رواية بعد فوات الأوان الفصل الثامن وثلاثون 38 - بقلم آنين الليل

السلام عليكم
طبعا قبل يومين كملت بارتين ردت انشر بارت والثاني انشره ثاني يوم لكن الي حصل خربطة بالجهاز
انشر يمكم شكم سطر وبعدين انحذفن البارتين ليش ما اعرف ورجعت اكتب من جديد وتوني كملت كتابة
ومراجعة البارت وراح انشره

لكن عندي عتب
بكل بارت القراء يوصلون 600 او 700 او حتى الف لكن الي يدوسون ع النجمه قليلين الي ما يعجبه القصه
چان ممكن ما يكمل قراءتها
اتمنالكم قراءه ممتعه 🌷🌷
انا احبكم هواي لان جاي تنطوني العذر بالتاخير ❤️❤️
تحياتي الكم 🥰🥰
#آنيين الليل #
//////////////////////////
مروه
من سمعت وشفت انحطاط ازهار ويه جمال وعرفت انو امه ومرته يعرفن ويوسف چان بالنسبه
الهن مجرد لعبه
ما اكتمكم بالبدايه انقهرت على يوسف لكن مجرد ما اختلييت بنفسي واتذكرت الي سوا بيه وشلون
حرم امي مني وحرمني منها حقدت اكثر وكرهته اكثر واكثر وانا اشوفه شلون ذليل گدام ضحى

ما انكر معاملته اتغيرت وياي وصار اكثر هدوء وهو يحاول يغطي هدوئه بشي من النرفزه الچذابه
الي ما تخفى عليه
كل هذا يهون امام ضعفه گدام امه ومرته وجبروته عليه هذا الشي خلاني افكر واگول

= اذا حاولت اساومه انو ايطلگني وارجع الاهلي انا وابني اكيد بتاثير من امه ومرته راح ايسوون بيه شي
مو بعيده ايكتلوني وياخذون ابني ويگولون انهزمت او ياخذني الغير هذا المكان وياخذ ابني من عندي ويحرمني
من شوفته خصوصا وانا اشوف شلون هو ضعيف  گدام ضحى الي مهددته ان تفضحه رغم هي بس تعرف انو
ازهار على علاقه ابجمال يعني ما عدها لاصور ولا محادثات لان لو چانت تعرف بالصور اكيد هددته بشي اكثر

( انتو تكولون انو انا جاي ابرر للشي الي طلبته من جهاد )

بالحقيقه اي انا جاي ابرر لان اول مره راح اسوي شي من ذاتي بدون ما يتحكم بيه طالب او جمال او يوسف
وهذا الشي كله الي راح اسوي كله كله الخاطر ابني الي تريد ضحى وبكل بساطه هي وام يوسف ياخذونه مني
يعني انا البريئه الوحيده بجريمة جمال وازهار والكل يريد يقتص مني وياخذ حق اساسا هوه ملكي
وهمه ما الهم بي شي

يمكن لو من عرف يوسف بسالفة اخته وتصرفات امه ومرته يمكن لو مسجل وياي موقف واحد يجوز چنت افكر
انو اسامحه لكن ضعفه ومذلته بس حتى ضحى ما تفضحه وبالمقابل جبروته وظلمه الي خلاني ارجح كفة الابتعاد
وصرت افكر وادورها بعقلي وسواء اطلگت او بقيت على ذمة يوسف راح اكون انا الخاسره

وحتى لو فرضا اواجه يوسف بالي عرفته ويوسف راح يتفهم وتتطلك ضحى وين تروح اكيد يم سالم وسماح
ومثل ما كدرت تسحر يوسف راح تسود عيشة سماح وتسحر سالم وشنو ذنبها اختي تحب زوجها وهو يحبها
وسوا المستحييل بس حتى يرضيها

ومثل ما كل واحد عايش حياته ومنتبه النفسه انا راح اعيش حياتي واربي ابني  وحتى من اتطلك ما يصير كلام
وقال وقلت ولان فكرت بابني ما اريده من يكبر ينظلم مثل ما انا انظلمت قررت ما اسامح يوسف وما التفت
وراي واهاجر

