رواية بعد فوات الأوان الفصل السابع وثلاثون 37 - بقلم آنين الليل

مرحبا حبايبي 🌷🌷
يمكن هذا اقصر بارت اكتبه حوالي 2900 كلمه
بس لان انتو تطالبوني انشر لذلك تشرته لعيونكم
تحياتي 😘😘
احبكم 💙💙
آنيين الليل 🥰🥰
بس صدگوني مو بارت ايخبل اتمنالكم قراءه ممتعه
//////////////
جهاد
سمعت صوتها وهي تكول
شو خبصتوني بالبيت خابروني اقاربج جاي عليچ وهسه انتي تگولين اقاربچ منو هذا

صارت عينها بعيني شفتها نفس ماهي بس شويه مبين عليها الكبر الي تحاول اتغطي بالمكياج
ما متبدل عليها شي نفس اللبس الغالي والذهب والمكياج الي ما تتخلى عنه ونفس الجبروت وقوة الشخصيه

شافتني اتسمرت بمكانها بين الاستغراب وبين شي ما عرفته فتحت عيونها ع الاخير كان ابالي
ردة فعل لكن هي سوت العكس اتقربت مني وحضنتني حييل وشمتني برگبتي وصارت تبوسني بخدي بركبتي
وانا حتى ما رفعت ايدي ومسكتها چان شعوري عباره عن فراغ

سمعت شهگتها وهي تگلي
:جهاد ياروحي اشتاقيت الك ياعمري
ما جاوبتها هي باوعتلي شفت بعيونها دموع رجعت حضنتني وصارت تبوس بيه مره ثانيه انا جريت نفس
وهي لزمتني من ايدي ودخلتني للمكان وفتحت الي باب الغرفه دخلت شفت مكتب فخم گعدت على القنفه
وهي بقت واگفه دگت جرس اجت نفس البنيه گالت الها
—— جيبي كهوه وما اريد وحده تجي وتسال خلي ام رونق تتصرف تمام

البنيه تباوع بذهول يمكن لان شافتها تمسح دموعها اتصدكون اذا اگلگم اول مره اشوفها تبچي اجت كعدت يمي
وخلت ايدها على چتفي وهي تگلي //حبيبي ماما اشتاقيت الك
بقيت مدنگ وساكت البنيه جابت الگهوه وخلتها گدامي وراحت بقت ساكته ما حچت سالتها بعد ان دخنت جگاره
— —اشلونج ام رامي ؟

هي گامت وگفت وصارت گدامي وگالت //مستخسر اتگلي اشلونچ ماما
سحبت نفس من الجگاره وباوعت الها باستهزاء وانا ابتسم //  ماما اتصدگين انا نسيت هاي الكلمه
جاوبتني //بس انا ما نسيتك
رفعت حواجبي //. صدك
هزت راسها //  اي صدك ما نسيتك ولا رحت عن بالي

اتحسرت ورديت عليها //وجنه ؟
هي گعدت مقابيلي ودنگت وگالت // الي صار صار غصبن علينه كلنه
اتنفست ونفخت //شعجب ما طردتيني او عيطتي عليه او حتى جبتيلي الشرطه
هي اتحسرت //ماكو ام تجيب على ابنها الشرطه

ضحكت بتستهزاء // هههاي بس اكو ام تترك جهالها بايد القدر وتروح تاخذ حبيبها الي چان صديق زوجها
باوعتلي وهي اتحرك برجلها // اذا تعرف هذا الشي انا مسويته ليش اجيت
عضيت شفتي // يمكن محتاج الچ
ردت عليه باستغراب // يعني انت جاي حتى تطلب مني فلوس

-دخنت جكاره ونفخت الدخان // اذا على الفلوس فمن اطلب ما راح اخذهن خاوه (هزيت راسي )
لا من اطلب لان هنه حقي وانتي تعرفين هذا الشي كلش زين مو
لكن انا ما جاي اطلب فلوس لان ما محتاج لفلوسچ الي بعتي عليهن كرامتج واولادج

