفي
امين هز راسه وهو يتنفس // مو هذا قصدي يااخي بس ما اريد صورتي تهتز بالسوك

جمعه گال // صادق عمي اخوك هم شيسوي تره هو ما مقصر
صادق // ادري عمي امين ما قصر ويانا بس مو معناها طالب يغلط واحنه علينه نخسر
جمعه //بعد هذا امر واقع ولازم تتحملونه وتخسرون لو تعرفون تبيعون ابيوتكم
صادق بعصبيه //شنو انبيع والمن لو توصل للبيت صدگني اروح ادور تركيا شارع شارع والگا واجيبه
اسلمه الهم عسا ما يگطعونه ويبيعونه كيلوات لحم

جمعه //على كيفك عمي هسه ما بعتو البيت
صادق بتفس العصبيه //ولا راح نبيعه لو شيصير
جمعه //احنه ما نقصد على هذا البيت انكول امين اذا ما گدر ايحصل الفلوس يبيع ذاك البيت
صادق بعصبيه // يابيت تحچي صدگ
علي //عمي تريد صادق ينتحر اذا باع امين ذاك البيت

جمعه // يا ستار وليش
علي يباوع الصادق الي خزره // مو صادق يريد يتزوج ويسكن هناك
امل //يتزوج علوا بس ليش يگعد بذاك البيت خو يگعد وياكم
صادق يحچي وهو مدنك // لا عمه مو اهل البنيه يردولها بيت ابحدها
امل //يا يا. عمنك طفرت وصرت اتصيح اثاري مو على مود امين وتعبه  كله الخاطر تسكن بالبيت ابحدك

صادق هز راسه // لا مو هيچ اول وتالي انا بس اتخرج اشتغل وهذا امين اسالي شگد اتهددت وگلت ابطل
واشتغل وياك وهو ما يقبل يگول وصية امي تكملون دراسه تره عمه اول وتالي انا راح اشتغل واكون نفسي
واطلع من البيت وحتى لو سكنت بذاك البيت فتره واطلع يبقى البيت بيت امين والتعب تعبه

امين //شنو هالحچي هذا منو يطلعك من البيت بس عمتي ما عدها علم انو البيت انت تكعد بي
صادق // مي خالف بس لازم الواحد يفكر للمستقبل انا من حچيت لان هذا تعبك وانت راح يصير عدك
جهال شنو ذنبك ذاك عمر وهذا عمر وانت اتسدد الطالب وسوالفه التعبانه
جمعه // يعني البيت ذاك يكعد بي صادق
امين // اي عمي يگعد بي وهذا البيت الي انا وعلاوي وزينب

امل هزت ايدها // شو كل واحد بيكم يگول ياروحي ونسيتو ذيچ المسكينه العايشه بقهر وضيم
  الكل رفع راسه صادق // عمه الف مره حچينه عوفي كل شي وتعاي اهنا وهي ما تقبل
امل اتهز بايدها // وين تكعد وياك البعدنا اسم الله بالطبگ حتى ما شايفينها وشارطين بيت ابحدها لو عد
امين الحمله يكسر جبال
صادق //حمله من وره اخوچ
امل // وشنو انا جاي اكول اخوي زين لا اعرفه نذل وخسيس

امين //عمه شبيدي هي ما تريد تجي وتعوف ابنها شسوي يعني اروح اجيبها غصبن عنها
امل // لا مو هيچ بس تودي ناس على رجلها ويحجون ويا تره هذا اليصير بيها حرام
صادق بعصبيه //شنو انودي ناس ونكبر راسه الهذا يوسف صدگيني بس اشوفه انهي خلاص
من الوجود تره انا ساكت لان هي بت اخوج ما تقبل تجي

جمعه راد يبدل الموضوع باوع الامين // شنو صادق يمته تخطبوله ؟
امين //بكيفه يمته ما يريد انا حاضر
امل // مو توك خسرت للناس منين تجيب
امين // عمه الله يدبرها
امل // الله يزيد ويبارك برزقك

