رواية بعد فوات الأوان الفصل الخامس وثلاثون 35 - بقلم آنين الليل

جهاد
ايامي تمشي رتيبه بالنهار شغل وبالليل آه من الليل تفكير وجگاير والنوم ما يجيني من اطلبه
مجرد غفوات افز بيها اتحسس فراشي وانا اشوف ابتسامتها وعيونها الناعسات وترجع
تغمضهن وتنام

اباوع الها وانا گلبي يريد يطفر من مكانه بعدين اغمض عيوني واحچي
-  -اصحى جهاد كافي الي تسوي كله خيال ولا يمكن يتحقق

ما اگدر انساها رغم كلامي وياها ما اتخطى اي حاجز لكن بعمري ما انسى رجفتها وشهگتها بيوم
ما زفيتها بايدي انا وحجي عبد زفيتها على سجنها الي خليناها بي والي محد من عدنا حاول ايدافع
عنها چان اهم شي عدنا انو نحافظ على حياة امين وصادق وحتى طالب ابوها الي يدخل اولاده
من مصيبه المصيبه

بهاي الايام صار كل الي ايشوفني ينصحني لازم اتزوج واكون اسره واستقر
ولازم انتبه النفسي لان العمر يمشي وما ينتظر احد
من اروح اسلم على حجي عبد او هو يجي يمنا ايكلي

- - بابا جهاد لازم تنسى وتنتبه الحياتك الي بعمرك اولادهم بطولهم الى متى تبقى

ما يدري انو حياتي انتهت بوفاة جنات وابتدت من شفت مروه
وحتى امين دووم ايگلي //ياالله خلي نفرح بيك وصادق ايكول انا ما اتزوج اذا مو انت تتزوج

من اشوف لهفتهم عليه وحبهم واحترامهم الي احقد على نفسي واكرهها لان انا جاي افكر بانسانه اقل
ما تكون هي عرضي وكرامتها من كرامتي

صرت الوم نفسي واكرهها لان اتجاوزت على امين وصادق وهمه مامنيني على نفسهم
وهنا فكرت بالاستقرار ولازم انسى ولازم ابدي من جديد وهذا قراري وبالنهاو من ابقى ابحدي ويمر خيالها
اگوم من مكاني واحاول اشغل نفسي باي شي بس حتى ما افكر بيها

لكن مجرد ما اروح للبيت الوم نفسي لان اريد ابعد عنها ومن ابعد عنها منو يبقالها منو يفكر بيها وانا اشوف
الكل ملتهي بنفسه ومشاكله

صدگوني انا ما اعرف ليش هالشكل اريدها رغم ما محاچيتني ولا انا مصارحها مجرد اتمنيتها تكون الي
لكن مروه غيرت نظرتي اتجاه النساء وانا اشوفها شلون محافظه على شرفها رغم عذابها من ابوها
وجمال وهسه من يوسف واهله

چنا راجعين من يم جماعه ابو امين ضاحك عليهم وماخذ منهم فلوس حتى يفتحون معرض سيارات
وهو اخذ الفلوس وطلع خارج العراق هو وزوجته وابن جمال بيومها صرت اشوف صورة امي واطابقها
ويه صورة طالب لان اثنينهم نفس الحقاره

الناس الي اخذ منهم الفلوس اجو على امين وطالبوبفلوسهم ولان هو ابنه لازم يرجعلهم الفلوس
وحتى من فهمناهم انو هو طالع منهم وهمه ما عليهم بي ما اقتنعو ورادو فلوسهم وصار الاتفاق انو ينطونه
مهله بلكي نعرفله طريق واذا ما عرفنا عنه شي راح نرجع ونتفاهم وياهم
وهذا الشي صار بوجود حجي عبد وجمعه رجل امل ما تركو امين وكفو ويا صارو يجون ويرحون
بس حتى يلگون حل لهاي المصيبه الي دخلهم بيها طالب