والتجأت الجهاد الي اعتبره مسؤول عنه من اول ما دافع عني او وكف بوجه جمال ولان اعرف بي هو عنده
معارف ويكدر ايساعدني طلبت مساعدته وانا مخليه كل شي گدام عيني

ممكن جهاد ما يقبل او ممكن يسولف الامين لكن انا چنت مصره وفهمت جهاد انو اذا ما يكدر ايساعدني يسكت وما
يگول اي شي ولا كأني طالبه منه شي وهو وعدني وانا اعرف بي  هورجل بكل معنى الكلمه ما قبل اله
ان يكون وياي رغم الي يسوي چان ممكن ان يكلفه حياته ناهيك عن الفضيحه

اما يوسف فنفس ما هو يجي ساعات ويروح ايام صحيح اتبدلت معاملته اتجاهي لكن هذا الشي ما غير نظرتي
اله وانو هو انسان متقلب وما عنده رأي وبأي لحظه يجي وياخذ مني ابني ويرجعني الاهلي وصحيح عندي
دليل وممكن استخدمه ضده لكن انا قررت غير شي

بقيت نفس ما انا اطلع احش وابني وياي وارجع وحاولت اخفف علاقتي ويه ام بشير وهي هم صارت
مو هلكد تمر بيه لان بشير لگى بيت وصار يريد ينتقل اله ومثل كل بيت بي تعديلات فاكثر وكته يروحله
ويبقى سجاد الي اتجنبته اكثر

جهاد خابرني وبالبدايه چان كلش شديد وياي وحاول يقنعني انو يساعدني بكل ما يملك بس كون اقبل ابقى
واشيل فكرة الهجره من راسي  لكن انا رفضت وبشده
وهذا رفضي واصراري اول مره يكون نابع من داخلي وبقرار مني وماكو اي ضغط عليه

وعرفت من جهاد انو الثلاثاء الفجر يجي وياخذني ولازم اكون مستعده لكن انا كنت حذره وخلي اگول
خايفه لاجهاد يرجع بكلامه وينسحب باخر لحظه وانكشف واصير من مجني عليها الى مجرمه
فقررت اجازف واخلي جهاد امام الامر الواقع

يوم الاحد الظهر اجه يوسف شفته  وهو لازم حمودي ويبوس بي وانا بيومها اتمنى اكله
= ودعه الابنك الي تريد تحرمه مني
صرت اباوع اليوسف وهو يحضن محمد استوقفتني جمله كالها وهو يدغدغ بحمودي
:: ياالله اكبر هم ياالله حتى تروح وياي واليسالني اكله هذا ابني ابو جاسم السبع

من سمعت كلمته رحت للمطبخ وغلبتني دموعي كلت خلي انطي فرصه واحجي ويا واكله يطلكني
ويترك ابني عندي واطالبه ابيت ويطلعني من الحقل واذا كلي اي اخليلج بيت وانتي تبقيين ام ابني
اطلب منه ايأكد زواجنا بالمحكمه ويسوي جنسيه الابني

جبتله الغدا وطلب مني اكل ويا واكلت شويه وغديت محمد وانا ما اباوع بوجه يوسف صدكوني كل الحوادث
صارت كدامي وبعدها جبتله جاي وصار يشرب
وحالي حال اي جاريه لازم اكون طوع امره وبهاي الشغله بالذات ولحد هاي اللحظه
وهو ما  يريد يعترف انو انا زوجته لا يعاملني على  انو انا فصليه وابن عمي هو الغلطان ويه اخته

چان متمدد يمي واتصلت بي ضحى عرفتها هي لان من جاوبها كلها
ها عيوني
وطلع من الغرفه وانا رحت ورا اتسمع الكلام الي دار بينهم
::هلا ضحاوي
::اي انا بالحقل
:: انتي شبيج مو گتلچ انطيني وكت هاي انا كل ما اجي انتي تسويلي نفس القوانه  وتتقررين نمت وياها
سولفت بوستها عيب هاي الاسئله