وصار الاتفاق قبل لا تبدي الدراسه يخطب ويتزوج بنصف السنه يعني قبل التخرج باشهر وهم البيت يكون خلص
استاذنت منهم وامين طلع وياي وگلي // شبيك جهاد مو على بعضك
ابتسمت // لا ما بيه شي بس راسي يوجعني
امين //امشي خلي نروح للمستشفى عاد نقيس ضغطك
  هزيت راسي //  يابه ما بيه شي هسه بس انام اصير زين
   —- —. اذا تشوف نفسك تعبت خابرني
ابتسمت وگتله // اكيد انت لا يظل بالك

رجعت للبيت وانا محبط ومقهور وبنفس الوكت خايف على مروه غسلت واتمددت وانا صافن شلون
راح اتصرف اجاني مسج منها = اذا موجود مي خالف تجاوب
رديت عليها // اي موجود
واتصلت ردت بخجل = الو
- هلا مروه اشلونج
= زينه الحمد لله
- الحمد لله والشكر

هي ردت عليه = شسويت جهاد بالموضوع الي گتلك علي
طلعت جگاره ورثتها وصرت ادخن وانفخ الدخان هي ردت = ها اشو ما جاوبتني
جريت نفس // مروه انتي تعرفين شنو جاي تسووين لو شنو تطلبين مني
هي بعصبيه = هذا هو جهاد انسى انسى كل شي حجيته

وسدت التلفون عرفت هي قافله على هذا الموضوع اتصلت بيها ما جاوبت رجعت اتصلت هم ما جاوبت
دزيت الها مسج
- مروه ابد لا تتصرفين من بحدچ لا تتهورين الموضوع مو سهل مثل ما انتي سامعه لازم تعرفين
الموضوع يرادله تفكير انا باچر او عگبه اتصل بيچ وافهمج خلي اتاكد واحسبها عدل ويصيز خير

هي ما ردت عليه بس شفتها استلمتها للرساله بقيت متمدد وانا راح انجن من التفكير لو واحد بمكاني
يمكن چان گال الاخوتها وفضييت الشغله لكن انا ما اسويها مو لان قسمت بروح اختي لا لان هي استنجدت
بيه يعني اطلع ناقص وقليل مروءه اذا ما اساعدها

رجعت كتبت الها مسج ثاني لان خفت عليها تتصرف من راسها كتبت الها
- - مروه انا انطيتج كلمه انو راح اساعدج وانا عد كلمتي بس انطيني مجال اتاكد من كل شي

بقيت طول الليل وانا احرك بالجگاير صار الصبح وانا گاعد وافكاري تجيب وتودي الصبح طلعت للمحلا
ما الي واهس حتى ما مريت بامين الي اجاني هو وصادق وجايبيين ريوك اكلت وياهم شويه وشربنا چاي
امين سالني // شبيك جهاد مو على بعضك بعدك تعبان
- - ما بيه شي گتلك تعبان شويه

اجه صادق وهو يضحك // امين هذا البي جهاد كله من الوحده والفراغ (باوعلي ) يااخي اتزوج خليها
تنكد عليك وتتعارك وياك من الصبح
ابتسمت اتقرب عليه صادق وسالني //صدك جهاد تره هم ياالله تتزوج وتستقر
هزيت راسي //الله كريم
امين //. والنعم باالله كلام صادق بمكانه
صادق يهز بايده // چا شنو عبالكم ما اعرف احچي شحلاتك جهاد من انت نايم وتحلم بسندريلا يمك تفتح عيونك
وتشوف صيهود نايم بحضنك

امين // منو هذا صيهود
صادق // لا تاخذ ابالك هذا واحد ما اعرفه بس صدك جهاد اتصور يااخي ترجع من الشغل الظهر تلاگيك
الشعفه ما مشطتها الها اسبوع والدشداشه كلها دهن وجهها يطرد الشر ولازمه سجينه وهيه اتگول
عساها بحظ امي وابوي انا وين والزواج وين جنت امللى ابيت اهلي واجيت الضيمك
وانت جكارتك بحلكك وشايل العلاليك وتسالها خير شكو
وتبدي
ابنك هالشكل سوا
غاز ماكو
خلصنه بهارات
اطيني فلوس اريد اشتري ملابس واروح للصالون اسوي منكيير وبديكيير واميش شعري هسه انتي بدلي
دشداشتج مشطي اعطوبج اول مره ياالله ترحين للصالون

