رواية بعد فوات الأوان الفصل الثلاثون 30 - بقلم آنين الليل

جهاد
من اتوفت ام امين وما اجت مروه وبعدين عرفت انو زوجها مانعها او ما قابل تجي وهي ما تعرف
بوفاة امها
حقدت علي يمكن اكثر من امين وصادق وحتى اكثر من حقد مروه من تعرف انو هو السبب
ما خلا امها تشوفها

چنت اتمنى ارتكب بي جريمه اكتله اخطفه لكن ارجع واستغفر ربي لان هو زوجها وانا مو خوان حتى اخون
عرض صديقي

ومروه ظلمها ابوها وجمال وكمل عليها يوسف والظلم بشع ابشاعة امي من قشمرت ابوي وضحكت
علي وبعدين تركتني انا واختي وراحت اتزوجت صديق ابوي اگللكم شي

انا ما شفيت غليلي من امي وما ارتاح اله اقضي عليها لكن الي مصبرني عن هذا كله هو (مروه )
والي مر بيها من قهر وظلم وكسر خاطر

ومن رحنا للاربعينيه چنت اتمنى تجي واشوفها  من بعيد واطمن عليها لكن هي ما اجت واكيد منعها
يوسف لان حسب
ما يگول فصليته وزاد حقدي اضعاف وانا اشوف الولد والبنات من يبچون على امهم ينادون باسمها
على اساس هي
الچبيره ولازم تكون ابمثابة الام  لكن ظلم البشر وجبروته هو الي منعها ان تجي مثل ما منعها ان
تحضر فاتحة امها

چنت ما افارك امين ولا امين يفارگني وحسيت نفسي مسؤول عنهم اكثر بعد وفاة امهم وغياب ابوهم
وبنفس الوقت اشوف نظرات زينب ولمعة عيونها من تشوفني ومن تروح للمدرسه وهي تحاول من تشوفني
تباوعلي وتدنك ومن رحنا المروه لمن ولدت ابنها بوكتها انا انسان محبط واتمنيت الموت لان عرفت مستحييل
مروه تكون من نصيبي

صرت اسوق ولابس نظاره سوده بس حتى لا ينتبه امين على دموعي ومن شفناها ورجعنا وبالطريق نزلنا للمطعم
اشوف زينب تحاول تلفت نظري وبعدها من تمرضت امها ومن اتوفت

حاولت اقنع نفسي على زينب خصوصا وانا اعرفها واعرف اخلاقها وبنفس الوقت هي حلوه كلش ومؤدبه وزغيره
حتى مرات من ابقى ابحدي الشيطان ايوسوس الي على انها اخت مروه واصير اگدر اخذها واتشوفها
او تتصل عليها لكن ما گدرت ما گدرت اخون صداقتي وخوتي ويه امين واظلم زينب وياي

ومن خطبنا الامين وزينب تحاول ان تجذب نظري لكن هي ما تعرف بالنار الي تسعر بگلبي وقررت
اخلي حد الكل هذا الشي وبعد ما اخليها تتأمل انو ممكن يصير ابيناتنا شي

وره زواج امين عزمتهم كلهم يعني امين وزوجته وصادق وزينب وعلاوي اخذتهم للعشار وهناك
گعدنا بمطعم راقي طلبنا عشا واتعشينا وبعدها طلعت هديه قطعة ذهب عباره عن مداليه بيها اسم امين
وقدمتها الزوجته
هي امتنعت او خلي انگول خجلت لكن امين گللها //ولاء اخذي هديتج هذا الي تشوفينه هو اخوي او ولي
امري او خلي  اگلج هو اخونه كلنه ومسؤول عنه

جاوبته // الله يخليك هذا  من حسن ظنك
امين // لا حقيقه هاي انت سويت الي ابوي ما سواا كبرتني  وعلمتني وشاركتني وكل هذا الخير بفضل الله وفضلك

بذيج اللحظه كرهت نفسي شلون انا افكر بمروه وهي عرضي لكن المصيبه مو بايدي ولا بايد گلبي
مروه عايشه بكل جوارحي ابين عيوني وبدگات كلبي بعقلي بروحي جاوبته // الله يخليك امين ما مسوي شي
امين // لا والله كل شي سويت علمت ودافعت وشجعت
صادق // وآن الاوان نزوجك ونرتاح منك