:: اصلا من يوم ما امها ماتت لاتباوع بوجهي ولا تحچي وياي
::لا تولي قابل انا محتاجها بس اسوي هالشكل حتى ما تشك بشي
:: ضحى اسمعيني بلا تهديد گتلچ الولد راح اجيبه بس خلي امه تفطمه لان ما اريد يصيرله شي
:: اي اخاف علي لان هو هذا الي راح اطلع بي من الدنيا عاد خلي ينفطم واجيبه
:: ها ما ترديني ازعل وتهديدج لو نسيتي بس خلي اطلگ مروه واجيب ابني ويصير خير
::كل شي راح اسوي بس خليني اسكتج وارضيج
:: لا ما اتاخر هسه اجي

من سمعت كلامه رجعت المكاني وانا اباوع الحمودي الي خليته على ايدي وحضنته وحجيت ويه نفسي
= انت ياماما الي تستاهل احارب مو بس ابوك لا احارب الدنيا كلها على مودك

رجع يمي يوسف واخذ المنشفه وراح للحمام سبح ولبس ملابسه  وباوع الحمودي الي چان نايم دنك علي وباسه
وشمه وكانما يعرف انو هذا اخر يوم راح يشوفه  صار يمشي  وصل للباب وباوع عليه سالني

:: محتاجه اجيب وياي شي من اجي
= لا سلامتك
باوعلي وابتسم ورد عليه :: تدرين هاي اول مره تگليلي سلامتك
باسني براسي  وگلي :: ديري بالچ على نفسچ وعلى محمد
من سمعت هيج احس صرت ارجف گتله = منين  ادير بالي

:: مو بشير هالايام ملتهي ابيته ومو دووم يجي للحقل
= لا تخاف ما عليه شي اسرگي للباب واقفله
هو ابتسم وگلي :: زين تسوين تره فتره وراح كل شي يتغير
هو ابتسم وراح ركب السياره وشغلها اهنا گعدت وگلت

= بعد ما بقالك عذر ولا بقالي خيار هذا هو بوجود جهاد او عدم وجوده راح اسوي الشي الي براسي
واول شي فكرت بي انو اذا جهاد ساعدني لازم افكر بسلامته وما اخلي بالصوره

انا بوكتها ما چان عندي اي خيار اله اني اوثق بي بس بنفس الوكت هم لازم اخذ حذري لان بصراحه
ما صارت الي اي ثقه بكل احد خصوصا وانا اشوف اخواني من اخابرهم امين يسولف الي على
زوجته والطفل الي فرحان بي وهو بعده ما جاي للدنيا
وصادق يسولف الي على حبيبته وشلون هي بنت ذوات وكيوت
وسماح طاير عقلها بسالم وابنها
وزينب وعلي  ملتهيين بدراستهم وما اعتب عليهم لان بعدهم مو گد المسؤوليه

اما ابوي الي انا طالعه من صلبه ومتسجله باسمه فما كلف نفسه لو دقيقه يكلي بيها اشلونج
لذلك انا وثقت بهذا الانسان الغريب لان اتذكر وكفته من لمن جمال راد يساومني بشرفي

ارجع واكول اكيد تتصورون هاي اعذار حتى اغطي على خطأي لكن الي ما عايش المأساة وما مار
بيها اكيد يحچي بما يتصوره ويفهمه

خابرني جهاد وكلي انو الثلاثاء الفجر راح يجي وياخذني من الحقل وما عليه بس اجيب اوراقي الثبوتيه
حتى ما گلي جيبي وياچ فلوس او ذهب اذا عندج
من راح يوسف وبقيت ابحدي صرت افكر واكول
= يجوز جهاد ما يجي ابحده
= يجوز ايگل الامين وصادق ويجون ياخذوني وبعدها يوسف ياخذ ابنه وحتى لو طلعت التسجيل
راح انحق لان ما حچيت وما گلت يعني انا مبيته النيه لذلك قررت يوم الاثنين الفجر اطلع ابحدي
واوصل البغداد ومناك اخابر جهاد