سالتني باستهزاء // ها ما محتاج ؟
هزيت راسي وابتسمت // ايي لعد شعبالج مثلا انا صرت اجدي بالاشاره من تركتچ
- - قصدك من ضربتني بالسچين وردت اتموتني
  باوعت الها بتحدي وحركت راسي // اي وما متي

- - بعد هذا الشي من حسن حظك او من سوء ما اعرف صحيح اني فقدت الكليه مالتي وعالجت نفسي
بالفلوس مالات ابوك الي تگول هنه حقك
لملمت حلكي وانا اعض بشفتي // بعدج نفس ما انتي بجبروتچ ما اتبدلتي  صدگ گالو عندچ بنيه والولد شفته
هزت راسها //ايي عندي رامي وساره

حاچيتها وانا اباوع للسگف واتنفس بحسره // من تشوفيها هم تتذكرين جنه لو لا جنه الي بيوم ما انتلت جانت غايبه
من المدرسه وجايه حتى اتشوفچ جنه الي چا...
رفعت ايدها وقاطعتني // كافي جهاد انا ام  يمكن غلطت بحقك وحق اختك لكن مو عبالك انا ناسيتها
جاوبتها // انتي مو بس غلطتي بحقي وحق اختي انتي غلطتي بحق ابوي المسكين الي حبچ وترك الدنيا على مودچ

هي اتنفست قوي وكالت// ابوك ؟
باوعتلها وهزيت راسي // اي ابوي
- - ما انكر حبني لكن انا ...

عضت شفتها وبس صوت انفاسها انا رديت عليها // انتي شنو ضحكتي علي وعشگتي صاحبه براسه خليتي
يترك اهله دوختي ما خليتي يندل طريقه صار يشتغل مية شغله بس حتى يرضيج وبعدين شغلتي بالتهريب وانسجن
واخذتي فلوسه وشمرتي جهالج بالشارع بعد ان اتزوجتي عشيقچ انتي ورجلج الي بلغتي عنه مو
هي فتحت عيونها ع الاخر جاوبتها // لا عبالج جاي احاسبج  اصلا انا ما اعرف ليش جاي

اتبدلت ملامح وجهها اول مره اشوفها خايفه سالتني //  شبيك جهاد شنو صاير وياك
هزيت راسي ولملمت حلگي وگتلها // لا تاخذين ابالج ما صاير شي
لزمت ايدي قوي // - - كلي ماما شلون اگدر اساعدك

استهزأت من نفسي من سمعت كلامها  وگلت الها بعتب  // اتساعديني بعد ان صرت رجال طول بعرض ياريتچ
ساعدتيني انا واختي من واحنه زغار بس الصحيح انا ما اعرف ليش جاي
دنكت وكالت // ماما جهاد يمكن انا غلطت بحقكم بس صدگني انا يوميه اعاقب بنفسي مو عبالك بهذا حالي تشوفني
فرحانه (هزت راسها. وكالت )  لا هذا وجهي گدام الناس بس بداخلي انا انسانه محطمه تعبانه يوميه اسأل نفسي
وين رحت شنو صار بيك شلون عايش مو عبالك نسيتك لو نسيت اختك

——— صحيح اني بنظرك خنت ابوك بس انا عمري ما حبيته الابوك وما انكر هو حبني وسوا المستحييل بس
حتى يرضيني وما انكر ابوك مخبل بحبي بس مو مشكلتي اني ما حبيته حاولت ابقى ويا الخاطيركم لكن ...