امين چان كلش ضايج ومهموم وحجي عبد گله //عمي ولا يهمك نلگالها حل
امين //وين الحل وشلون الناس تريد فلوسها وابوي ما اله اثر
حجي عبد //ادري عمي واذا ما رجع ابوك اعرف شلون احچي وياهم
امين //حجي لو ابيع الوراي والگدامي ما اسددهم

حجي عبد هز راسه //ادري بويه انت ولا يهمك وحاولو توصلون الاهل مرته  او البت عمك يجوز عدها خبر
امين // رحنا البت عمي طردتنا من الباب وگالت هي ما تعرف عنهم شي وصارت اتعد وتغلط وانو هو حرمها
اتشوف اخوها
الحجي // واهل مرته
امين //اهل مرته ما اعرف شنو طينتهم ناس ما مهتميين ومن رحنا انا وجهاد نحچي وياهم كالو
هي عد رجلها وحتى ما تجينه

الحجي // يجوز ايچذبون
امين // يجوز عمي لو شايفهم ناس مخربطين اللهم يا كافي
الحجي هز راسه // ولا يهمك يصير الها حل ان شالله
امين //حجي والله ما اعرف شلون اجازيك 
حجي عبد //هاا تره ازعل انت وجهاد اولادي وانا مسؤول عنكم

امين //والله حجي عمامنا وعشيرتنا ما وگفو النه
جاوبته //لان ملو من تصرفات ابوك
امين جر نفس //اي والله صحيح
حجي عبد //هسه هذا الحچي عوفو بلكي منا لتلث تيام لاگيله رقم عنوان هو متصل
امين //بلكي
سالته //حجي واذا ما اتصل

الحجي // اذا ما لگينا راح اخذ جماعه وارجع على الناس واقصد المبلغ
امين // شلون اتقصده وما ليش انا ادفع الهم
الحجي //لا ما مقبوله منك امين شنو تريد تاكل حلال الناس مثل ما انت فلوسك عزيزات عليك الناس
همه ما لاگينهن بالشارع
امين //ادري حجي بس انت اعذرني يعني بدل ما هسه هو عينه علينه وينصحنا ويدلينه ع الطريق الصحيح
جاي ايذبنا بمصيبه ما ندري شلون انحلها

الحجي // اتوكل على الله بابا وانا اعرف شلون احلها
امين // طال عمرك حجي
انا گلت// والله حجي ما ندري شلون انجازيك
باوعلي بنص عين // تريد تجازيني اتزوج واستقر
جاوبته وانا اتنفس //ان شالله حجي

الحجي // ايي ابقى انت ان شالله ان شالله وكل شي ما مسوي بابا الله يكول اسعى وانا اعينك شنو تكبر
بعد الي بگدك اولادهم بالاعداديه اسمع نصيحتي انتبه النفسك جهاد وكافي

هزيت راسي  وتمينه ساكتين الحجي نزل يم بيتهم وانا وامين رجعنا واحنه بالسياره  فاتحني على اخت
زوجته هي خوش بنيه ومؤدبه وگلي انو هو لو ما يعرفها ما حاچاني
هزيت راسي وانا ساكت واكول ويه نفسي
- - حقك ما تدري روحي وگلبي وعقلي مو وياي
سالني // ها شگلت
بلعت ريگي // يصير خيير

دخلت للبيت وگعدت ع القنفه اتذكرت شريط حياتي  امي والسوته وهسه هي عايشه ويه زوجها وجهالها بكلى وحده
ويمكن هي مريضه لو ابوي وسجنته وشلون مات وره جنه لو اختي الي كل شي ما شافت من هالدنيا

بقيت ادخن واتمددت ع القنفه وغفيت گعدت الساعه تلاثه ما گدرت اتحرك حسيت بجسمي مكسر ومصخن
بقيت اريد بس اگوم انام بالغرفه او اجيبلي بطانيه اتغطى ما گدرت ورجعت غفيت الصبح اتصل امين وهو يسالني
—هاي انت وين
انا جاوبته وصوتي مبحوح //امين انا كلش تعبان
- - شبيك جهاد
- - يمكن مصخن جسمي مكسر
  - - جايك

