رواية بعد فوات الأوان الفصل العاشر 10 - بقلم آنين الليل

مرحبا باغلى قراء ❤️❤️
خاطره كتبتها واحب ان تشاركوني بها
ان قراءة القصص بالنسبه اليكم كما الكتابه بالنسبه لي
هي اهم من العلاج لانها تجعلنا نذهب في عوالم قد نحبها وقد نبغضها ونتعايش مع اناس
نرسم لهم لوحه في مخيلتنا 🌷🌷🌷
#آنيين الليل #

////////////////////////////

يوسف
من شفت دموع ضحى انقهرت لان من يوم الحادثه وانا تصرفاتي وياها بيها نوع من البرود وهذا الشي بسبب
الي صار والضغط الي اتعرضتله من الناس اقاربنا وكل واحد اله راي ومن الناس الي تجي وتروح ومن
الي سمعته وكبر اختي بنظري خصوصا والشيوخ كالت هي شريفه ولو ما شريفه ما كلبت السياره لان لگوا ايدها
موجوده ع الاستيرن

هذا الشي خلاني احقد على جمال الي طفى شمعة اختي وهي زواجها بعد ايام قليله
جمال الي باك فرحة سالم وهو جاي يحضر الزواجه
المصيبه هو اعتدى علينه واحنه لا نعرفه ولا يعرفنه ولا بيناتنا ثار او زعل ليش هيج سووا بينه وكلمة
واحد من الشيوخ الي اجوا يردون ننطي عطوه الهسه ترن باذني
: انت رجال سبع وحوك وتعرف الها انصحك اذا تريد ما تخسر واحد من عمامك والدم يجر دم اخذ فصل نسوان
المره تبرد الموقف وتجيبلك زلم تلزم ظهرك وبيها تذل اهلها الي اعتدو عليكم وتحقن دم

هذا الكلام اثر بيه وطلبت نسوان وفصل لكن دموع ضحى قهرني وانكسر خاطري عليها لذلك گلت ااجلها واخلي
سالم بالبدايه ياخذ اختها وبعدين نشوف شنو انسوي
ثاني يوم اولاد عمي وسالم رجعوا الاشغالهم وانا اجازتي بعدهي ما منتهيه لان اخذت مرضيه وره مرضيه
انا ما اطلع ولا صرت اشوف اصدقائي لان التهيت بهاي المصيبه فكله گاعد بالبيت ما عدا صديقي ماهرالي ما فاركني
ابد وبقى وياي حتى مرات يبقى يبات يمي ودووم يگلي انا بظهرك وشتريد انا حاضر بيومها چان جاي عليه
وگاعدين نشرب  چاي ورن التلفون شفته الشيخ ابو راكان جاوبته

::الو
-اشلونك عمي
::هلا بيك
-انت وين
::بالبيت
-زين جاييلك
::هلا بيك خو ماكو شي
-لا بس الخير ان شاالله جاي اشرب چاي يمك
::تشرفنا شيخنا

وسديته وتقريبا ربع ساعه واجه ابو راكان ويا السيد الي اخذ القضيه على عاتقه ماهر راد يروح بس انا اصريت يبقى
لان اعتبره واحد من عدنا گعدوا وجبنه الچاي السيد گال// عمي انا اجيتك گبل لا نجيب ناس عليكم
::هلا بيك مولاي بس خير عليمن تجيبون ناس ؟
السيد بايده علاكه خلاها يمي وكال //عمي هذا جزء من فلوس الفصل وان شاالله قبل ما تنتهي المده الباقي يمك
باوعتله باستغراب ::بس ليش سيد چان كملوهن او ودوهن

:عمي الناس تريد تراويكم حسن نيتها وانت ما قصرت سويت المحد يسوي
::واجبي هذا سيد مايصير ناخذ واحد بجريرة الثاني
السيد //بارك الله بيك والله كلامك ذهب وانا الي يمك طلب واعتبره شخصي ومن تلبي كانما ولد ملبي الابو
هزيت راسي ::اي سيد اسمعك أأمر
السيد //. ما يامر عليك ظالم عمي يوسف  انت حچيتها بالديوان( لاتزر وازره وزر) اخرى والناس رضو
بالطلبته وتشلع عيونهم وتاخذ فصلك لكن اكو شي بمكان شي
عكفت حواجبي : : شنو قصدك سيد وضح
السيد //عمي الفصليات نريد ابدالهن تاخذ فلوس