سكتت ما كملت انا جاوبتها // لكن انانيتچ وحبچ النفسج خلنچ تتخلين حتى عن امومتچ
وگفت اريد اطلع هي لزمتني وگالت //يجوز انا انانيه وانت ما قصرت وياي وصلت بيك ردت تكتلني موت
جاوبتها // وانتي هم ما قصرتي اخذتي فلوس ابوي وتخليتي عن امومتج
جاوبتني باستهزاء // يافلوس هاي وك من اموت راح تستارثني حالك من حال رامي وساره

جاوبتها باستهزاء // هههه من تموتين
غمضت عيونها وفتحتهن - - جهاد اني اشتريت بيت وسجلته باسمي وسويت بالمحكمه هبه الك والاوراق
موجوده عد محامي وبالمحكمه صحيح ما شفتك هاي 16 سنه لكن انت تبقى ابني انا قسيت عليكم وانت قسيت
عليه حتى انك تستنكف تگلي ماما

ما جاوبتها درت وجهي وخليت ايدي على يدة الباب قبل ما افتحه  درت عليها وانا عيوني مليانات دموع
- - قبل عشرين سنه چان اكو ولد زغير وبنيه ازغر منه ابوهم انسجن وامهم تركتهم واخذت صاحبها الي چانت
عاشگته وهي متزوجه عافتهم وهمه يبجوون الولد والبنيه راحو العمامهم لكن طردوهم گلولهم روحو الامكم
الي ابوكم الخاطرها باع اهله وعشيرته الولد صار يشتغل ويخلي اخته من تحل من المدرسه تجي يمه لان يخاف
عليها وهي من تروح للدوام او ترجع منه چانت تروح الامها الي تطردها من البيت ومن كبرت البنيه صار
يخليها بالبيت ويوصي جيرانهم مره جبيره خاف احد يدك الباب خاف تطلع وبيوم رجع الولد چان جاي يريد
ايعاقبها لان بيومها هي ما مداومه مغافلته ورايحه الامها الي غرگانه بالعسل ويه حبيبها عاد امها ما قصرت
يمكن حتى ما طلعت وخلتها اتشوفها ورجعت وهي مقهوره يجوز  دعت على نفسها بالموت ومن دخلت
والدنيا تمطر والرطوبه وهي تغسل بوجهها  لگفتها الكهرباء وماتت وامها ما شاء الله بقت ابيتها وصالونها
وزوجها ومكياجها وذهبها والولد مو بس دفن اخته لا دفن ابو الي حس بغلطته لان حب زوجته وانطاها كل
شي ايملكه وما يملكه

والولد اتشرد لكن الله رحم بحاله وخلى بطريقه حجي ابن حلال ربا وعلمه صنعه وهسه هو يعتبر نفسه تاجر
وهسه اتكليلي واهبتلك بيت (باوعت الها وحچيت بحرگه )
انا واختي ما چنه نريد بيت ولا فلوس لا چنه نريد بس حضنچ وضحكتچ بوجهنه
هي سالتني برجفه // لعد اذا انت تاجر وتكرهني وحاقد عليه المن جاي
درت وجهي ع الباب وخانتني دموعي گلت الها //مو يگولون دعاء الام مستجاب ادعيلي

طلعت وهي بقت واگفه صرت بره وصلت يم سيارتي حسيت بيها طلعت وراي وهي خاله شال على شعرها وصلت
يمي انا باوعت الها وهي خلت ايديها على وجهي وكالت وهي تبچي
- - الله يرضى عليك وينور طريقك ياابني انت سامحني
ما جاوبتها ركبت سيارتي وسقتها وانا انحب بصوت مسموع واگول
- - وينچ ياجنه تعالي ارجعي لو يوم اتهني بهاي الفلوس ادفي من البرد واشبعي من الجوع وخلي حضن
امچ يدفيچ ويفرحچ

صرت ابچي وامسح دموعي ويرجعن يحرگن خدي وانا اتذكر المرار والقهر الي عشنا انا واختي اسوق بالسياره
واشهگ بحيث وكفوني سيطره وسالوني // خويه بيك شي
جاوبتهم بحركه //اختي اتوفت