دقايق واجه عليه واخذني للطبيب الي انطاني علاج وضربني ابره وكال فلاونزا قويه ضاربته ولازم يرتاح وياخذ
العلاج ويشرب سوائل
رجعني امين للبيت ودخلت للغرفه غيرت ملابسي وغسلت ورجعت ع الچربايه اتمددت وامين راح والظهر
رجع جايبلي شوربه وبالليل هم اجه جابلي عشا وبقى بات يمي وانا اتوسل بي يروح البيتهم لكن هو ما قبل

الصبح سوالي كوب حليب وانطاني علاجي وطلع للشغل
بقيت بالبيت ابحدي واشوفه شلون موحش وبارد احس ما بي حياة وصرت افكر واكول
- - لازم اغير من حياتي  مثل ما گال حجي عبد كافي اركض وره سراب يمكن هسه آن الاوان انسى واتزوج
وابدي حياة جديده بلكي الزواج ينسيني ويخليني اعيش حياتي ولو ما اتصور راح انسى

الظهر اجه امين وجابلي غدا وردت افاتحه على اخت زوجته لكن بيني وبين نفسي گلت خلي انخلص
من سالفة ابو حتى نتفرغ الخطبتي وزواجي

العصر گمت سبحت وطلعت للمحل امين من شافني ما قبل وكلي //ليش طلعت
جاوبته //ضجت ابحدي
امين //حقك تضوج شنسويلك نحچي نريد ما تصيرلك چاره
ابتسمت وجاوبته //لا ان شالله تصير بس خلي نخلص من سالفة طالب
امين جر نفس // والله شگلك ما مبينه راح نخلص

- - الله كريم ان شالله تخلص لا تفكر ربك يصفيها صدگ رحت العمامك خابرتهم
امين بعتب // اي خابرتهم وعمي جمعه هم رايح وحاچي وياهم بس همه ايكلوله ما علينه بيهم
- - ولا تهتم امين انا گدامك وخسار وياك
امين اتقرب مني وگال //تسلم جهاد والله وگفاتك ما تنسي

ثاني يوم رحنا على الجماعه ويانه حجي عبد وابو عادل وجمعه ومن گعدنا صار حچي وغلط ومهادد لكن حجي
عبد سال شيخهم // حجي الجماعه من شاركو بالمعرض اجو شاروك لو اجو الامين خلو عنده علم
الشيخ // لا لا شاروني وما ادري اذا مخلين علم عد امين واخو
باوع الهم الحجي //ها عمي جيتو شفتو الولد من انطيتو الفلوس هذا الولد (واشر على امين ) چان حاضر

جاوب واحد منهم// لا حجي انطينا الفلوس وهو كتب بيهن وصل
الحجي // يعني امين ما يدري
واحد منهم // ما نعرف بعد ابو گايله او لا
حجي عبد // زين عمي اذا مشتغلين وبايعين ومشترين ورابحين تنطون ثلث ربحكم الامين واخو
- - لا حجي ما ليش

حجي عبد //ها عمي چا امين هم ماليش يخسر الكم انتم ما شفتو ولا عرفتو لمن ما ابو اخذ الفلوس يعني هو
ماله شغل
واحد منهم وگف وگال للحجي // لا هاي ما مقبوله منك حجي
حجي عبد بنتر وهو اياشر بايده // اكعد وخلي اكمل الولد هذا الي تشوفونه يشتغل عامل عدي والبيت
الگاعد بي بيتي كل شي ما يملك ابوهم ذابهم ما يدري بيهم شنو اكلو شنو شربو وامين من عمره عشر سنين
وهو يشتغل عدي نجاروشبع ضيم على ما اتعلم ولماله شكم فلس هسه تردونه يطيهن الكم

