رواية بعد فوات الأوان الفصل العشرون 20 - بقلم آنين الليل

احداث سابقه ولاحقه ولا تگلولي معاده لان الترابط بالقصه يستوجب هذا الشي فراح تشوفون باتلث بارتات
القادمه هواي اشياء اعيدها اتمنالكم قراءه ممتعه ومعايشه حقيقيه ويه الاحداث
تحياتي 😘😘آنيين الليل 😘😘
///////////..../////////.....//////..../////..../////
يوسف
الايام الي رجعت بيها ضحى من زواج سالم چانت كلش هادئه واعتذرت مني وانا ما قبلت اعتذارها وصارت
تتحاشاني وهي ساكته بس اذا هي تسكت ام يوسف شنو الي ايسكتها دائما نفس الكلام
مرتك بت عمك يتيمه منو الها انت حزام ظهرها هي لان تحبك هالشكل تسوي

انا اكتفي اهز راسي واروح عنها للغرفه وضحى تجي وتعتذر وتبجي وانا اسفه والكلام ما اقصد بي اهانه الرجولتك
وهواي كلام رجعنا انا وياها لكن هي صارت اكثر هدوء وحتى امي مو مثل قبل تحچي وتسأل
وره ما اجه سالم خابرني كلي راح اجيب مرتي يمكن كلمة (مرتي ) خلتني افكر واكول

::هذا شبي امس اتزوجها وفصليه ويگول مرتي
هزيت راسي باسف ::ايي هو حي الله ابن عمها الازهار وچان خاطبها يعني هي المصيبه ما اتاذي اله صاحبها

عرفت اجه موعدها ويه الطبيبه رحت عليها بعد ان خابرت ضحى گتلها عندي شغل راح اتاخر لا يظل بالكم
لان حسبت مسافة الطريق والطبيب هواي وكت هي عادي ردت //ماشي حبيبي دير بالك
اعرف بيها تدري بيه رايح المروه لكن تخوثها وصلت ودزيت عليها هي اجت گالت
= الله يساعدك
:: هلا يابه ياالله  غسلي وبدلي حتى اخذج للطبيب
جاوبتني =انا جاهزه
::زين صبيلي اكل انا جبت وياي

هسه تگلولي ليش هيج احچي وياها لان هي تجبرني صمتها هدوئها واستجابتها يعني ما تحاول ان تثير اعصابي
هذا الشي خلاني احجي وياها ولان حتى من تسلم بس هاي الكلمتين ما تزيد ولا تنقص خلتلي اكل الي جبته وياي
وخلته گدامي وانا اشوفها لابسه  بدله عريضه لونها سمائي والردن ابيض بصراحه
حلوه عليها وبطنها مبينه اما من شفت اديها فذني كارثه لان من طلعت من المستشفى صارت تلبس جفوف
توصي عليهن ام بشير

ما اعرف رغم اتمنى اشوفها متعذبه واديها مفطرات ودووم الشمس حارگتها لكن من بدلت حسيت بيها شگد
هي حلوه ويلوك الها اللبس صدگوني حتى من تتوزر ع العبايه عبالك ريفيه ابا عن جد وبقيت اباوع وهي تعدل
بشعرها وعدلت الشال سالتها
::ما تتغدين
هي بدون ما تباوعلي = اكلت قبلك 
سكتت لان اعرف شنو ماكله جاوبتها ::اذا كملتي ياالله خلي نروح

وركبنا بالسياره اسوق واباوع الها شلون وجهها ع الجامه سالتها ::اختج راحت
= ايي اجه عليها زوجها وراحت ويا
::ارتاحيتي من شفتيها
اكتفت بهز راسها
وصلنه للطبيبه ودخلت وطلبت سونار وتحليل واخذتها سوينا ورجعنا للطبيبه الي رادت تشوفني
ومن دخلت صارت تحچي وياي وتوصيني
شلون لازم ادير بالي عليها لازم ما اتعبها ولازم تاكل زين اذا اريد ابني يجي للدنيا وهو متعافي
باوعت للطبيبه وهي تكلي كلمة ولي العهد حسيت انو انا بحاجه ان يكون عندي ولد صارت براسي عدة افكار