مشوني وطلعت السياره للنجف دخلت للامام بعد ان توضييت زرت ودعيت وصليت هدأت شويه لكن دموعي ما هدأن
بعدها طلعت للمقبره وصلت وانا خجلان حضنت قبر اختي وگلت الها
- - زعلانه عليه لان رحت لكن چنت اريد شي يهديني ويطمني وهذا انا رجعت الچ ياجنتي ياحبيبتي لاتزعلين عليه انا
ما اعرف شسوي محتار اخوج اول مره يحتار جنه مشتا ق الضحكتچ والدمعتچ مشتاق الصوتچ انتي ارتاحيتي وانا هذا
طوول عمري متعذب لان فارگتچ ولان ابوي راح مني ولان قتلت امي وما ماتت ولان ولان
وهسه ياجنه الي حيرتني اكثر مروه احبها يمكن مثل حب ابوي الامي احبها بخبال بس مروه ما تشبه امي

گعدت يم قبر ابوي وانا احچي ويا بعتب
- - يابه شوف الحب وين وصلنه انت من السجن للگبر وجنه اتواسدتك وانا محتار وامثال ام رامي وطالب عايشين
واحنه كاسرنه الظلم والقهر يابه اول مره بحياتي ما اگدر اسوي شي
يابه انا ابنك ومحتاجك واساسا ما اعرف شسوي او شنو الي اريده

بقيت كاعد والدنيا ليلت عليه طلعت من المقبره ورحت اخذت غزفه بالفندق سبحت وطلعت اكلت شويه ورجعت
زرت الامام وانا صافن على حالي وكل شويه ارفع راسي للسما واطلب من الله ايساعدني

رجعت للفندق ودخلت للغرفه غيرت ملابسي ونمت اي نمت يمكن من التعب گعدت الفجر رحت
صليت بالامام واتريگت ورجعت للبصره وصلت وره الظهر بوجهي ع المحل شافني امين اجاني
- - الله يساعدك جهاد
جاوبته// هلا امين
- - اشلونك
- - الحمد لله
- - ليش اجيت للمحل جان رحت للبيت ارتاحييت

هزيت راسي // لا شويه ابقى وبعدين اروح شلونه الشغل
- - من احسن ما يكون
باوعتله وانا عاكف حواجبي // شبيك شو مو على بعضك
امين // زوجتي بالمستشفى
اتفاجىت //شخيرها
- - ما اعرف بساع بساع واگعه وماخذيها للمستشفى

جاوبته // هاا وگاعد اهنا شتسوي ما ترووح يمها
هز راسه // لا زينب وامها واختها باقيات وياها
وگفت وگتله // مو مثل اذا زوجها يمها راح تحس بالامان اكثر وتطيب بسرعه رووح بابا ولاتخاف ان شالله
مابيها بس الخير
امين // الله كريم كله بايد الله

وصلت يمه وطبطبت على ظهره //والنعم باالله خايف ع الطفل
هز راسه وباوعلي //ايي جهاد ما تعرف احساس الخوف انو تفقد ابنك
ابتسمت //. لا تخاف ياالله شمنتظر رووح

راح امين وانا بقيت بالمحل اراجع الشغل وبالي مو يمه يم المصيبه الي خليت نفسي بيها
(مو عبالكم ما اعرف انا خليت نفسي بمشكله من الصعب اطلع منها )
صار المغرب واجه صادق سلم عليه وسالته // وين چنت
صادق بعدم اهتمام // يعني وين يم الحب

ابتسمت وهزيت ايدي // ههههه شنو ما تعرف مرت اخوك بالمستشفى مو المفروض تبقى بالمحل وتخلي
اخوك يروح الزوجته
صادق // وانا هم رايح الخطيبتي
- ها شبساع صارت خطيبتك
هز راسه // ايي وحتى اهلها عدهم علم يعني حتى من ترحون تره شي روتيني لان احنه متفاهمين على كل شي