الولد // اي حجي هاي مشكلته
حجي عبد // شوف عمي تره بالقانون انت ما الك شي يم امين بس احنه ما نريد انسويها طلايب وشرطه
لذلك (باوع للشيخ وكال ) امين راح ايقصد الكم المبلغ ترضون اهلا وسهلا ما ترضون الكتلتو امين انتم تخسرون
الحرگتوبيتهم هم كل شي ما تحصلون
شيخهم // شنو تريد تگول حجي

- - اريد اكول هذوله الولد مو مثل ابوهم يستحرمون ياكلون فلس حرام لذلك انصحكم تقصدون الفلوس ليش
تخلصونها طلايب لو تشتكون بالحكومه وما راح تحصلون شي

وبعد شد وجذب صار الاتفاق يتقصد المبلغ كل شهر يدفع قسم رجعنا انا وامين بعد ان وصلنه الحجي
ردت افاتح امين انو آنا وافقت استقر واتزوج اخت مرته لكن شفته ضايج من الي سوا ابو حاچيته
- - أمين ولا يهمك الي يصير عليكم يصير عليه
هو جر حسره وهز راسه // تسلم جهاد قابل انت مقصر
- - واجبي واقل من واجبي لا تضوج

امين بحسره // الله كريم تصفى ابحدها
وصلته  للبيت وباوعلي گلي //مو تنسى علاجك
هزيت راسي ودخلت للبيت واخذت ملابس فتت للحمام سبحت وطلعت سويت كهوه شربتها بالصاله
ودخلت للغرفه اتمددت ع الچربايه والجكاره بايدي وانا افكر
- - شنو جاي تسوين هسه هو يمچ لو ابحدچ گاعده لو نايمه اااخ يابنت الحلال اعتقيني اطلعي من راسي
ليش كل ما اريد انساچ اتذكرچ بالزايد

- - بس بعد خلص مروه لازم اعيش حياتي واستقر ويصير عندي بيت واطفال اي هو هذا الي راح يصير
- - جهاد انتبه بعد ماكو اعذار لو تاخير كافي انت مو زغير
هزيت راسي - - اي صحيح بس من اريد انسى مروه راح اعيش بدون عقل وبدون گلب وبدون روح يعني بالاساس
انسان ميت
جريت نفس واجتني رساله ع الواتساب گلت // هسه يابطران مراسلني
فتحت الواتس بتثاقل شفت الرساله من مروه الي مسجلها ( جنة روحي ) ما صدكت گلبي صار يدك الف بالثانيه
صرت ارجف ايدي ما تكدر تشيل النقال فتحتها وشفت كلمتين // شلونك جهاد

يعني هي ما متوهمه راسلتني الي وباسمي ما اوصف حالي بذيچ اللحظه بين الفرح وبين الخوف عليها وبين الخجل
من أمين لان اراسل باخته يعني انا خاين لكن انا معذور
رديت عليها // مروه شكو شصاير انتي بيچ شي
= لا انا زينه ما بيه شي بس ...
- - شنو بس فهميني
= محتاجه احچي وياك اذا فارغ
- - ما عندي شي انا راح اتصل

اتصلت وانا گلبي يرجف خوف عليها اتصلت اتاخرت حتى جاوبتني سمعت نبرة صوتها الخايفه
وهي اتگلي برجفه = الو
- - مروه شكو
ساكته وما تجاوب رجعت سالتها // مروه شكو شبيج فهميني
هي جرت نفس وبنفس الخوف = جهاد محتاجه مساعدتك

نزلت التلفون من ايدي وصرت اجر نفس قوي شهيق وزفير اكثر من تلث مرات جاوبتها // شنو صاير
= اتذكر من دزيتلي رساله وگتلي انت مستعد اتساعدني وانا ممكن اعتمد عليك
- - ايي مروه ولا زلت بس غير افهم
جرت نفس = راح افهمك لكن اول مره اريد اسالك
- - شنوومروه ؟
= منو اغلى واحد عندك بالدنيا