رحت جبت العلاج وبعدها طلعنه احس بيها فرحانه وگفت يم مطعم ورحت سوبر ماركت وجبتلها عشا
وصمون وكعك وعصائر ومكسرات وحلويات ما اعرف فرح لو خجل من الدكتوره خاف تتهمني بالبخل
وركبنا بالسياره وانطيتها بطل عصير وكتلها اشربي وهي ردت عليه شكرا
سالتها ::انتي شنو دارسه
هي بلعمت وجاوبتني =كملت ثالث وتركت

ابتسمت ::ليش بطلتي لازم مو شاطره
هي بدون ما تباوعلي سالتني = انت بالثالث متوسط شنو طلعت
باوعتلها بس هي وجها ليگدام ما تباوعلي
::تسالين سؤال بسؤال
= بس رد شنو طلعت
:: الصدك مكمل بالانكليزي
باوعتلي = انا الاولى ع المدرسه بالانگليزي بالذات جبت 100وتگدر تتاكد

رديت باستهزاء ::الاولى
= اي معدلي 98 بس بالاحياء خربطت شويه بالرسم وبالعربي ما انطوني درجه كامله
:: اذا هيچ ليش بطلتي
جرت نفس = ما بطلت ابوي گعدنا گال ما عندي بنات يكملن
::حرامات چان هسه صايره دكتوره (حچيتها باستهزاء هي ما ردت )
::يعني لو هسه انتي دكتوره يمكن ما متزوجتني مو

شربت العصير وشمرت البطل بره وهي كملت عصيرها وخلت البطل بايدها
حاچيتها ::ذبي للبطل ليش مخليته بايدج
= اي من اوصل للبيت اخلي بچيس الزبل والصبح ياخذهن بشير يذبهن
::هههه وليش ما تشمريهن اهنا
= لان حرام وما يجوز
اتعجبت من كلامها باوعت الها وعاكف جواجبي:: حرام وليش حرام
= لان الشارع وهاي الگاع مو ملكنه هاي ملك كل الناس وكل الناس من حقها تمر عليها فليش اذب زبالتي
بمكان مو الي
::شنو قابل راح تخرب الدنيا
= لا ما تخرب بس هذا شي تربينه علي

وظليت اتناقش وياها واضح هي تفتهم يعني مو مثل ما جنت متصورحبيت استفزها
صرت اسالها انو اذا كل واحد سوا غلط لازم يتعاقب وهي تجاوبني باي
وسالت عن جمال
شفتها ما اهتمت السؤالي وگالت لازم اسأل رجل دين

وصلنه للغرفه وانا سألتها عن جمال الي انقبر ولازم كل مخطئ يتعاقب بهاي الحاله انا اعاقب منو
هي دايره وجهها وردت عليه ليش انت بعدك ما عاقبت
انا كانما اريدلي حجه درتها وحصرتها وخليت ايدي ابلعومها وصرت اخنك بيها وهي صارت تفرفر بين اديه
الشي الي سمعته منها هاي الجمله الي اثرت عليه لان من حچتها حسيتها من گلبها گالت بالحرف الواحد
انو جمال لو لامس شعره مني مو اكسرها الايده لا اگطعها

حسيت مقدار الكره والحقد على جمال وشفت بعيونها نفس الكره والحقد عليه
وطلعت وانا اتوعدها نزلت العلاليك وحاچيتها بنبره كلها تهديد :: اله اندمج
طلعت الدنيا ليل وصرت اسوق وامسح العرق من گصتي وانا اسب بمروه واگول
::بت النعال متندمه لان اخذتها الكلبه اله اموتها

صعدت من الترابي ع الشارع العام شويه هدأت فجأه اجت سياره مسرعه ما اعرف شلون اتخطيتها وانا اكول
::ياستار ياستار
وصرت اسوق وانا منتبه  واجت سياره ثانيه عبالك متقصدتني وهم اتخطيتها وبقيت اسوق لكن بعدها ما حسيت
اله انا بالمستشفى ايدي مكسوره وكل جسمي مرضوض  والدكتور يسالني بطنك توجعك
وانا ااشر الهم بلا احس لساني ثگيل من هوول الصدمه