ضحكنا من تصنيف صادق امين گله // يجوز هاي مرتك من تاخذها هيج تصير بس مو مرت جهاد
صادق // علوا نخطب سوا انا وياك وتصير فرحتنا فرحتين
ابتسمت //ان شالله

بقى امين شويه يمي راجعنا حسابات وراح للمحل الثاني وبقيت انا ما اعرف شنو اسوي احاول اكون طبيعي بس
ما اكدر وانا محتار بجنون مروه ما اريد اكون خاين وغدار الاعز شخص بحياتي ولا اريد اصير بعينها مو رجال
وما عندي كلمه خصوصا وهي وثقت بيه والتجاتلي

فكرت اذا احچي الامين اكيد راح يروح ويجيبها يمه ويوسف ياخذ ابنها وبالتالي راح انحق الهم شلون
الي تواصل ويه بتهم
اما هي فاكيد راح انزل من عينها واكيد همه راح تنفذ كلامها وتنهي حياتها
صرت احچي ويه نفسي

- - مروه هاي سنتين انا ما اعرف شنو راحه گاظيها قهر وتفكير بيچ شنو اكلتي شنو شربتي شجاي تسوين ذاك النذل
الاخذج ماذيج شلون يتعامل وياج ومن حچيتي وياي زيدتي همومي هموم او...
قاطعتني رنة التلفون باوعتله شفت ولد صديقي كلفته اذا يعرفلي ناس ثقه اريد اسالهم واستفسر منهم رديت علي

- - الو هلا ابو اطياف
- - اشلونك جهاد
- - الله يخليك ها بشر
- - جهاد احچيلي الصدك اذا الشغله الك اوديك على شخص هو يفيدك كلش
- - اي اليه او خلي اكلك ناس امرهم يهمني اكثر من نفسي

- - تمام راح ادزلك رقمه وانت احچي ويا هو اسمه ايوب
- - تمام دزه وانا اشكرك هواي
- - لا يمعود ما سوينه شي
- تسلم دزلي الرقم
- - مبين مستعجل ياالله راح يوصلك مسج ومن تخابره گله من طرفي لان هوه حذر الى ابعد الحدود

وصلني الرقم راسا اتصلت هو رد عليه
- الو
-الو مرحبا استاذ ايوب
- اي نعم منو
- وياك جهاد من البصره انا من طرف ابو اطياف
- اهلا وسهلا بيك وبي
- تسلم
- اامرني استاذ جهاد

- - محتاجك باستشاره ومساعده
-:بخصوص
- اريد اهاجر
بقه ساكت شويه بعدين جاوبني // استاذ جهاد بس بالتلفون ما ترهم وانا لو ما ابو اطياف حتى ما ارد عليك
- مشكور استاذ والمطلوب

- - شوف جهاد لازم تجي ونكعد ونسولف
سالته // يمته انت فارغ ؟
جاوبني // انت مستعجل
- - اكثر مما تتصور
- - تمام اليوم بالعشره بالليل اذا تگدر تجي ومن توصل بغداد خابرني وانطييك العنوان

- - تمام بالعشره ان شالله يمك
—- تلحك توصل بالوقت المحدد
——   التسهيل من الله
—-0  تمام بانتظارك

گعدت شويه بالمحل ورحت على امين گتله//  دير بالك ع الشغل اريد اروح البغداد
امين مستغرب // ليش شكو
جاوبته بعدم اهتمام // عندي شغله ضروريه 
امين // اي غير افهم انت مريض شنو داعي هاي السفره
- - اريد اروح اشوف الوكاله الي كلفت الجماعه عليها شنوو صار منها
امين رد عليه // جهاد لا تنسى سيوله ماكو

جاوبته // هو انا ليش اريد اروح علمود افهم شلون يكون العقد
امين رفع اكتافه // بكيفك جهاد
دير بالك ع الشغل
امين سالني /. وصيت كرار
- - اي وصيته وخلي صادق يروح يگعد يمه انا ما اتاخر بس لازم اخذلي فره ع الوكالات