فجر الاثنيين الليل كله ما نمته حضرت غيارات الحمودي  واخذت جنسيتي وشهادتي والجواز  وخليتهن بالجنطه
واخذت بيان الولاده وهذا خليته بالجيب الزغير وطلعت فلوسي الي انطاهن الي امين من اجاني للمستشفى ومن
صار محمد انا ما صرفت منهن اله شي قليل حسبتهن لگيتهن مليون وخمسين ضميت المليون وخليت الخمسين
الف بايدي وطلعت ذهبي المداليه الي اشتراها الي امين والتراچي وعندي محبس وسوارين هم ضميتهن بالجنطه
وخليتهن بالجنطه الثانيه الي بيها ملابس وغيارات محمد

ما اخفيكم حسيت بخوف واترددت اكثر من مره لكن قررت اطلع وما ارجع لهنا لو يكلفني هذا الشي حياتي

رحت للمطبخ طلعت سچين حاده وزغيره خليتها بجنطتي وبقيت ما مستقره تقريبا الساعه تلاثه
الفجر شغلت التلفزيون وعليته يعني اليوكف بصف الشباك يسمعه وطفيت المبرده  لبست دشداشه سوده وشالي رديته على عيوني وحنكي وجواريب وشحاطه (اجلكم الله ) سويت هالشكل حتى من اركب بسياره محد ايشك
من كملت بدون تفكير اخذت ابني وطلعت وصرت امشي بسرعه واكول

= ياربي ساعدني بجاه النبي والله هذا الي اسوي المصلحة ابني
امشي وما اباوع وراي جان اكو شارع قريب للحقل وهو الفاصل بين حقلنه والحقول الباقيه وچنت دووم اسمع
بي صوت سيارات واكثر من مره شفت بشير يجي من عنده وشفت يوسف هم مرات يجي ردت بس اوصل حتى
اعبر للجهه الثانيه واامن شويه

جانت لحظات صعبه ما تتصوروها الى ان عبرت الشارع للحقول المقابله جريت نفس وصرت امشي بيناتها ومن اسمع
صوت سياره اباوع الها الى ان شفت سياره زغيره تكسي راسا طلعت واشرت الها هو وگف باوعتله رجال عمره يجي
اربعين سنه صار يباوعلي مستغرب لان مره وبحدي  انا گتله بدون ما اسلم علي

= الله يخليك اخذني للمستشفى لان ابني لازم اعلگله دم
هو رد عليه كلي // يامستشفى
= هذا مستشفى الحله

هز راسه وركبت ويا ورا وانا ادعي ربي كون حمودي ما يكعد ويضحك ويشوفه السايق هو باوعلي بالجامه وحاول يطمني
- - لا تخافيين ان شالله ما بي شي بس ليش ابحدچ وبهالوكت
جاوبته بكل ثقه وانا مدنكه = ما عندي احد بس عيالي عمي مجلوط وعمتي مره چبيره وما تشوف
- - وزوجج وين

غلست وگتله // الله يخليك بسرعه استعجل الولد مغمي علي (يمه ابني ) الله يخليك بسرعه لازم اعلگله دم
هي الطبيبه كالت نامي بي مستشفى بس انا ما اكدر اعوف الشياب ابحدهم الله يخليك استعجل
هز راسه وگلي //لا تخافيين هسه نوصل گولي ياالله

صار يسوق بسرعه وصلني وكلي // انتظري راح اجي وياچ
= لا خويه شكرا انا متعوده دووم اجيبه لهنا كثر خيرك
شلت كروه هو ما قبل لكن انا انطيته خمس تالاف هو كلي // خويه هذنني هواي
= لا حقك الله يخليك ما قصرت

ودخلت للطوارى وسجلت باص الي بس انطيت اسم ضحى ما ادري ليش ورحت شفت الطبيبه الخفر سالتني شبيج
جاوبتها  = دكتوره جاي اختنك وكلبي يدك
سجلتلي على علاج رحت صرفته وطلعت وانا ادعي كون ما الگا الهذا الوصلني
طلعت شفت رجال چبير لابس دشداشه وچفيه وعگال وصلت يمه وكتله

= حجي اريدك توصلني للگراج
هز راسه // اصعدي عمي
ركبت وبقيت ساكته گلي//  وين تردين
= للكراج
ادري بس انتي جايه منين مو چنتي بالمستشفى

