رواية بعد فوات الأوان الفصل التاسع والعشرون 29 - بقلم آنين الليل

يوسف
رجعت ويه ماهر الي اصر ابات يمهم واطلع الصبح على راحتي وتمينا ساكتين اكيد ماهر احترم الخصوصيه
بتت بالديوان والصبح گعدنا اتريگنا وبعدها سلمت على ماهر واتشكرته هو گلي
-لاتحجي هالشكل يوسف انت اخوي وان شالله ترتاح وترجع النفسك اول مره

::ان شالله سلملي على الوالده واخوانك
- يوصل ان شالله
::فيمان الله ماهر ما اعرف شلون اجازيك
- ما بيناتنا انت فضلك سابق
::الفضل ال الله
- بس اتمنى يايوسف تنتبه النفسك وتراجع حساباتك

هزيت راسي واتنفست شهيق وزفير :... الله كريم من اتصيرلك جيه البغداد البيت خالك عود مر
- ايي اكيد
وصلني ماهر للكراج وركبت بتكسي انا بالصدر او اجه ولد هو وزوجته وابنهم زغير اخذو الوره ومشت السياره
وانا استرجع كلام السيد انو لازم ما اكل من الي متعود اكل منهم وحتى ماي ما اشرب

:: هو انا اكل عدمن ... انا اكل ابيتي ومن ايد مرتي
:: هذا هو يعني السيد يعرف منوالي مسويلي السحر واكيد عن طريق الاكل لذلك هو ما فهمني منو
الي خالي هذا السم
::بس ما كلي الاسماء يعني قصده الحر تكفي الاشاره

:: يعني ضحى هي الي مسويتلي السحر
::بس ضحى ما تطلع ابحدها اله امي وياها
::يعني امي مشتركه وياها
::معقوله لا لايمكن
زمخت على نفسي :: شنو هو الا ولا يمكن ضحى ما تطلع اله ويه امي

:: منو ايكول ضحى يجوز هذا كله چذب ويجوز دجل وانا مابيه شي
::اي يجوز كله چذب لا هو چذب لا يمكن ضحى تسويلي مستحييل
هزيت راسي  :: الرجال ما سووا شي بس يقرا بايات محددات واختنكت نفس خنگتي اي انا گلبي دووم اياذيني
:: اي دووم والسيد ايچذب ولمن اتقيأت هم چذب ولمن راسك وجعك
:: والله ما ادري شسوي محتار

:: على گولة ماهر انت سوي الشي الي گلك علي السيد  واتحمل هالشكم يووم
:: اي لازم اتحمل لازم بس شلون اقنعهن ما اكل ولا اشرب والسبح شلون
بقينا بالسياره مره نستمع للراديو ومره اسولف ويه السايق ونزلنه بالاستراحه واكلت ودخنت بعدها استانفنا سفرتنا
وصلت وره الظهر فتحت الباب ودخلت للصاله ما لگيت احد بيها ورحت الغرفة امي الي لگيتها متمدده على
چربايتها وصلت يمها وبست راسها هي فتحت عيونها وكالت

- هلا يمه بيك اجيت
ابتسمت بتعب :: اي توني وصلت اشلونج يمه
- انت شلونك
::انا زين الحمد لله
- دياالله اصعد غير ملابسك وخلي ضحى تنزل تصبلك غدا

:: لا يمه اكلت ما اشتهي
- زين يمه اصعد ارتاح
::اي والله تعبان كلش
اخذت الجنط وصعدت امي گالت //هسه ما بيك حييل خليهن وبسام ايصعدهن

:: لا مو ثگيلات
صعدت فوك فتحت الباب لكيت ضحى نايمه هي حست عليه گعدت وبس شافتني نزلت من الجربايه واتقربت
مني وحضنتني وهي تكلي // الله يساعدك
::هلا يابه
-الحمد لله ع السلامه
::الله يسلمج
- مشتاقه هواي
:: وانا هم تعبان وما اشوف بعيوني محتاج انام

ضحى وهي تهز بايدها // ههههي وانا عبالي تكلي انت هم مشتاق اليه اثاري تكلي تعبان
اتقربت منها ولزمت حنچها :: هاي شبيج ضحى تعبان شغل وسفر
- زين اسبح ونام
:: لا ما اكدر افتح عيوني انام ولحد ايگعدني انا ابحدي اكعد