امين // انتبه للطريق
- - فيمان الله اروح اغير ملابسي واطلع
- الله وياك

رحت على عجله غيرت ملابسي واخذت فلوس وطلعت البغداد وانا اعرف كل هذا الي اسوي تهور لكن مضطر
اسوي وصلت قريب المغرب رحت الفندق الي دائما انزل بي  اخذت غرفه وانا منتظر الساعه عشره الي
جاي تتحرك ابطئ عجيب سبحت واتمددت بعدها نزلت اتعشيت تقريبا الساعه ثمانيه وربع اتصلت بايوب
الي رد عليه
- الو
- السلام عليكم
- عليكم السلام اهلا استاذ جهاد
- اهلا بيك
- ها وصلت
- اي والله وصلت
- هسه انت وين

- انا بالفندق شلون اگدر اشوفك
- شنو فندق استاذ جهاد مو عيب
- - تسلم الله يخليك بس شويه تعبت من الطريق وگلت ارتاح فد ساعتين
- - اي حقك الطريق بعيد ومتعب
سالته // المهم شلون  اشوفك
- تمام هسه انطيك العنوان تسال علي ابو الفندق ما يتيه

صار الاتفاق نلتقي بمطعم وانا سالت استعلامات الفندق ودلوني علي رحت وانا شايل هموم ثگيله اول مره
احس بالتعب وانو انا ما اعرف اتصرف
وصلت واتصلت بي هو رفعلي ايده ورحت سلمت علي وصافحته
- - استاذ ايوب مو
هو وگف وصافحني //اي انا اهلا وسهلا بيك
- شكرا

- - الله يساعدك ع الطريق
دخنت جكاره // متعود استاذ
ايوب // ها انت دائما تجي البغداد ؟
جاوبته // انا ولادتي بغداد
- بربك
هزيت راسي // اي وتركتها عمري 16 سنه رحت للبصره واشتغلت وكونت نفسي

ايوب // الله يرزقك هسه نتعشى ونسولف
جاوبته // انا سبقتك
ايوب // ما يصير
- - صدكني اكتفي بكوب گهوه
- - تدلل

جابو كهوه سالني ايوب // اذا انت اشتغلت وكونت نفسك ليش تريد تهاجر
فركت عيوني وگتله //  استاذ ايوب قبل ما اجاوبك انا عندي استفسار
- اي اتفضل
- اذا ماكو وثائق اثبات شلون الواحد يطلع
باوعلي بنص عين عرفت قصده جاوبته وانا ابتسم //  لا يمعود لا يروح بالك لبعيد
هو رد عليه // شلون ما يروح وضحلي ؟

- - يعني بصراحه بالوقت الحاضر مو انا الي اريد اهاجر خلي اگول بت عمي ويهمني امرها
ايوب // هي الي ما عدها ...
قاطعته وانا اهز براسي//  لا استاذ ابنها عمره سنه
- - وزوجها رين
- - همه تقريبا شبه المنفصلين وما تريد اتطولها ويا او ويه اهلها البنيه تريد تاخذ ابنها وتهاجر
تريد اتربي وترتاح

باوعلي وابتسم // وانت ؟
رديت بسؤال // انا شنو؟ 
صار يحچي وياشر عليه // انت من كل هذا شنو محصولك ؟
- محصولي ؟
هز راسه وگلي // انا من اجيتك لهنا اكيد ما اشتغل بمنظمات حقوق الانسان الي هي بالحقيقه ما موجوده عدنا
بس بالاسم موجوده ؟
هزيت راسي // اعرف
ايوب // زين ما دامك تعرف انا اريد اعرف انت شنو فائدتك

- - البنيه طلبت مني اسال الها وانا ما اكدر اردها
ايوب // والمقابل ؟
جاوبته // انت حقك محفوظ المبلغ الي تطلبه
- وانت ؟
باوعتله هو گال // ولو هذا الشي ما يعنيني شنو المطلوب

- - استاذ ايوب هي عدها جنسيه وجواز لكن ابنها ما عنده لا جنسيه ولا جواز
-ها وليش ما عنده ؟
- - ابو ما طلع اله بس بيان
حك لحيته // شوف جهاد انطيني مجال وباجر ارجع الك الخبر
هزيت راسي //تمام
وگف وكلي // وهسه تتفضل وياي تبات وترتاح

- - لا شكرا ممنون منك  انا حاجز بالفندق ما اريد ادوخك وياي والصبح عندي شغل
- - تمام نبقى على اتصال
- ان شالله
طلعنه هو ركب سيارته وانا رجعت للفندق بسيارتي رحت الغرفتي وغيرت ملابسي وحاولت انام شفت مروه
متصله ع الواتساب كتبت الها //  الو