باوعت الصادق وانا ابتسم واختلس النظر الزينب الي صار وجهها احمر من الخجل وقررت اخليها تقطع الامل
مني نهائيا وما تفكر بيه اله كاخ وبس جاوبته //توكم تگولون اخونه ومسؤول عنه
صادق // اي صحيح
- - تمام لازم اول افكر ازوج اخوي الوسطاني الي هو انت واطمن على اختي وتاج راسي زينب تكمل دراسه
ويجيها ابن الحلال الي هي تختاره بس ها لازم اخلاق وشهاده (باوعت الامين وابتسم ) خو مو نكبر ونتعب
وندخل كليات وننطيج الواحد ماعنده شهاده وبعدها علاوي

صادق //اگلك جهاد اذا تبقى ما تتزوج على ما يتخرج علاوي ويتزوج انت ذاك الوكت لو مجلوط لو بالفتحه الخامسه

الكل ضحك وانا اشوف زينب شلون تبدل فرحها الى حزن بس بيني وبين نفسي ارتاحييت لان ما املتها ولان خليتها
تعرف انو هي بمثابة اختي ولا يمكن افكر ارتبط بيها
صارت زينب  وهي رايحه للمدرسه من تمر من يمي مدنگه وتمشي بسرعه وعرفت بمرور الوقت هي نست كل
شي حلمت بي لاتنسوون هي شابه واكيد النسيان سهل بمثل عمرها

چنت اگضي ليلي مثل الملدوغ كل ساع يطفر انا هالشكل ما مستقر احبها المروه بس مستحييل تكون من نصيبي
اله بمعجزه

ودووم اروح يم حجي عبد وهو يقتعني اتزوج ويحلفلي انو مجرد ما اتزوج راح انسى مروه
لكن هذا الشي  چان يخليني اعاند وابقى متأمل  لان مجرد فكرة النسيان انا حاذفها من قاموس تفكيري

حجي عبد مرات يصير عصبي عليه ويغلط ومرات يكون حنين ويگلي خايف عليك
ومن ارجع من يمه اسد عليه الباب وابقى ابچي مثل الطفل الجاهل وانا احس بمروه عايشه وياي
هي تحضني وتمسد على ظهري وتكلي اسكت لاتبچي وتنيمني والصبح قبل ما اطلع للشغل اشوفها تبتسم
الي وتدعيلي بالرزق

انا اتخيل مروه وياي بكل لحظه وصدگوني انا ما اعرف سبب تعلقي بيها
اقصد يعني هواي  ناس حبت وبعدين نست او اتناست ليش انا مو من هاي الناس
بيوم رحت على امين شفته ضايج سالته // خيير شكو
باوعلي وعيونه مليانه قهر. رجعت سالته //شكو امين
اتحسر وكلي//  مروه ما تخابرني مثل قبل ولا تحچي وياي
- - معقوله من يمته
امين وهو مدنك // من عرفت بوفاة امي من راحت يمها سماح حچيت وياها وبعد ما خابرتني

- - يجوز زوجها شاف التلفون
هز راسه // لا ما اتصور  لو عرف چان خابرني
- - زين ما سالت اختك
- - تقصد سماح اي دووم اسالها تكلي ماكو شي بس مروه ساكته حتى من تروح يمها كلامها صاير
قليل حتى سماح تكول خايفه عليها بس ساكته ودموعها تنزل

جاوبته بخوف // اكيد مصدومه خلي  من تروح تقنع  تفتح تلفونها وانت اتصل او خليها تتصل
من تلفونها وحاچيها
امين // حاولت بس مروه ما تقبل
اتحسرت وكتله // امين لا تخاف مروه مصدومه تره الي مر بيها مو شويه

- -ما اعرف جهاد ابالي اروح واشوفها واجيبها هي وابنها والي يصير يصير
- - وانا وياك بس تتصور هو هذا حل
باوعلي وسالني // گلي شسوي محتار
- - لا تتهور امين اختك فتره وترجع هي الله يساعدها الي صار بيها مو شويه