ردت اكلها ماكو اغلى منچ لكن ما گدرت احتراما الوضعها جاوبتها //اختي الله يرحمها
هي ردت = وانا احلفك بروحها هذا الي راح احچي ما تجيبله سيره للموت
- - هذا هو صار
= لا بالبدايه احلف بروحها الاختك
- - مروه شغلتي بالي مبين الموضوع خطير

= احلف جهاد لو ماكو احذف رقمي وانسى انا اتصلت بيك وصدگني ما ازعل
نفخت وحاچيتها  // وروح اختي ما اگول اي شي اسمعه منچ (اتحسرت وگلت الها ) ما اريد احلف بانسان
عزيز ثاني

بقت ساكته ما ردت حاچيتها // احچي مروه لا تسكتين
هي جرت نفس وكالت = جهاد اريد اهاجر
من سمعت كلمتها ما اوصف الكم مقدار المفاجآه من الي سمعته رديت عليها // شنو
= اريد اهاجر
- - انتي تعرفين شنو كلتي
جاوبتني بثقه // اي اعرف وراح اعيدها عليك اريد اهاجر جهاد اريد اطلع ما ابقى اهنا

شعلت جكاره وصرت ادخن وجريت نفس // على كيفچ وفهميني
=  اتذكر فد يوم انا صرت بموقف صعب هذا الموقف راد ايكلفني حياتي وانت نقذتني منه
- انا ؟

= ايي جهاد انت من چنت زغيره وجمال حاول يبتزني بشرفي وانا ما چان گدامي اله اسولف الامين واعرف هو
ازغر مني وما يگدر يسوي شي بس ما چان عندي حل اله اخوي بيومها قررت انهي حياتي رغم تطمينات امين اليه
وانو ما راح يعيدها وياي لكن انا اشوف امين زغير بالعمر وجمال چبير وحقير ونذل فقررت انهي حياتي حتى جمال
ما يدنس شرفي ومن اجه امين شفت بعيونه هدوء وفرحه وعرفت انو خلص جمال لا يمكن ايعيد هذا الشي وياي
بعدها من اجه جمال وشفت الكتله الماكلها وامين گلي انو انت الي سويت كل هذا الشي بوكتها عرفت انت
مو بس صديق الامين لا انت اخ واخ النه كلنه ممكن نلجأ الك من نحتاجك وانا هسه احتاجيتك

(هي اختنكت بعبرتها وصارت تشهك وتبچي )
- - على كيفج وبدون بچي اريدچ تسمعيني ها جاي تسمعيني
( هي سكتت وانا استردفت ) شوفي مروه انا افديچ بعمري اقصد افديكم كلكم انتو اهلي بس سالفة انو تهاجرين صعبه
جاوبتني بزعل = خلص جهاد انسى ما چني حچيت شي بس انت حلفت الي بروح اختك ما تجيب سيره
- - لا ما انسى افهم بالاول انتي ليش فكرتي تهاجرين شنو السبب مو انا (اتلكات بالكلام ) اا اخوانج واخواتج ينتظرون
بس كلمه حتى ترجعين يمهم

= خلص جهاد گتلك انسى حچيت اي شي وياك
اهنا انا صرت عصبي بقدر شوقي ومحبتي صرت اعيط عليها //شنو انسى بكيفچ انتي تحچيين وبلحظه تبدلين
وتگولين انسى انا اريد افهم سولفي كل شي انتي طلبتي مساعدتي وهسه انا راح اعتبرچ انسانه غريبه ما اعرفج
استنجدتي بيه وهسه سولفي وانا اسمعج واوعدج ما راح احچي وراح اساعدج بالي اكدر علي