اهنا حسيت بنفسي شگد انا زغير وشگد يشوفوني ما عندي شخصيه باوعت للشيخ الي شفت بوجهه قبول گتله
::تدلل سيد بس تعرف انا مو بحدي عدي اخوتي او ولد عمي فانطيني يومين وارجعلك الخبر وما يصير خاطرك
اله طيب
:كثر الله خيرك هاي المرجيه منك
ودفعت العلاگه الي بيها الفلوس ::واذا تريد اخذ هذني الفلوس وخلي يكملوهن وبعدين جيبوهن قابل همه طايرين
السيد //عمي الفلوس انجابن لان الناس تريد ترد لبيوتها وانتم ما قصرتوا
::هذا هو سيد ما سوينه اله الواجب الفلوس راح يبقن يم ابو راكان يكملن واستلمهن

وراح السيد ويا ابو راكان الي گلي// عمي اوصله وارجع الك
::لا شيخنا لا ترجع لان انا اريد اروح ويه ماهرالفاتحة صاحبنه ابو اتوفى
حس الشيخ بانزعاجي جاوبني //ها چا بعدين نحچي
::اي ان شالله
طلعوا وصاحبي باوعلي وهو يگول //شبيك يوسف
::ما بيه بس خلي نطلع لان اختنگت

وطلعنه بسيارة ماهر وتمينه ساكتين وهو يكلي //شبيك يوسف
:: ما بيه بس انا انهنت بكرامتي
-افه ما عاش الي يهينك شكو فهمني
صرت احچي بعصبيه :: جايبين الفلوس عبالهم فرحان بيهن ويردوني اتنازل عن النسوان
صاحبي نفخ انا گتله :: ما عدك جواب لان تعرف همه شايفيني بدون شخصيه

ماهر هز راسه //لا شنو هالكلام مو شيوخ وساده وناس خييره خليتهم يرجعون لو من طلبت اله ولدهم وخليت
الناس محتاره لاتگدر اتگلك اي ولا لا شنو هالحچي يوسف بس تره شغلة الفصليه يعني شغله قديمه
:: وهم الي صار بينه وبعرضنا مو شويه
-صحيح انا وياك

نزلنه بكوفي وطلب ماهر گهوه وجابوا كوبين وانا ساكت ماهر گلي //يوسف على كيفك ويه روحك
دخنت جگاره وانا اشرب گهوه وصافن باوعتله   ::اگلك ماهر  انت مو بيت خالك بالحله
هز راسه //ايي بالحله ليش
::رايده بخدمه
ماهر باستفهام //خالي ؟
هزيت راسي وگتله ::خابره هسه گله اذا اكو يمه بيت اجار مرتب
—شنو المن
::انت خابره وبعدين تفهم

واتصل ماهر بخاله وساله والرجال گله اي موجود بيت ولد صديقي توه باني بس مرته وجهاله ما يقبلون يعيفون
المنطقه مالتهم
اخذت التلفون من ماهر  وگتله :: السلام عليكم عمي انا صديق ماهر ومحتاجه البيت وتسوي علي فضل
اذا تاجره النه
-اي عمي مي خالف دزلي تلفونك وتدلل
::عمي واذا مايصير اريدك تشوفلي حيا الله بيت
-مي خالف ساعه وارجعلك الخبر
::مشكور ما تقصر فيمان الله
- الله وياك

ماهر //يرسف كل شي ما افتهمت شلك بي البيت
::اريده
- المن
باوعتله ::اشيل بي
-تحچي صدك ؟
هزيت راسي ::مثل مل سمعت
-ادري غير افتهم
::اريد اوصل الهم ردي
- يعني تشيل من بيتك ومحافظتك على مود توصللهم الرد
::ايي لان اذا ما قبلت راح يودون ناس هواي وشيوخ وما طول هيج لحمهم غالي انا لحمي مو رخيص وغالي حيل

ماهر //بس ما يستوجب تشيل
::لا يستوجب حتى اذا لعبو بذيلهم لو اكتل اربعه منهم ما عليه ولا على عشيرتي اي شي
- انت ادرى بس لا تتهور
عضيت على شفتي ::انا گلبي محروك ما اعرف شسويله ويبرد خليني اشيل واحاول اجمع اوراقي ويصير خير
-الله يسهلك او وظيفتك
::اقدم نقل واكيد ياخذون بنظر الاعتبار ظرفي
- اي اكيد