= اي عمي ابني اتخربط وجبته وانا اريد اروح الاهلي ابوي مريض
- - هاا وين اهلچ
بدون تردد = بالنجف
- - وليش ابحدج
= عمي زوجي متوفي وبس عمي رجال عنده جلطه وعمتي مره جبيره بقت اتداري
هو اتحسر وكلي // الله كريم ان شالله ما بي الحجي شي
= ان شالله

بقيت ساكته وصلني اباب الكراج انطيته اجرته  وراح بس نزلت ودخلت للگراج شفت سياره السايق يكول نفر بغداد
انا رحت ركبت بيها ومشت السياره وانا اقرا ايات وگعد حمودي باوعلي واستغرب السياره انا خليته جوه عباتي
وصرت ارضعه ومن وگفنا بالسيطره سبحان الله بس باوعو ما فتشونه الى ان وصلت بغداد ونزلت بالگراج
ذيچ اللحظه اتنفست

وخلي اگلكم شي كل هذا الي سويته ماخفت ولا فكرت بالخوف ولا حتى بالعقاب وما لكيت تفسير الكل هذا
من نزلت بالكراج چانت الساعه بالعشره وثلث  خابرت جهاد هو استغرب  لان الصبح احجي ويا ردعليه

- الو
= الو جهاد انت وين
- - ابغداد ليش
= زين انا هسه بالگراج
رد عليه بعصبيه // يا گراج
= گراج بغداد

- - شنو يعني انتي اجيتي من الحله البغداد ابحدج
= اي انا هسه ابغداد بالكراج
- - زين جايچ ابقي ابمكانچ لا ترحين الاي مكان

باوعت شفت ناس تصعد وناس تمشي واصوات اصحاب السيارات وهمه ينادون بصوت عالي  صرت افكر واكول
= منو يكول جهاد ما جاي ويا امين لو حتى يوسف

صرت اتلفت وشايله ابني شفت كشك بالكراج رحت دخلت لگيت بي اثنين جاي يشترون باوعلي صاحب الكشك انا
اخذت كيكه  وچبس وطلبت منه بطل ماي هو انطاني شفت عنده لفات وصيته يسويلي وحده واخذت بطل عصير
من طلعو الي جانو بالمحل انا استاذنت منه وگتله

= مي خالف اكل اللفه اهنا
هو طلع من يمه كرسي وكلي // اتفضلي اكعدي واكلي لفتج او وكلي الزغير
صرت اوكل بحمودي الكيكه لكن عيني على الي يدخلون للكراج اريد اشوف جهاد ويامن جاي

شفته يمشي ويباوع للوجوه انا درت وجهي حتى ما يشوفني لمن حسيت بي عبر الكشك صرت اباوع للناس الي
يمشوون اتصل بيه رديت علي كلي بعصبيه
- - ما تگليلي انتي وين
= بالكراج
- - اي وين انا هسه بالكراج گليلي انتي وين بالضبط

= شنو يعني
- - مروه يعني شنو يمج موجود السياره وين يصيح راعيها الاي مكان
= ها هسه اشوف واتصل

طلعت وانا شايله حمودي لمن ما وصلت يمه وهو داير وجهه انا گتله = جهاد
حسيت بي اتسمر بمكانه دار عليه شافني دنك وبعدين رفع راسه وسالني
- - وين چنتي
جاوبته = وراك بس انت ما شفتني
اتنفس وگلي //امشي وراي بسرعه
سالته = اجيت ابحدك

هز راسه بدون ما يجاوب صار يمشي وانا ورا وگلبي ايدك يتهيأ الي هسه اشوف امين او صادق او حتى يوسف
خليت محمد جوه عباتي وصلنا للسياره الي مخليها بره الگراج وركبت بالصدر لان هو فتحلي الباب وساق السياره وانا
ساكته  بعدها طلع تلفون وخابر
- - الو السلام عليكم
- - اشلونك ابو صبر
- - ام محمد وصلت البغداد وهسه وياي بالسياره
- - تمام بانتظارك

سد الخط وبقى يدخن ويسوق الى ان وصلنه المطعم هو نزل وفتحلي الباب نزلت ومشى گدامي  للمطعم وانا ورا
راح الطاوله بزاويه  بعيده وانا كعدت هو كلي بدون ما يباوعلي
- - ذاك الحمام فوتي غسلي الحمودي وغيريله