هي صارت تشهك وتگلي = مي خالف باچر اسولف
- - لا هسه مروه تحچيين كل شي اذا بقيت الباچر تلكيني الصبح بالحقل مزروع
هي ردت عليه باستغراب = الحقل انت تندله
- - اي اندله هسه مو هذا موضوعنا فهميني مروه ليش اجت على بالچ فكرة الهجره

= جهاد كل هذا الي سويته والي راح اسوي كله الخاطر عيون ابني وصدگني اذا انت ما تساعدني انا
راح اسوي الشي الي براسي ومستحييل اتخلى عن هاي الفكره لو تكلفني حياتي
حاولت اهدئها // ابنج من تتطلگين حتى لو يبقى يم ابو هم راح تشوفينه
= وانا مستحييل اخلي يم ابو
- - ممكن تهدين وتفهميني

وبدت تحچيلي شلون زوجة يوسف جاي تضغط علي حتى يطلگها ويسجل الولد باسمها
جاوبتها // مو بكيفها اكو دوله وقانون واذا كل ذوله ما گدرو يمنعون هذا الشي اكو زلم تاخذ حقج
وترجع الج ابنج
= جهاد كل شي اعرف بس اذا صار وتطلگت ابني مستحييل اشوفه حتى لو يوسف قبل اهلي ما راح
ايقبلون وراح ...

- - لا تسكتيين مروه انتي طلبتي مساعدتي وانا راح اساعدج بس رسيني على بر وسولفيلي يجوز
الگالج حل واذا  ما لكيت وعجزت صدكيني راح اساعدج بكل شي لو اعرف ادفع روحي الخاطرج
= انت وعدتني تساعدني
- - وانا عد وعدي
= وحلفت بروح اختك ما تحچي لو شنو يصير
—— اي ما احجي لو اعرف امووت

وصارت تسولف الي شلون عرفت بقصة ازهار وجمال وانو بيناتهم علاقه
جاوبتها // مستحييل
= شلون مستحييل

- - لان اكو حوادث تصير العشاير ابيناتهم ايسدوها بس انا رحت بنفسي وقريت التقرير انو هي
چانت راكبه وره وبعدين خلت ايدها على الاستيرن واصلا هي السبب بان السياره تنگلب
= هاي يم المستشفى والشرطه لكن الحقيقه انا سمعتها وشفتها
- - سمعتيها يجوز بس شلون شفتيها

ما جاوبتني رديت عليها // مروه الوضع ما يتحمل سكوتج احجي
= رسايل وصور بين ازهار وجمال
انا عبالك نايم وفزيت // انتي شتكولين
= اي شفت رسايل ابين ازهار وجمال
- - وين
= بنقال ازهار
- - شلون شفتيهن شجاب نقال ازهار الچ

= ذاك اليوم اجه يوسف وهو عصبي ومن طلع للحقل نسى نقاله عاد اجته رساله انا هيج قريتها شفتها
من مرته تگله لازم تسجل محمد باسمي وتطلك مروه لو ماكو افضح كل شي انا حاولت اتصرف بهدوء
من قريت كلمة افضح شكيت بالامر 

ومن عرفت انو هنه راحن للزياره گتله حمودي مريض كلش  واخذني للطبيب وبيومها امه وزوجته بالزياره
فيوسف مرني على بيتهم وهو طلع ما اعرف وين راح
من بقيت ابحدي بالبيت نزلت الغرفة امه وصرت ادور بغراضها وشفت نقال ازهار فتحته وقريت
الرسايل وعرفت بان مرته تعرف بعلاقة اخته ويه جمال وهي جاي تضغط علي حتى يطلگني وتاخذ الولد

- - زين مروه الرسايل بجهازج
= ها لا منين بجهازي ليش هو يوسف يعرف عندي نقال
- - ولو ما اقتنعت بچذبتچ بس ليش تردين تهاجرين الكره بملعبج وانتي المسيطره
= لا انا ما اچذب هاي الحقيقه ان......
قاطعتها // مروه اذا هذا الكلام صدك ليش تردين تهاجرين