ضربوني ابره بعدها اتوضحت الرؤيه باوعت گلت للمضمد ::موبايلي اريده
طلع واجه رجال ويا ولد شاب وگلي //الحمد ع السلامه عمي انا وابني چنه وراك وشفناك من انگلبت بيك السياره
الولد // انت نجيت باعجوبه الحمد لله على سلامتك
الرجال //هذا موبايلك وجزدانك امانة الله بس كل شويه نقالك يتصل ما عرفنا شنرد
انا بتعب باوعت للولد:: اتصلي على سالم

طلعه اسمه بالسجل مال الاتصال رن شاله //الو هلا يوسف
جاوبته ::سالم تعالي انا بمستشفى ال...
سالم //شبيك يوسف شصاير
::ما صاير شي حادث بسيط لا تگل الكل احد تعالي ابحدك
جايك
::مو تخابر اهلي
جايك

ربع ساعه واجه سالم بالتراك وهو عيونه بگصته وصل للطوارئ اتصل وطلعله الولد اجه يمي وهو يگلي
-يوسف شبيك
الرجال كله// عمي ما بي بس الخير
-منو الجماعه
جاوبته بتعب //ذوله الي نقذوني وجابوني للمستشفى
سالم //كثر الله خيركم
الرجل //عمي ما سوينه غير الواجب بس السياره ظلت بگلبتها وتعرف ما كو امان
سالم //اي صحيح هسه اخابر عليها

خابر سالم والرجال وابنه راحو بعد ان سجلو رقمهم بتلفوني واتحمدولي السلامه سالم اجه يمي وكلي
- ها يوسف شلون صار الحادث
هزيت راسي وكتله ::ما ادري
سالم //الرجال وابنه يگول معجزه طلعت سلامات
::الحمد لله والشكر

اجه الدكتور وسالم ساله گله يبقى بس الليله تحت المراقبه وباجر اذا ماكو مضاعفات يطلع
سالم راح ورا الدكتور وانا بقيت يتراوالي شلون انگلبت بيه السياره رغم اسوق منتبه وماكو سياره عارضتني
لكن فجأه انگلبت نزيت من مكاني وانا اتنفس واهز راسي
رجع سالم وهو يگلي
هسه اشلونك يوسف
قبل ما اجاوبه امي اتصلت وانا ما اكدر ارد سالم رد

-هلا خاله
-انا سالم شنو ما عرفتيني
- الحمد لله بخير ايي يوسف هذا يمي عازم جماعه وخابرته
-لا راح للحمام ما تسمعين الهوسه
-ههههههه اي تعرف سباعيه لا تخافين عليها
-خاله يجوز يوسف يبات يمي
-جماعه من البصره جايين خو ما ابيتهم ابحدهم
-وانتي من اهله
-وشكو بيها اذا بقى يمي
-اي ان شالله من يجي اخلي يتصل

سالم باوعلي وهو يضحك //خالتي تكلي شنو عازم جماعه هاي مرتك تعرف تسويلهم اكل لو تجيبلهم من المطعم
طلع تلفونه واتصل
-ها سموحه اليوم ما اجي اقفلي الابواب ونامي
-يوسف شويه تعبان واخذته للمستشفى

-ظغطه مرتفع خو ما تخافين اخابر بيت ام انسام تجي يمج
- زين حبيبتي لا ابقى سهران
-عادي اتصلي لو انا اتصل
-ياالله ديري بالج
- وانا هم

باوعتله وگلت ::روح سالم انا زين ما عليه شي
- شنو يوسف شلون اعوفك
:: رووح يم مرتك انت عريس وهي يجوز تخاف ابحدها
سالم //يا عريس عمي شيبنا ولا تخاف عليها سماح سباعيه

وبقى سالم بات يمي وهو يتصل بزوجته غمضت عيوني وانا اتذكر الي سويته بمروه بعدها ما حسيت اله الصبح
اجه الطبيب وشافني وكال السالم لازم يرتاح اذا مصر يطلع من المستشفى
وكتبله على علاج وكله هذا تجيبه من بره ومن يتعب ياخذ منه