هي اتاخرت بعدين كتبتلي // الو جهاد اعذرني جنت احچي ويه امين
كتبت الها // خمس دقايق واتصل
رحت اتصلت على امين راسا جاوبني
- الو هلا جهاد
— هلا امين شفتك متصل ع الواتساب
امين // ايي والله چنت احچي ويه مروه كامره

—هاا وشلونها
- - الحمد لله ها جهاد خو ما كو شي
—لا بس يجوز اتاخر
امين // غير على ما تكمل شغلك
جاوبته // اي
امين // براحتك

—انت دير بالك ع الشغل
امين // ان شالله لا تشيل هم
— تسلم تصبح على خير
امين // وانت من اهله

سديته من امين ورجعت اتصلت بمروه الي جاوبتني
= الو
–—اشلونج مروه
هي سكتت ما ردت وكأنما تريد تگلي انا منتظره شنو سويت گلت
— — مروه باچر راح يرجعولي خبر بس قبل لا تحچيين اريد اسألج انتي فكرتي زين
هي ردت عليه =  اي فكرت
- - وشنو قررتي
—— نفس قراري ومصره علي

جاوبتها // زين راح اسألج اذا انا بطلت وتراجعت بكلمتي وما اريد اساعدج شتسوين
جرت نفس قوي وكالت  = جهاد حتى لو انت اتخليت عني راح اخذ ابني واهاجر
  من سمعت اسمي تلفظه غمضت عيوني وانا اتنفس بكل قوه سالتها // زين واذا سولفت الاميين كل شي
هي ردت = بكل الاحوال راح اكتل نفسي واموت وخطيتي برگبتك لان وثقت بيك وانت خنتني

حسيت بكلامها اصرار ومتاخذه قرارها سواء بيه او بدوني راح تهاجر هي ردت عليه وگالت
= انا من استنجدت بيك لان اعرف لو تنطي حياتك ما تتراجع بكلمتك
جريت نفس قوي وگتلها //  مروه باچر يرجعولي خبر بس اوعديني لا تتصرفين اي تصرف بدون علمي
ردت عليه = لا ما اتصرف الى ان اقطع الامل منك

- - تمام انا اليوم اجيت البغداد وشفتلي واحد وسولفنه وباجر ان شالله يرجعلي خبر
سالتني باستغراب =  انت ابغداد
- - اي مروه انا ابغداد
سكتت  شويه وگالت =  يعني انت اجيت  البغداد حتى تشوف ناس ممكن اتساعدنا
اتنفست // اي مروه

حسيت بيها بچت جاوبتها // هو باچر گلي يرجعلي خبر
= ان شالله
- - ياالله نامي وارتاحي باجر اذا عندج مجال نحچي تصبحين على خير
= وانت من اهله (اتنفست قوي وگالت ) = جهاد

رجفت من لفظت اسمي غمضت عيوني وخال ايدي على كلبس //- - ها مروه
= شكرا تعبتك وياي بس ما عندي غيرك التجأ اله
- - الله كريم خلي نشوف شيطلع بايد الرجال الي كلفته
= تصبح على خير

وسدته وانا بقيت اسحگ جگاير وافكر واگول
- - جهاد چنت تتمنى  لو تمر عليك بالحلم وتسمع صوتها ومن حاچتك وسولفت وياك وهي تطلب منك المساعده
بان تكتب نهايتك بايدك
- - ايي نهايتي يعني مروه اذا هاجرت انا بعد ما اشوفها

- - جهاد انت جاي تلعب بالنار جاي تضحي بنفسك وشغلك وتضحي حتى بسمعتك
- - ها جهاد شو سكتت ما تجاوب شنو نهاية هذا الي جاي اتسوي
- - انا اگلك نهايته راح تفقد كل شي صداقتك ويه امين الي حاسبك اخو الچبير واسمك الي ياما اشتغلت وتعبت
واتحملت كل شي حتى تبني راح تفقد احترام الناس وتقديرهم ومو بعيد تفقد حياتك