بدلت ملابسي واتمددت ع الچربايه وبقيت افكر بالي صار وياي وليش ضحى هيج تسوي شنو السبب وهي
تدري بيه انا مستحييل اتركها مو لان احبها بس هي بت عمي وبت خالتي واخت سالم الي اعتبره اخوي معقوله
ضحى تريد اتموتني او اتسمني ليش

:: يجوز الطبيبه گالت الها ما يصير عندج اطفال وخافت كرهتني بمروه حتى بعد ما يصير عدها جهال
::يعني حتى ما اتقرب الها
: :ايي هو هذا السبب يعني انا شگد صارلي ما متقرب المروه يمكن اكثر من اربع تشهر حتى من اتقربت الها هيج
حبيت اذلها وابين الها رجولتي مو رغبه

غلبني النعاس ونمت ما گعدت اله والدنيا ظلمه رحت اتوضيت وصليت وبعدها سبحت وبدلت ملابسي ونزلت
لكيت امي وضحى گاعدات وبسام هم طلع من الغرفه انا سلمت وكعدت وبسام كلي // الحمد لله ع السلامه سفره سعيده
:: الله يسلمك
امي باوعت الضحى // يالله حضري العشا
باوعت البسام وطلعت فلوس گتله :: هاك روح جيبلي روبه من هاي الزغار وجيبلي وياك سيت ماي بطاله

امي كالت // شبيك يمه
نفخت دخان الجگاره :: هناك اتخربطت معدتي اذتني وصرت اتقيأ ورحت للطبيب سويت تحاليل
طلعت عندي جرثومه والتهاب حاد
امي // اسم الله الرحمن

هزيت راسي :: اي اتاذيت كلش عاد الطبيب انطاني علاج وصاني ما اشرب اله ماي بطاله واكل روبه وصمونه
بالعشا والغدا خفيف وابتعد عن الدهون
امي // وانت طايح مرييض واحنا ما ندري
باوعتلها :: ماكو شي يمه شويه تعب والحمد لله صرت زين
امي تهز بايدها // شلون زين مو هالتكول مسويلك تحاليل ومانعك تاكل

:: شسوي فتره وبعدها الله كريم
بسام //لازم بالطريق ماكل ومغثوث
ضحى // اي ااكيد  اكل المطاعم مو زين
:: لا هاي صار لي فتره معدتي ماذيتني وانا هم ما راجعت
بسام // اذا تريد باچر اخذك للطبيب

:: صرت زين وگلي اهم شي العسل وبيك وما تستحمي
بسام //انا اجيبلك عسل من امه خالص
::لا المهندس الوياي نسيبه  عنده منحل وجابلي الله ينطي
بسام //يوسف يعني ما بيك شي
:: لا وداعتك (باوعت الهم ) هاي شبيكم خفتو

بقيت گاعد بالصاله وبسام اجه وجابلي روبه وسيت ماي ضحى بالمطبخ جابت العشا هم اكلو وبعدها شالت المواعين
ورجعت كعدت بصفي امي انا باوعت الها
:: ضحى روحي نزلي جنطتي مو الجنطه الزغيره هايه نساها يمي صاحبي خابرته باچر اخذها اله من اروح للدوام

صعدت ونزلت الجنطه فتحتها وانطيت الامي قطعة قماش وشحاطه
وضحى جبتلها مكياج وعطورات وبدلة نوم وبسام تي شيرت
اخذوهن واتشكرو مني وضحى عينها تربي ع الجنطه عبالها جايب المروه شي باوعت الها وحچيت

:: ولو اتعبج ضحاوي صعديهن وطلعي ملابسي هنه نظيفات
- لا ما بيها تعب اصلا انا اريد اصعد
:: زين وانا هم تعبان وباچر عندي دوام ويجوز اتاخر
امي // شنو اتمر ع الحقل
:: لا حجيه اتاخر بالدائره عدنا جرد

ضحى// بس انت تعبان لو تاخذ اجازه
:: يمعوده منو ينطيني اجازه اداوم ما عندي شي
طلعت من باب الصاله امي سالتني // وين طالع مو گلت تصعد تنام
:: شويه  بالحديقه
طلعت بالحديقه گعدت واجه وراي بسام الي سالني // يوسف انت زين اخذك للمستشفى
باوعتله :: زين ما بيه شي بس ارهاق وتعب