امين // وليش احنه الي صار بينه هيين هي زعلانه علينه لان ما اجينه انا وصادق واخذناها
وانت گدامك سمعت امي الله يرحمها هي الي ما خلتنه نروح لان تعرف بنفسها هي منتهيه ومن تجي مروه
راح تخسر ابنها للابد
نفخت // ايي اعرف وهذا الحقيير رجلها يرادله واحد ايعلمه
امين // والله ياجهاد انا مو قليل شر بالي اياذيني لكن وصية امي مربطه اديه ورجليه

- - على كيفك اكيد  نلگالها حل انت بس اتوكل على الله
- والنعم باالله صدك جهاد هم سديت من فلوس حجي عبد
هزيت راسي // ايي سديته وكل شي مسجله بقى علينه مبلغ بسيط
- - الحمد لله والشكر والرجال ما قصر ويانه

- - لا والله ما قصر
- - وانت هم شد حيلك بيتك وكمل واثثته شد حيلك خلي نزوجك
هزيت راسي // الله كريم يصير خيير

امين ما لح عليه وبسكوته اعرف بي هو حاس انو انا لازلت (استغفر الله ) بس هذا الشي مو بيدي
يمكن لو مروه مرتاحه ويه زوجها وعايشه حياتها مستحييل افكر بيها بس هي متعذبه وغصبن ما
عليه افكر بيها

رجعت للبيت الي من اثثته كانما اسال بيها وهي تهز براسها وتبتسم يعني اي
واذا ما قبلت على شي تهز اصبعها يعني لا
بعمركم شفتو واحد بجنوني طلعت تلفوني وانا حافظ رقمها مو بس بالجهاز ناقشه بگلبي اتجرأت وكتبت الها

مروه انا جهاد ليش جاي اتعاقبين بامين هو ما سووا شي ما رادج تخسرين ابنج مثل ما خسرتي امج
اعذريني لان كتبتلج وهم خلي اگلج امين اذا يعرف انا مراسلج راح كل اخوتنا وصداقتنا تنتهي بس انا شفته
يتعذب وقررت ابلغج

شفت الرساله ما وصلت اكيد  مغلق واعرف هذا الي سويته اكبر غلط بحق اخوي وصديقي بس انا ردت مروه
تتصل وتحچي ويه امين لان خفت عليها وهم كان عندي امل ترد عليه لكن لا حياة لمن تنادي وهذا الشي شغل
بالي وفكري 

مرات افكر اعرف عنوانها من سالم واروح بس اشوفها لكن چنت خايف عليها اكثر مما خايف على نفسي
بس ارجع واگول
هذا الشي الي جاي يصير وياها ظلم ولازم اساعدها وقررت اعرف احوالها حتى لو من بعيد

بعد اسبوع شفت سالم اجه يم امين انا اخذتني رجليه يمه ورحت اسلم علي وگعدنا بعدين عزمتهم ع الغدا
واثناء الكلام امين ساله // شلونها مروه ؟
سالم هز راسه وگله //راحت يمها سماح
- - وانت من وديت سماح ما شفتها
- - شفتها وسلمت عليها هي ردت وبعد ما حچت اي شي
- - شنو يعني ؟

سالم // خطيه مصدومه من وفاة الوالده
- - اي وابن عمك  ما قصر وياها
سالم // امين تره يوسف حس بغلطه وحتى گللها بعد لا تطلعين للحقل لكن اختك ما جاوبته
امين هز راسه // ما اصدك يوسف اتغير
سالم // هو مو اتغير لكن حس انو غلط من ما خلاها تجي للفاتحه

انا اتدخلت // يعني سالم اذا هيج حس بغلطته چان ممكن يخليها تجي وتشوف اخوانها
سالم // والله ما ادري يوسف مره تشوفونه هادي وزين ومره اموره كلها مخربطه
رديت // هسه هو شله بالحقل ايبيعه ويشتريله بيت
سالم // حتى انا گتله وهو رد عليه بعد وكت بعدين
سألت سالم // ها هو الحقل زين يعني اقصد موقعه شغله ؟