اهنا اتصل خال ماهر وحاجيته وكلي //الرجال وافق وگلي بس كون عايله زغيره وانا گتله ايي وعلى ضمانتي
جاوبته بفرح :: كثر  الله خيرك ما قصرت وياريت تستلم المفتاح منه
-اي عمي تدلل بس عرفت شگد الاجار
::شگد ما يصير اجي وادفعله مال سنه اذا يريد انا راح اعتمد وباچر بحيل الله يمكم انا وعايلتي
باوعت الماهر  وكتله ::ياالله خلي نمشي.
وصلنه للبيت انا وماهر وخابرت سالم گتله ::تعال رايدك

خليت ماهر بالديوانيه لان فهمته يبقى محتاجه ورحت داخل للصاله وصحت على امي وضحى
::يمه يمه تعالي رايدج ضحى وينج
اجن اثنينهن وامي تكلي
-هاا يمه خيير
باوعت الضحى وگلت ::بسرعه جمعي ملابسنا وملابس امي ولمي الفرش
امي //ليش شكو ياستار
::ماكو شي الفجر راح نسافر
ضحى //وين

::نشيل انروح للحله انا اجرت بيت
اتفاجئت امي //شني
::مثل ما سمعتي راح نشيل ما ابقى لو دقيقه
امي - ليش غير نفتهم
:: من غير ليش قررت انشيل وبسرعه
ضحى//  يوسف تحجي صدك
:: شنو شايفتني اتشاقى مثلا
امي // على كيفك فهمني ليش تريد تشيل

:: مو وكتها بعدين افهمج (باوعت الضحى ) اشو واكفه انا شكلت
ضحى // والفراشات والاخشاب
::اخلي ماهر  يفكهن ويدزهن وراي
::ياالله ياالله استعجلن هاا وما اريد اي احد يعرف بشي لازهره ولا اي احد من گرايبنا مفهوم

ما انتظرت اسمع جوابهن صعدت فوگ وصحت على ضحى ::تعاي وراي
هي اجت وانا طلعت جنطه بيها اوراق البيت وشغلات وفلوس ضامهن وانطيتها الها وگتلها
::خليها ويه الذهب مالتج ولمي ملابسنا والي تگدرين تجمعينن وبعدين لمي ملابس امي
ضحى //اي هسه بس ليش الاستعجال

ما جاوبتها نزلت وانا اگول ::وين بسام
-ها يوسف هذا انا
::هاك هاي فلوس رووح جيب عشا  وتعال
- اي صار يوسف شو امي تكول راح نشيل صدك هذا الكلام 
هزيت راسي وگلت ::اي بس دير بالك تجيب طاري الاحد
- يوسف ليش انشيل اهنا اهلنه واصدقائنا
:: بسام رووح هسه وبعدين افهمك

رحت ولگيت ماهر يصلي وانا هم اتوضييت وصليت واجه سالم سلم وگعد بعدين جابولنه العشا ويا الچاي
اتصل احمد ابن عمي
- الو اشلونك يوسف
::هلا احمد
- انت وين
:: انا بفاتحة ابو صديقي ليش احمد خير
- لا هيج گلت اسير عليك

::اعذرني حمودي توني طلعت  اذا شغله ضروريه ارجع
- لا يابه كل شي ما عندي
::خيير ان شالله فيمان الله
-الله وياك
سالم متعجب التصرفي انا ما انطيته مجال يسأل طلعت مفاتيح البيت ودرت على ماهر وگتله
::ابو حسين اعتمد على الله وعليك بالعمال

ماهر // - اعتمد ولا يهمك من چنت جوه خابرت العمال وحتى اجرت سياره
::الله يخليك ما تقصر
- ان شالله عگب باچر  هنه يمكم
::الكهربائيات والصيني تره الحجيه تموت اذا انكسر ماعون 
ماهر وهو يبتسم - كله حاسب احسابه انت لا تهم بشي
::مشكور ما تقصر
سالم باوعلي وگال //شلقصه يوسف
::ماكو قصه باچر الفجر راح اشيل

سالم باستغراب // تشيل شنو وين تشيل
::للحله
سالم ابتسم //عود صدگ لو تتشاقى
::صدگ اشيل حتى اذا لعبوا بذيلهم اكتل وما افصل
- غير تفهمني وليش تگل الاحمد انت ما موجود
::اي ما اريد احد يدري ويردعني عن الاريد اسوي
- شصار يوسف
وسولفت السالم الي صار وگلي //بس ليش تشيل