- وليش هلگد ضايج
:: ما ضايج شبيه؟
- والله مبين شايل هموم الدنيا على راسك
سكتت ماجاوبت وطلعت جگاره ودخنتها هو گليي // شنو يوسف الطبيب من رحتله ما گلك الجگاير مو زينه عليك
هزيت راسي :: اي گلي بس ما اگدر اعرفها
- لا تگدر تعوفها تگدر
وكانما بسام يريد يگلي // انت ما تعوف الجگاره بس عايف ابنك وزوجتك

هو راح اخذ الصونده وطلع بره يرش بالباب وانا دخلت شفت امي وضحى يسولفن وبس شافني سكتن باوعت الهن
وگلت // تصبحون على خير
رحت الغرفتي واجت ضحى للغرفه خلت الجنطه على صفحه والمكياج ع الميز ولبست بدلة النوم الي جبتها وهي تگلي
- الله شگد ذوقك حلو
واتقربت مني وبادلتها بس هالمره مو حب ولا اشتياق هالمره اسقاط واجب لا اكثر

نمنا والفجر گعدت سبحت وصليت وبقيت گاعد وانا افكر بالي صار بيه اباوع الضحى نايمه وجهها كله براءه
اتساءلت ويه نفسي :: معقوله انتي ياضحى معقوله لا لا ما اتصور
:: اذا مو هي منو
بقيت افكر:: يجوز وياي بالدائره
::منو مثلا ؟
:: يجوز منار

هزيت راسي :: اي هي اكثر من مره جابتلي كيك ولفات وابو ايهم دووم يكلي اخذها واكسب بيها ثواب
هي مبين عليها تريدني ودووم اشوفها تراقبني يجوز هي وما منتبه
:: لك انت ظل انطي اعذار الضحى اذا منار ليش ما خلتني اكره ضحى ليش خبلتني بس كون ارجع واشوفها ليش
ما اشوف مروه اله ......... استغفر الله ياربي دخيلك

  ندهت ضحى تسويلي ريوك وبالحقيقه كعدتها بس حتى انزلها هي كعدت سبحت ونزلت وانا بسرعه قفلت الباب
اخذت خاشوگة عسل على ريكي وبعدها شربت ماي
وبديت ارش ملابسي وغرفتي ورشيت الغرفه كلها وبقيت كاعد دخنت جكاره وبدلت ونزلت وياي الجنطه الزغيره
وحتى ما اخليها تصعد كعدت بالصاله وصحت الها

:: ضحى ضحاوي
- ها حبيبي هسه اجيبلك الريوك
:: عوفي الريوك وتعالي
- ها يوسف
انا بابتسامه ورافع حواجبي :: وحده من الصبح رجلها ايصيحها تكله ها يوسف
باوعت // لعد شتكله

:: اويلي امووت على اللعد مالتج هالايام متبغددين
- ههههه
:: گليلي ها حبيبي ها ياروحي
هي بدلاعه // ها حبيبي شرايد
:: لا بس (سحبتها من ايدها )  اكعدي يمي
وصرت ابوسها براسها واكلها :: عجبتج الهدايا
- ايموتن شكرا
:: شنو عجبج اكثر شي

- صاير وكيح تعرف شنو
غمزت الها ::بدلة النوم مو
حضنتني // ايي تخبل وذووق
:: تستاهلين شكم ضحاوي عندي
  صرت ابوسها وهيه تكلي //لا يكعد بسلم ويشوفنه
  ::  خلي ايشوف قابل انا بايك

صارت تبوس بخدي اتنفست وحچيت :: ياالله لازم اروح اتاخرت
- والريوك
:: ياريوك بس ابقى بعد شويه اقترف جريمه فووك بالغرفه ويجوز بعد ما اداوم
- علوا يوسف تبقى
:: حبي ما الحك محتاجه شي ياروحي
- سلامتك

بستها وطلعت ركبت السياره وانا حانق على نفسي رحت للدائره وباشرت شغلي تفكيري بكلام السيد لاتاكل من
الناس الي تعرفهم
خلص الدوام وطلعت ركبت بالسياره وكلت اروح البيت سالم اسولف اله واسبح عدهم
:: لا شلون يصير ومنو يگول ما سماح بروحاتها للبصره سوتلي سحر
::كافي يوسف لا تخلي اعذار اهم شي تكمل العلاج وبعدين يصير خيير
::اي اروح للحقل اسبح أأمن الي ومحد يسالني