جاوبت بصوت عالي // مروه استنجدت بيه معقوله اخذلها
- - مروه متزوجه وهذا الشي الي جاي تسوي ما يقره لا شرع ولا قانون انسى واطلع من حياتها وما عليك بيها
هزيت راسي وگلت // ما اگدر ؟
- - تگدر جهاد دور وجهك وروح وابتدي من جديد اتزوج وكون اسره وحتى ابتعد عن كل شي ايذكرك بيها صفي
شغلك  ويه امين وروح الغير محافظه وابدي من جديد العمر يمشي كافي لازم تنتبه النفسك

-هزيت راسي وحچيت // - مستحيل انا شنو جاي احچي انا ما اعوف مروه هي لو ما متعذبه ما اتخذت هذا القرار
مستحيل اتخلى عنها واطلع نذل بنظرها
- - بس انت لا اخوها ولا زوجها ولا حتى اقاربها هذا الي تسوي حرام ما يجوز
- - ادري وانا مضطر اسوي هالشكل

فتحت شباك الغرفه وصرت استنشق الهوا وانا اكول
- - ياريت مروه چانت مرتاحه بزواجها چان تركتها وما فكرت بيها ودفنت حبي الها لكن هي متعذبه وضحيه واذا
ما ساعدتها اخاف تتهور وتسوي شي مو بالحسبان لان الضغط يولد الانفجار
رفعت راسي للسما وگلت // ياربي ساعدني انا محتار بامري ساعدني يا الله

بعدها رحت على فراشي اتمددت وحاولت اغفى نمت وگعدت الساعه بالعشره على رنة تلفون كرار
العامل الي خليته بالمحل جاوبته چان يسالني على واحد نطلبه وجايب فلوس دليته بالسجل وسديت التلفون
ورحت للحمام سبحت وبدلت ونزلت اتريگت وانا عيني ع التلفون
ركبت سيارتي وصرت افتر بشوارع بغداد وانا اتذكر طفولتي ويه اختي

دووم من اجي البغداد تبدي وياي الذكريات وصورة ابوي وابتسامته وضحكة اختي ولعبنا انا وياها والهموم
الي شفناها والجوع والقهر واسال نفسي
- - رغم كل الي سوته امي بس اختي الاخر لحظه متمسكه بيها وهذا الشي ما عرفت افسره دائما اسأل نفسي
ليش اختي اتقبلت امي وبقت متمسكه بيها وهي بعينها شافت الخيانه ليش غفرت الامي كل الي سوته بابوي

دموعي سبقتي على خدي وانا اتذكر منظرها وهي منتوله وجامده ابمكانها وسالت نفسي
يعني لو كنت انا ابمكانها شراح ممكن تسوي اكيد تلتجأ الامي وبذاك الوقت امي كانت تستقبلها لو تطردها

هزيت راسي وانا ما اريد حتى افكر رحت على شركه خاصه بشغلي وبقيت يمهم اكثر من ساعتين نسولف
انا والمدير ع الشغل شلون ممكن اوسعه
لكن بنفس الوقت عيني ع الموبايل بلكي ايوب يتصل

الساعه ثنتيين اتصل ايوب وگلي تعال النفس المطعم بس لا تجي متغدي عازمك اني
سلمت على المدير واتفقت ويا انو ينطيني مجال افكر وارجعله خبر ركبت بالسياره وانا احچي
- - جهاد انت جاي تتوسع بشغلك معقوله تجازف بكل هذا الشي

ما جاوبت شي لان اعرف الي اسوي غلط وصلت يم ايوب وعلى نفس الطاوله اتسالمنه وگعدنا ايوب كلي
- - انا دائما اجي الهذا المطعم وهاي طاولتي اكثر الاوقات اگعد اهنا
هزيت راسي هو استردف وگال // الانسان اذا ادمن على شي من الصعوبه ان يتخلى عنه
باوعلي وسالني شنو يعجبني اكل جاوبته // ما اريد ازاحمك توني اتريگت
ايوب //سالفه تفيدك وهسه گلي شنو يعجبك تاكل
- - اي شي

طلب ايوب الغدا وصرت اكل وانا مرتبك اريد اسمع منه شي يطمني ويهدأ نفسي كملنه وجابو الچاي وانا فدمتله
جگاره وهو كلي ما يغير دخنت وسالته // شسويت استاذ ايوب
هو باوعلي وابتسم // هسه تونه كملنه الغدا يعني مو مال استاذ صار بيناتنا خبز وملح سميني ابو صبر
رديت // صبر ؟
- - اي اسم بنتي