ورجعت انا وسالم وايدي مجبسه وصلنه للبيت وامي بس شافتني انهبطت او اغمى عليها وضحى صارت تبچي
وتدك على وجهها
سالم // گولن ياالله ما بي بس العافيه
ضحى غسلت وجه امي الي فتحت اديها وهي تگلي
- شبيك يمه گلبي حس بيك شي البارحه الليل كله ما نمت
:: ما بيه شي هاي انا گدامج

ضحى حاضنتني وتبوس بيه وتبچي //سلامات سوده عليه
::الله يسلمج كافي لا تبچيين ما بيه شي
امي //شنو يمه ليش هيج شصار وياك
:: من طلعت من الدائره مشيت شويه التاير طگ وما سيطرت ع السياره
سالم //كافي لا تعبنه بالكلام ياالله وين تنام

اشرت براسي ::اهنا بغرفة بسام
ضحى //ليش مو فوگ !
سالم // خلي جوه احسن يجوز يتعب ناخذه للمستشفى كل شي يصير وين بسام
- طلع للمدرسه
::اريد اسبح
سالم // وايدك شلون
::اسحب الصونده على صفحه المهم اذب على جسمي ماي

سالم باوع الضحى // حضريله ملابس خلي يسبح
وراحت ضحى تركض وجابت المنشف وملابس وسالم گلي ادخل اسبح
ورحت للحمام بعد ما ضحى جابت الصونده من الحديقه وخلتلي كرسي غسلت بايد وحده لبست گلبيه وطلعت
سالم من شافني گلي //انا اروح هسه وارجع العصر وانتي سويله ريوك لان كل شي ما ماكل
ضحى //ايي هسه

سالم // وهذا العلاج الطبيب ماشر علي وياريت (باوع الامي واخته ) ياريت تخلونه ينام ويرتاح
امي باوعت السالم //چا انت شوراك ما تبقى تتغدا يمنا
- خاله اروح اشوف السياره ومناك اروح البيتي
امي //من البدايه گول اريد اروح للبيت بس عليش هالاعذار

سالم ما رد طلع وگلي //ارتاح يوسف وحاول تنام وشنو تريد بس اتصل
::تسلم ما قصرت
- لا شنو هاي ما بيناتنا
امي //انتم اخوان واولاد عم وهسه عدايل

سالم ابتسم وراد يغث امي // ايي خاله بهاي صدگتي خو انا ويه يوسف اخوان واولاد عم واولاد خاله 
وانوب على گولتج عدايل (بت على چتفي ) ياالله يوسف انا اروح لا ابقى بدون غدا بعد انت تدري

ابتسمت هو راح وانا اتمددت على صفحتي وامي هزت ايدها وهي تگلي
- شنو هذا ما مصدك 
غلست ما جاوبتها هي ردت //اول تالي بوجه منو مصبح من طلعت
خال ايدي الثانيه على عيوني ومتمدد ::بعد قدر يريد يصير

امي باوعت الضحى //عليمن تبچيين هذا رجلج ما بي شي
-الحمد لله خاله لو صاير بي شي وين انطي وجهي
-اسم الله خوش فال روحي طلعي دجاج واسلكي خلي يشرب السوب 

::لا ما اشتهي اريد بس انام
ضحى //خلي اسويلك ريوك
::ما اشتهي
امي //روحي فوريله حليب بين ما يجي بسام ويروح يجيبله حليب جاموس زين للعظم

راحن هنه وانا بقيت بغرفة بسام افكر واگول ::معقوله الي صار وياي معقوله هاي حوبة مروه لان ضربتها
:: شنو ضربتها رادت تموت جوه ايدي
::ايي هي هاي حوبتها او يمكن دعت عليه

اتذكرت كلام ام بشير لمن تگلي// مروه بچت اكثر من ورق الشجره ودير بالك من دمعة المظلوم