واتذكرت مروه وشنو راح تتصرف من تشوفني وشلون تعاتبني وقررت اسكت وما اعتذر الى ان اكمل كل شي
اكيد راح ارجع الطبيعتي

نزلت يم محل يبيع ادوات منزليه واخذت طشت وسطل ورحت للحقل ونزلت من السياره فتحت الباب شفتها متمدده
ومحمد نايم هي بس شافتني جفلت وگعدت على حيلها ما باوعت بوجهي طلعت من الغرفه بدون اي كلمه چانت
لابسه دشداشه سوده بصراحه اتفاجات من هدوئها وسكوتها اتوقعت تعيط تسب تبجي او حتى اتعاتب لكن كل
هذا ما صار  بقيت ساكت ما حچيت ولا لحگتها

طلعت رحت للسياره واخذت السطل والطشت وسبحت وشمرت
الماي بره رجعت للغرفه وشفتها واگفه بالمطبخ رحت للسياره نزلت جنطة الملابس خليتها وطلعت

مريت على بشير سولفنه شويه وصيته وطلعت بالطريق نزلت يم مطعم اتغديت وشربت چاي ورحت للبيت

ضحى كلتلي // اصبلك غدا
::لا ماكل بالدائره
- بس مو چنك اتاخرت
اتقربت يمها وانا ابدي اكسر ظهرها :: مو چنج هالايام هواي اتحققين وياي
هي باستغراب //ليش انا شنو گتلك ؟

رديت عليها بعصبيه //اتاخرت وين رحت وين اجيت هاي بطليها
اجت امي على صوتي //خييير يوسف شبيك
اتذكرت السيد وانو انا لازم ما ابين شي  جريت نفس قوي // لا يمه ماكو شي بس ضحاوي خايفه عليه تسالني
ليش اتاخرت عبالك طفل جاهل
امي // غيير تخاف عليك صدك يمه جاي تتاخر هواي

:: صحيح حجيه هالايام اتاخر لان عدنا لجنه مالت جرد ولازم نكون وياهم هسه جماعتي بقوا وبس انا
رجعت لان تعبت
امي // اسم الله عليك يمه منين تعبت
:: معدتي وراسي
- دياالله اصعد اسبح وانزل اتغدا
:: لا حجيه جابولنه اكل بالدائره ما اشتهي
- يمه مو گلنه الاكل بره مو زين عليك

::حجيه جابولنه دجاج شوي انا اكلت شويه
- بالعافيه يمه
:: الله يعافيج اروح ارتاح
- اي يمه بس انا يوسف ما اقبل تزمخ على ضحى
اتقربت وحضنتها :: هو انا شعندي غيرها بس هالايام كلش هوااي تسأل وتتقرر
امي // غير تحبك
:: وانا اموت عليها عبالك مسويتلي سحر

امي نكتت دشداشتها // ياستار سحريش بس ضحى الواحد مجبور يحبها اخلاق وتربيه وجمال
انا بابتسامه ::ها يمه تره انا ابنج
امي // وضحى بت الغاليه كافي تحبك وتموت عليك
:: وانا اموت عليها
ابتسمت وصعدت ورحت بدلت واتمددت وانا اسال نفسي ::معقوله امي هلگد تحب ضحى
:: يعني تدري بيها هي مسويتلي العمل وساكته
:: وليش ما امي هي وياها مسوايات العمل بس حتى اكره مروه

اتحسرت وانا اتذكر مروه الي ما باوعت بوجهي وانا عبالي بس تشوفني تظل تعيط وتحچي وتلم عليه الناس لكن هي
سكتت ياترى خوف مني لو شنو ؟
حسيت بضحى اجت انا غمضت  عيوني وهي اتمددت يمي ضحى الي هاي اكثر من سنه ما اشوف اله هي وشنو
تريد يجرالها ضحى الي ابد ما سالتني على مروه وعلى ابني ولا قارنت نفسها بيها رغم هي مو مثل مروه
اقلها مروه ام ابني وازغر من ضحى واثقف واحلى