سالم هز راسه // ايي كلش زين وخير من الله والولد اليشتغل بي خدووم ويعرف بالشغل
امين // بس الي متعذبه بي اختي
سالم // لا امين هي تسولف السماح تگلها من اطلع للگاع ارتاح
جاوبتهم // اي اتغير جو وهم هوا نقي (باوعت الامين ) والله يرادلنه حقل انا وياك امين
سالم وهو يضحك //وانا اشاركم

وبطريقتي عرفت عنوانها وقررت  ثاني يوم اسافر اروح اشوفها حضرت نفسي على اساس اغبش وبنفس اليوم
هي فتحت النقال وشفتها استلمت الرساله الي صار اكثر من اسبوع راسلها انا اتشجعت وكتبت الها
اشلونج مروه انا جهاد صديق امين
اتفاجأت من ردت عليه وگالت =هلا جهاد
- - اسف كتبت الج بس تره امين مقهور حييل ياريت تخابريننه

ما ردت رجعت كتبت الها //الخاطري خابري
ردت عليه = ان شالله
اتشجعت وكتبت الها = مروه اعرف بيج كلش متعذبه واتمنى اساعدج وادري هاي كتابتي الج خيانه للاخوه الي
بيني وبين امين بس الله يشهد عليه من راسلتج الخاطر امين وهم اريد اطمن عليج لان انا يامروه احس بنفسي
مو غريب والي يجري عليكم يجري عليه لذلك اعتبريني مثل امين انا سندج وبظهرج وشنو تردين ترخص لج الروح

شفتها ما ردت عليه  وبليلتها ما نمت وصرت ابچي واندب حظي وثاني يوم الصبح چنت متردد اروح واشوف امين
لان اعرف بنفسي غلطان لكن مو بيدي ياناس ياعالم مو بيدي
لحد ايلومني رحت وصلت يم امين وانا عبالك بايك شفته سلمت علي
السلام عليكم
هو وكف وهو مبتسم // عليكم السلام هلا جهاد
- هلا بيك اشلونك
- انا اليوم زين كلش
باوعتله // ياالله فرحنا
امين // البارحه مروه اتصلت بيه

من سمعت بالخبر وشفت فرحة امين فرحت الفرحته ودمعت عيني لا ارادي هو بس شافني وصل يمي
وحضني وگلي
- - جهاد الله يرحمها حاس بيك بس هذا قدرها وانت هم لازم تفكر بنفسك
هزيت راسي // ان شالله
- ان شالله

بقيت ما اتصل بمروه ويوميه اباوع الرقمها واتمنى اراسلها لكن ما اكدر لان اعرف هذا الي اسوي قليل بحق
امين الي يشوفني اكثر من اخ دخلت واكلت وشربت وعرفت كل اسرارهم وصرت حالي حالهم ما افرق
عنهم همه عائلتي الحقيقيه لكن
مو بايدي ما اگدر انسى مروه وما انساها الاخر لحظه بحياتي

///////////////////////////////

مروه
صار يوسف يجي تقريبا يوميه بعد الظهر ومرات يجي وره العصر ويبات والصبح يروح يحاول يرضيني يريدني
احجي او ارد لكن انا نفس ما انا من يجي احضرله اكل بدون ما يكول ومن ايقرر يبات افرشله وبيناتنا محمد
من يجي ما احاول اگعد يمه ولا اباوع اله ومره اجتني ام بشير وكالت

- - بشير يگول بعد ام محمد لا تطلع وتحش
باوعتلها = ليش خاله
- - ابو محمد مخابره
هزيت راسي = لا خاله انا من اطلع ارتاح وهم على مود ابني الشمس زينه اله واريده ايشم هوا نقي
- - بكيفج بس تره يوسف حس بغلطته

ابتسمت باستهزاء = وشنو الفايده الصار صار
- - مي خالف خاله وعينج بعين الله
اتحسرت وجاوبت = والنعم باالله

بعدها اجه يوسف العصر وراح شاف العجول وبقى يسولف ويه بشير وسجاد ورجع للغرفه لكاني اصلي وهو هم
فرش سجادته وصلى من كملت رحت حضرت اله العشا وجبت الصينيه خليتها  گدامه واخذت محمد اعشي
بالمطبخ هو گلي :: جيبي عشي وياي