::والي صار وياي مو ظلم
::الي صار وياي مو مس بكرامتي
::هسه شعليها هيه الي سووا هذا الشي انقبر وراح هي ليش تتحمل ذنب ما مسويته
::ايي بس هي خطيبته
::لذلك انت حتى من تتقرب منها تقرف وتتقزز
::ايي لان هو اكيد لازمها بايسها ويجوز كل شي مسوي وياها

::بس شفت ردها وشلون صارت ترجف من اتگول اگص ايده اذا لامسني
گعدت على حيلي ورثت جگاره وجريت نفس وگلت ::يعني انا شنو افرق عن جمال انا هم جاي ااذيها بكرامتها
بس تحت غطاء شرعي وهاي النتيجه

::شنو النتيجه انگلبت
::لاچان بينك وبين الموت شعره اتصور لو ميت وجاي ابنك شنو الي راح يصير
::رد العقلك يوسف والفات مات
::عمره ما مات ما طوول هي گدامي عمره ما يموت
:: هم دير بالك مو كل مره تسلم

انتبهت النفسي وانا اهز راسي
::هاي شبيه انطي اعذار
جابت ضحى كوب حليب وصمونه حاره انا اكلت شويه وشربت الحليب بعدها حاولت انام ومجرد ما اغفه
يجيني الكابوس شلون انگلبت والمعجزه الي طلعت بيها افز ريگي يابس واحچي ويه نفسي
::اكيد الله نجاني مو حتى اظلم مروه حتى اعيد ترتيب نفسي

ما اعرف ليش من گلت هاي الجمله ارتاحيت بمقدار الالم والوجع الي احس بي
الظهر جابتلي ضحى شوربه هارسه فوگها صدر دجاج وعصير برتقال مرات اباوع الها وانقهر انا من البدايه ما
اشوفها اله مثل اختي لكن صارت امر واقع بسبب تمثيليه ابطالها ابوي وابوها وامي وضحاياها انا وهي
::ليش نسيت ازهار مو هي رايحه ويه امي البيت سحر
::يمكن لان چانت تريد سالم وافقتهم

ما اعرف ليش من اتذكر ازهار اتذكر جمالها وضحكتها وحركتها بالبيت ويزيد حقدي على جمال الي ما اعرفه
والي لاهو حرامي ولاهو رئيس عصابه شلون خطف اختي وليش وهي مو قليله شنووما گدرت اتعيط
يجوز خدرها ومن صحت شافت نفسها وحاولت تنزل ومن منعها يمكن هي الي ما خلته يسيطر على السياره
ويمكن ويمكن

اباوع بوجه ضحى وهي كاعده وتحاول تقرب الخاشوگه انا اخذتها منها وصرت اشرب بالشوربه من كملت
باوعت الها ::شكرا عاشت ايدج
اشوفها ضايجه او بعيونها كلام لكن ما حاولت احچي وياها دنيت الباكيت واخذت منه جگاره وهي سالتني اسويلك چاي
هزيت راسي ب(اي ) واجت امي سالتني

ها يمه شلون صرت
::زين الحمد لله
-وايدك
:: ايدي هاي بعد مجبسيها
-خو ما توجعك
::لا زينه
:: سوده عليه اجه بسام وانت نايم بالغرفه وخابر سالم وراح يشوف السياره

هزيت راسي ما جاوبتها اجت ضحى جابتلي كوب چاي وهي تكول //بسام يگول السياره صايره عبالك قوطيه كل
الي يشوفها يسال شلون طلع سلامات ما بي شي
امي رفعت اديها بالدعاء //الف الحمد لله والشكر يمه على سلامتك (باوعت الضحى )خلي بسام يجري دم السلامة
اخو ويوزعها ع الفقره

-اي خاله هو هم گال راح يجيب خروف ويذبحه الوجه الله
امي باوعتلي //يمه يوسف راية الله بيضه هسه انت يمي يمه لو صاير بيك شي غير اتخبل
صارت تبچي // يمه بعده جرح الشابه المسكينه ما طايب

ما اعرف اول مره ما احس بقهر من كلام امي ولا حرك شعوري درت وجهي وضحى گالت //خاله خلي يرتاح
طفت الضوه وطلعن بقيت كاعد وادخن اجت ضحى يمي اتقربت وحضنتني قابلتها ابرود وگتلها
::تعبان وجسمي كله يوجعني اريد انام
-ابقى يمك
:: لا ماكو داعي من احتاج شي ارمش عليج