::احسن اشيل احسن اريد اعلمهم
-شتعلمهم تحچي الغاز
::لا الغاز ولا ابدا من شافوني قبلت بالفصل اجو يطيحون النسوان ويدفعون ابدالهن فلوس هذا الشي غثني
وقهرني شنو شايفينه  هلگد احنه ما عدنا كرامه عبالهم من قبلنه ناخذ فلوس خلص كل شي ينحل بالفلوس
نسوا ذلتهم ما خلو احد ما ودو علينه ومن وصلت للصدك بدو يلعبون بذيلهم انا الهم اله اعلمهم
سالم بنتر //يخسون بس ليش تريد تشيل
::لان مثل ما ودو السيد يودون ثاني وثالث وعاشر فاانا خلي اوديلهم رساله سريعه يفهموها

سالم //وديها وانت اهنا
:: لا اوديها وانا بغير محافظه حتى يعرفون منو يوسف وهمه ويامن اتصادمو
- قصدك تكتل
::ايي اكتل وما يهمني اذا ما اجو للطريق اكتل وما يهمني اكبر واحد والي يصير يصير
(باوعت السالم ) وانا وديت عليك انت اخوي وابن عمي بكيفك تريد تجي ويانه تريد تبقى هذا الشي راجعلك
- لا اجي وياكم اقلها بالوكت الحاضر ونشوف وين تصفى بس اگلك خلي انحمل الغراض بسيارتي
::لا سالم ما اريد احد من گرايبي يعرف انا شلت لان راح يجون ويطيحون عليه وانا قررت وخلص

- بكيفك
ماهر //ياالله ياجماعه انا اترخص وباچر من تطلع بالسلامه خابرني
::اي ان شالله
-تصبحون على خير
طلعت ويا ومديت ايدي على جيبي اريد اطلع فلوس السياره والعمال گلي //عيب يوسف ضم فلوسك بجيبك
اتحاضنا  وهو يگول //افراگك مو سهل بس مادام هذا الشي بي راحتك الله يوفقك

راح ماهر  وانا رجعت يم سالم الي لگيته فايت جوه وگاعد يم امي وهي تبچي وتكول
-ليش شمسوين وهيج نتجهول كاتلين بايگيين همه گاعدين ومرتاحين واحنه نشيل
اتقربت عليها وگتلها ::يمه راح اخذج المحافظه تخبل وهناك قريبه عليج الزياره والجو يختلف وناسها
طيبه مثل ناسنه
-يمه ما اريد هذا بيتي ومنطقتي وجواريني اتعودت عليهم
سالم //خاله مي خالف اقلها تغيرين البيت وبلكي شويه تنسين

امي وهي تمسح دموعها بشيلتها //شنسى يمه انا من اشوفك اموت الف موته عساها بحظه وبخته السواهه
وحرمكم من السعاده
سالم جر حسره ودنك
الفجر طلعنه اخذنه بس ملابسنا وفلوسنا وكتب بسام وسالم گال //انا الحگم لو الظهر اطلع لو بالليل
درت گتله ::اهم شي محد ياخذ خبر انا الي يتصل بيه اكله ماخذ امي ومرتي ورايحين نزور
سالم // تمام مثل ما تريد

سلمت ورحت ركبت بالسياره وامي تبچي باوعت الها :: يمه طالعين بطريق لا تبچيين
تمينا ساكتين وكفنا باستراحه اتريگنا وبعدين كملنه طريقنا وصلنه واتصلت بخال ماهر  الي دلانه ولگينه
الرجال منتظرنه ورحب بينه وبالبدايه گال //تمرون علينه بالبيت ترتاحون وبعدها انا بايدي اخذكم
انا ما قبلت گتله ::نروح ما دام النهار باوله
ورحنا شفنه البيت چان بي گراج وحديقه وصدك توه مبني جديد بي ديوان براني وحمام
وجوه صالة چبيره وغرفتين ومطبخ
وفوك تلث غرف وطلعت انا وخال ماهر رحنا على  ابو البيت وكتبنا عقد اجار وانطيت اجار مال تلث تشهر
لان شويه البيت اجاره غالي لان حديد ومحد ساكن بي قبلنه