ما جاوبته ورحت للمطبخ ابالي اجيب صحن حمودي واوكله بالغرفه لكن يوسف افتهم غلط اجه وراي وحاچاني بعصبيه
:: ما اعرف شنو انتي شايفتني گدامج احچي ما چني موجود لو اكسر راسج وتردين واصير
مو زين لو تبقيين ساكته لا تنسيين شنو انتي ابد لا تفوتين زايد انا تاركج بمزاجي وارادتي وانتي ترحين
وتردين فصليتي (اتقرب مني )تعرفين شنو. فصليتي لو لا
انا فتحت عيوني مستغربه هو هز راسه بعصبيه

:: ايي ايي اخزريني خفت منج شتردين اسوي اعتذرت ما فاد حاولت اصلح غلطي ما فاد كتلج
اطلگج وروحي ما فاد شتردين فهميني (گالها بصياح )
ماجاوبته اتقرب مني وكلي :: من احجي وياج ردي عليه

اهنا محمد بچى هو اجه يم الكاونتر الي بي المواعين گلبه حييل واتكسر كل شي بي وطلع راح للغرفه
محمد يبجي حاولت اسكته شلته وانا احرك بي لمن ما هدا شويه وكلته وبعدها گعدته وصرت الم بالكزاز وهو
يحاول يجي يلم وياي وانا ارجعه واكعده ما خلاني يريد يلعب حاله حال الاطفال بعمره حركين ويحبون يستكشفون
الاشياء
عفت الگزاز ورحت غسلتله واخذته للغرفه ابدل ملابسه وانيمه دخلت لكيت يوسف متمدد ومخلي رسغ ايده على
وجهه وما ماكل اي شي

بدلت الحمودي وحاولت انيمه. اتمددت يمه وانا اطبطب علي هو نام وانا گمت شلت الصينيه ورحت للمطبخ
صرت اجمع بالكزاز وانا اتذكر كلامه انو انا مجرد فصليته الي لازم اكون مجرده من كل احاسيس البشر
وما الي اي حقوق وبس واجبات عليه لازم انفذهن وياوياويلي اذا حچيت او عاتبت او رفضت

صحيح احس بيوسف شويه اتغير لكن مسرع ما يرجع الحقيقته وانا ابد ما راح انسى شلون حرمني
من شوفة امي  وشلون عذبني ومستحييل اقبل اعتذاره بكلمة اسف ما يعرف انا يوم بعد يوم يزيد حقدي علي
الم بالگزاز  ودموعي تنزل وانا احچي

= يمه مو عبالج جاي ابچي على نفسي وعذابي لا والله يمه جاي ابجي عليج
=. يمه انا المن قبلت واتحملت غير على مودج تالي ترحين حتى ما تانيتي اجي وتشوفيني
= مو انتي الي توصيني وتكليلي اصبري يمه اتحملي مو انا اتحملت كل شي
= هسه وين انتي انا صبرت وانتي عفتيني ااااخ يايمه جمرتج بكلبي ما تطفه جاي تزيد
= سامحيني يايمه سامحيني ياحبيبتي

بقيت كاعده بالمطبخ وانا عيوني غوشن من گد الدموع حاولت اهدا  وبعدها نظفت المطبخ ورحت غسلت اديه
ورحت اتمددت على فراشي ونمت والصبح كعدت سويت ريوك اله هو گعد صلى وبدل وطلع ركب  السياره
بدون ما يحچي وياي ولا يتريك راح وما اجه اله ورا تلث تيام وانا نفس الشي ما اتغير عليه شي بقيت على حالي
ما احجي ويا وهو نفس الشي يجي يغسل ويشيل حمودي ايلعبه

ومن يجي يجيبلي ملابس وجنط واحذيه وانا حتى ما اباوع الهن لان ما احب البس شي هو جايبه
ولو اكو بديل عن الاكل چان ما اكلت من المسواك الي يجيبه
مرات بالايام الي يبات بيهن  يمنا يتقربلي وانا ابدا ما ابادله اي شعور لان بصراحه انا نفسي كرهته
ومجرد ما يجي اتذكر كل شي سووا بيه لذلك ما افكر اسامحه لو بالحلم