هي طلعت واعرف بيها متنرفزه لكن هذا الشي موبيدي اخذت الدوا وغفيت وثاني يوم سالم اجه خابرته لان
ضلوعي اياذني حيل
واخذني للطبيب الي سوولي اشعه والطبيب طمني وگال// الحمد لله بس رضوض
وكتبلي علاج وصاني ارتاح لمدة اسبوع وما اتحرك والتزم بالعلاج

واجوني زملائي بالشغل لان بسام سووا الاجازه واتحمدولي السلامه والكل يكول الله قدر ولطف لان بسام مصور
الهم السياره
صرت احب ابقى ابحدي وصرت احاول اقرا كتب لا على التعيين وصرت اقرا قصص ومرات كتب دينيه
ومسائل شرعيه

وانا استرجع كل شي من يوم الي شفت بي مروه واتذكر مقدار العذاب والاهانه الي اتحملته مني وكل هذا دين برگبتي
::يعني انا شگد مطلوب المروه ولازم اوفيها حتى الله يغفرلي
وظليت اسأل نفسي ::ياترى مروه تغفر لي اما غفران رب العالمين اكيد يصير من ارجع حقوق الناس وانا ابد ما بيوم
اكلت حق احد لكن ظلمت مروه هواي وهواي كلش

سادس يوم صعدت للغرفه بس مو غرفتي انا وضحى لا صعدت الغرفتي الي اشتريتها المروه شگد صار
ما دخلتها
من يوم الي اشتريت ملابس للطفل من بغداد وكل ما احاول ادخلها اشوف طيف جمال وازهار
وحتى مروه
لذلك ما احبها لكن هالمره لا فتحتها وانا اشوف الغرفه عليها نزلة العرس وكلها تراب والاخشاب هم فتحت الكنتور
وانا اشوف شلون مسفطات الملابس الي بعدهن بعطرهن

اشتاقيت الها والهدوئها او برودها اشتاقيت للنظره التايهه والعيون الي كلهن عتاب
اشتاقيت للصبر للخوف
وارجع اسأل نفسي :: ليش كل هذا ويمته
ويكون الجواب ::لان خفت من الموت والعقاب

نمت بالغرفه وكعدت الصبح اتريگت وامي تگلي
سالت ضحى نايم بالغرفه الثانيه
::اي حجيه اشتهيت انام بيها
امي باوعتلي وسالت
-اشو مبدل وين رايح
::للگراج اشوف السياره
امي //لا تطلع شنو متوازي ع السياره
::اي طبعا متوازي اريد اروح اشوفها شگد تكلف وين وصلت بالتصليح
ضحى //بس بعدك تعبان
::لا صرت زين الحمد لله

وطلعت اخذت تكسي ورحت شفت السياره فعلا الله سبحانه نجاني باعجوبه
واتفقت ويه المصلح يصلحها ويشتري غراضها من الاصلي طلعت من الگراج اريد ارجع للبيت لكن
روحي تريد تروح وتشوف مروه واتذكرت شگد قسيت عليها
اهنا خابرت ولد صديقي اسمه عون هو بالحقيقه عالم ديني دارس حوزه اتعرفت علي عن طريق اخو زميل الي
بالشغل كان انسان هادئ وكلامه موزون رحتله واتناقشت ويا بعدين اجرت تكسي وطلعت للحقل حتى اشوف
مروه

ما اعرف اتسامح منها لان انا كل مره اشتاق الها لكن كرهي  الجمال وحقدي من الي سوا يخليني ما احبها اعذبها
وادري هيه ما الها يد بجل الي صار
بالطريق نزلت اتسوگت قريب العصر وصلت وخليت ام بشير تروح الها وطبعا اتفاجىو من عرفو بالحادث
وطلبت من ام بشير ترجعها للغرفه بدون ما تكللها ع الحادث
خفت تتشمت
راحت ام بشير وانا كعدت بالغرفه شويه انفتح الباب اتفاجات بوجودي باوعتلي انا جريت نفس وصلت يمها اتنفست
::مروه سامحيني
هي ما عرفت ترد عليه بقت واگفه وهي تباوع الايدي هزت راسها وسالتني
= خير يوسف شبيها ايدك
::حادث والحمد لله عده على خير
= الحمد لله ع سلامتك