باوعت الصادق وخابرت امين  سالته // ها امين شلونها المريضه
امين  گلي // على الله توهم دارولها بطل دم لان عدها فقر دم حاد
ان شالله ما كو شي كل حامل يصير عدها فقر دم محتاج شي كلي
- - تسلم جهاد الله يخليك انا راح ابقى اهنا يمها
- - اي ابقى يحتاج اجيك

- - لا ما عندي شي ابقى لليل وارجع خلي صادق يعزل المحل وانت باوعله تره ما يقفله عدل
-—اي. اكيد بدون ما تكول
عزلنا  ورحت للبيت صليت وكعدت اباوع للساعه لان اعرف هي تحچي بالتلفون وره الساعه 11 انا احس بنفسي فارغه
حتى ما اعرف بشنو افكر الساعه 11وثلث ظبط رمشت عليه
فتحت الواتساب هي كتبت
= اشلونك جهاد

- - اهلا مروه ضروري اتصل
= اي
واتصلت جاوبتني = الو
- - الو وياچ
= شلونك جهاد
- - تمام الحمد لله
سالتني = بشر جهاد شسويت

جريت نفس قوي وحاچيتها بحده // قبل ما اگلچ شسويت  وبدون ما تگليلي اصرف نظر وبلا عصبيه اريدچ تسمعيني
للاخير واذا ما سمعتيني يامروه راح اسولف الامين واخلي يجيبج ويجبرج تحچيين كل شي واخلي يطلگج وبعد ما
تشوفين ابنچ سمعتيني مروه
هي ما جاوبت
رديت سالتها بعصبيه // سمعتيني جاوبي
ردت بعتب = مو چنك جاي اتهدد

جاوبتها بنفس العصبيه // اششش لا تحچيين زايد شنو اهدد ليش انا شريد منج واهدد
هي ردت بخنكه = كلامك بشنو تفسره
اتنفست وگلت // انا اريدچ تسمعين كلامي
= اعرف شتريد تگول انو هذا الي اسوي غلط
حاچيتها بنتر // ها وانتي شايفته صح
= ايي

اهنا فقدت اعصابي // ولچ مروه انتي متزوجه وجاي تردين تنهزمين من رجلج تعرفين شنو يعني مره
تنهزم من رجلها
يعني لا بالشرع وارد ولا بالقانون ومو بس هيچ راح   ترجع العداوه واخوانچ راح يلبسهم العار طول عمرهم واذا
عرفو انا الي مساعدج راح انحق ويجوز انكتل لان يعتبروني خاين وناهبچ تعرفين شنو يعني
لو امين لو صادق يكتلني

——— ومو عبالج خايف لا ما اخاف بس من ربي بس من تنهزمين شتتصورين يوسف يسكت صدكي راح
يفضحج ويفضح اهلج
ومو بعيده يوسف ياخذ زينب ويعذبها بگد عذابچ واكثر واي احد بمكانه يسوي هالشكل واكثر
فكري يابت الناس فكري لا تضيعين نفسچ وابنچ
جاوبتني  بهدوء = انا فكرت وراح اگلك شي اذا چنت قبل مصره بنسبة سبعين بالميه على الهجره لا هسه مصره مليون
بالميه واحب اطمنك يوسف ما راح يسوي شي واخواني انا اتفاهم وياهم

جاوبتها // ها خوش واثقه بنفسج
= اكثر مما تتصور واعيدها واكررها  انا قررت وخلص طلبت مساعدتك تريد اتساعدني اهلا وسهلا ما تريد رحم الله
والديك ما عليك بيه ولا چنك سامع مني لو نص كلمه ولاتنسى انت وعدتني ما تجيب سيره للموضوع