ما اعرف ليش متاكد انو ضحى وامي الهن يد بالي صارلي لان انا صرت اشوف ضحى مثل قبل ما اتزوج مروه
يعني بت عمي وبت خالتي وزوجتي الي انفرضت عليه والي ما اعرف احبها او لا

وصرت افكر بمروه واتمنى ارجع يمها مو حتى اجزعها وتعوفلي ابني وتروح لا اصلا خفت من فكرت هالشكل خفت 
انو ممكن تروح وتتركني بقيت داير وجهي ومصطنع النوم ساعه وگعدت ولگيت ضحى گاعده ع الكرسي گبال المرايه
يمكن تتمكيج هي باوعتلي وضحكت
لابسه دشداشه ربع ردن وصدرها دلع اجت يمي وكالت

- مبين تعبان
هزيت راسي :: اي كلش تعبان
حضنتني وهي تگلي // يوسف شبيك
:: ما بيه شي معدتي حييل ماذيتني
- اشو ما اشوف علاجك
:: كملته وماكو فايده لازم اراجع طبيب ثاني انزلي سويلي چاي
- هسه وكت عشا ياچاي هذا

:: وينچ او وين العشا بعد وكت راسي اياذيني انزلي وانا جاي وراج بس اصلي
هي بدلت لبست تراك طويل ونزلت وانا رحت قفلت الباب ورشيت الغرفه  وبعدها اتوضييت وصليت  واخذت
خاشوگة عسل ونزلت
وراها لگيت امي كاعده بالصاله وبسام يمها گاعد شفته مبدل سلمت وسالته
:: ها وين اشو مبدل
- طالع ويه الشباب شويه وارجع
::بسام انت تدري انا ما اقبل بطلعات الليل
- هاي شنو يوسف تره كبرت مو زعطوط

امي // هاي صايره موده هالايام الي نحاچي يگول كبرت مو زعطوط
بسام بضحكه // شنو يمه شايفتني زعطوط العب بالشارع
امي هزت راسها // اي ما اشوفك اله هيج
:: بسام دير بالك واختار اصدقائك زين ما تعرف شنو الناس
- اي ان شالله تأمر أمر

جابت ضحى الجاي وكالت // بدل ما تطلع ويه صحبانك روح ويه اخوك للطبيب
بسام // ليش شبيك يوسف
ابتسمت بوجه ضحى وگلت :: لا شويه معدتي ماذيتني
بسام // ياالله خلي نروح هسه
دخنت جگاره // لا خليها باچر
بسام باوعلي // صدك يوسف شفت سالم (باوع الامي ) يمه هواي يسلم عليج انتي وضحى

امي // وهو شبي مكسوره رجله ما يمر خلي ايولي
ضحى // هو خاله مكسوره رجله لو ما يكلف نفسه حتى يخابر
جاوبتهن :: كلمن وظروفه
بسام سالني // يوسف انت تدري باام مروه اتوفت
الكل اتفاجأ باوعتله ::منو گلك ؟
بسام // سالم گال قبل عشرين يوم متوفيه وهو رايح للفاتحه وماخذ مرته

امي سالتني // وانت تدري ؟
جريت نفس وكتلها :: بعدين دريت
- ها واخذتها الفاتحة امها
:: لو ماخذها ما چان سالم گال البسام
امي باستهزاء // چا ليش ما اخذتها ؟
بسام // المفروض من ياخذ مرته انتي تروحين وياها هاي الاصول

امي بعصبيه // ولك ابسيم ما تعرف تحچي وين اروح
بسام راد يرد عليها بس هي سكتته // كافي كافي تريدني اروح للفاتحه وهم بدربي اتشكرهم على سواية ابنهم
بسام // يمه ما كلت شي بس هم الاصول هي مرت ابنج
امي // لا مو مرته هي فصليه لو اريدها چان رحت وشفت ابنه لو گتله جيبه خلي اشوفه وانت مو تعلمني الاصول

بسام // بس انتي لازم ترحين وتشوفينه هذا حفيدج
امي هزت راسها // لا اريده ولا اريد امه