اخذت ملابس وراحت للحمام وره دقايق اجت مغسله ولابسه دشداشه نظيفه باوعتلي
= اسويلك شي تاكله
::لا تعالي اگعدي اريد احچي وياج
گعدت باوعت الها   :: جبتلج اكل من المطعم
= شكرا
::گومي اكلي وبلغت بشير بعد ما تطلعين
هي باوعتلي واللمعه بعيونها ومتفاجئه من كلامي اتقربت عليها وحاچيتها
::انا چنت قاسي وياچ اريدچ تعذريني وتتحمليني

هي نزلت دموعها وشفت دمعه نزلت للگاع اتقربت مررت ايدي على خدها الي اول مره اتلمسه
  مسحت دموعها وقربتها الي وحظنتها وهي ساكته وانا اسمع دگات گلبها بين الذهول والاستغراب
بقيت حاضنها وهي ساكته سالتها وراسها بحضني ونفسها يطخ صدري
::الله عليج ذاك اليوم دعيتي عليه

هي ما جاوبت بس شهگت حسيت بيها شگد حامله قهر مني بقيت امسد على شعرها واگلها ::سامحيني واعذريني
خف توترها شويه سالتها ::شنو گلتي عليه
هي جاوبتني بخوف =حسبي الله ونعم الوكيل
::اذيتج مو
هزت راسها = ايي هوااي
دنگت وگلت ::انتي هم اعذريني واتحمليني لان الصار يهد جبال
هي وتشهك = واحنه ما قابلين ع الصار بس مو بيدنا نغير القدر

::يعني سامحتيني
= انت كل شي الي بهاي الدنيا انت وابني الي جاي ياريت تخاف الله بينه
::بعدج شايله عليه
مسحت دموعها = ظلمتني وانا ما استاهل
::مرات الواحد بسبب الضغط والكلام وبسبب التفكير يتصورله اشياء
هزت راسها = انا ما اعاتبك انت حقك بس اگعد واسالني وانا اجاوبك وگلي شنو تريد اسوي بس شغله
وحده اريدك تعرفها انت لازم تحافظ على كرامتي وتصونها

من سمعت كلمة كرامه غمضت عيوني سالتها ::  چنتي تحبين جمال
سالتها وانا اباوع التفاسير وجهها جاوبت بدون تفكير وهي تهز براسها= لا
::انا ما اقصد هسه لا اقصد قبل
هزت راسها ونفس الكلمه = لا
::مو مخطوبتله سنتين
= ايي بس هو خطبني حتى يوقف حالي
اتفاجئت من كلامها  :: شلون

صارت تسولفلي على جمال وعلى ابوها الي اخذ امه واتغير عليهم وصار ما يشوف گدامه اولاده لا يشوف اعداء
يكرههم ما يحبهم
عرفت انو ابوها هو الي انطى مجال الجمال وما چان ايحاسبه حسيت بيها كل كلامها صحيح وانا اشوف تعابير
وجهها الخاليه من اي حب او عطف اتجاهه حتى من تذكره ما تگول
الله يرحمه

سمعت كلام مروه بصراحه خجلت من نفسي اتقربت يمها لان عرفت من خلال كلامها مقدار الكره والحقد الي
شايلته على جمال سالتها
::وانا
  باوعتلي = انت شنو
::انتي شگد تكرهيني وتحقدين عليه
هي دنگت وصارت شفايفها ترجف وگالت بصوت هادئ = انا ما اكرهك ولا احقد عليك لان عاذرتك

اتقربت يمها وبستها بكصتها وطلعت رحت البيت بشير لان ابو التكسي طلبت منه ينتظرني بشير
شال فلوس وانطاني مال بيعه اخذتهن وطلعت والطريق كله احس بگلبي يدك كل ما اتذكر كلامها
وصلت بالليل للبيت وامي لاگتني وهي تحچي بعصبيه