مره بالليل يمي سماح الي بدت بطنها تكبر والحمل ماذيها لكن اشوف السعاده والراحه بوجهها چنت
متمدده ونسولف
رحت جبت النقال الي ضامته بعلاگتين وكل فتره اغير مكانه رغم ما صرت استعمله من بعد وفاة امي اله قليل
فتحته حتى اشحنه وشفت رساله جايتني مكتوب بيها اشلونج مروه انا جهاد صديق امين

استغربت جهاد يدزلي مسج ومنين عرف رقمي
جهاد اعرفه واحترمه واله معزه ما تقل عن معزة امين لان هو صاحب فضل عليه من عرف بجمال يتحرش بيه
وشلون ساعد امين وضرب جمال دما وهددا اذا يوصلي ايذبحه خلاص
بس شعجب هيج اتجرأ ودزلي مسج وقررت ارد علي حتى اعرف هو شيريد

جاوبته //اهلا جهاد

وهو فهمني انو لازم اخابر امين وهم طلب مني ما احچيله انووهووراسلني وگلي كلام اثر بيه هواي
كلام المفروض اسمعه من زوجي كلي انو انا شنو احتاج هوموجود

حسيت بكلام جهاد انوحاسب نفسه مسؤول عني وبيومها خابرت اميين الي بس سمع صوتي صار يبچي
ويعاتبني ليش ما اخابره وانا ما طولت ويا حاولت انهي المحادثه باسرع وقت ممكن بالرغم چنت شگد
مشتاقتله اسمع صوته لكن وفاة امي جردتني حتى من عاطفتي ويه اخواني

بعدها سماح  رجعت البيتها وره عشر تيام اجه يوسف قريب الظهر لگاني بالحقل مر عليه وكلي
::بسرعه بدلي الحمودي وانتي هم غيري ملابسج وامشي سماح بالمستشفى
عرفت سماح حان موعد ولادتها
انا بسرعه لبست حمودي وانا بدلت واخذت ملابس الحمودي  ورحت وانا گلبي نار على اختي  ركبت
يمه بالصدر هو خلا حمودي بحظنه ويكله
:: تريد تتعلم سياقه

حمودي يضحك وفرحان لازم الستيرن ويوسف يبوس بي ومن صعدنا الشارع العام انطا الي بقينا ساكتين الى ان
وصلت للمستشفى انطيت محمد اليوسف بدون ما احجي ويا ورحت يمها وانا اشوفها شلون متاذيه من الطلوك
سماح مجرد شافتني كلتلي وهي تبجي من الالم // مروه الحگيني اريد امي
باوعت الها وحاولت احبس دموعي الي صبن غصبن عليه وكتلها = شدي حيلج وكولي ياالله هسه ربج يفرجها عليج

بقت تتالم والطلق يشتد عليها وانا وياها مره امشيها ومره امسح العرك من جبينها واگلها
ادعي الله يفرجها عليج وره اكثر من ساعه ونص اخذوا  سماح الغرفة الولاده وانا بقيت بره وادعيلها الله يسهل عليها
ربع ساعه اجني العاملات وهنه جايبات ولد وانطنه اليه وانا اخذته  وانا ابجي ورحت يمها شفتها تعبانه حييل
وبستها واتحمدت الها السلامه شفت بعينها دمعه عرفت على امي مسحت دمعتها وخليت ابنها بصفها وگلت

= ان شالله يعوضج عن كل الحزن الي مريتي بي
وطلعت شفت سالم ويوسف وهو شايل حمودي سالم يدخن ومتوتر وصلت يمه وانا مبتسمه
= مبروك ما اجاك ولد الله يخلي
سالم بين علي الفرح سالني بتوتر // سماح سماح شلونها
هزيت راسي = زينه الحمد لله
سالم رفع ادينه للسما // الف الحمد لله والشكر يعني زينه

= اي سالم زينه ساعتين ترتاح ونطلعها ان شالله
اجا يوسف وحضن سالم واتبارك اله :: مبروك سالم الله يخلي وتشوف اولاد اولاده
سالم // ويخليلك محمد
:: صدك شتسمي
سالم // احنه اتفقنا احمد
بقينا بالمستشفى ساعتين واجت الطبيبه الي شافتها وگالت // امورها زينه تطلع للبيت