وبعدها طلعنا انا وخال ماهر الي يسمونه ابو علي طلعنه انا ويا ودلاني المنطقه وگلي //شنو تحتاج تتصل بيه
جاوبته :: خالي اهم شي اريدلي عمال ينزلون الغراض
هز راسه //موجودين ان شالله باجرمن غبشه يمك
ورجعنا للبيت والرجال گلي // اليوم غداكم وعشاكم علينه
ابتسمت بوجهه ::تسلم ما نريد انكلفكم
-ماكو اي تكلفه انا حضرت الكم  ترمز ماي وترمز چاي والكوابه والشكر يمكم
::تسلم  ما تقصر

ودخلت للبيت شفتهن گالبات خلقهن وگاعدات على بساط وبساط ثاني عرفت خال ماهر هو جايب الفراش
امي متمدده وضحى گاعده ومبين ما عاجبها الوضع  رحت اغسل واندك الباب وراح بسام واجه شايل جدوره
اثنين وبعدين طلع جاب علاگتين
انا رحت طلعت واتشكرت من خال ماهر الي رد عليه وكال // احنه اهل ما بيناتنا انا خال ماهر وان شالله خالك
لزمت بي يتغدى وياي بس هو گال // ان شالله بس تستقرون اجيب الاهل واجي اتغدى يمكم

اتغدينا وشربت چاي والكل ساكت اعرف بيهم مستغربين من تصرفي لكن انا بينت الهم عدم مبالاتي بس كملت
ركبت سيارتي ورحت افتر واباوع للمحلات والشوارع اريد اتعرف عليها اكيد بيها اختلاف عن محافظتي وعن
منطقتي نزلت اشتريت دواشك اربعه وبطانيات وكيتلي مال ماي واشتريت مخاد ورجعت نزلتهن وگلت الضحى
هذا الكيتلي خلي بي ماي وخلي ع الهيتر بين ما يجن الغراض ونشد السخان هي ما جاوبتني وكلت البسام ينزل
الفراشات ويخلي دوشك الامي تتمدد علي

اتصلت على ماهر  الي گلي كمل تحميل الغراض وهسه راح السايق يتوكل انت حضر عمالك
سالم كل شويه يتصل اعرف مشغول باله عليه وعلى ضحى انا طمنته وهو گال باچر يمنه عنده شكم شغله يكملها
زهره اتصلت بامي وصارن يسولفن ويبچن بالنقال وبعدين زهره حاچتني وعاتبتني لان شلت من بيتي
جاوبتها بكلمتين ::هيج احسن الي

وصلن الغراض بالليل ونزلوهن العمال كلهن خلوهن بالديوان واتصلت بابو علي  الي گلي الصبح يجيبلي الباي فيتر
ويسويلي السخان ويربط الماطور مال الماي وهم يجيبلي نجار يشد الغرف
ضحى ما تعرف شنو تسوي انا گتلها
::خلي يجون العمال يشدون الغرف ويكملون ربط الماي وبعدين براحتج لملمي ما عدنا شي

هي گالت //بس  الثلاجه والمجمده  خلي نحطهن ابمكانهن
وانا وهي وبسام رتبنا الكاونترات والطباخ وخلينه المجمده والثلاجه بمكانهن بالمطبخ الي چان كلش چبير
بعدها صرت ارد على الاتصالات والكل  يسأل //ليش شلت
چان جوابي //احسن
ومن ايلحون عليه ارد عليهم // اسألو الشيخ
وصاروا يگلولي //راح نجي ونرجعك
وارد عليهم :: مستحيل ارجع لو شني ما يصير

احمد بعتب // - شنو گدامك مو زلم تريد تكتل احنه وياك بس ليش تتصرف من راسك
::احمد بلا عصبيه روحو الابو راكان واسالو انا شلت وبعد ما ارجع ولو زفولي عشيرة ال ...اربع نسوان بيوم
واحد هم ما ارجع
واتصل بيه الشيخ الي گلي //اعرف انت عاتب عليه بس انا ما جبرتك على شي وانت طلبت مهله وترد على الناس
:: وهذا ردي ابو راكان الحر تكفي الاشاره

وراها بيومين اجه ابو اركان ويا ابو عادل وصلو البيتي وره ما گعدوا صار السؤال من الشيخ
- گدام ابو عادل اريد اعرف ليش شلت
انا ما جاوبت
الشيخ گال //عمي يوسف اذا بدر من عندي شي فاانا اعتذر
هزيت راسي ::لا شيخنا كل شي ما بدر منك
- ليش شلت
سكتت ما جاوبت
الشيخ گال//  ابو عادل  من عرف بيك شلت اصر هو يجي حتى يسمع ردك