من سمعت كلام امي من گالت ما اريده انقهرت على محمد يعني اذا عافته مروه وراحت شلون راح يتربى ويه
امي وضحى وگفت اخذت السويج وضحى كالت
- وين رايح راح اصب عشا ،
:: ما اشتهي اخذت شويه عسل
بسام جاوبني // انتظرني طالع وياك عود خلولي عشا

طلعنا وركب بسام وانا صرت اسوق وادخن بسام كسر السكوت // يوسف مو تگول معدتك اتاذيك تره من الجگاير
هزيت راسي بسام استردف // اي لازم اتقلل منها
::ان شالله
بسام //يوسف لاتزعل من امي تره مقهوره على الي صار بازهار الله يرحمها ولو انا اشوف مروه مو طرف
بالمشكله بس هاي امنا ومحروك گلبها على بتها ولازم ندير بالنه عليها

جاوبته :: وانا ما مسوي شي
- مو شفتك ضجت من تحجي على مروه
سكتت هو گال //شنو يوسف اتحبها
ما جاوبته بس كلامه صحى بيه شي وگفت نزلته يم الكوفي هو گلي //  يوسف حچيت وانت ما رديت عليه
جاوبته :: انا ما ضجت من امي لان حچت على مروه بس ضجت من گالت ما تحب محمد

بسام // صدگني ما تقصد بس ما تعرف تعبر
هزيت راسي ::لا بسام تقصد لان كلامها اجه بسرعه بدون تفكير او شراء خواطر
بسام // يوسف الله ايخليلك محمد وان شالله يصيرون اخوان اله وانت هم لازم تغير من تصرفاتك ويه مروه
باوعتله باستغراب ::شقصدك بسام

- قصدي سالم گلي على الي سويته وشلون حرمت الام تشوف بتها وكلامك السالم واتهامه انو جبان وكلامك
ويه اخوانها يوسف تره انت غلطان وغلطان هواي لاتنسى هي ام ابنك ابنك الي شايل اسمك والي ضحى صار الها
سنين ما گدرت تخلف ولد او بنيه
:: بسام هذا رزق الله
- والنعم باالله ما گلت شي ضحى ما يصير عدها قسمة الله والله سبحانه انطاك بديل ورزقك
(باوعلي بسام وگلي ) انزل وياي شويه غير جو

:: لا راح افتر لان ضايج
بسام // لا تضوج الي صار لا بيدك ولابيدها الي صار مكتوب على ازهار مثل ما انكتب على مروه
جاوبته :: وازهار ماتت
بسام باستهزاء // وليش مروه هسه عايشه

دار وجهه بسام ودخل للكوفي وانا مشيت بالسياره صرت افتر وانا استرجع كلام بسام واتذكر كلام ماهر وغدير
بت زهره ومرت عمي وسالم وام بشير وقاسم صرت اخذ شهيق وزفير ما اعرف شنو صار بيه يمكن تانيب.او
صحوة ضمير او يمكن خوف

رن نقالي باوعت شفت رقم السيد رديت :: الو هلا بيك سيد
- اشلونك يوسف
:: الحمد لله شويه احسن
- الحمد لله شنو سويت -
::مثل ما گتلي بديت بالعسل ورشيت الغرفه وسبحت
- وشغلت قران
::هاا لا والله نسيت
- شغل عمي خصوصا سورة البقره

::ان شالله
- شنو الي صار وياك
:: سيد خلي يكمل العلاج واسولفلك
- براحتك وان شالله خير
:: ان شالله
- فيمان الله
::الله وياك

السيد //صدك يوسف مثل ما وصيتك اتصرف طبيعي
::شقصدك سيد ؟
- اقصد اتصرف طبيعي كدام اهلك وبالدائره
:: ايي ايي انا هم هالشكل اسوي
- تمام فيمان الله
::سالم الله وياك

سديته من السيد الي عرفته هو يريد يفهمني تره كل الي چنت بي سببه من بيتي وبيتي منو بي بس امي وضحى
بس ياويلج ياضحى اذا انتي وبعلم امي اله اموتج خلاص
رجعت للبيت ولگيتهن گاعدات انا سلمت ::السلام عليكم
امي //هلا يمه شنو وين رحت
::وصلت بسام وبقيت افتر
ضحى //خلي اروح اصبلك عشا
::لا ما اشتهي معدتي ماذيتني وبعدين انا ما اكل بس روبه