وطلعنا سماح البيتها ومن وصلنه انا اخذتها للغرفه الجوه احسن بدل ما تصعد
وبهاي اللحظه هي اتمددت وانا خليت ابنها يمها وشفت دموعها ينزلن اتقربت منها ومسحت دموعها وگتلها
= لا تبچيين سموحه مو زين عليج امي الله يرحمها ما تعرفين هسه شكد فرحانه
سماح تباوعلي وتگلي//  هسه عرفت شگد امي الها حق من بقت يمنه واتحملت ابوي
جاوبتها = الله يرحمها كافي لاتبجيين
سماح // ولمن تكول خلو مروه يم ابنها

باوعت الها باستفسار هي هزت راسها // چان بنيتي مجرد مايصير هذا الطفل انطي الابو واطلب الطلاك
وارجع الاهلي لكن مجرد ما صار نزل ويا نص من گلبي حقچ يامروه من ما تعوفين يوسف الخاطر محمد
مسحت دموعها وحضنتها وانا اكلها
= وانتي من كل وعقلج تعوفينه السالم صدكيني اذا عفتي الله يعاقبج شوفي الفرحه ما سايعته من طلعت وبلغته صار
عنده ولد ما فرح لمن ما سالني عليج ياالله شفت الفرحه بعيونه سالم ياسماح جوهره ما يتفرط بيها
ياالله سمي واگعدي ارضعي هذا البطل فدوه خالته تروح اله

سماح // لا مراوي اسم الله عليج
گعدتها حتى ترضعه بعدها اندك الباب انا كلت اتفضل دخل سالم الي كلي
ام محمد يوسف رايدج
طلعت وانا حتى الابتسامه نسيتها وصلت يمه هو انطاني محمد وگال :: راح اجيب اكل وفواكه وبعد  شنو اجيب
= عصاير
:: تمام

طلع وانا اخذت محمد وگعدت بالصاله شفت سالم صعد فووك وانا رجعت يم سماح وبايدي حمودي الي يريد يعوفني
ويروح يم الجاهل اجه سالم وهو منزل سرير زغير مال طفل وكلي
- راح انتعبج ام محمد هالايام
باوعتله وگتله=  ليش...شمسويتلكم  واتعبوني اله اذا معتبرني غريبه

- - لا والله اختي قبل ما تكونين اخت سموحه
= تسلم الله يحفظك
سالم اتصل فتح الحاكيه هو كال // اهلا امين اشلونك
- الحمد لله سماح شلونها
- زينه وشرف ولي العهد احمد
امين بفرحه // الله عليك
- اي والله وهاي يمنا مروه ومحمد

انطاني سالم النقال = الو امين
- هلا مراوي شلونج
-= الحمد لله انت شلونك
- زين ماشي حالي اشلونها سماح
= نعمه بخير
- هذا صادق يمي
- ها شالونج يالگاطعه

خفت يجوز صادق يحچي گدام سالم ليش ما اخابرهم
= هلا صدوقي انت شلونك
- زين من سمعت صوتج
= شلونك بالدراسه
- الحمد لله اگلجن اخواتي رحمه الوالديچن وقفن الانتاج شويه مو كل سنه جايبات الجن طفل واخوجن
كل شي ماكو انطيني اسميحه خلي ابارك الها

سماح قبل لا يسلم عليها // ليش تريدنا نوقف الانتاج فوك ما نجيب جهال يرگصون بعرسك
صادق بضحك // وهسه انا اتانيهم على ما يكبرون هو كلمن وحظه اشلونج سموحه
- الحمد لله
- مبارك ما اجاكم
- الله يبارك بعمرك يوم ال الك
صادق // ايا ما تستحيين شنو ترديني احبل هههههههه انطيني رجلج اباركله عيب خلصنا الرصيد وما باركت له

انطت سماح النقال السالم وصادق باركله بعدين امين طلب يحچي وياي جاوبته
= ها امين
- اگلج ما نگدر نجي هسه لان زينب امتحانات هي وعلاوي
= براحتك اموني يمته ما تجون
- اي ان شاء الله باقرب فرصه اجيبها واجي
= براحتك وجيب وياك علاوي
امين / صار اتامرين امر ديري بالج على سماح
= بعيوني