باوعت للشيخ وجاوبت ابرود وانا رافع حواجبي :: شنو ما وصله ردي
ابو عادل //لا وصل وهسه عرفنا
ما رديت على ابو عادل حاچيت شيخنا :: هذا هو واحترام الك استقبله ابيتي لان احنه ما سوينه صلح بس قبلنه
بالفصل الخاطر الناس الاجت وهسه الفصليات يمته ما ارفع التلفون ثاني يوم يجني
ابو عادل //يجرالك

اهنا باوعتله :: وصدگني ما چان ابالي اخذ نسوان چان ابالي اكتل زلم بس اخلاق وكلام امين ابن طالب كسر عيني
ومو يوسف الي يتعدون على كرامته ويقبل بشكم فلس وانتم البديتو  اول مره بس ردتو حلها والخاطر الاجاويد
قبلت وتالي صرتو تتملصون صدگوني هالمره اله النسوان ومثل ما جمال باك عرضي لا انا راح اذل عرضكم
ابو عادل / عمي ثق  ما النه قصد بس منشفناك قبلت بالفصل گلنه...

قاطعته وانا احرك بايدي ::گلت اي هذا انسان مسالم ويستحي ونسكته بفلسين ويطيح النسوان تره العلمك انا اخذت
ديه رب العالمين مشرعها
وانچان قبلت اگعد ويفصلوني مو الخاطر اي احد الخاطر الناس التعبانه الي عيشتها يوم بيومه الخاطر الناس الفقره
والمرضى وصدگني لو بوكتها حاضي بامين لو ابو چان كتلتهم ولا تخليني بعد اتجاوز بالحجي
ابو عادل //حقك عمي واحنه نعتذر

وگفت :: وصل الربعك اي تلاعب صدگني اخذها زلم مو نسوان وما عليه اي شي ها وقبل ما انسى
فلوس  الفصل يجني بموعدهن فلس ما ناقصات
وطلع ابو عادل وما طلعت ورا وابو راكان گال //عمي انت فاهم الشغله غلط
رديت بعصبيه :...لا فاهمها صح انت رجال شيخ والناس والشيوخ تريد حگها ولازم تجاملها وانا عفيتك من شغلتي
شلت الغير محافظه حتى لو يلعبون بذيلهم انا كتال وما عليه اي تبعه لا عشائريه ولا قانونيه

ابو راكان // وانا وياك وتدري بيه شگد انقهرت وگتلك حلالي وگبلهم ويلادي گدامك بس انت گلتها الناس والمجاملات
جريت نفس ::وجهك ابيض عمي انت ما قصرت
- ياالله انا اروح
::لا تبقى الليله وباچر تروح
- الجايات هواي يوسف بس والله طلعت نچر واخو اخيتك

ونقلت دوامي للحله وبسام هم انتقل للاعداديه وصارت حياتنا طبيعيه امي من تريد تروح تزور ياخذها بسام وضحى
وانا چنت دووم ويه سالم والتقي ويه ابوعلي  الي ساعدني هواي وكملولي فلوس الفصل وجابهن الشيخ
وبيومها چان سالم موجود وشلت نصهن وانطيتهن السالم الي هز راسه   // لا يوسف الديه  من حقك انت اخوها وانا
ابن عمها ما الي اي حق بيهن لان مو زوجتي

شلت للشيخ مبلغ والرجال ما قبل ياخذه لكن انا اصريت علي لان هو بصراحه هواي خسر من جيبه
وبعدها فاتحت امي وسالم انو اريد ابيع بيتنا الي بالبصره واشتري اهنا بيت
امي ما قبلت وگالت  // نرجع البيتنا
انا جاوبتها :: يمه  اهنا قررت استقر وابو علي گلي الرجال ابو البيت يريد ايبيعه فليش ما اشتري ومن تشتاقين الزهره
هاي اربع ساعات ونوصل مو بعيده

بيتنا عرضنا للبيع وبعنا واشتريت هذا البيت وهم صارلي فرق بالفلوس لان العقارات اهنا شويه ارخص من البصره
ورغم بيتنا مو كلش جديد بس جاب سعر اكثر من سعر هذا البيت
علاقتي ويه ضحى علاقه عاديه ودوم اشوفها مهمومه وضايجه
وقررت اتزوج الفصليه فاتحت سالم وامي الي ما قبلت اخذها وگالت //ما تاخذها على بت اختي
انا جاوبتها :: يمه هذا واقع حال وما اگدر اتراجع المن شلت واتغربت
امي //اي احد من ولد عمك لو بسام ياخذها