بدون ما احجي رحت واخذت جنطتي وياي والف فكره براسي غسلت وجهي وعدلت شالي وغسلت الابني وغيرتله
بعدها رجعت
گعدت مدنكه هو كلي //شنو تحبين تاكلين
جاوبته بدون ما ارفع راسي = ما اشتهي
نفخ بصوت وگلي // شنو خايفه لو متندمه

= خايفه
- - من شنو
= خايفه بس لا انت ...
ما جاوبني اشر للنادل وطلب غدا وكلي //لازم تاكلين وتوكلين الطفل خطيه

جابو الاكل صرت اوكل بحمودي الي مبين علي مستغرب الاماكن والاشخاص جهاد باوعلي وكال
- - انطيني حمودي وانتي اكلي
= لا عادي انا اكل
اكلت شويه واشوف جهاد متوتر ويدخن رغم يختلس النظرات ويباوع الي كملت كلي
- - ما اكلتي
= شبعت الحمد لله

طلب جاي وهو صار يشرب ويدخن انا بادرت بالكلام لان سكوته قالقني
= هواي اتدخن مو زين عليك
نفخ الدخان وكلي //متعود
هزيت راسي وسكتت وحمودي بحظني هو گلي
- - هسه راح يجي الرجال وراح نبدي الاجراءات انتي قانعه بالشي الي تسوينه يعني متاكده من نفسج ما
راح تتراجعين
هزيت راسي وكتله  = اي متاكده

- - اسمعيني من نطلع منا راح نمشي بالسياره تقريبا الف متر وراها ماكو مجال للتراجع
هزيت راسي = ما اتراجع
باوعلي وجر نفس // وليش كل هذا
جاوبته بدون تفكير وانا ااشر على ابني = على مود هذا
بقينه ساكتين بعدها رفعت راسي وكتله = تدري ليش التجات الك وطلبت مساعدتك

هو جتف اديناته انا كتله = لان انت انسان الواحد يكدر يعتمد عليك وهو مغمض
رد عليه //لا هذا الكلام ما مقبول منچ امين خوش ولد وينشد الظهر بي وحتى صادق
هزيت راسي = اي اخوي امين سبع بس انا التجات الك لان احس انو انت مسؤول عني

هو استغرب كلامي هزيت راسي = اي انا اعتبرك مسؤول عني من لمن جمال حاول يعتدي عليه وانا باعتباري 
بت عمه وشرفه ومحسوبه علي وانت دافعت عني وانا بالنسبه الك غريبه ما تعرفني ولا بيناتنا لو كلمه
دافعت عني وحميتني لان عندك غيره وساعدت ولد بذاك
الوكت يعتبر طفل شفته محتار وقدمتله مساعده بدون اي مقابل

هز راسه وحرك ايده // لا امين هو اخوي الي (اتحسر ) انا ما عندي اخوان وحيد ويتيم وامين قبل ما اساعده
هو ساعدني ونقذ حياتي
= يعني انا مو غلطانه من كلت انت مسوول عني
باوعلي وخزرني وهاي اول مره بحياتي اباوع الجهاد هو سالني // ليش تردين تنهزمين
ما جاوبته دنگت وانا احس بجهاد ما يريد ايساعدني اكيد. يريد يرجعني هو رد كلي
- - لا تسكتيين جاوبيني

بقيت ساكته وانا اهز رجلي حتى حمودي يسكت رجع يحچي
- - مروه اسمعيني جاي تسمعيني مو
انا هزيت راسي هو گال //مروه الوكت ما فات تكدرين ترجعين الاهلج او حتى الزوجج ما اريدچ تتهورين
وتتندميين بعد اكو وكت لا تسكتيين اريد اسمع جوابج

باوعتله  وفتحت الجنطه وطلعت السچينه الزغيره وحاجيته والعبره بصدري
= شوف جهاد ما عندي اي خيار يااما اروح واذا عندك اي امل ان ترجعني لو خطوه وحده صدگني اگطع
شريان ايدي واموت گدامك
من شاف السچيين فتح عيونه ع الاخير وگلي  //كافي تهور