- اي هي روبه وشويه خبز قابل تبقى بدون اكل
:: عود صعديلي فواكه
امي // يمه يوسف لا تسكت رووح للطبيب
:: اي ان شالله بهاي الايام اروح لان تعبان حييل
صعدت وانا احچي ويه نفسي :: يعني معقوله يمه جاي تغشمين نفسج لو صدك ما تدرين

بقيت افكر واتذكرت مروه گلبي صار ايدك من جبت اسمها رجفت اتمنيت اروح الها اشتاقيت الها
اجت يمي ضحى بادلتها الحب وانا اشوف صورة مروه مو صورتها وقررت اروح الها واعتذر منها وشنو تريد
اسويلها بس حتى احميها من ضحى وامي الصبح نفس الشي انزلها بحجة تسويلي ريوك وابقى ارش الغرفه واخذ العسل
وره الظهر اروح للحقل اسبح
واشمر الماي وانا اشوف مروه بس ادخل هي تحاول تطلع بدون ما تحجي ولا تسلم عليه ثالث يوم قررت اعتذر
منها وحتى لو تريدني اطلگها اطلكها واخلي محمد عدها واجيبه من يصير عمره ست سنين لكن انا مجرد التفكير
بان مروه تطلب الطلاك هذا الشي يخوفني

مو لان تاخذ محمد وياها لا هي امه اكيد تحبه وتحن علي وهم اعرف بامين وصادق خوش ولد المشكله بيه انا
انا ما اگدر افارك مروه
رحت بوجهي سبحت وبعدها دخلت للغرفه هي بس شافتني طلعت هالمره راحت للزريبه مالت العجول اعرف بيها
حتى ما تطيق تشوفني طلعت ورحت وراها وانا شايل محمد لگيتها گاعده على كومة قش هي من شافتني فزت ويمكن
خافت اتقربت منها انطيتها محمد وحاچيتها

::انتي الج حق شتشوفيني ما راح اگلج اسف ولا اعتذر منج لان ما يوفي دمعه من دموعج انا اگلج انتي شتردين
يجرالج اذا تردين اطلگج انا حاضر ومحمد يبقى عندج يصير عمره ست سنوات اجيبه يمي بس اخلي يجي وتشوفينه
هي مدنكه رديت حاچيتها :...مروه لا تبقيين ساكته انا جاي اتعذب

من گلت اتعذب باوعتلي وتريد تحچي بس سكتت لان اعرف كلامي مو بمحله يعني انا الي اعذبها شلون اتعذب
جريت نفس وگتلها :: ما اجبرج على شي انا اذيتج هوااي وعذبتج وحرمتج وصدگيني حقج من تشوفيني عدوج
بس اريد اگلج شي واحد انا يامروه من جنت ااذيج واعذبج هذا الشي مو بايدي صدگيني
واي شي تطلبينه انا حاضر واسوي وانا ممنون بس الله يخليج بداعة حمودي لا تبقيين ساكته

هي باوعتلي وگالت = ما اريد منك شي
وخلت وطلعت انا اتفاجآت مروه ما طلبت الطلاك ولا حچت ولا عاتبت ولا دعت عليه واتحسبت معقوله مروه
تحبني مثل ما انا احبها اي انا احب مروه واموت عليها وصرت اخاف ضحى وامي اسولها شي ايموتنها

گعدت على كومة القش وانا اگول // يوسف انت حقير ونذل وحتى جبان لان ما تگدر تحمي مرتك وتدافع عنها

///////////////////////////////////////

مروه
من عرفت  بوفاة امي انهاريت ودموعي ما نشفن وبقت حسره بگلبي  لان ما شفتها صرت ابجي ليل ونهار
بدون ما اعتب على اي احد ولان عرفت انو يوسف چان هو احد الاسباب بوفاتها زاد حقدي وكرهي اله بگد كرهي
وحقدي على ابوي لذلك قررت انتقم منه
صرت ساكته وبسكوتي اريد اعرف شلون اخذ حقي وحق امي

ما صرت اخابر اخواني لان عاتبه عليهم ما اجو واخذوني لكن من اجتني سماح ثاني مره فهمتني امي الله يرحمها
هي الي ما قبلت يجوون ويجيبوني الخاطر ما ياخذ محمد مني يعني عرفت يوسف جاي يلوي ذراعي بابني