حسيت بكلام امين كانه ابونه وجاي يوصي على بنته واجه يوسف سماح گالت السالم لا يگله خابر امين ومروه حچت ويا
سالم هز راسه وراح يم يوسف الي جايب مشاوي وفواكه وكرزات وعصاىر
وانا رحت خليت العشا السالم ويوسف بالصاله واخذت  السماح بغرفتها واتعشيت وياها

بليلتها يوسف راح وانا بقيت يم اختي اداري بيها وسالم محتار شيسويلها وشنو يجيب چانت فرحته چبيره وهو
يشوف سماح وابنه
ثالث يوم طلع سالم غاب ساعه ورجع وهو جايب مسواك وراح يم سماح وانا اخذت المسواك وصرت ارتب بي
بعدها طلع صعد الغرفته وانا رحت يمها هي راوتني ملاوي اثنين جايبهن وملبسهن بايدها رجع يمنا سالم وهو يخابر

- - لا كله وزعه ع الفقره
باوع النه وكال // هاي ذبحت عقيقه وصيت يوزعوها ع الفقره
= الله يكثر خيرك ابو احمد
- - الله يخليج انطيني محمد اخذه اشتريله
= لا عليمن اشو كل شي موجود بالثلاجه
- - مي خالف شويه افره وارجع

واخذه وانا خليت سماح تنام ورحت ارتب بالبيت طبعا كلش مرتب ونظيف ولان سماح ايدها بي
اجه سالم وهو جايب عشا ويا وجايب الحمودي علاكه بيها العاب وقاط وتراك اتشكرته ورحت خليت العشا وگعدنا
تلاثتنا ناكل وحمودي مكعدته بحظني

من كملنه شلت السفره ورحت اخدر جاي بالمطبخ وسمعت اندك الباب راح سالم وهو يكول
هلا خاله اتفضلو اتفضلو
اسمع صوت مره //  چا وين مرتك
سالم // اي بالغرفه اتفضلو
المره حچت باستهزاء /|اشو گضيتها اتفضلو اتفضلو شنو ما تريدنا نجي

سالم گلها //  البيت بيتج خاله (بعدين صاح عليه ). ام محمد خالتي واختي اجو
طلعت هنه اتفاجان بوجودي انا گلت = حياهن الله هلا بيهن
دخلت للصاله شفت ولد كاعد سلمت = السلام عليكم
الولد وگف = عليكم السلام هلا ام محمد
سالم // هذا بسام عم حمودي
= هلا بيك خويه
جاوبني بابتسامه // انطيني حمودي
اخذه وصار ايبوس بي ويكله // حمودي انا عمك بسام كول عمو كوول

اتقربت من ام يوسف
= اشلونج خاله (وباوعت الضحى ) اشلونج ام يعگوب مبارك ما اجه السالم
ما ردن السلام ام يوسف گالت //ياا هاي انتي اهنا چا منو بقى بالحقل يخدم
ابتسمت باستهزاء وباوعت الها بتحدي بدون ما اجاوبها
ام يوسف فلت وجهها سالت سالم // چا وين ابنك انريد انشوفه
جاوبتهن =اتفضلن بالغرفه

ورحت قبلهن دخلن اثنينهن وانا اشوف الحقد بعيون ضحى ام يوسف من وره خشمها باوعت السماح //ها شلونج
سماح ردت بنفس البرود //هلا
اجه سالم دخل للغرفه ضحى تباوعلي بحقد //سالم ليش ما خابرتنا يعني لو ما بسام گال چان ما ندري
سالم //. تعرفين بيه ابحدي ومشغول

وشال احمد وانطا الخالته الي كالت وهي تباوع السماح // ياالله سلوم لم نفسك حتى تاخذلك مره
سالم باستغراب // اخذلي مره ؟
ام يوسف // ايي تاخذ ثانيه وثالثه خو مو تبقى على الفصليه

سالم راد يحچي بس سماح سبقته // خاله سالم ما ياخذ مره (صارت اتاشر على نفسها ) لان انا مرته وما اشكي
من شي حلوه وزغيره ومثقفه او ولود لو گلتي يوسف من اخذ لان عنده عذره
منا ابن عمنا والسوا (وخزرت ضحى ) ومنا خطيه ما يصير عنده جهال

/////.....///....///...//// يتبع