-ما تگول عدي ام عدي مره گلبهن مثل النار عليه صدك چذب
باوعت الها وگلت:: شنو ما طالع قبل وتخافيين عليه
-بس انت گلت ما اتاخر وهاي صارت دنيا ليل
ضحى //خاله عوفي يجوز راح للحقل
امي هزت ايدها //ياحقل هذا شيسوي يروحله

باوعت الضحى الي اعرف كلامها بي مغزى وجاوبتهن ::لا ما رحت للحقل لگيت جماعه اصدقائي وگعدنا نسولف
ومن اريد اروح للحقل محد يمنعني
ضحى رادت تغير الموضوع //اصبلك عشا
::لا ما اشتهي اريد انام
امي //اصعد الغرفتك نام بيها لان بسام محتاج غرفته
::ايي حجيه صار
امي بنفس عصبيتها //خو مو هسه تنام
::لا بس ابدل وانزل

نزلت وضحى جابت العشا وامي جبرتني اكل وبعدها جابتلي جاي وانا ورثت جكاره امي گالت
-هذا ابن عمك شبي انغسل دماغه فد نوب
جاوبتها ::ها يمه خير عليمن تحچين
-على هذا الاغم سالم
::شبي
-طاح حظه من يوم الي اتزوج ما كال خالتي اختي ،

سحبت نفس من الجگاره ::حجيه انتي تعرفين سالم ماخذ بخاطره ولو ما الحادثه وانا مخابره فلا اجه
امي بعصبيه //اگلكم انتو ليش ما تصدگ......اندك الباب باوعت البسام (روح شوف منو خاف جايين على اخوك )
طلع بسام ورجع وهو يگول // اتفضلوا اتفضلوا الخيير بذكره

اجه سالم هو وسماح وانا اباوع شلون سالم حتى حليان مبينه الراحه على وجهها
اباوع الامي وضحى لونهن اتبدل وعيونهن فتحنها بكراهيه سالم دخل وسلم عليه ودنك على راس امي وضحى
اتلگته وباوسته
سماح باوعتلي وهي تگلي بابتسامه //اشلونك خويه الحمد لله على سلامتك الله دفع ما هو اعظم
رديت ::الله يسلمج هلا بيج ومرحبا شرفتينه

اشوف امي خزرتني هي اتقربت على امي وهي تگللها // اشلونج خاله الحمد لله على سلامة يوسف
رادت تبوسها امي ردتها بايدها وجاوبت بحنق //الله يسلمج
سماح غلست وراحت على ضحى وهي اتگللها //حبيبتي الحمد لله على سلامة ابو بيتج انا بس كلي سالم
اليوم گتله //لازم نجي نتحمد السلامه اليوسف

ضحى ابرود //الله يسلمج
امي باوعت السالم //نعم الله ع الفصليه خلتنه نشوفك
سالم باوع السماح الي بقت مبتسمه // مشاغل خاله
- يامشاغل مو توها تگول بس سمعت مترمه عليك اتجيبها
بسام راد يتلافه التوتر //راح اجيب عشا
امي // ليش هو بقى احد الهسه ما متعشي

سماح //اي والله خاله مثل ما تگولين اخذني سالم وعشاني بره وهسه اجينه (وطلعت علبة جكليت )
خلتها ع الطبله انا جاوبتها ::شنو هالزحمه
-شي بسيط خويه المهم الله قدر ولطف الله يخليك الشبابك وان شالله تشوف اولاد اولادك

امي وضحى وحده تباوع للثانيه وبعيونهن سؤال شمدريها باختها حامل
باوعت الضحى وگتلها ::اشو واگفه عصير چاي بسرعه
اهنا امي انتفضت وگامت وهي تگول اروح الغرفتي تعبانه (وراحت وهي تسمع بالكلام ) والله زين واحد
الفصليه تجره يهبت بيها بالمطاعم والثاني يريد مرته تخدم الفصليه انغسل حظهم فد نوب ونسوا ثارهم
امدا هيچ زلم
///////////////////////////////////يتبع