بسام //هههه يمه عمري 16 وترديني اخذ فصليه
سالم جاوبها //خاله ولو ضحى اختي بس ما اقبل يوسف يطلع مو گد كلمته المن اتغرب وشال وباع واشترى

وصار الاتفاق انو ياخذوها من بيتهم الي هجمنا علي وبعدها تروح البيت الشيخ لان راح اسوي مادبه چبيره
هناك بالبصره وثاني يوم تجي لهنا
سالم كلي //ليش كل هذا ناخذها من بيتهم وتجي اهنا
:: لا سالم انا شلت ومن اخذها لازم الكل يعرف انا شلت ليش
سالم //يعني عزيمه وطباخ
::ايي وما اخلي احد ما اعزمه واريدك تروح وياي
-انا گدامك يوسف

ضحى وهي تبچي //ليش سالم مو انا اختك تروح ويا ياخذ عليه مره
سالم بحزن //بعد حكمت الظروف
امي بنتر // اسمعني يوسف انا ما اريد اشوفها والله من اشوفها اگطعها  بسنوني
جاوبتها وانا اضحك ::كل شي سهل انتي وضحى ما يصير خاطرچن اله طيب
امي باستغراب //شلون يعني ؟
::بعدين كل شي راح تفتهمن

وصار يوم العرس ورحنا بسيارات بيض بس سيارتها سوده واجه الحجي الي يشتغل ويا امين
هو الي زفاها وصار وكيلها بالعقد بعدها الصبح سافرنه للحله انا بغير سياره طلعت قبلهم وسالم جابهن بالسياره
وداهن للصالون بناءا على طلبي ومناك زفوها

انا بيومها ما اتدخلت بشغل النسوان ولا وصيتهن بشي لان هنه مقهورات الله يساعدهن بس طلبت منهن شي واحد
ولا وحده توصل يمها ولا تحچي وياها لو كلمه
انا ما شايفها بس الي اعرفه اسمها مروه وعمرها 22سنه وبالليل رحت يمها دخلت بوكتها مجرد ما فتحت باب
الغرفه تراوالي جمال وشنو ممكن مسوي بعرضي اهنا انا ما عرفت شسويت  اتهسترت اخذتها بدون  حتى
ما اباوع الوجهها بدون ما حس بيها

اخذتها وانا كلي حقد وكره الها مو هي خطيبته للنذل مو بعدهي ابنيه ويدور ابعراض الناس واكيد هي تحبه
اي اكيد مو عايش وياهم يعني شگد محافظ عليها وشگد هي تحبه ومحافظه على شرفها هسه اجه وكت الانتقام
وانتقامي منج يامروه لان انتي چان المفروض ابدال اختي اختي الي طفى شمعتها خطيبج النذل
اخذتها وطلعت حتى بدون ما اباوع الها لو شنو صار بيها
لاگتني امي وهي تگلي // عفيه بيك زلمه معدل عرفت تذلهم

ما حاچيتها وصرت اسمع الهلاهل رحت الغرفتي وسبحت ونمت يم ضحى الي چانت سعادتها ما تنوصف ،
لان تركت العروس واجيت يمها
اكذب عليكم لوواگول انا احرزت نصر لان ذليت البنيه بليلة عرسها ولان عاملتها معاملة اي وحده رخيصه ولان
حقرت امها وعمتها من خليتهن بدون عشا وطلعن حتى بدون ما اسلم عليهن  كل هذا السويته ما ريحني ومن
اعاتب نفسي واگول
::ليش سويت هذا الشي ويه البنيه هي شنو ذنبها

يكون الجواب ::ذنبها خطيبة الحقير وبت عمه ايي هي بت عمه الي حافظ عليها واحترمها لكن ما احترم ابنيه
بعد شكم يوم زواجها  لا تعرفه ولا يعرفها بنيه طالعه للكليه راح خطفها وگلب السياره او موتها  وقررت اذلها
اكثر واكثر واعاملها معامله ما تقل عن معاملة الحيوان

انا من استقريت بالحله ساعدني خال ماهر وگلي ما طول عندي شكم فلس اشغله احسن بدل ما مضموم وكل
ما احتاج اصرف منه اقتنعت بالفكره ودرتها براسي  وكلفته يدورلي گاع زراعيه وخابرني  وگلي لگيتلك
مشروع واخذني ورحنا للگاع الي هي بالاساس مسوينها مزرعة عجول چان  عجبتني الفكره وخصوصا
يمها گاع ثانيه ينزرع بيها محاصيل علفيه مثل الجت والبرسيم