هي بچت وحاچتني بحرگه وحچت بعصبيه = لان اذا افضح يوسف واطلب الطلاگ اخوتي بنفسهم ما يقبلون يبقى
ابني عندي اصلا بعد ما اشوفه لان راح ايحقون يوسف وراح اعم على اختي وحتى لو سالم ايحبها هم تتطلگ
باعتبار انا شوهت صورة اخته وبت عمه وحتى لو بقت سماح ويه سالم ما راح لا ام يوسف ولا ضحى ايتركوها
بحالها هسه عرفت لو بعد تريد توضيح جهاد  لا تخليني اتندم طلبت مساعدتك

—تتندميين ؟
= اي مو عبالك انا ما اعرف مجرد كلامي وياك حرام وما يجوز لكن الضيم الي مريت بي والذل والقهروالخوف
على  ابني يخلوني اسوي اكثر
نفخت // لا مروه لا تكولين هالشكل بس انتي تعرفين انو هذا الي تطلبينه شي اقرب للمستحييل
= اعرف جهاد بس انا ما گدامي اله هذا الطريق وطالبه مساعدتك تگدر كثر الله خيرك ما تگدر معذور ولا كأنك
سمعت من عندي لو كلمه

- - ها وبهاي الحاله شتسويين
= انا اعرف اتصرف ابحدي
زمخت عليها // كافي ما اسمع كلمة اتصرف ابحدي مروه ما اريدج تتهورين والحق وياچ بعدها يصير عليچ
= مو اتهور القضيه اكبر من هذا الي سمعته يعني فووگ ما اتحملت كل شي يوسف ياخذ ابني لو يسجله باسم
مرته لو من تنكشف الحقيقه ياخذه ومن يكبر الله اليعلم شنو راح ايگله عليه وشلون راح ضحى تربي وشنو
يشوف من ضيم لا جهاد انا قررت اخذ ابني واهاجر  سواء ساعدتني او لا

سمعت اصرار بكلامها ولا يمكن اتحيد عنه جاوبتها // زين مروه اهدي وفهميني شنو نوع المساعده الي ترديها
= ابني ما اگدر اطلعه اله بموافقة ابو وهو حتى ما عنده جنسيه
جاوبتها // خليني افكر واشوفلج طريقه واسأل واتأكد  وبعدين يصير خير بس لا تسووين اي شي اله بعد
ان تستشيريني لازم  تعرفين هذا الشي الي جاي تسوينه مو هين احتمال يصير بيها كاتل ومكتول

= وانا ما اريد يصير هذا الشي
- - راح يصير مروه اذا اتهورتي وما فكرتي بعقل
= جهاد انت بس ساعدني صدگني كل شي ما يصير انا دارسه كل شي
بقيت ساكت ما جاوبت هي ردت عليه وگالت // جهاد انا باالله وبيك ارجوك ساعدني

دخنت جگاره // اسمعيني زين مروه انا راح اساعدج اول شي راح اسال وافتهم من جماعه بعدها راح اتصرف لكن
اريد منج وعد انو ما تتصرفين اي شي من راسچ ولا اتاتين باي حركه افتهمتي
ما جاوبتني رديت عليها السؤال //افتهمتي مروه اريد منچ وعد

جرت نفس وگالت = اوعدك بس صدگني ياجهاد اذا اعرف انو انت كايل الامين او صادق اي كلمه صدگني
راح اقترف جريمه وراح اكون انا الخاسره الوحيده بيكم

خفت من كلامها واصرارها // لا مروه انتي اعقل من هذا الشي اريدچ تفكرين مو مره  لا فكري  الف مره
قبل لا تخطيين هاي الخطوه يمكن هذا القرار اتخذتي وانتي عصبيه وانت مسدوده كل الابواب بوجهج ما اريدج
اتندميين لو لحظه لان كافي المرار الي شفتي والقهر فكري وانا وياج بلي تردينه  وصدگيني مروه انا مو اليوم
من اول ما عرفت أمين ولحد ما اموت انا ابقى (جريت نفس قوي) انا ابقى سندج بس اريدچ اتفكرين
وانطيني شويه مجال