جاوبتها بعصبيه وانا لو بيدي اطلع من الشاشه اشبعها كتل // ولچ مروه من يمته صايره هيچ صلفه وتحچيين هالشكل
جرت نفس وردت بعتب = مشكور بس انا مو صلفه لا غلطان  انا مظلومه واريد استرجع حقي وحقي اطلع منا
وابني يكون وياي
جاوبتها بهدوء // مروه افتهمي انا خايف عليچ وخايف على كرامتچ

= لا تخاف صدكني ما راح يصير شي
- - شلون ما يصير شي
= مثل ما اگلك يوسف ما راح يتحرك لو يفك حلگه بكلمه واخواني انا اقنعهم وانت ابد ما راح تصير بالصوره
جاوبتها // اشو انتي واثقه بنفسچ

= اي واثقه بنفسي وبالي. اسوي جهاد انا طلبت مساعدتك لان اعرف بيك انت تكدر تساعدني وهسه انا ما اطلب
منك المستحييل انت بس دليني بالشخص الي راح يساعدني وانا افتهم منه
حاچيتها بنتر // كافي مروه شنو الكدامچ مو بعينچ ادليج شنو ولچ افتهمي هذوله الي ايسفرون تره عصابات
ذاك من ذاك الشريف بعدين لا تنسيين انتي مره وعندچ طفل اشلون اخليچ تجازفين بعدين اخوتچ ما فكرتي بيهم

جاوبتني بعصبيه = اخوتي منو او وينهم اذا چنت ...خليها سكته
- - شبيج مروه

هي بنفس العصبيه = لا تسالني شبيه لان انت الي تعرف انا مسجونه بذنب ما سويته واتحملت كل شي الخاطر اخوتي
الي ما كلفو نفسهم يجون اليوسف ويوكفونه عد حده اتمرضت امي عدهم ما عدهم خابرو خليها تجي ما كدرو يجون
ياخذوني ويفهمونه اشوف امي وارجع من اتوفت ما دريت اله وره عشر تيام اخوتي ايحبوني بس التهو
عني بشغلهم وبزوجاتهم وببيوتهم محد فكر بيه هسه اتريدني افكر بيهم اي انا فكرت بيهم والي
راح اسوي مو غلط لا اكبر صح  وصدكني
يوسف ما راح يحچي واخواني راح يتقبلون فكرة هجرتي

جريت نفس //غير اتفهميني لا تنسيين اذا عرفو انا راح افقد كل شي حتى حياتي ويوسف راح ايئول الكلام
جاوبتني = لا تخاف جهاد انا دارسه الموضوع ومخليه كل شي كدام عيني
———شلون فهميني
= من گتلك اريد مساعدتك بس حتى الناس ما تستغلني اخاف على نفسي وعلى ابني
وانت نفسك گلت همه عصابات
- - اي مروه لا يغرج الي تسمعينه وتشوفينه بالاخبار

= اي انا هم اشوف تقارير واخبار لذلك اتصلت بيك واعرفك انت ابن سوك وتعرف هواي ناس لذلك طلبت
مساعدتك وراح اعيدها واكررها ياجهاد
انا بيك او بلياك راح اهاجر واذا تحچي لاخواني صدگني انتحر وتشيل خطيتي وخطية ابني
رديت عليها // لا تهددين مروه

= ما اهدد بس انا مقهوره على نفسي جهاد انا ما بقالي بالدنيا كلها بس ابني واذا ما طلعت ابني راح ياخذونه
واتطلك افتهمت فاانا ليش اتطلگ وابني يروح مني لا خلي اتطلك وابني عندي
= جهاد انا فكرت الف مره ومره بعدين اتخذت قراري ومن طلبت مساعدتك لان اعرف انت رجال وگدها
وهسه هم اكلك انا ياجهاد بمساعدتك او بدونك راح اهاجر حتى لو انت ما ساعدتني