وخابرني اخوي امين وهو يسولف عليه ويبجي وانا بس ساكته ولا عاتبته رغم زعلانه عليهم صحيح ابني عزيز
بس امي اتوفت وانا ما شايفتها  وهذا الشي خلا جرح بگلبي مستحييل يندمل

فد يوم جنت بالحقل احش للعجول وابني يمي شفت خيال واگف يم ابني عبالي يوسف درت اتفاجأت بولد شاب چان گاعد
مقابيل محمد ويضحك بي انا خفت لا انرعبت چنت لازمه المنجل اتقربت وگتله بنتر = منو انت وشعندك هنا

هو ابتسم وگلي // لا تخافيين مني شفت محمد وجيت اخذه من الشمس
من سمعت يعرف حتى اسم ابني خفت حاچيته بعصبيه = انت منو
- گتلج لا تخافيين انا سجاد اخو بشير
باوعتله وهدأت ورديت = بس بيت اخوك اهناك مو اهنا

هز راسه //اعرف بس من سوالف امي حبيت اشوف هاي الانسانه الي تمتلك كل هذا الصبر
بصراحه ما ارتاحييت الكلامه رغم باوعتله شاب مرتب رديت علي بثقه = مو بس صبر وقوه وقساوة گلب

يمكن اتفاجأ بكلامي ما انطيته مجال يحچي = رووح البيتكم لان الي يشوفك ما يكول اخو بشير وعيب تكون السبب
تگطع خبزة اخوك منا
هو راح بعد ان اتقرب مني وهو يبتسم وكلي //انا اسف اذا ضوجتج

ما جاوبته وراح وره الظهر اجت عليه ام بشير وهي جايبه علاكه بيها فواكه وحلويات سلمت عليه //اشلونج خاله
جاوبتها =الحمد لله الله يسلمج
-وحمودي شلونه
= زين الحمد لله
- هاج حبيبتي هاي الحمودي

= شنو خاله امس ابو بهاء دز بيدج مسواك
- لا هذني مو من رجلج ذني من سجاد ابني
استغربت لكن اخذتهن رغم كارهه هذا الشي گتلها = شكرا خاله لا تكلفون نفسكم تره كل شي عندي

- بالعافيه ياروحي وشنو تحتاجين بس گولي سجاد يجيبه الج
جاوبتها =وليش سجاد خو ابو بهاء ؟
ام بشير // انتي ما تدرين مو سجاد راح يستقر اهنا يعني يروح ويرجع هو كمل كليته وتدرين ما يرتاح
اذا انا مو يمه
جاوبتها = يستقر اهنا ؟

ام بشير هزت راسها //ايي مو بشير راح يشتري بيت بالولايه ومرته تروح هناك هي وجهالها وسجاد يبقى بين ذاك
البيت وهنا تدرين لا شغل ولا وظيفه بهالبلد
= ادري خاله الله يوفقه ويتوظف
-بعد عمري عاد كال اجي اهنا اساعد بشير ومن يروح البيته ابقى يمج

چان من يجي سجاد حتى يشوف امه ما اشوفه لان يجي يبقى بالبيت او ياخذ السياره ويروح بيها للسوك يعني
ما ملتقيه بي والصراحه من شفته بالبدايه خفت احد يشوفه ويتقول وبعدها ما اهتمييت الوجوده لان بالاساس
انا ما اعرفه ولا احب اعرفه

واجاني يوسف وبدا سمفونية الاعتذار وهو گلي شنو اريد هو راح اينفذ لكن انا بيني وبين نفسي استهزأت بكلامه
ولان اعرف بي هو مو صاحب كلمه لاهو انسان متذبذب كل ساع براي لذلك انا اعرف بنفسي خسرانه من اول
ما قبلت ان اكون فصليه

وهذا كله بسبب سلبية امي وتجبر ابوي لذلك قررت انتقم من يوسف بس انتقامي راح يكون مثل لدغة الحيه
يعني اصبر اصبر وبس تجي الفرصه المناسبه راح انقض على الفريسه وتكون لدغتي هي نهاية
تسلط وطغيان وجبروت يوسف
//////////////////////////يتبع
القصه شارفت ع النهايه واذا ما عجبتكم لهنا واوقفها بانتظار ارائكم
تحياتي #آنيين الليل #