—الله يخليها اي ابو صبر شنو الاخبار
- - شوف جهاد لو تريدني اسميك استاذ ههههه
—لا جهاد مثل ما كلت احنه ابيناتنا خبز وملح
- - شوف جهاد لازم تعرف الي يروح يهاجر حاله حال المريض الي يدخل عمليات وهو ميؤوس من حالته فالطبيب
حتى يخلي مسؤوليته يطلب اهله ويكلهم وقعولي على انو انا استلمت انسان ميت يعني نسبة نجاح العمليه نسبه ضئيله جدا

جاوبته // اكيد طبعا واكثر الخوف من البحر الواحد بوسط بحر ما تعرف شنو يصير
هز راسه وگال // لا مو بس هذا الشي شوف جهاد انا لو ما ابو اطياف دزك عليه فلا احچي وياك بهاي
الاريحيه والثقه
—اشكرك من طيب اخلاقك 

هو رد عليه // مو بس الخوف من البحر حتى من البلاد الي يرحولها تعرف من بدت هجرة السوريين وبعدها
العراقيين وهسه الافارقه وغيرهم صارت هناك عصابات منظمه لبيع الاعضاء وامور اخرى
—مثليش
- صدگني حتى المتاجره بالنساء
سالته // زين وهاي الي نشوفها بالتلفزيون

دخن جگاره وگال // انا اگلك مو كل الدول اما الي تشوفها بالتلفزيون فهذا اعلام يعني كل واحد يريد مصلحته ويدور
على الخبر الي يفيده
المهم مو هذا موضوعنا بالنسبه الطلعتهم من العراق التركيا ومناك عن طريق البحر تبدي الهجره بالعراق
ما اعرف جهاد يمكن تدري اكو منفذين للهجره  اما جوي عن طريق مطار البصره او بغداد او اربيل وهذا الشي
ما يصير اله بورق ثبوتي وهي ما تملك هذا الورق

اذن ما بقى كدامنا اله الطريق البري وهذا هم يرادله اوراق ثبوتيه وهم بي مجازفه لكن يبقى شويه اسهل من الطيران
سالته // زين ابو صبر وبالنسبه الابنها ؟
هو گلي // بالنسبه الابنها اكو ناس ممكن اتسوي زوجها متوفي وتطلع شهادة وفاة وقسام شرعي وانو
هي المعيله الابنها ( حك شعره ) وبعد اكو شي ثاني
ممكن يطلعون  اله جنسيه انو هو اخوها واهلها اتوفوا بحادث او غير شي او انو تعقد عقد ويه شخص غير زوجها
بتاريخ قديم انت مثلا

بيني وبين نفسي گلت (استغفر الله )
ايوب وهو يسوي بايده بين وسين گال // وكل هذا مقابل فلوس
— —   اكيد طبعا

ابتسم // واكثر جهاد وانت واني نعرف بهاي الحقيقه
اذا واحد عنده فلوس خو يطلع بصوره شرعيه او حتى يبقى بالعراق
الي مثل حالتكم قله قليله والباقيين الي هاجرو هذوله اما شباب متحمس يريد يشوف الدنيا وشارد من واقعه
او ناس ممكن تكون مطلوبه للدوله
بقيت صافن ايوب گلي  // - - ماعلينه هسه انت فكر ورجعلي جواب

جاوبته // هي عدها جواز
ايوب // تمام اذا ما منتهيه صلاحيته تبقى بس شغلة ابنها اما انو نسوي اخوها او نخليها ارمله وهي المعيله
انت شوفها ورجعلي جواب
گتله // وانت هم ايوب اعرف لي شگد اتكلف
آيوب // على حسب طلبكم تره الشغله مو هينه يراد الها صرف

جاوبته // انا اريد ناس ثقه
هز راسه // موجودين بس حدهم التركيا وبعدين ايعرفونكم على ناس يوصلوكم للبلد الي تردو بس كل
هذا الشي بمقابل مادي
وگفت على حيلي وصافحته وگتله // ان شاالله ارجعلك خبر خلال هاليومين
هو رد عليه // وانت تدلل جهاد انا باكثر الاحيان ما اتدخل بشغله ما تخصني لكن اشوفك جدا مهتم الهاي البنيه