هي بتوسل = حاول تستعجل جهاد ارجوك
- - انتي بس گولي ان شاء الله  وانا راح اسأل وارد لج خبر وهم ارجع واگلج فكري
جاوبتني وهي تبچي = ان شالله
صار لازم انهي المكالمه لان اذا تبقى تبچي وتترجى بيه يمكن بنفس الليله اروح واجيبهاوالي يصير يصير گلت
- - اسمعيني هسه انتي صار. لازم تنامين وترتاحيين وانا من يصير وياي شي ادزلج مسج

= بس الله يخليك استعجل
- - تمام تصبحيين على خير
= وانت من اهله  ( حسيت بانفاسها وصوتها - جهاد - انت وعدتني الكلام محد يدري بي
- - وانا عد وعدي مع السلامه
= الله وياك

سديت الخط وبقيت الليل كله ما غمضلي جفن  متعجب من اصرار مروه واندفاعها حتى تتخلص من واقعها
الي عايشته واستنجادها بيه صرت احچي وانا اهز براسي
- - لكن الي تطلبه مستحييل باعرافنا وتقاليدنا شلون اخليها تترك كل شي وتهاجر
- - ليش هي شنو عدها
- - سمعتها واخوانها وانا انا شلون اگدر اعيش وهي بعيده
- - ليش هي قريبه هسه

- - المهم بأي لحظه اشتاق اگدر اجي واشوفها من بعيد اسأل عنها امين يمكن باي لحظه يرحولها ويجيبونها لكن
تهاجر وبالخارج وتريدني اساعدها صعبه
- - صعبه ومو صعبه الي جاي يصير وياها انوب وصلت ياخذون ابنها منها وهي تعرف حقيقتهم

هزيت راسي //اي مروه طوول عمرها وهي تضحي ومن تنعرف الحقيقه راح تنحرم من شوفة ابنها ويجوز صدگ
حتى سالم ايطلك اختها وياخذ ابنه وحتى لو يوسف ما طلگها فمستحييل يغفر الها

- - اي جهاد وانت
- - انا انا شبيه ؟
- - انت مو هو هذا چان حلمك وطلبك انو تتطلك وتتزوجها
- - اي بس هي تريد تتطلك وتهاجر يعني بعد ما راح تشوفها

جريت نفس وخليت اديه على صفحة وجهي وگلت // اموت غيير اذا ما اشوفها لو اسمع صوتها
- - وشنو قررت
- - ما اكسر خاطرها ولا اخذلها راح اساعدها
- - وانت جهاد ؟
- - خلي اساعدها بالاول وبعدين الگى حل النفسي

- - مساعدتيش من تساعدها اتاكد راح تفقد خوتك ويه امين وصادق وعلي راح تكون انسان منبوذ هذا
اذا ما حقوك ويجوز ايكتلونك
- - خلي كل شي يردون ايسوون يسون مو جهاد الي مروه تطلب  منه مساعده وما يساعدها
- - بس اذا ساعدتها راح تفقدها للابد
- - اذا افقدها وتعيش مرتاحه مي خالف
- - تضحك على نفسك جهاد

خليت المخده فوك راسي // اي اضحك على نفسي (لا اراديا صرت ابچي وانا مغطي وجهي واگول )
- - ياربي امتحانك صعب والي جاي اسوي حرام ساعدني ياربي ساعدني

بقيت گاعد ما اعرف شنو اسوي ولا شلون اتصرف وقررت احچي وياها وافتهم منها كل شي بس
خلي انطيها مجال تفكر وتقرر وهم انا افكر
///////////////////////////يتبع
رجاءا لحد تكتب بالتعليقات البارت معاد او قصير او ما بي احداث
تحياتي 😘😘