= انا التجأت الك  مو بطرانه انا حملت مآسي الجبال ما تحملها مو عبالك شغل لا لو ع الشغل اهون
بس مذله ضرب جوع وآخر شي يردون ياخذون ابني شنو عبالك ما فكرت لا فكرت وفكرت هواي
ما لگيت اله هالدرب وانت بكيفك
كل العليك تكمل فضلك وتوصلني للرجال الي يساعدني بشغلة الطلعه منا وانا عندي فلوس هاك شوف

(طلعت الذهب الي مخليته بعلاكه نايلون وياهن الفلوس ) هاك هذا الذهب بيعه وذني الفلوس اكيد
راح يوصلني الفد مكان

بقى ساكت ودفع العلاكه وهو يتنفس
- - ضمي ذهبج وفلوسچ لو على الفلوس والذهب سهله وتهون بس وضعج وظرفج وحتى وجودي وياچ كله غلط
= شوف جهاد حقك تخاف صدكني هسه لو يجون اهلي وعشيرتي ما راح اگول التجأت الك راح اگول شافني
بالگراج وجاي يقنعني ارجع وهسه لهنا وتگدر تروح وكثر الله خيرك بس تنطيني تلفون الرجال وانا اتفاهم ويا

هو نفخ الهوى من حلگه وشفته صار وجهه احمر وفتح عيونه وعض شفته وهو يحچي بعصبيه
- - شنو انطيج رقم الرجال ولهنا واروح شنو شايفتني گدامچ هذا الكلام بعد لا تحچينه
دنكت ورديت بهدوء // انا اسفه ما اقصد

ما حچى وصار يدخن تمينه ساكتين ما اعرف شگد وحمودي خليته جوه العبايه وصار يرضع ونام
لمن اجه رجال وسلم على جهاد وگلي
- - السلام عليكم
رديت علي وانا اباوع الجهاد = عليكم السلام
گعد وجهاد گال //الله بالخير
الله بالخير

طلب جاي شرب واعرف بي جاي ايباوعلي ويخزرني لان انا مدنكه بعدها گال الجهاد
من رخصتك
وگف واتمشى قريب الطاوله وجهاد راح ورا وصار يحجي ويباوعلي بعدها حجى بصوت مسموع
انا  راح انتظركم بره
هز جهاد راسه واجه يمي گعد وگلي // مروه للمره الاخيره هذا قرارج ما تتراجعين عنه
هزيت راسي = ايي

- - تدرين شنو يكلي الرجال
باوعتله = شنو ؟
هو اتنفس // گلي اتاكد منها يجوز متعرفه على واحد بالتواصل الاجتماعي وهذا مقشمرها من توصل
التركيا هو يجيها وبعدين يضحك عليها لان ص...
انا قاطعته بحركه  من ايدي وگتله بعصبيه = اشش بس لا تحچي شنو انت ما تعرفني
- - اعرفچ وهم اعرف انتي عندچ نقال واكثر الوكت ابحدج

هزيت راسي = مشكور ما قصرت لهنا وارجع وحتى هذا الرجال ما اريد يوصلني
- - يعني ترجعين الاهلج
هزيت راسي = لا ادبر حالي
كام من مكانه وكلي بحده // مره ثانيه اگص السانج اذا تتجاوزين بالكلام انامن حچيت وياج لان انتي ما رايحه
البيت عمتج امل انتي رايحه تعبرين محيط والله العالم شنو راح يصير بس انا اخلي كل الاعتبارات كدامج

باوعتله هو كلي // انتي نفسج لو وحده مثلج هيچ مسويه ما راح تعذريها افتهمي بابا احنه ماكاعدين
بامريكا احنه بالعراق عادات وتقاليد وتربيه وعشاير
هزيت راسي //. اي العشاير والعادات الي زوجتني الواحد وانا مجبوره وشبعت اشكال الاهانات والضيم