عرفت هاي من المستحيل تغير رايها واذا حچيت الامين اكيد راح تكتل نفسها جريت نفس وكلت الها// يمته تردين نبدي
هي ردت بفرح = بكيفك
- - وطلعتج من الحقل
كالت // ادبرها جهاد
سالتها //شلون اتدبرينها لازم تفهمين اي غلطه تكلفج حياتج وحياتي

ردت عليه // لا تخاف جهاد حاسبه الكل شي راح امشي لحد ما اوصل للشارع العام وبعدها اركب سياره

من اسمعها النار الي بگلبي تزيد ودي اطلع الها واشبعها كتل بس انا مجبور بيها جاوبتها
- - لا مو هيج شنو تركبين سياره لا مو صحيح اسمعيني بيوم الي تقررين انا اجي اخذج هي براسي براسي
ردت بسرعه = باچر جهاد
دخنت جكاره وسبحت نفس // لا حتى ابعد الشك عني لازم اسافر قبلچ افتهمتي

= شلون يعني
- - يعني خليها اسبوع اليجي وانا قبل تلث تيام اسافر وافهمج تمام
ردت // ان شالله بس خلي ابالك ياجهاد اذا غدرت بيه صدگني اكتل نفسي وكدامك
اتنفست قوي // اطمني مروه لا تخافيين اهم شي اتصرفي عادي وكافي لا تهددين تره انا جهاد ما اتهدد
= ادري لذلك طلبت مساعدتك

سدته حتى بدون ما تسمع ردي بقيت افكر شسوي وانا اسمع اصرارها انو تكتل نفسها حاولت انام والصبح
طلعت للمحل قبل الظهر رحت يم امين وگتله//  يمكن بعد يومين او تلاثه ارجع اسافر
امين // ليش جهاد شصاير
جاوبته //ما صاير شي اروح اجيب البضاعه من بغداد

امين // وليش ما تطلبها ويحملونها ويوصلوها لو تطلبها ويجيبوها من الميناء مثل كل مره
باوعتله // مو اكو اجهزه جدد وذني لازم افحصهن كدامهم واتفق ويه التاجر على مهله للتصريف شتگول
امين // مثل ما تشوف انت بكيفك

رحت للبيت وانا محتار بامري ما اكدر اخذلها وبنفس الوقت ضميري ايانبني شلون ما اكول الامين صار
عندي راي احاول اقنعها تگلي شنو الي مخليها واثقه انو يوسف ما راح يحجي وحتى اخوانها ما راح يعارضون
سفرها بس اذا ما اقتنعت شتسوي جهاد لازم من هسه تقرر

— — شقرر
—- — شنو شتقرر ولك جهاد هاي مروه هاي حبك وحياتك انت عايش بس لان هي عايشه
  هزيت راسي // اي وهسه انت الي راح تبعدها عنك وبايدك
جريت نفس // شسوي مروه اتعذبت شالت هموم الجبال ما تشيلها وهي من حقها ترتاح
  —— وانت جهاد تكدر اتفاركها
   هزيت راسي // لا
 
— — شراح تسوي ؟
  —— ما اتركها لو اعرف انطي عمري وحياتي
  —- بس هاي هجره مو سفر من محافظه المحافظه
—— ادري وما راح اتركها خلي بالبدايه اامن عليها وبعدين يصير خير

وره يومين سافرت اخذت جوازي وياي واخذت فلوس قبل يوم صرفتهن دولارات واخذت وياي فلوس عراقيه
واتفقت ويه ابو صبر نتلاگه بنفس المطعم واجيب وياي فلوس تكفي وهو يروح ايوصلنه الاربيل ويعرفنه بالناس
الي ياخذونه التركيا

وصار الاتفاق انو يوم الثلاثاء العصر نلتقي بالمطعم جان يوم احد انا خابرتها وگتلها انو الثلاثاء الفجر
اجي للحقل واخذها لكن المفاجأه يوم الاثنيين الظهر هي خابرتني وگالت انو هي وصلت البغداد وهسه هي بالگراج

//////////////////////////////////////////////يتبع