شفتها چانت كلش چبيره وبيها اماكن للعجول ومخازن للعلف وبيها بيت عباره عن كرفان وساكنه بي
العائله نفسهم الي چانوا عد صاحب الحقل  وفعلا جبت بيها عجول وابقار وخليت بيها نفس الناس الي جانوا
يشتغلون  چان ولد شاب وزوجته وامه وجهال اثنيين وبعدين عرفت عنده اخوه اثنيين واحد متزوج ويشتغل
بشركه والثاني طالب كليه وذولاك ساكنين ابيتهم الي بالولايه حسب كلامهم
ا
بعيد عنهم سيجت قطعه وبنيت بيها غرفه وحمام ومن سالوني كالوا المن گتلهم الي والزوجتي وهذا الشي صار
قبل ما يزفون مروه
ثاني يوم زواجي الصبح طلعت من غرفتي  بمجرد ما عرفت انو امها  وعمتها راحن وهنه شبه المطرودات
دزيت بت اختي زهره  واسمها اريج اتگلها خالي يگول اتريكي بسرعه ويگول خلي تخليلها دشداشتين وملابس داخليه
وتتحضر حتى نروح
هي سائلتها =وين نروح
اريج ردت عليها مثل ما فهمتها // من تكملين البسي عباتج وانزلي

ونزلت اريج وره خمس دقايق نزلت مروه وهي تباوع للبيت والهدوء البي اول مره اباوع الها چانت شابه وجهه
مدور بياضها عادي وجهها صافي
كرهتها وانا اباوع الها لان اتذكرت اختي الي جمال طفى شمعة شبابها
حاچيت اريج :: خالو راح نطلع وانتي گلي البيبيتج زين
هزت راسها وبدون ما احچي طلعت من باب الصاله وهي طلعت وراي  ركبت بالسياره وفتحت الها باب
الصدر وبسام فتحلي باب الگراج طلعت وصرت اسوق وهي كاعده هادئه ما تتحرك ولا تحاول تباوعلي
چان نظرها شاخص ليگدام عرفت بيها متوتره وخايفه وانا ما حاولت احجي وياها واطمنها الى ان وصلنه
نزلت وهي نزلت وراي وبيدها جنطتها مال الملابس رحت امشي ودخلت وفتحت الها باب الغرفه دخلت
وهي ساكته اباوع الها واشوفها صارت ترجف انا ما اهتمييت لمن ما اجه بشير وامه وگفو. بره

بشير  // السلام عليكم
::عليكم السلام (باوعت الام بشير )اشلونج خاله 
ام بشير //الله يسلمك انت شلونك
::الحمد لله ام بشير (اشرت على الغرفه واحچي بنترواسمعها المروه ) هاي المره تخلينها تشتغل حالها حال
الفلاح الچان اهنا
ام بشير باستغراب //اي يمه صار

::انتي خاله ديري بالج عليها انتوا تعرفون وضعها
ام بشير //بس يمه بيتنا عن بيتك مسافه لو شويه مدنيها يمنه
هزيت راسي ::لا اهنا احسن الها ومثل ما فهمتج هي كل شي ما تعرف علميها
- مي خالف

ودرت وجهي ورحت دخلت للغرفه وانا اشوفها واگفه  وهي مستغربه من جيتها لهنا انا جبت للغرفه بساطين
وجودليه وبطانيه ومخده وترمز ماي ومواعين بسيطه گعدت على البساط وحاچيتها بدون ما اباوع الها

::هذا مكانج وهاي غراضج تشتغلين حالج حال الناس الموجودين اهنا حچي وسوالف زايده ناقصه اموتج
وادفنج بگاعج افتهمتي
ما خليتها ترد عليه طلعت وشغلت السياره ورجعت للبيت وانا احس النار الي بگلبي بعدهي ما طفت

///////////////////////////يتبع
اذا عجبكم البارت لاتنسون تصوتولي
وعندي ملاحظه
اكثر القراء يگلولي لا تتاخرين علينه احبابي تره الكتابه شي مو هين
احداث وسرد  وتصحيح اخطاء املاىيه ومخيلة كاتب
ابد لا تستهينون بهذا الشي
اتمنى تاخذون كلامي بنظر الاعتبار
احبكم ❤️❤️❤️
# آنيين الليل #