    دخن جكاره وحبس الدخان بصدره //  كل هذا اعرفه لكن انتي هسه بحكم الشارده من رجلج منو راح
ايعذرج منو يكول من قهرها وعذابها
صدگي راح الناس تتقول اشكال عليچ واخوتچ ما راح يرفعون راسهم وانتي لو ما اعرف بيچ صايره متهوره
چان لزمتج ورجعتج بس اخاف تنفذين تهديدج

باوعتله باصرار = اي انفذه وهسه كدامك
نفخ وكلي //انا خايف عليج وما يهون عليه امين يتعير من وراج
=من هاي الناحيه اطمن
سالني // شلون ؟
لزمت النقال ولوحت بايدي = بهذا النقال بي ادانة يوسف واهله

هو عكف حواجبه وسالني// شنو ادانه ؟
=اي ادانته امام الله والناس وانو الفصل چان كله لعبه
جاوبني باستغراب //انتي شتحجيين
= الي سمعته
- - يعني الي صار كله چذب ولعبه
= اي

- - ويوسف اخذ الفصل واخذج واخذسماح السالم وكل هايه خاوه
= اي
—— يعني يوسف يعرف بااخته عدها علاقه ويه جمال
هزيت راسي = ايي

غمض وهز ايده وحچى باستهزاء // وهسه انتي تردين تنهزمين وتجيبين العار الاهلج وساكته على
مصيبه مسويها يوسف
جاوبته = لا لاتفهم الشغله غلط يوسف ما چان يعرف
- - شنو ما يعرف  فهميني تره دخت
دنكت وكلت = ما اكدر احجي والي اسبابي
- - ها ما تحجين شي وتردين تنهزمين وما ترديني اعرف شنو هالالغاز

بقيت ساكته ما جاوبت هو رد كلي //مروه انتي راح تصيرين بنظر الناس خاينه ولعوب ومو زينه وعندج الف
صاحب ليش مروه تعرضين سمعتج وسمعة اهلج للعار وانتي تدرين الناس ما ترحم
بقيت ساكته وغلبتني دموعي رفعت راسي باوعتله  = جهاد انت عندك ثقه بيه
هو ما جاوب رديت كتله =الك حق ما تجاوب  وما يصير الك ثقه بيه الوحده الي تترك زوجها واهلها وتلتجأ
الانسان غريب وتريده ايساعدها تنهزم شلون يوثق بيها بس لازم تفهم محد راح يجيب سمعتي او سمعة اهلي بالموزينه

هو باوعلي // ايي فهميني شلون !
جريت نفس = هسه ما احجي بس من اامن على نفسي راح احجيلك كل شي
وكف وكلي // ياالله امشي واي شي تسمعينه لا تعقبين واي سؤال ينطرح عليج لا تجاوبين خليني انا احجي
بس قبلها روحي للحمام عدلي حجابج البسي عادي بلا ما تنزلينه

رحت واخذت ابني وياي وجنطتي عدلت حجابي وطلعت ورا صاحبه ركب بسيارته وچان ويا سايق
وانا ركبت بسيارة جهاد صار يسوق بالسياره ويدخن بدون ان يباوعلي خابر وگله // انتظرني يمك
باوعتله هو رد عليه // راح اخلي  سيارتي بالكراج ونصعد ويه ابو صبر

ركن السياره بكراج خاص للسيارات وطلع جنطه زغيره وفتحلي الباب وركبنا بسيارة ايوب انا ركبت وره السايق
وهو ركب وره ايوب وصارت السياره تمشي طلعنه من بغداد وبدينا نمشي ناحية الشمال انا ساكته وابني بحضني
واقرا ايات قرآنيه واطلب من ربي الستر وجهاد الطريق كله وهو يدخن جكاير جان السكوت سيد الموقف
الا من بعض الكلمات والجمل الي كان ايوب يتبادلها ويه جهاد ونزلو للمطعم وانا ما نزلت بس جهاد
جابلي علاكه خال بيها اكل وعصير وماي

وبعدها كملت السياره الرحله وانا كل ما نمر بسيطرة تفتيش اخاف واصير ارجف كل خوفي على ابني
واحاول اضم محمد جوه عباتي  
الى ان وصلنه الاربيل الي ما اعرف هي محطه للتغيير لو رجوع للواقع المرير

///////////////////////////////يتبع