هزيت راسي وگتله  // فعلا هي اتهمني
ايوب // الله ايوفقكم بس ضروري تتاكد شنو تردون وتحددون يوم تجون بي لهنا حتى انا ارتبها الكم
- - تسلم ابو صبر ما قصرت اكيد بيناتنا التلفون

سلمت وطلعت وانا محمل هموم ثگيله واعرف اذا انا ما اساعدها ممكن تضيع نفسها وتضيع ابنها الي
اتحملت كل شي الخاطره صرت احجي
- - شسوي يا مروه شسوي اخاف عليچ واخاف من تهورج وضميري ايانبني وانا جاي اخدع امين
باوعت للسما وگلت // ياربي ساعدني هاي اول مره بحياتي من بعد وفاة اختي انا هلكد ضايع

ركبت بالسياره ورحت للكاظميه المقدسه زرت ودعيت ربي بجاه الامام موسى الكاظم والامام محمد الجواد عليهما السلام
ان يساعدني صرت ابچي كانما طفل ضايع من امه وانا محتار بقيت اقرا  قرآن بعدها اذن المغرب صليت وطلعت
من الصحن الشريف وانا امشي واسمع الناس وادعيتهم الرب العالمين بجاه الائمه الاطهار

مثلا سمعت مره كبيره بالعمر  تكله بعفويه دخيلك يالكاظم بجاهك عد ربك لين گلب الناس وخلي اوليدي ياخذ اليريدها
كون يطونها  بلا مشاكل
وثانيه تدعي يالكاظم بجاهك عد ربك ترزق اوليدي وتهدي المرته
وثالثه تدعي وتبجي وتكله ابو طلبه عليك الله ادعي الابني بالهدايه ما اريده يصير عاق واغضب علي انا والله ما داعيه علي
وهو يوميه بمشكله بجاهك عد الله اريد يهديلي ابني
اب يدعي ويكول يا ابو طلبه ربيته وتعبت علي واريده من الله ومنك
وهواي ناس عدها حوائج من اسمعهم ابجي واكول آميين

طلعت وصرت امشي گعدت بمحل وطلبت گهوه وانا صافن على حالي كملت الگهوه ورحت ركبت سيارتي
وطلعت رحت للفندق ما خابرتها المروه نمت وكعدت الصبح طلبت ريوك وبعدها ركبت سيارتي وطلعت
رحت يم بيت اعرفه دگيت الباب
طلعت مره يجي عمرها اربعين سنه بقيت اباوع الها گتلها // صباح الخير خاله
جاوبتني //اهلا وسهلا اتفضل
رايد ...اهنا اجه صوت ولد وهو يكلها// منو بالباب ام كريم

باوعت وراها // هذا ولد
اجه شفته ولد شاب عمره عشرين او اكثر شويه گلي // اتفضل اخويه شرايد
- 0 السلام عليكم
- - عليكم السلام اتفضل 
- - الحقيقه رايد ام رامي
باوعلي باستفهام وهو عاقچ حواجبه  // شرايد منها ؟
جاوبته // انا اقاربها من بعيد وعندي شغله وياها

الولد // : لازم انت مو منا
- - لا مو منا
-منين ؟
- - من الناصريه
رد عليه // بس ما اعرف عدها اقارب بالناصريه
رديت علي // لا عدها بس هي ما مخبرتكم
الولد // هي ما موجوده بالشغل اقصد بالمركز

- - ممكن تنطيني عنوان المركز
-: لازم شغلتك ضروريه ؟
—اي والله
-: تندل ابغداد
—اسال ويدلوني
:-*تمام

وصفلي اسم المركز ورحت وصلت يمه شفته من خلال اليافطه مركز چبير وراقي دگيت الباب لان اعرف
هو خاص لتجمييل النساء طلعت بنيه شابه باوعتلي وكالت //  اتفضل
- السلام عليكم
- عليكم السلام ابيش اخدمك
—-اشكرج حاب اشوف ام رامي
البنيه //منو انكلها ؟
—اقاربها
-: دقيقه

سمعت صوتها وهي تكول شنو شصار خابروني اقاربچ جاي عليچ هسه انتي تكولين اقاربي منو هذا
فتحت الباب وصارت عينها بعيني

/////////////////////////////////يتبع